 |
القصة كاملة
بعد ٤ سنين تعب ومعافرة ..أخيرا اتجوزنا ..انا وآيه حياتي
أكتر انسانه وقفت جنبي وأتحملتني وكانت بتدعمني
باستمرار ..كل ما كنت ايأس ..أشوف ضحكتها بس
ترجع الامل وتديني طاقة اهد الدنيا عشانها
أتخطبنا من سنه ونص ..حصلت مشاكل كتير
بسبب أهلها ..عشان ظروفي الصعبة بس هي
كانت بتقولي مش عاوزه حاجه من الدنيا غير اننا نبقى لبعض
معلش أستحمل انا بنتهم الوحيده ونفسهم يطمنوا عليا
وياسيدي لو حصل ايه انا ليك انت وبس
واتحملت وصبرت وربنا عوض صبري خير
شهر العسل فات بسرعه الصاروخ .
ماهو دا الطبيعي كل حاجه حلوه بتخلص بسرعه د
بس انا وهي اتفقنا أن حياتنا كلها هتبقى شهر عسل
مهمها واجهنا من مشاكل وصعوبات
طالما اننا مع بعض يبقى كله هيهون
من أسبوع كنت راجع متأخر من بره
ولقيتها نايمه .
اسفه يا حبيبي انا تعبت شوية النهارده
ومقدرتش أجهز عشا
ولا يهمك يا روحي ..الف سلامه ليكي
مالك بس
مش عارفه حسيت بشوية دوخه كدا
اوعي يكون اللي ف بالي !
لا أطمن عملت اختبار حمل ومفيش حاجه
وبعدين احنا اتفقنا مش هنخلف قبل سنه من جوزانا
طيب تمام ايه رايك نطلب دليفري
ماشي يا حبيبي اللي تشوفه
طيب نطلب ايه ؟
اممم مش عارفه
انا لقيت أعلان لمطعم جديد ملزوق على أزاز عربيتي
لما نزلت من الشركه
ايه رأيك نجرب أكلهم ..عاملين تخفيضات بمناسبة الأفتتاح
خلاص ماشي يا روحي
طيب انا هاخد دش وأطلبي انتي الاكل .دي الورقة وعليها ارقام المطعم
دخلت أخد شاور ..ومراتي طلبت الأكل
ولما خرجت لقيت الأكل وصل
قعدنا ع السفرة ..عشان نتعشى
الأكل كان لذيذ وكمان مش غالي مقارنة بمطاعم تانية
وانا باكل لاحظت انا ايه فيها حاجة
مالك يا روحي ؟؟
...
ايه ؟ في ايه !!
بتقول حاجة يا عمر ؟
انتي مش هنا خالص في ايه يا قلبي؟
لا مفيش ..بس ..بس اصلي لسه حاسه بدوخه وزغلله
طيب تحبي ننزل نكشف ؟
لا لا مش مستاهلة انا محتاجه راحه وهبقى كويسه
طيب يا حبيبتي كملي اكل
لا انا شبعت الحمدلله ..هقوم اعملك الشاي
فيها حاجة مش طبيعية ..بس مش عارف ايه هي
انا مش هتهوه عن مراتي
فات يوم والتاني وايه لسه متغيرة
يا حبيبتي احكي لي مالك فيكي ايه
برضو مفيش ..نفس الإجابة وبتتهرب مني
أخدتها وكشفت ليها وعملت تحاليل وفحوصات
والحمدلله مفيش حاجة
ساكته ومسهمه وسرحانه ..في حاجة مخبياها عني
حاولت كتير أعرف منها في ايه
وبتقولي مفيش ..بتحاول تخبي عني
بس قلقها وخوفها واضح رغم انها بتحاول تبان طبيعية
في ليلة بتقلب وبحط ايدي جنبي ..ملقتهاش في السرير
قلقت وقومت ..وخرجت من الأوضة بهدوء
لقيتها بتكلم حد في الموبايل
وبتقوله أرجوك ..ابوس ايدك انا ست متجوزه
ومش عاوزه فضايح
...
عشان خاطري انساني
واحنا اخوات
. ..
بس انا مش هقدر اخون جوزي ..بلاش تخرب عليا
لسه هخرج وأواجها ..لقيتها فضلت تعيط
وقفلت الفون وبتحاول تكتم بكاؤها
عشان محسش ..رجعت بسرعه على السرير
وتظاهرت اني لسه نايم
دخلت ونامت جبنبي بهدوء..عشان متصحنيش
كنت سامع صوت نفسها وهي بتنهج وبتعيط
مديت ايدي عشان اطبطب عليها واحتويها في حضني
واقولها مالك ..لكني تراجعت في اخر لحظه
وقولت خليها تيجي منها وتحكي لي لوحدها
صحيت الصبح لقيتها محضره لي فطار
متكلمناش كتير ..بس في نظرة حزن في عيونها
نفسي تتكلم وتقول ..بس مقالتش حاجه
نزلت الشغل ولما رجعت بعد المغرب
لقيتها واقعه ع الأرض في الصالة وقاطعه النفس
جريت عليها بسرعه شيلتها ودخلتها سريرها
حاولت افوقها لكن مفيش
أخدتها بسرعه على أقرب مستشفى
وبعد ما فاقت ما حكتش اي حاجه
كانت ساكته ومش بتتكلم خالص
خير يا دكتور !؟ هي مالها
واضح انها اتعرضت لصدمه عصبية حادة
دخلتها في حالة أكتئاب ..وحاليا هي محتاجه
راحه في المستشفى لكام يوم
طيب حضرتك هي فيها اي شئ عضوي ؟
لا هي تمام ..الضغط والسكر ونبضات القلب مظبوطين
لكن الموضوع نفسي ..هو ايه اللي زعلها للدرجه دي
الموضوع انه....
انه ايه ؟؟
لا مفيش حاجة يا دكتور
طيب على راحتك عموما لو حبيت تحكي في اي وقت
انا موجود
شكرا لحضرتك
كل يوم والتاني حالتها كانت بتزيد سوء
مش عارف ايه جرالها
يمكن يكون الحيوان اللي كلمها هو السبب !!
اكيد هو ..انا غبي انا مسألتهاش من البداية
واستنيت انها تحكي من نفسها
وادي النتيجة ..انا معرفش هو بيهددها بأيه !!
بس انا واثق جدا من مراتي وعارف أخلاقها كويس
دايما كانت بتصحى بالليل مفزوعه
اطبطب عليها واقولها متخافيش انا جنبك
رجعنا البيت بعدها.. وهي لسه على حالها
ماشيه بالأدوية والمهدئات
بطلب منها تحاول تتكلم..بس مفيش
في يوم لقيتها شاورت على قلم على المكتب
فهمت انها عايزه تكتب حاجه
اديتها ورقه وقلم ولقيتها بتكتب
وايدها بترعش
1997 وسابت الورقه والقلم
وفضلت تعيط..
دي تاريخ يا روحي.. ماله يعني!!
تاريخ ايه دا.. ممكن توضحي أكتر
مسكت القلم وحاولت تكتب تاني
بس ايدها فضلت ترتعش جامد.. رمت القلم والورقه
وهزت راسها وفضلت تعيط
هديتها وسبتها تنام ..أتصلت على مامتها
يمكن افهم منها حاجه
سنة 1997 حصل حاجه لآيه فيها ؟
حاجة ايه يعني ؟
معرفش هي كتبت التاريخ دا ومش عارف ايه تفسيره
لا وقتها آيه كانت طفله.. والوقت دا كانت
في كي جي.. وصعب يكون حصلها حاجه وتفضل فاكره
التاريخ دا.. كمان هي عاشت طفوله عاديه
وكانت مدلعه جدا
قفلت معاها وانا محتار وفضلت أفكر في اي حاجه
ليها علاقه بالتاريخ دا.. حتى لو كانت ليا
بس انا وقتها كنت في المدرسه ومفيش اي شئ مميز
حصل لي انا او حد من أهلي في التاريخ دا
طيب مش ممكن يكون مش تاريخ أصلا
اومال هيكون ايه ؟
آيه حالتها ساءت أكتر.. مامتها طلبت
انها تاخدها تقعد عندها فتره ..وافقت وقولت
يمكن تلاقي راحتها هناك
تاني يوم رجعت من الشغل جعان
مش عارف ممكن ااكل ايه
قررت اطلب دليفري.. لقيت الورقه
بتاعت المطعم لسه ع السفره
من ساعتها.. جيت اطلب الرقم
اتفاجأت انه 1997 !!
ساعتها افتكرت ان ايه ابتدت تتغير
من يوم ما طلبنا الأكل من المطعم دا
وليلتها هي مكملتش أكل وقالت انها تعبانه وملهاش نفس
المطعم دا هو السبب ..بس ازاي
روحت على عنوان المطعم واللي كان قريب مني
ممكن أعرف مين عامل الدليفري اللي هنا
ليه حضرتك في حاجه ؟
لا بس كان حصل لخبطه في الحساب
وانا جاي ارجع له حقه
والله حضرتك انسان محترم..مين في الزمن دا بيعمل كدا
عموما هو راح يوصل طلب وجاي
هو في حد غيره شغال هنا دليفري
لا هو بس عماد.. شغال معانا هنا قريب من شهر
اه واضح انه ابن حلال
اه جدا...برغم انه عمل مشكله وقت استلامه للشغل هنا
ازاي ؟؟
يعني كنا عايزين نوديه فرع تاني للمطعم
بس هو صمم وطلب يفضل هنا
حتى لو بنص الأجر
يااه نص الأجر ..طب ليه ؟
يعني بيقول انه قريب من سكنه
هو ساكن فين اصلا ؟
هو حضرتك مهتم بيه ليه كدا!!
انا.. لا ابدا انا بس
اهو عماد وصل
بصيت ليه.. شوفته بعد ما خلع الخوذه من على دماغه
ولسه هينزل من الموتسيكل
وقف وبص لي وهو مصدوم
أنت !!!
صاحب المطعم قالي
هو في ايه يا أستاذ
عماد ركب الموتسيكل وجري بيه بسرعه
ركبت عربيتي وجريت وراه
عماد.. انا فاكره كويس ..كان واقف في القاعه
ليلة فرحي وعينه منزلتش من على آيه وهوبيعيط بحرقه
سألت آيه مين دا
على ما بصت عليه.. كان أختفى
وساعتها أتلهيت في الفرح والضيوف
ونسيته خالص.. وافتكرته دلوقت لما شوفته
أكيد هو اللي حط لي ورقة المطعم على عربيتي
واكيد هو اللي جاب الأكل.. وطبعا هو االي كان بيكلم
مراتي وقلب حالها
فضلت أجري وراه وهو بيحاول يهرب مني.. زي ما يكون عامل عمله
انا مش هسيبك لو روحت فين
دخل في فجأة في شارع جانبي
لفيت بسرعه لدرجة اني كنت هتقلب
بس ربنا ستر.. كان بيبص عليا
وهو خايف مني.. بيني وبينه أمتار
دوست بنزين أكتر ..وقربت منه
لكنه جري ودخل في شارع تاني
وانا وراه من شارع لشارع
لغاية ما دخل في شارع سد
واضح انه ميعرفوش.. بس انا عارف الشارع دا كويس
لانه فيه واحد صاحبي ..وقف في النهايه وأستسلم
نزلت من العربيه ..وقربت منه
لسه همسكه راح مدور المكنه فجأة ولسه هيهرب
مسكته من دراعه وشديته.. اتقلب على ضهره
مسكته وخلعت الخوذه من على دماغه ونزلت فيه ضرب
انت مين يلا. اتكلم..انت مين ؟!
خلاص كفايه.. انا هقولك على كل حاجه
تعالى معايا.. مش هنتكلم هنا
الناس اتلمت.. وانا اخدته على بيت صاحبي
ربطناه وقولت له اتكلم والا هدفنك هنا حي
حاضر يا باشا هتكلم
انت مين وايه علاقتك بمراتي
انا.. انا أخوها
أخوها ازاي يعني ؟
احنا اخوات بس مش بالظبط
انا يتيم ..اتولدت لقيت ابويا ميت
وامي هي اللي ربتني.. لغاية ما عرفت راجل محترم
عطف عليها واتجوزها واعتبرني زي ابنه
الراجل دا يبقى حماك والد آيه
غريبه دي.. بس آيه مجابلتيش سيره عن حاجه زي دي
هتقولك ايه يعني.. هما اعتبروا جواز والدها
من امي نزوة..او غلطه وازاي يتجوز وحده
مش من مستواهم ..مراته الاولانيه زعلت
وخربت الدنيا مع جوزها وطلبت منه يطلق امي
لكن اللي حصل ان امي ماتت وبقيت انا بدون اب ولا ام
خدني عشت هناك فترة..وكنت بشوف اسوء معامله
من مراته وولاده الصبيان بس طبعا من وراه
وهو ميعرفش.. محدش كان بيعاملني كويس
غيره هو وآيه ..عطفت عليا واعتبرتني زي اخوها
بس غصب عني حبيتها
ايه ؟؟
للأسف شوفت عطفها ليا دا حب
كتمت مشاعري في قلبي وكبرت
وحبي ليها كبر جوايا اكتر واكتر
وانا في الثانوي.. والدتها اتهمتني بسرقة
خاتم الماظ.. وحطت ليا في الدولاب وسط هدومي
وعملت مشكله كبيره.. وطلبت من جوزها يسلمني للقسم
لكنه رفض.. بس قرر انه يمشيني من البيت
كان مصدق مراته.. بس اقسم لك اني كنت مظلوم
ومدافعتش ليه عن نفسك!!
دافعت كتير بس محدش صدقني
الوحيده اللي صدقتني هي ايه
كانت كل فتره بتيجي تسأل عني وتديني فلوس
من وراه مامتها ووالدها كمان كان بيساعدني من وقت للتاني
اتمرمط واشتغلت في كذا شغلانه.. وسبت دراستي
واتلطمت في الشوارع ..وكل دا وانا لسه بحب آيه
بطل كلمة بحبها دي ومتجبش سيرتها تاني
والا قطعت لك لسانك
اسف.. بس دي الحقيقه واللي صارحتها بيها
وفضلت تضحك وتستهزء بمشاعري
وكنت بشتغل وبطحن نفسي على امل اني اقدر
اكون نفسي واتجوزها.. لغاية ما ظهرت انت في حياتها
واتجوزتها ..وكنت هموت وانا بشوفها بفستان الفرمع راجل غيري..
ايوه فاكر لما شوفتك ليلتها في القاعه
بس انت جريت زي الجبان
وبعدها قررت تنتقم منها مش كدا
اشتغلت في مطعم قريب من بيتنا
وحطيت لي ورقة المطعم على عربيتي
عشان تيجي وتتكلم معاها
حصل.. كنت هتجنن واكلمها
جبت الاكل وهي اللي فتحت لي الباب
استغربت لما شافتني وقولتلها دي مش صدفه ..انا عايزك في موضوع مهم
وطلبت رقمها لكنه رفضت اديتها رقمي
وقولتلها كلميني ضروري.. والا هتندمي
طبعا خافت وكلتمني.. و..
وايه انطق.. هددتها بأيه قلب كيانها
...
ضربته بالقلم
صاحبي قالي.. بالراحه يا عمر وهو هيقول كل حاجه
اضرب ياعمر.. الوجع دا اهون بكتير من وجع قلبي بسببك
انا هقتلك يا كلب.. انطق هددتها بأيه
قولتلها اني ليها صور عريانه عندي
لو موافقتش تسيبك وتطلق منك
هبعتلك الصور..وبعتلها صوره ع الواتس
وكانت هتموت من الخوف لما اتأكدت
يا حقير يا ابن الكلب.. وجبت الصور دي منين
انا..
قول جبتها منين
بطريقتي عرفت اوصل للي صور لكم فرحكم
وعملكم السيشن.. وعرفت اخد منه كام صوره ليها
اااه وطبعا عملتهم فوتشوب.. على جسم عريان
عشان تهددها
انا اسف.. انا حبي ليها هو اللي عماني
انت عارف انها كانت هتموت بسببك
ودخلت في حالة أكتئاب حاد.. لا بتنطق ولا بتتكلم
وحالتها بتسوء يوم عن يوم بسببك
انا مقصدتش انه يحصلها كل دا
انا هوديك في ستين داهيه انت والزفت اللي صورنا
ومش هرحمك..
سلمته للشرطه بعد ما قدمت فيه بلاغ بتهديد
وابتزاز زوجتي واصابتها بالمرض بسببه
وصديقي شهد معايا.. وهو أعترف بكل حاجه
رجعت لمراتي وقولتلها انا عرفت كل حاجه
متخافيش طول ما انا جنبك
انا بحبك.. بس كان لازم من الأول تعرفيني
ومتخبيش عني حاجه زي دي
اتفقنا اننا هنعدي أي مشكله مع بعض
عيونها دمعت وحضنتني وقالت بصعوبه
ب ح ب ك .
ياريت تعملوا شير ومنشن كتير تقديرا لمجهودي في الكتابة
عدد كبير مش بيتفاعل مع القصص وبيقرأ في صمت وده للأسف بيهدد استمراري في الكتابة لأن تفاعلك ودعمك هو اللي بيخليني أشتغل على نفسي أكتر وأكتب حاجة ترضيك وترضيني.. فمن فضلك تفاعلك بيفرق ❤
أتمني القصة تعجبكم..
حاول تشارك ب
( لايك _ كومنت _ شير _منشن )
ولو لسه مش متابع الصفحة يشرفني إنك تعمل متابعة
وتقرأ القصص التي فاتت وتستنى القصص الجاية ❤
💚💕💖🌷💓برنس 💔❤️💜💙💜
تعليقات
إرسال تعليق
فضلا اترك تعليق من هنا