رواية فتاه سيئة السمعه كامله البارت 10--11الاخير كامله
رواية فتاه سيئة السمعه كامله البارت 10--11الاخير كامله
الحلقة ١٠
ظهرت دموع في عيون هدي لكن حاولت تداريها وقالت : انا اسفة ، لكن كان مينفعش اشوف ناس بتلعب عليك واسكت ومش اتكلم ، لكن اوعدك بعد كده مش هتدخل في شئونك ابدا ، انا اسفة يا استاذ عز .
وقامت هدي علشان تمشي بعد ما بدأت دموعها تنزل .
بصراحة صعبت عليا اوي وحسيت اني كنت قاسي معاها زيادة عن اللزوم فقومت علشان اهديها واعتذرلها .
هدي قعدت ودموعها انهمرت بغزارة وحاولت اوقفها كثير وفي النهاية وقفت هدي بعد ما جففت دموعها وقالتلي : انا لازم امشي حالا .
: انا اسف يا هدي.
: اسف علي ايه ولا ايه .
: مش فاهم .
: ايوه فعلا انت مش فاهم اي حاجة .
: تقصدي ايه يا هدي . بتتكلمي بالالغاز ليه ؟
: انا مقصدش حاجة ، انا لازم امشي حالا .
: استني اوصلك .
: لا لا ، سلام .
مشيت هدي بعد ما حسيت اني اهانتها ، لكن كنت لازم اعمل كده بعد ما تدخلت في حياتي بشكل مش طبيعي !!
لكن السؤال اللي في ذهني دلوقت " ليه هدي قالت الكلام ده ؟ وهتستفيد ايه من الايقاع بيني وبين ايناس ؟ ""
هل ممكن يكون كلام هدي صح ؟؟
ولو افترضنا ان كلام هدي صح هتكون ايه اللعبة اللي ايناس وطارق بيلعبوها عليا ؟؟
المهم دلوقت اني اكون حريص ولو بنسبة بسيطة لغاية ما اختبر صدق كلام هدي ، اواتأكد من اخلاص ايناس ليا .
روحت البيت في اليوم ده وكان في انتظاري والدي ووالدتي اللي بمجرد دخولي البيت الاتنين قالولي في نقس واحد ' انت تقعد هنا وتسمع اللي هنقولك عليه '
: في ايه طمنوني ؟ في حاجة حصلت ؟
امي قالتلي : العروسة اللي اسمها ايناس ده تقطع علاقتك بيها فورا ومش اسمع انك كلمتها تاني .
: في ايه يا ماما ؟
: أسأل ابوك هو بقي يحكيلك اللي عرفوا عنها .
والدي قال : اللي اسمها ايناس دي مش بنت زي ما انت قولت يا عز ، دي واحدة ست كانت متجوزة واطلقت وسمعتها مفيش اسوأ من كده !! كل الناس عارفين انها شمال وسلوكها زفت ، وانت زي العبيط كده رايح تحبها !!! انا مش عارف ازاي يبقي عندك ٣٠ سنة وعبيط كده ؟!!!
: يابابا دي كلها اشاعات طلعت عليها بسبب جوزها الاول ، لكن هي محترمة جدا وبنت حلال وكل الكلام اللي بيتقال عنها مش حقيقي .
والدتي قالت : ابوك سأل ناس كتير محترمين جيرانها في المنطقة وكلهم اجمعوا انها سيئة السير والسلوك وان سمعتها السيئة دي حقيقة مش اشاعات .
: كل الكلام ده كدب يا أمي .
: طيب دي اخر كلمة عندي هقولهالك ، لو مش بعدت عن الست دي ولا انت ابني ولا اعرفك وهكون غضبانة عليك ليوم الدين .
كان الحوار بيني وبين اهلي بالنسبة لايناس وصل لطريق مسدود .
بعدها اتكلمت مع ايناس ولما سألتني هنتجوز امتي قولتلها اننا هنتجوز مؤقتا بدون علم أهلي وبعدين نبقي نعرفهم لما اقدر اقنعهم بالتدريج .
ايناس : لكن لما اهلك يعرفوا يا عز اننا اتجوزنا بدون علمهم هيزعلوا منك اوي وانا مش عاوزة كده .
: انا عارف وقتها هعمل معاهم ايه ، المهم دلوقتي ان مفيش قوة علي الارض تفرق بينا .
: اللي تشوفوا يا عز انا خايفة لكن هوافق لسبب واحد بس ، هو ان حبي ليك بقي اقوي مني .
: هنتجوز امتي بقي يا حبيبتي؟؟ علشان انا مستعجل اوي !!
: بص يا حبيبي انا عندي سفر للخارج اسبوعين هخلص شوية شغل ونرجع نتجوز علطول .
: هتسافري فين ؟ اول مرة اعرف انك هتسافري ؟
: مش انت عارف ان انا مديرة التعاقدات في الشركة ؟
: ايوه .
: هسافر اخلص تعاقدات للشركة في تايلاند وممكن طارق يسافر معايا .
: طارق !!!!! ليه بقي طارق بالذات ؟؟
: علشان هيبقي معاه تفويض من الشركة باسمه يوقع العقود .
: لا يا ايناس بلاش طارق يسافر معاكي .
: اومال مين اللي هيسافر معايا ؟
: اسافر انا معاكي وبالمرة نتجوز و نعمل شهر العسل هناك .
: علشان تسافر معايا وتوقع انت العقود لازم يكون معاك تفويض من الشركة .
: لو قدرتي تعمليلي تفويض من الشركة واسافر انا معاكي .
: طيب انا هحاول اقنع ادارة الشركة تعملك التفويض .
بعد يومين ايناس قالتلي انها قدرت تجيب لي تفويض من ادارة الشركة وحددوا ميعاد السفر بعد اسبوعبن .
الشئ المريب اللي لاحظته قبل السفر مباشرة ان السفر بخصوص استيراد وليس بخصوص تصدير !!!!
سألت ايناس : مش المفروض اننا مسؤلين عن التصدير في الشركة ؟
: ايوه .
: طيب السفر ده المفروض انه بخصوص استيراد وليس تصدير !!! يعني المفروض ان اللي يسافر مسؤلين من مكتب الاستيراد في الشركة ؟؟؟
ارتبكت ايناس قليلا وابتسمت : انت غيرت رأيك ومش عاوز تسافر معايا ؟
: لا طبعا عاوز اسافر معاكي النهاردة قبل بكره لكن عاوز افهم .
: هفهمك كل حاجة يا حبيبي ، اي تعاقدات خارجية انا بنفسي اللي بعملها سواء استيراد او تصدير وبيكون معايا مفوض من الشركة بيقوم بالتعاقد والتوقيع علي العقود .
: تمام ، انا كده فهمت .
: لو مش عاوز تسافر قولي دلوقت لأن طارق بيلح عليا وعاوز يسافر ، لو كده نلغي التفويض اللي معاك واعمله تفويض بسرعة .
: لا يا حبيبتي بتهزري ، دا انا ما صدقت هكون معاكي ونتجوز ونقضي احلي واجمل شهر عسل .
: ولما نرجع من السفر يا عز هنعمل ايه وهتواجه اهلك ازاي ؟؟
: انا المهم عندي اننا نتجوز ونبقي لبعض بعد كده لما بابا وماما يعرفوا اني متمسك بيكي بالشكل ده هيضطروا يوافقوا .
: اتمني ده يحصل لكني خايفة .
: متخافيش طول ما انا جنبك .
وقبل السفر بيوم هدي السكرتيرة قالتلي : بلاش تسافر مع ايناس .
: ليه يا هدي .
: اسمع اللي بقولك عليه يا عز انا خايفة عليك .
: طيب فهميني اللي انتي تعرفيه .
: انا مش عارفة تحديدا فيه ايه ، لكن اللي اعرفه ان كل اللعبة اللي بتلعبها ايناس وطارق عليك لها علاقة بسفرك معها .
بعد كلام هدي اول مرة ، وشكي في طريقة سفري مع ايناس وتكرار تحذير هدي ليا تاني من السفر مع ايناس كانت الشكوك جوايا بدأت تزيد .
حسيت ان جوايا صراع بين حبي لها و....
الحلقة ١١ ( الأخيرة )
بعد كلام هدي اول مرة ، وشكي في طريقة سفري مع ايناس وتكرار تحذير هدي ليا تاني من السفر مع ايناس كانت الشكوك جوايا بدأت تزيد .
حسيت ان جوايا صراع بين حبي لها واحساسي انها بريئة ومظلومة وبين احساس تاني بيقولي ان كلام هدي حقيقي وان الاشاعات علي ايناس كلها حقيقية وانها فعلا بتلعب لعبة كبيرة مع طارق عليا !!!!!
وقبل السفر بيوم قولت لايناس : النهارده نروح للمأذون و نكتب الكتاب ( عقد القران ) علشان لما نسافر بكره نقضي شهر العسل علطول واحنا بنخلص شغلنا .
: انا عندي رأي تاني يا عز .
: قولي يا حبيبتي .
: احنا نكتب عرفي النهارده ونبقي نكتب بصورة رسمية بعد موافقة والدك ووالدتك .
اندهشت جدا من كلام ايناس لأن المفروض انها هي اللي تطلب مني الزواج الرسمي بدل العرفي !!!
وبالفعل سافرت مع ايناس تايلاند بعد ما كتبنا العقد العرفي وبعد ما وصلنا دخلنا الفندق وقضينا اول يوم في الفندق .
وفي اليوم التاني كان المفروض اننا هنقابل مندوبين الشركة اللي بنتعاقد معها لكن اتفاجئت بايناس بتقولي انها هتقابل مندوبين الشركة لوحدها في اللقاء الاول !!!
اندهشت وسألتها : ازاي انتي اللي هتقابليهم لوحدك ؟؟ مش المفروض اني اكون موجود بما أني مفوض من الشركة !!!!!
قالتلي : يا عز مش هنضحك علي نفسنا ، انت لسه مش عارف اي حاجة بالنسبة للشغل ، كل اللي عليك انك هتوقع علي العقود في اللقاء الاخير بعد الاتفاق .
كلام ايناس شعرني بالقلق بصورة اكبر وحسيت ان فيه شئ مش طبيعي ، فسألتها : ايه نوع الشغل اللي احنا هنستورده من هنا ؟
: بنتفق علي استيراد غزل .
: هنستورد غزل ؟
: ايوه ، انت بتفهم في الغزل ؟!!
: لا .
: طيب يبقي هتوقع علي العقود وبس .
: تمام يا حبيبتي اللي تشوفيه .
لاحظت ان ايناس خلال ٣ ايام كانت بتقابل ناس كتير وانا حاسس اني مش فاهم اي حاجة !!
وبعد ايام ايناس قالتلي : جهز نفسك يا حبيبي علشان توقع العقود النهاردة .
وفي اليوم ده نزلت مع ايناس وقعدنا مع وفد الشركة اللي هنتعاقد معها و قبل التوقيع مسكت العقود وقرأت اجزاء منها بسرعة ( وكانت ايناس مش عارفة ان مستوايا في اللغة الانجليزية قوي جدا ) و لما لاحظت اني بحاول اقرأ العقود قالتلي : انت لسه هتقرا يا حبيبي ؟؟ وقع العقود علطول انا قرأتها وهي مطابقة للاتفاق اللي الشركة متفقاه قبل ما نسافر .
قدرت من القراءة السريعة للعقود اني اتأكد انها فعلا بخصوص استيراد غزل لكن الغريب ان اسم المستورد كان باسم شركة وهمية مش باسم شركتنا !!!
بعد ما طلعنا غرفتنا في الفندق انتهزت فرصة دخولها الحمام وصورت العقود بالموبايل .
وبعدها قرأت العقود عرفت فعلا انها بخصوص استيراد غزل لكن باسم شركة وهمية .
بدأت اتأكد ان الموضوع كله فيه حاجة غلط !!
ذهبت للسفارة هناك وقدمت بلاغ
بشكوكي وفي السفارة ساعدوني اني اعمل بلاغ رسمي اقول فيه كل شكوكي علشان اكون بعيد عن اي مشكلة تحصل .
بعد ايام اتفاجئت بايناس بتقولي اننا النهاردة هنوقع باقي العقود !!!!
كنت مش فاهم حاجة !!! سألتها : عقود اي تاني ؟؟ احنا وقعنا العقود من ايام !!!
قالتلي : دي تكملة العقود .
روحت مع ايناس وهناك طلبت مني توقيع بعض العقود !!!
قدرت بردو في نفس اليوم اني اصور العقود دي بالموبايل بدون ما تشعر ايناس ، وقعدت اقراها واكتشفت الكارثة !!!!!!
اكتشفت ان ايناس عملت شركة وهمية بتقوم بدور الوسيط بين الشركة بتاعتنا والشركة اللتايلاندية اللي هنستورد منها الغزل لتحقيق فرق اسعار هائل حوالي ٣٠ مليون دولار سنويا !!!
وان العقد مدته ٥ سنوات قابل للتجديد !!!
اررسلت صور العقود لااستاذ عبد المنعم مدير التصدير في الشركة وقولتله علي كل اللي عرفته .
لكن المفاجأة الصادمة ليا فعلا اني بعد ما كلمت استاذ عبد المنعم بنص ساعة اتفاجئت بايناس بتقولي : تعالي يا عز عاوزاك في موضوع مهم .
: في اي يا ايناس ؟
: انت بتحبني ؟
: ايوه .
: عاوز تسجني ليه ؟
: مين قالك كده ؟!!!
: طيب يا عز مادام انت فهمت كل حاجة يبقي نلعب ع المكشوف .
: مش فاهم .
: انت لسه هتستعبط عليا !!!
: انت عرفت الشركة الوهمية وبلغت عبد المنعم ، صح ؟
: معقول !!!! استاذ عبد المنعم هو اللي قالك ؟؟!! ده يبقي كده هو كمان مشترك معاكي !!!
: ايوه يا عز ، الشركة الوهمية دي باسمي انا وعبد المنعم وطارق ، واحنا مش بنعمل حاجة غلط ، كل الموضوع اننا بنطلع فرق سعر لنا بيتقسم بينا احنا التلاتة وانت هتبقي الرابع بتاعنا ، قولت ايه ؟؟
: هاخد كام ؟؟؟
: هتاخد ١٠% يعني ٣ مليون جنية لمدة ٥ سنين . ايه رأيك ؟ حاجة ولا في الاحلام !! ، لكن في شرطين اساسيين .
: ايه هما ؟
: اولا هاخد منك تليفونك ده دلوقتي اللي عليه الصور والاثباتات كلها وثانيا نقطع ورق الجواز العرفي اللي بينا لأني كده كده كنت ناوية اقطعه لما نرجع مصر .
: يعني انتي مش بتحبيني ؟
: حب ايه يا عز !!! انا مش بتاعت حب يا قلبي ، انا بتاعت بيزنس وبس .
: ماشي يا ايناس ، موافق يا حبيبتي .
ايناس اخدت الفون ومسحت علي اللي عليه و دمرت البورده والميموري وبعدها قطعنا الورق العرفي واخدت منها شيك علي بياض حفاظ علي حقي في اللعبة دي .
وقبل ميعاد رجوعنا لمصر ذهبت للسفارة اللي كنت سايب فيها نسخة احتياطية من العقود كلها .
اخدت النسخة الاحتياطية علي كارت ميموري ورجعنا مصر انا وايناس .
وبمجرد رجوعي مصر قدمت كل صور المستندات وعملت بلاغ في ايناس وطارق وعبد المنعم .
وتم فصلهم جميعا من الشركة وحصلت علي مكافأة كبيرة من الشركة .
اما هدي السكرتيرة بمجرد ان شوفتها شكرتها جدا علي مساعدتي لولاها كان اللعبة كملت و اخدوا هما الفلوس ولو انكشفت اللعبة كنت انا اللي هضيع !!!
هدي اعترفت لي بأعتراف تاني خطير جدا وجرئ جدا جدا بعكس شخصيتها الخجولة لما قالتلي انها معجبة بيا وبتحبني من اول يوم دخلت فيه الشركة !!!
كانت هدي بعد اللي عملته معايا جديرة بأنها تستحوذ علي حبي و تعتلي عرش قلبي بكل سهولة ويسر .
ولما روحت لوالدي ووالدتي وقولتلهم اني عاوز اتجوز كان في ظنهم اني لسه بتكلم عن زميلتي ايناس لكن قولتلهم اني اقتنعت بكلامهم اخيرا بعد ما شوفت وجربت بنفسي ودلوقتي عاوز اتجوز هدي .
وبعد شهور قليلة كنت انا وهدي بنقضي شهر العسل في اسبانيا هدية من الشركة لنا .
انتهت .
تعليقات
إرسال تعليق
فضلا اترك تعليق من هنا