رواية انا وابن خالتي الجزءالثاني بداية الانتقام البارت الثاني2 بقلم عمرو راشد
رواية انا وابن خالتي الجزءالثاني بداية الانتقام البارت الثاني2 بقلم عمرو راشد
ايه يا حبيبتي اول مرة تشوفي راجل بيتجوز على مراته ولا انتي زعلانة عشان معرفتيش تملي عينه
= بلاش أنتي عشان انا عارفة انتي دخلتي هنا ازاي
هكون دخلت ازاي،، مانا قدامك اهو داخلة من الباب
" رجعت ابص على مروان وكلمته
يا مروان افهم اللي انت بتعمله دا غلط
" لكنه بدأ يحط ايده على دماغه بعدها رجع قعد على الكنبة،، ساعتها شمس قربت مني ومسكت ايدي بقوة
هو انتي كنتي فاكرة انك هترجعي هارون ليكي واحنا هنسيبك ونسكت،، دا انتي حسابك تقيل معانا اوي يا هند،، اوعدك يا هند انك عمرك ما هتشوفي خير تاني في حياتك
" لمحت من وراها مروان واقف بس لا دا مش مروان،، لقيته اتكلم وقال
نورتي الارض يا شمس
" شمس بصت وراها و ضحكت
كنت عارفة انك موجود،، حسيت بيك من اول ما دخلت
" هارون قرب منها وقال
جاية ليه؟
= جاية انقذك من الغلط اللي هتعمله
الغلط الحقيقي هو وجودك هنا يا شمس
= مش وجودي لوحدي،، وجودنا احنا الاتنين غلط يا هارون و لازم نرجع
نرجع فين؟
= شكلك نسيت،، نرجع العالم بتاعنا،، الأرض عمرها ما كانت مكان نعيش فيه
وانا لقيت نفسي هنا وحابب اكمل
= انا بجد مش فاهمة،، تكمل مع مين،، مع هند!! ،، انت نسيت ان الج*نس البشري متحرم علينا
القوانين دي تمشي على اي حد الا انا،، انا هارون يا شمس،، هااااارون
" عنيه قلبت للون الأحمر ثواني و رجعت تاني لطبيعتها
كويس انك لسة فاكر،، اسمعني بقا أنا مش جاية عشان اتناقش معاك،، انت معاك اخر فرصة،، فاهم يا هارون،، اخر فرصة و دلوقتي هتختار يإما ترجع معايا او تخليك هنا بس ساعتها هتندم اوي على اختيارك دا
" هارون ابتسم ولكنه منطقش،، كملت هي كلامها
كنت عارفة انك هتختارها،، اتحمل بقا نتيجة اختيارك يا هارون
" كانت بتلف وشها وماشية،، باب الشقة اتفتح لوحده وهي كانت لسة هتخرج لكن فجأه الباب اتقفل بقوة و اتربط عليه ب جنازير،، هارون ساعتها اتكلم
انا لسة مخلصتش كلامي،، اخر حاجة كنت اتوقعها اننا نحا*رب بعض لكن طالما أنتي نسيتي مين هارون وجاية لحد هنا تهدد*يني يبقا تسمحيلي افكرك بيه
" بصيت على هارون لقيت عنيه قلبت للون الأحمر وبدأ يتكلم بصوت مرعب
تذكري جيدا يا شمس من هو هارون،، انا الذي تخشاه جميع المخلوقات في السماء والأرض،، انا الاقوى،، الأفضل،، انا هااااروووون
" خرج منه رياح قوية جدا سحبت شمس ل ورا بسرعة كبيرة جدا لحد ما دخلت جوا الحيطة،، انا وقعت على الأرض من المنظر،، ضربات قلبي كانت سريعة جدا من كتر الخوف،، ساعتها هارون قرب مني وبدأ يكلمني وانا حاسة ان صوته بيبعد اكتر،، حاسة اني هيغمى عليا وفعلا صوته كان بيبعد اكتر لحد ما مسمعتش حاجة خالص واغمى عليا بالفعل،، فوقت على صوت حد بيقرأ قرآن جنبي،، صوته كان عذب جدا وجميل جدا جدا،، حسيت بهدوء وقلبي اطمن شوية،، فتحت عيني لقيت نفسي في اوضتي،، قومت اتعدلت لقيته ماسك مصحف وبيقرأ منه
" قَالَ إِنَّمَا أَشْكُو بَثِّي وَحُزْنِي إِلَى اللَّهِ وَأَعْلَمُ مِنَ اللَّهِ مَا لَا تَعْلَمُون. يَا بَنِيَّ اذْهَبُوا فَتَحَسَّسُوا مِن يُوسُفَ وَأَخِيهِ وَلَا تَيْأَسُوا مِن رَّوْحِ اللَّهِ ۖ إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ " صدق الله العظيم
" قرب مني و طبطب عليا
أنتي كويسة؟
= الحمدلله
" نظرة عنيه و طريقته كانت بتقول ان دا هارون مش مروان خصوصا ان مروان قليل لما بيقرأ في المصحف بس ازاي هارون هيقرأ قرآن
خليكي هنا وانا هقوم احضرلك حاجة تاكليها
" مسكت ايده قبل ما يقوم،، رجع قعد جنبي وابتسم
في ايه يا حبيبتي؟
= انت هارون؟
ايوا هارون
= ازاي
ازاي ايه؟
= ازاي كنت بتقرأ قرآن؟،، هو انت مش جن؟
جن اه بس جن مسلم
= انا اول مرة اعرف،، طب ليه مقولتش من الاول
مكنش في فرصة اقولك حاجة
= يعني انت بتقرأ قرآن عادي ومش بتتحر*ق
" ضحك على كلامي
مبتحر*قش لا
= وبتصلي عادي طب؟
ايوا عادي طبعا
" قومت انعدام من مكاني والابتسامة اترسمت على وشي
انا مش مصدقة
= دي حاجة كويسة يعني؟
دي حاجة كويسة جدا،، قولي بقا دي كانت سورة ايه اللي كنت بتقرأها
= سورة يوسف،، أكتر سورة بحبها في القرآن
اشمعنا
= بحس ان فيها درس جميل جدا في الصبر و ازاي هنصبر وفي الاخر ربنا هيعوضنا باللي نستحقه
انا كل شوية بكتشف فيك حاجة احلى من اللي قبلها،، انا مش عارفة حياتي من غيرك كانت هتبقا عاملة ازاي
= انا موجود عشانك انتي وبس،، عشان احميكي و احاول بقدر الإمكان امي اخليكي اسعد واحدة في الدنيا
" قومت وقفت
هارون انا مش مصدقة،، طب وحد الله كدا
= لا إله الا الله،، كدا كويس
طب استغفر ولا اقولك اذكر أسماء الله الحسنى؟
" بدأ يضحك على طريقتي وقال
في ايه يا هند مالك؟
= مش عارفة بس انا فرحانة أوي
طب دا شئ كويس
= طب بالنسبة للي حصل؟
ايه اللي حصل؟
= شمس
" قرب مني وبا*سني من جبيني
متقلقيش انا معاكي،، مفيش مخلوق يقدر يقربلك طول ما انا موجود
= ومروان؟
هنلاقي طريقة نفوقه بيها عن اللي هو فيه
= نفوقه ازاي يعني؟
ماهي شمس مسيطرة عليه عشان تخليه يحبها وبالتالي هي تعرف تقرب مننا
= يعني مروان ميعرفهاش؟
يا هند بقولك شمس دي من العالم بتاعي يبقا مروان هيعرفها ازاي؟
= وهنعمل ايه؟
هحاول اتصرف بس دلوقتي لازم امشي
= رايح فين؟
مروان قرب يفوق،، مكنتش عايز اسيبك بس المهم اني اطمنت عليكي
#بقلم : #عمرو راشد
" رجع ونام على السرير بكل هدوء،، وأنا خرجت للصالة لقيت كل حاجة طبيعية زي ما كانت وكأن مفيش حاجة حصلت،، بعدها ب نص ساعة بالظبط مروان خرج من جوا
انتي معملتيش اكل؟
= ابقا خلي حبيبة القلب تيجي تعملك
هي راحت فين صحيح؟
= مشيت.. حضرتك تعبت ونمت وهي مشيت
تعبت؟؟؟
= اه تعبت،، فجأه حسيت انك دايخ و دخلت تنام
تمام انا هبقا اكلمها
" قومت من مكاني و روحت وقفت قدامه
اسمع يا مروان،، انا مش هقبل يكون ليا ضره
= انتي نسيتي اننا متفقين على الطلاق اصلا
لا منستش،، بس انت اللي شكلك نسيت احنا عملنا ايه ولا عدينا ب ايه عشان نتجوز وفي الاخر انت عايز تهد كل دا و تطلقني
= القرار دا اتأخر اساسا يا هند،، انا مش عايز اهد حاجة،، انتي اللي قررتي تهدي البيت دا بتصرفاتك،، وأنا بصراحة زهقت ومش هقبل اكون في الموقف السخيف دا تاني،، انا من ساعة ما اتجوزتك مشوفتش يوم حلو،، انا مش فاكر لينا لحظة حلوة مع بعض،، انتي متخيلة؟ ،، شهور متجوزين ومش فاكر منها اي حاجة ليه بقا؟ ،، ايه اللي بيحصل؟
= اللي بيحصل انت مش هتقدر تفهمه
طالما مش هقدر افهمه يبقا نتطلق لإني مش هعيش بالطريقة دي
= دا اخر كلام عندك؟
ومعنديش غيره يا هند،، انتي بقا عايزة تكملي وتعيشي في البيت دا معنديش مانع بس تعطلي جوازتي لا
" سابني و دخل نام،، فضلت قاعدة لحد الصبح،، معرفتش انام،، مش عارفة انام من التفكير،، دماغي فيها مليون حاجة،، هارون ومروان وشمس،، كل حاجة متلخبطة،، الساعة كانت 9 الصبح وانا لسة منمتش لقيته هو دخل الحمام و اخد دش وخرج يلبس عشان يروح الشغل،، ناديت عليه قبل ما ينزل
انا هروح عند خالتو النهاردة
= ماشي بس متتأخريش،، ولو هتروحي في حتة تانية تقوليلي قبلها عشان متصلش و الاقيكي مش عند خالتك كالعادة يعني
" نزل وانا مستحملتش اقعد دقيقة كمان في الشقة،، قومت غيرت هدومي ونزلت روحت عند خالتي،، الساعة كانت 11،، رنيت الجرس لقيت بودي هو اللي فتح الباب،، دخلت من غير ما حد فينا ينطق
اومال خالتو فين؟
= نزلت السوق تجيب طلبات
طيب انا همشي وهبقا اجيلها وقت تاني
" كنت لسة همشي لكن هو مسك دراعي
استني يا هند
= في ايه
انا اسف على كل اللي انا قولته،، صدقيني انا مكنش قصدي،، كل دا كان غصب عني والله،، انا كاتم مشاعري بقالي كتير أوي يا هند ومش قادر انطق بيها عشان مش عايز اخسرك بس خلاص انا مبقتش قادر
= بس انا عمري ما لمحتلك بأي حاجة من دي
بس انا غلطت،، غلطت وحبيتك
" اتوترت اول ما قالها وبدأ يبان عليا
ايوا يا هند انا بحبك،، وبحبك اوي كمان،، انا احق بيكي من اي حد
" لقيته مسك ايدي و با*سها
هند انا بحبك!!
#عمرو_راشد
#انا_وابن_خالتي 2 " بداية الانتقام " 2
تكملة الرواية هناااااااااااا
الرواية كامله الجزءالاول من البدايه من هنااااااا
تابعونا علي قناة التليجرام هنااااااااااا
ليصلكم كل جديد
تعليقات
إرسال تعليق
فضلا اترك تعليق من هنا