سكريبت حل اجباري كامل هاجر العفيفي
: انتى ازاى توافقى انك تتجوزيني وانتى عارفه ان مش بحبك
قالها ريان بحده وعصبيه
تالين بتوتر : أ أنا مكنتش أعرف
ريان بصوت عالى : ازاى مكنتيش تعرفى انتي عارفه ان عمرى ماحبيت فى حياتي غير ريتاج الله يرحمها انتي عايزه تاخدي مكانها ليه انتي بتستغلى الفرصه
تالين كانت واقفه ماسكه دموعها بالعافيه بس اتمالكت نفسها عشان متضعفش وقالت بصوت مهزوز : انا بابا قالي أن فى عريس متقدملى و
قاطعها ريان بحده وقال : خلاص مش عايز كلام تاني اهي تدبيسه وخلاص
قال كلامه غير مبالي بال واقفه هتنهار ومشي وسابها فى حزنها
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹أستغفروا
كارما بحزن : قولتلك متوافقيش ليه تعملى فى نفسك كده من الاول وتسمحي على نفسك الاهانه دى كلها
تالين : كله يهون عشان خاطر رقيه
كارما : وقلبك ال بتضيعيه انتي مش فاهمه مصلحة نفسك
تالين : لاء فاهمه وعشان كده مش هتخلى عن بنت أختى ابدا
كارما : وأهلك ليه يطلبوا منك تضحي بسعادتك ونفسك ليه دايما كده انتي ال مظلومه ليه دايما جاين على سعادتك
تالين بتنهيده وحزن : خلاص ياكارما ال حصل حصل ربنا يقدرني
كارما بصتلها بقلة حيله وحزن على حالها
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹صلوا على شفيعكم
راضي : وانتي فاكره ان ال بنعمله ده صح احنا كده بنظلمها
عزه بتريقه : مش أحسن ما تفضل عانس
راضي : ازاى تقولى على بنتك كده عيبه فى حقنا
عزه : مش بقول الحقيقه اسكت انت انا عارفه مصلحتها فين
راضي : ده جوز اختها الله يرحمها ازاى هيتقبلوا بعض
عزه : ملكش دعوه انت بس سيب الموضوع يكمل على خير انا عايزه حفيدتى تتربى فى حضني
راضي بقلة حيله : ربنا يصلح الحال
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹أذكروا الله
: بارك الله لكما وبارك عليكما وجمع بينكما في خير
كلمه اتقالت حزينه على بعض وبسيطه على بعض أخر
راضى والد (تالين) : مبارك ياحبيبتى ربنا يسعدكم
تالين بصوت منخفض : الله يبارك فيكم
ريان وهو يجز على أسنانه بغيظ: مش يلا ولا انتي فاكره نفسك عروسه بجد
تالين : يلا
لسه هيمشوا سمعو صوت شخص مكانتش تتوقع ابدا انها تسمعه
: كده برضوا تعملوا الفرح من غيرى
يتبع
البارت الثاني ❤️
تالين جريت عليه بفرحه وحب واترمت فى حضنه : سيف حبيبي وحشتني
سيف بحنان : وانتي اكتر ياحبيبتى
ريان قرب منه وقال : سيف عامل ايه
سيف بجمود : الحمد لله
راضى حضن ابنه وكمان عزه حضنته
سيف : محدش خد رأي فى كتب الكتاب ده
عزه : وايه يعني احنا قولنا مش عايزين نضيع وقت و
قاطعها سيف وقال : ليه هي تالين كانت مطلقه قبل كده عشان تخلصوا منها بالطريقه ده
راضي : يابني ملوش داعي الكلام ده خلاص كتب الكتاب خلص وتم على خير
سيف بص على تالين ال ملامحها حزينه وقالها بحنان : تعالي ياحبيبتى عايزك فى كلمتين بعد اذنكم
ريان كان متغاظ من تجاهل سيف ليه
دخلوا البلكونه وسيف بدأ كلام
سيف : مبسوطه
تالين هزت راسها بنعم
سيف بابتسامه : من وانتي صغيره لو كدبتي على كل الناس بس معايا انا متقدريش تكدبي عليا ابدا انا أخوكي الكبير وفاهمك اكتر من نفسك انتي تربيتي ياتالين
تالين دموعها نزلت واترمت فى حضنه وقالت بشحتفه : انا بحبه اوى ياسيف
وللأسف هو عمره مابادلنى نفس الشعور ابدا انا ال كان المفروض اخد الحب مش ريتاچ انت عارف انها عمرها ماحبته هي خدته عند فيا لما عرفت أن بحبه بس والله انا مش بكر"هها دي اختي وحبيبتى بس هي عمرها ماحبتني كانت دايما تاخد كل حاجه مني ماما طول عمرها بتحبكم اكتر مني بس والله عمرى ماكر"هتها
سيف كان بيسمعها وضمها بحنان وساكت
كملت كلامها وقالت : والله انا مش زعلانه ابدا انها اتجوزته بس ال قهرني أنها كانت دايما بتتعمد تغيظني بس عارف انا والله من اول ماريتاچ اتجوزت ريان انا نسيته خالص وابتديت أتعود على كده واعيش حياتي لحد لما حصل ال حصل
سيف رفع وشها ليه وقال : ليه وافقتى؟؟
تالين : مش عارفه يمكن عشان رقيه صعبت عليا عشان ملهاش ذنب ولا عشان ضغط بابا وماما عليا ولا عشان معايرتهم ليا إن بقيت عانس عشان عندي ٢٧ سنه ومتخطبتش لسه
سيف : يعني مش عشان لسه بتحبيه
تالين بسخريه : تصدق أن دي الحاجه الوحيده ال مفكرتش فيها انا بقولك ان نسيت ريان من اول ما تجوز ريتاچ انا صادقه فى كلامي
سيف ابتسم على أخته وقال : بصي ياحبيبي دلوقتي انتي اتحطيتي فى أمر واقع بس بإيدك تخليه اختيار ليكي انا عارف ان صعب عليكي والله بس انتي اقوي من كده بكتير متخليش ريان يجرحك بأي كلمه ابدا هو ملوش أن يزعلك ابدا انتي كده بتعملى معاه واجب كمان خليكي دايما قويه وليكي حق مش مكسوره ابدا انا معاكي وفى ضهرك ولو فكر فى يوم يزعلك كلميني وصدقيني لو هقف قدامهم كلهم واطلقك منه واخدك ونسافر علطول انتي بتحبي رقيه صح
تالين بابتسامه من وسط دموعها : جدا دي هي سبب كبير فى أن أقبل بالموضوع ده
سيف : فرغى وقتك كله ليها عيشي حياتك متعيطيش متبينيش انك مكسوره ولا زعلانه كل لما تلاقي نفسك زعلانه كلميني لحد لما ترتاحي متنسيش صلاتك ووردك من القرآن وأذكارك دي كفيله أنها تحفظك وتريحك بس بعد ده كله اوعي تنسي حقوق ريان عليكي انتي مراته يعني مينفعش تبعدي عنه نهائي يعني كل حاجه تجهيزيها ليه عشان ربنا هيحاسبك عليه ياحبيبتى
تالين حضنت اخوها بحب وقالتله : ربنا يخليك ليا يا احن واجمل أخ فى الدنيا
سيف : ويخليكي ليا ياحبيبتى يلا بقا عشان دراكولا ال بره ده ممكن يضربني عشان الوقت ده كله
تالين ضحكت على كلامه وخرجوا الاتنين بس هي نفسها ارتاحت من كلام أخوها
ريان بغيظ : يلا
تالين : يلا بس فين رقيه
عزه : هتبات معايا و
قاطعتها تالين وقالت : لاء انا عايزاها معايا هي فين
عزه بغيظ : نايمه جوه
تالين دخلت الأوضه وشافتها نايمه زي الملاك (رقيه عندها خمس شهور بس )
شالتها وضمتها بحب وبعدين خرجت ومشيت مع ريان بهدوء بعد ماودعتهم
عزه بغيظ : شوفت بنتك راحه تاخد رقيه معاها النهارده
راضي بتعب : ملكيش دعوه ياعزه هي حره فى حياتها
سيف : انا داخل انام تصبحوا على خير
عزه : مش هتاكل
سيف : شكرا يا أمي مش هقدر
قال كلامه ودخل أوضته وكذلك راضى وعزه
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹استغفرووا
عند ريان وتالين
ريان بضيق : الأوضه دي هتكون ليكي انتي ورقيه والتانيه دي اوضتي
تالين بهدوء وهي بتنظر لرقيه بحب : تمام تحب تاكل
ريان بجمود : شكرا مش عايز
تالين : تمام تصبح على خير
قالت كلامها ودخلت الاوضه وقفلت عليها هي ورقيه
ريان أتضايق من هدوئها ودخل أوضته وقفل على نفسه وفضل ماسك صور ريتاچ ونام على وضعه
عند تالين
كانت بتلاعب رقيه ال صحيت بحب وقالت : عارفه ياروكا انتي شبه بابا اوى وماما الله يرحمها بس انا بحبك أوووى أوووى تعالي نلعب يلا ولا تاكلى اعملك لبن هعملك لبن
نسيت نفسها مع رقيه وسمعت كلام سيف وطنشت كل الالم والوجع
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹أذكروا الله
تاني يوم
ريان صحي وخرج من أوضته وشاف الفطار محطوط على الترابيزه وكانت تالين شايله رقيه وقاعدين قدام التلفزيون
بص عليهم وراح عندهم اخد رقيه منها وباسها ولاعبها وبعدين بص على تالين بجمود واتكلم
ريان بجمود : مش كفايه اهتمام عشان مهما عملتي عمرك ماهتاخدي مكانها ابدا فاهمه
تالين وقفت بهدوء وقالت : والله انا بعمل واجبي مش اكتر وده العادي
ريان بعصبيه : انتي ازاى بار"ده كده ازاى قادره تعيشى مع شخص مش بيحبك ازاى عايزه تاخدي مكان مش مكانك هو انتي فاكره أن مش واخد بالي انك بتحبيني من زمان لاء واخد بالي اوى بس اعملى حسابك انتي ولا حاجه فى حياتي
تالين كلام ريان جرحها بس افتكرت كلام سيف ليها واتكلمت بهدوء عكس ال بداخلها : انت مغرور اوى الصراحه فاكر أن كل حاجه حواليك تحت أمرك انا عمرى ماحبيتك ولا هفكر أحبك لأن انا يوم ماهفكر احب حد هحب واحد سوي نفسيا مش عايز يتعالج
قالت كلامها بهدوء واخدت رقيه منه ودخلت الاوضه وسابته هو واقف مصدوم من ثباتها وهدوءها وكلامها
عند تالين
تالين بجمود : ماشى ياريان انا هقسي قلبى عليك وهتشوف وش عمرك ماشوفته قبل كده همحيك من حياتي نهائي
يتبع
البارت الثالث❤️
ريان بضيق : فين التيشيرت بتاعي الاسود
تالين بهدوء : فى الدولاب عندك
ريان اتعصب من هدوئها وقال : انتي شخصيه مستفزه
تالين بصدمه : لاحول ولاقوة الا بالله هو أنا كلمتك دلوقتي بتسألنى ورديت عليك عايز ايه تانى
ريان بتوتر : فين رقيه
تالين : نايمه وبعد أذنك بلاش كل شويه تتلكك على حاجات تافهه اعتقد انت كبير على الكلام ده
قالت كلامها وكانت داخله أوضتها بس وقفها كلامه
ريان بجمود : ليه وافقتى تتجوزيني
تالين لفت وقالتله : انا مش عايزه ادخل فى مناقشات دلوقتي
ريان بعصبيه : بتهربى ليه من الإجابه انا عايز إجابه منطقيه
تالين بعصبيه : هو انت عايز توصل لإيه بالظبط انت عارف أن وافقت اتجوزك عشان رقيه وبس مش عشانك ياريان انا عارفه انك مستني الاجابه دي انا عايزاك تكون متأكد أن انت مش فى دماغي اصلا ولا ليك مكان فى قلبي من هنا لحد لما نشوف نهايتنا مع بعض عامله ازاي تكون عارف ان انا هنا عشان رقيه وبس فاهم رقيه وبس
أكدت كلامها ومشيت وسابته وهو كان واقف متعصب بسبب ردها هو كان مستني رد تاني طب ليه هو مش بيحبها اصلا
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹استغفروووا
عزه : إنما ايه ياسيف شوفتلك عروسه قمر هتعجبك أوى
سيف كان بيشرب القهوه سابها وقال : بس انا مش عايز اتجوز دلوقتي
عزه بزعل : كده يابني مش عايز تفرح قلبي زي اخواتك
سيف بسخريه : قصدك تجبرينى زيهم
عزه بغضب : قصدك ايه يعني هي البت تالين اشتكتلك ولا ايه
سيف : هو أنا جبت سيرتها دلوقتي بس إنك تقولى عليها انك عارفه انك أجبرتيها
عزه : انت هتعملى زي ابوك خلاص تالين واتجوزت مش حكايه هي
سيف : بس عمرها ماهتكون مبسوطه لأن هي اتغصبت علي الجوازه دي
راضي : في ايه مالكم صوتكم عالي ليه
سيف : أمي عايزه تجوزني ماهي عايزه تخلص مننا مره واحده
راضي : اهدي شويه ياعزه
عزه بعياط : مستكترين عليا الفرحه يعني مش كفايه البت ال ماتت وهي لسه فى شبابها وسايبه طفله صغيره عايزين تقهروني عليكم
سيف بحزن : خلاص يا أمي الله يرحمها ال انتي عايزاه هعمله
عزه بفرحه : بجد يعني هتروح معايا نشوف العروسه
سيف بإستسلام : أمرى لله
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹أذكروا الله
تالين : انا هاخد رقيه ونروح للدكتور عشان تعبانه شويه بعد أذنك
ريان بلهفه : مالها رقيه فى ايه
تالين : متقلقش هي بس شوية كحه وبرد
ريان : طب اجهزوا وانا هروح معاكم يلا
تالين بتوتر: لاء أنا
قاطعها ريان بحزم : مفيش مقاطعه يلا
تالين بإستسلام : حاضر
دخلت لبست ولبست رقيه وخرجت وهو كان جهز ونزل قبلهم جهز العربيه وهي نزلت كانت هتركب ورا بس هو وقفها
ريان : اركبي قدام ياتالين
مرديتش تجادل معاه وركبت قدام وكانت ضمه رقيه بحب وخوف كأنها بنتها هي مش بنت أختها وريان لاحظ حنيتها على بنته بصلها وابتسم من غير ماهي تاخد بالها كانت مركزه فى الشباك
وصلوا عند الدكتور وكشفوا على رقيه وقالهم دي نزله معاويه وأعطاهم العلاج وخرجوا من عندو وركبوا العربيه
ريان : احم شكرا انك اهتميتي برقيه شكرا ليكي
تالين بهدوء : ده واجبي ورقيه بنتي بس متقلقش مش هاخد مكان امها
ريان أتضايق من كلامها رغم أن هو دايما يقولها كده
اتكلم بتساؤل : ناويه تعملى ايه بعد كده
تالين : هطلق طبعا
ريان بصدمه : نعم تطلقى
تالين : أيوه
ريان : ليه ؟؟
تالين بسخريه : اظن من حقي الاقي ال يحبني وأحبه واعيش معاه فى امان
ريان بغيظ وهو يجز على أسنانه : ورقيه
تالين : تكون كبرت شويه وماما تاخدها لو انت عايز تشوف حياتك وانا دايما هسأل عنها واشوفها
كانت بتقول الكلام ده كله من ورا قلبها هي مجاش فى تفكيرها أنها تسبب رقيه ولا تبعد عنها
ريان وقف العربيه وبص فى عيونها وقال بجرأه : لسه بتحبيني ياتالين
تالين اتصدمت من كلامه ومردتش عليه
ريان : ردي عليا صارحيني
تالين بخنقه ودموع محبوسه : قولتلك عمرى ماحبيتك
ريان : كدابه عيونك فضحا"كي
تالين : حتي لو كنت بحبك مش من حقي
ريان : ليه انا جوزك
تالين : لاء قدام الناس بس إنما فى الواقع احنا اغراب ياريان افهم بقا ريتاچ هي مراتك وحبيبتك بس
ريان بوجع : بس ريتاچ كانت بتحب غيري وهي متجوزاني ياتالين
تالين بصدمه : انت بتقول ايه
ريان اتنهد بوجع وقال بغضب مكتوم : عرفت كل حاجه من مذاكرتها ال كانت مخبياها
تالين بخوف : عرفت ايه بالظبط
ريان : ......
يتبع
البارت الرابع ❤️
تالين بخوف : عرفت ايه بالظبط
ريان : انك بتحبيني ياتالين
تالين اتصدمت من كلامه واتوترت اكتر وكتمت دموعها
ريان بعصبيه : عرفت انك انتي ال بتحبيني مش هيا انتي ال ضحيتي بسعادتك مش هيا وكمان داست على قلبك ومش بس كده لاء دي كمان كانت بتخو"نى
تالين بإنفعال : ريتاچ عمرها ماخا"نتك
ريان بوجع : للأسف شوفت كل الشات ال كان بينها وبين زميلها فى الجامعه زمان الخيا"نه مش بس زي مانتي فاكره مجرد ماهي تفكر فى واحد غير جوزها دي خيا"نه
تالين بتنهيده قويه : انت عايز ايه دلوقتى ياريان
ريان : اعرف انتي لسه بتحبيني ولا لاء ؟
تالين بسخريه : هتفرق
ريان بعصبيه : ايوه هتفرق ماتقولى بقا
تالين بعصبيه اكتر : ايوه بحبك ياريان بس عرفت انك متستاهلش الحب ده ابدا انت اكتر حد جر"حتني اكتر واحد كنت بتكسر"ني بكلامك انت حبك ده بالنسبالي مرض للأسف نفسي أتعافى منه
ريان كان مصدوم من كلامها وقلبه وجعه عشانها وقال بحزن : مقولتليش ليه ياتالين من زمان
تالين ضحكت بسخريه وقالت : اقولك ايه اشوفك بتطلب ايد اختي اروح اقولك انا بحبك ؟؟ هيكون شكلى ايه قدام أهلى اخسر أهلي عشان مين طب اختي عمرها ماحبتني بس عمرى مافكر اكسر فرحتها هو انت فاكر. كسر الخواطر ده سهل ياريان شغل العربيه ياريان ويلا نروح انا تعبت من الكلام
ريان بصلها بغموض وشغل العربيه وراحوا البيت
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹استغفرووا
سيف بضيق : هي دي العروسه يا امي ال انتي جيباها هو مش انتي عارفه انا عايز مواصفات ايه كويس
عزه بامتعاض : مالها يابني متتعيبش انت بس ال فاكر نفسك شيخ
قاطعها سيف وقال بهدوء : هو عشان طالب عروسه ملتزمه وعارفه أمور دينها كويس عروسه لابسه الزي الشرعي وعارفه يعني ايه أمور دينها وحدود كل شئ يبقا عامل فيها شيخ ؟؟ هو مش ده الطبيعي ولا ايه بالظبط ليه المجتمع بقا تفكيره سلبي كده انا عايز أم لأولادي وزوجه صالحه مش واحده كل همها لبس وميكب وتهريج ازاى عايزاني أقبل عن أذنك يا امي انا داخل انام
سابها ودخل واقفه متغاظه من كلامه
راضي : كفايه تجبرى العيال على كل حاجه كده مش كفايه تالين
عزه : يوووه كل شويه بقا هتسمعني الكلمتين دول ماخلاص اتجوزت وخلصنا فيه ايه بقا
راضي : ليه بتعاملى بنتك كده ياعزه هي مش زي ريتاچ الله يرحمها وسيف دايما تفضليهم عليها رغم انهم كلهم ولادك ليه بتفرقي
عزه بصدمه : انا بفرق
راضي بسخريه : هو انتي مش واخده بالك من ال بتعمليه ده كله مش واخده بالك انك جوزتي ريتاچ لريان اول ماعرفتي ان تالين بتحبه يبقا ده معناه ايه
عزه : انا عارفه مصلحتهم اكتر منهم
راضي : ولما تظلمي تالين بجوازها من أرمل وكمان عنده بنت
عزه : بس دي بنت أختها
راضي : مش واجب عليها تربى بنت أختها دفنتي شبابها بدرى ياعزه وكل شويه تعايريها انها عانس بنتك مكانتش عانس ابدا دي كان بيجيلها عرسان كتير اوى وانا ال كنت برفض برغبتها هي كفايه ظلم ليها لحد كده هتندمي اوى بعد كده
قال كلامه وسابها ودخل الأوضه
عزه دموعها نزلت بندم بعد كلام راضي ليها وحست بالذنب ناحية تالين
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹أذكروا الله
سيف كان بيكلم تالين فى التلفون وهو بيضحك وبيقول : يابنتي بقولك هحصلك عايزين يجوزوني بالإجبار
تالين بصدمه : انت كمان
سيف بضحك : اه وحياتك
تالين : طب انت عملت ايه
سيف بهدوؤ : طبعا رفضت البنت ال روحتلها النهارده دي مش هتنسابني نهائي انتي عارفه أخوكي
تالين بمرح : طبعا يابني انت فاكر أن هخلى اي واحده تاخدك مني ده انت الغالي
سيف بضحك : والله يابنتي محدش بيجبر بخاطرى غيرك ربنا يديمك ليا ويحفظك ياست البنات
تالين : ويخليك ليا ياحبيبي
سيف : عامله ايه مع ريان اوعي يكون بيضايقك
تالين بحزن حاولت أخفاؤه : عادي مفيش تعامل بينا كتير متقلقش انا بخير
سيف بقلق : بس صوتك مش بيقول انك بخير ياتالين
تالين بابتسامه : صدقني لو حصل حاجه اول واحد هكلمه انت خليك واثق فيا
سيف بابتسامه : وانا واثق فيكي ياتالين
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹صلوا على شفيعكم
فى المساء
تالين نيمت رقيه وخرجت اخدت كوفى ميكس ودخلت البلكونه وكان الجو برد ضمت الكوبايه بشرود ولقت ريان بيحط على كتفها چاكيت
ريان : الجو برد ايه ال خرجك البلكونه
تالين بهدوء : ده مكاني المفضل حتي وانا عند بابا
ريان : سامحيني ياتالين
تالين بصتله باستغراب : على ايه
ريان بندم : على كل حاجه انى أذيتك وزعلتك ودايما كنت بجرحك بكلام انتي مالكيش ذنب فيه انا اتصدمت فى اكتر واحده كنت فاكر أنها بتحبني صدقيني انا مكانش قصدي أكسرك بجوازى منها انا كنت فاكر حبك ليا أن زي اخوكي بس مش اكتر عشان خاطرى وخاطر رقيه سامحيني عايزين نعيش زي اي زوجين حياه طبيعيه بالله ونربي رقيه ونجيباها اخوات تعالي ننسي ونعيش ياتالين
تالين بصتله بهدوء وقالت : انا على فكره مسمحاك وكمان سامحت ريتاچ الله يرحمها وسامحت أمي على ظلمها ليا سامحتكم كلكم بس الوحيده ال مش عارفه أسامحها هي نفسى حاسه ان انا عايشه فى مكان مش مكاني حياه مش حياتي انا مدمره نفسيا بس الحل الوحيد أن أبعد عن ده كله
ريان بخوف : قصدك ايه ؟؟؟
تالين اتنفست بصوت عالي وقالت : هتطلقني وهسافر بعيد عنكم كلكم يمكن الاقى نفسي واسامحها
ريان بعصبيه : بس مش هطلقك ياتالين مش هطلقك انا بحبك
تالين بصتله وقالت بسخريه : .........
يتبع
البارت الخامس❤️
ريان بعصبيه : مش هطلقك ياتالين مش هطلقك انا بحبك
تالين بصتله بسخريه وقالت : بتحبني ؟؟ ده احساس بالذنب من ناحيتي ولا ايه مش فاهمه انت مش من يومين قولتلى انك عمرك ماهتفكر تحبني ايه حبتنى من يوم وليله ؟ قول كلام منطقى كلام تكون حاسه
ريان بتوتر : لاء والله أنا مشاعرى متلغبطه بس مش أكتر كل حاجه فى حياتي جت بسرعه جت بطريقه غريبه كنت محتاج وقت اخطط أمورى خليكي جمبي انا محتاجك الفتره دي اوى والله
لو هتفتكريها انانيه يبقا ابعدى ياتالين ابعدى بس خليكي عارفه ان حبيتك والله
قال كلامه وخرج من البلكونه على أوضته علطول وهي كانت بتفكر فى كلامه ومحتاره تصدقه وتمشى ورا قلبها ولا تسيبه وتبعد عنه نهائي وترتاح من العذ"اب ده ملاقتش غير أخوها هو الوحيد ال هيقدر يفيدها وينصحها من ده كله
خرجت تلفونها ورنت على رقمه واستنت الرد
سيف بقلق : ايه ياحبيبتى خير فيكي حاجه
تالين بهدوء : لاء ياسيف بس ممكن تجيلى وريان فى الشغل عايزاك فى حاجه ضرورى
سيف : حاضر ياحبيبتى اول لما يخرج كلميني وهجيلك علطول
تالين بابتسامه : حاضر ياحبيبي
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹استغفرووا
تاني يوم
سيف راح لتالين زي ماتفقوا ودخلوا البلكونه
سيف بقلق : ايه ياحبيبتى خير طمنيني
تالين : بص بصراحه كده ريان عرف أن كنت بحبه
سيف بصدمه : عرف منين
تالين بتوتر : شاف مذاكرات ريتاچ بص انا هحكيلك على ال حصل امبارح
سيف : تمام سامعك
حكت ليه كل حاجه ريان قالها وحصلت
سيف بتفكير : انتي عايزه تفضلى معاه وتعطيه فرصه ؟
تالين بلغبطه : مش عارفه ياسيف عشان كده حكتلك انا تايهه اوى انا بحبه ينفع اكمل معاه ولا هتجرح ولا ايه بالظبط ؟
سيف بهدوء : بصى ياتالين من رأي اعطي ريان فرصه صغيره وكوني جمبه فى اصعب وقت يعدي عليه ولو فى يوم فكر يجرحك انا ال هقفله وهطلقك منه بس جربي مش هتخسري كتير
تالين : هصلى استخاره وهقرر
سيف ابتسم وسكت
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹أذكروا الله
فى المساء
الجرس رن وتالين فتحت الباب وكانت امها
تالين باستغراب : ماما اتفضلى
عزه بندم : وحشتيني ياتالين
تالين بدهشه : وحشتك ؟؟
عزه بحزن : عارفه انك مستغربه أن بقولك كده لاني عمرى ماحسستك أن أمك بجد ياتالين بس والله انتي متعرفيش انا بحبك ازاى يابنتي
تالين دموعها نزلت وفى الوقت ده خرج ريان من الأوضه وسلم على عزه
عزه : كويس يابني انك موجود عشان لازم تسمعوا ال هقولوا
ريان : اتفضلى
عزه أبعدت تتكلم : انا عمرى ماكر"هتك ياتالين ابدا بس يمكن عشان ريتاچ كانت مطوعاني شويه كنت بتكلم معاها إنما أنا غلطانه أن عمرى مافكرت أقرب منك اكتر واعرف دماغك ظلمتك كتير واخر حاجه لما جوزتك جوز اختك غصب عنك مخلتكيش حتي تفكرى للأسف كنت متغيبه تماما كلام ابوكي واخوكي فوقني لو عايزه تطلقي يابنتي احنا معاكي ومش هيهمنا كلام الناس بس انتي حقك تلاقي ال يحبك صدقيني عمرى ماهنيجي عليكي تاني وياريت ياريان يابني توافق على اي قرار هي هتاخده
تالين كانت بتسمع الكلام ده ودموعها موقفتش خالص وريان كان حزين وخايف أن تالين توافق تطلق وكان مستني قرارها
تالين مسحت دموعها بهدوء وقالت : بس انا مش عايزه أطلق ياماما انا مبسوطه
ريان : تالين انتي متأكده ؟؟
تالين بصتله بابتسامه وقالت : عايزني اتطلق ؟؟
ريان بلهفه : لاء طبعا انا ماصدقت عرفت انك موافقه
عزه بدموع : تعالي فى حضني يابنتي
تالين جريت عليها وماصدقت سمعت كلامها واترمت فى حضنها وبكت بشده
عزه بحنان : حقك عليا يانور عيني مش هتشوفى بعد كده غير كل خير وحب وسعاده ربنا يسعدك يابنتي يارب ويفرح قلبك
تالين بدموع : يااااااه ياماما كان نفسى فى دعواتك دي من زمان انا كنت محتاجلك اوى متسبنيش ياماما عشان خاطرى
عزه قالت بحب : مش هسيبك ياحبيبتى ابدا والله
ريان بمرح : خلاص ياجماعه انا هعيط والله
تالين ضحكت على كلامه
وعزه قعدت معاهم شويه وقامت وصت ريان على تالين أن ميزعلهاش ومشيت وسابتهم
ريان : شكرا انك وافقتي تكوني جمبي
تالين بهدوء : بس لو ملقتش منك تقدير ياريان صدقني مش هتشوف وشي تاني عن أذنك هدخل علشان أتطمن على رقيه وسابته ودخلت
ريان ابتسم وقال بحب : هعوضك عن كل حاجه ياتالين ياحبيبتى متقلقيش
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹استغفرووا
عدا فتره وكانوا عايشين فى جو هادى فى بعض المناكشه من ريان لتالين بس كانوا ابتدوا يقربوا من بعض اكتر ويحكوا لبعض كل حاجه
وفى يوم كان خطبة سيف بعد لما اتقدم لبنوته من عيله ملتزمه عملوا خطوبه اسلامي وكمان عزه هي ال لبست الدبله للعروسه والفرح كان جميل جدا وتالين كانت أجمل بفستانها البيبي بلو وخمارها الاوف وايت
تالين بتأفف : انت ياعم انت بتشد بنت اختك وبعدين ازاى تخليني اسيب خطوبة اخويا ؟؟
ريان : بس بس ايه ماصدقتي تفتحي وبعدين فى واحده تقول لجوزها ياعم ؟؟
تالين : ايوه انا قولى عايز ايه خليني ادخل
ريان : لاء ماهو كفايه كده النهارده على الخطوبه انا هخط"فك
تالين بصدمه : تخط"فني !!!!! ياماما ياسيف يابابا
ريان حط ايده على بوقها وكتمه وقال : بس يامصيبه ايه هو أنا واحد غريب
تالين بخوف : عايز ايه ياريان
ريان بضحك على شكلها : يابنتي والله هنخرج انا وانتي بس مش اكتر
تالين : طب وسيف و
قاطعها ريان وقال : سيف عارف والله متقلقيش وهو ال متفق معايا يلا بقا
تالين : طب ورقيه؟
ريان : مع مامتك وهي كمان عارفه يلا بقا يا أخرة صبرى
تالين : طب
قاطعها ريان وهو بيشدها وبيقول : والله مانتي مكمله قدامي يلا
شدها بسرعه وركبوا العربيه وطلعوا على مطعم هادي فى مكان شيك جدا وقعدوا على ترابيزه شكلها لطيف وتالين ده كله مصدومه من ال بيحصل
ريان اتكلم بهدوء وقال : انا عارف انك مستغربه ال بيحصل كله بس انا حبيت النهارده نكون مع بعض ونتكلم شويه فى حياتنا ال جايه هسألك سؤال وتجاوبيني بصراحه لأن ده هيحدد ال بينا بالظبط
تالين : اتفضل
ريان : لسه بتحبيني ؟؟ ومتتهربيش منه ياتالين المره دي كمان
تالين بحزن : ايوه
ريان بفرحه : بما انك قولتيها انا عايز اعرفك أن بحبك ياتالين ومبقتش متخيل حياتي من غيرك ابدا انا بتكلم من قلبي والله مش مجرد كلام بيتقال
تالين بدموع فرحه : بجد ياريان
ريان : اه والله بجد انا مش هقولك من زمان والكلام ده الحب مش بالمده الزمنيه الحب بالشخص ال معاك موافقه تكملي معايا انا ورقيه باقي حياتك ونجيبلها اخوات حلوين شبهك كده وصدقيني لو ليكي رأي تاني مش هغصبك ابدا على حاجه
تالين بخجل : موافقه اكمل حياتي كلها معاكم ياريان انتوا عيلتي الصغيره
ريان ابتسم بارتياح وقال : صدقيني عمرى ماهخليكي تندمي ابدا على قرارك ده وهكون ليكى خير زوج
تالين بتنهيده : ربنا يقدرني واقدر اكون انا كمان زوجه صالح
ابتسموا الإثنين لبعض وهما مقررين ينسوا اي عوائق بينهم ويبصوا للمستقبل وحياتهم
تمت بحمد الله 💙
تعليقات
إرسال تعليق
فضلا اترك تعليق من هنا