رواية جميلة البارت 21-22بقلم الشيماء محمد
رواية جميلة البارت 21-22بقلم الشيماء محمد
#الحلقه_٢١
#جميله☺️
جميله اول ما وليد فتح الباب اتفاجئت جدا لان ساعتها شافت اهلها .. عمها ومرات عمها وعياله واخوها فجريت عليهم سلمت عليهم كلهم ووليد دخل معاها وبعد السلامات اخدت بالها من حد تاني قاعد ما تعرفوش فبصت لوليد اللي ابتسم
وليد : ده مأذون
جميله باستغراب : مأذون ؟ لمين ؟ مين هيتجوز ؟ ( بصت لاخوها) اوعي تكون انت ؟
عماد : لا مش أنا ما تبصيليش
وليد اتدخل : المأذون ليا أنا
جميله باستغراب وزعل : إنت .. هتتجوز تاني ؟
وليد باستغراب : أتجوز تاني ؟؟ ( استوعب قصدها ) أه ليه لأ؟ الشرع محللي اربعه ولا إيه ؟ وبعدين فكرة الجواز عجبتني
جميله زعلت والدموع لألئت في عنيها : مبروك مقدما يا وليد
يدوب هتمشي فوليد مسكها بسرعه ووقفها قدامه ومسح دمعة نزلت علي خدها : حقك عليا يا قلبي بس غصب عني إنتي هبله أعملك إيه ؟
جميله : هبله ليه ؟
عماد أخوها اتدخل : علشان المأذون ليكم انتو الاتنين يا فصيحه
جميله بصت لوليد بعدم فهم : حبيبي هنتجوز شرعا بدال العقد يعني علشان اضمن حقوقك واطمن عليكي أكتر
جميله : وليد أنا ما يفرقش معايا كل ده .. أنت ليه مصر تتكلم في موضوع حقي وأحميكي و و و ؟ ليه بتخوفني من بكره ؟
وليد : مش قصدي أخوفك بس ده أبسط حقوقك وبعدين علشان ابنك فكري فيه هو .. بعدين نتكلم بعدين يالا المأذون مستني
كتبوا الكتاب واحتفلوا والكل بارك لهم وبعدها سابوهم ومشيوا
وهما كملوا احتفالهم لوحدهم ..
وليد : أخيرا بقينا لوحدنا .. وحشتيني
جميله : انت كمان
وليد : انا كمان ايه ؟
جميله بخجل : انت كمان وحشتني
وليد : طيب بعيده كده ليه ما تقربي
جميله : انت بقيت كويس يعني ! خايفه اوجعك
وليد : بعدك بس اللي بيوجعني حاليا
شدها ليه وقربها منه قوي واتقابلت عنيهم في نظره طويله مليانه حب وليد وطي وشالها وحس بألم في صدره ودراعه بس حاول ما يظهروش
جميله : ضلوعك ودراعك انت مجنون نزلني حالا
وليد : دول كام خطوه يدوب
دخلوا اوضتهم وفضلوا يتكلموا و وليد عايز جميله تعترف بمشاعرها لكن هيا حرجها وحياءها مانعها
وليد : وبعدين معاكي
جميله بغيظ: وبعدين مالي ؟ انا مش فاهمه انت مالك ؟
وقفت وماشيه : انتي رايحه فين كده ؟
جميله : هغير هدومي
وليد : وقالبه وشك ليه كده ؟
جميله : انا مش قالبه وشي سلام
وليد : مالك يا جميله ؟
جميله انفجرت : انت عايزني اقولك ايه مش فاهمه ؟ هو لازم اقول اصلا كلام ! انت فاهم كويس قوي اللي انا عايزه اقوله
وليد زعق هو كمان : وليه ما تقوليش اللي انتي عايزاه ؟ هاه ؟ عماله تلفي وتدوري ليه مش صريحه ! ليه بتخبي مشاعرك ! زي ما انتي بتبقي عايزه تسمعي مني وعايزاني اعترف بحبي او اقول اني عايزك انا كمان عايزك انتي تطلبي مني او تكلمني او تقوليلي انك محتاجاني
جميله : ما ينفعش
وليد : ليه علشان ايه ؟ لازم الراجل اللي يتكلم يعني ؟
جميله : لا مش حكايه لازم او راجل او غيره
وليد : امال حكايه ايه فهميني ؟
جميله : حكايه ان انت تعبان وخارج من حادثه كبيره والحمد لله انك خرجت منها علي خير ومعرفش انت حالتك ايه او حاسس بايه او رجعت لطبيعتك ولا لسه فما ينفعش اطلب حاجه منك .. ما ينفعش اقولك اني محتاجالك حاليا او اني هموت عليك .. يمكن اجرحك بدون ما اقصد او حتي اضايقك .. فما ينفعش .. ما ينفعش في التوقيت ده اتكلم ..فهمت ولا لسه ؟
وليد قرب منها ورفع وشها : فهمت بس اعتقد يا جميله ان انا وانتي واحد .. انتي خايفه تجرحي شعوري كراجل ماشي انا معاكي بس انا وانتي كيان واحد .. ايوه انا ممكن اهتم برجولتي او منظري قدام الناس او قدام واحده زي ميس لكن انتي مش بحس اني المفروض اخبي عنك او اتعامل بحساسيه معاكي .. جميله انتي الوحيده اللي في الكون ده كله اللي بكون علي طبيعتي معاها .. بكون انا وبس .. بعمل كل اللي نفسي فيه واللي بتمناه معاكي وبالتالي عايزك انتي كمان تكوني كده .. يعني كل الحوار ده يخلص بسؤال واحد .. كفايه قوي تسأليني اذا كنت كويس او لأ ؟
جميله بصتله : انت كويس ؟
وليد ابتسم : انا كويس
جميله هنا باسته هيا بكل الحب والشوق واللهفه والغل حتي اللي جواها وهو بادلها حبها بحب اكبر وشوقها بشوق اكبر
جميله وهيا في حضن وليد : المهم
وليد : ايه المهم ؟ قولي
جميله : ليه خليت جوازنا شرعي او قانوني
وليد : خطوه اتأخرت فيها كتير فكان لازم اعملها بقي
جميله : انا ما اعترضتش بس
وليد : جميله انتي مراتي انتي وبس فكان لازم يكون الوضع صح
جميله : وميس ؟ هتعمل ايه لما تعرف ؟
وليد : تشرب من البحر ما تشغليش بالك بيها
جميله : رحت فين كده الصبح ؟ وليه مقولتليش رايح فين ؟
وليد : جهزت لليله دي
جميله : لا الصبح قصدي كان وراك حاجه مهمه وخرجت انت ومعظم رجالتك
وليد : كانت شغلانه كده خلصتها ما تشغليش انتي بالك .. المهم انا جعان جدا
جميله : جعان وجدا .. ده احنا متعشيين
وليد : ما اكلتش قوي .. كنت عايزك انتي تأكليني
ضحكت : بس كده انت بس تشاور لحظه وهجيب الاكل ..
في الفيلا
اكرم رجع بالرجاله وهناك قابلته نبيله : فين وليد وجميله ؟
ميس اهتمت تسمع الاجابه
اكرم : هيباتوا بره الليله
نبيله : هيباتوا فين ؟ وليه مفضلتش معاهم ؟ افرضنا حاجه حصلت ؟ اكرم مكنتش تسيبه
اكرم : هو بأمان حضرتك ما تقلقيش .. بعدين محدش يعرف مكانه وغير كده هو عايز يفضل لوحده مع مراته ويقضي وقت خاص ( بص لميس واكد علي كلمه مراته )
ميس بصت بعيد واستنت لحد ما خرج : خليه يعمل اللي يعجبه لحد ما يتكشف وكل حاجه تبان .. انا مش عارفه انتي سكتاله ليه
نبيله : هو حر .. هو ادري بمصلحته
ميس: يعني واخد اللي اسمها جميله دي معاه ليه ؟
نبيله : مراته .. واكيد وحشته وبعدين انتي ايه اللي مضايقك ؟ ولا علشان خف ووقف علي رجله ومعدش محتاج مساعده ؟
ميس: علي فكره هو اللي بعدني عنه مش انا اللي بعدت
نبيله : كان بيبعد جميله بس هيا رفضت تبعد وفضلت تحت رجليه ليل ونهار مع انها تعبانه وحامل بس وقفت جنب جوزها .. ما سابتوش للحظه .. مخلتش حد من الشغالين يلمسه او يديله حتي كوبايه ميه .. هيا كانت سنده
ميس وقفت : خدامه متوقعه منها ايه ؟ بعد اذنك
سابتها وخرجت ونبيله قالت لنفسها : عمرك ما هتفهمي .. ده كان حب مش خدمه .. حب وبس
وليد رجع اخر النهار تاني يوم ومقالوش لاي حد علي جوازهم الرسمي خالص حتي نبيله .. واليوم اللي وراه نزل الشغل وهناك بدأ يشوف ايه اللي فاتوا في الفتره اللي تعب فيها ..
نسمه دخلت عند علاء : علاء انا نازله مع الاجهزه للمستشفي
علاء : وحشتيني يا بت انتي تعالي هنا
نسمه : انا كنت معاك الصبح مالحقتش اوحشك سلام
علاء وقف : تعالي هنا .. الصبح ده كان من تلات ساعات واكيد طبعا وحشتيني .. تعالي هنا
نسمه ضحكت ودخلت وسندت علي الباب : عايز ايه ؟
قعد علي كرسيه : تعالي
قربت منه : تصدق من زمان نفسي اكون علي علاقه بمديري .. علاقه سريه ونسرق لحظات مع بعض
علاء شدها عليه : طيب فرصتك اهي خلينا نسرق لحظات
نسمه : ايوه بس ممكن حد يدخل هيكون شكلنا ايه ؟
علاء: اولا محدش هيدخل بدون استئذان وثانيا انتي مراتي
عند وليد
جاله تليفون وبعد ما خلص كان علي اخر غضبه وقمه العصبيه فقام بعكازه وراح لمحي
محي : خير مالك وشك بيطلع نار ؟
وليد : يعني المفروض وانا في المستشفي تهتموا ولو من باب التمثيل بالشغل شويه يعني افهم لما الشركه تقع هتستفادوا ايه ؟ ايه المكسب في ده ما انتو هتقعوا معاها
محي : انت بتتكلم عن ايه ؟ انا مش فاهم
وليد : اه اعمل نفسك مش فاهم .. ولا علاء ما بلغكش باللي عمله واتصرف من دماغه !
محي : ماله علاء عمل ايه ؟
وليد : استغل ان انا مفيش واستورد اجهزه مضروبه وطبعا في اقل من شهر الاجهزه كلها وقفت والمستشفي بتتصل عايزه تنفذ الشرط الجزائي يا اما نستبدل الاجهزه كلها بأجهزه سليمه تقدر تقولي مين هيتحمل الخساره دي !!
محي : علاء ما يعملهاش اكيد في غلط في الموضوع
وليد : بجد علاء ما يعملهاش ؟ انت مصدق نفسك وانت بتقول كده !
محي : ايوه مصدق
محي خرج ورايح عند علاء ومعاه وليد وخالد لمحهم فراح وراهم
خالد : في ايه مالكم ؟
محي: مش وقتك يا خالد امشي دلوقتي
وصلوا المكتب ومحي فتحه مره واحده وهنا علاء ونسمه اتنفضوا لانها كانت علي حجره ووضعهم مش ظريف ..
محي قفل الباب بسرعه ووليد ضحك باستهتار : هو اصلا ولا علي باله ولا مهتم بالشغل اصلا .. كفايه اللي هو فيه
محي ما ردش وعلاء فتحلهم الباب وهو مستغرب مالهم
علاء: في ايه مالكم ؟
محي : اخر صفقه انت استوردتها .. اتعاملت مع انهي شركه ؟
علاء: الشركه بتاعتنا اللي بنتعامل معاها علي طول ليه ؟ في ايه؟
وليد اتدخل : في ايه ؟ في ان الاجهزه كلها وقفت ومش شغاله وده مالوش غير معني واحد ان سيادتك جبت اجهزه مضروبه من الشركه اياها وحطيت فرق الفلوس في جيبك فهمت في ايه ؟
علاء: انت بتخرف بتقول ايه ؟ اجهزه ايه اللي مضروبه ؟
وليد : الاجهزه اللي سيادتك روحت ركبتها
نسمه اتدخلت : انا اللي ركبتها وكلها كانت شغاله ..
وليد اتنرفز عليها : بجد كانت شغاله !! وهو انتي اصلا مركزه في الشغل علشان تعرفي اذا كانت شغاله ولا لأ !! خليكي في اللي انتي فيه والنبي
نسمه اتحرجت وسكتت وعلاء اتنرفز : انت مالكش حق تتكلم معاها كده
وليد : انا اتكلم بالطريقه اللي انا عايزها مع اي حد هنا
علاء : لا طبعا
اتدخل خالد : اهدوا انتو الاتنين .. وليد الاجهزه سليمه انا كنت معاه في الصفقه دي
وليد : انت كنت معاه !! يااه بجد !! ما انت طول عمرك معاه في الغلط قبل الصح انت معاه
ندي جت علي صوتهم العالي وبصت لجوزها : في اي؟ انت عملت ايه ؟
خالد : مفيش حاجه ما تدخليش انتي
وليد : ليه ما تدخلش .. الاساتذه الاتنين استوردوا اجهزه مضروبه واهي وقفت في شهر والمستشفي حاليا عايزه ترفع قضيه علينا او نستبدلها الاجهزه .. صفقه زي دي هتخسرنا علي الاقل عشرين مليون دولار ده غير سمعتنا ده غير ارواح الناس اللي بنلعب بيها .. دي مستشفي
محي : استني نسمعه الاول قبل ما تصدر قرارك علاء ايه اللي حصل ؟ والاجهزه منين ؟
علاء: الاجهزه مش مضروبه انا محطتش فلوس في جيبي واتعاملت مع نفس الشركه مغيرتهاش
محي : اهو قالك اهو
وليد : ياه بجد قالي !! والمفروض اني اصدقه دلوقتي ؟
محي : ايوه تصدقه
علاء : وليد اكيد في حاجه غلط
وليد : الحاجه الغلط هيا وجودك انت هنا .. كان المفروض من ساعت ما عرضت نتعامل مع الشركه اللي شغاله في المضروب كنت اتصرفت او من ساعة ما سرقت الاجهزه وهيا في المينا لكن انا غلطان اني بديك فرصه وري التانيه
علاء: لحد كده وكفايه يا وليد .. انا هروح المستشفي بنفسي واشوف ايه اللي حصل
وليد : انت اكيد هتروح وتاخد معاك حد
نسمه قاطعته :انا هروح معاه لان الاجهزه كلها كانت سليمه وشغاله
قاطعها وليد : انتي ما تروحيش في اي مكان .. انتي ما تتخيليش صدمتي فيكي ازاي دلوقتي !! كنت متخيل انك هتغيريه .. الحب هيخليه انسان تاني لكن ما تخيلتش ابدا انك انتي اللي هتتغيري وتتخلي عن مبادئك وقيمك معاه
علاء : نسمه هتيجي معايا
وليد : تروح معاك كزوجه انت حر لكن كحد من هنا لأ .. هيروح معاك المهندس المسؤل وهسمع تقريره لما يرجع اتفضل
علاء : انا هتفضل بس انت غلطان في اتهامك ده وهتدفع تمنه
وليد : انا عايز اكون غلطان .. ارجوك اثبتلي ان انا غلطان
ندي اتدخلت : هتدفعه تمنه ازاي يعني ؟ هاه عايزه افهم
وليد : خلاص يا ندي
ندي : لا مش خلاص عايزه افهم بيهدد بإيه ؟ هتروح انت وخالد من تاني تأجروا شويه بلطجيه يحاولوا يقتلوه
خالد : بلطجيه ايه يا ندي بس
ندي : بلطجيه زي ما عملتوها قبل كده
محي : احنا محدش فينا له علاقه بالحادثه دي .. لم اختك يا وليد وبلاش ندخل في السكك دي
وليد : ندي .. اسكتي
علاء: البلطجيه دي احنا ملناش علاقه بيها وبعدين حد بيروح يأجر بلطجيه يوم فرحه انتي اتجننتي ؟
ندي : ايوه تعملوها علشان محدش يشك فيكم
خالد : يا بنتي محدش فينا له علاقه باللي حصل ده
ندي : محدش غيركم عايز يأذيه
علاء: لا فيه .. اخوكي اعداؤه كتير فوق ما تتخيلي
ندي : مالوش اعداء غيركم ياللي المفروض تكونوا اخواته
وليد شدها : قلت اسكتي وما تخلطيش الامور ببعض دلوقتي نشوف المصيبه اللي احنا فيها اتفضل يا علاء
محي : علاء هيروح بس لو طلع مالوش علاقه باللي حصل يا وليد ...
وليد : هعتذرله قدام الكل لكن قسما بالله لو طلعت الاجهزه مضروبه مش هيفضل فيها هيكون ده اخره معانا هنا
محي قلق لانه خاف ان علاء يكون فعلا عملها فسكت
وليد مشي من قدامهم وندي وراه وكلهم فضلوا وصمت سيطر عليهم للحظات قطعه محي : اوعي تكون بدلت الشحنه بمضروبه
علاء باستغراب : انت بتقول ايه انت كمان ؟
محي : بقول انك كتير بتكون غبي وممكن فعلا تعملها
نسمه بتبص لعلاء بخيبه امل كبيره وكأنها اتصدمت فيه
خالد : عمي الاجهزه فعلا سليمه واستوردناها من نفس الشركه اللي بنتعامل معاها
محي : امال ايه اللي حصل طيب ؟
علاء : هروح واعرف بعد اذنكم ( اتحرك بس نسمه فضلت واقفه فبصلها ) مش هتيجي ؟
نسمه : لأ روح انت
علاء رجعلها : تعالي معايا
نسمه : لا معلش روح انت كفايا عليا صدمات ليوم واحد .. مش هستحمل لو الاجهزه طلعت مضروبه انا هروح واستني تكلمني
علاء : الاجهزه سليمه انتي فاهمه ؟
نسمه ابتسمت بوجع : اكيد بس معلش روح انت
مشي ومعاه خالد ومعاهم المهندس اللي وليد بعته
عند وليد
ندي : اطردهم الاتنين من الشركه ده عقابهم الوحيد
وليد : الاتنين اللي هما مين ؟ نسمه وعلاء؟
ندي : نسمه ؟؟ وهيا نسمه مالها ؟ اقصد خالد وعلاء
وليد : اول مره اشوف واحده بتتمني الشر لجوزها زيك .. لا سوري مش اول مره .. تاني مره ..يا بنتي اهدي علي جوزك
ندي : جوزي حاول يقتلك .. اهدي ازاي هاه ؟ افضل معاه وانا مطمنه ازاي ؟ اعيش معاه ازاي ؟ جوزي عايز يقتل اخويا
وليد : يخربيت الغبا .. يا بنتي ماقلتلك من ساعتها جوزك مالوش علاقه باللي حصل ده نهائي
ندي : انت بس بتقول كده علشان ارجعله وانا مش هرجعله
وليد باستغراب : هو انتي لسه مرجعتيلوش كل ده ؟ طب والله كويس انه مستحملك
ندي : انت بتهزر ؟
وليد : يعني اعمل ايه لغباءك ده .. قلتلك جوزك مالوش علاقه وانتي غبيه لازم يكون عندك ثقه فيه يا ندي .. الحياه ما تنفعش بدون ثقه ابدا
ندي : انا فعلا ما بثقش فيه
وليد : يبقي في حاجه غلط عندك .. خرجيني بره حساباتك يا ندي .. شوفي ايه الغلط اللي بينكم وصلحيه .. جوزك فعلا بريء من الحادثه دي اللي عملها حد تاني خالص .. لا هو ولا علاء ولا محي حتي .. وانا مش بقولك كده علشان ترجعيله
ندي : مين اللي عملها ؟
وليد : حد تاني خالص
ندي : انت عارفو يعني ولا بتخمن ؟
وليد : عارفو طبعا
ندي : ومستني ايه ؟هتعمل ايه ؟
وليد ابتسم بخبث : لحظه مناسبه اصبري وهتعرفي هعمل ايه المهم دلوقتي ان خالد مالوش ذنب
ندي : طيب احلف .. احلف بحياه جميله واللي في بطنها
وليد باستغراب : احلف ! انتي حتي انا مش مصدقاني !! طيب وحياه جميله وابني اللي في بطنها خالد وعلاء مالهمش دخل ابدا هاه ارتحتي كده ؟ روحي لجوزك وحاولي تصلحي علاقتكم قبل ما توصل لمرحله ما ينفعش تتصلح بعدها
ندي وهيا ماشيه : انت قلت اني تاني واحده مين اول واحده ؟
وليد ابتسم : خليكي في نفسك ممكن ؟ يالا روحي صالحي جوزك يالا
اخر النهار علاء رجع بس لقي وليد روح فراحله البيت زي المجنون ودخل وأكرم وراه متحفز وهو بينادي عليه بصوت عالي ونزلت ميس ونبيله وجميله مسكت في وليد مش عيزاه ينزل
وليد : اهدي دي مشكله في الشغل هنحلها بهدوء خليكي هنا
وليد نزل وعلاء متعصب وأكرم واقف وراه باصص لوليد مستني اوامره وينقض عليه
وليد بهدوء : خلاص انت يا اكرم ده خلاف في الشغل .. اهدي يا علاء واقعد
علاء: لا مش ههدي ومش هقعد علشان الاتهام اللي اتهمتهولي النهارده مش مقبول
نبيله : اتهام ايه ؟ ايه اللي حصل ؟
ميس خافت يكون وليد اتهم علاء وعلاء هيقول انها هيا اللي طلبت البلطجيه وليد لاحظ توترها وفهمه وابتسم
وليد : عارف ان الاتهام مش مقبول وانا اسف يا سيدي اني اتهمتك
علاء باستغراب : اسف ! انت المهندس كلمك ؟
وليد : محدش كلمني لأ
علاء : امال بتتأسف ليه ؟
وليد : لاني لما بغلط بتأسف انا اتهمتك انك استوردت اجهزه مضروبه واتهامي مش في محله لاني كلمت الشركه واكدوا ليا انهم بعتوا الاجهزه وانت استلمتها .. مهما يكون حصل بقي في المستشفي فده مش غلطنا وعلشان كده بقولك اسف
علاء هدي نوعا ما : حصل عطل في محولات الكهربا عندهم وده عمل زي قفله في الاجهزه لانها متصممه انها تفصل في حاله اي خطأ في الكهربا كخاصيه امان علشان ما تتحرقش وده اللي حصل انها فصلت لكن كلها سليمه
وليد : طيب كويس
علاء اتنرفز تاني : لا مش كويس انت اتهمتني وغلطت فيا انا ومراتي .. مراتي اتصدمت فيا .. انت مش متخيل انا حاسس بايه دلوقتي يا وليد
وليد : لا متخيل .. احساسك ده نفس الاحساس اللي بحسه منك في كل مصيبه انت بتعملها .. خيبه امل .. قهر .. غيظ .. احساس ان ممكن تقتل اللي قدامك .. احاسيس كتيره قوي .. ده اللي بحسه منك يا علاء .. المهم روح صلح علاقتك بمراتك واشرحلها اللي حصل ولو عايزني اكلمها معنديش مشكله وجهز نفسك لحفله الخميس لازم تكون موجود انت وهيا
علاء : انا مش هحضرلك حفلات لا انا ولا مراتي
وليد : وتفوت فرصه اني اعتذرلك قدام الكل انت ومراتك واقول اني غلطت في حقك !! ما اعتقدش
علاء سكت : ربنا يسهل سلام
وليد : سلام بس اكلم نسمه ولا ؟
علاء : لأ .. مش عايزك تتوسطلي عند مراتي مش دي كمان هيكونلك كلمه فيها
وليد ضحك : تاني مره ابقي اقفل الباب بالمفتاح ومراتك معاك
علاء ابتسم : المفروض ان انتو اللي تخبطوا .. وبعدين الغيران يعمل زينا
وليد : ماشي هعمل زيك
علاء بص لميس : ما اعتقدش هتعرف
وليد بص هو كمان لميس : عيب عليك .. روح لمراتك وابقي طمني
علاء مشي وميس ونبيله بصوا لوليد : ايه اللي حصل ؟
وليد : مشاكل في الشغل واتحلت
ميس : قصده علي ايه اللي مش هتعرف تعمله ؟
وليد بصلها : ده بقي شيء ما يخصكيش نهائي ده يخص مراتي ..بعد اذنكم هطمن جميله زمانها قلقانه
علاء روح بيته : نسمه !! نسوووم ! بيبي انتي فين ؟
دخل يدور عليها بس ملقهاش في البيت فاتصل عليها وردت عليه مامتها صفاء : ازيك يا علاء
علاء: اه اهلا ست الكل امال نسوم فين ؟
صفاء اترددت شويه : نايمه
علاء : امممم ماشي طيب
صفاء : اصحيها حبيبي
علاء : لا يا ست سيبيها مرتاحه
قفل وفضل كتير واقف مش عارف يعمل ايه ؟ يسيبها ؟ يروحلها ؟ كان المفروض تستني تسمعه ما تحكمش عليه !!
اخيرا قلبه اخد القرار وخرج من البيت وراحلها
صفاء : علاء ! اهلا حبيبي اتفضل
علاء : نسمه صحيت ولا لسه نايمه ؟
صفاء : ادخلها شوفها انت
دخل علاء لحد اوضتها وخبط ودخل كانت قاعده علي السرير
علاء : انتي مش في البيت ليه ؟
نسمه : عادي كنت مخنوقه شويه وجيت اقعد مع ماما فيها مشكله ؟
علاء : انك تقعدي مع ماما لأ لكن انك تيجي بدون ما تعرفيني !!
نسمه : سوري بس ما فكرتش
علاء : طيب يالا نروح بيتنا !
نسمه : لو قلتلك عايزه افضل هتقولي ايه ؟
علاء : هقولك لأ في كلام كتير لازم نتكلمه !
نسمه : سيبني هنا الليله وبكره هاجي
علاء اتنرفز : مش هسيبك وبعدين اقفي وكلميني انتي بتعامليني بالبرود ده ليه ؟ طيب علي الاقل اسأليني عملت ايه وايه اللي حصل في المستشفي ؟
نسمه وقفت : ايه اللي حصل ؟
علاء : الاجهزه سليمه طلع في مشكله في محولات الكهربا عندهم
نسمه : اههه طيب كويس
علاء : ايه كويس دي ؟ بقولك الاجهزه سليمه
نسمه : انت عايز ايه يا علاء مش فاهمه !! المفروض افرح يعني
علاء : ده اقل واجب
نسمه : افرح علي ايه يا علاء !! انك مطلعتش حرامي !! ان ابن عمك وابوك نفسه شايفينك حرامي وان ممكن تسرق ؟ ده اللي عايزني افرح علشانه ؟ سوري مش قادره افرح
علاء : انتي مش فاهمه حاجه فاسكتي
نسمه : لا مش هسكت .. ليه بيعتبروك حرامي يا علاء ؟
علاء: نسمه اذا سمحتي بلاش نتكلم في الموضوع ده
نسمه : لا طبعا لازم اتكلم لازم اعرف ليه جوزي اقرب الناس ليه بيعتبروه حرامي وهل انت فعلا ممكن تسرق ؟ انت حرامي يا علاء ؟
علاء: انتي ايه اللي بتقوليه ده ؟
نسمه : بقول اللي ابوك وابن عمك قالوه .. انت حرامي ؟؟
البنات اللي متعاطفه مع ميس ضدها او مع جميله او ضدها او مع وليد او ضده او شايفه ان جميله بتتعامل بسهوكه .. معامله جميله دي الصح فلو انتي مش زي جميله مع جوزك راجعي نفسك وبدال ما تتعاطفي مع ميس ان جوزها نسيها وانه بص لغيرها وانه وانه وبتلوموا فيه هو .. الاحسن صلحي انتي من نفسك وخليكي جميله في بيتك .. جميله اللي بتقف تستقبل جوزها .. جميله اللي بتهتم براحته حتي علي حسابها .. جميله في كل شيء بتعمله .. فبلاش تعاطف مع ميس وتلتمسيلها اعذار لان مفيش اعذار بلا حماتها بلا ابوها .. ركزي في بيتك واهتمي بزوجك وخليه ديما رقم واحد حتي قبل عيالك وصدقيني عمره ابدا ما هيبص لغيرك حتي لو نزلتله مليون جميله لانه عنده جميلته الخاصه .. دي نصيحه مني اتمني تقبلوها اتمني تكون الحلقه عجبتكم ...
انتظروني ☺️
#الحلقه_٢٢
#جميله☺️
علاء: انتي ايه اللي بتقوليه ده ؟
نسمه : بقول اللي ابوك وابن عمك قالوه .. انت حرامي ؟؟
علاء : لا طبعا .. اللي هما بيتكلموا فيه ده بيزنس وحوارت قديمه انتي مالكيش فيها
نسمه : اي شيء يخصك قديم جديد يبقي ليا فيا
علاء : بس مش في الامور دي
نسمه : ايه هو انا مراتك بشغل جزئي ولا ايه ؟ فهمني
علاء : لا يا نسمه ده موضوع ما يخصكيش .. علاقتي بوليد ومشاكلها ما تخصكيش
نسمه : خلاص يبقي انا اسفه انا مش هروح معاك البيت
علاء : انتي بتلوي دراعي ولا ايه ؟
نسمه : لا يا علاء بس انا مش هقدر اطمن اعيش مع راجل ممكن يسرق ابن عمه الفكره نفسها مرفوضه ..
علاء : انا مش هسرق ابن عمي انا بس باخد حقي
نسمه : انا عمري ما امنت بمبدأ الغايه تبرر الوسيله ده ابدا .. السرقه ملهاش مسميات تانيه بس هستغرب ليه قبل كده كان عندك مبررات للاغتصاب فعادي انك تبرر للسرقه
علاء : انتي كده بتظلميني وبتخلطي الامور ببعض .. انا عمري ما فكرت اغتصبك
نسمه : امال ايه ؟ انا عديت الموضوع لاني بحبك بس الظاهر اني كنت غلطانه كنت بقنع نفسي ان انت انسان كويس وضعفت في لحظه بسبب حبك ليا لكن كمان تسرق ومين اقرب الناس ليك !! فده لأ وألف لأ لحد هنا ولأ يا علاء مش هعيش مع راجل عنده استعداد يدخل بيتي مليم واحد حرام
علاء : ده مش حرام ده حقي فاهمه حقي
شرحلها وجهه نظره وشرحلها كل المشاكل اللي حصلت ووجهه نظر ابوه وكلام وليد نفسه وهيا ساكته تماما لحد ما هو كمان خلص وسكت
علاء : هاه ؟ يبقي حقي ولا لأ ؟
نسمه : لا مش حقك .. انت سبق وقولتلي انك عشت عمرك بره وراجع من كام سنه صح ؟ وخالد كمان لسه راجع قريب صح ؟
علاء : ايوه صح بس ده ايه علاقته ؟
نسمه : ده هو ده الاساس .. انتو سافرتو ومشيتو وعشتوا حياتكم وابو وليد هو اللي فضل راعي الشركه بغض النظر هو فعلا جدك سابها مديونه او سابها كويسه بس اللي استلمها هو ابو وليد .. هو اللي اشتغل وهو اللي كبرها ومن بعده مسكها ابنه وكمل مشوار ابوه جايين انتو دلوقتي بعد ما بقت مجموعه كبيره وليها اسمها ووضعها تفتكروا ان ليكم حق !! لا طبعا والف لأ مش حقكم .. ده غير كمان لو فعلا سابها مديونه وده المنطقي لانه لو سابها ناجحه مكنش عمك وابوك سابوها وسافروا لكن العقل بيقول انهم لقوها صفقه خسرانه فسافروا وسابوها لاخوهم ولما لقوها نجحت رجعوا فبالتالي المفروض تحمد ربنا ان ابن عمك عنده اصل ورضي يشغلكم ويعتبركم اخواته انت وخالد
علاء : انتي بتقولي ايه ؟
نسمه : بقول ان وليد طلع جدع وراجل وشغلكم ومسككم كلكم مناصب كبيره واعتبركم شركاء معاه واحد غيره كان قالكم بره مالكوش مليم احمر واخرتها ايه بتحاولوا تشاركوه في ملكه وملك ابوه وعايزين تسرقوه ده انتو ايه ؟
علاء : انتي مراتي المفروض تكوني في صفي .. مش في صف وليد
نسمة : انا لا في صفك ولا صف وليد انا مع الحق .. الحق بيقول ان الشركه لوليد وتحمدوا ربنا انكم شغالين فيها
علاء : لا طبعا كلامك غلط والمفروض ان التلاته يكونوا واحد وبالتالي انا وخالد و وليد واحد برضه
نسمه : يعني اللي يشتغل زي اللي ما يشتغلش ؟؟ ده في انهي شرع ولا انهي منطق ده ؟ ان الكل يتساوي ؟؟ لو انت مكانه كنت هتديهم ؟ كنت حتي هترضي تشغلهم ؟؟ حط نفسك مكانه الاول قبل ما تتكلم
علاء : بقولك ايه انا ليا حق وهاخده .. بالذوق بالعافيه هاخده من وليد فهمتي ؟
نسمه : للاسف فهمت يا علاء
علاء : يالا بقي علي البيت
نسمه : انا اسفه بس مش هقدر اروح معاك
علاء : انتي بتعملي كده ليه ؟ علشان وليد ؟ مهتمه بيه كده ليه ؟ خايفه عليه كده ليه ؟ ( وفجأه وكأنه استوعب حاجه ) اوعي تكوني ... بتحبيه ؟
نسمه اتفاجئت : نعم ؟ بحبه ؟ انت الظاهر اتجننت
علاء : من زمان وانتي بتهتمي برأيه وبمنظرك قدامه وبتاخدي كلامه ثقه والنهارده زعلتي جدا انه وجهلك كلمه معناه ايه ده كله؟ غير انه حب واهتمام بس انا اللي غبي ومش واخد بالي ؟ ده حتي هو بيقولك النهارده انه امله وظنه خاب فيكي قصده انك اتجوزتيني صح ؟
نسمه : انت مش طبيعي .. لا انت غبي .. انا بحبك انت يا غبي وليد مجرد حد محترم الواحد غصب عنه بيحترمه وزعلي علشانك انت مش علشانه .. زعلانه لاني شايفه جوزي انسان مستعد يسرق او ياخد حق مش حقه .. زعلي عليك انت .. انت وبس لكن الانسان الغبي ممكن يغير في الحقايق ويشوف علي مزاجه
اطلع بره يا علاء وماتجيش هنا تاني الا اذا كنت مستعد تتغير وتعيش انسان نظيف وما يبصش علي اللي في ايد غيره ارجوك علاء خليني اثق فيك .. خليني اعيش مطمنه مع جوزي ... اطلع بره ارجوك
وهو خارج وقفته وابتسم بس ابتسامته اختفت بسؤالها
نسمه : انت ليك يد فعلا في اللي حصل لوليد ؟
علاء بصلها بعنف : لأ مش للدرجه دي يا نسمه
نسمه : ليه مش للدرجه دي انت مش لسه بتقول بالذوق او العافيه ماهي دي العافيه؟
علاء : انا معنديش رد ليكي
بقلم /
shimooo novels الشيماء محمد
خرج علاء وهيا قعدت مكانها تعيط ودخلتلها صفاء : قولتيله ؟
نسمه : لا طبعا مقولتلوش .. ازاي اقوله ؟ بيفكر بطريقه غريبه وعايز يسرق وليد ده مش بعيد يكون بيفكر يخلص منه انتي متخيله ؟
صفاء : طيب كنتي قولتيله انك حامل وده هيخليه يعيد حساباته كلها ويفكر من جديد
نسمه : لا طبعا .. ممكن يضحك عليا بكلمتين .. مش هقوله ومش هعرفه غير لما احسه فعلا عايز يتغير
علاء خرج من عندها وهو عايز يرتكب جنايه واتصل بخالد واتقابلوا سهروا مع بعض ..وكل واحد بيتكلم في مواله والتاني مش سامعه خااالص
ندي فضلت تفكر في كلام اخوها واخيرا وصلت ان لو خالد فعلا له يد في اللي حصل لوليد فأكيد اخوها مش هينكر ده لمجرد انهم يتصالحوا لان ساعتها اقل شيء هيخاف عليها منه . يبقي فعلا وليد عنده حق وهيا ظلمت خالد ولازم تعوضه عن هجرها ليه بالشكل ده ..
لبست اشيك فستان عندها وطلبت عشا وشغلت موسيقي وحطت شموع وانتظرت خالد يرجع .. ساعه وراها ساعه والانتظار طال
اتصلت بيه بس تليفونه مغلق .. الوقت اتأخر وبدئت تقلق لانه ما بيتأخرش كده ابدا ..
حاولت تتصل بعلاء بس هو كمان ما بيردش وكلمت نسمه بس عرفت منها ان علاء مش معاها .. اخيرا اتصلت بوليد
وليد : ندوش حبيبي خير ؟ مش عوايدك تكلميني اخر الليل ؟
ندي : لا عادي بس بطمن عليك انت وجميله ؟
وليد : احنا كويسين .. ندي في ايه مالك ؟ قولي علي طول
ندي : مفيش بس خالد اتأخر قوي وتليفونه مقفول وهو مش عوايده يتأخر حتي اتصلت بعلاء مردش ونسمه قالت ان علاء مش معاها بس
وليد : كل ده وبس ؟ لفيتي علي الكل وانا اخر واحد فكرتي تكلميه ؟
ندي : علشان بس انت تعبان مش اكتر ومرضيتش اقلقك
وليد : هعديها كده .. بس تاني مره انا اول حد تفكري تكلميه سامعه ؟
ندي : حاضر
وليد : اديني نصايه كده هعرفلك هما فين .. وربنا يستر
ندي بقلق : يستر ازاي قصدك ايه ؟
وليد : قصدي انك تكوني اتأخرتي قوي يا ندي من امتي وانا بقولك انه مالوش دخل ؟ احساس الظلم وعدم الثقه وحش يا ندي يالا ما علينا مش وقته شويه وهكلمك
قام يلبس وجميله جنبه : طيب لازم تنزل بنفسك ؟ ابعت اكرم
وليد : حبيبي دي اول مره ندي تطلب مني حاجه مش هبعت اكرم فيها
جميله : بس انا خايفه عليك
وليد باسها : خليكي انتي بس مستنياني وماتناميش هنكمل كلامنا لما ارجع باذن الله اوك ؟
جميله ابتسمت : ما تتأخرش
نزل وليد وطبعا اكرم اول ما شافه خارج راحله : علي فين يا باشا هنروح فين ؟
وليد وقف وابتسم : هنروح ؟
أكرم : أكيد مش هتخرج لوحدك في وقت زي ده
وليد : ماشي يالا مش هجادلك لاني مش هخلص منك
بعد شويه وليد : بس اقف هنا
اكرم باستغراب : هنا ؟ هنقف هنا ؟
وليد : اه ايه مالك ؟
اكرم : لا ابدا براحتك بس هو حضرتك متخانق مع جميله هانم ؟
وليد ضحك : ليه ؟
اكرم : مش عوايدك تسهر في اماكن زي دي
وليد : مش جاي اسهر يا فصيح واطمن مش متخانق مع جميله يالا
نزلوا بس اكرم لسه مستغرب : طيب جايين هنا ليه دلوقتي ؟
وليد بيدور علي حد : هتعرف حالا .. دور معايا بس
اكرم بيبص حواليه : علي مين ؟
وساعتها لمح علاء وخالد : تقصد دول ؟
وليد : ايوه دول تعال
كانوا بيشربوا وبيرقصوا وسكرانين علي اخرهم واول ما شافوه هيصوا جامد والبنات اتلفت حواليهم
علاء : الباشا الكبير وووووصل .. واحلي تحيه لوليد بيه
وليد : انتو هنا ؟ لازم تكونوا هنا
خالد : والان حان موعدكم مع درس في القيم والاخلاق لفضيله الشيخ وليد نصار اووووووه
وليد : يالا قوموا من هنا
علاء : عارف انت سبب ازمتي في الحياه
وليد : انت اللي سبب ازمه نفسك قوم
وليد بص حواليه يشوف اكرم فين بس ملقاهوش واستغرب راح فين وسابه ولحظه ولقاه جاي ووراه اتنين رجاله ضخمه
وليد : انت فين ومين دول ؟
اكرم : رجاله الامن اللي هنا معرفه ما تقلقش هيساعدونا ناخد الاتنين دول
وليد : انا مش عارف انا كنت عايش من غيرك ازاي ؟ هاتهم
الاتنين سحبوا علاء وخالد وحطوهم في العربيه لوليد واتحركوا علي بيت علاء الاول
علاء : ليه هنا ؟ نسمه مش هنا ؟ بفضلك انت طفشت ؟ الهانم بتحبك انت اكتر مني
وليد : نسمه ما بتحبنيش اطلع نام والصبح نشوف قصتك ايه ؟ اكرم معلش طلعه
اكرم طلعه لحد ما حطه في سريره : المفروض تحمد ربنا ان عندك ابن عم زي وليد
علاء : ههههههه انت كمان بتحبه .. ازمه وليد
اكرم : لو حاولت تفكر صح هتلاقي نفسك انت كمان بتحبه بس المشكله في الافكار الغبيه اللي ماليه دماغك
وليد تحت مع خالد : انت ليه مش مع مراتك ؟ ليه سهران كده ؟
خالد : مراتي ؟ وهيا فين مراتي ؟ انا ما اتجوزتش اصلا .. دي اشاعه
وليد : ندي بتحبك وانت عارف ده كويس
خالد زعق : ندي بتحبك انت اكتر
وليد : هو ايه حكايتكم النهارده انتو الاتنين ؟ كل واحد يقولي مراته بتحبني انا اكتر ! مش يمكن تكونوا انتو الاغبيه كل واحد فيكم مراته بتحبه بس هو غبي وعايز اي شماعه يعلق عليها اخطاؤه فملقيتوش غيري صح ؟
وليد وصل خالد البيت واكرم سنده ودخله وندي قابلتهم
ندي : هو ماله يا وليد ؟
وليد : مالوش بس شرب زياده اكرم معلش طلعه لفوق
ندي طلعت معاه وحطوه في السرير : متشكره جدا يا اكرم علي تعبك معانا ووقفتك مع وليد
اكرم : لا ياهانم ما تقوليش كده تصبحي علي خير
نزل ووراه ندي ووليد وقفها : اطلعي انتي لجوزك يالا سلام
ندي : وليد ربنا ما يحرمني منك ابدا
وليد : ولا منك .. ابقي طمنيني عليكي
في العربيه
اكرم : خالد بيه هيندم الصبح جدا لما يعرف هو فاته ايه ؟
وليد : اشمعني ؟ فاته ايه ؟
اكرم : لا اصل الهانم كانت مجهزه عشا وشموع وورد .. يعني اعتقد كان احتفال بشيء
وليد : انت اللحظه اللي دخلت فيها مسحت الاوضه كلها ؟
اكرم : لا مش كده ابدا بس شغلي عودني اني اكون دقيق الملاحظه ولماح لادق التفاصيل فاكيد هشوف ترابيزه سفره واكله الاوضه وهشوف الشمع والورد ولا ايه ؟
وليد : ماشي يا اكرم هعديهالك بس بعد كده مش عايزك تكون لماح قوي وخصوصا في اوض النوم
اكرم : حاضر يا افندم واسف لو كان ده تطفل مني
وليد : لا عادي بس بنبهك مش اكتر .. اوض النوم دي اماكن حساسه ومعني اني اوافق انك تدخل اوضه نومي فده ثقه عمياء فيك فاهم ؟
اكرم : فاهم يا افندم
وليد : روحنا بقي يالا الليله كانت طويله
ندي مع خالد قاعده جنبه ومره واحده خالد زق ايدها بعيد
خالد : ابعدي عني
قالها ونام وهيا خافت فعلا تكون خسرته ..
اخيرا النهار طلع والكل صحي
علاء مستغرب مين حطه في السرير وشويه وبدأ يفتكر وليد واكرم واستغرب ليه اهتم يوصله ؟ هل فعلا حب ؟ هل هو فعلا زي ما نسمه قالت بيعتبرهم اخواته ؟ هل هما مالهمش حقوق ؟ حاسس انه متلخبط مش عارف يفكر ؟؟؟
خالد صحي وبص كانت ندي نايمه جنبه وهيا قاعده وكأنها كانت خايفه عليه .. بص حواليه شاف اثار الليله اللي ضيعها وللحظه ندم بس بعدها حس بغيظ ماليه منها ..
قام مره واحده وهيا صحيت : انت كويس ؟
خالد : وانتي يفرق معاكي ؟
ندي : اكيد .. قلقت عليك امبارح لما اتأخرت
خالد : اه وعلشان كده بعتيلي اخوكي يجيبني من افايا صح ؟
ندي : مش كده لأ بس قلقت عليك
خالد : وفري قلقك ده .. ولعلمك امبارح سهرت وشربت وقضيت الليله مع بنات كتير بتنقل بينهم وعملت كل اللي نفسي فيه وكل اللي انت حرماني منه عملته معاهم فوفري قلقك ده لان امبارح كانت ليله حلوه انتي واخوكي بوظتوها ( راح ضرب التربيزه برجله ووقع اللي عليها ) ووفري رومنسياتك دي معدتش عايزها
سابها ودخل الحمام وهيا فضلت تعيط ومره واحده وقفت وقررت ونفذت
خالد خرج من الحمام وملقهاش موجوده وعرف انه ممكن يكون خسرها واحاسيس جواه متلخبطه .. هو صح ولا غلط ؟ ليه جرحها كده ؟ كانت هتبدأ معاه من جديد .. بس لأ كان لازم تثق فيه مش لما اخوها اللي يقولها ؟؟ لا هو صح وهيا اللي غلط ..
وليد صحي من النوم ومراته جابت فطار فطروا مع بعض في اوضه النوم وشويه وسمع صوت ندي ومامته وحس ان في قلق فخرج يشوف في ايه وندي اول ما شافته جريت عليه وعيطت في حضنه وهو مستغرب مالها ..
نبيله : مالها يا وليد ايه اللي حصل ؟
وليد دخلها اوضتها : مفيش يا ست الكل هاتيلها حاجه تشربها بس وما تقلقيش .. سيبونا لوحدنا شويه
ندي : خاني يا وليد
وليد : مين ده اللي خانك ؟ خالد ؟
ندي : ايوه
وليد : ومين قالك الاكتشاف الفظيع ده ؟
ندي : هو قالي بنفسه
وليد اتنهد : هو قالك وانتي زي الهبله صدقتي ؟ خانك امتي وفين وازاي ؟
ندي : معرفش بس هو قالي انه كان مع بنات وانه .. يعني خاني
وليد حضن اخته : حبيبتي كان لازم تفهمي ان ده مجرد غيظ منك او رد فعل مش اكتر .. هو في حد بيحب يخون حبيبه لمجرد انهم اتخانقوا او اختلفوا .. بعدين انا جبتهم من نايتكلب كانوا سهرانين مجبتوش من شقه .. هيخونك فين ؟
ندي : معرفش بس هو قالي كده ؟
وليد : ندي انتي غلطانه من الاول .. غلطتي في حقه كتير
ندي : واديني اهو حاولت اصالحه
وليد : بعد ايه ؟ هو وصل لاخره .. حبيبتي لما الواحد بيحب بجد بيكون جرحه مضاعف .. يعني هو بقاله قد ايه يقنع فيكي ؟ وانتي رفضتي تسمعيه او تصدقيه فهو مجروح منك .. كان لازم تفضلي في بيتك وكان لازم تسمعيه وتحتويه وكان لازم تكوني واثقه تماما انه مايعملهاش لكن كده انتي اثبتيله لتاني مره ان معندكيش ثقه فيه وان كلمه تجيبك وكلمه توديكي .. ندي فين حبك ؟
ندي : انا بحبه
وليد : اوعي يكون حبك زي حب ميس .. حب تملك مش اكتر
ندي بنرفزه : انا مش زي ميس
وليد : ولا زي جميله
ندي : ليه جميله بتعمل ايه زياده ؟
وليد : جميله في شهر العسل دخلتلي ميس عندي علشان نتصالح علشان ما نزعلش انا وميس مع بعض !! مش هقولك اكتر من كده
ندي : ده غباء مش حب .. ادخل لجوزي واحده ده منتهي الغباء كمان
وليد : ده منتهي الحب يا ندي انك تسعدي واحد حتي لو علي حساب سعادتك انتي .. ده قمه الحب .. انك بتحبيه اكتر من نفسك وان اهم شيء عندك هو سعادته وبس ..
ندي : وانت قابلت حبها ده بايه ؟ انها زوجه في السر وابسط حقوقها مش مديهالها .. ده حتي ابنها هتاخده تنسبه لغيرها ؟؟ لا سوري مش عايزه الحب ده
وليد اتنرفز منها : انتي مش عارفه انتي بتتكلمي في ايه ؟ وظروفي غير ظروفك تماما وبعدين انتي مدخلاني في النص بينكم ليه ؟ فكري بعقلك قبل ما تخسري ولا تبقي ميس تانيه بعد اذنك
خرج وسابها متنرفز لان كلامها مس وتر حساس عنده وسؤاله بيرن : انت قابلت حبها بإيه ؟؟
دخل يغير هدومه ولحظه والباب خبط ودخلت ندي
ندي : انا اسفه يا وليد مش قصدي اضايقك ابدا .. حقك عليا
وليد : لا عادي المهم حاولي تصلحي امورك
ندي : لا بجد ما تزعلش مني والله ما اقصد .. انا عارفه ان ظروفك انت وجميله متلخبطه وعارفه انه غصب عنك فمعلش طلعت نزفزتي عليك انت
وليد : قولتلك عادي خلاص
ندي : طيب ممكن توصلني بيتي ؟
وليد : اوصلك عادي بس ظهوري مش هيكون في مصلحتك لان ساعتها خالد هيعند وهيقول انك رجعتي علشان انا قلتلك ترجعي فالاحسن تروحي لوحدك
ندي : بس انا عايزاه يعرف اني رجعت علشان انت رجعتني .. عايزه يحس بالفرق بينكم
وليد : مش وقته يا ندي .. الاول اتصالحوا والباقي بعدين
ندي : انت شايف كده ؟
وليد : ايوه شايف كده
راحت للبيت بس ملقتش خالد وعرفت انه راح الشركه وراحت هيا كمان للشركه ..
بقلم /
shimooo novels الشيماء محمد
وهناك دورت عليه معرفتش بيه فراحت لاخوها ويدوب قعدت الباب خبط ودخلت نسمه : اسفه اجي لحضرتك وقت تاني
وليد : لا ادخلي يا نسمه تعالي
سلموا علي بعض هيا وندي وقعدت وطلعت ورقه عطتها لوليد
وليد : ايه دي ؟
نسمه : استقالتي
وليد : شايف انها استقالة بس ليه ؟
نسمه : عادي بقي .. بس مش هقدر استمر هنا
وليد : علشان كلامي معاكي امبارح ؟ انا كنت لسه هعتذرلك علي اسلوبي لاني فعلا زودتها بس كنت متنرفز وانتي جيتي في الطريق مش اكتر
نسمه : لا لا الموضوع ما يخصكش وعارفه ان كلامك مجرد نرفزه مش اكتر
وليد : طيب امال ليه بقي الاستقاله ؟
نسمه : ده موضوع خاص بس بعيد عنك ده بخصوص علاء
وليد : تسمحيلي اتدخل ! علاء محتاجك جنبه وبعدين لازم تهدي وتاخدي المواضيع بتفهم اكتر من كده .. انا مش عارف انتو مالكم ؟ اغبيه ليه كده ؟
الاتنين بصوا لبعض ندي ونسمه وبصوله
وليد : ايوه الكلام ليكم انتو الاتنين ..انتو متجوزين اتنين مختلفين اتربوا علي نمط معين بأفكار معينه .. جايين انتو الاتنين في يوم وليله عايزين تغيروا تربيه سنين ؟ ازاي طيب ؟ وجودكم في حياتهم احسن شيء حصلهم لو اتخليتوا عنهم هيضيع الامل .. هينتهي .. بس لازم يكون نفسكم طويل وبراحه وواحده واحده مهواش كن فيكون .. نسمه علاء محتاجك هو بدأ يتغير فعلا .. بدأ يفكر .. بدأ يحس ووقف علي اول الطريق خليكي بقي ماسكه ايده مش تسيبها وتقوليله انت مش عارف تمشي ؟ هو فعلا مش عارف يمشي ومحتاجك خطوه خطوه تاخدي بإيده .. وانتي كمان يا ندي .. خالد بيعشقك ومن واحنا عيال مش النهارده ولا امبارح ده سنين واخيرا بقيتي في بيته بس اتفاجئ انك بعدتي اكتر واكتر ده بالعكس انتي ضاعفتي عذابه مليون مره لانك بقيتي في بيته وبين ايديه ومع ذلك حرمتي نفسك عليه .. ده عذاب ايه ده ؟ انتو الاتنين غلط .. اتمسكوا بحبكم وصلحوا اموركم قبل ما انتو كمان تندموا ..
الباب اتفتح ودخل علاء واول ما شاف نسمه : اه لمهم انت حواليك واملي دماغهم ضدنا صح ؟ مش ده اللي بتعمله ؟
وقبل ما حد يرد كان خالد كمان دخل واول ما شاف ندي
خالد : اه فعلا لازم تكوني هنا ؟؟ هتكوني فين يعني ؟ لازم تقدمي تقرير لاخوكي ؟؟ مش قلتلك انها بتحبك اكتر ؟
وليد :
اكتب في بحث جوحل( مدونة قصر الروايات) تظهر القصص كامله
تابعونا علي قناة التليحرام من هنااااااااااا
ليصلكم اشعار بالنشر
الرواية كامله من البداية من هناااااااااااا
تعليقات
إرسال تعليق
فضلا اترك تعليق من هنا