رواية جميلة البارت_23-24-25الاخيره بقلم الشيماء محمد
#الحلقه_23-24-25الاخيره
#جميله☺️
الباب اتفتح ودخل علاء واول ما شاف نسمه : اه لمهم انت حواليك واملي دماغهم ضدنا صح ؟ مش ده اللي بتعمله ؟
وقبل ما حد يرد كان خالد كمان دخل واول ما شاف ندي
خالد : اه فعلا لازم تكوني هنا ؟؟ هتكوني فين يعني ؟ لازم تقدمي تقرير لاخوكي ؟؟ مش قلتلك انها بتحبك اكتر ؟
وليد بص للبنات : هنا بقي ينطبق المثل اللي بيقول خيرا تعمل (شاور علي علاء وخالد وبصلهم ) شرا تلقي
علاء : خير ؟ لما تقلب مراتي عليا يبقي خير ؟
نسمه : وتقولي افضل جنبه وهو هيتغير !! ده عمره ما هيتغير ابدا ده مواليد برج الثور
علاء : نسمه !!
نسمه : بلا نسمه بلا زفت .. انا اسفه يا وليد بس بالمنظر ده انا مش هقدر اكمل .. عرفت بقي انا ليه مقدمه استقالتي !
علاء : استقالتلك ؟ انتي هتستقيلي ؟ ليه ؟
وليد : ليه ؟؟ علشان ما تشوفش وشك .. علشان الغباء والتخلف اللي مالي دماغك ده .. لا وجاي تلومني انا ! وانت يا سي خالد هاه اتكلم عايز تلومني علي ايه ؟ علي التخلف اللي انت قلته لمراتك الصبح ؟
خالد : قالتلك ؟ كل حاجه لازم تبلغهالك
وليد : لما واحده جوزها يقولها انه خانها ايوه لازم تروح لاهلها وتقولهم .. انت بتفكر ازاي سيادتك ؟
علاء بص لخالد : انت خونتها ؟؟ امتي ؟ احنا طول الليل مع بعض
وليد بص لندي وكأنه بيقولها صدقتيني !!
خالد : يا عم اسكت انت التاني .. اكيد مخنتهاش
علاء : امال بتقولها كده ليه ؟ ده انت هتموت عليها تقوم تقولها كده ؟ انت اهبل يالا
خالد : حوش الذكاء اللي بينقط منك .. وان مكنتش مراتك سيبالك البيت انت التاني !! خليك في حالك
وليد راح عندهم ودخلهم وقفل الباب وراهم : اتنيلوا اقعدوا اما نشوف اخرتها ايه معاكم
نسمه جت تقف علشان تمشي ) وليد اقعدي انتي التانيه مفيش استقالات هقبلها ..كل واحد قعد جنب مراته ووليد قعد قصادهم ..مبدئيا كده انتو الاتنين لازم تكونوا واثقين تماما اني عمري ما هقلب مراتتاكم ضدكم
نسمه : قبل ما تدخل كان بيقنعني اديلك فرصه تانيه وارجع البيت ( بصت لخالد ) حتي ندي كان بيقولها انها غلطانه من الاول وانتو جايين تتهموه
وليد : ما علينا من الاتهام دلوقتي .. اللي يهم حاليا ان كل واحد يخرج من هنا حبيبه في ايده .. ومش هتخرجوا من هنا غير لما تتصافوا جميعا ..
نسمه : انا الخلافات اللي بيني وبين علاء ما ينفعش نتكلم فيها هنا
وليد : هنا اللي هو قدامي صح ؟
علاء : لا عادي .. سيادتها معترضه علشان حقنا اللي عايزين ناخده منك
وليد : طيب مش هنتكلم في النقطه دي حاليا .. بس يا نسمه ده خلاف بيني وبينه علي ميراث او علي شغل انتي ايه دخلك ؟ ليه حطيتيه بينكم !!
نسمه باستغراب : لانه مش حقه .. ده كده حرام
وليد : وانتي تعرفي منين انه مش حقه ؟ ( الكل بصله باستغراب) بتبصولي كده ليه ؟
ندي : انت ايه اللي بتقوله ده ؟ طبعا مش حقه
وليد : اهدي انتي دلوقتي انا بكلمها هيا ..
نسمه : انا قلتله وجهه نظري .. سواء جدكم ساب الشركه مديونه او شغاله فوالدك اللي فضل وتابعها وابهاتهم سافروا ولما الشركه كبرت وبقي ليها وضعها رجعوا يبقي فين حقهم ده وباي وجهه حق اصلا بيتكلموا ؟
وليد : ماشي انا معاكي بس كل ده ايه دخله بعلاقتك معاه كزوجه ؟ كسند ؟ كشريك ؟ كاتنين وقفوا قصاد بعض واتفقتوا تقفوا مع بعض العمر كله علي الحلوه وعلي المره !! فين واجبك كزوجه واقفه في ظهر جوزها بغض النظر هو صح ولا غلط !
الكل بصله بطريقه مختلفه مش عارفين يفسروها
وليد : الزوجه بتساند جوزها في اي وقت .. ولو هو غلط بتقف معاه بس واحده واحده بتوضحله وجهه نظرها .. مش تسيبله البيت يا نسمه ؟ او اسوأ من كده وتهجره ( بص لندي )
المصيبه انكم كلكم بتحبوا بعض وجوازاتكم عن حب مش عادي فين الحب ده ؟ ( بص لعلاء وخالد ) وانتو الاتنين ايه مش عارفين تطمنوا مراتتاكم وتضموهم ؟ انت يا سي خالد رايح تقول لمراتك انك خنتها متوقع منها ايه ؟ تقولك وماله حبيبي المهم رجعت ؟ كنت مستني منها ايه ؟
خالد : كان المفروض تكون واثقه اني ما اعملهاش .. لازم تثق فيا
وليد : معاك ان الثقه مهمه بس سؤال بسيط عملت ايه انت علشان تبني الثقه دي .. الثقه شيء بيتبني بصعوبه وبياخد وقت كبير لكن للاسف بتتهد في لحظه او في كلمه زي ما انت عملت الصبح ..
خالد : انا مخنتهاش
وليد : بس قلتها ومعني انك قلتها انك ممكن تفكر فيها ومعني انك تفكر فيها يبقي ممكن تعملها ازاي بقي بعد كده تطلب منها تثق فيك !!
علاء : طيب هو وزعلها لكن انا ما زعلتهاش في اي حاجه ؟
وليد : الثقه .. مشكلتكم انتو الاتنين هيا الثقه ..
علاء : ايه علاقه الثقه بينا ؟
وليد : ازاي بقي ؟ مراتك شيفاك من وجهه نظرها انك مستعد تعادي وتحارب ابن عمك علشان حبه فلوس زياده يبقي انت مالكش خير في اهلك اللي هما من دمك فازاي هتثق فيك تآمنك علي حياتها وعيالها فيما بعد ؟
علاء : دي مراتي
وليد : وانا ابن عمك وفي وقت من الاوقات كنا اقرب من الاخوات والنفوس اتغيرت وقربنا نكون اعداء فليه برضه النفوس ما تتغيرش ناحيتها وتبطل تحبها وتتحول لعدو .. ماهو عادي عندك فطالما انت اصلا شخص ممكن في اي وقت حد حبيبك يتحول لعدو هيا كمان ممكن تتحول لعدو
علاء : هيا عمرها ما هتتحول لعدو
وليد : ازاي بقي ما انا
قاطعه بغيظ : انت ما اتحولتش لعدو .. ممكن اه بتضايق منك او احاول اغيظك او اخسرك في شغل لكن ما اتحولتش لعدو
علاء استغرب من كلامه ده ووليد ابتسم : امال انا يا ايه يا علاء؟
علاء : انت بتستغل الامور لصالحك
وليد : او بحاول اصفي كل النفوس اللي هنا مش انتو بس كلنا
خالد : انت بتتكلم في حاجات بقالها سنين
وليد : حاجات زرعها اهالينا احنا ليه ماشيين في نفس سككهم احنا لينا عقليتنا الخاصه .. ليه سيبناهم يبعدونا عن بعض احنا كنا قوه مع بعض
علاء : علشان كنا زي بعض لكن دلوقتي الامور اتغيرت
وليد : مفيش حاجه اتغيرت اللي اتغير اتغير جوانا يا علاء .. المهم كل واحد فيكم ياخد مراته ويروح علي بيته وافضلوا مع بعض اتكلموا لحد ما تتصافوا وسيبوا الباقي للايام هيا كفيله بيه يالا اتكلوا
وفعلا كل واحد اخد مراته وروح وفضلوا مع بعض يتكلموا لحد ما يتصافوا مع بعض ..
كل واحد فضل مع مراته وبعدها كل واحد فيهم بعد ما مراته نامت فضل يفكر في كل حاجه ويقلب الامور في دماغه ويحاول يدور علي حاجه وحشه وليد عملها في حقهم بس للاسف مفيش ... اي شيء وحش او غلط كانوا هما اساسه ..
نسمه صحيت لقت علاء سرحان تماما فقربت منه : سهران ليه؟
علاء ابتسم : لا يا حبيبي عادي نامي انتي
نسمه : بتفكر في ايه كده ؟
علاء : عادي مش في حاجه معينه
نسمه : طيب اقلك حاجه تفكر فيها ؟
علاء : قولي
نسمه : فكر في ده ( مسكت ايده وحطتها علي بطنها )
علاء : مش فاهم ده ايه ده ؟ بطنك مالها ؟
نسمه همست في ودنه : جواها نونو عايز يقولك بابا
علاء اتجمد لحظات مش عارف يفكر .. مفاجأه عمره ما تخيل رد فعله هيكون ايه ؟ شيء عمره فعلا ما فكر فيه قبل كده
فضل كتير كده لدرجه ان نسمه قلقت عليه : علاء مالك ؟ علاء
علاء : انتي قلتي ايه ؟ نونو ؟ بابا ؟ قصدك ايه ؟ تقصدي انك عايزه بيبي مثلا ؟ عايزه نخلف ؟
نسمه : ايه الغبا ده بقولك جواها نونو مش لسه عايزه .. انا حامل يا علاء
علاء مره واحده قام يتنطط وشالها معاه وهيا لسه ما استوعبتش جنانه ده
نسمه : والله مجنون
عند خالد هو وندي مع بعض واخيرا بدؤا شهر عسلهم المتأخر قوي
ندي : خالد
خالد : عيوني
ندي : اوعي في يوم تخلي وليد يقف بينا
خالد : يعني ايه ؟
ندي : يعني مش عيزاك انت وهو تتخانقوا او اضطر اني اخد صف حد فيكم خليكم ديما صف واحد ارجوك علشان خاطري اوعي تقف قصاده .. ايوه انا بحبك وبعشقك كمان بس بحبه هو كمان .. وليد كان اب قبل ما يكون اخ فاهم ؟؟ فارجوك ما تحطنيش في اي وضع اني اضطر اختار بينكم
خالد : ولو اتحطيتي هتختاري مين؟
ندي : مش هعرف اختار ساعتها هتدمر انا لان انتو الاتنين مكانه واحده قلبي وعقلي مش هقدر اختار بينكم ولو اخترت فدي نهايتي لاني لا اقدر اعيش من غيرك ولا اقدر اعيش من غيره فارجوك اوعي تدمرني يا خالد
خالد : وليه ما تطلبيش منه هو طلب زي ده ؟
ندي : لانه عمره ما سعي لاي مشاكل معاكم .. عمره .. ديما بيعتبركم اخواته .. عارف من اول ما فاق بعد المستشفي وهو يقولي ارجعي بيتك وجوزك مالوش دعوه باللي حصل .. كان واثق تماما انك ما تعملهاش
خالد : وليه ما سمعتيش كلامه ؟
ندي : خفت .. خفت يكون لك يد واكون انا خاينه .. خفت يكون حبي ليك عاميني .. فاسفه جيت عليك انت .. سامحني بس كان غصب عني
خالد : تعالي نبدأ من جديد ونعتبر ان فرحنا كان النهارده
ندي : تعال بس اوعدني الاول ان وليد اخ ليك
خالد : اوعدك اني هحاول اشوفه كده
ندي : وانا راضيه ب هحاول دي دلوقتي ..
عند وليد
جميله : عملت ايه ؟
وليد : اتكلمنا وربنا يسهل بقي ويهدي الكل .. بس مش مقتنع قوي انهم ممكن فعلا يتغيروا
جميله : الحب بيحل امور كتيره
وليد : معاكي بس مش كل الامور .. العلاقات المعقده دي ما اعتقدش هتتحل بالحب يا جميله
جميله : طول عمركم بتتخانقوا وواقفين قصاد بعض والعداء مستمر فجرب الطريقه دي هتخسر ايه ؟ جرب تعاملهم كأخوات وصدقني هتصحي الحب اللي كان بينكم وانتو عيال والحب هيعرف طريقه بينكم وهيرجع
وليد : اديني اهو ماشي وري كلامك لما نشوف اخرتها ايه ؟ بس عارفه !
جميله : ايه ؟
وليد : علاء النهارده اول مره يقول انه عمره ما اعتبرني عدو علي الرغم من انه طول الوقت كان بيعتبرني عدو بس النهارده معرفش .. حسيته .. مش عارف افسرلك
جميله : حسيته فعلا بيحبك بس العداء ده حاجه ظاهريه لكن مش من جوه .. جوه يا وليد في قرابه دم !! حبيبي انتو اخوات بس الاخوه دي عليها شويه تراب كده عايز يتنفض .. نفض انت التراب ده وهيظهرلك الاصل
وليد بصلها كتير : هو انا ليه بحبك كده ؟
جميله ابتسمت : علشان انا بحبك اكتر
وليد : ما اعتقدش ..
قرب عليها وباسها بحب وهو قريب حس بحركه ابنه وكأنه بيعترض من جوه
وليد : وده ماله ده ؟
جميله : غيران .. عايزك تحبه هو كمان
وليد قرب من بطنها وباسها : بحبك انت كمان ولا تزعل
ايديه علي بطنها وحس بحركاته جامده
وليد : هو حركاته جامده كده ليه ؟ مكنتش بحسها قوي كده
جميله : اولا لانه حاسس بيك وثانيا علشان كبر وبيقولك انا اهو موجود وجايلك يالا استعد
وليد سرح .. لازم فعلا يستعد .. لازم ينهي العداءات دي كلها .. مش عايز يورث العداء ده .. مش عايز يفضل خايف عليه طول الوقت .. لازم يتصرف
جميله : ممنوع السرحان وانت معايا مفهوم ؟
وليد ابتسم وباس ايديها : مقدرش اسرح وانتي معايا اصلا ..
اخدها في حضنه واسترخي بس عقله شعله من النشاط بيفكر ويخطط ويقرر ..
عند شريف
ميس : خير يا بابا
شريف : عايزك تسافري او تفضلي هنا عندي الفتره دي
ميس : ليه ؟
شريف : المفروض انك هتدخلي في التاسع او الثامن مش عارف بس المفروض بطنك تكبر ويبان عليكي الحمل
ميس : ما انا بلبس واسع اهو
شريف : ايوه بس مفكيش روح الحامل ولا تعبها ولا مشيتها حتي فالاحسن تختفي حاليا عن الانظار
ميس : حاضر بس بعد الحفله اللي وليد بيجهزلها
شريف : مش عارف ليه انا قلقان من الحفله دي .. تحسي فيها بغموض كتير وكأنه بيخطط لحاجه
ميس : هو حاليا غرقان في مشاكل علاء وخالد وخلافاتهم مع مراتتاهم ..
شريف : يالا ربنا يسترها
عند محي الكل متجمع حسين وعلاء وخالد
علاء : خير يا بابا مجمعنا ليه كده ؟
خالد : اه يا عمي خير
علاء : طبعا انت طالع من البيت علي عينك
خالد ضحك : اصلا كنت عايز اسافر بس ندي رفضت وقالتلي بعد الحفله
محي : الحفله !! وهو ده المهم ايه الحفله دي وليه وليد عاملها ومخطط فيها لايه ؟؟
علاء : عادي حفله بمناسبه سلامته ورجوعه للشغل ووقوفه علي رجليه ده كان هيموت فيها
حسين : اصلا مين اللي عمل فيه كده ؟ انت يا محي ؟
محي : لا طبعا مش انا .. صراحه انا شكيت في علاء
علاء : انا ؟؟ ليه شايفيني قتال قتله انا ؟ لا طبعا ماليش انا في البلطجه دي
محي : من امتي ؟ امال لما جبت بلطجيه سرقوا الشحنه كان ايه !
علاء : شحنه مش قتل بني ادم وابن عمي كمان
محي : ابن عمك ؟
علاء : ايوه ابن عمي .. ايه معترض ليه ؟
محي : ابن عمك ابن عمك انت حر خلونا في المهم .. عرفتوا ايه عن حمل ميس .. انا مش حاسس انها حامل .. ايه الجديد
خالد : مفيش جديد
علاء : فعلا
حسين : يعني ايه مفيش جديد .. خالد عرفت من ندي ايه عن حمل ميس .. المفروض ان انت اقرب حد فينا حاليا
خالد : معرفتش حاجه انت ناسي انها اصلا كانت زعلانه علي اخوها واللي حصله
محي : طيب واديكوا اتصالحتو اهو اعرفلنا اساس الحمل ده ايه ؟
افتكر ندي في حضنه بتترجاه ما يقفش قصاد وليد
محي : خالد
خالد : ايوه يا عمي
حسين : الحمل
خالد : انا اسف خرجوني بره القصه دي .. اللي بيني وبين مراتي هيفضل بينا انا مش هقدر اخسرها ووعدتها ما اقفش ضد وليد بعد اذنكم
حسين : انت يا ولد اقف هنا
خالد : انتو كان في مشاكل بينكم وبين اخوكم واختلفتم لكن انا ووليد مفيش بينا مشاكل وهو ابن عمي ومتجوز اخته وماشفتش منه حاجه وحشه صراحه فخرجوني بره قصتكم دي ..
محي : وحقك وميراثك ؟؟
خالد : انا عايش كويس قوي ولو الحق والميراث اللي بتتكلم عنه ده ثمنه ندي فمش عايزو بعد اذنكم
سابهم ومشي وعلاء قلبه بيدق بسرعه وبيفكر هل هو عنده الجرأه يعمل زي خالد كده ؟ هو مش عايز الدوامه دي هو عايش مبسوط كده وعنده ابن جاي في الطريق ..
محي : علاء انت يا علاء
علاء فاق : هاه نعم ؟ ايه ؟
محي : بقولك انت عايزك تجيبلي قرار الحمل ده .. انت علاقتك بميس كويسه ..
علاء : ايوه اعملها ايه يعني !! وبعدين انتو شاغلين نفسكم بالحمل ده ليه ؟ واحد ومراته حامل انتو مالكم ؟
محي : احنا مالنا ؟ ايه احنا مالنا دي ؟
علاء: شاغلين نفسكم ليه ؟ وبعدين خالد عنده حق
محي اتجنن : عنده حق في ايه ان شاء الله ؟
علاء : احنا عايشين كويس كده مش ناقصنا حاجه فليه المشاكل وليه العداء والخناق وبعدين وليد
محي قاطعه : وليد ماله ؟ مش وحش
علاء اتنرفز : ايوه مش وحش .. عمره ما كان وحش ..
محي : ده لسه من فتره بسيطه كان عايز يحبسك ساعة نسمه ولا نسيت ولا من يومين بس كان عايز يطردك من الشركه
علاء : ده بيزنس وبعدين انا فعلا اقترحت نستورد مضروب فلازم يشك وبعدين اعتذرلي وساعة نسمه انا كنت غلطان ووليد حقاني فأحنا زعلانين علشان هو حقاني؟؟؟
محي : انت جرالك ايه ؟ نسمه عملت فيك ايه ؟
علاء : خلتني اشوف كل حاجه بشكل تاني .. هتخليني أب .... بعد اذنكم
محي : شايف يا حسين العيال
حسين : وبعدين هنعمل ايه ؟
محي : هنتصرف احنا لوحدنا ده حقنا احنا ..
حسين : ولو العيال اتحدوا ووقفوا ضدنا ؟؟
محي : مش هيحصل هما اخرهم ينسحبوا لكن مش هتوصل انهم يقفوا ضدنا ابدا ..
بقلم /
shimooo novels الشيماء محمد
اخيرا جه اليوم المنتظر والكل بيستعد للحفله ومحدش فاهم ايه اللي هيحصل فيها
نبيله : نفسي افهم انت ليه مهتم كده قوي بالحفله دي ؟؟
وليد : هتعرفي في الحفله ؟
ميس : ليه الغموض ده كله ؟
وليد : برضه هتعرفي في الحفله ؟
جميله نزلت وراحت عند وليد : وليد
وليد : ايه يا جميل ؟ عايزه حاجه ؟
جميله : عادل كلمني وعايزني اقضي معاه النهارده وبما انك النهارده مشغول في الحفله بتاعتك فقلت اروح انت ايه رأيك ؟
وليد باسها وضمها : ماشي يا قلبي روحي كده احسن علشان ما تفضليش لوحدك واكون مطمن عليكي اجهزي وأكرم هيوصلك لعنده
جميله طلعت وميس نفسها تولع فيها ببطنها اللي قدامها دي
ميس : نفسي اعرف بتحب فيها ايه ؟
وليد : كلها علي بعضها كده
وليد نادي علي اكرم علشان يوصل جميله وفعلا اخدها وسلمها لاخوها ورجع هو لوليد ..
الحفله بدئت والكل وصل للنادي اللي فيه الحفله والبنات كانوا ايات في الجمال .. نسمه وندي .. وميس حست انها عامله زي الشريره اللي في القصه .. مضطهده من الكل .. منبوذه .
الكل منتظر وصول وليد للحفله .. الكل متحمس .. واخيرا وليد ظهر بهاله غريبه واكرم ورجالته وراه وكان دخوله مهيب ...
نهاركم سعيد ☺️
توقعاتكم
#الحلقه_ال٢٤
#جميله☺️
الحفله بدئت والكل وصل للنادي اللي فيه الحفله والبنات كانوا آياات في الجمال .. نسمه وندي .. وميس حست انها عامله زي الشريره اللي في القصه .. مضطهده من الكل .. منبوذه .
الكل منتظر وصول وليد للحفله .. الكل متحمس .. واخيرا وليد ظهر بهاله غريبه واكرم ورجالته وراه وكان دخوله مهيب ...
سلم علي والدته واخته وعيال عمه والكل بيسلم عليه ويهنيه علي صحته ورجوعه لشغله ووقفته علي رجليه من تاني ..
ميس واقفه جنب باباها وبتبص لوليد ورجعت بذكرياتها لقبل ما تظهر جميله في حياتهم .. ازاي وليد كان بيحبها !! ازاي كان في يوم ملكها هيا وبس !! ايه اللي وصلهم لكل ده ؟ هل هيا فعلا بتحبه مجرد حب تملك ولا هيا فعلا بتحبه ؟ ازاي جميله ببساطتها وجهلها قدرت تكسب كل القلوب في صفها ! هل بيحبوها لانها هتجيبلهم ولي العهد ولا هيا فعلا تتحب ! والسؤال الاهم من كل ده ازاي سمحت لوليد يفلت من ايديها ويبعد عنها بالشكل ده ؟؟
والاجابه كانت بسيطه وواضحه جدا قدامها .. هيا محبتش وليد اصلا .. كان زوج مناسب وواجهه اجتماعيه وبرستيج ومنظر قدام صاحباتها .. يمكن علشان كده مزعلتش انها مخلفتش منه .. او ما غارتش لما طلب يخلف من جميله بالطريقه الطبيعيه .. طيب ليه عملت كل ده ؟ لانه ملكها هيا وبس ولانه حب واحده اقل منها بكتير وهيا ما سمحتش انه يحب .. هيا اه سمحتله يتجوز ويخلف بمزاجها لكن ما سمحتلوش ابدا بالحب وعلشان كده يستاهل كل حاجه حصلت ...
جميله مع عماد اخوها بيقضوا يومهم مع بعض
عماد : بقولك ايه ما تيجي نخرج ؟
جميله : نروح فين بالليل ده ؟
عماد : يعني !!
جميله : يعني ايه ؟ شكلك عايز تروح مكان معين ؟
عماد : بصراحه اه .. عايز اروح فرح واحد صاحبي هنا
جميله : طيب قوم البس وروح
عماد : لا انتي تعالي معايا
جميله : اجي معاك فين بشكلي ده ! وبعدين صاحبك انت انا مالي وغير كده انا ما قلتش لوليد اني خارجه والاهم اني ماليش مزاج اصلا اخرج ما بالك اروح فرح !!
عماد : كل اللي بتقوليه ده حجج فارغه .. ووليد ممكن نكلمه ونقوله وبس كده
فضل يقنع فيها وهيا رافضه حتي فكره الخروج نفسها
جميله : انا مش عارفه انت مصر كده ليه يا عماد ؟؟
عماد : يوووووه يا جميله .. مصر يا ستي علشان في حد مهم هيكون موجود وعايزك تشوفيه
جميله : حد ؟ حد كواحده مثلا ؟
عماد : ايوه حد كواحده عايز اعرفك عليها ممكن بقي ؟
جميله : طيب ما كنت تقول كده من الاول
عماد : اديني قلت ممكن بقي تقومي تجهزي علشان ما نتأخرش
جميله : حاضر يا سيدي بس هلبس ايه ؟
عماد : تعالي يا ستي
اخدها من ايدها علي اوضتها وفتح الدولاب وطلع فستان وعطاهولها
جميله : واااو .. مين جاب الفستان ده ؟
عماد : انا جبته من اول راتب قبضته ممكن تقبليه ؟
جميله : طبعا .. بس ازاي عرفت مقاسي ؟
عماد ابتسم : في حد ساعدني
جميله : تقصد وليد ؟
عماد : عندك غيره ؟
جميله فرحت جدا بالفستان وخصوصا لما عرفت انه ذوق وليد: اديني عشر دقايق وهكون جاهزه
لبست جميله الفستان ووقفت قدام المرايه وحست كأنها اميره في الفستان ده واتمنت لو وليد يشوفها فيه !! اتصلت بيه تستأذنه علي خروجها مع عماد
وليد : روحي حبيبي وغيري جو براحتك بس خلي بالك من نفسك
جميله : ماشي ..
وليد : مالك ؟ عايزه تقولي ايه ؟
جميله : كان نفسي تشوفني في الفستان ده .. فستان جميل قوي ما تخيلتش ان عادل يعرف يشتري حاجه زي دي ..الفستان تحفه يا وليد
وليد : كويس انه عجبك !
جميله : كان عندك شك انه ممكن ما يعجبنيش ؟ طيب ازاي؟
وليد : روح قلبي انتي .. المهم يالا اطلعي لاخوكي لاحسن يضايق ولا حاجه
جميله : حاضر بس هشوفك امتي ؟
وليد : هتشوفيني ما تقلقيش المهم ما تغيريش الفستان لحد ما اشوفك بيه
جميله : اكيد طبعا هستناك ما تتأخرش عليا
قفلت جميله وطلعت لاخوها اللي انبهر بجمالها وشياكتها
جميله : هاه ؟ حلو ولا ايه ؟
عماد : هو حلو بعقل !! ده تحفه يا بنتي عامله زي ما تكوني اميره هتاكلي الجو من الكل
جميله : ماشي يا بكاش يالا بينا
وليد في الحفله واقف مع اولاد عمه بيتكلموا ويهزروا
علاء: مش هتقولنا بقي الحفله دي سببها ايه ؟
ندي : هو قومانه بالسلامه مش كفايه لحضرتك ولا ايه ؟
علاء : لا اكيد كفايه بس احساسي بيقول ان في سبب اهم
صحفي جه من وراه : وليد بيه
وليد : خير يا ناصر
ناصر: مش هتفك بقي الغموض اللي مغلف الحفله دي ؟
وليد : اكيد اتقل بس شويه .. اتفضل اشرب حاجه واصبر
الصحفي انسحب وسابهم وهو رجع لاولاد عمه
نسمه : هو ينفع اتطفل واسألك ليه ميس بعيده عنك ؟ حاسه انكم بعيد قوي عن بعض ؟
وليد بص ناحيتها : عادي .. ما تشغليش بالك بينا
نسمه : وانت ليه شغلت بالك بينا ؟ لو متخانقين خلينا نصالحكم ولا ايه يا علاء ؟
علاء بص لميس كتير : عايز تتصالح عليها يا وليد ؟
نسمه ردت : اكيد طبعا هو حد بيحب الزعل ؟
وليد حس ان علاء عارف حاجه : سؤالك غريب يا علاء
علاء : لا عادي بس حاسس انكم مرتاحين في بعدكم ولا بيتهيألي ؟
وليد : لا مش بيتهيألك
نسمه : هو ده اللي ربنا قدرك عليه ؟ تقنعه انهم مرتاحين في بعدهم عن بعض !!
وليد : سيبك انتي مننا .. الا قوليلي انتي شكلك متغير ليه ؟ فيكي حاجه متغيره مش عارف احددها
علاء ضمها : احلوت بس
ندي : فعلا يا نسمه شكلك محلو زياده
وليد : شكلكم كده عندكم اخبار حلوه ! ما تشاركونا
علاء : اه فعلا .. احنا منتظرين نونو صغنن كده !!
باركولهم كلهم وفضلوا مع بعض لحد ما وليد جاله تليفون فانسحب بعيد عنهم وبعدها اعلن للكل ان عنده اعلان مهم والكل سكت علشان يسمعه
بقلم /
shimooo novels الشيماء محمد
وليد : طبعا كلكم عايزين تعرفوا الغرض من الحفله دي صح !!
الحفله النهارده كلها مفاجأت وليها اسباب كتيره الصراحه .. اول سبب هو ان انا مديون لعلاء ابن عمي باعتذار لاني من كام يوم اتخانقت معاه واتسرعت في حكمي عليه فأتمنى انه يقبل اعتذاري وبقوله ان انا ما اقدرش استغني عنه ابدا ولو يوم واحد هو او خالد .. ( علاء وخالد فرحوا جدا بكلامه ده )
السبب التاني هو ان في شخصيه لازم اعرفكم عليها ( الكل بيبص حواليه وبيحاول يعرف مين الشخصيه دي وليد بص لاكرم وشاورله وأكرم اتحرك وفتح باب والكل عينه علي الباب يشوفوا مين هيدخل )
عماد واقف هو وجميله : احنا منتظرين ايه يا عماد ؟ ما ندخل
عماد : لحظه يا جميله
الباب اتفتح وهنا عماد : يالا يا جميله
مسك ايدها وداخل بيها وبمجرد ما دخلوا جميله لمحت وليد وقفت وحاولت تسحب ايدها من ايد اخوها او تجري بس اخوها منعها : انت اتجننت جايبني هنا ؟
عماد : ما تخافيش تعالي
وليد : جميله تعالي .. تعالي حبيبي
ميس كانت هتتجن ومش عارفه تعمل ايه في اللحظه دي لان ده اخر شيء ممكن تتوقعه .. علاء بصلها كتير قوي مش مصدق
وليد : تعالي ( راح ناحيتها مسك ايدها واخدها ووقفها جنبه وحط ايده حواليها بتملك وفخر
وليد : اعرفكم بجميله .. مراتي ( الكل بيتكلم ودوشه وشوشره بس سكتوا اول ما وليد اتكلم ) مراتي علي سنه الله ورسوله مراتي شرعا وقانونا وعقلا وبكل الطرق الممكنه ومش بس مراتي دي معشوقتي وحبي الاول والاخير ( حط ايده علي بطنها ) وام ابني زي ما انتو اكيد ملاحظين .. ( سكت شويه يسمح فيها للناس تستوعب وهنا لاحظ ان ميس هتمشي )
ميس رايحه فين ؟ استني الحفله لسه في اولها وانتي بالذات ما ينفعش تمشي ابدا ده الحفله علي شرفك .. استني
ميس وقفت مكانها وابوها جنبها بيتمني لو يقدر ينهي المهذله دي ويعمل اي حاجه ..
وليد : طبعا اكيد كلكم مستغربين ( بص لعلاء ) اه هيا يا علاء اكيد دلوقتي عرفت انا ليه كنت غيران عليها ..
علاء ضحك : طيب ما قولتش ليه ؟
وليد : ما انا قلتلك ساعتها انها ملكيه خاصه ولا نسيت ؟ المهم علشان الغموض ده ينتهي اسمحولي احكيلكم حكايه صغيره الاول وهقولكم ازاي اتجوزت جميلتي ..في يوم راجع من شغلي لقيت والدتي ومراتي مجتمعين ومنتظريني وواخدين قرار ان انا لازم اتجوز علشان اخلف لان لازم يكون في وريث والقصه الحمضانه دي .. طبعا انا كنت بحب مراتي ورافض الفكره دي تماما وقفلت معاهم الموضوع ده.. بعدها بفتره رجعت البيت لقيتهم جايبين بنت صغيره فلاحه بسيطه وقالولي لازم تتجوزها .. صراحه ساعتها اتنرفزت جدا وقررت اني فعلا هتجوزها عندا فيهم وخصوصا عندا في ميس انها ازاي توافق ان جوزها يتجوز غيرها وبالفعل اتجوزتها .. اتجوزتها واللي محدش عمل حسابه ابدا ان انا ممكن اقع في حب الانسانه البسيطه دي .. طبعا مراتي اللي هيا ميس اتجننت ازاي احب غيرها وحاولت بكل الطرق انها تعذب جميله وتعاملها بطرق غير ادميه وما اخدتش بالها ابدا انها كل ما بتعمل حاجه ضدها كانت هيا اللي بتنزل من نظري وجميله بتعلي ومكانتها بتعلي وبتتوغل في قلبي اكتر واكتر .. جميله دخلت بيتي ودخلت قلبي والكل حبها واكتشفت اني عمري ما حبيت غيرها وان انا كنت عايش وهم الحب .. عشت معاها حاجات كتيره .. جميله هيا عشق عمري .. بس علي الرغم من كل ده كنت بحافظ علي ميس وبراعي مشاعرها لكن هيا مقدرتش ده وبدئت تظهر علي حقيقتها البشعه اللي انا مكنتش واخد بالي منها وكنت اعمي عنها واكتشفت ان انا كنت مجرد ملكيه خاصه ليها اتجننت لما غيرها شاركها فيها.. خططت تخلص منها كذا مره .. خططت تخطفها ولما فشلت كل خططها قررت انها لازم تنتقم .. تعالوا نسيبنا من ميس حاليا ونتكلم عن الحادثه اللي اتعرضتلها من فتره .. الكل بيقول ان الحادثه كانت بغرض السرقه وفعلا انا اول ما العربيه وقفت ساعتها تخيلت انهم حراميه وخفت علي ميس بس اتفاجئت ان العيال دي جايه لهدف واحد بس وهو انها تهجم عليا .. مكنوش عايزين يسرقوا .. ما بصوش لميس ما التفتوش لاي شيء .. فغرضهم ايه طالما مش السرقه ؟ يقتلوني ؟ لأ كان ممكن يقتلوني ببساطه .. فهنا اكتشفت ان غرضهم هو الانتقام وبس .. كنوع من انواع التأديب .. بس ياتري لمصلحه مين ؟ وده كان السؤال اللي هيجنني !! وبفضل الله ثم أكرم اللي قدر يوصل للعيال دول ومنها وصلنا للي شغلهم .. أكرم
هنا اكرم دخل العيال متربطين وكمان دخل الدمنهوري ورماه تحت رجلين وليد .. ميس هنا حاولت تمشي بس اتفاجئت برجاله وليد واقفين منعوها تتحرك
وليد قرب من الدمنهوري : تسمح تقول تاني مين اللي طلب منك تعمل اللي عملته ؟
الدمنهوري : مرات حضرتك هيا اللي جت وطلبت مني ده
ميس زعقت : ده كداب .. انت هتصدق النصاب ده !
وليد : ومين قالك يا ميس انه يقصدك ؟ مش يمكن يقصد جميله ؟ ولا انتي عارفه ان جميله ما تعملهاش وانتي بس اللي ممكن تعمليها ؟
ميس : اكيد تقصدني .. هيا مش معشوقتك زي ما بتقول !! وعايز تطلعني انا اللي وحشه !
وليد : اطلعك وحشه !! ما علينا .. دمنهوري مراتي بتقول عليك كداب وبعدين ؟
الدمنهوري : عندي الدليل يا باشا وعطيته لاكرم باشا
اكرم هنا راح وشغل سي دي وفيه اتفاق ميس مع الدمنهوري وهيا بتطلب منه يأدب وليد
الكل اتفرج لحد ما أكرم قفله
وليد : طبعا الدمنهوري لحسن الحظ بيعمل حساب اللحظه دي .. بيهتم انه يكون معاه دليل ضد اللي بيطلب منه اي شغل هاه ؟؟ لسه كداب ؟؟
ميس : انت عايز ايه دلوقتي ؟ اه انا اللي عملتها ويا ريتني كنت خلتهم يخلصوا عليك خالص انت وجميلتك دي !!
وليد : ودي كانت غلطتك يا ميس .. ودلوقتي اقولك تقدري تمشي من الحفله لان وجودك مش مرغوب فيه بس قبل ما تمشي .. إنتي طالق باي باي يا ... يا قلبي
جت تمشي بس اتفاجئت بالبوليس واقف من وري ومنتظر واول ما اتحركت راحولها
ميس : ايه ده ؟ انتو عايزين ايه ؟
الضابط : حضرتك مقبوض عليكي
ميس : بتهمه ايه ؟
الضابط : شروع في قتل وليد نصار
ميس بصت لوليد اللي شاورلها : هتوحشيني باي .. خدوها من هنا
البوليس اخدها ومشي وشريف مذهول من اللي بيحصل
وليد : روح وري بنتك هتحتاجك اليومين الجايين دول
شريف مشي وري بنته
وليد : دلوقتي بقي نقدر نبدأ حفلتنا ( بص لجميله ومد ايده ) تسمحيلي يا جميلتي بالرقصه دي ؟ أكرم خليهم يشغلولنا اي مزيكا .. اتصرف
المزيكا اشتغلت وهو اخد جميله في حضنه وبدأ يرقص معاها
جميله : انا مش مصدقه اللي انت عملته ده ؟
وليد : اتأخرت قوي لحد ما عملته
جميله : ليه كل ده ؟
وليد : لان ما ينفعش ام ابني وحبيبتي تفضل في السر .. كان لازم قبل ما ابني يجي احفظ حق مامته والا مش هقدر احط عيني في عينه .. كان لازم اجيب حق حبيبتي .. انتي احق الناس تشاركيني فرحي قدام الكل ..
جميله : بس مش بالطريقه دي .. وميس ؟
وليد : اخدت جزاتها ولا انتي راضيه باللي عملته ؟
جميله : لأ بس
وليد : ما بسش ارقصي بقي وانتي ساكته هو انا مش علمتك ازاي ترقصي معايا !!
وليد بيرقص معاها وبص لعلاء وخالد وشاورلهم يشاركوه وفعلا كل واحد سحب مراته وراحوا جنبه لحد ما الرقصه خلصت ووقفوا كلهم مع بعض .. ندي باست جميله وخالدبصلها باستغراب : انتي كنتي عارفه ؟ ومقولتيليش ؟
ندي : مكنش سري علشان اشاركك فيه
وليد : خلاص من هنا ورايح مفيش اسرار تانيه
علاء : بقي كانت مراتك !! شفتي بقي يا نسمه انه كان عندي حق لما قلتلك ان الوضع كان غريب
نسمه : قصدك لما قلت انها جميله الجميلات ؟؟
وليد : وقعت في شر اعمالك رد بقي عليها
علاء : نسمتي حبيبتي
نسمه : هسامحك بس لان عندك حق هيا فعلا جميله الجميلات
ضحكوا وهزروا وقاطعهم محي وحسين
محي : بقي دي اللي هتجيب ولي العهد !؟ الخدامه ؟
وليد : مراتي يا عمي وخلي بالك وانت بتتكلم عنها .. جميله مليون خط احمر
حسين : اهدوا .. مبروك علي جوازك منها يا وليد
وليد : الله يبارك فيك يا عمي
نبيله هنا اتدخلت هيا كمان : جميله تعالي ارتاحي بقي حبيبتي
وليد : لا يا امي جميله هتفضل هنا معايا سيبيها لو تعبت هترتاح ما تقلقيش
نبيله : براحتكم .. محي ، حسين .. سيبوا الشباب يتبسطوا وتعالوا احنا نتكلم مع الضيوف
محي : نقولهم ايه ؟ ازاي ابنك حبس مراته وازاي جاب واحده واعلنها مراته ؟؟
وليد : ايوه بالظبط كده يا عمي .. وياريت حضرتك تتقبل اللي حصل بسرعه
محي : اتقبله ؟؟ انك انت وقبلك ابوك كوشتوا علي الشركه ودلوقتي ضحكت علي العيال دي بكلمتين !! واعتذار سخيف
وليد : والله انا ما ضحكتش علي حد واهم قدامك اسألهم
محي : ايه يا علاء ! فجأه كده بقي وليد حبيبك ؟ نسيت كل حاجه ! نسيت اللي فات
علاء : لا ما نسيتش بس تعبت من الخلافات وكفايه بقي انا عندي مراتي واللي في بطنها بالدنيا معدتش عايز عداء مع اي حد
محي : وابنك لما يجي يقولك فين حقي ؟ ولما يقارن نفسه بابن وليد باشا هتبقي تقوله ايه ؟
ندي : جري ايه يا عمي هو حضرتك كنت فرحان بالعداء بينهم ودلوقتي لما اتصافوا جاي تشعللها ؟؟
محي : اتصافوا ولا اضحك عليهم حددي ؟؟
ندي هترد بس وليد اتدخل : اللي انتو بتعملوه ده ولا وقته ولا مكانه فأرجوك النهارده بنحتفل
محي : بجوازك ؟؟
وليد : بإعلان جوازي
محي : ماشي يا وليد احتفل
كملوا احتفالهم وكانت سهره جميله بكل المقاييس واخيرا الكل مروح بيته .. وليد جنبه جميله ماسك ايديها وأكرم سايق وجنبه واحد من البودي جارد ووراهم عربيه بودي جارد ..
وليد : ما تتخيليش انا فرحان قد ايه ؟
جميله : وليد
وليد : عارف حبيبي اكيد انتي كمان فرحانه
جميله : ولييييد
وليد : ايه مالك في ايه ؟
جميله : انا تعبانه
وليد : دقايق وهنكون في البيت ارتاحي يا قمر
جميله : لا يا وليد مش التعب ده بقولك تعبااانه
وليد اتعدل وبصلها : تعبانه ازاي يعني مش فاهم ؟
جميله : انا هولد الليله
أكرم أخد فرامل وبصلهم ووليد مش مستوعب : انتي لسه ما دخلتيش في التاسع اصلا ولا دخلتي ايه مش فاهم ؟
جميله : اخر اسبوع في الثامن .. المهم اني تعبانه
وليد : طيب نطلع علي المستشفي .. أكرم
أكرم : حاضر دقايق وهنكون هناك
وفعلا خلال دقايق كانوا في المستشفي وبعد ما الدكتوره كشفت عليها اكدت ان دي فعلا ولاده .. وليد كان متوتر جدا .. نبيله اتصلت بيه علشان تأخيره فبلغها وهيا اتحركت تروحله وكذلك ندي وحتي علاء ومراته والكل اتجمع منتظر ..
وليد مع جميله ماسك ايديها ودخل معاها لحد ما ابنه شرف الدنيا وكله انتهي .. شال ابنه وكان احساس مختلف تماما بس في خوف جواه .. خوف علي ابنه من الطمع .. كلهم متجمعين
نبيله : اوعو كلكم كده بعيد وروني حفيدي اللي طال انتظاري ليه ؟ تعال يا قلبي انت شوفتو شبهي ازاي
الكل ضحك و وليد حضن مامته
ندي : هاتيه يا ماما بالله عليكي عايزه اشيله
نبيله : امشي يا بت من هنا روحي هاتيلك واحد ده بتاعي
ندي : ماما بقي
اخيرا نبيله تنازلت وعطته لندي اللي باسته كتير وبعدها عطته لجوزها : شفت يا خالد جميل قد ايه !!
وكمان نسمه وعلاء اخدوه
علاء : نسمه انا كده شايله صح ؟
نسمه : اه يا حبيبي ما تقلقش .. تعال نتعلم في ابنهم ..
وليد : نعم منك ليها .. بكره يشرف ابنكم اتعلموا فيه .. هات يا ابني الواد
علاء : هتسميه ايه ؟
وليد : لسه مش عارف .. هاه جميلتي هنسميه ايه ؟
جميله : مش عارفه .. سميه انت
نبيله : ايه رأيك يا وليد في اسم فهد ؟
وليد : فهد ؟؟ فهد ! ممكن
ندي : اه جميل فهد
نبيله : اوعو بقي كلكم وهاتولي الكتكوت ده ..
وليد : طيب انا مش هشيله ولا ايه ؟ ايه يا ماما
نبيله : ما انت شيلته هيا حكايه ولا ايه ! روح هات غيره
وليد : اجيب غيره !! ايه يا حجه نبيله غيره ايه دلوقتي
دخلت الممرضه : بعد اذنكم هاتوا البيبي علشان يرتاح في سريره كده اعتقد كلكم شوفتوه
نبيله : خليه معايا
الممرضه : لا مش هينفع يا افندم اصلا غلط عليه حاليا لازم يكون في اوضته المعقمه مع باقي المواليد ده علشان خاطر صحته يا افندم
نبيله : طيب هتجيبيه تاني امتي ؟
الممرضه : هبقي اجيبه علشان يرضع ما تقلقيش حضرتك
الكل بعدها سابهم علشان يرتاحوا وروحوا وفضل وليد مع جميله
وليد : حمدالله علي سلامتك يا عمري
جميله : الله يسلمك حبيبي
فضلوا مع بعض يتكلموا بهمس وهيا نايمه علي صدره وشويه وجاله تليفون وكان شريف
شريف : انا يا وليد تحبس بنتي ؟ مراتك ؟ كل ده ليه يعني ؟علشان جميلتك ؟
وليد : لا مش علشانها يا شريف بيه بس بنتك اللي زودتها قوي
شريف : غارت
وليد : غارت لدرجه انها تقتلني ؟
شريف : مكنش قصدها وانت عارف ده كويس
وليد : امال ايه قصدها ؟ تأدبني ؟ ولو سوري يا شريف بيه انا ما بتنازلش عن حقي وبعدين مش وليد نصار اللي واحده هتأدبه
شريف : وليد دي بنتي
وليد : اللي غلط يتحاسب ويتحمل نتيجه غلطه .. سيبها تتحمل ولو مره نتيجه اعمالها بعد اذنك
قفل وبص لجميله : بتبصيلي كده ليه انتي كمان ؟
جميله : علشان ما ينفعش تحبس مراتك دي كده قلة اصل وانت حبيبي مش قليل الأصل
وليد : انتي هتجننيني ؟ قلة اصل يا جميله ؟ بعد كل اللي عملته فينا وتقوليلي قلة اصل
جميله : انت ليه بتعاملها بأخلاقها ! عاملها بأخلاقك انت
وليد : لان هيا ما ينفعش معاها غير كده
جميله : لا يا حبيبي مش انت اللي تحبس واحده مش انت .. وبعدين احنا بننهي العداءات اللي موجوده مش بنخلق اعداء جديده
وليد : شريف انا اقدر اقفله كويس قوي ده انا كمان ممكن الغيه نهائي
جميله : انت سامع نفسك يا وليد !! انت مش كده ارجوك علشان خاطري وخاطر ابننا الغي اي عداء وحاول كمان تتصرف مع عمك محي بالذات لا أنا ولا انت هنتحمل حاجه تحصل لابننا ولا ايه ؟ فكر فيه
وليد سكت ومردش عليها ..
جميله خرجت من المستشفي وندي ونسمه تقريبا ما بيسيبوهاش وعلاء وخالد مع وليد ..
وليد قابل شريف ومعاه محاميه الخاص
شريف : ايه جاي تشمت اني مش عارف اخرج بنتي من السجن ؟
وليد : دي مش أخلاقي يا شريف بيه بالعكس انا جاي اخرجهالك
شريف انتبه : بجد هتخرجها ؟
وليد : بشرط
شريف :: اللي انت عايزو ؟
وليد : تتنازل عن نصيبك في المجموعه !!
شريف : نعم !
وليد كمل : هشتريه منك بسعره المناسب
شريف : لا طبعا مش هبيع
وليد وقف : خلاص خليك بس هاخده منك باي طريقه الموضوع مجرد وقت ابقي سلملي علي ميس وبلغني اخبارها في سجن النسا بعد اذنك
شريف : استني بس
وليد : انت عارفني ما بجادلش وما بغيرش كلامي يا تتنازل يا بنتك هتتحبس مفيش حل تالت
اخيرا شريف وافق واتنازل عن نصيبه لوليد وراح خرج ميس
في يوم السبوع اتجمعت العيله وبس واحتفلوا ونوعا ما بدأ الامن يستتب في العيله وبدأ اولاد العم تجمعهم قرابتهم ومراتاتهم قربوهم من بعض جدا ..
بقلم /
shimooo novels الشيماء محمد
............بعد كام سنه ...........
وليد ابنه معاه وعلاء مراته خلفت بنت سمتها سالي وخالد خلف ولد اسمه وليد علي اسم خاله ..
محي وحسين مازالوا بيخططوا بس في السر ومنتظرين فرصه مناسبه ..
علاء مراته نسمه حامل تاني وخالد كمان اما جميله فمشغوله بكليتها اللي في اخر سنه فيها وقربت تتخرج منها وعايشه بحب وسعاده مع جوزها وابنها ..
وليد كان بيعمل عقد اجهزه جديده بس محي قرر انه يتدخل ويلغي العقد مع الشركه من وري وليد ويستبدله باجهزه مضروبه ويوقع وليد وطبعا بما ان كل حاجه باسم وليد محدش هيشك فيه هو خالص .. هو امن نفسه هو وحسين وجه الدور علي وليد يقع بشركته ..
استلموا الاجهزه المضروبه واتوزعت علي المستشفيات وكان اغلبها حضانات واجهزه لغرف العمليات ..
نسمه جه معاد ولادتها وتعبت جدا ودخلت العمليات تولد والكل منتظرها .. جوزها و وليد وخالد وكل العيله منتظره ..
طلعت الدكتوره لعلاء وقالتله انها مضطره تولد نسمه قيصري وطبعا علاء وافق لان المهم عنده نسمته ...
خرجت الدكتوره بعد فتره طويله وملامح الحزن علي وشها والكل بصلها منتظر
علاء : في ايه ؟ مراتي فين ؟
الدكتوره : انا اسفه جدا بس مراتك كان عندها نزيف جامد مقدرناش نسيطر عليه وحاليا هيا دخلت في غيبوبه فجهزوا نفسكم
علاء واقف جامد ومنطقش
محي : طيب والبيبي ؟؟
الدكتوره : هو دخل الحضانه .. الساعات اللي جايه حرجه .. بس املنا في ربنا كبير بعد اذنكم
الكل وقف جنب علاء وبيواسيه وهو حاله صمت غريبه مسيطره عليه ..
اخدوا يومين بالمستشفي وفي اليوم الثالث علاء بلغوه ان مراته وابنه الاتنين اتوفوا وكانت صدمه للكل
علاء بدأ يطلع من صمته بحاله من الجنون والخناق مع الكل وعايز يقتل الدكتوره وكانت حاله هرج ومرج وادخل الامن واتدخل وليد وخالد علشان يقدروا يسيطروا عليه
واخيرا مدير المستشفي اتدخل
علاء : مراتي كانت كويسه انا هقفلكم المستشفي دي انتو قتلتوها .. انا هقفل المستشفي سامع هقفلها
المدير : والله لو في حد غلطان واتسبب في موت مراتك فده حضراتكم ومش هيا بس في كذا حاله
وليد : تقصد ايه ان ده بسببنا ؟
المدير : اقصد ان الاجهزه اللي شركتكم جابتها كلها مضروبه والحضانات كمان وده اللي قتل مرات حضرته .. في وقت العمليه مهم جدا الاكسجين يفضل مستمر علشان المخ يفضل مستمر وبما ان الاجهزه مضروبه فالاكسجين ما وصلش لمخها وده اللي دخلها في غيبوبه وقتلها ونفس الوضع لابنه .. الحضانات بايظه ما بتقمش بدورها .. انتو اللي قتلتوهم والمستشفي هيا اللي هترفع علي شركتكم قضيه وانا اللي هقفل شركتكم
المدير سابهم ومشي والكل بص لوليد لان الصفقه دي بتاعته هو
وليد : ما تبصوليش انا استحاله اشتغل في اجهزه مضروبه وانتو عارفين ده كويس
طبعا الدنيا اتوترت ومحي فضل مع ابنه يقنعه ان وليد قتله مراته وابنه علشان ما يسمحش يكون في شريك مع ابنه فهد ..
وليد الدنيا كلها اتلخبطت معاه ومقدرش يوصل لمين اللي لغي العقد مع شركته وعمل العقد الجديد
واترفعت قضيه علي الشركه من المستشفي وطبعا وليد سحب كل الاجهزه المضروبه من المستشفيات قبل ما تحصل كوارث كتير..
حيره وغموض .. كل حاجه عملها هو بنفسه والشركه بلغته انهم وصلهم ايميل بإلغاء الصفقه ولما طلبوا تأكيد اتأكد عليهم معني كده ان اللي عمل ده يقدر يدخل مكتب وليد وله صلاحيات في الشركه .. وده مالوش غير معني واحد ان حد من اعمامه او اولادهم عملها بس يا تري مين !! وليد كلف مخبر سري وكان ( اسمه جمال ولقبه جيمي ) يعرفله كل اللي يقدر عليه من الشركه بره وبعدها قرر وليد يسافر بنفسه يشوف ايه اللي حصل بالظبط
بقلم /
shimooo novels الشيماء محمد
جميله : ارجوك يا وليد ما تسافرش .. خلي اي حد تاني يسافر
وليد : لازم انا بنفسي يا جميله ده سمعه الشركه ومستقبلها كله متوقف علي ده ..
جميله : بلاش انا مش مطمنه ارجوك
وليد ضمها : المكتوب مكتوب يا جميله .. خلي عندك ثقه في ربنا
خلي بالك من نفسك ومن فهد .. وبعدين مش هتأخر
جميله : طيب خد اكرم والبودي جارد معاك
وليد : جميله البودي جارد في فتره كنت محتاجهم بس دلوقتي خلاص وبعدين هيعملولي ايه بره !! حتي لو في خطر هيكون هنا مش بره اللي خاني موجود هنا ما تقلقيش
هنا ابنهم دخل : بابي
وليد شاله : روح قلب بابي
فهد : انت هتوصلني المدرسه صح .. بكره اول يوم وهكون كجي١ صح بابي
وليد : صح يا قلب بابي بس اسف جدا يا فهد مامي هتوصلك لان بابي مسافر في شغل مهم جدا
فهد : بس انا كنت عايزك انت
وليد : اسف حبيبي لازم اسافر اعذرني فهد
وليد برضه سافر وساب جميلته وابنه اللي زعلان من ابوه انه ما وصلوش زي ما وعده ...
وليد حاول يعرف اي حاجه من الشركه بس موصلش لاي شيء مجرد ايميل وري ايميل اتبعتوا لغوا الصفقه وبالليل جاله تليفون من جيمي اللي كلمه و نزل يقابله
وليد : ايه اللي مخلينا نتقابل في السر كده وبالوقت ده
جيمي : حضرتك عايز تعرف مين اللي لغي العقد مع الشركه وانا هقولك
وليد : اتفضل قول
جيمي : اتفضل شوف بنفسك الايميل
وليد : وده افهم منه ايه ؟ كل اللي مكتوب فيه اني بلغي الصفقه وبس فاعمل ايه بيه !!
جيمي : حضرتك ركز بس وشوف هنا ..
وليد : مش فاهم
جيمي بدأ يشغله برامج علي اللاب ويشرحله اكتر
جيمي : كل مكتب بيكون له رقم حتي لو اتفتح نفس الايميل .. وبالتالي بمجرد ما تعرف ازاي المكاتب مترقمه هتعرف اتبعت من انهي مكتب وساعتها ..
وليد : هعرف مين اللي بعته !! طيب اعرف ازاي ترقيم المكاتب
جيمي : الكمبيوتر هو اللي هيعرف .. انا مشغل برنامج هيوصلنا للترقيم ده اصبر بس دقايق وهيقولنا
وبالفعل في خلال ربع ساعه من الانتظار البرنامج وصل للترقيم وفك الشفره وساعتها وليد واقف مش مصدق
وليد : عمي محي ده مكتبه !!
جيمي : يبقي عمك اللي عملها بس ليه ..
وليد مش مصدق ابدا : وليه يلغيه هو مش هيستفاد شيء وبعدين هو وابنه اكتر حد خسر
جيمي : انا معرفش ليه انا اللي اعرفه قلته لحضرتك
هنا نور عربيه نور في وشهم .. كذا عربيه مش واحده ونزل اشخاص كتيره منها ووليد حط ايده علي عنيه بيحاول يشوف مين اللي نزل لحد ما قربوا منه واكتشف انهم عيلته مش اكتر
وليد : انتو هنا ليه ؟ عمي محي سمعت ان حضرتك اللي لغيت عقد الشركه
محي : انا ؟ وانا الغيه ليه ؟ يهمني في ايه علشان الغيه ؟
علاء : انت اللي لغيته وتمثيلك للقيم والمباديء معدش لايق عليك
وليد : انا مالغيتش حاجه ابوك اللي لغاه
علاء : ابويا مش هيقتل حفيده فاهم
وليد : لا للاسف يا علاء ابوك فعلا اللي قتل ابنك
علاء للحظه اتردد بس محي اتكلم : ايه دلوقتي عايز ابني يقتلني ولا ايه ؟ عايز تخلص مننا كلنا وتوقعنا في بعض .. انا قتلت ابنه وهو يقتلني وبكده تخلص مننا احنا الاتنين صح ؟
وليد : انا ماليش في التخطيطات دي وانتو عارفين ده كويس .. خالد اتكلم انت كنت معايا في الصفقه دي
خالد : انا فعلا كنت معاك لحد ما اتفقنا بعد كده انت لغيتها
وليد زعق : انا ما لغتش صفقات
جيمي : فعلا الايميل اللي اتبعت كان من مكتب محي وده اتأكدنا منه حالا وممكن حضراتكم تشوفوا الايميل اتبعت منين
هنا محي طلع مسدس وقبل ما حد يستوعب كان ضرب رصاصه في دماغ جيمي ونزل في الارض وسط دهشه وليد اللي عمره ما تخيل انها توصل للقتل كده رفع دماغه وبصلهم علاء طلع مسدس : خلص الكلام يا وليد واكتفيت منك
وليد رجع خطوه لوري : علاء اعقل
علاء : كفايه عقل ما كنت عاقل وايه التمن ؟ خسرت مراتي وابني .. وانت السبب
يدوب وليد هيرد بس علاء كان ضرب رصاصه في صدره ووسط حاله من الذهول وليد وقع علي الارض بينزف وكلهم وقفوا فوقه
محي : واخيرا خلصنا منك .. يالا بينا قبل ما البوليس يوصل
مشيوا فاضل علاء و خالد وعلاء وطي عليه ووليد بينزف جامد قرب منه
علاء : اخيرا اخدت اللي تستاهلو
وليد نطق بالعافيه ومد ايده مسك علاء من هدومه : جميله وفهد مالهمش ذنب
علاء شد ايد وليد وزقها : وابني ونسمه مكنلهمش ذنب وبعدين انا هجمعك بيهم
علاء وقف ووجه مسدسه في وش وليد وهيضرب بس خالد مسك ايده وعلاء بصله : ايه ؟ هكمل عليه ولا عايزو يقوم ويرجعلنا يودينا كلنا في داهيه
خالد : سيبلي انا الشرف ده
علاء بعد وسابهم وخالد وطي علي وليد حط حاجه في جيبه
خالد : ده ضمان انك ما ترجعش تاني ..
وقف وعنيهم متعلقه ببعض
وليد : ندي ؟
خالد : ماتقلقش عليها بعدين انت عارف اني بحبها .. باي باي وليد
خالد ضرب رصاصه كمان ومشي حصل عيلته لان سارينات البوليس قربت
علاء : خلصت عليه ؟
خالد : ما تقلقش
مشيوا كلهم وسابوه بينزف في الارض .. وليد حط ايده في جيبه وطلع اللي خالد حطه كانت فلاشه صغيره مفهمش اي دي
كان بينهج والدم بيخرج من صدره حتي من بوقه ودعي دعاء صامت لربنا يحميله ابنه ومراته .. وقفل عنيه ونفسه هدي شويه شويه ...
توقعاتكم
#الحلقه٢٥والاخيررررره
#جميله☺️
جميله قامت مفزوعه تعيط وجريت علي ابنها حضنته وهو نايم وفضلت جنبه لحد ما الصبح طلع ومكنتش عايزه توديه مدرسته بس نبيله رفضت ..
حاولوا طول الوقت يكلموا وليد بس مقدروش يوصلوله نهائي
تاني يوم الصبح وصل محي وابنه واخوه وخالد وعملوا نفسهم مش عارفين اي حاجه لان محدش عرف انهم سافروا بره البلد اصلا واخيرا وصلتلهم اخباره بعد اسبوع كامل
المحامي : انا اسف نبيله هانم
نبيله بخوف : ابني فين ؟ عرفت ايه ؟
المحامي : طبعا انا قلبت الدنيا وحتي كلمت السفاره هناك و
نبيله قاطعته : من غير رغي ابني فين ؟
جميله قلبها هيخرج من مكانه .. ومنتظره المحامي ينطق
المحامي : البقاء لله يا افندم
مهما الواحد يكون مستعد انه يسمع اخبار وحشه بس عمره ابدا ما بيتقبل الموت .. ازاي الواحده تتقبل موت جوزها او ابنها ..
حاله صدمه عاش فيها الكل .. جميله ساكته تماما وما بتتكلمش بس حاضنه ابنها ..
حاله انهيار الكل وقع فيها محدش مصدق اصلا ازاي ده حصل ..
خالد في بيته وندي كانت بتجهز شنطتها واول ما شافها جري عليها : انتي بتلمي شنطتك ليه في ايه ؟
ندي باستغراب : رايحه عند ماما مش هينفع اسيبها لوحدها هيا وجميله وبعدين انت ليه اتخضيت قوي كده ؟
خالد : لا ما اتخضيتش بس خايف عليكي انتي علي وش ولاده
ندي فكرت شويه : انت سافرت فين انت وعلاء اليومين اللي سافرتهم دول ؟
خالد : انتي بتسألي ليه دلوقتي ؟
ندي : بسأل .. سافرت فين ؟
خالد : سافرنا شرم غيرنا جو انتي عارفه حاله علاء عامله ايه بعد موت ابنه ومراته .. ايه غلطان؟
ندي : لا مش غلطان .. بس توقيتكم كان غريب
خالد : والله لو اخوكي الله يرحمه كان قال كنت سافرت معاه او سافرنا انا وعلاء معاه بس هو سافر لوحده
ندي : قسما بالله يا خالد لو اكتشفت في يوم من الايام ان لك يد في اللي حصل
قاطعها : وصلت يا ندي للقتل ؟؟ ايه قتال قتله انا قدامك ؟ انا مش هتقبل اتهامك عمال علي بطال كل شويه .. وليد ابن عمي وبقالنا كام سنه كويسين وركنا خلافتنا كلها علي جنب واكيد انتي شفتي ده بنفسك ايه اللي جد بقي ؟
ندي عيطت وقعدت في الارض : امال ايه اللي حصل ؟ ايه اللي قلب العيله كده .. كنا سعدا كلنا وفجأه نسمه تموت هيا والبيبي وبعدها اخويا ....
خالد قعد جنبها وضمها : دي اعمار حبيبتي .. اعمار
اخدها بيت مامتها اللي منهاره تماما بموت ابنها لدرجه كل شويه يدوها مهدئات علشان تقدر تنام او ترتاح .. وجميله وندي ما بيفارقوهاش ابدا ..
جميله قررت تسافر تجيب جثه جوزها تدفنه في بلده
ندي كانت عايزه تسافر معاها بس ولدت بنتها واضطرت تقعد
ندي : كان نفسي اسافر معاكي
جميله : معلش المهم انك قومتي بالسلامه انا بس مش هاين عليا اسيب ماما في الظروف دي .. بس لازم
ندي : ما تقلقيش عليها .. طيب ندي خلي خالد يسافر معاكي
جميله : خالد انتي محتاجاه اكتر مني .. ابنك وبنتك محتاجينه وبعدين انا علاء مسافر معايا ما تقلقيش .. يالا اشوف وشك بخير
وهيا في المطار من بعيد مراقب
علاء : واخيرا هتخلصي منها
ميس : كويس انك قدرت تقنعها تسافر
علاء ابتسم : هيا ما اخدتش اكتر من دقيقتين في الكلام كل اللي قلتهولها انها هيا اللي المفروض تستلم جثته بحكم انها مراته يا اما هيدفنوه هناك او يحرقوه
ميس ضحكت : هو فعلا في جثه ؟
علاء : لاطبعا مفيش .. انا عطيتها عنوان وهمي ومعلومات وهميه .. هو اه البوليس وصل ساعتها بس معرفش جثته فين او ايه اللي حصل . محدش بعدها عارف ايه اللي حصل وبعدين انتي شاغله نفسك ليه هيا مش هتوصل هناك اصلا !
ميس : عارفه بس فضول مش اكتر انت هتسافر معاها ؟
علاء : قصدك هسافر لوحدي .. هيا مش هتسافر انا بس اللي هسافر وهرجع بجثه لوليد ما تقلقيش
وجميله بتخلص الاجراءات جالها اتنين ظباط واخدوها وطلبوا منها تتفضل معاهم هنا علاء ظهر وراح ناحيتها
علاء : هاجي معاكي ؟ ايه اللي بيحصل ؟
جميله : سافر انت وهات وليد وانا هنا هتصرف ما تقلقش .. سافر انت مالكش دعوه بيا
علاء : انا هكلم بابا وخالد مش هنسيبك ما تخافيش
علاء مشي مبتسم ان كل حاجه ماشيه زي ماهو خطط بالظبط
جميله اتمنعت من السفر ودخلت في متاهات كتيره جدا ما بقتش فاهمه منها حاجه
كل محامين وليد واقفين معاها بس للاسف مفيش حد عارف يخرجها
نبيله : فهمني ايه اللي بيحصل ده ؟ وازاي ؟
المحامي : انا نفسي مش عارف ايه اللي بيحصل .. الادله معاهم قويه وللاسف وليد الله يرحمه كتب اغلب املاكه باسم ابنه وهيا وصيه عليه وفي الفتره الاخيره هيا بدئت تشتغل معاه وده اللي خلاها حاليا متهمه
ندي : احنا شركتنا من انضف الشركات وسمعتها معروفه
المحامي : كانت !! الشركه من ساعه اخر صفقه بتاعت الاجهزه المضروبه وهيا في النازل
ندي : ايوه في النازل بس ده مش معناه اننا هنشتغل في تهريب الاسلحه والمخدرات
المحامي : انا عارف بس البوليس لهم الادله والمشكله ان صفقه الاجهزه المضروبه كان جاي معاها سلاح وبعدها في صفقه تانيه وصلت المينا وللاسف كان فيها سلاح ومخدرات وطبعا جميله اللي مضت علي استلامها وكمان في المطار الشنطه بتاعتها كان فيها دولارات كتيره .. يعني كأنها هربانه بالفلوس
للاسف كل حاجه ضدها وكل حاجه بموت وليد باسمها هيا وبالتالي هيا اللي هتشيل الليله كلها
نبيله : انت لازم تخرجها
المحامي : هحاول بعد اذنك
ندي مع بنتها امل ( سمتها امل لانها حاليا محتاجه للامل في حياتها )
ندي : خالد انت لازم تتصرف وتخرج جميله ..
خالد : المفروض اني اعمل ايه ؟ اخر كام شحنه وصلوا البلد كان فيهم مخدرات وسلاح واخوكي ومراته ماضيين علي الاستلام
ندي : اخويا ما يعملهاش .. لازم نعرف مين اللي عمل ده ؟
خالد : مش يمكن اخوكي كان بيمثل الاخلاق والقيم عليكم
ندي بهدوء حطت بنتها في سريرها ووقفت قدام جوزها ومره واحده ضربته بالقلم وهو اتفاجيء ومسك ايديها الاتنين بعنف
خالد : قسما بالله يا ندي .. لولا اني مقدر حالتك وموت اخوكي كنت هتصرف معاكي تصرف تاني خالص ..
ندي : ايه هتعمل ايه ؟ لاخر مره هقولك يا خالد اخويا كان انضف راجل في الكون ده كله ومش هسمح لاي حد يوسخ اسمه
خالد زعق : يوسخ اسمه ؟ اخوكي اسمه بقي في الوحل والشركه وقعت واتعرف انه كان تاجر مخدرات وسلاح روحي بقي للناس كلهم دافعي عنه .. ولا طلعي دليل لو عندك انه كان عنده قيم واخلاق بعد اذنك ..
ندي قعدت مكانها تعيط ولاول مره في حياتها تحس انها يتيمه ملهاش حد .. احساس بالضياع مسيطر عليها .. احساس بالخوف من بكره ..
ندي وقفت : انا لازم اتصرف .. انا لازم اعمل حاجه .. انت وعلاء اكيد ليكم يد في اللي حصل .. انتو اكبر اعداء لوليد .. محدش له مصلحه غيركم .. انا لازم اتصرف
جت تخرج بس خالد مسكها من شعرها جامد : هتروحي فين وهتعملي ايه ؟ هاه
ندي : هروح للبوليس ؟ للمخابرات ؟ لاي حد ؟ هتهمكم بقتل وليد ؟ هتهمكم بتلفيق تهم لجميله المسكينه ؟ هعين ميت مخبر خاص يجيبلي الحقيقه ؟ هفضل احفر وراكم لحد ما اعرف ايه اللي حصل لوليد بره ومين اللي جاب اسلحه وحطها في الشحنه ؟ ومين اللي حط دولارات لجميله ؟ هعرف كل حاجه يا خالد ؟
خالد بهدوء : اطلعي اعملي كل ده
ندي بصتله بتردد : ايه الهدوء ده ؟
خالد وقف قصادها : بصي بقي .. وليد اخوكي احنا معملناش فيه حاجه تحبي تصدقي علي عيني وعلي راسي ..ما تصدقيش فانتي حره .. بس اوعي تفكري اني هسمحلك تطلعي وتوسخي باقي اسم العيله وتعملي عداءات تانيه مع عمي وابويا وابن عمي ..
ندي : هتعمل ايه يعني ؟
خالد : كل اللي هعمله يا ندي اني هخرجك من حياتي
ندي : بس كده ؟ انا هخرج من حياتك دلوقتي
جت تتحرك بس مسك ايدها : هتخرجي لوحدك
بصتله بصدمه : قصدك ايه ؟
خالد : قصدي ان عيالي هيتربوا في بيتي في حضني وفي حضن جدهم وجدتهم انتي بقي مش عاجبك بيتي وشاكه فيا اني قتال قتله .. واني ليا يد في موت اخوكي اتفضلي ( شاور علي الباب ) اعملي ما بدالك .. بس عيالي مش هتجريهم معاكي لدوامه الكره دي . عايزه تخرجي بره البيت لوحدك يا ندي . فياريت تفتكري اني بحبك واني عمري ما هأذي وليد ابدا وتفتكري ان بينا بدال العيل اتنين .. عندنا وليد الصغنن وامل بينا عيلين يا ندي وانتي لسه بتشكي فيا فلو هتكملي في طريقك ده ساعتها ما تلوميش الا نفسك ..
سابها وخرج وهيا فضلت مكانها تعيط . عيطت على اخوها كتير لانه كان سندها .. استحاله حد كان يقدر يدوسلها علي طرف طول ما هو عايش .. استحاله حد يقدر يزعلها و وليد يسيبه .. استحاله تكون قليله الحيله كده .. ليه يا وليد سافرت وسيبتنا ؟؟؟؟؟؟؟
جميله علي الرغم من المحامين الكتير الي انه اتحكم عليها بالمؤبد .. اخدت 20 سنه سجن ..
وبعد المحاكمه نبيله روحت بيتها اتفاجئت بميس في البيت ومعاها فهد
نبيله : انتي بتعملي ايه هنا اطلعي بره
ميس وقفت : اطلع بره ؟ ده بيتي وده ابني وانا الوصيه عليه وعلي املاكه لحد ما يبلغ السن القانوني
نبيله : انتي الظاهر اتجننتي
ميس ضحكت جامد : حضرتك الظاهر اللي مش واخده بالك من اللي بيحصل حواليكي .. وليد ابنك بخ خلاص وجميله الله يعينها بعد ال 20 سنه دول .. والشركه بقت بتاعتنا وفهد بقي ابني انا ودلوقتي ياريت تخليكي مؤدبه بدال ما اخلص منك انتي كمان
نبيله : انتي بتقولي ايه ؟ هيا سايبه ولا ايه وبعدين انتو مين ؟
ميس : انا هقولك .. انا وبابي ومحي وحسين وعلاء وخالد .. الشركا الاساسين شريف بابي ومحي وحسين واحنا عيالهم التلاته واتفقوا ان الشركه هتتقسم بالتساوي بينا انا وعلاء وخالد بس طبعا نصيب الاسد لفهد وانا الوصيه عليه بحكم اني مامته
نبيله : مامته ازاي ؟
ميس طلعت ورقه وعطتها لنبيله : انتي نسيتي اننا كنا جهزنا كل حاجه علشان الولد يكون باسمي ؟ اه وليد لغي كل حاجه بس الاوراق كلها فضلت موجوده مستنيه بس توقيع منه ..
نبيله : وانتو زورتو توقيعه بعد ما مات صح ؟
ميس : لا طبعا ده توقيع ابنك
نبيله : وليد لا يمكن يوقع علي ورق زي ده
ميس : فعلا لا يمكن بس سهل قوي سكرتيره يحطله ورقه وسط اي ملف يوقعها مع الورق كل المطلوب انك تشوفي سعره ايه وتشتريه وكل ملف تتحط ورقه لحد ما يوقع كل الاوراق المطلوبه وبعدها نخلص منه .. هاه عايزه تعرفي حاجه تانيه .. ابنك مات ومراته اتقبض عليها وانا رجعت لبيتي وكمان معايا ابني واحمدي ربنا اني قررت اعتبره ابني مش اخلص منه
نبيله : انا لا يمكن هسمحلك تتمتعي بده يا ميس انا هقف لك
ميس : يبقي حضرتك اللي جنيتي علي نفسك وتستاهلي اللي هيجرالك .. بعد اذنك يا ... يا مامي
ميس مشيت ونبيله مش عارفه تعمل ايه !! اتصلت بندي تجيلها وفعلا راحتلها قعدت معاها وفضلت تعيط وتقولها انها يتيمه وانها خايفه ولاول مره نبيله تشوف ندي ضعيفه ومهزوزه كده ..
نبيله اترددت تقولها علي ميس بس لازم
نبيله : ميس رجعت
ندي : رجعت ؟ يعني ايه رجعت ؟
نبيله : يعني رجعت ومعاها اوراق بتقول ان فهد ابنها
ندي : مزوره !! وسهل نثبت انها مزوره
نبيله : للاسف الاوراق مش مزوره .. الاوراق عليها امضه اخوكي
ندي : ازاي يا ماما
نبيله : مش مهم ازاي المهم دلوقتي هنعمل ايه ؟ الشركه اعمامكم وعيالهم كوشوا عليها
ندي : فهد كمان مش في امان
نبيله : لا فهد في امان لان معظم الاملاك باسمه فحاليا محدش يقدر يلمسه لان لو جراله حاجه كل حاجه تروح للدوله بناءا علي وصيه وليد ..
ندي : وبعدين هنعمل ايه ؟ هنسيبه لميس ؟
نبيله : لا طبعا .. ندي خالد جوزك معانا ولا معاهم ؟ لازم تعرفي موقفه ايه ؟ ممكن يساعدنا
ندي بدموع : ما اعتقدش يا ماما بس هشوف
ندي روحت بيتها تستني خالد ورجوعه وبعد ما رجع حكتله اللي حصل من ميس
خالد حط ايده علي خدها : حبيبتي فكري بالعقل .. اعتقد ميس شيء كويس لفهد وبعدين زي ما قلتي هو في امان بوصيه ابوه
ندي زقت ايده : انت عايز ميس تربي فهد ؟
خالد : امال مين ؟ مامتك اللي عمرها فوق الستين ؟
ندي : انا هربيه !!
خالد : انتي !! انتي عايزاني اعمل ايه يا ندي ؟
ندي : تجيبلي ابن اخويا !
خالد : انا اجيبه ؟ انتي لسه قايله اهو ان هيا بقت رسميا وصيه علي فهد وابوها رجع شريك في الشركه عايزاني انا اعمل ايه ؟ قوليلي كده اروح اعاديهم وبعدها ايه ؟
ندي : معرفش معرفش اتصرف يا خالد .. انت جوزي لازم تتصرف .. لازم تحسسني بالامان .. انا مش قادره احس بالأمان .. اتصرف
خالد وعدها بإنه هيتصرف والايام بتعدي يوم وري يوم
في الشركه
محي : واخيرا كل حاجه مشيت زي ما احنا عايزين
شريف : فعلا
محي : لولا اننا اتفقنا مكناش قدرنا نوقع وليد ابدا بس انت ازاي حطيت اسلحه في الشحنه ؟
شريف : ده بقي سر المهنه .. وليد هاني وهان بنتي وانا حلفت اني لازم اردله اللي عمله مهما يطول الزمن ..
محي : ايوه بس ازاي ؟ انت مش شغال في التهريب ؟
شريف : لا طبعا بس ليا معارف وبعدين هما لهم مصلحتهم .. كانوا محتاجين يدخلوا اسلحه وانا قدمتلهم شركات وليد علي طبق من فضه ولولا بلغنا عنهم كانوا هيفضلوا مستمرين
محي : طيب مش ممكن يضرونا ؟
شريف : لا ما تقلقش انا مأمن نفسي وبعدين احنا اتفقنا علي صفقتين ووصلوا مصر وبعدها عرفتهم ان الشحنه هتتمسك وعوضتهم عنها .. ما تقلقش احنا في السليم ..
بقلم /
shimooo novels الشيماء محمد
عند ميس
ميس رجعت الفيلا تستقر فيها والفيلا كلها بقت تحت سيطرتها وكل الشغالين غيرتهم الا علية سابتها مديره للبيت ..
ميس كانت مع دكتور نبيله اللي متابع حالتها
الدكتور : هيا حاليا صحتها كويسه ومش محتاجه للمهدئات الا وقت اللزوم تاخدها
ميس : ولو قلتلك اني عايزاها تستمر عليها .. عايزاها مش في وعيها
الدكتور : حضرتك بتقولي ايه ؟؟
ميس : اللي سمعته ..
الدكتور : حضرتك عايزاني
قاطعته: سمعت ان حضرتك محتاج تفتح مستشفي جديده عايزها فين بالظبط ؟
الدكتور سكت وبلع ريقه وبعد شويه : نعم ؟
ميس : بقولك عايز مكانها فين ؟ شاور
واتفقت مع الدكتور يكتب علاج لنبيله يخليها ديما دايخه وهزيله وتعبانه .. ومع الوقت فعلا صحتها بقت بتتدهور .. كانت بتفوق شويه وغايبه عن الدنيا معظم الوقت لحد ما الكل اتفق يدخلوها مستشفي حفاظا علي صحتها
في يوم نبيله صحيت من نومها بتبص حواليها لقت نفسها في اوضه غريبه ومربوطه في السرير .. صرخت وعلت صوتها وفضلت تنادي كتير لحد مادخلت ممرضه ومعاها دكتور : اديها مهديء
نبيله صرخت وطلبت يبعدوا عنها بس كتفوها وعطوها مهديء وهيا بتغيب وبتصرخ
الممرضه : مسكينه
الدكتور : فعلا صدمه كبيره انها تخسر ابنها ومراته وللاسف هيا مش متقبله ده .. سيبيها ترتاح وخلي بالك منها
وبكده ميس خلصت من كل الاطراف اللي ممكن يقفوا في وشها فاضل بس ندي لكن خالد بيحميها ..
ندي : وبعدين يا خالد ؟
خالد : مفيش بعدين .. فهد الصح انه يفضل مع ميس انا معنديش استعداد اعمل عداءات مع الكل .. ندي مش كل شويه بقي .. وليد ومات وجميله واتحبست وفهد ميس هتربيه عايزه ايه انتي بقي .. الامور استقرت خلاص .. ياريت تتقبليها بقي ..
ندي قعدت تعيط وهو قعد جنبها ضمها : كل شيء هيبقي كويس .. مامتك هتخف وهتخرج وجميله هنعملها استئناف وفهد هيعيش ملك وبعدين ميس عمرها ما هتخلف يعني دي فرصتها تكون ام واعتقد انها هتستغل الفرصه دي صح .. انا عارف ان مجمل الاحداث صعب بس ده احسن الحلول .. ابن اخوكي هيكون له ام احسن ما يكون يتيم فكري فيه هو ما تفكريش في كرهك لميس .. فكري في مصلحته .. هيا هتكون ام وبعدين انتي اهو شيفاها بتعمله ايه !! هيا من مصلحتها ان فهد يحبها ويكون ابن ليها
ندي : ليه بقي ؟
خالد : لان لو حبها وكانت ام ليه هتضمن انها تفضل ديما متربعه علي العرش لكن لو كرهها وعرف انها مش امه اول حاجه هيعملها انه هينتقم منها ويرميها بره فهيا لازم لازم تكسبه في صفها واحنا بقي يهمنا ايه غير ان ابن اخوكي يعيش في حضن ام تحبه وتخاف عليه .. انتي مهما كان عمته
مش هتكوني زي ام ..فكري بعقلك حبيبتي واللي يريحك نعمله
ميس في البيت مع فهد اللي مش بيبطل عياط ووقفت قصاده وشالته وقفته قدامها
فهد : انا عايز ماما
ميس : انا ماما وانت لازم تفهم كويس .. باباك خاني وبهدلني ورماني واخدوك انت مني .. وخلي الخدامه بتاعتي تكون مكاني وعملك انت ابنها .. انت ابني انا وبس وكل ما تستوعب ده كويس هيكون احسن .. انت ابني ..
فهد : انتي كدابه
وكل يوم ميس تقول نفس الكلام لفهد وبتحاول تقرب منه شويه شويه
ندي راحت تزور جميله وهناك اتقابلت مع اخوها عماد اللي كان مسافر بره مصر ورجع اول ما عرف باللي حصل لاخته وعملها استئناف بس للاسف اترفض لان الادله ثابته وصريحه
ندي حكت لجميله كل اللي حصل
عماد : انا هروح احط ايدي في رقبه الوليه دي لحد ما اخنقها واجيبلك فهد منها
جميله : وتوديه فين ؟ هاه ؟ وبعدين لما تقتلها مين هيربي بنتك ! نسيت جميله اللي لسه يدوب بتفتح عنيها
عماد : امال عايزاني اعمل ايه ؟
جميله : ولا اي حاجه محدش فيكم يعمل حاجه .. وليد وراح وانا مش هيفرق المكان اللي هعيش فيه وفهد ابني هيتربي في بيت ابوه وزي ما قلتي يا ندي ميس هتعتبره ابنها واتمني انها تحبه بس حتي لو محبتوش هتعامله كويس فأنا شايفه ان الصح انكم تسيبوه معاها .. هيعيش كويس ويتربي كويس ولما يكبر ويشد عوده نبقي نقوله الحقيقه لكن افضله دلوقتي يكون له ام بدال ما ابوه ميت وامه مسجونه .. سيبو فهد مع ميس
ومع اصرارها عماد وندي استسلموا يقنوعها لانها بتتكلم بالمنطق والعقل
ندي راحت تزور فهد وتطمن عليه
فهد : عمتو هو صح ميس دي مامتي ؟؟ مش جميله ؟؟
ندي الدموع لألئت في عنيها وبصت لميس اللي فعلا بتحاول تكون ام ومع رفض الاستئناف لجميله
ندي : فعلا حبيبي ميس هيا مامتك !!
فهد سابهم وجري وهيا بصت لميس : قسما بالله لو زعلتيه لاقتلك بإيديا دول
ميس : ده ابني .. من ساعة ما جميله دخلت البيت ده وانا بستني اليوم ده .. فهد ابني حتي لو مكنتش خلفته ..
وكبر فهد علي ايد ميس تقنعه انها امه وربته بكل الحقد والكره اللي جواها ..
وتوته توته خلصت حدوتنا وخلصت حكايه وليد وجميله او لسه مخلصتش بس الاكيد ان لسه هتبدأ حكايه فهد .. انتظروني مع جميله ٢ في الجزء التاني
غدا
طبعا انا عارف ان النهايه مش هيا اللي متوقعينها بس اصبروا وان شاء الله بكره نكملها ... اتمني انكم ما تحكموش عليها دلوقتي وباذن الله اوعدكم ان الجزء الثاني يهيعجبكم وهتتعدل كل الموازين والشر عمره ما بينتصر ابدا حتي لو في الظاهر انه انتصر .. اصبروا عليا مش هقولكم غير كده بعد قليل
واشوفكم علي خير بعد قليل في الجزء التاني من روايه جميله ☺️..
اكتب في بحث جوحل( مدونة قصر الروايات) تظهر القصص كامله
تابعونا علي قناة التليحرام من هنااااااااااا
ليصلكم اشعار بالنشر
الرواية كامله من البداية الجزء الاول من هناااااااااااا
تعليقات
إرسال تعليق
فضلا اترك تعليق من هنا