رواية جميلة البارت 35-36من الجزء الثاني بقلم الشيماء محمد
#الحلقه٣٥ من الجزء الثاني
#جميله☺️
صباح الخير للجميع
اللّهم لك الحمد والشّكر كما ينبغي لجلال وجهك وعظيم سلطانك. اللهم اكفني بحلالك عن حرامك واغنني بفضلك عن من سواك. اللّهم إنّي أحمدك حمداً كثيراً وأشكرك شكراً كثيراً يليق بجلال وجهك وعظيم سلطانك.
الشباب التلاته شالوها ورموها جنب عربيتها ورموا عليها هدومها المقطعه وركبوا عربيتهم ومشيوا وكأنهم ما ارتكبوش اي جريمه .....
جميله قاعده في حضن ابنها وجوزها والاتنين بيحاولوا يطمنوها وهيا بتعيط لحد ما اخيرا هديت وبدأت تتكلم
جميله : انتو عايزيني اعمل ايه ! انا مبقتش قادره خلاص ! معدتش قادره استحمل وجع تاني او فراق تاني ...
وليد : احنا اتجمعنا خلاص يا جميله
جميله : كان ممكن تروح مني !!
فهد : انتي ليه بس بتفكري كده !!
جميله بعياط : ليه !! اقولك انا ليه !! انا كنت بنت صغيره في قريه صغيره في بيت فقير بسيط بس مليان حب امي ماتت وسابتنا وبعدها ابويا كمان مات وسابنا لعمنا انا واخويا عماد .. عمنا علي قدحاله بيصرف علي عياله بالعافيه عماد اخويا دخل معهد مع انه جاب مجموع يدخله جامعة لكن مرضيش يتقل بالمصاريف على عمي وقبل بالمعهد وكان بيشتغل بعد الظهر اي شغلانه يلاقيها وبعدها انا خلصت الثانوي ودخلت معهد بردو وكنت اقدر ادخل جامعة لكن ماامكنش واهو علي قد ما نقدر ما بنكلفوش غير في الضروري بس الحمل تقل عليه وكان لازم حد فينا يسيب معهده فانا سيبته علشان عماد يخلص ويشتغل وهو يصرف عليا انا وهو لكن انا لو اخدت شهادة هعمل ايه ! هشتغل انا واقعده هو في البيت .. ساعتها ظهرت نبيله هانم في حياتنا بتدور علي بنت غلبانه يتيمه وترضي بالقليل وعمي ساعتها جه وكلمني وانا وافقت علي امل اخفف عن عمي واساعد اخويا ونقدر نعيش وساعتها عرفت اللي هيا طلباه خفت في الاول بس بعدها وافقت لان مفيش قدامي طرق تانيه ولاني كنت ساعتها عيله فمكنش في بالي ولا كنت افهم اصلا يعني ايه جواز او خلفه او حب مكنتش مدركه ايه اللي انا داخله عليه
اهي واحده غنيه عايزه حد يخدمها كام شهر وهخلف وامشي وارجع بيتنا والكل يعيش مبسوط ... ده اللي فكرت فيه
دخلت وشوفتك يا وليد مش هنكر اني كنت مرعوبه منك وخصوصا في الاول كنت بتزعق كتير وبتتخانق مع ميس كتير
ومش قادره انسي لما خليتهم يلبسوني ويزوقوني وبعدها اخدتني لميس اللي اتجننت كنت في قمه رعبي
وليد : حبيبه قلبي انا
قاطعته : انا مش بقول كده علشان تتأسف يا وليد انا وانت حبينا بعض وبجنون انا بس عايزه اتكلم وافضفض
وليد بحب : اتكلمي وقولي كل اللي جواكي
حكت جميله عن حياتها كلها وخوفها ووجعها وعذاب ميس لها وحكت عن حبسها ظلم وخروجها ومحاولتها تشوف ابنها وطرد ميس لها كل شويه او تبعتلها البوليس يمشوها .. حكت كل وجعها طول السنين اللي فاتت وفهد جنبها نفسه لو الزمن يرجع وكان يدور عليها من اول ما رجع مصر واستقر بدال ماهو اخد كلام ميس امر مسلم به ...
جميله عيطت جامد : دلوقتي جوزي رجعلي وابني رجعلي وانا مش عايزه غير انهم يفضلوا جنبي .. مش هقدر حد فيكم يبعد عني تاني .. مش هقدر علي فراق تاني ... يا رب يارب اجعل يومي قبل ما حد فيهم يفارقني
وليد هنا ضمها قوي : ما تقوليش كده يا جميله انا معرفش اعيش من غيرك
جميله : وانا معدتش عايز اعيش يا وليد تعبت خلاص .. لما اسر قال ان في جماعه طلعوا عليك انت وجميله قلبي كان هيقف .. كنت هموت .. افتكرت اللي ميس عملته فيك بس ساعتها كنت شاب صغير وربنا نجاك خفت المره دي ........ اترعبت يا وليد ..... ما تبعدش عني تاني. ... ما تبعدش عن حضني تاني
وليد : مش هبعد ابدا ،.. مش هبعد يا جميله خلاص
فهد كان عايز يعيط هو كمان مع امه وابوه وكميه الحب اللي بينهم ...
اكرم نزل بناءا علي كلام وليد علشان سالي بس بعدها خاف يكون فخ عملاه لوليد تصطاده بيه فاخد معاه يزيد ابنه وفضل ماشي في الطريق ومنتظر اي عربيه راكنه عطلانه لحد ما لمح عربيه وابتسم انه اخيرا وصل ركن وراها ونزل هو ويزيد وراه واتفاجيء بالعربيه فاضيه والباب مفتوح
طلع مسدسه وطلع موبيله نوره ونادي علي سالي
اكرم ليزيد : تعال ندور عليها
بينور ويدور في الصحرا جنب العربيه لحد ما لمح حاجه في الارض قرب عليها بحذر وبص حواليه بس يزيد واقف وراه ومفيش حد
قرب واتفاجيء انها بنت فجري بسرعه عليها وشال شعرها من علي وشها اللي كله دم لدرجه انه مش عارف مين دي اصلا قلع جاكته بدلته وحطها عليها ونادي علي يزيد اللي جاله بسرعه
يزيد : دي سالي
اكرم : والله ما عارف البنت متبهدله
يزيد : تستاهل مش ده اللي كانت عايزاه يحصل لجميله
اكرم : لا حول ولا قوه الا بالله يا ابني مش متأكدين انها هيا وبعدين مش هنشمت في البنت وهيا بتموت ...ولا الله اعلم اصلا هيا ماتت ولا عايشه
يزيد قرب وحط ايده علي رقبتها يشوف نبضها
يزيد : في نبض بس ضعيف وبعدين دي بتنزف جامد .. دول مش بني ادمين اللي عملوا فيها كده .. انا هبلغ البوليس والاسعاف وفهد كمان
اكرم : بلاش فهد كلم وليد
يزيد بلغ البوليس وبلغ موقعهم بالظبط وطلب اسعاف واتصل بوليد اللي كان ساعتها جميله في حضنه بتعيط وبيهديها ولما موبيله رن شاور لفهد يرد عليه
وليد : فهد شوف مين واتصرف انت
فهد وقف واخد تليفون ابوه وخرج واتفاجيء انه يزيد
فهد : ايوه يا يزيد خير
يزيد بص لموبيله يتأكد هو طلب مين
يزيد : انا كنت بكلم والدك ؟ هو فين ؟
فهد : جميلته تعبانه شويه وانا معاك اهو قول بقي في ايه ؟
يزيد : طيب تمام المهم سالي اتعرضت لحادثه وهننقلها المستشفي
فهد باستغراب : هيا مش سالي في شرم !!عرفت منين ؟
يزيد : كانت راجعه وعربيتها عطلت وكلمت والدك اللي اتصل باكرم واكرم كلمني وجينالها ولقيناها ......
فهد : لقيتوها ايه ؟
يزيد : مضروبه جامد جدا وبتنزف من كل مكان وهدومها متبهدله ومتقطعه واعتقد يا فهد انها مغتصبه ..
فهد : يا الله ... طيب انا هجيلكم انتو فين !!
يزيد سمع صفارات الانذار للاسعاف والبوليس فعلي صوته علشان فهد يسمعه : احنا هننقلها للمستشفي تعال علي هناك هفضل علي اتصال بيك
قفل وفهد يدوب هيتحرك لقي جميله خطيبته وراه : في ايه يا فهد ؟ وهتقابل مين دلوقتي !!
فهد : مشوار مع يزيد ادخلي كملي نومك
يدوب هيدخل اوضته بس مسكت دراعه : اقف كلمني الاول في ايه ! وليه هتقابل يزيد ! هو عرف حاجه ! ولا اوعي يكون عمك محسن ظهر !
فهد مسك وشها يطمنها : حبيبتي مفيش اي حاجه نهائي من الكلام ده ادخلي ارتاحي انتي بقي
جميله باصرار : طيب هاجي معاك
فهد بص في ساعته : طيب ادخلي اتصلي بأبوكي وقوليله انا خارجه مع خطيبي الساعه ٣ الفجر ... يا حبيبتي والله ما في حاجه تقلق اطمني
جميله : انا قلبي مش مطمن اصلا
فهد بابتسامه : لا طمنيه ... انا هدخل اغير هدومي
فهد دخل غير هدومه وخرج كانت قاعده في الاوضه منتظراه
جميله : خليني اجي معاك بقي علشان خاطري
فهد : خاطرك علي عيني يا قلبي بس مش هينفع .. ارتاحي انتي بقي ... نامي هنا لو تحبي
جميله : انا فعلا هفضل هنا مستنياك
فهد ابتسم وقرب منها باسها في خدها
فهد : بس لو رجعت لقيتك نايمه هاخدك في حضني وانام مش هصحيكي
جميله ابتسمت : بس انت ارجع بسرعه
خرج مبسوط انه عنده حب زي اللي بين ابوه وامه راح عند اوضه ابوه وخبط خبطه بسيطه جدا وفتح الباب كان ابوه واخد جميله في حضنه وهيا نايمه وليد شاورله يقرب منه
فهد بهمس : انا رايح اقابل يزيد
وليد بهمس : في حاجه حصلت لسالي ولا معرفوش مكانها ؟
فهد اتردد يقول لابوه ولا لأ فابوه اتكلم : فهد سالي مالها ؟
فهد : لقاها اكرم ويزيد علي الطريق جنب عربيتها بس مضروبه جامد وممكن تكون مغتصبه وطلعوا علي المستشفي انا هروحلهم
وليد : لا اله الا الله .. طيب روح وخليك معاهم واقف جنب بنت عمك وما تعرفش حد حاجه دلوقتي وانا اول ما امك تفوق واطمن عليها هجيلكم ...
فهد خرج وراح علي المستشفي واتقابل معاهم علي الباب وهما داخلين
اكرم نزل هو وشاف فهد راح ناحيته وفهد عينه علي الاسعاف اللي بينزلوا سالي وشاف منظرها واتصعق من كميه الدم وملامحها اللي مش ظاهره اصلا
اكرم : معلش يا ابني ان شاء الله خير
فهد : انتو معرفتوش مين اللي عمل كده
اكرم : للاسف روحنا لقيناها كده
فهد : امال يزيد فين ؟
اكرم : سيبته مع البوليس ياخدوا اقواله ويساعدهم
دخلوا وبعد فتره طلعلهم الدكتور
الدكتور : فين والدها او والدتها ؟
فهد : ان ابن عمها والدتها متوفيه و والدها مسافر انا تقريبا المسؤل عنها
الدكتور : هيا للاسف حالتها حرجه لان عندها نزيف داخلي وعندها ضلعين مكسورين وكسر في ايدها وشرخ في الجمجمه ده غير النزيف نتيجه الاغتصاب المتعدد .. كانوا اكتر من واحد وطبعا احنا عملنا اللي علينا بحيث ما يحصلش اي حمل نتيجه الاغتصاب ده وبعتنا عينات علشان البوليس يمكن يتعرفوا علي اللي عملوا كده عن طريق ال DNA بتاعهم
فهد مصدوم : طيب هيا فاقت !
الدكتور : لا ما فاقتش الله اعلم اصلا هتفوق امتي او هتفوق ولا لأ
فهد : طيب ينفع اشوفها ؟
الدكتور : من بعيد ممكن ... طبعا حالتها النفسيه هتكون متدمره فخليكم مستعدين لده
فهد شافها واكرم جنبه واتصعق من منظرها .. وشها كله جروح وازرق ووارم وملامحها كلها مختفيه تماما ....
شويه و وليد اتصل بفهد وبلغه اللي حصل
وليد النهار طلع والكل صحي واجتمع علي الفطار وهو سرحان
جميله الكبيره: حبيبي مالك ! ( بصت لجميله ) وفهد فين علي الصبح كده ؟
جميله : خرج من بدري راح يقابل يزيد
جميله الكبيره بصت لوليد بخوف ظاهر في عنيها : ابني فين ؟
وليد : اهدي ابنك كويس ... مفيش حاجه
جميله الكبيره : امال يزيد ليه ؟
وليد : طيب هقولكم
وحكالهم كلهم اللي حصل واللي عرفه عن حاله سالي والكل اصر انه يروحلها
وليد رايح وبص لمراته : عايزه حاجه مني
جميله : سلامتكم ... بس خلي بالك منها ولازم تعرف مين عمل فيها كده ..
وليد خرج والكل اتجمع عند سالي واتصدموا من شكلها وهيا لسه ما فاقتش ... البنات فضلوا معاها والرجاله راحوا لاشغالهم ...
اتجمع يزيد واكرم و ليد وفهد
فهد : ها عرفتو حاجة عن اللي عمل لسالي كدا؟
يزيد : لأ بس البوليس رفع البصمات اللي على عربيتها... ممكن يكونو سابو بصمات ليهم على العربية.
فهد : طيب وموضوع محاولة خطف جميلة وصلتوا لايه في الرجاله اللي كانوا عايزين يخطفوها ! وهل لهم علاقه باللي حصل لسالي ؟
يزيد : الرجاله تبع واحد اسمه حمدي المهندس وهو اللي طلب منهم يعملوا كده لكن لحساب مين محدش فيهم يعرف ..
وليد : انت متخيل ان الحادثتين مرتبطين ببعض ؟
فهد : ليه لأ ؟ جميله خطيبتي وسالي كانت خطيبتي .. يمكن حد عايز ينتقم مني
اكرم : لا مش منطقيه يخطفوا خطيبتك وخطيبتك السابقه كمان !! طيب ليه !
يزيد : الستات عموما اللي في حياته
وليد : يبقي باقي البنات يكون عليهم حراسه لاحسن يحالوا يخطفوا جميله تاني
فهد هنا قلق : انا هروح اخد جميله من المستشفي واخليها قدام عيني
وليد : مش للدرجه دي هما يكون عليهم حراسه وخلاص ما تقلقش
اخر النهار امل وجميله وندي في اوضه سالي منتظرينها تفوق ...
سالي بدأت تفوق وهما استدعوا الدكتور اللي جه بسرعه وبيكلمها بس هيا تايهه ومش بترد علي حد بس بتبص حواليها بعنيها اللي شبه مقفوله من الورم بصت لكل واحده شويه لحد جميله وركزت عليها قوي وعيطت وبدأت تنهار والدكتور خرجهم بره وعطاها مهديء
خرجلهم وطلب منهم يروحوا لانها هتنام للصبح وبالليل الكل متجمع في الفيلا وجميله الكبيره اصرت انها تروح لسالي الصبح وتقعد معاها و وليد اخدها تزورها واتصدمت من شكلها ....
سالي فاقت وبصت حواليها شافت جميله وبصتلها باستغراب فجميله مدت ايدها بحب : حمد الله علي سلامتك .. ما تخافيش انتي مش لوحدك احنا كلنا جنبك
سالي غمضت عنيهم واتكلمت : اطلعي بره
جميله : مش هسيبك لوحدك .. ومن النهارده انا هكون مسؤله عنك فاهمه !
سالي مستغربه ايه الست دي وافتكرت كلام ميس عنها وكلام ندي
سالي : انا مش عايزاكي
جميله : انا عايزاكي ... انتي من العيله وحته مننا واحنا ما بنرميش عيلتنا ولا بنتخلي عن بعض .. احنا بنفرح مع بعض وبنزعل مع بعض وبنقوي بعض وانتي دلوقتي محتاجه اللي يقويكي
سالي عيطت : انا مش عايزاكي ... مش عايزاكي ... اطلعي بره
جميله رنت الجرس والممرضه جت وعطتها مهديء تاني
وجميله الممرضه خرجتها وقابلت دكتور عصام اللي متابع سالي
جميله : رفضاني تماما
عصام : ومش هتتقبلك بسهوله انتي تقريبا رمز لكل شيء حصلها وحش في حياتها .. انتي متحمله كل شيء ..
جميله : طيب وبعدين ؟
عصام : هيا حاليا طالعه من صدمه كبيره وانتي من الاعداء ازاي هتثق فيكي .. اديها مساحه شويه .. المهم هتفضلي في الكرسي ده كتير .. حبايبك محتاجينك واقفه جنبهم لسه الخوف اللي في قلبك ما هديش
جميله: ويهدي ازاي مع كل اللي بيحصل حوالينا ده ..
عصام : وهو خوفك هو الحل ؟؟ فين طيب ايمانك بربنا وقضاؤه .. فين ايته الكريمه ( قل لن يصيبنا الا ما كتب الله لنا ).
جميله : عارفه كل الكلام ده ومؤمنه بيه بس قلبي مش مستحمل .. ده مش بإيدي
عصام: لا بايدك ... قلبك طمنيه بعقلك انتو اتجمعتو وربنا ارحم منك ومن اي حد ربنا رحمته كبيره وبرحمته جمعكم تاني ده انتي كنتي بتعتبري نفسك ارمله دلوقتي جوزك وابنك كمان في حضنك هو ده بقي شكرك لربنا ؟ (ولئن شكرتكم لازيدنكم ) اشكري ربنا واستمتعي بنعمه بدال ما .....،.،
جميله عيطت : والله شكراه وحمداه
عصام : يبقي خوفك مالوش محل يا جميله ، طيب فكري من ناحيه تانيه .. ابنك لاول مره في حياته هيتجوز ولاول مره هيكون وسط عيلته اللي بتحبه بجد مش اللي بتمثل عليه مش هيحتاج لامه ؟ مش هيحتاجك تقفي وتجهزيله فرحه ! تختاري معاه مثلا بدلته ! تختاري معاه شبكته ! تختاري هديه لعروسته ! بقي لاول مره ابنك هيحتاجك وهتتخلي عنه ! يعني عمره كله محروم منك ولما يلاقيكي برضه مش هتقدري تقدميله اللي محتاجه
جميله عيطت وبصتله بعجز : حرام عليك
عصام : لا مش حرام عليا انتي قاعده في الكرسي ده بمزاجك .. بعقلك .. بخوفك اللي مكتفك ... انتي مش مريضه علشان تقولي كده .. ابنك هيفسر ده علي مزاجه براحتك بقي
جميله : انا عايزه امشي
عصام : امشي يا جميله امشي بس ما تجيش تعيطي لو ابنك بعد او ...
جميله بصتله : او ايه ؟
عصام : وحشته ميس
جميله بصلته بعنف : ميس !
عصام : اه مكنش عندها مشاعر بس كانت بتلبي طلباته وبتسافرله وواقفه معاه مش زيك
جميله سابته ومشيت بكرسيها وفضلت بره تعيط كتير واتصلت بوليد بس موبيله مقفول وفكرت تكلم ابنها بس تراجعت هو فرحان مع خطيبته مش عايزه كمان تنكد عليه بمشاكلها .. فضلت عاجزه مكانها لحد ما ندي دخلت كانت جايه تزور سالي وشافتها بتعيط قعدت جنبها
ندي : في ايه يا جميله بتعيطي ليه !
جميله مسحت دموعها : موبيل وليد مقفول
ندي باستغراب : وده سبب للعياط ده كله
جميله مرضيتش تتكلم معاها عن سبب عياطها : حسيت بس اني عاجزه اروح او اعمل اي حاجه
ندي : طيب انا هروحك يالا
جميله : لا اتصليلي بوليد انتي خليكي مع سالي هيا رافضاني انا لكن انتي ممكن تتقبلك انتي موجوده في حياتها من زمان
ندي اتصلت بوليد بس فعلا موبيله مقفول .. اتصلت بمكتبه مش موجود
ندي : طيب اكلملك فهد؟؟
جميله : لا فهد لا .. فهد مع جميله هيشتروا اوضه نومهم وحاجتهم سيبيهم
ندي فكرت واترددت هو في حد ممكن تكلمه ويوصل لوليد بسهوله ... طيب ايه ؟ ليه قلبها دق كده بمجرد ما فكرت تكلمه !! لا هتكلمه علشان جميله وبس
جابت اسمه وداست اتصال وقلبها بيدق يدق وريقها نشف وحست انها مراهقه من تاني لحد ما سمعت صوته : معقوله موبيلي نور باتصالك !!
ندي ابتسمت وبصوت متوتر : ازيك يا اكرم
اكرم : اسعد انسان في الدنيا باتصالك
ندي ابتسمت : المهم كنت عايزاك في حاجه بسيطه
اكرم : بسيطه بس !! انتي بس تشاوري واكرم ينفذ
ندي باحراج : كنت عايزه اوصل لوليد
اكرم : وليد معايا اهو .. لحظه بس انا بعيد عنه هوصله الموبيل .. اتمني تكرريها تاني
ندي : ان شاء الله بس خليني اكلم وليد دلوقتي
اكرم راح لعند وليد : ندي اخت حضرتك
وليد استغرب واخد الموبيل بصله واستغرب ان المكالمه بقالها حوالي خمس دقايق وكلم ندي : ايوه يا ندي خير يا قمر !
ندي : موبيلك مقفول ليه يا وليد !
وليد : في العربيه هو وانا مع اكرم في ايه قلقتيني
ندي : مراتك عايزاك جيت المستشفي لقيتها بتعيط بسألها مالها قالتلي وليد موبيله مقفول !!
وليد اتضايق : اديهاني ( عطتها الموبيل ) ايوه يا جميله خير يا قمر مالك
جميله بصوت مخنوق من العياط : ينفع تيجي تروحني ! وما تبعتليش حد عايزاك انت تروحني !!
وليد وقف : مسافه الطريق هكون عندك انا جايلك يا قلبي
قفل وعطي الموبيل لاكرم وبصله : خمس دقايق ليه ؟
اكرم مفهمش : خمس دقايق ايه ؟
وليد : مده المكالمه لحد ما وصلتلي الموبيل ؟
اكرم استغرب : مش رديت وسلمت وعقبال ما وصلتلك !
وليد بصله : اسمها متسجل فكان ممكن تجيب الموبيل ليا انا ارد ولا ايه ؟؟
اكرم بصله بنظره تحدي قصاد نظرته : لو انت بتعتبرني غريب ما ينفعش ارد او اسلم علي اخت حضرتك فقولها صريحه
وليد قصاد نظرته : ولو انت بتبص لاختي بنظره غير نظره اخت صاحبك فقولها صريحه !! وبعدين انت عارف انت مش حد غريب ومش صاحب كمان انت اكتر من اخ فبلاش التحوير في الكلام
اكرم : انا ما بحورش في الكلام
وليد : وانا لازم امشي دلوقتي ولينا كلام تاني بعدين بس انت بتحور ومش صريح
سلام يا صاحبي
وليدوصل لجميله اللي اول ما شافته مدت ايديها وهو قعد قصادها ضمها وهيا عيطت من تاني وندي انسحبت وسابتهم
وليد : مالك بس ؟
جميله : روحني علشان خاطري
وليد : حاضر
وقف علشان يروحها بس لقي في وشه عصام والاتنين بصوله
وليد : خير يا دكتور
عصام : الحب والحنيه مطلوبه بس ساعات برضه بعض القسوه بتكون مهمه
وليد : قسوه ؟ قسوه من مين ولمين ؟
عصام : قسوه منك وليها ؟
جميله عيطت وعلت صوتها : انت عايز ايه مني ! انا مش عايزه حاجه منك .. وليد روحني !! علشان خاطري روحني ومش عايزه اشوف الراجل ده تاني
وليد مش فاهم مالها وبص لعصام : بعد اذنك دلوقتي
اتحرك ويدوب عداه وعصام مسك دراعه : طول ما انت حنين وبتجري تلبي نداها مش هتقف هتفضل في كرسيها علشان تفضلوا حواليها .. دي طريقتها اللي عقلها اخترعها تضمن بيه انكم حواليها شويه قسوه مطلوبه يا وليد ... لازم عقلها يقتنع انكم موجودين ومش بالطريقه دي
لازم تقف من تاني ما تستسهلش القعده دي وجوزها معاها وخلاص بعض القسوه يا وليد
وليد بصله وما ردش واخد جميلته وروحوا وحطها في سريرها ....
وليد قعد جنبها : وبعدين ؟ مالك ؟
جميله : سالي طردتني من عندها ورفضت تقبلني
وليد : ده شيء متوقع بس انا حاليا بسأل ايه اللي ضايقك ؟
جميله : هو موضوع سالي
وليد : لا يا جميله مش سالي ... ايه اللي ضايقك وبطلي لف ودوران ؟
جميله اتنهدت وهربت من عنيه : انا تعبانه وعايزه انام يا وليد
رقدت بس وليد فضل واقف فوق دماغها
وجميله بعد تردد بصتله كان واقف ومطبق ايديه فاضطرت تتعدل وبصتله
جميله : نعم يا وليد !
وليد : جميله انا راجع بعد غياب عشرين سنه .. عايز مراتي مش عايز شبيهه ليها مش عايز حطام.. عايز مراتي
جميله : انا جنبك
وليد زعق : لا مش جنبي ... عايزك معايا في كل مكان .. عايز نخرج مع بعض .. عايزك معايا في الشركه من تاني .. عايز نسافر مع بعض ... عايز اعوض عشرين سنه فاتوا ... لكن انتي ربطتينا هنا في السرير في الاوضه دي في الكرسي ده ...
جميله بعياط : غصب عني
وليد : مش غصب عنك .. كل الدكاتره اكدت انك سليمه وانك في الكرسي ده بمزاجك
جميله : مش بمزاجي ابدا ... محدش بيختار انه يكون مشلول
وليد : لا يختار ... لما تكوني فاكره ان ده اللي هيربطنا بيكي يبقي هتفضلي كده
جميله عيطت : انت عايز ايه مني ؟
وليد : عايزك تتمشي معايا بره !! عايزك معايا
جميله :والله غصب عني وعلي عيني يا وليد غصب عني ... لو حاسس اني عاله عليك وعايز تتجوز تاني روح وانا والله ما هزعل منك
وليد بصدمه : اتجوز تاني !! اتجوز تاني يا جميله .. انتي اللي بتقوليلي كده ! حاضر هروح اتجوز تاني بعد اذنك
سابها ومشي وهيا فضلت تعيط وهو فضل شويه بره اوضتها بيفكر يرجع بس في الاخر قرر يمشي
فهد مع جميله بيختاروا اوضه نومهم
جميله : واااااو فهد تحفه دي
فهد : بيضا يا جميله بيضا
جميله كشرت : اووووف ... طيب استني دي جميله قوي ومش بيضا
فهد : شرحه يا جميل .... غيره
جميله وقفت وايديها في وسطها : وبعدين بقي ؟
فهد قصادها : وبعدين ايه !!
جميله : مش عاجبك حاجه وانا تعبت
فهد : ماهو انتي بتنقي الوان غريبه يا جميله وانتي عارفه كويس انا بحب ايه
جميله طبقت ايديها علي صدرها : اتفضل وريني انت عايز ايه !
فهد مشي شويه وشاور علي اوضه : حاجه زي كده ؟
جميله بغيظ : سودا ؟؟ عايز اوضه سودا
فهد : ملك الالوان ! يا بنتي ده اجمل لون الاسود
جميله : واللي ما بيحبوش يعمل ايه يولع في نفسه؟
فهد : ليه بس يا قلبي والله الاوضه تحفه
جميله : حاسه اني داخله جنازه مش جوازه يا فهد
فهد : جميلتي استحمليني انتي عارفه اني مبحبش حاجات كتير وعملتها علشانك اتنازلي انتي بقي علشاني انا بلبس جينز علشانك وبلبس تيشرتات علشانك وبلبس فواتح علشانك وبشرب شاي علشانك انتي ايه بقي !
جميله بصدمه : انت بتشبه التيشرت والبنطلون بأوضه النوم اللي هنتجوز فيها ؟
فهد : لا مش القصد اقصد اني تقبلت علشانك حاجات ما بحبهاش .. ثم ان الاوضه مش وحشه وبعدين انتي ممكن تفتحيها بالمفارش والحاجات دي ..
جميله متغاظه : دي برضه مش عجباني
فضلوا يلفوا لحد ما فهد اقنعها بأوضه سودا برضه وهيا هتولع منه
وليد فضل متغاظ كتير من جميله ومن نفسه ومش عارف يروح فين ! واخيرا اتصل بابنه
وليد : ايوه يا فهد انت فين !
فهد : مع جميله اخيرا اتفقنا علي اوضه وبخلص فيها
وليد بضيق : طيب كويس خلص وروح عند والدتك
فهد بقلق : ليه مالها ؟ في حاجه ؟
وليد : لا لا مفيش بس معلش روحلها
فهد : انتو متخانقين ؟
وليد : فهد روحلها ينفع نتكلم بعدين ؟
فهد قفل مع باباه وروح خطيبته و راح علي البيت وطلع لجميله علي طول اللي كانت بتعيط
فهد : بعدين بقي في الست اللي مش مبطله عياط دي ! يعني اولعلك في نفسي علشان تبطلي !
جميله مسكت ايديه : اخص عليك ما تقولش كده
فهد : طيب مالك بتعيطي ليه !
جميله : ينفع اسألك سؤال تجاوبني فيه بصراحه ومن غير ما تفكر اول اجابه تخطر في بالك قولها
فهد : اسألي
جميله : ميس بتوحشك ؟؟؟؟
فهد : ميس ؟ ايه اللي فكرك بميس دلوقتي ؟
جميله : قولتلك رد عليا يا فهد بدون تفكير
فهد : لا يا ستي ميس ما بتوحشنيش هاه رديت كده ! مالك بقي !
جميله : ماليش يا حبيبي ماليش ( مسحت دموعها وابتسمت ) المهم احكيلي عملتوا ايه ؟ اختارتوا اوضه نومكم !
فهد ابتسم وقعد تحت رجليها وسند عليها : جميله دي متعبه مش عاجبها حاجه خالص ،اللي يعجبها ما يعجبنيش واللي يعجبني ما يعجبهاش
جميله حطت ايدها بحب في شعره : اكيد انت عايز تختار الوان غامقه وهيا بتحب الالوان الفاتحه
فهد بصلها : فعلا دي كانت مشكلتنا
جميله : طيب مجاش الاوان بقي انك تفتح قلبك للحياه !!
فهد اتعدل وبصلها : افتح قلبي ؟ وهو انا لسه ما فتحتوش !! اصلا قلبي بقي شراع معدش في بوابه اصلا اقفلها او حتي اواربها .. قال افتح قلبي قال
جميله ضحكت وهو ضحك : ايوه كده اضحكي وشك بينور لما بتضحكي ... ( رجع قعد تاني ورجع علي رجليها تاني ) كان نفسي تكوني معايا علي الاقل تفضي الاشتباكات بينا
جميله زعلت في نفسها وافتكرت كلام عصام لها وانهم ممكن مع الوقت يملوا من عجزها ويبطلوا يحبوها ......
وليد كان مخنوق من الكل ومش عارف يروح فين وفي الاخر قرر يروح يقعد مع عماد وبالفعل راحله ودخل قعد كتير معاه
واتكلموا اكتر واكتر
وليد : ينفع تخلي جميله تروح تبات مع عمتها النهارده
عماد : هو انت مش هتروح !
وليد : لا مش هروح
عماد : هتبات هنا ؟
وليد وقف : اقوم امشي؟
عماد مسكه من ايده : والله ما اقصد وانت عارف كده كويس بس مستغرب انك هتسيب جميله لوحدها !!
وليد : معلش مخنوق قوي النهارده ومش عايز اضايقها فخلي جميله تروح تبات معاها
عماد : بس فهد يبات هنا !!
وليد ابتسم : والله ما طلباك ...
عماد : طيب ايه رأيك نخليها النهارده سهره رجالي انا هقوم اكلم وليد واسر وفهد يجوا هنا ونخلي الحريم مع بعض ...
وليد : اعمل اللي يريحك
عماد كلم وليد ابنه واسر وفهد وفهمهم هو ناوي علي ايه وطلب من فهد يجي يروح جميله عند عمتها
كلهم وصلوا وفهد استأذن يوصل جميله ويرجعلهم واخدها وواقفين في الجنينه قبل ما يدخلوا
جميله : بقي انت هتبات في بيتنا وانا هبات هنا !
فهد : شوفتي ابوكي وعمايله !!
جميله ضحكت : اكيد هتتبسطوا كلكم مع بعض
فهد : ماشي بس الاحلي لو كل واحد فينا معاه نصه الثاني ساعتها كانت هتبقي سهره فعلا محصلتش
جميله : بعد ما نتجوز باذن الله يالا انا هطلع لعمتو وانت روح للرجاله !
طيب هطلع معاكي اطمن عليها وانزل
طلعوا عند جميله وفهد دخل باسها
فهد : عايزين اي حاجه مني قبل ما امشي !
جميله : ما اتحرمش منك يا قلب امك
فهد بص لخطيبته : وانتي !
جميله بحب : ما اتحرمش منك يالا روح لبابا بقي وباباك
فهد مشي والجميلتين قعدوا مع بعض
جميله : بقالنا كتير قوي يا عمتو ما سهرناش مع بعض ننم علي ابنك ده !! اخدوكي مني
جميله بحب : لا يا قلبي محدش ابدا يقدر ياخدني منكم ... انتي بنوتي الجميله ربنا يحميكي .. تعالي ننم علي ابني شويه .. عاملين ايه مع بعض !!
وسهروا مع بعض والرجاله كمان سهروا مع بعض ... بقلم / الشيماء محمد
اخر الليل
جميله الصغيره : انا جعانه قوي يا عمتو هنزل السوبر ماركت اللي تحت اشوف حاجه ناكلها
جميله الكبيره : سوبر ماركت ايه يا بنت دلوقتي وبعدين المطبخ تحت فيه كل حاجه
جميله الصغيره ضحكت : ههههههه ده ابنك المره اللي فاتت وانا جوه التلاجه قالي اخرجي من السوبر ماركت ده وانجزي فانا سميت التلاجه سوبر ماركت
جميله الكبيره ضحكت وجميله نازله وقفت
جميله : عمتو صح ! امال فين امل وندي!
جميله الكبيره : راحوا فيلتهم امل عايزه تجيب باقي هدومها وحاجتها من هناك وعمتك ندي طبعا معاها حتي علية اخدوها معاهم... ندي بتفكر ترجع لبيتها اصلا وابنها يتجوز هناك معاها
جميله الصغيره : خساره كنا نعيش كلنا هنا
جميله الكبيره : وليد بيحاول يقنعها هيا واسر والكل يفضل هنا !! ربنا يسهل
جميله الصغيره : انزل اجيب الاكل وارجع نكمل رغي ...
نزلت جميله تحضر الاكل وفتحت السوبر ماركت او الثلاجه وبدئت تحضر عشا خفيف ليها ولعمتها ومندمجه وفجأه النور اتقطع والدنيا كلها بقت كحل ..... وجميله اتيبست ووقفت تنهج وبتفكر تعمل ايه ! حتي موبيلها مش معاها !! هتعمل ايه !
توقعاتكم
#الحلقه٣٦ من الجزء الثاني
#جميله ☺️
مساء الخير للجميع
دعاء النهارده طلب خاص من عضوه ان ربنا يرزقها الذريه الصالحه
اللهم صلى على محمد وعلى آل محمد كما صليت على إبراهيم و على آل إبراهيم و بارك على محمد و على آل محمد كما باركت على إبراهيم و على آل إبراهيم فى العالمين إنك حميد مجيد
اللهمَّ إني أسألك أني أشهد أنك أنت الله الذي لا إله إلا أنت الأحد الصمد الذي لم يلد ولم يولد ولم يكن له كفواً أحدٌ ان ترزقنى الذرية الصالحة
اللهم إنى أسألك بأن لك الحمد لا اله الا أنت الحنان المنان بديع السموات و الأرض ذو الجلال و الاكرام ان ترزقنى الذرية الصالحة
اللّهُمَّ إِنِّي أَسْأَلُكَ بِاسْمِكَ الطَّاهِرِ الطَّيِّبِ الْمُبَارَكِ الأَحَبَّ إِلَيْكَ، الَّذِي إِذَا دُعِيتَ بِهِ أَجَبْتَ. وَإِذَا سُئِلْتَ بِهِ أَعْطَيْتَ. وَإِذَا اسْتُرْحِمْتَ بِهِ رَحِمْتَ. وَإِذَا اسْتُفْرِجْتَ بِهِ فَرَّجْتَ ان ترزقنى الذرية الصالحة
اللَّهُمَّ إِنِّي أَدْعُوكَ اللهَ. وَأَدْعُوكَ الرَّحْمنَ. وَأَدْعُوكَ البَرَّ الرَّحِيمَ. وَأَدْعُوكَ بِأَسْمَائِكَ الْحُسْنَى كُلِّهَا، مَاعَلِمْتُ مِنْهَا وَمَا لَمْ أَعْلَمْ. أَنْ تَغْفِرَ لِي وتَرْحَمَنِي وترزقنى الذرية الصالحة
اللهم امين واسيبكم مع الحلقه .....
نزلت جميله تحضر الاكل وفتحت السوبر ماركت او الثلاجه وبدئت تحضر عشا خفيف ليها ولعمتها ومندمجه وفجأه النور اتقطع والدنيا كلها بقت كحل ..... وجميله اتيبست ووقفت تنهج وبتفكر تعمل ايه ! حتي موبيلها مش معاها !! هتعمل ايه !
جميله فوق هيا التانيه اتوترت وفكرت في بنت اخوها هتعمل ايه !! هتتصرف ازاي ! طيب جميله تحت هتعمل ايه !! مكنتش عارفه تتصرف .....
جميله تحت اتوترت ونادت بصوتها كله : عمتوووووو ... عمتوووووو
جميله سمعتها بس مش عارفه تعمل ايه !!
جميله بدئت تعيط تحت وتنادي علي عمتها : عمتوووو عمتووووووو .... الدنيا ظلمه ...... الدنيا ظلمه قوي ... عمتو علشان خاطري تعالي هنا .....
جميله فوق عيطت ونادت : اطلعي يا جميله انا هنا ...
جميله الكبيره فضلت تكلم فيها وتطلب منها تطلعلها وجميله تحت بتعيط وتنادي والخوف شاللها تماما وبتنادي وبس ومش قادره حتي تتنفس وقعدت في الارض مكانها مش عارفه تعمل ايه وتخيلت مليون حاجه وحاجه ... ( عمتووووووووو علشان خاطري )
جميله فوق زحفت لحد موبيلها واتصلت بفهد ابنها
فهد رد عليها : ايه يا قمر خير
جميله بعياط : النور قطع يا فهد
فهد وقف : جميله فين يا ماما !
جميله عيطت : تحت في المطبخ وبتنادي ومش عارفه اعملها ايه !!
فهد قام ونزل جري وماردش علي اي حد فيهم وهما بيسألوه في ايه او ماله او ايه اللي حصل بس وليد مسكه من دراعه : في ايه اللي حصل فهمنا !!
فهد : النور قطع وجميله بعيد عن ماما وبتترعب من الظلمه وطبعا ماما مش هتنزلها
وليد : في محول احتياطي في الفيلا هيتشغل خلال دقيقه
فهد لامه : ماما المفروض الكهرباء ترجع خلال دقيقه
جميله : لا يا فهد النور مقطوع من اكتر من خمس دقايق
وليد هنا قلق : كده ممكن يكون بفعل بفاعل .. يالا بينا . آسر وليد تعالو معايا .. عماد كلملي اكرم ويزيد بسرعه وشوف بتوع الامن فين !!
عماد: لا انا مش هفضل هنا وبنتي واختي الله اعلم حصلهم ايه انا هروح معاكم ...
الكل نزل يجري واخدوا عربيه وليد اللي ساق وجنبه عماد و وري ركب التلات شباب وكل واحد بيكلم حد عماد كلم اكرم و آسر كلم يزيد
فهد كلم امه : امي كلميها ، سمعيها صوتك ، حاولي تطمنيها
جميله بتعيط : هيا بتعيط تحت ومش عارفه اعملها ايه !
فهد : ماما انتي سامعه اي صوت تحت غير صوت جميله !!
جميله قلقت وهديت : صوت !! تقصد ايه !!
فهد : سامعه اي حاجه !!
جميله : لا يا حبيبي مش سامعه
هنا سمعت صوت صرخه شلت الكل وجمدتهم في اماكنهم ودي كانت صوت جميله ... كلهم بصوا لتليفون فهد اللي حس ان الكون كله وقف ....
جميله هنا قفلت التليفون وزحفت وقعت نفسها من علي السرير وزحفت لحد السلم وعايزه تنزل لبنت اخوها اللي بتصرخ وحد بيشد فيها وسمعت صوته بيكلمها
@ لسه ما اتخلقتش اللي تكون نقطه سودا في حياتي انا ما بفشلش في اي مهمات فاهمه ....
جميله الصغيره : انت عايز مني ايه سيبني بقي !!
@ اللي اتطلب مني هنفذه
هنا جميله نورت موبيلها عليهم والراجل بصلها
@ ارجعي اوضتك يا حجه بدال ما اخليكي تندمي علي اليوم اللي شفتيني فيه !!
جميله الكبيره نزلت بهدوء : في امن بره وبودي جارد
@ ضحك : عارف ومشغولين بالمحول اللي اتحرق بره وبيشوفوا ماله وجراله ايه وهناك مجهزلهم مفاجأه صغيره هيتشغلوا فيها شويه اكون انا خلصت اللي انا عايزو
جميله الصغيره : انت عايز ايه !!
@ انتي يا قطه ... من ساعة ما شوفتك وانا عايزك
جميله الكبيره : انت عارف ان انت مش هتخرج من هنا وانا مش هسمحلك انك تخرج من هنا
@ ضحك جامد : انتي هتمنعيني !! طيب ازاي ؟ طيب حتي اوقفي كلميني .. كان نفسي ادردش معاكي شويه يا حجه بس البودي جارد ممكن يكونوا خلصوا لعبتهم وانا لازم اخلع بقي من هنا .. يالا يا قطه !!
جميله كانت بتصرخ وهو كان ماسك جميله من ايدها بايده وهيا بايدها التانيه بتحاول تخلص ايدها منه بس كان قافل بقبضه من حديد عليها وبيجرها وراه وعمتها بتنادي عليهم وبتزحف علي السلم وتحاول تقف وفضلت تزحف وتقف وتقع وتقوم وتقع لحد ما نزلت وكان لازم تقف والا بنت اخوها وخطيبة ابنها .... ابنها فهد اللي من ساعة ما ظهرت في حياته معرفتش تقدمله اي شيء حتي حبيبته هتتاخد منه وهيا بتتفرج عليها وقفت وبصت حواليها كان في قدامها صينيه فاكهه وعليها سكينه مسكتها وراحت وراهم بسرعه وفتح الباب و قبل ما يخرج صرخت : اقف هنا
الراجل بصلها واتفاجيء بيها ويدوب بيلفلها اتفاجيء بسكينتها بتغرزها في صدره فاضطر يسيب جميله من ايده هنا عمتها مسكتها وشدتها لبره الفيلا وطلعوا يصرخوا الاتنين ويستنجدوا باي حد ... ولمحهم واحد من البودي جارد اللي جري عليهم واستغرب مالهم
جميله الصغيره : في واحد جوه الحقه بسرعه
الراجل نادي علي زمايله وراحوا تلاته لجوه وفضل اتنين مع جميليتين يحرسوهم وهنا وصل وليد بعربيته واول ما لمحهم وقف والكل نزل والبنتين جريوا عليهم
جميله الكبيره جريت علي جوزها وليد اللي ضمها يطمن عليها وفهد جري علي خطيبته اللي منهاره يطمن عليها
فهد ضمها بيحاول يطمنها وابوها كمان جنبها والاتنين معاها وهيا ماسكه ايديهم الاتنين وبتعيط وليد اخوها كمان ضمها
وليد لاخته : جميله انتي كويسه !! فيكي اي حاجه !!
جميله : لا يا وليد انا الحمد لله بخير
وفهد راح لامه يطمن عليها وبصلها باستغراب : انتي واقفه !!
الكل هنا استوعب انها فعلا واقفه وسطهم والكل كان مبسوط مع خايف مع مش فاهم واحاسيس كتير ملخبطه لحد ما البودي جارد خرجوا
امن ١: مفيش حد جوه !!
وليد زعق: يعني ايه ! وبعدين انتو كنتو فين وهما جوه وليه لما الكهربا اتفصلت محدش فيكم دخل جوه !
امن ٢: يا باشا احنا كنا فعلا هندخل بس لمحنا في الملحق كركبه ودخان وقلنا اكيد المحول اتحرق فرحنا نشوف في ايه
فهد : انتو الخمسه !! محدش فيكم فكر نهائي ان ده ممكن يكون فخ يبعدوكم بيه عن البيت !!
امن ١: دخلنا نشوف المحول واتفاجئنا مع الدخان بتعابين !!
اسر : تعابين ؟؟ تعابين ايه !!
امن ١: في جوه الملحق اكتر من عشرين تعبان وده اللي شغلنا وعملنا حاله هرج ومرج !!
هنا يزيد واكرم وصلوا ودخلوا وفهموا ايه اللي حصل
اكرم مره واحده لآسر : والدتك فين ! واختك فين !
وليد بصله قوي : ندي مش هنا في بيتها
اكرم : طيب مش ممكن حد يستغل وجودهم لوحدهم وبدون حراسه
هنا وليد كشر وبص ليزيد : خد كام واحد وخد آسر وروح اطمنوا عليهم وهاتوهم هنا
يزيد اتحرك هو وآسر ووليد اصر يروح معاهم يطمن علي خطيبته وراحوا لندي ...
واحد من البودي جارد جالهم : لقيت دي يا افندم في الفيلا
طلعلهم سكينه فيها دم وحاططها في كيس وكلهم بصولها باستغراب
جميله الصغيره بعياط : دي عمتو ضربتو بيها ولولا كده مكناش هربنا منها
فهد ضمها يطمنها : خلاص بقي كفايه عياط انتي كويسه
جميله : انا فعلا كويسه
اكرم اتدخل : البوليس علي وصول واكيد هيرفعوا البصمات من عليها لانه اكيد مسكها وشالها ونعرف كل حاجه !!
بالفعل وصل البوليس وعمل تحرياته وحققوا مع جميله الكبيره اللي اكتر واحده تعتبر شافت الراجل ده بس للاسف كان متلتم ... وملون وشه اسود ....
البوليس ومعاهم اكرم فتشوا الفيلا كلها ولقوا آثار دم علي باب المطبخ اللي بيخرج للجنينه وعرفوا ان ده طريق خروجه ... البوليس بعد ما اخدوا اقولهم وخلصوا تحرياتهم مشيوا وسابوهم
وليد كان مع جميلته وايديه حاوليها
وليد ضم جميلته بدراعه : كل ده يطلع منك !! احكيلنا ايه اللي حصل بالظبط !!
دخوا وقعدوا وحكوا كل اللي حصل ونوعا ما وجميله بدئت تطمن في وسط عيلتها وفي حضن فهد اللي حاطط دراعه حواليها ورافض يبعد عنها حتي مع نظرات عماد ليه ...
جميله الصغيره مره واحده وقفت لدرجه فهد اتفاجيء ووقف معاها : في ايه مالك !
جميله : نسيت السوبر ماركت مفتوح
هنا الكل ضحك وفهد قعد واخد نفسه : والله تخيلت ان في تعبان عدي وراكي وقومت معاكي علشان كده
هنا جميله ضحكت : خوفت علي نفسك يعني !
فهد اتريق عليها وماردش
وليد : ايه السوبر ماركت ده الاول !!
جميله مراته : الاتنين سموا التلاجه السوبر ماركت
ضحكوا الاتنين
جميله لفهد : قوم معايا اقفل السوبر ماركت
فهد بصلها : روحي انتي !!
جميله بصت لعمتها : عمتو قولي لابنك يجي معايا
فهد : مالكيش دعوه بأمي
عماد هنا بصلها : انا هاجي معاكي يالا
هنا فهد وقف : لا خليك مرتاح يا خالي انا هروح
كلهم ضحكوا وهو راح مع جميلته اللي دخلت للتلاجه ويدوب هتقفلها بس رجعت وطلعت منها اللانشون وحطته علي التربيزه جنب الفينو اللي كانت مجهزاه
وبدئت تعمل ساندوتش وهنا فهد انفجر في الضحك وهيا بصاله وهو مش عارف يبطل ضحك لحد ما سكت
جميله : نعم !!
فهد : انتي بجد هتاكلي !
جميله : ايوه جعانه اصلا انا كنت نازله هنا علشان جعانه وابن التيت ده قاطعني ملحقتش اعمل الساندوتش
فهد ضحك وقرب منها ومسك وشها بحب : مالوش حق ابن التيت ده يقاطع حبيبتي وهيا هتاكل
جميله زقت ايديه بعيد عن وشها : ولا انت كمان ليك حق تقاطعني وانا هاكل الساندوتش بتاعي
فهد بصلها واستغرب كده ومره واحده سابها وخرج وهيا جت تخرج وراه بس رجعت اخدت الصينيه اللي عليها اللانشون والجبنه والزيتون والحلاوه وخرجت وراه وهو قعد وسطهم وهيا وراه والساندوتش في بوقها والصينيه في ايديها حطتها وبصتله
جميله : انا مش فاهمه انت اكلي مضايقك في ايه !!
فهد : طب والله ما هرد عليكي بساندوتشك ده اللي في بوقك وصينيتك اللي في ايدك .. ( زعق بغيظ ) يا بت ده انتي كنتي هتموتي من شويه في الساندوتش ده
جميله : الله وما موتش ما اكلش بقي !!
فهد بصلها : لا كلي ... كلي يا قلبي
عماد اتدخل : انت مش عايزها تاكل !! بدال ما انت تعشيها وتأكلها
فهد وقف : لا يا خالي ازاي كده !! تاكل براحتها ( بص لامه ) اتصرفي مع بنت اخوكي ... انا طالع انام تصبحوا علي خير
عماد : تعال روحني انا وجميله الاول
فهد وقف : مش هتباتوا هنا !!
جميله امه : هيباتوا هنا طبعا اطلع ريح انت عماد ده بيستعبط اصلا
عماد : يا بنتي بس وليد
جميله : مش بعيد يبات مع اسر
عماد : طيب اروح انا وجميله .. طيب اطلع ارتاح يا فهد وانا هطلب اوبر
فهد : يا خالي مش حكايه اوبر واريح والكلام ده بس فعلا خليك معانا الليله
عماد : معلش
وبعد حوار طويل وافق عماد يبات معاهم في فيلتهم
وليد في اوضته مع جميلته
وليد : بقي وقفتي !!
جميله ابتسمت : الحمد لله
وليد بغضب مكتوم : بقي وقفتي !!
جميله : مالك يا حبيبي بتقولها كده ليه !
وليد وقف وبعد : علشان انا مفرقتش معاكي وفرق معاكي جميله بنت اخوكي ... انا فكرت في مليون فكره وفكره النهارده علشان تمشي وفي الاخر مشيتي بس مش علشاني علشان خاطرها
جميله قربت منه بحب ودفا : حبيبي الحكايه مش مين وعلشان مين ما بتتحسبش كده !!
وليد : امال تتحسب ازاي يا جميله !!
جميله قربت منه : معرفش يا وليد ... انا اتحطيت في موقف صعب و ..... انا كل اللي فكرت فيه كان فهد لعلمك .. فهد ابني
وليد : فهد !!
جميله : ايوه فهد لانه ساعتها كان هيلومني انا اني وقفت واتفرجت عليها وانه خسرها بسبب اني كنت عاجزه ده اول سبب خطر في بالي ... بعدها حبي لجميله انا مش هنكر يا وليد اني بحبها انا بعيد عن انها بنت اخويا انا اللي ربتها وكبرت علي ايدي هيا واخوها
وليد بضيق : انا مش عايزك تنكري حبها ... دي بنتك وانا مش ده اللي اقصده
جميله وقفت قصاده بحب ومسكت وشه بايديها الاتنين : يعني انت مش فرحان لحبيبتك انها وقفت بس زعلان اني وقفت في موقف كان ممكن نموت فيه !! المفروض انا اللي ازعل علي فكره
وليد مسك ايديها الاتنين : بعد الشر عليكي طبعا انتي وجميله بس معرفش غيران يا ستي من كل اللي حواليكي واللي بيقاسموني حبك !! هاه كده ارتاحتي انتي !! معدش ليا مكان يا جميله في قلبك ! قلبك بقي زحمه
جميله : انت وبس اللي جوه قلبي .. مفيش غيرك حبيبي وجوزي ومعشوقي .. الباقيين كلهم دول اهل واصحاب انت ..... انت قلبي كله .... وليد انا مش عارفه اعبر عن اللي جوايا ليك بكلام لان مفيش كلام ممكن يوصفه بس المفروض انه واصلك حبي ده !!
وليد ابتسم بحب وتفهم : عارف يا جميله بس غصب عني غيران .... غيران من فهد لما بيضمك ... او وليد ابن اخوكي ... او عماد نفسه ... غيران حتي من الهوا لما يطير شعرك او يخليكي تبتسمي في لحظه حر .. غيراااان يا جميله
جميله ابتسمت : وجميله ملك ايديك يا وليد ... وبتقولك طمن قلبك مفيش حد غيرك ابدا ابدا
ضمها وليد بعد ما طمنته ان هو وبس اللي في دنيتها
عند اكرم
اكرم : يالا يا يزيد روح انت لبيتك والصبح نبقي نتقابل ونشوف هنعمل ايه !!
يزيد : انا عايز افهم انت ليه رفضت اننا نقولهم ان سالي هيا اللي وري خطف جميله وهيا اللي اجرت حمدي المهندس ده !! اهو النهارده كان هيكمل مهمته
اكرم : مين قالك هاه ! مين قالك ان النهارده ده كان حمدي ؟ ومين قالك ان حمدي تبع سالي ؟
يزيد : يا بابا واحد زائد واحد يساوي اتنين ... الرجاله قالوا ان اللي كاريهم اسمه حمدي المهندس وده صاحب سمير واولاد منطقه واحده وسمير بتاع الامن بتاع سالي مش محتاجه فكاكه يعني علشان تربط الامور ببعض ... وبعدين مين له مصلحه انه يأذي جميله خطيبه فهد غير سالي .. عارف لو محاولته كانت لجميله والدته كان اه ممكن اشك لكن ده قاصد دي بالذات وجميله الصغيره ملهاش اعداء غير سالي فقط
اكرم : ماشي دور علي حمدي بس ما تجيبش سيره سالي دلوقتي وخصوصا لفهد
يزيد : ليييييييه !! اوعي تكون صعبانه عليك؟؟
اكرم : يا ابني دي بنت واللي حصلها ده شيء صعب جدا جدا وبعدين هيا حاليا ملهاش حد غير عمها وليد فلو هو كمان اتخلي عنها هتكون حالتها ايه !!
يزيد بعدم تصديق : انت بتقول ايه ! ولو كانوا نجحوا وكانت جميله هيا اللي مكانها في المستشفي دلوقتي كان وضعهم هيكون ايه !! تخيل كده للحظه لو جميله اللي مكانها !! وبعدين ده مش ذنبها هيا لوحدها ده ذنب الناس اللي ابوها ضحك عليهم قبل كده ولا نسيت مي اللي لولا تدخلنا وستر ربنا كانت هيا كمان هتكون مكانها ولا غيرها وغيرها وغيرها ... مش ابوها ده اللي كان كل يوم مع واحده ولا بيحترم اعراض حد ولا بيراعي حد !! "البر لا يبلى ، والذنب لا ينسى ، والديان لا يموت ، فكن كما شئت ، فكما تدين تدان "
اكرم : يا ابني
قاطعه يزيد : ده حتي القرآن قال (مَنْ يَعْمَلْ سُوءًا يُجْزَ بِهِ ) كل واحد بيتحمل ثمن اخطاؤه
اكرم : يا ابني عارف الكلام ده كله وهيا صعبانه عليا كبنت اتدمرت مش سالي اللي عملت وعملت افهم بقي
يزيد : لا صراحه يا بابا مش فاهم ومش عايز افهم وبكره باذن الله هبلغ البوليس باللي وصلناله وهبلغ وليد وفهد كمان .. تصبح علي خير
اكرم حاول يوقفه بس رفض يوقف او يسمع لابوه من تاني ومشي علي بيته ...
اكرم اتصل علي وليد اللي رد عليه : يا ابني قولتلك ما تتصلش بيا اخر الليل كده الا لو في مصيبه !! في مصيبه ؟؟
اكرم : مش مصيبه قوي !!
وليد بص لجميله اللي نايمه وطلع البلكونه : خير في ايه !
اكرم : يزيد مصر يبلغ فهد والبوليس عن سالي !!
وليد : ما احنا قولنا مش وقته !! البنت ماشي ما تستاهلش بس هيا محتاجه حد جنبها في ازمتها دي ولو فهد عرف وجميله هيتخلوا عنها وفهد هيجبر والدته ما تقفش جنبها وجميله انت عارفها هتكون ما بين نارين انها تسمع لابنها اللي مش هيفهم مساعدتها دي وما بين انها تساعد سالي ..
اكرم : طيب هو مصر هنعمل ايه !
وليد : انا هكلمه خلاص الصبح ....يالا عايز حاجه تانيه !!
اكرم : لا تصبح علي خير يالا
قفلوا و وليد دخل جنب مراته اللي فتحت عنيها : في حاجه !!
وليد ضمها بحب : لا مفيش يا قلبي نامي ...
فهد طلع اوضته ينام بس النوم جافاه وقلقان وعايز يطمن علي جميلته ..... طلع وقفل الباب بصوت عالي شويه ونزل يتمشي شويه .... جميله كانت في اوضتها اللي اختاروها ليها واول ما سمعت قفلة الباب قامت بسرعه وفتحت بابها وخرجت واول ما هتتحرك لقت ابوها فتح اوضته : رايحه فين !!
جميله اتخضت : خضيتني يا بابا ... هشوف فهد عايزه اتكلم معاه شويه ... ينفع !!
عماد بصلها كتير : الوقت متأخر يا جميله !!
جميله : بابااااا
عماد : استغفر الله العظيم يارب ... روحي وما تتأخريش
نزلت وري فهد اللي سمعها هيا وابوها فكان منتظرها علي باب التراس واول ما سمعها نازله علي السلم فتح الباب وخرج وهيا جريت وراه ووقفت في الباب
جميله : استناني
فهد بصلها من فوق كتفه : ما انا مستنيكي
ابتسمت وقفلت الباب وراها وخرجت وحست ان الجو برد فاترعشت وجريت علي فهد مسكت دراعه تستخبي فيه ونزلوا الاتنين يتمشوا مع بعض
فهد : ايه اللي مصحيكي لدلوقتي ؟
جميله : نفس اللي مصحيك ... قفلت الباب جامد ليه !
فهد : علشان تسمعيه
جميله : مين قالك اني صاحيه !!
فهد : ده مجرد حظ
اتمشوا شويه وكان في مرجيحه جنب البيسين وفهد شاور عليها : تعالي نقعد
قعدوا عليها وجميله رفعت دراع فهد واستخبت في حضنه وهو ضمها ...
جميله : هو احنا هنتجوز امتي يا فهد !!
فهد : والله ما عارف يا جميله الفرح اللي عمال يتأجل ده كل شويه !!
جميله : طيب احنا دلوقتي مستنين ايه ! عمتو و وقفت والحمد لله
فهد ابتسم : مستعجله قوي كده !
جميله بصتله : انت مش مستعجل !!
فهد : انا مستعجل وجدا كمان
جميله : طيب ايه بقي !! المهم امتي ؟
فهد : مش عارف والله بكره نشوف ابويا وابوكي المهم طمنيني عليكي !! اللي حصلك النهارده كان صعب !
جميله سندت علي كتفه : فعلا انت عارف لو ابن التيت ده مقطعش النور انا كنت عرفت اسلك معاه لكن المشكله ان الظلمه هيا اللي لجمتني
فهد : ولحد امتي هتفضل الظلمه تلجمك ! لازم نشوف حل للموضوع ده يا جميله !!
جميله اتنهدت : وايه الحل !
فهد : مش عارف بس لازم يكون في حل يا جميله ! مش معقوله هيفضل خوفك مرضي كده علي طول .. طيب ايه رأيك نكلم دكتور عصام !!
جميله : اللي عمتو راحتله !
فهد بتريقه : عمتو بس ده واخد العيله كلها مقاوله فنضمك انتي ليهم
جميله ضربته براحه علي صدره وهو ضحك : انا بتكلم بجد علي فكره
جميله : طيب هنقوله ايه ! بخاف من الظلمه ! مافي ناس كتيره بتخاف من الظلمه !!
فهد : خوف عن خوف يفرق يا جميله ... الخوف لما يكون بطريقتك دي فده مرضي مش خوف طبيعي
جميله : طيب خلينا نروحله بس بعد الفرح مش دلوقتي
فهد : ماشي يا جميله خلينا لبعد الفرح باذن الله
الصبح جميله اخدها وليد وراحوا لسالي ومعاهم ندي وامل ودخلوا عندها كانت صاحيه وباصه للسقف
جميله : صباح الخير يا بنتي
سالي ما ردتش وبصت بعيد
ندي : صباح الخير يا سالي .. وبعدين معاكي
سالي : ابعدوا عني انا مش فاهمه انتو عايزين مني ايه !!
جميله : يا بنتي احنا عيلتك ووالدتك كانت صاحبتنا وحبيبتنا الله يرحمها
سالي اتأثرت للحظه بس فضلت مصره : انا مش من عيلتكم انتو دمرتوا عيلتي فابعدوا عني كلكم
امل : سالي طيب انا !! طول عمرنا اخوات
سالي بغيظ : طول عمرك بتحاولي تقربي وانا كنت بعطف عليكي واسمحلك تكوني جنبي
امل زعلت وندي اتضايقت
امل : هتفضلي علي طول كده !! مكروهه من الكل !! علي فكره بقي انا كنت بفضل جنبك لان محدش تاني كان بيطيقك ولا حد كان بيحبك ومن صغرنا واحنا بنات في المدرسه كان الكل بيكرهوكي وده السبب الوحيد اللي خلاني افضل معاكي وغلطي الوحيد اللي ارتكتبه في حياتي هو اني سمحتلك تتمادي في كلامك معايا وسمحتلك تأثري علي شخصيتي وتهدي ثقتي في نفسي بس لحد كده وخلاص ده كانت اخر محاوله مني اقرب منك ... اللي حصلك ده تستاهليه كله ويمكن كمان قليل عليكي ... اشبعي يا سالي بوحدتك بس خلي بالك اللي كانوا مقوينك خلاص راحوا فما تتكبريش قوي كده لاحسن مابقالكيش حد
جميله : كفايه يا امل كده دي مهما كان اختك واتربيتوا مع بعض
امل : لا يا خالتو خلاص بقي كده انا اكتفيت منها .( بصت لامها ) انا ماشيه هتمشي معاياولا هتفضلي هنا !
ندي بصت لجميله : هنستناكي بره
خرجوا الاتنين وفضلت جميله اللي قربت منها وشافت دموعها اللي بتحاول تداريهم : وبعدين معاكي ... امك كانت غاليه جدا ووصتني عليكي قبل ما تموت .. اسمحيلي انفذ وصيتها .. وربنا يعلم لولا اللي حصلي لكنت ربيتك في حضني بس غصب عني
سالي بصتلها واستغربت قوي الست دي وكلامها اللي بيدخل قلبها بس دي اللي ربت جميله ... جميله اللي اخدت منها فهد .. ايه هتسمحلها تدخل حياتها ؟ وتاخدها بيتها وتتفرج علي فهد وجميله وهيا تتحسر عليهم ؟ لأ والف لأ حتي لو هيجرالها ايه !!
سالي بكره : ابعدي عني واخرجي بره وما تجيش تاني هنا وامي اللي بتتكلمي عنها دي انا ما اعرفهاش اصلا ما اعرفش غير ابويا وجدي وجوزك اخدهم مني واعرف فهد خطيبي وبنت اخوكي اخدته مني فابعدي انتي كمان عني والا مش هرحمك ولعلمك بقي الرجاله اللي كانوا هيخطفوا جميله انا اللي بعتهم وقولتلهم يغتصبوها ويقدموها هديه لفهد شبح بنت ما تنفعش لاي حد ... بس للاسف الاغبيه فشلوا
هنا الباب اتفتح علي اخره وكان واقف فيه فهد وجميله
فهد بكل هدوء : وبدال ما يغتصبوها هيا ربنا بعتلك اللي يغتصبوكي انتي ... ( بص لامه ) كنتي بتقنعيني الصبح نيجي نزورها والحمد لله اني سمعت كلامك وجيت علشان اسمعها بنفسي ... ولعلمك يا سالي انا سيبتك مره من غير عقاب لما حاولتي تخطفيها بس المره دي مش هرحمك وهتخرجي من هنا علي السجن خليكي تحصلي ابوكي وجدك اللي بتتحسري عليهم انا هخليكي تحصليهم .... ( مسك ايد خطيبته وبص لامه ) هتمشي معانا ولا هتفضلي هنا ؟
جميله امه : حبيبي بس
قاطعها فهد بصرامه : هتمشي ولا هتفضلي هنا ؟؟
جميله حست انه بيخيرها بينه وبينها مش قصده خالص علي المشي من هنا فمشيت ناحيته بهدوء وبصتله : همشي معاك انت طبعا
اخدهم ومشي وكانت عمته بره منتظره
جميله الكبيره : امال امل فين ؟؟
ندي : اخدها وليد ومشيوا وانا انتظرتك
جميله الكبيره : طيب روح انت يا فهد مع خطيبتك وانا وعمتك هنروح مع بعض
فهد اخد خطيبته ومشي وغيظ الدنيا كله فيه وجميله خطيبته بتحاول تهديه
فهد مره واحده وقف : يعني لو كانت نجحت دي كانت خطتها !! انك تكوني مكانها هيا !!
جميله : ربنا سترها خلاص يا فهد ما تفكرش بقي فيها
فهد بغضب : كانوا هيغتصبوكي انتي ؟؟
جميله مسكت ايده : وماحصلش ... واخدت جزائها
فهد : ولو كان حصل ؟
جميله : مش هنفكر في لو دي يا فهد ... يعني هنعمل بلو دي ايه ! خلاص ربنا سترها ومحصلش
فهد : واللي حصل امبارح !!
جميله : كانت نتيجته ان عمتو وقفت علي رجليها من تاني بص للحلو
فهد : ولو كان المره دي نجح ياخدك ؟
جميله : تاني لو يا فهد ... يا ابني ربنا اللي بيحفظ مش انت ولا الامن ولا البودي جارد ... والله خير حافظ
خلي ايمانك بربنا كبير ... بابا ديما الصبح قبل ما نتحرك يستودعنا عنده ويقول ربنا هيحفظكم لان الودائع عند ربنا عمرها ما بتضيع ابدا
فهد : ماشي يا جميله ونعم بالله بس ده ما يمنعش ان نفسي حاليا احط ايدي في رقبتها وما اسيبهاش غير لما روحها تطلع
جميله : معلش معلش مهي برضه اخدت عقابها واتكسرت
فهد : تستاهل كل اللي جرالها ولو مكنوش اغتصوبها كنت هأجرلها انا ناس يغتصبوها
جميله بصتله قوي وهو لاحظ ده وتجاهله : اه كنت هعمل كده !!
فضلت برضه بصاله وهو كمل : مش كده بالظبط يعني بس كنت هعمل فيها اي حاجه
جميله مسكت ايده : حبيبي دي بنت عمك
فهد شد ايده : عمي اللي حاول يقتلني وضربك انتي بالنار ده اللي تقصديه بالله عليكي يا جميله تسكتي
جميله : حاضر هسكت ... هتغديني فين ؟؟
فهد فضل جامد شويه وبعدها ضحك وهيا ضحكت معاه : ايوه كده فرفش
فهد : بتفكري في الاكل في اوقات غريبه
جميله : لان ده اهم شيء في الكون .. ازعل اكل ، افرح اكل ، اجوع اكل
فهد : طيب احمدي ربنا انك مش من النوع اللي بيتخن والا كان زمانك حاجه تانيه
جميله : ولو كنت حاجه تانيه كنت هتحبني؟؟
فهد بصلها كتير : مش عارف بس ما اعتقدش
جميله : يعني لو تخينه شويه مش هتحبني ؟؟
فهد : مش حكايه تخينه ورفيعه البني ادم مش بجسمه يا جميله والا كده اكون بحب شكلك فقط وساعتها ده مش حب اصلا
جميله : طيب كلام عين العقل امال انت تقصد ايه بقي!
فهد : اقصد انك فعلا يا جميله بحس كتير ان الاكل اهم شيء عندك فلو ده كان سبب لمشكله عندك ومقدرتيش تسيطري عليها فساعتها هقف وهتردد ارتبط بيكي .. اصل الموضوع مش طفاسه وخلاص او اكل عمال علي بطال ... بعدين هكلمك من منطقك اللي ديما بتتكلمي بيه .. (نحن قوم لا نأكل حتى نجوع وإذا أكلنا لا نشبع). مش ده حديث برضه ولا ايه انا سمعتها قبل كده بس مش عارف دي ايه !!
جميله ابتسمت : اعتقد حديث بس ضعيف .. سنده ضعيف مش عارفه برضه والله اعلم
فهد : ايوه دلوقتي علشان مش علي هواكي فبقي ضعيف !!
جميله : والله ابدا بس فعلا سنده ضعيف المهم ما تاخدنيش في دوكه وتتوهني هتغديني فين ولا كل ده علشان تهرب من الغدا هروح لعمتي تغديني
فهد : عمتك سيبنها مع عمتي ندي
جميله : هروح لنبيله جدتك زمانها مجهزه مالذ وطاب
فهد ابتسم ودور عربيته واتحرك : تروحي فعلا نتغدي معاها !
جميله : مع مين ؟
فهد : جدتي !!
جميله : يالا يا ريت
راحوا ودخلوا عندها وفهد ضمها وباسها : في غدا النهارده نتغدي معاكي ؟؟
نبيله حضنته قوي : طبعا يا قلب قلبي بس غريبه يعني
فهد : كلنا مشغولين والنهارده امي بره مع عمتي فقولنا بدال ما تتغدي وحدك نتغدي احنا معاكي !!
نبيله فرحت قوي : ثواني هخليهم يجهزوا السفره لتلاته
وليد راح المستشفي لسالي وقعد قصادها
سالي : انتو مش هتسيبوني في حالي ؟؟
وليد : لو سيبتك في حالك فهد مش هيسيبك وهيحبسك علي اللي عملتيه في خطيبته واللي حاولتي تعمليه ..
سالي عيطت : انت عايز مني ايه ؟ انتو كلكم عايزين مني ايه ؟ انا مش متعوده علي الحب اللي من غير مقابل ده !! كل حاجه ولها تمن ؟ انتو عايزين ايه مني
وليد : احنا مش عايزين منك حاجه واحنا عكسكم الحب عندنا للحب وبس ومالوش ولا تمن ولا مقابل
سالي بعياط : انا مش هقدر اقبل حبكم ده !! مش هقدر
وليد : طيب انتي عايزه ايه دلوقتي او بتفكري في ايه ؟ اللي انتي عايزاه انا هعملهولك
سالي مسحت دموعها وبصتله : انا عايزه حاجه واحده بس
وليد : ايه هيا ؟
سالي : عايزه اشوف بابا ؟؟
وليد فكر شويه : هحاول
وقف وخرج وماشي واكرم وراه هو والبودي جارد
اكرم : رايح فين ؟
وليد بغموض : هجيبلها ابوها !
اكرم وقف واستغرب وكمل وراه : هتجيبوا فعلا ؟؟ طيب ازاي ؟
وليد : هناخدله اذن يزور بنته بما ان حالتها خطيره
اكرم : انا مش بسأل عن الطريقه .. انا عارف الطريقه انا بسأل ازاي ؟؟ ازاي هتنفذلها طلبها لمجرد انها طلبت انا مستغرب !!
وليد بغموض بص لاكرم : حاجه في نفس يعقوب .... يالا نجيبه
تابعونا علي قناة التليحرام من هنااااااااااا
ليصلكم اشعار بالنشر
الرواية كامله من البداية الجزء الاول من هناااااااااااا
الجزء الثاني هناااااااااا من البدايه
تعليقات
إرسال تعليق
فضلا اترك تعليق من هنا