رواية حب مشروع كامله وحصريه

رواية حب مشروع كامله وحصريه

حب مشروع 

اهل العريس كلهم موجودين والعروسه فرحتها مش سايعاها واخواتها البنات بيباركولها وبيهنوها ان عريسها تحت بيقري فتحتها مع باباها 

الحكايه حكايه 6 بنات منتقبات حلوات آيات في الجمال....  الكبيره ساره خريجه طب بيطري  متجوزه ومعاها ولدين 

بعدها سميه ودي اللي قرايه فاتحتها شغاله اتخرجت من حاسبات ومعلومات 

بعدها بطله قصتنا حبيبه هتدخل اخر سنه صيدله 

بعدها ساميه في اولي  هندسه بعدها امل في ثانوي وبعدها اخر العنقود سهيله ودي في ابتدائي لسه 

ابوهم عم سعيد امام مسجد ومحترم ومعروف في منطقته وبناته محترمات الكل بيتمني يناسبه 

وبطل قصتنا ايمن عنده 29 سنه متدين عايش هو وامه مع بعض ومعندوش اخوات ومتدين جدا 

************                *************     

عم سعيد عازم اخواته واخوات مراته علشان قرايه فاتحه بنته سميه والكل موجود مبسوط 

فجأه سرينات البوليس تسكت الكل والكل بيسأل في ايه؟  ودول جايين ليه ولمين في المنطقه ياتري؟؟ 

يتفاجئ اهل الحته واهل الفرح ان البوليس دول داخلين بيتهم ويدخل ظابط جاد جدا ويسأل بصوت يهز الابدان 

الظابط: مين فيكم سعيد محمد احمد عبد الصمد؟؟؟ 

يجي عم سعيد ويرد: انا يا ابني خير في ايه؟  

بناته واهل بيته وقفوا فوق يتابعوا اللي بيحصل 

الظابط: اتفضل معايا حضرتك 

عم سعيد: اتفضل فين وليه؟  خير يا ابني؟؟ 

الظابط: هتتفضل معايا علي مديريه الامن لان سيادتك مقبوض عليك فاتفضل وبلاش تضييع وقت 

شوشره والكل بيهمس والكل مستغرب وبيسأل الراجل الطيب ده عمل ايه؟  

عم سعيد: مقبوض عليا ليه وبتهمه ايه؟ ؟  

الظابط: انت عارف تهمه ايه فبلاش لف ودوران!!!  فاكر نفسك هتستخبي لامتي تحت القناع ده؟؟؟  دقن ونقاب وخطابه...  امثالك دول بيسيؤا للدين 

عم سعيد: انت بتقول ايه؟  تمثيل ايه وقناع ايه؟  

يا ابني انت اكيد غلطان وبعدين انا فرح بنتي النهارده انت كده بتتعدي علي حرمات بيتي 

الظابط: انا ما بتعداش علي حرمات حد وانا ما دخلتش بيتك اصلا اتفضل بقي 

اخو عم سعيد: يا ابني طيب بس فهمنا ايه اللي بيحصل وتهمته ايه؟ ؟  انتو مش كنتو بطلتوا ارهاب الناس ده والسطو علي البيوت؟؟؟؟  

الظابط: ارهاب ايه وسطو ايه؟ ؟  احنا اللي بنعمل الارهاب امال واحد زيه كده اللي بيخطف بنات صغيره ويصدروهم ويبيعوهم زي العبيد يشتغلوا في الدعاره دول تسميهم ايه؟ ؟  

عم سعيد: لا حول ولا قوة الا بالله...  خطف بنات ودعاره ايه  يا ابني انت غلطان...  انا امام مسجد 

الظابط: وانا بقوم بشغلي اتفضل بالذوق ولا نستعمل العنف،؟؟؟  

عم سعيد: حسبي الله ونعم الوكيل.....  حسبي الله ونعم الوكيل.....  حسبي الله ونعم الوكيل 

الظابط: حسبن لبكره بس مش عارف انت ازاي جايلك وش ترفع ايدك لربنا 

عم سعيد: انت بترتكب غلطه كبيره وهو قذف المؤمنين بدون دليل انت بتشوه سمعتي وسمعه بناتي 

الظابط: مين قالك ان مفيش دليل؟؟؟؟  اتفضل 

اخو عم سعيد: انت واخده فين؟؟ واسمك انت ايه؟ 

الظابط: اسمي مقدم ايمن محمد عبد الكريم عايز اي تفاصيل تانيه؟؟؟؟  

ايمن قبض علي عم سعيد قدام منطقته كلها وركبه البوكس ومشي 

بس جواه احساس غريب انه ظلم الراجل ده ومش عارف لو احساسه صح هيعمل ايه،؟؟؟؟؟؟ 

اخده علي المديريه وبدأ يحقق معاه وعم سعيد بينكر كل تهم ايمن 

اخيرا ايمن حبسه علي زمه التحقيق وروح اخر النهار بيته ومش عارف ليه ضميره مش مرتاح!!!!!! 

تاني يوم ايمن اتشغل بشغل بره ومارحش نهائي المديريه كان لازم يعمل تحريات تانيه قبل ما يظلم الراجل ده لازم يتأكد هو فعلا مظلوم ولا بيمثل؟؟ 

تالت يوم تحريات ايمن اثبتت ان في غلط وان في حد تاني اسمه سعيد محمد احمد عبد الصمد وده تشابه في الاسماء 

ايمن ما ارتحش غير لما اثبت براءه عم سعيد بس برضه ده ما يعوضش اللي حصل 

راح بنفسه خرجه من الحبس واعتذرله 

ايمن: انا اسف جد علي اللي حصل ده وعلي تشابه الاسماء ياريت تقبل اسفي؟؟؟ 

عم سعيد: أأقبل اسفك؟؟؟  انت فضحتني قدام اهلي وقرايبي وعريس بنتي وجاي تقولي اسف!؟؟؟  اعمل بيه ايه اسفك ده؟؟  هيفيدني بايه؟  

مش هقول غير حسبي الله ونعم الوكيل 

ايمن: لا ياعمي انا اسف جدا ارجوك انا كنت بقوم بشغلي مش اكتر 

عم سعيد: شغلك تفضح الناس؟؟؟  هو ده شغلك؟؟؟  بدال ما تتأكد قبل ما ترمي الناس بالباطل جيت تتهمني؟؟؟  لا برضه مش هسامحك وانت خصيمي يوم الدين ربنا يحكم بينا 

سابه عم سعيد ومشي يحسبن عليه وايمن هيتجنن لانه عارف ان ربنا ما بيفرطش في حقوق العباد ابدا 

معرفش ينام طول الليل وهو بيلوم نفسه ازاي ارتكب غلط زي ده....  لازم يصلح غلطه ده باي طريقه 

تاني يوم راح لعم سعيد بيته خبط وهو بنفسه فتح الباب واتفاجئ اول ما شافه 

ايمن: ادخل ولا؟؟؟ مش هتستقبلني في بيتك؟  او ممكن تاخد بطارك وتطردني قدام الكل 

عم سعيد: لا طبعا بيتي مفتوح للكل ومين دخل دارك جاب العيب عليك اتفضل 

ايمن دخل وهوه مش عارف يقول ايه؟  

ايمن: انا مش عارف اقول ايه؟  لان اللي عملته ما يغتفرش؟؟  بس انا كنت بقوم بشغلي في عصابه بتخطف البنات في سن 16 و17 سنه وبيبعوهم ويسفروهم بره يشغلوهم في الدعاره وطبعا البنات دي بتضيع وما بترجعش تاني وعلشان كده مكنش ينفع اكون متساهل ابدا واي خيط لازم اطارده والمسؤل عن العصابه دي للاسف بنفس اسمك 

عم سعيد: وده يبرر اللي انت عملته؟؟؟ 

ايمن: لا طبعا بس انا بقولك اللي حصل واتمني انك تقبل اعتذاري 

عم سعيد: يعني انت تيجي تفضحني قدام الدنيا كلها وتيجيلي هنا البيت تعتذرلي؟؟؟  انا غير الفضيحه وسمعتي اللي بقت في الوحل بنتي اتفسخت خطوبتها لان عيلتها مرضيوش يناسبوا واحد مشبوه في دعاره 

يعني حتي لو طلعت براءه بس اتشبهت وانا عندي 6 بنات انت متخيل انت عملت ايه فيهم؟؟؟  اسفك مش مقبول ودلوقتي بعد اذنك علشان الصلاه قربت 

ايمن مشي هيتجنن ومش عارف يعمل ايه؟  

رجع بيته مهموم وامه شافته فحكالها اللي حصل 

امه فاطمه: يا حبيبي هو عنده حق معلش بس ده عنده بنات وانت بصراحه لطيت سمعتهم كلهم 

حاول معاه لحد ما يسامحك معلش 

تاني يوم كان جمعه وايمن راح يصلي في الجامع اللي عم سعيد بيصلي فيه 

وحضر الخطبه وبعد الصلاه وقف قدام الكل واعتذر لعم سعيد واتأسفله وقال ان ده غلط مش هيتكرر 

عم سعيد سمع اعتذاره ومشي وايمن طلع يجري وراه لحد ما حصله 

ايمن: اعتذرتلك  قدام الكل اهوه...  كل حتتك عارفه انك برئ...  سامحني بقي؟  

عم سعيد: انت ليه مصر؟؟؟ مش انت اعتذرت قدام الكل وريحت ضميرك يفرق معاك ايه بقي اقبل اعتزارك ولا لأ؟؟؟  ولا علشان انت عارف ان اللي انت عملته ما يكفيهوش الاعتذار صح؟  لان الثوب الابيض لو اتبقع حبر ما بينضفش مهما تغسله...  روح يا ابني روح 

ايمن:مصر لاني عارف ان ربنا ما بيسامحش في حقوق العباد فاعذرني  لاني  مش هروح غير لما اسمعها منك انك مسامحني؟؟ 

عم سعيد: وانا قلتلك اني خصيمك يوم الدين 

ايمن: لا يا عم سعيد ارجوك 

عم سعيد: ما انا قبلك اترجيتك وقولتلك فرح بنتي والناس وعيلتي ولا اتهزيت 

ايمن: خلي انت قلبك كبير 

عم سعيد: قلبي كبير في كل حاجه الا الاعراض  وانت خضت في عرضي وشرفي

ايمن: طيب شوف ايه يرضيك وانا موافق عليه؟  

عم سعيد: ايه اللي ممكن تعمله يرجع عرض الواحد وشرفه؟؟؟  ايه؟؟  مفيش صح!؟؟ شوف وراك ايه ما تعطلش نفسك 

ايمن: يا عم سعيد انا مستعد اعتذرلك تاني قدام الكل 

عم سعيد: هتروح قدام اهل عريس بنتي وتقولوهم الحقيقه وترجع الفرح من تاني؟؟ 

ايمن: اه اروحلهم واعملهم فرح تاني علي حسابي اديني العنوان 

عم سعيد: لا اصلا اللي يتخلي عن بنتي لما تحصل مصيبه ما يلزمنيش بعدها شوف رايح علي فين يالا 

سابه ومشي وايمن فضل مستينه العصر والمغرب والعشا والفجر كمان. وكل مره يكلمه وعم سعيد رافض يسمعه وبعد صلاه الفجر

اخد تلات ليالي كل يوم بعد العشا وبعد الفجر يجيله ويكلمه ونفس الرد 

عم سعيد: هو انت ما وركش شغل ولا بيت ولا متجوز ولا اي حاجه،؟؟؟ 

ايمن: الجمعه  اجازتي ولا مش متجوز وماورايش حاجه وحتي لو ورايا ده اهم ارجوك يا عم سعيد سامحني 

عم سعيد: تعال بكره بعد صلاه العشا 

ايمن: هتسامحني؟؟؟ 

عم سعيد: لا طبعا بس هحاول اصفي من ناحيتك واشوف ايه اللي ممكن يعوضني بس ما تحطش امل 

ايمن ماشي وكله امل في بكره

عم سعيد روح بيته وبناته حواليه 

عم سعيد: حبيبه؟؟ 

حبيبه: نعم يا بابا 

عم سعيد: تعالي يا حبيبتي اقعدي 

حبيبه :اتفضل يا بابا قول 

ام سعيد: ايه رايك في الظابط اللي اسمه ايمن ده؟؟؟

حبيبه: اهو راح اهوه 

عم سعيد: ايوه يعني ايه رأيك فيه حلو وحش؟؟  

حبيبه: يعني ايه حلو ووحش دي؟؟؟  عادي يعني؟  

عم سعيد: شكله ايه؟  

حبيبه: وانا من امتي بدقق في شكل الرجاله؟؟ 

عم سعيد: بس ده جه كذا مره وبعدين مختلف وضعه فأكيد شوفتيه؟؟؟ 

حبيبه: طيب بتسألني انا ليه؟  ما تسأل ساميه ولا ساره ولا سميه،؟؟

عم سعيد: لا انا بسألك انتي 

حبيبه: اشمعني انا؟؟؟ 

عم سعيد: علشان عايز اجوزهولك انتي 

حبيبه تنحت او ما استوعبتش ابوها قال ايه؟  

حبيبه: انت بتقول ايه؟  تجوزهولي؟  تجوزني اللي فضحنا وقبض عليك وكان السبب في فركشه جوازه سميه؟  وبعدين هتروح تقوله ايه تعال اتجوز بنتي وانا اسامحك هيقولك مع السلامه انت وبنتك؟؟؟ 

عم سعيد: اولا فركشه جوازه سميه ده كان مصلحه لان ربنا بين لنا انه مش راجل يعتمد عليه ايوه هيا هتزعل شويه بس بعدها هتفوق وتحمد ربنا 

ثانيا لو هو اتجوز مننا هيبقي ده اكبر اعتذار واكبر دليل ان احنا ملناش علاقه باللي حصل 

ثالثا اه هقوله تعال اتجوز بنتي 

ساره اتدخلت :وبعدين اول ما يشوفها هيوافق ويقول هو حد طايل جوازه ببلاش؟؟ 

عم سعيد: هو انتو فاكريني هقول تعالي اتفرج وان عجبتك شيل؟؟؟ 

حبيبه: امال هتعمل ايه؟  

عم سعيد: تقولي الاول رأيك ايه فيه؟  

حبيبه: يعني انا مشفتوش كويس بس اعتقد انه حلو يعني وبعدين افرض انه متجوز؟؟؟ 

عم سعيد: لا هو مش متجوز...  هتعرفوا بقي انا هقوله ايه؟؟ ولو وافق بعد اللي هقولهوله يبقي مبروك عليكي راجل هيراعيكي العمر كله 

حبيبه: مين قالك انه هيراعيني؟؟؟ 

عم سعيد: يا بنتي عمرك سمعتي عن ظابط جه اعتذر لحد؟؟؟  لا مفيش اما ده مصر انه يعتذر ومصر اكتر اني اقبل اعتذاره لانه عارف ان ربنا ما بيسامحش في حق عباده واعتذرلي قدام الناس كلها ومستعد يقبل اي حاجه مني...  المهم اختك سميه اخبارها ايه؟  ووضعها ايه؟  

حبيبه: هيا زعلانه طبعا بس في نفس الوقت متقبله اللي حصل وبتقول كويس انه ظهر علي حقيقته قبل اي شيئ رسمي 

عم سعيد: ربنا يكملها بعقلها ويرزقها بابن الحلال اللي يستاهلها...  اول ما ايمن يجي عايزك تعمليله حاجه يشربها وتيجي بنفسك تقديميها

حبيبه: هتخليه يشوفني؟؟؟ 

عم سعيد: لا يا بت هتطلعي بنقابك ومش هيشوف حتي لونك ايه؟  بس انتي تشوفيه من قريب وان عجبك وارتحتيله من اول مره يبقي نتكل علي الله حسيتي انك مش قبلاه يبقي نقبل اعتذار الراجل ويروح لحال سبيله ماشي المهم الليله تعملي استخاره وتشوفي مرتاحه لايه 

حبيبه: وانت مش هتعمل؟؟ 

عم سعيد :يا بنتي انا من اول ما جاتلي الفكره وانا كل يوم بعملها والنهارده كمان نشوف 

حبيبه: ماشي 

حبيبه متوتره ومتحمسه في نفس الوقت...  هيا لمحت ايمن ولو كان في ظروف تانيه كان عجبها 

ابوها صلي العشا ورجع وهيا مترقبه انتظاره وفعلا وصل...  دخل وقعد مع ابوها وهيا طول النهار بتفكر تعمله ايه يشربه واخيرا استقرت علي كابتشينو 

عملته وابوها شاورلها تدخله 

دخلت وايمن بص للارض وده عجب ابوها وحبيبه قربت منه وحطت الصينيه قدامه وحطت قدامه كوبايته وكوبايه ميه وحطت لابوها الشاي بتاعه وطولت علشان تتأمله وقلبها كان بيدق جامد لما تخيلت نفسها في حضنه 

خرجت وابوها استأذنه وخرج وراها ودخلوا كلهم اوضتها 

عم سعيد: هاه رأيك ايه؟  

امها...  اخواتها..  ابوها كلهم بيبصولها ومستنين رأيها 

حبيبه اتحرجت جدا وابتسمت 

عم سعيد: حبيبه لازم اسمع منك صريحه رأيك ايه؟  امشيه ولا اكمل؟  

حبيبه: لا متمشيهوش كمل 

عم سعيد: علي خيره الله ربنا يجعله خير ليكي 

عم سعيد خرج لايمن بره وقعد قصاده 

عم سعيد: اتفضل ولا اخلي البنات يعملولك حاجه تانيه؟  

ايمن: لا لا  المهم نتكلم في المهم 

عم سعيد: المهم تاخد واجبك الاول وبعدها نتكلم اشرب وانا اشرب الشاي بتاعي 

وفعلا ايمن بدأ يشرب الكابتشينو وعجبه لانه مظبوط جدا 

عم سعيد: محتاج سكر ولا سكره زياده ولا اي حاجه؟ 

ايمن: لا لا بالعكس ده مظبوط جدا...  نادرا ما بشربه مظبوط كده الا اذا عملته لنفسي تسلم ايد اللي عمله 

حبيبه سمعاه وتخيلت نفسها في بيته بتعمله وبيشربوه مع بعض 

حبيبه "" كفايه افكار انتي متعرفيش اذا كان هيبقي من نصيبك ولا لأ؟  متعلقيش نفسك بيه""كلهم واقفين بيراقبوا اللي هيحصل ومستنين يشوفوا ابوهم هيقول ايه؟  

ايمن: المهم يا عم سعيد نتكلم بقي 

ايمن حط الكوبايه من ايده 

عم سعيد: شوف يا ابني...  انا عندي 6 بنات زي ما انت عارف...  الكبيره متجوزه واللي وراها انت والحمد لله بوظت جوازها ( ايمن جه يتكلم بس هو شاورله يسكت)  ما تقاطعنيش لو سمحت...  وطبعا انت مهما تعتذر عمرك ما هتصلح اللي حصل 

ايمن: والحل ايه؟  

عم سعيد: الحل انك تفضل هنا علي طول 

ايمن: افندم؟  افضل هنا ازاي؟  بصفتي ايه؟  

عم سعيد: مش قصدي تفضل هنا انك تقعد هنا او تعيش هنا قصدي انك يكون لك وجود دايم في حياتنا 

ايمن: معلش برضه مش فاهم 

عم سعيد: تتجوز واحده من بناتي 

ايمن بص لعم سعيد وهو مش مستوعب يقول ايه؟  افتكر كل خلافاته مع امه علي الجواز وانه ديما يرفض كل واحده تجيبهاله ويقولها لازم تكون واحده مميزه وفي الاخر يتجوز واحده حتي ما يعرفهاش 

عم سعيد: انت رحت فين؟  

ايمن: انا اتجوز؟؟؟ 

عم سعيد: اه فين المشكله؟  انت مش راجل ولا ايه؟  

ايمن: لا مش حكايه راجل ومش راجل الموضوع بس فاجئني لاني مش بفكر نهائي في موضوع الجواز 

عم سعيد.: ما تقوليش انك عايز تعيش قصه حب وتخرج وتدخل مع حبيبتك الاول؟  

ايمن: لا مش كده انا ما بقتنعش بعلاقات قبل الجواز دي بس برضه ما تخيلتش اني اتجوز كده 

عم سعيد: المهم في حاجه لازم تعرفها الاول عن بنتي 

ايمن: حاجه ايه؟  

عم سعيد: بنتي دي محدش ابدا ممكن يتجوزها وعلشان كده انت لو اتجوزتها يبقي كده اي حد يعرف هيصدق فعلا اني برئ وان ده كان غلطه 

ايمن: وضح اكتر لاني مش عارف ليه حاسس اني غبي النهارده يا إما حضرتك بتتكلم بالالغاز 

حبيبه ابتسمت وكان نفسها تخرج وتقوله يوافق 

عم سعيد: بنتي عاميه 

ايمن اتصدم # عاميه؟ 

عم سعيد: ومش بس كده دي خرسه وطرشه 

مش ايمن بس اللي اتصدم؟؟  ده ايمن وحبيبه واخواتها وامها اللي كان نفسها تخرج وتشد جوزها وتتخانق معاها 

ايمن دي كانت اول مره في حياته ما يلاقيش كلام يرد بيه نهائي 

عم سعيد: سكت ليه؟  

ايمن: المفروض اقول ايه؟  انا مش عارف اقول ايه؟  طيب ازاي يعني؟؟  طيب لو عاميه بس او خرسه بس او طرشه بس كنت هعرف اتواصل معاها لكن التلاته ازاي؟؟  يعني مش عارف؟؟  اصلها هتكون محتاجه رعايه خاصه وانا مشغول؟؟  الحكايه انها؟؟  هيا اصلا عارفه يعني ايه جواز؟؟  طيب هتكلموها ازاي ولا؟

عم سعيد.: علي فكره انت ما بتقولش كلام له معني 

ايمن: انا مش عارف اقول ايه اصلا؟  

عم سعيد: فكر وشوف والدك هيقول ايه؟  وتعال رد عليا بكره زي دلوقتي 

ايمن: والدي؟؟  والدي متوفي انا ووالدتي بس مع بعض.. عمي مع احترامي ليك بس صعب قوي اللي حضرتك بتطلبه 

عم سعيد: وصعب اللي انت عملته ودمرت بيه حياه خمس بنات اعتقد ده عدل انك ترتبط بواحده فيهم وتنقذ مستقبل الاربعه الفاضلين...  وبعدين ربنا حللك 4 وقال مثني وثلاث ورباع يعني انت ممكن تتجوز تاني وتبقي اخدت ثواب بنتي وانقذت اخواتها وانت مضيعتش شبابك برضه 

ايمن: انت عايزني اتجوز علي بنتك؟؟؟ 

عم سعيد: انا بقولك لو عايز فكر وخد وقتك 

ايمن: طيب بس هجيلك بعد ثلاث ليالي مش بكره 

عم سعيد: ليه ثلاث ليالي؟؟ 

ايمن: موضوع زي ده مش محتاج استعجال اعذرني النهارده الاحد هاجي لحضرتك الاربعاء 

عم سعيد: في انتظارك 

ايمن مشي وحس ان الدنيا بتضيق عليه 

اول ماهو خرج البنات وامهم هجموا علي ابوها وحبيبه واقفه ساكته 

عم سعيد: مالك يا حبيبه؟؟ 

حبيبه: بتخليني اتعلق بيه ليه لما انت هتمشيه برضه في الاخر؟؟  عمره ابدا ما هيوافق ابدا 

عم سعيد: انا قولتلك شوفيه مش اتعلقي بيه وبعدين هيوافق وابقي شوفي 

امها زينب: يوافق؟؟  انت شردت البنت طيب قول حاجه واحده؟؟  يتجوز فيها ايه العاميه والخرسه والطرشه دي يعني لاتتكلم ولا تسمع ولا تشوف يا راجل حرام عليك 

عم سعيد: مش قولتلك يا حبيبه انه لو وافق هيشيلك جوه عنيه العمر كله 

حبيبه.: ده لو وافق؟؟ 

عم سعيد: بعدين مستغربين ليه غيره وافق قبل كده؟  

كلهم بصوله باستغراب غيره مين؟  

حبيبه فهمت ابوها وهيا اللي ردت 

حبيبه: انت بتشبه ايمن بأبو  الامام حنيفه؟؟؟ 

عم سعيد: كان شاب عادي بس بيخاف ربنا وهو فكرني بيه لما اصر علي اعتذاره 

سهيله: هو ابو الامام حنيفه عمل ايه؟  

عم سعيد: كان شاب فقير وجعان جدا وهو ماشي لقي بستان تفاح واكل واحده وبعد ما اكلها خاف من ربنا فراح لصاحب البستان وطلب يسامحه وصاحب البستان رفض وفضل وراه يستسمحه وهو رافض 

وبعدها قاله كده يتجوز بنته وقاله انها عاميه وخرسه وطرشه والولد زعل بس  وافق واتفاجئ بيها جميله ومفيهاش اي حاجه وخلف الامام حنيفه 

حبيبه: وانت بقي مستنيه يعمل كده؟  

عم سعيد: هتشوفي تعالي شيلي الكوبايات دي واعمليلنا شاي يالا 

حبيبه شالت الكوبايات ودخلت المطبخ 

مسكت كوبايه ايمن وقربتها منها شمت فيها ريحه برفانه...  كانت لسه دافيه اخدتها وطلعت اوضتها 

اختها سميه راحت تشوفها في المطبخ ملقتهاش فطلعتلها لقتها بتشرب كوبايته 

سميه: انتي بتشربي كوبايته؟؟ 

حبيبه: عندك مانع؟؟؟ 

سميه: ده حب بقي ولا ايه؟  

قعدت جنبها: حبيتيه؟؟ 

حبيبه: اتمنيته بس خلاص بقي 

سميه: مش يمكن يوافق؟؟ 

حبيبه: انتي شايفه كده؟  

سميه: ممكن وبعدين بابا قاله انه حر يتجوز تاني يعني مقفلهاش في وشه قوي 

حبيبه: يعني العاميه والخرسه والطرشه يتجوز فيها ايه دي؟  

ايمن روح مهموم وحكي لامه كل اللي حصل وامه صوتت وفضلت تلوم فيه بس في الاخر قالتله هو حر في قراره لان فعلا ذنب البنات دي في رقبته 

ايمن قالها انه هيصلي استخاره 3 ليالي وطلب منها هيا كمان تصلي زييه ويسيب ربنا هو يختار 

واول ليله صلي استخاره واقام الليل ونام واتفاجئ باللي حصل لان اللي حصل مكنش متوقع ابدا ابدا 

نكمل بكره 

توقعاتكم يالا 

ايه رأيكم في اول حلقه؟ 

الاحداث لسه هتولع ما تقلقوش 

حب مشروع

الحلقة الثانية 

ايمن اقام الليل وصلي استخاره ونام صحي لقي نفسه في مكان رائع..  مكان كله خضره وورود كتير اشكال الوان..  ورود عمره ما شافها قبل كده 

فضل يسأل نفسه معقوله مات ودي الجنه،؟؟؟ 

فضل ماشي يتفرج بانبهار علي كل حاجه حواليه لحد ما شاف بركه مياه صغيره وقاعده علي جنبها بنت رائعه الجمال لابسه فستان ابيض فرشاه حواليها وحاطه ايدها بتلعب في الميه وشعرها اسود طويل لامس الارض وهيا قاعده 

البنت حست بيه وبصتله وابتسمت ابتسامه طيرت عقله منه ومدت ايدها ليه فهو استغرب وبص حواليه يتأكد انها ماده ايدها ليه هو 

البنت: ايوه انت بتبص حواليك ليه؟  

ايمن مد ايده وقعد جنبها ولسانه معقود من اللي هو فيه 

البنت: بتبصلي كده ليه؟  

ايمن: انا ميت صح؟  ودي الجنه؟  وانتي من الحور العين صح كده؟  

البنت ضحكت بصوتها وجننت ايمن اكتر واكتر 

البنت: لا انت ما متش 

ايمن: امال انا فين؟  

البنت: انت في مكان جميل 

ايمن: وانتي مين؟  

البنت: انا ملكك 

ايمن: ملكي انا؟؟؟  ازاي؟؟؟ 

البنت: تعال معايا عندي ليك هديه 

مسكت ايده ومشيت وهو وراها لحد ما وقفت قدام حاجه زي ورده كبيره مقفوله 

لمست الورده بايدها فاتفتحت وكان جواها بنوته صغيره بيبي بس اجمل مايكون وعندها اجمل ابتسامه 

ايمن ما قاومش البنت فمد ايده وشالها وضمها 

البنت: دي كمان ملكك احنا الاتنين ملكك لو انت عايز 

ايمن: طيب ازاي؟  الاقيكي فين؟  

البنت: لازم تخطي النار قبل ما توصلنا...  لازم تخطي النار الاول لازم 

ايمن صوت البنت بيبعد وبتختفي من قدامه حاول يكلمها او يوفقها بس اختفت 

# ايمن يا ايمن ايمن؟؟؟ 

فتح عنيه لقي نفسه في اوضته وعلي سريره وامه واقفه بتصحيه 

ايمن: بتصحيني ليه يا امي حرام عليكي 

فاطمه: الفجر بيدن قوم يالا مش هتصلي الفجر يالا 

ايمن: هصلي يا امي هصلي 

قام قعد في سريره 

فاطمه: يا واد قوم يالا هتتاخر 

ايمن: حاضر قايم قايم اهوه حاضر 

قام وراح صلي ورجع وقعد مع امه 

فاطمه: كنت بتعمل ايه لما صحيتك وزعلت ليه؟  

ايمن: مكنتش بعمل حاجه...  صفوا نيتكم بقي 

امه ضربته علي صدره وضحكوا 

ايمن: كنت في الجنه ومعايا واحده من الحور العين 

فاطمه: الحور العين حته واحده؟  

حكالها حلمه كله 

فاطمه: طيب اعتقد البنت الصغيره في الحلم رزق حلو ودنيا حلوه 

ايمن: ما انا عارف انها دنيا حلوه ودي المشكله 

فاطمه: ايه المشكله بقي؟  

ايمن: هل دي اشاره مثلا من ربنا اني اوافق علي بنت عم سعيد وساعتها هلاقي البنت دي 

فاطمه: اعتقد كده 

ايمن: ولا دي وسوسه من الشيطان اني ارفض البنت واعيش حياتي وتبقي دنيتي حلوه بس اخرتي اني اخطي النار والبس فيها بقي لاني اخترت الدنيا وسيبت الاخره 

فاطمه: مفكرتش فيها كده؟؟؟  علي العموم حبيبي انت قدامك لسه وقت صليها مع كل وقت صلاه واستخير واسأل ربنا يلهمك الصح فين واكيد ربنا مش هيتخلي عنك ابدا 

ايمن: ادعيلي يا ست الكل ادعيلي ديما 

باس ايدها وهيا فضلت تدعيله ربنا ينور طريقه 

تاني ليله ايمن حلم بنفس البنت وقالتله نفس الجمله 

لازم تخطي النار علشان توصلي 

تالت ليله نفس الكلام مستنياه بس لازم يخطي النار 

ايمن هيتجنن مش فاهم يعمل ايه؟  ولا عارف الرؤيه دي معناها ايه؟  

النهارده الاربعاء ومعاده مع عم سعيد بالليل ولحد دلوقتي مش عارف ياخد قرار 

راح شغله وسابها لربنا 

فاطمه زي ابنها بتعمل استخاره كل يوم 

ثالث يوم وحشها جوزها فبتدور علي صوره وبتدور علي البومها الخاص فلقته في دولابها وهيا بتشده صندوق دهبها وقع واتفتح ووقع منه خاتم بس 

اخدت الخاتم وابتسمت 

ايمن جه بعد المغرب وهو مش عارف يعمل ايه؟  

فاطمه: انا هاجي معاك النهارده لعم سعيد وبناته 

ايمن: انا مش عارف اصلا اقوله ايه؟  

فاطمه: هنروح نخطبها 

ايمن: نخطبها؟؟؟  قررتي خلاص؟؟؟ 

فاطمه طلعت الخاتم وورته لايمن 

ايمن: ايه ده؟  

فاطمه: خاتمي وغالي عليا 

ايمن: وبعدين؟  ايه علاقته؟ 

فاطمه: الخاتم ده امي عطيتهولي وقبلها امها وهكذا بيتوارث في العيله والمفروض ان انا اديه لبنتي بس انا مخلفتش بنات فاخدت عهد ان انا اديه لمراتك 

ايمن: وبعدين؟  

فاطمه: كنت نسياه تماما والنهارده بجيب حاجه من الدولاب فوقع قدامي وكأنه بيقولي ان اوانه جه 

انا كنت حاسه اني كأم هرفض تماما جوازك بواحده زي دي بس مش عارفه ليه قلبي مطمن عليك...  قلبي مطمن عليك يا حبيبي 

ايمن: طيب وبعد ما اتجوزها اعمل معاها ايه دي؟  

فاطمه: قصدك تنام معاها ازاي؟ ؟  

ايمن: يا امي نوم ايه بس اللي بتتكلمي عنه؟؟؟  بيقولك عاميه وخرسه وطرشه هتفهم ازاي اصلا يعني ايه جواز او علاقه بين اتنين؟؟؟  لو اتجوزتها هيبقي علشان عم سعيد واخواتها بس برضه هنتعامل معاها ازاي؟  

فاطمه: هنجيبلها حد متخصص يخدمها ما تقلقش انت يالا بقي يدوب نجهز علشان منتأخرش 

حبيبه اليوم كله متوتره وكل يوم بتصلي وتدعي ربها لو ملهاش نصيب فيه يبعده عنها ويشيله من تفكيرها 

اخر النهار خرجت راحت تشتري كتاب جديد نزل 

اهو اي حاجه تقتل الانتظار في البيت 

ايمن وصل بيت عم سعيد واستني امه بره في جنينه عم سعيد وفضل يتأمل فيها ويفتكر لما جه والفرح شغال..  قد ايه كان غبي ومتخلف 

بيتفرج علي البيت وبيرجع لوري وفجأه خبط في حد 

حبيبه كانت داخله والكتاب وقع في الارض ووطت تجيبه وهيه هتقوم خبطت في ايمن وهو بيرجع لورا بضهره 

ايمن لف بسرعه و مسكها لانها كانت هتقع 

حبيبه قلبها هيقف وهيا بين ايديه...  تلات ايام بتدعي ربها انها تشوفه تاني..  تلمحه ولو حتي من بعيد 

وفجأه تلاقي نفسها في حضنه بين ايديه...  شامه ريحته اللي عشقتها علي الكوبايه اللي لسه مغسلتهاش علشان تفضل فيها الريحه 

للحظات فضلت ثابته وهو ماسكها ووقفها علي رجليها 

ومن غير ما تنطق حرف جريت ودخلت وما وقفتش غير في اوضتها 

اخواتها سميه وساره جريوا وراها وبيسألوها في ايه 

حبيبه: شوفته تحت شوفته 

سميه: مين هو اللي شوفتيه؟  

حبيبه: ايمن...  واخدني في حضنه 

ساره وسميه: انتي اتجننتي؟  ولا اتهبلتي ولا لا تكوني ورتيله نفسك علشان يوافق عليكي؟  

حبيبه: ايه التخاريف دي؟؟؟  انتو متخيلين اني ارفع نقابي واكشف وشي واقوله تعال شوفني حلوه ازاي وبابا بيضحك عليك و والنبي اتجوزني... انتو هبل ولا اتجنيتوا؟؟؟ 

ساره: امال اخدك في حضنه ازاي يا فصيحه؟؟

حبيبه: اتخبطنا في بعض وهو مديني ضهره وانا داخله وما اخدتش بالي خبطت فيه ولحقني علشان ما اوقعش وبعدها جريت من غير ما انطق بس كده 

ساره: وكده يبقي اخدك في حضنه؟؟؟ 

حبيبه: ايوه مش قربت منه وشميت ريحته يبقي كفايه كده قوي بس هو بيعمل ايه بره؟  هو بابا مش عايز يدخله ولا مذنبه بره؟  

سميه: لا مش كده امه تحت مع ابوكي وامك والله اعلم بقي جايه تستسمح ابوكي ولا جايه تخطبك؟؟ 

هو انتي بتبصي علي ايه من الشباك كده؟ ؟  

حبيبه: ايمن واقف تحت رايح جاي صعبان عليا قوي 

ساره: ما يصعبش عليكي غالي يا اختي 

حبيبه: ماهو غالي 

سميه: تيرارارارا اااا

ام ايمن تحت مع زينب وعم سعيد 

فاطمه: طبعا الاول انا بتأسفلكم جدا علي اللي حصل وعارفه ان الاسف مش كفايه والله بس ايمن غصب عنه!!!  عمره ما اذي حد ابدا 

زينب: النصيب بقي نعمل ايه؟  

فاطمه: انا عندي طلب غريب شويه 

زينب: ممكن العروسه تيجي هنا لحظه؟؟؟ 

عم سعيد: انا قلت لابن حضرتك انه محدش يشوفها لحد يوم الدخله واعذروني ولا حتي الرؤيه الشرعيه 

فاطمه: عارفه وكلامك علي راسنا تنزل بنقابها عادي مع اخواتها انا بس  هتأكد من حاجه معلش اعذروني 

زينب قامت وطلبت من البنات ينزلوا وحبيبه بنقابها 

البنات نزلوا وماسكين ايدين اختهم كأنها فعلا عاميه وقعدوها قدام فاطمه 

فاطمه طلعت من شنطتها الخاتم ومسكت ايد حبيبه وحطته في ايديها وكلهم مستغربين 

الخاتم طلع مقاس حبيبه بالظبط؟  فابتسمت فاطمه 

فاطمه: عم سعيد حضرتك عايز الفرح امتي؟  يناسبك امتي؟؟ 

حبيبه كانت عايزه تتنطط بس افتكرت انها المفروض خرسه وطرشه فسكتت 

البنات انسحبوا وايمن دخل يتفق مع عم سعيد علي كل حاجه واتحدد الفرح خلال شهر يكون فاطمه جددت بيتها يستقبل عروسه 

زينب: يعني مش لازم تجددي كل حاجه 

فاطمه: عروسه ومن حقها تدخل علي فرش جديد...  وزيها زي اي عروسه...  بس علشان اكون صريحه معاكي من الاول انا هجوز ابني تاني 

زينب كانت هتعترض بس افتكرت شروط الجوازه 

زينب: اللي فيه الخير ربنا يقدمه 

حبيبه طول الوقت فرحانه بخاتمها وما بتقلعوش ابدا من ايديها 

ايمن محلمش تاني بالبنت دي وقال انها كانت وسوسه من الشيطان علشان يختار الدنيا ويبيع الاخره 

كل يوم فرحه بيقرب وهو مهموم وزعلان انه هيتجوز كده...  علي عكس امه اللي كانت فرحانه ومستغربه هيا ليه فرحانه 

ايمن: هو انتي مبسوطه كده ليه؟  

فاطمه: مش هتتجوز بعد يومين 

ايمن: وهيا دي تعتبر جوازه يتفرحلها؟؟؟  دي تخليص حق يا امي؟  

فاطمه: اقبل قضا ربنا علشان يفرجهالك في وشك 

وبعدين البنت اخواتها حلوين وامها حلوه اكيد هيا كمان هتبقي حلوه 

ايمن: واعمل انا ايه بحلاوتها؟؟؟ ما علينا يا امي انا داخل ارتاح بعد اذنك 

حبيبه طول الوقت مشغوله مع اخواتها بتجهيز كل حاجه للجواز 

ومع ان فاطمه قالتلهم انها هتفرش  الشقه بس هما حبوا يشاركوا علي قد ما يقدروا 

حبيبه كان نفسها تشوف بيتها وتروح معاهم وفعلا في مره راحت علي اساس انها سميه واتفرجت علي البيت  اوضه ايمن اكتر اوضه فضلت فيها تتأمل حاجته هدومه!  برفانه اللي بتعشقه؟  كتبه؟  مكان صلاته!!  مصحفه!!  وتخيلت نفسها بتشاركه كل حاجه من دول ومجرد التخيل بيجننها وبتدعي اليوم يقرب 

وبدأت تنقي ستاير وتحف وسجاد علي ذوقها تناسب العفش

اخيرا جه يوم الفرح!!  اليوم الموعود!!!  

ايمن متوتر ومش عارف يتصرف ازاي؟  او هيعمل ايه؟  

الكل بيهنيه اصحابه ومعارفه وهو بيرد وخلاص 

الفرح اتعمل في بيت عم سعيد وكان فرح اسلامي 

الكل كان متفاجئ بالظابط اللي بس من شهر كان بيقبض علي عم سعيد 

جار: مبروك يا عريس...  بس تصدق عم سعيد راجل سكره ويستاهل ومعلش بقي يا عم سعيد انا صراحه صدقت انك فعلا تكون بتمثل اعذرني بقي 

الراجل اول ما قال كده ناس كتيره قالت انها فعلا كانت مصدقه وحتي لما ايمن اعتذر قالت برضه ممكن يكون القانون ما عرفش يثبت حاجه بس بجواز ايمن منهم نهي كل الشبهات 

عم سعيد لايمن: عرفت بقي ان اعتذارك مكنش كافي 

ايمن: عرفت يا عم سعيد عرفت 

عم سعيد: انا عارف انك زعلان مني وحاسس اني ورطتك واخدت منك فرحه جوازك بس صدقني هتشكرني 

ايمن: طالما سامحتني يبقي فعلا هشكرك... 

عم سعيد: انا عندي هديه غاليه قوي ليك هديهالك بس مش دلوقتي 

ايمن: انا مش عايز هدايا يا عمي صدقني 

عم سعيد: لا دي هديه هوصلهالك مع حبيبه وبعد ما تسلمهالك تكلمني وتقولي رأيك ايه في هديتي بس بأمانه لو عجبتك تقولي ولو معجبتكش برضه تقولي اتفقنا؟؟  امانه؟؟؟ 

ايمن: امانه يا عم سعيد حاضر ومتشكر مقدما 

عم سعيد: لا متشكرنيش اشكرني بعد ما تشوفها ده لو عجبتك 

اخو عم سعيد: ربنا يعينك علي ما ابتلاك يا ابني دي حبيبه دي بالذات جننت الكل!!! الله معك 

عم حبيبه كان يقصد ان حبيبه ليها ارائها الخاصه وما بتسمعش الكلام بسهوله وصعب حد يغير رايها وعنيده جدا لكن ايمن فهمها انه يعينه علي ظروفها ويصبره 

عدي الفرح وجه معاد كل واحد يروح بيته 

ايمن طلع ياخد عروسته اللي لبست نقابها فوق فستان فرحها 

امها سلمتهاله في ايده ودمعتها نزلت 

زينب:دي اول مره بنتي تبعد عن حضني وتروح بيت تاني...  طول عمرها متهننه في بيت ابوها ارجوك خلي بالك منها وخليك ديما حنين معاها ارجوك يا ابني 

ايمن: ما تخافيش عليها انا هعمل كل اللي ربنا يقدرني عليه علشان اسعدها وبعدين انتي قريبه منها وفي اي وقت تحبي تشوفيها تليفون صغير منك 

عم سعيد: ما تخافيش علي بنتك يا زينه يا ام البنات ايمن هيخاف ربنا فيها وهيحطها جوه عنيه وده شيئ انا واثق منه اتكل علي الله يا ابني 

ايمن ماسك حبيبه من دراعها ونازل بيها واحده واحده واخواتها حواليها بيساعدوها وهيا الفرحه مش سايعاها ركبها العربيه وركب امه كمان وركب جنب مراته 

عم سعيد لمراته: شوفتي قبل كده كام عريس بيركب امه ويفتكرها يوم فرحه؟؟ 

زينب: طيب ماهو بيحب امه 

عم سعيد: بيحبها ويحترمها وده معناه انه هيحترم مراته برضه فهماني؟؟ 

زينب: طيب افرضنا معجبتوش او زعل مثلا انك ضحكت عليه او 

قاطعها: في حد يزعل انه مراته مطلعتش عاميه ولا خرسه ولا طرشه ده الفرحه هتلجمه ومش هتخليه يعرف يتكلم وهتقولي سعيد قال 

زينب: ربنا يعدي الليله علي خير 

ايمن وصل بيته ونزل امه وبعدها نزل مراته ومسك ايدها وطلعها السلم وماشي معاها واحده واحده 

ودخلها اوضته قعدها علي السرير وخرج 

ايمن: ماما يا ماما 

فاطمه: ايه يا حبيبي مالك؟  

ايمن: ايه مالي دي؟  هو انتي هتبيعيني من اولها ولا ايه؟  

فاطمه: عايز ايه بس يا حبيبي؟؟؟ 

ايمن: تعالي قلعيها ولبسيها وشوفي هتتواصلي معاها ازاي؟  اتصرفي 

فاطمه: دي مراتك يا ايمن روح انت قلعها ولبسها 

ايمن: انتي بتقولي ايه؟  اقلع مين والبس مين؟  ماما بقولك ايه؟  انتي اللي خلتيني اوافق 

فاطمه: وانت اللي قبضت علي الراجل مش انا روح لمراتك وشوف طريقه تتواصل بيها معاها؟  ياما قولتلك روح زورهم وشوف بيفهموها ازاي ما رضيتش اشرب بقي يا حبيبي 

ايمن: انتي بتبيعيني ماشي يا امي ماشي 

فاطمه: انت بتهددني يا وله انت..  ادخل يا واد لمراتك يالا ادخل 

ايمن دخل وفضل رايح جاي مش عارف يعمل ايه؟  

دخل اتوضي وصلي ركعتين لله وهيا قاعده علي السرير التوتر ماليها ومش عارفه تتكلم ولا تخلع نقابها ولا تعمل ايه هيا كمان؟؟؟  مش عارفه ازاي تقوله انها شيفاه وانها سمعاه؟؟؟  صعبان عليها حيرته دي 

ايمن مسك تليفونه وكلم ابوها 

ايمن: ايوه يا عم سعيد انا ايمن 

عم سعيد: هديتي عجبتك؟؟؟ 

ايمن: لا لا لسه ما اخدتش هدايا انا مش عارف اصلا اعمل ايه؟  يعني كان حد من اخواتها جه معاها اول يوم حتي يعني؟؟؟وبعدين انا افهمها ازاي؟  او!؟؟  انا مش عارف اتصرف؟  

عم سعيد: هيا فين بنتي دلوقتي؟  

ايمن: قدامي 

عم سعيد: هو انت لسه مكشفتش وشها ولا قلعتها حتي نقابها؟؟؟ 

ايمن: انا ملمستهاش 

عم سعيد: ملمست؟؟؟؟ يا ابني البنت تفطس في النقاب ده روح لمراتك يالا وقلعها نقابها وتعامل معاها هو انت محتاج حد يفهمك ولا ايه؟  

ايمن: انا مش عارف رد فعلها هيكون ايه وهتفهم ازاي ولا انا اصلا افهمها ازاي؟  

حبيبه كانت هتضحك بس مسكت نفسها 

عم سعيد: روح لمراتك قلعها نقابها والباقي هيجي لوحده روح يا ابني للبنيه تفطس 

قفل السكه في وشه وايمن واقف متردد قدامها 

ايمن: انا عارف انك مش سمعاني بس انا هقلعك نقابك ماشي...  يا الله عدي الليله علي خير 

ايمن بايد بتترعش رفع نقاب حبيبه واتقابلت عنيهم في نظره طويله و......

نكمل بكره 

توقعاتكم 

ايمن هيعمل ايه؟  

حبيبه هتعمل ايه؟  

حب مشروع 

الحلقة الثالثة 

اتمني الحلقه تعجبكم اسيبكم معاها يالا 

ايمن واقف متردد قدامها 

ايمن: انا عارف انك مش سمعاني بس انا هقلعك نقابك ماشي...  يا الله عدي الليله علي خير 

ايمن بايد بتترعش رفع نقاب حبيبه وهيا باصه للارض كانت لابسه حاجه شبه الاسدال فوق فستانها 

وقفها وهيا مش عارفه ترفع عنيها فيه ومكسوفه جدا 

مسك الاسدال ده وشده لفوق وقلعهولها 

وهنا بقي كانت صدمته ومفاجئته 

فستانها كان فستان بحمالات رفيعه جدا ...  ودي كانت اول صدمه لايمن...  مكنش متخيل انها بالجمال ده 

كان جسمها ابيض قوي وشعرها اسود ومكياجها رائع 

رجع لوري خطوه وهو مذبهل من جمالها 

مستغرب ان الجمال ده يكون اعمي او اخرس او اطرش 

قرب منها ورفع وشها لفوق علشان يشوف ملامحها كويس 

ايمن: تبارك الخلاق فيما خلق...  ربنا ابدع في جمالك 

عنيهم اتعلقوا ببعض في نظره طويله وايمن مستغرب وبيسأل نفسه هيا بصاله ولا هو متهيأله؟؟؟ 

حبيبه: يعني انت شايفني جميله؟؟ 

حبيبه اول ما نطقت ايمن اتنفض ورجع لورا بذهول 

ايمن: انتي!!!  انتي شايفاني؟؟؟  انتي بتتكلمي؟؟  انتي اصلا سمعاني.؟؟؟؟؟ ازاي؟؟  ابوكي؟؟؟  ابوكي قالي انك!!!!  انك عاميه وانك خرسه وانك طرشه؟؟؟  انتي بجد ولا انا اصلا بحلم؟؟؟  انا صاحي ولا نمت وبيتهيألي؟؟؟  ايه اللي بيحصل؟؟؟ 

ايمن مش مصدق نفسه ومش مجمع نهائي ومش لاقي جمله واحده مفيده يقولها 

حبيبه قربت منه ومسكت ايديه الاتنين 

حبيبه: اهدي...  اهدي...

ايمن: ابوكي 

حبيبه: ماله ابويا؟؟؟  

ايمن: طيب ليه؟  يعني مش فاهم؟؟  طب كان ممكن ارفض؟؟  يعني لو كنت شفتك مكنتش 

حبيبه:   مكنتش هتتردد؟؟؟  هو انت متخيل ان بابا طلب منك تتجورني علشان انا مثلا مش لاقيه عرسان؟؟ 

ايمن: بصي ما تسألنيش اي اسئله انا حاليا عقلي عاجز تماما عن التفكير او انه يجمع 

حبيبه: مش هسألك خلاص...  بس حاليا بابا مستني منك تليفون تقوله رأيك ايه في هديته ليك 

وهيا بتقول كلمه هديه مسكت فستانها وكأنها بتقول ان هيا الهديه 

ايمن ابتسم وسكت شويه..  وبص حواليه يدور علي تليفونه لحد ما شافه 

جابه ومسكه وعينه متعلقه بعنين حبيبه 

ايمن: ايوه يا عم سعيد..... لعلمك هديتك ما عجبتنيش....  ما عجبتنيش نهائي 

قال كلمته وقفل السكه وقفل تليفونه خالص ورماه علي السرير 

حبيبه بتبصله باستغراب ودهشه ودمعه لمعت في عنيها وبتهدد انها تنزل 

حبيبه معرفتش تقول ايه؟  بتبص حواليها ولقت الاسدال اللي كانت لبساه مسكته وهتلبسه 

ايمن: ممكن اعرف بتعملي ايه؟  

حبيبه بصوت مرعوش بيهدد بالعياط: بجهز لان اكيد بابا زمانه جاي ياخدني 

ايمن: ياخدك فين هو انتي مش مراتي؟؟ 

حبيبه: طالما مش عجباك يبقي هفضل هنا ليه؟  همشي وانت ترجعلك حريتك 

ايمن: هو حد قالك ان انا بقيت ملككم؟؟؟  اتجوز طلق؟؟  ايه الحكايه؟ ؟  ماليش اي رأي نهائي؟؟ 

حبيبه: احنا مش عايزين نفرض عليك مش اكتر 

ايمن: ياه بجد؟؟؟  ده انتي ابوكي ذلني وبعدها تقوليلي مش عايزين نفرض عليك؟؟ 

حبيبه عيطت: شوف ايه اللي يناسبك واعمله 

هنا ايمن مقدرش يستحمل اكتر من كده وقرب منها ومسح دموعها ولهجته اتغيرت تماما 

ايمن: بس بس بس ارجوكي ما تعيطيش ارجوكي شششش بس...  ما تعيطيش انا اسف 

حبيبه بتبصله مستغربه 

ايمن: كنت بهزر معاكي بس اهدي...  يعني انتو لعبتو باعصابي اكتر من شهر وعيشتوني في حيره وكآبه مستكتره عليا العب باعصابك تلات دقايق؟؟؟ 

حبيبه: انا مش فاهمه حاجه؟  

ايمن: تخيلي تلات دقايق مش فاهمه حاجه وعيطتي كده امال لو ربنا رزقك بواحد زي ابوكي معندوش قلب سابك شهر وعشر ايام مش فاهمه اي حاجه كنتي عملتي ايه؟  

حبيبه: يعني انا دلوقتي عجبتك ولا مش عجبتك وعايزني امشي ولا لأ؟؟ فهمني،؟؟؟؟

ايمن: هو انتي متخيله ان ممكن يكون في راجل عاقل سليم ما تعجبيهوش؟؟  انتي عبيطه؟ ؟  

حبيبه: انا ماليش دعوه باي راجل انا ليا دعوه بيك انت.... انا عجبتك؟؟؟ 

ايمن مسك ايدها وباسها بكل رقه وابتسملها وهيا قلبها هيوقف من مسكه ايديه وضغطته عليها 

ايمن: تصدقي لو قلتلك اني حلمت بيكي؟؟؟ 

حبيبه:  حلمت بيا؟؟  امتي؟؟ 

ايمن: بعد ما ابوكي قالي اتجوزك عملت استخاره وحلمت بيكي ومع اني افتكرتك واحده من الحور العين بس انتي اجمل مليون مره 

حبيبه ضحكت بصوتها 

ايمن: وضحكتيلي نفس الضحكه دي 

حبيبه: وايه كمان؟؟؟ 

ايمن: كنت قاعده جنب بركه مياه صغيره وحواليكي ورد كتير وشعرك طويل واصل للارض وضحكتيلي وقدمتيلي هديه

حبيبه: وكانت ايه الهديه؟؟ 

ايمن: بوستيني 

حبيبه: ايه بجد؟  انا؟؟ 

ايمن حس انها اتحرجت جدا 

ايمن: لا مش بجد قدمتيلي ورده كبيره ولما فتحتيها لقيت فيها بنوته صغيره بيبي كده وكانت اجمل شيئ شوفته في حياتي 

حبيبه ابتسمت: اجمل مني؟ ؟  

ايمن: كانت في جمالك بس ضيفي عليها حلاوه الاطفال وجمالهم 

حبيبه: وعلشان كده وافقت تتجوزني ؟؟ 

ايمن: لا ده انتي قولتيلي جمله جننتني...  علشان ابقي ملكك  لازم تخطي النار الاول

حبيبه: وجننتك ليه؟  

ايمن: معني البنت الجميله الصغيره في الحلم دنيا حلوه فمعرفتش هو انا لازم اتجوز العاميه علشان اوصل للجميله وبكده ابقي عديت النار؟؟؟  ولا الشيطان بيوسوسلي بدنيا جميله لما ارفض العاميه والبس انا بقي في النار؟؟ 

حبيبه: وايه اللي خلاك توافق؟؟؟ 

ايمن: قررت اعمل الصح حتي لو علي حساب دنيتي 

حبيبه: كويس انك عملت الصح 

ايمن: اه صح شعرك في حلمي كان طويل؟؟؟ 

حبيبه: انت بتحب ايه؟  

ايمن: تاج المراه شعرها فبحب الطويل بس اعتقد في حالتك انتي مش هيفرق كتير طويل او قصير 

حبيبه سابت ايده وفكت شعرها وفردته  واتفاجئ ايمن بشعرها الطويل الناعم 

ايمن: يعني مش هتفاجئ تاني... اعتقد بعد النهارده مفيش اي شيئ في الدنيا ممكن يفاجئني 

حبيبه: ايه ده؟  بابا نسيته زمانه هيتجنن؟؟ 

ايمن: امي ثواني نسيتها  

فتح باب اوضته وفضل ينادي علي امه 

ايمن: يا ماما يا فاطمه يا بطه تعالي 

فاطمه خرجت: وبعدين في ليلتك دي؟  قولتلك تعامل معاها وما تناديش عليا كل شويه عايزه انام

ايمن: هيا دي الامهات تبيع وش كده؟  المهم تعالي عندي ليكي مفاجاة 

ايمن اخدها ودخلها لمراته 

فاطمه: خساره يا ايمن تبقي بالحلاوه دي وتبقي عاميه يا حبيبتي...  ياللا اهوه ما تزهقش كل ما تبصلها 

ايمن: حبيبه مش عاميه يا امي 

فاطمه: خرسه بس وطرشه؟؟؟ 

ايمن: ولا خرسه ولا طرشه ابوها بيهزر بس هزار بوابين حبتين 

فاطمه: بجد طيب قولي حاجه كده؟  

حبيبه: حاجه 

ايمن: شوفتي بنت ابوها اهي في هزارها 

حبيبه ضحكت: انا اسفه...  اسفه يا ست الكل 

قربت وباست حماتها اللي الفرحه مكنتش سايعاها 

فاطمه: كنت عارفه وواثقه في حكم ربنا...  كان قلبي مطمن علي ابني ربنا يسعدكم ويهنيكم ويرزقكم بالفرحه ديما ويرزقكم ذريه صالحه 

ايمن وحبيبه: اللهم امين 

فاطمه: بصي بقي يا حبيبتي انتي النهارده تنامي في حضني اصل ايمن من اول الليل كان عايزني اخدك فتعالي بقي نامي في حضني 

شداها من ايدها وخارجه فايمن جري ومسك حبيبه واخدها من امه 

ايمن: ايه ايه دلوقتي احلوت!!؟  من دقيقتين بس تعامل يا حبيبي نسيتي؟؟؟  سيبيني بقي اتعامل وروحي نامي مش برضه كنتي عايزه تنامي؟؟  تصبحي علي خير يا امي يالا؟؟  قال تعالي في حضني قال؟؟؟  طريقك ابيض يا اما 

فاطمه: علي اخر الزمن تقولي أما؟؟ انا أما؟؟  

ايمن: اه أما....  يالا بقي سهرتي النهارده 

فاطمه: وزعني بقي طيب هنام هنا الليلادي وريني بقي هتطلعني ازاي!؟؟  ابن امك طلعني 

ايمن: يا قمر انتي تنامي في الحته اللي تشاوري عليها 

حبيبه يالا بينا نبات في اي فندق البسي يا قمر يالا 

فاطمه: لا وعلي ايه؟  الطيب احسن يالا اعمل خير وارميه البحر تصبحوا علي خير 

ايمن: اعتبريني زي ابنك برضه 

هيا خارجه وايمن وراها واول ما وصلت للباب بصت لابنها ودمعه لمعت في عنينها 

فاطمه: مبروك يا حبيبي ربنا يسعدك يارب 

اخدته في حضنها وهو ضمها قوي 

ايمن: بركه دعاكي يا ست الكل 

حبيبه بتابعه وكل لحظه بتعشقه اكتر واكتر 

امه خرجت وقفل الباب وبصلها وابتسم وهيا بصت للارض قرب منها ورفع راسها

ايمن: مش عايزك تبصي للارض وتهربي من عنيا 

حبيبه بصتله بس برضه مش عارفه تثبت عنيها في عنيه ومحرجه جدا 

حبيبه: عايزه اكلم بابا يا ايمن لو سمحت زمانه علي نار 

ايمن :ولو قلتلك لأ مش عايزك تكلميه وسيبيه علي نار؟؟

حبيبه: هقولك حاضر بس ارجوك مش اول طلب تطلبه مني اكسر بخاطر ابويا وازعله...  انت نفسك اول حاجه عملتها فرحت والدتك سيبني انا كمان افرحهم 

ايمن: مع اني كنت ناوي اسيبه شهر علي نار بس علشان خاطرك انتي...  كلميه 

ايمن عطاها تليفونه وهيا كلمت باباها و طمنته عليها 

ايمن: ارتحتي خلاص؟؟ 

حبيبه: ربنا يخليك ليا 

ايمن: دلوقتي انا عايز اغير هدومي واعتقد انتي كمان تحبي تدخلي الحمام ولا تغيري هنا ولا ايه؟  اللي يريحك ولا اسيبلك الاوضه خالص ايه اللي يناسبك؟ 

حبيبه: شوف اللي يريحك انت 

ايمن: سيبك من اللي يريحني خالص دلوقتي لان اللي يريحني مش هيناسبك حاليا...  بصي انا هغير هدومي بره في الحمام الخارجي وانتي خدي راحتك بس ربع ساعه اقصاكي فاهمه 

ايمن خرج وراح المطبخ لانه اكتشف انه جعان جدا 

لقي صينيه متغطيه كشفها ولقي عليها ما لذ وطاب 

والاكل محطوط في علب حافظه للسخونه 

شويه وخبط علي مراته وفتحتله 

كانت لابسه روب ابيض طويل ووشها نقي وصافي جدا من غير ميك اب 

ايمن: انتي احلي كتير علي فكره من غير ميك اب 

حبيبه: علشان كان اوفر بس شويه 

ايمن: المهم صليتي العشا ولا مع زحمه اليوم نسيتيها 

حبيبه: لا منستهاش يدوب اتوضيت وكنت هصلي اهوه 

ايمن: طيب صلي الاول 

حبيبه لبست اسدال الصلاه بتاعها اللي خلاها زي الملاك في عنين جوزها 

حبيبه: القبله ازاي؟  

ايمن: السجاده مفروشه في الكورنر اهي 

حبيبه: هصلي قدامك؟؟ 

ايمن: علي ما اعتقد اني جوزك يعني ينفع تصلي قدامي صلي العشا والسنه والشفع واستني علي الوتر

حبيبه صلت وايمن بيراقبها واكتشف ان قلبه بيتحرك لحبيبه وانها هتبقي فعلا حبيبه قلبه 

حبيبه: خلصت 

كانت هاديه ورقيقه وجميله 

ايمن قام من مكانه وراح لها ومد ايده لها وقفها 

ايمن: نصلي مع بعض؟؟؟ 

حبيبه ابتسمت: يا ريت 

صلي ايمن بيها وحبيبه اتفاجئت بجمال صوته في القرآن واستمتعت بكل ايه بيقراها واتمنت لو يفضلوا الليل كله يصلوا 

خلص ايمن وبصلها وحط ايده علي راسها وقال الدعاء

بسم الله اللَّهُمَّ إِنِّي أَسْأَلُكَ خَيْرَهَا وَخَيْرَ مَا جَبَلْتَهَا عَلَيْهِ ، وَأَعُوذُ بِكَ مِنْ شَرِّهَا وَمِنْ شَرِّ مَا جَبَلْتَهَا عَلَيْهِ

اللهم بارك لي في أهلي وبارك لهم فيَّ، اللهم اجمع بيننا ما جمعت بخير، وفرق بيننا إذا فرقت إلى خير

حبيبه: اللهم امين 

ايمن: صلي بقي الوتر 

قاموا الاتنين وصلو الوتر وقعدوا مكانهم 

حبيبه كانت متوتره وايمن حاسس بتوترها ده 

قعد قصادها ومسك ايديها 

ايمن: نتكلم بقي كلمتين مهمين...  شوفي يا ستي انا عارف ان ظروف جوازنا كانت غريبه شويتين...  بس ربنا اراد انه يجمع بينا في الاخر...  انتي مراتي حاليا وانا جوزك بس احنا الاتنين اغراب عن بعض...  انتي متعرفنيش وانا معرفكيش 

حبيبه: انت عايز تقول ايه يا ايمن؟؟؟ 

ايمن: عايز اقولك ان انا واحد معندوش استعداد ينام مع واحده عارفها من نص ساعه....  او بمعني تاني توترك وقلقك وخوفك دول ملهمش اي لازمه...  انا عارف اني راجل غريب بالنسبالك وده موترك 

وصراحه موترني انا كمان...  انا معرفش عنك اي حاجه نهائي كل اللي اعرفه اسمك وبس... محتاج اعرفك...  اعرف بتحبي ايه؟؟ بتكرهي ايه؟؟  بتدرسي ايه مثلا؟؟  ميولك؟؟ طموحك؟؟ عايز اعرف كل حاجه عنك؟؟  واعتقد ان انتي كمان زيي صح ولا غلطان؟؟ 

حبيبه: لا صح...  يعني انت بتقترح ايه؟  

ايمن  مسك ايدها الشمال وقلعها دبلتها وهيا اتفاجئت بده 

حبيبه: ليه بتقلعهالي؟؟ 

ايمن: اولا لان مش انا اللي لبستهالك 

حبيبه ابتسمت: وثانيا؟؟ 

ايمن مسك ايدها اليمين وبيلبسها الدبله 

ايمن: ثانيا والاهم انك هتبقي خطيبتي الاول فتره صغيره وحطي مليون خط تحت كلمه صغيره دي؟ ؟  

ولما نحس ان احنا عرفنا بعض واتعودنا علي بعض شويه نبقي ننقل الدبله للشمال؟؟؟  يناسبك الاتفاق ده ولا ( بص للسرير) 

حبيبه لفت وشه ليها بعيد عن السرير 

حبيبه: يناسيبني جدا 

ضحكوا الاتنين 

ايمن: طيب في المطبخ صينيه عليها اكل انما ايه؟  وانا واقع ميت من الجوع ايه رايك؟  

حبيبه: بجد هناكل؟؟  انا تخطيت مرحله الجوع انا وصلت لمرحله ملهاش اسم 

ايمن: طيب جميل غيري هدومك بقي والبسي براحتك فستان بجامه بنطلون اللي يناسبك وبلاش قمصان نوم طويله كده اولا لانها خنقه 

حبيبه: وثانيا؟؟ 

ايمن: ثانيا هنأجلها شويه لحد ما ننقل الدبله بس...  بس يا حلوه ساعتها لو هتلبسي حاجه ينفع تصلي بيها زي كده مش هيحصلك كويس...  انا سايبك اهوه براحتك وحاولي تتعودي عليا وتكسري كسوفك شويه شويه..  حصليني بقي لانك لو اتأخرتي مش هقولك ايه اللي هيحصل بس هتباتي للصبح جعانه 

حبيبه: ثانيه وهحصلك 

وصل للباب ويدوب هيقفله 

حبيبه: ايمن 

ايمن بصلها 

حبيبه: متشكره قوي 

ايمن: علي ايه؟  

ابتسملها وقفل الباب وحصلته بسرعه وكانت لابسه فستان قصير بحمالات عريضه بينك تحفه عليها وحطت فيونكه في شعرها 

ايمن: اممم اعتقد بشكلك ده ما اوعديكيش...  انتي كده بتكشكشي الفتره الصغيره قوي اللي اتفقنا عليها 

حبيبه: هو انت مش قولت احط مليون خط تحت فتره صغيره؟؟؟  بحاول استعد 

قعدت واتعشوا مع بعض وفضلوا يرغوا ويهزروا ويضحكوا 

ايمن: سؤال محيرني 

حبيبه: قول يا حبيبي 

ايمن: قول يا ايه؟  

حبيبه ابتسمت وبصتله وسندت وشها علي ايديها وبصتله بتأكيد واتكلمت 

حبيبه: ح بي بي....  انت حبيبي 

ايمن: من امتي حبيبك؟؟ 

حبيبه: من يوم ما قدمتلك النسكافيه وشوفتك 

ايمن: انتي اللي قدمتيلي النسكافيه؟؟؟  ومين اللي عمله؟؟ 

حبيبه: انا عملتهولك عجبك؟  

ايمن: جدا...  وابوكي وافق انك تشوفيني؟؟ 

حبيبه: ابويا ساعتها قالي ادخل لو حسيت انك عاجبني يكمل خطته ولو ما ارتحتلكش يسامحك ويمشيك 

ايمن: يعني اقول الحمد لله انك ارتحتيلي 

طيب يوم ما كنت رايح علشان اقول لابوكي اني موافق وكنت بره ساعتها 

حبيبه كملت: خبطت فيا انا!!!  خبطتني انا وجننتني ساعتها انا 

ايمن: جننتك ليه؟  

حبيبه: كنت بدعي ربنا طول التلات ايام دول انك توافق وان يكونلي نصيب معاك...  كنت بعشق ريحه برفانك وعلشان كده رفضت اي حد يلمس المج اللي انت شربت فيه 

ايمن: شربت النسكافيه فيه؟  ليه؟ 

حبيبه: كانت  ريحته برفانك ولما خبطت فيك شمتها  فيك انت وده كان فوق توقعاتي..  اني اكون ولو لحظات في حضنك 

ايمن: يعني انا عايز اقولك معلومه صغيره...  انا حاطط نفس البرفان ده دلوقتي وملك ايدك كلي علي بعضي مش مج ولا لحظه..  انا كلي ملكك 

مسك ايدها وهيا كالعاده بتتحرج وتبص في الارض 

ايمن: يعني بحس انك بتتكلمي عادي بس اول ما المسك تبصي للارض في ايه؟  بصيلي انا 

قومي نخرج من المطبخ ده يالا 

شدها وخرجوا وطلعوا الصاله بره ايمن شدها وقربها منه وحط ايديه حواليها 

ايمن: مش كل ما اقرب منك تبصي للارض...  حاولي تتعودي عليا وتقربي مني...  حاولي 

حطت راسها علي صدره وهو ضمها براحه 

ايمن: طبعا سيادتك بتستغليني علشان تشمي البرفان؟؟ 

حبيبه: طبعا امال انت فاكر ايه؟ صح؟  ايه السؤال اللي محيرك؟؟

ايمن: اه صح نسيتيني...  ليه ابوكي قالي كده وجاب الفكره المجنونه دي منين؟  

حبيبه:  عجبته لما شاف انك خايف من ربنا وبتراعيه وعجبه اخلاقك واصرارك وساعتها لما قالي انه عايز يطلبك ليا وانا استغربت فقالي انك لو وافقت علي شروطه دي هتحطني جوه عنيك العمر كله...  وقالي اللي بيخاف ربنا هيخاف ربنا فيكي وهيراعيكي 

اما بقي الفكره دي جاتله منين؟؟؟  

ده نفس اللي حصل مع ابو الامام حنيفه لما..... 

قاطعها ايمن بانه ضرب علي دماغه 

ايمن: لما كان مسكين وفقير واكل التفاحه وصاحب البستان رفض يسامحه...  فعلا طلب منه يتجوز  بنته وقاله انها عاميه وخرسه وطرشه 

تصدقي مجتش في بالي نهائي...  بس ابوكي متخيل ان انا زي ابو الامام حنيفه؟ ؟  ايوه انا بخاف ربنا بس عمري ما هوصل لربع الناس دي نهائي 

حبيبه: احنا بنعتبر الناس دي قدوه لينا وبنتعلم منهم 

الفجر اذن عليهم وهما بيرغوا 

حبيبه: هنقوم نصلي الفجر مع بعض؟؟ 

كانت متحمسه تسمعه تاني بيقرا القرآن 

ايمن: هتقومي؟!  انا هنزل اصلي في الجامع اوك 

حبيبه: اه ماشي براحتك 

ايمن: ومالك متضايقه ليه؟ علشان هسيبك وانزل الجامع؟!  

حبيبه: لا لا طبعا  مش كده بس كان نفسي اسمعك بتقرا قران تاني 

ايمن: بس كده؟؟  هقرالك براحتك مع ان صوتي مش حلو عادي يعني بس عيزاني اقرالك براحتك في اي وقت انتي بس تشاوري 

حبيبه: اول ما ترجع نقري للشروق

ايمن: علي فكره الليلادي المفروض يعني ده المفروض ليله دخلتنا مش ليله تعبد ونحيي الليله للشروق 

حبيبه: تتكتبلنا عمره 

ايمن: يا ستي نبقي نروح نعمل عمره المهم اقوم اصلي ولما ارجع 

راح صلي ورجع لقي مامته ومراته مع بعض قاعدين علي سجاده الصلاه 

سلم عليهم وقعد معاهم وامه بهدوء انسحبت 

حبيبه: هتقرالي؟؟ 

ايمن: ااااه عايز انام....  انا من يوم ما عرفت ابوكي ما نمتش...  

حبيبه: علشان خاطري ده اول طلب اطلبه منك 

ايمن: امال لما طلبتي من شويه تكلمي ابوكي كان ايه رقم زيرو ولا ايه؟  ما علينا مش هزعلك سوره واحده 

حبيبه: انا اختار السوره...  سوره البقره 

ايمن فضل يبصلها: سوره الكوثر...  بعد البقره دي اخرك الكوثر 

حبيبه: لا خلاص خلاص مش هبقي طماعه...  سوره الملك والدخان زياده لو بتحبني؟ 

ايمن: ماشي تعالي جوه علشان ما نضايقش ماما بصوتنا 

ايمن قعد معاها وقرالها السورتين وهيا فرحانه لان جوزها فتي احلامها 

ايمن: هقولك بقي تصبحي علي خير لاني خلاص مش شايف قدامي 

قام ومشي خطوتين وبصلها: علي فكره كنت هوافق علي البقره 

حبيبه ابتسمت : وانا كنت هرضي بالكوثر 

ايمن: تصبحي علي خير 

حبيبه: وانت من اهل الخير..  بس هو انت رايح فين؟  

ايمن: هسيبك تنامي براحتك 

حبيبه اتضايقت بس: اه طيب 

ايمن مشي وسابها وراح اوضه تانيه واول ما لمس السرير النوم جافاه وندم انه خرج من اوضته واستغبي نفسه جدا وفضل يتقلب يمين وشمال ومستغرب كان وهو معاها هيموت وينام راح فين النوم؟؟؟ 

حبيبه كان نفسها تفضل في .  ايوه عايزه فتره تتعود عليه بس برضه كانت عايزه تنام في حضنه 

وفجأه و هيا سرحانه وغرقانه في احلامها لقت..... 

حب مشروع 

الحلقة الرابعة 

حبيبه كان نفسها تفضل في حضنه...  ايوه عايزه فتره تتعود عليه بس برضه كانت عايزه تنام في حضنه 

وفجأه و هيا سرحانه وغرقانه في احلامها لقت..... 

لقت الباب بيخبط خبطه خفيفه 

حبيبه: ادخل 

الباب اتفتح وايمن دخل وبعد ما كان مجهز هيقول ايه نسي الكلام اللي هيقوله ومعرفش يقول ايه؟  

ايمن: في تكييف في الاوضه لو حاسه ان الجو حر ممكن تشغليه وده الرمود 

بص لحد ما جاب الرمود وعطاهولها 

حبيبه: اه تسلم فعلا الجو بدأ يبقي حر 

بيدور علي حاجه تانيه يقولها 

ايمن: طيب محتاجه اي حاجه؟  

حبيبه: سلامتك 

ايمن: لو احتجتي انا في الاوضه اللي جنبك تمام 

حبيبه: تمام 

رجع خطوتين لورا بضهره وصل للباب ويدوب هيخرج

ايمن: بصراحه انا بعد ما وصلت للسرير النوم اتبخر 

حبيبه: وانا زيك 

ايمن: طيب وبعدين؟  

حبيبه: براحتك 

ايمن: انا عايز انام ومش جايلي نوم هناك 

حبيبه ابتسمت: هيجلك نوم هنا؟  

ايمن: انتي رأيك ايه؟؟ 

حبيبه: انت قلت هنفضل فتره مخطوبين 

ايمن: وانا مازلت عند كلمتي بس الفتره دي علشان نتعود علي بعض واعتقد لو كل واحد فضل في اوضه مش هنتعود علي بعض 

حبيبه: دي وجهه نظر برضه...  يعني احنا هنام مع بعض في اوضه واحده وسرير واحد بس مش هنام مع بعض؟  انا فاهمه كده صح؟  علشان تبقي الامور واضحه 

ايمن: بالظبط كده.....  بس لو في اي وقت حبيتي ننهي الخطوبه دي والطبيعه تاخد مجراها ده مش وحش برضه علشان برضه الامور تبقي واضحه 

حبيبه: قصدك ايه بقي؟ ؟  

ايمن: قصدي يا حبيبه ان مفيش اي حاجه هتم غصب عنك او وانتي مش مستعدالها او انتي مش عيزاها..  اللي انا وانتي نرتاحله وعايزينه هيتم 

هاه عندك اي مخاوف تانيه؟  

حبيبه: لا 

ايمن: اجي؟  ولا مش مرتاحه للخطوه دي؟  

جاوبت بانها حركت نفسها من نص السرير ورفعت الغطا فايمن راح جنبها وقعد 

ناموا الاتنين وكل واحد وشه للسقف ومتحنط 

حبيبه راحت للحرف وعطته ضهرها 

حبيبه: تصبح علي خير 

ايمن ما ردش عليها بس باصص ناحيتها 

 حبيبه بعدها بفتره.: انت نمت؟  

ايمن: لا لسه 

لفت وشها ليه وبقوا الاتنين جنب بعض وشهم لوش بعض 

حبيبه:   خلينا كده قريبين من بعض بس ينفع؟  

ايمن: ينفع 

وشويه والاتنين نامو وغرقوا في النوم 

# ايمن ايمن حبيبي 

ايمن: ايه خير؟  امي في ايه؟  

فاطمه: خير حبيبي بس العصر هيأذن خلال دقايق وما اعتقدش انك صليت الظهر فقلت اقولك وانت براحتك بقي لو تبقي تصليه قضاء 

ايمن: لا قضاء ايه هقوم تسلمي يا ست الكل 

فاطمه: ومراتك اللي في حضنك دي هتصحيها؟؟ 

ايمن بص لقي فعلا حبيبه مستخبيه في حضنه ونايمه علي صدره فابتسم 

ايمن: اه هصحيها تصلي 

فاطمه: اجهزلكم غدا ولا هتكملوا نوم 

ايمن: ما تتعبيش انتي نفسك 

فاطمه: لا يا حبيبي انا اصلا عملتلكم غدا يستاهل احلي عرسان وام حبيبه برضه باعته غدا 

ايمن: طيب تسلموا سيبينا نتعامل بقي 

انسحبت وهو مستمتع بحبيبه في حضنه بس لازم يلحق الظهر 

حبيبه: بيبه...  حبيبه 

حبيبه: امممم ايه 

حبيبه بتتقلب وهو باصصلها ومش مصدق اصلا انها مراته...  شال شعرها من علي وشها برقه وبيمتع عنيه بجمالها ولقه نفسه بيقرب لخدها ويحس بنعومته 

وباسها جنب شفايفها 

ابتسمت وفتحت عنيها 

حبيبه: صباح الخير 

ايمن: صباح الخير لاجمل عروسه في الدنيا 

حبيبه: هو الوقت ايه دلوقتي 

ايمن: الوقت يدوب نلحق الظهر 

حبيبه: طيب نلحقه بسرعه 

قاموا وصلوا ونزل العصر في الجامع ورجع اتغدوا وجاله تليفون عايزينه في شغله 

حبيبه: انت بجد هتروح شغلك؟  

ايمن: امم هروح انا مش واخد اجازه والنهارده ما رحتش 

حبيبه: هو في عريس ما ياخدش اجازه؟؟؟ ماليش دعوه انت لازم تاخد اجازه ولو حتي بسيطه 

ايمن: عيوني انتي بس تشاوري....  بس مفيش عريس بياخد اجازه لعروسه بالمواصفات اللي انا اتجوزتها 

حبيبه: ودلوقتي؟؟ 

ايمن: هاخد اجازه هحاول ارتبلها بس مش الافضل الاجازه لما ننهي الخطوبه ولا ايه؟  حتي نسافر انا وانتي كام يوم ايه الرأي؟؟ 

حبيبه: ماشي ده الصح بس برضه عايزه اقعد معاك كتير 

ايمن قرب منها ومسك ايديها: مش هتأخر اوك هرجع علي طول 

ايمن نزل وفضل 3 ساعات بره ورجع 

عدي حوالي اسبوع بيقربوا فيه من بعض بيضحكوا يهزروا يروح شغله ويكلمها ويخرجوا يتمشوا 

حبيبه: النهارده الخميس واحنا اتجوزنا الخميس 

ايمن: عدي علينا اسبوع بحاله عدي بسرعه قوي 

حبيبه: اهممم فعلا 

ايمن: تحبي نعمل ايه الليله؟؟ 

حبيبه: ايه رأيك نعمل فشار وكوبيتين نسكافيه ونسهر قدام التلفزيون 

ايمن: انا اؤيد بشده 

قامت عملت الفشار والنسكافيه وطلعوا قعدوا قدام التلفزيون 

حبيبه: هقول لمامتك تيجي تسهر معانا؟  

ايمن: قوليلها 

راحت قالت لمامته بس رفضت وقالتلها انها عايزه تنام بدري علشان تصحي الفجر 

فاطمه عارفه بالاتفاق اللي بينهم وكل يوم تدعي انهم ينقلوا الدبل 

ايمن: تتفرجي علي ايه؟  

حبيبه: شوفلنا فيلم اكشن 

ايمن بصلها باستغراب 

حبيبه: بتبصلي كده ليه؟  

ايمن: ما تخيلتش ابدا انك هتقولي كده...  انتي النهارده بتفاجئيني 

حبيبه: ههههههه ازاي؟  

ايمن: في الاول اتخيلت انك هتقولي نقيم الليل وتقرالي قرآن ولقيتك بتقولي لا نسهر مع بعض فرحت انا بقي.... بعدها تقوليلي فيلم اكشن الطم ولا اجيب لطامه 

حبيبه: ههههههه طيب هات اللي تحب تتفرج عليه 

ايمن: لا يا ستي انا نادرا اصلا ما بقعد قدام التليفزيون بصي احنا نختار رقم واللي يطلع نتفرج عليه احنا وحظنا بقي 

حبيبه: ولو طلع مثلا متش كوره او حاجه بايخه 

ايمن: يبقي حظك كده نقلب كل ربع ساعه لو حاجه مش عيزينها 

حبيبه: اتفقنا...  انا اختار الاول 

ايمن: اختاري 

اختارت رقم صغير  وايمن جابه وكانت قناه ناشونال جيوغرفيرابو ظبي 

حبيبه: انا بحب القناه دي بتجيب حاجات حلوه 

لقوا برنامج عن الحيوانات شغال فيها وكان بيتكلم عن التزاوج في الحيوانات 

الاتنين تنحوا وفجأه ايمن انفجر في الضحك وحبيبه معاه 

حبيبه: ابوس ايدك اقلب 

ايمن: مش انتي اخترتي وبتحبي القناه اتفرجي 

شويه وايمن: اختاري رقم تاني 

اختارت رقم كبير 

ايمن: الف كام؟؟  هو في الف قناه اصلا ما علينا نجرب 

ايمن جاب القناه وطلعت قناه التت 

ايمن: ههههه ما شاء الله اختياراتك ايه؟  

حبيبه: طيب اقلب 

قامت وقفت قدام وشه

ايمن: انتي بتخلي بشروط اتفاقنا 

حبيبه: ماهو انا مش هسيبك تتفرج علي واحده شبه عريانه وبتتمايص كده 

ايمن: طيب ما تتمايصيلي انتي وانا اتفرج عليكي انتي ايه رايك؟  

حبيبه: لأ ماليش في المياصه 

ايمن: يبقي اقعدي علي جنب ومالكيش دعوه 

حبيبه قعدت وكشرت وهو قلب القناه 

حبيبه: متشكره 

كان فيلم عربي قديم وكان بتاع عبدالحليم ابي فوق الشجره 

كانت اغنيه شغاله لعبد الحليم وناديه لطفي وكل لقطه ببوسه 

ايمن: هيا ليله باينه من اولها ذنوب ذنوب ذنوب 

امسكي يا بنتي انتي الرمود واختاري 

حبيبه قلبت ولقوا فيلم اجنبي ولقطه فيها اكشن 

ايمن: اهو فيلم اكشن اهو 

كان لقطه مطارده عربيات كان فيلم 

Mission impossible 2 

واحد بيطارد واحده والمطارده كانت حلوه 

ايمن: اعتقد انه بيهزر معاها مش بيطاردها بجد 

حبيبه: شكلهم فعلا  بيحبوا بعض ومتخانقين مثلا

اصلا الواد ده افلامه حلوه كلها هو اصلا مز 

ايمن: افندم؟  مز؟  توم كروز مز؟؟  ده اوزعه...  وبعدين لما واحده تبقي قاعده مع جوزها وتشاور علي راجل تقول عليه مز المفروض يعمل ايه؟  

حبيبه: هههههه يجري ورايا زي دول شوفت بيجري وراها بالعربيه ازاي وهيا ولا معبراه

 ايمن: امم ماشي اتفرجي 

فجاه العربيه بتاعت البنت لفت حوالين نفسها وهو حاول يوفقها فحط عربيته جنبها والعربيتين لفوا مع بعض 

ايمن: اهو هتموت اهو بغبائها وهتموته معاها 

حبيبه: ده البطل مش هيموت 

العربيه وقفت علي حرف جبل والبنت بابها اتفتح ووقعت وماسكه في الباب وهو جري ولحقها وشالها 

وفجأه المشهد اتقلب رومانسي جدا  

المشهد كان كفيل انه يسحب كل الاكسجين من الاوضه ويعمل شرارات في الجو ويخلي الاوضه تبقي زي خرم الابره 

ايمن: اعتقد نطفي التلفزيون؟؟ 

حبيبه: يا ريت 

ايمن: ما تيجي ننام بدري 

حبيبه: اه يالا 

راحو اوضتهم بس الشحنات اتنقلت معاهم والانفاس بقت عاليه ومسموعه...  

ايمن: بعيده عني ليه النهارده؟  ما تقربي 

حبيبه قربت منه شويه صغيرين 

ايمن: مالك؟  

حبيبه: ماليش 

شويه وحبيبه قايمه 

ايمن قام وراها و  مسكها من ايديها وشدها ليه وسند راسه علي راسها 

ايمن: رايحه فين؟  

حبيبه: هشوف ماما عايزه حاجه ولا لأ؟  

ايمن: شوفيني انا الاول عايز حاجه ولا لأ؟  

حبيبه: انت عايز ايه؟  

الكلام كله كان همس بتتخلله نظرات مشتاقه 

ايمن: عايز ده 

قرب منها قوي 

بعد فتره طويله 

ايمن: بحبك 

حبيبه : اخيرا قولتها 

ايمن: كل حاجه في وقتها حلوه 

حبيبه رفعت ايدها اليمين لايمن 

ايمن: امم ننقلها الشمال 

خلعها دبلتها ولبسهالها في الشمال وباس ايدها 

حبيبه اتعدلت 

حبيبه: هتروح شغلك بكره؟ 

ايمن: بكره الجمعه اجازتي 

حبيبه: وبعده؟؟؟ 

ايمن: هروح 

حبيبه ضربته وعطته ظهرها هو اتعدل وراها واخدها في حضنه 

ايمن: هروح علشان ابلغ اني اجازه ما تبقيش عبدو السخن كده اهدي عليا 

حبيبه اتلفت ليه: هتاخد اجازه قد ايه؟  

ايمن: علي قد ما اقدر ماشي 

شويه وامه خبطت عليه تناديله وايمن قام وخرجلها

ايمن: خير يا ست الكل في حاجه؟  

فاطمه: هو انا قاطعت حاجه اصلك طولت علي ما خرجت؟؟  يعني اسفه مش اقصد

ايمن: اسفه ايه؟  عادي ما تشغليش بالك بس كنتي عايزه حاجه؟  

فاطمه:  لا ابدا كنت هصحيك زي كل يوم للفجر وعارفه انكم بتبقوا نايمين فبدخل اصحيك براحه    

 المهم ايه الاخبار انا  قاطعت حاجه ولا متهيالي

ايمن: هههههه هسيبك بفضولك ده وادخل اجهز للفجر 

فاطمه: ماشي يا ايمن ادخل 

سابها واتحرك كام خطوه وهيا رايحه اوضتها فرجع وراها وضمها وهيا مدياله ضهرها وباسها علي راسها 

ايمن: انتي ما قاطعتيش حاجه يا ست الكل...  

فاطمه: يعني هيا بقت مراتك ولا لسه؟  

ايمن: بقت مراتي خلاص 

فاطمه: الف مبروك يا حبيبي  

ايمن: تقدري تقولي كده اني اسعد راجل في الدنيا كلها 

ايمن بيتكلم وامه في حضنه وهيا حاضنه ايديه 

فاطمه: ربنا يسعدك يا حبيبي ويفرح قلبك علي طول طيب يدوب تلحق تاخد شاور وتنزل الفجر 

ايمن: طيب عايزه اي حاجه؟  

فاطمه: سلامه قلبك يا حبيبي 

يدوب هيمشي 

فاطمه: ايمن حبيبي 

ايمن: اؤمريني يا ست الكل 

فاطمه: الامر لله حبيبي بس عيزاك تاخد مراتك وتسافر يومين كده تبقوا براحتكم او لو مفيش اجازه عندك تروحو فندق مثلا او انا اروح 

ايمن: حيلك حيلك شويه انتي مش هتخرجي من بيتك واحنا واخدين راحتنا ما تشيليش همنا 

فاطمه: بس يا حبيبي اول كام يوم بيبقي ليهم متعتهم ومش عايزين حد فيهم 

ايمن: ما تشغليش بالك بكره الجمعه وبعدها هاخد اجازه ونسافر 

ايمن اخد مراته وسافر وقضي احلي شهر عسل ورجعوا وكل يوم بيقربوا من بعض اكتر واكتر وبيعرفوا بعض اكتر واتعلقوا ببعض اكتر 

ايمن كمان بيروح مع حبيبه تزور اهلها والكل بيعتبروه اخوهم وبيرتاحولو في الكلام وما بيلبسوش نقاب قدامه وهو كان مستغرب من النقطه دي 

ايمن: هو انتو ليه مش بتلبسوا نقاب قدامي مع انكم كلكم منتقبات؟؟؟ 

سميه: احنا بنلبسه قدام الغريب بس لكن العيله لأ

ايمن: اول مره اسمع المنطق ده 

ساره: احنا مش منتقبات قوي احنا متدينات عارفين دينا وبنلبس النقاب قدام الغريب او في الشارع لكن اهلنا اللي متربين في وسطهم هنلبسه ليه اغلبهم يعتبروا محارم اصلا وانت جوز اختنا وبقيت اخونا وحاليا ما تحلش لاي واحده فينا طول ما هيا مراتك

ايمن: امم 

حبيبه: مالك بتقولها كده وكأنك مش مقتنع 

ايمن: عادي وجهه نظر تحترم 

حبيبه: هو انت من رأيك النقاب فرض ولا سنه؟؟؟ 

ايمن: انتي ايه رأيك؟؟ 

حبيبه: هو مش فرض طبعا 

ايمن: اعتقد انه فرض في حاله 

حبيبه قاطعته: واحده جميله لدرجه يخشي منها الفتنه 

ايمن:يعني بالنسبالك فرض

حبيبه: ليه بقي ان شاءالله؟  

ايمن: انتي ما بتبصيش في مرايه ولا ايه؟  ايه؟؟؟ 

كلهم ضحكوا 

حبيبه: يعني انت شايفني جميله لدرجه الفتنه؟؟ 

ايمن: والله انا اول واحد اتفتنت واعتقد ابوكي اكتر واحد هيوافقني ولا ايه يا عم سعيد؟؟ 

عم سعيد: عادي يعني؟  

ايمن: عادي؟؟؟  ده لولا انك واثق انها هتفتن مكنتش دخلت فيا بقلب جامد يا عم سعيد 

عم سعيد: انت لسه فاكر؟؟ 

ايمن: لسه فاكر يا راجل ده انا كنت بقف زي الشحاتين قدام الباب واقولك لله باليوم وانت ولا الهوا ولا في بالك اصلا 

عم سعيد: ندمان؟؟؟  لو ندمان رجع اللي اخدته من البيت هنا واحنا مسامحينك؟؟؟ 

ايمن: ارجع اللي اخدته؟؟؟  امممم 

حبيبه: انت بتفكر اخص عليك طيب روح بقي وحدك النهارده 

ايمن شدها وقعدها جنبه واخدها في حضنه 

ايمن: وعلي ايه الطيب احسن انتي عارفه ما بعرفش انام غير وانتي في حضني 

عم سعيد: ربنا يسعدكم..... صح يا بيبو هيا الكليه هتبدأ امتي ان شاءالله؟  

حبيبه: خلاص اسبوعين 

ايمن: اسبوعين بس كنت فاكر انها لسه شويه!!!!  طيب لو انا كنت قولتلك ما تكمليش كنتي هتعملي ايه؟  

حبيبه: شخصيتك ما تديش انك من المتعصبين ضد التعليم 

ايمن: ولو قولتلك؟؟ 

حبيبه: اعتقد يا ايمن ممكن اسيبك 

ايمن: بجد تسيبيني؟  

حبيبه: ماهو مش هتبقي انت دلوقتي هتبقي شخص سوري يعني متخلف حبتين ورجعي واغلب الصفات الكويسه فيك مش هتكون موجوده فساعتها اه هسيبك 

حبيبه رجعت كليتها واغلب اصحابها حسدوها علي جوزها اللي بيوديها ويرجعها 

وبالليل كتير يسهر جنبها وهيا بتذاكر 

فات كام شهر وفي يوم وايمن في الشغل حبيبه صاحيه تعبانه ومش متظبطه وفاطمه نزلت جابتلها اختبار حمل وحبيبه عملته واكتشفت انها حامل 

حبيبه: ماما يا ماما انا حامل 

فاطمه: الحمد لله الحمد لله الف حمد وشكر ليك يارب 

هتتصلي بايمن تقوليله؟؟ 

حبيبه :لا لما يجي هقوله هعملهاله مفاجأة...  ايه رايك ننزل انا وانتي نجيب تورتايه صغيره ونعمل غدا مميز 

فاطمه: طيب قوليلي عايزه ايه وانا اجيبهولك وانتي ارتاحي 

حبيبه: لا يا ست الكل تعالي ننزل مع بعض...  انتي بس قولي لايمن ان احنا نازلين نشتري حاجات ماشي؟  

فعلا نزلوا الاتنين يتمشوا شويه ويجهزوا لقعده مميزه 

فاطمه: مش هتقولي لمامتك؟؟؟ 

حبيبه: هقولها بس الاول ايمن يعرف بعد كده الباقي 

ماشيين هما الاتنين بيتمشوا وبيضحكوا وفجأه وقفت عربيه زي الميكروباص متفيمه كلها ونزل منها اربعه رجاله ومسكوا حبيبه...  فاطمه حوالت تشدها منهم وهيا بتصوت بس زقوها وقعوها واخدوا حبيبه وجريوا...  الناس اتلمت علي فاطمه اللي بتصوت بس بعد ايه؟  

جت تكلم ايمن بس شنطتها مع حبيبه فعيطت اكتر واكتر 

قامت مش عارفه تعمل ايه ايدها اللي وقعت عليها بتوجعها ورجلها اتخبطت فيها ومش عارفه تروح فين ولا تعمل ايه؟  

واحد واقف: احنا نطلب البوليس بسرعه 

فاطمه: ابني مقدم حد يوديني عنده في المديريه حد يوديني بسرعه 

واحد: طيب يا حجه اتصلي بيه وهو يجي 

فاطمه: موبيلي معاها ومش حافظه نمرته ياما قالي احفظيها وانا بطنش 

 كام واحد من اللي واقفين راحو معاها  لحد المديريه ودخلوا  معاها 

ايمن كان في اجتماع هو ومعظم زمايله...  امه راحتله مكتبه ملقتهوش سألت عسكري عليه قالها انه في اجتماع واترجته يوصلها صعبت عليه  فاخدها لايمن

خبط العسكري ودخل 

المدير: في ايه يا عسكري ايه اللي جابك هنا؟  

العسكري: في واحده ومعاها كام واحد عايزين المقدم ايمن 

ايمن رفع راسه وبصله 

ايمن: عايزيني انا بالاسم؟؟  خليهم يستنوا في مكتبي لما اخلص 

العسكري خرج وقالهم كده فاطمه زقته وغافلته ودخلت 

الكل وقف ويدوب المدير هيزعق ايمن قام وجري علي امه اللي اتخض من شكلها المتبهدل 

ايمن: في ايه يا امي حصل ايه؟  

المدير: والدتك 

فاطمه: مصيبه يا ايمن حبيبه 

ايمن قلبه هيقف: مالها حبيبه؟؟؟ 

امه بتعيط وهو ماسكها 

ايمن: ماما مالها حبيبه؟؟؟

فاطمه: اتخطفت 

ايمن مش مستوعب هيا مش عيله تتخطف 

ايمن: انتي بتقولي ايه؟  اتخطفت ازاي؟  

فاطمه: كنا مع بعض ومره واحده عربيه وقفت ونزل منها اربع رجاله متلتمين وشدوها مني ومشيوا الحقها يا ايمن بسرعه يا حبيبي ال ح ق ها

قالت جملتها دي ووقعت من طولها بين ايدين ابنها اللي حس مره واحده ان كل حاجه بتنهار ومش عارف يعمل ايه؟  يلحق امه ولا يلحق مراته؟؟؟؟ 

نكمل بكره 

ياتري ايه اللي هيحصل؟  

ايمن هيلحق مين الاول؟؟؟ 

حبيبه هيجرالها ايه؟  

ايمن هيلاقيها تاني ولا كانت حلم جميل وانتهي؟؟

حب مشروع 

الحلقة الخامسه

ايمن امه وقعت بين ايديه وهو واقف مش عارف يعمل ايه او يتصرف ازاي؟؟؟ 

ايمن: انا هاخدها المستشفي انتو مين؟  

الناس: احنا كنا موجودين ساعت الحادثه 

المدير: روح انت بوالدتك واحنا هنتصرف روح ما تقلقش 

ايمن اخد امه علي المستشفي وقابلوه واخدوها منه وهو واقف مستني حد من الدكاتره يطلع يطمنه 

عقله عاجز عن التفكير او انه يصدق انه لو روح مش هيلاقي حبيبه مستنياه 

اخيرا دكتور خرج لايمن 

ايمن: خير والدتي مالها؟  في ايه واغمي عليها ليه؟  

الدكتور: ايدها مكسوره ورجلها تقريبا مجزوعه وفي كدمات في جسمها فحضرتك المفروض تقولنا ايه السبب؟  

ايمن: انا معرفش كل اللي اعرفه انها جاتلي الشغل وقالتلي انها اتعرضت لحادثه خطفوا منها مراتي وهيا وقعوها محتاج افهم منها ايه اللي حصل؟  

الدكتور: هيا شويه بسيطه وهتفوق وتقدر تتكلم معاها واتمني ان مرات حضرتك ترجع بالسلامه 

هنا زمايله راحو له المستشفي 

ايمن: عرفتو ايه؟  وصلتو لحاجه؟؟ 

علي زميله: مش كتير عربيه كبيره رمادي متفيمه وقفت واخدوا مراتك فيها 

ايمن: طيب ليه؟  العربيه نمرها ايه؟  موديلها ايه؟  

علي: محدش ادانا معلومات كتيره الاغلبيه كانوا بعيد اعتقد ان والدتك ممكن تفيدنا اكتر هيا حالتها ايه؟  

ايمن: ايديها مكسوره ورجلها متصابه والله اعلم عملوا فيها ايه؟  ( ايمن حط ايديه علي راسه الاتنين) 

علي انا مراتي اتخطفت؟؟  مراتي معاهم؟؟  مراتي اتخطفت 

كأن ايمن بدا يستوعب ان مراته اتخطفت 

احمد زميله: ان شاءالله هنرجعها بس حاليا احنا محتاجين صوره لمراتك علشان نوزعها علي الكل ونبلغ كل الاقسام والدوريات ولازم نتحرك بسرعه 

علي: فعلا عايزين صوره ليها يا ايمن 

ايمن مش بيرد عليهم ازاي يدي صور لمراته ويوزعها لكل الناس....  ازاي؟  

مديره بنفسه جاله كمان 

المدير: انا بلغت كل الدوريات والاقسام الكل حاليا بيدور عليها بس لازم يبقوا عارفين بيدورا علي مين عايزين صوره لمراتك يا ايمن!!!!  ايمن؟!!!  ايمن

ايمن: هاه هاه 

المدير: عايزين صوره لمراتك ركز وفوق صوره مراتك 

ايمن: انتو عايزني اجيب صوره لمراتي واوزعها علي كل الرجاله والاقسام والدوريات؟؟؟  صوره مراتي المنقبه صح؟ ؟  

المدير: عندك استعداد تخسرها؟؟؟؟ 

ايمن: اخسرها؟؟؟  لا طبعا انا مش عايز اخسرها 

انا معنديش صور ليها معنديش 

احمد: افندم مش مصور مراتك ولا صوره علي تليفونك او في البيت ليه يعني؟  

ايمن: صور خاصه بينا ما ينفعش حد يشوفها؟؟؟  معنديش صور ينفع حد يشوفها 

احمد: ايمن اتصرف وبسرعه قبل ما اللي خطفوها يوصلوا لمكانهم ويستخبوا بيها اتصرف 

ايمن بيحاول يفكر يعمل ايه؟  طيب يطلع صوره لمراته بشعرها في حضنه؟؟؟  لا مش ينفع اخيرا افتكر 

ايمن: سميه 

احمد: سميه مين؟  

ايمن: سميه اختها كانت بتصورنا من كام يوم واحنا عندهم 

ايمن اتصل بسميه وكلمها 

ايمن: سميه ابعتيلي بسرعه كام صوره لحبيبه تكون واضحه فيها قوي ومحترمه ينفع حد يشوفها 

سميه: حد يشوفها؟؟؟  حد مين يا  ايمن؟؟؟ 

ايمن: سميه بسرعه وحياتك ابعتي علي الواتس او الماسنجر بسرعه 

سميه: في ايه يا ايمن فهمني الاول 

ايمن: حبيبه اتخطفت ومحتاج صور ليها نوزعها علي الظباط علشان يتعرفوا عليها فهمتي بسرعه بقي بالله عليكي 

سميه: حاضر ثواني هبعتهم واكلمك تاني 

سميه بعتتله كام صوره لحبيبه وهيا مع ايمن 

صوره وشهم جنب بعض واحلي ابتسامه علي وشها 

وصوره هو وراها وهيا سانده علي صدره وبتضحك 

ياااه قد ايه هو مفتقدها دلوقتي ومفتقد ابتسامتها دي اللي بيعشقها 

احمد: ايمن وبعدين؟  انجز الوقت محسوب علينا 

ايمن بتردد بيمد ايده يديله تليفونه وبعدها افتكر ان في صوره خاصه كتير 

ايمن: هبعتلك صورها واتس 

فعلا ايمن بعت لاحمد الصور وبعتهم لعلي 

احمد وعلي فتحوا الصور واتفاجؤا بمدي جمال مرات صاحبهم وبصوله 

احمد: ايمن انت عارف اننا هنوزع صور مراتك دي للكل...  ضباط وعساكر ومحققين وحتي الناس في الشوارع هنسأل الكل؟؟؟؟ 

ايمن الدموع لمعت في عنيه متخيلش ابدا ان مراته المنقبه هو بنفسه هيوزع صورها علي كل الرجاله 

بص للارض 

علي: اسف يا ايمن احنا عارفين ان الموضوع صعب عليك وخصوصا انها منقبه بس مضطرين وان شاءالله ترجعلك بسرعه 

ايمن: موبيلها وموبيل امي معاها انا ما جربتش اتصل 

ايمن اتصل بموبيل مراته بس لقاه مقفول واتصل بموبيل امه ورن جرس 

ايمن: بيرن بتاع ماما 

الخط اتفتح وسامع انفاس 

ايمن: الو حبيبه الو الو...  رد عليا الووو... انت خطفت مرات الراجل الغلط...  انا هقلب الدنيا عليك وهفتح ابواب جهنم كلها عليك....  سيب مراتي تمشي وانفد بجلدك وانا مش هدور عليك لكن لو مسيبتهاش صدقني الدنيا دي علي كبرها هتضيق عليك ومش هتلاقي مكان تستخبي فيه مني......  رد عليا 

الصوت: مراتك جميله قوي.... جميله لدرجه بس اكيد انت عارف...  مراتك مش هترجعلك تاني انسي!!! 

ايمن: اقسم بالله لو لمست شعره منها 

قاطعه: هتعمل ايه؟  شعرها كله اهوه بين ايديا هتعمل ايه؟  ولا حاجه؟  انت مش بايدك حاجه فمتهددش انت تحت رحمتي انا اقرر هعمل فيك ايه؟  وانا لسه مقررتش باي باي يا نانوس 

قفل السكه في وشه وايمن هيتجنن... 

احمد: سمعت اي حاجه مميزه جنبه؟؟ حددت حاجه؟  عرفت صوته؟؟ 

ايمن: لا ولا اي حاجه وكان بيتكلم بالهمس صمت جنبه 

الدكتور خرج: والدتك فاقت 

ايمن وزمايله دخلولها 

ايمن: حمدلله علي سلامتك 

فاطمه: حبيبه؟  حبيبه يا ايمن 

ايمن: ايه اللي حصل؟  

فاطمه: احنا كنا ماشيين في شارع ____ وكان الجو هادي ومره واحده عربيه كبيره كده رمادي وقفت ونزل منها اربع رجاله ضخام واخدوها وزقوني انا معرفتش اعمل حاجه يا ايمن 

عيطتت وهيا بتتكلم 

ايمن: اهدي يا امي اهدي بس قوليلي عرفتي رقم العربيه او اي حاجه؟  

فاطمه: العربيه مكنش عليها نمر خالص ولا اي حاجه 

ايمن تليفونه رن وكانت سميه

ايمن: ايوه يا سميه

سميه: ايه اللي حصل وانت فين دلوقتي؟  

ايمن: انا في المستشفي مع امي وهتحرك اهو ادور علي حبيبه

سميه: طيب لو عرفت حاجه امانه تبلغنا وما تقلقش علي مامتك انا هاجي اقعد معاها 

خرج ايمن يلف علي مراته ويشوفوا كل الاماكن المشبوهه 

صور حبيبه اتوزعت علي الكل وتقريبا كل الدوريات بتدور عليها 

اهل حبيبه مع فاطمه في المستشفي بيقعدوا معاها ومش بيسيبوها غير بالليل وسميه بس اللي بتبات معاعا 

ايمن هيتجنن من غياب مراته بيلف ويلف ويرجع يشوف امه اللي مش مبطله عياط نهائي ورفضت تقول لاي حد علي حمل حبيبه علشان ما تزودش قلقهم وخوفهم وحسرتهم وخصوصا ايمن اللي مش عارف يعمل ايه؟  زي المجنون او التايه بيلف حوالين نفسه 

ايمن مع اصحابه احمد وعلي وحمدي والمدير بتاعهم 

المدير: وصلتو لايه؟  ايه الجديد؟؟ 

احمد: ولا اي حاجه كل ما بنوصل مكان بيكونوا مشيوا منه ديما متأخرين بخطوه 

المدير: طيب يا ايمن محدش فيهم كلمك او طلب فديه او اي حاجه؟؟؟ 

ايمن: لا محدش كلمني 

علي: اعتقد ممكن يكون الموضوع ليه علاقه بسعيد عبد الصمد ده 

ايمن: سعيد ده اخد حكم اعدام واعتقد ان الحكم اتنفز كمان 

المدير: طيب القواضي اللي انت بتشتغل فيها حاليا ايمن: درستهم كلهم ما اعتقدش ان لهم علاقه 

##

فات اسبوع بحاله وحبيبه غايبه ومفيش ولا حس ولا خبر عنها...  ايمن كل ما بيوصل لمكان بيكتشف انها كانت فيه ومشيت منه...  في مره جاله واحد وقال ان عنده اخبار 

ايمن قابله وكل زمايله معاه 

الراجل: انا يا بيه شفت اخر الليل عربيه متقفله وكام راجل ونقلوا فيها واحده مربطينها 

ايمن مش عارف يسأل ايه او يقول ايه وكأنه عمره ما اشتغل في اي قواضي زي كده 

احمد: مواصفاتها ايه البنت دي؟  

ورولو صورتها 

الراجل: الدنيا كانت ظلمه وبعدين البنت دي كانت لابسه بنطلون وبلوزه كده بحمالات وبصراحه ملامحها مش باينه قوي 

ايمن: يعني ايه ملامحها مش باينه؟؟ 

الراجل: يا بيه وهيا بتركب في عربيه عدت فنورت في وشها وانا شفته بس معلش كانت عنيها ورامه ووشها في دم فمغطي ملامحه مش باينلها ملامح 

ايمن هيعيط ومش عارف يعمل ايه؟  متكتف عاجز 

احمد: طيب مفيش اي حاجه مميزه للبنت شعرها مثلا 

ايمن هو شعرها ايه؟  

ايمن: حبيبه شعرها طويل وطويل قوي كمان 

الراجل: لا يا بيه تبقي مش هيا دي كان شعرها قصير خالص زي الولد تقريبا...  نازل شويه من قدام علي وشها لكن وري مفيش خالص 

ايمن: ااحمد ابعت حد المكان ده وشوف تعرف ايه؟  او شوف اي دليل 

احمد: هبعت اي حد يشوف وانا هروح مكان تاني خلينا حاليا مركزين علي مراتك ودي مش مراتك 

ايمن: دي مرات حد تاني وبنت حد تاني واكيد اهلها هيتجننوا عليها 

احمد: حاضر يا ايمن حاضر 

تاني يوم ايمن بيلف اليوم كله ورجع اخر النهار المستشفي عند والدته وكانت سميه معاها 

ايمن: متشكر يا سميه علي وقفتك معايا 

سميه: علي ايه بس يا ايمن بس يارب حبيبه ترجع 

الباب خبط والباب اتفتح ودخل احمد من غير ما يستني حد يقوله ادخل واتقابل هو وسميه 

سميه ملحقتش تلبس نقابها كان علي الكرسي وهتمد ايدها تجيبه بس ملحقتش 

احمد: انا اسف 

وقف قدام الكرسي بحيث يوسع لسميه طريقها 

سميه: اسفه بس عايزه اللي علي الكرسي 

احمد بص علي الكرسي وشاف النقاب عطاه لسميه 

احمد: انا اسف جدا جدا 

ايمن: انجز يا احمد في ايه؟  

احمد راح لايمن 

احمد: الراجل بتاع امبارح جاي وعايزك ضروري وبيقول في اخبار جديده  

ايمن: طيب هو فين؟؟ 

احمد: جبته معايا اختصارا للوقت وواقف بره 

ايمن خرجله بره وخرجت معاه سميه اللي لبست نقابها واحمد كمان 

الراجل: يابيه في حاجه مهمه لقتها النهارده في الزباله 

ايمن: خير لقيت ايه؟  

الراجل كان في ايده كيس فتحه لايمن اللي اول ما شافه رجع لوري لحد ما خبط في الحيطه ووقع علي الارض وسميه عيطت واحمد واقف متنح معندوش اي كلام ممكن يقوله....  حاله صدمه سيطرت عليهم كلهم

بقي معقوله اللي هما شيفينه ده؟؟؟

هنا تليفون ايمن رن 

احمد: ايمن رد علي تليفونك ايمن ايمن 

احمد شد تليفون ايمن ورد عليه هو وكان صوت غريب زي ما يكون صوت آله مش انسان 

احمد حط ايده علي التليفون 

احمد: ايمن دول هما اللي خطفوا حبيبه 

احمد فتح الاسبيكر 

ايمن: الو انتو مين وعايزين ايه؟  

الصوت: وصلك السوفونير بتاع مراتك؟؟؟ 

ايمن: طيب انتو عايزين ايه مني؟؟؟  اللي تطلبوه هنفذوا بس مراتي رجعوها 

الصوت: عايزين عذابك وبس استني هدايا تانيه مننا 

قفل التليفون وايمن قعد في الارض مكانه 

تتوقعوا مين دول؟؟ 

هيعملوا ايه تاني في حبيبه؟؟؟ 

ايمن هيلحق مراته ولا هيوصلها بعد فوات الاوان؟؟ 

توقعاتكم بسرعه 

حب مشروع 

الحلقه السادسة

معلش عالتاخير النت فصل عندي ❤

احمد واقف جنب ايمن اللي قاعد في الارض بيحاول يوقفه او يخليه يقوم 

احمد: ايمن في ايه مالك؟  ايه ده؟  ده مجرد شعر انا مش فاهم في ايه؟  

ايمن: ده مش مجرد شعر ده شعر مراتي....  شعر حبيبه 

سميه: ده شعر حبيبه  ايمن انت لازم تتصرف يا ايمن 

فاطمه خرجت علي صوتهم بتعرج 

فاطمه: في ايه؟؟  ايه الشعر ده اوعي يكون ؟  لقيتوها يا ايمن؟  

ايمن ما ردش بس منهار في الارض 

فاطمه: هيا جرالها حاجه؟  انتو مبتردوش ليه؟  ايمن؟  

احمد: لا لا لسه معرفناش حاجه؟  هما بس علشان شعرها لكن لسه مفيش اخبار تعالي يا ست الكل ارتاحي تعالي 

اخدها احمد ودخلها اوضتها 

سميه: ايمن ممكن توديني البيت لوسمحت 

ايمن اخدها وروحها وبعد ما كان ماشي غير رأيه ودخل لابوها 

سميه كانت داخله منهاره من العياط واول ما ايمن دخل زينب جريت عليه هيا وعم سعيد 

زينب: في اخبار قولي يا ايمن 

سميه: قصولها شعرها يا ماما شعر حبيبه الطويل قصوه 

طلعت شعرها من الكيس وعطته لامها اللي شاركتها في العياط 

ايمن: انت جوزتهالي ليه؟  ايه الميزه اللي شفتها فيا؟؟ انا راجل فاشل...  انا قبضت عليك غلط واتهمتك انك بتخطف بنات اتهمت شيخ وامام مسجد انه بيشغل بنات في الدعاره!!!  ايه فكرت ازاي تجوز بنتك لواحد معرفش يفرق بين قواد وشيخ؟؟؟  مخك كان فين؟ ؟  

عم سعيد: شفتك فيك راجل يعتمد عليه...  شفت فيك واحد غيور علي اي بنت وهيتجنن ويقبض علي واحد قواد زي ما انت قولت ومهموش مظاهر او اي حاجه تانيه...  شفت واحد بيخاف ربنا وبيتقيه في كل اعماله...  شفت واحد عنده خلق وعلم ودين....  شفت فيك حاجات كتيره 

ايمن: واديني اهوه قدامك متكتف ومش عارف ارجع مراتي...  مش عارف اعمل اي حاجه واقف اهوه 

عم سعيد وقف فوق ايمن وبيشده يوقفه علي رجليه 

عم سعيد: مش عارف تعمل ومش عارف تتصرف لانك حاليا زوج بيدور علي زوجته!!!  حبيب بيدور علي حبيبته لكن مش ظابط ابدا....  المفروض تقف علي رجليك انت لما اصريت في خلال 24 ساعه اثبت برائتي وجبت المجرم الحقيقي فين الظابط ده؟؟؟ 

عارف ان الموضوع صعب عليك بس حاليا انسي شويه انها مراتك واركن الزوج علي جنب وطلع الظابط وخليه يشوف شغله....  طلع الظابط يا ايمن وخليه يرجعلي بنتي....  اتحرك 

وهو ماشي خرجتله زينب 

زينب بصوت مبحوح من كتر العياط 

زينب: بنتي عمرها ابدا ما بعدت عن حضني...  بناتي كلهم ديما في حضني...  ابوها شافك وقال انك راجل ويعتمد عليه...  فالراجل ولا يرتاح ولا يهداله بال غير ومراته قدام عينه في حضنه....  انت مسؤل تجيبلي بنتي انت فاهم؟  بنتي لازم ترجع وانت هترجعها 

ايمن مشي من عنده وبيحاول يرتب افكاره 

راح لاحمد واخد منه كل المعلومات اللي جمعها وجاب خط سيرهم من اول مكان اتخطفت مراته فيه ومشي وراهم خطوه خطوه 

كان في مكتبه وجاله طرد مكتوب عليه اسمه 

كان معاه زمايله بيدرسوا القضيه 

احمد: مش عارف يا ايمن بس هتفتحه كده علي طول مش نعرف في ايه الاول 

 ايمن: وهنعرف في ايه ازاي من غير ما نفتحه؟؟  

ايمن فتحه وبص جواه واتجمد مكانه 

احمد فتح الكرتونه وبص فيها 

احمد: دي هدوم يا ايمن في ايه؟  

ايمن بصوت عالي: دي هدوم مراتي مش هدوم بس...  دي هدوم مراتي عارف ده معناه ايه؟  انهم يقلعوها هدومها؟؟؟  مراتي مع مجرمين قصولها شعرها وقلعوها هدومها ومش بعيد كمان يكونوا...، 

مقدرش يكمل الجمله ويقول انهم ممكن يكونوا اغتصبوها بس كلهم مشاركين صاحبهم نفس الخوف والوجع وحاسين بيه وحاسين بالاهانه انهم مش عارفين يعملوا حاجه 

 ايمن لقي كمان علبه صغيره زي علبه خواتم فتحها واول ما فتحها قام لوري لدرجه انه وقع علي الارض واصحابه كلهم بصوا ايه اللي في العلبه وما قدروش ينطقوا... 

العلبه كان فيها كام صباع مقصوصين 

معرفوش ازاي يهونوا علي ايمن او يقولوه ايه؟  

قام وقف وراح بص من الشباك بيحاول يسيطر علي اعصابه 

جاله تليفون وجري يرد عليه 

ايمن: عايز ايه؟  انت اكيد عايز حاجه عايز ايه؟  

الصوت: عايز اوجعك وبس مراتك ناعمه قوي وجميله قوي 

ايمن: اقسم بالله لاقتلك واشرب من دمك 

الصوت: هتقتلني زي ما قتلت ابويا 

ايمن: ابوك مين؟  

هنا الخط اتقفل وكأن اللي بيتكلم غلط وندم 

احمد: قالك ايه؟  

ايمن: قالي اني قتلت ابوه؟؟؟  

احمد: انت قتلت حد قريب راجع نفسك كده؟  

ايمن فضل يعصر دماغه 

ايمن: قتل بايدي مخصلش انا ما قتلتش حد لكن اتسببت في موت حد 

احمد: مين؟؟ 

ايمن: سعيد عبد الصمد مش اتعدم بسببي 

احمد: ومين عياله ولا اعمارهم ايه؟  

ايمن: عنده كذا ولد...  انا محتاج ملف قضيته 

فضل يعملوا كلهم تحريات بحيث يعرفوا مين من عياله ممكن يكون ليه نشاطات اجراميه زي ابوه 

عمل حمله مكثفه وبدأ يهجم علي كل الاماكن المشبوهه وقبض علي اي حد مشبوه...  اي حد ليه سجل عنهم او مسجل خطر...  اي حد ليه علاقه بالخطف وبدأ يوسع شبكه معلوماته وبيحقق مع الكل بشراسه...  ايمن ركن الزوج والانسان كمان واتحول لوحش شرس ما بيرحمش والكل مستغرب ان ايمن الزوق اتحول للوحش اللي ما بيتفاهمش ابدا وبيحقق ويستجوب بمنتهي العنف 

اخر الليل ايمن بيقعد ويرفع ايده للي خلقه ويطلب منه يرحمه ويقف جنبه ويرجعله روحه تاني 

اخيرا جتله معلومات عن كام واحد بيتحركوا بواحده مخطوفه في حته تعتبر وكر للمجرمين فاخد قوه كبيره وراح هجم عليهم 

فتش المكان حته حته ومش لاقي مراته 

لقي اوضه فيها سرير صغير وحبل صغير وقلبه اتقبض اول ما شاف الحبل ده 

ايمن: مين كان مربوط بالحبل ده؟  

راجل من المجرمين: محدش يا بيه ده مجرد حبل 

ايمن قرب ومسك الحبل ولقي عليه اثار دم 

ايمن: واثار الدم دي ايه؟ ؟  

الراجل: معرفش يا بيه 

ايمن: متعرفش اممم 

يدوب ايمن هيخرج حاجه لمعت في الارض جنب السرير فقرب منها وشالها واتفاجئ انه حلق حبيبه مراته 

ايمن: ايه ده؟  ولا متعرفش ده ايه؟  

الراجل: لا معرفش تلاقيه وقع من اي بنت من البنات اللي بيجوا هنا 

ايمن: انا اعرفك ده حلق  مراتي اللي كانت مربوطه هنا وبما ان السرير لسه دافي فده معناه انها يدوب لسه منقوله من هنا من دقايق وانت هتقولي هيا فين 

الراجل: معرفش سيادتك بتتكلم عن ايه؟  

ايمن: امممم متعرفش طيب انا اعرفك 

ايمن طلع موبيله ووري للراجل صوره حبيبه 

ايمن: بتكلم عن دي هاه؟  

الراجل: مشفتهاش قبل كده 

ايمن كان بيقدر يميز اللي بيكدب من اللي بيقول الحقيقه والراجل ده كان بيكدب 

ايمن من غير اي مقدمات طلع مسدسه وضربه رصاصه في رجله والراجل وقع وفضل يصرخ 

احمد وعلي دخلوله بسرعه 

احمد: ما ينفعش كده يا ايمن 

ايمن: اللي مش عاجبه يمشي من هنا....  وانت افتكرت ولا لسه؟  مراتي فين!؟؟؟  علي فكره مسدسي مليان ومعنديش اي مانع افضيه كله عليك 

الراجل: معرفش قولتلك مشفتهاش قبل كده 

ايمن: اممم مصر برضه 

ضربه رصاصه تانيه في رجله التانيه بكل برود 

احمد: مش هينفع كده يا ايمن 

ايمن: قولتلك مش عاجبك اطلع بره 

احمد جه يقرب علي ايمن رفع مسدسه في وشه 

ايمن: احمد انا ضاعت مني اغلي حاجه في حياتي وبعدها معنديش غالي ومستعد اضحي باي حاجه حتي لو كان حياه صاحبي فابعد عني دلوقتي 

احمد رجع لوري خطوتين 

احمد: اهدي يا ايمن اهدي 

ايمن: مراتي فين؟  مش هعيد سؤالي تاني 

الراجل: معرفش يا بيه اه اه معرفش 

ايمن: طالما مش هتفيدني يبقي حياتك كلها ملهاش لازمه 

ايمن رفع المسدس في وش الراجل 

ايمن: طالما ما تعرفش يبقي حياتك ما تلزمنيش 

ايمن يدوب رفع صمام الامان والمسدس في وش الراجل فصرخ 

ايمن: والله ما اعرف هيا كانت هنا بس لما الدنيا اتدربكت الباشا جري وقالي اخلص منها فناديت علي اتنين صنايعيه اخدوها يدفنوها واخدوها ما اعرفش بقي هما راحو فين او عملوا ايه والله ما اعرف صدقني 

الراجل بيتكلم وبيعيط ويصرخ من الالم 

ايمن شده وقفه وما سكه من هدومه 

ايمن: دفنتو مراتي؟؟؟؟  الكلام ده من امتي؟  

الراجل: اخدوها من نص ساعه بس 

ايمن: راحو فين؟  هيدفنوها فين؟  انطق 

الراجل: في حته الارض الفاضيه ورانا دي 

ايمن رماه من ايده وطلع يجري ووراه احمد وعلي وكام واحد من زمايله وراحوا للارض اللي الراجل قالهم عليها 

راحو الارض ووقفوا كلهم متنحين لان الارض كانت كبيره ومش عارفين يبدؤا منين؟  وياتري هيلحقوها ولا لأ؟  

ايمن بيبص حواليه مش عارف يبدأ منين؟  

ايمن: اكيد شكل الارض هيكون مختلف لانها لسه محفوره كل واحد يدور في مكان اتحركوا 

كل واحد فعلا راح في اتجاه والكل متوتر وخايف 

حياه مرات صاحبهم متوقفه حاليا عليهم كلهم 

ايمن بيدعي انه يلحقها ورجليه شيلاه بالعافيه 

فجأه وقف قدام مكان علي جنب وبدأ يحفر فيه 

هو مش عارف ليه اختار المكان ده بس احساس جواه او شيئ الهي خلاه يحفر هنا 

كان بيحفر بإديه بدأ براحه وكل ما بيحفر بيحس اكتر ان مراته في المكان ده 

كل اصحابه اتلموا عليه يساعدوه...  واحد فيهم جاب حاجه يحفر بيها بس ايمن رفض وخاف انها تعور مراته 

بيحفر باديه لحد ما قابله حاجه زي شوال بدؤا يحفروا براحه حواليه لحد ما كله ظهر وفعلا جواه حد 

ايمن عايز يفتحه مش عارف فاحمد طلع مطواه وقطع الشوال واخيرا لقي حبيبه!!!!!! 

شالها وطلعها بره الشوال مسك وشها ومش عارف اذا كانت بتتنفس ولا لأ؟  او قلبها بينبض ولا لأ؟ ؟  

بايد بتترعش حطها علي رقبتها بس من رعشه ايده مش عارف اذا كان في نبض ولا لأ؟؟؟؟؟ 

احمد: اسمحلي يا ايمن انا 

ايمن بصله وكأنه مش سامع حد في الدنيا 

احمد حط ايده علي رقبة حبيبه وبعد لحظات 

احمد: ايمن لسه عايشه!!!  في نبض بس ضعيف جدا 

قوم لازم نوديها المستشفي حالا انا طلبت الاسعاف واكيد هيا علي وصول بس مش هي هيعرفوا يدخلوا هنا قوم.... 

ايمن: عايز اغطيها الاول 

ايمن مسك ايدين حبيبه وشافها بس ايديها كانت كامله وصوابعها موجوده يعنبحهما كانوا بيلعبوا باعصابه بس 

لكن شعرها للاسف اتقص كله 

علي بص حواليه وكان في بيت  قريب منهم  وناشر غسيل جري وجابله ملايه لف بيها ايمن مراته 

الاسعاف جت وفي دقايق كانوا في المستشفي 

ايمن اتصل بفاطمه: ماما انا لقيت حبيبه وجبتها المستشفي 

فاطمه: حالتها ايه؟  طمني 

ايمن: كان مغمي عليها وكانت مدفونه ساعت ما لقيناها ونبضها ضعيف ويدوب واصلين ولسه 

جوه مع الدكاتره ادعيلها يا امي ادعيلها كلمي اهلها وبلغيهم لاني مش قادر اتكلم 

فاطمه لبست بسرعه ونزلت وهيا في الطريق كلمت اهل حبيبه وبلغتهم وخلال عشر دقايق وصلت وبعدها بشويه وصل اهل حبيبه عم سعيد وزينب وسميه 

كلهم بيتكلموا مع بعض وبيسألوا ايمن اللي واقف بالعافيه اصلا علي رجليه عطاهم ضهره وبص للحيطه 

احمد: يا جماعه احنا لسه ما نعرفش حاجه 

سميه: طيب هيا كانت فايقه لما جبتوها؟؟؟ 

احمد: لأ 

سميه: طيب كانت حالتها ايه؟  لقتوها ازاي؟  وضعها كان ايه؟  

احمد: للاسف هيا كانت مدفونه...  احنا حفرنا وطلعناها يعني في كام جرح في وشها واثار لكدمات بس الحمد لله اننا لحقناها وحاليا مستنين حد من الدكاتره يطلع يطمنا 

الكل سكت بس صوت العياط 

زينب: يا عيني عليكي يا بنتي وعلي اللي جرالك....  ادفنتي وانتي حيه يا قلبي 

عم سعيد: انتي يا وليه هتعددي ولا ايه؟  يا تدعي ربنا يقومها بالسلامه يا تسكتي 

عم سعيد راح لايمن اللي عاطي ضهره للكل وحط ايده علي كتفه 

عم سعيد: ما تخافش عليها....  زي ما ربنا خلاك تلاقيها هيقومهالك بالسلامه..  ربك كبير ورحيم....  ايه رأيك لو نروح انا وانت نصلي ركعتين قضاء حاجه ونطلب من ربنا يقومها بالسلامه؟؟؟ 

ايمن: نطمن عليها ونروح.... نطمن بس الاول 

احمد وعلي والباقين وحتي مديرهم اول ما سمع جالهم 

المدير للضباط: ايه الاخبار حالتها ايه؟  

احمد: مستنين حد يخرج يطمنهم 

المدير: ايمن عامل ايه؟  

واحد من الظباط اسمه عادل  : اللي يشوفه مع المجرمين وهو جبروت وبيستجوبهم ما يشوفوش دلوقتي وهو ماسك نفسه بالعافيه ولولا الملامه كان عيط 

احمد: مراته يا اخي عايزه يعمل ايه؟ ؟  انت مشفتش شكلها كان عامل ازاي؟  وبعدين ايمن متدين ومراته منتقبه لما تتخطف من رجاله معندش اخلاق ولا ضمير يقلعوها نقابها ويلبسوها لبس عريان بالشكل ده ويضربوها وحتي شعرها يقصوه وجوزها واقف متكتف عايزه يعمل ايه؟  حس بيه.. 

الظابط عادل : يا تري اغتصبوها؟؟؟ ده ايمن ممكن يروح فيها 

علي: وانت مال اهلك ده انت بارد 

المدير: بس انت وهو.... انتو عاملين زي العيال بتوع ابتدائي وبيتناقروا 

المدير راح لايمن: ايمن ان شاءالله خير ان شاءالله 

ايمن: ان شاءالله 

الباب اخيرا اتفتح وخرج دكتور وممرضه 

الدكتور بيكلم الممرضه: روحي بسرعه وهاتي دكتوره امل شوفيها اتأخرت ليه؟  بسرعه 

الكل متوتر ومستني علي اعصابه 

ايمن: حالتها ايه؟  

الدكتور :الحمدلله حاليا حالتها مستقره احنا عملنا كل المطلوب هيا ضعيفه من عدم التغذيه فبنعملها ارواء طبعا حطينها علي جهاز التنفس الصناعي شويه بس لحد ما الرئتين يرجعوا لطبيعتهم...  الجروح اللي في جسمها كلها الحمد لله سطحيه ودكتور تجميل بيخيطهم حاليا علشان ما يسيبوش اي اثر في وشها والباقي كله كدمات فالحمد لله مجملا هيا كويسه المشكله هتبقي نفسيه مش عضويه 

فاطمه: والبيبي يا دكتور؟؟؟ نزل ولا؟؟؟ 

الكل بص لفاطمه 

ايمن: بيبي ايه يا امي؟  

فاطمه: كانت حامل يا ايمن ولما خرجنا كانت عايزه تعمل حاجه مميزه علشان لما انت ترجع تقولك 

الدكتور: هو مفيش عندها نزيف او اي حاجه بس ما اقدرش احكم علي وضعها...  دكتوره النسا دكتوره امل  حاليا هيا هتكمل شغلها معاها هيا هتحدد حاله البيبي او اي حاجه تانيه بعد اذنكم 

ايمن: مقولتيش ليه انها حامل؟؟؟ 

فاطمه: هو انت كنت ناقص هم وقلق وتوتر زياده؟؟؟  مكنتش هتقدر تفكر او تعمل اي حاجه مكنلوش لازمه انك تعرف 

ايمن: يا الله ارحمنا برحمتك يا رب 

عادل لزمايله: تصدق شكل المنقبين دول جامدين...  يعني بعيد انها مزه مزه يعني مخليه الواد يلف حوالين نفسه وده مش هيحصل الا اذا كانت جامده 

احمد: تصدق انت راجل بارد يا اخي!!!  اهو اللي بيلبسوا نقاب بيلبسوه من امثالك دول...  

احمد سابهم وراح وقف جنب ايمن وشويه والدكتوره خرجت بره تطمنهم 

الدكتوره: البيبي سليم ووضعه مستقر والرحم كويس جدا الحمل مستقر هيا حاليا في الاسبوع الثامن 

فاطمه: بجد يا دكتوره؟؟  وهيا كويسه؟ ؟  وصحتها هتستحمل الحمل؟؟ 

الدكتوره: هيا ضعيفه طبعا بس احنا هنغذيها وهنحاول نرجعها لطبيعتها وان شاءالله خلال اسبوع مع المحاليل والتغذيه تاخدوها البيت 

ايمن: لو سمحتي يا دكتوره هيا؟؟؟  يعني؟؟  

الدكتوره: عايز تسأل علي ايه قول علي طول 

ايمن: مراتي منقبه وانتي شايفه المنظر اللي جيبناها بيه ومخطوفه من اكتر من اسبوعين واللي خطفوها ضربوها عذبوها قصولها شعرها فعايز اعرف عملوا ايه تاني؟  

الدكتورة: اعتقد اني فهمتك انت عايز تسأل هل هما اغتصبوها ولا لأ؟  

ايمن: ايوه 

الدكتورة: الموضوع ده صعب ارد عليه بس اللي اقدر اقولهولك ان مفيش اي اثر لعنف حصل معاها واعتقد انها مش هتسلم نفسها بسهوله كمان مفيش اي اثر لاي حيوانات منويه 

ايمن: يبقي محدش لمسها؟؟؟ امال ليه بتقولي انك مش متأكده؟؟؟ 

الدكتورة: الحيوانات المنويه بتفضل اثارها اربع او خمس ايام بالكتير كمان لو في عنف خلال اسبوع هيخف طالما ما اتكررش وانت بتقول انها اكتر من اسبوعين 

ايمن: ام فهمتك يعني لو حد اغتصبها من اسبوعين انتي متقدرش تحددي صح؟  

الدكتورة: ما تقلقش كلها ساعه بالكتير وتفوق وهنعرف منها كل حاجه بس برضه علشان اطمنك انا ارجح ان محدش لمسها لان برضه لو كان في عنف في بدايه حمل الجنين هينزل فبنسبه 95%محدش لمسها بس ده برضه ما يمنعش ان محدش اتحرش بيها وده لو حصل هيأثر نفسيا كتير.....  مراتك يا سياده المقدم معندهاش حاليا اي مشاكل طبيه المشاكل هتبقي نفسيه وده للاسف اللي علاجه صعب وده هيتحدد بعد ما تفوق.....  انا في مكتبي لو عزتو اي شيئ 

ايمن واقف بره الباب بيبص عليها فالممرضه فتحت الباب 

الممرضه: ممكن تدخل لو تحب 

ايمن دخل فعلا وقرب منها بيحاول يفتكر شكلها في الاول كان ايه؟  

كانت جميله ورقيقه وابتسامتها منوره علي طول في وشها 

حاليا وشها ازرق وفي كدمات كتير وعنيها ورامه ومضروبه جامد وشعرها مفيش 

حط ايده علي وشها وباسها في خدها 

ايمن: انا اسف ان كل ده حصلك واسف اني مكنتش موجود حقك عليا...،  حقك عليا 

ايمن خرج بره واول ما خرج هيا بدأت تفوق واول ما فاقت ما نطقتش غير كلمه واحده 

نكمل بكره 

توقعاتكم ايه 

حب مشروع 

الحلقة السابعه 

حبيبه اهلها جنبها واول ما فتحت عنيها استغربت هيا فين بصت حواليها وشوش كتير قوي حاسه انها عارفاها بس في وش وحيد اتمنت انها تشوفه ومش لقياه غمضت عنيها تاني 

حبيبه: ايمن.....  ايمن 

ايمن بره الباب سمعها غمض عنيه وسند علي الحيطه ومقدرش يدخلها 

عم سعيد: حمدلله علي السلامه يا بنتي...  ايمن يدوب خارج راح يصلي وهيجي المهم يا بنتي طمنينا عليكي 

حبيبه :ايمن... ايمن 

زينب: حبيبت قلبي انا امك 

حبيبه: ايمن فين؟  

زينب: جاي دلوقتي هيجي

حبيبه نامت تاني وعم سعيد راح لايمن يشوفه فين ولقاه زي ما توقع بيصلي 

عم سعيد: حبيبه فاقت وسألت عليك 

ايمن: الحمدلله ربنا يقومها بالسلا مه

عم سعيد: مش هتروحلها؟؟؟ 

ايمن: اكيد هروح 

طول الوقت ايمن ما بيفارقش باب اوضتها بس مش قادر يدخلها نهائي 

فاقت تاني بس المره دي كانت احسن ونامت تاني علي طول وبعدها 

حبيبه: سميه 

سميه: حبيبه فوقتي يا قلبي؟؟ 

حبيبه: ايمن فين؟؟

سميه: طول الوقت قاعد بره 

حبيبه: وليه مدخلش؟؟؟ 

سميه: علشان اعرف اخد راحتي ولا انتي عايزاني انام ازاي وجوزك هنا؟  

حبيبه: ينفع تناديله وحشني قوي 

سميه: ثواني 

يدوب هتخرج الدكتوره قابلتها في وشها فدخلت معاها تاني وايمن بره الباب مراقب 

الدكتورة: عامله ايه النهارده؟  ان شاءالله احسن؟ 

حبيبه: الحمدلله احسن 

الدكتورة: قلقتي الكل وخصوصا جوزك اللي ما بيفارقش بابك ده نهائي 

حبيبه: البيبي اخباره ايه؟  

الدكتورة: البيبي كويس عايزك بس تشدي حيلك بسرعه وتخرجي من هنا 

حبيبه: ايمن عرف اني حامل؟؟؟ 

الدكتورة: اهه طبعا الكل عرف ما تقلقيش المهم انا عايزه اتكلم معاكي بس براحتك السؤال اللي ما تقدريش تجاوبي عليه عادي خدي راحتك وخدي وقتك

حبيبه: اتفضلي 

الدكتورة: انا ملقتش فيكي اي اثر لعنف 

حبيبه: كل اللي في وشي ده ومفيش اثر عنف 

الدكتورة: مش قصدي علي عنف ضرب او كده 

حبيبه: امال قصدك علي ايه؟  

الدكتوره: انا كشفت عليكي كشف نسا ومفيش اثر لعنف او مقاومه او حاجه زي كده 

حبيبه: انتي عايزه تسأليني اذا كانوا اغتصبوني او لأ؟

الدكتورة: بالظبط حد اغتصبك؟؟  اول ما خطفوكي مثلا؟ ؟ ؟  

حبيبه سكتت وسرحت اول يوم خطفوها فيه 

اخدوها في العربيه وغموها قلبها كان هيوقف من الخوف والعجز 

وصلت لمكان دخلوها فيه ومش شايفه اي حاجه كل اللي سمعاه اصوات 

صوت1: ايه دي؟  

صوت2: بنت خطفينها 

صوت1:دي بنت؟؟؟  لا شكلها ما يديش 

صوت2: ماشيه هيا ومامتها 

صوت1: ولابسه كده ليه؟  

صوت2: منقبه يا باشا... 

صوت1: وانت خاطفين منقبه ليه؟  

صوت2: المنقبه دي اهلها هيخافوا عليها قوي وبعدين هيدفعوا اللي نطلبه علشان نرجعها سليمه وبعدين الباشا هو طلب دي بالذات نخطفها 

صوت 1: طيب وريني شكلها يستاهل ولا؟؟  

حبيبه: لألألأ محدش فيكم يقربلي انتو فاهمين؟  محدش يقربلي 

بترجع لورا لحد ما خبطت في الحيطه بس ايد شدتها جامد وشدوا الغطا اللي علي وشها وقلعوها طرحتها وشعرها اتفرد طويل 

الاوضه كانت ظلمه ونور في وشها فمش شايفه حاجه 

صوت1: هما المنقبات بيبقوا حلوين قوي كده ياض 

صوت2: اول مره اشوف واحده كده؟  ايه الجمال ده؟  يا باشا احنا نتمتع بيها وبعدها يحلها المولي 

دي ما ينفعش نرجعها كده!!!  ده انا اموت لو ملمستهاش 

حبيبه: لا محدش فيكم هيقربلي....  انا جوزي ظابط وزمانه قالب الدنيا عليا وهيقتلكم انتو فاهمين؟  هيقتلكوا لو حد لمسني 

صوت 1: جوزها ظابط؟؟؟  وتقولي بنت 

هنا دخل واحد كمان بس شكله الريس بتاعهم لانه اول دخل كلهم سكتوا ووقفوا علي جنب 

الريس: جبتوها كويس 

صوت1: بس مين دي يا باشا؟؟  دي حلوه قوي و

قاطعه الريس: محدش يلمس شعره منها فاهمين؟  دي الباشا الكبير تلزمه 

صوت 2: بس حتي نتسلي 

الريس: قولت ولا شعره لحد ما تروحله وهو حر يعمل ما بداله احنا وظيفتنا نجيبها وبس 

سابوها وخرجوا وساعتها تليفون مامته  رن وكان ايمن وردوا عليه واتأكدوا فعلا ان جوزها ظابط 

الدكتوره: يعني اغتصبوكي ولا لأ؟  

حبيبه: لأ كانوا خايفين محدش اغتصبني 

ايمن هنا اخد نفس طويل وحمد ربنا ويدوب هيبتسم

حبيبه: بس ده ما يمنعش ان فيه منهم حاول

ايمن هنا فهم ان مراته محدش اغتصبها بس اتحرشوا بيها 

الدكتورة: يعني ايه؟  

حبيبه: يعني بعد ما نقولوني وودونا للراجل الكبير بتاعهم ده بدؤا يضايقوني !!  قطعولي هدومي!!!  لمسوني في اماكن محبش حد يلمسني فيها!!!  تحرشوا بيا 

دموعها نزلت وسكتت

الدكتورة: لو الكلام صعب بلاش 

حبيبه: انا كنت بنت محدش لمحها حتي قبل جوزها ودلوقتي؟  دلوقتي شاركوا جوزي في حاجات كتيره قوي...  انا اعتقد ان اي حاجه تتاخد غصب تبقي اغتصاب...  هما ايوه ما اغتصبونيش بالمعني المعروف بس اغتصبوا حاجات مني... شعري اللي قصوه!!!  حرمه نقابي!!!  حرمه جسمي اللي كشفوه!!  حاجات كتيره عملوها مش هقدر انساها ابدا...  ازاي اقدر اواجه ايمن او هو ازاي يواجهني وهو عارف ان غيره شاف مراته ولمسها وانه معدش هو المتفرد بجسم مراته؟؟؟ 

انا مش عارفه اصلا ازاي انا وهو هنواجه بعض؟ ؟  صعب وصعب قوي كمان 

ايمن مشي من قدام اوضتها لانه هو كمان مش عارف ازاي هيواجهها؟؟؟ 

الدكتورة خرجت من عند حبيبه وقابلت ايمن وقالتله ان مراته محدش اغتصبها 

اهلها فرحوا بالاخبار دي لكن محدش حس بالنار اللي جوي ايمن او حبيبه

ايمن كانت في نار جواه مش عارف يعمل فيها ايه؟  

اخيرا مشي وراح شغله ودخل للرجاله اللي قبض عليهم ومسؤلين عن خطف مراته 

وبدأ يضرب فيهم كلهم زي المجنون...  كان عايز يعرف مين في عيال سعيد صاحب فكره خطف مراته؟؟؟ 

احمد دخل لايمن ومسكه بالعافيه 

احمد: هتموتهم يا ايمن هتموتهم في ايدك 

ايمن: ما يموتوا دول بهدلوا مراتي 

احمد: وهيتحاكموا وياخدوا جزاتهم 

ايمن: لازم اعرف مين صاحب فكره خطف مراتي 

زق احمد ودخلعم تاني واول مره ايمن يستمتع بضرب حد فضل يطلع النار اللي جواه فيهم بس للاسف النار ما بردتش وقلبه ما ارتاحش 

عرف منهم اسم اللي خطف مراته وراح جابه من بيته وعرفه ازاي يخطف مرات ظابط 

ولولا احمد سحبه من فوقه كان قتله 

ش

كل يوم بيعدي ايمن بيتهرب بطريقه شكل انه يدخل لمراته وهيا في الاول كانت متفهمه لكن بعد كده بقت بتعيط في صمت 

احمد كان بيزورهم بانتظام وكان ايمن بيكلفوا انه يجيبلهم اكل او طلباتهم او اي حاجه 

واحمد كان مبسوط بالدور ده لانه شويه شويه بيقرب من سميه اللي معجب بيها 

اخيرا جه معاد خروج حبيبه من المستشفي كان مر عليها اسبوع في المستشفي 

اليوم ده كانت فاطمه هيا اللي مع حبيبه وايمن كالعاده موجود بس بعيد 

الدكتورة شافته وطلبت منه يخلص اوراق الخروج لمراته 

رن علي امه وخرجتله بره 

حبيبه عرفت ان ايمن بره قامت تخرجله هيا او علي الاقل تلمحه 

كانوا بره الباب ايمن وفاطمه

فاطمه: وبعدين معاك يا ايمن؟  هتدخل تشوف مراتك امتي؟  كل شويه تسأل عليك 

ايمن: مش وقته..  انا هروح اخلص ورق خروجها من المستشفي وانتي جهزيها اوك؟

فاطمه: هناخدها علي البيت صح؟  

ايمن: لا طبعا ومين هيخلي باله منها في البيت؟؟؟  انا هسيب شغلي ولا انتي بايدك المكسوره دي؟؟  

فاطمه: يا حبيبي ملكش دعوه بينا وبعدين انا بقيت كويسه وفكيت الجبس خلاص 

 ايمن: امي حبيبه هتروح بيت ابوها اقفلي الكلام بقي 

فاطمه: طيب فهمني يا ايمن؟  انت كنت هتجنن عليها؟  

ايمن: امي انا.....  انا......  مش عارف اواجهها خلاص؟  

هروح اخلص الورق 

فاطمه دخلت لحبيبه اللي كانت في الحمام خبطت عليها

فاطمه: حبيبه احنا هنمشي عايزه مساعده عندك

حبيبه: لا يا ماما تسلمي 

حبيبه كانت بتعيط غسلت وشها وتماسكت وخرجت كانت فاطمه بتلم حاجتها بايد واحده فساعدتها ولبست هدومها ونقابها واستنو ايمن في صمت 

فاطمه كانت حاسه بحبيبه وانها بتعيط في صمت بس معرفتش تقولها ايه؟  

ايمن خلص الاوراق وجالهم خبط علي الباب بره فامه خرجت 

ايمن: يالا 

فاطمه: طيب انا اللي هشيل الشنطه والحاجات اللي جوه ولا مراتك الحامل؟؟ 

ايمن بص لامه واستعد انه يدخل يقابل حبيبه بس هو مش مستعد.... ايمن دخل بس مش عارف يقول ايه؟  

ايمن: سلام عليكم...  حمدلله علي السلامه 

حبيبه: وعليكم السلام...  الله يسلمك 

ايمن كان مستني منها انها ترمي نفسها عليه او تعاتبه او تكلمه او تقول اي حاجه بس حبيبه ما نطقتش 

ايمن: نمشي؟؟  ناقصك حاجه؟  

حبيبه: لا يالا 

مشي قدامها وهيا وراه امه مسكتها واتسندوا علي بعض 

وهما ماشين حبيبه كانت دايخه ومش قادره وكانت ماشيه بالعافيه 

فاطمه: حبيبه انتي كويسه؟  لو تعبانه نرجع؟؟ 

حبيبه: لا انا بس دايخه شويه من كتر الرقده ما تشغليش بالك بيا 

فاطمه: واشغل بالي بمين بس هو في اغلي منك 

حبيبه: ربنا يخليكي ليا يا ست الكل 

حبيبه الدنيا بتلف بيها وسندت علي الحيطه 

فاطمه: ايمن الحقنا 

ايمن رجعلهم: في ايه؟  

حبيبه: مفيش حاجة يالا 

فاطمه: انتي هتوقعي وانتي ماشيه وتقولي مفيش حاجه؟  

ايمن: نرجع؟؟؟ 

حبيبه: لا انا دايخه بس شويه وعايزه اروح لو سمحتو ما تكبروش الموضوع لو تعبت اكتر هبقي اجي بس انا كويسه 

ايمن: ماشي براحتك...  يالا انا هساعدك 

ايمن حس انها فعلا مش قادره تمشي وبعد تردد للحظات شالها 

حبيبه: ايمن انا كويسه 

ايمن: عارف 

هو ما زودش وهيا ما نطقتش بس ايديها حوالين رقبته ودماغها في صدره 

اكتر حاجه وحشتها ضمته ليه...  احساسها بالامان في حضنه....  ريحته اللي بتعشقها....  كل حاجه فيه وحشتها.... 

ايمن اتمني لو العربيه تبعد ويوصلها للبيت كده او ما يوصلهاش ابدا وتفضل كده في حضنه!!!  لو يقدر ما يخليهاش تغيب عن عينه ابدا!!!  لو ينفع يسيب شغله ويسيب الدنيا كلها وياخدها لمكان مفيهوش حد غيرهم هما الاتنين بس...  لو ينفع....  وهو بيكره كلمه لو....  

وصل العربيه وفتح بابها ودخلها براحه وري بحيث ترقد براحتها 

حبيبه فهمت انه مش عايزها جنبه وهو سايق 

فتح الباب لامه وركبها جنبه وركب هو

كل شويه يبص في المرايه يشوفها بس كانت باصه بره علي طول  

وصلوا بيت عم سعيد 

ايمن: وصلنا 

حبيبه فاقت من سرحانها لقت نفسها قدام بيت ابوها 

كان عندها امل بسيط انه ياخدها بيته او اللي كان بيتها...  ده حتي ما سألهاش 

حبيبه: متشكره 

يدوب هتنزل كانت هتوقع فايمن لحقها سندها ودخلها من غير ما يشيلها ...  دخلوا والكل رحب بيها 

عم سعيد: انا اتخيلت انك هترجعي بيتك؟  

حبيبه: امشي يعني مش عايزيني؟؟؟ 

عم سعيد: حبيبه قلبي بيت ابوكي علي طول مفتوح بس مستغرب 

حبيبه: ماما فاطمه تعبانه وانا تعبانه وايمن المفروض يرجع شغله بقي هنعمل ايه؟  

فاطمه: يا حبيبتي انا احطك في عنيا 

حبيبه: تسلمي يا ست الكل بس لولا انك تعبانه كنت جيت لكن ده امر ربنا...  خليكي انتي معايا النهارده 

ايمن: امي لو عايزه تفضلي النهارده براحتك بس انا لازم اروح شغلي فقرري 

فاطمه: طيب وانت؟؟؟ 

ايمن: مالكيش دعوه بيا انا لو روحت البيت فيدوب هغير وانزل انا بقالي كتير ما بنزلش الشغل 

عم سعيد: اتكل انت علي الله وسيبهملنا توكل يالا ؟؟

ايمن مشي وحبيبه طلعت اوضتها تعيط في صمت 

حبيبه فاهمه ان ايمن مش قابل ان مراته حد يشاركه فيها وشايفه ان ده من حقه...  مراته مبقتش ملكه لوحده..  هو بيحبها اه بس مش متقبل فكره ان حد لمسها غيره....  مش قادر حتي يبص لوشها...  مش قادر حتي يواجهها....  كل ما بيشوفها بيتخيل الرجاله وهما بيلمسوها...حتي شعرها اللي كان بيعشقه قصوه...  معدش عندها حاجه تشد جوزها ليها...  معرفتش تحافظ علي نفسها.... وعلشان كده بطلت تطلب تشوفه في المستشفي وما اعترضتش لما جابها بيت ابوها لانها ما تيستاهلش تدخل بيته.... 

ايمن مشي وهو بيلوم نفسه...  ازاي معرفش يحمي مراته؟!؟  ازاي مقدرش يرجعها بسرعه؟؟؟  ازاي هيا هتقدر تشوفه راجل تاني قدامها؟؟؟هيا في الاول كان واحشها بس بعدها استوعبت....  استوعبت انه اضعف من انه يحمي اهل بيته....  فقدت ثقتها فيه...  الراجل اللي يقبل ان مراته غيره يشاركه فيها ميبقاش راجل بيبقي ديوث......  لا لا بس ده حصل غصب عنك يا ايمن؟؟؟؟  لا كان لازم تبقي اذكي من كده؟؟ 

مراتك معدتش بتثق فيك وعلشان كده بطلت تطلب تشوفك في المستشفي ولما  وديتها بيت ابوها مفتحتش بوقها حتي ما اعترضتش ولو بكلمه لا دي كمان بتبرر لابوها هيا ليه جت.....  هو خلاص خسر مراته...  خسرها نهائي ومش هيعرف يرجعها لحضنه تاني!!!! 

فتره عدت وايمن عرف يقبض علي ابن سعيد ويقفل ملف القضيه دي للاخر 

كان هيقتله بس مسك نفسه وغفرله انه ما اغتصبش مراته 

شهر بحاله  عدا وايمن بيكلم عم سعيد كل كام يوم يطمن ويهرب منهم ومستني حبيبه تقوله ولو كلمه 

حبيبه كل يوم تعيط وتستني كلمه من ايمن...  اي كلمه 

اخيرا اخدت قرارها...  نزلت لابوها وقعدت معاه شويه يرغوا وبعدها 

حبيبه: بابا انا طول عمري كنت مطيعه ليك وعمري ما كسرتلك كلمه او طلب صح؟  

عم سعيد: ايوه يا حبيبه خير اطلبي علي طول 

حبيبه: هطلب بس لازم توعدني من غير ما تتدخل 

عم سعيد: ماشي مش هدخل 

حبيبه: ولا تقولي لأ

عم سعيد: قولي بقي خير

حبيبه: انا عايزه اتطلق من ايمن...  طلقني منه ارجوك 

انا عايزه اطلق...... 

ونكمل بكره 

ياتري هيطلقوا طيب لو حصل هيرجعوا تاني ولا خلاص كده؟  

استنوني هتعرفوا 

انتو توقعاتكم ايه

حب مشروع 

الحلقة الثامنه 

حبيبه بتقول لباباها انها عايزه تتطلق من ايمن 

باباها اذبهل منها لانه عارف انهم بيحبوا بعض جدا وما بيستغنوش عن بعض ودلوقتي حامل منه فالطلاق كان اخر حاجه ممكن يفكر فيها 

عم سعيد: انتي بتقولي ايه؟  تتطلقي؟؟؟  

يا بنتي " ان ابغض الحلال عند الله الطلاق" 

حبيبه: اديك قولت اهوه حلال 

عم سعيد: طيب ليه؟  جوزك مقصر معاكي في ايه؟  اللي حصلك ده كان غصب عن الكل؟؟؟  انتي بتلوميه ليه؟ ؟  دي حاجه اي حد ممكن يتعرضلها؟؟؟ انتي مشفتيش كان عامل ازاي؟  وحالته كانت ايه؟  عايزه دلوقتي تسيبيه؟؟؟ 

حبيبه: هو مين سايب مين يا بابا؟؟؟  انا اللي سيباه ولا هو اللي سايبني؟؟؟  هو جابني هنا ومرضيش ياخدني بيته...  انا كدبت عليك لما قولتلك ان مامته تعبانه وان هو مشغول...  هو مكنش عايزني 

عم سعيد: ما تتبليش عليه؟  هو قالك انه مش عايزك في بيته ولا بتعملي زي امك وتألفي من عندك؟؟ 

حبيبه: ياريت بألف بس انا سمعته مامته قالتله ناخدها البيت وهو قالها لأ...  هو قال لمامته مش هينفع ياخدني البيت ومش عايز يواجهني او يشوفني....  بابا اخر مره شوفته معايا كان امتي هاه؟ ؟  انا فضلت قد ايه في المستشفي شفته مره واحده معايا؟  شوفته مره واحده كلمني كلمه؟؟  بابا انا من يوم ما اتخطفت للنهارده مقاليش( غير سلام عليكم حمدلله علي السلامه) وبس شهر بحاله اهوه فات ودول الكلمتين اللي وجهملي..  استني ايه؟  قولي انت استني ايه واللي انت تقوله انا موافقه عليه؟؟؟  

عم سعيد: يا بنتي ما يمكن عنده عذره 

حبيبه: اللي يريحك يا بابا اعمله (بتعيط) بس انت سبق وعرضتني عليه وهو اتجبر يوافق وعمل بأصله وكمل معايا لاني عجبته وعجبه شكلي وديني واخلاقي وانه اول راجل في حياتي لكن دلوقتي معدش هو اول راجل وشكلي اديك شايفه اهوه واكتر حاجه كان بيحبها شعري واهو راح فهتجبره تاني يفضل معايا وهو من ذوقه هيوافق وهياخدني بيته غصب عنه...  بس انا تعبت يا بابا تعبت ترخصني كده 

عم سعيد: يا بنتي انا عمري ما رخصتك ابدا ولا يرضيني ارخصك وما اعتقدش ابدا ان ايمن بيفكر كده او انه بيحب شكلك هو مش من النوعيه دي ابدا 

بس لو انتي ده احساسك وعايزه تتطلقي حاضر هجيبه واكلمه و

قاطعته: بالله عليك ما تتكلم معاه ابوس ايدك ما تتكلم معاه 

عم سعيد: امال يا بنتي هنعمل ايه؟  

حبيبه: تقوله بس اني عايزه اتطلق ومن غير ما توضح اسباب 

عم سعيد: ولو اعترض ولو قالي لأ ورفض؟؟؟ 

حبيبه :مش هيعترض ولا هيقول لأ...  ده ما هيصدق انها جت مني وهيوافق علي طول 

عم سعيد: ايمن بيحبك وهيتمسك بيكي 

حبيبه: ساعتها هبقي افضل معاه اوعدك هروحله وابوس ايده كمان....  ياريت يا بابا بس هو يعترض بس 

عم سعيد: يا بنتي طيب قوليله انك بتحبيه وعيزاه 

حبيبه: مش هقدر معنديش عين اقولها....  هو مش قادر يبص في وشي لانه مش هيشوف غير شكلي لما جابني عريانه والكل شافني اصحابه!! زمايله!! المجرمين!! معدش فيا حاجه مميزه معدش عندي حاجه خاصه بيه...  انا نفسي مش قادره ابص في مرايا واشوف نفسي هو هيشوفني ازاي؟؟ 

عم سعيد: يا بنتي تفكيرك ده غلط انتي غاليه وهتفضلي علي طول غاليه 

حبيبه: ده تفكيرك انت مش هو ارجوك يا بابا 

عم سعيد: حاضر حاضر يا حبيبه...  طيب واللي في بطنك؟؟ هيبقي وضعه ايه بينكم؟؟ 

حبيبه: هيبقي ابنه ووقت ما يحب يشوفه الباب مفتوح ديما بابا انا بحبه يعني عمري ما هسببله مشاكل ابدا 

عم سعيد: ربنا يصلح الحال يا رب 

عم سعيد راح تاني يوم لايمن في شغله 

ايمن: اهلا اهلا بحضرتك يا عمي خير؟  

عم سعيد: كنت عايزك في موضوع مهم كده نتكلم هنا ولا بره؟؟؟ 

ايمن: طيب كنت كلمتني وانا جيتلك 

عم سعيد: تدخل بيتنا؟؟؟  هو انت لسه فاكر عنوانه اصلا؟؟؟ 

ايمن: معلش يا عمي انا مشغول شويه...  قضايا الخطف كتيره قوي ورجوع حبيبه عطي الكل امل في ان اللي بيتخطفوا ممكن يرجعوا وعلشان كده مشغول كتير...  انا حسيت بالنار والوجع اللي بيحسهم اهل المخطوفين وعلشان كده حاليا ماسك قضايا خطف 

عم سعيد اتردد ومش عارف يقوله ولا لأ؟  هل هو فعلا مشغول ولا بيتشاغل؟؟؟ 

ايمن: موضوع ايه خير؟  

عم سعيد: والدتك اخبارها ايه؟  فكت الجبس ولا لسه؟  وصحتها عامله ايه؟  

ايمن: فكت الجبس من بدري والحمد لله كويسه...  وبعدين دي كل يوم والتاني مع حبيبه في البيت عندكم ولا ايه؟  

عم سعيد: طيب الحمدلله...  هو انت ناوي ترجع مراتك بيتك امتي فات اكتر من شهر اهو وهيا الحمدلله كويسه ووالدتك برضه كويسه؟ ؟ ؟  

ايمن مش عارف يقول ايه؟  او يبرر لابوها بايه؟  يقوله ازاي انه مش هيقدر يواجه حبيبه وهيا مش واثقه فيه؟  يقوله ازاي ان هو نفسه ثقته في نفسه اتهزت؟  يقوله ازاي انه مش هيقدر يضم حبيبه لحضنه وهيا بتلومه انه معرفش يحافظ عليها او يحميها؟؟ 

عم سعيد: هو للدرجه دي سؤالي صعب؟؟؟ 

ايمن: مش حكايه صعب 

عم سعيد: امال حكايه ايه؟  

ايمن: الحكايه اني مشغول زي ما قولتلك ومش عايز اخدها البيت واسيبها طول النهار والليل لوحدها انا تقريبا مش بدخل البيت وهيا اكيد عارفه الكلام ده من ماما فهتزهق وعلشان كده سايبها عندكم ولا انتو مش عايزينها؟؟؟ 

عم سعيد: انا بيتي مفتوح لبناتي علي طول 

فكر عم سعيد ان بنته فعلا كان عندها حق ايمن مش عايزها في ببته!!!! 

عم سعيد: شوف يا ابني انا فتحتلك بيتي وممكن اكون جبرتك فعلا تتجوز بنتي 

ايمن: عمي لزمته ايه الكلام ده؟  

عم سعيد: ما تقاطعنيش لو سمحت....  انت اتجبرت تتجوز بنتي وهيا كمان اتجبرت لانها طول عمرها بتسمع كلمتي وانتو اتجوزتو وعشتو مع بعض كويسين بس اهو واقفين في نص الطريق وكل واحد فيكم مشي من اتجاه 

ايمن: انا مش فاهم حضرتك عايز تقول ايه؟  

عم سعيد: حبيبه طالبه الطلاق 

عم سعيد قالها علي طول لانه مش عارف ولا يزوقها ولا يقولها علي مهله... 

ايمن متوقعش ابدا انها تطلب الطلاق ابدا ابدا 

للدرجه دي هيا بيعاه؟؟؟  للدرجه دي مش قادره تتقبله او تسامحه؟؟؟  هو غصب عنه لو طلبوا حياته مكنش اتأخر نهائي؟؟؟  للدرجه دي يا حبيبه بايعاني؟؟؟؟ 

عم سعيد: انت ساكت ليه؟  

عم سعيد حس هنا ان ايمن اتصدم واتوجع وحس قد ايه هو بيحب بنته؟؟؟؟ 

ايمن: مش عارف حضرتك مستني مني اقولك ايه؟  هو المفروض اقول ايه اصلا دلوقتي؟؟ 

عم سعيد: هيا طالبه الطلاق وانت بعيد عنها اهوه وسايبها هتفرق في ايه بقي؟  

ايمن: هو كل واحد الشغل ياخده شويه مراته تطلب الطلاق؟؟؟ 

عم سعيد: ايمن!  انت عارف ان ده مش السبب الرئيسي للطلاق وبلاش بقي نتكلم في مواضيع تجرح 

ايمن عارف انها مش عايزه تقولها في وشه انها فقدت ايمانها وثقتها فيه وان رجولته اتهزت قدامها 

عم سعيد: يا ابني انت ساكت ليه؟  

ايمن: حاضر يا عم سعيد اللي هيا عيزاه هنفذهولها...  هاه مبسوط كده؟  

عم سعيد: هو في حد بيتبسط في الطلاق؟؟؟  لاحول ولا قوة الا بالله 

ايمن: شوف عايزين تعملوا ايه وانا تحت امركم...  الوقت اللي يناسبها ويناسبك هات مأذون ونتطلق خلاص؟  في حاجه تانيه؟  

عم سعيد: لا يا ابني 

عم سعيد قام مشي وساب ايمن اللي الدنيا كلها ضاقت بيه...  

عم سعيد ماشي محتار مش عارف اللي عمله ده صح ولا غلط؟؟؟  كلام بنته صح واحاسيسها صح ولا متهيألها؟؟؟  الصدمه والضياع  اللي شافهم في عنين ايمن تقول عكس كلام بنته تماما؟؟  حاله الاستسلام اللي هو فيها تقول انه مغلوب علي امره؟؟  طيب ليه؟  ليه ماقالش لأ؟؟  ليه ما اتمسكش بمراته وابنه اللي لسه ما شافش النور؟؟؟  ليه مقالش انه بيحبها وعايزها ديما جنبه؟؟  الف ليه وليه ملهمش اي اجابه 

حاجه واحده بس هو متأكد منها :: ان الطلاق ده غلط وغلط جدا كمان ::

عم سعيد اول ما روح حبيبه جريت عليه 

حبيبه: عملت ايه وقالك ايه؟  

عم سعيد: وافق وقال الوقت اللي يناسبنا نجيب المأذون وهيجي يطلق 

حبيبه دموعها نزلت وعيطت جامد في حضن ابوها 

حبيبه: مش قولتلك انه هيوافق ومش هيتردد ابدا 

عم سعيد: يا بنتي انا حاسس انه اتصدم...  حبيبه ايمن بيحبك 

حبيبه: مقالكش لأ ليه؟  مقالكش هاجي اتكلم معاها واشوفها عايزه تطلق ليه ليه؟؟  مقالكش بحبها ليه؟  مقالش ولا كلمه!!!  بس قالك انه موافق عايز ايه تاني؟  يقولك بركه يا جامع انها جت منكم؟؟؟ 

حبيبه حبست نفسها في اوضتها ومش عايزه ولا تشوف حد ولا تكلم حد 

ايمن قاعد مكانه مصدوم مش عارف يعمل ايه او مش مجمع حتي وراه ايه؟؟؟  افكاره كلها ثايره ومتلخبطه 

دخل عليه احمدوبيكلم فيه وهو ما بيردش نهائي 

احمد: ايمممممن يا ابني فيييينك؟؟ 

ايمن بصله: ايه؟  

احمد: بقالي ساعه بتكلم في ايه مالك؟  انت فين؟  

ايمن: حبيبه عايزه تطلق 

احمد: نعم؟  مين قالك التخاريف دي؟؟  دي كانت هتموت عليك وانتو في المستشفي..  ما تصدقش التخاريف دي؟  ده حد بيوقع بينكم 

ايمن: ابوها بيوقع بينا؟؟؟  ابوها لسه ماشي وهو قالي انها عايزه تطلق 

احمد: وانت قولتله ايه؟  

ايمن: قولتله اللي يريحها 

احمد: وانت ما صدقت ولا ايه؟  

ايمن: ما صدقت ايه؟  انت بتخرف؟؟  بس مش هجبرها تعيش معايا غصب عنها 

احمد: انت عبيط يا ايمن ولا ايه؟  هو حد قالك تجبرها؟؟  بس الصح انك تتمسك بيها شويه...  تحسسها ان لها قيمه!! علي الاقل  تتكلم معاها وتشوفها عايزه تطلق ليه؟  ده اضعف الايمان..  مش يقولولك طلقها تقول حاضر...  دي ملهاش غير معني واحد انك ما صدقت وقولت الحمد لله انها جت منهم وخصوصا وانت راميها في بيت اهلها كده 

ايمن: انا مش راميها 

احمد: امال تسميها ايه؟  واحد ودي مراته بيت ابوها وسابها هناك يبقي ده ايه؟  مش عايزها في بيته وخصوصا بعد اللي حصلها 

ايمن:  قصدك ايه؟  

احمد: قصدي انها معدتش في المستوي المطلوب لتطلعاتك...  معدتش النقيه الطاهره اللي تستاهل تبقي في بيتك 

ايمن: اسكت يا احمد اسكت....  انت مش فاهم اي حاجه 

احمد: طيب يا ابو المفهوميه انت فهمني 

ايمن شرح لايمن هو بيفكر ازاي وهو حاسس بايه واحمد فضل يقنعه بوجهه نظره 

احمد: ايمن انت لازم تقعد انت وحبيبه تتكلموا مع بعض تسمعها وتسمعك قبل ما تاخد الخطوه دي 

ايمن سابه ومشي وروح وامه اول ما شافته حست ان في حاجه مش مظبوطه 

فاطمه: في ايه مالك؟  

ايمن: ماليش انا داخل ارتاح شويه 

فاطمه: طيب يا ايمن ما انش الاوان بقي تجيب مراتك تنور بيتك تاني؟؟؟ 

ايمن: لا ما انش الاوان 

فاطمه: ليه بس يا ابني؟  

ايمن :امي حبيبه طالبه الطلاق؟  اسكتي بقي 

ايمن سابها ودخل اوضته وهيا وراه 

فاطمه: ماهو لما ترميها بالطريقه دي لازم تطلب الطلاق امال انت فاكر ايه؟  هتيجي تبوس رجلك وتقولك والنبي رجعني بيتك؟  انت كنت متخيل ايه؟  كل يوم تسألني عليك وانا كل يوم بكدبه جديده وانت ولا انت هنا عايز اييه ومستني ايه؟  

ايمن: ارجوكي انا مش مستحمل ارجوكي 

فاطمه: انت تروح تجيب مراتك حالا انت فاهم؟  

ايمن: لا يا امي مش هجيبها 

فاطمه: مش هتقعد في بيتي غير وهيا معاك؟  

ايمن: نعم؟  انتي بتطرديني؟؟؟ 

فاطمه: ايوه لما تبقي غبي ومتخلف كده وتطلق مراتك ام ابنك اللي لسه جاي اطردك ايوه؟؟ 

ايمن: حاضر يا امي 

فاطمه: هتجيب مراتك؟  

ايمن: لا هسيبلك البيت 

ايمن سابلها البيت ومشي وهيا بتنادي عليه بس ما بيردش 

اول مره يخرج بالشكل ده من بيته؟  اول مره امه تنادي عليه  وما يردش عليها؟  اول مره يحس بالوجع اللي جواه ده؟  مش عارف يعمل ايه ولا يروح فين؟  

الاذان اذن فراح علي اقرب جامع وصلي وقعد فيه 

سميه في البيت كل شويه تدخل لحبيبه تحاول تخرجها او تتكلم معاها بس حبيبه رافضه تسمعلها تماما 

تليفونها رن برقم غريب فردت 

سميه: السلام عليكم ورحمه الله وبركاته 

# وعليكم السلام ورحمه الله وبركاته 

سميه: ايوه مين حضرتك؟؟ 

# انا احمد زميل ايمن جوز اخت حضرتك 

سميه: اه افندم؟  

احمد: ينفع اقابلك؟؟  

سميه: نعم؟  انت بتهرج حضرتك ولا ايه؟  

احمد: لا ابدا انا بس محتاج اتكلم مع حضرتك 

سميه: بخصوص ايه ان شاءالله؟  

احمد: بخصوص ايمن وحبيبه....  انا شايف ان طلاقهم ده اكبر غلط...  

سميه: قول لصاحبك الكلام ده 

احمد: ايمن له وجهه نظر لو سمعتيها هتعذريه...  انا مش عايز حبهم ده ينتهي كده بسبب سوء تفاهم...  وما ينفعش اكلم حبيبه نفسها واطلب اشوفها من وري ايمن ولو قلتله هيرفض ومش هيخليني اكلمها وفي نفس الوقت ما ينفعش اشوفهم بيهدوا حياتهم كده وانا اقدر امنع ده واقف اتفرج فملقتش قدامي غيرك انتي....  كان ممكن اكلم عم سعيد بس حبيبه ممكن ما تسمعلوش لانه اب وهيتكلم بصيغه الاب لكن انتي صحبتها قبل ما تكوني اختها وده انا حسيته وانتو في المستشفي...  وبراحتك انتي في الاخر 

سميه مش عارفه تقوله  ايه؟عمرها ابدا ما خرجت تقابل شاب قبل كده؟  وعمرها ما كدبت قبل كده ولا تقول لابوها ايه وهيا خارجه؟؟  وفي نفس الوقت ما ينفعش فعلا ما تعملش حاجه؟  

احمد: حضرتك لسه موجوده؟؟ 

سميه: ايوه موجوده بس مش عارفه اقول لحضرتك ايه؟  

احمد: خدي وقتك وقرري...  انا هستناكي بكره  في الكافيه اللي قصاد الشارع اللي فيه شغلك حضرتك بتروحي الساعه 9 وبتخلصي الساعه 2....  الساعه 2 ان شاءالله هكون في الكافيه وحضرتك براحتك تيجي او لأ؟  سلام عليكم 

سميه طول الليل هتتجنن تروح ولا لأ؟  قامت تشرب وعدت من قدام اوضه حبيبه سمعتها بتعيط فدخلتلها 

سميه: وبعدين معاكي طيب خافي علي اللي في بطنك مش كده يا حبيبه؟  

حبيبه بعياط شديد: ايمن حبيبي هيطلقني يا سميه هيطلقني.... 

سميه: انتي اللي طلبتي منه الطلاق 

حبيبه: كنت متخيله انه هيقول لأ!!!  هيجي ويقولي يالا بيتنا!!!  هيقولي حتي علشان خاطر اللي في بطني...  هيقول اي حاجه غير انه يوافق....  متخيلتش ابدا انه يوافق ابدا يا سميه 

فضلت تعيط علي حجر اختها لحد ما نامت وهنا سميه اخدت قرار ان لو في ايدها اي حاجه تعملها مش هتتأخر ابدا ابدا 

ايمن راح عند احمد يبات عنده واول ما دخل 

ايمن: كلمه واحده منك همشي خلاص؟  

احمد: هو انا فتحت بوقي اصلا...  بس انت جاي ليه دلوقتي؟  

ايمن: امي طردتني خلاص ارتحت 

احمد: انت عايز تضرب علي دماغك يمكن تفوق مش تطرد 

ايمن: انا غلطان اني جيتلك سلام 

احمد: خلاص خلاص ادخل ريح جوه ادخل مش هتكلم نهائي اهوه 

عمل حركه انه قفل بوقه تماما 

@ مين يا احمد؟  

احمد: ده ايمن يا بابا 

ابو احمد: يا اهلا بيك يا ابني اتفضل عاش من شافك...  حمدلله علي سلامه مراتك والله كنت بدعيلها في كل صلاه ترجعلك يالا الحمد لله 

ايمن: تسلم يا عمي ربنا يخليك 

ابو احمد: احضرلكم عشا خفيف كده 

احمد: يا سلام تبقي راجل ميه ميه 

ايمن: لا يا عمي تسلم 

احمد: سيبك من الراجل ده ده فقري...  كام ساندوتش كده من ايديك اللي تلفف حرير دي 

باس ايد ابوه 

ابو احمد: ماشي يا بكاش بس علشان صاحبك اللي جاي وشايل الدنيا فوق راسه....  ايمن هونها تهون 

ايمن: ان شاءالله يا عمي ان شاءالله 

ابوه دخل وسابهم 

ايمن: نفسي اعرف انت مش ذوق كده زي ابوك ليك؟ 

احمد: وانت مش ناصح زي امك ليه؟  

ايمن: امك؟؟؟  في حد يقول امك؟؟ 

احمد: زي ابوك دي زي دي ولا ايه؟  

عدت الليله واحمد فعلا ما اتكلمش مع ايمن خالص 

احمد: بقولك 

ايمن: قول 

احمد: مامتك كلمتني من شويه وقولتلها انك عندي خلاص؟  

ايمن: طيب كويس...  الصبح ان شاءالله هبقي اروح اصالحها 

احمد: مش هتصالحك غير لما تروح ترجع مراتك هتروحلها؟  

ايمن: تصبح علي خير يا احمد 

بعد شويه كتير 

احمد: ايمن انت نمت؟  

ايمن: هو في حد يبقي مع شكلك ده وينام؟؟  عمال تتقلب يمين شمال لما طهقتني 

احمد: هيا حبيبه مكنتش بتتقلب فوقك ولا ايه؟  

ايمن ما ردش بس افتكر حبيبه ونومها في حضنه 

#######              ###-----#######

ايمن: نامي بقي 

حبيبه: مش مرتاحه 

ايمن: ليه؟  

حبيبه :شعري مضايقني  وانت مصر تخليه مفرود 

ايمن: طيب افرديه علي المخده 

حبيبه: ليه بقي وانت هتنام ازاي؟  

ايمن: هنام فوقه؟؟  

حبيبه: هيضايقك 

ايمن: يضايقني اني انام علي حرير ( اخد نفس طويل) وبريحته دي اللي بقت ادمان 

حبيبه ضحكت وفردت شعرها فعلا علي المخده وايمن نام فوقه وباصين لبعض 

حبيبه: هو احنا ممكن ننام واحنا باصين لبعض كده؟  

ايمن: انتي عايزه تنامي؟ 

حبيبه: انا عايزه اشبع منك 

ايمن: لو عرفتي الحقيني بالطريقه لاحسن انا ديما جعان....  وعلي رأي الشاعر 

نعم انا مشتاق وعندي لوعة 

ولكن مثلي لا يذاع له سر 

اذا الليل اضواني بسطت يد الهوى

واذللت دمعا من خلائقه الكبر

تكاد تضيء النار بين جوانيحي

اذا هي اذكتها صبابات والفكر

حبيبه: مكنتش اعرف انك من هواه الاشعار قول تاني 

ايمن: في اخر القصيده بيقولها

 اذا مت ضمأنا فلا نزل القطر

حبيبه: وايه هو القطر اللي هيرويه؟؟ 

ايمن: قربه من حبيبته...  (مسك ايدها وباسها) او ده (باسها في خدها برقه) او ده ( باسها في شفايفها) او ده 

حبيبه: وايه كمان؟  

ايمن قالها ايه كمان بس مش بالكلام بطريقه العشاق 

#-######_________#########_______##

احمد: انت نمت ولا ايه؟  

ايمن: عايز ايه يا احمد ما تسيبني بقي 

احمد: بقولك ايه رأيك؟؟ 

ايمن: رأيي في ايه؟  

احمد: نجوز ابويا لامك واهو كله بثوابه 

ايمن قام اتعدل وبص لاحمد وفجأه مسك المخده وخبطه في وشه 

ايمن: اتخمد بقي اتخمد وبطل هبل اتخمد 

طلع النهار وايمن مشي واحمد نزل شغله وهو متوتر ومش عارف سميه هتيجي ولا هتطنش

سميه رايحه شغلها وهيا ماشيه 

سميه: ماما انا هتأخر شويه النهارده ماشي ورايا مشوار كده 

زينب: ماشي يا حبيبتي بس ما تتأخريش قوي 

سميه: ساعه بالكتير سلام 

خرجت بره ورجعت تاني لامها 

زينب: نسيتي ايه يا حبيبتي؟؟ 

سميه: ما نسيتش 

زينب: امال في ايه؟  

سميه: انا هتأخر لاني هقابل احمد زميل ايمن 

زينب: ايه؟  تقابليه ليه؟  

حكتلها سميه كل اللي دار بينهم 

سميه: ده كل اللي حصل ايه رايك؟  اقابله ولا لأ؟  

زينب: والله ما عارفه يا بنتي...  قابليه يمكن ربنا يكون كاتب خير...  انتي تعرفي تحافظي علي نفسك كويس وتعرفي تلزمي اللي قدامك يعاملك باحترام وادب 

روحي قابليه واسمعيه وحافظي علي ادبك واحترامك سامعاني؟ 

سميه: سمعاكي بس ما تجيبيش سيره لحبيبه لحد ما اسمعه واجي ماشي؟  

زينب: اتوكلي علي اللي خلقك 

الساعه 2 احمد كان في الكافيه ومستني وسميه جات وقابلته 

احمد: اهلا اهلا ازيك عامله ايه؟  

سميه: الحمدلله اتكلم عندك ايه تقوله؟؟ 

احمد: طيب نشرب حاجه الاول 

سميه: مقدم احمد انا مش جايه اشرب ولولا الحاله اللي سايبه حبيبه فيها مكنتش جيت ولا وافقت اقابلك فاتفضل اتكلم 

احمد: ولولا برضه الحاله اللي شايف ايمن فيها مكنتش برضه كلمتك...  بس ده ما يمنعش ان الجو حر وعطشان 

سميه: طيب اتفضل اطلب لحضرتك واتكلم 

احمد طلب الجرسون وطلب اتنين ليمون 

احمد: حبيبه طلبت الطلاق ليه؟  

سميه: صحبك وافق ليه؟  

احمد: اه بصي احنا مش هنتخانق احنا هنتناقش لحد ما نوصل لحاجه تنفعهم فما تدخليش معايا في مناظره...  اختك طلبت الطلاق ليه؟  بطلت تحب ايمن؟  او رجولته اتهزت في عنيها؟  ولا فقدت الثقه فيه؟  

سميه: لا طبعا حبيبه بتعشق ايمن بس هو اللي سايبها وما بيسألش عنها...  وعلي يدك شوفت فضلت قد ايه في المستشفي وهو ما دخلش عندها ولا مره!!!!  انا تخيلت انه مش هيخليها تفارق حضنه ابدا مش يرميها كده؟  وبعدين جابها البيت اهو من شهر ولا حتي اتصل بيها مره عايزها تعمل ايه؟  

احمد: ده نفس اللي قولته لايمن 

سميه: وقالك ايه؟  

احمد: قالي بطل هبل 

سميه: هو ايه عذره؟؟؟ 

احمد: شوفي يا سميه....  يضايقك لو قلت سميه؟  ولا باشمهندسه؟؟ 

سميه: قول اللي تقوله خليك في المهم 

احمد: شوفي يا ستي ايمن طول عمره راجل متدين وخدوم جدا وراجل قوي وعنده كبرياء رهيب..  مراته مش عارف اقولها ازاي بس مش قصدي حاجه علشان متفهمنيش غلط 

سميه: اتكلم بحريه يا احمد 

احمد فرح قوي لما سمع اسمه منها 

احمد: اوك حبيبه جميله وجميله قوي كمان...  جميله لدرجه الفتنه 

سميه: انت هتتغزل في اختي كتير؟؟؟ 

كانت غيرانه من تغزله في جمال اختها 

احمد: مش قصدي ابدا حبيبه مرات اخويا قصدي انها جميله ومنتقبه وايمن معتز بده وفجأه تتخطف ويطلب منه يوزع صورها علي كل الرجاله ودي اول ضربه لرجولته...  وبعدها يتبعتله شعرها ودي كانت تاني ضربه قسمته...  وبعد كده تغيب اسبوعين مع تفكيره طول الوقت انها ممكن تكون اتعرضت للاغتصاب بس الحمدلله محصلش بس اتحرشوا بيها ودي ضربه قاضيه لاي راجل فما بالك بقي لواحد  مراته منقبه محدش شافها قبله....  ايمن اتزلزل من جواه وثقته هو في نفسه وفي رجولته اتهزت ومتخيل او لأ معتقد ان ده تفكير حبيبه ان هو ما عرفش يحميها وانها مش واثقه فيه وانها فقدت الامان معاه وانها بتلومه علي كل اللي حصل...  ايمن مطعون في كبرياؤه ورجولته وعلشان كده وافق يطلق 

سميه: لا طبعا حبيبه مش بتفكر كده نهائي 

احمد: بتفكر ازاي؟  

سميه: حبيبه بتفكر انها الاول اتفرضت علي ايمن وهو وافق يتجوزها غصب عنه ولما لقاها حلوه كمل معاها 

بس حاليا هيا فقدت الحلاوه دي....  جمالها حيائها كبريائها دينها عفتها حتي شعرها اللي كان بيعشقه وهو علشان كده سابها 

لانه معدش متفرد بيها...  لانها معدتش تليق بيه...  لانها اتكشفت علي رجاله غيره...  حتي اصحابه وزمايله وعلشان كده هيا عايزه تبعد علشان متحرجوش قدام حد...  هيا فاهمه ان كل الميزات اللي كانت بتميزها خسرتها فبتفتحله الباب لو عايز يخرج يخرج براحته وللاسف ايمن خرج 

احمد: والله انا قلت كده لايمن وهو ما صدقنيش 

سميه: يعني ايمن بيحبها؟؟؟ 

احمد: ايمن بيعشقها 

سميه: وهيا بتعشقه...  طيب وهنعمل ايه؟  

احمد: مش عارف بصي انا عندي فكره بس مجنونه حبتين وممكن تكلفني صحوبيتي مع ايمن بس مش مهم المهم انهم يرجعوا لبعض وبعدين هحتاج لمساعدتك 

سميه: انا معاك قول وانا هساعدك 

احمد قالها علي فكرته وهيا اتصدمت منها جدا 

سميه: انت مجنون؟؟؟؟  ايمن هيقتلك مش هيخاصمك لا طبعا الفكره دي مجنونه ومتخلفه 

احمد: الفكره دي هتخليهم يتكلموا مع بعض ويرجعوا لبعض 

سميه: انت فعلا هتخسر ايمن بفكرتك دي مستعد لده؟  

احمد: مستعد هتساعديني؟؟؟ 

سميه: هساعدك 

ونكمل بالليل

استنوني 

ياتري ايه فكره احمد المجنونه؟؟؟ 

ايمن هيتقبلها ازاي؟  

احمد  فعلا هيخسر ايمن ولا هيسامحه؟ 

توقعاتكم 

حب مشروع 

الحلقة التاسعه 

 احمد قالها علي فكرته وهيا اتصدمت منها جدا 

سميه: انت مجنون؟؟؟؟  

ايمن هيقتلك مش هيخاصمك لا طبعا الفكره دي مجنونه ومتخلفه 

احمد: الفكره دي هتخليهم يتكلموا مع بعض ويرجعوا لبعض 

سميه: انت فعلا هتخسر ايمن بفكرتك دي مستعد لده؟  

احمد: مستعد هتساعديني؟؟؟ 

سميه: هساعدك بس مش هنعرف ننفذها لوحدنا؟ 

احمد: طبعا هنحتاج حد معانا شوفي تثقي في مين ورتبيلنا مكان نتقابل فيه كلنا وكلميني واهو معاكي رقمي 

سميه: خلاص ماشي اتفقنا بس صح انت جبت رقمي منين وعرفت مكان شغلي ومواعيدي ازاي؟  

احمد: امممم انا ظابط ما تنسيش...  

سميه: ايوه يعني جبته منين برضه ولا عينت حد يراقبني؟؟؟ 

احمد: لا لا ابدا....  سوري يعني رقمك جبته من تليفون ايمن اما مواعيدك فلاحظت وانتي في المستشفي مواعيدك والمكان عرفته من ايمن وسط الكلام عرضت عليه اني اوصلك وهو رفض بس يا ستي 

سميه: اممم كويس انك قولتلي علشان ابقي انبه ايمن ما يثقش فيك بعد كده 

احمد: ليه بس هو انا عملت ايه غلط؟؟؟ 

سميه: نعم؟؟؟  اخدت تليفونه من غير اذنه واخدت معلومات خاصه وبتحاول تقرب من اخت مراته كل ده وتقولي عملت ايه غلط؟؟؟ 

احمد: مش يمكن يكون غرضي شريف؟؟؟ 

سميه وقفت: اللي غرضه شريف ما بيسرقش ارقام تليفونات ويوقع صاحبه في الكلام ولولا الظروف اللي احنا فيها ولولا ماما شجعتني اسمعك مكنتش جيت قابلتك ابدا بعد اذنك 

احمد وقف: طيب اوصلك؟ 

سميه: هعتبر نفسي ما سمعتكش 

سابته ومشيت وهو هيموت عليها...  من ساعت ما شافها وهو بيحلم بيها ليل ونهار وبيتخيل انها مراته طول الوقت....  لازم بقي يفاتح ايمن...  بس ازاي وهو اللي هيعملوه ده ممكن يكلفه صحوبيته لايمن 

سميه روحت وحكت لمامتها كل اللي حصل واول ما خلصت اتفاجئت بابوها وراها 

عم سعيد: انتو اتجننتوا؟؟؟  هبل ايه ده؟  انتو معدش عندكم عقل؟؟؟  وانتي ازاي تطلعي تقابلي راجل غريب هاه؟  دي تربيتي ليكي؟؟ 

سميه: انا اسفه يابابا بس كنت مضطره وبعدين انت شايف حاله حبيبه؟  كان لازم اعمل حاجه.. 

عم سعيد: ايمن اللي لازم يعمل مش انتي 

حكتله سميه وجهه نظر ايمن وطريقه تفكيره 

عم سعيد: صاحبه اللي قالك كده؟  

سميه: ايوه ودي الطريقه اللي نقدر نجمعهم مع بعض 

عم سعيد: طيب ما نجمعهم عادي زي اي اتنين من غير الجنان ده؟؟؟ 

سميه: طيب جرب يا بابا تجمعهم ولو قدرت واتكلموا وصارحوا بعض يبقي خير لكن لو مقدرتش يبقي تساعدنا 

عم سعيد: يا بنتي فكرتكم دي مجنونه ومتخلفه 

زينب: جرب طريقتك ولو ما نجحتش يبقي نجرب طريقتهم خلاص؟  

عم سعيد: خلاص 

عم سعيد راح لحبيبه وحاول يقنعها تقابل ايمن وتقوله علي مشاعرها بس رفضت رفض تام 

وقالت لو هو عايزها يجيلها ويطلب منها ترجعله 

كلم ايمن كمان وطلب منه يتقابل هو حبيبه يتفقوا ويقرروا هيعملوا ايه بس ايمن كمان اتحجج بشغله وقال انه هيخلي والدته تيجي تشوف طلباتهم بحجه انه مشغول تماما 

حاول تاني مع الاتنين بس برضه رفضوا 

راح لسميه بنته 

عم سعيد: كلمي احمد ده وحدديلنا معاد نتقابل فيه ونشوف اخرت الجنون ايه؟  بس كلمي كمان ام ايمن تبقي معانا وتوافق علي جنانكم ده لانها لو موافقتش يبقي بلاش 

سميه كلمت الكل وحددت معاهم يتقابلوا كلهم في نفس الكافيه 

عم سعيد وزينب وفاطمه وسميه واحمد 

احمد شرحلهم خطته وخلص وكلهم ساكتين 

احمد: ايه ساكتين ليه؟  

فاطمه: انت عارف انك ممكن تخسر صاحب عمرك في حركه زي دي؟  

احمد: ممكن بس اعتقد ان ايمن لما يعرف انا عملت كده ليه هيسامحني 

فاطمه: لا ما تعتقدش ايمن مجروح وانت بتضغط علي كل جروحه 

احمد: لو هيرجعوا لبعض يبقي اي حاجه تانيه مش مهم 

سميه بدأ يعجبها احمد وحبه واخلاصه لصاحبه 

عم سعيد: طيب نفرض عملنا كل ده وما اتكلموش؟؟  يبقي ساعتها موت وخراب ديار 

احمد: اعتقد يا عمي ان اي اتنين بيحبوا بعض لو اتواجدوا مع بعض لازم يتكلموا...  دي فطره بين الراجل والست ولا ايه؟  

عم سعيد: ده في الطبيعي لكن مش في الظروف دي 

احمد: عمي الموضوع من اوله لاخره مخاطره وهنخاطر وربنا يستر في النتايج هنعمل اللي نقدر عليه ونقول يارب 

عم سعيد: يارب...  هتنفذ امتي؟  

احمد: اظبط بس كل حاجه وابلغكم ماشي؟  المهم ان الكل معايا؟  

احمد بدأ يجهز لخطته المجنونه وهما بيساعدوه 

ايمن غرق نفسه في شغله وما بيديش لنفسه اي فرصه للتفكير...  مامته كلمته وخلته يرجع البيت واتأسفلها انه زعق او سابها او علي صوته 

في شغله المدير استدعاه 

ايمن: افندم 

المدير: فاكرابن  سعيد احمد محمد؟؟؟ 

ايمن: فاكره هو ده يتنسي بس ده اتحكم عليه واتسجن خلاص 

المدير: للاسف هرب يا ايمن 

ايمن: ايه هرب؟؟؟  ازاي وامتي؟؟؟ 

المدير: رجالته ساعدوه وانا كلفت كذا ضابط بيحاولو يرجعوه بس المهم دلوقتي انت 

ايمن: انا ايه؟  مش فاهم؟ 

المدير:هو ساب ورقه ليك بيهددك فيها وبيهدد بيتك 

ايمن :بيتي؟؟؟  فين الورقه دي؟  

المدير عطاله الورقه وقراها 

" انت سبق ودمرت حياتي وبيتي واتسببت في موت ابويا  واخدت مني اولادي ومراتي ودلوقتي جه وقت الحساب 

اللي انت اخدته مني انا هاخده منك...  خلي بالك يا شطور من مراتك واللي في بطنها "

ايمن: وبعدين انا لازم احط حراسه عليها او اجيبها او مش عارف اعمل ايه؟؟!

المدير: اهم حاجه تهدي انا فعلا حطت حراسه علي بيت ابوها وحاليا احمد هيجي وهتشوفوا هتعملوا ايه 

احمد خبط ودخل 

احمد: خير يا افندم 

ايمن:ابن  سعيد هرب وبيهددني انه يأذي حبيبه؟  

احمد: ايه؟  هرب امتي؟  وازاي ياذيها؟؟ 

ايمن: معرفش 

احمد: طيب مستني ايه احنا لازم نحط حراسه علي بيتها وانت روحلها 

ايمن: اروحلها؟؟ 

احمد: نقعد بره انا وانتي مش لازم ندخل 

مشيوا الاتنين بس احمد استأذن من ايمن لانه نسي تليفونه فطلع يجيبه واتصل بعم سعيد 

احمد: في مشكله حصلت في الشغل ادعيلنا بقي ربنا يسترها لان شكلها هتولع بجد ربنا يستر هنأجل خطتنا شويه ماشي!؟؟ 

عم سعيد: في ايه اللي حصل قولي،.. 

احمد :لا ما تقلقش 

عم سعيد: ما اقلقش امال عربيات البوليس اللي بره دي ايه؟  

احمد: حراسه بس المهم خلي بالكم من حبيبه قوي يا الله اقف جنبا واسترها ادعي يا عم سعيد ربنا يستر ايمن مش حمل صدمات تانيه 

عم سعيد: صدمات ايه؟  يا ابني فهمني ايه اللي بيحصل؟  

احمد: انا اتأخرت لازم انزل لايمن ما تقلقش انت بس ادعي بس ربنا يسترها 

احمد نزل لايمن 

ايمن: كل ده بتجيب التليفون؟  

احمد: يالا بينا 

ايمن: كان المفروض نروح ندور علي ابن  سعيد ده مش نروح نقف حراسه؟؟ 

احمد: عندك استعداد تسيب مراتك امانه في ايد حد؟؟  ساعتها بجد بقي ما تلومش غير نفسك 

ايمن: ربنا يسترها يالا دوس بنزين شويه 

احمد وهو سايق سرحان هيعمل ايه في خطته وبعدين المشاكل دي ايه؟  ماهما ممكن يرجعوا من الظرف ده كده بس ومالهاش لازمه خطته؟؟؟  خوف ايمن علي حبيبته كفيل انهم يقعدوا مع بعض يبقي مش لازم خطته....  فعلا خطته ملهاش لازمه 

فجأه حد ظهر قدامه وداس فرامل والعربيه لفت حوالين نفسها لحد ما وقفت 

احمد اتخبط جامد في دركسيون العربيه وايمن الحزام حماه 

نزل ايمن ولف ينزل صاحبه ويطمن عليه احمد كان مغمي عليه 

ايمن يدوب فتح الباب طلعلوا اربع رجاله ضخمه واتخانقوا معاه وضربوه علي راسه اغمي عليه وشالوه 

احمد فتح عنيه ملقاش اثر لايمن واتجنن ومش عارف يعمل ايه؟  راح بسرعه لبيت حبيبه يشوفه راح وسابه ولا ايه؟  

اول ما دخل عندهم 

عم سعيد: في ايه مالك؟  

احمد: حبيبه فين؟  

عم سعيد: فوق في اوضتها 

احمد: ممكن تتأكد؟؟ 

عم سعيد جري علي فوق يتأكد ان بنته موجوده؟  فتح الباب والاوضه كانت فاضيه 

عم سعيد بينادي بصوته كله: حبيبه حبيبه؟  

سهيله: حبيبه خرجت هيا وماما وسميه 

عم سعيد: راحو فين؟  

سهيله: عندهم معاد مع الدكتوره انت نسيت مش ماما قالتلك في الظهر؟؟؟ 

عم سعيد: اه فعلا نسيت 

نزل لاحمد وقاله 

احمد: طيب ممكن تتصل بالحاجه تتطمن عليها؟  

عم سعيد اتصل بس محدش رد علي تليفون حبيبه واتصل علي تليفون مراته وردت 

عم سعيد: حبيبه فين يا زينب؟ 

زينب: احنا كشفنا واتطمنا ودخلت الحمام ومعاها سميه  وانا مستنياهم اهوه وهنيجي علي طول 

عم سعيد: طيب طمنيني 

احمد: نروح نجيبهم ولا ايه؟  

عم سعيد: براحتك 

احمد: الافضل نروحلهم وبالمره نشوف ايمن راح فين؟  

######_____-########_____--#####

ايمن بيفتح عنيه مش عارف هو فين؟  بس مربوط علي كرسي ومش قادر يتحرك نهائي 

في نور خفيف قوي في الاوضه مش مخليه شايف كل اللي حواليه 

فجأه سمع صوت حد معاه في الاوضه 

ايمن: مين هنا؟  مين هنا؟  

## اه اااااه ااااه 

ايمن: حبيبه؟؟؟  حبيبه؟  حبيبه ردي عليا...  حبيبه انتي كويسه؟  حبيبه 

ايمن بيحاول يتحرك هيتجنن مراته هنا جنبه وهو متربط 

حبيبه: انا تعبانه؟؟؟  انا فين؟  اااه 

ايمن: في ايه مالك؟  

حبيبه بتعيط: اااه 

ايمن: حبيبه ارجوكي قوليلي مالك؟  حبيبه 

حبيبه: جسمي بيوجعني وبردانه قوي وايديا بتوجعني اااه 

ايمن: طيب تقدري تقومي تجيلي 

حبيبه: اااه لأ انا مربوطه...  انا فين يا ايمن؟  

ايمن: مش عارف...  مش عارف احنا فين؟  

حبيبه: طيب تعال انت عندي 

ايمن حاول يتحرك بس مربوط جامد مش قادر نهائي 

ايمن: انا كمان مربوط يا حبيبه 

حبيبه: الجو برد قوي....  انا بردانه قوي يا ايمن بردانه 

بتتكلم كأنها هتنام 

ايمن كان بيعرق لان الاوضه حر جدا ومستغرب هيا ازاي بردانه 

ايمن: حبيبه خليكي صاحيه ما تناميش وبعدين الاوضه حر جدا 

حبيبه: انت علي طول كده ما بتحسش بالبرد ابدا 

ايمن: بتبقي في حضني ازاي ابرد وانتي في حضني 

حبيبه بتحاول ما تنامش بس بتنام 

ايمن: حبيبه كلميني ما تناميش حبيبه 

حبيبه: مش قادره هنام شويه وصحيني 

ايمن: لا يا بيبه ما تناميش كلميني 

حبيبه: اكلمك في ايه؟  

ايمن: اي حاجه؟  كنتي فين مثلا قبل ما تيجي هنا؟  

حبيبه: كنت عند الدكتورة بطمن علي ابننا 

ايمن ابتسم وزعل في نفس الوقت كان نفسه يشاركها اللحظات دي...  نفسه يكون معاها 

ايمن: وعملتي ايه؟  اتطمنتي؟ 

حبيبه: كان نفسي تكون معايا وتمسك ايدي وانا بشوف ابننا...  انا حامل في ولد يا ايمن...  

ايمن ما ردش والاتنين سكتوا كتير 

حبيبه: انت سكت ليه؟  احنا هنموت هنا صح؟  

ايمن: الموت والحياه دي حاجه بتاعت ربنا مش بايدينا 

وبعدين هتفرق ايه نموت ولا نعيش؟؟ 

حبيبه: علي رايك المهم اننا مع بعض نموت او نعيش 

ايمن انا خلاص دفيت 

ايمن: طيب كويس 

سكتوا وحبيبه نامت من التعب او من الاطمئنان ان ايمن معاها وهيحميها 

ايمن هيتجنن من التفكير ازاي هيخرج من هنا او هيتصرف ازاي ومش لاقي حل نهائي 

ايديه اتعورت من كتر ما بيحاول يفك الحبل 

النهار طلع والاوضه نورت شويه بس برضه معرفش اي حاجه جديده 

الباب اتفتح ودخل حد مغطي وشه  وحبيبه صحيت علي فتحت الباب فقعدت مكانها وبصت لجوزها

الراجل: الفطار اتفضلوا.. 

ايمن: انتو مين وعايزين ايه؟  

الراجل: هو انت مش عارف احنا مين؟؟؟  علي العموم اول ما الباشا يجي هيجيلك هنا بنفسه ( بص لحبيبه)  وهيعرفك هو مين وعايز ايه؟؟؟

حبيبه خافت وكشت مكانها وبصت لجوزها 

ايمن : لو باقي علي حياتك فكني او فك مراتي وخليها تمشي من هنا وانا اوعدك اني هسيبك 

الراجل: اههههههه انت بين ايدينا وبعدين مراتك جميله قوي وحرام الجمال ده تاخده لوحدك 

ايمن: علي جثتي ان حد يلمسها 

الراجل: وماله جثتك جثتك فيها ايه؟  ماهو في الاول وفي الاخر النتيجه واحده فما تستعجلش علي جثتك دي... بصي انا فكك تاكلي وتأكليه واياك تحاولي تستظرفي هموتهولك قدام عنيكي فاهمه؟  

حبيبه: فاهمه 

الراجل فكها فعلا ووقف وري ايمن وفي ايديه مسدسه 

حبيبه اخدت الاكل وراحت لايمن 

حبيبه: انت متعور في ايديك 

ايمن: ما تشغليش بالك انتي 

حبيبه: ممكن تفك الحبل ما فوق الجرح لو سمحت اربطه بطريقه تانيه ارجوك 

الراجل: لا يا نحنوحه وبعدين مش هيجراله حاجه انجزي قدامك دقيقتين تاكلي وتأكليه فانجزي 

بصت لايمن 

ايمن: انا مش عايز كلي انتي 

حبيبه: انت محتاج تاكل انت فاهم؟  لازم تكون قوي وبصحتك 

ايمن فهم انها عيزاه ياكل علشان يقدر يخرجهم من هنا واكل علشان ما يخيبش املها فيه تاني 

اكل ساندوتش وهيا اكلت وبعدها الراجل ربطها تاني 

وسابهم وخرج 

حاله صمت مسيطره عليهم....  كل واحد في احلامه الخاصه وافكاره الخاصه 

حبيبه نفسها تسأله هو بعد ليه؟  وهو نفسه يسألها هيا طلبت الطلاق ليه؟ ؟  

اخر النهار 

حبيبه: ايمن انا عايزه اعمل حمام 

ايمن: طيب 

ايمن نادي علي الراجل علي امل انه يكون موجود ويسمعهم 

وبعد شويه الراجل جاله 

ايمن: عايزين حمام ممكن ولا ايه؟؟ 

الراجل بيفكر: ثواني هشوف 

طلع ورجع بعد شويه 

الراجل: مراتك هتخرج تروح الحمام ولما تخلص هتفضل معانا لحد ما انت تدخل وترجع علشان بس لو حاولت تقل بعقلك وتاخدك البطوله هتحاول تعمل حاجه هنرجعهالك نصين رقبتها مفصوله عن جسمها 

الراجل فعلا فك حبيبه واخدها وشويه وجه فك ايمن ودخله الحمام 

ايمن حاول يعمل اي حاجه بس الحمام مفيهوش اي مخارج او حتي شبابيك 

خاف يعمل اي حاجه فيأذوا مراته بجد 

رجعوه الاوضه تاني جه يربط الحبل علي ايديه لقاها متعوره جامد ومعرفش يعمل ايه؟  جابله كلبشات ولبسهاله بدل الحبل 

ايمن: مراتي فين؟  

الراجل: هنجيبهالك 

ايمن: احنا هنفضل هنا لامتي؟  

الراجل: لحد ما الباشا يجي 

الراجل خرج وجاب حبيبه وربطها تاني 

حبيبه: انت كويس؟ 

ايمن: انا كويس المهم انتي حد ضايقك؟؟ 

حبيبه: لأ 

فضلوا كتير ساكتين ساعه! اتنين! الفجر بيأذن 

حبيبه: انت نايم؟  

ايمن: لأ

حبيبه: بتفكر في ايه؟  

ايمن: في طريقه نخرج بيها من هنا 

حبيبه: انا مش بفكر غير في حاجه واحده 

ايمن: ايه هيا؟؟؟ 

حبيبه: انت ليه معدتش عايزني؟؟  امتي بطلت تحبني؟؟ 

ايمن: انا مش عايزك؟؟؟  انا بطلت احبك؟؟؟؟  هههههههه 

حبيبه: بتضحك ليه؟  

ايمن: بضحك ليه؟؟؟  اصل انا يا حبيبه اللي بعت ابويا ليكي وطلبت الطلاق صح؟  

حبيبه: انا طلبت الطلاق بس انت وديتني بايدك لحد الباب ده وقفلت كل حاجه في وشي فمكنش قدامي غير الباب ده اخبط عليه وانت فتحت 

ايمن: انا ما وصلتكيش لاي حاجه...  انا كنت متكتف عاجز مش في ايدي حاجه 

حبيبه: انت بتتكلم عن ايه؟  انت ليه وافقت تطلقني؟ 

ايمن: وانتي ليه طلبتي الطلاق؟؟؟ انا مش هجبرك تعيشي معايا غصب عني 

حبيبه: زي ما ابويا جبرك تعيش معايا غصب عني؟؟؟

ايمن: ابوكي ما جبرنيش ابوكي خيرني وانا اخترت وبعدها انا اخترت اكمل معاكي 

حبيبه: ولما اخترت تكمل ليه بتسيبني؟؟ 

ايمن: انتي اللي بتسيبيني انتي 

حبيبه: انت سيبتيني الاول...  سيبتيني في المستشفي ورفضت تاخدني بيتك....  سمعتك وانت بتقول لماما مش عايزها في بيتي ومش هينفع....  ورمتني في بيت ابويا ولا سألت عليا يبقي مين ساب مين؟؟؟ 

ايمن: وانا برضه سمعتك....  سمعتك وانتي بتكلمي الدكتوره وبتحكيلها اللي حصلك وبتحكيلها ازاي اتحرشوا بيكي وازاي كل شويه ياخدوا جزء منك حاجه ورا حاجه بتضيع وازاي انتي بتناديني وازاي انا معرفتش ارجعك بسرعه...  كنتي عيزاني اعمل ايه؟  احط عيني في عينك ازاي؟؟؟

حبيبه: وعلشان كده سيبتيني؟؟  لانهم اتحرشوا بيا،؟؟؟  لاني معدتش علي قد المستوي؟؟  معدتش فوق مستوي الشبهات؟؟؟  بقيت مشبوهه صح؟؟  معدتش ملكيه خاصه ليك؟؟؟  غيرك شاركك ولو في جزء بسيط من ممتلكاتك؟؟؟  وشي كمان كان مليان جروح وشعري وقصوه وشكلي مفيهوش ريحه الجمال؟؟؟ فازاي فعلا هتبصلي؟؟؟ 

ايمن: ازاي اقدر اشوف لوم وعتاب في عنيكي هاه؟  مش ازاي هبصلك؟؟؟  انا السبب في اللي حصلك انا مكنتش راجل كفايه وحميت بيتي ومراتي ومكنتش حتي ظابط كويس وعرفت ارجعك بسرعه...  انا السبب في كل حاجه...  وحتي دلوقتي انا السبب؟  ده ذنب شغلي وعلشان كده مقدرتش اواجهك...  مقدرتش اقف قصادك واحس ان رجولتي قلت في نظرك او انك فقدتي ثقتك فيا او انك فقدتي احساسك بالامان وانتي معايا؟  كنت محتاج وقت...  كنت محتاج وقت اعرف اواجه فيه نفسي واتصالح معاها وبعدها ااقدر اقف قصادك واحاول اخليكي تسامحيني وترجعيلي بس انت فاجئتيني بالطلاق 

حبيبه: انا عمري ما لمتك ابدا ابدا ووعمري ما ثقتي فيك اتهزت....  ايمن انا امبارح نمت....  نمت بعمق لحد الصبح وانا مخطوفه ومتكتفه عارف ليه؟  لانك انت موجود...  لو في حتي سكينه علي رقبتي وانت قصادي مش هتهمني!!!!  انا الدنيا كلها في كفه وانت لوحدك في كفه....  طلبت الطلاق لاني خفت تكون مجبر عليا وتكون مش شايفني لايقه بيك بعد اللي حصل وانك تكون مستعر مني...  واني معدتش جميله في نظرك؟؟؟  فقلت افتح لك الباب تخرج 

ايمن: هو ده رأيك فيا؟؟؟؟  انا راجل ببص للجمال!؟؟؟  

هو انتي متخيله اني كملت معاكي علشان لقيتك جميله؟؟؟  جمالك ده كان بونص بس مش اساس 

انا حبيتك...  حبيت البنت اللي طاعت ابوها ووافقت تتجوز من اختياره واحد ما تعرفوش....  حبيت البنت المنتقبه اللي يوم فرحها وعلي الرغم من جمالها الي انها احتفظت بيه لجوزها بس....  حبيت البنت اللي يوم فرحها طلبت من جوزها يقرالها قران وقامت معاه الليل...  حبيت اخلاقك واخر حاجه فرقت معايا كان  شكلك اللي بتتكلمي عنه ده....  لو انا حبيت شكلك يا حبيبه كنت نمت معاكي من اول يوم مكنتش اديتك فرصه تحبيني اكتر واحبك علشان تكون اول مره لينا حاجه مميزه مش تقضيه واجب وخلاص...  انا كنت فاكرك عارفاني اكتر من كده؟؟؟  مش انا الراجل اللي يسيب مراته ابدا علشان شعرها ولا كام جرح في وشها ولا ازمه او مشكله اتعرضتلها...  انا كنت محتاج وقت بس مجرد وقت..  وقت اقف فيه قصادك واقولك انا راجل واستاهلك وانتي مديتينيش الوقت ده 

حبيبه عيطت: انا اسفه اسفه اسفه انا بحبك اكتر من روحي يا ايمن وكل اللي كنت محتاجاه منك هو حضنك اللي بخلت عليا بيه؟؟؟ 

ايمن: انا كنت محتاج الحضن ده اكتر منك يا حبيبه...  انا مفارقتكيش نهائي...  مفارقتش باب اوضتك ابدا وعيني علي طول كانت عليكي واول ما تنامي ادخل واضمك وابوسك واتطمن عليكي بس سامحيني بقي معرفتش اقولك ده... 

حبيبه: انت اللي سامحني اني طلبت الطلاق 

سكتوا الاتنين شويه 

حبيبه: هو احنا لو خرجنا من هنا هنروح فين؟؟ 

ايمن: انت عايزه تروحي فين؟  

حبيبه: اي مكان انت فيه؟  

ايمن: يبقي لو خرجنا من هنا هنروح بيتنا 

هنا سمعوا دربكه كتيره وصوت رصاص  وصوت احمد بينادي فايمن رد عليه 

ايمن: احمد انا هنا تعال هنا يا احمد 

احمد كسر الباب ودخل وفك ايمن بسرعه وجه يفك حبيبه فايمن زقه 

ايمن: انا هفكها 

ايمن بيفكها وعنيهم متعلقه ببعض لحد ما فكها قامت لحضنه وهو ضمها قوي.... اخدها في حضنه قوي وكأنه غايب سنين عن روحه...  وكأنه عيل اخيرا لقي حضن امه اللي غايبه عنه 

احمد اتحرج وخرج بره وسابهم 

ايمن: وحشتيني قوي قوي 

حبيبه: وانت كمان وحشتني...  يالا نروح بيتنا 

ايمن: يالا بينا 

ايمن شالها وخرج وكان احمد مستنيه 

احمد: واحد من الظباط هيروحكم وسيبني انا هنا هتصرف ما تقلقش...  روح مراتك العيله كلها هتتجنن عليكم في بيتك 

ايمن: خلاص هنروح متشكر يا احمد 

ايمن اخد مراته وروح ولقي فعلا الكل مستنيهم في بيت امه 

كلهم كانوا زي المجانين...  اخدوهم بالحضن واخيرا اتلم شمل العيله كلها...  

قعدوا شويه بسيطه وقاموا يروحوا علشان العشاق يبقوا براحتهم واتفقوا يقضوا اليوم مع بعض بكره ويتغدوا كلهم مع بعض احتفالا برجوعهم 

حبيبه استأذنت تقوم تغير هدومها وايمن بعدها بدقايق دخل وراها 

كانت لسه هتدخل تاخد شاور فاجئها وضمها وهيا عطياله ضهرها 

ايمن: ما تتخيليش انتي وحشاني قد ايه؟  

حبيبه: ايمن لو كنا اتطلقنا كنا هنعمل ايه؟  

ايمن: كنا هنرجع برضه لبعض...  كنا هنتلككك لاي سبب نرجع علشانه لبعض 

حبيبه: انا مش عيزاك تبعد عني تاني ابدا 

ايمن لفها ليه وحط ايديه علي بطنها 

ايمن: اللي في بطنك هيربط بينا ديما حته مني وحته منك 

حبيبه: فرحان بيه يا ايمن؟؟؟ 

ايمن: طبعا ما تتخيليش قد ايه؟  بس للاسف ظروفه معايا ملطشه حبتين..... المهم واحشاني 

حبيبه بتوتر: انا هدخل اخد شاور 

سابته وجريت وهو مبسوط انها لسه لحد دلوقتي بتتكسف منه خرج هو كمان اخد شاور ورجع وكانت حبيبه لسه ما خرجتش واستغرب انها طولت قوي كده وخاف لتكون تعبانه 

ايمن خبط عليها: حبيبه؟؟ 

حبيبه: ايوه يا ايمن 

ايمن: في حاجه؟  اتأخرتي قوي 

حبيبه سكتت وبعد شويه: لا مفيش هخرج 

ايمن استني شويه وبعدها قام 

ايمن: حبيبه انا هدخل؟؟؟ 

وفعلا دخل كانت لابسه برنس حمام وبتلف شعرها بفوطه وواقفه قدام المرايه

ايمن: في ايه مالك؟  

حبيبه: مفيش 

ايمن قرب وخلاها تبصله: في ايه؟  

حبيبه بصت بعيد بس دموع ظهرت في عنيها 

ايمن خلاها تبصله تاني: في ايه يا حبيبه؟  لما خبينا علي بعض مشاعرنا كنا هنطلق يبقي ما نخبيش علي بعض حاجه تانيه ولا ايه؟  مالك قوليلي ايه مضايقك كده؟  

حبيبه عيطت في حضنه: انا اسفه يا ايمن 

حبيبه شدت الفوطه من علي راسها...  كانت مكسوفه من شعرها القصير واللي كان اكتر حاجه جوزها بيعشقه فيها 

ايمن: اسفه علي ايه؟  حبيبه القصه اللي فاتت دي فاتت وخلصت ووجعتنا وكانت تجربه قاسيه علينا احنا الاتنين بس الحمدلله خرجنا منها كويسين وده المهم اي حاجه تانيه تتعوض... بعدين انا عايز افهم؟؟  انتي ليه عامله اهميه كبيره قوي لشعرك ايوه كنت بحبه بس مش لدرجه انه لو اتقص حبي ليكي هيقل او هيتهز حتي؟؟  وبعدين ما انتي كان ممكن تقصيه وتعملي لوك جديد فين المشكله؟  

حبيبه: انا اقصه بس مش يتقص غصب عني وبعدين شكلي وحش قوي...  كنت بحب اشوف جمالي في عنيك 

ايمن: طيب هو انتي خرجتيلي بره وما شفتيش جمالك في عنيا؟؟؟  انتي حابسه نفسك هنا تعيطي وسايباني انا اعد النجوم في عز الظهر يرضي ربنا ده؟  

حبيبه ضحكت 

ايمن: ايوه كده اضحكي خلي الشمس تنور كده بلاش الغيوم والاعاصير دي...  وبعدين ثقي شويه بقي في حبي ليكي...  انا بحبك سواء بشعرك طويل!  قصير!!  او حتي قرعه خالص 

حبيبه: وانا كمان بحبك قوي 

ايمن: طيب انتي بتحبني وانا بحبك وهموت عليكي هنفضل بقي في الحمام كتير؟؟

خرجوا وفضلوا مع بعض  

حبيبه: ايمن هو انا مين خطفني؟؟؟ 

ايمن: جماعه بيخطفوا البنات او ستات او حتي اطفال 

حبيبه: كانوا عايزين مني ايه؟  طلبوا فديه منك مثلا؟  

ايمن: والله ما اعرف هما كانوا عايزين ايه؟  هما بيبيعوا اطفال لو حد عايز...  بيتاجروا في اعضاء...... وساعات بيطلبوا فديه....  في حالتك انتي معملوش اي حاجه من دول... 

حبيبه: ليه؟  

ايمن: انتي كنتي عيزاهم يعملوا؟؟؟ 

حبيبه: لا مش القصد بس مستغربه ليه معملوش اي حاجه من دول؟؟؟ 

ايمن: مش عارف 

حبيبه اتعدلت وبصتله 

حبيبه: حسبت عليك كذبه 

ايمن: ليه بقي ان شاءالله؟  

حبيبه: علشان انت عارف وبعدين انت فاشل في الكدب اصلا 

ايمن: في اوقات كتيره بيكون الكدب حلال ومسموح بيه 

حبيبه: اه زي ما بتقولي ان شكلي حلو بشعري ده...  ما انا قبلتها وعدتهالك 

ايمن: لا ابدا والله...  اقسم بالله شكلك عاجبني كده 

حبيبه: بجد يا ايمن

ايمن:   انا بحبك في اي وضع وشكل وبعدين انتي حلوه في عنيا ديما 

حبيبه: ماشي بس قولي ليه بقي؟؟ 

ايمن: كانوا عايزينك لحاجه تانيه؟  

حبيبه: حاجه ايه؟  

ايمن: كانوا هيهادوكي للي بيسهلهم امورهم 

حبيبه: يعمل بيا ايه؟  

ايمن اتضايق واتعدل: واحده جميله هيهادوها لواحد مجرم هيعمل بيها ايه يا حبيبه؟  هيعمل اللي كنا بنعمله دلوقتي خلاص عرفتي؟؟؟     وبعدين الواحد ده كان بينتقم مني لاني قبضت علي ابوه واخد حكم اعدام ده الراجل اللي غلطت وقبضت علي ابوكي بداله فهمتي؟  عندك اسئله تانيه 

سابها وخرج وقعد جنب امه اللي كانت بتتفرج علي التليفزيون 

فاطمه: مالك في ايه؟   سيبت مراتك وخرجت ليه؟  

ايمن:    والنبي ماهي ناقصه يا امي؟؟؟ 

حبيبه خرجت وقعدت جنبه 

حبيبه: مش قصدي اضايقك يا ايمن؟  ماما قوليله حاجه 

فاطمه: قالتلك مش قصدها خلاص بقي 

ايمن: هو انتي فاهمه قصدها ولا مش قصدها علي ايه؟  ولا بتقولي وخلاص 

فاطمه: جت لعندك وقالتلك مش قصدها تضايقك يبقي الموضوع هنا انتهي ما نعملش حكايه بقي 

ايمن: انتي امي ولا امها؟؟ 

فاطمه: انا امكم انتو الاتنين قوم بقي خد مراتك وادخل 

ايمن: انا عايز اقعد معاكي شويه 

فاطمه: تقعد معايا ليه؟  مراتك مش وحشاك 

ايمن: خلاص يا امي هقوم عايزه حاجه

فاطمه: لا يا حبيبي سلامتك 

ايمن اخد مراته ودخلوا اوضتهم  

تاني يوم اهلها كلهم جم زي ما اتفقوا وحبيبه وفاطمه كانوا في المطبخ من المصبح يجهزوا الغدا واخواتها بيساعدوهم وقبل الغدا حبيبه دخلت تاخد شاور وتغير قبل ما يتغدوا واحمد وابوه يجوا 

سميه دخلت عند اختها تساعدها تغير هدومها وتاخد شاور 

سميه: اتصالحتوا ولا لسه ناويين علي الطلاق؟  

حبيبه: لا اتصالحنا....  ايمن ما بطلش يحبني ابدا 

سميه: عارفه كان باين عليه الحب علي طول 

حبيبه: انتي ايه المختلف فيكي؟؟ 

سميه: أأأ. أنا ولا حاجه 

حبيبه: أ أ أ وفي الاخر ولا حاجه....  بنت وشك احمر كده ليه؟  احكي مخبيه ايه؟  

سميه: مش مخبيه صدقيني 

هربت منها وخرجت بسرعه  وشويه واحمد جه يطمن عليهم 

سميه كانت فرحانه بمجي احمد ومستغربه من امتي قلبها بيدق كده وليه بيدق لما احمد يجي

احمد دخل هو وابوه  والكل رحب بيه جدا وكأنه واحد من العيله 

حبيبه قبل ما تخرج نادت لايمن ودخلها 

حبيبه: انا مش عايزه البس النقاب يا ايمن ممكن؟؟ 

ايمن: دي حاجه ترجعلك انتي براحتك وبعدين احمد زي اخويا وابوه راجل كبير ومحترم وبعدين شافك قبل كده 

حبيبه: خلاص يالا 

خرجت مع ايمن والكل استغرب انها مش لابسه نقاب بس محدش علق 

اتحطت السفره والكل بياكل ويهزر واحمد بيخطف نظرات لسميه وحبيبه لاحظت نظراته لاختها 

حبيبه بهمس: ايمن 

ايمن: هاه 

حبيبه: هو انا بيتهيألي ولا احمد فعلا بيبص لسميه؟؟ 

ايمن: لا مش متهيألك....  ده سحر بنات عم سعيد 

حبيبه: قصدك ايه؟  

ايمن: اللي بيشوفكم بيتجنن وبتخطفوا عقله وقلبه وهو من ساعت ما شافها وهو هيتجنن 

حبيبه: وهو شافها امتي؟  

ايمن: وانتي في المستشفي دخل مره بسرعه وكانت بوشها وملحقتش تلبس النقاب وبعدين الفتره دي اتعاملوا فيها كتير وسيادته واقع في سحرها 

حبيبه: سحر بنات عم سعيد؟ 

ايمن: ايوه بالظبط 

خلص الاكل وقاموا قعدوا مع بعض ودار حوار جانبي بين فاطمه وابو احمد عم معتز 

احمد بهمس: بقولك 

ايمن: هو النهارده اليوم العالمي للاحاديث الجانبيه ولا ايه؟  المهم قول 

احمد: ايه رأيك؟؟ 

ايمن: رأيي في ايه؟  

احمد شاور علي ابوه وفاطمه 

ايمن: يا واطي،....  شكلي هقوملك واعملها معاك 

احمد: ايه وجه اعتراضك؟؟  ابويا مش عاجبك؟؟؟ 

ايمن بصله باهتمام: ابوك قالك حاجه ولا انت بتألف؟ 

احمد: لا مقالش بس هو وحيد وانا شغلي كتير وانت شرحه فليه ما يونسوش بعض ويبقوا سند لبعض 

وانت تستقل بحياتك وانا كمان 

ايمن: ما اعتقدش ان امي اصلا ممكن توافق؟  وبعدين ابوك كمان ممكن ما يوافقش 

احمد: ابويا هيوافق ده ما بيصدق اي حجه يجي عندكم او يتكلم مع مامتك...  انت اعرف رايها ايه وهيا مستعده للفكره نفسها ولا 

حبيبه قربت: بتتوشوشو في ايه كده؟  

ايمن اخدها جنبه: ولا حاجه يا قلبي 

احمد: لما هتموتو علي بعض بتتكبروا ليه؟  قال يطلقوا قال؟؟  اهو الغباء بتاع امثالكم ده يغيظ 

ايمن: وانت ايه دخلك بينا قوم ياد بعيد ياد 

احمد: ماشي عقبالنا 

قالها بصوت عالي وهو بيبص لسميه اللي قامت دخلت المطبخ تعمل عصير 

احمد قال لفاطمه: سميه في المطبخ هو في مشكله لو دخلت ساعدتها؟؟؟ 

فاطمه ابتسمت وفهمته: روح وربنا يقربلك البعيد 

احمد: هو انتي ايمن مش زيك ليه؟  

دخل وسابهم 

عم معتز : مش فاهم وحاسس انه في حوار هنا؟  

فاطمه: اعتقد ان احمد معجب باخت حبيبه 

معتز: امم هيا حلوه زي اختها؟؟؟ 

فاطمه: بصراحه كلهم احلي من بعض والعيله كويسه وبنات محترمه ياريت ربنا يجعلها من نصيبه 

معتز: طالما قولتي انها كويسه تبقي كويسه ربنا يسعدهم 

احمد دخل لسميه اللي اتخضت اول ما شافته 

سميه: انت ازاي تدخل هنا انت اتجننت؟؟؟ 

احمد: اه اتجننت وجبت اخري 

سميه: لو حد اخد بالك انك هنا ه

قاطعها احمد: فاطمه اللي بعتاني وداخل قدام الكل اساعدك في ايه؟  

سميه: انا مش محتاجه لمساعدتك اطلع بره خليني اعرف هعمل ايه؟  

احمد: مش هطلع تعالي نعملهم كوكتيل...  انا بعمل كوكتيل تحفه وفي فواكه كتيره اهي...  خدي قطعي الكانتلوبايه دي يالا اتحركي 

سميه عملت زي ما هو قالها وهو بدأ يعمل....  مش عارفه هيا ليه مبسوطه وهو معاها 

احمد: ايمن وحبيبه رجعوا لبعض 

سميه : اهمم 

احمد: عقبالي...  قولي امين 

سميه: امين اسكت بقي 

احمد: بقولك 

سميه: قول 

احمد ساب اللي في ايده ووقف قدامها وهيا قلبها بيدق وكأنه هيخرج من مكانه وحاسه ان صوته الناس اللي بره سامعينه وهيجوا عليه 

احمد: تتجوزيني؟؟؟؟ 

سميه مش مصدقه ومش مستوعبه وبتبصله وهو عنيها مجنناه واتمني لو يرفع نقابها يقري ملامحها 

احمد: انا بحبك واعتقد ان انتي لاحظتي ده عايز اعرف رأيك بحيث اكلم ايمن واعرفه وبعدها اكلم ابوكي.....  ساكته ليه ردي 

سميه بعد شويه مدت ايدها علي صدره وزقته بعيد وجريت من قدامه دخلت اوضه حبيبه وقفلت الباب وقلبها طالع نازل هيقف من التوتر بس ابتسامه كبيره اترسمت في وشها 

احمد كمل العصير هو وخرجه وكلهم اتفاجؤا بيه 

زينب: انت اللي مخرجه؟؟؟  امال فين سميه؟؟ 

احمد: انا اللي عامله مش بس مخرجه 

ايمن: استر يا ستار 

احمد: مش عامل حسابك اسكت بقي 

احمد اول واحده عطاها زينب: اتفضلي يا ست الكل 

ايمن: علي فكره المفروض تبدأ بعم سعيد الاول النمره غلط 

احمد مسك مخده من الانتريه وخبط ايمن في وشه 

احمد: مالكش دعوه 

الكل ضحك وبيهزر 

ايمن: البت دي اختفت ليه هقوم اشوفها اخدت مراتي واختفت ليه 

ايمن يا دوب قام فاحمد جري وراه واخده علي جنب 

ايمن: عملت ايه قول؟؟؟ 

احمد: قولتلها تتجوزني وقولتلها اني بحبها بس 

ايمن: بس؟؟  بس؟؟؟  ما كنت اخدتلك بوستين بالمره؟؟ قال بس قال؟؟ 

احمد: بحبها المفروض اعمل ايه؟  

ايمن: تقولي انا وانا اخلي حبيبه تتكلم معاها ونشوف رأيها ايه مش تقولها هيا 

احمد: لازم اعرف الاول رأيها ايه قبل ما اعرف الكل 

ايمن: مش الكل بقول انا ومراتي 

احمد: ماهو مراتك اختها وتقول لامها وامها تقول لابوها 

ايمن: لا طبعا المهم هشوفها جوه بس ما تحطش امل كبير انها توافق 

احمد: ليه هيا ممكن ترفض؟؟؟ 

ايمن: ممكن؟؟؟  المفروض تقول هيا ممكن توافق؟؟؟ 

احمد: ليه يا ايمن؟  

ايمن: دي بنت متدينه منتقبه؟؟؟  وانت هاه؟  مقضيها بالطول والعرض ده انا ساعات بتجنن منك وانت مجرد صاحبي وبعدين انا...  انا اللي يعني الحمدلله متدين وبقيم ليل وبصلي الحمدلله كل وقت في الجامع ساعات حبيبه بتجننيني...  تخيل يا احمد ليله دخلتنا اقمنا الليل وخلتني اقرالها قرآن وبعد الفجر طلبت نكمل للصبح علشان تتكتبلنا عمره...  انت هتستحمل ده؟  هتصحيك الفجر وتقولك انزل الجامع هتقولها ايه؟  المفروض يا احمد تشوف الاول انت هتقدر تتحملها ماهو الجواز مش حب وبس لازم التوافق الفكري والاحتماعي والديني 

احمد: محسسني ان انا كافر يا ايمن!!!  اهو ممكن يكون ربنا جعلها سبب في هدايتي وابقي احسن منك 

ايمن: افلح وان صدق 

احمد: شوف انت بس رأيها ايه؟  

ايمن: حبيبه معاها جوه هدخلهم 

ايمن دخل لمراته وحبيبه واحمد خرج للعيله بره 

عم سعيد: بقولك يا احمد؟  

احمد: اتفصل يا عمي 

عم سعيد: اهم الحمدلله رجعوا لبعض فالحمد لله انها جت من عند ربنا وزي ما المثل رب ضاره نافعه والحمد لله مش هنحتاج لفكرتك المجنونه 

احمد: ههههههه ههههههه

عم سعيد: انت بتضحك ليه؟  

احمد: سوري سوري يا عم سعيد...  ماهيا دي فكرتي المجنونه 

عم سعيد: مش فاهم قصدك ايه؟  

احمد: قصدي ان انا اللي دبرت خطفهم وانا اللي اقنعته ان سعيد المجرم هرب وانا اللي كنت حابسهم الخطف والحبس كله جزء من خطتي ومرضتش اقولكم لانكم مكنتوش هتوافقوا بس اهو الخطه تمت بنجاح باهر واهم رجعوا لبعض وايمن معرفش حاجه ودي اهم نقطه 

احمد لاحظ ان كلهم بيبصوا وراه فقلبه دق وبص لوراه ولقي ايمن واقف وراه في حاله ذهول وصدمه........ 

توقعاتكم 

حب مشروع 

الحلقة العاشره قبل الاخيرة ♥

احمد: سوري سوري يا عم سعيد...  ماهيا دي فكرتي المجنونه 

عم سعيد: مش فاهم قصدك ايه؟  

احمد: قصدي ان انا اللي دبرت خطفهم وانا اللي اقنعته ان سعيد المجرم هرب وانا اللي كنت

 حابسهم الخطف والحبس كله جزء من خطتي ومرضتش اقولكم لانكم مكنتوش هتوافقوا بس اهو الخطه تمت بنجاح باهر واهم رجعوا لبعض وايمن معرفش حاجه ودي اهم نقطه 

احمد لاحظ ان كلهم بيبصوا وراه فقلبه دق وبص لوراه ولقي ايمن واقف وراه في حاله ذهول وصدمه........ 

احمد: ايمن....  اسمعني انا بس 

ايمن: انت خطفت مراتي؟؟؟؟ 

احمد: كان قصدي بس 

ايمن: انت خليت رجاله تخطف مراتي 

احمد: ايمن بس اسمعني 

ايمن: انت خدرتها ولا ضربتها؟؟ 

احمد: اديني فرصه اتكلم 

ايمن: انت خليت الرجاله اللي جبتهم يضربوني ويكتفوني ويحسسوني بالعجز لتاني مره قدام مراتي 

احمد: يا ايمن اسمع 

حبيبه وسميه خرجوا علي صوتهم العالي 

ايمن: اسمع ايه؟  ازاي خططت لخطفي انا ومراتي ولا ازاي حبستنا واحنا متربطين كده؟  انا مراتي حامل ولا ده ميهمكش؟؟؟ 

احمد: محدش لمس شعره واحده منها 

ايمن: ولو سقطت كنت هتعمل ايه؟  لو تعبت؟؟  رجالتك كان عندهم اوامر بايه؟  

احمد: ايمن انا كنت مراقبكم ومتابع كل حاجه 

ايمن: واستمتعت بالعرض بتاعنا 

احمد: انا كان قصدي انكم تتصالحو...  تتقابلو...  تتكلموا تسمعوا بعض...  وده اللي عملته؟  

ايمن: خدرتها وضربتيني وكتفتنا وهنتنا علشان نسمع بعض.... حد قالك اننا محتاجين مساعده 

احمد: انتو كنتو هتطلقوا؟؟ 

ايمن: وانت مال اهلك انت؟؟  نطلق؟  نتجوز؟  انت مالك؟  ولا ده ذنبي اني وثقت فيك واعتبرتك زي اخويا.؟؟؟؟  انا دخلتك بيتي؟؟؟ 

احمد: وعلشان دخلت بيتك كان لازم لما اشوفك في ازمه اساعدك تخرج منها 

ايمن: بانك تعيد الازمه دي تاني؟  اقولك حاسس اني رجولتي اتهانت بخطف مراتي وانا متكتف مش عارف اعمل حاجه تقوم تخطفها تاني والمره دي تحطني انا معاها متكتف بجد...  ايه قاصد ايه؟  بتحطني في اوضه واحده انا ومراتي متكتفين جنب بعض؟؟؟  مراتي قدامي متكتفه مربوطه متوجعه وانا واقف قدامها ولا عارف ولا قادر اعمل حاجه؟  بتعيد اللي حصل بطريقه أسوأ مليون مره؟؟  علي الاقل في المره الاولي مكنتش شايفها بتخيل بس حالتها ايه تقوم انت تعيشني كل حاجه تاني؟  تحسسني بعجزي تاني؟  وتعيشها هيا كابوس خطفها تاني؟  انت ايه يا اخي ما بترحمش؟؟ 

احمد: انا ما فكرتش في كل ده؟؟  انا كل اللي فكرت فيه اجمعكم مع بعض وبس؟  

ايمن: ملقتش اي طريقه تجمعنا بيها غير دي؟؟  يعني ايه ده؟  عذر اقبح من ذنب!!!!  معرفتش تقولي مثلا اقابلك وهيا تكلمها ونتقابل!!!  معرفتش مثلا تخترع اي سبب نشوف بعض بيه؟  معرفتش غير انك تخطفنا؟؟؟ 

اطلع بره بيتي لو سمحت؟؟  وما تورنينيش وشك تاني؟  

احمد: ايمن اسمع 

ايمن: اطلع __ بره ___ بيتي 

معتز: يا ابني يالا دلوقتي 

ايمن: لا يا عمي حضرتك وجودك هنا علي عيني وراسي.... كلامي موجه ليه بس؟ 

احمد سابهم وخرج والكل ساكت محدش قدر ينطق 

ايمن: انتو كنتو عارفين انه هيعمل كده؟  

عم سعيد: لا مش كده...  هو مقالش كده خالص 

ايمن: امال قال ايه؟  

عم سعيد: قال انه هيضحك عليك ويقولك انه عايز يتجوز حبيبه اول ما عدتها تخلص ويخليك تغير وتتجنن فتتمسك بمراتك 

ايمن: وحضرتك وافقته علي الفكره دي؟؟؟ 

عم سعيد: انتو كنتو هتطلقوا كنت عايزنا نعمل ايه نتفرج ونسكت حاولت اخليكم تكلموا بعض ومعرفتش هيا قالت لأ وانت قولت مش فاضي هبعتلك امي ولا نسيت؟؟  فكلنا وافقنا؟؟ 

ايمن: كلكم اللي هو مين؟  (بص لمراته)  انتي كنتي عارفه؟؟ 

عم سعيد: لا مكنتش تعرف حاجه هيا رفضت اي حد فينا يتدخل....  الباقي كله عارف قوليله يا سميه 

ايمن: وسميه ايه علاقتها؟؟ 

سميه: هو كلمني انا في الاول وقابلته وعرض عليا فكرته وبعدها قولت لماما ووافقت والباقي كله عرف 

ايمن: كلمك وقابلتيه؟؟؟  وانتي من امتي بتقابلي شباب هاه؟ ؟  

سميه: مكنتش قادره اشوف حبيبه ليل نهار بتعيط كده وكنت عايزه اساعدكم باي طريقه 

ايمن: جاب تليفونك منين ولا كلمك ازاي؟  

سميه :_____ مش عارفه. ____ قالي انه ظابط 

ايمن: سميه؟؟  جاب تليفونك منين؟ ؟  وما تكدبيش لو سمحتي...  ما تقضيش علي شويه الاحترام اللي فاضلينلك 

سميه: جابها من تليفونك 

ايمن: تليفوني؟؟؟؟  انتي بقي كنتي عارفه انه هيعمل انهي فكره؟؟؟  هيتجوز مراتي ولا هيخطفنا؟؟؟؟ 

سميه: يا ايمن حاول تفهم هو عمل كده حبا فيك 

ايمن: انهي فكره كنتي عارفاها؟؟ 

سميه: انت رجعت لحبيبتك بسببه 

ايمن: انهي فكره؟؟؟ 

سميه: كنت عارفه الاتنين!!!  انا اللي خدرت حبيبه ونقلتها معاه الشقه 

ايمن: وهو شالها وطلعها صح؟  

سميه: لأ محدش لمسها...  

ايمن: وما خفتيش علي اختك لما خدرتيها؟؟؟  مخفتيش علي اللي في بطنها؟؟؟ 

سميه: اتفقنا مع الدكتوره بتاعتها وهيا اللي خدرتها وبعتت معانا اتنين ممرضات يساعدوني في نقلها... 

ايمن احنا عملنا كده علشان تتصالحوا 

ايمن: مجبتيهاش علي هنا ليه؟  خدرتيها هاتيها هنا!!  ولا متخيله اني لو لقيتها هنا هطردها؟؟  هرميها في الشارع مثلا؟؟؟ انا كنت بعتبرك زي اختي الصغيره وربنا عالم بس من هنا ورايح انتي مجرد اخت مراتي مش اكتر...  

سميه: وانا بعتبرك زي اخويا واكتر صدقني

قاطعها: خلص الكلام...  اه علي فكره احمد عايز يتجوزك روحي وافقي عليه واتجوزيه علشان لايقين علي بعض قوي....  بعد اذنكم 

ايمن اخد مراته ودخل اوضته وقفل عليهم 

فضل رايح جاي...  رايح جاي زي المجنون بيكلم في نفسه 

حبيبه: ممكن تهدي وتقعد 

ايمن: احمد ده صاحبي من سنين انتي فاهمه؟  صاحب عمري؟؟  ده عايز يجوز ابوه لامي متخيله؟؟؟ 

حبيبه: طيب اهدي 

ايمن: انا مش عارف انتي اصلا هاديه كده ازاي؟  

حبيبه: انت هتتجنن لانك حاسس زي اول مره ان رجولتك اتهانت واتهزيت والتفكير ده مجاش في بالي لا المره الاولي ولا المره دي!!!  وبعدين انا اول مره كنت خايفه لاني عايزه احافظ علي نفسي علشانك لكن المره دي انت كنت معايا فمفيش  اي شيئ ممكن يهزني علشان كده انا هاديه...  انت كمان اهدي وحاول تشوف هما عملوا كده ليه؟  

ايمن: احنا كنا هنلاقي طريقه نرجع بيها لبعض.. فاهمه؟  مكنتش هسيبك تروحي مني؟  مكنتش محتاج لحد يرجعلي مراتي؟؟ 

حبيبه: انت كنت هتطلقني يا ايمن 

ايمن: ومطلقتكيش ليه؟  عرفتي الغيب سيادتك..  دي حاجه كانت لسه في علم الغيب 

حبيبه: اللي اعرفه وافهمه ان احنا رجعنا لبعض بسبب اللي عملوه وبعدين فعلا محدش لمسني ولا حد لمسك وجابولنا اكل وشرب ومحدش ضايقنا ولو بكلمه زعلان من ايه بقي؟  

ايمن: مش هرد عليكي يا حبيبه اقفلي الكلام بقي 

ايمن تاني يوم راح شغله ودخل للمدير بتاعه 

المدير: اهلا يا ايمن اتفضل 

ايمن: حضرتك ازاي تدخل في لعبه رخيصه زي كده؟  

المدير: كل الوسائل مباحه في الحرب والحب...  اقتنعت بوجه نظره وهو صاحبك من صغرك وخايف عليك فكان لازم اساعده 

ايمن: انتو هتجننوني؟؟؟  اي منطق بتتكلموا بيه؟  تخطفوني انا ومراتي وتكرروا مأساه حصلت وتقولوا بتساعدونا؟؟؟  دي مساعده ايه دي؟  انا مش قادر افهم 

المدير: اول ما تهدي وتفكر بعقلك مش عواطفك هتفهم لوحدك احنا عملنا كده ليه واي منطق اتعاملنا بيه ... 

احمد حاول مع ايمن يصالحه او يكلمه بس ايمن رفض يسمعه نهائي 

الحياه جميله بين حبيبه وايمن وحملها بيكبر ويكبر 

جه رمضان وده كان اول رمضان يجي عليهم واتعزموا كلهم في بيت عم سعيد 

ايمن: انا مش عايز اروح روحي انتي وماما 

حبيبه: ده اول رمضان لينا مع بعض وانت عايز تفطر بعيد عني؟  انتي مش وعدتني؟؟ 

ايمن: وعدتك بإيه ان شاءالله؟  

حبيبه: وعدتني نفطر مع بعض ؟

وهتفطرني بايدك اول تمره

ايمن: اللهم اني صائم...  اللهم اخزيك يا شوشو 

حبيبه: مفيش شوشو دلوقتي كلهم اتسلسلوا هنفطر مع بعض و هتنفذ وعدك 

ايمن: امري لله 

حبيبه: ونعم بالله...  هروح انا وماما دلوقتي معاك توصلنا وانت نازل شغلك وانت ترجع علينا اوك 

ايمن: اوك بس بسرعه بقي يالا 

ايمن جه قبل المغرب بدقايق والعيله كلها معزومه ومن ضمن احمد وابوه معزومين 

ايمن دخل وسلم علي الكل حتي احمد سلم عليه بس سلم عليه كأنه واحد يدوب يعرفه مش صاحبه ورفيق عمره 

حبيبه بتهمس: فاكر وعدك؟؟؟ 

ايمن بابتسامه: فاكره بس ازاي؟  ايدي علي كتفك 

حبيبه: ماليش دعوه انت وعدت انت تنفذ 

ايمن بصلها: نعم يا اختي 

صوته طلع عالي فالكل بصلهم 

ايمن: موضوع بينا ما تشغلوش بالكم...  هو فاضل قد ايه علي المغرب؟؟؟ 

عم سعيد: يدوب نوصل المسجد يالا بينا كلنا نصلي ونيجي نفطر...  ايمن متوضي ولا تتوضي 

ايمن: لا متوضي الحمد لله يالا 

راحو الرجاله يصلوا المغرب والبنات مع بعض 

فاطمه: حبيبه في حاجه؟  ايمن علي صوته كده ليه؟  هو متضايق من احمد؟  

حبيبه: لا لا ابدا...  بس هو وعدني وعد ومش عارف ينفذه 

زينب: وعد بايه؟  

حبيبه: اول يوم لينا في رمضان يفطروي بايده ووا يفطرش غير بايدي

زينب: يلهفك قلمين يعني؟ ؟  تعالي وانا افطر عليكي انا 

حبيبه والكل ضحك 

حبيبه: لا طبعا...  قلمين ايه؟ ؟  يفطرني .. يأكلني بايده 

زينب: ودلوقتي اهو في الجامع والرجاله هتفطر هناك عايزاه يعمل ايه ؟

حبيبه: يتصرف انا مالي

زينب: طيب هيفطر يا اختي مع ابوكي في الجامع اتهدي بقي ويالا جهزوا الصفره يالا 

حبيبه: مش هيفطر 

زينب: هيفطر تراهني؟؟ 

حبيبه: اه اراهن علي ايه؟  

زينب : لو خسرتي تباتي هنا ليلتين جوزك ما يشفكيش فيهم 

حبيبه: ولو كسبت تيجي انتي معايا ليلتين في بيتي 

زينب: اتفقنا والكل شاهد 

فاطمه: بت يا سميه جهزي لامك غيارين علشان هتخسر رهانها...  زينب يا حبيبتي ايمن عمره ما رجع في كلمته ده اولا وثانيا بقي بيموت في بنتك 

زينب: ربنا يهنيهم ببعض بس ده رمضان وهيفطر مع الحج في الجامع هيقولهم ايه اصلا؟  معلش اصلي هروح افطر مراتي الاول؟؟؟ ده انا وعدتها ااكلها بايدي

 المغرب اذن وحبيبه مرضيتش تفطر واخدت كوبيتين عصير اوضتها وجهزتهم 

زينب: شكلك هيبقي وحش قوي لو رجع فاطر 

حبيبه: مش هيرجع فاطر وبعدين حتي لو فطر هيبقي غصب عنه علشان بابا 

اخيرا الرجاله جت واول ما دخلوا 

عم سعيد: يا حبيبه 

حبيبه: ايوه يا بابا 

عم سعيد: صليتوا وجهزتو الاكل يا بنتي 

حبيبه: كله جاهز اتفضلوا 

عم سعيد: طيب فطري جوزك ده الله اعلم ما رضيش يفطر معانا معرفش مستني ايه؟  خديه وبلي ريقه بتمره يا بنتي ولا اي حاجه 

حبيبه بصت لامها وابتسمت والفرحه مكنتش سايعاها 

فاطمه: مش قلتلك يا زينبو

زينب: خدي يا حبيبتي جوزك فطريه وتعالو بسرعه نلحق ناكل 

ايمن وحبيبه طلعوا ودخلوا اوضتها وكانت مجهزه البلح والعصير 

ايمن مسك كوبايه العصير وحبيبه حطت ايديها في وسطها 

حبيبه: يعني انت ما فطرتش علشان تيجي تفطر علي العصير؟  فطرتي انا الاول 

مكملتش الكلمه لان ايمن سكتها نهائي و...........، 

نزلو تحت يلحقوا يفطروا مع العيله 

خلص الفطار وجه العشا وصلوا التراويح ورجعوا والكل ملموم 

عم سعيد: بما ان العيله كلها ملمومه فدي فرصه نتكلم فيها 

معتز: ربنا يديم المحبه....  ايمن يا ابني 

ايمن: ايوه يا عمي 

معتز: احمد طالب ايد سميه وبصراحه مستنين موافقتك علشان نحدد معاد للفرح 

ايمن: وانا علاقتي ايه بمعاد فرحهم..  العروسه واهلها موافقين خلاص انتو حريين...  شوفو اللي يناسبكم 

عم سعيد: ايمن الاتنين سواء احمد او سميه بيعتبروك اخوهم وما ينفعش فرح يتم او يتحدد الا بموافقه الاخ

ايمن: وما ينفعش برضه اخ يخطف اخوه او مراته 

عمي بنتك واتقدملها عريس انتو حريين بقي توافقو او لأ؟  براحتكم 

عم سعيد: يا ايمن قوله صلى الله عليه وسلم : ( تعرض الأعمال في كل إثنين وخميس فيغفر الله لكل امرئ لا يشرك به شيئا ، إلا امرأ كانت بينه وبين أخيه شحناء فيقول اتركوا هذين حتى يصطلحا ) رواه مسلم.

ايمن:عمي انا عارف كل الحاجات دي بس هقولك انا بقي انا مش مخاصم حد اللي جوه في قلبي انا حر فيه هو انا مش دخلت سلمت انا مش مخاصم حد 

عم سعيد: امال ده اسمه ايه؟  

ايمن: والله انا بشوفه بسلم عليه بكلمه عادي...  اما نرجع زي الاول فده ما ينفعش في حاجات لو اتكسرت ما بتتصلحش تاني 

عم سعيد: هقولك تاني 

( أربع من كن فيه كان منافقا خالصا ومن كانت فيه خصلة منهن كانت فيه خصلة من نفاق حتى يدعها، إذا اؤتمن خان وإذا حدث كذب، وإذا عاهد غدر وإذا خاصم فجر ) انت فجرت في الخصام كام شهر عدي وانت كده؟  مراتك اهي قربت تولد واحنا في ايام مفترجه فايه بقي؟  

ايمن اتنرفز: انا؟  انا فجرت في الخصام يا عمي؟؟  وهو عمل ايه؟  ماهو اؤتمن وخان؟؟  وحدث وكذب؟؟؟وعاهد وغدر؟؟؟اجر رجاله يضربوني؟  خدر مراتي وخطفها؟  فتح تليفوني وسرق حاجات مالوش حق يسرقها؟  كلم اخت مراتي اللي بعتبرها زي اختي من ورايا؟؟ عايزني ازاي بعد كل ده ارجع اثق فيه تاني؟  خان ثقتي بكذا طريقه   جاي بقي تقولي انا اني فجرت لا يا عمي والله انا حر اصاحب مين واعرف مين...  ده كان في يوم اكتر من اخويا وهو محافظش علي الاخوه دي...  وانا مش مقاطع حد ولا مخاصم حد

بس انا حر فاني اختار مين يقرب مني ومين اكتفي معاه بالسلام وبس انا حر...  

قام وقف وبص لامه ومراته 

ايمن: هتروحو ولا قاعدين؟؟ 

عم سعيد: يا ابني اقعد هنسهر مع بعض بطل رخامتك دي سيب البنت مع اخواتها 

ايمن: انا بسألها هتروح ولا هتقعد يعني هيا حره؟  اما انا اكيد هيا قالتلك اني من الصبح بره البيت فتعبان وعايز اريح ده لو معندكمش مانع؟ 

عم سعيد: اطلع ريح فوق 

ايمن: لا معلش انا ممكن انام للصبح مش شويه واصحي....  هتروحو ولا قاعدين؟؟؟ 

حبيبه وقفت: انا هروح معاك.....  ماما؟؟ 

عم سعيد: مالها امك؟  

حبيبه: هتيجي معايا ولا نسيتي؟  

زينب: يعني انتي شايفه ينفع اسيب الناس هنا واجي معاكي؟  

ايمن: الفطار اصلا عندنا بكره 

حبيبه: اهو يالا بقي 

زينب: لا يا حبيبتي هجيلك اول ما اصحي خلاص؟  

ايمن: عم معتز الفطار عندي بكره ان شاءالله 

معتز: لا معلش اعذرنا احنا 

ايمن: ليه؟  انت زي والدي وده شيئ مش هيتغير؟  واحمد خطيب اخت مراتي؟  فين المشكله؟  

معتز: لو انا زي ابوك يبقي احمد زي اخوك مش خطيب اخت مراتك؟؟ 

ايمن: يعني حضرتك مش عايز تيجي عندي؟؟ 

معتز: لا مش حكايه مش عايز اجي بس اعذرنا 

ايمن: امال حكايه ايه؟  

معتز: حكايه اتنين اخوات من سنين وفجأه يبقوا اغراب " انما الاعمال بالنيات ولكل امرئ ما نوي " يعني هو ممكن يكون طريقته غلط لكن نيته كانت خير ودي حاجه لصالحه مش ضده فايوه انت من حقك تزعل منه شويه بس مش تقاطعه وتنهي علاقتك بيه انتو مش معرفه يومين 

ايمن: يعني انا ينفع مثلا اروح اسرق من الاغنيه واوزع علي الفقرا واقول اصل انا قصدي خير؟  مش في كل حاجه فيها الاعمال بالنيات 

معتز: خلاص يا ابني وزي ما انت لسه قايل انت حر تعرف مين وتصاحب مين؟  انت حر  بس متجيش تقطع من ناحيه وتوصل من ناحيه تانيه ما ينفعش لان الاتنين ناحيه واحده...  انت بترمي عشره سنين في الارض بسبب انه غلط علشان مهنش عليه انك تتحرم من الانسانه اللي بتحبها...  مهنش عليك يشوفك بتتعذب ويقف ساكت ده غلطه فمعلش حقك عليا انا انه غلط واتسبب انك رجعت لمراتك وان ابنكم هيتولد بينكم معلش...  كان المفروض قال وانا مال اهلي زي ما انت قولت وهو مال اهله كنتو اتطلقتوا ولا رجعتو وهو مال اهله اصلا؟  حقك علينا يا ابني...  بس معلش بقي ما تجيش دلوقتي وتقولي انت زي ابويا يا عم معتز لان انا مش ابوك طالما هو مش اخوك اتكل علي الله وشوف انت رايح فين؟  

ايمن اخد مراته وامه وروح وطول الطريق ساكت واول ما وصلوا بيتهم سابهم ودخل اوضته 

فاطمه: ادخلي يا بنتي لجوزك ما تسيبيهوش لوحده 

حبيبه: حاضر يا ماما تصبحي علي خير 

فاطمه: وانتي من اهل الخير ربنا يهدي النفوس يا رب 

حبيبه دخلت لجوزها اللي كان راقد في السرير غيرت هيا كمان هدومها وقعدت جنبه 

حبيبه: اااه 

ايمن: تعبانه؟  

حبيبه: هلكانه مش تعبانه...  خلاص بقي تعبت وجبت اخري 

ايمن: هانت انتي في السابع اهو 

ايمن نام علي حجرها وايديه علي بطنها بيستمتع بحركات ابنه 

ايمن: هيا خبطاته دي بتوجعك؟؟ 

حبيبه: لا مش توجعني بس ساعات تضايقني لما يخبط كتير في حته واحده او يصحيني من النوم 

ايمن: ربنا يكون في عونك ويقومك ليا بالسلامه 

حبيبه بتلعب في شعر جوزها والاتنين ساكتين 

ايمن: انتي عمرك ما اتكلمتي عن علاقتي باحمد 

حبيبه: دي حاجه ترجعلك انت 

ايمن مسك ايدها  وباسها في ايديها 

ايمن: برضوا مقولتيش رايك ايه؟  

حبيبه: طبعا في الاول والاخر دي حاجه ترجعلك بس يا ايمن هو قصده انه يرجعنا لبعض فاعتقد ان ده يغفرله وبعدين احنا فعلا رجعنا لبعض بسببه بغض النظر بقي كنا هنرجع بعدين او هنلاقي طريقه احنا رجعنا بسببه 

ايمن: انتي عايزاني اصالحه واعتبر كأن مفيش حاجه حصلت!!!!!!! 

حبيبه: انت سألتني عن رأيي وانا قولتهولك لكن تعمل ايه بقي دي حاجه ترجعلك انت 

ايمن: ما علينا غيري الموضوع 

حبيبه: مش النهارده اتراهنت انا وماما 

ايمن: الرهان حرام المهم اتراهنتو علي ايه؟  

حبيبه: عليك 

ايمن: عليا انا؟؟؟  ازاي؟  ومين كسب؟؟ 

ايمن اتعدل  

حبيبه: انا كسبت طبعا والبركه في حبيب قلبي 

ايمن: مين حبيب قلبك ده؟  انتي تعرفي حد من ورايا 

حبيبه: بطل غلاسه انت طبعا حبيب قلبي المهم اتراهنا ان انت مش هتفطر وهتيجي تفطرني وماما قالت لأ هيتحرج من ابوكي وهيفطر بس واتراهنا والكل كان شاهد 

ايمن: هو انتي قولتيليهم علي الاتفاق اللي بينا؟ ؟  تصدقي بقي كده غلط 

حبيبه: ماما واخواتي مفيش حد غريب فين المشكله؟  

ايمن: يا حبيبه الحاجات الخاصه اللي بيني وبينك يا ريت ما تتقالش لحد وبعدين يعني اختك ساره في مشاكل علي طول مع جوزها ومش متفقين تيحي انتي تحكي قدامها قد ايه انتي مبسوطه وجوزك واثقه من حبه!!!  راعي مشاعرها ما تتكلميش عن السعاده قدام حد محروم منها ولا عن الصحه قدام حد مريض ولا عن الفلوس قدام حد فقير هو انا اللي هقولك يا حبيبه 

حبيبه: انا مفكرتش فيها كده خالص 

ايمن: عارف بس ابقي خلي بالك 

تاني يوم بعد الفطار سميه قعدت مع ايمن 

سميه: علي فكره انا مش هتجوز غير لما انت واحمد تتصالحوا 

ايمن: حياتك وانتي حره فيها تتجوزي ما تتجوزيش انتي حره؟؟  وبعدين انا سبق وجيت علي نفسي مره علشانك ساعه ما اتسببت في فشل جوازتك الاولانيه وسوري مش هاجي علي نفسي تاني علشانك 

سميه: وانت زعلان علشان جيت علي نفسك واتجوزت حبيبه؟  

ايمن: انتي عارفه ان ده مش قصدي فماتحوريش في الكلام 

سميه: طيب فكها بقي يا ايمن كفايه 

ايمن: علي فكره انا فاككها انتو اللي مش واخدين بالكم 

سابها ومشي ورافض يسمع لحد 

رمضان عدي وخلص بتعدي الايام وفاطمه جاتلها قرعه الحج السنه دي الفرحه مكنتش سايعاها 

ايمن: مبروك يا قمر 

الكل متجمع بيهنيها 

فاطمه: بس يا حبيبي مكنتش عايزه اسيب حبيبه دلوقتي خالص دي هتولد علي العيد او قبل العيد 

ايمن: ولو ولدت فين المشكله؟  هتضيعي الحج علشان حبيبه هتولد؟؟ وبعدين ما احنا كلنا موجدين n

زينب: ما تخافيش عليها ابدا روحي وتوكلي وادعيلها ربنا يقومها بالسلامه 

فاطمه فعلا سافرت وايمن وحبيبه اول مره البيت يفضي عليهم كده 

حبيبه: كنت متخيله اني هبقي براحتي اكتر لو كنا لوحدنا بس البيت مالوش طعم من غيرها 

ايمن: انتي عايزه تقعدي لواحدك؟؟ 

حبيبه: فكرت بس دلوقتي لأ مامتك بتملي عليا البيت وانت مفيش واهو بنسلي بعض وبعدين مع البيبي هتساعدني لاني مش حاسه اني هعرف اعمل اي حاجه 

ايمن: كله بيتعلم المهم هتسميه ايه؟  

حبيبه: في كام اسم في بالي 

ايمن: زي ايه؟  

حبيبه: انس.....  حمزه.......  يزيد......  يوسف...  يس.. عمر

ايمن: انتي بتنقي اسم لابنك ولا الشخصيات اللي بتحبيها؟؟ 

حبيبه: المهم ايه رأيك؟  انا كلهم سيان بالنسبالي

ايمن: بحب حمزه وعمر انا كانوا شخصيات  ليها وضعها ووزنها سواء حمزه عم الرسول او عمر بن الخطاب 

كان رسول الله صل الله عليه وسلم يقول اللهم اعز الاسلام  باحد العمرين :عمر بن الخطاب وعمرو بن هشام  وربنا اختار عمر بن الخطاب 

حبيبه: يبقي عمر 

ايمن: يبقي عمر....  يالا يا سي عمر شد حيلك وتعال بقي اشتقنالك ربنا يقومكم بالسلامه 

اخيرا يوم وقفه عرفه ايمن كان مقضيه اجازه في بيته مع مراته وبيشاركو بقلوبهم اللي واقفين فعلا علي عرفه كلموا فاطمه واتطمنوا عليها 

زينب اتصل ببنتها بالليل 

زينب: ايوه يا حبيبه هتيجي انتي وجوزك امتي

حبيبه: الصبح بدري ان شاءالله 

زينب: ما تيجي تباتي مع اخواتك هنا ساره اختك هنا واهو الصبح بدري ندبح بدري 

حبيبه: اديني دقيقتين واكلمك يا ماما 

راحت لجوزها 

حبيبه: حبيبي ماما بتقول نروح نبات ايه رأيك؟ اخواتي كلهم مع بعض وساره بايته هناك 

ايمن: عايزه تروحي اوديكي تباتي مع اخواتك 

حبيبه: وانت؟ 

ايمن: ما تشغليش بالك بيا انا هجيلكم الصبح بدري 

حبيبه: ايوه بس دي ليله عيد وانا عايزه افضل في حضنك 

ايمن: والله دي بقي عندك انتي اختاري يا تباتي في حضني يا وسط اخواتك؟؟ 

حبيبه: حضنك طبعا هكلم ماما اقولها هنروحلها بدري 

اخر الليل كانوا نايمين حبيبه صحيت علي مغص ووجع في ظهرها 

قامت دخلت الحمام وخرجت الوجع بيزيد وفي خبط في ظهرها جامد 

حبيبه: ايمن يا ايمن 

ايمن صحي: ايه؟  عايزه حاجه؟  

حبيبه: انا تعبانه قوي اااه 

ايمن اتعدل بسرعه: تعبانه ازاي في ايه؟  

حبيبه: اعتقد اني بولد وديني المستشفي 

ايمن: نكلم مامتك؟؟ 

حبيبه: لأ يمكن ما تتطلعش ولاده والساعه 3 وكلها ساعه ولا اتنين ويصحوا يمكن ابقي كويسه وما تبقاش ولاده دي ليله عيد ما تعملش قلق 

ايمن ساعدها تلبس ونزلوا الاتنين مع بعض 

حبيبه: سوق بسرعه يا ايمن ارجوك 

ايمن: طيب اربطي حزامك 

وفعلا ايمن ساق بسرعه جدا وفي العجله الندامه 

ظهرت عربيه فجأه قدام ايمن معرفش يتفادها لان اللي سايقها شكله كان سكران لانه بيطوح يمين وشمال وبسرعه  و خبطهم وجري 

ايمن اتخبط جامد وفقد الوعي لدقايق وفاق علي مراته بتصرخ 

ايمن: انتي كويسه حصلك حاجه؟  

حبيبه: محصليش حاجه بس هولد يا ايمن ااااه اتصرف 

ايمن جه يتحرك بس العربيه اتخبطت جامد من ناحيته  والدركسيون نازل علي رجليه ومش قادر يتحرك او يخرج بره العربيه 

حبيبه: في ايه مالك؟  ايمن في دم في وشك 

ايمن: دي خبطه بسيطه ما تشغليش بالك المشكله اني مش قادر اتحرك الدركسيون نزل علي رجليا ومتكتف 

حبيبه: هنعمل ايه كلم حد اي حد ااااه اتصرف 

ايمن: اكلم ابوكي؟  

حبيبه: بابا لأ مش هيعرف يعمل حاجه وهيخاف ويقف مكانه 

ايمن: مين طيب؟  الاسعاف محدش بيرد ودي ليله عيد يعني محدش هيعبرنا 

حبيبه: كلم احمد 

ايمن: احمد؟ 

حبيبه: مش هيعبرنا هو كمان ااااااه ااااه ايمن الحقني 

ايمن كلم احمد اللي اتفاجئ باتصاله بس ما اتأخرش وخلال خمس دقايق كان واصلهم 

احمد: قولي اعمل ايه؟ 

حبيبه بتصرخ وبتتوجع جامد 

ايمن: خدها علي اقرب مستشفي 

احمد: ايمن انت 

قاطعه.: هششش اسكت خدها علي المستشفي ومالكش دعوه بيا هيا مش هتستحمل....  كلم اي حد يجيلي وروح انت بحبيبه المستشفي 

احمد: مش هينفع اسيبك كده؟  

حبيبه: احمد هو في ايه؟  

ايمن: مفيش بس مش عايز يسيبني متكتف كده خدها واتحرك روح...  حبيبه امانه في رقبتك روح وصلها 

احمد سند حبيبه وخرجها بره العربيه بس مقدرتش تمشي فبص لايمن 

ايمن: مستني ايه؟  شيلها واتحرك 

يدوب هيشيلها حبيبه  صوتت وزقته 

حبيبه: مش هوصل المستشفي هولد دلوقتي هينزل خلاص...  اهه مش هوصل....  اااه 

احمد: ايمن اعمل ايه؟  

حبيبه: ااااه مش قادره 

ايمن: خدها في عربيتك وولدها...  كلنا واخدين دورات مكثفه في الاسعافات الاوليه...  

احمد: بس مش ولاده 

حبيبه: حرام عليكم ااااه اعملوا اي حاجه 

احمد فتح عربيته ونومها علي الكنبه وري وكان معاه بطانيه غطاها بيها وهيا بتصرخ وتصوت وتنادي علي ايمن اللي مش عارف ليه ديما في الاوقات دي بيبقي متكتف كده 

حط ايده علي جنبه اللي بينزف وغمض عنيه في استسلام 

ايمن مكنش الدركسيون اللي واقع عليه بس كان باب العربيه لما اتخبط اتكسر وحديده منه داخله في جنبه 

بينزف جامد وبدأ يفقد احساسه بكل جسمه 

مفيش الم...  مفيش وجع....  مش سامع غير صوت حبيبه ومش شايف غيرها بس حتي صوتها بيغيب ويبعد  شويه شويه........  اخيرا صوت عياط بيبي 

صوت اتمني كتير يسمعه 

احمد جاله بسرعه: ايمن ابنك اهو كويس شايفه؟  الاسعاف في الطريق وكل زمايلنا في الطريق وكلها دقايق وهنخرجك من هنا 

ايمن: حبيبه؟  

احمد: هيا كويسه ما تخافش 

ايمن شاف ابنه: عمر ماشي؟  

احمد: عمر 

ايمن: عمر وحبيبه امانه بين ايديك هتربي عمر زي ابنك واهو مش هيكون غريب هيبقي ابن اخت مراتك اوعي تبخل عليه باي حاجه؟  فاهم؟  

احمد: انت بتقول ايه؟  ايمن انت هتربي ابنك.... ايمن...  ايمن...  فتح عنيك شوف ابنك...  ايمن 

حب مشروع 

الحلقة 11 واﻻخيره

ايمن اخد ابنه باسه واذنله في ودنه ونطقله الشهاده وعطاه لاحمد 

ايمن: عمر وحبيبه امانه بين ايديك هتربي عمر زي ابنك واهو مش هيكون غريب هيبقي ابن اخت مراتك اوعي تبخل عليه باي حاجه؟  فاهم؟  

احمد: انت بتقول ايه؟  ايمن انت هتربي ابنك.... ايمن...  ايمن...  فتح عنيك شوف ابنك...  ايمن 

اخيرا سرينات الاسعاف وصلت واصحاب ايمن  وصلوا وصوت تكبيرات العيد بدأت 

اصوات كتيره متداخله مع بعض ايمن بيسمعها 

احمد عطي البيبي للاسعاف واخدوا حبيبه ومشيوا وهو فضل مع ايمن بيحاولو يخرجوا والمشكله انهم كل ما بيحاولو يفتحوا الباب بينزف زياده ولو خرجوه بالنزيف ده مش هيوصل المستشفي 

احمد: مش هينفع كده؟  هنعمل ايه؟  

دكتور الاسعاف: لو خرجتوه هينزف وهيموت قبل ما نوصل المستشفي المسافه بعيده 

احمد: انا عندي فكره 

دكتور: قول 

احمد: نقرب المسافه للمستشفي 

دكتور: قصدك ايه؟  

احمد: قصدي ان احنا ما نخرجوش هنا احنا ناخد العربيه بحالها المستشفي وهناك نخرجه ويبقي كله مستعد والعمليات مستعده بحيث تخرجوه وخلال دقيقه يبقي في العمليات 

دكتور: لو تقدر تنقله للمستشفي انا اجهز الباقي 

احمد: اقدر اتحرك 

احمد استخدم  العربيه اللي بتقطر العربيات علشان  تسحب العربيه للمستشفي وفعلا بدأوا يتحركوا 

الدكتور اتصل بالمستشفي وقالهم علي اللي هيحصل وهما كمان بدؤا يجهزوا العمليات وفريق من الدكاتره بدأ يجهز ويستعد لاستقبال ايمن 

احمد ركب جنب ايمن: ما تخافش كله هيبقي مظبوط 

ايمن: سامحني يا احمد اني كنت غبي معاك 

احمد: هششش مش وقته خالص لما تقوم بالسلامه نكمل خناقنا 

ايمن: انت عارف انك زي اخويا واكتر وعلشان كده زعلت منك قوي 

احمد: ايمن عارف وعلشان كده محبتش اضغط عليك انت كنت محتاج وقت تسامحني وانا بصراحه كانت فكرتي متخلفه انت اللي سامحني ودلوقتي اسكت وارتاح وحاول تفكر في حاجات كويسه تخليك تتمسك بالحياه...  ابنك وحبيبه محتاجينلك 

#####_______#######_______#######

فاطمه نايمه وقامت مره واحده مفزوعه علي كابوس 

واول ما قامت سمعت تكبيرات العيد 

قلبها مقبوض مش عارفه ليه؟  بتحاول تتصل بايمن او حبيبه ومحدش بيرد فيهم 

بتدعي من كل قلبها ينجي ابنها ومراته وحفيدها 

بس جواها قلق غريب مش عارفه مصدره 

اتصلت باهل حبيبه تعيد عليهم 

فاطمه: كل سنه وانتو طيبين والسنه الجايه تبقوا هنا مكاني ان شاءالله 

زينب: ان شاءالله يا حبيبتي 

فاطمه: ايمن وحبيبه عندك ولا لسه مجوش؟ 

زينب: لا قلتلهم يجوا يباتوا بس ما رضيوش وقالوا هيجوا الصبح زمانهم علي وصول اهوه اول ما يوصلوا هخليهم يعيدوا عليكي ما تقلقيش انتي 

قامت فاطمه وراحت ترمي اول جمره وتدعي ربها يحفظ ابنها اللي ملهاش غيره وطلعت علي الحرم تصلي وتدعي وهيا مش عارفه ليه خايفه قوي كده علي ابنها!!!! 

######_______#######______######

ايمن اول ما وصل دخلوه اوضه العمليات علي طول 

حبيبه في اوضتها بعد ما اسعفوها والبيبي كمان بقي في سريره وحبيبه مستغربه ايمن اتأخر ليه؟  

حبيبه طلبت الدكتورة بتاعتها وجاتلها 

الدكتورة: حاسه بإيه مالك؟  

كشفت عليها واتطمنت انها كويسه 

حبيبه: انا كويسه انا بس عايزه اتطمن علي جوزي هو فين واتأخر ليه؟  

الدكتورة: هتطمن عليه وابلغك ما تقلقيش 

حبيبه: اه ارجوكي تطمننيني 

خرجت الدكتوره من عندها وقابلها احمد 

احمد: حالتها ايه وعامله ايه والبيبي حالته ايه؟  

الدكتورة: اهدي كلهم كويسين البيبي كويس وحبيبه كويسه...  مش اي حد يقدر يعمل اللي انت عملته 

احمد: انا مش عارف اصلا انا كنت بعمل ايه ده ربنا اللي سهلها المهم دلوقتي جوزها يقوم بالسلامه 

الدكتورة: طيب هيا بتسأل عليه هتقولها ايه؟  

احمد: مش عارف اعمل ايه واهلها اقولهم ايه؟  انا هدخلها اتطمن عليها وهقولها ان ايمن بس اتعور في رجله لانه قالها الدركسيون زنق رجله واطمنها عليه لحد بس ما نعرف حالته ايه؟  ويخرج بإذن الله من العمليات 

الدكتورة: خلاص ماشي...  

احمد خبط واستني لحد ما قالتله يدخل 

احمد: حمدلله علي سلامتك وقعتي قلبي....  انا مالي انا ومال الولاده هاه؟  بقي كده تعملوها فيا؟  

حبيبه: معلش بقي المهم ايمن فين طمني عليه ارجوك محدش عايز يقولي حاجه؟  

احمد: هو كويس ما تقلقيش بس انتي عارفه ان رجله اتزنقت في دركسيون العربيه فحاليا هيخدوه يعملوله اشعه وفيها جرح بسيط هيتخيط ويجيلك علي طول 

وبعدين هو كمان كان هيتجنن ويجيلك ومش هماه رجله لولا الدكاتره منعوه وقالو انها لو مكسوره او مشروخه فحالتها هتبقي اسوأ 

حبيبه: رجله بس؟  يعني هو كويس يا احمد؟  

احمد: اه يا بنتي الحمد لله كويس 

حبيبه:  طيب الحمد لله...  ينفع انا اروح اشوفه يا احمد؟  

احمد: بقولك هيطلع الاشعه اول ما يخلص لفته دي هجيبهولك هنا او هاخدك ليه خلاص؟  

حبيبه: وعد؟ 

احمد: وعد....  المهم دلوقتي هنعمل ايه في عيلتك وسميه بتتصل بيا من بدري ومش عارف ارد عليها؟  

حبيبه: لا اوعي تقولهم حاجه هيلغوا العيد والدبح وهيجوا سيبهم يدبحوا الاول وبعدها نقولهم 

احمد: وانتي متخيله انهم مش هيقلقوا واحنا كلنا مش موجودين وهيدبحوا عادي كده؟  دول هيطلعوا يدوروا عليكم في الشوارع 

حبيبه: طيب اطلبلي ماما انا هكلمها 

احمد: هتقوليلها ايه؟  وبعدين انتي صوتك تعبان وطالع بالعافيه اصلا اول ما تسمع صوتك هتقلق 

حبيبه: هات بس هات 

احمد طلب امها وعيد عليها وعطاها حبيبه اللي حاولت علي قد ما تقدر انها تتكلم عادي 

حبيبه: كل سنه وانتو طيبين 

زينب: انتي مع احمد ليه وايمن فين؟  في ايه؟  

حبيبه: احنا كلنا تمام ومفيش حاجه انا حابسه ايمن وهحبس احمد اهوه معاه ومش هخليهم يخرجوا غير لما يتصالحوا يعني ممكن نتأخر شويه ادبحوا انتو واحنا اول ما يتصالحوا هنجي خلينا نعيد بنفس بقي 

زينب للي جنبها: البت حبيبه حبست احمد وايمن ومش هتفتحلهم غير لما يتصالحوا 

عم سعيد بصوت عالي: ربنا يعينك عليهم لو عايزاني ابعتلك قوات امن قولي 

حبيبه ابتسمت: تسلملي يا حبيبي كل سنه كلكم وانتو طيبين ماما 

زينب: ايوه حبيبتي اديني سميه 

سميه جت تكلمها فعطتها احمد وقالتله يقوله ويخليها ما تعرفش حد غير بعد ما يخلصوا 

احمد فعلا طلب من سميه تطلع اوضتها علشان يعرف يكلمها وحكالها اللي حصل وحكالها ان حاله ايمن صعبه وحرجه وان حبيبه ما تعرفش وطلب منها اول ما يخلصوا يجولهم بسرعه 

سميه عيطت لوحدها واتماسكت ونزلت وفضلت ساكته طول ساعتين لحد ما كانوا بيخلصوا وبيهزروا 

عم سعيد: بت يا سميه مالك هو يعني علشان خطيبك مش موجود ما تعبيريناش كده ولا ايه؟  وبعدين هما اتأخروا ليه؟  اتصلوا بيهم لاحسن واحد فيهم يموت التاني كلميهم يجوا بقي 

سميه :_____

عم سعيد: سميه كلمي اختك يالا 

سميه :مش هيجوا محدش فيهم جاي 

الكل سكت وكل واحد ساب اللي في ايده وبصولها 

زينب: اختك ولدت صح؟  وعلشان كده كان صوتها تعبان؟ انطقي 

سميه عيطت: حبيبه كانت هتولد وايمن نزل بيها قبل الفجر علي المستشفي وعملوا حادثه 

زينب صوتت والكل وقف وعم سعيد فضل يقول لاحول ولا قوة الا بالله ومعتز كان قلقان عليهم 

زينب: اختك جرالها حاجه؟  وجوزها عامل ايه؟  والعيل؟ 

سميه: اختي كويسه والعيل كويس ولدت بالسلامه 

عم سعيد: وايمن؟؟  ايمن ماله؟؟ 

سميه: حالته متأخره قوي وصعبه وفي اوضه العمليات وحبيبه ما تعرفش ان جوزها تعبان احمد قالها انه متعور في رجله بس وهيا بتسأل عليه 

عم سعيد: مقولتيش ليه بس؟؟  اختك لوحدها وجوزها ربنا يلطف بيه؟  يا بنتي حرام كده يالا بينا كلنا يالا 

وصلوا المستشفي واحمد لسه مخرجش برضه من العمليات واحمد وصاهم وفهمهم يقولو ايه لحبيبه ودخلو يطمنوا عليها 

زينب بتعيط جامد بس قالت ان صعبان عليها بنتها تولد وهيا مش جنبها 

جت الدكتوره واتدخلت وخرجت الكل بره بحجه انها المفروض ترتاح وطلبت من حبيبه تحاول ترتاح 

عم سعيد.  زينب،  سميه،  معتز، احمد كلهم واقفين مستين اي خبر عن ايمن 

اخيرا حد خرج وكلهم جريو عليه 

الدكتور :: مين هنا من عيله ايمن؟  

احمد: دول حماه وحماته وانا صاحبه 

الدكتور: لا حد من العيله ابوه امه اخوه؟؟  حد من العيله 

احمد: يا دكتور طيب طمنا مراته هنا بس يدوب ولدت هيا بس الموجوده تعتبر من عيلته ولسه ما تعرفش حاجه عنه 

الدكتور: لازم تعرف لاننا محتاجين موافقتها،

احمد: موافقتها علي ايه بالظبط؟  يا دكتور لو سمحت وضحلنا 

الدكتور: الحديده اللي دخلت في جنبه اذت الكليه الشمال جدا وحاولنا ننقذها بس للاسف صعب فهنضطر نستأصلها خالص كمان جزء من الكبد اضر واستأصلناه بس علشان نستأصل  الكليه لازم موافقه الاهل علشان  موضوع سرقه الاعضاء 

احمد: بس مراته ما تعرفش انه متصاب اصلا؟  

الدكتور: مسيرها هتعرف وحاليا الوقت ده محسوب من عمر جوزها..  كل دقيقه بتعدي ليها تأثيرها السلبي علي جوزها 

الدكتور دخل لحبيبه وهيا اول ما شافته عرفت ان في حاجه غلط لان قلبها مش مطمن 

حبيبه: ايمن ماله؟  قول علي طول من غير مقدمات لو سمحت ما تخبيش عليا حاجه؟  

الدكتور: هدخل في الموضوع علي طول...  جوز حضرتك اصابته جامده وللاسف الكليه اضررت جدا ومحتاجين موافقتك علي استأصالها 

حبيبه: وهيعيش ازاي من غير كليه؟؟؟ 

الدكتور: التانيه سليمه وان شاءالله تقوم بالوظيفه كامله 

حبيبه: انا موافقه علي اي حاجه المهم انه يقوملي بالسلامه...  هو فيه ايه تاني؟  ايه اللي حصله غير الكليه؟؟  ورجله عامله ايه؟  قولي حالته كلها 

الدكتور: الاصابه جامده في الجنب الشمال بس لولا ستر ربنا كانت جت في قلبه لانها من جوه كان بينها وبين قلبه اقل من نص سنتيمتر فكأن حد فاداله قلبه 

استأصلنا جزء من الكبد وجزء بسيط من الامعاء وزي ما قولتلك هنستأصل الكليه الشمال وربنا يسهل وما يحصلش اي مضاعفات...  اما رجله فدي مجرد جرح بسيط فيها وكدمات مش اكتر 

شدي حيلك بقي وان شاءالله يقوم لك انتي وابنك بالسلامه...  بعد اذنكم 

حبيبه: دكتور؟  انا عايزه اشوفه 

الدكتور: اول ما يخرج من العمليات بإذن الله تشوفيه 

الدكتور سابهم وخرج 

حبيبه: احمد 

احمد: ايوه يا حبيبه 

حبيبه: ايمن شاف عمر صح؟  

زينب: هيشوفه ازاي بس يا بنتي ماهما جابوه علي العمليات علي طول وانتي دخلتي ولدتي 

احمد: لا يا ست الكل اطمني يا حبيبه ايمن شاف عمر واذنله كمان وقالي انه عمر 

زينب: شافه امتي؟؟؟ 

احمد: حبيبه ولدت في عربيتي قبل الاسعاف ما يجوا 

زينب: ومين كان معاها؟؟؟ 

حبيبه: احمد كان معايا...  ابني اتولد علي اديه وايمن كان محبوس جوه العربيه متصاب وبينزف ومقاليش بس قالي ان رجله مزنوقه ضحك عليا 

احمد: انتي كانت حالتك ايه ساعتها يا حبيبه؟  الحمدلله انها جت علي قد كده وان شاءالله هتخرجوا كلكم بالسلامه 

حبيبه: متشكره يا احمد علي وقفتك جنبنا لولا ان انت جيتلنا بسرعه الله اعلم كان حصلنا ايه؟  

احمد: انا عمري ما اتأخر علي ايمن ابدا احنا اكتر من الاخوات

عم سعيد: ونعم الصاحب والاخ 

 حبيبه نامت علي جنبها وعطتهم ضهرها وبتعيط في صمت وتدعي ان جوزها يقوم بالسلامه 

عم سعيد: وبعدين يا حبيبه؟  ادعيله يا بنتي يقوم بالسلامه مش تعيطي...  هتفضلي لامتي تعيطي بصمت كده وفاكرانا مش واخدين بالنا؟؟؟  ابنك محتاجلك وجوزك هيحتاجلك فلازم تبقي قويه علشانهم 

حبيبه: مقاليش انه تعبان وانا محستش بيه كنت مشغوله بوجعي ونفسي وبس...  ما اخدتش بالي انه بينزف...  ازاي ما شفتوش؟؟؟ كنت بقوله الحقني واقوله اعمل اي حاجه؟  انا جيت عليه قوي 

عم سعيد: يابنتي ما تلوميش نفسك وبعدين ربنا قال ان اصعب وجع في الدنيا هو طلق الولاده فماتستهونيش بوجعك وايمن عارف ده كويس....  ايمن عارف كويس فما تلوميش نفسك 

ايمن خرج اخيرا من العمليات ودخلوه العنايه المركزه ومنعوا عنه الزياره لحد ما حالته تستقر 

حبيبه مصره تروحله وبيحاولوا يمنعوها بس محدش قدر عليها قامت وماشيه بتتسند علي الحيطه وسألت عليه فين؟  ومحدش عايز يقولها مكانه 

احمد صعبت عليه فوصلها ليه 

احمد: اهو شفتي وصدقتي انهم مانعين عنه الزياره...  يالا بقي ارجعك اوضتك 

احمد جه يشد حبيبه فزقته بعيد وراحت تخبط علي الباب علشان يفتحولها 

الممرضه: ممنوع الزياره عنه وبعدين انتي تعبانه روحي اوضتك ارتاحي 

حبيبه: انا لازم ادخله...  انا لازم اشوفه...  حرام عليكم اوعوا سيبوني لازم ادخله لازم 

حبيبه بتتكلم وهيا بتعيط امها واختها بيعيطو  كمان 

الدكتور خرجلها ودخلها لانها صعبت عليه 

الدكتور: ادخلي     بس لو سمحتي ما تعمليش اي دوشه وخمس دقايق وهخرجك اتفقنا؟  

حبيبه: اه اتفقنا 

دخلت حبيبه ودموعها مش عارفه توقفها نهائي 

اول مره تشوف حبيبها كده 

جهاز تنفس...  جهاز رسم قلب...  محاليل حاجات كتيره هيا مش عارفاها 

باسته: ارجوك اوعي تفكر تسيبني او تتخلي عني؟  انا محتجالك قوي... 

الممرضه للدكتور بصوت واطي: مش ده اجهاد ليه؟؟

الدكتور: بالعكس ده مشجع ليه انه يقوم لحبيبته ده اذا كانت حبيبته وهو بيحبها زي ما هيا بتحبه كده؟  

حبيبه: ايمن فتح عنيك وكلمني...  قوم يالا شيل ابنك. 

عيطت حبيبه علي كتفه فالدكتور قرب منها 

الدكتور: يالا بقي كفايه كده؟  انتي محتاجه ترتاحي علشان لما يفوق تجيله 

حبيبه: طيب خلوني جنبه؟  

الدكتور :لا مش هينفع اتفضلي 

حبيبه مشيت خطوتين ووقعت من طولها واغمي عليها 

شالوها وودوها اوضتها 

عدي اول يوم وجه تاني يوم العيد 

فاطمه هتجنن من القلق والخوف المبهم ده وبتتصل بابنها ومراته ومحدش بيرد فاتصلت بزينب 

فاطمه: امنتك باغلي ما عندك لتقوليلي ايه اللي حصل؟؟؟  ابني عمره ابدا ما اتأخر في الاتصال بيا او انه يرد عليا؟؟  حبيبه عامله ايه؟  ولدت؟ 

زينب: ايوه يا حبيبتي ولدت 

فاطمه: البيبي جراله حاجه وعلشان كده ما بيكلمونيش؟؟ 

زينب: لا ابدا عمر كويس والحمد لله 

فاطمه عيطت: ايمن ماله؟  حصله ايه؟  بقالي ليلتين بحلم بيه وبقوم مفزوعه وادعي ربنا يسترها معاه 

زينب: ما تشغليش انتي بس بالك خلصي حجتك وارجعيلنا بالسلامه 

فاطمه: زينب انتي ام وعارفه احساسي ايه دلوقتي طمنيني بالله عليكي ابني ماله؟  انا محيلتيش غيره في الدنيا دي؟؟  طيب خليني اكلمه قوليلي حصله ايه؟  

زينب :عملوا حادثه وهما جايين المستشفي وهو اتعور بس في جنبه واهو الحمدلله بقي كويس 

فاطمه عياطها بيزيد: طيب خليني اكلمه 

زينب مش عارفه تقولها ايه؟  

فاطمه: زينب اديله التليفون خليني اكلمه 

زينب: اصله نايم اول ما يصحي ان شاءالله 

فاطمه: ما فاقش صح؟  مش نايم؟  لطفك بيا يا رحيم 

انا هاخد اول طياره واجيله 

زينب: وهتعملي ايه لما تيجي؟؟ 

عم سعيد اخد التليفون من مراته 

عم سعيد: شوفي يا ام ايمن انتي في مكان طاهر ومقدس وخارجه من حج وبكره ان شاءالله اخر جمره ترميها بقي في حد يبقي جنب الكعبه ويسيبها ويجي هنا؟؟؟  ابنك محتاجك هناك توقفي بين ايدين ربنا وتدعي يقومهولنا بالسلامه؟؟  توقفي في جوار سيدنا النبي في الروضه الشريفه وتدعي ربنا يلطف بينا في حكمه ويرد قضاؤه ويقومه لمراته وابنه...  لكن هتيجي هنا تعملي ايه؟  توقفي تعيطي بره اوضته؟؟  هيفيده بإيه عياطك.؟؟؟  انتي في مكان الدعوه فيه مستجابه تسيبيه وتيجي؟؟؟  ده انهي عقل يقول كده؟  

فاطمه: بس لازم اكون جنبه 

عم سعيد: كلنا جنبه انتي بس ادعيله عندك خلصي الجمرات بكره واطلعي علي المدينه زوري الروضه وابقي تعالي علي هنا بعدها خلاص 

عم سعيد اقنع فاطمه بس برضه قلبها مش مطاوعها تسيب ابنها كده 

ايمن اخر النهار بدأ يفوق واول كلمه نطقها 

الدكتور: ايه اخيرا قررت ترجعلنا؟؟  فوق كده بقي؟  هتجنن الناس بره 

ايمن: حبيبه؟  حبيبه فين؟  

الدكتور: حبيبه دي مراتك؟  صح؟  

ايمن: حبيبه كانت بتولد في العربيه وجابت عمر هيا فين وصحتها ايه؟  

الدكتور: الظاهر انك بتحبها قوي.. {بيبص للممرضه}

طلع الحب متبادل اهو 

ايمن: عايز اروحلها 

حاول يقوم بس صرخ ومقدرش 

الدكتور: تروح فين اقعد واهدي كده؟ جنبك مفتوح وجسمك متأذي جامد وتقولي اقوم...  انسي انك تقوم خالص دلوقتي انسي تماما!!  انتو شكلكم انتو الاتنين جوز مجانين...  مراتك في اوضتها وتقريبا كده هنكتفكوا انتو الاتنين لانها برضه اصرت تيجي وتدخلك واغمي عليها من التعب والاجهاد ايه بقي الدور عليك انت النهارده توقع من طولك اهدي 

ايمن: ماهو لازم اشوفها 

الدكتور: روحي يا بنتي شوفيها لو فايقه هاتيها هنا 

الممرضه: حاضر يا دكتور 

الدكتور: هجبهالك لحد هنا 

ايمن: هو احمد هنا؟  

الدكتور: احمد ده اللي هو صاحبك ولازق بره وما اتحركش نهائي من قدام الباب!!!  اه بره 

ايمن: ينفع يدخل؟ 

الدكتور: هدخله بس دقيقتين وهخرجه 

احمد دخله 

ايمن: سامحني يا صاحبي

احمد: اسامحك علي ايه بس المهم تقول بالسلامه 

ايمن: كنت متخلف قوي وزعلت الكل مني... انت وسميه وابوك وحمايا وحماتي كلكم زعلتكم 

احمد: لا ياسيدي بس لو مصر تصالحني يبقي تقوم بسرعه وتخرج من هنا علشان انا اتجوز بقي 

ايمن ابتسم: ان شاءالله 

حبيبه دخلوها بالكرسي لحد عنده واول ما شافته قامت وقفت ومسكت ايد جوزها وباستها 

هو مسكها وشدها ليه 

ايمن :حمدلله علي سلامتك يا قمر 

حبيبه: حمدلله علي سلامتك انتي يا حبيبي ربنا ما يحرمني منك ابدا ابدا يا ايمن 

كلهم سابوهم وخرجوا 

الممرضه: يا دكتور احنا هنسيبها هنا 

الدكتور: هيا احسن علاج ليه حاليا سيبيهم 

ايمن: عامله ايه وحاسه بايه دلوقتي وابننا عامل ايه؟  

حبيبه: انا وعمر كويسين المهم انت تقوملنا بالسلامه..  ايمن انا مقدرش اعيش من غيرك ابدا ابدا..  

ايمن: ان شاءالله نفضل علي طول مع بعض...  عايز اشوف عمر وانتي جايه تاني هاتيه معاكي...  

حبيبه: انا عايزه افضل معاك هنا؟  

ايمن: انتي محتاجه ترتاحي ما تتعبيش نفسك معايا 

حبيبه: مامتك هتتجنن عليك صح كلمها طمنها كانت هتيجي بس بابا اقنعها تفضل واحتمال تيجي بكره او بعده بالكتير 

ايمن: طيب معاكي تليفون؟؟ 

حبيبه: لا مش معايا تليفوني سيبته في البيت اصلا 

اول ما اخرج هبعتلك احمد بالتليفون 

ايمن كلم مامته وطمنها عليه واقنعها انها تفضل تكمل حجها للاخر وما تجيش علشانه 

حبيبه طلبت من احمد ياخد عمر ويوديه لايمن 

احمد: ممكن ادخل؟بس معايا ضيف 

ايمن: ادخل انت وضيفك 

احمد دخل وكان شايل عمر اللي اول ما ايمن شافه كان عايز يقوم بس احمد منعه 

احمد: لا لا خليك مرتاح هو هيجي لحد عندك 

احمد رفع السرير لايمن اللي كل ما السرير يترفع يتعب بس بيجي علي نفسه لانه عايز يشيل ابنه 

شاله وباسه: بسم الله ما شاءالله تبارك الخلاق...  

احمد: هو هيبجيبه من بره؟؟  ابوه وامه زي القمر وجدوده كمان؟  وخصوصا بقي خالته

ايمن جه يضحك بس ما قدرش: يا واطي مش قادر اضحك...  

احمد: سوري المهم زمايلك كلهم عايزين يجوا يشوفوك انت وابنك ومراتك 

ايمن: انا وابني اه مراتي لأ 

احمد: ههه ماشي مراتك دي اضافه من عندي كنت عايز اشوف هتقول ايه؟  

ايمن كان بيتحرك بالعافيه وحبيبه كانت بتتحسن بسرعه 

احمد وسميه والكل معاهم وامه كمان كانت رجعت 

ايمن حبيبه مسنداه لحد ما قعد 

احمد: سبحان الله له في ذلك حكم 

ايمن: من امتي الايمان ده؟  مالك؟  

احمد: اصل ديما يا اخي بعد ما الست تولد جوزها يسندها ويقومها اول مره بقي اشوف الوضع معكوس هيا ولدت وانت اللي بتتسند 

الكل ضحك وايمن مش قادر يضحك فكان جنبه ازازه ميه خبطها في وش احمد وطرده بره 

قضوا اسبوع في المستشفي  وجه وقت الخروج من المستشفي 

زينب: تيجوا عندنا البيت مع حبيبه 

ايمن: حبيبه؟؟؟ 

زينب: مش والده؟؟  يبقي تيجي تربعن في بيت ابوها 

ولا انت معترض يا ايمن؟؟

ايمن: وانا من امتي بعترض علي حبيبه انها تيجي عندكم؟؟؟  هقول زي كل مره براحتها 

حبيبه: ماما معلش انا هروح بيتي انتي شايفه الظروف انا مقدرش اسيب جوزي في حالته دي؟  

زينب: بس انتي لسه والده 

حبيبه: معلش بقي 

عم سعيد: سيبي البنت مع جوزها يا زينب 

ايمن بيتحسن شويه شويه وطبعا اخد اجازه طويله من شغله وده خلي ابنه يتعلق بيه اكتر واكتر وما بيسكتش غير مع ابوه 

حبيبه: الولد اتعلق بيك قوي 

ايمن: خليه يتعلق...  المهم هنجيب اللي بعده امتي؟  

حبيبه: انت عايز عيال تاني؟  

ايمن: نعم يا اختي؟؟؟  هو انتي لسه جبتي؟؟؟  امال فين اللي وعدتيني بيها؟؟  

حبيبه: وعدتك بإيه؟  انا ما وعدتكش بحاجه 

ايمن: وعدتيني في الحلم  ببنوته زي القمر شبهك كده ولا نسيتي؟  

حبيبه: حلمك انت...  انا مالي انا بقي؟؟ 

ايمن: وانتي مالك ازاي بقي؟  امال البنوته دي فين؟  لو مش هتجيبها قولي نشوف حد يجيبها 

حبيبه خبطته: شوف غيري يالا وريني 

جت تقوم فايمن شدها 

ايمن: استني بس هو انا اقدر استغني برضه؟؟  ده انت قمري..  وروحي وحياتي ومراتي وام عيالي؟؟  انا مقدرش استغني عنك ابدا يا قمر 

احمد حدد معاد فرحه هو وسميه وعملوا فرح اسلامي 

حجزوا قاعتين واحده للرجاله وواحده للحريم 

حبيبه في الكوافير عملت نيولوك جديد...  قصت شعرها وظبطته وصبغته درجه من درجات الاحمر وازدادت جمال علي جمالها 

كانت لابسه فستان من غير حمالات وضيق وواسع من تحت طويل 

سميه كانت بدر منور...  الاخوات كلهم كانوا قمرات 

جه معاد تقطيع التورته 

فطلبوا من البنات المنتقبه تلبس علشان العريس هيدخل والرجاله المقربه هتدخل 

حبيبه لبست بوليرو وطرحه لفتها وكانت قمر برضه 

دخل احمد وابوه واعمام وخيلان البنات وبس 

قطعوا التورته واتصوروا 

حبيبه: بت يا سميه 

سميه: ايه ياقلبي 

حبيبه: البسي اي حاجه كده خليني ادخل ايمن بقي اخص عليكي 

سميه: عنيا يا قمر 

راحت حبيبه تنادي علي جوزها 

حبيبه: ايمن 

ايمن: ايه يا جميل 

حبيبه: بقولك 

ايمن: انت حلوه كده ليه الاول؟؟؟  ارحميني شويه هتجننيني 

حبيبه: انا عايزه اجننك 

ايمن: اهون عليكي ده انا ابو ابنك برضه 

حبيبه: المهم بص انا عازمه كل زمايلي في الكليه وسميه برضه وفي بنات كتير قوي جوه مقتنعه ان المنقبه دي ملهاش حق تفرح او تتبسط وان اجوازهم بيلبسوا الجلايب القصيره وبدقون وما بيدلعوش مراتاتهم واخدين فكره غلط قوي عننا 

ايمن: امم والمطلوب؟؟ 

حبيبه: تصلح الفكره دي اا

ايمن: انا؟؟  واعمل ايه بقي اديهم درس يعني ولا ايه؟  

حبيبه: لا طبعا 

ايمن فاهم بس بيستعبط: امال عايزه ايه؟  

حبيبه بدلع: تديهم درس عملي مش نظري 

ايمن: ايوه اعمل ايه يعني؟  

حبيبه: تدلع مراتك قدامهم!!  توريهم ان احنا مش عقد!!ترقص معايا سلو!!!  انا اللي هقولك برضه يا ايمن؟؟ 

ايمن: انتي عايزاني ادلعك قدام اصحابك واعمامك وابوكي وخيلانك؟؟؟ 

حبيبه: اه اه عندك مانع 

ايمن باسها: لا معنديش 

حبيبه مسكت ايده: طيب يالا 

ايمن: حد خالع راسه ولا حاجه؟  

حبيبه: لا محدش تعال

سميه لبست برضه بوليرو وطرحه وايمن دخل بارك للعرسان 

وراح لحبيبه حبيبت قلبه 

ايمن: جميله الجميلات 

حبيبه: عيوني 

ايمن: تسمحيلي بالرقصه دي 

ايمن وطي بطريقه مسرحيه ومد ايده لمراته فمسكت ايده وهو باس ايدها وبص لبتوع الديجي 

ايمن بصوت عالي: لو تتكرموا عايز اغنيه hero لو ينفع وحياه ابوكي 

وبص لاحمد: هترقص ولا هتتفرج؟؟ 

احمد: شغال معاك طبعا 

احمد بيرقص مع سميه وايمن بيرقص مع حبيبه 

طبعا احمد وسميه بيرقصوا بس بكسوف شويه لكن ايمن مراته في حضنه  ومنتهي الدلع والاثاره لدرجه ضايقت عم سعيد 

الرقصه اول ما خلصت ايمن باس حبيبه في شفايفها بوسه مثيره واخدها ونزل من الاستيج 

عم سعيد جاي ناحيته 

ايمن: عجبك كده ابوكي جاي الظاهر ان احنا زودناها حبتين؟؟ 

حبيبه: طيب عمر بيعيط اروح اشوفه 

ايمن: زي كل مره بتبيعيني وقتي ماشي يا حبيبه 

عم سعيد وصله: يعني ما تكمل وتنام معاها احسن 

ايمن: معلش يا عم سعيد حقك عليا 

عم سعيد: انت متخيل كميه الذنوب اللي اخدتها!! 

ايمن: ليه؟  دي مراتي 

عم سعيد: حركت مشاعر كام واحده؟؟؟  كام واحده تخيلتك معاها او تخليت واحد معجبه بيه ولا بتحبه؟؟؟  كام واحده هتفضل تفكر في شكلكم وتفضل طول الليل تتخيل ومش بعيد تغلط بسبب انها عايزه تجرب طالما انتو بينتوا قد ايه الموضوع حلو قوي كده؟  راعي يا ايمن مشاعر الناس هو انا اللي هقولك برضه 

ايمن: عارف يا عمي الكلام ده بس احنا كنا متعمدين ده 

حكي ايمن لعم سعيد الحوار اللي حبيبه قالته 

عم سعيد: برضه يا ايمن انت زودتها قوي قوي 

ايمن: طيب خلاص حقك عليا 

احمد خرج وفضل ايمن فحبيبه قلعت وورته فستانها 

ايمن: المفروض اعمل ايه انا بقي دلوقتي ما تيجي نروح ايه رأيك؟  

حبيبه ضحكت: كلها ساعه بالكتير وكلنا نروح بس علشان ما ينفعش اسيب سميه لوحدها 

خلاص خلص الفرح وسميه دخلت تلبس النقاب وحبيبه معاها علشان تساعدها 

سميه كانت متوتره جدا وخايفه وكان باين عليها قوي 

حبيبه: مالك يا بنتي في ايه؟  

سميه: مالي؟؟  متوتره؟  خايفه؟  قلقانه؟  بس 

حبيبه ابتسمت: وكل ده ليه؟  خايفه من ايه؟  

سميه: هو انتي معديتيش علي الليله دي قبل كده ولا ايه؟  

حبيبه: عديت وعلشان عديت مستغربه انتي خايفه ليه؟  

سميه: مستغربه؟؟  هو انتي مخفتيش في اول ليله مع ايمن؟؟؟ 

حبيبه: ايمن حبيته من اول مره شفته فيها وحبيته اكتر بعد ما بقي جوزي وعمري ابدا ما خفت منه بالعكس كان هو ديما الامان بالنسبالي 

انتي بتحبي احمد؟؟ 

 سميه: طبعا بحبه 

حبيبه: طيب خلاص طالما بتحبوا بعض هتبقي دي ليله حب....  ليله بيتقابل فيها اتنين مشتاقين لبعض عايزه ايه تاني اكتر من كده؟  

سميه: يا فلسفتك وغتاتك 

حبيبه: ولا فلسفه ولا غتاته انا عايزاكي تعيشي ليلتك انتي وبس...  انتي وهو تكتبوا سطورها من غير تأثير من حد او ضغط مش اكتر

 ابقي احكيلي عن ليلتك مع احمد 

سميه: ده انتي ولا حرف هقولهولك انا هقاطعك اصلا من النهارده 

حبيبه: ماشي يا ستي براحتك يالا بقي نطلعلهم 

في نفس الوقت كان ايمن واحمد بره مستنين مراتاتهم تطلع 

احمد: تصدق انت صاحب ولا ليك اي لازمه؟  

ايمن: انا؟؟؟  انا اللي طالع عين اهلي معاك في فرش وتوضيب وشرا اجهزه وعفش وتحضير للفرح والنهارده اهوه هشتغل لسيادتك سواق وبرضه في الاخر ولا ليا لازمه؟ ؟  ماهو دي اخرتها 

احمد: يا عمي مش قصدي علي كل ده 

ايمن: امال تقصد ايه؟  

احمد: هو انا المفروض اعمل ايه النهارده؟  

ايمن اول ما سمع سؤاله انفجر بالضحك بصوته كله واحمد حط ايده في وسطه ومستنيه يخلص 

ايمن: سوري سوري يا احمد 

احمد: عجبتك قوي؟؟؟  قولت نكته انا؟؟ 

ايمن لسه بيضحك: انت بتسأل بجد ولا بتهزر؟؟؟ 

احمد: اصل ده وقت هزار ده 

ايمن: انت بتتكلم بجد؟؟   وعاملي فيها دنجوان 

احمد: ولا عامل ولا مش عامل انا اول مره اتجوز وبعدين سميه غير الهلس اللي كنت بعرفهم...  فعلشان كده بسألك اعمل ايه؟  

ايمن: انت عايزني اقولك تعمل ايه مع مراتك في ليله دخلتك؟؟؟ 

احمد: مش بالمعني بس انت عملت ايه مع اختها؟؟ 

ايمن: نعم يا اخويا؟؟  وانت مال اهلك قال عملت ايه قال 

احمد: يووه يا ايمن مش قصدي بص هيا متوقعه مني ايه ده سؤالي 

ايمن: هو انا خطيبها ولا انت؟؟؟  المفروض انت تكون عارف هيا متوقعه ايه منك؟؟؟  متوقعه منك تحبها 

احمد: هو انت غبي النهارده ولا بتستغبي؟؟  انت اكيد فاهم انا قصدي علي ايه انت ليه عامل نفسك من بنها؟؟ قصدي ان مراتك اكيد حكتلها عن ليلتها الاولي فهي هتبقي متوقعه مني ايه؟  

ايمن: لا طبعا مراتي محكتش لحد حاجه..  احمد الموضوع ده خاص جدا وما ينفعش يتحكي ولو ده اللي قلقك فاطمن حبيبه ما حكتش اي حاجه 

وبعدين لو عايز نصيحتي النهارده بالذات حبها اكتر ما بتحب نفسك...    كحسسها الاول بالامان....  انت لازم تكون الامان بتاعها وتبقي عارفه ومتأكده ان انت الشخص اللي ديما هتجري تستخبي فيه...  لازم تطمنلك الاول...   

ده اللي اقدر اقولهولك وبس....  تعمل ده ازاي بقي دي حاجه ترجعلك انت...   

احمد: طيب افرضنا 

ايمن: ما تفرضش تعامل بالحب اللي جواك معاها وكل حاجه هتبقي سلسه وبعدين اهم جايين يالا روح خد مراتك يالا وانا اخد القمر بتاعي 

راحو اخدوهم حبيبه قعدت جنب جوزها قدام واحمد وسميه وري بيتكلموا 

وصلوهم وروحوا بيتهم 

اخر الليل حبيبه في حضن ايمن 

 حبيبه: سميه كانت جميله قوي النهارده وكانت فرحانه باحمد قوي 

ايمن: المهم سيبك منهم...  هو انا قلتلك النهارده انتي قد ايه جميله؟  جميله لدرجه مش عارف ابعد عنيا عنك او اغمضهم حتي 

حبيبه: النيولوك عجبك؟  يستاهل الفلوس اللي فركشتها النهارده؟  

ايمن: انتي جميله اصلا من غير حاجه بس النهارده اجمل واجمل...  وبعدين فداكي فلوس الدنيا كلها وبعدين هيا الفلوس لازمتها ايه غير انها تدلعنا؟؟  حلو شعرك كده قوي لونه!  ملمسه!  شكله!  ريحته!  من الاخر كلك علي بعضك حلو 

حبيبه: انا حلوه بحبك انت....  كل ما بتحبني اكتر كل ما بحلو اكتر 

ايمن: اوبا يبقي كده لازم ابطل احبك شويه لو احلوتي اكتر من كده هتجنن انا 

حبيبه: انا بحبك مجنون 

....#####.،،،،،،#####.........########...،،

سميه كانت في قمه سعادتها وفهمت ليه اختها مرضيتش تكلمها 

قضوا شهر عسل ما احلي ما يكون ورجعوا وطبعا ايمن وحبيبه زاروهم 

البنات مع بعض والرجاله مع بعض 

ايمن: اتبسط ولا؟ 

احمد: انا ممكن اعيش عمري كله في اوضه واحده مع سميه ومش هزهق ابدا 

ايمن: ههههه عارف انا الاحساس ده مجربه قبل كده 

احمد: المهم 

ايمن: ايه المهم قول؟  

احمد: ابويا كان لوحده طول الشهر اللي فات وده حسسني بالذنب الاول كنا مع بعض لكن دلوقتي بعد ما اتجوزت وسميه بقت في حضني ده اكدلي ان تفكيري صح وقراري صح؟  

ايمن: بتتكلم عن ايه وتقصد ايه؟  

احمد: ابويا يتجوز امك وقبل ما تتكلم...  مفكرتش وانت بتتمتع في حضن مراتك ومتمرمغ  في احضانها امك بتقضي الليل ده ازاي؟  وخصوصا لو بتهزروا او صوتكم عالي شويه؟؟؟  ما بتفكرش لما تخرج تتعشي بره مع حبيبتك هيا بتتعشي ازاي؟؟  ما فكرتش لما بتسافر انت وحبيبه هيا بتقضي الوقت ازاي؟  ما تبقاش اناني يا ايمن 

ايمن: انا مش اناني بس هيا عمرها ما فكرت في الموضوع ده 

احمد: مين قالك سألتها؟؟ 

ايمن: فتحنا الموضوع قبل كده بس اخدته هزار 

احمد: وانت كنت عايزها تقولك ايه؟  لا والنبي جوزني 

ايمن: بقولك ايه اخرج من دماغي 

قام وقف ونادي علي مراته واخدها وروح بس فعلا بيفكر في الموضوع جامد قوي لدرجه حبيبه لاحظت انه مشغول عنها 

سالته وما جاوبهاش!!!! 

عدت فتره كام شهر وايمن بيراقب والدته وحس قد ايه فعلا هيا وحيده وخصوصا اخر الليل بعد ما بيدخل لحضن مراته 

 تاني يوم راح لحماه وقعد معاه لوحدهم 

ايمن: كنت عايز اخد رأيك في حاجه كده؟  

عم سعيد: قول علي طول خير؟  

ايمن: هو ينفع يعني؟  قصدي صح انه؟؟ 

ايمن مش عارف يفتح الموضوع ازاي؟  

عم سعيد: ما تتكلم علي طول 

ايمن: هو ينفع امي تتجوز في السن ده؟  

عم سعيد: ينفع وليه لأ؟  عيب ولا حرام؟  الشرع حلله وبعدين مش احسن من الفتنه او الوحده اللي ما بترحمش حد 

ايمن: يعني انت شايف انه عادي تتجوز؟؟؟  وهيا في السن ده؟  دي بقت جده؟؟

عم سعيد: ايه المشكله ما انت اهو شحط طويل عريض فاتح بيتك وعندك عيل مسؤل منك معدتش صغير محتاجها....  لو في حد كويس وتثق فيه عايزها ما تحرمهاش من ده او علي الاقل سيبلها هيا حريه الاختيار

ايمن: احمد عمال يقنعني ان ابوه يتجوز امي لحد ما جننيني 

عم سعيد: والله واد بيفهم انا نفسي كنت هقترح ده؟  انتو اتجوزتو واستقريتو سيبوهم بقي يتنفسوا  

ايمن مشي والكلام بيلف ويدور وطلع علي بيت احمد خبط وفتحله عم معتز الباب 

معتز: اهلا يا ايمن اتفضل بس احمد وسميه مش هنا 

ايمن: كويس لاني جاي لحضرتك مش ليهم 

دخل وقعد وفتح معاه الموضوع دغري 

ايمن: انت عايز تتجوز امي؟؟ 

معتز كح وشرق ومكنش عارف ينطق بايه؟  

ايمن: اعتبر سكوتك ده رفض ولا ايه؟  

معتز: لا لا رفض ايه؟  بس انت مين قالك ده؟  

ايمن: عم معتز جاوبني؟ 

معتز: انا عمري ما فكرت في الجواز بعد المرحومه 

ايمن وقف: يعني بترفض طيب سلام 

معتز: يا ابني انا بتكلم!!! في ايه؟  اترزع بقي؟  انت مين قالك اني عايز اتجوز والدتك؟؟ 

ايمن: ابنك طبعا عمال يزن من فتره 

معتز: وانت ايه رأيك،؟؟ 

ايمن: علي فكره انا جاي اسألك مش انت تسألني؟؟  لازم ابقي عارف رأيك انت قبل ما افتح الموضوع مع امي 

معتز: ايمن انا يشرفني اني اتجوز والدتك انت ما تتخيلش 

قاطعه ايمن: ومش عايز اتخيل انا حلو قوي كده اني موافق تتجوزها انما اتخيل لأ؟  بعد اذنك 

معتز: هتقولها؟؟ 

ايمن: اه هقولها 

روح البيت ولقي امه لوحدها لانه مراته خرجت مع اخواتها ولاحظ فعلا وهيا قاعده قدام التليفزيون انها وحيده 

ايمن: الجميل لوحده ليه؟  

فاطمه: يعني هعمل ايه تعال اقعد 

ايمن: بقولك سبق وفتحت معاكي موضوع الجواز وانت قلبتيها هزار 

فاطمه: جواز ايه بس يا ايمن وانا في السن ده؟  

ايمن: سن ايه؟  انتي لسه جميله ومش كبيره ليه تعيشي لوحدك 

فاطمه: انت معايا 

ايمن: لا يا امي انا يا اما في شغلي يا مع مراتي وانتي اغلب الاوقات لوحدك... 

فاطمه: عادي اتعودت 

ايمن: طيب وليه طالما في حد ممكن يشاركك وحدتك دي ويبقي طول الوقت معاكي حد تاخدي بالك منه وياخد باله منك فايه المشكله؟  

فاطمه: ومعتز الحد ده؟  

ايمن: ايوه هوه ايه رأيك؟  

فاطمه: انت بجد يا ايمن مش فارق معاك اني اتجوز بعد ابوك؟؟

ايمن: ابويا ميت وانتي فضلتي كتير لوحدك كفايه بقي كده عيشيلك يومين افرحي وحبي واتبسطي 

فاطمه: مش هتقول اني خنت عشره ابوك؟؟؟ 

ايمن: خنتيها ازاي بس؟؟  انتي حافظتي عليها كتير قوي بس كفايه كده لو معتز عاجبك وهيسعدك انا هكون اسعد راجل في الدنيا لان اكتر اتنين بحبهم في الدنيا مبسوطين مراتي وهيا في حضني وانتي في،..  انتي مع معتز 

امه ضحكت: انت اكتر حد انا بحبه في الدنيا دي 

ايمن: اكتر من عمر؟؟؟ 

فاطمه :اه لا عمر اكتر معلش اعز من الولد بقي 

ايمن: ربنا يسعدك يا قمر 

اتعمل فرح هادي بسيط حضره العيلتين

حبيبه وعيلتها وايمن واحمد وابوه وبيت كبير مليان فرح وحب وايمان بالله وبقضاؤه ان ممكن حاجه وحشه يبقي وراها حاجات كتير حلوه 

ايمن وحبيبه واقفين في بلكونه حبيبه في بيتها وبيبصوا تحت علي الكل متجمع 

ايمن: فاكره اول يوم دخلت هنا؟  كان نفس الزينه والفرح بس ناس كتير 

حبيبه: وقبضت علي ابويا وبصيت عليك من هنا واستغربت ليه قلبي دق لواحد جاي يقبض علي ابويا 

ايمن: كنت بكره اليوم ده قوي ومستغرب ليه ربنا خلاني سبب لفضيحه راجل زي ابوكي ده  لحد يوم فرحنا واكتشفت اني كسبت اغلي واجمل هديه من ربنا وهيا انتي....  انتي كنتي الحور العين اللي حلمت بيها وقالتلي انها ملكي 

حبيبه: انا فين والحور العين فين؟  

ايمن: الزوجه في الجنه بتبقي اجمل مليون مره من الحور العين وانا محظوظ لان زوجتي في الدنيا برضه اجمل من الحور العين 

حبيبه: انا عندي هديه ليك علشان ابقي وفيت بوعدي 

ايمن: ايه هيا؟  

حبيبه: انا حامل يا ايمن؟  

ايمن معرفش يعبر عن سعادته دي بايه غير انه يسجد للي رزقه الحب الحلال والحياه الجميله 

حبيبه جابت بنوته قمر وبكده اتحقق حلم ايمن وربنا وهبه الذريه الصالحه  والحياه الجميله 

وتوته توته خلصت الحدوته