رواية صاحب مفتاح الشقة البارت الثامن 8بقلم عمرو راشد جديده وحصريه في مدونة قصر الروايات
رواية صاحب مفتاح الشقة البارت الثامن 8بقلم عمرو راشد جديده وحصريه في مدونة قصر الروايات
انت فين يا امجد؟
= انا في الشغل يا حبيبتي،، في حاجة؟
في الشغل ازاي؟ وأنا اتصلت بيهم وقالو انك مجيتش النهاردة ولا امبارح
= انتي في البيت؟
رد على سؤالي
= الكلام مش هينفع في التليفون،، لما ارجع هحكيلك
انا عايزة اعرف انت فين دلوقتي؟
= لما ارجع هتفهمي كل حاجة
ماشي يا أمجد وأنا مستنياك
" قفلت المكالمة معاها و ابتسمت بمنتهى البرود و اتجهت للبيت،، اول ما وصلت تحت العمارة فتحت الدرج اللي في العربية وخدت منه الشنطة اللي كانت جواه ونزلت عشان اطلع الشقة،، وفعلا لما وصلت كانت منال قاعدة في الصالة مستنياني و وشها كان غضبان جدا،، دخلت وقفت قدامها
في ايه مالك؟
= انت بتضحك عليا وتقولي انك نازل الشغل وانت اساسا مبتروحش،، دا اسمه ايه دا يا أستاذ؟
ممكن تسمعيني عشان اعرف افهمك؟
= انا مش عايزة اسمع منك اي مبرررات،، انا عايزاك حالا تقولي انت كنت بتنزل من هنا بتروح فين؟
عشان اجيب دا
" حطيت الشنطة قصادها وهي ساعتها بصتلي بنظرة شك
دا ايه دا ان شاء الله؟
= أنا كل يوم بنزل ادور على علاج ل امك،، كل يوم عند دكتور غير التاني عشان اعرف حالة امك بالظبط،، لحد ما في دكتور منهم كتب ليا العلاج دا والمفروض ان دا علاج ل حالتها،، العلاج دا مستورد يعني لسة منزلش مصر،، الدكتور عشان صاحبي عرفت اجيب العلاج بسهولة وحاليا بحاول اجيب أكتر من علبة من برا مصر،، كنت كل يوم بقولك انا نازل رايح الشغل عشان مش عايزك تتعشمي بحاجة الله اعلم ممكن تحصل ولا لا،، لكن الحمدلله حصلت اهي وأنا كنت راجع اقولك كل حاجة على فكرة،، عرفتي بقا انا بروح فين كل يوم
" لقيتها مسكت الشنطة وفتحتها وخرجت منها العلاج وقالتلي
يعني هو دا علاج امي؟
= بإذن الله
هو دا اللي هيخليها تخف؟
= ربنا قادر على كل شئ،، ربنا زي ما خلق الداء خلق معاه الدواء
" نظرتها بدأت تتغير ل ضعف وحيرة وحطت ايديها على رأسها وبصت في الارض وقالتلي
انا متلخبطة أوي،، انا حاسة اني في حلم،، أمجد ارجوك خليك جنبي متسبنيش
" قعدت جنبها وطبطبت عليها وخدتها في حضني
انا جنبك طول الوقت متقلقيش،، مش عايزك تشيلي هم اي حاجة طول ما أنا موجود،، انا ضهرك و سندك في الدنيا يا منال،، امك زي امي بالظبط يعني امرها يهمني وأنا مش هرتاح غير لما تقوم بالسلامة
= انا تعبانة اوي يا أمجد،، تعبانة اوي
سلامتك من التعب،، بعد الشر عليكي من اي تعب يا حبيبة قلب أمجد
= انا آسفة لو كنت شكيت فيك،، انا كل شوية اكتشف اني بظلمك معايا سواء ب معاملتي ليك أو بسوء ظني فيك،، صدقني كل دا غصب عني،، عايزاك تسامحني
انا مسامحك من قبل ما تتكلمي،، بس انا مش عايز اشوفك كدا،، عايزك تفوقي وترجعي منال بتاعت زمان
" فضلنا ساكتين لمدة خمس دقائق و هي في حضني بعدها قولتلها
يلا بقا قومي وخلي امك تاخد العلاج دا و ان شاء الله تكون كويسة،، انا أملي في ربنا كبير
" الخداع والتصنع من اخبث الطرق اللي ممكن تستخدمها عشان تعرف تخدع بيها اللي قدامك،، بس هي مش مضمونة 100% لسبب واحد وهو انك لازم تستخدمها بطريقة معينة عشان محدش يشك فيك،، لازم اللي قدامك يحس انك فعلا ضحية،، يحس بتأنيب ضمير وأنه هو اللي ظالم وشخص مش كويس عشان شك فيك،، زي مثلا اللي حصل دلوقتي دا،، العلاج اللي انا جيبته ل حماتي هو فعلا علاج ل حالتها،، العلاج دا مضاد للسم اللي في جسمها إنما هو مش علاج فعال لانه بيقلل انتشار السم في الجسم لكن مبيقضيش عليه بس الخدعة هنا فين؟،، لما حماتي هتاخد العلاج هتبدأ تستعيد وعيها من تاني وطبعا منال ساعتها هتصدق وتفرح جدا و في وسط الفرحة هبدل علبة العلاج بنفس العلبة اللي معايا بس اللي جواها مش هيبقا مضاد للسم دا هيكون السم نفسه يعني كدا الأم هتمو*ت على ايد بنتها و ربنا يسامحها بقا ساعتها،، بعدها انا دخلت غيرت هدومي ونمت في سلام،، صحيت تاني يوم على صوت منال وهي بتصحيني
الفطار جاهز يا حبيبي،، قوم يلا
" قومت بالفعل خدت دش و لبست وخرجت عشان افطر،، منال اول ما شافتني استغربت وقالت
ايه دا انت نازل؟
= ايوا يا حبيبتي،، هفطر وأنزل
رايح فين المرادي يا سي أمجد؟
= الميناء،، في شغل كتير متعطل هناك ولازم اكون موجود عشان نعرف هنعمل ايه
يعني مفيش اي حاجة سر؟
" ابتسمت في وشها وقولت
متقلقيش يا حبيبتي انا مستحيل اكدب عليكي تاني بس المهم طمنيني امك عاملة ايه دلوقتي؟
= انا مش مصدقة بجد،، النهاردة فاقت وبتتكلم معايا بس على خفيف يعني
يعني في تحسن؟
= البركة فيك يا حبيبي
البركة في ربنا ثم الدكتور وبعديهم انا
= ربنا ميحرمنيش منك أبدا
ولا منك يا حبيبتي
" خلصت فطار ونزلت ركبت العربية و روحت على شقة ناهد،، وصلت هناك وفتحت باب الشقة و دخلت بس المرادي لقيتها نايمة على الكنبة،، روحت قعدت جنبها و هي حست وفاقت
انت جيت يا حبيبي؟
= انتي شايفة ايه؟
مش شايفة غيرك
= مش قولنا قبل كدا نبطل شرب
كنت قاعدة لوحدي زهقانة ف قولت افرح شوية
= وفرحتي؟
الفرحة كانت ناقصة عشان انت مش موجود
= انا عايزك تبقي فايقة يا ناهد،، تصرفاتك مبقتش تعجبني،، خايف ييجي اليوم اللي استغنى عنك فيه
" لقيتها اتعدلت وقامت و دخلت في حضني
انت اللي سايبني لوحدي يا أمجد
= كلامي معاكي كان واضح من الاول،، أنتي عارفة اني عندي مسؤوليات كتير
وأنا فين من مسؤولياتك دي؟
= انتي اول مسؤولياتي بأمارة انك عارفة عني اللي محدش يعرفه
افهم من كدا اني ليا استثناء عندك
= واستثناء كبير أوي بس انتي بترفضيه يا ناهد بتصرفاتك
انا تحت امرك يا سيد الناس،، تحت رجلك كمان،، قولي ايه المطلوب مني؟
= انا هتجوز شهد خلاص
يا بختها والله،، هي مين تحلم انها تكون مراتك؟
= كل واحد وعنده حظه من الدنيا واللي حظه حلو بس هو اللي بيقابلني
عايزة اسألك سؤال بس متزعلش؟
" خدت نفس عميق و رديت عليها
اسألي؟
= ايه هي الشقة؟،، نفسي اعرف جواها ايه؟،، انا عارفة انه مش من حقي اسأل سؤال زي دا بس الفضول تاعبني اوي
قولتلك قبل كدا الشقة هي جنة الانسان على الأرض،، بيدخلها من غير حساب،، بيعيش فيها حياته كلها ومش هو لوحده،، هو وكل اللي من نسله،، في الجنة هتلاقي كل اللي نفسك فيه،، أي حاجة تتمنيها هتلاقيها في نفس اللحظة وكل دا بشرط واحد،، تنفيذ أوامري،، الموضوع سهل جدا
= وانا هكون معاك في الجنة؟
طول ما انتي بتسمعي الكلام ومطيعة هتبقي معايا
= ومنال ونورا وشهد
مش من حقك تعرفي حاجة عن غيرك،، خليكي في نفسك وبس يا ناهد واعرفي ان الفضول اخرته مش حلوة وهيخليكي تخسري كل حاجة
= لا لا خلاص انا آسفة،، عشان خاطري متزعلش مني
مش هزعل يا ناهد بس ياريت متتكررش
= مش هتتكرر وعد مني،، تحب احضرلك تاكل؟
لا،، انا جاي عشان اقولك على التعليمات الجديدة
= وانا سامعاك
صلاح جوز اخت مراتي
= مالو؟
محتاج تأهيل نفسي
= ازاي
ايه اصعب على الراجل يا ناهد؟
= الفقر
الفقر اصعب حاجة على اي بني آدم مش الراجل بس
= طب قولي انت؟
العجز
= ايه الفرق؟
الفرق كبير لان العجز اشكال وانواع بس اخطر نوع فيهم هو العجز الجن*سي
= اوعى يكون قصدك اللي في بالي
بالظبط وعشان اوضحلك اكتر هشرحلك كل حاجة بالتفصيل،، بس المهمة دي كبيرة يا ناهد لو فشلتي فيها عمرك ما هتعرفي توصلي للجنة
= وانا من امتى بفشل؟،، دا انا تلميذتك
يبقا اسمعيني
#بقلم : #عمرو راشد
" بدأت أشرح كل حاجة من الاول للاخر،، بداية الخطة هتبدأ لما ناهد هتتصل ب صلاح وتقوله..
انا ناهد اللي كنت معاك في عيد ميلاد والدة منال،، فاكرني
= فاكرك طبعا،، ايه اخبارك؟
مش كويسة خالص يا صلاح،، انا من ساعة ما شوفتك وأنا مبنامش،، حتى لو نمت بتجيلي في الحلم،، صورتك مبتفارقنيش لحد ما عرفت اجيب رقمك عشان اكلمك
" ولأن صلاح راجل عنيه زايغة وناقص هيرد يقولها..
بس احنا متكلمناش ساعتها،، حصل دا كله امتى وازاي؟
= انا كنت بحاول اداري و اخبي بس لقيت نفسي مش قادرة يا صلاح،، تعبانة اوي من غيرك
باين عليكي،، طب قوليلي أنتي فين وانا اجيلك و اريحك من التعب دا
= بجد يا صلاح؟،، هتعرف تريحني؟
انا تخصص في راحة المرأه،، هاتي العنوان بس
" مكنتش محتاج وقت عشان اعرف العب بيه،، الشهوة بتسوقه بدل مخه و دي اسهل طريقة تدخل بيها للانسان اللي زي دا،، كنت انا عامل حسابي ومأجر شقة تانية محدش يعرف عنها حاجة،، ناهد وصلت هناك وأنا فضلت قاعد تحت في العربية مستني صلاح يوصل،، وبعد نص ساعة صلاح وصل وطلع الشقة،، استنيت ساعة لحد ما ناهد تعمل دورها كويس أوي عشان صلاح يكون جاهز لاحلى ليلة هيقضيها في حياته،، الساعة عدت وبعدها طلعت الشقة بس مدخلتش،، اللي دخل هو ممثل صاحبي و دخل عشان يعمل دور جوز ناهد اللي هيمسكها وهي بتخونه وفعلا دخل وأنا دخلت وراه بس بعد ما كان صلاح متكتف تماما وهو من غير هدوم،، ناهد خرجت هي و الراجل اللي عمل دور جوزها وأنا الوحيد اللي فضلت واقف،، اما صلاح كان قاعد وباصصلي بكل غضب
ليه يا صلاح؟ انت متعرفش ان الز*نا حرام؟
= تصدق أنا مكنتش اعرف انك و*سخ أوي كدا،، لو راجل فكني يا امجد وشوف هعمل فيك ايه
غلط،، كلامك دلوقتي دا اكبر غلط،، الإنسان في الموقف دا بيعتذر،، بيحاول يبرر غلطه يا صلاح
= اخرج بس من هنا وانا هقول ل منال على كل حاجة،، اخليها تطردك وترجع شحات زي ما كنت
طب مش لو خرجت من هنا الاول؟
" نظرته بدأت تتغير ل خوف وقلق
انت هتعمل ايه؟
= انت عارف عقوبة الز*نا ايه يا صلاح؟ المو*ت
أمجد ابو*س سيبني اعيش وأنا احلفلك بالله اني مش هقرب ليك تاني ولا ل منال
= صعبت عليا،، حقيقي صعبت عليا يا صلاح عشان كدا انا مش همو*تك بس برضو لازم تتعاقب بس ازاي بقا؟
أمجد،، أمجد انت هتعمل ايه؟
" قبلها كنت مجهز سا*طور وخليته موجود في الشقة قبل ما هو يوصل،، بس جيبت لزق الأول و كتمت صوته و بعدها جيبت قماشة عشان اربط بيها بوقه بحيث امنع خروج صوته تماما،، بعدها خرجت برا وجيبت السا*طور ووقفت قدامه وانا مبتسم
عشان ربنا يسامحك لازم تتطهر من ذنبك يا صلاح،، صدقني دا احسن حل لو عايز تعيش مرتاح عشان بعد كدا تتعلم متخليش الشهو*ة هي اللي تحركك
" قربت منه وفي ثانية كنت ضر*بته بالسا*طور على منطقة شهو*ته لحد ما اتقطع تماما بعدها خدت نفس عميق وابتسمت لما شوفته واقع على الأرض قدامي مغمى عليه،، بس طبعا عشان انا قلبي طيب مش هينفع اسيبه كدا،، قبلها كنت اشتريت خط جديد،، فتحته واتصلت ب هالة مراته وحكيتلها كل اللي حصل وبعتلها العنوان بس طبعا كان معايا برنامج تغيير الاصوات يعني مش هتقدر تعرف صوتي،، بعدها كسرت الخط والموبايل كله ونزلت تحت ركبت العربية وناهد كانت جنبي ومشينا،، وصلنا تحت بيتها وهي ساعتها بصتلي وقالتلي
عقابك كان شديد المرادي
= صلاح كان على علاقة بمراتي يعني كان لازم ياخد جزاؤه
بس انت كدا قضيت عليه خالص
= وهو دا اللي أنا عايزه،، المو*ت كان هيبقا رحمة بس انا مش عايز ارحمه
مش خايف يبلغ عنك؟
= ساعتها هجيب الممثل اللي كان هناك وهجيب واحدة تانية غيرك و هزور عقد جواز بتاريخ قديم وهثبت انه عمل كدا بنية الدفاع عن شرفه
يااخي انت كل مرة تفاجئني بدماغك،، ايه دا؟ أنا ساعات بحسك مش بني آدم
= عشان انا مش اي بني آدم،، انا أمجد العطار صاحب مفتاح الشقة
" بعدها ناهد نزلت من العربية وطلعت الشقة و انا كملت طريقي لحد بيتي،، أول ما وصلت لقيت منال لابسة وجاهزة عشان تنزل
انت فين يا امجد؟،، كلمتك كتير
= في ايه يا حبيبتي؟،، أنتي كويسة؟
هالة اختي اتصلت وقالت ان صلاح عمل حادثة ونقلوه المستشفى
= لا حول ولا قوة الا بالله،، طب استني انا جاي معاكي
لا مينفعش خليك انت هنا مع ماما وأنا هروح و ارجع بسرعة
= مينفعش اسيبك لازم اكون معاكي
ماما مينفعش تبقا لوحدها يا أمجد،، خليك معاها وانا مش هتأخر
" قلبي معاك يا صلاح،، اتفض*حت من كل ناحية يا حبيبي،، بعد شوية أدركت ان البيت فاضي و دا انسب وقت اغير العلاج اللي عند حماتي،، وبالفعل خدت العلبة اللي معايا وفتحت الباب بهدوء ومشيت لحد ما وصلت جنبها وهناك بدلت علبة الدوا ب علبة زيها بالظبط لكن جواها سم،، وخرجت بنفس الطريقة،، بعد ما خرجت دخلت اغير هدومي و بعدها خرجت فتحت التليفزيون و قعدت قدامه،، بعد شوية لقيت تليفوني بيرن من رقم شهد،، رديت عليها
فينك يا أمجد؟،، مختفي عني ليه؟
= من اولها مبتسمعيش الكلام يا شهد،، دا اكبر غلط ممكن تعمليه في حقي خلي بالك
مقدرتش استحمل،، عشان خاطري قولي اي حاجة
= انتي متصلة عايزة ايه؟
عايزة اعرف هنتجوز امتى؟
= لما ييجي وقته،، وطالما انا لسة متكلمتش معاكي يبقا وقته مجاش
طب انا عايزة اشوفك
= هتلاقيني عندك في اقرب وقت بس ياريت متتصليش هنا تاني
حاضر اللي تؤمر بيه
= برافو يا شهد
" قفلت معاها و بعت رسالة ل ناهد وكتبت فيها
دلوقتي معاد المهمة رقم 2
" بعدها قفلت التليفون بعد ما مسحت الشات كله وقعدت اتفرج على التليفزيون
" كنت باخد دش وخرجت لبست هدومي و بحط مانيكير ولقيت رسالة جاتلي،، فتحت تليفوني لقيتها من أمجد،، كان بيقول فيها
دلوقتي معاد المهمة رقم 2
" قفلت الشات بتاعه ومسحته و اتصلت ب منال بس مردتش،، مرة واتنين وتلاتة وأربعة لحد ما ردت عليا
معلش يا ناهد مشوفتش التليفون،، خير في حاجة؟،، اصل انا مع اختي في المستشفى
" رديت وأنا مصدومة
خير مالها؟
= مفيش جوزها عمل حادثة صعبة شوية
ربنا يشفيه يارب،، طب تحبي اجيلك؟
= لا يا حبيبتي خليكي مرتاحة،، قوليلي بس انتي كنتي عايزاني في ايه؟
لا خلاص بقا مش مهم،، مش وقته
= قولي بس يا ناهد
اصل بصراحة يا منال انا شوفت حاجة كدا وبصراحة مش عارفة اقولك عليها ولا لا
= قولي في ايه قلقتيني؟
انا شوفت أمجد جوزك النهاردة مع واحدة تانية!!
تكملة الرواية من هنااااااااااااا
اكتب في بحث جوحل( مدونة قصر الروايات) تظهر القصص كامله
تابعونا علي قناة التليحرام من هنااااااااااا
ليصلكم اشعار بالنشر
الرواية كامله من البدايه هناااااااااااا
تعليقات
إرسال تعليق
فضلا اترك تعليق من هنا