رواية ما بعد الأغتصاب الفصل 1-2-3-4-5بقلم هناء عادل كاملة
رواية ما بعد الأغتصاب الفصل 1-2-3-4-5بقلم هناء عادل كاملة
الفصل الاول
اوعوا تكونوا نسيتونى انا مجد
اللى قولت انى هحكيلكم حكايتى
عرفتكم على امى رقية
وابويا فتحي
عطيتلكم فكرة عنهم لكن هبدأ اكلمكم بالتفصيل بقى
كانت رقية واخواتها عايشين فى بيت بسيط اوى
مش هقول ان اهل امى كانوا ناس بسيطة
لاء اهلها كانوا فقرا فعلا
عايشين اليوم بيومه واوقات كانت الظروف بتضيق عليهم لدرجة انهم مش بيلاقوا قوت يومهم
لكن كانوا نوعا ما راضيين
مفيش حد منهم دخل مدرسة ولا بيعرف يفك الخط
مش امى بس
لاء دى هى واخواتها كمان
بيتهم دور واحد ارضى واكن ابويا وارثه من ابوه
من الطوب الابيض
والبيت كان مكون من اربع اوض وكلهم متلونين بألوان الجير
ولا الزيت بقى ولا البلاستيك الحاجات الطبيعية اللى موجودة فى كل البيوت بتاعت دلوقتى
كل اوضة نازلة منها لمبة صفرا متعلقة بالسلك
يعنى ولا نجف ولا نيون
الفرش كان مراتب على الارض اللى كان مفروش حصير
وفى الفسحة او الصالة
كنبتين عربي بتوع جدى
وكام خدادية كده
بيقولوا عليهم ترابيع او شلت
للقعاد عليهم
قاعدة عربى يعنى زى ما كانوا بيقولوا عليها
مطبخهم مفيش فيه تلاجة
بس كان فيه بابور جاز
والاطباق الميلامين
وقلل مياه
مش ازايز
مش عارف ده الوصف الطبيعي لبيوت الفترة دى فى الارياف
ولا هما حالهم كان افقر من الطبيعي
بس المهم انهم دايما كانوا بيقولوا الحمد لله مستورين
فتحى ابويا في الفترة دى
كان عنده 34 سنة
ايوة انا مش ناسى انى قولت امى رقية فى بداية حكايتها كان عندها 13 سنة
عايش ابويا فى بيت عمتى اللى هو بيت ستى الله يرحمها
وعمتى فضلت عايشة فيه بعد ما ماتت
لأن اخواتها كل واحد منهم له بيت
وسابوا اختهم عايشة فى بيت امها مع جوزها واولادها
عمتى جوهرة متجوزة ومعاها اولاد وبنات
اصغر حد فيهم دلوقتى عنده 38 سنة
كانوا بيقولوا ان ابويا ده فاكهة العيلة بتاعتهم
عندى عمة تانية فردوس
برضه متجوزة ومخلفة اولاد كتير كبار منهم اللى مسافرين وانا حتى معرفهمش
لكن عماتى بيعشقوا ابويا
اما عمى الكبير اسمه علي
وده متجوز وعنده 3 بنات الفرق بينى وبينهم مش كبير فيه منهم اللى من سني ومنهم الاكبر والاصغر
وعمى خليل ده الصغير بقى اللى اصغر من ابويا
حاليا عنده 3 صبيان اصغر مني كلهم
وعنده بنت من مراته الاولى
بس دى مالهاش علاقة بينا لأنها عايشة مع امها
اهل ابويا عاديين مستواهم عادى عايشين في اسكندرية
ومش اغنيا لكن كلهم بيشتغلوا
وممشيين بيوتهم وبيحاولوا يربوا اولادهم كويس
لأن كل واحد منهم له بيت واتجوز
كان ابويا الوحيد اللى لسه متجوزش
وده اللى خلاه يبقى عايش مع عمتى جوهرة اللى كانت بالنسبة لأخواتها
فى نفس مكانة امهم
كلهم بيعملولها حساب
ابويا كان عايق اوى
بيشتغل سواق على العربيات النص نقل
ومن 31 سنة
اهتمامه بنفسه وشكله
كانوا بيخلوا الناس يقولوا عليه برنس وفنان
ماهو كان موراهوش اى حاجة غير انه يصرف فلوسه على نفسه
علشان كده كان علطول مهتم بمظهره
طبعا لما بشوف الصور بتاعته زمان اضحك على الفخر اللى بيتكلم بيه عن ستايله ومظهره زمان
واحس انه لو كان بالاستايل ده فى الوقت اللى احنا فيه ده
كان اتقال عليه احلى افيهات
لكن طبعا لكل وقت اذان
ودى كانت الموضة بتاعتهم
ابويا بقى كان من الرجالة اللى عنيهم زايغة اوى
كان بيحب الستات زى عنيه
واى نوع من الستات بقى
ومفيش حاجة بالنسباله اسمها حلال وحرام
يعنى اللى كانت تيجي معاه سكة وتقبل دحلبته
كان مش بيفكر مرتين انه يقع معاها فى الحرام
الغريبة ان ابويا كان مقنع جدا بالنسبة لستات كتير
مش عارف ازاى كان الحرام بالنسبالهم بيكون عادى كده
ندخل فى الاهم بقى
ابويا بسبب شغله
كان متعود انه يروح المحافظات
لأن فكرة انه شغال على عربية نص نقل
كانت بتخليه يوصل البياعين بتوع الاسواق
اللى بينزلوا يبيعوا بضاعتهم فى اسكندرية
وبيرجعوا محافظتهم اخر النهار
ويمكن بسبب شغله معاهم
كانت معظم معارفه مع ناس من الارياف
سواء اصحاب
او حتى ستات من اللى بيعرفهم
وده بيحصل لما بيوصلهم وبيتعرف عليهم فى الطريق
وزى ما فيه اللى بتقبل سكته
فيه اللى بتصده كمان
لحد اليوم
اللى كنت اتمنى انه ميجيش
التوصيلة اللى ابويا راح بيها المحافظة اللى امى عايشة فيها
وصل ابويا النقلة اللى كانت معاه
وقعد على القهوة
فتحى.هاتلى يابنى واحد شاي تقيل حبر
اشرف.تؤمر ياباشا
رقية.اشرف
يا اشرف
اشرف.ايه يابت فى ايه
ايه اللى جابك هنا
انا مش قولتلك اوعي تيجى على القهوة
رقية.والله امى اللى قالتلى
اشرف.طيب عايزة ايه اخلصى
رقية.بتقولك امى هات اى فلوس علشان عايزة تجيب اكل وابوك لسه مرجعش
اشرف.طيب انا لسه مستفتحتش حتى
هو انا بقالى ساعة خارج من البيت علشان يبقى معايا فلوس تجيب بيها اكل
رقية.طيب اقولها ايه انا
اشرف.خليها تصبر شوية
تهل علينا الزباين بس
وابعتلها
اوعى تيجي انتى تانى
ولا تخليها تبعت حد من اخواتك
رقية.حاضر
فتحي.بقولك يا ريس
اشرف.اؤمر يا باشا
فتحى.بقولك ايه امسك دول
اشرف وهو بيستغرب من الخمسة جنيه اللى مطلعها فتحى
مركز وبيبص للفلوس وبيبصله
فتحى.مد ايدك يا عم متتحرجش احنا اخوات
اشرف.معييش فكة والله ياباشا انا لسه بستفتح
دى كوباية الشاى بربع جنيه
فتحي.لا يا عم انا مش عايز باقى
اشرف.لاء ازاى يعنى
بقولك الشاى بربع جنيه
تدينى 5 جنيه
فتحى.معلش الحق بقى نادى على الامورة اختك واديلها الفلوس
اشرف بأحراج.لا والله ما يحصل
احنا مش بنشحت يا باشا
بس انا لسه فاتح النصبة من ساعة ويادوب بنقول يا هادى
فتحي.ياسيدى كلنا على باب الله
وبعدين ابقى شربنى بيهم شاى كل ما اجيلك
انا باجى الناحية دى كتير
كل ما اجى هعدي عليك اشرب كوباية شاى
يلا بقى روح الحق اختك
اشرف بيبص حواليه على النصبة
ومفيش حد شغال معاه ينفع يسيبه ويجرى ورا اخته
وهى كمان كانت بعدت شوية مش هتسمعه لو نده عليها
فتحى.خلاص خليك انت وانا هلحقها بسرعة
واقولها انك بعتنى بالفلوس
اشرف.تشكر يا باشا
كتر خيرك
انا بس مش عايز اسيب النصبة
ولا اقولك بلاش تتعب نفسك
انا شوية واشوف حد اشيعهلهم البيت
فتحى.لا ياعم مش اصول
تلاقى الحجة مستنية تبعتلها الفلوس
انا هحصلها بسرعة
وهرجع اكمل الشاى
اشرف.كتر خيرك يا باشا
فعلا اتحرك فتحى بسرعة
علشان يلحق رقية
فتحى.يا شاطرة
بسبسبس
بصى يا شاطرة
رقية التفتت وراها
ورجعت كملت مشى
فتحى.خدى يا امورة اخوكى باعت الفلوس
بصيت رقية وراها ووقفت
رقية.عمو انت بتكلمنى انا
فتحى بيضحك.اه يا حلوة بكلمك انتى
خدى اخوكى معرفش يسيب النصبة علشان كده جيت وراكي
رقية.ايه ده 5 جنيه
دى امى هتفرح اوى
هو لحق اشتغل
فتحي.انتى اسمك ايه
رقية.اسمى رقية
عندى 13 سنة
فتحى باعجاب.ماشاء الله
13 سنة
ده انتى لسه صغيرة اوى
اللى يشوفك يقول عليكي 20 سنة
ضحكت رقية ببرأة طفلة.ان شالله تسلم يا عمو
انا هروح لامى بقى علشان متأخرش عليها
فتحى.طيب ايه اوصلك
رقية.لاء اشرف يزعقلي
انا بعرف اروح لواحدى
مشيت رقية
وفتحى واقف يبص عليها وهى ماشية
كانت طفلة اه
لكن جميلة
ملامحها حلوة وطبيعية ووشها برئ
وكان بالنسبة لأبويا ابو عين زايغة
جسمها عجبه اوى
وعلشان كده كان مش مصدق انها عندها 13 سنة بس
رقية دخلت دماغ ابويا اوى
عجبته
برغم ان فرق بينه وبينها 21 سنة
لكن حطها فى دماغه
رجع فتحى لنصبة الشاى من تانى
بعد ما رقية اختفيت من قدامه
اشرف.تشكر يا باشا
كتر الف خيرك
فتحى.على ايه يا ريس الناس لبعضها
اشرف.مش كل الناس ولاد حلال كده
فتحى.يا اشرف بسيطة الموضوع مش مستاهل يعنى
دى 5 جنيه
ولا حاجة
اشرف.ربنا يزيدك ياباشا
فتحى.لاء باشا ايه بقى
انا اخوك فتحى الرايق
دى شهرتي
لو نزلت اسكندرية اى وقت
روح اى قهوة فى اى موقف واسأل على اخوك فتحى الرايق
الف مين هيدلك عليا
اشرف.عاشت الاسامى ياسى فتحي
فتحى.فتحى بس بقى يا عم اشرف
بقولك اخوك
ايه هتقول لأخوك سي
عيب حتى
اشرف.ربنا يجبر بخاطرك
فتحى.معطلك انا على شغلك
اشرف.لاء عطلة ايه
ما هى لسه الدنيا صحرا اهى
ربنا يبعت
الشغل هنا بيبدأ متأخر شوية
لما القهاوى بتقفل
السواقين مش بيلاقوا غيري بقى
فتحي.ربنا يوسع رزقك ورزقنا
بس متأخذنيش يعنى
انت بتصرف على البيت من النصبة دى
اشرف.لاء ابويا ربنا يديله الصحة
عايش وبيشتغل
بس اهو ايد لواحدها متسقفش
وبعدين انا ليا 3 اخوات بنات
وامى
يعنى ابويا مش بيقدر يصد على مصاريف البيت لواحده
بينزل بشوية خضار كده فى السوق
والجاى على اد اللى رايح
بس الحمد لله مستورة
فتحى.3 بنات
يااااه
ده هم خلفة البنات
ومفيش حد منهم متجوز
اشرف.لاء لسه والله بيجيلهم ناس ولاد حلال
بس انت عارف بقى الجهاز بتاع البنات مش بالساهل
ولو مش هندخل بنتنا واحنا مشرفينها
بيت اهل جوزها هيستقلوا بينا
علشان كده بنجهزهم واحدة واحدة
فتحى.واختك دى بقى الكبيرة
اشرف.لالا دى رقية الصغيرة
اخر العنقود
فيه اكبر منها بقى 15 سنة و16 سنة
فتحى.وانت الكبير بتاعهم
اشرف.اه انا 19 سنة ونص
فتحى فضل يتكلم كتير مع اشرف
وتقريبا عرف عنهم كل حاجة
وطول فى قعدته معاه
لدرجة ان الزباين لما ابتديت تهل على النصبة
كان فتحى بيستنى اشرف يشوف زباينه ويرجعله من تانى
ويكملوا كلام
واقتنع فتحى ان رقية دى الصيدة الجديدة
برغم انها بالنسباله عيلة
لكن اتهبل عليها
وكأنه مشافش حريم قبل كده
مشغلش باله بسنها ولا بأنها لسه متفهمش اللى هو بيفكر فيه
لكن هو قرر يستغل ظروفهم
ومسابش اشرف ومشي
غير بعد ما عرف كمان مكان بيتهم فين
كان اشرف بيتكلم بمنتهى التلقائية
لأنه مش عارف ايه اللى فى نية فتحى
ولا حتى توقعه
وكان فتحى بيستغل اشرف ويوقعه فى الكلام
لما قدر يوريله انهم بقوا اصحاب
وان فتحى هيشوف لأشرف لقمة عيش حلوة تمسكه قرشين كويسين
فتحى نفسه كان مستغرب جدا من نفسه
ان البت دخلت دماغه للدرجة دى
لكن انها حلوة وسنها مش باين عليها
وبرضه لسه متفهمش حاجة وعلى نياتها
ده عجبه اوى ودخل دماغه
وعلشان كده مسابش اشرف ومشي
غير وهو متفق معاه على.......
يتبع
ما بعد الأغتصاب
الفصل الثاني
فتحي.طيب خلاص يا معلم اشرف
يوم ولا اتنين
واجيلك اكون رستأتلك شغلانة معتبرة
اشرف بسعادة.الواحد مش عارف يقولك ايه والله
يابركة دعاكى ياما
ربنا يوقفلك ولاد الحلال
فتحي.انا ارتاحتلك والله انت واد جدع وانا احب اللى يشقى علشان يجيب القرش
مش يقعد مرحرح ويستنى ابوه يصرف عليه
اشرف.لا يا عم فتحي
مالناش احنا فى العواطلية والنوم فى العسل
ربنا يكرمنا بالحلال
انهى فتحى كلامه مع اشرف
وسابه ومشى
بعد ما عرف ان اشرف بيخلص شغله الساعة 12 بليل
كل يوم
جوهرة.ايه يا واد يا فتحى
اتأخرت كده ليه
فتحى.اكل العيش يا ست الكل
جوهرة.اكل العيش برضه يا صايع
شوف كنت بتدن فين
ياواد حوش قرش للزمن
علشان تعرف تفتح بيت بقى وتتلم
فتحى.بيت ايه يا جوهرة
لا انا مش بتاع المواضيع دى
انا احب ابقى براحتى كده
ولا حد يربطنى ولا جاى امتى ولا اتأخرت ليه
جوهرة.اومال ايه بقى هتترهبن يعنى
فتحى.ياجوهرة اخوكى عنيه فارغة
وواحدة بس مش هتملى عينى
يرضيكى اخد واحدة وانا كل يوم عينى بتطلع على عشرين واحدة
جوهرة بأنفعال.لاء يا صايع
تروح تتنيل على عينك
وترمرم من الزبالة شوية الحريم الوقيع اللى بيقعوا تحت ايدك
انا مش عارفة انت ازاى بيجيلك نفس تاكل لقمة غيرك كلها قبلك يا معفن يا نجس انت
فتحى.اه شكلها كده ليلة طويلة
ايه يا ست الكل هو مجدى عكنن عليكي النهاردة
ولا متخانقة مع حد من العيال
جوهرة.انت يا فتحى كل الكلام تاخده بتريقة كده
يابنى انا عايزة يبقى ليك بيت انت مش صغير يا فتحى
انت دخلت التلاتين اللى فى سنك عيالهم طولهم
فتحى.ماشى يا جوهرة
سبيها لوقتها
لما الاقى اللى تعجبنى هاجى اقولك روحى اتكلميلى عليها
جوهرة ترفع ايديها للسما.ياقادر يا كريم
اسمع منه
واهديه لنفسه
فتحي.عيالك فين اومال
جوهرة.اتنيلوا ناموا فيه مدارس الصبح
فتحى.والله عين الصح
انا كمان هموت وانام
ضهرى اتقطم من الطارة
عايز اغرق فى النوم
جوهرة.ماشى يا فتحى
مش عايز تتعشى يعنى
ولا انت بتهرب من الكلام
فتحى.لا يا حبيبتى والله انا اتعشيت قبل ما اجي
مش عايز غير انى انام
جوهرة.ماشى يا حبيبى تصبح على خير
فتحى.وانتى من اهل الخير يا ست الستات
خرجت جوهرة
وطفيت نور الاوضة
وفرد فتحى جسمه على الكنبة اللى بينام عليها
فتحى لنفسه.حلو يا واد يا فتحى السن بتاع العصافير ده
البت حلوة وعايزة الأكيل
بس هتوصلها ازاى بقى يا عايق
عايزاك داخلة انتى توصلنى ليكي
نام يا فتحى ومخمخ على رواقة بقى لما تبقى فايق
فعلا نام فتحى
فى بيت اشرف
نبوية.يارب يا اشرف يابنى يوقفلك ولاد الحلال
ده الراجل ده لو صدق فى كلامه بصحيح
يبقى اتفتحتلك طاقة القدر
رشا.ليه يعنى ياما
هو هيشغله مستوظف
نبوية.لاء يا ام لسانين
بس ينزل يشتغل فى اسكندرية
الرجل فيها كتير غير هنا
وبعدين هناك الناس سهيرة
مش بيناموا من المغربية زينا
يعنى اللى بيعمله هنا فى اسبوع
يعمله هناك فى يوم
ابو اشرف.اه هناك البلد شغالة للصبح
ولو وقف فى اى موقف هناك
اى وقت هيشتغل
والكام ساعة اللى بيقف فيهم هنا على الطريق
يعمل فلوسهم فى اول عشر دقايق هناك
اوعى يا واد يا اشرف
تسيب الراجل ده ينساك
لو جالك مرة تانية
الزق فيه
اشرف.والله يابا انا فخمت فيه لحد ما حسسته انه وزير
اصله راجل فييس كده
ده عطانى 5 جنيه من غير سبب
يبقى هيضحك عليا ليه يعنى
لا له عندى حاجة ولا ليا عنده حاجة
رقية.اه عمو ده اللى جرى ورايا عطانى الفلوس
باين عليه طيب يابا
نبوية.ربنا يجعله سبب فى وسع عتبة رزقنا يا ولاد
ماهو ربنا بيسبب الاسباب اومال ايه
الراجل ده جيته لهنا بسبب
ابو اشرف.امكم بقيت فطنة اوى يا عيال
بتقول كلام موزون بنت سعدون بياع الخس
نبوية بتضحك.بتتريق على كلامى يا راجل
كده تضحك عيالك عليا
ابو اشرف.انا بضحك معاكى يا ولية
اتريق على ايه
كلامك مظبوط
اشرف.طيب مش هناكل لقمة بقى ولا ايه
نبوية.لاء يا عين امك هتاكل اومال ايه
ده من خيرك يا ابن بطنى
اشرف.ربنا يخليكي ليا يا ست الكل
ابو اشرف.خلاص بقى من خيره
ماليش لازمة انا بقى
نبوية.ااه انت هتقفلى على الكلمة يا راجل انت
انا هقوم احضرلكم تاكلوا
يلا يا بت يا رشا قومى معايا على المطبخ
وانتى يا رقية
حطى الطبلية
فعلا حضروا العشا واتجمعوا على الطبلية ياكلوا ويدردشوا
لحد ما اذن الفجر
وكل واحد قام ينام
فات يوم واتنين وتلاتة
فتحى مراحش لأشرف
بس بيدورله على حتة فى الموقف يقدر يقف فيها بالنصبة بتاعته
وقرر انه ميروحش غير لما يكون مرتب كل حاجة
حتى الاتاوة اللى كانوا بيدفعوها للراجل اللى مدور الموقف
فتحى اتفق ان هو اللى هيدفعها
وخامس يوم
خلص فتحى شغله
ورجع على البيت عند جوهرة
حلق دقنه
وغير هدومه
وطلع من البيت
وهو بيقول لنفسه يا ارض اتهدى ما عليكي قدي
ولأنه سلم العربية بعد ما الطرف بتاعه خلص
قرر انه يروح مواصلات
ركب من الموقف
ونزل من العربية
قصاد نصبة اشرف
اللى كان بيشطب شغله
وبيقفل النصبة بتاعته
فتحى.ايه ده انا جايلك متأخر ولا ايه
اشرف التفت وراه بدهشة.ياااه
عم فتحي
ده انا قولت انت نسيتنى
فتحى بيسلم بحرارة
وبيشد اشرف ياخده بالحضن
وهو بيرد عليه.انسى ايه يا راجل عيب عليك
انت فاكرنى عيل صغير ولا ايه
اشرف.لاء ما عاش اللى يقول كده
بس االدنيا مشاغل
قولت انك نسيتنى
فتحى وهو حاسس انه جه فى الميعاد اللى كان قاصد يوصل فيه.لاء انا بس كنت مش عايز اجيلك غير لما ابقى مرتبلك شغلانة
قولت انت اكيد متعشم ومستنينى
بلاش اجيلك غير وانا جاى افرحك
اشرف بسعادة.لاء متقولش
ايه لقيت ليا شغلانة
فتحى.طيب خلص شغلك ونتكلم بعد ما تخلص علشان معطلكش
اشرف.لاء اخلص ايه
انا اصلا كنت بلم النصبة خلاص شطبت
فتحى.ايه ده خلصت
ده انا جايلك مخصوص
قولت هنقعد سوا نتكلم وندردش
هنقعد فين بقى لما انت بتقفل
اشرف.هنقعد عندنا فى البيت دى لو مشالتكش الارض نشيلك على دماغنا
فتحى.لاء يابنى
بيتكم ايه
الوقت متأخر
والبيوت لها حرمتها عيب
اشرف.عيب ايه بس انت ضيفنا
كفايا جيتك ليا مخصوص
مش هتقعد فى الشارع يعنى
وبعدين القهاوى بتقفل بدرى
وهنا من بعد 12 ممكن تلاقى قطاعين طرق
خلينا فى البيت احسن
ابويا كمان هيكون رجع البيت
تشوفه
وتتعشى معانا
فتحى.ليه بس الاحراج ده
لاء يا اشرف
احسن تكون الحاجة مش عاملة حسابها
اشرف.ياعم فتحى
لقمة هنية تكفي مية
فتحى.لاء علشان اجى معاك
تشوفلى كبابجى ولا ايه مطعم فاتح نجيب منه لقمة حلوة كده
مش هدخل بيتكم فى وقت زى ده فاضى
اشرف.يا عم فتحى عيب انت بتشتمني
فتحى.والله ما يجرى
يا كده يا بلاش خلينى قاعد فى الشارع
اشرف.لاء وعلى ايه
هقفل
ونروح نلحق فرارجى قريب من هنا بس على الله بقى ميكونش قفل
فتحى.ماشى يلا علشان نلحقه
فعلا قفل اشرف النصبة
وهو هيموت من الفضول
ويعرف ايه اللى جاى يقوله فتحى
راحوا مع بعض للفرارجى
اللى نضفلهم الفراخ وبطاية
وكان اشرف فرحان اوى
وفتحى مستخسرش خالص
وكان بيدفع وكأن الفلوس دى اخر همه
فتحى.بس مفيش حد يشوى هنا
اشرف.لاء انسى ده بركة اننا لقيناه فاتح لسه
بس امى واخواتى يخلصوهم مسافة ما تشرب حجر معسل وكوباية شاى
فتحى متحمس جدا
وراحوا سوا على البيت
وكان ابو اشرف موجود
والبنات جوة ونبوية
اتعرفوا على بعض
ورحب ابو اشرف بفتحى
وكان بالنسبالهم
سايح اجنبى مثلا
داخل عليهم شايل ومحمل
وجايب مكان حلو لأبنهم يشتغل فيه من غير ما يدفع جنيه اتاوة
فشالوه من على الارض شيل
دخلت نبوية وبناتها على المطبخ
وكانوا بيجهزوا الفراخ كأنهم فى مسابقة
بس البطة مجهزوهاش لأن كل اللى عندهم بابور ولو استنوا الفراخ تخلص وبعدين يعملوا البط هيقعدوا للصبح
وكانت البنات فرحانين جدا علشان هياكلوا فراخ اخيرا
ده بقالهم زمن مداقوش طعمها لدرجة انهم ناسيين طعمها ايه
كان فتحى قاعد على نار
برغم انه قالهم على الشغل
والمكان
وقعد بقى يتكلم كأنه من الاثرياء
وكل كلامه معاهم يقول انه راجل معاه قرش حلو
ونايم على خميرة
وفييس
وهو كان قاصد يزغلل عنيهم بالفلوس
ومستني يشوف رقية بفارغ الصبر
فعلا جهز الاكل
والبنات بتحضر الطبلية
واخيرا شافها هى واخواتها
وبرغم ان بسمة اختها جميلة
بس اصغر منها
وجسمها مش فى جمال جسم رقية
لكن رشا كانت عادية ملفتتش انتباهه زى رقية
رقية كانت لابسة جلابية بيت بس كانت مقاسها بالظبط
وده زغلل عين فتحى اكتر
وكانت لفة شعرها بأيشارب
بس كانت قصتها باينة منه
وشعرها اسود سواد الليل وباين عليه حرير
كان تايه فتحى فى تفاصيلها
وهى ولا واخدة بالها
لكن ابو اشرف لاحظ
ومن جواه قال والله وباضتلك فى القفص يا رقية
قعد اشرف وابوه وفتحى يتعشوا سوا
ونبوية والبنات فى المطبخ بياكلوا
خلصوا اكل
ابو اشرف.بت يا رقية
انتى يابت
رقية.نعمين يابا
ابو اشرف.خدى فوطة يابت وحصلى سى فتحى على الحمام يغسل ايديه
رقية.حاضر يابا
فعلا دخلت رقية وهى بتشاور لفتحى على الحمام وواقفة بعيد شوية عن الباب بخطوات
فتحى.تسلم ايديكي يا حلوة
الاكل زى العسل
رقية.ان شالله تسلم
فتحى.انتى عملتى الاكل مع امك
رقية.اه اومال ايه
انا بعمل كل حاجة فى البيت
انا واخواتى امى علمتنا كل حاجة
فتحى بيعيد غسل ايده علشان يفضل يتكلم مع رقية
فتحي.اه علشان لما يجيلكم عدلكم
رقية.لاء ابويا بيقول انا واختى بسمة لسه صغيرين
فتحي.صغيرة ايه بس
هو ابوكى مش بيشوف كويس ولا ايه
رقية.لاء والنعمة ابويا بيشوف
فتحى بيضحك.نزلتى اسكندرية يا حلوة قبل كده
رقية بفرحة.لاء ولا عمرى روحتها
بس اشرف بيقول انها حلوة وفيها بحر
فتحى.طيب ايه رأيك اخليكي تشوفيها
رقية بفرحة اطفال.والنبى صحيح يا عم فتحى
هتودينى البحر
فتحى.بتعرفى تعومي
رقية.لاء مبعرفش
بس اشوف البحر عامل ازاى
فى الحقيقة
فتحى.خلاص نتفق اتفاق حلو
ولو عجبك
هاخدك معايا هناك
وتروحى البحر
واوديكي كمان المراجيح
وافسحك وادخل السيما
ايه رأيك بقى
رقية بسعادة لا توصف.ياحلاوة يا ولاد
انا هروح كل الحتت دي
فتحي.ااااه بس تسمعى الكلام
اشرف.هقوم اشوف البت اتأخرت ليه كل ده جوة
ميصحش
ابو اشرف.اقعد ياض
انا ليا كيف
اشرف بانفعال.كيف لأيه يابا
بقولك البت واقفة على باب الحمام بقالها حبة
ابو اشرف.ياض سيبها
البت اختك عيلة صغيرة وحلوة
والراجل مش متجوز
وانا شوفت عنيه رايحة عليها
خلينا نرمى شبكنا عليه
يمكن يتجوزها
وتتشال من الفقر ده وتشيلنا معاها
اشرف بتركيز.عيب يابا
الراجل يقول علينا ايه
يفكرنا فاتحين بيتنا للبطال
ابو اشرف.بطال ايه يا ولا
واحنا لو شغالين فى البطال كان بقى ده حالنا
وبعدين انا بقولك نجوزهاله
وانا بقولك بزغلل عينه بيه علشان يرافقها
الراجل مرتاح ومعاه قرش
ومدام هو فييس كده
احنا اولى
اشرف.يابا بس عيب فى حقى
انت بتصغرنا كده
ابو اشرف بحدة.بقولك ايه ياض انت متعدلش عليا
بتي وانا بعمل لمصلحتها
بلاش انت بقى تحشر نفسك
وتعمل انك بقيت راجل
اصبر بس وهتشوف ابوك بيفكر ازاى
رقية.بس امى وابويا واشرف هيزعقوا
فتحى.مالكيش انتى دعوة بيهم
لو اتفقت انا وانتى
انا هتصرف فى الباقى
ايه رأيك
يتبع....
ما بعد الاغتصاب
الفصل الثالث
رقية.ابا انا عايزة اروح اقعد مع اشرف فى اسكندرية
اشرف.تقعدى معايا فين يابت انتى اتخبلتى ولا ايه
ابو اشرف.تقعدى معاه فين يا بت يا رقية
هو اخوكى هيبقى فاضيلك
ام اشرف.شوف ياخويا البت
عايزة تسيبنا وتهج ازاى
رقية.يما اهج ايه بس
انا قولت اروح اخدم اخويا بدل ما يبقى عايش بطوله
مين اللى هيشوف طلباته
ومين هيغسله هدمته ولا يعمله اكله يتأوت بيها
نبوية.حنينة يابت
شوف البت ازاى بتفكر فى اخوها وصعبان عليها قعدته لواحده
بس نهون عليكي يا رقية
تباتى بعيد عن حضن امك واخواتك
رشا.يما دى بس تلاقيها عايزة تروح اسكندرية علشان تطلع من الفلاحين
ياكش يابت تكونى فاكرة نفسك لما هتروحى هناك هتبقى اسكندرانية
اشرف.ليه هتتبرى من اصلها ولا ايه
بسمة.لا تكونى فاكرة ان اشرف هيفسحك يابت يا رقية
رقية.انا الحق عليا والله
علشان خايفة على اخويا وصعبان عليا وحدته
تقولوا كل ده
خلاص بلاش منها المرواحة هناك
وانا هعمل ايه يعنى
ما انا برضه هشتغل خدامة يعنى هناك وانا رايحة الف واروح واجي
ابو اشرف بخبث.بس ايه اللى طلع الفكرة دى فى راسك يابت يا رقية
قوليلى
انتى اللى فكرتى فى اخوكى منك لنفسك كده
ولا حد هو اللى وزك
كلهم استغربوا من سؤال ابوهم
اشرف ولأنه المستفيد الوحيد من ان رقية تكون معاه علشان تخدمه.قصدك ايه يابا
يعنى هكون انا اللى قولتلها تقولك كده
وانا حمل انى اسيب بت فى بيت لواحدها
فى حتة مالناش فيها حد
ابو اشرف.ليه يابنى مالكش حد
ربنا معاك هناك وفى كل مكان
وبعدين انت نسيت فتحى
ده الراجل كتر الف خيره
مجهزلك كل حاجة وعدك اخوه
جايلك مخصوص وقاعد معانا لوش الصبح
واكلنا وسابلك قرشين تجيبلك بيهم خزين علشان تملى الاوضة اللى هتعيش فيها
وتقول ماليش حد عيب متبقاش قليل الاصل كده
رقية.اه والنبى يابا
عم فتحى ده راجل طيب اوى
وغني
معاه فلوس كتير اوى
عقبالك يا اشرف لما تبقى غني زيه كده
بسمة.اه يا اشرف يارب يا خويا
بس هو كل اللى بيشتغلوا فى اسكندرية معاهم فلوس كتير كده
نبوية.ياعيال الرزق يحب الخفية
ورب هنا رب هناك
اللى مقسوم لأخوكى هيشوفه فى اى مكان
هى بس حصيرة اسكندرية واسعه
غير عندنا هنا البلد صغيرة
لكن الرزق اللى ربنا كاتبه هيشوفه على قد سعيه له
لو راح اسكندرية ونام فى فرشته ونزل الساعتين اللى بينزل يشتغلهم هنا
هيمسك القرشين اللى بيعملهم هنا
لو شاف مصلحته صح
واللى مش عارف يعمله هنا عمله هناك
اه هيمسك قرش حلو
ويبقى زى فتحى ويمكن اكتر منه كمان
بس هو يشغل نفوخه
ابو اشرف.ها يا بت يا رقية
امك واخواتك خدونا فى الكلام
قوليلى مين اللى قالك تروحي مع اخوكى تخدميه
رقية اتلجلجت فى الكلام.يابا مين هيقولى
انا اللى فكرت لواحدى
جه فى بالى اشرف لما يروح يقعد لواحده
هيضيع القرشين فى اكل وشرب علشان مش هيعرف يطبخ
ولا بيعرف يعمل لنفسه حاجة
صعب عليا انه يسيبنا وميعملش اى مصلحة
نبوية.اه يا اروبة
البت رقية دى دماغها متنورة ولا اجدعها بتوع مدارس
شوف فكرت فى اللى مجاش فى بالى انا ياللى اسمي امه
ابو اشرف بخبث.جدعة يابت يا رقية
عرفتى تفكرى بصحيح
ماهو اشرف مبيعرفش يناول نفسه كوباية المياه
هيطبخ ويغسل ازاى
يروح بقى يصرف القرشين اللى يعملهم فى اكل من السوق
ولا يروح يشتريله غسالة بقى
علشان مبيعرفش يغسل
انتى جدعة يابت يا رقية
انا راضي انك تروحي هناك تخدمي اخوكي
رقيه بسعادة وتنطيط.هييييه
بجد يابا
ان شالله تسلم يارب
وانا والله ما هخليه يحتاج حاجة ابدا
من اكل لغسيل لتنضيف
مش هخليه يصرف قرش
نبوية.جدعة يابت
وكل اسبوع واحدة من اخواتك تبدل معاكي
رشا.لالا ابدل ايه
انا قاعدة هنا لا بروح ولا باجي
بسمة بقى تبدل معاها
ابو اشرف.لا انتى ولا هي
كل اسبوع تبقى تروح امك تشقر عليهم
وتقعدلها يومين
وانتم تشيلوا البيت هنا
نبوية.قلبك جامد انت ياراجل
عايز البت والواد يمشوا ويسيبوا البيت
ابو اشرف.دى هتبقى سفرية الهنا والسعد
انتى لو فيكي مخ يا ولية
كنتى عرفتى ان ايام الفقر دى قربت تسيبنا وتبعد عننا
وتيجي بقى ايام العز والغنا
ياسلام يا ولاد
عقبالكم يا بنات لما تجيلكم الفرصة اللى تزود الفلوس
رشا.عقبالنا فى ايه يابا
وبعدين اشرف ورايح يسترزق زى ماهو بيسترزق هنا
ورقية ورايحة هناك علشان تخدمه وتشوف طلباته
هو فى ايه يابا بالظبط
هى السفرية دى وراها حاجة احنا مش فاهمينها
رقية.انا هنام بقى احسن الشمس طلعت واحنا صاحيين من امبارح
نبوية.اه والنبى القاعدة كانت حلوة
والراجل اللى اسمه فتحى ده قعدته زى العسل
رشا.اومال انا مش مرتحاله ليه
ابو اشرف.علشان انتى بومة ووش فقر
قومى منك ليها ناموا
وانت يا اشرف يلا قوم نام بقى
علشان تصحى تشوف طلباتك اللى هتاخدها معاك
واختك كمان تجهزلها هدمتين تاخدهم معاها
وتتوكلوا على الله بعد بكرة مع طلعة النهار
اشرف.يابا انا مش هأمن على البت تبقى لواحدها وانا برة
يابا انا هعرف اصرف حالى
بلاش من جيتها دى
ابو اشرف.ياض بلاش تبقى قفل كده
فتح مخك
انت لو فضلت مقفل كده الاسكندرانية هياكلوك هناك
عايزك تبقى مفتح وفاهم الدنيا ماشية ازاى من حواليك
وبدل النصبة دى
سنة والاقيك بقيت صاحب قهوة
وانا بدل ما بسرح بالخضار الدبلان
ابقى ليا دكانة فى الوكالة
واخواتك دول يتستتوا ويجيبولنا رجالة جيبها عمران
انت بس توعى لقرشك
وتلزق لفتحى ده لحد ما تلاقيه جاب اخره خلاص وهيموت على اختك
ساعتها هاتهولى بقى
وانا هتصرف
اشرف.يابا انا خايف من اللى انت بتفكر فيه ده يكون مش صح
والبت هتبقى لحالها طول اليوم
ولو عملت اللى انت بتقوله ده
اخاف يلعب بدماغها ويضحك عليها
ابو اشرف.لاء اختك مفتحة
البت جت نقلت الكلام اللى هو قالهولها بالحرف
ولما سألتها موقعتش بالكلام
يعنى لو انت قعدت معاها ووصيتها تعمل ايه
هتعمل اللى انت هتقوله وكأنه من دماغها
اشرف.طيب وليه مش انت اللى تقوله يابا
ابو اشرف.ياض بطل حمورية بقى
انت اخوها
يعنى فيه اخد وعطا بينك وبينها
لكن انا ابوها لازم تهيبنى وتخاف مني
لكن لو هتكلم معاها فى الحاجات دى
البت بعد كده تقول ابويا راجل هلاس
ومتخافش ولا تعملي حساب
فهمت ياقفل
اشرف.يعنى هى كده مش هتقول عليا انا كده
ابو اشرف.وبعدين بقى فى الواد اللى عقله متركب غلط ده
امك لو طلعت من المطبخ وسمعتنا بنتكلم كده
هتقولك البت لا هى رايحة ولا جاية
انت مش هتروح تقول لأختك روحى ارمي روحك عليه
انت هتنصحها انه لو راح وانت مش هناك
ترد عليه من ورا الباب
لو جالك البيت يسهر معاك سهرة حلوة
تسهر هى على طلباتكم
وتفضل رايحة جاية وكأنها بتشوف اللى ينقصكم
شوية تقعدها معاكم على انها عيلة صغيرة وبتزهق من قعدتها طول اليوم لواحدها
ووقت تانى تخليها تشوف طلباتكم ومتشوفوش وشها تانى فى القاعدة
شوق ولا تدوق يا قفل
اشرف.والله يابا انا مش راضى عن اللى انت بتقوله ده
انت عايزنى ابقى شغال قرني على اختي
ابو اشرف.ياض يابغل انت
مش المثل بيقول اخطب لبنتك
ده اللى احنا بنعمله
هو انا بقولك دارى عليه وخليه يرافقها
ده انا عايزك توقعه يتجوز البت
راجل معاه قرش
وهيعيشها عيشة مرتاحة
ومش هيغرمنا حاجة ده
اهو دخل بيتنا وعارف ظروفنا
اشرف بقلة حيلة.انت ابوها
وعارف مصلحتها اكتر مني
مش هعدل انا عليك يابا
بس لو اللى بعمله ده غلط وحرام هيكون ذنبه فى رقبتك
نبوية خرجت من المطبخ.انا خلصت المواعين
هدخل بقى اريح شوية احسن عنيا بتقفل لواحدها
ابو اشرف.ماشى نامى انتى
انا هشرب كوباية شاى
واحصلك
نبوية.طيب اعملك دور شاي وادخل انام
ابو اشرف.لالا فوتى انتى نامي
اشرف هيعملنا انا وهو دور شاى
احنا قاعدين ندردش سوا
شوفى بس البنات ناموا ولا لسه صاحيين يتكلموا
نبوية.لاء العيال ناموا ياخويا
دول صاحيين من صباحية ربنا
وحيلهم اتهد فى الاكل
يلا هخش انام شوية انا بقى
ابو اشرف.ماشى
دخلت نبوية تنام
وقعد اشرف وابوه
يتكلموا ويخططوا سوا
ازاى يوقعوا فتحى ويخلوه يتجوز رقية من غير ما يفهم انهم لهم رغبة فى ده
ومش فى بالهم خالص ان فتحى بيعمل كل اللى بيعمله مع اشرف من البداية علشان رقية عجباه وداخلة دماغه
بس نيته مالهاش دعوة بالجواز
فى بيت جوهرة
كان قاعد فتحى بعد ما رجع من عند اهل اشرف
جنب الشباك فى الصالة
وكان البيت كله نايم
صحيت ايمان بنت اخته ودى الكبيرة فيهم فى المرحلة الثانوية
وقريبة من فتحى جدا
ومفيش بينها وبينه القاب
ايمان.ايو يا ابو الفتوح
قاعد سرحان فى ايه
فتحى بيضحك.يابت عيب انا خالك
تقوليلى يا خالى مش يا ابو الفتوح
ايمان بتضحك.اكبرك يعنى ويتقال عليك عجوز
لما شحطة زيي تقولك يا خالى
الناس تقول عليك كبير فى السن
وهيبتك تروح وسط البنات
فتحى بيضحك.اه يابت الكل..
كلامنجية محدش بيعرف يغلبك
صاحية بدرى ليه
ايمان.عندى مدرسة
انت ايه اللى مسهرك كده
بتحب ولا ايه
فتحى.انتى تعرفى كده عن خالك
ايمان.اعرف ايه اللى اعرف
ده انت حبيب يا فتحي
تحب اعدلك سبحة البنات اللى تعرفهم
فتحى.يابت الله جميل بيحب الجمال
والبنات والستان اجمل حاجة فى الدنيا
مش عايزانى احبهم
ايمان.بتاخد من الدين اللى على كيفك انت يا فتحي
لا بجد
ايه اللى مسهرك لوش الصبح كده
فتحي.مشغول يا بت ايمان
حتة بت عينى طالعة عليها
البت مفعوصة مطلعتش من البيضا
بس زى القمر يخربيت ابوها
ايمان بأستغراب.مفعوصة ازاى يعنى يا فتحي
قصدك صغيرة
فتحي.هى صغيرة بس دى صغيرة اوى
ايمان.فى سني يعني ولا ايه
فتحي.لاء دى صغيرة اوى اصغر منك كمان
بس تشوفيها تقولى عليها فى سن خالتك فردوس كده ميبانش عليها انها عيلة
ايمان.يالهوى عليك يافتحى
هى حصلت
العيال كمان
يادى النصيبة
ايه انت مش عامل حساب الحرمانية خالص
فتحى.جرى ايه يابت
وانا قولتلك جيت جنبها ولا ضحكت عليها
انا بقولك عجبانى
ايمان.عجباك هتتجوزها يعنى
فتحى بيضحك.جواز ايه يابت المجنونة انتى
هروح اتجوز عيلة لو كنت اتجوزت من اول ما شنبي خط فى وشي كان زمانى معايا اكبر منها
لاء اكيد
انا بس عاجبنى السن
اصل مجربتهوش قبل كده
ايمان.خالى بقولك ايه
اوعى تضحك على عيلة صغيرة حرام
دى تلاقيها مش فاهمة حاجة
واللى زى دى فى سن العيال ده
كلمة توديها وكلمة تجيبها
وتجيبلك مصيبة كمان
فتحى.ما انا عمال افكرلها بقى
تمشى الخطة زى م انا راسمها بس
وكله يبقى زى الفل
ايمان.والنبى يا خالى
اوعى تضحك عليها
انت بتقول عليها عيلة
يعنى مش فاهمة حاجة
وانت الستات معاك ايه مالهمش عدد
يبقى بلاش تأذي واحدة لسه متعرفش الصح من الغلط
فتحي.هى ونصيبها بقى
ايمان.امانة عليك يا خالى
حطنا احنا طيب قدام عنيك
تقبل حد يضحك علينا
فتحي.انتم ايه
يابت يا ايمان ده انتى واخواتك ارشانات
تضحكوا على رجالة بشنبات
ايمان.بلاش انا واخواتى يا خالى
يرضيك حد من بنات خالى يحصل فيهم كده
فتحي.يابت يحصل ايه يخربيت سنينك
انتى هتلبسينى نصيبة وانا قاعد سرحان
قومى ياختى روحى مدرستك
انا غلطان انا اتفكيت معاكي بكلمتين
ايمان.هقوم اجهز للمدرسة
ربنا ينجيها منك البت دى
فتحى.يخربيتك نكدتى عليا
البت عايزة تصحي ضميرى
منك لله يا شيخة
هتنيمينى محروق دمي
سابته ايمان ودخلت تنام
وهو كمان دخل ينام
وهو مشغول برقية
وبيتخيل مع نفسه ايه اللى هيتم لو اهلها وافقوا انها تيجي تعيش مع اخوها فى اسكندرية
اما رقية الطفلة اللى فرحت بأنها هتسافر اسكندرية
وتروح البحر
والملاحى
وتدخل السيما
كانت فى احلامها شايفة نفسها وهى بتتفسح فى كل الاماكن اللى وعدها بيها فتحى
وبفرحة طفلة وسذاجتها
بتتمنى متصحاش غير وهى مسافرة مع اخوها للدنيا الجديدة اللى هتعيش فيها
وفعلا فات اليوم بمنتهى السرعة
وكان كله تجهيز لأنتقال رقية واشرف من بلدهم لأسكندرية
قعدت رقية وامها والبنات
يخبزوا عيش وفطير
وجهزتلهم شوية قرص وباكون
وطبعا الفلوس اللى جابت بيها طلبات كل ده
كان فتحى اللى دافعها
فى شنطة صغيرة جمع اشرف ورقية هدومهم اللى كانت متتعداش الطقمين
واحد هيلبسوه وهما مسافرين وواحد هيغيروا فيه لو نزلوا فى مكان
وهدوم البيت
اللى كانت عبارة عن جلابيتين تلاتة لرقية
واشترى اشرف قفطانين جداد غير الاتنين المقطعين اللى عنده
واخيراااااا
جه فتحى بالعربية النص نقل
واخد اشرف ورقية من قصاد باب البيت
بعد ما ودعوا العيلة
واتجهوا فى طريقهم لأسكندرية
يتبع
ما تقولوا توقعاتكم بقى
مابعد الأغتصاب
الفصل الرابع
مشيت رقية واشرف من البيت
وطول الطريق كان كل كلام فتحى مع اشرف
وفى بيت اهل رقية
نبوية.يلا يابنات
ادخلوا بقى على المطبخ لموا الارض
وامسحوها
انا ضهرى اتقطم من الخبيز
واعملولنا كوبايتين شاى انا وابوكم
وهاتوهم فى الفسحة برة
رشا.حاضر يمة
دخلت رشا وبسمة ينضفوا البيت ويعملوا اللى امهم قالت عليه
وطلعت نبوية تقعد قدام البيت مع جوزها
بيتهم متحاوط بسور من الطوب الابيض
شبه البلكونة كده
وعاملين فيه قاعدة عربي
نبوية.ايه اللى فى دماغك يا يوسف
مرواحة رقية مع اشرف ورضاك على غيابها ده مش مريحنى
ما تقولى فى دماغك ايه ياراجل
على الاقل لو فيه حاجة اوعي البت عليها متأخرش
يوسف.وانتى ياولية مستنية يكون فيه حاجة علشان توعي بتك
وبعدين هيكون فى ايه فى راسى يعنى
نبوية.عيالك خام يا ابو اشرف
مالهمش فى اللى فى بالك
دول لا بيروحوا ولا بييجوا
بحطة ايدك فى البيت
يعنى مش مدردحين
ابو اشرف.عايز اجوزهم جوازات مقرشة كده يا نبوية
مش عايزهم يتحوجوا لحاجة
انا عيالى مش رخاص
ولا انا راجل ناقص
بس عايز لما الاقى فرصة
هتعيش بتى مرتاحة ومستورة
امسك فيها بأيدي وسنانى
نبوية.لا يا خويا انت سيد الرجالة
بس ما تخلينى معاك على نور
علشان افهم انت فى ايه فى بالك
انت عايز تخلى فتحى يتجوز رقية يا يوسف
يوسف.والله يا نبوية انا مكانش فى دماغى حاجة فى الاول
رحبت بيه فى البيت
لما لقيته جايب مصلحة للواد
قولت اهو بركة
يسندنا نطلع من الهم اللى احنا فيه
بدل ما احنا يوم بنلاقى اللقمة ويومين لاء
وبعدين مش عارفين نجوز العيال علشان مش هنعرف نجهزهم
بس لقيت عينه على البت من اول ما شافها
مشالش عينه من عليها
نبوية.طيب يا خويا مش يمكن الراجل يطلع ناقص
وعينه زاغت عليها نقص منه
مش نية خير
نبقى احنا بعتنا البت لحد عنده
هتبقى قاعدة لواحديها طول النهار
يغويها ولا يضحك عليها
ودى برضه عيلة
يضحك عليها
يوسف.علشان كده انا وصيت اشرف عينه تبقى وسع الفنجال
وينصحها
يمكن يا نبوية
محدش عارف النصيب فين
وعيالنا غلابة
نبوية.بس مش كبير عليها يا ابو اشرف
الراجل داخل ع ال35
وبتك لسه مجابتش ال15 حتى
يوسف.ياولية الراجل ميعيبهوش غير جيبه
وده جيبه مليان
ادعى انتي بس بتك تبقى ناصحة
وتعرف تجيبه على بوزه
يخبط على بابنا
نبوية.ربنا يسترها معاكم ياعيال بطنى يارب
ويوقفلكم ولاد الحلال
ويسعدكم
ابو اشرف.انتى برضه لما تروحى هناك ابقى وعي البت
وفهميها كده علميها تتلحلح شوية
نبوية.ماشى ياخويا
جت رشا وحطيت الشاى ودخلت تكمل اللى بتعمله
وقعد يوسف ونبوية يكملوا كلامهم
فتحى.حمدالله على السلامة
اسكندرية نورت
اشرف بسعادة.الله يسلمك
وبعدين اسكندرية منورة بأهلها
فتحى.ايه رأيك فى اسكندرية بقى يا رقية
رقية.جميلة
دى ريحة البحر دخلت مناخيرى من اول ما وصلنا الموقف
فتحي بيضحك. ريحته
ههههههه
وماله يا رقية
نبقى فى يوم ناخدك انتى واشرف ونروحوا البحر
علشان تبقى شميتى ريحته وشوفتيه
اشرف.نتوكلوا على الله بس يا عم فتحى الاول ونشوف اكل عيشنا
احنا مش جاين نتفسح
فتحي.ساعة لقلبك وساعة لربك يا اشرف
وبعدين انت جايب اختك يعنى تحبسها
حتى حرام
خليها تشم نفسها
يلا بلاش نسبق الاحداث
تعالى بقى اطلعك الاوضة بتاعتك
على الله تعجبك
اشرف ماشى ورا فتحى.ياسلام يا عم فتحى
هو حد لاقى
الحمد لله
ده كتر الف الف خيرك
رقية ماشية وراهم
وهى بتحلم باليوم اللى هتروح فيه البحر
والسينما
والملاهى
اما فتحى كان مشى قدام فتحى ورقية
وهو حاسس ان اللى عايزه قرب اوى
طلعوا سوا عمارة من 5 ادوار
كل دور فيه شقتين
لكن معظم السكان مش موجودين
لأنه كل اللى عايشين فيه قرايب ومعظمهم مسافرين برة
كل العمارة اللى مسكون فيها بس شقتين تلاتة
والباقى مقفول
وعلى السطح
اوضة كبيرة مقسومة من الداخل لأوضة ونازل عليها ستارة
وصالة
وفيه جزر منها مفصول بقطوع خشب
ومعمول مطبخ
فيه بابور جاز
وشوية حلل الومنيوم
وكام طبق
وكام كوباية
الصالة فيها كنبة عربي
وكرسيين خشب شبه بتوع القهاوى
والاوضة فيها سرير كبير وشباك بيبص على السطح
وتحته ترابيزة صغيرة بضلفة صغيرة مقسومة لرفين عليها راديو
والحمام برة الاوضة
على السطح
منفصل لأن فيه اوضة تانية على السطح بس مقفولة
اشرف.ايه ده كله ايه ده كله
انت دى مش ناقصها حاجة يا عم فتحى
ربنا يسترها معاك
فتحي.معلش بقى انا معرفش ايه اللوازم اللى ممكن تحتاجوها
فحاولت اكمل الناقص على قد م اعرف
ولو محتاجين حاجة تانية قولولى اجيبهالكم
رقية.هو الراديو ده شغال يا عم فتحي
فتحت.اه يارقية شغال
انتى بتحبى الراديو
رقية.اه اهو حاجة تعمل صوت لما اشرف يروح شغله
فتحى بخبث.لا متخافيش مش هتزهقى هنا
هتلاقى اللى يسليكي
يلا بقى اسيبكم تناموا وترتاحوا من المشوار
وبكرة يا اشرف اجيلك اخدك
وتنزل تشوف الحتة اللى هتقف فيها واعرفك على كام واحد هناك
دول كبار الموقف
هيخلوا بالهم منك لحد ما تاخد على المكان والناس
وانت برضه عايزك تبقى مراعي لقمة عيشك
لا تشاكل حد
ولا تتعارك مع حد
هنا بيجاملوا بعضيهم
وتلاقى الموقف كله عليك
انت لسه جديد عليهم ومحدش يعرفك
مش هييجى الغريب حتتهم ويرازيهم
اشرف.لاء يا عم فتحى مشاكل ايه
انا مش بتاع مشاكل
لا هنا ولا حتى عندينا هناك فى البلد
متقلقش بكرة تلاقى الموقف كله اصحابى
الواحد بيحب الناس
وجايين نكسب مش نخسر
هنعادي الناس ليه
فتحي.يلا ربنا كريم
اسيبكم بقى
يلا تصبحوا على خير
اشرف ورقية.وانت من اهله يا عم فتحي
خرج فتحى
وراح قعد على القهوة
اشرف.ادخلى انتى يارقية
نامى على السرير
وانا هنام هنا على الكنبة
رقية.ايه ده احنا هننام
اشرف.اه اومال هنعمل ايه يعنى
رقية.ما تخلينا نطلع نقعد برة شوية نشوف شكل الشارع اللى هنعيش فيه
اشرف.لسه فيكي حيل
ماشى ياستى
بس طلعيلى بقى جلابية البسها
احسن انا حاسس انى مربوط بالبطلون ده
رقية بفرحة.فوريرة
فعلا فتحت الشنطة
وطلعت لأخوها عباية من اللى جايبهم معاه
وطلعت لنفسها جلابيه
وغيروا هدومهم
واخدوا الكرسيين الخشب وطلعوا قعدوا جنب السور
يبصوا على الشارع
رقية بفرحة.الله يا اشرف
شوف الشارع مليان ناس ازاى
مش احنا عندنا تطلع من البيت بعد المغرب تلاقى مفيش حتى كلب ماشى
اشرف.يابت ماهى هنا البلد زحمة ومليانة ناس
غير عندينا
هنا تلاقى محدش يعرف حد من كترهم
لكن احنا عندينا تلاقى كل واحد ماشى فى الشارع عارف مين اللى هيقابله فى طريقه
البلد كلها بيوتها معدودة
رقية.بس شكلها حلو اوى يا اشرف
انا فرحانة اوى انى جيت هنا
نفسى بقى اروح اشوف البحر
اشرف.بقولك ايه يابت يا رقية
عايز اقولك كلمتين
بس افهميهم كويس
فتحي مخك بقى
واعقلي كلامي
رقية بتضحك.ايه كل ده علشان قولت نفسى اشوف البحر
اشرف بيضحك.لاء يابت ابويا
هقولك كل ده ليه بالظبط
شوفى يا رقية
يوسف ده راجل كبير مش صغير
واكبر مننا بكتير
ومفتح
وبعدين معاه قرش
ومعارفه كتير
واحنا غلابة اوى
ومنعرفش غير بعض
يعنى اللى زى فتحى ده احنا لا نعرف ناكل ولا نشرب معاه
رقية.ليه يا اشرف ده راجل طيب اوى والله
ده ق اللى لو روحتى مع اخوكى اسكندرية
هفسحك واوديكي السيما والمراجيح
والبحر
اشرف.هو قالك كده
امتى يا رقية الكلام ده
وليه مقولتيش
رقية.يوم ما جاب الفراخ والبط
لما كنت ماسكاله الفوطة علشان ينشف ايديه
قاللى كده
وانا خوفت اقولكم احسن تخلونى مجيش معاكم
اشرف.فيه حاجة تانية حصلت يا رقية غير الكلام ده
رقية.لاء والله
هو كده بس
اشرف بضيق.طيب شوفي بقى يارقية
لو حصل فى يوم وجه فتحى وانا مش هنا
اوعي تفتحي الباب
فاهمة
رقية.ليه يا اشرف
افرض جايبلنا حاجة
ولا عايز يقول حاجة
اسيبه على الباب
اشرف.اسمعى كلامي
الراجل ده دماغه فيها حاجة احنا مش فاهمينها يا رقية
لو فى ضميره حاجة وحشة
نبقى بنحرس منه
ولو نيته خير يابنت الحلال
يبقى عارف اننا مش سهلين ولا بنجرى ورا اى حاجة تزغلل عنينا
فهمانى
رقية.لاء مش فاهمة
اشرف.يمكن هو عايزك تيجي معايا هنا
علشان غرضه حاجة منك
رقية.يعنى ايه غرضه مني
اشرف
هو انت قصدك ان عم فتحى يكون عايز يجوزنى لأبنه
اشرف.فتحي مش متجوز يا رقية
وبعدين ليه متقوليش ان غرضه يتجوزك
رقية.ياحومتي يتجوزنى انا ايه
ده فى سن ابويا باين عليه
هو اه يملى العين
بس يعنى ميبقاش جوزى
اشرف.ما تحترمي نفسك يابت
ايه يملى العين دى
وبعدين يا رقية الراجل سنه ميعيبهوش
لو هو فعلا غرضه الجواز
يبقى طاقة القدر اتفتحتلك
لكن يعالم يمكن ضميره فيه حاجة تانية
علشان كده لازم نحرس ولا نخون
تخلى بالك من نفسك
وانا فى غيابى الباب ده ميتفتحش لو اللى على الباب عصفورة مش فتحى بس
لو قطة بتخربش على الباب متفتحيش تشوفيها
انتى فاهمة
ومحدش عارف ياختي يمكن يكون ربنا كاتبلك الخير على ايد الراجل ده
بس خلينا برضه نعمل اللى علينا
رقية سرحت فى كلام اشرف
اشرف.ايه يابت انتى مش سامعانى
رقية بأرتباك.لالا سمعاك
حاضر
مش هفتحله الباب ابدا لو انت مش هنا
بس انت يا اشرف ابقى فسحنى
ابقى ودينى اتفرج على البحر بس
اشرف.والله يارقية
ادعيلي بس اول اسبوع ده يعدي على خير والناس وانا نتعود على بعض
والشغل ربنا يكرم فيه
واخد يوم اوديكي فيه الحتة اللى تعوزيها
رقية بسعادة.ربنا يفتح ابواب الرزق فى وشك
انا هدخل انام بقى
اشرف.ماشى يلا ادخلى انتى وانا هجيب الكراسى وادخل انام انا كمان
دخلت رقية
وقفلت الستارة الفاصل بين الاوضة والصالة
وطلعت السرير
ونامت على المخدة وهى مفتحة عنيها
وفى بالها
ان فتحى تكون عينه منها بجد
ويكون عايز يتجوزها
بالنسبة لظروفهم
راجل غني
وكمان اسكندرانى
وشكله حلو
فى اللحظة دى حسيت رقية انها كبرت
وابتديت تحلم بأنها مرات فتحى اللى كانت لسه بتقول عليه من سن ابوها
وشايفة نفسها عروسة
وشايفة نفسها وهى بتتفسح معاه فى كل مكان
وبيجيبلها كل حاجة بتطلبها
بعد ما كان كل هدفها انها تروح البحر ولا تتفرج عليه من بعيد
بقيت بتفكر فى حاجات تانية مكانتش فى بالها بالمرة
وفضلت تفكر لحد ما سمعت الفجر بيأذن
اما فتحى اللى كان على القهوة لحد وقت متأخر
قابل واحد صاحبه
وراحوا قعدوا سوا فى دكان واحد صاحبهم
وقفلوا عليهم الباب الصاج بتاع الدكان
وفضلوا جوة يشربوا شيشة
وحشي....
بس السهرة مكانتش مقتصرة على الشرب وبس
لاء دى كمان كان فيها ستات
ماهو الدكان مقفول عليهم
والوقت اتأخر
ومحدش حاسس بحد
فتحي مكانش عنده حاجة اسمها حرام
وعلشان كده وهو مع واحدة منهم
مع الشرب اللى شربه
تخيل رقية او جت فى باله من غير ما يكون بيفكر فيها
وده خلاه يقتنع بأنه لازم يوصل للبت دى بسرعة
وكمل ليلته مع الست اللى معاه
على انها رقية
لحد النهار ما بدأ يطلع
وحسوا انهم مش شايفين قدامهم من كتر الشرب والقرف اللى عملوه
قام من معاهم فتحى وهو بيجر رجليه جر
ووصل البيت عند اخته
ودخل نام حتى من غير ما يغير هدومه
ولا كان عنده وقت انه يفكر فى اى حاجة
ومجرد ما حط راسه على المخدة نام
ومحسش هو نام وقت قد ايه
لحد ما جوهرة صحيته
وهى بتقوله.قوم يا موكوس
المغرب بيأذن
نموسيتك بمبى يا اخرة صبري
فتحي بيتقلب على السرير.سيبينى نايم يا جوهرة
جوهرة.ماهو انا يا منيل لما تنام والنهار طالع هتصحى امتى
قوم يا فتحي
قوم انزل شوف اكل عيشك
انا عارفة بس انت لحد امتى هتفضل ضارب الدنيا صرمة كده
امتى بقى تتجوز وتتلم
فتحى فتح عنيه وبص لأخته.ايه بقى الاصطباحة دى
خلق الله يقولوا صباح الخير
جوهرة بأنفعال.صباح الخير ايه يا فتحى انت هتفوق امتى من القرف اللى انت فيه ده
انا سكتالك ومش عايزة اقول لاخوك على عمايلك دى
لكن انا الكلام ده مش نافعني
تيجي من برة وش الصبح ومعمي وريحتك زفت
وتنام لحد الدنيا ما تليل
ماهو انت لو عندك بيت
وليك واحدة ست
كنت لقيت اللى تعمل حسابه
لكن انت صايع
عايز تفضل تلملم من الزبالة
تضيع فلوسك وشقاك فى الحرام على قلبك زى العسل
لكن الواحد ينصحك بالعقل
تضحك وتهزر وكأنك مسمعتش
فتحي قام قعد على السرير.فى ايه يا جوهرة مالك ياختى
انتى زهقتى من قعدتى معاكي
قوليلى
لكن مالهوش لازمة حرقة الدم اللى على الصبح دى
جوهرة.قعدتك ايه يا ابو قعدة انت كمان
هو ده اللى انت فهمته
لاء يا حبيب اختك
كلامى ده علشان لو حد فى عيالى بيعمل عمايلك ده
هيبقى بيسمع نفس اللى بقوله
ولو الكلام يا فتحى مجابش معاك نتيجة
انا اكسر رقبتك
اوعى تكون فاكر انك هتكبر عليا
امشى بما يرضي الله يا فتحي
وشوف مصلحتك
ولو رجعتلى مرة تانية
بالشكل اللى كنت راجع بيه امبارح ده
مش هيحصل كويس
وقد اعذر من انذر
ويلا قوم علشان تاكل
سابته جوهرة وخرجت من الاوضة
وفتحى اللى كان لسه مفاقش
حس ان اليوم اتقفل
بعد الكلام اللى قالته جوهرة
حدف جسمه مرة تانيه على السرير
وماسك رأسه بأيديه
وسرح شوية
وبعدها بصوت مسموع.رقية
يخربيت الشرب ع الزفت
ادينى نسيت اروح للولا
الله يسامحك ياختى نكدتى عليا الاصطباحة
يلا اقوم اروح بقى
خليه ينزل شغله بسرعة والواحد يخلص مصلحته م انا مش هفضل كده كتير على نارى ومستنى الفرصة
وقام من سريره وجهز وخرج من الاوضة اكل
وطلع فى طريقه لبيت اشرف ورقية
اللى كانوا قلقانين من عدم ظهور فتحى اليوم كله
يتبع
ما بعد الأغتصاب
الفصل الخامس
خرج فتحى
وتوجه الى اشرف
كانت الساعة تقريبا 8 بليل لما وصل عندهم
اشرف بلهفة.عم فتحي
خير ايه اخرك كده
فتحي.ياراجل سيبنى ارمي السلام الاول طيب
اشرف.معلش متأخذنيش
انت عوأت علينا
وكنت قايل هتيجي بالنهار علشان تورينى المكان اللى هشتغل فيه
وانا ماعرفلكش طريق ولا نمرة تلافون
فتحى بيضحك.طيب اخد نفسى من السلم
ونتكلم
اشرف بيضحك.طيب ادخل يا عم فتحى ادخل ارتاح
متأخذنيش
انا خوفت
دخل فتحى وراح قعد على الكنبة.خوفت من ايه يا راجل
يوم من يوم قريب يعنى يا اشرف
واهو تريحلك شوية قبل الشقا
اشرف.اليوم بيفرق يا عم فتحى
فتحي وهو بيبص حواليه.طيب ايه مش هتخلي رقية تعملى كوباية شاى ولا ايه
اشرف.رقية نايمة
الساعة 8
عندينا فى البلد بننام بدرى
انا هقوم اعملك الشاى
فتحى.ماشى نوم الهنا
بس عايز كوباية شاى تقيلة حبر علشان دماغى وجعانى ومفوقتش لسه
اشرف.احلى كوباية شاى
قام اشرف ودخل المطبخ يجهز الشاى
واستغل فتحى الفرصة
وقام من مكانه فتح الستارة
وبقى يبص على رقية وهى نايمة
وبيفتكر الست اللى كانت معاه الليلة اللى فاتت
وبيتخيلها رقية
واول ما اتقلبت رقية على السرير
قفل الستارة بسرعة
فى اللحظة دى
خرج اشرف من المطبخ
ولما لقاه فتحى
عمل نفسه انه واقف ياخد الكراسى
اشرف باستغراب.فى ايه يا عم فتحى
فتحى.ولا حاجة انا قولت اخد الكراسى ونطلع نقعد فى الطراوة احسن
بدل الاوضة كتمة هنا
اشرف.طيب اطلع انت وانا هجيبهم واجي
فتحى سحب كرسى معاه
وطلع اشرف صنية الشاى على سور السطح
ودخل جاب الكرسى بتاعه
وطلع قعد معاه
فتحى.معلش بقى
راحت عليا نومة
اصلي امبارح رجعت البيت وش الصبح
محسيتش بنفسى
اشرف.معلش يا عم فتحى
انى بتقل عليك والله عارف
بس استحملنى لحد ما ابدأ شغلي
والله ما هتحس بوجودى خالص
فتحي.ياراجل عيب عليك
ده انتم امانة فى رقبتى
اشرف.كتر خيرك يا عم فتحي
طيب لو تقولى انت اروح انا لمين الصبح
واقوله انى من طرفك
متخافش عليا انا دماغى شغالة واعجبك يعنى
هعرف اوصل
فتحي.لاء يا راجل عيب عليك
رجلى على رجليك
لحد ما تفرش نصبتك
انا بس مشكلتى كلها فى الصحيان بدرى
انت عارف السهر بيخلي الواحد ما بيصدق يحط دماغه على المخدة
ومعنديش انا حد يصحينى
فتحي كان بيقول الكلام ده وهو مش فاهم هدف فتحي
اشرف.طيب ياعم فتحى ما تتجوز اهو تلاقى حد يصحيك
فتحى بيضحك.هو ده اللى قدرك عليه ربنا
بقى بدل ما تقولى بات معايا للصبح وننزل نتوكل على الله سوا
لالا يا اشرف انت شكلك بخيل مش زى ابوك خالص
ابوك طلع بيفهم فى الاصول عنك
كلام فتحى احرج اشرف
وفى نفس الوقت مرتحلهوش
ومش عارف يرد يقول ايه
فتحي.ايه ياعم
ده باين عليك بخيل بجد بقى
اشرف بأرتباك.لاء والله يا عم فتحى
ده مكانك
ده احنا اللى ضيوفك
انت جوة واحنا برة
فتحى.متقلقش يا عم انا مش هنام انا هفضل بس قاعد معاك لحد النهار ما يطلع
بدل ما ارجع البيت زى امبارح
وتروح عليا نومة
وانا عارف ان اكيد الفلوس اللى انا عاطيهالك اكيد قربت تخلص
وانت محتاج تنزل تسعى بقى على اكل عيشك
اشرف.عندك حق والله
ده الفلوس كلها اتجاب منها خزين يبىقى معانا هنا
لحد ما نشوف امورنا هتمشى ازاى
فتحي.لاء خلى خزينكم زى ما هو
وانا هنزل اجيب فراخ مشوية وكفتة وكباب
زى العسل
وانت صحصح اختك بقى تاكل معانا
الاكل ده ميتاكلش غير سخن مولع
اشرف بأحراج.يا عم فتحى مالهوش لازمة والله
مستورة الحمد لله
ومن خيرك برضه
انا هدخل احضرلك لقمة فلاحى كده على ما قسم
فتحي.لالا والله ما يحصل
انا هنزل ساعة زمن وارجعلك
هعيشك ليلة تحلف بيها
قبل ما تدخل بقى على دوامة الشغل
اشرف بعدم ترحيب.اللى تشوفه يا عم فتحى
شرب فتحى الشاى بتاعه بسرعة
وساب اشرف
ونزل راح وصى على الاكل يتشوى
وراح لواحد من اصحابه اللى كان سهران معاه ليلة امبارح
اشرف.رقية بت يارقية
قومى اصحى يابت
شوفى الوقعة المهببة اللى وقعناها دى
رقية بخضة بتفتح عنيها.خير يا اشرف
فى ايه
اشرف.قومى فوقي ياختى
فتحى جه وكسفنى
وقال انه هيبات هنا علشان يعرف ينزلنى الصبح اشوف المكان اللى هفرش فيه
رقية.يبات هنا فين يا اشرف
اشرف.هنا ياختى معانا
فى الحؤ اللى احنا فيه ده
الراجل ده شكله كده حط صابعي تحت ضرسه
الفلوس فلوسه
والسكن هو اللى جابه
وحتى الشغلانة مش عارفلها طريق
واني معرفش حاجة هنا علشان انزل ادور لحالى
وحتى لو عملت كده
ممكن يزعل
ويمشينا من السكن
واحنا معناش حق التوصيلة اللى ترجعك البلد
رقية قامت قعدت فى نص السرير.طيب وبعدين يا اشرف
اشرف.عارفة انا لو لحالى
مشغلش دماغي
بس انتى ياختى مكتفانى
منها خايف عليكي منه
ومنها مش عايز اخسره علشان احنا فى بلد غريبة
رقية.مش يمكن انت مكبر العبارة يا اشرف
ومفيش حاجة من اللى فى راسك دى
اشرف.الله اعلم
هو الراجل مقاليش هيدخل ينام هنا
قاللى بس هنسهر للصبح
علشان لو رجع بيته نام معندهوش حد يصحيه
وانا مش عايزه يفضل يمطوحنى وانا مجبور افضل قاعد مستنيه ياخدنى من ايدي علشان انزل اتوكل على الله
رقية.سلمها انت لله يا خويا
والله تلاقى بس انت اللى خايف عليا
لكن الراجل ولا فى باله حاجة من اللى فى بالنا دى
بس هو راح فين يعنى
اشرف.راح يجيب اكل
قاللى هيجيب فراخ وكفتة مشوية
رقية بسعادة.اييييييييييه
كفتة وفراخ
كفتة بجد يا اشرف
اللى بنشم ريحتها بس دي
اشرف بيضحك.اه يابت اللى بنشم ريحتها دى
والنعمة انا عرف ان الراجل ده عارف اننا محرومين
وبيطمعنا باللى بيعمله
رقية.بلا بيطمعنا بلا بينيلنا
سيبك بقى من كل ده
خلينا فى الكفتة
هناكل كفتة يا اشرف
ياسنة بيضا ياولاد
فينك يا بت يا بسمة انتى والبت رشا
فينك يمة انتى وابويا
تيجوا تاكلوا معانا كفتة
اشرف بيضحك.يخربيتك بت بتاعت بطنك انتى
رقية بتضحك.لا اخص عليك ياخويا
بقى اني كده
بس انى الكفتة دى لما بشم ريحتها ببقى هموت واعرف طعمها ايه
اشرف.هتعرفي
بقولك ايه
لفى ايشاربك على راسك حلو
شعرك ميبانش
كعب رجليك ميبانش
وتحضرى الاكل وتحطى منابك فى صحن وتدخلى تاكلى على سريرك
رقية.ياخويا اكل مطرح ما اكل
حتى لو تحت السرير
ومش هتشوفوا ديلي حتى
اشرف.ماشى ياختى
بس انتى قومى حضريلنا طبق سلطة حلو كده
علشان متفضليش رايحة جاية
وهو هنا
رقية.ياسلام من عنيا
احلى طبق سلطة
فعلا قامت رقية من السرير
ودخلت المطبخ
وابتديت تطلع حاجات من اللى امها مجهزاهالهم
وقطعت بصل
وجرجير وطماطم
وعملت طبق سلطة كبير
وهي كل يوم بتعشم نفسها بحاجة جديدة مع فتحي
فى بيت على اخو فتحى
جوهرة.والله يا فردوس ياختى
زى ما بحكيلكم كده
انا الواد ده حطيت صوابعى العشرة فى الشق منه
علي.طيب يا جوهرة ياختى
وانتى ساكتة عليه ليه
كنتى قولتيلى من بدرى
جوهرة.ياعلي انت ياخويا اللى فيك مكفيك
شقيان ليل ونهار
كمان هدورلك دماغك بمشاكل الصايع ده
كل يوم اقول يمكن يعقل
يمكن يحس على دمه
يمكن يراعي حرمة البيت
ولا حتى يتقى الله فى ماله ونفسه
وهو بيسوق فيها اكتر
فردوس.لا يا جوهرة تقوليلنا
هو بيدلع عليكي
علشان انتى اللى مربياه
لكن برضه على اخوه الكبير
ماهو لازم يلاقى حد يقف له
احنا مش هنستنى لما نلاقى حد بيخبط علينا
ويقولنا تعالوا الحقوا اخوكم اتمسك بمخدرات
ولا اتقفش مع واحدة
علي.استغفر الله العظيم من كل ذنب عظيم
طيب يحط بناتنا قصاد عنيه
يراعي ربنا فيهم
عندنا ولاية
جوهرة.لسانى نشف ياخويا من الكلام معاه
وبرضه الولا مبقاش صغير يا علي يا خويا
مش ههينه قدام عيالي عيب
ولا عايزة الراجل يعايرنى بأى حاجة تدور بينى وبينه
ما صدقت انى لقيته فى البيت قبل ما التانى يرجع
اتفتحت فيه بقى
متقفلتش
علي.لاء يا جوهرة ياختى
انا هعدي عليه فى الموقف
واقوله اننا هنتجمع كلنا يوم الجمعة هنا ونتغدا مع بعض
ونقعد معاه
ونحط له حد
فردوس.الواد ده لازم يتجوز
انا عندى له عروسة بت حلال
نشوف هو معاه كام ونكمل احنا عليه
ونجوزه
لكن طول ما هو فردانى وبطوله كده هيفضل على الحال ده
جوهرة.ربنا يهديه
ماشى يا على يا خويا
سايقة عليك النبى متنساش
الواحد خايف يوقع نفسه فى مصيبة ميعرفش يطلع منها
واحنا هنشيل الطين معاه
وهو ولا فى باله
علي.لاء ياختى متقلقيش
بكرة افوت عليه بعد الشغل
واتفق معاه على الجمعة
ومش هجيبله حتى سيرة على كلامنا النهاردة
جوهرة.ماشى يا خويا
نادي بقى على مراتك
عيب مقعدناش معاها
والولية من ساعة ما لقيتنا بنتكلم خدت بعضها ودخلت اوضتها مطلعتش
علي.بنت اصول هى
فاهمة اننا بنتكلم فى مواضيع مش لازم تكون عارفاها كلها
فردوس.بنت اصول بصحيح
عقبالك يا فتحي يا خويا
لما ربنا يكرمك بواحدة زى غالية كده
جوهرة.دى اسم على مسمى
غالية وهى غالية بصحيح
نادى عليها بقى نقعد معاها شوية
فتحي.ايه ياعم ديشة السهرة الجامدة دى
ديشة.ايه رأيك بقى
ليلة من الف ليلة
فتحى بيضحك.اه ده انا روحت معمي ومش شايف قدامى
صاحى النهاردة بعد العشا
حتى الشغل منزلتهوش
ديشة.ياعم احنا يعنى بنسهر كل يوم
لازم كده نغيب نغيب ونعوضها بليلة جامدة
فتحى.على رأيك
بس الصراحة دماغ امبارح كانت عالية اوى
ديشة.اه ياجدع دى حتة متكلفة
جايالى من واحد عرباوى انما ايه
معلم كبير
فتحي.معارفك تقال انت ياض
ديشة.بلاش نبر وحياة ابوك
فتحي.طيب بقولك ايه
عايز حتة حلوة من بتاعت امبارح دى
عايز حتة تتشرب تخلي اللى شربها مش عارف هو ماشى بوشه ولا بقفاه
ديشة بيضحك.ايه ده انت ناوى تقضى ليلة مع حالك ولا ايه
ياض بطل بقى قلة الاصل دى
ما احنا افتكرناك لما قولنا نقضى ليلة
فتحي.ياجدع ليلة ايه عيب عليك
ده واحد معرفة جاي من الفلاحين لسه بكرتونته
وعايز ادردحه كده واسهرة سهرة حلوة
ديشة.طيب ما تجيبه ونسهر سوا
فتحي.بلاش الليلة
هو لسه ماخدش على الجو هنا
خلينى بس اعوده على الجو بتاعنا
واجيبه
ده عيل صغير لسه
مش عايزه يخاف من اولها
ديشة.هههههههه انت قلبت بقى نشاطك عيال صغيرة ولا ايه
فتحي.جرى انت هترش عليا ولا ايه
ما تخلص يا عم وشوفلنا حتة حلوة كده
ديشة.ماشى ياعم
بس متتعودش على كده
الكلام ده بفلوس
فتحي.مردودالك
يلا بس هاتها خلينى الحق الواد قبل ما ينام
وفعلا ديشة عطاله اللى هو طلبه
ورجع فتحى على المحل بتاع المشويات اخد الاكل
وجاب شوية فاكهة معاه
وراح على اشرف
فتحي.يا اهل الله ياللى هنا
طلع اشرف من الاوضة ومسك من ايد فتحى الاكياس.ادخل يا عم فتحي
اتفضل
دخل فتحى وهو برضه بيبص حواليه
قعد على الكنبة.الاكل موحوح ياض يا اشرف
وفيه ازازة ازوزة عندك صب لنا منها علشان نبلع بيها وهى متلجة كده
اشرف.عنيا يا عم فتحي
هناكل هنا ولا على السطح
فتحى.لاء خلينا على السطح برة فى الهوا
الاكل سخن نار وهيسخنا
ايه مصحيتش اختك تاكل معانا ليه
اشرف.لاء صحيت وحضرت طبق سلطة انما ايه حاجة معتبرة
فتحى.طيب ما تخليها تيجي تاكل معانا
دى اللمة بتفتح النفس
ولا انت حاكم عليها تاكل لواحدها
اشرف.لاء بس علشان تبقى براحتك انت يا عم فتحى
فتحى.عيب عليك يا اشرف
ده انتم اخواتى الصغيرين
يلا يلا انا هطلع برة
وانت خلى اختك بقى تحط الاكل فى صحون
وحصلونى
ده انا هسهرك سهرة
اخليك تنسى اسم امك
يتبع
تكملة الرواية من هنااااااااااااا
تعليقات
إرسال تعليق
فضلا اترك تعليق من هنا