روايةخارج قانون الحب الفصل 1-2-3-4-5بقلم روزان مصطفى كامله (جميع الفصول كامله)
روايةخارج قانون الحب الفصل 1-2-3-4-5بقلم روزان مصطفى كامله (جميع الفصول كامله)
إيه الدم اللي على هدومك دا ؟ حد عمل فيكي حاجة إنطقي يا بنتي !!
هي بتعب : يا عمتو قولتلك مفيش حاجة ، أنا صاغ سليمة زي الفل محدش لمسني
عمتها برعب : أمال الدم اللي على فستانك دا منين !! يابت إنتي أمانة عندي
هي بعصبية : قولتلك مفييش مفييش سيبيني بقى
جريت عمتها وراها وهي بتقول : خدي يابت وإقفي كلميني
دخلت هي الحمام وقلعت الفستان وبدأت تغسله على الحوض وهي بتعيط
أنا ما صدقت هربت منهم ، رغم إني مقدرتش أنقذها معايا ، لكن ربنا نجاني أنا
* قبلها بخمس ساعات
على قدر هدوئك تأتي العاصفة .. على قدر حبك تطعنك الخيانة في صميم قلبك
وما يحدث لك ليس تكفير لذنب أو عين حسد ترصدك
أنما هو إبتلاء من الله
الدنيا كانت عاصفة وبتمطر ، خرجت وأنا ماسكة شنطة هدومي من بيت عمي ومشيت بالليل جمب عواميد النور وأنا بترعش من الخوف ومن البرد ، دي تالت مرة أتطرد من بيت زي ما أكون موبوءة ،
تلقائياً إختلطت دموعي بمياه المطر وأنا ماشية في الطريق الطويل ومش عارفة هروح فين
فضلت ماشية وسرحانة في همومي والشنطة كانت هتقطع إيدي من تقلها
وفي وسط ما أنا ماشية لقيت عربية راكنة ومنورة ، أترمى منها بنت على الأرضية لدرجة أن راسها إتخبطت جامد في الأرض ، وفضلت تتألم واضح إنها مضروبة بالرصاص في رجلها
جريت عليها وأنا برمي شنطتي وبقول للي في العربية : إنت يا حيوان يا متخلف أقف
كان كل همي إنه يوديها المستشفى
نزل هو من العربية ورزع الباب ووقف يدخن سيجار والبنت بتتألم
وطيت على الأرض وانا ببص على رجليها المتصابة بذهول وخوف عليها وروحت جريت على شنطتي تاني وجبتها جمب البنت خرجت منها روب طويل حاولت ألبسه ليها وكان في إسكارف ربطت رجليها بيه بس الألم مراحش
شكلها كان بنت ناس ، جزمة كعب وقميص ماركة حلوة وبرفانات وبتاع ، وهو كان شكله باشا إبن باشا بس أنا كنت بغلي من جوايا ، رفعت راسي وبصتله وقولتله : أي نوع من الحيوانات إنت ! إزاي تضرب بنت بالنار وترميها من العربية !
هي بألم : ساعديني
موصلنيش منه هو أي رد .. كان واقف بيبصلي بسكات ..
وكأنه مش حاسس بالذنب
البنت بتطلع نفسها بالعافية وبتقول : أنا .. أنا حامل ساعديني
حطت إيديها على بطنها وواضح إنها كانت بتتألم من رجلها ومن بطنها
بصيتله بغيظ وروحت قايمة من الأرض ورزعته حتة كف ، لدرجة إن مياه المطر اللي على وشه طلعت صوت
قولتله وأنا مش شايفة قدامي : إزاي يجيلك قلب تأذي مراتك وإبنك يا مُختل
محسيتش بنفسي غير وهو بيمسك دماغي وخبطها جامد في العربية مرتين
الرؤية إتشوشت قدامي وحسيت بسائل بارد غير المياه بينزل على عيني غالباً دم
قبل ما أقع على الأرض وأخر حاجة شوفتها قبل ما أقفل عيني هو بيجر البنت من شعرها
4 hours later
أوضة بيضا في نصها سجادة بني فرو .. وسريرين حديد عاملين زي بتوع السجن ، وزرعة كدا زينة لونها مستفز
حطيت إيدي على راسي وكنت بموت من الوجع والصداع
رمشت بعيني كذا مرة عشان أقدر أوضح الرؤية
لقيت البنت بتترعش وتنزف من رجليها وعماله تعيط وتنتحب
بصتلها بقرف بعدين قولت : مين الحيوان دا وعمل فيكي كدا ليه ؟
مردتش هي وفضلت تعيط ، أتعصبت أنا وقولتلها بنبرة عالية : ما تنطقي وتخلصيني مش كفاية إتسحلت معاكي في أم الحوار دا
هي بعياط : متخلهوش يموت إبني والنبي ، متخلهوش يعمل كدا
نفخت انا وقولت : إخلصي أنا مصدعة عمل فيكي كدا ليه وعاوز يموتك ليه ؟
فضلت تترعش وتبصلي وانا كنت جبت اخري منها لحد ما نطقت وقالت : عشان كذبت عليه
انا ببصلها ببرود بعدين قولت : نعم يا ماما ؟ عشان إيه معلش مسمعتش ؟؟؟ ما تكذبي ولا تتنيلي إنتي عاوزة تقنعيني إنه هايج وعاوز يموتك عشان كذبتي عليه
قبل ما هي تنطق دخل هو وواحد معاه ، قفل الباب وفضل يبصلي بعيونه الصغيره بعدين قال للي جمبه : هي دي
جبته من فوق لتحت بعدين قولت : يا كوكو ! إنت جايب صاحبك تفرجه على بدلة ولا إيه ، دا أنا هوديك في ستين داهية على خبط دماغي في العربية دا
فضل يبصلي ببرود مبيردش ، صاحبه كان لابس تيشيرت أحمر بكُم روحت بصيت لصاحبه وقولت : ومين بابا نويل دا كمان اللي جايبه تفرجه عليا
صاحبه بعصبية : نعم يا اختي ؟ بابا نويل ! طب يلا عشان أديكي هدية الميلاد
قرب وسحبني من شعري والتاني بيضحك ضحكة غريبة كدا تحسه أراجوز ، وبصوت هادي قال : واحد بيحل مشاكله مع مراته بتتحشري ليه ؟ شعب مالوش كتالوج
أنا بألم عشان مشدودة من شعري : إنتوا مجانين ولا إيه دا إنت ضاربها بالرصاص يا مجنون يا إبن الجزمة
هو بعصبية : وإنتي مالك ! ليه إتدخلتي في الموضوع ، ليه هتضطريني أعمل معاكي كدا !
هي بقلق : تعمل إيه مش فاهمة !!
هو بغموض : هتفضلي مشرفانا هنا لحد ما نعرف انتي مين وايه اللي مشاكي في الطريق الضلمة دا بالليل ، يا إما حد زاقك علينا يا أما وراكي مصيبة
هي بقلق وغضب : إنتوا مين أصلاً وزاققني إيه انا كنت خارجة من بيت عمي ولقيت أم عربيتك راكنة وواحدة بتترمي منها بوحشية ، إنتوا عصابة ولا إيه ؟
هزت البنت التانية راسها بمعنى لا وهي بتعيط
قال التاني وهو متعصب وبيشاور بسخرية على مراته : الهانم دي مراتي ، وحامل واللي حصل دا لأسباب شخصية بيننا .. أنتي ك بني أدمه معدية بتدخلي بيننا ليه ؟؟
هي بصدمة : اسباب شخصية إيه دا إنت رميتها من عربيتك ولا كأنها مانيكان ولا عروسة بلاستيك
رد عليها قال : نهاية الحوار إنتي هتفضلي مشرفانا هنا مع الأمورة ومش هطلعك غير بمزاجي عشان بعد كدا تحرموا تحشروا مناخيركم في اللي ميخصكمش
وخرج ورزع الباب وراه ، حاولت تفك إيديها و ..
يتبع
| 2 |
حاولت تفك إيديها المربوطة بالجنازير فشلت ومعرفتش ، ف لفت للبنت اللي بتعيط وقالتلها : بقولك إيه ما تحكيلي يمكن اقدر أحل مشكلتكم سوا وأصالحكم على بعض ، جوزك الحيوان دا عمل فيكي كدا ليه وإيه سبب تعذيبه ليكي رغم إنك حامل
البنت ساكته مبتردش بس بتعيط وبس
هي بعصبية : ما تنطقي بقى دا ايه البرود دا !!! ياريتني سيبتك تموتي
رفعت البنت راسها وقالت بعياط : هحكيلك .. هحكيلك كل حاجة من الاول بس إديني وعد تساعديني وتخرجيني انا وإبني كويسين من هنا
هي : أوعدك ، إنفضلي إحكي
خدت البنت نفسها وبدأت تحكي
* قبل سنة
مؤهلاتك إيه يا ريناد ؟
قعدت بخجل وأنا بنزل الجيب وبقول : أنا حاسبات ونظم معلومات ومعايا كورس كومبيوتر وإنجلش وبعرف أدخل الداتا
هو : عظيم جداً ، مقدرتك للشغل في اليوم كام ساعة ؟
انا : ممكن ٩ ساعات؟
هو بجدية : هنحتاجك معانا ١٢ ساعة ويمكن أكتر ، شغلنا كتير وهنحتاجك
انا بإبتسامة لطيفة : تمام حاضر
من غير ما يبتسم قال : مبروك عليكي الوظيفة
* الوقت الحالي
ريناد بعياط : وياريتهم ما قبلوني ، طلعت الشركة دي غسيل أموال لوساختهم ، أول واحد قابلته كان كنان ، ابو تيشيرت احمر دا اللي قابلتيه إسمه كنان وهو دراع بدر اليمين ، بدر دا اللي أنا مراته
هي بتكملة : أه وحامل منه
ريناد بنظرة ندم وخوف : لا ماهو .. ماهو أنا مراته بس مش حامل منه
شهقت هي وهي بتبصله بصدمه بعدين فتحت بوقها بالعافية وقالت : يخربيتك !! لا بجد يخربييتك ! إزاي مراته ومش حامل منه ، بصي يارب تولعي ويولع فيكي عشان إنتي خاينة
ريناد بعياط : كان غصب عني إنتي مش فاهمة ، البيج بوس بتاعهم أجبرني وعشان كدا بدر على خلافات معاه وعاوز يقتلني وصمم يخليني أسقط
هي بعصبية : وكمان مش عاوزة تسقطي إبن الزنا دا ! بقولك إيه انا هخرج نفسي وأسيبك تولعي
بدأت ريناد تعيط ف قالتلها هي : بيج بوس بتاع إيه ؟
ريناد بتردد قالت بعد وقت : م مافيا
شهقت هي تاني وقالت : يخربيتك لبيت اللي وقعني في طريقك
فضلت تفكر إزاي تخرج نفسها من الورطة دي ، إيديها مربوطة بكلبش في جنازير ، حست بوجع في شعرها وقالت بخنقة : دا حتى بنسة شعري السودا مضيقاني مخلياني عاوزة اهرش
بعدين ملامحها لانت وهي بتقول : بنسه !
حاولت تنزل راسها عشان تاخد البنية بصوابعها ، فجأة صوتت وهي بتقول : ااااه يخربيت أهلك إنتي وكنان وبدر ، جالي شد عضل من كتر ما بنزل راسي
ريناد بعياط : والنبي لو خرجتي تساعديني
عدلت هي راسها وقالت بتبريقة : دا أنا هسيبك مخصوص عشان يولعوا فيكي ، بلا قرف قال غصب عني معندكيش إيد تديله بوكس في سنانه توقعيله صف سنانه
ريناد بسرسعة : إنتي مجنونة بقولك بيج بوس بتاع المافيا !
وكملت عياط ف قالت هي بعصبية : بت نحنوحة ومستفزة
وطت راسها تاني لحد ما أخيراً جابت البنسة وإتقطع شعرها وهي بتتألم ، مسكت البنسه بصوابعها ودخلتها في فتحة المفتاح ، فضلت تجيب القفل من جوا بالبنسة يمين وشمال لحد ما إتفتح بعد معاناة
شالت إيديها من الكلبش وهي بتبص حواليها عشان تلاقي اي مخرج ، كان في شباك صغير ف بصت على جسمها لقت نفسها جسمها نوعاً ما كويس ممكن يعدي
ريناد وهي بتمد إيديها ناحيتها : فكيني والنبي
سمعت هي صوت خطوات برا ف طنشت ريناد وفتحت الشباك وحاولت تخرج جسمها منه
الباب بيتفتح كانت هي وقعت على الأرض من برا ورجلها إتلوت
مكانش في أي وقت تتألم ف بصت على فتحة الشباك لقت بدر بيبصلها وهو بيقول بصوت عالي : البت خرجت من الشبك في الجنينة الخلفية ، إلحقها بسسرعة !!
نزل بدر وقامت هي بالعافية عماله تجري برجل واحدة ، خرج بدر وراها عاوز يمسكها ، ووراه كنان
كنان جه يضرب نار جت طلقة في دراع بدر
بدر بألم وغضب وهو بيبصله : إنت بتضربني أنا بالنار ؟؟ إنت حمار يالا ؟؟
كنان فضل يبص على بدر اللي بينزف والبت اللي بتجري فضل يضرب نار في الهوا والبت بتجري بتحاول تتفادى الرصاص
خرج بدر السلاح من جمبه وهو بيجري وراها وبيقول : أقفييي هنا
تحاملت على رجليها التانيه وراحت مستخبية ورا شجرة برا في الشارع ، بدر واقف ماسك ليها السلاح وعماله يتلفت يمين وشمال عشان تطلع
هي في سرها : يارب ساعدني أروح بيتي ، يارب
بدر بغضب رمى المسدس وفضل يصرخ بغضب ، قميصه أتبهدل دم وهو ولا حاسس
حطت إيديها على بوقها برعب وهي بتتفرج على البني أدم دا ، عروق وشه بانت من الغضب وحست إنه معندوش رحمه ولا إحساس دا واخد طلقة وواقف على رجله عادي !
* في بيتها بعد ما حصل كل دا
كانت واقفه سرحانه بعيون مدمعة وهي سايبة المياه مفتوحة على فستانها بتنضفه من الدم
عمتها خبطت عليها وهي بتقول : بتعملي إيه كل دا في الحمام يا بت ؟؟ ما تخرجي تقوليلي سيبتي بيت عمك ليه والدم دا منين
نبضات قلبها زادت من الرعب ف بلعت ريقها وقالت : إتعورت في فخدي ، ف ف الفستان أتبهدل ، ممكن تسيبيني ؟
عمتها : طب إطلعي من الحمام عشان أجيب الغسيل إنتي بقالك ساعة
عصرت فستانها كويس ومسحت دموعها ولبست روب عمتها وخرجت
عمتها : أهلاً ياختي ، سيبتي بيت عمك ليه يابت ؟
هي ببرود : هو طردني ، اخوكي مش مستحمل حد يزعل مراته أعملكم ايه يعني ؟
ربعت عمتها إيديها وقالت : ف إنتي ناوية تقعدي عندي لحد إمتى ؟
هي ببرود وهي حاضنه فستانها المبلول : لحد ما تلاقي حد غيرك ترميني عنده ، ما أنا أصلي موبوءة
دخلت الاوضة وقفلت الباب الخشب وهي سامعة عمتها بتبرطم : أنا كان مالي ومال الهم دا يخربيت الخلفة على اللي عاوزين يخلفوها
حست هي بنغزة في قلبها بسبب كلام عمتها وبسبب ندالتها مع البنت ، كان واجبها تخرجها مش تسيبها تتقتل ، زمان التانيين قالبين عليها الدنيا
* عند بيت المافيا
دخل بدر وهو في إيده إزازة خمرة وبينزف ، عمال يشرب
دخل وقفل الباب وراه
قربله كنان وهو بيحاول يشوف الطرح ف قال بدر بغضب : إبعد
قربله كنان تاني ف زقه بدر لورا وقال : قولتلك إبعد ، إمشي من وشي ، إمشي
نزل كنان راسه ومشي قعد بعيد ، دخل بدر المطبخ وخلع قميصه كله وفضل عاري الصدر ، جاب علبة حديد كدا حاططها على الرخامه وفتحها كان في زي مشرط ، عشان يتحمل الألم شرب شوية خمرة كمان
فتح الجرح بعمقه بالمشرط وهو بيتألم بصوت عالي وريناد محبوسة جوا ومرعوبة من صوته
مسك رباط ضاغط وحطه بين سنانه عشان يتحمل الألم معرفش
راح مايل على الحوض ومرجع
دخل كنان وقال : بقولك يا زعيم انت لازملك مستشفى
بدر بغضب : إطلع برا يا غبي ، انا لو حاطط دبدوب يراقبهم البت مش هتهرب كدا
حتة بت محصلتش جزمتي تلبسنا قرون وتجري ، بعد ما عرفت عننا
كنان حط إيده في جيبه وقال : هنجيبها متقلقش ، المهم خليني أنا على الأقل أخرجلك الطلقة
ودا بدر وشه الناحية التانية واداه المشرط وقال : إخلص !!
يتبعع ..
تفتكروا هيلاقي البنت اللي هربت ؟ ومصير مراته ايه ؟
| 3 |
يعني المفروض أعملك إيه عشان تصدقيني! قولتلك الدم دا أتعورت عادي
عمتها بتصميم : وريني التعويرة ، أنا مش مصدقاكي أكيد عمك طردك عشان بعتي شرفك
رفعت سيا إيديها في الهوا كانت هتضرب عمتها بالقلم ، نزلت إيديها بضعف وقالت بنبرة مكسورة : ربنا هيحاسبكم عشان المفروض أنا أمانة أخوكي سبهالك ف بتقولي كلام قذر عني
عمتها بغضب : عوزاني أعملك إيه ؟ دخلالي ب دم وبتعيطي وبتقولي عمك طردك ، إطلعي من بيتي وروحي لعشيقك يا فاجرة
دخلت سيا لبست بنطلون جينز وتيشيرت وخدت شنطتها وقبل ما تخرج من البيت قالت لعمتها : بكرة هتندمي ، على كل اللي عملتيه
ورزعت الباب وراها
مشيت في الشارع بكسرة وهي بتعيط ، وماسكة الشنطة ومش عارفة تروح فين محدش راضي يستحملها ومش لاقية شغل وحالتها أصعب شيء البني أدم ممكن يتخيله
♤ في بيت المافيا
ربط بدر دراعه وهو بيمشي وقميصه كله دم طالع لفوق
كنان وهو بيغسل إيده من الدم قال : أنا طلعتلك الرصاصة وخيطت الجرح كروكي كدا ، بس لازم تروح المستشفى يا زعيم
بدر وهو طالع السلم : جهز العربية عشان نتحرك نلاقي البت يا حنين ، وبدل نصايح أهلك اللي قارفني بيها متبقاش غبي وتشيل عينك عنهم
كنان : حصل يا ريس
طلع بدر ووصل الاوضة ، فتح الباب وقفله برجله وهو بيتنفس بسرعة وبيبص للأوضة
قال لنفسه : كنت بنيم واحدة وسخه جمبي على السرير ، صنف وسخ ميستاهلش
قلع قميصة ورماه على الأرض وهو بيبص في دولابه عشان يطلع قميص نضيف ، دراعه بيوجعه بس بيقاوح ، أو إتعود على وجع القلب ف وجع جسمه بقى مش فارق
غسل جسمه كويس وظبط نفسه ولبس القميص عشان ميبقعش دم ، لبس الجزمة السيفتي بتاعته ونزل السلم وهو بيلبس الساعة
كنان بتصفير : بررنس ، عليا الطلاق برنس في كل أوقاتك
بدر بجدية : العربية جهزت ؟ أنا مش عاوز غلطة غبية زي دي تضيعنا
كنان : جاهزة يا ريس
خرج بدر ووراه كنان وركبوا العربية
♤ في الشارع عند سيا
بتصوت بصوت عالي وبتقول : ياربي مفيش حد يقتلني ويريحني ، خليني أروح لأبويا وأمي وأرتاح !
بعياط بتكمل : تاجر أعضاء أو قتال قتلة يقتلني ويخلصني ، عشان أنا تعبت والله يارب تعبت ومش وش بهدلة
ياااااااارب
* بصريخ *
كان بيلف بالعربية ف ركن وهو بيقول لكنان : البت أهي ! أنزل هاتها
كنان وهو بياكل تفاحة : يا سلام ! بسهوله وكدا أنزل أجيبها ؟ وإفرض البت صوتت وفضحتني ؟
خرج بدر السلاح من جيبه وصوبه في وش كنان اللي برق ف قال بدر : أنا مبحبش الناس الجبانة ، فاهم ؟ هنزل أنا أجيبها وإياك تتحرك من هنا
كنان بصدمة : يا برنس إفرض حد شافك وإتكلم
بدر وهو بيحط السلاح في جمبه : يبقى خلي أمه تترحم عليه
نزل بدر من العربية ورزع الباب ومشي بكل ثقة ناحية سيا اللي عمالة تدعي على نفسها بصوت عالي وبتعيط : يارب خدني بقى آبعتلي حد إبن حرام يخلصني من العذاب دا
وقف قدامها جزمة سودا سيفتي ف رفعت راسها وعيونها مدمعة لقت بدر واقف قدامها بيقول : شبيك لبيك ، شوفتي سهلة إزاي ؟
فتحت بوقها من الصدمه ف شدها من إيديها ورفعها على كتف واحد
سيا بصويت : إلحقوووني هيخطفنيي دا كان وقت حزن ، ألحقوووني
بدر ماشي بكل ثقة حتى مبيجريش
كنان بيلطم في العربية وبيقول : يا نهار إسود !
فتح بدر باب العربية اللي ورا ورماها جوا لدرجة إتوجعت وقفل الباب وراها ، ركب في كرسيه وهو بينفض قميصه منها بتناكه ف بصله كنان وهو بيقول : زعيييم ، عليا الطلاق زعيييم
بدر بجدية وهو بيقفل ماسوجر العربية : أحسن حاجة أننا لقيناها بسرعة ، أنا مبحبش تضييع الوقت
سيا ورا بتحاول تفتح الباب أو تكسر الأزاز منفعش ، ساق بدر العربية بسرعة وهي عماله تخبط في دراعه وتقول : يا مريض يابن المجنونة !! هتستفاد إيه من اللي بتعمله وعاوز مني إيه مش كفاية حياتي السودا
بدر ببرود : ما أنا هخلصك من حياتك اللي تعباكي ، زعلانة ليه بقى !
سيا بغضب : مش عوزاها تخلص على إيدك
كنان بعصبية : ما بس يا بت بقى ! بس متخلنيش أقولك كلمة تزعلك
قعدت هي وفضلت تعيط ، بدر مكمل سواقة عادي ولا همه وكنان حلص التفاحة ورماها
وصلوا بيت المافيا وهو بيجرها من إيديها وهي بتحاول تفلت منه ، رماها على الأرض جوا جنب ريناد اللي كانت تقريباً بتطلع في الروح
قلع بدر حزامه وقال : في الأفلام الأجنبية لما البت بتبقى بجحة وبتعصي كلام أبوها ، البابا بيعاقبها وعقابه بيبقى وحش
كنان ساند على الحيطة بيتفرج
بدر بكل قوته نزل بالحزام على جسم سيا
اللي صرخت وهي بتبصله بصدمة ، كمل عليها وهو بيقول بغضب وغل : بتهربي عشان تجيبيلي مصيبة ! بتهربييي مني لييييه ، خونتييييييه لييييه
كانت بتاخد الضرب وهي مش فاهمة بيقول إيه ، خانت مين ولا هو يقصد حد تاني ؟
بدر لبس حزامه وهو بينهج ووشه كله عرق ، وسيا على الأرض جسمها مزرق ومحمر من الحزام وبتتوجع
فضل يبص لإيده اللي بتترعش ولجسمها اللي بيتوجع ف خبط الحيطة برجله جامد
سيا بوجع وعياط : يخربيت البطن اللي خلفت واحد زيك إبن حرام
بدر وشه إتحول لغضب ، كان حرفياً خرج المسدس من جيبه عشان يقتلها ف مسك كنان إيده وقال وهو بيهديه : هي متعرفش ، هي متقصدش ، روق يا زعيم
خرج بدر من الأوضة بعصبية وهو بيقول لكنان : يتحبسوا الأتنين زي الكلاب ميتحطلهمش نقطة مياه
قفل كنان الباب عليهم ، إتعدلت سيا بصعوبة في قعدتها وهي بتبص لريناد لبت تحتها كومة دم ناشف كبييرة ، وهي وشها باااهت وأصغر وبتاخد نفسها بالعافية
قامت سيا بالعافية وبخضة وقربتلها وقالت : مالك ؟؟؟ سقطوكي ؟
ريناد بصتلها بعيون مدمعة وقالت وهي بتطلع في الروح : حتى لو قتلوني مبقاش يفرق ، صدقيني أنا كنت عايشة عشان إبني وكنت هاخده ونروح بعيد ، بس قتلوه
عيطت سيا وقالت : دا حيوان ومعندوش دم ، ربنا ياخده
ريناد بعياط : أنا عذراه ، هو أمه سببتله عقدة من الستات .. ف .. ف انا جيت أكدتله العقدة دي بغبائي
سيا بإستغراب : عقدة إيه ؟
ريناد بعد صمت : أمه كانت ...
يتبع ...
| 4 |
أمه كانت بتخون أبوه ، بتجيب واحد الشقة وتدخله والراجل في شغله ، وبدر في المدرسة
أبوه كان رجع البيت في يوم بدري على حظها الإسود ، وشافهم
وقتل الراجل ..
شهقت سيا وعيونها وسعت وهي بتقول : وبعدين !
ريناد بتعب : بعدين .. رجع بدر من المدرسة لقى سكينة متغرقة دم وراجل مقتول وأبوه نازل مع الحكومة عشان يتسجن
سيا بصدمة : وأمه !
ريناد بتعب : كانت بتعيط ، بس بدر كان باصصلها متنح مش فاهم .. مفهمش غير لما الناس بقت تقوله يابن الحرام مع انه مش ابن حرام ، بس يقصدوا ان امه مش كويسة ، ف دي حتة حساسة عنده وكمان لما أنا خونته .. غصب عني يعني كرهه الصنف كله ، ف متستغربيش إنه كدا وحتى لو حب واحدة هيفضل شاكك فيها .. صدقيني بسببي أنا وأمه
حطت سيا راسها على رجلها وهي بتقول : طب أنا ذنبي إيه !
كانت بتحاول ريناد تغمض عيونها ف قالت : ذنبك وقوعك في طريقنا ، بدر متورط ف شغل وحش وكبير و ..
أغمى على ريناد ف صوتت سيا وهي بتحاول تفوقها
دخل كنان وهو بيقول : ششششش إيه الدوشة دي ! الزعيم لو سمعكم هيعمل معايا أنا حوار
سيا برجاء : عشان خاطري محتاجين مياه ! دي بتموت نزفت كتير ومفيش في جسمها أكل ولا مياه
سند كنان على الحيطة وهو بيبصلهم ببرود بعدين قال : ما تموت ؟ ما إحنا سايبينها تموت وتتعذب أنتي مال أهلك ؟
سيا بغضب قامت تضرب فيه : أنتوا إيه معندكوش رحمه !! بقولك البت بتموووت !
* بدر في أوضته
بيشرب سيجار وسامع صويتهم وفارد جسمه على السرير ، وبيفتكر أمه
النقطة السودا اللي في حياته ، بيفتكر تفاصيل اليوم المشؤوم بالظبط
* عند ريناد وسيا
كنان ببرود : دي خانته ولوثت شرفه ، دي تستاهل تموت مليون مرة
سيا حست إن جسمها كله أعصابه باظت ، ببصت لريناد بعدين رجعت بصت لكنان وتفت ف وشه
مسكها كنان من دراعها ولواه وقال : إحمدي ربنا آني موجود وبنقذك من إيد الزعيم
سيا بعصبية : أنا أصلاً معنديش حاجة أبكي عليها ، وحظي الإسود وقعني ف طريقكم ف مش هعمل حاجة عاوزين تموتونا موتونا وخلصونا
ريناد بكحة وبعيون مقفلة : عطشاانة
كنان بضيق : إتكتموا وأنا هجيبلها كوباية مياه تطفحها
خرج كنان ف قعدت سيا جمب ريناد وهي بترجع شعرها لورا بأيديها : متخافيش هيجيب المياه وهتشربي وتبقي كويسة
جاب كنان إزازة مياه صغيره وهو بيبص على الباب وبيقول : شربيها بسرعة قبل ما الزعيم ينزل
فتحتلها سيا الأزازة وبدأت تشربها واحدة واحدة
أخدت ريناد نفسها وهي بتنهج وبتستطعم المياه وحست آن الدموية ردت لروحها شوية
كنان أخد الأزازة وقفل عليهم تاني
ريناد بتعب : هو طيب ، كنان أطيب من بدر ، بدر جرحه مغطي على طيبته
سيا بتساؤل : بس إنتي عرفتي الحكايات دي إزاي ؟
ريناد بتوهان : كان بيحكيلي وهو سكران ونايم جمبي
سيا يندت رايها على الحيطة وقالت : أنا معنديش حاجة أبكي عليها ، أنا يتيمة ومطرودة من كل بيت ، كل البيبان إتقفلت في وشي وكنت فاكرة إن هييجي يوم تحصل المعجزة والقدر يبتسم ليا بس محصلش ، جيت هنا إتذليت وإتضربت ومش عارفة مصيري إيه
سمعت سيا صوت شخير ريناد ف بصتلها بطرف عينها وقالت : إنتي نمتي ؟ يلا خليها تكمل
سندت سيا راسها على الأرض وهي بتبص للسقف وبتترعش من البرد والتلج ، غمضت عينيها بهدوء ونامت بتعب وإرهاق
* صباح تاني يوم
نزل بدر السلم وهو لابس بنطلون قماش إسود وقميص أبيض
طلع كنان من المطبخ وهو بيقول : معلش يا زعيم هدومك عاوز أغسلها كمان مرة لإن المسحوق اللي جبناه طلع مبينضفش كويس
بدر بعصبية لكن بصوت واطي : يعني إيه ؟؟ ما أنا قولتلك شوف اللي إنت عاوزه وأنا هدفع وإختار المناسب ليك ، مينفعش نجيب حد يساعدنا عشان شغلنا حساس
حط كنان إيده في جيبه وقال : ومحتاجين حجات للبيت والله يا زعيم ، أتصل بطنط جولفدان طيب وأسألها !
كشر بدر وقال بتساؤل ساخر : جولفيدان ؟ دي تطلع مين
كنان بذكريات : ياااه دي جارة أمي ، كانت بتعمل بسكويت برتقال مفي منه إتن
قاطعه بدر بعصبية وقال : نسيب بقى الهم اللي إحنا فيه ونركز في التفاهات دي ؟ أنا شايل الهم كله على دماغي وأنت منفض راسك أخلص واتصرف
بعد تفكير بص بدر لكنان بخبث وهو بيحط إيد نظارته الشمسية في بوقه
كنان براحة : النظرة دي أنا عارفها كويس ، أؤمرني يا برنس
بدر بجدية : خش هات البت دي من جوا خليها تغسل وشها وتلبس أي نيلة من هدومك مؤقتاً بدل هدومها المعفنة ، هنروح نجيب حاجتنا من كايرو فيستيفال
كنان بسعادة : عنيا يا ريس
فتح كنان الباب وقوم سيا من دراعها وهي بترفص وبتقول : هو في إيه على الصبح هو قايم من النوم عاوز يفطرنا ضرب ولا أيه
كنان بعصبية : إخلصي إمشي متجبلناش الكلام
خرجت سيا وهي مربعه إيديها ورافعة حاجبها
بدر واقف بيبصلها من فوقها لتحتها ف ضمت الجاكيت على جسمها ف ضحك بدر
هو : فكراني ببص على جسمك ومهتم أوي ؟ كلكم في الضلمة شبه بعض وفي النور أوساخ
أتعصبت سيا وقالتله : إنت سافل إبن صرمة
قربلها بدر بهدوء ورزعها كف وقال : هتعلميني أتكلم أزاي ؟ إنتي تعملي اللي بقولك عليه وإنتي ساكته ، تنطيط النسوان دا مبحبوش
سيا بحقد : وعاوز مني إيه مطلعني من الأوضة ليه !
بدر بجدية وبأمر : خمس دقايق وتكوني لابسه لبس كنان عشان هنتحرك
هي ببوز : هنغور فين ؟ هنروح نأمن على تجارة الأعضاء ولا الأسلحة
بدر بأمر : إتأكد إن البت دي هتلبس وهاتها من شعرها على العربية ، مش عاوز أستنى كتير
كنان حط الهدوم على كتف سيا وبدر راح العربية
سيا قالت : حسبي الله ونعم الوكيل ، يارب نعمل حادثة كلنا بالعربية ما نلحق نوصل
كنان بصوت عالي : سمعتك يابت
دخلت الأوضة اللي تحت وهي ماسكة الهدوم وقاعدة تلف في الأوضة
سيا : يارب الموتور يولع بيه ويتقطع دراعه اللي ضربني دا
مشوار آيه وزفت إيه على الصبح ريقي ناشف مفطرتش ونازله بعماصي
بني أدم مقرف ومغرور وقتال قتلة إبن ستين في سبعين
* بدر في العربية بعد ما سخنها ولبس نظارة الشمس بيقول لكنان : إنت سبت البت جوا وجاي مرزوع جمبي ؟ أنت مش هتتعلم أبداً
كنان : هنزل أجيبها يا باشا حالاَ
بدر بعد ما نزل : خليك أنا هدخل أجيبها من شعرها
دخل بدر بعصبية وراح ناحية الاوضة اللي هي بتغير فيها حسبها خلصت لبس
فتح الباب بعصبية لقى سيا بتغير وإتفزعت لما شافته وإستخبت ورا ااحيطة وهي بتقول : إيه القررف بتاعك دا آطلع !!!
وقف بدر متنح بعدين كشر وقفل الباب وهو بياخد نفسه بعصبية
يتبع ...
|5|
إزاي الحيوان دا يفتح عليا الباب وأنا بغير هدومي !
خلصت سيا لبس وخرجت من الأوضة لبرا ، لقت بدر ساند على عربيته وبيدخن سيجار وكينان مخرج إيده من شباك العربية بيقول : ما يلا يا بت عشان إتأخرنا .. مستنيين السفيرة عزيزة تخلص لبس ؟
نفخت وهي ماشية وراحت فاتحة الباب وركبت وهي باصة للشباك بسكوت
ركب بدر ببرود ودور العربية وقال : معاكي بطاقة ؟
بصتله من فوق لتحت وقالت : دا على أساس إني جاية عندكم رحلة ؟ انا مش فاكرة فين بطاقتي
بدر بجدية : أوقات إدارة المول بيشتبهوا في ناس ف بيطلبوا بطايق بس أنا هتصرف المهم مسمعش صوتك وإحنا هناك من غير سبب
دور العربية لحد ما وصلوا للمول ، فتح التابلوه وخرج ثلاثة ماسك ورمى واحد ورا وهو بيقول : عشان ممنوع تدخلي من غير الماسك ، إلبسيه
سيا بعناد : مش هلبس حاجة
خرج بدر المسدس من جيبه ف بص كسنان حواليه وهو بيقول : إيه يا زعيم !!! مش كدا الناس هتشوف السلاح
بدر بغضب : أنا مبحبش أكرر كلمتي مرتين ، أول مرة الأمر بيخرج من بوقي تاني مرة بيخرج من سلاحي ، انا غير العالم الزبالة اللي إتعاملتي معاهم بقلة أدبك وإستحملوكي
إترعبت هي ومسكت الماسك ولبسته ف نزلوا
مشي بدر وكينان جمبه وسيا وراهم وهي بتبص حواليها بتحاول تستنجد بحد ، بدر حس با ف قال من غير ما يبصلها : حاولي بس تشاوري بعنيكي لحد أو تلمحي بحاجة هتلاقي رصاصة في نص راسك
بصت على الارض وهي بتغمض عنيها جامد لحد ما وصلوا لبوابة المول
السيكيورتي : أستاذنكم بس جهاز قياس الحرارة
حطوا إيديهم قدامه وطلعت حرارتهم طبيعية ف دخلوا
كينان بسعادة : ياااه يا زعيم إحساس إن معانا بنت وهتختار لينا حجات البيت دا زي ما تكون خارج مع أم ..
مكملش جملته بدر بصله نظره قاتلة ، بعدين بص قدامه من غير ما يرد
كينان بإعتذار : أنا أسف يا زعيم ، دي خرجت مني تلقائي
وصلوا لمحل شيك بيتباع فيه مستلزمات البيت من أول الصابون لحد ترابيزات السفرة
دخل بدر وقال لكينان : خد البت دي خليها تختار مسحوق الغسيل الاول بعد كدا شوف بنفسك معاها لو في حاجة ناقصة في البيت تجيبوها ، وميهمكوش الفلوس
سيا بصدمة : نعم ! إنتوا بجد عاملين الحوار دا كله على مسحوق الغسيل ؟
بدر برفعة حاجب : في إعتراض أو حاجة ؟
سيا بغضب : إيه التفاهة دي !
حرك بدر رقبته يمين وشمال ف طلعت صوت ف رجعت سيا لورا بخوف ، قربلها بدر وبصلها وهو بيقول : أنا مفيش حاجة ليها علاقة بيا تافهه ، مفيش حاجة خالص ف حاسبي على كلامك عشان خُلقي ضيق
سيا بغضب : مسحوق غسيل للأبيض ولا للإسود
بدر ببرود : هاتي الإتنين ، هاتي كل حاجة تسمعي إنها كويسة وميهمكيش الفلوس ، لو جبتي حجات سيئة عشان تنتقمي منس هعاقبك وانا عقابي وحش
مشيت سيا مع كينان وسط الرفوف ف قالت : إريال دا ريحته حلوة باللافندر ، إنت عاوز إيه تاني غير المسحوق ؟
كينان بتضييق عين وتفكير : مممم منظف كويس للأرضية
سيا بخبث : هو إنت بتغسل وبتطبخ وبتنضف عشانه ؟ رغم إن معاملته مش حلوة يعني
كينان بضحكة بعد ما فهمها : لا بقولك إيه السكة دي مبتجيش معايا ، دا الزعامة ويعمل اللي هو عاوزه انا بحبه بعيوبه قبل مميزاته ، راجل برنس في نفسه كدا
سيا بغيظ : طيب الارضية بيستخدمولها كلور ومنظفات تانيه ، أما انا شخصياً بستخدم الفنيك زي ما ستي وستك كانوا بيعملوا زمان عشان يخرجوا الدبان ويمسحوا الشقة
كينان بذكريات : يااااه فكرتيني ببيت تيته والبلي والقلبظ و .. إيه دا إنتي هتصاحبيني يا بت إنتي ؟ هاتي الحاجة وإنتي ساكتة
سيا قالتله : عاوز حاجة تاني غير المسحوق والزفت ؟
كينان : ممم لا كفاية علينا المسحوق والزفت ، يلا يابت قدامي
إتحركوا ناحية بدر اللي واقف بيبص على السمارت تي في في المحل وعارض فيلم اكشن اجنبي ، وقفت سيا قدام الكاشير وهي بتحط الحجات عشان يحاسبوا عليها ، الكاشير كانت بنت وقاعدة بتبص لبدر بأعجاب ومش مركزة مع الزباين
سيا بصتلها بقرف عشان مش وقته وقالت : والله ؟ إنتي يا أنسة !
بصتلها البنت وهي ماسكة الحجات وبتحسب السعر وهي بتقول : سوري يافندم
كنان ضحك وقال : زعييييم
بدر بجدية : خلصتوا ؟
كينان : حصل يا باشا
الكاشير حاسبت وقالت : ٥٦٠ جنيه
سيا بفتحة بوق : يا حراميين ! شوية صابون ومنظفات خمسميت عفريت يركبوكم ! دا انا بجيبه من ماركت الارزاق بالله بخمسين جنيه ويكفي ويفيض
بصلها بدر وقال : تؤ ! * بتبريقة *
الكاشيرة : ودا رقمي الشخصي يا فندم لو حبيت تتواصل معايا عشان اعرفك إذا فيه عروض او لا
* بتبص لبدر بإعجاب *
سيا أتخنقت منها مش عشان حاجة غير إنها وقحة وبس ، ف خدت الكارت من إيديها وقطعته نصين وقالتلها : حتى لو في عروض مش هنجيلكم تاني عشان أسعاركم غالية
كينان شال الأكياس وغمر للكاشيرة قبل ما يخرجوا
بدر عجبته حركة سيا وإحترم فيها إنها فيها نقطة الجد زيه
لما خرجوا من المحل عاتبها وقال : إيه اللي عملتيه جوا دا ؟ هو أنا مش قولت هاتوا ومش مهم الفلوس !
سيا وقفت قدامه وقالت : والله عرفنا إن حضرتك مقتدر ومعاك فلوس لو صرفتها مش هتخلص بس معلش يعني الناس دول إستغلاليين ، كل اللي عاملينه ديكور غالي عشان سبانوا ولاد ناس لكن الاسعار مبتختلفش ، اكيد المسحوق اللي إشتريناه مش سحري عشان يبقى بالسعر دا ويبقى لا عرق بعد اليوم ! إنت متهمنيش في حاجة بس انا مبحبش الإستغلال ودول إستغلاليين
قالت الكلام دا ووشها إحمر من العصبية وبدر متنح ومركز فيها بس لإنه حس إنها مختلفة شوية * مش حب عشان عرفاكم *
كملت هي بعصبية وقالت : وحاطين واحدة عماله تشقط الزباين ومش محترمه نفسها ولا محترمة حد ، اظن انا عملت اللي عليا ممكن نروح عشان عاوزة اتطمن على ريناد ؟
كان بدر مبتسم وسرحان سمع إسم ريناد الشيطان عفرته ، ف رد قال : ملكيش دعوة بالوسخة دي ، تقعدي زي الجزمة جوا زيك زيها
سيا بقرف : ما تختار ألفاظك هو إيه القرف دا !
بدر بتحذير : أنا بشتغل مع المافيا يعني مش موظف حكومي ف هي دي ألفاظي
كينان بتعب : أنا بصراحة يا زعيم جعان أوي
سيا بغضب : انا مش جعانة وعاوزة أروح * بطنها طلعت صوت من الجوع *
بدر بضحكة خفيفة : هنروح الفود كورت ناكل حاجة قبل ما نمشي
قعدوا في مطعم ف سيا قالت : مش هاكل من غير ريناد
بدر بصلها شوية بعدين قال ببرود : هي بنت خالتك وإحنا معندناش خبر أو حاجة ؟
سيا : لا بس حرام نقعد ناكل ونملا بطوننا ونسيبها جعانة
بدر بجدية وغضب : لو ذكرتي إسمها تاني قدامي هعاقبك وأنا عقابي وحش ، وعشان تكوني عارفة لو مأكلتيش معانا هتفضلي جعانة طول اليوم زيها !
سيا بإضطرار : ماشي هاكل
طلبوا الاكل وطلبت سيا إتنين ساندوتش وقالت : اظن حقي بعد لفي معاكم ونقيتلكم حجات كويسة
بدر بتضييق عين : دا كدا كدا هتعملي دا ، بس انا مش بخيل ف جبتلك مش أكتر
بدأت تاكل وهي بتبص عليهم بياكلوا ، سحبت الساندوتش التاني وحطت في جيب السويت شيرت بتاعها ، لاحظ كينان الحركة وبدر كمان لاحظ بس متكلموش ، بتصلهم لقت كل واحد باصص في إتجاه ف كملت الساندوتش بتاعها وهي بتقول في عقلها * الساندوتش اللي عينته دا لريناد مش هاكل وهي جعانة دي مهما إن كان روح *
بصت بالصدفة على طبق بدر لقته طالب سلطة وعصير لمون نعناع ، بصت لكينان لقته طالب زيها وبياكل ، بدر مبياكلش ومرة واحدة قام وقال : هحاسب وجاي مش هستنى الشيك عشان مستعجلين ، خلصوا عشان نمشي
قام بدر ف ميلت سيا على كينان وهي بتقول : ممكن سؤال ؟
كينان وهو بياكل : لا
بصت قدامها بزعل ف قال كينان : إخلصي !
سيا : هو ليه بياكل سلطة ويشرب ليمون ، هو أكله ضعيف ؟
كينان : ملكيش فيه
سيا : ما تقول هو سر حربي ولا إيه ؟
كينان بحزن : اعداء لينا ك مافيا حاولوا يسمموه وأنقذناه في الوقت المناسب من ساعتها ومعدته حساسة وأكله ضعيف
سيا بإستغراب : يسمموه ! ليه ؟
كينان وهو بيفتكر : عشان كان ...
يتبع ..
تكملة الرواية من هناااااااااااا
 روايةخارج قانون الحب الفصل 1-2-3-4-5بقلم روزان مصطفى كامله…){kind=link}
تعليقات
إرسال تعليق
فضلا اترك تعليق من هنا