رواية قصر الجان البارت العاشر 10بقلم هناء عادل قصر الجان
رواية قصر الجان البارت العاشر 10بقلم هناء عادل قصر الجان
قصر الجان
الفصل العاشر
- انت هتحضر معانا اجتماع المملكة العليا.
قالها الاجهر الاكبر بصوت حزين لكن فيه شموخ، كانت واقفة الجشيرية جنب الاجهر الاكبر وعلى وشها حزن يدل على احساسها بذنب فى انها ممكن تكون جزء من اسباب اختفاء هُجيرة، جنبهم كان فيه اطياف تانية مش فاكر بالظبط اتنين او تلاتة لكن من الواضح انهم اعضاء هيئة المملكة، المجلس كان فيه ترتيب ونظام بيدلوا على انهم مستنيين شخص مهم جدا، بصراحة كان الوضع يدل على حزن عام وقد ايه هُجيرة غيابها فارق مع المملكة بأكملها، فجأة حسيت بأنتفاضة فى عيون كل الاطياف المصطفة على جانبين المكان الواسع ده، حتى اعضاء هيئة المملكة عيونهم راحت للضوء الجاي من الفراغ اللى كان ورايا، كان خارج ضوء من بين الاشجار الطويلة دي وابتدا يزيد كل ما يقرب، ومع اعتدال واستعداد كل الحضور لأستقبال صاحب الضوء اللي بيقرب اكتر واكتر قدرت افهم ان الشخص ده هو الملك الاكبر للمملكة، عرفت من موكبه الملكي اللى حدة الاضاءات فيه قدرت تظهر مدى روعته وقد ايه هو مبهر، ابتديت الاصوات تزيد بالتدريج دليل على ترحيب الجميع بوصوله، الاصوات ابتديت تزيد لدرجة انها وصلت للصراخ تقريبا، وضح الموكب وظهرت العربية الخاصة بالملك وهي بيجرها اربعة من الكائنات اللى اتعودت على انهم خاصين بحركة العربيات فى المملكة، لكن الكائنات دي كان كل واحد فيهم قاعد فوقه طيف من الاطياف لكن فيه لمعة ظاهرة فيه كأن فيه قطع من الماس فوق اجاسمهم اللى مجرد اطياف، وبين الاربع كائنات ومعاهم اربع اطياف بينهم فى المنتصف اتنين من اطياف ضخمة وعملاقة رجليهم بعيد عن الارض لكن كانوا تقريبا مساهمين فى ان العربية الخاصة بالملك اعلى من مستوى العربيات والاطياف اللى موجودة فى الساحة، ومع وقوف العربية المرصعة بقطع ذهبية ضوئها يخترق العين ونقوش كلها عبارة عن حروف وكتابة شبه الكوفية، كل الحضور انحنوا تقديرا لظهور الملك اللى ميختلفش كتير عن اللى جه فى خيالي، هيبة وشموخ ووقار اكبر من الطبيعي، حتى ملامح الحكمة والذكاء، انا شايف قدامي كيان مملكة متمثل فى طيف...شخص بلغة عالم البشر، وطبعا وجوده اللى رحب بيه كل الموجودين وانا واحد منهم حسينا بيه بمجرد ما شوفناه بيبص علينا من شباك العربية الملكية دي، ومجرد ما وقفت العربية فى مكن محدد كان قبل المكان اللى انا واقف فيه بخطوات دخل الملك من الشباك واتفتح باب العربية وشوفت اللى مكنتش متخيل اشوفه...الملك اللى قدر يخطف انتباهي ده هو هو نفس اللى ظهر قدامي بقامته وهيبته....طفل...اه طفل انا مش بكدب، طول طفل لا يتخطى ال11 سنة تقريبا، رغم انه كان ظاهر من الشباك بهيبة وشموخ مالهمش وصف، الا انه واقف قصادنا بطول طفل وملامح طفل، للحظات تخيلت ان ده ابن الملك وهو اللى ظهر قدامنا قبل ابوه، لكن نزوله من العربية وخطواته فى اتجاهنا كانت بتأكدلي انه مجرد طفل، ومش قادر استوعب ازاي مملكة فيها شخصيات زى الاجشيرية والاجهر وهُجيرة الملك بتاعها طفل زي ده؟ لكن هيبته كانت طاغية على الجميع اللى واقفين كلهم فى مستوى اقل من المستوى اللى هى بيتحرك فيه، طبيعي انهم مش بيمشوا على الارض لكن ارتفاع مستواه عن الارض كان اعلى من الجميع، ملامحه الطفولية وقامته اللى كانت لوهلة تدل على انه قزم لكن اكتشفت ان ده طوله الطبيعي غريبة بالنسبالي، لكن مع نظرتي الاولى المباشرة بيني وبينه حسيت بأحساس الرهبة والهيبة من مجرد نظرته ليا، مش عارف سبب مقنع يخلي طفل زي ده ملك لمملكة زي دي؟ ازاي ده هيقدر يرجع هُجيرة؟ ازاي هيكون ده اللى له قرار فى انهاء هجوم مملكة الجان الاسود على مملكة الجهران؟ بعد لحظات وقف الملك فى مكانه المُخصص وابتدوا يتعاملوا مع بعض وتدور بينهم لغة حوار بنفس طريقة التخاطر اللى اتعودت عليها بينهم، كان واضح ان فيه تبادل اراء وده ظهر من نظراتهم لبعض وان كل طيف بتتوارد افكاره كانت كل العيون بتتوجهله، ومجرد ما ينتهى الحوار بينهم بتتنقل الانظار لطيف تاني وكأن كل واحد فيهم بيعرض افكاره، طبعا ما بين وقت للتاني كنت بشوف نظراتهم متوجهة ليا، حاسس ان وجودي فى المملكة وراه حاجة لكن مش قادر افهم ايه هي! بعد ما انتهى الحوار بينهم ابتدا الاجهر الاكبر يتواصل معايا وعمل نفس اللى كانت بتعمله معايا هُجيرة فى انه يترجملي اللى بيحصل حواليا، فسر ليا الاجهر الاكبر فى الوقت اللى كانوا اعضاء المملكة بيتشاوروا مع بعض فى الامور الحاصلة، لقيته اتكلم بحزن وقال:
- طبعا انت عارف ان احنا بنتعرض دلوقتي لهجوم من مملكة الجان الاسود، عرفنا ان هدفهم هو خطف هُجيرة، وعرفنا ايه السر فى التوقيت ده بالذات.
كان بيقول كده بحزن ومشاعر ابوة واضحة لكن هيبته وشموخه برضو كان لهم دور وكمّل كلامه وقال:
- هُجيرة الوحيدة اللى عندها معلومات قوية محدش يعرفها غيرها فى المملكة عن عالم الانس، وده كان بالنسبالهم من الحاجات المهمة جدا للدرجة اللى تسمح لهم بأنهم يعتدوا على حدود مملكتنا علشان يوصلوا لهُجيرة.
حسيت برعشة فى جسمي لما عرفت ان الاسرار والمعلومات اللى تعرفها عن عالم البشر واللى انا واحد منهم هي سبب فى اللى بيحصل فى مملكة كانت من اجوائه السلام والهدوء، لكن اتكلم الاجهر وهو بيقول:
- فى عدة اقتراحات اتكلمنا فيها لكن كلها حلول تقريبا مينفعش ننفذها، اهمهم هو اننا نبعت قوة متخفية من قواتنا لكن ده ممكن يسبب الاذى لها ومنقدرش نوصل للي احنا عايزينه، وفكرنا اننا نهجم هجوم حربي لكن برضو ده ممكن يضر بجنود واهالي المملكة، وعلشان كده احنا اتخذنا قرار وده الارجح انت هتكون طرف فيه، وده هتعرفه لما تتكلم مع الملك سلهاب اللى هتقابلوا دلوقتي.
فى اللحظة دي ظهر قدامى 3 اطياف بشكل مفاجئ وبنظرتهم المباشرة ليا اتكلم الاجهر الاكبر وقال بشكل رسمي ووقار:
- اتفضل، هتقابل الملك سلهاب.
مش عارف ليه حسيت برهبة من مقابلته؟ مع اني شوفت وشوفت ملامح الطفولة على وشه وهيئة الطفولة على جسمه لكن فى نفس الوقت برضو انا افتكرت الرهبة والرجفة اللى حسيت بيها وقت ما عينه جت فى عيني بشكل مباشر، اتوترت مجرد التفكير فى اني هقابل الملك الاكبر لمملكة الجان، اتحركت مع حركة الاطياف اللى كانت محددة طريقي فى خط سير معين، وفى نهاية الطريق ده واقف الملك سلهاب ومحاط بعدد من الاطياف وشكلهم بيقول انهم الحرس الملكي الخاص بيه، كان واقف سرحان ويبدوا عليه التفكير، وقفت الاطياف وبالتالي وقفت انا كمان قصاد الملك سلهاب بالظبط، اتحرك حواليا بشكل دائري خلاني حسيت بالرعب وجسمي بيرتجف، فجأة وقف قصادي ولمس ايدي بأيديه الطفولية دي، وعن طريق الحركة دي اتنقلت ليا بصورة كاملة الفكرة اللى عرضها الملك واعوانه خلال المجلس الاعلى عن طريق التخاطر كالمعتاد في المملكة، كنت حاسس ان سمعت نفس الكلام اللى وصلني منه بالتخاطر قبل كده، لكن هو استمر فى نقل الصورة كاملة ليا بصورة وقورة وملكية مُبهرة، والحقيقة الخطة اللى قدر يوصلهالي بأسلوبه وهيبته وشموخه كانت خطة رهيبة متطلعش غير من ملك للجان فعلا مش مجرد ....اي حاجة تانية غير عفريت....كانت خطة شيطانية مدروسة ومُحكمة بشكل رهيب مالهوش تفسير، خطة خارجة من ملك رغم شكله الطفولي الا انه اثبت انه ملك اكبر للمملكة بكل معاني الكلمة، وبما ان فكرة ان جواسيس تدخل بين صفوف مملكة الجان الاسود فكرة مش صائبة ومش هتقضي الغرض المطلوب، كان لازم يكون فيه فكرة تانية اكثر دقة واكثر شيطانية، خطة خارجيا وداخليا تقدر توصلنا للهدف المحدد..خطة...لالالا خدعة هي السبيل الوحيد للوصول.
يتبع
اكتب في بحث جوحل( مدونة قصر الروايات) تظهر القصص كامله
تابعونا علي قناة التليجرام من هنااااااااااا
ليصلكم اشعار بالنشر
الرواية كامله من البدايه هناااااااااااا
تعليقات
إرسال تعليق
فضلا اترك تعليق من هنا