روايةخارج قانون الحب الفصل 11-12-13-14-15بقلم روزان مصطفى كامله (جميع الفصول كامله)
روايةخارج قانون الحب الفصل 11-12-13-14-15بقلم روزان مصطفى كامله (جميع الفصول كامله)
|11|
طب بص والله ما هتتكرر تاني
عض بدر شفته اللي تحت وهو بيقول بعصبية وهي بتستخبى منه : لا والنبي كرريها ، عشان يبقى نهايتك على إيدي
سيا قامت وقفت وأتعصبت وهي بتقول : وأشمعنا أنا لما بدلع بتتعصب مع إن البت اللي تحت بتتمايص وإنت ساكتلها
بدر بعصبية : وأنتي مالك هو إنتي مراتي ؟ أنا جاي هنا أتمم على شغل وإنتي مش راضية تعدي الليلة
هديت هي وبعدين قالت : طب خلينا في المهم ، إحنا دلوقتي في أوضة واحدة ، هننام إزاي ؟
بدر بيلبس حزامه تاني وبيقول : نامي عادي ، أنا مش بتاع الجو اللي في دماغك ولا صنفكم بيشغلني أصلاً
سحب بدر مخدة من على السرير وحطها على الكنبه وفرد ضهره
سيا واقفة في نص الأوضة وقالتله بسعادة : إنت سبتلي السرير ؟
بدر مردش ف كملت هي هزار وهي ماسكه ضهرها : أصل الحمل برضو محتاج مرتبة طرية أفرد ضهري عليها
بدر بتحذير : أنا لسه لابس الحزام ، إنتي حرة
قعدت سيا على السرير وهي بتبص على الكنبة اللي بدر نايم فيها ، بعدين قالت بملل : طب بقولك إيه أكيد الراجل راح إتخمد هو والبت المايعة اللي معاه ، ما تتصل على كنان كدا ييجي قعد معانا بدل ما هو قاعد لوحده
بدر بعصبية : اللهم طولك يا رووووح
سيا بلوية بوز : خلاص هنام أهو
* صباح تاني يوم
بدر قاعد بيشرب القهوة بتاعته وهو بيبص على فونه
سيا بتطبق اللحاف مطرح ما نامت وهي مشغلة روبي وبتبص على بدر
جااني بهدااوة ، علم علاامة
بتميل بنفسها على كرسيه وهي بتطبق وبتقول : بسمة العيون ورسمة الشفايف شايف الحلاوة هوباااا
بدر بملل : القهوة هتدلق ! ما تتهدي
سيا بغنا وهي بتبصله : أصل الأفندي دا في حتة تانية عندي مترستأ جوا قلبي وفي قلبي له علامة
بدر : هوووف
الباب خبط ، شاب بدر القهوة وقام وهو بيقول : اي حاجة تخلصني من زنك
جريت هي على الحمام تلبس وتحط المخدة ، فتح بدر الباب لقى لورا
دخلت السويت من غير إذن وهي بتقول بوقاحة : صحيتكم من النوم ولا حاجة ؟
بدر بيبصلها بصدمه : دا على أساس إني سمحتلك تدخلي ؟
بصت لورا على الكنبة وضحكت بشماتة وهي بتقول : واضح إنك والمدام مش متفقين
خرجت سيا من الحمام وهي لابسة فستانها وحاطة المخدة وبتقول : لا يا حياتي دا بس عشان بدوري حبيبي مش بيحب يجيله النوم جمبي عشان ميضايقنيش وأنا حامل
لورا بتدقيق : قولتيلي
سيا ربعت إيديها وقالت بقلة ذوق : تسمحي تخرجي عشان عاوزين نكمل لبس وإنتي معطلانا ؟
بصت لورا ل بدر بصة عتاب وخرجت ورزعت الباب وراها
بدر بعصبية : أنتي حطاها في دماغك ليه !
سيا بعصبية : والله معرفش واحدة داخلة السويت علينا من غير إذن وفكراه بيت أبوها ، لو سمحت خلينا نروح أنا مش مرتاحة هنا
خرج بدر وسيا وراه وكان شكلها متضايقة ، جه زاهي وهو بيشرب سيجار ومبتسم بيقول : المدام حابة تتفرج على الفندق ؟
بدر وهو بياخد نفسه ومغمض عينه : لا المدام حابة نروح عشان هي تعبانة ، عن إذنك يا زاهي باشا
سحب سيا من إيديها ومشي بيها بعيد عن زاهي
سيا بصوت واطي : إنت أحرجت الراجل إيه اللي إنت عملته دا ؟
بدر ببرود : إخرسي خالص ، الراجل دا وسخ متختلطيش بيه مش ناقص مصايب في شغلي
ظهر قدامهم كينان وهو بيقول : إيه يا زعيم
بدر بخنقة : يا عم بلا زعيم بلا زفت ، حضرلنا العربية خلينا نمشي
سابهم وسيا بتبصله بعصبية ، كينان بأستفهام : هو حصل حاجة وأنا مش معاكم ؟
سيا فهمته غلط راحت متعصبة وقالت : ما تحترم نفسك حاجة إيه دي
كينان : يا غبية مقصدش ، إتخانقتوا يعني !
سيا بغيظ : أنا مبتخانقش بس كنا صاحيين بنلبس والزفتة لورا دي دخلت السويت من غير إستئذان ف طردتها ! هو بقى اتضايق معرفش ليه ، أكيد دي حبيبته القديمة
كينان وهو ماشي جمبها : إطلاقاً ، هي حبت تعمل معاه علاقة زمان وهو رفضها تماماً وأتجوز ريناد ، وعمرها ما شافت ريناد ف عشان كدا هي متضايقة منك وبصراحة إنتي عملتي حركات كيد كتير إمبارح ملهاش لازمة يا سيا إحنا جايين عشان شغل
خرجوا من الفندق لقوا بدر مستنيهم في العربية ، ركبت سيا ورا وركب كينان جمبه
بدر بجدية : هروحكم البيت وامشي عشان عندي مشوار مهم
سيا من غير قصد ومن غير ما تاخد بالها : فين ؟
بصلها بدر في مراية العربية ف سكتت
كينان بتعب : طب يا زعيم رأيي نروح ناكل ف أي حتة عشان صحينا مفطرناش حتى ، ومفيش حد فينا فيه حيل يعمل أكل
بدر وهو بيدور العربية : بس تاكلوا ع السريع ومتخليش البت دي تشيل المخدة لايكون الراجل دا مراقبنا ولا حاجة
سيا بهزار : حد الله ما بيني وما بين الحرام أنا مسقطش أبني أبداً
خبى كينان وشه وضحك وبدر ساق من غير ما يرد عليها
* في المطعم *
دخل بدر وقعد على ترابيزة وقعد كينان وسيا جمبه
فتح المنيو وبص فيه شوية وبعدين قفله بزهق وهو بيقول : مش جاي في دماغي حاجة أنا أكلي كله سلطات
بص ل سيا لقاها ماسكة المنيو وبتقول : أنا عاوزة فرخة
بدر : وطي صوتك ، هتاكليها كلها لوحدك ؟
سيا بصتله وقالت : أنا باكل ليا ولابني على فكرة
بدر وهو بياخد المنيو من إيديها : ما خلاص يا أوفر خلاص يخربيت دا هزار بايخ
سيا بعصبية : أه هاكلها لوحدي أنا جعانة
بدر بتكشيرة : وأنت يا كينان هتاخد إيه ؟
جه الجرسون وحط قدامهم اطباق فيها سائل أصفر
سيا بصوت عالي للجرسون : إحنا مطلبناش شوربة
بدر : شششش
سيا بغيظ : هيحطوا تمنها زيادة على الفاتورة وأحنا مطلبنهاااش
بدر بتبريقة : ششششش وطيي صوتتك ، دي مش شوربة أصلاً فضحتيني
سيا بتركيز في الطبق : أمال دي إيه ؟
بدر بعصبية : دا زفت معقم للشوك والمعالق ، إتهدي بقى كفاية فضايح
كينان حط راسه على الترابيزة وعمال يترجرج ضحك راح بدر قال بعصبية : أقسم بالله ما هاخدكم معايا ف مكان تاني ، ماشي
جه الجرسون تاني وهو واقف بياخد الطلبات
بدر بشرح : عاوز سلطة سيزر ، وألاجريك ، وفرخة كاملة مشوية
الجرسون بيسجل : تمام يافندم تأمروا بحاجة تانية ؟
بدر : شكراً
مشي الراجل وسيا عماله تبص بقرف لترابيزة قدامهم ، بدر لاحظ دا ف قالها : بتبصي لمين بقرف ؟
ميلت سيا عليه وقالت : من ساعة ما قعدنا والواد اللي ع الترابيزة دا عماله يبتسم ويبصلي بصات مش مريحاني رغم إني حاطة مخدة وباين يعني إني حامل
قلع بدر ساعة إيده وقالها : متتحركيش من هنا ، كينان عينك على البت
قرب بدر للترابيزة اللي قاعد عليها الواد وسند عليها بدراعه وقال : مستني حد ؟
الولد : أفندم ؟
بدر بصوت عالي شوية : أطرش مش سامعني ؟ بقول مستني حد !
الولد بعصبية : وإنت مالك !
بدر ماسك نفسه : لو مش مستني حد هنا متطفحش هنا ، وقوم خد بعضك وإمشي عشان مبلعكش صف سنانك
الولد قام وجاي يمسك بدر من قميصه وبيقول : أنت بتكلم مين كدا ؟
بدر رجع راسه لورا وبدون مقدمات خبط الولد في راسه
إتنطر الولد لورا ، راح مسك بدر الكرسي كسر رجله ونزل بالخشبة عليه وهو بيقول : مبحبش حد يبص لحاجة ف إيدي
سيا بفزع : كينان عشان خاطري قوم هاته
قتم كينان وحاول يسحب بدر كذا مرة لحد ما أخيراً بعده عن ترابيزة الولد
سحبه ل برا وقامت سيا خرجت ووقفت معاهم
بدر بعصبية وزعيق في وش سيا : كله بسببك ! من ساعة ما ظهرتي في حياتنا كل حاجة غلط ، من ساعة ما وقعتي في طريقي وأنا كل يوم شايل مسؤولية واحدة وأنا مبحبش كدا ، كان زمانك محبوسة في البيت وكان زماني روحت مشواري
سيا دمعت وهي بتبص للناس اللي شافوها بتتهزق
كينان بتهدئة : يا زعيم ! ملهاش ذنب دا كان واد قليل الأدب ولازم يتربى
سيا إدتهم ضهرها وجاية تمشي ، بدر بزعيق : أقفي هنا !!!
كينان راحلها وقال : حقك عليا انا يا سيا ، عشان خاطري تعالي نركب ونروح واللي عوزاه هعملهولك
سيا بعياط : مش عاوزة اروح معاكم
بص كينان لبدر بعتاب ف بعد بدر وشه وهو متضايق عشان زعقلها بس هي ضغطت أعصابه من ليلة إمبارح
ركب بدر العربية وأقنع كينان سيا تركب بالعافية
رجعوا البيت راحت سيا رامية المخدة على الأرض ودخلت الاوضة وقفلت الباب عليها
كينان بحزن : زعلتها يا زعيم
بدر بعصبية وهو بيقلع القميص : تتفلق ، أنا كنت هقتل واحد في العلن بسببها
طلع بدر اوضته ودخل كينان الاوضة بتاعت سيا ، قفل الباب وقعد جمبها وقال : من إمتى وإنتي حساسة كدا دا كان بيمد إيده عليكي أيام ريناد وكنتي بتشتميه وتستحملي ، إيه العياط دا كله ، إنتي حبيتي الزعيم ولا أيه ؟
سيا بصتله وهي بتعيط ومردتش ، كينان بصلها مستني تقول يع او اي حاجة مفيش
كينان : ؟؟؟
سيا بعياط : من إمبارح متعصب وبيزعقلي وأنا مستحملة عصبيته
كينان أبتسم وقال : بس بدر طيب ، شخصيته قوية محدش يقدر ينكر دا بس هو طيب ، زيك كدا يا سيا
سيا بصتله مردتش ، بس حست بسعادة جواها أنها شبهه في حاجة
* في أوضة بدر
كان بيبص على جرح في كتفه قبل ما يلبس القميص النضيف ويقفل أزراره
ضميره مأنبه عشان زعقلها بس شخصيته وكرامته مش هيسمحوله يعتذر لحد
حط السلاح في جيبه وقرر يخرج يروح مشواره
نزل من الاوضة وهو بيقول : كينااان
سمع صوت سيا من وراه بتقول : في المطبخ بيعمل أكل عشان مأكلناش
لف بدر وبصلها كان عاوز يعتذر بس لسانه مش جايبه ينطقها ف قال بتكشيرة : روحي إغسلي وشك عشان تفوقي
إبتسمت سيا وسندت على الحيطة وهي بتقول : مستكتر تقول أسف ؟
بدر بعصبية : أسف دي لما أكون غلطان بس أنا ..
قربتله سيا وحطت أيديها على شفايفه وقالت : أسفة !
لانت ملامحه من العصبية ، إستوعبت هي الحركة وسحبت إيديها ، فضل متنح ٣ ثواني بعدين خرج من البيت وقفل الباب وراه
كينان طلع من المطبخ وهو بيقول : مين رزع الباب ؟ هو الزعيم مشي !
سيا بتوهان وهي بتبص للباب وحاطة إيديها اللي كانت على شفايفه على قلبها : أيوة !
في سرها ( أنا معرفش بيحصل إيه بس أنا ببقى مبسوطة في وجوده )
* الساعة ١٢ بالليل
بدر رجع من برا ، بص على أوضة سيا و ..
يتبعع ....
|12|
بص على أوضة سيا بعدين طلع على أوضته من غير ما يدخلها
* صباح تاني يوم
صحي كينان ولقى بدر قاعد في المطبخ قدامه عصير ليمون وماسك ورقة بيبص فيها
كينان وهو بيفتح الثلاجة بيطلع إزازة مياه : صباح الخير يا زعيم
بدر بضيق : صباح النور ، جهز نفسك بالليل
كينان بعد ماشرب : على فين ؟
بدر رجع ظهره لورا وقال : في مصلحة هتحصل في الكافيه اللي ع النيل إحنا مش طرف فيها بس عاوز أعرف تفاصيلها ف غالباً هنروح متنكرين
سيا دخلت وهي رابطة شعرها ضفيرة : صباح الخير
كينان : صباح العسل ، هتيجي معانا ؟
بدر بجدية : لا سيا هتفضل هنا
ربعت سيا إيديها وقالت : وأفضل هنا ليه ؟ إنتوا رايحين فين بالظبط
بدر بحزم : ميخصكيش إحنا رايحين عشان شغل مش طالب هزار ومرقعة ولازم يتم لإن أي غلطة فيه هتضيعنا
سيا بعناد : لا بقى يخصني عشان من بعد ما دخلتوني في حواراتكم وأنا بقيت واحدة منكم ولا هو الحجات اللي بتيجي على المزاج تدخلوني فيها ولما متعوزونيش ترموني زي الكلبة
حط بدر إيده على راسه وهو بيقول : بسس بسس !! إيه صدعت من صوتك
سيا بلوية بوز : عشان خاطري خدوني معاكم ، هو إحنا مش بقينا خلاص مافيا سوا
بدر بعصبية : مافيا سوا ! رد إنت يا كينان عشان مفقدش شعوري
كينان برجاء : عشان خاطري يا زعيم مشيها المرة دي
بدر بعصبية : طب يميني على يمينك ما هي جاية
* after 5 hours ..
بدر لابس جلابية بيضا خليجي ولافف راسه بالغُترة والعقال ، كذلك كينان ، وسيا لابسة عباية سودا ع الراس ونقاب
سيا عمالة تضحك على منظر بدر وكينان
بدر بعصبية : أهو إتفضل من أولها متحركناش وفشتها عايمة !
كينان بتكشيرة ل سيا : خلاص عشان الموضوع دا بالذات جد
بدر بقبضة قلب : مش متطمن ، ربنا يستر
وصلوا المكان ودخلوا قعدوا ، بدر عمال يبص حواليه مستني الناس ييجوا عشان الاتفاق ..
سيا فردت نفسها وقالت : انا عطشانة
بدر رفع عينه بمعنى * يااارب !! *
كينان شاور بإيده للجرسون
جه الراجل وقال : حياكم الله
سيا بتناكة بتحاول تتكلم خليجي : أبغى كاكاو وبسويلك صبسكرايب خووي
بدر برقلها وقال : نبي عصاير ، كله فريش
الجرسون : تحت أمرك يافندم
راح يجيب الطلبات راح بدر مميل على الترابيزة وقال : وحيااة ديني لو عملتي حركاتك القرعة دي هنا لا همسكك من عبايتك ارميكي في أي صحراا ، صبسكرايب قال
سيا بلوية بوز : خلاص أتكتمنا
كينان لقى مجموعة ناس داخلة ف ضيق عينه وهو بيقول : هما دول يا زعيم ؟
إتعدل بدر في قعدته وقال : أيوة هما ، رجع كرسيك لورا وإسمع تفاصيل العملية وأنا هسجلها في فوني
قعدوا الناس ورجع كينان كرسيه عشان يسمعهم ، واحد منهم قام راح الحمام ف الباقيين مستيينه يرجع عشان يتكلموا عن العملية
الجرسون جه حط الطلبات قدام بدر وكينان وسيا
كينان : شنو إسمك إنت ؟
الجرسون : أحمد يافندم
مشي ف سيا فضلت تضحك وهي بتقول : ابوو احمد يالمنحرف يالموكوس
بدر مسك الطفاية عاوز يخبطها بيها ف كينان مسك إيده وقال : عديها يا زعيم معلش حقك عليا أنا
بدر بعصبية : البت دي متجيش معانا تاني ولو إتصدرتلها في خروج هحبسك معاها
كينان : حصل يا زعيم
رجع الراجل من الحمام وقعد معاهم ، وبدأوا يتكلموا
الشخص الأول : البضاعة دي هتطلع من مطروح علينا هنا في القاهرة ، أنا إختارت أحسن عربية شحن عندنا والصناديق الخشب اللي هتكون في اخرها متروسة سلاح
كينان برق وهو بيسمعهم
الشخص الثاني : يبقى الميعاد تخلوه يوم الثلاثاء عشان اللي بيكون واقف في الكمين اليوم دا سعيد باشا محمد ودا راجل تبعي أنا مديله حلاوته وهيفتش من على الوش كدا ويعدينا ، اظن كدا دوري في العملية تمام
الشخص الأول : ونسبتك محفوظة ، بس أفرض حصل في الأمور أمور وسعيد محمد بتاعك دا موقفش في الكمين يومها ؟
الشخص الثاني : يا باشا عيب عليك ، أنا أضمنلك اليوم دا برقبتي
الشخص الثالث : خلاص يبقى التسليم يوم الثلاثاء الساعة ٦ بالليل لو العربية عدت من الكمين على خير
المعلومات اللي بدر بيسجلها ( من مطروح للقاهرة يوم الثلاثاء الساعة ٦ مساء )
( الخطة : ضرب نار على الافراد اللي في إيديهم الشحنة والأستيلاء عليها وبيعها بمعرفتهم )
بدر قفل فونه بعد ما سجل
شرب من العصير وهو بيغمز لكينان
رجع كينان كرسيه بالراحة جداً للترابيزة ، وهو قلقان من العملية دي
كينان بهمس : هنقوم يا زعيم ؟
بدر بصوت واطي : مينفعش دلوقتي هيشكوا فينا ، إشرب إشرب
سيا بنعاس راحت مالت غصب عنها على كتف بدر وراحت في النوم
بدر وقف الكوباية عند بوقه وهو بيبص لراسها اللي على كتفه
كينان إبتسم ، وقال : هنادي الجرسون يا زعيم عشان نحاسب ونمشي
بدر هز راسه بمعنى ماشي
بدر بصوت واطي : سيا .. ، إنتي يا بنتي
سيا بنعاس : هممم
بدر : قومي إخلصي مش وقت نوم ، قومي هنروح متفضحيناش
سيا بنعاس بس عارفة بتقول إيه : شيلني طيب وديني العربية
بدر بعصبية : وحياة أمك !! اشيلك وأنا لابس جلابية وأنتي لابسة عباية !!
إتعدلت سيا وهي بتبص حواليها وبتتاوب
كينان بعد ما حاسب : يلا يجماعة
قاموا وركبوا العربية وبدر سايق
سيا بنعاس : هو إحنا هنروح ؟
بدر وهو سايق : لا هوديكي الملاهي ، عشان انا راجل رايق ومش ورايا هموم ف فاضيلك بقى
سيا بتكشيرة : على فكرة مش لازم تتريق كان ممكن ترد بذوق وخلاص
بدر بعصبية : ما هو لو سؤالك مش غبي هرد حاضر بس غبية هقولك إيه
كينان بقلق : ما بلاش العملية دي يا زعيم
بدر بتركيز في الطريق : لو خايف هطلعها لوحدي ، وهاخد رجالتنا معايا
كينان : أنا مش خايف على نفسي أد ما أنا خايف عليك
بدر : سيبها على الله
سيا من كلامهم خافت على بدر ، وفضلت تبص عليه في المرايا وهو ملاحظ ومتجاهلها
وصلوا البيت أخيراً ، قفل بدر العربية ودخلوا
دخل كينان اوضته بس سيا قلعت العباية وقالتله : بدر !
لف ليها وبصلها من غير ما يتكلم
قربتله سيا وقالتله بلمعة عين : ما بلاش العملية دي زي ما كينان قالك ، ما إنت عندك فلوس مش محتاج
بدر بضحكة سخرية : خايفة عليا يعني ؟
صدمته بردها وقالت : ليه لا !
تنح بدر شوية وبعدين كشر وقال : سيبيها على الله
طلع أوضته وسابها واقفه تبص مطرح ما كان واقف ، خدت نفس عميق ودخلت اوضتها
لما وصل لفوق لقى كينان واقف على السلم من فوق بيبصلهم
أول ما كينان شاغ بدر قاله : على فكرة البت دي يا زعيم معجبة بيك ، واضح من تصرفاتها
بدر قلع القميص وهو بيقول : عارف ، عشان كدا بعاملها وحش ، شكلها طيبة مش عاوزها تتعلق بيا
كينان إبتسم ف بدر إستغرب وقاله : مالك ؟
كينان : أول مرة تقول على واحدة ست طيبة يا زعيم ، طول عمرك بتكرههم معندكش ثقة فيهم
بدر بتعب : بقولك أيه انا مش شايف قدامي ، تصبح على خير
دخل بدر اوضته وقفل الباب وهو متضايق عشان حاسس ان سيا بدأت تظهر مشاعر منها ناحيته
* تاني يوم الصبح
نزل بدر وهو لابس تيشيرت أبيض نص كم وبنطلون جينز إسود
كينان بتصفيرة : أوبااا يا زعيم العضلات اللي بانية من التيشيرت
بدر : ما هي عندي من زمان ومحافظ عليها إيه الجديد يابني
كينان : القمصان بتخفي الحلاوة دي يا باشا
خرجت سيا من أوضتها وهي بتقول : صباح الخير
ظهرت إبتسامة على وشها لما شافت بدر بس دارتها بسرعة
كينان بتريقة : صباح النور يا عروسة
بدر بتبريقة لكينان : تؤ ، حضرت الاكل ولا أحضره أنا ؟
كينان : حضرته يا زعيم
دخلوا قعدوا ياكلوا ، بدر بيدوق الجبنه وقال : أيه دا ! فين الجبنة المملحة يابني انا مبحبش الجبنه القريش
كينان قبل ما ياكل : يا زعيم والله دي المملحة انا حاططها بإيدي
بدر بعصبية : إزاي يعني ! ملهاش طعم اهي
سيا بقرف : ولا البيض ليه طعم خالص لا ملح ولا فلفل
كينان بغضب : لا دا أستقصاد بقى
غمس اللقمة في البيض وداقه فعلا مالوش طعم ، بعدين الجبنة برضو مفيش طعم
كينان بصدمة : إزاي دا ! تقريباً إحنا واخدين برد ف مش مستطعمين حاجة.
بدر بتتنيحة : برد متأكد ! أصل إمبارح كنا في تجمع وكافية وشكلنا لقطنا حاجة
سيا برعب : قصدك إيه !! كورونا ؟
بدر بتحليل : أنا الصبح فضلت أرش برفان على نفسي زي كل يوم ومش شامم قولت يمكن عشان لسه صاحي ، بس كدا الموضوع لازم يتعملنا مسحة وننعزل عن الناس
سيا بزعل : لا أنا كويسة مش هعمل مسحات دا تلاقيه برد
بدر بتكشير : هكلمهم ييجوا يهببولنا المسحة
التحليل / إيجابي للثلاثة
العلاج / فيتامين سي وزينك ومقويات مناعة مشروبات ساخنة
قاعد بدر على الكنبة بيتابع الاخبار على التي في ، جت سيا خدت الريموت وبتقلب
بدر : تؤ تؤ مش بتفرج انا ؟
سيا بتعب : وانا زهقانة على طول قاعدة جوا مبعملش حاجة من حقي أتفرج
بدر : هو أيه اللي من حقك ؟ هاتي الريموت وإنجري جوا ف الاوضة إنتي هتصاحبينا ولا إيه !
سيا بضيق : بطل تعاملني كأني لسه مخطوفة أنا خلاص بقيت واحدة منكم
بدر بخلق ضيق : اللهم طولك ياروووح !
جه كينان من المطبخ وقال : أنا طلبت حجات من السوبر ماركت عشان الشوربات والحجات بتاعت المرض ، الولد هيسلمهولنا في السبت من البلكونة
بدر هز راسه ل كينان بعدين قال ل سيا : إخلصي هو أنا ههزر معاكي !
سيا بكيد : مش هديهولك يا حبيبي إنسى !
بدر أستغرب الكلمة وقال : حبيبي !
سيا أرتبكت وراحت رمياله الريموت وقالت بتوتر : أصلاً أنا دايخة وحاسة إني عاوزة أفرد ضهري
كينان بتخفيف عنها : إقعدي معانا والزعيم هيجبلنا فيلم حلو نتفؤج عليه ، مشيها يا زعيم إحنا كلنا تعبانين وفي الكوارنتاين سوا * الحجر الصحي *
قعدت سيا ورفعت رجليها على المسند وقعد كينان جمب بدر
جه فيلم الفرقة الانتحارية بتاع الجوكر والبنت بتقوله ( انا عملت كل حاجة تثبت إني بحبك بس أنت إتقبل حبي دا !
الجوكر : أنا مش للحب ، أنا فكرة )
بصت سيا ل بدر بطرف عينها ، بصلها هو بنظرة اللي هو انا زي الجوكر ، ف متستنيش مشاعري تتغير
فجأة قامت سيا وقربت ل بدر بالراحة وكينان باصص وفاتح بوقه من الصدمه
قربت لبدر و ...
يتبع ..
|13|
قربت من بدر وكينان فاتح بوقه ، خدت الريموت من إيده وغيرت القناة وهي بتقول بكيد : الفيلم مش عاجبني
كينان إتنهد براحة وهو بيقول : يا دينيي قلبي وقع !
| 13|
يوم الثلاثاء / يوم العملية
كينان بقلق وتعب : إحنا لسه في فترة الحجر خروجنا خطر على غيرنا وكمان مينفعش نعمل كدا وإحنا تعبانين ، عشان خاطري يا زعيم أنا قلقان
بدر كان لسه هيرد عليه لقى سيا خارجة من أوضتها وبتقول : أنا لبست وجاهزة
بدر بيحط السلاح في جمبه وقال بعصبية : خشي جوا ، مش هكرر كلامي مرتين
سيا بتبريق : إنتوا مش هتتحركوا من هنا من غيري !
بدر بصوت عالي : متعصيش أوامري ! إسمعي الكلام عشان صوتي ميطلعش على الصبح
بصت سيا لكينان عشان يخرجها معاهم لكنه وطى راسه وقال : الزعيم عنده حق المرة دي يا سيا ، دي عملية خطر أنا أصلاً قلقان وقلبي مقبوض
سيا قالت بأمل أخير : هقعد في العربية مش هتحرك وعد
بدر بهدوء : إنتي ليه مش عاوزة تفهمي !
سيا بدأت تدمع وقالت : لما هي خطر رايحين ليه ! إنت اللي ليه مش مستوعب إني خايفة تروحوا يحصل حاجة وأنا قاعدة هنا لوحدي ، على الأقل هكون معاكم
قربت من وحطت إيديها على إيده وقالت : يابدر من فضلك مترفضش
لبس بدر نظارة الشمس بتاعته وهو بيقول : حصلوني على العربية
خرج كينان وسيا وركبوا معاه ، وطلعوا على الطريق عشان يستنوا التسليم
الساعة حالياً / السادسة والربع مساء
بدر من ورا الإزاز : كينان إنت متأكد إنهم قالوا الساعة ٦ ؟
كينان بهمس : حصل يا زعيم
بدر بإستغراب : أمال في إيه !
كينان بقلق : كويس إننا جبنا رجالتنا عشان لو حصل حاجة
تك تك تك * حد بيخبط على إزاز عربية بدر *
بص بدر لقى رجالة ميعرفهمش واقفين حوالين عربيته
بص لكينان وقال : إحنا إتكشفنا
كينان وهو بيبص ليهم محاوطين العربية : أو يمكن فاكرين إننا حكومة
بدر خد نفس وقال : أنا هنزل هتكلم كلمتين وأبتدي أضرب نار ، إحمي إنت ضهري
سيا برعب : لا متنزلش ، سوق العربية جامد وإمشي بعيد
بدر بغضب : أنا مش مرا عشان أهرب ، وحتى لو عملت زي ما بتقولي هيخرموا العربية طلق ، خليكي إنتي متتحركيش
نزل بدر ووقف قدامهم
الراجل بضحكة : طب حتى إحترم عقلية ناس بتتاجر في السلاح ، صعبة دي ؟
نزل كينان وهو واقف عند باب عربيته
ضحك بدر على جنب وهو بيقول : لا ف دي عندك حق ، إنت راجل شكلك لعيب قديم في النقطة دي
الراجل : شوفت بقى ؟ هتستفيد إيه لما تحسر أمك على شبابك
بدر ركبه عفريت لما سمع سيرة أمه ، خلال ثانية كان ماسك رقبة الراجل وراح لاففها جامد لحد ما أتكسرت في أيده ، على ما رجالة الراجل كانوا ضربوا نار جت طلقة في بطن بدر
هنا سيا صوتت ونزلت من العربية ، كينان زعقلها ومسكها نزلها تحت العربية وهو بيضرب نار مع رجالة بدر وبدر كذلك بيضرب نار
من دون أي مقدمات لقت سيا حد بيضربها بحاجة على راسها فقدت الوعي في ساعتها
* بتفتح عينيها ببطيء
هي في نفس المكان اللي حصل فيه تبادل ضرب نار ، ولكنها على الأرض لوحدها وفي عربيات أسعاف بتنقل الموتى من العصابة بتوع السلاح
بتحاول تعدل نفسها عشان تقوم مش عارفه ، الضربة على راسها كانت قوية جداً
إفتكرت اللي حصل ! بدر خد طلقة في بطنه !!
بصت جمبها لقت دم على الأرض
سيا بعياط ورعشة : بدر .. بدررر كينااااان
الدكتورة لزمايلها : في واحدة عايشة هنا ، جهاز تنفس بسرعة
الدكتورة بتقرب ل سيا وبتقول : انتي بخير ؟ حاسة بإيه
سيا بعياط : أنا عندي كورونا
غطت الدكتورة بوقها ومناخيرها وهي بتقول : ماسك هنا بسرعة وترولي ، بسرعة
سيا متجهلاهم وعماله تنادي : يا بدررر يا كينااان ، متسيبونيش لوحدي
بتحسس على بقعة الدم وبتبص للدكتورة بتقول : بدر خد طلقة في بطنه
الدكتورة : إهدي وهنعالج جروحك
بصت سيا في جسمها لقت رجليها مجروحة متعرفش إزاي ولا إمتى
جم إتنين لابسين زي بتوع الفضاء * زي الحماية الخاص بالاطباء من كورونا *
شالوا سيا وحطوها على الترولي
مش قادرة هي تحرك رجليها عشان تنزل بس عماله تبص حواليها وتنادي بعلو صوتها : يا بدررر يا كينااان ، يا بدرررر
* في عربية بدر
كينان سايق وهو بيقول : تماسك يا زعيم عشان خاطر العشرة يا صاحبي
بدر بتعب وعمال ينزف : ن نزلني على جمب أنا خلاص ، ش شوف سيا فين وخدها وروحوا
كينان بدأ يدمع وقال : أنا ماليش غيرك يا زعيم وعاوز تسيبني أبقى لوحدي ؟ إمسك نفسك وحياة أبوك يا شيخ
بدر بدأ يكح وطلع دم من بوقه
كينان بقلق وعياط : أنا ملحقتش أشيل سيا ، بس متأكد إني شوفتها بتفتح عينيها ، هي عارفة طريق البيت ف هتحصلنا
بدر بيبتدي يغمض عينه
كينان بصوت عالي : يا بدرر !!! متغمضش عينك يا بدرر
* في المستشفى
الدكتورة لابس الواقي وبتحط المحاليل في إيد سيا
سيا بعياط : طب ما تطمنوني هما عايشين ! هما كويسين يعني ؟
الدكتورة بتنفخ بملل
شافت سيا من ورا الإزاز عمها وعمتها واقفين مضطرين راحت مكشرة
الدكتورة : أهلك كلمناهم بعد ما البوليس كشف عن بطاقتك وتبين إنك هربانة منهم من فترة
سيا بنظرة وحشة للدكتورة : دول مش أهلي ، الراجل اللي واقف مجبور دا طردني من بيته في نص الليل عشان مراته ، واللي جمبه دي أتهمتني في شرفي ! أنا أهلي وعيلتي بدر وكينان ، هما فين أنا عاوزة أروح معاهم
الدكتورة بملل : علقتلك جلوكوز هيخلص كل ٣ ساعات هيتعلقلك واحد جديد ، حمد الله على سلامتك
خرجت الدكتورة ف بدأت سيا تشهق وهي بتعيط
وهي عاوزة تقوم مش عارفة
* برا أوضة سيا
الدكتور لعمها وعمتها : لازم يكون ليها أوضة تتعزل فيها عن الكل عشان عندها كورونا
عم سيا بخوف : انا متجوز وعندي ولاد وبصراحة أخاف عليهم يتعدوا
عمتها بصت لأخوها وقالت : أنا قاعدة لوحدي أه بس أخاف على نفسي برضو
الدكتور بملل : يبقى حد ينزل الحسابات يدفع تمن إحتجازها في الحجر الصحي هنا في المستشفى
بصوا لبعض ومحدش رد ، عمتها قالت بتكشيرة : ماشي هحطها في الأوضة عندي وأقفل عليها
بعد ما عمة سيا خدتها البيت وحجزتها في الأوضة
سيا قاعدة باصة للبدر في السما ، وصوت أغنية منير خارج من الراديو
يا شال الهواا غطيه ، يا نسيم الأطبة داوييه .. وتحاسبي يا غربة عليه ! بكيني وإضحكي ليه
سيا باصة للبدر ومدمعة وعيونها حمرا
عمتها خبطت وهي بتقول : صنية الأكل عند الباب خديها وإقفلي ع نفسك تاني مش ناقصة مرض
* في بيت بدر
كينان خرج الطلقة وبدر فاقد الوعي ، جايب فوطة في مياه سخنه وعمال ينضف الجرح بتاع بدر من الدم عشان يعرف يخيطه ، ويعيط
رن فون كينان ، رد وقال : جبت البت ؟
الراجل : جم أخدوا الجثث اللي هنا وغالباً خدوا البت معاهم
كينان بعصبية : أنت بتقول أيه ؟ اخدوا سيا فين ! دي زمانها مرعوبة الله يخربيتك
الراجل : سامحني يا كينان بس هي مش موجودة
قفل كينان في وشه وبدأ يحس بالضغط العصبي وهو بينضف جرح بدر ، بعدين بدأ يخيط فيه
مفيش أي رد فعل من بدر ، خلص خياطة جرحه وعمله كمادات مياه ساقعة وتلج لإن حرارته بدأت ترتفع ودا شيء طبيعي بعد أصابته
قعد كينان على الكرسي قدام سرير بدر وهو بيقول بعياط : ما تقولي يا زعيم هتتصرف إزاي لو مكاني ؟ أصل أنا دايماً ماشي وراك وورا كلامك ، حرك حتى صباعك وهفهمك أصل أنا مش محتار أنا تعبان والله يا زعيم
قام كينان يظبط البيت وساب بدر نايم
وسيا في الأوضة في بيت عمتها مبتتحركش من السرير بتعيط بس وشكل بدر وهو بياخد الطلقة في بطنه مش مفارق مخها
عدت أيام ، يوم والتاني والتالت
كينان كان واقف بجمود بعد ما وصله خبر إن سيا عند عمتها ومش عارف يوصلها عشان معزولة كورونا ، واقف في المطبخ بيعمل شوربة سمع صوت من وراه بس صوت تعبان بيقول : متنساش تزود ليمون يا زفت
أبتسم كينان ولف وهو بيقول بصوت عالي وسعادة : يا زعيييييييم
جري على بدر وهو بيحضنه راح بدر إتألم
كينان بيبعد وبيقول : لامؤاخذه من فرحتي بيك يا زعيم
بدر بتعب : البت صحيت ؟
كينان وشه جاب ألوان بعدين قال بنبرة حزينة : يوم العملية لما إنت إتصابت ، كان كل همي إني أنقذك ف قولت أكيد سيا هتروح ع البيت بما إنها عرفاه ، الإسعاف جت لمت الجثث وخدت سيا معاهم
بدر بصدمة : يعني هي فين !
كينان بزعل : عند عمتها
بدر غضب وقال : وسيبتها !! إفرض قالت عننا ؟؟ إفرض حكت
كينان : إهدى بس يا زعيم
بدر وهو بيعرج : هغير هدومي ونروح نشوفها فين
كينان بخضة : تغير إيه وتعمل إيه !! جرحك ملمش مستحيل أسيبك تخرج
بدر بعصبية : أنا عاوز أعرف هي فين ! شوف عنوان عمتها خلينا نجيبها أنت سامعني ، وهطلع أغير هدومي
طلع بدر لاوضته وغير هدومه بالعافية نظراً للجرح اللي لسه بيوجعه
نزل تحت وهو ماسك عكاز لإنة مش قادر يسند تقل جسمه على رجله ولا عنده توازن وكان لابس نظارة شمس وقميص لونه إسود
بدر : جهزت العربية ؟
كينان بدر صعبان عليه ف قال : طب أروح أنا أجيبها لوحدي يا زعيم ؟
بدر بغضب : لازم أكون موجود ، جهزت لبس الدكاترة !
كينان : أيوة
بدر : تمام ، لما نوصل هسيب العكاز في العربية وهتحانل على نفسي بس عاوزك لو مرضتش تيجي معانا تشيلها إنت
كينان بموافقة : حصل يا ريس
ركب بدر جمب كرسي السواق وساق كينان العربية لحد ما وصلوا تحت عمارة عمتها
بدر قلع النظارة وبص لفوق وهو بيقول : وبعدين ؟ دي منطقة شعبية يعني هيتلموا على العربية ويقعدوا يتصوروا عليها
كينان : هي عربية جامدة الصراحة ، بس هنركنها على جمب عشان ننزل
ساب بدر العكاز في العربية ونزل
كان في بنت ماشية وشايلة شنطة على ظهرها
قربت من بدر وكينان وقالت : تشتري يا باشا معايا مكن حااقة أصلي ومعايا ..
بدر بإستعجال : شكراً إحنا مستعجلين
البنت بتساؤل : جايين لحد يا بشوات ؟
كينان : وإنتي مالك ما تخليكي في حالك ؟
البنت : الله الله ! ما بوراحة يا هندزة مالك ! * هندسة * أنا كان القصد أساعد وأخد حلاوتي
بدر بص لكينان بإبتسامة وقال : البت جت في ملعبنا ، تاخدي كام وتعملي اللي هقولك عليه بالظبط ؟
البنت بإبتسامة : قدرني إنت يا باشا بقى وأنا عنيا ليك
خرج بدر من جيبه ٤٠٠ جنيه ، البنت عيونها كانت هتطلع عليهم وقال : هتطلعي شقة كذا تعملي نفسك صاحبة البنت اللي فوق عشان هما حابسينها ، وأول ما تشوفيها تاخديها بالحضن ويا حبيبتي ويا قلبي ، وشوشيها في ودنها إن بدر وكينان مستنيينها تحت خليها تنزل ، متخليهاش تفضحك عشان لسانها طويل المهم متنزليش إلا بيها ولو نزلتي هتاخدي ال ٤٠٠ جنيه
البنت : باشا لامؤاخذه ما أنا ممكن أنزلهالك وأعمل كل دا وبعدين تقولي وشك ولا وش الضيف وماخدش حاجة
بدر بثقة : أنا مش محتاج أكذب عليكي بمبلغ زي دا ، وعد رجالة هتاخديه أول ما تجيبيها
البنت بسعادة : ماشي ، العروسة إسمها إيه !
كينان : إسمها سيا ، إستجدعي بقى وهاتيها بس خلي بالك متبوسيهاش وكدا عندها كورونا
البنت : سيبها على الله يا باشا إحنا مناعتنا بومب
بدر بجدية : لا دي مفيهاش مناعة دا مرض وحش ، تمام !
البنت طلعت وسابتلهم شنطة ظهرها
* عند شقة عمة سيا
خبطت البنت على الشقة وقالت : مساء الخير يا أبلة
عمة سيا : أبلة ؟ خير
البنت : أنا صاحبة سيا وكنت عاوزة أتطمن عليها
عمتها بصتلهت بقرف وهي بتقول : ما هي دايماً جايبة مصايب ، سيا تعبانة مش هتقدر تقابلك عندها كورونا
البنت زقت عمتها وقالت : ياختي سيبيها على الله ، يا سيااا ، بت يا سيااا
فتحت سيا الباب فتحة صغيرة وهي بتقول : مين بينادي انا تعبانة
البنت جريت وزقت باب الأوضة بتاعة سيا وهي بتحضنها وبتقول : وحشتينييي يا بنت الجزمة
سيا بتبريقة : إيه الألفاظ دي إوعي كدا إنتي مين ؟ إبعدي عشان هتتعدي مني
البنت بوشوشة في ودن سيا : كينان وبدر مستنيينك تحت إنزلي معايا اللهي يسترك عاوزة أخد الحلاوة
سيا وشها ورد وإبتسمت وهي بتحضن البنت وبتقول : يا حبيبتي يا حبيبتي ، إنتي متأكدة
البنت بسعادة : وربنا زي ما بقولك ، تعالي معايا
سيا وهي بتقفل باب الاوضة : معلش يا عمتي هقعد مع صاحبتي عشان معدكيش
عمتها واقفة بعيد ومغطية بوقها ومناخيرها وهي بتقول : رايحة فين يابت يا وش المصايب خدي هنا
نزلت سيا جري ع السلم مع البنت وهي بتقول : بدر وكينان تحت بدر وكينان تحت * بتقولها زي أغنية العيد *
أول ما شافت بدر من غير مقدمات راحت جريت وحضنته بكل قوتها ، أتألم هو وأتصدم لكنه فرح بشوفتها * حتى لو مبيحبهاش حب حبايب ف هو إتعود على وجودها ك صديقة على الأقل
كينان والبت واقفين متنحين وسيا حاضنة بدر وبتعيط
بدر بتعب : بتعيطي ليه ؟ حد ضايقك ؟
سيا بتعب : خلينا نمشي نروح بيتنا أنا عاوزة اروح معاكم
بدر بيطبطب عليها تلقائي
البنت : جبتهالك أهي يا باشا فين حلاوتي ؟
بدر خرج من جيبه ٢٠٠ جنيه كمان وبيديها للبنت وهو بيقول : ٦٠٠ جنيه أهو عشان تعرفي إني أد كلمتي وعشان تقريباً يومين ويظهر عليكي الأعراض ف تلاقي الفلوس للدوا
سيا كل دا حضناه
كينان : إحم ، سيبي الزعيم يابت ، هو أنا موحشتكيش ؟
سيا بعياط وهي لسه في حضن بدر : وحشتوني والله وحشتوني
كينان بيبص لبدر انها صعبانة عليه وبدر مستغرب حضنها ليه
نزلت وركبت العربية مستنياهم يركبوا ويمشوا بيها
كينان بيغمز لبدر
بدر بعصبية : في إيه يالااا ؟
كينان بأبتسامة : البت واقعة واقعة ، عليا الطلاااق زعيييي
ولسه كينان مكملش كلمته لقى بنت نازلة من ميكروباص وزي القمر ، غالباً طالبة ثانوي لسه راجعة من الدرس
صفر وهو بيبصلها و ..
يتبعع ...
|14|
بدر بإستغراب : بتبص على إيه يابني ؟
بص بدر لقى بنت في ثانوي ماشية وشايلة الكُتب بتاعتها ، رجع بص لكينان تاني وقال : بجد والله ؟ عيلة صغيرة لافتة نظرك !
كينان بإعجاب : بس متقولش عيلة يا زعيم ، دا إيه القمر المتنقل على الأرض دا
بدر وهو بيركب العربية : يلا يابني إركب أنا تعبان ومفيش فيا حيل
ركب كينان وهو بيبص ل سيا وبيقول : هي مش بنت منطقتك دي ؟ ما تقوليلي دي مين !
سيا بلماضة : أولاً دي مش منطقتي دي منطقة عمتي يعني معرفش حد فيهم أوي ، ثانياً المنطقة دي كلها لبش يعني البعد عنهم أفضل
ساق بدر العربية لحد ما وصلوا البيت ، كينان قال بتعب : هطلع أخد شاور يا زعيم عشان مرهق
بدر بتعب : ماشي
طلع كينان ياخد شاور ، جه بدر يطلع وراه وقفته سيا وهي بتقول بلهفة : بدر
وقف بدر وبصلها من غير ما يتكلم ، قربت منه سيا وقالت بلهفة حقيقية وصوتها خارج منها مليان حنين وعنيها مدمعة : أنا كانت كل دقيقة بتعدي عليا في بيت عمتو مبيروحش من بالي مشهد إنت وبتاخد الرصاصة ، إنت كويس حالياً ؟ حاسس بتعب ؟
بدر مبينطقش بس بيبصلها بأستغراب للهجتها الملهوفة ونبرة صوتها الحزينة ، تماسك وجاوبها : أنا بخير ، شكراً لإهتمامك
طلع أوضته وسابها واقفة تبص عليه ، نزلت الدموع من عيون سيا وهي بتبص لمكانه بعد ما مشي وبتقول بعياط : أصل أنا حبيتك يا زعيم ، غصب عني
دخلت غسلت وشها في المطبخ وبدأت تحضر في أكل كينان كان جايبه
نزل كينان وهو بينشف شعره وبيقول : يا سلاام ، كنت شايل هم الطبخ والله
سيا بتوهان : بسلي نفسي بدل قعدتي لوحدي
كينان وهو ساند على الحيطة وبياكل خيارة : تفتكري لو روحت حاولت اتعرف على البنت دي هتصوت ومش هتديني فرصة ؟
سيا بضيق : دي عيلة صغيرة يا كينان ، بعدين متنساش إن عندك كورونا يعني لو روحت هتأذيها
كينان بعصبية طفل : يخربيت الكورونا
سيا بتساؤل : هو .. هو بدر مش هياكل ؟
كينان بتنهيدة : الزعيم الأيام دي تعبان وصحته على أده زي ما إنتي شايفة ، لما يصحى هسخنله الشوربة وهياكل متقلقيش عليه
* في أوضة بدر
بيتكلم في الفون بضيق وبيقول : لا مش فاهم ! يعني إيه واحد منعرفهوش يقعد معانا على نفس الترابيزة ؟ .. إنتوا واثقين في دا حواركم لكن أنا مبثقش ف حد بسهولة ! عامة لما ييجي يوم الخميس هنشوف مين الدخيل دا وقبل ما أتعرف عليه هجيب قراره بنفسي عشان أرتاح
قفل بدر الفون وقرر ينزل تحت عشان يشوف بيعملوا إيه
كان بيعرج بسبب وجع بطنه وهو نازل
لقى سيا ماسكة طبق شوربة عاوزة توديه على ترابيزة السفرة
مجرد ما لمحت بدر إرتبكت وإتخضت والطبق وقع منها أتكسر
بصت للطبق بصدمة وهي بتوطي وبتقول : أنا مخدتش بالي معلش ، معلش
نزلت تلم الإزاز ف بدر نزل وقرب منها وهو بيقومها وبيقول : هتجرحي إيدك ، متتعامليش بالغشومية دي تاني !
ماسك دراعها وبيتفحصه لاتكون إتعورت
قالت هي بنبرة غريبة : شوفت مجرد جرح بسيط من إزازة خضك إزاي ؟ ما بالك بقى عن حالي وإنت واخد طلقة !
رفع بدر راسه وبصلها ، قلبها نبض جامد ف قال هو بإستغراب : هو مالك اليومين دول كلامك غريب وتصرفاتك مش مفهومة ؟ هي الكورونا مأثرة عليكي ؟
إبتسامتها بسعادتها لوجوده قربها بهتت وقالت بنبرة جد : لا أبداً أنا بس بحاول أوضح إني مش خاينة للعيش والملح عشان أفرح في وجعك سواء إنت أو كينان
بدر ببرود : ما أنا عارف ، لو مش كدا مكانش زمانك واقفة بتتكلمي معايا وبتاكلي في بيتي ..
سابها ومشي ، بصتله هي بضيق ومستغربة قلبه الحجر ، طلع كينان من المطبخ وهو بيقول : أنا سمعت حاجة بتتكسر وأنا بغرف الشوربة ، أوووف كسرتي الطبق ! ولا يهمك المهم سلامتك
سيا بضيق : تصدق عندك إحساس عن الأخ دا
كسنان بإبتسامة وهو حاسس بإن سيا بدأت تحب بدر قال : صحيح اللي بتقوليه ، بس يا بختها اللي هتكسب قلب الزعيم ، هتتفتحلها كل أبواب السعادة وبكرة تقولي كينان قال
راح كينان يودي طبق الشوربة
قعدوا كلهم بياكلوا ف رن تليفون بدر ، رفعه على ودانه وقال : حصل إيه ؟ عملية إيه دي ! انا مش قادر أتحرك .. يعني إيه مفيهاش خطورة بنسبة كبيرة ما توضح كلامك
فين المكان طيب ؟ أه اعرفه خلاص هنيجي أنا وشريكي نسمع منكم واللي يعجبنا هندوس فيه .. سلام
قفل بدر التليفون وقال لكينان : جهز نفسك
بص لسيا وقال : أنا وإنت بس هنروح مشوار
سيا بإعتراض : بس أنا ..
قاطعها بدر وقال : عارفة لو جبتيلي الوزير ! مش هاخدك معايا كفاية اللي حصل
كينان بموافقة : الزعامة عنده حق ، هنروح نتمم شغل ونيجي تاني
بدر كشر وقال : أنا مبحبش أتعامل مع الجماعة دول ف متتعشمش إني هقبل عرض منهم ، بس مفيش مانع نروح نسمع مش يمكن في فايدة كويسة ؟
كينان بأمل : بإذن الله
لمت سيا السفرة وراهم وهي شيفاهم بيلبسوا ورايحين
كينان بتريقة : زعلانه يا بطة ، عارفة لو قعدتي مؤدبة لحد ما نرجع هجبلك حاجة حلوة * بيغمزلها *
سيا بضيق : إنتوا بس متتأخروش ، وإلبسوا الماسك عشان الناس ميتعدوش
كينان ببرود : إياكش يولعوا ، دول أوسخ ناس في المافيابنتعامل معاهم
بدر وهو بيخرج مفاتيح العربية قال لسيا : إقفلي على نفسك متفتحيش لحد
إداها ضهره وجه يخرج ف قالتله : بدر !
لف وبصلها من غير ما يتكلم ، قالتله : لا إله إلا الله
الهوا على الباب طير شعره الناعم ف قال بتكشيرة كدا : محمد رسول الله
خرج وقفل الباب هو وكينان وسابوا سيا قاعدة في البيت لوحدها
كينان وهو بيركب : متقلقش يا زعيم هي مش هتمشي ، الحضن اللي إدتهولك أول ما شافتك تحت بيت عمتها دا يثبت كدا
بدر حب يغير الموضوع ف قال : إركب إركب يا حنين
* جوا البيت
سيا حبت تطلع أوضة بدر عشان تلعب في حاجته وتعرف شخصيته أكتر
دخلت الاوضة وهي بتبص حواليها ، سريره مترتب شكله مش من الرجالة الفوضويين ، بصت على مكتبه كان في ساعات كتير أشكال وألوان ومنهم الروليكس الغاليه ومفتاح عربية وبرفانات ونظارات شمس
الرف اللي فوقه كان في أوراق وألبوم صور مستخبي تحتهم
سحبت ألبوم الصور وحبت تفتحه
كانت صور بدر وهو بيتدرب خيل ورماية في النادي ، وصوره وهو بيعوم وبيصطاد ، متصور مع أسد كبير
بعدين بدأت صوره وهو صغير
كان في ست لابسه فستان أحمر وشعرها إسود كيرلي حاضنه بدر وقدامه تورتة ال ٣ سنين
أكيد دي والدته ، حست بالشفقة عليه وكملت تقليب في الصور
وصلت لصور فرحه على ريناد ، كان باين إنه عادي مش مهتم وريناد كان وشها هيطق من السعادة ، متعرفش ليه حست بالغيرة وهي بتتفرج بس كملت عشان كانت عاوزة تعرف عن بدر كل حاجة
* في مصنع مهجور على الطريق الصحراوي
بدر ببرود : لا مش فاهم ومفهمتش وضحلي معلش ، عاوز مننا إيه ؟
الراجل بصوت ضعيف : إنتوا اعضاء في عصابة مافيا مش بياعين عرقسوس ، نوعوا شغلكم شوية مش كله أسلحة وهيروين
بدر بغضب : لا أنا شخصياً ماليش في الشغل الشمال دا ، إنت يا باشا إنتوا بتتاجروا في الاعضاء البشرية ودي مش شغلتي
الباشا بصوت غريب : على الترابيزة دي دايماً بتكون في أجزاء مفقودة ، إنت أهم واحد يا بدر ويهمني أحط إيدي في أيدك
بدر بجدية : بس حاجة غير الأعضاء والتجارة فيها لأني مش هعمل كدا
الباشا بخبث : عندي ليك شغل ، والله ما ينفع لغيرك
* في البيت
سيا كانت عماله تفتش في دولاب بدر وتتفرج على لبسه اللي كله ماركات
تليفون سيا رن للمرة الأولى في حياتها لدرجة إنها إتخضت من رنة فونها
رفعت الفون وبصت لقت عمتها ، إستغربت أكتر
قالت ترد عشان متقلقش الدنيا وتقولها إنها عند صاحبتها
ردت سيا وقالت : دا إيه عجايب الدنيا دي ، إزيك يا عمتو
عمتها بصوت تعبان : إلحقيني يا سيا ، إلحقيني يا بنتي بموت وأنا لوحدي في الشقة
سيا بقلق : مالك يا عمتو ! طب إهدي إهدي أنا جاية حالاً
قفلت مع عمتها وجت تبعت رسالة على تليفون بدر تبلغه فيها إنها هتمشي إفتكرت إن مش معاها رقمه مش متسجل
ف خدت المفاتيح وطلعت من البيت جري
برا البيت كان بدر وكينان داخلين بالعربية لقوا سيا بتجري
بدر بفزع بينزل إزاز العربية : رايحة فين !
سيا بتاخد نفسها بالعافية وبتقول : ع عمتو تعبانة أوي لازم أروحلها
بدر بصوت مرتفع : طب إركبي هنوديكي
ركبت بسرعة وطلعوا بالعربية على بيت عمتها
وصلوا المنطقة ف بدر قال : هنستناكي تحت متقعديش فوق كتير ، لو تعبانة أوي إنزلي بيها نوديها مستشفى
سيا بطاعة : حاضر
نزلت من العربية وطلعت جري على فوق ، بدر نفخ دخان السيجار وقال : هي قالت حاضر ولا أنا بيتهيألي ؟
كينان بضحكة : القلب وما يريد يا زعيم
البنت بتاعة ثانوي كانت بتشتري من السوبر ماركت حاجة ، كينان إبتسم لما شافها ف فتح باب العربية وهو بيقول : جاااني في ملعبي ، جميل والنبي .. أستأذنك يا زعيم ورايا كصلحة على ما سيا تخلص
بدر بغضب : مش وقته يا كينان ، خد يابني هنا ! الله يخربيت دماغك
نزل كينان وقرب منها وهو لابس كمامة وبيقول : متعرفيش خياط قريب من هنا لو سمحتي ؟
هي بجدية : على أول الشارع في واحد إسمه عم حسين
كينان بإعجاب : وعم حسين دا بيخيط قلوب ؟
بصتله بقرف وقالت : لا بيخيط عسل وخفة ، عارف العسل ؟
كسنان بإبتسامة : أعرفه شخصياً دا واقف قدامي أهو
البت بعصبية : اللهم طولك يا روح ، ما توعى من سكتي خليني أعدي
وسعلها كينان وهو بيغني لسعد لمجرد : دا أنا والله إبن ناس ، مش بعاكس من الأساس
صحكت وهي ماشية ، لقى بدر بيضرب كلاكس العربية
كينان بصله لقى بدر بيشاورله
* في شقة عمة سيا
سيا برعب : يعني إنتي مش تعبانة ؟ بتستغليني عشان أجيلك ؟
عمتها : أنا جيبالك الدكتورة تتأكد من عذريتك ، عاوزة أطمن
سيا بعصبية : دا إنتي مش عمتي دا إنت ست بنت كلب ، عارفة لو خليتيها تقربلي هصوت وهفضحك
الدكتورة للممرضة : إنزلي هاتيلي من العربية المخدر
سيا بتصوت وبتجري على الباب ف عمتها بتسحبها لجوا بالعافية
نزلت الممرضة تجيب المخدر
شافها بدر ف إفتكر إنها موجودة عشان عمة سيا
نزل من العربية وهو بيقول : بقولك ، أنتي عند الطابق الثاني شقة كذا ؟
الممرضة : أيوة بس لسه مبدأناش الحالة خايفة ف نزلت أجيب المخدر
بدر بإستغراب :
مخدر لإيه مش فاهم ؟
الممرضة بوقاحة : عشان نكشف على عذرية الأمورة اللي لسه جايه
بدر بخضة : أوعي يكون حد لمسها فوق !
الممرضة : ومالك إتخضيت كدا ليه ؟
بدر : لا أنا بقول مينفعش كدا دي سمعة بنات ناس
شاور بدر لكينان ف كينان إدا للممرضة فلوس وقال : إخلعي أنتي
الممرضة بتبص للفلوس بلهفة وبتقول : بس !
بدر خرج السلاح من جمبه وقال : إخلعيي !
الممرضة طلعت تجري
طلع بدر مع كينان
بدر بطنه بتوجعه وقال : كينان ، ساعدني أكسر الباب
كينان برعب : بس يا زعيم أ ...
مكملش جملته بدر رجع لورا وبكل قوته هجم على الباب كسره ، حس بألم في بطنه شديد بس تجاهله وهو سامع صويت سيا
دخل جوا راح زق الدكتورة بعيد وهو بيقول : وحياة أمك لا أوقفك عن العمل خالص ودا أقل وش هتشوفيه مني !
كينان بيرفع السلاح : إرجعي ورا يا حجة ، الأمانة بتاعتنا فين !
عمتها برعب : أنا هبلغ الحكومة عنكم
بدر وهو رافع السلاح في وش الدكتورة : ١٢٢
عمتها بتبصله ف بدر قال بصوت عالي : رقم الحكووومة ١٢٢ ، البت فييين !
خرجت سيا من الاوضة وهي بتعيط وبتستخبى ورا بدر وبتعيط
بدر حطها تحت دراعه والدراع التاني ماسك السلاح وبيقول : إنتي كويسة ؟ حد لمسك ؟
سيا بتهز راسها يمين وشمال بمعنى لا
كينان واقف على الترابيزة بياكل من البليلة اللي عمة سيا عملاها وبيقول : يا ساتر أنتي عملاها بلبن كلاب ولا إيه ؟ حتى نيتك السودا طافحة على الأكل
بدر بغضب ل سيا : محدش هيقدر يقربلك طول ما إنتي معايا
بعدين بص لعمة سيا وقال : دي مبقتش بنت أخوكي دي واحدة تخصني يعني مش عاوزك تجيبي سيرتها على لسانك حتى بالغلط !
سيا رغم الرعب كانت طايرة من الفرح ، وقفت على أطراف صوابعها وقربت لبدر و ...
يتبع ....
#خارج_قانون_الحب
#روزان_مصطفى
#بقلمييييي
|15|
وقفت على أطراف صوابعها وقربت لبدر وباست رقبته
عمتها فتحت بوقها على أخره ، كينان بصلها بذهول ، بدر كإن في حد كهربوا
بدر بتكشيرة : خد سيا على العربية بسرعة ، وسيبني أنا هتفاهم مع النسوان دي
سيا برجاء وطيبة : عشان خاطري يا بدر ، نسيبهم ونمشي ووعد لو هي فعلاً بتموت أنا مش هعبرها
شبكت صوابع إيديها في إيده ، بص بدر على إيديهم وسحبها برا ومشي معاها
نزلوا وركبوا العربية ف سيا إتنهدت وقالت : أنا ربنا بيحبني عشان إنتوا معايا ، أنا بجد بعتبركم عيلتي وبعتبر نفسي واحدة منكم
بدر كان بيسمعها وإبتسم إبتسامة خفيفة
دور العربية وروحوا على البيت تاني ، أول ما دخلوا كينان قال إنه هيطلع ينام عشان مُرهق ، بدر كان هيطلع ف نادته سيا كالعادة
وقف وبصلها مستنيها تتكلم ، قالتله بهدوء : أنا خايفة ومتضايقة من الموقف اللي حصل في نفس الوقت ، ممكن تخليك معايا شوية نتكلم سوا ؟
بص بدر في ساعة إيده وقال بتنهيدة : هنتكلم ف إيه ، أنا مش هتكلم عن نفسي
ميلت سيا راسها وقالت : أنا هتكلم عن نفسي ، حابة جداً أوضح نفسي قدامك على الأقل ، تعرف طموحي وأحلامي وإيه اللي وقعني في طريقك يومها
إتنهد بدر وحس أنها فعلاً نفسياً مُحطمة ومحتاجة تتكلم ، نزل على السلم ووقف قدامها وقال : تحبي نقعد فين ؟
إبتسمت سيا إبتسامة عريضة وقالت : لو المطبخ هيكون كويس عشان بحب قعدته
دخلوا ف قعد بدر وحط ثلج في الكاس بتاعه ، حطت سيا إيديها فوق إيديه وقالت : هو لازم تشرب يعني ؟
بدر بجدية : عشان أفوق بشرب ، في ناس بتشرب عشان تتسطل وتنسى الواقع ، أنا عشان أركز فيه بشرب .. وبعدين بقولك إيه أنتي هتحكي وهسمعك ملكيش دعوة بقى بشرب إيه
قعدت سيا قدامه وقالت : زي بعضه ، المهم أنك موجود هنا جمبي
تنح بدر من كلامها وقال بجدية : إحم ، إيه اللي وقعك في طريقي يومها ؟
سيا بحُب : حظي الحلو
بدر جه يقوم ف مسكت إيده وقالت : خلاص هكلمك بجد يا سيدي ، من يوم وفاة ماما وبابا الله يرحمهم وأنا الدنيا ملطشة معايا من كل إتجاه ، كل بيت من بيوت عيلتي محدش مستحملني ولا طايقني وبيتلككوا عشان أمشي ، أخر بيت كنت فيه كان بيت عمي وطردني عشان مراته
لقيت عربيتك مركونة والقدر جر رجلي لحد عندك ، في بيتك هنا نمت لأول مرة وأنا حاسة بأمان .. زي ما حكيتلك قبل كدا جوز خالتي كان بيتحرش بيا ف سيبتلهم البيت ، هنا بنام وأنا متطمنه بوجودك يابدر ، مبتبصليش في طبقي وتعد عليا أكلت بكام ولا أد إيه ، عينيك مليانة عمرك ما بصتلي بصة كدا ولا كدا ، رغم عصبيتك عليا كتير بس أنا مبزعلش منك
أصل ربنا خلقنا ناقصين عشان نكمل بعض ، كل واحد فينا عنده عيوب كتير ولازم تلاقي حد يستحمل عيوبك ويتعايش معاها ، أنا إستحملت دا .. أنا عاوزة أقولك على حاجة بس متزعلش مني ، أنا مستغربة إزاي ريناد تخون واحد زيك ، أنا لو كنت مكانها كنت شيلتك في عيوني العمر كله
بدر كان ساند راسه على الترابيزة ونايم من التعب والأرهاق وسيا عارفة إنه نايم عشان كدا بتتكلم بقلب جامد
قربت منه ومسكت إيده وباستها وحضنتها جامد وهي بتقول : أنا عنيدة ولساني طويل ، وعلى طول بقول لا على أي شيء ، بس حبيتك مش هعرف أنكر ، أنا قلبي بيوجعني في قربك من فرحته وربكته
للدرجة دي حبيتي الزعيم ؟؟
كان صوت كينان جاي من عند باب المطبخ ، وش سيا إحمر وهي بتبصله وبتقول : إنت هنا من إمتى ؟
كينان بذهول : عطشت قولت أنزل أشرب لقيت فيلم عمر وسلمى شغال في المطبخ وإنتي عمالة تبوسي في إيد الباشا
سيا برجاء : عشان خاطري متقولوش ، عشان خاطري يا كينان
كينان بإبتسامة : بشرط
رفعت سيا حاجبها وقالت : أه إنت إستغلالي بقى ! شرطك إيه يعني ؟
كينان بخبث : تعرفيني على البت القمر اللي في منطقة عمتك
سيا وإيديها في وسطها : مش هينفع أعمل كدا عشان إديت وعد لبدر إني مروحش هناك تاني أبداً ، كينان ! إنت جدع ومش هتقول
كينان بتساؤل : بس إنتي بتحبيه وهتصونيه ؟ أصل في بنات كتير بتحبه عادي هو أهم حاجة عنده تصوني شرفه
سيا بحب : أنا مش عاوزة حد غيره حتى عيلتي مش عاوزة أشوفهم
كينان بضحكة : من إمتى يا بت الكلام دا ! يخرب عقلك والله دا إنتوا كنتوا ناقر ونقير
سيا بسخرية : لا متقلقش هو لسه نقير زي ما هو ، المهم ساعدني نطلعه ينام في سريره عشان ميتعبش
* صباح تاني يوم
صحي بدر وهو لابس تيشيرت أبيض نص كُم وجاكيت كت لونه زيتي ، وبنطلون إسود
نزل على السلم ووصل للمطبخ وهو بيقول : صباح الخير ، خلصوا فطار عشان رايحين الإسطبل
سيا بلمعة عين : خيول !! الله عمري ما شوفتهم في الحقيقة
بدر بتساؤل : بتعرفي تركبي خيل ؟
سيا بحزن : بقولك عمري ما شوفته في حياتي هعرف أركبه إزاي ؟
بدر بجدية : طب خلصوا فطار وإلبسوا عشان نروح ، ألبس حاجة مريحة
خلصوا فطار ولبسوا وركبوا كلهم العربية عشان يروحوا إسطبل الخيل
سيا واقفة وسط الخيول وبتحاول تلمس واحدة فيهم بس كانت خايفة لإن الفرس بتتحرك وبتطلع صوت
بدر كان لابس نظارة شمس سودا ف قرب للفرس وهو
بيقول : الخيل عنده عزة نفس وكرامة ، لو حس إنك خايفة منه هينفر منك ، هاتي إيدك
سيا مدت إيديها ف مسك بدر إيديها ، حست إن جسمها كله بيترعش
حط بدر إيد سيا على الخيل خلاها تطبطب عليه وهو بيقول : شوفتي الموضوع سهل إزاي ؟ هي بس محتاجة تثقي فيها وتحبيها
سيا بتوهان : هي فعلاً محتاجة إنك تثق فيها وتحبها
بدر فهم قصدها ف قال : إحم ، طب بما إنك مبتعرفيش تركبي خيل إركبي ورا كينان أو ورايا ، عجباكي أنهي فرسة ؟
سيا من غير ما تبصلهم : هي أنهي واحدة بتاعتك ؟
بدر : اللي لونها إسود هناك دي وشعرها أبيض
بصت سيا للفرسة كانت جميلة أوي ومختلفة ، قالت بذهول : دي جميلة جداً ومميزة ماشاء الله
بدر : دي إيلينا الفرسة بتاعتي
سيا بحب : هركب وراك
بدر إداها سديري أسود وقال : ألبسي دا عشان لو لقدر الله وقعتي تحفظي عظمك
ساعدها تطلع وراح طلع على الخيل بمهارة وسيا راكبة وراه
كانت ماسكه جاكيته بطرف إيديها ف قال : لما هنتحرك هتجري هي بسرعة ، إمسكي فيا جامد شوية ، بأقوى ما عندك
ميلت سيا بجسمها وحضنته من ورا وهي راكبة وراه ، بدر رفس برجله في جمب الخيل بالراحة ف إتحركت وهي بتجري
سيا بصويت : يالهوووي هقع
بدر بجدية : إمسكي فيا جامد
حضنته سيا جامد وشعرها كان بيطير وراها وهي راكبه وراه ، كينان وقف الفرسة بتاعته وصورهم وهما راكبين كان شكلهم خيالي ، صورهم فيديو وصور كتير
الفرسة مشيت بعيد لحد ما دخلت عند النهر ، وقفت في نص النهر ووطت راسها وبقت تشرب ، نزل بدر من عليها ونزل سيا في وسط النهر ، مسكها من وسطها ونزلها لحد ما وقفها قدامه
بدر ببرود : هي وقفت هنا عشان كانت عاوزة تشرب و ..
قاطعته سيا وهي متعلقة في رقبته وقالت بعشق : أنا بحب أوي أكون معاك
* عند كينان
نزل من الفرسة بتاعته وهو بيتنفس بالعافية عشان جري بيها كتير ، قعد مستنيهم لقى بدر ماسك الفرسة بتاعته وسيا ماشية جمبه ووشها أحمر
كينان بمصمصة شفايف : هببتي إيه يا بت ، كل ما تستفردي بالراجل تهببي مصيبة
قعدت جمبه سيا وهي بتشوف بدر بيلاعب الفرسة وقالت : معملتش حاجة قولتله أني بحب أكون معاه
كينان بصدمة : والزعيم سكت ؟ عارفة إن في بنات كتير بيغازلوه ف بيصدهم بطريقة وحشة ؟ غريبة أنه ساكتلك
سيا بأمل : تفتكر ممكن ييجي يوم يحبني فيه ؟
كينان بحزن : بدر قلبه حلو بس مكسور ، لو عرفتي تعالجي قلبه يبقى كسبتيه طول عمرك
بدر قربلهم وقال : مش جعانين ؟ حابين تاكلوا حاجة معينة ؟
كينان بيقول : بما إني الحمد لله بدأت أدوق ف نفسي أوي ف أكلة سمك حلوة كدا
بدر بص ل سيا وقال بنبرة إهتمام أول مرة تسمعها منه : وإنتي يا سيا مش نفسك في حاجة معينة ؟
سيا بإبتسامة : اللي تحبه إنت هاكل منه
كينان : هوب هوب هوب
بدر بإحراج : أنا عادي والله باكل أي حاجة ، المهم يلا طيب عشان نروح نغير وبعدين نروح ناكل برا
ركبوا العربية ورجعوا البيت يغيروا هدومهم ، سيا وهي بتلبس كان في رقم غريب إتصل عليها كذا مرة ، ردت في الأخر لقت واحد بيعاكسها وكل ما تقفل يتصل تاني
نزلت تحت لقت بدر بيشرب كاس وبيدخن سيجار ف قالتله : بدر ، الرقم دا قرفني عمال يتصل عليا كل ما أكنسل يتصل عليا تاني
سيا بغضب : أهو بص ! بيتصل أهو
مد بدر إيده ليها وخد الفون ورد وهو بينفخ السيجارة وبيقول : أيوة يا حبيبي ؟ بتشتكي من إيه عشان أريحك ؟
لا رقم غلط إيه إنت متصل على رقم يخصني بترجع في كلامك ليه مش تسترجل كدا ؟ مش إنت عاوز دلع ! هدلعك أنا طول الليل
الراجل قفل ف بدر مد إيده بالفون ل سيا وقال : لو كلمك تاني قوليلي ، متتضايقيش عشان حوار تافه زي دا
سيا حضنت الفون وهي بتبصله بلمعة عين
بدر لاحظ دا ف قاطع أفكارها وقال : خلصتي لبس ؟
سيا فاقت : ها ! أه أه خلصت خلاص ، مستنيين كينان بس
نط كينان من فوق السلم ف سيا أتخضت وصوتت
كينان بصوت عالي : أنا جااااهز يا زعيم
ركبوا العربية وأتحركوا بيها لحد ما وصلوا عند المطعم
سيا جت تنزل رجليها إتلوت ووقعت على الأرض وهي بتصوت
كينان وبدر جريوا ناحيتها بخضة
بدر بقلق : مالك !!
سيا بألم : رجلي ، رجلي بتوجعنييي ااااااه
رجليها كانت باينة من الفستان وفي واحد واقف يتفرج
بدر بغضب : مستغني عن عينك ولا إيه ؟ غور من هناا
غطى رجليها وراح حاطط إيده تحت جسمها ورفعها بإيده عن الأرض
ميلت راسها وحطت راسها على صدره و ...
يتبع ..
تكملة الرواية من هناااااااااااا
 روايةخارج قانون الحب الفصل 11-12-13-14-15بقلم روزان مص…){kind=link}
تعليقات
إرسال تعليق
فضلا اترك تعليق من هنا