روايةخارج قانون الحب الجزء الثانى2 الفصل 11-12-13-14-15بقلم روزان مصطفى كامله (جميع الفصول كامله)رواية اصحاب الظلال السوداء

|11|

" ‏باﻷمس كنا نفتقد الحرية، اليوم نفتقد المحبة، أنا خائف من الغد ﻷننا سنفتقد الإنسانية "

دخلوا قعدوا جوا في البلكونة وكانت مامة كينان بتحضر الغدا ، قعدت هي قدامهم وقالت لكينان بمواساة : عرفت إنك إتجوزت من بدر وهو عزمني لكني زعلت منك جداً .. كنت مستنية إبني يتصل يعزمني وقولت طالما هو معملش كدا من نفسه يعني أكيد مش حابب وجودي ف مش هنكد عليه ف يوم زي دا ، بدر كان دايماً يطمني عنك وأنا بحبه زيك كفاية إن هو خد باله منك في عدم وجودي .. وسمعت إن مراتك توفت بيقولوا مقتولة وشغال تحقيق زعلت جداً وعزمتكم عشان أكون جنبك في الظرف دا

كينان ببرود : كتر خيرك ، أمال فين جوزك ؟

لمت مامته شعرها لفوق وهي بتقول : لا إتطلقنا من حوالي شهر وأنا قاعدة لوحدي أهو ، لكن أنا كويسة

بدر بيبص بطرف عينه للعربية المركونة تحت ومطفية وهو عارف إنها كانت وراهم من أول ما طلعوا

رفع راسه فجأة وقال لمامة كينان : في مخرج تاني من الشقة غير الباب الرئيسي ؟

مامة كينان : أه في سلم المنور الباب في المطبخ

قام بدر وهو بياخد علبة السجاير بتاعته

سيا بتبصله : على فين ؟

بدر بهدوء : سجايري قربت تخلص ف هنزل أجيب

بيوجهه كلامه لمامة كينان : ممكن أخرج من المنور ؟

مامة كينان : sure * أكيد *

نزل بدر من باب المنور لحد الشارع

العربية السودا كان قاعد البودي جارد باصص على مدخل العمارة

تك تك تك * خبط على إزاز العربية *

نزل الإزاز ف لقى بدر قدامه وهو حاطط سيجار في بوقه وبيقول : معلش لو هعطلك عن المراقبة ، معاك ولاعة ؟

* في البلكونة

سيا بتبص على بدر من فوق وهي قلقانة

مامة كينان بضحكة : مش هيتخطف متقلقيش

إنتبهت سيا وهي بتبتسم وبتقول : بطمن لما بيكون جمبي مش أكتر

مامة كينان : بدر طيب وكويس إوعي تخسريه ، أنا عرفت إنه كويس وإتطمنت على كينان معاه لإنه مقساش قلب إبني عليا بل بالعكس كان همزة وصل بيني وبينه

كينان بحزن : هو مش محتاج يقسي قلبي عليكي ، أنا كدا من غير تدخل حد

فضل يتناقش كينان مع والدته وسيا بتبص على بدر من البلكونة

* تحت

بدر بإبتسامة : هتنزل من العربية بالراحة كدا وتركب معايا بدل ما أولعلك في تانك البنزين ونترحم عليك ، ولعلمك أنا بحب النوع دا وجربته قبل كدا ، إنزل يالا

البودي جارد نزل راح مخرج بدر المطواة بهدوء وهو مسلطها على ظهره وبيبص على الناس في الشارع وهو مبتسم

فتح بدر عربيته وقال للواد يركب

شافت سيا الكلام دا من فوق ف قامت ونزلت

قعد بدر في العربية جمب الراجل وقال وهو مسلط المطواة على جمبه : أحلى حاجة في المنطقة دي مش كل متر تلاقي كمين شرطة ، هنا هُس هُس خالص .. عماير جديدة بقى

الراجل : أنا كنت واقف عادي لقيتك بتهددني ف عشان كدا ..

بدر بمقاطعة : تؤ تؤ تؤ ، بذمة أبوك دا منظر واحد تستخف بعقله ؟ إنت في حد باعتك وهتقولي هو مين

الراجل ساكت

بدر ببرود بيغرز المطواة حتة صغيرة جداً في جمب الراجل ف التاني بيخاف وبيقول : توفيق بيه اللي طلب مني كدا

تك تك تك

* حد بيخبط على إزاز العربية

بدر بهمس للراجل : أقسم بديني لو إتحركت لأشرحك

نزل بدر الإزاز لقى سيا واقفة

لف للراجل بسرعة وقال : إنزل ، وروح بلغ البيه بتاعك إني هكلمه إنهاردة

نزل الراجل وراح لعربيته جري

بدر قفل عربيته وسحب سيا من دراعها وهو بيعض شفته اللي تحت وبيقول : إزاي تتحركي من غير إذني والدنيا مش أمان ؟

سيا بتبص وراها وبتبص لبدر بعتاب : مين دا ؟ إحنا مش هنخلص بقى هنفضل في التوتر دا كتير !

بدر بغضب مكتوم : إطلعي بس قدامي عشان إنتي مش فاهمة حاجة وكان ممكن تروحي فيها ..

دخلها الأسانسير وراح داخل وراها وهو بيبص يمين وشمال وراح قافل باب الأسانسير وراهم

بدر واقف وباصص لفوق وهو بينفخ وسيا مكتفة إيديها في الأسانسير وبتقول : مين داا !! إنت عاوز تشلني ! عاوزني أبقى أرملة ؟ بتعمل كدا ليه !

داس بدر على زرار تعطيل الأسانسير وبعدين قال بزعيق : إهدي !

سيا إتخضت ف خبط إيده في الأسانسير جامد عشان خوفها ، بعدين قال من بين سنانه : من ساعة ما طلعنا وفي عربية سودا ماشية ورانا وراكنة تحت بتراقبنا ، أسكت ؟ ولا أنزل أطلع عين أهله وأعرف هو مين ؟

سيا برعب : لا متنزلش ! عشان أنا مش لاقية قلبي في الشارع عشان تخضني عليك كل شوية يا بدر

بدر بيقربلها : سلامته

سيا وهي بترجع لورا : لم نفسك إحنا في الاسانسير وغالباً فيه كاميرات

بدر بيحاوطها بإيده : مفيش صدقيني أنا مافيا قديم وفاهم في الحوارات دي

سيا : لينا بيت ليناا بيت إتلم

داس على زرار التعطيل تاني عشان يرجع الأسانسير تاني وهو لسه باصصلها بعدين قال من بين سنانه : نستنى ماشي

طلعوا وفتحتلهم مامة كينان وهي بتقول : فينكم خضتوني ، حطيت الاكل ومرضيناش ناكل غير لما تطلعوا

قعد بدر جمب كينان وهو بيقول : سيا قلقت بس ف نزلت ورايا

ميل بدر على كينان وهو بيقول بهمس : توفيق باعتبنا حد يراقبنا ..

بص بدر قدامه بثبات إنفعالي مُريب ف بصله كينان بصدمة وهو بيقول بهمس : تفتكر ليهتفتكر ليه ؟

مامة كينان : بتحب السلطة يا بدر ؟

بدر بضحكة : مباكلش غيرها

مامة كينان بضحكة : لا هتدوق المكرونة الفرن بتاعتي

* بتحطله في طبقه *

بدر بهمس لكينان : نخلص بس من العزومة وهرسيك على الحوار

سيا بتلعب بالشوكة في طبقها وهي بتبصلهم بقلق

خلصوا غدا وراحت تعملهم مامة كينان القهوة

بدر بيقول لكينان : بقولك من ساعة ما طلعنا وهو ماشي ورانا ، ثبته تحت بالمطوة لولا نزول سيا كان زماني مخلص عليه

كينان بغيظ : بيراقبنا ليه إبن المتضايقة دا ، أكيد في حاجة

بصله بدر بطرف عينه ف فهم كينان النظرة وبص بحزن قدامه ومردش

ساندين هما الإتنين على سور البلكونة وسيا قاعدة

قدمتلهم مامة كينان القهوة وهي بتقول : بتتوشوشوا ف إيه ؟

سيا بزعل : هما كدا يعملوا مصايب ومتعرفيش عنها حاجة

كينان بتبريقة : إنتي بتخوفيها مننا ليه !

بدر وهو بيشرب من القهوة : مش فاهم أنا ..

خلصوا قعدة وحضنت هي كينان وهي بتقول : ما تبات معايا إنهاردة ؟

كينان بتعب : مش بعرف أنام غير في سريري

مامته : طب على الأقل تعالى شوفني من نفسك مش هقول لا على فكرة

كينان بإبتسامة : إن شاء الله

نزلوا وركبوا العربية ، كينان قعد جمب بدر وسيا قعدت ورا

كينان لبدر : عشان إيه بيراقبنا ومن إمتى في بيننا حركات الغدر دي ؟

بدر ببرود : من ساعة ما قتلت واحدة من اللي بيشتغلوا معاه

كينان بعصبية : وهي تخصه ف إيه بروح أمه ، دا حقنا نروح نخلص عليه عشان رمى في حضننا واحدة خاينة

بدر بتفكير : أنا معرفش هو عارف إنها خاينة وبيستعبط ولا هو زعلان عليها ، أصل هو اللي مربي البت دي الله يجحمها ، هوصلكم البيت وهروحله

سيا عشان عارفة إنه عنيد ملقتش حاجة تقولهاله ف قالت : ورحمة إبنك ما هتروح ..

بصلها بدر في المرايا ف وطت هي راسها ، بص للطريق تاني وقال بنبرة مبحوحة : مش رايح .. بس أياك أسمع الحلفان دا تاني

سكتت سيا مردتش لحد ما وصلت البيت

دخلوا ورمى بدر مفاتيح العربية على الترابيزة وقعد على الكرسي وقدامه كينان ، وسيا ساندة على الحيطة

فتح بدر الإسبيكر وهو بيتصل على توفيق

رد توفيق وهو بيقول : كنت مستنيك

بدر بسخرية : ما إنت لازم تستناني طبعاً ، أنا مبستناش حد أنا الناس بيستنوني

توفيق : متثقش في نفسك كدا وتنسى إني ساعدتك ، بس ياريتك قدرت .. عضتني من دراعي لحد ما قطعته

بدر بتفكير إستهزاء : دراعك ؟ أه تقصد ال .. ياجدع فداياا * عشان بيتكلم في الفون ف خطر إنه يذكر إن كينان قتلها لكن توفيق فهم *

توفيق بتهديد : سلملي على كينان أوي أوي لحد ما أشوفه

بدر ببرود : السلام بيكون من خلالي انا ، يعني عشان تسلم عليه لازم تتخطاني وإنت عارف إني ناشف عليك أوي

توفيق بعصبية : إنت نسيت نفسك !

بدر بعصبية أعلى : إنت اللي نسيت نفسك ياروح أمك ! دا إنت بتاع كبد وقوانص يالااا * بيتريق عليه عشان تاجر أعضاء *

بدر بعصبية بيكمل : إنت اللي بدأت العداوة مش عاوزك ترجع تعيط ، وتقول نعمل قعدة صلح عشان إنت عارفني مع أشكالكم بياع ، ولو جبت سيرة كينان قدامي تاني هعملك زيارة حلوة هتحبها * بيهدده *

بيكمل بدر وبيقول : المره دي رجعتلك الراجل بتاعك على رجليه المره الجايه هتغدا كبد وقوانص على حسكم * بيهدده بالقتل هو ورجالته *

قفل بدر في وشه وحرك رقبته يمين وشمال بعصبية

كينان بغضب : سامع بيقول إيه ! بيهددك بيا

بدر ببرود : رقبته تحت إيدي ميقدرش يمسك ، عيب ياض إنت مستقل بالزعيم ؟

نفخت سيا وطلعت فوق وهي قلقانة

كينان بإستغراب : آيه دا مالها ؟

بدر وهو بيرجع راسه لورا : تصدق وتؤمن بالله أنا عارف إنها هتقلب بنكد ، مع إني كنت هموت وأروح البيت بدل ما نعطل الأسانسير على الناس وبتاع

كينان بيبصله مش فاهم حاجة ف نفخ بدر وقال : هطلع أشوفها في إيه ، وإنت متخافش توفيق مش متخلف عشان يقل بعقله معايا الأيام دي ، هو عارف كويس إن رجالته عاجزين ف مش هيهاجم لايروح فيها خصوصاً بعد ما خسر نصار وسونيا أهم إتنين عنده

طلع بدر ودخل الأوضة بتاعته لقى سيا بتسرح شعرها قدام المرايا وبتبصله منها بعتاب

فضل بدر باصصلها بعدين قال فجأة : بتعرفي ترقصي شرقي ؟

رمت سيا المشط وهي بتبصله بصدمة وبتقول : نعم !!

يتبع ...

#خارج_قانون_الحب٢

#روزان_مصطفى

#بقلمييييي

| 12|

" لا يصح إلا الصحيح ، الباب الذي يأتي لك منه المُعاناة أغلقه لتستريح ! "

#بقلمي

سيا رمت المشط وبصتله وقالت : نعم !!

بدر بوضوح : بقولك بتعرفي ترقصي شرقي ؟

سيا برخامة : مبعرفش لا ..

بدر بحسرة : خسارة والله .. كان نفسي أعيش دور المعلم

هي بعوجة بوق : ما كفاية عليك دور الزعيم

بدر بصوت عالي : هههههه ، لا عجبتني دي

سيا جاية تتحرك من قدامه راح ساحبها من دراعها وهو بيقول : أنا مش بكلمك ؟

سيا بوجع : أاااي بالراحة يابدر إيدي بتوجعني

بيسحبها ليه وهو بيشم ريحتها : وأنا قلبي بيوجعني ، أهون عليكي

بتبعد نفسها وهي بتقول : مش هخليك تقربلي يابدر طول ما إنت مكمل في الشغل اللي معرض حياتك للخطر دا

حط بدر صوابع إيديه بين خصلات شعره وهو بيقول : إبتدينا نكد

سيا بعتاب : نكد عشان خايفة عليك ؟ نكد عشان مش عوزاك تقربلي وأحمل منك تاني وإيدي ع قلبي لا إبننا يتيتم ولا هو ذات نفسه يموت وأتعب تاني

بدر وهو بيضغط على جسمها بين دراعه كان هيكسرلها عضمها قال : مفيش كلب بيقربلنا بسيبه بيتنفس وعايش ، مبقعدش وقت طويل عشان أخد حقي ، وعلى فكرة من ساعة ما إتجوزنا شغالة نكد الله ينور مع إنك قبل الجواز إنتي اللي خلتيني أحبك بسبب حبك ليا

سيا بحزن : أنا اللي مريت بيه مش سهل عليا عشان أفضل زي ما أنا ، خلاني طول الوقت خايفة ومرعوبة من فكرة أصحى ألاقي نفسي لوحدي في الدنيا دي وكمان معايا بيبي ، أو ييجي يوم مصحاش وأقابل ربنا وأنا مش جاهزة

بتكمل وهي بتبصله بعشق : بموت فيك يا بدر يا كابر بس لازم أعاندك لحد ما تتعدل وتبعد عن السكة دي

بدر إتنهد وقال : لو سيبت المافيا هشتغل إيه !

سيا بلمعة عين : معاك فلوس تفتح بيها شركة أو مشروع كبير وتبقى إنت سيده

بدر بعصبية : مش ملاحظة إنك بتضغطي عليا ؟؟ مش عوزاني أقربلك مش هقربلك دي بقت عيشة تقرف

خرج من الأوضة وهو متعصب ف قعدت سيا على السرير بحزن وهي مش عارفة تتصرف إزاي

دخل بدر على أوضة كينان لقى كينان قاعد ع الفون بيتفرج على فيلم

بدر بغيظ : خش جوا شوية

كينان بإبتسامة : هتنام جمبي يا زعيم ؟ تعالى

بدر وهو بيقلع جزمته وبيحدفها جامد : دي بقت عيشة نكد ، أيوة هتخمد جمبك

قفل كينان فونه وطفى النور وهو باصص للسقف

بدر بهدوء : إتخمد إنت كمان عشان نصحى بكرة بدري ..

كينان بتساؤل : رايحين في حتة يا زعيم ؟

بدر بتعب : هنقابل واحد من رجالتنا بكرة في البار ، هنتفق معاه على حوار كدا يخص توفيق .. الصبح عاوزك تقول للهانم تلبس وتيجي معانا ، أنا مبكلمهاش بس مينفعش أسيبها لوحدها هنا من غير أمان

كينان بنعاس : حصل يا زعيم

* صباح تاني يوم

قاعد بدر قدام كينان في المطبخ ، نزلت سيا ودخلت وهي بتقول بتعب : صباح الخير

كينان بس اللي رد وقال : صباح النور يا سيا

بصت لبدر بعدين قالت لكينان : تشرب معايا لبن ؟

كينان رفع كوباية القهوة قدامها يعني بشرب

سيا : طيب تمام

كينان : سيا بالليل خارجين رايحين بار عشان هنخلص شغل هناك ، ف إنتي لازم تيجي معانا

بدر بيلعب في فونه ومش رافع راسه ولا بيبصلها

سيا كتفت إيديها وقالت : مممم ، الساعة كام ؟

كينان : يعني على تسعة كدا ، جهزي نفسك

سندت بظهرها على الرخامة وهي بتبص لبدر بعدين قالت : بس يارب محدش يعترض على لبسي وقتها

حدف بدر فنجان القهوة بتاعه وإتدلق ، كينان وسيا إتخضوا

بدر وهو مغمض عينه : لو جدع يا كينان عاوز أشوفك لابس حاجة مبينه بس طرف رجلك وشوف هعمل إيه

كينان بضحكة : بتغير عليا يا زعيم

بدر بزعيق : ولاااا متتهبلش ، أنا طالع

طلع بدر اوضته وقعد كينان يضحك ف جابت سيا مناديل ومسحت القهوة المدلوقه وهي بتقول : شايف عصبي إزاي ؟ هو على كدا بقى من إمبارح

كينان : متستفزيهوش يا سيا ، متخرجيهوش عن شعوره وترجعي تشتكي وحاولي تخففي عنه بدل ما تزودي عليه

سيا بخبث : حاضر ، هطلع أنا أخد شاور عشان نعرف نبدأ يومنا كويس

كينان بتعب : تمام

* في أوضة بدر

كان بيجيب حجات من الدولاب ، قربت سيا من الدولاب وهي بتحاول تجيب حاجة من الرف اللي فوق مش عارفة ، عماله تنط وتشب برضو مش عارفة

مد بدر إيده بسهوله وجابلها اللي بتحاول توصله ف قالت : شكراً * بتبصله ببراءة *

قربلها بدر وكان لسه هيبوسها راح عدل نفسه وخبط باب الدولاب جامد عشان مش عارف يتحكم في نفسه معاها وقام خرج من الأوضة ، ضحكت هي على كدا وبدأت تاخد شاور

قعدوا يتغدوا سوا وبدر برضو مش عاوز يبصلها أو يتكلم معاها عشان كل يوم تنكد عليه لنفس السبب ، وهي عماله تحاول تستفزه عشان يفتح كلام معاها مش عارفة وبتفشل ..

* الساعة تسعة بالليل

بدر بيدخن وبيبص لكينان بيقول : هنقعد ساعة بقى عشان نلبس

كينان بهدوء : بالراحة عليها يا زعيم دي مهما إن كان ست وبتحب تتزوق

مسك بدر السيجارة المولعه وكرمشها بإيده وهي مولعة وقال : نعم يخويا ؟؟ تتزوق لمين ! طب وديني لو لبست حاجة مش عجباني ما في خروج من أساسه !

سمع صوت جزمتها الكعب على السلم ف رمى السيجارة وبصلها من تحت لتحت بغضب كدا .كانت لابسة فستان إسود وعليه جاكيت جينز وجزمة كعب

دقق بدر في شكل الفستان على جسمها بعدين قال بعصبية : أنا في العربية حصلوني ..

خرج وسابهم ف قالت سيا بغيظ : شايف ! شايف دا حتى مقاليش كلمة فيها تحذير مثلاً أو حاجة

كينان بوشوشة : المهم أنا زي ماقولتلك حاولي إنتي بس متستفزيهوش عشان أم اليوم دا يعدي على خير

ركب كينان جمب بدر وسيا ركبت ورا

بدأ بدر يسوق وهو بيبص من وقت للتاني في المرايا على سيا اللي قاعدة ورا ، لاحظت هي دا ف قالت تثير إهتمامه راحت مخرجه روج من شنطتها وبدأت تحط فيه وهي باصة لمراية بدر ..

بدر عمال يدقق على تفاصيل وشها ولون الروج عليها ومش مركز مع الطريق خالص

تييييت

كينان بخضة : كنا هنخبط يا زعيم ، إنت كويس أنزل أسوق أنا ؟

بدر بتكشيرة : أنا تمام خلاص قربنا نوصل أساساً .

وصلوا قصاد البار ودخلوا

بدر لكينان : قعدها على ترابيزة قريبة مننا عشان متقعدش بعيد وتبقى تحت عيني .. عينينا يعني

كينان بإبتسامة : حاضر يا زعيم

قعدها كينان على ترابيزة قريبة منهم ، وقعدوا هما على الترابيزة مع الراجل بتاعهم

بدأوا يتكلموا عن الشغل

الراجل : أنا أول ما عرفت إنك عاوزني يا زعيم جيت على طول مترددتش ، إؤمرني بس ف أي مصلحة وهخلصهالك

بدر بيشرب من الكاس بتاعه : جدع ، في راجل أنا أعرفه شخصياً إسمه توفيق إشتغلنا معاه قبل كدا لو فاكرة

الراجل بتفكير : بتاع الأعضاء يا باشا ؟

بدر وهو ماسك الكاسة : مظبوط ، هو معروف في دايرتنا يعني ، في بيننا حالياً عداوة ، إكتشفت إنه بيراقبني ف أنا عاوزك تروحله على أساس إني طردتك من عندي وبتاع وتستسمحه إنك تشتغل عنده

الراجل : بس إنت بتقول إنه بيراقبك يا زعيم ، يعني أكيد زمانه عارف إني قاعد معاك

بدر تركيزه مع سيا اللي بتبصله بكيد ..

بدر مركز معاها وهي بتاكله وضاغط ع الكاس اللي في إيده ، وهو بيبصلها من تحت لتحت بعدين جفوزه تترعش ويرجع يبص للراجل اللي قدامه

بدر بتوتر : ل لا ماهو أنا قفشت الصبح الراجل اللي كان مخليه يراقبننا ف ..

جه واحد قعد قدام سيا وبدأ يتكلم ، هي في الأول كانت متجهلاه بس لما لقت بدر مركز معاها بدأت تتكلم مع الراجل

بدر بيعض شفته اللي تحت وهو باصصلهم

الراجل اللي قاعد قدام بدر : معايا يا زعيم ؟

رمى بدر الكاسة ع الترابيزة ف وقعت ع الراجل بتاعه وراح قاسم لترابيزة سيا

حرك رقبته يمين وشمال وهو بيقول للواد : قوم من بدام المدام بتاعتي ..

الواد برخامة : وإن مقومتش !

بدر بعصبية بس بيحاول يبان بارد ، بيخلع حزامه وبيقول : هخليك إنت كمان مدام

الواد قام مفزوع ورجع لورا ، سك بدر شنطة سيا وحدفها عليها وهو بيقول وهو على أخره : يلااا ..

سحبها من إيديها ف قامت معاه

الراجل لبدر : والشغل يا زعيم ؟

بدر بغضب : هبقى أكلمك ..

سحب سيا وكينان ماشي وراهم وركبوا العربية

طول ما بدر سايق بيحاول قدر الإمكان يبعد عينه عن سيا لحد ما وصلوا

كينان عرف إن بدر متعصب على أخره ف قال : هطلع أوضتي أنا يا زعيم ، تصبح على خير

بدر ساحب سيا من إيديها وهي بتتألم وبتقول : في إيه طيب إهدى انا كنت بقوله يقوم بالذوق والله !

بدر مبيردش عليها وساحبها لفوق برضو لحد ما وصلوا للأوضة

بياخد نفسه بالعافية وبيقربلها وهي بترجع لورا وبتقول : عل على فكرة والله العظيم كنت بكلمه بس كنت بقوله يقوم

بدر من بين سنانه : والروج اللي بتحطيه قدام عينيا !

سيا ببراءة مصطنعة : كنت بظبط شكلي

بدر بتضييق عين : بتتعمدي تستفزيني ؟

سحبها ناحيته جامد وبكل قسوة غيرلها معالم الروج اللي في وشها ..

* في فيلا توفيق

واقف قدامه الراجل بتاعه وتوفيق بيقوله : كان لازم أحترم ذكاء بدر وأبعتله حد أحسن منك ، المشكلة مش عارف أمسك عليهم حاجة بسبب إن أحسن إتنين في رجالتي ماتوا .. والبنت اللي إعتبرتها زي بنتي موتوها، إنت لو مكاني وعندك راجل خايب أوي كدا زيك هتعمل فيه إيه

الواد برعشة : يا باشا م ..

مكملش كلمته لقى رصاصة في نص راسه ، توفيق بيتف على الجثه وبيقول : أغبياااا، من كتر ما بصفيكم مش هيتبقالي ولا راجل !

* في أوضة كينان

عامل أكونت فيس بوك فيك بإسم " الجينيرال "

كان قاعد يشوف كلام الناس على السوشيال ف لقى فيديو في بنت شعرها كيرلي إسود ورفيعة جسمها رشيق وبتتكلم فيه عن أضرار السمنة وإزاي يكون عندك إرادة تخس ، كينان مركز معاها وهي بتتكلم كلمتين تشرح وتبتسم تلقائي يعني ماسكة ضحكتها ف بيضحك معاها

البنت في أخر الفيديو : معاكم كابتن مادلين لو حد عاوز يسأل عن الإشتراك في الجيم أو عن مواعيد الكلاس بتاعي يسيب كومنت وهرد عليه بنفسي

كينان مكانش بيتكلم إطلاقاً على السوشيال ولا حتى بيعمل لايك بالغلط .. لقى نفسه بيكتب كومنت " الإشتراك بكام "

فضل متردد يمسح ااكومنت ولا يسيبه

فات عشر دقايق وقرر يدخل يمسح الكومنت

لقى إن في حد رد على الكومنت بتاعه

فتح الإشعار لقى مكتوب من مادلين " تم الرد على الخاص " ..

يتبع..

#خارج_قانون_الحب٢

#روزان_مصطفى

#بقلميييي

تفاعل بقى عشان نكمل وتشجعوني ❤❤

|13|

" لا فائدة من إغلاق النافذة والمشهد مازال يدور في رأسك "

فتح كينان الرسايل بسرعة لقى في كذا حد باعت ف تجاهلهم وشاف الرسالة اللي لسه مبعوتة من مادلين

" مساء الخير يا جينيرال ، ثمن الإشتراك الشهري ٢٠٠٠ جنيه عشان في عرض عندنا في الجيم ، لو حابب تيجي تشوف المكان بنفسك والأجهزة الرياضية وكل شيء مُرحب بيك

العنوان / ****

كينان إبتسم تلقائي وهو بيقرأ , لقى نفسه بيكتب " أقدر أجي أخد فكرة الساعة كام ؟ "

مادلين تكتب الأن ..

ردت : " يناسبك ثلاثة العصر ؟ "

كينان : " تمام "

شافت وقفلت ، خرج هو من المسجات وهو بيتفرج على فيديوهاتها وصورها في البروفايل ، وعمال يعمل زوم على الصور لحد ما نام

* صباح تاني يوم

نزل كينان من أوضته وهو حاطط هاند فري في ودانه ولابس بنطلون زيتي وتيشيرت رمادي

لقى بدر واقف في المطبخ وقالع التيشيرت بتاعه وواقف قدام البوتوجاز وبيتفرج على فيديو طريقة عمل البيض المقلي

أول ما بدر شاف كينان قال براحة نفسية : أخيرااا صحيت ! تعالى ساعدني

كينان بضحكة : إيه دا يا زعيم ؟ طريقة عمل البيض المقلي ؟

إنت لو كنت صحتني وقولتلي إنك جعان كنت عملتلك

بدر بتنهيدة : يابني مش أنا ! سيا غالباً خدت برد ف بجهزلها فطار

كينان بإبتسامة : الزعيم بجلالة قدره يجدعان واقف بيحضر فطار ولواحدة ست

بدر حط إيده على رقبته من ورا وقال : مراتي يعم هو أنا كسبتها في رهان ؟

شال كينان السماعة من ودانه وقال : بص يا زعامة ، مبدأياً طالما برد ممنوع عليها البيض والسمك إسمع مني

بدر بضيق : ياعم متدخليش الطب في الأكل ياعم

كينان بتأكيد : بكلمك جد ، دي ممكن تشرب حاجة دافية ينسون أو أعشاب وساندوتش جبنة .. إهتم بيها في الأدوية بس ، ومتخليهاش تنزل لأحسن أتعدي منها وأنا رايح مشوار مهم

بدر بتساؤل : مشوار أيه ؟

كينان بثقة : هروح الجيم وكدا

بدر بتدقيق : يابني جسمك حلو مش محتاج جيم ، عضلات وبتاع

كينان : لا يا زعيييم أنا بجد هيطلعلي كرش عشان باكل وبقعد ، وكمان تغيير مود

بدر بهمس : خف شوية يا كينان عشان القضية مفتوحة لسه

رجع كينان كشر تاني ف قال بدر : خلاص روح طالما هيغير مودك بس متلفتش النظر ليك ، عاوز فلوس ؟

كينان : هو إشتراك الشهر بس ..

بدر فتح إزازة المياه وهو بيقول : معاك فل ، عاوز كام ؟

بدأ بدر يشرب ف قال كينان : ٢٠٠٠ جنيه

تف بدر المياه وهو بيقول : نعم يخويا ؟ ٢٠٠٠ جنيه في الشهر ! يولاد الحرامية

كينان بتوضيح : ماهو جيم هاي كلاس وبتاع

بدر بتريقة : هاي كلاس إيه وزفت إيه دا لو تامر هجرس هيدربك مش هياخد المبلغ دا ، بس هي شكلها عشان فلوس حرام على رأي سيا

كينان بأمل : طب إيه يا زعيم ؟ هتظبطلي الحوار دا ؟

بدر : بص خد الفيزا ومتسحبش إنهاردة أكتر من ٥٠٠٠ جنيه ، فاهمني ؟ هنتبعتر أنا وإنت وهنخش في موال من أين لك هذا

كينان بإستغراب : أنا مش فاهم إنت بقيت تخاف ع القرش ليه بعد الجواز ومبقاش قلبك ميت زي الأول !

بدر بضيق : عشان سيا ، مبقتش لوحدي أنا ، المهم طب ساعدني في الفطار بعدها روح إعمل اللي إنت عاوزه

كينان وهو بيسخن المياه : هعملها ينسون . وجبنة زي ما قولتلك

وقف بدر جميه لحد ما خلص وخد الصينية منه ، طلع كينان على أوضته وطلع بدر على أوضته مع سيا وفتح الباب بإيد وهو شايل الصينية بإيد

سيا بصداع : إيه دا ؟

بدر وهو بيقفل الباب : إيه يا حبيبي ، حاسة بإيه ؟

سيا بتعب : صداع ودايخة وبعدين * عطست * وبعدين برد شديد ..

قعد بدر جمبها وهو بيحط إيده على جبينها وقال : وسخنة كمان ، أنا السبب ، بسببي مفضلتيش لابسة وخدتي برد ، هكلم أحجز ميعاد في المستشفى عشان أتطمن عليكي

سيا بتعب : لا مش قادرة أتحرك

بدر وهو بيسند بدراعه وبيقربلها : هشيلك طيب ؟

سيا وهي بتبعد وشها : خلي في مسافة بيني وبينك عشان متاخدش برد

بيقربلها بدر ويبوس خدها

سيا بتعب : تؤ ! هتتعب بقول

* بيبوس خدها التاني *

بدأت تضحك ف قال بدر : أيووة بالظبط ، أنا توقفيني في المطبخ وأنا بتفرج على طريقة عمل البيض المقلي ؟

سيا بضحك : بجد عملت كدا ؟

بدر : أه والله ، بس طلع غلط عليكي ف عملك كينان ينسون وجبنة .

* في أوضة كينان

كان بيدور في دولابه على لبس عشان يروح بيه يدفع الإشتراك وياخد فكرة ، نقى طقم أخيراً وحطه على السرير عشان لما تيجي الساعة ٣ يلبسه ويروح

فتح الفيس بوك تاني وهو بيفتح بروفايلها بيشوف نزلت حاجة ولا لا ، كانت منزلة فيديو وهي راكبة العربية وماسكة إزازة مياه بتحركها يمين وشمال وكاتبة " to the gym " إلى الجيم

كينان بتلقائية : جايلك أنا إصبري ل ٣ بس ..

أول ما الساعة دقت ٣ لبس كينان ونزل وركب تاكسي بما إن عربيته الشرطة متحفظة عليها ، وصل للجيم وطلع فوق

وقف وهو بيبص حواليه بيدور عليها مكانتش موجودة ، كان لابس كاب إسود nike على راسه وتيشيرت أبيض مبين عضلاته ..

جاله واحد بيقوله : حضرتك جديد هنا حابب تشترك ؟

كينان بتنهيدة : أيوة بس هما اللي بيدربوا هنا كلهم رجالة بس ؟

الراجل

برخامة : إشمعنا ؟

كينان بعصبية هادية : يعم هو إيه اللي إشمعنا ؟ أنا عندي حساسية من الرجالة ليك فيه ؟

ههههههههههه

صوت ضحكة أنثوية مع برفان ظهر فجأة ، إلتفت كينان ببطيء بيبص على مين بيضحك ، كانت هي !

وضحكتها حقيقي حاجة من النوع اللي يفتح النفس

قربت هي منه وكانت ماسكة كوباية عصير برتقال وبتقول : أنا بجد أسفة إني خليتك تدور عليا بس حسيت بهبوط وسط التدريب ف روحت أشرب حاجة فريش ، معاك مادلين عامر أدمن البيدج الرسمية للجيم ع الفيس بوك وكابتن هنا

* مدت إيديها تسلم عليه *

كينان باصص لإيديها وباصصلها ، مد إيده بالراحة ومسك إيديها وهو بيقول : أهلاً وسهلاً

مادلين بنفس الضحكة : أكيد حضرتك كلمتني وأنا رديت عليك عشان كدا دورت عليا ، بص أنا سمعت أطراف كلامك مع كابتن سالم ، اللي بيدربوا هنا ستات ورجالة .. بس أنا هنا بدرب بنات ، لو إحتاجت مني أي مساعدة أكيد هعمل دا

كينان مش مركز في كلامها بس ملامحها كانت مبهجة جداً ومن نوع الناس اللي تحسسك إنك تعرفهم من زمان ، أو بتشيل عنك إحساس الرهبة بتاع دخول مكان جديد دا

كينان بإبتسامة مع إن الكاب مغطي نص وشه : هو أنا كنت محتاج حضرتك تتابعي معايا

كادلين بتبص لدراعاته : مع إن ماشاء الله شكلك من الرجالة اللي بيحبوا يهتموا بصحتهم وكدا

كينان بهدوء : دا حقيقي ، عشان كدا جيت عشان أفضل كدا متخنش ..

بتكمل مادلين العصير بتاعها وبتقول : طب إيه ؟ تحب تاخد فكرة عن الجيم ؟

بيبصلها هو بتدقيق وبيقول بثقة : لا أنا عاوز أدفع الإشتراك على طول ♡

* في أوضة بدر وسيا

سيا قاعدة على السرير وهي معيطة بسبب الصداع ولابسة سلوبيت جينز فستان ، وبدر موطي بيربطلها الكوتشي بتاعها

بدر بضيق : يخربيت أم دا رباط ، بتتعمل إزاي الفيونكة ! وليه لازم فيونكة يعني !

سيا بتعب : هووف يابدر خلاص هربطه أنا ، لازم فيونكه عشان كل الناس بتربطه فيونكة

بدر بعصبية : يخربيت دول ناس يا شيخة

سيا بتعب : خلاص يا بدر هلبس صندل ولا تقعد تتعصب على رباط

ربطه بدر بطريقة غريبة وقال : بصي بعد ما نرجع من الدكتور هنروح محل هدوم ، كويس إني معايا كاش عشان الواد كينان خد الفيزا بتاعتي وراح الجيم

بدر بيلبس الحزام وبيقول : وغالباً هيتأخر ف أنا قلقان عليكي عاوز أتطمن

سندت سيا على السرير وهي بتقول بدلع : إنت حنين أوي بجد بس مشكلتك عصبيتك

بدر من غير ما يبصلها : متكلمنيش بالنبرة دي تاني وإحنا خارجين

ضحكت هي وكمل بدر لبس عشان يوديها الدكتور

* في الجيم

مادلين وهي ماسكة الورق بتسجل لكينان : إسمك إيه ؟

كينان بهزار : حقيقي ولا فيسبوك ؟

مادلين بضحكة : فيسبوك عشان أحاول أفتكر إنت أنهي فيهم

كينان وهو بيسند على الرخامة وبيبصلها : مش كنتي قولتي لواحد تعالى الساعة ٣ ؟

مادلين بإبتسامة عريضة : أااه إنت الجينيرال ، ههههه ماشي ، هات بطاقتك بقى عشان نسجل البيانات

بهتت إبتسامة كينان وحس بخوف لو عرفت إنه كان متجوز ومراته وحوارات

مادلين حست إنه أتضايق ف قال بذوق : عندك مشكلة في البطاقة ؟ دي مجرد إجراءات روتينية للاشتراك

كينان فاق من توهاته وقال : ها ؟ لا معنديش

خرج محفظته وخرج منها البطاقه وحطها ع الرخامة قدامها

مسكت هي القلم وبدأت تكتب البيانات وحطلها هو الفلوس ، خلصت الورقة وقال : طيب يا أستاذ كينان ، تحب تبدأ أول يوم ليك جيم من بكرة ؟

كينان : ياريت ، بس هو حضرتك هتدربيني ؟

مادلين بتفكير وملامحها جد ، فجأة ضحكت وقالت : ماشي لو دا هيريحك طبعاً ، بس خلي بالك لو جو لمس أو الحركات دي أنا كابتن جيم هزعلك

كينان بيضحك : لا أنا مش منهم صدقيني

مادلين بإبتسامة : تمام هنستناك بكرة في نفس الميعاد أنا بكون موجودة عشان الصبح بوصل كارما المدرسة ..

كينان ملامحه بهتت وقال : كارما ومدرسة ؟

مادلين بضحكة : أه ، يلا هاف فان

سابته ومشيت وهو ساند ع الرخامة مش فاهم حاجة ! بس أكيد هيفهم ..

* عند سيا وبدر ، بعد ثلاث ساعات

دخلوا محل هدوم وبدر بيدور ليها على حاجة بيقول : سمعتي الدكتور قال إيه ؟ تلبسي كويس ومتناميش غير بهدوم كويسة

سيا بسخرية : والله ؟ ما تقول لنفسك

بتوصل لبدر رسالة على فونه من رقم غريب وهو مع سيا في محل الملابس بيختاروا الطقم

بيفتحها بدر بيكون مكتوب فيها بالنص " بما إن قضية سونيا إتأيدت ضد مجهول لعدم كفاية الأدلة ، ف المجهول اللي إنت سايبه لوحده في البيت مش هتحلق تودعه .. ويودعك "

وقعت الهدوم من إيد بدر وهو متنح ، سيا إتخضت وقالت : في إيه ؟؟

بدر بفزع وهو بيجري وبيسحبها معاه : كينان !

فضلوا يجروا لحد ما وصلوا للعربية ، ساق بدر بسرعة وسيا مبطلتش أسئلة : ماله كينان يا بدر ؟؟ الرسالة اللي جاتلك تخصه ؟؟ بدر رد عليا قلبي هيوقف

بدر بعصبية : إسكتيي بقى إسكتتتييي

وصلوا البيت لقى بدر باب البيت مفتوح ، دخل بخطوات مهزوزة وسيا وراه إيديها على بوقها كاتمة صرخة أو شهقة متعرفش ، كان في رجالة حوالي ٤ واقعين على الأرض وسايحين في دمهم ..

وكينان مرمي في الاخر وعلى صوابع

صوابع إيديه دم

سيا أول ما شافته قعدت على ركبها وهي بتعيط وبتقول : لا !! كينان !

بدر جري عليه وهو بيرفع جسمه وبيحضنه وبيبص لسيا ببوق مفتوح وملامح مش فاهمة

سيا جريت عليهم وحطت إيديها قدام وش كينان وهي بتقول بصوت متقطع : ق .. قاطع النفس

بدر حاضنه ومبينطقش

حطت إيديها على قلبه بعدين قالت بصريخ : عاايش ! قلبه بيدق قوم نوديه المستشفى !! قوم يلحقوه

كينان فتح عينه نص عين وهو بيقول : خليهم يلحقوني يا زعيم ، محتاج نقل دم عشان معنديش

بدر بيبص ل سيا بصدمة وهي بتبص لبدر مش فاهمة حاجة

قام كينان قعد إتعدل على الأرض وهو نايم على ظهره وعمال يضحك ومغطي وشه وبيقول : مش قاادر كتمت نفسي بالعافية

سيا بعياط : يعني إيه ؟؟

* فلاااش باك

كينان كان بياخد شاور وخلص ولبس هدوم البيت ، نزل المطبخ عشان يشوف حاجة ياكلها لحد ما بدر وسيا يرجعوا من برا

سمع صوت عربية داخلة راح يبص من الشباك بتاع الصالة لقى أربع رجالة بينزلوا منها

معرفش يفطر ف طلع فوق دخل أوضة بدر طلع رشاش ، أول ما إتهجموا على البيت كان من فوق السلم كينان نزل عليهم بالرشاش خلص عليهم ..

* الوقت الحالي

سيا بصدمة : ولما خلصت عليهم عملت نفسك ميت ليه ؟

كينان بضحك : بصراحة لما سمعت عربية تانية جاية قولت يمكن حد جاي يتأكد أنا إتقتلت ولا لا ف لغوصت إيدي بدم واحد من الجرابيع دول وروحت كاتم نفسي ، وأول ما لقيتكم داخلين قولت ميضرش أهو مقلب والسلام ، بس لما حسيتكم مرعوبين فتحت عيني وقولت عندكوا شااامبو

بدر بعصبية وهو بيخلع حزامه وبيجري ورا كينان : دا أنا هطلع دباديب أمك ، يالاااا يابن ال***

كينان بيجري يستخبى ورا سيا : ألحقيني ، إيه يا زعيم إنت سايب سوسن في البيت يعني ؟

سيا واقفة بينهم : خلاص يابدر عشان خاطري

بدر بعصبية : الغبي إبن الغبية توفيق الكلب باعتله رجاله يقتلوه بعد ما القضية إتقفلت ودا قاعد يهزر

كينان من ورا ظهر سيا : ياديني إنتي بتهديه إزاي دا انا صاحب عمره مبعرفش !

بدر وهو بيلف الحزام على آيده : ماشي يا كينان ، حسابك معايا بعدين ، أخلص بس من توفيق ال **** وأروقلك ..

يتبع ...

#خارج_قانون_الحب٢

#روزان_مصطفى

#بقلمييييي

|14|

" عيل مقموص ، كان واخد علقة موت من أبوه .. قاعد في الركن وبيعيط .. مستني إخواته يصالحوه .. وبنفسه أبوه على أخر اليوم ييجي يصالحه . ويجبله حجات ... نفس الإحساس أنا حسيته ساعة ما قابلتك بالذات ♡ "

* صباح تاني يوم

كله كان نايم ومحدش قام بدري زي المعتاد

منبه كينان بيرن : أبو أحمد خدني الكوافير أبو أحمد عينلي شوفير أبو أحمد

بيمد كينان إيده لفونه وهو بيبص بنص عين بيحاول يقفله وبيقول : أبوكي لأبو أحمد ع الصبح

بص في الساعة وهو بيتاوب لقاها ١١ الظهر ، حط الفون جمبه تاني وقام غسل وشه وغير هدومه

فتح الفيس بوك كالعادة وفضل يدور في الأكونت بتاع مادلين عشان يعرف مين كارما دي

شاف صور ليها كتير مع طفلة كدا وفيديوهات ف حس إنه متضايق

سيا نزلت لقته قاعد متضايق ف قالت : صباح الخير

كينان بتريقة : ناموسيتك كحلي إنتي والزعيم

خرجت باكيت القهوة وهي بتقول : أه والله يا كينان ، بننام كتير الأيام دي مش عارفة ليه

كينان بجدية : ما تنزلوا جيم معايا بدل قعدتكم دي

صوت بدر جه من وراه وهو بيقول : إنت لسه ليك عين تتكلم معانا يا بتاع الشامبو ؟

كينان بضحكة : كل ما أفتكر شكلكم وقتها ، المهم يا زعيم أول يوم جيم ليا إنهاردة هروح ع الساعة تلاته

بدر بجدية وقلق : خلي بالك ع نفسك يالا ، عامة أنا كمان رايح مشوار هوصل بس سيا عند أمك عشان أكون متطمن عليها أكتر ..

كينان : فل وديها

بدر بنبرة حزينة ولكنه تماسك : إنت عارف لو كان عندي أم كنت وديتها والله

كينان قال بمواساة : يعني أنا أمي كان لازمتها إيه في حياتي ، والله يا زعيم إنت كل عيلتي أساساً

بدر بتغيير موضوع : هطلع أنا ألبس ، وإنتي إشربي قهوتك ويلا

سيا بتساؤل : مشوار إيه اللي إنت رايحه ؟ رايح لتوفيق مش كدا ؟

بدر : متخافيش مش هقتله عشان أصلاً الحكومة عينها مفتحة اليومين دول علينا بسبب القضية ، رغم أنها إتأيدت ضد مجهول بس مش عاوز أخاطر ، المهم إلبسي

خلص بدر وسيا لبس وخرجوا ، طلع كينان يلبس لقى مكالمة من القسم بتبلغه إنه ييجي يستلم عربيته بما إن القضية إتقفلت على كدا ، خلص لبس وطلع على القسم وإستلم عربيته ، بعد ما خلص راح بعربيته ناحية الجيم

أول ما وصل لقاها راكنة عربيتها ونازلة وشعرها بيطير حواليها ، من المنظر فرمل العربية وهو متنح

إتخضت هي ع الشخص اللي في العربية راحت جريت عليها وهي بتخبط ع الإزاز

كينان من جوا العربية : بيت جمال أمك يا شيخه ، إهدى كدا إهدى

نزل كينان الشباك وهو بيحاول يخلي ملامحه باردة

مادلين بخضة : إيه دا الجينيرال؟ إنت كويس؟

كينان متنح : أه كويس أه ، إسمي كينان والله

مادلين بإعتذار : معلش والله أنا من خضتي بس

كينان بتساؤل وهو بينزل من العربية : بجد أتخضيتي عليا ؟

مادلين وهي بتقلع نظارة الشمس : أيوه طبعاً ، العربية فرملت قولت مية في المية اللي جواها أتخبط

كينان وهو بيعدل شعره : أصل لسه جايب العربية من التصليح ف .. يمكن عشان كدا كان صعب أتحكم فيها

مادلين بإبتسامة : أنا برضو حصلي موقف مش ظريف وأنا بودي كارما المدرسة ، كان

قاطعها كينان وهو بيقول : هي مين كارما لو مش هضايقك ؟ بنتك ؟

مادلين بضحكة : هي فعلاً زي بنتي ، دي بنت أختي الله يرحمها أنا باخد بالي منها لحد ما أبوها يرجع من الخليج عشان مقدرش ياخدها معاه

كينان بتنهيدة راحة : لا دا إحنا ندخل نتدرب بقى

مادلين : هههههه يلا ، عاوز تشتغل على العضل ؟

كينان بإبتسامة : ياريت ..

* في فيلا توفيق

نزل توفيق على سلم بيته وهو بيبص لقى بدر قاعد على الكرسي بتاعه وبيشرب كاس

توفيق بعصبية : إنت ليك عين تيجي لحد هنا ؟؟ مش خايف على روحك أصفيك !

بدر ببرود : إهدى كدا وإبلع ريقك عشان نعرف نتكلم ، فطرت يا بيبي ؟

توفيق بعصبية : أوعى تكون فاكر إنت وصاحبك إني هسيبكم عايشين معايا على الكوكب ، أنا سلمتلكم بت زي القمر رجعتوهالي جثة

حدف بدر الكاسة على الارض ف إتكسرت ، توفيق بيبصله بغضب

بدر بصوت عالي : إنت جايبلنا واحدة وسخة تمثل علينا عشان تنتقم لخطيبها ؟ انا لحد دلوقتي مش عاوز أديك الناحو عشان تروح مع اللي إرتاحوا ف إظبط الكلام كدا وإسمع أنا جايلك ف إيه ، ف داهية البت

توفيق بعصبية وغباء : وسخة زي أمك يا بدر ؟

صمت .. بس صمت وتوفيق أستوعب هو عمل إيه

كان بدر مقربله وقال ببرود غريب : الكلمة اللي إنت قولتها دي هتكون سبب تعاستك في الكام يوم اللي باقيين ليك في الدنيا ؟

توفيق بمحاولة ثبات : أنا مبتهددش زي ما بتعمل مع باقي أعضاء المافيا ، ف متحاولش

خرج بدر سلاحه وبظهر السلاح ضرب توفيق على راسه ، وقع توفيق تحت رجل بدر اللي رفع فونه بيتصل على كينان

* في الجيم

كينان كان بيرفع الحديد ومادلين واقفة وراه بترفع معاه ، الحديد مش تقيل عليه بس هو بيستعبط عشان توقف هي وراه

نزل الحديد وراح خد الفون يشوف مين بيتصل لقى بدر ، وقف بعيد شوية وراح رادد : أيوة يا زعيم

بدر بنبرة غريبة : تعالالي على فيلا توفيق .. من غير عربيتك ، من غير

عربيتك يا كينان فاهمني ؟؟

كينان بيبص وراه لمادلين وبعدين رجع بص قدامه وقال في الفون : إعتبره حصل يا زعيم

قفل كينان مع بدر وراح ناحية مادلين وهو بيقول بإعتذار : بصي بعتذر بس لازم امشي دلوقتي لإن والدتي محتجاني ، أنا عارف إننا مخلصناش وإني عطلتك على الفاضي

مادلين بإبتسامة : ولا يهمك مجاتش من يوم ، خلاص اشوفك بكرة بقى

كينان بتتنيح : أتفقنا هجيلك

مشيت مادلين من قدامه ف ضغط كينان على سنانه وهو بيقول : يعني حبكت دلوقتي يا زعيم !

* في بيت مامة كينان

والدته : إنتي أتعرفتي على بدر وكينان إزاي ؟

كانت سيا بتشرب النسكافيه ف نزلت المج من على بوقها وهي بتفتكر ، بلعت ريقها وقالت بتوتر : حادثة .. خبطوني بالعربية

والدة كينان بإبتسامة : طب إشمعنا بقى حبيتي بدر مش كينان ؟ هو سؤال غريب بس فضول

سيا بإبتسامة : بصي هو كينان كان حنين أوي وطيب من ساعة ما قابلته رغم إنه كان بيحاول يتظاهر بعكس دا عشان بدر ، بدر هو اللي كان دايماً خلقه ضيق وعصبي ، ف لما إتعامل معايا بطريقة كويسة لما وثق فيا حسيت بإختلاف وإني بتشد ليه ، هو عامة الحب مفيهوش ليه هو بييجي فجأة كدا

مامة كينان : يا سلام يا سلام على الكلام الحلو ، ربنا يخليكم لبعض يا حبيبتي

سيا : أميين

والدة كينان بغباء ولكنها متعرفش : طب إيه ؟ مفيش بيبي جاي في الطريق ؟

ملامح سيا إتغيرت للحزن ولكنها إبتسمت وقالت : كان فيه ، مات في بطني

والدة كينان بمواساة : يا حبيبتي ، ربنا يعوضك أنا معرفش سامحيني

سيا بإبتسامة : عادي والله الواحد ياما شاف ، بس الحمدلله

مامة كينان : طب بصي هديكي نصيحة هتنفعك

سيا بفضول : قولي ..

* في فيلا توفيق ، بعد خمس ساعات ..

توفيق بيفتح عينه على صوت حديد بيخبط في بعضه زي ما يكون مشارط وسكاكين

الرؤية إبتدت توضح قدامه وهو شايف بدر قاعد على الكرسي بيغني : فاكر سنيني ولا قلبك ناسيني ولاا ، الحب زاد ولا البعاد خلا الغرام ولااا

توفيق مش عارف يتعدل حاسس بوجع رهيب .

كينان بيخلع الجوانتي بتاعه فيه حبة دم وهو بيبص لتوفيق وبيقول بإبتسامة : صباح الخير يا عروسة

بدر بيعدل راسه وجسمه على الكرسي وهو بيقول : إيه دا ! شوف يابن المحظوظة ربنا كتبلك عمر جديد إزاي !

كينان بإبتسامة : طبعاً بما إنك لسه عايش هتستنى كام يوم ددا على ما تخش تستحمى والأفضل تلبس جلاليب واسعة

توفيق بتعب : ح حصل إيه ؟

بدر ببرود : زمان في عصر السلطان ، كان الحرملك بتاعه لازم ليه مشرف ، بس كان عنده نخوة وغيرة على الحريم بتوعه ، ف قالك يعمل إيه ؟ يجيب أغاا راجل يعني ويقوم عامل إيه ؟ بالمقص مخليه نص راجل لامؤاخذة ، ف أنا قولت ليه لا ؟ واحد بيجيب سيرة أمك قدامك يابدر ليه منحرمهوش من متعة إنه يكون راجل ! وعلى فكرة كنت عاوز أقص ليك لسانك بس كينان حبيب قلبي نصحني وقالي هو ميعرفش يقص لسان بس بما إنه قعد سنين يدرس عن الطب بعيد عن مجال كليته ف قال دي أسهل

توفيق بيبصلهم وبيبص لجسمه برعب

كينان بضحكة : وبدر قالي لو مات ف إيدك أنا كدا كدا كنت هقتله ف فداك ، أما لو ربنا إداله عمر وفضل عايش هيعيش بعين مكسورة ، وإنت عشان ربنا بيحبك ف هتعيش نص راجل الباقي من ناحيتك

توفيق بصريخ : يا ولاد ال ****** إنتوا عملتوااا إيه ، هوديكم في داهية هبلغ عنكم

بدر ببرود : هتروح تقول للظباط إيه ألحقوني في ناس خلوني نص راجل ؟ هتفضح نفسك وسط الظباط والعساكر يا هندسة ودول ما بيصدقوا هيقوموا راميينك للمساجين جوا يخلوك توفيقة على طول

كينان بيضحك جامد

بدر ملامحه إتحولت من الضحك للغضب وقال : أنا أمي بالذات اللي بيجيب سيرتها بيبقى كإن صابته لعنة ، بيفضل طول عمره دا لو عاش يندم إنه غلط فيها قدامي ، والمدام بتاعتي كانت قالتلي متلومش أمك على حاجة بس عاقب اللي يجيب سيرتها ، ودا اللي حصل معاك .

توفيق بغضب : ر .. رجالتي

بدر بغمزة : معندهمش ولاء ناحيتك خالص دول بقرشين إشتريتهم . ماهو يا موت يا فلوس وأنت وشطارتك تختار ..

قام بدر من على الكرسي وقال وهو بيبص لتوفيق : يلا يا كينان هو عرف غلطه خلاص

كينان وهو خارج ورا بدر : سلام يا عروسة ..

* خرجوا من فيلا توفيق من الباب الخلفي وهما مغطيين وشهم عشان الكاميرات ك العادة

فضلوا ماشيين مسافة طويلة لحد ما لاقوا تاكسي ، إداله بدر عنوان مامة كينان ف راحوا لقوا سيا روحت

بدر إتعصب إنها عملت كدا رغم إنه قال خليكي لحد ما أعدي أخدك ..

رجعوا البيت

اول ما دخلوا بدر زعق بعصبية : سياااا ، إنتي فين !

طلع لأوضته وفتح الباب

جاله صدمه من اللي شافه

بدر بتتنيحة وهو بيقفل الباب وبيسند عليه : نهار أبوكي إسود ! إيه دا !!!

سيا وهي بتلف حوالين نفسها ببدلة الرقص اللي لبساها وبتقول بسعادة : عجبتك ؟

يتبع ...

#خارج_قانون_الحب٢

#روزان_مصطفى

|15|

" أنا كنت قبلك في المحبة سوي ، بس إنتي حلوة .. إنتي حلوة أوي ، وكتاب قانون الدنيا لا يحتوي على وصفة تمنع عني تأثيرك ، وشك بيظهر فوق وشوش غيرك .. عشان إنتي حلوة .. حلوة أوي ♡ ! |

بدر بيبصلها بتتنيحة وبياخد نفس وهو بيقول : إيه اللي إنتي لابساه دا !

سيا وهي بتقربله بالفستان : إيه يا حبيبي مش قولتلي نفسي ترقصيلي شرقي ؟

بدر من بين سنانه : إقلعي المسخرة دي دلوقتي حالاً !!

* after 15 minutes

ولع قلبي لما شافها ولع ، كان مروح بس حلف لي هيرجع ، قالها هاتي رقمك لو ينفع

بدر حاطط سيجارة مولعة في بوقه وبيسقفلها وهي عماله ترقص

* في أوضة كينان

كان قاعد يتفرج على بروفايل مادلين كالعادة وسامع صوت أغاني ف ضحك على جمب وهو بيقول : زعيم الصبح وبالليل روميو

رجع يبص للشاشة تاني لقى مادلين بعتاله مسج

" والدتك بقت أفضل يا أستاذ كينان ؟ "

عقد كينان حواجبه وهو مش فاهم ف كتبلها " هي مكانتش تعبانة يا أنسة مادلين هي بس كانت محتجاني ضروري ف كان لازم أمشي ، بعتذر إني مشيت بالطريقة دي "

مادلين " ولا يهمك خلاص بكرة على ميعادنا ، تصبح على خير "

كينان وهو بيحدف الفون ع السرير : هو إيه اللي تصبح على خير ! هما كلمتين وتقفل !

* تاني يوم / الظهر

كينان دخل لقى سيا بتعمل أكل ف قال : الأكل خلص ؟ أنا رايح الجيم .. إيه دا بشاميل وبانيه ؟ لا أنا بحاول أخس

سيا بتبصله وبتقول : إيه يا كينان تخس إيه إنت جسمك حلو زي ما بدر قال ! ، وبعدين مش لازم جيم إنهاردة

دخل بدر المطبخ وهو شايل إزازة مياه كبيرة عشان يحطها في البرادة وقال : إيه حكاية الجيم معاك اليومين دول يا معلم ؟

كينان سند على الرخامة وهو بياكل خيارة وبيقول : نفسي مفتوحة اليومين دول للتدريب والعضلات والجو دا

سيا وهي بتحط الصينية في الفرن : خروجكم بقى كتير ومش عاملين إعتبار لتوفيق اللي ممكن يأذيكم

بدر وهو بيتأكد إن برادة المياه شغاله : لا ماهو توفيق مش هيأذينا هو اليومين دول عنده ظروف

كينان بص لبدر وضحك من غير صوت ف بصتلهم سيا بإستغراب وقالت : في إيه ؟ يعني إيه عنده ظروف ؟

بدر بيبوس راسها : يعني متشغليش بالك ، أنا الاوضة المقفولة اللي تحت هعملها مكتب ليا .. هجهزها يعني بأثاث مستورد وحجات شيك وكويسة

سيا بتعب : متحسسنيش إنك محامي يا بدر

كينان شافهم هيبتدوا خناق ف قال : طب خلاص مش هتغدا يا سيا بس عينيلي نص الصنية كدا عشان هرجع هفتان

سيا بضحك : روح طيب روح

طلع كينان ف سند بدر ع الرخامة مكانه وقالها : في إيه بقى ؟

سيا وهي ماسكه ظهرها : إيه ؟

بدر : إيه لازمة الكلمتين دول محامي ومش محامي

سيا : أيوة يا بدر بجد هتعمل مكتب عشان تباشر شغلك في المافيا من خلال أصحاب الظلال السوداء ؟

بدر وهو بيلعب في دقنه : هو إنتي مش منهم ولا إيه ؟

سيا : لا من ساعة ما خسرت إبني وأنا عرفت إنه مينفعش

كانت رابطة شعرها لفوق ف فكه بدر وهو بيفرده وبيقول : ورينا بس الجمال دا عشان محرمش عيني منه

سيا : يا سلام دا ع أساس إن إمبارح ..

قاطعها بدر وهو بيضحك وبيقول : لا إمبارح دا كان حالة خاصة ، حاجة مسخرة كدا

* تليفون بدر بيرن *

هو بإستغراب : دا أبويا !

سيا بإستغراب أكتر : هو يعرف رقمك منين وجاب فون إمتى ؟

بدر : أخر مره سبت معاه رقمي عشان يكلمني من أي حتة يطمني عليه .. بس معرفش جاب فون إمتى

رد على أبوه وهو بيقول : إيه يا محمد جبت فون إمتى ؟

أبوه : مش هتحترم نفسك وتقولي يا أبويا . واحشني وقولت أكلمك ، الأجندة السودا اللي وصلتك لستك عرفتني على أرقام أهلي في البلد ف جبت محمول بالكام قرش اللي سبتهم ليا وركبت شريحة ، كلمتهم وإتطمنت على أحوالهم هيعملولي إحتفال كدا على طريقتنا الصعيدية بمناسبة خروجي من السجن ، قولتلهم هجيب إبني ومراته ونيجي

بدر بتكشيرة : أهلك دول فين عشان أنا معرفهمش ! بلد إيه لأنك محكتليش عنهم لا إنت ولا تيتة وكنت صغير

أبوه : الصعيد يا واد

بدر بيبص ل سيا : والله أنا معنديش مشكلة بس معايا ناس مش عارف هتستحمل جو الصعيد ولا لا

أبوه : دا أحلى جو وأحلى ناس ، ظبط حالك وكلمني هنطلع الفجرية

بدر بعتاب : يعني إنت مكلمني يوم السفر أظبط أموري ، عامة ماشي يحج هنشوف

أبوه بحزم : مفيش هنشوف أنا إديت كلمة للناس خلاص

بدر : خلاص تمام هنظبط حاجتنا ونيجي ، وهجيب الواد كينان معانا

أبوه : ماشي يلا .. أشوفك بخير

قفل السكة ف سندت سيا بإيديها على الرخامة وهي بتقول : الصداع هيموتني

مسكها بدر من وسطها وهو بيقول : تطلعي ترتاحي شوية ؟

سيا بتعض شفتها اللي تحت : لا سيبك مني هكون كويسة ، أونكل كان عاوز منك إيه ؟

بدر مسك خصلات شعرها بين إيديه وراح مقرب لوشها وباسها وهو بيقول : يخربيت كلمة أونكل وهي طالعة منك

سيا بإبتسامة : بس بقى لأحسن كينان ينزل في أي لحظة ، كان بيقولك إيه بجد

بدر ببلاهة : يعني أهله في البلد عاملين ليه إحتفال بمناسبة خروجه من السجن وهو قالهم إبني ومراته جايين

سيا بصدمة : والبلد دي فين ؟

بدر بهمس : الصعيد ..

سيا بتعب : لا يابدر دا مشوار طويل وأنا حقيقي حاسة بصداع ودوخة ، مش هقدر أتحمل الطريق دا

بدر بيبص لطريقتها وهي مكشرة ف قال : ولا أنا عارف هكمل الطريق إزاي ، إنتي عاملة زي المخدرات الواحد يقربلك مرة ميشبعش منك

حطت إيديها على رقبته وهي بتقول : بحبك أوي ، وبحب الصدفة اللي جمعتني بيك حتى لو وحشة .. وقلبي بيتلهف عليك كل مرة وكإني مش مراتك وقريبة منك وبلمسك

بدر بتوهان في عينيها عدل ملامحه وهو بيضحك وبعدين قال : لا بصي أنا مبعرفش أتنحنح كتير بس أنا بعرف أعبر عن حبي بطرق تانية

وطى وحط إيديه تحت جسمها ورفعها بين إيده

سيا بضحك : بس كينان هنا عشان خاطري

بدر : بقولك رايحين الصعيد وهنبات يعني مش هعرف أشبع منك أناا ..

* عند كينان

خلص لبس وركب عربيته وراح للجيم ، أول ما وصل فضل يدور على مادلين ملقهاش ، سأل عليها واحد من الكباتن قاله بتتكلم مع خطيبها

كينان بلع ريقه وهو مصدوم وبيقول : خطيبها !!

دار في عقله مليون سؤال ! إزاي ملهاش صور مع خطيبها على السوشيال ؟؟ طب إزاي ملاحظش الدبلة في إيديها ! إزاي كل التفاصيل دي عدت عليه !

نزل راسه بحزن وقال : طيب بلغها إني جيت وملقتهاش ، ف مشيت

الكابتن بيكلمه كينان ماشي مبيردش ، هو محصلش بينه وبينها حاجة ماله حس بالحزن وإتضايق ليه ؟ ممكن مجرد إعجاب عادي !

كيناان ..

سمع صوتها بتناديه ، لف ببطيء بيبصلها وهو مبتسم على جنب

مادلين قربت منه وهي بتضحك ك العادة وبتقول : إيه بس أنا موجودة أهو

كينان بنبرة غريبة : الكابتن قال إنك مع خطيبك ف .. كنت همشي أنا ، هو ليه مش لابسة دبلة !

هي بإحراج وعينيها بتروح وتيجي : عشان الدبلة سيباها بقالي كذا يوم عند بتاع الذهب بيضيقها ليا عشان واسعة على صوباعي

كينان بأسئلة ورا بعض من غير ما ياخد باله : وليه مش حاطة صورك معاه سوشيال ؟

هي بإبتسامة : عشان دي خصوصيتي مش حابة أشاركها على أكونت الشغل بتاعي !

كينان بضيق : ما إنتي بتشاركي صورك مع كارما عادي !

حس بنبرته بقت عصبية وأسئلته سخيفة ولقاها بتبصله بصدمه ف قال وهو بيغمض عينه : أنا بعتذرلك أنا كنت سخيف ، أنا بس مضغوط ف .. عن إذنك

كينناان .. أستاذ كينان وأشتراكك ؟؟

سابها ومشي وهي عمالة تنادي عليه مبيردش عليهاا

* في بيت بدر

سيا بتاخد شاور وبتنادي على بدر : حبيبي ممكن تجبلي الفوطة عشان أخرج ؟

بدر بتعب : حاضر ، أنا مش قادر أخد شاور وراكي والله ..

قام بدر وفتح الدولاب بتاعها وهو بيدور في الرفوف على فوطة ، الفوط كانت ف الرف اللي فوق ف مد إيده عشان يجيبها سحبهم كلهم بالغلط نزلوا على الأرض وقعوا

وقع من تحتهم ملف فيه ورق يخص سيا

وطى بدر و مسك الملف بإيده وهو بيفتحه وبيشوف اللي جواه ..

* في الصالة

رجع كينان من برا وقفل الباب وراه بتعب ، طلع على أوضته ودخلها وقلع هدومه ومدد على سريره وهو باصص للسقف

فضل على الوضع دا حوالي ربع ساعة بلا شعور ..

مسك فونه ودخل على أكونت مادلين وفضل يبص عليه بصه أخيرة .. قبل ما يعملها بلوك

رمى فونه وهو بيقول لنفسه : بطل تدلق على نفسك كل ما تعجب بواحدة . متخليش قلبك يتكسر بسهولة

أتنفض لما سمع صوت تخبيط عنيف على باب أوضته !!

* في بيت مادلين

صاحبتها كانت واقفة في المطبخ بتاع بيتها بتعمل ليها ولمادلين نسكافيه ومادلين بتحكيلها بتقول : لقيته إتغير مع إنه مكملش يومين جيم ، تعرفي أنا ك كابتن صارمة في تعاملي ولكن بضحك عامة .. ف هو ك شخصية غامضة وإصراره إني أدربه وكمان تصرفاته الغريبة مخلياني مضايقة إنه مشي من غير سبب ، دا يا بنتي ..

قاطعتها صاحبتها وهي بتقول : مادلين إنتي جاية من ساعتين وتقريباً حكيتيلي الحوار أربع مرات ، يابنتي دا زبون للجيم عادي ومشترك فيه ومرتاحش ف قرر يمشي ، إنتي شاغلة دماغك ليه ما اللي يقعد يقعد واللي يمشي يمشي

مادلين وهي بتاخد كوباية النسكافيه من صاحبتها : تؤ مش عارفة ! أصل مفيش سبب يمشي كدا ! بصي أنا هبعتله مسج أفهم هو متضايق من الجيم عامة ولا متضايق مني

صاحبتها : يابنتي بطلي جنان الرجالة بتفهم غلط ، يخربيتك إحترمي حسن خطيبك طيب

مادلين وهي بتفتح الفيس : ما انا محترماه يابنتي عيب اللي بتقوليه دا ، بس إحنا يهمنا ثقة العميل

صاحبتها بتضحك وفجأة وش مادلين أتغير وقالت بشهقة : دا عملي بلوك !!!

يتبع ...

#خارج_قانون_الحب٢

#روزان_مصطفى

#بقلميييي

" إحبسوا أنفاسكم للبارت الجاي ، في حجات كتير هتوضح ، وفي حالات رومانسية شديدة هتكون موجودة .. وفي ألغاز جاية كتير ، البارت هيكون الساعة ٢ ودا لإنه هياخد وقت على تظبيطه لو قدرت أنزله بدري أكيييد هعمل كدا من غير ما تقولوا ، بحبكم "

تكملة الرواية من هناااااااااااا

قصر الروايات

القائمة الرئيسية

الصفحات

تابعنا من هنا

روايةخارج قانون الحب الجزء الثانى2 الفصل 11-12-13-14-15بقلم روزان مصطفى كامله (جميع الفصول كامله)رواية اصحاب الظلال السوداء

أخر المواضيع من قسم : قصص حديثه

تعليقات

إرسال تعليق