روايةخارج قانون الحب الجزء الثانى2 الفصل 16-17-18-19-20بقلم روزان مصطفى كامله (جميع الفصول كامله)رواية اصحاب الظلال السوداء

رواية اصحاب الظلال السوداء

" "لقد غادر كل من في الفندق .. فالخدمة سيئة للغاية .. إنه يشبه قلبك كثيراً "

بدر فضل ماسك الملف في إيده وكان لسه هيفتحه لقى سيا بتنادي عليه من جوا : يلا يا بدر هموت من البرد

خد نفس عميق ورجع الملف مكانه وهو عارف إنه هييجي وقت يفتحه ويشوف اللي جواه ، رجع الفوط فوقه مكانها وخد فوطة وخبط على سيا وهو بيقول : خدي الفوطة وأنا هنزل أبلغ كينان بسفرنا وأظبط شوية حجات في العربية

سيا خدت الفوطة وهي بتقوله : ماشي يا حبيبي

خرج بدر من الأوضة وهو متضايق إن سيا مخبية ورق عنه حتى لو ورق عادي ف إيه لازمة تعينه تحت الهدوم ؟

راح لأوضة كينان وخبط على الباب لقى كينان بيقول بصوت ميت : إدخل

دخل بدر لقى الأوضة ريحتها سجاير وكينان قالع هدومه وباصص للسقف

بدر بإستغراب : ما تقوم تلبس حاجة يالا ! وإيه كل السجاير دي ؟

كينان بملل : مخنوق شوية يا زعيم

بدر بوش جامد : طب قوم طيب حضرلك طقمين عشان مسافرين

كينان بيطفي السيجارة اللي في إيده : على فين ؟

سند بدر على الباب وهو بيقول : أهل أبويا في الصعيد عاملين عشانه حفلة كدا بمناسبة خروجه من السجن

كينان طلع دخان السجاير من بوقه وهو بيضحك وحاطط آيده على وشه

بدر : أنا برضو كان رد فعلي زيك ، محسسني إنه راجع من أمريكا

كينان بخنقة : بس السفرية جت في وقتها يا زعيم ، أنا فعلاً محتاج أغير جو

بدر بهزة راس : طب يلا قوم غير هدومك ورتب أوضتك قبل ما تمشي ، بطل عفانة يالا

قام كينان من على السرير وحط الشنطة الصغيرة وطلع كام قميص وبنطلون ..

* في أوضة بدر

بدر دخل مرة واحدة ف من الخضة الفوطة وقعت من على سيا

سيا بخضة وهي بتنزل تجيبها وتحطها على نفسها تاني : محدش هيقطعلي الخلف غيرك

بدر بضحكة : بتتكسفي يا بيضا ؟

سيا : أتلم هاا .

بدر بجدية : مش عارف بس مش حابب نبات هناك ، ممكن ليلة الحفلة بس ونرجع .. لو أبويا عاوز يقعد هسيبله فلوس يبقى يرجع بيها

سيا وهي بتبص في الدولاب : هو أصلاً المفروض هنركب كلنا في عربيتك ؟

بدر : أيوة ، عشان لو في كمين ولا حاجة يكون كينان معايا عشان إنتي عارفه القضية

سيا بفضول : طب إنتوا عملتوا حاجة في توفيق ؟ أصل بقالكم كذا يوم مش بتجيبوا سيرته

بدر بضحكة : توفيق اااه .. ربنا يقومه بالسلامة ، حضري بس الشنطة بسرعة ، متحطيش غير هدوم النوم بس عشان هي ليلة وراجعين

سيا : حاضر

جهزوا حاجتهم ونزلوا تحت وبدر بيحط الشنط في شنطة العربية وبيقفلها

بدر بجدية : سيا هتقعدي ورا جمب كينان عشان هقعد أبويا جنبي

سيا بتفهم : هعمل كدا من غير ما تقول أصلاً

قعدت سيا جمب كينان ورا وساق بدر العربية لحد ما وصل لبيت جدته القديم وهو بيضرب كلاكس ..

كينان بهمس : يا زعيم إحنا الفجر الناس نايمة ، ما ترن على أبوك ياعم

بدر بيبصله بطرف عينه : ما يلعن أبو الناس ماهما بيقرفونا خمسه كيلو بطاطس بعشرة ومبنتكلمش

سيا بتخبط كينان في دراعه : دا متناقشهوش يا كينان دا صاحب الردود الجاهزة

نزل أبو بدر وهو ماسك شنطة صغيرة ، نزل بدر شال عنه الشنطة وحطها في شنطة عربيته مع شنطهم

ابوه بعد ما ركب جمب بدر بص ورا وقال : كدا تركب مراتك ورا ؟ ما أقعد أنا ورا عادي

بدر وهو بيشغل العربية وبيبص للمرايا : ما خلاص يعم محمد متعملهاش حوار ، قولي بس فين ف الصعيد وخليك معايا

ابو بدر : إدخل بس الصعيد وبعد كدا أمرك سهل ..

ساق بدر العربية وفضل يتكلم مع أبوه في الطريق ، وسيا بتبص لفون كينان اللي عمال يلعب لعبة Gta

سيا بهمس : هات ألعب شوية يا كينان عشان تليفوني فصل شحن

كينان وهو مركز : لا إنتي غبية وهتخسريني ..

سيا بتبص قدامها ببوز وبتقول : مش عاوزة .

كينان : طب إتفرجي معايا وأنا بلعب

سيا برفعة حاجب : مش أنا غبية ؟ مش عاوزة أتفرج

بدر بيبصلهم في المرايا وبيقول بتريقة : إنتوا الإتنين متقعدوش جمب بعض تاني

كينان بيضحك وسيا بتتريق : ننيننيني ..

فضل بدر سايق لحد ما وصلوا الصعيد .. بص لأبوه كان نايم وسيا وكينان كذلك كان الصبح بدأ يطلع

بدر لبس نظارة الشمس بتاعته وهو بيقول بصوت عالي : حج محمد وصلنا الصعيد ، هنروح فين ياعم !

أبوه فاق وهو بيبص حواليه وبيقول : بالسرعة دي ، أسأل أي حد عن عيلة الهوارة هيدلك

بدر بيبص لأبوه بطرف عينه : إنت أهلك من الهوارة ؟

ابوه : أهل أبويا أه ..

سأل بدر وعرف مكانهم لحد ما وصل لبيت ضخم كبير ودخل بعربيته

نزل وهو بيبص للبيت وأبوه نزل معاه

سيا بإنبهار : ماشاء الله يا عمو بيتهم جميل أوي

كينان بيتاوب : بيت في الصعيد عادي

أبو بدر بحزم : ألا تكون مش عجباك الصعيد يواد ، إقفل خشمك لو حد سمعك هيطخك ويتاويك .

كينان بضحكة : إيه جو ذئاب الجبل دا ، أنا فل عادي عاجبني تغيير الجو

بدر قرب لكينان وميل عليه وهو بيقول : ولا يا كينان إحنا هنا في الصعيد يعني لو بصيت لواحدة هيدفنوك مكانك وساعتها مش هحوش عنك عشان لو حد بص لمراتي هعمل كدا ..

كينان شال طرف النظارة الشمس بتاعته عن عينه وهو بيبص حواليه وبيقول : أبص على إيه يا زعيم

دا كلهم لابسين إسود في إسود ..

أهلاً أهلاً يا مرحب بالحج محمد وجماعته يا حمد الله على سلامتكم يولاد الأصول

ابو بدر بيحضن الراجل وبيقول : يا مرحب بكبير الهوارة ..

الراجل بيبص لبدر وكينان وهو بيقول : مين فيهم ولدك اللي من صلبك ؟

أبو بدر : الإتنين ولادي بس اللي من صلبي صحيح بدر اللي واقف هناك أهو

قرب بدر عشان يسلم على الراجل ف الراجل حضنه وهو بيقول : يا مرحب بأعز الرجال ، ماشاء الله هيبتك سبقاك

بدر : الله يعزك

الراجل بيبص ل سيا وبيقول : والحلوة دي مين يا حج محمد ؟

أبو بدر : دي تبقى مرات ولدي

بيشاور بإيده ل سيا : شايفة الباب دا يا ست الناس ، إدخلي هتلاجي الحريم جوا إتونسي معاهم لحد ما نقعد قعدة رجالة ، وكمان هيدوكي خلجات للحفلة بالليل * بعتذر للصعايدة أنا بتكلم حسب معرفتي البسيطة بلهجتهم ♡ *

راحت سيا ودخلت الباب دا ودخل الرجالة يقعدوا سوا .

اول ما سيا دخلت من الباب لقت ستات قاعدين جوا عمالين يضحكوا ويهزروا لكن لبسهم كان محتشم وقعدتهم كانت محترمة

الست الكبيرة اللي قاعدة وسطهم : دي شكلها الضيفة اللي تبع الحج محمد ، تعالي يا حلوة إتونسي معانا

سيا بإبتسامة وهي بتقربلهم : معلش لو هضايقكم بس هو عمو قالي إدخلي هنا

الستات بدأوا يضحكوا ف قالتلها : أهو عمو ده كبير الهوارة جوليله يا حج هواري ..

طبطبت الست على الحتة الفاضية جمبها وهي بتقول ل سيا : تعالي إجعدي ف ريحي .

قعدت سيا جمبها ف بصتلها الست وقالت : سمعنا إنك مرت إبن الحج محمد وعرفنا إنك مصراوية ، بس ماشاء الله إنتي لبسك طويل ومستر مش زي البنات هناك

سيا : مصراوية يعني من القاهرة ؟ هو مع حضرتم حق طبعاً بس البنات هناك كتير جداً محترمين

الست : مش بعيب في حد بس يعني عجبني إن العرق الصعيدي في بدر مادد ومستر مرته ، ألا إسمك إيه صحيح ؟

سيا بإبتسامة : سيا ..

الست : ها ؟ بس حلوة الله يحرسك ، إطلعي ريحي لحد بالليل عشان يكون فيكي حيل تسهري تتونسي معانا

بنت من اللي قاعدين وهي بتبص ل سيا بغيرة : إيه ظا هي مش هتعجن وتخبز معانا ؟

الست بتبصلها وقالت : دي ضيفة وعلى راسنا ، يلا منك ليها بلاش لكاعة خلصوا شغلكم

الست قامت ومدت إيديها ل سيا وهي بتقول : تعالي أخليكي صعيدية وأظبطلك خلجات ..

* في أوضة بدر وكينان

بدر لبس جلابية سودا صعيدي وعمال يبص لنفسه في المرايا

خرج كينان بيبصله وبيقول : عليا الطلاق زعيم ، صعيدي ماشي .. زعيم مافيا ماشي ..إبن ناس ماشي

بدر بصله وضحك وقال : إيه يابني دا صعيدي من مدينتي ؟ هتضحك الرجالة علينا

كينان وهو بيبص لنفسه : أعمل إيه ما أنا حلو بزيادة ..

بدر بنعاس : هنام شوية عشان نعساان وعشان أقظر أفوق ل بالليل

* بالليل

ضرب نار في الهوا وخيول وستات داخلين طالعين بصواني الأكل والشربات وصوت زغاريط لكن الستات كانوا محتشمين

كينان كان قاعد وبدر كان واقف مع الرجالة ، جه راجل إظا لبدر عصاية وإشتغلت أغنية

لو جبنا شيرة الجدعنة إسمك لازم يتقال .. صاحبي اللي بيه بفتخر من يوم ما كنا عياال

خد بدر عصاية من راجل واقف جمبه ورماها لكينان عشان يقوم يرقص صعيدي معاه

بدأوا يرقصوا بالعصيان

تشرف اي حد عشان راجل بجد لو وسط النار تسد عمرك ما تجيب ورا .. تكبر من اللي منك جدع من صغر سنك حبيبي وربنااا .. بحبك يا صاحبي من وأنا لسه بحبي وأنا مسنود عليك

سيا قاعدة بتبصلهم وبتضحك بفخر كدا .

واحدة من الحريم اللي قاعدين ورا سيا : هو دا ولد الحج محمد ؟

اللي جمبها : بيجولوا أه

البنت التانية : ودا متجوز ؟ ماشاء الله عليه

لفت ليهم سيا وهي بترفع إيديها بدبلة الجواز وبتقول : أنا مراته ، يمكن متعرفناش الصبح .. بس أنا موجودة

البنت بتبصلها من فوق لتحت : أه يا حلوة .

بصتلهم سيا بقرف ورجعت بصت لبدر وكينان اللس بيرقصوا سوا ..

توب الرجولة معمول عمولة على قد جسمك .. لو غبت حتى في أي حتة كفاية إسمك .. بحبك يا صاحبي ..

خلصت الأغنية وحضن بدر كينان والناس عمالة تحييهم ..

بدأوا ياكلوا سوا وخلصت الحفلة على كدا ..

الصبح ودع بدر ابوه والهوارة عشان أبوه قرر يقعد معاهم إسبوعين كدا وبعدين يرجع .. ، خد شنطه هو وكينان وسيا ورجعوا القاهرة ..

أول ما وصلوا الشقة سيا بتقول بتعب : اليومين دول بجد مش هقظر أتحرك لا سفر ولا خروج .. السفرية كانت متعبة

بدر بيحط الشنط على الأرض : بس كانت حلوة كفاية إن أبويا أتبسط ، الراجل دا مشافش يوم عدل في حياته

كينان بنعااس : أنا هطلع أنااام يا زعيم

سيا وهي بتشم نفسها : وأنا مش حاسة إن ريحتي لطيفة ف هطلع أخد شاور ..

طلعت سيا تاخد شاور وكينان عشان ينام ، طلع بدر الشنط للاوضة وسيا في الحمام

قلع قميصة وجزمته وفشل عريان من فوق ..

بص للدولاب بتاع شيا كذا مرة لحد ما قام وخرج الملف من تحت الفوط تاني ..

وفتحه للأسف

لقى شهادة ميلاد سيا عادي ، وعقد بيع شقة أبوها لعمامها بعد وفاة أمها وأبوها .. وهي موقعة عليه تقريباً أستغلوها أو أستضعفوها ..

ولقى صورة قديمة ..

ثلاث رجالة وأتنين

ستات ..

واحد من الرجالة دول بدر فضل مركز في وشه لحد ما عينه وسعت وجابت دموع وإحمرت

فلااش بااك من سنينن كتير فاتت

بدر لقى أبوه بيخنق أمه وفي راجل واقع على الأرض ومضروب بسكينة والسكينة متغرقة دم ..

نفس الراجل اللي كان مع أمه الليلة دي .. هو الراجل اللي في الصورة اللي في ملف سيا ..

خرجت سيا من الحمام وهي مبتسمة وبتقول : كنت خايفة المياه تكون ساقعة لأحسن السخان مطفي .. خش خد شاور و ..

بدر بيرفع الصورة قدام وشها وبيقول وهو بيشاور على راجل معين : مين دا !!

سيا بصت للدولاب لقته مخرج الفايل ف أتضايقت أنه لعب في حاجتها

ف قالتله بعصبية : بتلعب في حاجتي ليه يا بدر ؟

عينيه إحمرت زيادة وهو بيقول من بين سنانه : مين داا !!

سيا مفيش حاجة على وشها غير الإستغراب : دا عمي الله يرحمه ، أسمع إنه مات في حادثة بس كنت صغيرة مشوفتوش .. ليه ؟

بدر وقع من إيده الصورة وهو بيبص ل سيا وهي بتبصله بأستغراب ، قربت عليه وجريت وقعدت على ركبها قدامه وهي بتقول : مالك بس ؟؟ أيه مضايقك في صورة عمامي وأبويا !

حط إيده على راسه والذكريات متراكمة عليه

صوت جدته : منك لله إنتي وأختك على اللي عملتوه في إبني وحفيدي ..

أمه وهي بتتزين قدام المرايا وبتبصله وبتقول : نام بقى ؟ دا ماصدقت أبوك خرج مش عشان تفضل إنت صاحيلي

صوت الجيران وجثة أمه خارجه وهما بيشتموها وبيتفوا عليها وبيكسروا قُلل وراها ..

نظرته الأخيرة للبيت وهو خارج منه مع جدته وهو طفل

زعق بكل طاقة وحشة جوااه : لاااااااااا

أتنطرت سيا لورا ووقعت على ظهرها بألم وهي بتترعش من الخوف ومن تحوله المفاجيء

17|

" لا تتركني في المنتصف من كل شيء ، لا تتركني لعجز قلبي وحزني "

#بقلمي

بدر قاعد على السرير وماسك راسه وسيا واقعة على الأرض بتبصله بصدمة

هي برعشة : مالك بس ، طب إيه ضايقك طيب ، طمني يا حبيبي

قام بدر من على السرير وهو بيلبس وبياخد شنطة بيحط فيها حاجته وعينيه حمرا مش شايف قدامه

سيا بتمسك إيده وبتقول بعياط : بتعمل إيه ؟؟ بتعمل كدا ليه رايح فين !

بدر بيسحب دراعه من بين إيديها وهو بيكمل لم هدومه ، مسكت سيا هدومها وقعدت تلبس وهي بتترعش وبتبصله خايفه

خرجت من الأوضة راحت لأوضة كينان وهي بتخبط بعنف ..

كينان قام من النوم مفزوع وفتح الباب وهو بيقول : في إيه ؟

سيا بعياط : م معرفش بدر بيلم ف هدومه وعاوز يسيب البيت ..

كينان بصدمه : نعم !! وسعي كدا

خرج بدر من أوضته وراح لأوضة بدر لقاه بيلم في هدومه بجد

كينان بتبريقة : بتعمل إيه يا زعيم !!!

بدر مبيردش

كينان : طب رايح فين طيب ؟؟ رايح فين !

بدر بزعيق : ياعم رايح لجهنم ! سيبني بقى

سحب بدر شنطته وخرج من البيت وسيا بتجري وراه بتعيط مش فاهمه حاجة ، رزع بدر الباب ف قعدت هي قدام الباب تعيط .. ركب عربيته وساقها بسرعة ومشي بعيد

كينان قعد على السلم بيحاول يفوق عشان لسه صاحي وشايف سيا قاعدة على الأرض بتعيط

قام بهدوء ومد إيده ليها وهو بيقول : هو هيبقى كويس متقلقيش ، قومي معايا

سيا بعياط : وحياة ربنا ما عملتله حاجة ، والله ما عملت حاجة يا كينان

كينان بهدوء : أنا عارف ، قومي بس من على الأرض وفهميني بالراحة اللي حصل يمكن أعرف حاجة ..

سيا بتترعش وبتعيط بس مدت إيديها لكينان اللي سحبها من على الأرض بقوة ..

قعدها على كرسي المطبخ ووقف يعملها حاجة دافية عشان تهدى وهي عينيها حمرا وساندة إيديها على راسها بحزن

حط كينان قدامها مج النسكافيه وهو بيقول بهدوء : فهميني بقى ، حصل إيه لما روحتوا أوضتكم ؟

سيا بصوت تعبان : دخلت أخد شاور عشان راجعين من سفر ، أنا ورق أبويا وأي ورق مهم يخصني حطاه في ملف في الرف بتاع الفوط تحتهم عادي يعني .. لما خرجت من الحمام لقيت بدر ماسك الملف وماسك صورة وعينيه حمرا ، وبيشاور على عمي الله يرحمه وبيسألني مين دا ! قولتله عمي ، قعد يصرخ بعصبية وقام لم هدومه ومشي وأنا مش عارفة ليه

كينان بيقرب ل سيا وبيقول : وريني الصورة معلش

قامت سيا بتمشي بالراحة وبتتمطوح يمين وشمال ، وفجأة وقعت مغمى عليها قدام باب المطبخ ، جري كينان عليها عشان يلحقها ..

* في عربية بدر

وقف قدام بيت أبوه وأمه القديم ، نزل من العربية وهو ماسك شنطته وماسك المفتاح بالإيد التانية ..

دخل العمارة لقى البواب قاعد وهو بيقول : إزيك يا بيه ، يا مرحب

بدر ببرود : الست اللي قولتلك جيبها تنضف جت ؟

البواب : أيوة يا بيه وفضلت واقف على راسها لحد ما مسحت وغسلت وكنست .. ومتخافش يا بيه مسرقتش حاجة حاجتك ف أمان

خرج بدر من جيبه ورقة ب ٢٠٠ وإداها للبواب ف مسكها بإنبهار وهو بيقول : يديم عزك يا سعادة الباشا

طلع بدر للشقة بتاعته وحط المفتاح ودخل ..

رمى شنطة هدومه ع الأرض وقلع جزمته ودخل الشقة ..

البواب فتحله الكهربا ك العادة لحد ما بدر يروح ويظبط الموضوع دا لكنه في الوقت الحالي مش حاسس إنه على قيد الحياة من الأصل ! البنت الوحيدة اللي حبها بجد تطلع من عيلة سبب في نكسته ..

دخل الاوضة وإتحدف على السرير وهو بيعيط ..

لحد ما راح في النوم ..

حلم إنه قاعد قدام المرايا في أوضة أمه والشمس من الشباك بدأت تغرب ، نزل راسه بحزن وهو باصص للمرايا فجأة إيدين أمه حاوطت رقبته وهي بتقول بصوتها اللي من كتر ما السنين عدت قرب ينساه أو نساه : يا إبني يا حبيبي ، لو إحتاجتني ف أي وقت أنا موجودة وحاسة بيك

بص في المرايا شاف أمه وراه وكانت شابة زي ما كانت بشعرها الاسود وبفساتينها الحلوة

بدر كمان في الحلم كان شاب ف بصلها بإبتسامة وهي حضناه ورجع راسه عليها لورا وهو مغمض عينه بسعادة

في الواقع وبدر نايم وبيحلم الحلم دا ، نزل من عيونه خطين دموع رغم إنه في عز النوم ..

* في بيت بدر وكينان

كينان راشش برفان بتاعه على طرف إيده وعمال يمرر إيده قدام وش سيا عشان تفوق ، كشرت هي وفضلت تكح لحد ما فتحت عينيها بالراحة وهي بتقول بتعب : إيه حصل ؟

كينان وهو قاعد على ركبته قدام الكنبة اللي هي ممدة عليها : يابت قولي إنتي إيه اللي حصل ؟ طلبت منك تجيبي الصورة اللي كان ماسكها بدر لقيتك وقعتي من طولك !

سيا بخضة : بدر فين يا كينان ، والله ما عملتله حاجة

كينان حس بصداع من الدوامة دي وقال : أنا هطلع أوضتكم أشوف أم الصورة دي وخليكي هنا متتحركيش !

طلع كينان ع السلم جري لحد ما وصل لأوضة بدر وسيا

لقى الأوضة متبهدلة طبعاً ولقى الملف مرمي ع السرير وصورة مقلوبة على وشها مرميه فوق الملف

مسكها كينان وعدلها وبص فيها ، شاف بالفعل ثلاثة رجالة وإتنين ستات بس ميعرفش ولا واحد فيهم

خد الصورة ونزل تحت ل سيا اللي قاعدة على الكنبة ، وراها الصورة وهو بيقول : هو كان بيشاور على أنهي أنهي واحد فيهم ؟

بلعت سيا ريقها وهي بتبص للصوره بعدين شاورت على الراجل وقالت : عمي دا ..

بص كينان للصورة تاني وقال بهمس : إيه اللي ممكن يكون عمله الراجل دا خلا بدر يسيب البيت !

* صباح تاني يوم / في بيت أم بدر

الجرس كان بيضرب ف فتح بدر عينه بتعب وهو بيبص حواليه ، إستوعب اللي حصل ف قام من على السرير وهو فاتح قميصه ومش واخد باله وكان بيتاوب ..

فتح الباب لقى بنت أمل الصغيرة ف إبتسم بحزن وهو بيقول : عاملة إيه ؟

البنت بإبتسامة : باح الخير يا عمو ، ممكن ألعب ف بيتك ؟ أنا شوفتك بالليل وإنت داخل

بدر بإبتسامة : ماما تعرف إنك هنا ؟

البنت : تؤ تؤ ..

بدر بصوت حنون : طيب مش تعرفيها عشان متقلقش عليكي ؟

البنت بلوية بوز : ما هي هتضربني لو عرفت

بدر بيتاوب لقى أمل جاية من وراها وبتبصلها بتبريقة بعدين رفعت راسها لبدر وقالت : حمدالله على سلامتك يابدر ، إنت كنت بايت هنا

بدر بتعب : أه هفضل هنا كام يوم

البنت دخلت الشقة وإستخبت ورا بدر وهي بتقول : ما تخليني ألعب هنا يا ماما

أمل بتبريقة : تعالي هنا يابنت ! عمو تعبان

بدر حس إنه مخنوق من اللي حصل إمبارح وحاسس بتعب نفسي فوق طاقته خصوصاً إن سيا مش بتروح من باله ف قال : أنا ممكن أخرجها تتفسح شوية لإن شكلها محبوسة ..

البنت : أه عشان بابا مبقاش ييجي هنا تاني

بدر باستغراب لأمل : إيه دا هو جوزك مسافر ؟

أمل وهي بتعدل طرحتها وبتبتسم : لا مسافر إيه ، أنا وأبوها إنفصلنا من كام يوم . إتطلقنا يعني

بدر بتكشيرة : ربنا يعوضك

هي بتبصله بلمعة عين وبتقول : ياارب

بدر : خلاص سيبيها ومتقلقيش خليها تلعب شوية هنا وهسيب باب الشقة مفتوح

أمل بسعادة : وأنا هطلع أخلص كام حاجة تكون لعبت هي شوية ، بس إوعي تصدعي عمو

البنت بتنطيط : حاضر

وقف بدر وهو حاطط إيده في وسطه وبيبصلها بهزار بتضييق عين بعدين قال : إنتي عارفة إن لو حد صحاني من النوم بعاقبه ؟

البنت بخوف : بتضربه زي ماما ؟

بدر بيهرش في دقنه : مش بضربه أوي ، هو على حسب مين صحاني من النوم ، يعني لو اللي صحتني حاجة عسلية زيك كدا بقوم أكلها على طول

البنت بإستغراب : يعني إيه عسلية !

بدر بفتحة بوق : مش عارفة العسلية ؟ دا إحنا حتى في منطقة شعبية يعني ، هي حاجة كدا بتكون سمسم وملزق بعسل

البنت : يععع أنا بحب الشوكولاتة أكتر

بدر بإبتسامة حزينة : طب إيه رأيك هدخل أغير هدومي وأجيلك ؟ بس متخرجيش برا عشان محدش ياخدك

البنت بطفولية : لو حد أخدني هتعاقبه ؟

بدر بتكشيرة هزار : هضربه بقى

ضحكت هي راح راميلها بوسة في الهوا ودخل يغير هدومه في الأوضة ..

* في بيت بدر وكينان

سيا بتحط طبق الفطار قدام كينان وهو بيحاول يتصل ببدر بس بيديله غير متاح

حط كينان الفون بعصبية ع الترابيزة ف بصتله سيا بقلق وهي بتقول : عاملة وضع طيران برضو ؟؟

كينان بنفخ : أيوة ! طب ماشي عاوز تقعد لوحدك طمنا إنت فين !

سيا قلبها بدأ يدق بعدين قالت : يمكن قاعد مع أبوه ؟

كينان بصلها بصة بمعنى إنها غبية بعدين قال : إزاي وإحنا سايبين أبوه في الصعيد ..

سيا بحزن : ممكن يا كينان توصلني بيت عمتي ؟ أنا هروح أسألها يمكن يكون عمي دا عمل حاجة مثلاً أو كان سوابق .. أو متجوز مثلاً لازم أفهم الحكاية

كينان وهو بيقوم وبيحط الفون في جيبه : يلا طيب إلبسي جاكيت ويلا ..

سيا بتبص لطبقه : مش هتفطر ؟

كينان بضيق : يلا يا سيا الله لا يسيئك أنا أصلاً ماليش نفس

طلعت سيا لبست جاكيت ونزلت وراحت مع كينان لعربيته عشان يروحوا لعمتها

وصلوا لبيت عمتها ف قالت سيا لكينان : إستناني هنا معلش ، يمكن أتأخر فوق لكن متقلقش عليا هكون كويسة

كينان بقلق رغم كل شيء : متأكدة ؟

سيا بحزن : متقلقش

نزلت من العربية وقفلت الباب وطلعت العمارة

سند كينان راسه على إيده .. لقى حد بيخبط على إزاز الشباك بتاعه

نزل الشباك لقى البنت بتاعة ثانوي واقفة وحاطة ميك أب خفيف ولافة الطرحة وشايلة طبق في شوكولاته ومبتسمة

كينان رفع راسه وبصلها بإبتسامة وقال بحزن : إزيك !

البنت بتمد آيديها بالطبق : أنا فكراك من المرة اللي فاتت ، وبما إنك ضيف المنطقة تاني ف إتفضل

كينان : إيه دا ؟

البنت : شوكولاتة بمناسبة نجاحي في ثانوي .. خلاص داخلة جامعة

مد كينان إيده وخد واحدة وهو بيبصلها وبعدين قال بحزن : هتدخلي جامعة حلوة .. وتاخدي شخص كويس ، مش وراه مشاكل وهتكون حياتكم هادية

البنت إستغربت من كلامه ف لف كينان وشه الناحية التانية وهو بيغمض عينه جامد لإنه من كتر تعبه بيفضفض لأي حد .. بعدين قال : مبروك ع النجاح

البنت وشها بهت وقال : الله يبارك فيك

خدت طبق الشوكولاتة وكملت توزيع على الناس

* في شقة عمة سيا

يتبع ...

#خارج_قانون_الحب٢

#روزان_مصطفى

#بقلمييييي

( تفتكروا هيحصل إيه مع عمة سيا ؟ وهيحصل إيه مع بدر وأمل وبنتها ؟ تابعوا الجاي )

التفاعل بقى سيء للأسف يجماعة .. لو كدا قولولي أوقفها لو التفاعل استمر كدا ..

|18|

" إنك لا تعرف أن حضورك يخلق مني شخصًا آخر، شخص لا يتذكّر أنه حزين. "

* في شقة عمة سيا

قعدت سيا على الكنبة وهي بتبص لعمتها بغيظ وبعدين قالت : مش كفاية عليا كدا ولا إيه ؟

عمتها برفعة حاجب : كفاية عليكي وساخة فعلاً يابنت الشوارع

سيا وشها إتصلب وبعدين قربت كدا وهي قاعدة وقالت : إنتي عارفة أنا نفسي أقوم أجيب كرشك على سمعتي الزفت بسببك دي في المنطقة ، بس أنا هأجلها وهختصرها وهجبهالك من الأخر ..

عمتها : طول عمرك بت قليلة الأدب وماشية على حل شعرك ، عاوزة تضربي عمتك ؟

سيا بقرف : يا شيخة عمى الدبب ، ما إنتوا اللي رمتوني في الشارع ، وبعدين أنا أنضف من رقبتكم .. المهم أنا مش جيالك عشان كدا

عمتها بهزة رجل : هااا جاية ليه ؟

سيا بجمود : أخوكي وائل الله يرحمه ، كان عليه قضية قبل ما يموت أو متجوز واحدة أو قتل حد ؟

عمتها بغضب : إخرسي قطع لسانك ! حتى الميت مش سيباه في حالة ؟

سيا بعصبية : أنا مش بجيب ف سيرة حد أنا عاوزة أعرف !!

عمتها بمصمصة شفايف : الله يرحمه بقى ويغفرله ، ماهو مفيش راجل مبيغلطش

سيا بنرفزة : أيوة يعني كانت إيه غلطته ؟

عمتها ببرود : عادي زي ما أي راجل بيعمل ، كان نايم مع واحدة وسخة وميعرفش إنها متجوزة جرجرت رجليه ، جوزها لقاهم وقتلهم وإتسجن

سياا شهقت وهي بتقول بصوت يكاد يكون مسموع : م .. مستحيل ، عمي مات زاني ؟

عمتها ببرود : ما كل الرجالة بتعمل كدا في إيه ! كان لازم يقتلوه يعني

سيا بصويت : إتقي الله كل الرجالة بيزنوا عادي !! بتتكلمي كإنها حاجة عادية ! وكنتوا مخبيين عني ليه؟؟

عمتها بقرف : وطي صوتك وإنتي في بيتي ! ونخبي ليه إحنا محدش سألنا عشان نقول !

لطمت سيا على وشها وهي بتقول : عمي .. زنا مع ! يالهوووي يالهووووي

عمتها أتخضت : بتلطمي ليه يابت الكلام عدا عليه سنين ، فات وقت الزعل ياختي

خدت سيا شنطتها وركبت مع كينان وهي بتعيط وخدودها حمر

كينان بخضة : في حد مد إيده عليكي ؟

سيا عماله تخبط على رجلها : إطلع يا كينان ، إطلع

كينان بعصبية : ما تفهميني حصل إيه

سيا بعياط وهي بترفس في العربية بدر هيطلقنيي ، هيطلقننني

كينان بصدمة : هو قالك كدا ؟

سيا بتشهق : ل لاا بس أنا عرفاه ، هياخدني بذنبهم ..

كينان مش فاهم حاجة وقال : أنا لازم ألاقي بدر وأقعدكم قدامي وأفهم في إيه

سيا بعياط مسكت إيد كينان وهي بتقول : لا والنبي عشان خاطري لا يا كيناان

كينان بشفقة : إهدي طيب ، خلاص حاضر والله متخافيش

سيا بتاخد نفسها بالعافية وهي ماسكة بطنها : أاااه مش قادرة

كينان بخضة : مالك في إيه ؟ إنتي كويسة

سيا بدوخة : مش قادرة روحني ..

* في شقة بدر

كان حاطط لعب قديمة أووووي ومهترئة قدام البنت

وهي قاعدة قدامة

بدر بحزن : مش هتعرفي تلعبي بيهم ، قدام أوي زي ما إنتي شايفة ..

البنت : دي كانت لعبك وإنت صغنن ؟

بدر بحزن : أيوة .. بس ملحقتش ألعب بيهم ، ونسيتهم هنا مخدتهمش معايا وأنا ماشي ، يوميها مكانش همي اللعب خالص ، لإني فقدت حاجة أهم .. ف كنت خايف

البنت بتبصله مش فاهمة حاجة ف بدر غمض عينه وفتحها تاني وهو بيقول : تحبي تعملي إيه يا برنسيسة ؟

البنت : إنت عارف بابا مشي ليه وزعل ماما ؟

بدر : مش عاوز أعرف

البنت بإصرار : عشان بتنام كتير

بدر مقدرش يمسك نفسه ف ضحك بعدين قالها : وإنتي بقى بتحبي تنامي كتير ؟

البنت بلوية بوق : لا بحب ألعب كتير

بدر بإبتسامة باهتة وهو بيرفع إزازة المياه وبيشرب : طب ألعبي

بدأ يشرب ف البنت قالتله : هو إنت هتتجوزني لما أكبر ؟

تف بدر المياه وبصلها وهو بيقول : إنتي تعرفي حوار الجواز كمان ؟

البنت : أه بشوفه في الأفلام ، بيجيب خاتم ويقولها تتجوزيني ؟ بعدين ياخدها تعيش معاه وخلاص كدا ف أنا عاوزة أروح معاك وأخد كل لعبي معايا ونلعب سوا أنا وإنت

بدر بياخدها على أد عقلها : بصي هو مش هينفع أتجوزك عشان إنت يا عسلية صغير عليا ، بس ينفع نكون صحاب ، إتفقنا ؟

البنت بتصميم : لا نتجوز

في اللحظة دي دخلت أمل وهي شايلة صنية وبتقول : هي لسه مزهقاك ؟

بدر بهدوء : بالعكس مسلياني ، مخلياني أنسى أي حاجة وحشة مضيقاني ..

أمل بإبتسامة : متخانق مع المدام ؟ مقصدش أتدخل أنا بسأل بس

بدر فهمها ف قال : مقدرش أتخانق معاها بس أنا اليومين دول قاعد هنا عشان هخلص حجات للشقة ، أنا بحبها ف مش هقعد هنا كتير هرجعلها ..

أمل وشها بهت وحطت الصنية وهي بتقول بزعل : طب أنا جبتلك أكل عشان إنت مأكلتش

بدر ببرود : شكراً لتعبك بس أنا ماليش نفس

في اللحظة دي دخلت سيا وهي ماسكة كيس أبيض في إيديها والباب كان مفتوح عشان بدر قال لأمل هسيبه مفتوح

بصت لأمل وللبنت بعدين قالت : عرفت من حمايا إنك هنا ، قال إنك كلمته الصبح تطمنه ..

بدر باصص للأرض ومش قادر يرفع عينه يبصلها

أمل بصت ل سيا بصة مش حلوة بعدين قالت : دي مراتك يابدر ؟

سيا بنظرة باردة : أه أنا مراته يا حبيبتي ، أستأذنك بس تاخدي الصينية وتسيبينا سوا عشان جبتله أكل معايا وهو مش بيحب ياكل غير من إيدي .

أمل حست بغضب ف قالت لبنتها : قومي معايا يلا

البنت لقت أمها متعصبة ف قامت ، شالت أمل الصينية وخرجت بيها راحت سيا رازعة الباب وراهم ..

بصت بضعف لبدر اللي قام من على الأرض وهو بينفض هدومه ووقف عند الشباك مدي ظهره ل سيا

سيا بنبرة عياط : أنا عرفت كل حاجة من عمتي ..

بدر مبيردش

سيا بتعب : وماليش ذنب ! عيلتي دي أذوني زي ما أذوك ، وأنا لما وقعت تحت إيدك قولتلك .. قولتلك ماليش عيلة وأهل غيرك إنت وكينان ، أنا ذنبي إيه يا بدر ؟

بدر ببرود : مقولتش إن ذنبك حاجة عشان كدا مشيت ، مينفعش أطلع غضبي عليكي ف بعدت بهدوء

سيا بعياط : طب بص ليا طيب ..

بدر بوجع : القدر بيسخر مني وبيوقعني في بنت أخو الراجل اللي أمي !!

قطع كلامه وهو بيغمض عينه بألم

سيا بحزم : أنا ماليش علاقة بالراجل دا ولا يخصني .. أنا كل اللي أعرفه إني مرات بدر محمد الكابر . وشايلة إسمه ، لا عمري خونتك ولا أقدر عشان أصلاً أصلاً مفيش راجل زيك ولا بحب غيرك

أنا بحبك يابدر

لف وبصلها ، عينيه كانت حمرا وبلع ريقه وهو شايف ضعفها

قال بنبرة حزينة : أنا فارغ يا سيا .. مش هقدر أتعايش مع كدا .. أنا أسف

سيا بعياط : إنت مش فارغ إنت مالي حياتي

بدر بتصميم : من فضلك إخرجي ..

سيا : يا بدر

بدر بتصميم : إخرجي ..

قلع قميصه وجه يدخل الأوضة وهو سايبها وراه ف قالت بصوت عالي : أنا حامل يا بدر ..

وقف مكانه وهو بياخد نفسه بالعافية ف قربتله ومسكت إيده اللي مكورها بغضب ، بدأت إيده تلين بين إيديها ولف ليها

مسكت إيده وحطتها على بطنها وقالت وهي ساندة راسها على راسه : تجاهل صوت دقات قلبي اللي بيرتفع كل لما تقربلي ، وركز على اللي جوايا منك ..

بيحسس على بطنها وهو مغمض عينه ، شدها من ظهرها ناحيته جامد ف قالت : بالراحة

بدر بحب : إنتي نقطة ضعف بدر الكابر ، هفضل أقولهالك كل ما تقربي مني ، لو أطول أجيب منك عشر عيال هعمل كدا .. مش عشان بحب الخلفة ! بس عشان كلهم هيكونوا منك

بيقرب لوشها ف حطت سيا إيديها على شفايفه وهي بتقول : الشباك مفتوح

بعد عنها وبياخد نفسه بالعافية ، وطى ورفعها بين إيديه وهي بتضحك وحضناه جامد وحاطة راسها على كتفه ..

يتبع ...

#خارج_قانون_الحب٢

#روزان_مصطفى

#بقلميييييي

( مش قصير انا قصدت أقطعه على الجزئية دي + رأيكم في البارت ؟ )

|19| ♧ عنوان البارت : رأس الأفعى ♧

" والقلب يعشق كل جميل زيك .. دا أنا يوم بعد يوم بقع بزيادة في حُبك " ♡

#بقلمي

* في بيت بدر وكينان

كان قاعد كينان وهو عارف إن سيا عند بدر في شقة أبوه

فاتح فيس بوك وبيشوف فيديوهات

لقى مسج جياله.

فتح الماسنجر ولقى البيدح بتاعت الجيم بعتاله مسج

" مساء الخير الجينيرال ، بنتمنى تشرحلنا تجربتك معانا كانت سيئة ولا جيدة لإن حضرتك مكملتش شهر الإشتراك "

كينان عقد وشه وهو بيقول : إيه الهبل دا من إمتى الجيم بيهتم بالتفاصيل بتاعت الزباين يعني ؟

رد كينان وكتب " التجربة كانت كويسة لكن أنا مش حابب أجي تاني لظروف خاصة "

الصفحة ردت على طول " ممكن حضرتك تشرفنا تاخد باقي فلوس إشتراكك "

كينان نفخ وقال : إيه الإهتمام دا هما مالهم ؟

كتبلهم إنه هييجي كمان ساعة عشان يخلص من حوارهم ..

* في بيت أم بدر

كان ساند على المخده وسيا نايمة على صدره وبتبص للنور اللي جاي من تحت الشباك بتاع الأوضة وبتقول : إنت سامحتني عشاني ولا عشان البيبي ؟

بدر وهو بيبص لراسها المسنودة عليه : إنتي معملتيش حاجة غلط عشان أسامحك عليها .. أنا مقهور بس مش منك ، نفسي أرتاح بس مش عارف ، عندي فلوس كتير قادرة تخليني ملياردير في يوم وليلة بس لو خرجتها وبقيت ملياردير الحكومة هتيجي تقولي من أين لك هذا ! معنديش حتى حاجة أتسند عليها تبقى ك غسيل للفلوس دي ، بغبائي حتى الشركة اللي كنت عاملها وكنت شريك فيها مع الزعيم قفلتها بعد خيانة ريناد ليا ..

إتعدلت سيا وهي بتبصله وبتقول بجرأة : إنت لمست ريناد ؟

بدر إتعدل وهو بيبصلها وبيلبس هدومه : مش فاهم إيه السؤال دا ؟ دا طبيعي كانت مراتي وبتنام جمبي على سرير واحد !

سيا بضيق : إنت إتجوزتها ليه أصلاً طالما محبتهاش ؟

بدر وهو بيبص للسقف : أه دي هرمونات حمل صح ؟

سيا بتبويز : مش من حقي أسأل ؟

بدر بيبصلها وبيقول : متعمليش بس الحركة دي قدامي عشان مبلعكيش ونخلص

* في عربية كينان

ركن عند الجيم وهو بيقفل العربية وبعدين نزل

دخل للكاونتر وهو واقف بعدين قال : صباح الخير أنا الجينيرال كان حد كلمني بخصوص باقي فلوس الإشتراك ..

الولد اللي كان واقف مردش ، ظهرت مادلين من ورا كينان وهي بتقول : دي الطريقة المثالية اللي تودعنا بيها لو فعلا مش حابب تكمل

ألتفت كينان وبصلها وهو بيرمش بعينه كذا مرة بعدين بعد نظره عنها ، أبتسمت هي عشان حركته دي غالباً عرفاها لما بيتوتر بعدين قالت وهي بتمد إيديها بالفلوس : دول ١٥٠٠ جنيه إحنا ميرضناش حقك يروح عليك ..

كينان بصوت هادي : حضرتك اللي كلمتيني من صفحة الجيم ؟

مادلين بنفس الهدوء : أيوة أنا ، الحقيقة فوجئت لما جيت أكلم حضرتك إنك عاملي بلوك ف معرفتش أتواصل معاك غير بالطريقة دي ..

أخد كينان الفلوس من إيديها وبعدين قال وهو موطي راسه : شكراً

جه يمشي وقفته كلامها وهي متضايقة وبتقول : معتقدش البني ادم عمل شيء يستاهل المعاملة دي !

غمضت عينيها وهي بتلعن غبائها ومستغربة نفسها عمالة تحايله ليه دا في الأخر زبون يعمل اللي يريحه

لف كينان وبصلها وقال برضو بنفس ليفل غبائها : والله الواحد مش عاوز يكون سبب مشكلة بينك وبين خطيبك ..

خبط الأرض برجله وهو بيلعن غبائه برضو

مادلين بإستغراب : إيه علاقة خطيبي بالموضوع ؟ هو كلمك أو ضايقك بحاجة ؟

كينان بسرعة : لا لا ، أقصد .. طب خلاص فلوس الإشتراك أهي وهبقى أجي إن شاء الله .. عن إذنك

ساب الفلوس ع الكاونتر وخرج ف مادلين رفعت حاجبها وعضت شفتها بغيظ وهي كانت جايبة أخرها أصلاً من خطيبها ، رفعت الفون وكلمته وهي بتقول : أيوة يا حسن من فضلك تعالى على الجيم حابة أتكلم معاك .. لو مش مهم مش هتيجي مثلا ؟ طب أه هو موضوع مهم من فضلك تعالى ! أنا منكدتش إمبارح من الأساس .. أوك سلام

فضلت مادلين مستنياه لحد ما عربيته جت ، خرجت من الجيم وفتحت باب العربية وقعدت جنبه بعد ما رزعت الباب

حسن بضيق : ما بالراحة شوية !

مادلين بتشاور بإيديها بعصبية : لا بص أنا تجاهلت تماماً إتفاقاتك مع مامي اللي تمت من غير علمي وزعيقك لكارما بنت أختي رغم تحذيري ليك إنك متقربلهاش حصل ولا لا ؟ لكن يوصل بيك الحال تهدد حد من الزباين بتوع الجيم لمجرد إني أنا بدربه مش هسمحلك بكدا أبداً

حسن بتكشيرة : حد مين ؟ بتخرفي بتقولي إيه ؟؟

هي بعصبية : أنا مبخرفش أنا بقالي ٣ أيام بصحى وبنام على أعصابي لو إنت فعلاً هتفضل ضاغط على أعصابي كدا نفضها سيرة أحسن !

حسن بضحكة سخرية : أه تلاكيك لقيتي الجواز قرب ف عاوزة تخلعي ..

مادلين بعصبية : أخلع ! دا لفظ تقوله ؟ عامة أنا جيبتك عشان اقولك متدخلش في شغلي وتهدد زبايني

حسن حس إنه مالوش خلق يتناقش ف قالها : إنزلي أنزلي أنا ورايا شغل ومش فاضي للنكد دا

نزلت مادلين ورزعت الباب ف ساق هو جامد ومشي بعيد .. أتنهدت بحزن ودخلت لشغلها وهي مبتسمة .

* في بيت أم بدر

سيا بتلم الأكل اللي كانت جيباه معاها وراهم بعد ما خلصوا وبدر بيلبس عشان يمشوا

مسكت طبق في أكل كانت شيلاه على جمب وهي بتقول لبدر : معلش يا

حبيبي هحط الأكل دا للقطط وأجي ..

بدر : ماشي

خدت سيا طبق الأكل وبصت فوق مش عارفة شقة أمل فين ، لقت بنتها بتلعب ف قالتلها : شقتكم فين يا حبيبتي ؟

البنت شاورت على الشقة ف ضربت سيا الجرس ..

إستنت شوية لحد ما فتحت أمل وهي بتعدل الطرحة على راسها

سيا بكيد : أنا قولت طالما أكلت جوزي وطلعتك بالصنية أجي أراضيكي ، بصي هو مش طبخي عشان من شوقي وقلقي على بدر ملحقتش اطبخ هو أكل جاهز بس هيعجبك ، عرفت من بدر إنك إنفصلتي قولت خسارة عشان البنت الصغيرة

* أمل واقفة تسمعها وهي بتجيبها من فوقها لتحتها وبتهز جسمها *

سيا بتكمل : بس يلا ربنا يعوضك خير وميوقعش في طريقك أبداً خرابين البيوت يا قلبي ..

* بتبص لأمل تقصدها *

أمل بغيظ : مبأكلش بنتي ولا أهل بيتي من برا ، ما تدخلي إنتي تدوقي طبيخي هيعجبك ؟

سيا بتحط آيديها على بطنها وهي بتقول : لا أنا وحبيب مامي شبعنا خلاص

بصت أمل على بطن سيا وبعدين بصت لوشها ، سيا بكيد : خدي الطبق بقى دا النبي قبل الهدية وبعدين مش قادرة أقف أكتر ظهري بيوجعني

أمل بغيظ وهي بتاخد الطبق : تسلم إيدك ..

سيا بخبث : الله يسلمك ، أشوفك بخير بقى ماشيين

نزلت بلكاعة على السلم ف رزعت أمل الباب وسيا بتضحك من قلبها

دخلت الشقة لقت بدر خلص كل حاجة وخلص لبس وحاطط سيجار في بوقه

سيا بتحذير : حبيبي معلش متولعش سجاير في العربية عشان غلط عليا ريحتها ؟

مسك السيجارة وكور إيده عليها لحد ما إطفت وهو بيقول بتتنيحة ف سيا : حاضر

خرجوا سوا من العمارة بعد ما قفل بدر الشقة وحط شنطته في العربية وركب هو وسيا وساق لحد بيته

* في فيلا توفيق ..

قاعد وهو ساند على عصايته بقهر وقدامه واحد ماسك كاس وبيدخن سيجار وبيقول : وبعدين ؟ عملوا إيه كمان !

توفيق بصوت مكتوم : وهما هيعملوا إيه أكتر من كدا ، مبقاش ليهم كبير حتى أنا قتلوا البت اللي إعتبرتها بنتي وبهدلوني زي ما إنت شايف ، أنا عاوز نهايتهم تكون أبشع نهاية حصلت ف طريقنا ك مافيا ، عاوزهم يكونوا عبرة لمن يعتبر عشان يحرموا يلعبوا معانا اللعب الوسخ دا ، عاوز أسلمهم بإيدي للحكومة ..

الراجل اللي قاعد قدام توفيق : حكومة ؟ إنت إتهبلت ! إحنا ناس خارجة عن القوانين عاوز الحكومة تعاقبهم ؟ أمال أنا بعمل إيه يا توفيق ! العيال دي مياخدوش في إيدي غلوة وإنت عارف .. بس سيبك إنت ، حابب تقولهم رسالة وداع ؟

توفيق بغيظ : أنا حابب أشوفهم وهما بيودعوا ، جوايا نار قايدة

الراجل وهو ماسك الكاسة بإيده ومدينا ظهره : بشرفك لأطفيهالك

توفيق بضيق : شرفي إيه إنت التاني هو أنا بقى فيا شرف ، على العموم هستنى ..

* في بيت بدر وكينان ..

وصل بدر وسيا للبيت أخيراً وفتحلهم كينان وإستقبلهم .

بدر بتنهيدة : جهز نفسك عشان بالليل هيوصل الأثاث بتاع المكتب ، هنبتدي نشتغل بقى عشان نخرج فلوسنا للنور ونبقى مليارديرات

كينان بمخ واقف : إزاي دا يا زعيم ؟

بدر : هفهمك كل حاجة في وقتها ، عرفت اللي حصل ؟

كينان بهزة راس : لا

بدر بهمس وهو بيقربله : مستر x .. وصل كايرو

كينان بتبريقة وهو بيبلع ريقه : يا نهار إسود !!

* في مبنى راقي ..

ماشي هو بخطوات واثقة بجزمته اللامعه وشعره المتسرح لورا ووراه توفيق ساند على العكاز وبيمشي على مهله

مستر إكس : كل حاجة كانت زي ما سيبتها ، ودي فايدة إنك تشغل معاك رجالة بجد مش كلاب فلوس ، هو الواد نصار دا كان داس ليك على طرف ؟ سمعت إنك صفيته وكالعادة خدت أعضاؤه ، مش عاوزك تشتغل بأريحية كدا عشان متنحدرش للغباء ..

وصلوا مكتب كله أثاث سيلفر ف قعد توفيق بتعب وهو بيقول : بقالي فترة مشتغلتش ومش عارف حتى أخد طريق الهيروين هو إبن ال **** زعيم الظلال السوداء دا اللي كان بيصدر للحصان الإسود هيروين ف لما قتلهم وخدت الصفقة منه حصلت كل الحوارات دي وبالتالي مش لاقي حد أتعامل معاه ، كلن بيشتغل على مياه سودا من تحت لتحت ولازم يكون عندك حد ثقة

مستر آكس وهو بيخرج الدخان من بوقه : إنت مش جديد في عالمنا عشان تشتكي من كدا ، عموماً طول ما أنا هنا كلامي بس هو اللي هيحصل ، بس أهدى على الشغل شوية لحد ما نصفي إسمهم إيه دول

توفيق بحقد : بدر وكينان .. وياريت مراته معاه مش عاوز حد من طرفهم عايش على وش الأرض

أخد نفس من سيجاره وقرب ل وش توفيق وهو بينفث الدخان وبيقول : أوعدككك ...

* في بيت بدر وكينان

كينان بصدمة : دا إحنا كدا في عداد الموتى ، هو إيه اللي رجعه أصلاً إحنا معملناش حساب رجوعه !

بدر وهو ساند ظهره على الكرسي : مش عارف ، بس الأكييد إنه مش هيسكت على كل اللي عملناه

كينان بتبرير : أيوة بس عندنا مبرر لكل اللي عملناه !

بدر بنظرة جد : مبرر إيه إنت هتتناقش مع جوز خالتك ؟ ماتفوق يابني وتفتكر إحنا بنشتغل إيه ! أنا مش خايف على نفسي أنا خايف على سيا ، مكانش المفروض تقع في طريق واحد زيي ..

كينان بجدية : مش وقت ندم يا زعيم ، أنا شايف إننا نبتدي نعمل إحتياطتنا ..

ضغط كينان على سنانه وهو بيقول : ياديني ياريتني قتلت توفيق الكلب دا بدل ما يودينا ورا الشمس

بدر بتفكير : أنا شايف إن سيا ...

يتبع ...

#خارج_قانون_الحب٢

#روزان_مصطفى

#بقلمييييي

( توقعاتكم ؟ )

|20|

" الوضع العام على الجميع ، بيسوء .. لذا نرجو من سُكان كوكب الأرض الكرام طوال رحلة الحياة يكونوا ذوق "

#بقلميي

بدر : أنا شايف إن سيا لازم تكون في أمان ، أبعتها عند أبويا ؟

كينان بتفكير : ما تصبر شوية يا زعيم ، شايف إننا نقدم السبت عشان نلاقي الحد ، يعني نروح للراجل دا ونقعد معاه ونتعامل عادي

بدر بعصبية : ماهو مش أهبل هو

كينان بإبتسامة : إسمع مني يا زعيييم ، ولو تعرف حد سيا تقعد عنده لحد ما نرجع يكون خير وبركة ، ونروح نقعد معاه بدل ما إحنا مستخبيين بنفكر

سيا نزلت وهي بتقول بغضب : سيا مين اللي تشوفولها حد تقعد معاه ؟؟ يارب هو ميعديش يوم عليا غير لما أتمرمط يعني !

بدر بيبصلها وبيبص لكينان بتفكير

سيا بصوت عالي : إييييه !!

* after 1 hour ..

سيا وبدر ماسك دراعها وممشيها معاه هو وكينان : مستحيل أروحلها الست دي أنا لسه مهزقاها الصبح !

بدر بمواساة : معلش يا روح بدر نستحمل بس عشان والله الوضع ما أمان

ركبت سيا ورا وهي مبوزة وركب كينان جمب بدر ، ساق بدر العربية لحد ما وصل لمنطقة أمه

أخد سيا معاه وطلعوا لشقة أمل وخبط عليها ، مر حوالي دقيقتين لحد ما أمل فتحت وهي بتحط الطرحة على راسها

بدر بإبتسامة : يارب مكونش صحيتك من النوم

أمل بتبص ل سيا بقرف وبتقول : لا أنا كنت بنيم بنتي بس ، خير إنتوا كويسين ؟

بدر بذوق : أستسمحك بس سيا تبات عندك إنهاردة ، قلقان عليها عشان حامل ومش عاوز أسيبها لوحدها وأنا عندي شغل

أمل بتبص ل سيا وهي بتقول بهدوء : وماله البيت بيتها ، إتفضلي يا حبيبتي إتفضلي

سيا متبتة في بدر وبتبصله بغيظ ف باس خدها وهو بيقول : عشان خاطري إدخلي وخلي بالك من نفسك ، هحاول متأخرش وعد ..

دخلت سيا ونزل بدر

وقفتها امل وهي بتقولها : إقلعي جزمتك لامؤاخذة أصل لسه ماسحة

جابتلها شبشب وحطيته عند رجلها وهي بتقول : ولو إني زعلت منك أوي الصبح على الكلام اللي من تحت لتحت ، أنا أبص لبدر ولا تشكي فيا ؟ دا أخويا دا ؟

سيا لبست الشبشب وهي بتقول غصب عنها : معلش هتقل عليكي

أمل بترحيب : لا يا حبيبتي متقوليش كدا ، دا إحنا هنسهر ونحكي ونقعد قعدة ستات سوا ، تعالي تعالي

دخلت سيا قعدت ودخلت أمل المطبخ عشان تجيبلها ضيافة

* في عربية بدر

كينان : خليك فاكر يا زعيم إن الراجل دا لعبي ، وهيحاول يستفزك

بدر بضحكة : يابني أنا عاجن أصنافهم دي واحد واحد عيب عليك ، هو ممكن يكون إتغير طول الفترة اللي مكانش فيها في كايرو ، بس أنا بطبعي بقرأ الناس وبعرف أتعامل معاهم ، ف متخافش

كينان : معلش يا زعيم توقف على جمب بس ؟

بدر بإستغراب : ليه ؟

كينان : هفك زنقتي عادي

بدر بقرف : وهي كلمة عاوز أروح حمام قصرت معاك ف حاجة ؟

كينان بتعب : على فكرة أنا شارب مياه كتير وهغرقلك العربية إنت حر

ركن بدر على جمب وهو بيقول : إنزل طيب في رمل أهو ، يلعن أبو قرفك

نزل كينان وهو مدي ظهره لبدر وعمال يتمرجح بجسمه وبيغني : حبيبتي إفتحي شباكك أنا جيت ، بعمل حمام تحت البيت

بدر بيضرب كلاكس : ما تخلص يالااا

كينان وهو بيعدل هدومه : حتى دي مش بتهنى فيها

كينان بصوت عالي : ما تنزل تفك نفسك يا زعييم

بدر من بين سنانه : إركب يالاا ملعون أبو دا مشوار

ركب كينان وهو بيكلم بدر ف بيمد إيده

بدر بيبعد وبيقول : تقعد عشر ساعات متلمسنيش لحد ما تروح البيت تستحمى ! رايحين لزعيم مافيا وحالتنا بالبلاا وإنت قاعد تستظرف

كينان بضحك : على الأقل نموت من الضحك احسن من الرصاص أهاهاااا

بدر مردش عليه ودور العربية وكمل سواقة

* في المبنى الراقي

كان في بنات رايحين جايين بفساتين سودا قصيرة زي ملابس موحدة .. الشقرا وذات الشعر الاحمر والسمراء وكل الأشكال * بيشغلهم في الدعارة * كان قاعد إكس على البيانو بيعزف لحن أنستازيا .. ومندمج ومغمض عيونه ، النور الأبيض الخافت كان طاغي على المكان والبنات رايحين جايين وفي منهم اللي واقفين على جمب بيشربوا كاسات نبيذ أحمر وبيتكلموا سوا ..

وصل بدر وكينان ودخلوا ، بصوا لقوه مديهم ظهره وقاعد يعزف على البيانو وفجأة وقف وهو بيقول من غير ما يبصلهم : كنت واثق إنكم هتيجوا ، مش بدر بس اللي بيعرف يقرأ اللي حواليه ..

قامن من على البيانو وهو بيسند عليه وبيبصلهم ببرود وقال : العبد لله برضو ذو نظرة ثاقبة ، طبعاً إنتوا جايين تقدموا خطوتكم عن خطوتي ، عارفين إنكم عملتوا حاجة ولا إيه ؟

كينان بإعتراض : الله ليه الإستقبال دا يا زعيم ؟ دا حتى جايينلك بنفسنا

قعد إكس على الكرسي اللي بيلف ومسك كاسة نبيذ أحمر وهو بيقول : كينان ! عاش من شافك ، حقيقي بدر محظوظ بيك ، تخيل يكون عندك صديق هزلي بيضحكك طول الوقت ، وبعدين ما إنتوا لازم تجولي ، هو إنت مستنيني أجيلكم ولا إيه ؟

بدر ببرود وهو حاطط إيده في جيبه وباصصله قال : خلصت فقرة الإستهزاء بتاعتك ؟ مين بقى الشاطر اللي قالك بنسبق خطوتك عشان كدا جينا ؟ هو مش الأصول برضو لما حد بييجي من المافيا بعد طول غياب بنيجي نشوفه ونقعد معاه عشان نسايس الدنيا

بعد كدا ؟

إكس بضحكة : أصول ؟ الأصول دي لما حد يضايقك من الأعضاء زمايلك في المجال بلهجتنا يعني .. تيجي للكبار يكونوا حكم بينكم ، يا نقتلكم إنتوا الإتنين يا نصافي الدنيا بينكم ، لكن تتصرف من دماغك من غير ما ترجعلنا لا كدا أزعل أوي ..

بدر بضحكة سخرية : إنت شكلك قارينا غلط خالص ، أنا اللي أعرفه إنك مش بتاع أحكام متسرعة .. يعني القتل الخيار الأخير عندك

حط إكس الكاسة بتاعته على الترابيزة وهو بيقول : لا الخيار دا خليه للمدام تقطعهولك على السلطة ، هي مجاتش معاكم ليه ! اااه اكيد إنت عملت إحتياطاتك وقولت تحميها وتوديها مكان كويس أنا مقدرش أوصلها فيه ، شابو يا بدر .

بدر بص لكينان بنظرة عرف الحوار من أوله لأخره

إكس بيكمل بخبث : لكن كلامك صح ، أنا فعلاً أخر حاجة بعملها هي القتل ، لييه ؟ عشان أنا راجل رايق .. بس طالما جيتوا لحد عندي كدا ممكن نتفاهم .

* في شقة أمل

سيا وهي قاعدة جمبها : وإنتي بقى جارتهم من زمان ؟ شوفتي مامته يعني ؟

بتحط أمل الصينية على الترابيزة وهي بتقول : أه شوفتها بس مش فاكرة ملامحها أوي أصل كنت صغيرة ساعتها ، لكن فاكرة بدر كويس هو من الناس اللي ملامحهم متتنسيش

سيا بتكشيرة : أهاا عندك حق ..

أمل بإستفزاز : إتعرفتوا على بعض إزاي بقى ؟

سيا بتستفزها : حبني وإختارني من وسط ألف ♡

أمل بتبصلها بغيظ وهي بتقول : نصيب بقى ..

* في المبنى الراقي

إكس : والله كل اللي أقدر أعمله إني أقعدكم مع توفيق هنا قصادي ولو سامحكم يبقى نبدأ صفحة جديدة سوا ، لكن لو لا ! هيكون في كلام تاني مختلف

بدر بضحكة : يسامح مين ؟ إحنا لامؤاخذة خليناه نص راجل

إكس ببرود : وقتلتوا الحصان الإسود ، ودا شيء أنا شخصياً مش هغفره ..

بدر بغمزة : لا بس فاتك إنت المصنع وهو بينفجر بيهم ، لقطة هوليود ذات نفسها متعرفش تعمل زيها

إكس بيبص لبدر ببرود وبيضحك على جمب وبيقول : برافو ، حقيقي هايل ..

خلصت قعدة كينان وبدر معاه وقاموا روحوا .. شاور إكس بإيده لواحدة من البنات وهو بيوشوشها في ودنها بحاجة

البنت راحت وجه معاها راجل كدا لابس بدلة ونظارة طبية وهو بيقول : التليفون اللي البنت جابتهولك عرفت منه حاجة؟

* لما كينان وبدر كانوا قاعدين واحدة من البنات سحبت الفون بتاع كينام من جمبه من غير ما ياخد باله وإدته لواحد من الهكر *

الهكر : في تواصل شات فيس بوك بينه وبين واحدة إسمها مادلين وعملها بلوك .. عرفنا إنها مدربة لياقة بدنية في جيم *** ، وفي أرقام منهم رقم والدته .. وفي صور لمنطقة في *** مصور بنت شكلها طالبة ثانوي ، كل دا قدرت أوصله رغم إنه ماسح نص الصور لكن فونه بالنسبه ليا تحت المراقبة يعني حتى لو راح فين هنقدر نعرف مكانه

إكس بياكل باتون ساليه وهو بيقول : قولتلي مدربة لياقة بدنيه وطالبة ثانوي ؟

الهكر : مظبوط يافندم

إكس : ممممم ، شوفلنا كدا البونبوني الصغير ساكن فين عشان هنبدأ بيه الصبح ، وبتاعة الجيم نبقى نروح ناخد فكرة لطيفة بعد الظهر عشان حاسس إن عضلاتي إبتدت تنام ..

الهكر بأدب : هو فون الاستاذ بدر ليه حضرتك مطلبتش مني أتفحصه ؟

بيكمل أكل باتون ساليه وبيقول : عشان بدر مش مندفع زي كينان وبيحتفظ بصور وأرقام على تليفونه ، هو حريص بزيادة ف عشان فاهمهم إختصرت عليك الوقت ، المهم روح كمل شغلك إنت ...

إنحنى الهكر بأدب وإنسحب من قدام إكس

* صباح تاني يوم / في منطقة عمة سيا ..

كانت بتاعة ثانوي " إسمها ريما " نازلة عادي الصبح تجيب الفطار وماسكة ورقة ب ١٠٠ جنيه في إيديها ، الورقة فلتت من إيديها وفضلت تطير على الأرض وهي موطية وماشية وراها عاوزة تمسكها

وفي ويط ما هي باصة في الأرض لبت واحد لابس بنطلون جينز أزرق وتيشيرت أبيض نص كُم موطي لحد ما الورقة وصلت لإيده

رفعت راسها تبصله كان إكس ..

مسك الورقة وهو بيقول : هوبااا مسكتها ، غلبتك صح ؟

بصتله ريما بنظرة ضيق كدا وهي بتقول : تمام شكراً هات بقى

مد إيده ليها بالورقة ف جت تاخدها راح ساحب إيده ناحية جسمه تاني وهو بيقول : العيون الحلوة دي المفروض تركز كدا ومتسرحش

ريما صوتها علي : وإنت مالك ما تجيب الفلوس !

مد إيده بالفلوس وهو بيقول : خدي يا حلوة :))

يتبع ..

#خارج_قانون_الحب٢

#روزان_مصطفى

#بقلمييييي

تكملة الرواية من هناااااااااااا

قصر الروايات

القائمة الرئيسية

الصفحات

تابعنا من هنا

روايةخارج قانون الحب الجزء الثانى2 الفصل 16-17-18-19-20بقلم روزان مصطفى كامله (جميع الفصول كامله)رواية اصحاب الظلال السوداء

أخر المواضيع من قسم : قصص حديثه

تعليقات

إرسال تعليق