روايةخارج قانون الحب الجزء الثانى2 الفصل 21-22-23-24-25بقلم روزان مصطفى كامله (جميع الفصول كامله)رواية اصحاب الظلال السوداء

|21|

" ليس لدي وقت لأرتدي وجه أخر " ..

أخدت ريما ورقة المية جنيه ومشيت بعيد عنه وهو واقف بيبصلها

قال بصوت واضح من ورا نظارته للبودي جارد بتاعه : تفتكر مين الأهم عند كينان باشا ، البنوتة دي ولا بتاعة الجيم التانية ؟

البودي جارد برد منطقي : ولا واحدة فيهم يافندم

إكس بإبتسامة : exactly .. * بالظبط* يلا ودينا للجيم أما نشوف التانية ونحكم عليها بنفسنا ..

ركب عربيته وساق البودي جارد العربية لحد ما وصله للجيم ..

نزل بخطوات ثابته وهو بيبص حواليه لقى الإستقبال بس مفيش حد واقف

إكس بسخرية : تؤ تؤ تؤ ، بكرهه قلة النظام ، جيم محترم زي دا مفيهوش حد يستقبلنا

كانت تحت الكاونتر بتجيب حاجة ف إتعدلت وهي بتقول : كنت بجيب القلم يا أستاذ وقع مني ..

إكس بإبتسامة : إنتي بتدربي إيه بقى ؟

حست مادلين إنه بيسخر ف قالت بسماجة : والله لو حضرتك صحتك مش جيباك تشيل حديد بساعدك تشيله عادي

إكس ببرود : أنا شايف إن لو ربنا خلق الإنسان دمه مش خفيف ميجتهدش ، عشان خسارة الجمال دا يبقى دمه أومليت

مادلين بعصبية : أه إنت قليل الذوق وعاوز تتربى بقى

شاور بإيده وهو بيقول : إطلاقاً أنا مش جاي أضايقك ، كنت جاي أخد فكرة عن حاجة وماشي على طول

رزعت القلم على الكاونتر وهي بتقول بقرف : يكون أحسن ..

إكس ببرود : باي يا كوتش ..

خرج من الجيم وهو بياخد نفس وبيقول : إنت عارف يا تيتو ، البنت بتاعة المنطقة الشعبية ألطف من دي ، بس واضح إن كينان باشا بيلعب على الطرفين زي ما إنت قولت ، المهم ودينا البيت عشان ميعاد أكل صخر * الكلب بتاعه *

البودي جارد : إتفضل يا باشا

فتحله باب العربية وركب ومشي لبيته ..

* في بيت أمل

سيا كانت نايمة على الكنبة ف أمل جابتلها لحاف غطتها بيه

خبط الباب ف فتحت لقت بدر وكينان قدامها

بدر بقلق : سيا كويسة ؟

أمل بإبتسامة : نايمة جوا إتفضلوا

دخل بدر وكينان لقوا سيا نايمة على الكنبة ومتغطية

قربلها بدر وهو شايفها بتتنفس بصعوبة ، مشى إيديه على وشها ف غمضت عينيها بضيق راح ضحك ، قرب لودانها وهو بيهمس وبيقول : أنا جيت يا حبيبي

كينان بعوجة بوق : مسم ، راعي شعور السناجل يا زعامة

بدر برفعة حاجب : بس يالا

سيا إبتدت تفوق فتحت عينيها لقت بدر ف أبتسملها

إبتسمتله وهي بتقول : إنت جيت ؟

بدر بوشوشه : شوفتي بقى زي ما وعدتك

سيا بنعاس : ريحتك حلوة أوي ، معاك البرفان دا ترشه عليا

فتح دراعاته وحضنها وهو بيقول : مش محتاج أرشه ، خديه مني شخصياً هيثبت عليكي

بتحاول تبعد وهي بتقول : بس عشان إحنا مش في البيت

بدر بيبوس رقبتها : الحتة دي لسه البرفان متحطش عليها

سيا بضحك : بس بغير

كينان بلوية بوق : ياعم أنا قايم يخربيت الذل بجد !

خرج برا ف ضحك بدر وسيا عليه .

جت أمل وهي شايلة صنية حجات ساقعة وبتقول : ما تسيبها معايا شوية كمان مستعجل على إيه

بدر بذوق : أشكرك عشان إستقبلتيها عندك يا أمل

أمل بحزن : إحنا إخوات متقولش كدا ، ربنا معاكم

قامت سيا وظبطت شعرها ولبست جزمتها وخرجت مع بدر

لقوا كينان بيلعب كورة مع العيال قدام البيت

بدر بحزم : كينان ! يلا عشان مروحين

كينان بإستهبال : هلعب خمس دقايق بس يا بابا

بدر بيبص ل سيا وبيقول : هاتيلي الواد دا عشان نروح

سيا بدوخة وهي بتميل ع جمب بتعب : بدر .. مش قادرة أقف

جري عليها وهو بيسندها وبيقول : إنتي أكلتي ؟

سيا بتعب : لا كانت عاملة سمك وأنا نفسي مسدودة من الزفارة

بدر بعصبية : مقولتليش ليه يا سيا ؟؟ متصلتيش بيا ليه !

سندها وفتح العربية وكينان لاحظ تعبها ف ركب ورا من سكات

* في مبنى مستر إكس

توفيق كان مستنيه ف خرج إكس وهو لابس روب وسايبه مفتوح وشعره مبلول عشان كان بياخد شاور

توفيق بضيق : ما تستر نفسك عشان أعرف أكلمك ؟

إكس بيحط تلج في الكاسة بتاعته : ممكن أعرف سبب الزيارة ؟

توفيق بعصبية : إحنا هنهزر !

إكس بتبريقة : صوتك يوطى !

صب إكس شوية خمرا وهو بيقول ببرود بعد ما قعد : أستر نفسي أمشي ملط دا حسب مزاجي إنت اللي جايلي في وقت إسترخائي

توفيق بغيظ : أهو أنا نفسي أسترخي زيك بس مش عارف ! ولاد ال *** دول منكدين عليا

إكس بنظرة لتحت : ما تهدى ؟ مش قولتلك هاخدلك حقك عمال تصيح زي الديك بتاع السوق ليه ! أنا واحد ع الهادي وتعاملي زبادي إنت عاوز مستعجل روح خدلك سلاح وهاجمهم ، بس لو قطعولك حاجة تانية على سبيل المثال لسانك مثلاً متجيش تشتكي

توفيق بقهر : ما بلاش التلميحات اللي ملهاش لازمة دي ؟

إكس بضحكة مستفزة : مش قادر بصراحة ، أصل كل ما أفتكر اللي حصل ، متزعلش يا توفي هعذبهم ليك

توفيق وهو بيسند على عصايته بغيظ : أنا ماشي

إكس بيرجع راسه لورا وهو بيضحك بهستيريا

جالة صخر الكلب بتاعه ف طبطب على راسه

* في بيت بدر وكينان

بدر كان فاتح الاكل قدام سيا اللي كانت عمالة تاكل لدرجة عملت بلونتين في خدودها من الأكل

كينان بضحكة : عليا الطلاق قبل ما تتجوزوا مكانتش بتاكل كدا واخد بالك يا زعيم ، كانت على طول بعد أي لقمة تمسح بوقها

بالمنديل وبعدين تبصلك وهي بترمش ههههههه

بدر كاتم الضحكة ف سابت سيا المعلقة وهي بتقول : وجاي على نفسك وكاتمها ليه ما تطلعهاا الضحكة ..

بدر وهو بيمسح عينه : كُلي يا حبيبي بالهنا والشفا

كينان بتريقة : هقوم أقطعلك دراعي عشان تحلي بيه

بدر بحزم : بس يالا بقى !

قام كينان وهو بيقول : لا بجد هطلع أخد شاور وأغير هدومي

طلع كينان ف بدر قال ل سيا : في صلصة على شفايفك

سيا وهي بتبلع الأكل بتحسس على شفايفها وهي بتبصله ف عض هو شفته وهو بيقول : متعمليش كدا !

مفهمتش هي ف قالتله : معملش إيه بحاول أمسحها

بدر وهو بيقربلها وبيبوسها : همسحهالك أنا بطريقتي

بعدت هي وهي بتقول : لا لا ، في الحمل الأول * وشها بهت بحزن * الدكتور قال مينفعش علاقة زوجية في الشهور الأولى

بدر بضيق : بالنسبة للي حصل في بيتنا القديم ؟

سيا بإبتسامة : كنت بصالحك طيب !

بدر بحب : طب ما تصالحيني دلوقتي ؟

سيا بتعب : لا بجد تعبانة يا بدر حاسة بوجع في ظهري ونعاس

شالها بدر وحطها على السرير وهو بيغطيها وبيطبطب على دراعها وهو بيقول : وأنا جمبك في أي وقت ♡

* تاني يوم بالليل

كانت قاعدة ريما بتذاكر أول محاضرة ليها وهي رابطة شعرها لفوق ولابسه نظارة نظر وبتكتب

" كفااية نورك علياا ، نورلي رووحي وقلبيي ، خلااني شوفت بعينيا اللي إنكتبلي في حبي .. قريت على ضيك كلام جميل زيك " * عبد الحليم حافظ - كفاية نورك عليا *

ريما بضيق وهي بتقفل الكتاب بعنف : هو إيه السخافة دي اللي مشغل أغاني بصوت عالي دااا !!

حطت الطرحة على راسها وهي بتبص من الشباك لقت إكس واقف بعربيته تحت وهو نايم على الكبوت وحاطط رجل على رجل وعمال يحرك إيده مع اللحن

حطت إيديها على بوقها من الصدمة وهي بتقول : يا نهار إسود مش دا الراجل بتاع الصبح ! وإزاي أهل المنطقة ساكتينله !!

قفلت الشباك ولبست الإسدال الإسود بتاعها ونزلت تحت عشان أبوها مكانش موجود

وقفت قدام عربيته وهي بتقول بعصبية : هو إيه قلة الذوق دي أنا مش عارفة أذاكر ، وبعدين ذوقك في الأغاني سخييف !

إكس وهو بيتعدل وبيقفل الموسيقى بعدين بيطلع من العربية وبيقول : دا عبد الحليم حافظ ، في حد مبيحبوش ؟

ريما بعصبية : أه أنا !! لو هيسقطني يبقى مبحبوش أه

إكس بتصفيرة : دحيحة وشاطرة ماشاء الله ، سنة كام يا قطة ؟

ريما بتكشيرة : لو سمحت خليك بني أدم محترم وخد عربيتك وإمشي من هنا ! وإعتبرني أختك أو بنت من بنات عيلتك ومتضايقنيش ! أنا أصلاً غلطانة إني واقفة أتكلم معاك !

طلعت وسابته وهو واقف مبتسم على جمب وبيقول : دي مبتمثلش الإحترام وبتتقل ، دي محترمة بجد ، خسارة فيك يا كينان بيه ..

* في بيت بدر وكينان

سيا موطية على التواليت وبترجع للمرة التالتة وبدر بيطبطب على ظهرها

سيا بتعب : إطلع عشان متقرفش مني

بدر : على قلبي عسل ملكيش دعوة ، إنتي كويسة دلوقتي ؟

سيا وهي بتقوم تغسل وشها : دي مش أول مرة أحمل ، بس بجد تعبانة المرة دي

بدر بضيق : ما أنا كل ما أجبلك حاجة ترجعيها ..

سيا بتركيز وسرحان : بدر ممكن تسيبني لوحدي في الحمام شوية ؟

بدر بإستغراب : في حاجة ولا إيه ؟

سيا بعصبية : يا بدر من فضلك سيبني لوحدي شوية

بدر وهو مقدر هرموناتها : حاضر هخرج أهو

سيا بتلحس بوقها بشهية ومركزة في حاجة معينة

دخل بدر أوضته يلعب ضغط وهو قالع التيشيرت بتاعه ، شوية لقى كينان داخل ووشه ومتعصب بيقول : ياعم ما تقوم تشوف مرااتك ياعم !!!

بدر نزل جسمه على الأرض من الضغط وهو بيقول وهو بينهج : بتزعق كدا ليه يالاا !!

كينان بعصبية : خلصتلي علبة فوم الحلاااقة ! رشاه كله على إيديها وعاوزة تاكله

بدر بخضة : يا نهار إسود !!

جري على الحمام لقى سيا قاعدة على الأرض وهي بتعيط زي العيال

بدر بخضة : بتعيطي ليه الواد دا عملك حاجة ؟

سيا بتشاور على كينان وهي بتعيط وبتقول : خد مني الفوم ومسحه من إيديي أعاااااا

كينان بيكور آيده عند بوقه وهو بيقول : مكانتش كدا في أول مرة معرفش مالها دي !!! وهي شهور الوحم المفروض بتبقى في الأول ولا في الأخر أنا مش فاهم !!

بدر بياخد نفس وهو بيقول : طب قوم يا بطاطس من على الأرض أنا هظبطك

سيا بعياط : عاوزة الفوم عشان خاطري

بدر بمواساة : قومي طيب هجبهولك

كينان بصوت عالي : هتجيبهولها ؟؟

بدر بيخبط على بوقه بعصبية : إسسكتت إسكتت

نزل كينان راسه لتحت وسيا بتقوم وبتمشي مع بدر

نزلو المطبخ ف جاب بدر كريم شانتيه وحكهولها في طبق

حطت سيا صوباعها فيه وداقته راحت باصه لبدر بلوية بوق

مسكت حبة من الكريم شانتيه وراحت رمياه في وش بدر

غمض عينه وهو ماسك نفسه * عشان من غير حاجة عصبي *

كينان شاف وش بدر متبهدل كريم شانتيه راح ضحك وهو بيشاور عليه

راحت سيا واخدة حبة كريم شانتيه كمان راحت رمياهم على كينان

وقعدت تضحك !

يتبع ..

#خارج_قانون_الحب٢

#روزان_مصطفى

#بقلمييييي

( رأيكم ؟)

|22|

" أصابعها الرقيقة الناعمة تلطخت ، ياليت كُل مأساويتها في هذا العالم إنتهت "

#بقلمي

مرت الأيام وسيا كانت بالفعل بتعمل تصرفات غريبة ومفيش أكل بيفضل في بطنها على طول ترجيع ، بدر كان طول الوقت جمبها بيحاول يعوضها عن طفلها الأول بإنه يبذل أقصى جهد عشان يحافظ على الحمل الجديد عشانه وعشانها

كينان بدأ يروح الجيم وعلاقته بمادلين تطورت وبقوا أصحاب بعد فسخ خطوبتها من حسن

أما إكس كان من وقت للتاني بيتعمد مضايقة ريما ك نوع من أنواع التسلية

ونيجي لأهم شخصية في البارت دا .. ♧ توفيق♧

* في مبنى إكس

كان قاعد بيحط أكل في حوض السمك ببرود ، لابس بنطلون رسمي لونه رمادي غامق وقميص إسود ومدي ظهره لتوفيق اللي قاعد وبيقول : لا يا شيخ ، ما أنا قادر أخلص عليهم ومش هياخدوا في إيدي غلوة ، بس عملتلك إنت إعتبار وكبرتك وجيتلك تُحكم وتاخدلي حقي ، بس إنت نايم ومش معبرني

إكس ببرود وهو بيبص على السمك وبيلاعبهم من غير ما يبص لتوفيق : الدنيا دي يا توفي عاملة زي حوض سمك كبير ، كله ماشي يضبش في بعضه وسايقين الهبل على الشيطنة ، في وسط قذارة وهرجلة السمك اللي بيعمل تواليت في سمكة منهم منظمة ونظيفة ، بتستني طول اليوم وهي شيفاهم بيوسخوا الحوض ف تخرج تحاول تنظف كل دا وراهم ، بس إييييه ؟ بتستنى

أنا بقى زي السمكة دي ، بستنى كدا عشان أنضف حواراتكم اللي مبتخلصش ، عشان مبحبش أقعد في بيئة وسخة ، ولو إتكلمت بالإسلوب دا تاني معايا يا توفيق هتزعل مني جداً

قعد إكس قدام توفيق وهو بيرفع كم القميص بتاعه

توفيق بملل : ما أنت عمال تقولي إصبر إصبر وأنا صابر ، بس ياريت ييجي بفايدة

إكس بنفاذ صبر : أنا لو مراتي حامل مش هتبقى متوترة كدا وعمال أهديها ، أنا شايف إنك تقعد تسترخي في فيلتك وأنا لما ييجي وقت التنفيذ هبقى أبلغك

بعت إكس بوسة في الهوا لتوفيق ف توفيق بصله بغيظ ونفور ..

* في إحدى المطاعم

مادلين وهي بتضحك : ثبت إيدك على الترابيزة ولو ضربت إيدك هبقى كدا كسبتك ونطلب على ذوقي

كينان بضحكة وهو بيحط إيده : ماشي بس متضربيش جامد

الجرسون واقف ماسك المنيو وباصصلهم وهو على أخره من لعبتهم السخيفة ومستنيهم يطلبوا

كينان بصله وقال : هظبطك في البقشيش متقلقش

حطت مادلين إيديها على ودنها وهي بتقول : زززز * بتنزل إيديها عشان تحاول تضرب كينان ف بيبعد هو إيده ويرجعها

ضربت مرة واحدة ف كينان سحب إيده ف جت الضربة على الترابيزة

مادلين بعياط هزار : لااااااع مش عاوزة سمك ماما لسه طبخاه إمبارح

كينان : ههعهعهع ، هاتلنا بقى يا معلم إتنين شوربة سي فود وواحد صيادية

مادلين بترفع صوباعها زي التلاميذ اللي في الفصل ف كينان قالها : قولي

مادلين : عاوزة جمبري مشوي معلش عشان أكلنا سمك إمبارح

كينان للجرسون : خلاص هاتلها

خد الجرسون الطلبات وراح يجيبها

كينان وهو بيسند على الترابيزة : عشان تعرفي بس إن حتى وإنتي خسرانة بسيبك تطلبي براحتك ، قلبي طيب

مادلين بضحكة : ماشي يعم ، هو فونك بينور كتير ليه ؟

كينان بيبص للفون بإستغراب : مش عارف !

رفع الفون لقى بدر ف قال بسعادة : دا الزعيم

* في بيت بدر وكينان

بدر بيكلم كينان : بقولك يا كينان فاضي بالليل ؟ رايح H&M أجيب كام حاجة كدا

كينان : فاضي يا زعيم عينيا ، بس هتفتكر أخوك صح

بدر : يعني هجيب لنفسي مش هجيبلك ؟

كينان بضحكة : حبيبي يا زعيم

قفل مع كينان وسيا كانت في المطبخ بتحط نوتيلا على توست وعليهم خيار مخلل وبتاكلهم وهي مستمتعة ومغمضة عينيها

بدر بقرف : بقولك يا حبيبي بالليل هنخرج عشان نجيب كام طقم ليا ولكينان ، ولا تعبانة نأجلها يوم تاني ؟

سيا وهي بتاكل : تؤ تؤ روحوا إنتوا ومتخافوش عليا

بدر بقلق : لا أخاف ، مقدرش أسيبك هنا لوحدك

سيا بلوية بوز : ما إنتوا مش هتتأخروا وهتجبلي معاك كاجو عشان نفسي فيه

بدر : طب هاتي تمن الكاجو

مسكت سيا شنطتها وهي بتدور فيها ف حط بدر إيده على الشنطة وهو بيقول : لا مش دا تمنها

ميل عليها وباسها وهو بيفك شعرها وبيسندها على الترابيزة

سيا بتبعد وتتعدل : غلط ، غلط عشان الشهور الأولى من الحمل * بتكمل أكل *

بدر بعصبية وهو بيخبط إيده في الحيطة : يعني النوتيلا والمخلل سوا كويس وبوسة بدر الكابر هي اللي هتسقطك !!!

سيا ضحكت ف خلع بدر التيشيرت بتاعه وقال : هاخد شاور وبعدين ألبس عشان نروح أنا وكينان

* بالليل

بدر وكينان واقفين عند الباب وسيا ساندة ع الحيطة بتشوفهم بيلبسوا الجزم

بدر : عاوزة حاجة تانية غير الكاجو ؟

سيا بتكشيرة وهي حاطة إيديها على بطنها : لا خلاص أكلت كتير إنهاردة

بدر باس راسها وخرج مع كينان ، لقت سيا المطبخ مكركب شوية وكينان كتر خيره بيغسل المواعين على أد ما يقدر

فتحت سيا الراديو لإنها بتحب تسمعه في العربية أو في البيت ومش بتحب تسمع في الفون ، فتحته على محطة الأغاني وبدأت تغسل المواعين ، كانت متذاعة " فطومة " من فيلم هند رُستم بالصوت الأصلي

ف بدأت سيا تغسل المواعين وهي بتدندن مع الأغنية : أنا

قلبي حبك فطوومة ، وقال بحبك فطوومة

أوكرة باب البيت كانت بتتحرك حد بيحاول يفتحه ، وبالطبع سيا مش سامعة عشان بتغسل الطباق وبتغني

فتح الباب أخيراً ، ودخل بخطوات ثابتة للمطبخ ، كانت سيا موطية بترمي الزبالة اللي في الطباق وهي بتدندن

واحد هجم عليها من ورا وهو ماسك سكينة وحاططها على بطنها ومثبتها جامد وسط صوت الأغنية اللي خارجه من الراديو

سيا برعب وهي ماسكة إيده خايفة يأذي إبنها سمعت صوته وعرفت هو مين

توفيق بغل : إستنيت كتير عشان أخد حقي وفضلت مستني ومستني ، ليه سونيا تموت وإنتي تعيشي ؟ ليه أعيش مكسور

سيا مبرقة وهي ماسكة إيده بتحاول تمنع السكينة تدخل في بطنها

توفيق وهو بيجمد إيده وبيقربها لبطنها : لازم تدفعوا ثمن أفعالكم

كان في سكينة وسخه على طرف الحوض ف سيا بصتلها

مدت صوابع إيديها ومسكتها وهي بتقول : مش هخسر إبني مرة تانية ، مش هخليه يدفع ذنب حاجة معملهاش

بإيد كانت بتمنع إيده تضربها بالسكينة ، بالإيد التانيةوبكل قوتها غرزتها في رقبته وسحبتها تاني وهي مسكاها في إيديها

والأغنية شغالة

فتحة البوق من الصدمة ، نني العين بيصغر ! وصوت الاغنية مش لايق تماماً وإتحولت لموسيقى مُرعبة بالنسبة ل سيا

وقع توفيق على الأرض وهو بيجيب دم من رقبته وبقى جثة هامدة من غير روح

سيا وقعت على الأرض وهي بتبص على إيديها المتغرقة دم !

مسحت إيديها في فستانها وهي بتقول بتكرار : ك كنت بدافع عن إبني .. كنت بدافع عن إبني ! ك..

رجع بدر وكينان ولقوا الباب مفتوح إتفزعوا ! دخلوا جري على المطبخ وهما بيبصوا لقوا توفيث ميت وسيا فستانها متغرق دم والسكينة متغرقة وهي مسكاها ، أول ما شافت بظر إتفزعت وبدأت تعيط وهي بتقول : إتهجم عليا ! كان عاوز يحط السكينة في بطني عشان يموت إبني يا بدر

بدأت تشهق وهي بتقول بصعوبة : أنا بقيت قاتلة ! أنا قتلت !!!

بدر بقرف وهو بيبص لتوفيق : خير ما عملتي ، كلب وراح لو مكنتيش قتلتيه كنت قتلته أنا

سيا برعب : قتلته ! أنا قتلته !!

الراديو شغال على الأغنية وكأنها مش راضية تخلص

قرب بدر ل سيا وهو بينفض إيديها من السكينة وبيقول بمواساة : دا كان دفاع عن نفسك ، واحد جاي يقتلك ف قتلتيه ! شوفتي الموضوع سهل إزاي ؟ دلوقتي يا حبيبي هتطلعي الحمام فوق تستحمي لحد ما ننضف القرف دا ، كينان هات ملاية من فوق متكونش بيضا

طلع كينان فوق وخرجت سيا من المطبخ وهي بتجري برا البيت ومعاها شنطتها اللي كانت أصلاً المطبخ ، خرجت برا البيت من غير ما تقول لبدر ..

طلعت تجري في الشارع ولقت تاكسي راحت مشوراله

وقف الراجل ومخدش باله من الدم اللي على هدومها بس كانت بتعيط وحالتها صعبة

السواق : على فين يا ست ؟

سيا : *****

السواق إفتكر إن حد تعبان من عيلتها ف هي ريحاله بالليل معيطة من القلق عليه ف قعد يحوقل طوال الطريق وسيا ساندة برعب على الشباك والدموع الباردة مغرقة وشها

شغل السواق الراديو وأول ما إشتغل كانت أغنية فطومة

الألحان كانت مُرعبة بالنسبة ل سيا ف قالتله برعب : لا لا لا إطفي الأغنية دي !

السواق بيبصلها في المرايا : حاضر بالراحة يا مدام ..

* في بيت بدر وكينان

جاب كينان الملاية ولف توفيق فيها وهو بينظف الدم اللي حواليه وبيحط السكينة في كيس بلاستيك

رفع بدر الفون وإتصل برقم ، عشر ثواني الرقم رد وكان مستر إكس

بدر بصوت مش تمام : تعلالي على البيت .. محتاج مساعدتك في حاجة

* في المنطقة الشعبية

وصلت سيا وهي بتبص لعمارة عمتها

طلعت فوق وهي ساندة بالعافية على الباب ومعيطة ومتبهدله هدومها دم

فتحتلها عمتها ودخلتها

عمتها أول ما شافتها قالت بخضة : إيه الدم اللي على هدومك دا ؟ في حد عملك حاجة إنطقي يابنتي !!

سيا بتبص لعمتها وفجأة حطت إيديها على راسها وتكرار الحدث هيقتلها

هكذا كانت البداية .. هل تلك الديجافو تعني أن نهايتها إقتربت ؟؟

يتبع ..

#خارج_قانون_الحب٢

#روزان_مصطفى

#بقلميييي :))

|23|

“نحن اللذان

لا تجمعنا صورة

ولا طريق”

وصل إكس لبيت بدر ونزل من عربيته ووقف يخبط على الباب ، فضل دقيقتين لحد ما كينان فتحله ودخله

قفل كينان الباب وراه ف بص إكس حواليه وهو بيقول : مساعدتي إيه اللي إنتوا محتاجينها ؟

كينان بغموض : إدخل المطبخ هتعرف ..

إكس بص لكينان بصة رهيبة وحط إيده في جيبه ودخل المطبخ

لقى ملاية ملفوف فيها حاجة وبدر قاعد على كرسي المطبخ بيبص لإكس بغرابة ..

إكس بوضوح : تمام حد يفهمني إيه اللي بيحصل هنا

بدر قام وفتح الملاية قدام إكس ، شاف توفيق ف بص لبدر وقال : لولا إنه مقتول هنا في بيتك أنا كنت قولت إنك قتلته وخالفت قوانين المافيا .. بس وجوده في بيتك يثبت إنه المتهجم ، ولا إنت إستدرجته عشان تثبتلي كدا ؟

بدر بحزن : مش أنا اللي قتلته للأسف ، هو إتهجم على مراتي ف قتلته بإيديها ..

إكس برفعة حاجب : وااو ، جميل تكون المدام بتعرف تدافع عن نفسها ، هي فين حالياً

بدر بحزن : فوق هطلع أتطمن عليها

طلع بدر لفوق عشان يشوف سيا فين ويجيبها

إكس قال لكينان : عندكم هنا كوريك ؟

كينان بإستغراب : إيه الكوريك دا ؟

إكس بتفكير : مممم ، عندكم حجات نحفر بيها في الرمل؟

كينان كان لسه هينطق سمع بدر من فوق بيزعق وبيقول : يا سيااااا ...

* في بيت عمة سيا

غسلت فستانها وفردته على الكرسي اللي في الأوضة اللي قاعدة فيها

عمتها بتساؤل : ماهو لو في دم يبقى حصلك إجهاض ، روحي لدكتور يطمنك

سيا بتوهان وهي ممدة على السرير برعب : كان هيحصلي إجهاض بس لحقت نفسي

عمتها : أنا لولا وريتيني قسيمة الجواز كنت جيبتك تحت رجلي ، ألا قوليلي هو بيضربك وبيمد إيده عليكي ؟

سيا بتعب : سيبيني لوحدي شوية وأنا يومين بالظبط هحاول أظبط نفسي ف أي شغل وأسيبلك البيت

خرجت عمتها من الأوضة وقفلت الباب ف إنكمشت سيا على نفسها وهي بتعيط

* في بيت بدر وكينان

بدر بقلق : هموت وأعرف راحت فين ، أدور عليها فين

إكس ببرود وهو بيهرش في دقنه : عادي جداً لو خدت تليفونها معاها أقدر أعرفلك هي فين

بدر وقف وقال : إزاي دا ؟؟

إكس بنفس البرود : أصل أنا هكرت تليفونها هي وكينان بيه ف عشان كدا

بدر بعصبية وهو بيمسك إكس من قميصه : نعم يا أخوياا ؟؟ كل دا عشان الكلب توفيق بتتجسس على تليفون مراتي ؟؟

إكس وهو بينطر إيد بدر : إيدك ! القميص دا براند ! ، وبعدين مالك متعصب ليه ما طلع ليه فايدة على الأقل تعرف هي فين عشان تطمن عليها

بدر وهو متضايق : طب إعرفلي هي فين طيب

خرج إكس الفون بتاعه وبعت مسج للهكر اللي شغال عنده وقاله ، خمس دقايق وصلت لإكس رسالة ف إتصدم !

إكس قال لبدر العنوان ف بدر قال : يعني هي عند عمتها دلوقتي ؟

إكس : لو عمتها ساكنة في العنوان دا ف غالباً أه

أخد بدر مفاتيحه وقال : طب يلا بينا نروح نجيبها

إكس بيفرد إيده قدام جسم بدر مانعاً إياه إنه يخرج وقال : الأفضل في حالتكم دي المدام تفضل عند عمتها ، ألا قولي يا بدر هو بيتك دا يلزمك أوي ؟

بدر بتكشيرة : أكيد يلزمني أمال هبات في الشارع !!!

إكس ببرود : تؤ ، بص اللي هيحصل ك الأتي ، هناخد جثة توفيق ونرميها ف أي مكان .. ونخفي أي دليل ليه علاقة بالمدام ، بعدين هنولع في البيت ف لو في حاجة مهمة ليك فوق إطلع خودها عشان نخلص

بدر بإعتراض : إيه علاقة إنك تولع في بيتي يعني ؟؟

إكس بذكاء : البوليس أكيد هيلاقوا جثة توفيق مقتول ، تقرير المعمل الجنائي أعتقد بيحدد وقت الوفاة ف عشان كدا عاوز في نفس يوم موته يكون بيتك بيولع وإنت وكينان كنتوا برا بتوصلوا المدام عند عمتها ف رجعت لقيت بيتك بيوبع وتتصل على المطافي وتنهار ، هي ممكن تكون خطوة ملهاش لازمة بس إحتياطية عشان نبعد الشبهات عنك لو ظهرت مع توفيق كتير ف هيبقى وقت وفاته إنت مشغول في حريق بيتك فهمتني ؟؟

بدر بعصبية : عليا الطلاق الشغل معاكم بقى جاي عليا بخسارة * بيطلع على السلم *

إكس ببرود : مع مين هو إنت خليت حد ! دا إنت ناقص تصفيني أنا شخصياً

* after 2 hours

واقف بدر وكينان قدام البيت بعد ما خد إكس جثة توفيق والدليل وكل حاجة .. واقفين كينان وبدر مستنيين المطافي اللي جت وبدأت تخمد نار الحريق ..

ظابط الشرطة لبدر : في حد جوا ؟ في حد إتأذى ؟؟

بدر بتمثيل إنه مصدوم : لا ! لا بس أوراقي ورخص العربية وكل ممتلكاتي الشخصية جوا !!!

ظابط الشرطة : تقدر تروح السجل المدني تجدد أوراقك .. عندكم مكان تناموا فيه ؟

بدر بصدمة : ليا ضديق كلمته وجاي في الطريق ، أنا يافندم كنت بوصل المدام عند عمتها رجعت لقيت البيت بيولع ! مين عمل كدا بس ميين !!

ظابط الشرطة : هل ليك عداوة مع حد ؟ دا بالنسبة لو كان فعل عمد ، أو ممكن حد منكم نسي حاجة على النار ف ولعت الدنيا

جت عربية إكس ونزل لابس قميص أبيض وبنطلون إسود ونظارة نظر ، حاطط جل على شعره ومسرحه لورا وعامل شكله محترم وإبن ناس

وصل لبدر والظابط وهو بيقول بخضه : مساء الخير يافندم ، إنت كويس يا بدر ؟

بدر بتمثيل : مش عارف أقولك إيه البيت ولع وكل حاجة ولعت

إكس بنبرة محترمة : فداك يا أخويا بيت أخوك مفتوحلك لحد ما توقف على رجليك

بيمد إكس إيده بالبطاقة للظابط وبيقول : مساء الخير يافندم أنا قاسم الكاشف صديق لبدر

بص الظابط على البطاقة وهو بيقول : أهلاً يا أستاذ ، عموماً يا أستاذ بدر ربنا يعوضك خير وتأكد لو ف أي وقت حابب تعمل بلاغ ضد حد مكتبي مفتوحلك

بدر بأدب : أشكرك يافندم شكراً جزيلاً

قوم إكس بدر وكينان مشي وراهم وركبوا عربية إكس ..

* في العربية بعد ما مشيوا مسافة كويسة

إكس بيبص في المرايا عشان يشوف العربيات اللي وراه بعدين قال : رجعت خدت شاور ولبست عشان كنت متبهدل أنا والرجالة تراب ، إنت كان ييجي في مخيلتك يابدر إني أساعدك ؟

بدر وهو ساند راسه على الكرسي : أكيد لا بس مع ذلك كلمتك

إكس : بالظبط ! ساعدتك عشان توفيق صغرني أوي وإتصرف من ورايا برضو ف يستاهل نهاية وسخة شبهه

فتح إكس الكاسيت على أغنية : الحلوة بعيونها الحلوة ، لعبدالحليم

بدر بضيق : إنت رايق ؟؟

إكس بيدندن مع الأغنية وبعدين قال : صوت عبدالحليم دا قادر يخرجك من كل مشاكلك النفسية ، مكونش رايق ليه واحد بدماغ ألماظ زيي لازم يكون رايق

كينان بغيظ : يعني هنقعد فين برضو ما ولعت في البيت ؟

إكس : هتقعدوا عندي إهدى بقى !

وصلوا المنطقة ف نزل بدر جري وطلع سلم العمارة

نزل إكس وهو بيرفع أكمام القميص ونزل معاه كينان

إكس بتريقة : الحُب يا أمير

كينان بخنقة : يا شيخ إتنيل !!

* في شقة عمة سيا

جرس الباب كان بيضرب ف خرجت عمتها من المطبخ وهي بتمسح إيديها وبتقول : أيوة ياللي على الباب إستنى هي الدنيا هتطير !!

فتحت الباب لقت بدر ، بصتله بضيق وقالتله : هو إنت !! مش مكفيك إنك إتهجمت عليا في بيتي قبل كدا إنت والصايع التاني

بدر بضيق : سيا فين ! يا سياااا

خرجت سيا من الأوضة وهي واقفة قدام بدر بوش بارد وبتقول : معلش يا عمتي دخليه ..

عمتها ببرطمة وهي بتسيبله الباب مفتوح : أنا كنت نقصاكي جتك البلا إنتي والأشكال اللي تعرفيها

سيا بحزن : جاي ليه يابدر ؟

بدر دخل وقفل الباب وهو بيقول : إنتي جريتي ليه لما ...

جريت عليه وهي بتسحبه من إيده ودخلته الأوضة وقفلت الباب وهي بتقول : إسسكت إنت جاي تفضحني هنا هو أنا ناقصة !

بدر بعصبية : أنا اللي هفضحك ولا غبائك وغباء اللي عملتيه هو اللي هيفضحك !

سيا ببرود : أنا معملتش حاجة ، أنا مش مصدقة إني عملت كدا بسبب حياتك القذرة ! سيبني في حالي بقى !!

بدر مصدوم من كلامها وبيقول : حياتي القذرة ! دلوقتي بقت حياتي أنا اللي قذرة ؟ وبقى بيت عمتك كويس !

سيا بتبريقة : على الأقل هنا مش هلاقي حد بيتهجم عليا عاوز يقتلني ف أقوم قتلاه ! انا عارفة إن هربي دا كان غلط بس مش هقدر أستحمل العيشة دي .. الحُب لو من غير أمان ف يغور ، أنا على طول إيدي على قلبي لا يحصلك حاجة ولا تتحبس وعلى طول إيدي على قلبي لا الحمل بتاعي يجهض زي اللي فات ف على إيه كل دا ! طلقني وخليني أتعود على غيابك من دلوقتي أنا مبقتش قادرة

بدر مسك دراعها جامد وقال من بين سنانه بغضب : مفيش طلاق طول ما إنتي حامل مني ! أنا سكتلك كتير وقولت مخضوضة من اللي حصل بس مش هسكتلك تاني ، ومتنسيش إنك عضوة في الظلال السوداء

سسا بتسحب دراعها بعنف من بين إيده وهي بتقول : أنا حامل يا متخلف ! حبيتك وبقيت حامل خاف عليا أنا وإبنك شوية بقى

* عند إكس وكينان

كانوا ساندين على العربية مستنيين بدر وسيا ، سمعوا صوت بنت بتزعق

بصوا لقوا ريما وسط مجموعة شباب ماسكين شنطتها وبيشقطوها لبعض وهي في النص تجري على دا وتجري على دا عشان تحاول تاخد الشنطة

وهما عمالين يضحكوا وهي وقفت حطت إيديها على راسها وبدأت تعيط

المنظر كان مستفز ومفيش حد من المنطقة بيتدخل غير راجل عجوز جداً بيقولهم : إختشي على دمك يا ولد إنت وهو

إكس وهو بيقوم من على العربية بعصبية : إنت لسه هتكلمهم يا عم الحج ! تعالى يا حبيبي إنت وهو

كينان بيخلع جاكيته وبيمشي ورا إكس : معاك يابا

قربلهم إكس ووقف في النص وهو بيقول : هات الشنطة دي كدا وخليك واقف قدامي ..

الواد بتريقة : ولو مجبتهاش ؟

لف إكس وبص لكينان وهو بيقول : هو أنا إتسرعت لما لبست لبس راجل محترم صح ؟

كينان وهو بيبصلهم بنظرة مش تمام : تقريباً كدا

قلع إكس النظارة وقال : طب هات يا كوكو الشنطة وإطلع لأمك تحميك ، ولا أطلعك ليها بلبوص وجاهز ع الحموم

حطت ريما إيديها على بوقها بكسوف ف قال إكس وهو بيبصلها : إقعدي إنتي عند عربيتي ومتتحركيش

ريما بإعتراض : إنت مين أصلاً عشان ..

إكس بصوت عالي : بقول يلااا !

إتخضت ف خبطت في الأرض وهي رايحة تقعد عند عربيته وتتفرج على الخناقة من بعيد

بدأوا يضربوا العيال لحد ما خدوا الشنطة وبص إكس ل ريم

لسه هيتحرك ناحيتها سمعوا صويت جاي من شقة عمة سيا !!!

يتبع ..

#خارج_قانون_الحب٢

#روزان_مصطفى

#بقلمييييي

|24|

" قُل للمليحة في القميص الأبيض .. مطر وبرد حلوتي لا تبردي .. هل تسمحي لي أن أعيرك معطفي ؟ .. والرأي رأيك إنما لا ترفضي ♡"

سمعوا صوت صويت جاي من شقة عمة سيا ف إكس إدا الشنطة لريما وطلع جري ورا كينان على السلم

الشقة كانت مفتوحة وبدر بيحاول يسحب سيا لبرا اللي عمالة تصوت ورافضة

بدر بعصبية : قدامي يلااا !!

جارهم : ما تسيبها يا جدع إنت ؟

بدر بإنفعال : دي مراتي مش عاوز حد يتدخل ! الهانم عاوزة تاخد إبني وتمشي !

كينان بمحاولة تهدية بدر : طب سيبها بس يا زعيم مينفعش كدا !

إكس بتدخل : مدام سيا ، من فضلك إختصاراً لأي مشاكل ممكن تحصل تتفضلي معانا على العربية ؟ بيت جوزك ولع ولازم تكوني جمبه في الظروف دي

سيا بصدمة : يالهووي ! البيت ولع ! وحاجتي ؟؟ وهدومي ؟؟

بدر من بين سنانه : قدامي كدا ، خشي جوا يا حجة * على عمتها *

رمت عمتها شنطة سيا وهي بتقول : متخبطوش على باب بيتي تاني يا مجانين يولاد المجانين * رزعت الباب في وشهم

نزل إكس وكينان ووراهم بدر ساحب سيا ، شافتها ريما ف قالت بعنف : إنتوا خاطفينها ولا إيه !! إيه الإسلوب الهمجي دا ؟؟

بدر بعصبية : وإنتي مالك ؟

إكس بتحذير : هااا ! مالك يابدر ينفع نعامل المودموزيل بالطريقة دي ؟

كتفت ريما إيديها وهي بتبص لإكس وبتقول : والنبي تخليك في حالك عشان بقالك كام يوم بتيجي تتنحنح هنا بأغاني عبد الحليم

إكس بهزار : هبقى أجي أتنحنح المرة الجاية بأغاني شادية حاضر ..

ريما بعوجة بوق : يا خفة يا عسل !

كينان بإستغراب : إنت مالك ومال البنت دي ؟ على فكرة دي بنت محترمة أنا شخصياً أعرفها

إكس بغيرة من غير ما ياخد باله : ما هي عشان محترمة أنا مهتم ، إركب يا حنين

ركب بدر سيا ورا وركب جمبها وخلى كينان يركب جمب إكس ..

وصلوا للمبنى اللي قاعد فيه إكس ، دخل رمى المفاتيح على الكاونتر وهو بيقول : نورتوا يا جماعة ، الثلاجة فيها أكل والبار فيه واين * خمرة * اي حد حابب يعمل حاجة ميتكسفش ، وفي أوض في الطابق الثاني حوالي ٦ أوض ..

بدر بوضوح : هحتاج أنا والمدام أوضة واحدة بس ، لو معاك مفتاحها

إكس وهو بينكش شعره من الجيل : أه المفتاح في الباب من برا ، أنا هغير ستايل نجيبة الخولي دا وأجيلكم ..

كينان قعد ومسك تفاحة وهو بياكلها وبيقول : برااحتكك

سحب بدر سيا لفوق ودخلها أوضة وهو بيقفل الباب وراه

بدر بصوت عالي : عاوزة تطلقي ومشوفش إبني تاني !! عاوزة تحرميني منك ومنه ؟؟

سيا بحزن : مش أحسن ما نتحرم إحنا الإتنين منك ؟

بدر بعصبية : هو إنتي بتشوفي الغيب يعني وخلاص قررتي إني هموت ؟

سيا : وأنت برضو متعرفش الغيب عشان كدا بقولك ! السكة دي زفت ووصلتني إني أقتل ، أنا خايفة أنام وخايفة أعمل حاجة ومنظر الدم مش مفارق عيني

بدر بهمس : سيا إفهمي إن دا بقى قدرك من أول يوم بقيتي ملكي فيه ، مفيش مجال للتراجع خلاص ، مش هسمحلك تخلي مصير إبني زي مصيري عشان أنانيتك أو أنانيتي ، أما بالنسبة للنوم أنا ممنعتش عنك حضني !

* عند إكس وكينان

كينان بتساؤل : هنفضل قاعدين هنا لحد إمتى ؟

إكس وهو بينفث دخان سيجاره الإلكتروني : لحد ما تدهنوا بيتكم من أول وجديد وتجيبوا عفش وحجات

كينان بضيق : كانت خطوة هبلة ملهاش لازمة ، ومحدش شك فينا أصلاً

إكس بوش مُتجهم : ممكن متفتيش في حاجة أنا خبرة فيها أكتر منك ؟

وصلت لكينان رسالة على فونه ف بص فيها كانت من مادلين " أنت مفتحتش إنهاردة خالص على فكرة ! "

كينان كتب رسالة سريعة وهو قاعد " بيتنا ولع وقاعدين عند صاحبي "

مادلين " بتهزر صح !! إنت كويس طيب ؟ "

إبتسم كينان على إهتمامها وكتب فجأة " وحشتيني أوي "

قلبها دق وهي ماسكة الفون لإن هما صحاب مُقربين مش أكتر ف إبتسمت وهي بتكتب " وإنت كمان وحقيقي متضايقة عشان مشوفتكش إنهاردة !"

شاف كينان المسج ومردش وهي إتضايقت من كدا

* في بيت مادلين

كانت لأول مرة مش عاملة شعرها كيرلي وقاعدة قدام المرايا وهي عاملة ضفيرتين وبتكلم نفسها في المرايا : تؤ ! مردش ليه بقى ؟ يعني كان لازم تقوليله وإنت كمان وحشتني ! مبسوطة بشكلك دلوقتي ؟

صوت مسج وصلتها على فونها ، قامت من قدام التسريحة وهي بتقعد ع السرير مربعة وبتقرأ

كينان " حبيبتي أفتحي شباكك أنا جيت .. أنا واقف تحت البيت "

ضحكت مادلين وهي بتكتب " مش هعمل زيطة وسيط وحشتيني "

كينان كتب " هو إنتي وحشتيني بجد بس أنا تحت البيت بجد مش هزار ! "

مادلين بشهقة : نعمم !!

رمت الفون على السرير وهي بتبص من الشباك لقت عربية غريبة غير عربية كينان وهو واقف قدام البيت بالفعل مبيهزرش

دخلت مادلين بسرعة ولبست جاكيت طويل وخدت المفاتيح ونزلت ، مامتها كانت نايمة

نزلت لقت كينان ساند على العربية

جريت عليه ف هو تلقائياً فتح إيده وحضنها !

* في أوضة بدر وسيا

كانت قاعدة على السرير وبدر قاعد جمبها وبيكمل كلامه وبيقول : هدومك اللي إتحرقت هجبلك الأجمل منها ، هجدد البيت من تاني بس كان لازم يا حبيبتي أبعد عنك أي أذى ممكن تتعرضيله بسبب توفيق الكلب دا !

سيا بتعب : والحل

نقعد في بيت راجل غريب منعرفوش ؟

بدر بجدية : هو أه منعرفوش أوي ومش سهل نثق فيه ، بس اللي واثق منه إنه صعب يخوننا عشان أنا عارف الراجل دا كويس .. مش بتاع وشين يعني ..

سيا وهي بتسند ظهرها على السرير : مش قادرة بجد ضهري واجعني أوي

بدر وهو بيزيح خصلات شعرها عن وشها : مش عاوزك تخافي وإنتي معايا ، أنا لو واثق إني مش هحميكي مكنتش أتجوزتك ، هو بس غلطتي يومها إني سيبتك في البيت لوحدك وخرجت

ميل براسه على بطنها وباس بطنها وهو بيقول : حقكم عليا بجد

حطت صوابع إيديها بين خصلات شعره وهي بتطبطب على راسه وبتقول : بحس طول الوقت إني خايفة ، بنام وإيدي على قلبي بجد لا يحصل حاجة ، مقصدش أبقى نكدية بس بخاف أتعلق بحاجة وتروح مني

حط بدر راسه على رجل سيا وهو باصص للسقف بتوهان وقال : لما فقدتها كان سني صغير مش مستوعب يعني إيه خيانة وكل اللي حصل ، كنت كل ما أشوف عيل أمه ماسكة إيده وماشيين في الشارع سوا ببقى عاوز أسيب إيد تيتا وأجري أخرج أمي من الرمل وأخليها تمشي معايا ، أنا جدتي برضو مقصرتش معايا بس الأم غير ، كنت تعبان وبروح أنام في أوضة لوحدي عشان تيتة عوزاني راجل على حد قولها .. كنت بحلم بيها ، دموعي دي كانت بتغرق المخده بجد لدرجة إن من كتر الدموع جدتي كانت بتشك إني بعملها على نفسي

بس كانت تشوف هدومي تلاقيني نضيف ف تعرف إني عيطت ، ف تقولي لو ذاكرت الدرس بتاعك حلو إنهاردة هجبلك عسلية .. كنت بحب العسلية أوي ف كنت بذاكر ، بس كنت بحتاج في أخر كل يوم أروح أحضن أمي ولو لمرة

أشوفها تاني وهي بتسرح شعرها الإسود الطويل قدام المرايا

أنا كنت بكتم إحساسي حتى إني أقول لحد إنها وحشتني ، مرة قولت لجدتي كدا ضربتني بالقلم بعدها حضنتني .. مقدر إحساسها إبنها إتسجن بس كنت طفل وكان غصب عني يا سيا ، عشان كدا بقولك عاوز أخلف منك كتير بس أفضل أنا أكتر واحد بتديله إهتمامك ، كفاية إن أمهم هتكون بالحنية دي كلها ، يابختهم إنهم جواكي .. برغم إنك مراتي بحس طول الوقت إني عاوز أكون جوا أعمق جزء منك

سيا بتبصله بحب وبتقول : مش مكفيك إنك جوا قلبي

بدر بيتعدل وهو بيمسح دموعها على كلامه وهو ساند دراعه وباصصلها : مش مكفيني ، عاوز سيا وبدر يكونوا واحد ، عاوز أبقى أنا وإنتي منتنفسش غير من هوا واحد ، بتجنن لما بتقولي طلقني ، إزاي وأنا مبقتش أقدر أعيش من غيرك ؟ تقدري إنتي ؟

سيا : تؤ ، إنت قولتلي كنت بتقول لبنت أمل إيه ؟

بدر بإبتسامة : يا عسلية

سيا : ومبتقوليش أنا كدا ليه ؟

باس كتفها وهو بيقول : عشان حلاوتك إنتي متتقارنش بأي حاجة مسكرة في الدنيا .. بحبك

* عند ريما وكينان

ريما كانت قاعده على كتف كينان وهي بتقول : أول ما قعدت على كتفك إفتكرت على طول مشهد أوس أوس وجاد ، مبسوط يا أوس أوس ؟ مبسوط يا جااد ♡

كينان بتعب : طب وإنتي مبسوطة ؟

ريما بسعادة : أووووي الجو برد فوق

كينان : أنا محتاج أروح مركز تأهيل صحي والله

ريما بغضب : قصدك إيه ؟ قصدك إني تخينة ؟ أنا اه بقالي أربع أيام مبروحش الجيم وبدرب الناس بس عادي يعني مكانش طبق محشي اللي كلته إنهاردة دا

نقط مياه بدأت تنزل على وشها ، فجأة بدأت الدنياا تمطر

ريما بخوف : كينان نزلني الدنيا بتمطر

نزلها كينان وهو بيسندها بإيده لحد ما وقعت في حضنه تحت المطر

* في أوضة بدر وسيا

سيا وهي بتتغطى باللحاف : الدنيا شكلها بتمطر سامع صوت المياه على الإزاز ؟

حضنها بدر وهو ماسك إيديها وبينفخ فيهم عشان يدفيها لإنها كانت متلجة

" القشعريرة التي سرت في جسدي من لمسته أنستني الشتاء وإسمي وأنا ! " ♡ بقلمي

يتبع ..

البارت الجاي في مفاجأة ، تفتكروا حلوة ولا وحشة ؟

#خارج_قانون_الحب٢

#روزان_مصطفى

#بقلميييي

|25| عنوان البارت / كُن مُنصفاً سيدي القاضي

" كان يهرول بين أقدام أولئك الذين يحملون النعش .. سقط المطر .. ف إحتمى بأبيه للمرة الأخيرة "

أتعاقبني الأن على النسخة السيئة التي أصبحت بها ؟ بعد كل ما مررت به من قسوة العالم ولم أجد من يحنو علي ، جفاء العالم صنع مني ذلك الشخص الصلب متحجر القلب الغير مكترث بما يسمى " الضمير " ، لكن صدقني يا سيدي .. أنا لم ألوث يدي بدماء الأبرياء ، كل من قتلتهم كانوا بالفعل ملوثين ووجب التخلص منهم .. " _ من مذكرات بدر الكابر

رجع كينان المبنى بعد ما وصل مادلين وإتأكد إنها طلعت بخير لبيتها ، خلع جزمته برا عشان متبهدلة طينة من مياه المطر ، وطلع لأوضته بإرهاق بعد ما لقى إن بدر وسيا نايمين غالباً وإكس زيهم ..

* صباح يوم جديد

كان إكس قاعد ولابس قميص سيلفر وفاتح أول كام زرار منه وبنطلون أبيض

نزل كينان وهو بينكش شعره بإيده وبيقول بهدوء : صباح الخير

إكس بيبصله بنظرة خاوية : صح النوم ، خرجت روحت فين يا كينان إمبارح ؟

قعد كينان على الكرسي المجاور لإكس وهو بيقول ببرود : مش فاهم إنت مالك بخرج بروح فين ؟ هو عشان قاعدين عندك هنديلك تقرير بتحركاتنا ؟

إكس وهو بيتعدل في الكرسي وبيقول بحماس : بالظبط !! إنت تعرف رغم الإحتياطات اللي عملناها إحنا مشكوك فينا ؟ وتحت الأنظار ؟

كينان بتضييق عين : مش فاهم ! عرفت منين ؟

إكس بثقة : يابني أنا ببقى قاعد على الكرسي بتاعي وعارف النملة مخبية عيالها فين ، يعني أعرف إن قضية سونيا مراتك اللي ماتت إتفتحت تاني بعد مالقوا جثة توفيق خصوصاً إن الظابط اللي كان ماسك القضية أتبعتتله صور على مكتبه فيها توفيق وسونيا سوا ، and guess what ! فتحوا القضية عشان الطب الشرعي أثبت إن توفيق مضروب في رقبته بسكينة يعني مقتول ف شكوا إن سونيا إترمت من فوق الجبل زيه

كينان وقف بخضة وهو بيقول برعب : إنت بتقول إيه !! إحنا كدا روحنا في داهية !!

نزل بدر وسيا على السلم وهما مش فاهمين حاجة ف بدر قال : صباح الخير

كينان برعب : هييجي منين الخير ، الزفت دا قاعد يقولي مصايب ببرود كإنه مذيع نشرة الطقس !

إكس بنفس البرود : والله مش ذنبي إني بحاول ألم مصايبكم ونتايج غبائكم

بدر بعصبية : حصل إيه أنا بسألكم هنا

إكس ببرود : القضايا المقفولة إتفتحت ، قضية سونيا مرات كينان اتفتحت بعد ما توفيق لقوا جثته وإكتشفوا إنه مقتول وعلى علاقة بسونيا ، وقضية ريناد مراتك إتفتحت برضو عشان إنت صاحب كينان ف كله وقع فوق راسكم ، وحالياً بشوف أنسب طريقة نمشي بيها كلنا من البلد عشان ألحقكم وألحق نفسي قبل ما تتمنعوا من السفر

سيا بلطم : يا نهار إسود !! يا نهار إسود !!! * اللطم على الوجه حرام لكنها فقدت عقلها *

رن فون كينان وسط قلقهم وتوترهم ف رفع الفون عشان يرد

وصله نبرة صوته أمه الحزينة وهي بتقول : البقاء لله يا كينان .. أبوك توفى

ثم بيقع الفون من إيدها بصوت واضح وبتبتدي تعيط رغم إنفصالهم عن بعض

وقع الفون من كينان أتكسر وهو بيبصلهم بصدمة وحاسس الدنيا بتلف بيه

كينان بحزن وتوهان : أبويا مات ! أبويا أنا مات ؟

بدر بصدمة : بتقول إيه !!

كينات بإنفعال : أنا لازم أروحله !! * بيتجه ناحية الباب عشان يخرج *

إكس بيمنعه وبيقول : أقف هنا ! مينفعش تخرج في حتة

بيسحب كينان إيده من إكس وبيجري على الباب وبيفتحه

بيقابله ظباط شرطة بيمسكوه وبيكتفوا إيده ورا ضهره وبيحطوا الكلبشات ، دخلوا البننى وقبضوا على بدر وسيا كمان ومعاهم إكس ، لكن إكس رفض الكلبشات تتحط ف إيده ..

* في قسم الشرطة

كل شخص منهم في غُرفة لوحدة ، قاعد على ترابيزة وقدامه كرسي فارغ ، الجو بارد وهيبة المكان محسسه كل واحد فيهم بالتوتر ، ماعادا إكس اللي كان بيزعق وهو قاعد على كُرسيه وبيقول : مش فاهم أنا مُتهم بإيه عشان تقبضوا عليا ؟؟

العسكري : أقعد ساكت لحد ما سيادة الباشا ييجي يحقق معاكم

إكس بنفخ : على فكرة إبتديت أتعصب ودا مش كويس ليكم عشان عامتاً أنا شخص بارد ..

كينان كان قاعد في الأوضة مبيتكلمش ، الدموع عماله تنزل من عينه وهو سرحان ووشه متجمد ، وبيفتكر لقطات سريعة بينه وبين أبوه وه صغير ، وبيفتكر كمان إن بعد إنفصال أبوه عن أمه هو إترمى في الشارع ومكانش ليه حد غير بدر اللي جمعتهم الدراسة

دخل ظابط الشرطة أوضة كينان وهو بيشيل سلاحه من جمبه وبيحطه على الترابيزة وبيقول : منور والله يا كينان ، عامل إيه يا ترى ؟

كينان من غير ما يبصله وهو بيحرك سنانه على بعض : مُتهم بإيه عشان تقبضوا عليا بالطريقة دي وإيه الدليل الموجه ضدي ؟ أنا أبويا توفى ولازم أحضر الدفنة ..

ظابط الشرطة بإبتسامة سمجة : لا ما إنت هتفضل منورنا لحد ما تحكيلنا يا بطل إيه اللي حصل ومراتك ماتت إزاي ، وتوفيق مات إزاي ؟

كينان بعقدة حاجب : توفيق مين ؟

الظابط بيخرج من الملف اللي بين إيديه صورة سونيا جمب توفيق وهو بيقول : توفيق دا

رفع كينان عينه وبص للصورة بمُنتهى الثبات الإنفعالي وقال : دا الراجل اللي ربى مراتي الله يرحمها ف طبيعي تكون متصورة معاه ،

اللي بعت لحضرتك الصورة دي غالباً هو القاتل وقتلهم لسبب أنا لا أعلمه ، لإنه كان ممكن يبعتلك صور فرحي برضو ما هو توفيق بيه كان حاضر ، ف الصورة اللي في إيدك دي متعتبرش دليل إدانة ليا ، أنا شخص واعي للقوانين كويس ف مقدر إن القضية ممكن تتفتح في أي وقت في حال ظهور أدلة جديدة ممكن تغير مجرى التحقيق وتوصلكم لخيط صحيح ولكن .. زي ما قولتلك أكيد اللي بعتلك القاتل

الظابط فضل باصص لكينان وهو فاتح بوقه بعدين ضحك على جمب وهو بيسقف بطريقة مسرحية وبيقول : برافو ، حقيقي هايل مشوفتش في حياتي ثبات إنفعالي كدا ، هل كُنت تعرف إن بتفتيش فيلا المجني عليه توفيق والقبض على رجاله اللي غالباً يوم مقتله مخدهمش معاه عرفنا إنه كان تاجر أعضاء كبير ؟ متقولش مكنتش تعرف

كينان بيبص للظابط جوا عيونه وبعدين بيقول : لا مكنتش أعرف ، لإن لو مصدر دخله هو تجارة الاعضاء ف هو عامل شركة للتصدير ف هي دي كانت الواجهة قدام عيني انا معرفش إنه عاملها ك غسيل أموال ، كمان أنا كُنت بحب مراتي قبل الجواز وكنت بسمع منها الكلام عن أبوها إنه راجل محترم هي بقى الله يرحمها لو كانت عارفة موضوع تجارته للأعضاء ف محكتليش عن حاجة زي كدا

الظابط بيكمل تحقيق وبيقول : عربيتك كانت موجودة فوق تل الجبل اللي إترمت منه مراتك

كينان بثقة : حصل هي خدتها من ورايا معرفش إيه السبب ، وأنا بلغت عن فقدان عربيتي ساعتها

الظابط بذكاء : ما يمكن عملت كدا عشان تشيل الشُبهة من عليك

كينان بثقة زيادة : هو أنا لو في دماغي أقتل مراتي هاخدها في عربيتي ليه وأجيب لنفسي الكلام من الأول ؟

بيخبط الظابط بصوابع إيده على الترابيزة وهو بيجيب كينان يمين وشمال بالكلام ..

* في غرفة سيا

الظابط : عمتك تقدمت ببلاغ صباح اليوم عن إن جوزك خدك بالإجبار من منزلها الواقع في منطقة **** في حدود الساعة العاشرة مساءً ، وبتقول إن فستانك كان عليه دم ساعتها .. وغسلتيه عندها ..

سيا حست بالغيظ من عمتها ف قالت في محاولة ثبات : من بعد وفاة أمي وأبويا عيلة أبويا بالخصوص مضوني على عقد بيع رسمي بإسم عمي الكبير على شقة أبويا وكنت في حالة نفسية سيئة وأقنعوني إنهم هيدوني نصيبي ويعيشوني مع عمتي بحكم إن بنتها هتتجوز والبيت هيكون أنا وعمتي بس ، ف باعوا البيت بعد ما مضيت بالتنازل عنه لإنه بإسم أبويا وفضلت اتطرد من بيت دا وبيت دي ومخدتش مليم .. ف بالتالي عيلة أبويا زي ما حضرتك شايف بيكرهوا الخير ليا ، عمتي بتكرهه جوزي ونفسها تلبسه أي مصيبه عشان هو مراعيني وبيحبني وبياخد باله مني ، يوم ما روحت لعمتي أرتاح هو اللي وصلني بنفسه * بدر حكالها على موضوع الحريقة * عشان دا كان طلبي لإننا الجو بيننا مش صافي ، ومكانش في على فستاني دم * حتى السواق بتاع التاكسي ملاحظش الدم لإن اللبس كان غامق * هي عمتي بتقول كان عليه دم عشان توهم اللي حواليها إن بدر جوزي ضربني ف خلاني أسقط عشان أنا حامل ، ولكن أنا حملي سليم .. وتقدر حضرتك تستشهد بطبيب يتأكد إني متعرضتش للضرب من الأساس .. يعني دا إفتراء من عمتي علينا عشان تتعب اعصابنا ، أنا بتمنى حضرتك توجهلها تُهمة البلاغ الكاذب

الظابط بصلها بأقتناع وسكت ..

* في غرفة بدر

يُقال إنك بتعمل حجات خير ساعات دا حسب كلام الشهود من أصحاب الجمعيات الخيرية .. بتعملوا بإسم سيدة تدعى سماح ، ويُقال في نفس الوقت إنك إتحبست على ذمة قضية السيدة ريناد بعد ما لقوا جثتها ومكنتش حزين عليها . وخرجت بعدها بأربع أيام ، تُثار حواليك الشكوك وفي نفس الوقت بتبتعد عنك !! ولا دا رسم صورة كويسة قدام الناس عشان محدش يشُك فيك ؟ ويا ترى مين أشعل النيران في منزلك ؟ وليه تعديت بالضرب على المدعو عبد المقصود حارس عقار ٢٨ اللي هو عقار السيدة جدتك ! إنت وراك إيه بالظبط ؟

بدر بعصبية : أنا كُل دول ! إيه يعني لما أعمل تبرعات خيرية بإسم والدتي عشان من وقت للتاني بفتكرها وإتحرمت منها ونفسي أساعدها بشيء يرفع ميزان حسناتها ، وإيه يعني لما أساعد عُمال النظافة في الشارع بس مديش فلوس للبواب عشان مبحبوش ولا بتقبله ! كل واحد بيحكم عليا بفعل واحد عملته قدامه ، لكن شخصيتي الحقيقية محدش يعرفها !!

كينان ببرود : عاوز أخرج عشان أحضر دفنة أبويا وأشيل النعش بإيدي

الظابط بصوت عالي : رد على قد السؤال ! ملف القضية لسه في حوزتنا ، كنت فين ساعة وقوع الجريمة لما مراتك إترمت من فوق

كينان بإستفزاز : إترمت ولا إنتحرت ؟

سيا بترفع راسها للي قاعد قدامها وبتقول : قدر !

ايوة إيه القدر اللي وقعك في طريقهم ؟ حسب كلام جيران عمتك وعمتك نفسها إنك كنتي بتجري معيطه وعلى ملابسك بعض الدماء ، تقدري تبرري ؟

سيا بتبصله بعيون ثابته من تحت بعدين بتبتدي تضحك بإستفزاز .. وبعدين قالت : أحب أعرف مين الجيران اللي شافوني بجري وعلى ملابسي دم ؟

الظابط : عمتك بتقول..

قاطعته سيا وقالت : عمتك بتقول .. يافندم عمتي بتتبلى علينا وأي حد هييجي يقول كان على ملابسي دم هيكون تبعها هي ، أنا لو جوزي بيأذيني هعترف

هعترف عشان أخلص من شره مش هقعد أقاوح

الظابط بثبات : ما يمكن يكون مش دمك إنتي ؟

بلعت سيا ريقها وقالت : مش فاهمة ؟

الظابط : يعني ممكن يكون دم حد مقتول أو متعور أو أو وإنتي بتداري ؟

سيا بذكاء : ولو حد مقتول ومتعور هروح أجري على عمتي يافندم ؟ ما أقعد في بيت جوزي أروح لواحدة بتكرهني ليه وأنا عليا دم ؟ * بتلعن غبائها من جواها *

* غرفة إكس

الظابط : إسمك قاسم الكاشف ؟ جميل بس إيه بقى البنات اللي عندك في المبنى دول ؟

إكس بصله بثبات : دول الخادمات والمساعدات بتوعي ، جايبهم من مكتب تخديم موثوق منه ومعايا اوراق تعاقدهم للعمل عندي .

الظابط : والسيد بدر وزوجته والسيد كينان بيعملوا إيه عندك في المبنى ؟

إكس بثبات : بيت بدر صديقي إتحرق وإستنجظ بيا وروحت خدته يوم الحريقة ، كان في ظابط شرطة زميل حضرتك محترم قدمتله بطاقتي الشخصية وخدت بدر وصديقه عندي وبالطبع زوجته وإستضفتهم عندي ..

الظابط : المدعو توفيق اللي وجدت جثته ملقاة على أحد الطرق الصحراوية تعرفه ؟

إكس بتضييق عين : معرفهوش أوي ، بدر عزمني على فرح صديقه كينان والراجل دا كان من أهل العروسة تقريبا ؟ * كذاب محضرش *

يتم إخلاء السيدة سيا عبد الخالق والسيد قاسم الكاشف بضمان محل أقامتهم ، ويتم حبس السيد بدر محمد الكابر والسيد كينان اربعة أيام على ذمة التحقيق

بيعدي بدر وكينان من قدام سيا وإكس ، بص إكس لبدر نظرة مش هتفضل هنا كتير هخرجكم ، بص بدر لسيا وبصتله هي بنظرة 《 كنت حاسة إن دا هيحصل في يوم ، عشان كدا كنت بحذرك 》 ..

" إلى متى سيظل الإنسان الوجهة الاولى التي تتلقى صفعات الحياة ؟ يخيل لي صوت كاظم الساهر في الخلفية وهو يقول : كُن مُنصفاً يا سيدي القاضي .. ذنبي أنا رجُلاً له ماضي .. "

يتبع ..

#خارج_قانون_الحب٢

#روزان_مصطفى

#بقلميييي

تكملة الرواية من هناااااااااااا

قصر الروايات

القائمة الرئيسية

الصفحات

تابعنا من هنا

روايةخارج قانون الحب الجزء الثانى2 الفصل 21-22-23-24-25بقلم روزان مصطفى كامله (جميع الفصول كامله)رواية اصحاب الظلال السوداء

أخر المواضيع من قسم : روايات حصريه

تعليقات

إرسال تعليق