رواية ما بعد الأغتصاب الفصل 21-22-23-24-25بقلم هناء عادل كاملة
رواية ما بعد الأغتصاب الفصل 21-22-23-24-25بقلم هناء عادل كاملة
ما بعد الأغتصاب
الفصل الحادى والعشرون
قامت فاطمة بفزع وصدمة من اللى قاله علي
ووقفت مكانها متحركتش خطوة
وهى مركزة فى عنيه
ومش مصدقة اللى سمعته
اما رقية بمجرد ما سمعت الجملة
ضربت بأديها على رأسها
وهى بتقول.هى اللى كنت بسمع صوتها
هى اللى بتكلمنى
علي وفاطمة استغربوا كلامها وركزوا معاها
علي.هى مين دى اللى بتكلمك يا رقية؟
رقية بأستيعاب.ها
لالا
انا بقول يبقى هى سبب الرعشة والحاجات اللى بحس بيها هنا لما بكون لواحدى
فاطمة.على
ايه اللي حصل
انا ازاى معاك العمر ده كله
ومعرفش حاجة زى دى
على واقف فى مكانه ومرتبك.علشان مكانش فيه الداعي اللى يخلينى احكيلك حاجة زى دى يافاطمة
مفتكرش ان حاجات فاتت من سنين طويلة
تخص اهلى
مأثرتش على عيشتك معايا فى حاجة علشان اتكلم فيها
وافتكر ان دى حاجة صعبة على ان الواحد يتكلم فيها
غير ان انا واخواتى بنحاول ننسى اللى حصل
اللى بكلمك عليها يافاطمة دى امى
رقية.ليه ياعمي علي
مين اللى قتلها
عملت ايه هى علشان تتقتل
فاطمة.قصدك يا علي ان بعد موت الست والدتك
الاوضة دى اتسكنت بروحها
على بيهز رأسه يمين وشمال
ومضايق من كلامهم
ومضايق من نفسه انه اتكلم
خبط الباب
وكانت سنية
ومعاها عواطف
فتح على
سنية.اتمسوا بالخير يا على يابنى
علي بترحيب وكأنها انقذته فى اللحظة دى من ردود هو مش عايز يقولها.اهلا يا خالتى ازى صحتك
وعمي عثمان عامل ايه
سنية.فى نعمة يا حبيبى نحمد ربنا
ادخلى يابت يا عواطف
دى لقمة كده خفيفة
دخلت عواطف
وحطيت الصنية على الارض
وساعدتها فاطمة فى تنزيل الصنية
علي.تعبناكي معانا ياخالتى
سنية.لاء يا حبيبى ما تقولش كده
ده انتم ولاد الغالية
يعنى ولادى
يلا نسيبكم بقى علشان تاكلوا
بتبص لرقية
وانتى عاملة ايه دلوقتى يابت يا رقية
رقية.كويسة يا خالتى الحمد لله
سنية.بقيتى حلوة يعنى
فوقتى كده
رقية.ايوة ياخالتى الحمد لله
سنية.بركة ياحبيبتى
يلا نفوتكم بعافية بقى
لو عوزتى حاجة خبطي عليا
فاطمة.كتر خيرك يا خالتي
خرجت عواطف وسنية
وفى الوقت ده دخل فتحى
واول ما شاف فاطمة وعلي استغرب جدا
وفكر ان الخبر بتاع وجوده عند ميرفت وصل لرقية
وبعتت جابت اخوه
فتحى باستغراب.ايه النور ده
خطوة عزيزة
متجمعين عند النبي
على وكأن فتحى جه فى ميعاده.ده نورك يا ابو العريس
فتحى بأستغراب.ابو العريس ايه
كانت رقية واقفة وحاسة بالخوف
وفى نفس الوقت فاطمة عارفة وفاهمة ان جوزها بيحاول يهرب من الكلام
علي.مش تبارك لعروستنا
ولمرات اخوك
الاتنين حوامل
فتحى فتح عنيه على اخرها مذهول
محدش يعرف انه عارف بحمل مراته من قبل ما حد يبلغه
على.مش مصدق نفسك صح
الفرحة ربطت لسانك
حقك
بس خد بقى الخبر التانى
فتحى بص لعلي وهو ساكت
علي.مراتك حامل فى الخامس يا عريس
كان الموقف محرج جدا لرقية
لكن فتحى محسش بنفسه غير وهو.اه ما انا عارف يا علي
كلهم بصوا لفتحى بصدمة
على بحدة.يعني ايه كنت عارف يا فتحى
انت كنت بتصلح غلطة
فتحى.بقولك ايه يا علي
رقية دى مراتى
وحامل فى ابنى ولا بنتى
اى كلام تانى مالهوش لزوم
اللى عايز يبارك
كتر الف خيره ونردهاله فى الفرح
واللى مش عايز يبارك
يبقى لسانه فى بوئه
وينقطنا بسكاته
مراتي انا عارفها وكويس وعارف اخلاقها
وعارف ان محدش لمسها غيري
ومبروك يا مرات اخويا
تقوميلنا بالسلامة
فاطمة بحدة.بقولك ايه يا علي انت وفتحى
رقية محدش لمسها قبل يوم دخلتها
والبت حلفت بكتاب الله
وكل اللى رايح واللى جاى
خايف من اوضتكم دى
ومن قبل الجوازة دى وسمعت كلمة مريحتنيش وبرضه
علي هرب من الرد
ودلوقتى يقول اخوك يا سي فتحى ان الست والدتك الف رحمة ونور تنزل عليها
اتقتلت فى الاوضة دى
قولوا في ايه
علشان نعرف اللى فى بطن رقية ده ازاى بقاله خمس شهور
فتحى بأنفعال.بقولك ايه يامرات اخويا
مراتى ان شالله حامل فى التاسع
دى حاجة متخصش حد
وبعدين انتى مش عايشة فى الاوضة هنا
علشان تشغلى راسك بيها
واهو احنا عايشين فيها وزى الفل
ايه جيتى لقيتى حد فينا ناقص ايد ولا رجل
علي بهدوء.استهدى بالله يافتحى
متنساش انك بتتكلم كده مع مراتي
وانتى يا فاطمة
خلاص فتحى خلص الكلام
هو ومراته حرين مع بعض
عايزين يكملوا عيشة هنا
على راحتهم
شافوا حاجة ضرتهم
يبقى يسيبوا المكان ويمشوا
خلينا فى حالنا احنا
فاطمة بانفعال.يعنى ايه خلينا فى حالنا
منين اخوك الصبح يقول للبت هطلقك
ومنين دلوقتى يقول مراتى ومش عارفة ايه
وجايبها تعيش فى بيت مسكون ليه
ولا انتم كلكم عارفين ده
وعاملينه بالقصد
انا مش هسكت
انت ياعلي ترضى ان واحدة من بناتك يحصل فيها كده
علي.يا فاطمة استهدي بالله
هو ايه اللى حصل
فاطمة بانفعال هى مش عارفة سببه.اللى حصل ان البت حامل فى خمس شهور
واخوك بعد 8 ايام من جوازهم بيقولها اطلقك
والاوضة وباين عليها مسكونة
والناس هتعمل البت لبانة تحت لسانهم
يرضيك انت اخوك يطلقها والناس تقول عليها اللى ميتقالش
هيتقال ايه غير انه لقاها حامل
وعلشان كده طلقها
تتفضح هى واهلها
وازاى ترضوا انها تتجوز فى اوضة
انتم عارفين ان واحدة اتقتلت فيها
والاوضة مسكونة وكل الناس عارفة
ليه مصارحتوش اهلها من الاول
وهما يرضوا او يقولوا لاء
طبعا كان فتحى واقف بيبص لرقية بحقد لأنها قالت لمرات اخوه انه اتكلم معاها فى الطلاق
علي بيبص لأخوه
ومستني منه رد
فتحى.شوفى يامرات اخويا
انا حر اتجوز ولا اطلق
اعمل اللى على كيفى
اخواتى الكبار على عيني وراسى
لكن انا صوباعي مش تحت ضرس حد
لا حد بيأكلنى ولا حد بيشربني
اما حكاية الاوضة
برضه انتى مالكيش فيها
وانا ياست الكل لو عايز اطلق مش هاخد الاذن
لكن انا هتجوز واحدة تانية
وكنت بخيرها
لو عايزة تعيش معانا وتبقى هى والعروسة الجديدة اخوات
خير وبركة
والاتنين هيعيشوا عيشة زى الفل
لو عايزة بما يرضى الله تطلق
وبرضه هتاخد حقها
براحتها
ده اللى انا قولته
اتفاجئ علي من رد اخوه
وفاطمة اتصدمت
اما رقية كانت شبه العروسة اللعبة
اللى رايح واللى جاى يتكلم فى حياتها
وهى واقفة تتفرج
لا عارفة ترد
ولا ليها اللى يرد عنها
علي.تتجوز
يعنى ايه تتجوز يا فتحي
وليه يابن الناس
ولما انت مالكش غرض فى رقية
كنت خدتها ليه
ده انت مبقالكش سنة متجوز علشان الواحد يقول انك زهقت
ماهو كده صحيح يا فتحى
كله هيقول اخدها علشان يستر عليها
فتحى.شوف يا علي
انا ياخويا محدش كاسر عيني
اللى يقول ويعيد هو حر
انتم قعدتوا تزنوا عليا اتجوز وافتح بيت
ورقية انا عارفها بت غلبانة
واهلها غلابة
وقولت اربيها على ايدي
علي.طيب وايه اللى خلاك تقول اتجوز بعد اسبوع فرح
فتحي.علشان انا حسبتها غلط يا علي يا خويا
انا راجل
ومش عايز عيلة صغيرة اعلمها تعمل ايه ومتعملش ايه
عايز واحدة فاهمة يعنى ايه جواز
ويعنى ايه راجل
رقية فى بيتها على عينى وراسى
لكن من حقى مدام اقدر وصحتى مساعدانى انى اتجوز تانى
وكويس انها هى قالت بلسانها
علشان الكلام يتفتح قدامكم
انا يا علي هتجوز على رقية
وابني اللى فى بطنها مسؤول مني
عايزة تفضل على ذمتى
اهلا وسهلا
عايزة نطلع بالمعروف
مش هقولها لاء
فاطمة مصدومة
وعلي بيتمنى ان الكلام يبعد تماما عن الاوضة
وعن اللى حصل لأمه فيها
وموضوع فتحى واللى قاله
فعلا اخد الحكاية لمكان تانى غير اللى كانوا عايزين يوصلوله
فتحى.ها يابت الناس قولتى ايه
براحتك
انا مش هغصبك على حاجة
فاطمة صعبانة عليها رقية.يعنى ايه يا فتحى
انت عايزها تقولك طلقها
علشان الناس متيسيبهاش فى حالها
وتتفضح
هى واخواتها البنات
ولا عايزها تتكسر نفسها وهى بتقولك ماشى اتجوز وهاتلها ضرة
وتعيشها مكسورة معاك
فتحى.ده شرع ربنا يا مرات اخويا
رقية بهدوء.انا راضية يا خالتى فاطمة
انا راضية ياسى فتحي
فاطمة اتعصبت جدا من سلبية رقية
وده خلاها
تنفعل اكتر.يلا بينا يا علي
انا مالى ايه اللى يحرق دمي
كل ظالم منه لله
علي حس كأن روحه رجعتله
برغم ان كان فيه كلام كتير عايز يلوم اخوه عليه
الا انه مش عايز فاطمة تفضل موجودة فى المكان
خرج علي وفاطمة من الاوضة
وقفل فتحى الباب وراهم
واخد نفسه وكأنه كان بيجرى بقاله ساعة
رقية بهدوء.هو انت ياسي فتحى كل ما حد يزنقك فى الكلام تقول هتجوز
طيب ليه تروح تظلم واحدة تانية
وتجيبها تبهدلها معاك
وبعد اسبوع تقولها اطلقك
فتحى بيروح يقعد على طرف السرير
وباصص لرقية اللى بتتكلم بمنتهى الهدوء
رقية.وليه يا سي فتحى تجيب واحدة مالهاش فى الثور ولا فى الطحين
وتعيشها فى اوضة مليانة عفاريت
ليه يا سي فتحى ايه غرضك
كل ده علشان مسلمتكش نفسي لما كنت عايز
ياريتنى كنت سمعت كلامك وقتها
ولا كنت اتجوزت ولا جيت البيت اللى من يوم مادخلته ده
وانا حاسة انى بقيت مجنونة
بقيت بكلم نفسى
ابتهدلت واتذليت واضربت
وسكت
حطيت جزمة فى بوئى واتخرست
بخاف اتكلم ولا احكي احسن تيجي تضربني
تنام على سريرى مع واحدة غيري
وتطلعنى مجنونة وتكدبني
ليه كل ده
فتحى بهدوء.شوفى يارقية
انا وانتى ادبسنا فى بعض
العفاريت اللى شوفتيهم
شوفتهم
وبدل ما كنت همشى من هنا علشان اخلص من كل اللى بيحصل
واللى انا كنت نسيته
بقيت مغصوب انا وانتى نفضل هنا لحد ما تولدي
شوفي يابت الناس
اه انا هتجوز واحدة تانية
واجيبها تعيش هنا
ويكون فى معلومك
اختك شافتنى معاها النهاردة فى بيتها
رقية واقفة قصاد فتحى بتسمعه وهو بيتكلم بمنتهى الهدوء والبجاحة
ومش عارفة المفروض يكون رد فعلها ايه
فتحى.ليكي عليا متعرضلكيش بحاجة تزعلك لحد ما تقومى بالسلامة
لقمتك هتلاقيها
بيتك مش هينقصه حاجة
بس انا وانتى هنعيش تحت سقف البيت ده اخوات
رقية.يعني مش هتضربني
مش هتيجي جنبي تاني
مش هتحرقنى بالسجاير
فتحى بهدوء.ولا هقرب منك
اكتر من لقمتى وهدمتى مش عايز منك حاجة
مالكيش مني غير المعروف
لحد ما نعرف نخرج من البيت ده
ساعتها لو عايزة تطلقى هطلقك
عايزة تفضلي زى ما انتي
ماشى
لكن اسمع مرة تانية
كلمة خرجت من بيتي لأى حد
حتى لو ابويا طلع من قبره وقالك احكيلى
ونطقتى بكلمة
ساعتها هقطع لسانك
حلو الكلام ده
رقية.راضية
والله راضية ياسي فتحي
خبط الباب
قام فتحى يفتح الباب
عواطف.عمي فتحى
ابويا بيسلم عليك
وبيقولك هو عايزك فى كلمتين
فتحى.حاضر يا عواطف
هاكل لقمة بس واجى اشرب معاه الشاى
عواطف.ماشى ياعم فتحى هقوله
قفل الباب
ودخل قعد على الارض والصنية محطوطة قدامه
وابتدى ياكل
فتحى.هتفضلى واقفة كده
اقعدى كلي
انتى شايلة ولازم تتغذى
قعدت رقية وبصاله
فتحى.جرى ايه انتى هتصوريني
رقية.هو انا ازاى حامل فى خمس شهور ياسي فتحي
فتحى.شوفى يا رقية
انا يابنت الناس
كل اللى اعرفه
ان فيه حاجة هنا مش مظبوطة
انا لما عيشتك فى البيت ده
كنت نسيت اللى حصل فيه زمان
وانا مش بصدق فى العفاريت والحاجات دى
لكن بعد اللى حصل هنا اليومين اللى فاتوا
انا عارف ان البيت فيه حاجة
اللهم احفظنا يعني
والله اعلم
يمكن انتى مبروكة وفيه ملايكة حواليكي
وانا لو مش عارف ان محدش جه جنبك غيري
ومسمعتش وصايتهم عليكي بودني
كنت رميتك لأهلك باللى فى بطنك
وقولتلك انك خاطية
لكن انا عارف ان البيت ده سبب فى الحاجات الغريبة اللى بتحصل
علشان كده هنستحمل بقى كلام الناس
وسؤلاتهم اللى مش هتخلص
ومحدش له عندنا حاجة
انتى مراتي قدام ربنا والناس
رقية.بس انا خايفة من البيت هنا يا سي فتحي
فتحى.وانا والله خايف
بس ما باليد حيلة
لازم نفضل هنا لحد ما تولدي
رقية.طيب هى ليه امك اتقتلت هنا يا سي فتحى
فتحى وهو بياكل وبيبص فى الطبق اللى قدامه.اتقتلت لأنها كانت خاينة
خانت ابويا
وخلفت اخويا خليل من الحرام يا رقية
اتقتلت لأن ابويا شاف خيانتها بعنيه
قتلها
وقبل ما يحس انه اخد تاره وغسل عاره
اتشل
مستحملش قهرته على نفسه ولا رجولته
مات من الحسرة
مات وهو مشلول
لا قادر يتحرك ولا قادر ينطق
حتى دموعه اللى نزلت من عنيه
مكانتش سبب فى راحته
انتى عارفة يعنى ايه مراته ام عياله
تطلع خاينة
عارفة يعنى ايه راجل يعرف ان ابنه
ابن راجل تانى من مراته اللى على ذمته
انتى عارفة يعنى اب يحس فى لحظة ان عياله دول كلهم ممكن يكونوا مش عياله
وهو عايش عمره معاها بيتغفل ومش حاسس
عرفتي اتقتلت ليه
علشان هى ست خاينة
واللى تفكر لو بالكدب انها تغفل اهلها او جوزها
حتى التفكير يا رقية
تستاهل القتل
وانا لو كنت عرفت قبل ما ابويا يعرف وفى الوقت ده كنت افهم يعنى ايه ست تخون
كنت انا قتلتها بأيدي
كنت حرقتها
وقبل ما احرقها ادبحها
وسابها بعد ما خلص كلامه
وقبل ما تبان لمعة عنيه بالدموع
سابها وخرج وقفل الباب وراه
كانت رقية قاعدة ومش مصدقة ان فتحى بيتكلم معاها
ولا بيفضفض بالشكل ده
ولا حتى بيقول الكلام ده عن امه
لكن هو واقف برة قصاد الباب
بيولع سيجارة
وبيتنفس وكأنه شال هم من على قلبه لما قال الكلام ده
عم عثمان خارج من اوضته
علشان يقعد على الكنبة بتاعته
وشاف فتحى وهو واقف بيشرب سيجارته
عثمان.ايه يافتحى يابنى انا مستنيك من بدرى
مخبطتش عليا ليه
فتحى.انا واقف قولت اشرب سيجارتى و اجيلك يا عم عثمان
خير
قعد عثمان على الكنبة بتاعته
وشاور لفتحى يقعد جنبه
قعد فتحى
عثمان.انت شوفت مين فيهم يافتحى
فتحى مش فاهم
وبيبص لعم عثمان باستغراب
عثمان.شوفتها هى ولا هو
فتحى.قصدك على مين يا عم عثمان
اخويا علي ولا مرات اخويا
عثمان.لاء يابني
اصحاب سكنك
اللى تحت الارض
فتحى بص لعثمان بتركيز وسكت تماما
عثمان.متخافش يابني
ده هما سبب الخير اللى انا فيه
بس قولى شوفت مين فيهم
وفى نفس اللحظة سكت عثمان
وحس فتحى اللى كان مصدوم من الكلام
ان فيه حد بيتنفس جنبه من الاتجاه اللى عثمان مش قاعد فيه
وقبل ما يبص جنبه
حس بأيد بتلف حوالين رقبته تمنعه من الحركة
واتقطعت الكهربا
يتبع
ما بعد الأغتصاب
الفصل الثاني والعشرون
فى بيت علي
فاطمة باين عليها الزعل
علي.فى ايه بس يا فاطمة
انتى ليه عايزة تعملى حكاية من غير حكاية
فاطمة بزعل.حكاية ايه يا على اللى بعملها من غير لازمة
انت عارف انا وسطكم بقالى سنين قد ايه
علي.طيب يا فاطمة انتى بتقولى اهو
بقالك سنين فى وسطنا
حد عمره زعلك ولا داسلك على طرف
فاطمة.لاء محدش داسلي على طرف
لكن يكون عندك فى حياتك اسرار معرفش عنها حاجة
ليه يا علي
ده انا مراتك ام عيالك
سرك
علي بأحراج.يا فاطمة
بلاش تكبرى الموضوع
خلينا نفرح بالخبر الحلو اللى رجعنا بيه
ياستى انا مش مخبي عنك حاجة عن قصد
بس انا فيه حاجات تخص اهلى مش بحب اجيب سيرتها يا فاطمة
والكلام فيها لا هيقدم ولا هيأخر
هيقلب المواجع وبس
فاطمة بتقعد على كرسى الانتريه.بس ابقى عارفة
جوزى فى ايه فى حياته
مش اتفاجئ قدام الناس انهم عارفين حاجات تخص اهلك وبيتكم
وانا واقفة شبه الاطرش فى الزفة
وبعدين يعنى يرضيك يحصل فى بنتك اللى بيحصل مع رق....
قاطعها علي.فاطمة مفيش داعي نفضل نتكلم فى حاجات لا تقدم ولا تأخر
بس اللى عايز اقوله
ان وحياة اللى فى بطنك ولسه ميعرفلهوش رب
انا نفسي مش عارف كان ايه اللى المفروض احكيه
ولا كان ايه اللى اقوله لرقية علشان انصحها
مكانش عندى اللى يتقال
او مكنتش عارف ازاى ممكن اقوله
يرضيكي جوزك يتقال عليه مجنون
ولا بيخرف
ولو بنتى فى نفس الوضع
كنت هلتمس مليون عذر قبل ما احط سوء النية
لأن احنا معندناش اللى نقدر نقوله
فاطمة.يعنى ايه يا علي
ما انا قولت ان الست والدتك اتقتلت فى الاوضة دى
ليه ماقولتش ده من الاول
بدل ما البت تتلبس
ولا يحصلها اللى بيحصل فيها ده
علي وهو بيقعد على ايد الكرسى جنبها
وبيحاوطها بدراعه على كتفها.وايه بالظبط اللى حصل فيها يافاطمة
انها حامل يعنى
ما كل الستات بتحمل
فاطمة.لاء يا علي انت فاهم قصدى
البت حامل فى خمس شهور
وهى متجوزة بقالها كام يوم
انت فاهم
علي.يا فاطمة ما انتى عارفة فتحي
وعارفة انه كان مبيراعيش حرمة حد
ولا حلال وحرام
يمكن رقية غلط معاها
ومرضاش يقول
يمكن اهلها وقفوله
علشان كده اضطر يتجوزها
ويصلح الغلطة الل....
فاطمة بأنفعال.اوعى تكمل
انت عندك بنات حرام عليك
وبعدين البت بتحلف محدش لمسها قبل الدخلة
وكله فى البيت بيقول الاوضة فيها حاجة مش طبيعية
والبت حاسة بده
يبقى هنرمي بلانا بقى ونقول ونتكلم فى عرضها وشرفها
اخص عليك يا علي
علي بنفاذ صبر.بصى يا فاطمة
رقية وفتحى فى بيتهم يمشوا حالهم زى ما يحبوا
فتحى راجل عارف ايه اللى يتعمل وايه اللى ميتعملش
وموضوع البيت هو عايز يتكلم مع مراته فيه هيتكلم
عايز ياخدها ويمشى هيعمل كده
انا يا فاطمة معنديش حاجة اعملها
فاطمة قامت وقفت بأنفعال.ماشى يا علي
صح
انا فى الاول والاخير غريبة
انتم اهل فى بعض
تمشوا اموركم زى ما تتفقوا بينكم وبين بعض
ليكي ربنا يارقية يابنتى
اقف معاها يارب
سابته فاطمة ودخلت اوضتها تغير هدومها
علي.انا هروح اجيب العيال من عند جوهرة
فاطمة وهى فى اوضتها.اه واحكيلها اللى حصل
يمكن ضميركم يصحى
خرج علي من بيته
ورايح عند جوهرة اخته اللى ساكنة بعده بكام شارع
فى بيت اهل رقية
نبوية.مش عارفة ياخويا
اهم طول اليوم على كده
قاعدين حاطين راسهم فى راس بعض
ونازلين ودودة
ابو اشرف.بنات بقى يانبوية
بياخدوا ويدوا مع بعض
هيكونوا بيتودودوا فى ايه بس
هما لهم مكان غير البيت
ولا يعرفوا حد غير بعض
نبوية.شوف الراجل
بدل ما ينادى على العيال يعرف ايه الوشوشة اللى بينهم دى من صباحة ربنا
يقولى خليهم على راحتهم
ابو اشرف.يعنى انتى هترتاحى لما اجيبهم استجوبهم يا نبوية
حاضر ياستى
مبتراعيش انتى الواحد راجع تعبان ولا قرفان
لاء ازاى
بت يا رشا
يا بسمة
تعالوا هنا
فعلا رشا وبسمة خرجوا سوا من الاوضة
ابو اشرف.فى ايه يا عيال
قاعدين فى الاوضة كده وحسكم مش طالع
بسمة.قاعدين يابا
هنقول ايه يعنى ولا حسنا هيطلع فى ايه
نبوية.وانتى يا اوس النصايب
فيكي ايه يابت
مش مريحانى
رشا.هيكون في ايه ياما
هو احنا عندنا ايه يعنى بيحصل علشان نتكلم فيه
ابو اشرف.امكم بتقول طول اليوم قاعدين تتوشوشوا
فى حاجة
حصل مع حد فيكم حاجة
بسمة.يابا والله ما حصل حاجة
رشا.هيحصل ايه يعنى يابا
ما احنا بحطة ايدك اهو
نبوية.بت انتى قولى انتى من ساعة ما رجعتى من السوق
وانتى مقلوبة
فى ايه
رشا.عايزة تعرفى
طيب ياما
انا شوفت جوز اختى
داخل عند الولية اللى اسمها ميرفت
نبوية ضربت بأيديها على صدرها
ابو اشرف بانفعال.انكتمى ياولية
جوز اختك مين
وميرفت مين
انتى اتهبلتى يابت
رشا بتبص لبسمة ورجعت تبص لأمها وابوها.اهو علشان كده انا سكت ومتكلمتش من الصبح
علشان حتى لو انتم اللى شايفين بعنيكم هتكدبوا روحكم
نبوية.يابت انتى بتتكلمي بصحيح
ولا انتى شوفتى حد شبهه
رشا.ياما جوز اختى
فتحي
وكلمته وكلمني
وميرفت المعفنة دى
بجحت وغاظتنى بالكلام
بس انا مسكتلهاش
نبوية.ياعينى على حظك يابتى
دى عروسة اسبوع
ابو اشرف بانفعال.جرى ايه منك ليها
هو الراجل راح جاب البت ورماهالنا قدام باب البيت
هى عايشة فى بيتها معززة مكرمة
ما هى كل الرجالة كده
بيلفوا ويهيصوا
وفى الاخر يرجع ينام على سريره جنب مراته
نبوية بانفعال.والله لا اروح ابهدل بكرامتها الارض
الناقصة خطافة الرجالة
ابو اشرف.بقولك اكتمى بقى يا ولية
بلاش تخليها تصطاد فى المية العكرة
لو روحتى اتعاركتى معاها
هتلف عليه اكتر بالعند
وبدل ما يزهق منها ولا هى تشوفلها شوفة غيره
هتفضل لابدة فيه
نبوية.يعنى انت عايز جوز بتك يفضل داخل خارج على الولية السحابة دى
ونسيبهولها
وافرض راحت عملتله عمل وقعد فى ارابيزها
ابو اشرف.يا نبوية
هى ميرفت ساكنة فى ريحنا بقالها قد ايه
كل يوم والتانى مع راجل غير التانى
اللى زى دى مش هتلزق لراجل واحد
دى تمص دم الراجل من هنا
وتشوف اللى بعده طوالي
نبوية.يعنى تاخد رزق بيت بتك ياراجل
ابو اشرف.الراجل بيصرف بمزاجه يا نبوية
وبتك لو شافت طلبات الراجل بالمظبوط
مش هيبص لبرة
وقرشه وخيره هيبقى لها ولينا
كل ده بيدور وواقفة رشا وبسمة قصاد امهم وابوهم
ورشا مصدومة من رد فعل ابوها
ومش لاقية حتى كلام تقوله
ولا ترد بيه على اللى بتسمعه
نبوية.ينتقم منك يا مخفية ياللى اسمك ميرفت
رشا بأنفعال.هو انتى سايبة اللى عندنا
وراحية تشتمى فى الولية
طيب هى ديلها نجس
يروح بقى عريس اسبوع زى ما بتقولى
يجرى ورا ديلها النجس ويسيب عروسته
البت اللى لسه بخيرها وزى الوردة المفتحة
بس هنقول ايه
لازم نتكتم
القرش بيذل
انفعل ابو اشرف على رشا
وقام من مكانه
ونزل فيها ضرب
لكن هى كانت مش بتعيط
ولا بتصرخ من الوجع
بالعكس كانت بتكمل كلامها اللى شايلاه جواها من اهلها
رشا.اضرب
كده يعنى هتحس ان انت مش بايع بتك بالرخيص
بكرة تجيلنا بيعة انا وبسمة ومش هتقولوا لاء
ولو رجعنا ليكم جتت من غير روح
وحطولكم على جتتنا فلوس
هتقولوا يلا نستعوض ربنا
واهو قرش نمشى بيه حالنا
حسبي الله ونعم الوكيل
رشا كانت بتقول الكلام ده وابوها نازل فيها ضرب
بسمة واقفة تعيط على اختها
ومش عارفة تعمل حاجة
ونبوية بتحاول تحوش بينهم
لكن جوزها كان مش سايب فرصة لحد انه يقدر يبعد رشا عن ايديه
فضل يضرب فيها وقت طويل
وهى بتحاول متعيطش
برغم ان جسمها كله واجعها
وايديها اتجرحت
لكن برضه عمالة تأنب فيهم بالكلام
وقد ايه هما بايعين لحمهم
ابو اشرف وهو بياخد نفسه ورا بعض.يخربيت ابوكي
ايدي وجعتنى
انتى ايه مش بتتكتمى
نبوية اخدت رشا من تحت ايديه وزقتها على الاوضة
وجريت وراها بسمة علطول
نبوية بلوم.ليه كده ياخويا بس
كان اتقطع لسانى قبل ما اقولك اسألهم
ابو اشرف بيرمي جسمه على الكنبة.بت قليلة الرباية
واقفة قصادى وبتناطحنى
نبوية.محروقة على اختها يا ابو اشرف
البت غيرانة على اختها اللى قاعدة فى بيتها لا بيها ولا عليها
وجوزها داير يتسرمح
ابو اشرف.لاء نروح بقى نحاسب الراجل
ونقوله انت بتدور ععلى مزاجك ليه
علشان يقولنا بتكم عندكم وانا ادور على مزاجى على كيفي
رشا خرجت على باب الاوضة.اه صحيح مينفعش
اومال مين هيدفعلنا الفلوس اللى هو بيدفعها
ابو اشرف.اتلمي يا بت الكل....
علشان مقومش اركب فيكي نصيبة
نبوية.خلاص يا رشا
خشى جوة بقى
الجيران سمعت بينا
سحبت بسمة اختها جوة الاوضة
وقعد ابو اشرف ساكت وباصص للسقف
ونبوية قاعدة على الارض تضرب كف بكف
وهى عارفة انهم مش هينفع يعملوا اى حاجة علشان يقطعوا علاقة فتحى بميرفت
والا ممكن يطلق رقية فعلا
وترجعلهم تانى
والخير اللى بيجيلهم من وراه يتمنع
وكان الرزق بأيده هو
جوهرة.يا لهوى ياعلي
اهو ده اللى عملت حسابه يا خويا
ده اللى كنت خايفة منه
قولت لاختك والله
علي.وسكتي ليه يا جوهرة
الواحد علشان من بعد اللى جرى هناك
مشي
من البيت
من غير ما تحصل فيه حاجة تانية
نسيت انا يا جوهرة
او يمكن عملت نفسى ناسى علشان مجيبش سيرة تانى
لكن كنتى فوقينى ياختي
جوهرة.فردوس ياخويا طمنتنى
قالتلى هيحصل ايه يعنى
ولما روحنا لقيناهم كويسين وزى الفل
وقولنا البت دبلانة شوية علشان لسه مخدتش على الجواز ولا البيت
ليه يا ربي بس كده
اهى لو حصلها حاجة ذنبها فى رقبتنا
علي.مش عارف هو ايه اللى ممكن يحصل يعني
تفتكرى يا جوهرة
موضوع ان البت حامل فى الخامس ده
اخوكي غلط معاها
ولا اللى فى البيت السبب
جوهرة.استغفر الله العظيم
هنتكلم فى عرض الولايا كمان يا علي
بس البت ياخويا مش شكل حرام ولا غلط
وبعدين دى لا بتشتغل ولا بتروح ولا تيجي
هيضحك عليها فى وسط اهلها يعني
لاء يا علي
البيت واللعنة اللى فيه السبب
ولازم يمشى منه فتحى النهاردة قبل كمان شوية
علي.اخوكي مش هيسيب البيت يا جوهرة
جوهرة.خليل كان عنده حق يا علي
احنا اللى قولنا عليه بايظ
ومجنون
علي.لازم نلاقى حل
جوهرة.كلم اخوك خليل يا علي
لازم يرجع
رقية قامت من مكانها
واخدت الصنية بتاعت الاكل
وطالعه تغسلها هى والاطباق علشان تدخلها عند سنية
كان عم عثمان قاعد على الكنبة بتاعته
رقية.السلام عليكم ياعم عثمان
عثمان.وعليكم السلام يابتي
طمنينى عاملة ايه دلوقتى
رقية.نحمد ربنا ياعمي
عثمان.ربنا ينتعك بالسلامة يابتى
وتشوفيه وتفرحي بيه
رقية بابتسامة.كتر خيرك يا عمي
ربنا يسمع منك
راحت رقية قعدت عند الحوض
وغسلت الحاجة
ونشفتها
واستأذنت من عثمان تدخل لسنية علشان تدخل الحاجة
رقية.عوافى
عواطف.يعافيكي يا رقية
تعالي ادخلى بسرعة
رقية.اومال خالتي سنية فين
تسلم ايديها وكتر الف خيرها
عواطف بصوت هامس.نايمة امى
تعالى بس ادخلى اوضتى
ده فيه مصيبة حصلت
رقية دخلت معاها وهى خايفة.مصيبة ايه تانى
سترك يارب بقى
عواطف.شوفت جوزك يابت يا رقية
قاعد على كنبة ابويا برة
وسمعت صوته وانا قاعدة جنب الشباك
كان بيكلم نفسه
واول ما بصيت من الشباك علشان اشوفه بيتكلم مع مين جنب شباكنا
طلعت راسى من الشباك
لقيته اختفى
فص ملح وداب
رقية باستغراب.ازاى يعنى يا عواطف
انتى واعية للى بتقوليه ده
عواطف.اه يارقية ولا انطس فى نظري
ده اللى حصل
رقية.اختفى ازاى يعنى
وبعدين بقى فى اللى بيحصلي ده يارب
هو انا ناقصة
ده انا خلاص مبقيتش حمل كل ده
عواطف.انا قولت اقولك الاول
وانتى قولى لأبويا بقى
علشان ميقولش انى كنت بتصنت على الراجل وهو واقف
رقية سابت عواطف
ودخلت اوضتها
وهى حاسة انها تايهة
قفلت الباب وراها
ولأول مرة ومن غير الكهربا ما تقطع
تشوف قدامها
شخص
مش هينفع يتوصف بكائن
لأنه كان راجل بكل ملامح الرجولة
ومش مجرد ملامح
دى كانت ملامح لراجل كأنه مرسوم
اية من الجمال
رقية اتخضت اول ما شافت راجل غريب قاعد على الكنبة
ووقفت مصدومة وصوتها اتحبس
الشخص.رقية متخافيش
انا هنا علشان احميكي
مش علشان اخوفك
رقية مذهولة.ااا.ااان.انت.ميي.مين
الشخص.انا اللى هعيشك ملكة فى مملكتى
انا اللى هحافظ عليكي
وانا اللى هقف معاكي واجيبلك حقك
ومش هقبل بأن اى حد على وجه الارض او باطنها حتى ييجى عليكي
انا اللى انتى جيتي مخصوص هنا علشان تكملى حياتك معاه
انا يا رقية
الحياة اللى انتى كنتى بتحلمى تعيشي فيها
واحلى بكتير كمان
رقية.فين.هو.هو فين.سي فت.فتحي
الشخص.بعد اللى عمله فيكي
بعد ما اغتصبك بتسألى عنه يا رقية
انتى فعلا عايزاه تانى فى حياتك
ولا تحبي تبقى فى حياتى
يتبع
ما بعد الأغتصاب
الفصل الثالث والعشرون
فى مكان غريب
ممر طويل
الاضاءة اللى فيه اخفت بكتير من انه يتعرف مصدرها
وبرغم انها كانت كأنها اضاءة نجوم بعيدة
الا ان المكان كان مش فوق الارض
ايوة
الممر ده
تحت الارض
بدروم
فااااضى
مفيش فيه غير جسم مرمي على ارضيته
هو فتحى
وكأنه جثة
مش حاسس بالدنيا ولا حاسس باللى هو فيه
نفسه طالع نازل مماتش
لكن فاقد الوعي تماما
فى بيت جوهرة
علي.بقولك ايه يا جوهرة
هو ايه اللى خليل ممكن ييجى يعمله
جوهرة.هو ايه اللى يعمل ايه
يبقى معانا
هو مش فتحى ده اخوه هو التانى
واللى حصل لأمك وابوك ده
هو هو اللى حصل لأمه وابوه
واهو هيتكرر تانى
والمرة دى اخوه
والبت اللى مالهاش ذنب
واللى فى بطنها
احنا هنرتاح لما حد منهم تولع بيه الاوضة
ولا ندخل عليه نلاقيه مدبوح
زى ما حصل فى امك
لازم نبقى ايد واحدة ياعلي
لازم نتكاتف علشان نبقى فى ضهر بعض ونخلص من المصيبة اللى حطينا نفسنا فيها مرة تانية
علي.هو قاللى من الاول بلاش
اصغرنا يا جوهرة عدل علينا
وقال بلاش تضحوا بحد تانى
عايزانى اروح دلوقتى اكلمه
واقوله اللى انت كنت خايف منه حصل
اللى انتى حذرتني منه يا اخويا يا صغير
طلع صح
واخواتك الكبار طلعوا هما اللى غلط
جوهرة.يا علي
مش وقت كبير وصغير
ولا وقت مكابرة
احنا لازم نبقى ايد واحدة
علشان نساعد اخوك ومراته يطلعوا من هناك
قبل ما نخسر حد فيهم
واخوك فى كتفك
هيكون اقوى مني انا وفردوس
علي.انتى عايزة تشيلي ايديكي يا جوهرة
جوهرة.اخص عليك يا علي
ليه ياخويا
وانا من امتى اتخليت عن حد فيكم
انا كنت امكم قبل اختكم
لكن انا عايزاك تستقوى براجل زيك
وفتحى اخوك بايع الدنيا
ومبيكبرش لحد
علشان كده لازم كلنا نقفله
علشان نخليه يطلع من البيت اللى احنا كنا سبب فى انه يدخله
علي.ايه اللى عملناه فى نفسنا ده بس
ما كنا ارتاحنا
عموما
ماشى ياجوهرة
انا بكرة وانا راجع من الشغل
هتصل عليه
يمكن يرضى ييجي
مع انى مستتقل اقول لأخويا الصغير
انه كان هو الصح وانا اللى غلط
بس هعمل اللى انتى شايفاه
كلنا فى نفس المركب
والاذى اللى يطول واحد فينا
كأنه طالنا كلنا
جوهرة.ربنا يكملك بعقلك يا حبيبى
ويزيح عننا الغمة دى
وانت خليك على كلامك
متحكيش لمراتك حاجة
علي.لاء احكي ايه بس يا جوهرة
هو اللى حصل يتحكي
جوهرة.ربنا يعديها على خير
علي.طيب انا هقوم امشى بقى
جوهرة.طيب بقولك ايه
سيب العيال نايمين
وانا بكرة الصبح ابقى اروح انا وايمان اوصلهم
واتكلم مع فاطمة شوية
ميصحش تشيل الهم وتزعل وهى حامل
علي.ماشى يا جوهرة
يلا تتصبحي بالخير
جوهرة.وانت بخير يا حبيبى
خرج على من عند اخته
وهو شايل هم الدنيا كله على دماغه
وبيتخيل لو واحدة من بناته
مكان رقية
وقلبه اتوجع عليها
للدرجة اللى خليته عايز يروح فى عز الليل ياخدها من فتحى
ويقعدها عنده وسط مراته وبناته
اما فى البيت عند نبوية
كلهم ناموا وكأن مفيش حاجة حصلت
لكن اللى كانت مش عارفة تنام
وخدت قرارها النهائي باللى المفروض تعمله
هى رشا
لكن عند رقية
اللى حصل
كان اكبر بكتير من اللى كان ممكن فى يوم تفكر فيه
رقية كانت مش عارفة المفروض فى موقف زى ده ترد تقول ايه
لكن هى فى نفس الوقت
بتتمنى تعرف مين اللى قصادها ده
ودخل بيتها ازاى
ويعرف اللى حصل بينها وبين جوزها ازاى
وايه السبب اللى يخليه بيحميها
الشخص.ليه مش عارفة تردي
شايف الاسئلة اللى بتدور جواكي يا رقية
بس هجاوبك عليها
لما تقوليلى
انتى عايزة فتحى فى حياتك مرة تانية ولا لاء
واجابتك هى اللى هتحدد مصيره ونهايته
رقية بقلق.انت هتموته ولا ايه
الشخص.انا اقدر اعمل ده فى غمضة عين
بس انا ماليش الحق انى انهي حياة انسان
لكن ليا الحق انى احافظ على حياة انسان بيتعرض للأذى
رقية.طيب انت مين
دخلت هنا ازاى
فين سي فتحى
عواطف بتقولى اختفى
الشخص.رقية
فتحى موجود
يمكن مش على وش الارض
لكن لحد دلوقتى هو موجود
لحد دلوقتى هو عايش
ومشافش اللى يخليه يتمنى الموت
لكن اللى عمله فيكي
بكلمتك انتى
هتخليه يشوف اضعاف اضعافه
بس تقولى انك رفضاه
رقية.هو انت سي فتحى هو اللى بعتك طيب
هو تلاقيه عايز يشوفنى هطلع اسراره برة ولا لاء
اصل محدش يعرف اللى انت قولته ده غيره
الشخص.بيتهيألك يا رقية
انا عارف كل حاجة حصلت من اول لحظة انتى حطيتى رجليكي فى المكان ده
رقية ابتديت تحس بالرعشة اللى بتحس بيها
وكأن نسمة هوا مفاجئة حاوطت الاوضة
اللى كان مفيش فيها اى منفذ للهوا فى اللحظة دى
ابتسم لما ارتعشت رقية قدامه من نسمة الهوا
رقية.هى دى الرعشة اللى مش بحس بالدنيا بعدها
الكهربا هتقطع دلوقتى
ولا هسمع حد بيتكلم فى ودني
الشخص.انا موجود قدامك
مش محتاجة اى حاجة من دى تحصل
اللى عايز اقوله
هقوله وانا باصص فى عنيكي
رقية بأندهاش.ااا.ااانت..انت العفريت اللى فى الاوضة
بس ازز..از..ازاى
ده قال ان حماتى هى اللى اتقتلت
يعنى عفريتها هيكون واحدة ست مش راجل
ابتسم للمرة التانية
وكأن ابتسامته هى سبب فى انتفاضة جسمها
لاء مش جسمها بس اللى بينتفض
ده قلبها كمان مع ابتسامته
دقاته بتزيد
وصوتها بيعلى
ابتسامته الجميلة لسه على ملامحه
رقية.بس لاء لاء
انت مش عفريت
هو فيه عفريت حلو كده
رد عليها بمنتهى الهدوء.اه فيه عفريت حلو كده
مش انتى شايفة انى حلو
يبقى اكيد فيه عفاريت حلوة
رقية عقلها خلاها متستوعبش كلامه بسرعة
ضحك وهى واقفة ابتسمت برغم ذهولها
علشان يتكلم مرة تانية
انا امير قبيلة قيعان يا رقية
رقية بعد استيعاب.ايه يعنى مين دول
حد ساكن معانا هنا فى البيت
ابتسم وهو بيقول اسمى دهمان
رقية.ايه الاسم ده
اول مرة اسمع حد اسمه كده
دهمان.انا يا رقية من ملاك المكان ده
رقية ببرائة.انت صاحب البيت يعنى
ازاى ده بيت اهل سي فتحى
دهمان.اهل فتحى وكل اللى موجودين فى البيت ده
بطوله وعرضه واوله واخره
هما فى ضيافتنا احنا
احنا الملاك للمكان ده
رقية.لاء انا مش فاهمة
مد دهمان ايديه لرقية
ومسك ايديها
وسحبها بأستسلام لحد ما قعدها على الكنبة
ووقف قصادها
طويل يوصل طوله لمترين
عيونه بلون السما الزرقا
بشرته برغم سمارها الهادى الا انها صافية صفاء بشرة الاطفال
دهمان.البيت ده كله مبني بقاله سنين كتير اوى عديت ال200 سنة يا رقية
وقبل ما يتبنى
كانت قبيلة قيعان هى صاحبة المكان كله
ولما اتبنى
عيشنا مع كل اللى فيه
لهم حياتهم ولنا حياتنا
هما لهم حق العيشة والظهور وممارسة حياتهم بمنتهى الراحة
لكن احنا كنا مضطرين نبقى عايشين فى مملكتنا واحنا مش ظاهرين
وبرغم عن كده
رفضت قبيلتى انها تعيش فى اى مكان تانى غير المكان ده
كل يوم بتيجى ناس جديدة تسكن فى اوضة من اوض البيت اللى اتبنى بالطوب وهما مش حاسين بوجودنا حواليهم
ولا حاسين ان هما اعتدوا على حاجة مالهمش الحق انهم يعتدوا عليها
لكن قبيلتى قبيلة مسلمة وموحدة بالله
وعلشان كده كان صعب انهم يأذوا اى حد
لكن اللى فعلا كنا بنأذيه
هو اى حد كان بيحاول يأذي غيره
رقية وعنيها مفتوحة على اخرها.انت.انت بجد عايز تقول ان انت من اللهم احفظنا سكان تحت الارض
دهمان ابتسم.اه يا رقية
انا من سكان تحت الارض
رقية قامت وقفت وهى بتفرك ايديها بتوتر
دهمان.بقولك اطمنى
انتى هنا معايا
صدقينى مفيش اى حاجة ممكن تأذيكي
رقية.اا.انت بب.بتعمل .كككده ليه معايا
دهمان.علشان حبيتك
من اول ما دخلتى المكان ده
وشوفتك حبيتك
لما حسيت احلامك وشاركتك فيها
لما شوفت انتى ازاى صافية وبريئة
لما شوفت مدى استسلامك وضعفك
حبيتك
حسيت ان انتى حياتك والحفاظ عليها وحمايتك دى حاجة انا اللى مسؤول عنها
رقية.انت بشكلك ده
عفريت
لاء وكمان بتقول انك بتحبنى
ده انا متجوزة
دهمان بحدة.اوعى تقولى الكلمة دى
ده مش جوزك يا رقية
انتى مراتي انا
اما اللى جواكى ده
واللى انتى شايلاه
ده بذرة دهمان
ده من بني قبيلة قيعان
اما فتحى ملمسكيش
رقية فتحت بوئها ببلاهة وهى مش فاهمة ايه اللى بيتقال ده
دهمان.هتشوفى العالم بتاعى وبتاعك
هتشوفى العالم اللى ابننا هيكون في يوم من الايام ملك من ملوكه
هيكون ليكي القرار فى انك تعيشى ملكة فى العالم بتاعى
او اعيش انا مقسوم نصين بين العالم بتاعك
والعالم بتاع قبيلتى
رقية.عفريت بيحبنى انا
ازاى
سي فتحي ملمسنيش ازاى
ده ورانى العذاب الوان
ده بهدلني
ازاى اللى فى بطني ابنك انت
ازاى انا هعيش تحت الارض
قصدك انى هموت
ماهو انا مش عفريتة علشان اعرف اعيش تحت الارض
انا مش فاهمة حاجة
طب هو فين
دهمان.فتحى اعتبريه فى غيبوبة يا رقية
هيفوق منها
لما انتى تقرري
وجعك شوية واذاكى
لكن ولا يوم كنتى مراته
من احساسك بالوجع والالم
ومن الغل والحقد اللى جواه
محدش منكم حس ان اللى كان معاكى وفى حضنك ليلة الدخلة
كنت انا
مقدرتش اشوفه وهو بيأذيكي
زى ما كانت امه بتتأذي زمان
رقية.امه
اللى اتقتلت
هو انا هتقتل زيها طيب
هو قاللى ان هى كانت خاينة
دهمان.انتى بتسألي كتير اوى يارقية
وانا جاوبتك كتير اوى
واحنا مش قدامنا وقت طويل علشان كل الاسئلة دى
رقية.ليه ورانا ايه طيب
وبعدين
انا عايزة افهم
معلش اصل انا عقلى على قدي شويتين
انا واقفة بتكلم مع عفريت
انا لحد دلوقتى
حاسة انى ممكن اكون اتخبلت من اللى شوفته
واكيد اللى بيحصل دلوقتى ده مش بجد
دهمان.رقية انتى عايزة فتحى مرة تانية فى حياتك ولا لاء
رقية.لاء مش عايزاه
دهمان.يبقى انتى اللى حكمتي عليه
رقية.لالا اوعى تموته
دهمان.خايفة عليه
رقية.لاء مش خايفة عليه
بس انا مش عايزاه يموت
حرام
دهمان.حرام
وهو ليه مقالش حرام بعد اللى عمله فيكي
ليه مش بيقول حرام انه كل يوم بيرتكب الكبائر بمنتهى الرضا
رقية.انا مش هقدر اعيش بذنب حد فى رقبتى
وبعدين علشان اهله
محدش منهم اذاني
دهمان.انا ماليش انى انهي حياة حد
لكن اللى ليا فيه اني اطلعه برة حياتك انتى
وعلشان كده انا هعاقبه على ظلمه ليكي
بس هخليه يكمل فى اللى هو فيه
لأن حسابه وعقابه اللى هيكون فى انتظاره يوم ما يقابل ربنا
هيكون مالهوش مثيل ابدا بالرأفة اللى انا كنت هحاسبه بيها
استهوانه بكل الذنوب
ومبالغته فيها والمجاهرة بيها
ده عقابه هيكون اشد مما يتخيل
لكن هطلعه من حياتك
بس اللى باقى حاجة تانية
رقية.ايه هي
دهمان.انك تقبلي تعيشى معايا فى مملكتي
تعيشي فى وسط قبيلة هتكونى ملكة فيها
رقية.انت عايزني اعيش مع عفاريت
يتبع
ما بعد الأغتصاب
الفصل الرابع والعشرون
قامت رشا بهدوء
طلعت هدومها
واتسحبت لحد ما خرجت من البيت
بعد ما اخدت فلوس كانت شايلاها
اشرف كان عاطيهالها يوم ما راحت لرقية
علشان لو احتاجت تشتري حاجة
طلعت وكان الوقت اتأخر اوى
محدش فى البيت حس بيها لأن كله نام
راحت للموقف
وكان على قد خوفها
على قد ما كانت بتحاول تطمن نفسها
فى الريف الوقت ده الدنيا بتبقى ساكتة
والطرق مفيش حد ماشى فيها
لكن برغم عن كده هى متراجعتش ولا فكرت ترجع بيتها تانى
ولا حتى فكرت رد فعل ابوها وامها هيكون ايه
وصلت للموقف
وهى حاسة ان وصولها لحد هناك
ده فى حد ذاته انجاز
دورت على اى عربية طالعة اسكندرية فى الوقت ده
واخدت وقت طويل اوى لحد ما العربية اللى لقيتها اتحركت من الموقف
ماهو مش بسهولة عربية تحمل فى وقت زى ده
وفعلا وصلت اسكندرية
وهى بتدور فى دماغها مليون فكرة
وعلى قد ما هى قلقانة من رد فعل اشرف اخوها اللى قررت انها تروحله
الا انها عندها ثقة قوية فى انها هتقدر تقنعه انها مش هتقدر ترجع تعيش مرة تانية فى البيت ده
وصلت رشا بيت اخوها
وهى طالعة على السلم
قابلت حد من الجيران
كان طالع هو ومراته
سارة.انتى طالعة عند مين يا شاطرة
رشا.طالعة على السطح
اخويا اشرف ساكن فوق
محمد جوز سارة
بص لرشا وبص لمراته
ولأن البيت بيت عيلة
كان صعب ان حد يتغافل عن ان بنت تطلع لشاب فى وقت زى ده وهما ميعرفوش حقيقة علاقتهم ببعض
محمد.طيب وايه اللى جايبك فى وقت زى ده لاخوكى
رشا بثقة.هو انتم بتسألونى كتير ليه
اخويا وانا جاياله من بلدنا علشان عندنا ظروف كان لازم تخلينى اجى دلوقتى
فى ايه بقى
هو انا حرامية
سارة.انتى بتتكلمي كده ليه
هو فيه اهل هتسيب بنتها تخرج فى وقت زى ده
وبعدين اخوكى نفسه ازاى هيقبل انك تخرجى من بيتكم فى وقت زى ده حتى لو علشان هتجيله
محمد.بصى يا شاطرة البيت ده كل اللى فيه ناس محترمة
يعنى لو انتى جاية هنا وفاكرة ان الكلمتين دول هيدخلوا علينا
يبقى وفرى على نفسك الفضايح واتفضلي ارجعى من مكان ما جيتي
رشا بانفعال.بقولكم ايه
انا باين عليا انى اقل منكم اه
لكن انا مش هقبل حد فيكم يتكلم معايا كده
اطلعوا معايا عند اخويا
وهو يقولكم
علشان اللى انتم تقصدوه ده
لو اهلي عرفوا بيه هيكون ليا حق عندكم
سارة ومحمد بصوا لبعض
رشا.يلا اتفضلوا
فعلا طلع محمد وسارة
وطلعت معاهم رشا
وقف محمد وسارة جنب باب الاوضة
وخبطت رشا على باب اخوها
اللى فتح بعد وقت
وكان باين عليه النوم
واول ما شاف رشا قدامه
اتخض
اشرف.رشا
فى ايه يابت
ابوكى فيه حاجة
امك فيها حاجة
ايه جابك دلوقتى
رشا منفعلة.مش وقت كل السؤلات دى يا اشرف
الجماعة جيرانك مش مصدقين انى اختك
قرب سارة ومحمد بعد ما سمعوا كلام اشرف مع رشا
اللى كان طبيعي وتلقائي وهو ميعرفش ان حد واقف بيترقب رد فعله لما يشوفها
وده اقنعهم انها مش بتكدب
محمد.السلام عليكم يا اشرف
اشرف.عليكم السلام يابيه
خير فى ايه
محمد.اولا احنا بنعتذر
اننا طلعنا مع اختك دلوقتى لحد هنا
واسفين كمان اننا مصدقناش
بس معلش انت عارف مش اى حد يقول انا طالع عند فلان ولا انا قريب علان يبقى بيقول الحقيقة
رشا بأنفعال.وهو يعنى ده منظر واحدة بطالة يا بيه
عيب ده حتى انتم باين عليكم متنورين وتفهموها وهى طايرة
بس هنقول ايه
هما الغلابة علطول مظلومين كده
اشرف.اسكتى يا رشا
في ايه بس انا مش فاهم
محمد بأدب.فيه كل خير
احنا جيرانك هنا فى البيت فى الدور الرابع
كنا مسافرين ولسه راجعين الاسبوع ده
ومنعرفش ان فيه حد ساكن على السطح
لقينا الانسة طالعة
وبتقول ان اخوها ساكن على السطح عندنا
طبيعي جدا لو انت مكانى
ممكن تشك فى الشخص اللى قدامك خصوصا انك متعرفهوش
اشرف.حقك يا بيه طبعا
محمد.علشان كده طلعت اشوف مين الجار الجديد اللى ساكن معانا فى البيت
واشوف برضه اذا كانت الانسة فعلا طالعة لأخوها ولا لسبب تانى
وانا اسف لو ظنيت اى ظن سئ
اشرف بأدب.لا يا بيه حقك
الواحد يفرح لما يبقى قاعد فى بيته مطمن ان مش اى شاردة ولا واردة سهل تدخل البيت
وبعدين اه رشا اختى الجماعة تحت كمان عارفينها
هما شافوا اهلي لما جولى كذة مرة
لو عايز تسأل اى حد منهم مش عيب يا بيه
الحمد لله ربنا يبعدنا عن الحرام
سارة.معلش احنا اسفين يا انسة رشا
ما تزعليش مننا
بس الوقت متأخر على انك تخرجي لواحدك
وده خلانا نستغرب شوية
رشا.ولا يهمك يا مدام حصل خير
محمد.طيب اتفضلوا
هى الاوضة مش قد مقامكم
بس تنوروها
محمد بابتسامة.مرة تانية ان شاء الله
وسامحونا بقى على سوء الظن
نستأذن احنا
واسفين مرة تانية يا انسة رشا
رشا/اشرف.حصل خير
محمد/سارة.تصبحوا على خير
اشرف.وانتم بخير
نورتوا
نزلت سارة ومعاها محمد
وبعدت رشا اشرف من على الباب
ودخلت قعدت على الكنبة
اشرف قفل الباب ودخل وراها وهو مستغرب وجودها فى وقت زى ده
رشا.شوف يا اشرف
انا عارفة انك هتغلطني
لكن اللى بيحصل ده مش على هوايا
ولا يرضى رب ولا عبد
اشرف.فى ايه بقى يا رشا
انتى وخدانى فى دوكة كده
وانا مش فاهم اللى بيحصل
فهمينى بالعقل
انتى ازاى جيتي هنا دلوقتى
وازاى ابويا طلعك من البيت
رشا.ابوك ميعرفش
انا طلعت مني لنفسي
ومش هرجع هناك تانى
يا تعيشني معاك هنا
واخدمك زى ما رقية كانت بتعمل قبل الجواز يا تشوفلى شغلانة
اشرف.طفشتى من البيت يا رشا
خبط باب الاوضة مرة تانية
واتخض اشرف ورشا لما سمعوا صوت خبط الباب
للدرجة اللى خليتهم يبصوا لبعض ثوانى قبل ما يروح اشرف يفتح الباب
علي.وبعدين يا فاطمة
انتى هتفضلي واخدة جنب كده
فاطمة.سيبك مني يا علي
فين البنات
علي.هناك عند جوهرة كانوا نايمين قالتلى بلاش يطلعوا دلوقتى علشان ميبردوش
والصبح هى هتجيبهملك
فاطمة.ماشى
علي.طيب انتى هتنامى يعنى من غير ما نتراضى
فاطمة وهى نايمة على سريرها.معلش يا علي
انا تعبانة شوية
اليوم كان طويل وحيلى مهدود
الصباح رباح
علي.ماشى يافاطمة اللى يريحك
علي كان مرتاح ان فاطمة فعلا مش هتتكلم معاه فى حاجة دلوقتى
لحد ما يشوف هو واخواته ايه اللى يتقال وايه اللى يتعمل
هو مش عايز يكدب على مراته
ولا عايز يتكلم فى حاجة هو مش بيحب يتكلم فيها
فى بيت جوهرة
عمار اسم جوز جوهرة
جوهرة.شوفت يا عمار
دارت الدنيا
وفكرنا ان اللى حصل زمان
اتنسى وفات
اهو رجعناله من تانى ويعالم مين المرة دى
البت
ولا اخويا
عمار.يا جوهرة
سيبك من التخاريف اللى فى دماغك دى
اللى حصل زمان محدش منكم كان له دخل فيه
واللى انتم بتتوهموا نفسكم بيه ده مالهوش اساس من الصحة
ايه عفاريت وارواح والكلام ده
عيب يا جوهرة انتى ست تعرف ربنا
جوهرة.يا عمار
وهو انا يعنى بكفر
اهو ادينى حكيتلك كل اللى حصل هناك
ايه اللى هيكون سبب فى اللى بيحصل
غير الارواح
انت ناسى ان اللى بيتقتل روحه مش بتبقى مرتاحة
وبتفضل متعلقة بين الحياة والموت
عمار.تانى هتقول اتقتل
هو مين اللى اتقتل يا جوهرة
انتى ليه مصممة تصدقى حاجة محصلتش
جوهرة.بقولك ايه يا عمار
انت اللى عايز تكدبنى والسلام
وكأن انا واخواتى مجانين ولا فرحانين باللى بنقوله
عمار.لاء انتم بس عايزين تصدقوا اللى رسمتوه فى عقلكم والسلام
خايفين تصدقوا اللى حصل يا جوهرة
جوهرة.خلاص يا عمار
اقفل بقى الكلام ده دلوقتى
انا غلطانة انى بفضفض معاك يا عمار
عمار بيبتسم.وماله يا جوهرة
هسيبك على راحتك
بس انا عارف ان انتى عارفة انى على حق
يلا تصبحي على خير
جوهرة.وانت من اهله
سابها عمار وقام دخل اوضته ينام
وفضلت جوهرة قاعدة جنب الشباك
وتفتكر اللى حصل
اما فى بيت فتحى ورقية
دهمان.انتى خايفة مني يا رقية
رقية.اه خايفة
مش بتقول انك عفريت
هو فيه حد مش بيخاف من العفاريت
دهمان.طيب انا فيا ايه يخوف
انا واقف قدامك اهو
وبتكلم معاكي
لا عيني حمرا
ولا انيابى طويلة
ولا انا بقرون
ولا ضوافرى احفر بيها فى الصخر
ايه بقى مخوفك مني
رقية ببرائتها المعتادة.مش عارفة
بس هو المفروض ان اى حد بيخاف من العفاريت
ف انا خايفة علشان كده بقى
دهمان بابتسامة.يعنى مع انك مش شايفة حاجة تخوفك
الا انك لازم تخافى علشان بس الناس بتخاف من العفاريت
ماشى
اللى فهمته من كل كلامى معاكي
ان انتى مش عايزة تعيشى مع فتحى تاني
صح
رقية.اه
دهمان.لكن مش عايزاه يموت او يتأذى
رقية.اه سايقة عليك النبى
دهمان.وفهمت انك خايفة تعيشى معايا فى مملكتى
وخايفة مني لأنى عفريت
رقية.اه وخايفة من اللى فى بطني ده كمان
هيطلع عفريت
يا نصيبتى انا كنت عملت ايه فى دنيتى بس
دهمان بهدوء.هو انتى ليه عايزة تخافى وخلاص
وبعدين قوليلى
لما تعيشى فى وسط العالم بتاعك
وتخلفي الطفل
رقية.قصدك العفريت
دهمان.الطفل يا رقية
هيكون ابن مين
رقية بتفكير.هيكون ابنك مش انت بتقول كده
دهمان.يعنى هتقولى لكل اللى حواليكي
ان ده ابن دهمان
من قبيلة قيعان
ملك من ملوك الجن
رقية بصيتله وسكتت
دهمان.علشان تعرفى ان مستحيل تقدرى تعملى حاجة زى دى
كل اللى حواليكي هيفكر انك مجنونة
ومحدش هيصدقك
ومش بعيد تدخلى مستشفى المجانين
رقية.خلاص يبقى هيبقى ابن سي فتحي
ماهو انا مراته
وكل الناس عرفوا انى حامل
لو فجأة مبقيتش موجودة
هيقولوا عليا انى خوفت ان اهلي يعرفوا بفضيحتى
وطفشت
ما هو انا حامل فى الخامس وانا لسه عروسة من كام يوم
وانا مش هرضى لأبويا واخويا
يعيشوا وفاكرين انى جيبتلهم العار
وبعدين اخواتى البنات لما يبوروا بسبب السمعة اللى هتطلع عليا
ابقى اعمل ايه انا بقى ساعتها
دهمان.يعنى انتى عايزة ابن قبيلة قيعان
يسيب ذريته
لبشري زى فتحي
رقية.هو مش انت قولت انك ممكن تساعد اى حد ممكن يتأذى
خلاص يبقى تخلى بالك بقى مني ومن ابنك
ومتخليش سي فتحي يأذي حد مننا
دهمان.فتحى مش هيكون له علاقة بيكي تانى يا رقية
ومش بمزاجك
ده هيعمل كده بمزاجه هو
اه
هسيبك فى العالم بتاعك
لكن هكون معاكى كل وقت
ابنى هيكون فى حمايتى
وهييجى الوقت اللى يعرف حقيقته وحقيقة العالم بتاعه
لو على اسم فتحى اللى هيتعلق بأسمه فى عالمكم
فهو فى عالم بني قيعان مش هيكون له اى وجود
هقبل اللى انتى قولتيه
بس مش علطول
هقبل ده لحد ما يبقى ابني جاهز انه يعيش فى عالم تانى
هو احق بوجوده فيه
وساعتها هتبقى جاهزة انك تعيشي فى وسط مملكة هيتعمل فيها الف حساب لوجودك
وهتعيشي ملكة بمعنى الكلمة
رقية.طيب اهلى
يعنى انت هتخلي سي فتحي يطلقنى
دهمان بيضحك بصوت عالي.انسي فتحي يا رقية
انتى هتفضلي عايشة هنا
فى البيت ده
بعلم الكل وقدام الدنيا بحالها
وفتحى هيسيبك هنا برضاه
وبعدين هو متجوزكيش من الاساس
رقية.لاء اتجوزنى
كتبنا الكتاب والله
دهمان.قدام كل الناس
انتى ست متجوزة
حامل
وعايشة فى بيت جوزك
وانتى فعلا كل دول
انتى مراتي
وحامل فى ابني
وده فعلا بيتي
لكن اللى هيخرج من هنا هو فتحي
اللى هيعيش عمره كله
حاسس بالذنب اللى عمله فيكي ومش هيقدر يكفر عنه
علشان لما يقابل ربنا يبقى حسابه عسير
رقية.بص هو انا مش فاهمة اوى يعنى اللى انت قولته
بس انا مش عايزة حد يتأذى بسببي
ولا اهلى حد يجرحهم بكلمة
دهمان ب حب.مش كتير فى عالم البشر
ان يكون فيه قلوب بريئة ونضيفة بالشكل ده
هسيبك دلوقتى
همشى من قصادك
لكن انا جنبك
معاكي
ومش لواحدى
انا وكل عشيرتي
كل اللى هطلبه منك
ان اى حاجة تحصل
بلاش تدي فيها اى رد فعل
رقية.يعنى ايه
دهمان.يعنى اى حاجة تحصل قدامك
اتفرجي عليها وانتى ساكتة
واللي حصل بيني وبينك
محدش يعرفه ابدا
رقية.ولا اى حد يعني
دهمان بأبتسامة.ولا اى حد
محدش هيعرف غير ابننا
فى الوقت اللى ينفع يعرف فيه
رقية.اما عجيبة والله
اتجوز عفريت بالحلاوة دى
فى بيت كان فيه قتيل
وهكمل كمان حياتى فى البيت ده لواحدى
هجيب منين انا قلب لكل ده
دهمان.هتعرفي كل حاجة فى وقتها
رقية لسه هتتكلم
اختفى دهمان من قدامها
قاعدة باصة فى المكان اللى هو كان فيه
وبتتكلم مع نفسها كأنه لسه موجود.يمكن يابت يا رقية
ربنا بيعوضك على اللى حصل فيكي
بس ايه ده يعوضك بعفريت
رقية.عفريت ايه
هو فيه عفريت بالشكل ده
العفاريت دى كنا بنسمع انها بتخوف
ده زى القمر فى ليلة تمامه
والله انا ما بقيت فاهمة حاجة
هو انا مش فاهمة علشان جاهلة
ولا اللى بيحصل حواليا كتير عليا انى افهمه
فضلت رقية قاعدة تسأل نفسها
وتجاوب على نفسها كتير
لحد ما نامت وهى قاعدة فى مكانها من غير ما تحس
لكن اللى كان غريب
لما فتح فتحي عنيه
وشاف نفسه نايم فى مكان تانى غير اوضته
فتحى بأستغراب.ايه ده انا ايه اللى جابني هنا
ميرفت.رجليك والشوق يا حلو
فتحي بيبص حواليه بتركيز.ميرفت
انا جيت عندك امتى
ميرفت بمياعة.لا ياراجل
انت مش عارف جيت امتى
انت عندى من الليلة اللى فاتت نسيت ولا ايه
فتحى بيمسك دماغه.اه مش فاكر حاجة
مديت ميرفت ايديها فى صدرها
وطلعت ورقة
فردتها قدام فتحى
وهى بتضحك بمياعة
وبتقول.ومش فاكر دى كمان ولا ايه
فتحى فتح عنيه على اخرها
وهو بيبص على الورقة
وبيقنع نفسه ان عنيه مزغللة
ميرفت.جرى ايه يا راجل مالك
هى بايتة معاك ولا ايه
انت ناسى بصحيح انك كتبت عليا ولا ايه
فتحى بذهول
سحب الورقة من ايديها
وهو بيبص فيها بصدمة وتركيز
ميرفت.مبروك عليك يا جوزى
عروستك الزينة
ههههههههههههي
يتبع
ما بعد الأغتصاب
الفصل الخامس والعشرون
فتح اشرف الباب
شاف قدامه جاره استاذ محمد
محمد.انا اسف مرة تانية انى بتطفل عليكم فى وقت زى ده
بس معلش مقدرناش ننام غير لما نقدملكم هدية بسيطة كده بسبب سوء التفاهم اللى حصل
اشرف بسعادة واحراج.لالا على ايه بس يا استاذ
محصلش حاجة
الغلط كان من عندنا
انتم عملتوا الاصول
محمد.معلش برضه
ده اعتذار لانسة رشا على اسلوبنا معاها
ولو تسمحلى
انا وانا واقف بخبط على الباب
سمعت كلامكم عن غير قصد
لو فاضى بكرة
ممكن نتكلم مع بعض
انا عندى عرض يمكن يكون مناسب
اشرف بيبص على رشا اللى قاعدة على الكنبة
بأستغراب
وهى كمان كان فضولها قاتلها وبتشاور لاشرف انه يسأله ايه هو العرض
اشرف.ان شاء الله يا استاذ
هنعمل ايه بس مفيش بيت مفيش فيه مشاكل
ربنا يهدي الاحوال
محمد مد ايديه بالهدية.اتفضل
وبكرة ان شاء الله هنتظرك تفوت عليا اى وقت
انا موجود فى البيت مش خارج
يلا تصبح على خير
اشرف بابتسامة.وانت من اهله
دخل اشرف قفل وراه الباب
وماسك فى ايديه
شنطة صغيرة
قامت رشا بسرعة تشوف ايه الهدية دى
سحبت الشنطة من ايد اشرف
طلعت اللى فيها
ولقيتها ازازة برفان
رشا بسعادة.يالهوى عليا
شوف يا اشرف
دى ازازى ريحة
شم كده شم
اشرف بيشم البرفان.اه حلو اوى
بس تفتكرى عرض ايه اللى عنده ده
وبعدين يا رشا
اللى انتى عملتيه ده كله مكانش يصح
رشا.بقولك ايه يا اشرف
انت تقعد تسمعني كده
ومن هنا للصبح تكون فكرت وتقولى رأيك ايه فى كل اللى حصل
وانا عليا النعمة
هقولك كل حرف حصل من طقطق للسلام عليكم
اشرف.احكى ياختى
ده انتى ابوكى هيكسرك لما يشوفك
احكى احكى
وفعلا قعد اشرف قصاد اخته
وحكيت كل حاجة حصلت
من اول تفكيرها فى الشغل وكلامها مع ابوها وامها فيه
لحد ما شافت فتحى عند ميرفت
واللى حصل فى البيت ورد امها وابوها على الموضوع
ولحد ما هى مستحملتش كلامهم وردت على ابوها
وقام ضربها
اشرف.استغفر الله العظيم
ماشى يا رشا
نامى انتى دلوقتى
والصبح نبقى نشوف هنعمل ايه فى المصايب اللى انتى جيبهالى دى كلها
رشا.مع انى جعانة
بس ماشى انا عايزة انام اوى
اشرف.خلاص ادخلى نامى مكان رقية فى الاوضة
رشا قامت دخلت الاوضة
وغيرت
ونامت
واشرف كمان كمل نومه
فى بيت ميرفت
فتحى مذهول.انا
انا اتجوزك انتى
طب ازاى يعنى
وعرفي كمان
ميرفت.لاء بس اوعى تستهون بالعرفى
انت ناسى الورقة دى كمان ولا ايه
وطلعت ورقة تانية
وكانت عبارة عن ايصال امانة
فتحى بصدمة.ايه ده كمان
ميرفت.ده وصل امانة يا عنيا
بدل المهر بتاعى
قام فتحى من مكانه وهو منفعل ومصدوم.مهر ايه يابت انتى صدقتى نفسك ولا ايه
ده انتى سبيل
جواز ايه اللى اتجوزه لواحده زيك
وكمان واخدة عليا وصل امانة
ميرفت وهى بتحط الورقة فى صدرها مرة تانية.وحد كان ضربك على ايدك يا خويا
انت اللى جيتلى هنا نص الليل
واتحايلت عليا علشان ارضى اتجوزك
وقولتلى هكتبلك حقك واضمنهولك بوصل امانة
وانت اللى كتبت الرقم بأيدك يا حبيبى
فتحى.رقم ايه يا ولية
انتى هتجنيني ولا ايه
انا قولتلك انتى كده
ميرفت.يوه
وانا هتبلى عليك ليه يعنى
وانت عيل صغير ولا عيل صغير
انا نفسى مصدقتش نفسى لما قولتلى هكتبلك مهرك خمسين الف جنيه
ده بت البنوت فى نواحينا مفيش واحدة فيهم سمعت نمرة زى دى
فتحى.ايييييييه
انا كاتبلك انتى خمسين الف جنيه
ليه يعنى
لالالا
انتى اكيد عملتي كده وانا مش فى وعيي
ميرفت بأستهزاء.بقولك ايه يا خويا
وانا هعمل كده ليه
يعنى انت ابن البهوات
ولا البشوات
ده انت حتة سواق على عربية وياريتها ملكك كمان
ولو متجوزتش فى بيت ابوك مكانش بقالك بيت جاتك خيبة
فتحى.حلو اوى اللى بتقوليه ده
يبقى اللى حصل امبارح ده كأنه محصلش
والورق اللى اتكتب ده يتقطع
ويادار ما دخلك شر
احنا اصحاب وحبايب من غير لا جواز ولا ورق
ميرفت.هيهيهيهيهيهيهي
ليه اياك اكون هبلة ولا عبيطة انا
فاكرنى هضيع مني فرصة زى دى
لاء يا عنيا
انا على قلبك
مش عايزنى ادينى الفلوس اللى فى وصل الامانة
مش هتدفع
خلاص يبقى انا ملزومة منك
اكل ولبس وشرب وسكن كمان
فتحى بصدمة.انتى بتقولى ايه ياولية انتى
انتى واعية لنفسك
عايزانى اخليكي انتى على ذمتى
يا ولية ده الموقف كله داس عتبتك
انتى جرى ايه فى مخك
ميرفت بأنفعال.فتحى
بقولك ايه
شغل حاوريني يا كيكة ده مش عليا
اه يا خويا
انت جيتلى لحد باب بيتى بكيفك
وانت اللى اتحايلت
قصاد الشهود اللى كنت جايبهم معاك
يروحوا يقولوا انى بكدب
لكن تيجي بعد ما تعشمني بالحلق واخرم ودانى
لا تجيب الحلق ولا اللحم يرجع تانى
لاء يا حبيبى ده مش انا
الكلام ده تعمله على الهبلة اللى راكبها ومدلدل فى بيتك هناك
لكن انا مياكلش معايا
وحقى برقبتى يا فتحى
فتحى مسك ميرفت من رقبتها
لدرجة ان روحها كانت بتروح
لكن فاق لنفسه
وهو بيقولها.لاء ماهو انا مش هدخل السجن فى واحدة زيك
بقى انتى بتلوي دراعي يا ميرفت
بقى انا فتحى الرايق
يمشى فى الموقف الناس تشاور عليه
ويقولوا ده اللى اتجوز ميرفت اللى هتركبله الارايل
ميرفت ببجاحة.مش عاجبك ياخويا
نقطع الورقة
وتدينى مهري
ويادار ما دخلك شر
القول قولك بقى
فتحى.يا ميرفت منين
هجيبلك انا منين مبلغ زى ده
ميرفت.خلاص
بلاش المبلغ ده
خلينا نقسم البلد نصين
انت تديني نص الفلوس
ومسامحة فى الباقى ياسيدى
ايه رأيك بقى
شوفت انا جدعة ازاى
فتحى بأنفعال.انتى اتهبلتى
عليا النعمة جرى حاجة لمخك
بقى انا معايا خمسة وعشرين الف جنيه
وحتى لو معايا
اجى اديهملك انتى
لاء وعلى ايه
خليكي يا ميرفت على ذمتى
وهتشوفي سواد السنين فى عيشتك معايا
لحد ما تدفعيلى انتى علشان اطلقك
ميرفت باستفزاز.ههههههه يا حبيبى يا جوزى
وانا اطول ابقى عايشة فى حما راجل زيك
ال اطلق ال
قولى بقى امتى هتاخدنى اسكندرية
ماهو مش هتبقى انت عايش هناك وانا عايشة هنا
فتحى بنفاذ صبر.ااااه البرود ده انا عارفه كويس
وبعدين اسكندرية ايه اللى تيجي تعيشى معايا فيها
انتى اتخبلتى يا ولية
ميرفت.شوف يا ابن الناس
انا بتكلم بالحسنا
شوف هترتب امورك وتاخدنى ازاى وامتى من هنا
بدل ما هروح لأهلك واصحابك فى الموقف كلهم
واقولهم متجوزنى
ورامينى
ومخلينى زى البيت الوقف
علشان مش عايز يدفعلى حقي وشرع ربنا
ويطلقنى
شوف نفسك انا بموت فى الفضايح انت عارف
لا ليا كبير
ولا حد له عندى حاجة
انت اللى عندك اخواتك ورجالتهم
وحريمهم
وهتبقى انت سبب الفضايح اللى هتجيلهم على حسك
قولت ايه
فتحى.انتى ايه شيطان
يخربيت اهلك
انا بس لو اعرف انا ايه اللى جابني هنا
وايه اللى انا عملته فى نفسي ده
مستحيل اعمل كده بكيفي انا
ميرفت بأستهزاء.اااه يا خويا تلاقينى كنت مربطاك ومضيتك غصب عنك
بقولك ايه
انا هتخمد بقى
كفايا عليا كده
مناهدة معاك
وفعلا طلعت ميرفت على سريرها
وعطيت ضهرها لفتحى
ونامت
وهى حاسة انها وصلت لأقصى المكاسب اللى كانت ممكن تحققها فى حياتها
اتجوزت ولو حصل وطلقها مش هتتنازل عن انها تطلع كسبانة من الطلاق ده
ولو اخدت من الف جنيه
هى برضه الكسبانة
فتحى كان قاعد جنبها
بيحاول يفتكر
لكن مش قادر
اخر حاجة فاكرها انه ساب رقية وخرج من الاوضة
وافتكر انه قالها انه هيتجوز
معقول يا فتحى
انت نفذت اللى قولته
معقول محسيتش بكل ده
بقى انا اتجوز ميرفت
ده انا مقولتش اتجوز غير لما لقيت واحدة استعصيت عليا ودوختنى وراها
فى الاخر اروح اتجوز واحدة زى دى
وكمان احط رقبتى تحت سكينتها
عملت ايه انا فى نفسي بس
فضل فتحى قاعد يتكلم مع نفسه
ويحاول يفتكر ايه اللى حصل بعد ما خرج من اوضته
لكن كأن ذاكرته اتمسحت تماما
لحد ما النهار طلع
كان قاعد بيكلم نفسه
صحى علي من نومه
وعلى غير العادة
خرج من البيت قبل ما فاطمة تصحى
كان حابب يأجل اى فرصة للكلام معاها
راح على اول سنترال قابله فى طريقه
وحاول يتصل على خليل
لكن كان مفيش رد
هو مش متعود يتصل بيه بدرى كده
عارف ان خليل بيشتغل بليل
وبيبقى نايم بالنهار
وده خلاه محاولش اكتر من مرة
راح علي على شغله
وخرج فتحى من بيت ميرفت قبل ما هى تصحى
نزل على اسكندرية
نبوية.يانصيبتى البت طفشت يا راجل
قوم الحقنى
يا فضيحتنا
قام بسرعة ابو اشرف
وهو بيجرى ولسه تايه توهان النوم
بسمة صحيت على صرخة امها مفزوعة
ومش فاهمة ايه اللى بيحصل
نبوية.بتدور على ايه
بقولك البت طفشت
اخدت حاجتها وهربت
يا فضيحتنا وسط الخلق
ابو اشرف واقف فى اوضة البنات
وحاسس انه بيحلم
تايه ومش عارف هو المفروض يقول ايه او يتصرف ازاى
بسمة.طب مش يمكن راحت لأخواتى فى اسكندرية
ابو اشرف بسرعة.يا بت الناصحة
صح يا نبوية
هى اكيد هتروح لأخوها
اصل البت لا تعرف شرق ولا غرب
اكيد نزلت لأخوها
انا هغير هدومي
وطيران على هناك
ولو لقيتها هناك انا هقطم رقبتها علشان تعرف تسيب البيت وتطلع
فاكرة نفسها واد صايع
بتطفش من البيت
نبوية.يارب
يارب سايقة عليك النبى محمد والاوليا
ان البت ميكونش جرالها حاجة
وتكون عند اخواتها
اوعى يا ابو اشرف
اوعى تأذيها ورحمة اللى ميتين لك
بسمة بتوسل.الله يخليك يابا
ابوس على رجليك
كفايا الضرب اللى انت ضربتهولها امبارح
بلاش تعمل فيها حاجة
سابهم ابو اشرف وراح على الحمام
وخرج غير هدومه
وطلع على الموقف
واتفاجئ لما شاف فتحى وهو بيركب من الموقف فى وقت زى ده
صحى اشرف ورشا من نومهم
وفطروا سوا
اشرف.انا هتوكل على الله
بس هنزل افوت على الاستاذ محمد ده اشوفه عايز ايه
علشان يمكن بعد الشغل
اروح لأبوكى البلد
تلاقيهم عرفوا انك مشيتي وبيلفوا حوالين نفسهم
رشا.ماشى
ان شالله يكون خير
بس بقولك ايه انا هاخد بعضى
واروح عند البت رقية اختك
اطمن عليها
واهو علشان لو ابوك جه يدور عليا ولا حاجة مبقاش لواحدى
ده ممكن يقتلنى فى ايديه ولا حد يحس بيا
اشرف.خلاص ماشى
بصى خدى الفلوس دى خليها معاكي
متدخليش على اختك فاضية
ومعاكى فلوس بالزيادة
رشا بفرحة.ايوة بقى الشغل حلو يا ولاد
اشرف ابتسم.ربنا يستر من اللى جايلى من وراكي
يلا هتوكل على الله
رشا بأبتسامة.ربنا يفتحها فى وشك يا حبيبى
نزل اشرف
وقفلت وراه رشا الباب
ودخلت علشان تغير هدومها
اشرف رن الجرس على بيت استاذ محمد
محمد.اهلا اهلا
اتفضل يا اشرف
ادخل
اشرف بأحراج.متأخذنيش يا استاذ
انا بس علشان برجع بليل متأخر قولت ميصحش اخبط عليك فى وقت زى كده
محمد.عيب يا راجل ما تقولش كده
بيتك اتفضل ادخل
اشرف عنيه فى الارض ودخل من باب البيت.احم احم
السلام عليكم
محمد.عليكم السلام
اتفضل المدام لسة نايمة
محدش خالع راسه يعنى
ابتسم اشرف
ودخل بيه محمد للصالون
محمد.اتفضل يا اشرف ارتاح
اشرف وهو بيقعد.يزيد فضلك يا استاذ
خير بقى
محمد.طيب ياراجل اصبر مستعجل على ايه
مش تشرب حاجة الاول
اشرف.كترا لف خيرك
دايما عامر
بس متأخذنيش انا لازم انزل اروح اشوف شغلي
ملحوقة
قعد محمد.ماشى ياسيدى
بس ليك عندنا عزومة بقى
هدخل فى الكلام علطول
بص انا ومدام سارة لسه راجعين من بعثة
والشغل بتاعنا هيكون مقره فى القاهرة
وهننزل اسكندرية فى الاجازات بس
اشرف.بالسلامة يااستاذ
ربنا يوفقكم
محمد بيبتسم.العرض بقى اللى قولتلك عليه
ان احنا محتاجين حد معانا هناك فى القاهرة
يهتم بالبيت وامور البيت
لأن انا والمدام هنبقى طول اليوم فى شغلنا
مش هيبقى فيه وقت
لتنضيف او طبخ
او الامور بتاعت اى بيت اللى انت عارفها دى
اشرف مش فاهم محمد يقصد ايه
محمد.ابسطهالك
انا كنت عايز اعرض عليك
ان اختك تيجي تكون هى مديرة البيت فى القاهرة
اشرف.ايه
اختى رشا انا تسافر وتشتغل شغالة فى البيوت
لا يا استاذ انت استقليت بينا اوى
محمد.اعوذ بالله من انى استقل ببني ادم يا اشرف
بالعكس
ده نوع من انواع الاعتذار
وبعدين اختك مش هتكون شغالة عندنا
هى هتكون مديرة امور البيت
لأن انا والمدام هنعتبر ضيوف فى البيت
بدل ما نتغدى فى مطاعم
وبدل ما نبعت هدومنا تتغسل
ولا حد ييجى ينضف البيت ويكونش امين
لاء انت جارنا اهو فى البيت
وباين عليكم ناس كويسين
والمدام عندى ارتاحت لاختك
وغير انها هتبقى مسؤلة عن البيت
احنا هنكون مسؤولين عنها
مش مصاريفها بس
بالعكس
احنا كمان هنساعدها تتعلم
وهنهتم بكل حاجة خاصة بيها
ها قولت ايه
ومتقلقش هتاخد مرتب محترم
اشرف بيفكر فى الكلام
وساكت
محمد.بص مش هستعجلك واقولك رد عليا دلوقتى
بس لو قدرت ترد عليا بكرة
اكون ممنون ليك
علشان احنا مسافرين اخر الاسبوع
لو مش هيحصل
بلغني علشان نقدر نشوف حد تانى
واتمنى انك تقبل
اشرف باحراج.خلاص يا استاذ
انا برضه هشور على ابويا
واشوف هيقول ايه
واللى فيه الخير ربنا يعمله
اصل متأخذنيش احنا معندناش بنات اشتغلت قبل كده
فتلاقينى متاخد شوية من الحكاية
محمد.فكر براحتك
وعايز تتأكد ان اختك معانا هتكون احسن بكتير اوووى
هستنى ردك
اشرف وهو بيقوم يقف.خلاص يا استاذ
خير ان شاء الله
اخد رد ابويا
واجيلك اقولك اللى دار
يلا السلام عليكم بقى
محمد بيوصل اشرف للباب.خلاص فى انتظارك
عليكم السلام ورحمة الله
خرج اشرف راح لشغله
ودخل محمد
بلغ مراته باللى حصل
هما فعلا محتاجين مديرة منزل
ورشا مناسبة ليهم
والعرض مناسب للوضع اللى هى عايشة فيه
اما ابو اشرف اول ما شاف فتحى بيركب العربية
قررش انه ميخليش فتحى يشوفه
هو مش عايز فتحى يعرف انه عرف من رشا موضوعه مع ميرفت
علشان ميبقاش مضطر يتكلم معاه فى الموضوع
ورد فعل فتحى
يبقى مش على مزاج ابو رقية
وعلشان كده حاول يفضل بعيد عن فتحى
لحد ما فتحى ركب جنب السواق
واتدارى ابو اشرف بين الركاب لحد ما طلع العربية من غير ما فتحى ياخد باله
وفعلا فتحى كان فى دنيا تانية
وهو عمال يفكر فى اللى حصل معاه
وبرغم عن كده هو مش حاسس ان اللى بيحصل فيه ده تخليص حقوق منه
ولسه حسابه يوم ما يقابل ربنا
اما ابو اشرف
كان شاغل باله برشا وهروبها
وبيتمنى انه فعلا يلاقيها عند اخوها
والا هتبقى فضيحة
الباب عند رقية بيخبط
صحيت رقية من النوم بكسل
بس كانت حاسة لاول مرة انها نامت فى المكان ده وهى مرتاحة
لاول مرة تنام وهى مش حاسة بنفس ولا ريحة فتحى فى الاوضة
اتحركت فى اوضتها وكأنها فراشة بتطير
كانت حاسة انها خفيفة اوى
برغم الكسل اللى كانت حاسة بيه
فتحت الباب
علشان تلاقى قدامها
خضرة
خضرة.نوم الهنا
ازيك ياحبيبتى
رقية بتركيز.الله يهنيكي
يسلم زيك يا خالتى
خضرة.انتى مش فاكرانى ولا ايه
انا خالتك خضرة
جارتك هنا فى البيت
كنت هنا مع باتعة والجماعة امبارح لما كنتى عيانة
رقية بترحيب.اه اهلا و سهلا
خطوة عزيزة يا خالتى اتفضلي
دخلت خضرة.يزيد فضلك يا حبيبتى
ايه ياختى طمنينى عليكي
عاملة ايه دلوقتى
رقية بترحيب.الحمد لله
زى الفل والله
وراحت ناحية الطباخة
ومسكت كوباية ومليتها عصير
وقدمتها لخضرة
خضرة بتاخد العصير.ياختى حلوة
دايما عامر يا حبيبتى
متاخذنيش بقى جيالك بايدي فاضية
بس كنت رايحة السوق
قولت اما ادخل اشقر عليكي
يمكن تكونى عايزة حاجة
انا عارفة انتى حامل واهلك مش جنبك
مش عايزين نتعبك
رقية بأبتسامة.كتر الف خيرك يا خالتى
انتى نورتيني والله
وبعدين انا فى وسطكم هنا
كأنى وسط اهلى
خضرة.لسانك سكر يا مضروبة
تعالي بقى قوليلى
اقعدى هنا جنبي
خلينى اطمن عليكي
قربت رقية وقعدت جنبها
هى متعرفش ان خضرة من الناس اللى بتحب تقعد على اساس كل حاجة
كانت رقية اصفى بكتير من انها تظن فى الناس
حتى بعد اللى بيحصل معاها
خضرة سحبت رقية قعدتها جنبها.قوليلي بقى
روحتى الاسبتاليا بصحيح
رقية.عند الدكتورة يعنى
اه روحت
الحمد لله
طمنتنا
خضرة.لاء والنبي صحيح
طيب بركة ياختى
وقالتلك العيل حلو كده وكويس
رقية.اه الحمد لله
خضرة.هانت ياختى
كلها اربع شهور يعدوا هوا
وييجى بالسلامة الحلو
ونعمله احلى سبوع هنا فى الحوش
رقية بسعادة.ان شالله تسلمى ياخالتى
يلا ربنا يعديهم على خير
خضرة بفضول.بس البت باتعة طلعت اروبة بصحيح
عرفت ياختى انك فى الشهر الخامس
تقوليش داكتورة
برضه الخبرة بتحكم
الجهل وحش يا ولاد
رقية ببرائة.كتر الف خيرها والله
لو اعرف هى فى انهى اوضة بالظبط
كنت روحت شكرتها
خضرة.يابت احنا هنا كلنا اهل
واحد
لو مش الجار هيبقى للجار
يبقى مين يلحقنا لما نقع
احنا اقرب لبعض هنا من الاهل
بس صحيح هو مش انتى متجوزة باين من عشر تيام ولا تسعة
رقية.اه يا خالتي
خضرة بتمصمص شفايفها.لاحول ولا قوة الا بالله
ربنا يستر على ولايانا
طيب وليه يابتى تفرطي فى نفسك كده
مدام كنتى هتتجوزيه
كنتى صبرتي
رقية بعدم استيعاب.يعني ايه يا خالتي
متأخذنيش مش واخدة بالى
خضرة.يوووه
يابت مش انتى بتقولى حامل فى خمس شهور
وانتى داخلة عروسة بقالك اسبوع
يبقى ازاى بقى حصل المراد ليلة الفرح
اومال الحمل جه منين
ده انتى الناس هتعملك لبانة فى بوئهم
رقية اخيرا استوعبت كلام خضرة
وحسيت فى الوقت ده
انها اتكسفت وعرفت ان خضرت بتلمح بكلام مش كويس فى حقها وحق شرفها
وعلشان كده
فى اللحظة دى
حسيت رقية برعشة فى جسمها
والنور اتقطع فجأة
خضرة.ياااااختى على النور اللى كل شوية يقطع ده
افوتك بعافية
اجيلك وقت تانى ياختى
انا بتلبش م الضلمة
وبصوت كله قوة وثقة
رقية.على فين
مش تستنى ارد على كلامك الاول
شوفى يا ست خضرة
حامل فى يوم او فى سنة
متجوزة امبارح او لسه حتى متجوزتش
حسك عينك
تفتحى كلمة تخص حاجة زى دى
والا هتشوفى مني اللى متحلميش تشوفيه
خضرة بتوتر.يوه انا بس كنت بنصحك
بقولك ان الناس اللى هنا مش بيسيبوا حد فى حاله
رقية بصوت واثق للمرة التانية.مالكيش دعوة بغيرك
كل حد هيجيب سيرتي انا هعرف اوقفه عند حده
خليكي فى نفسك
سيرتى متجيش على لسانك لا مع حد ولا بين وبين نفسك
علشان هعرف
وساعتها
متلوميش غير نفسك
خضرة حسيت بالرعب من صوت رقية اللى برغم هدوئه كان فيه نبرة تحذير وتهديد
خوفتها فعلا
رقية.الاوضة دى رجليكي متخطيهاش غير زايرة
لو جاية جايرة يبقى وفري على نفسك
وخليكى لازمة اوضتك
فاهمة يا خالة خضرة
خضرة بتوتر.فاهمة
فاهمة ياختى
قطع لسانى لو اجيب سيرتك
فوتك بعافية
خرجت خضرة بخوف من الاوضة
وهى مش عارفة بتمشى ازاى
لكن كان كل اللى بتفكر فيه انها تخرج من باب الاوضة
وبمجرد ما خرجت
رجعت الكهربا
دهمان.هتفضلي تسكتي عن حقك كده كتير
انا مش هينفعني الكلام ده
يتبع
تكملة الرواية من هنااااااااااااااااا
تعليقات
إرسال تعليق
فضلا اترك تعليق من هنا