رواية ما بعد الأغتصاب الفصل 26-27-28-29-30-31-الاخيربقلم هناء عادل كاملة
رواية ما بعد الأغتصاب الفصل 26-27-28-29-30-31-الاخيربقلم هناء عادل كاملة
ما بعد الأغتصاب
الفصل السادس والعشرون
رقية.ايه ده هو انت اللى كنت بتتكلم
انا مرديتش عليها ولا كلمة
دهمان.لاء مش انا يا رقية
بس انتى لازم تتعلمي تتكلمي
مش هينفع تبقى واقفة قدام اى موقف ساكتة
او بتتعاملى بالسذاجة دى
رقية.طيب اعمل ايه
انا مش بعرف ارد
وبخاف حد يزعل مني
ومكنتش فاهمة انها تقصد حاجة غلط
دهمان.انتى خلاص يا رقية
مش الطفلة الصغيرة
انتى المفروض دخلتى عالم جديد
لازم كل حاجة فيكي تتغير
اه احنا معاكى وحواليكي
لكن لازم انتى كمان تتعلمي
رقية.طيب اعمل ايه
دهمان.تسمعى كل النصايح اللى هتوصلك سواء مني او من اى حد من العشيرة
وتنفذيها
لحد ما تلاقى نفسك مش محتاجة نصايح من كائن فى العالم
وتلاقى نفسك عارفة تردى وتتكلمي وتكوني قد كل موقف تتحطي فيه
رقية.ماشى حاضر
دهمان.انا عايز اقولك على حاجة
اختك هتيجي دلوقتى
رقية.اختى انا
مين فيهم
دهمان.رشا
هى عندها مشكلة مع اهلك
بسببك
اقفى معاها
وساعديها
واقبلوا العرض اللى اتعرض على اشرف اخوكي بخصوصها
على فكرة
اختك هتعيش عيشة مكانتش تحلم بيها
وهتكون لها مكانة كويسة جدا
رقية.انت عرفت منين
دهمان بيضحك وهى ابتسمت مع ضحكته
رقية.ضحكتك حلوة اوى
دهمان.انا شايف ان الخوف مبقاش موجود
وبتتعاملى عادى كأننا جيران
ونسيتى انى عفريت
رقية.مش انت قولت انك مش بتأذى
وبتساعدني كمان
وبعدين انا اتعودت على شكلك
يعنى مبقاش فيه حاجة تخوفني
دهمان.شاطرة
انا فعلا عايز منك متخافيش من حاجة ولا من حد
وخلي بالك فتحى راجع
رقية قلبها اتقبض
دهمان.انتى مش قولتى مش خايفة من العفريت اللى قدامك
ايه هتخافى من فتحى
رقية.بقيت بتقبض لما بسمع اسمه
دهمان.كل حاجة هتتغير
ومع الوقت هتعرفي كل حاجة وصلته لكده
رقية.هما محدش منهم قال حاجة
خبوا عني موضوع امهم
لكن هو قاللى ان ابوه قتلها
دهمان.عايزة تعرفي الحقيقة
قولى لعثمان يحكيهالك
رقية بأندهاش.عثمان مين
عم عثمان جوز خالتي سنية
دهمان.ايوة
قوليله جالى خبر ان انت اللى هتحكيلى كل الحكاية
وبني قيعان بلغونى
هيقولك كل حاجة
رقية.طيب اروحله دلوقتى
دهمان.لاء
هبقى اقولك امتى تروحيله
المهم
خليكي ساندة اختك قصاد ابوكي
وهو هيوافق اكيد على العرض
لكن اقنعي اخوكى كمان
وفتحى عقابه ابتدا
رقية ابتسمت.هتفضل جنبي صح
دهمان بأبتسامة مريحة.انا معاكى كل وقت
متخافيش
رقية.عفريت ايه يا ناس اللى زى القمر ده بس
اختفى دهمان
بس ابتسامته فضلت قدام عنيها
وهى مبسوطة من وجوده
وفى نفس الوقت
خايفة تفوق مرة واحدة وتلاقى ان كل ده حلم
وتصحى منه تلاقى قدامها فتحى
رقية حضرت تاكل
وقعدت لواحدها تفطر
وشغلت الراديو على اذاعة القرأن
وولعت بخور فى الاوضة
وكانت حاسة براحة غريبة
خبط الباب
وقامت رقية تفتح
وهى عارفة ان رشا هى اللى على الباب
وفعلا كانت رشا
رقية بترحيب.يادي النور يادي النور
الست رشا بحالها منورة اسكندرية
حضنتها رشا بأبتسامة وحب.شوفتى بقى
ايه رأيك فى المفاجأة دى
رقية سحبتها دخلتها البيت وقفلت الباب
وحضنتها مرة تانية
رشا.خمسة عليكي
وشك النهاردة احسن من يوم السبوع
رقية.ايه يابت جاية تقري عليا ولا ايه
رشا طلعت من حضنها
وراحت قعدت على الكنبة.بقى انا برضه هقر عليكي
اخص على اصلك
رقية قربت وقعدت جنبها.بهزر معاكي يابت
رشا.اومال جوزك فين
عيني باردة عليكم
شكله مراضيكي
رقية.يااااختى
ليه السيرة دى
ده هو بايت برة
يمكن علشان كده تلاقى وشى منور
هههههه
رشا بتضحك على كلام اختها.بقيتى ولية يابت وبتعرفى تردي
رقية.والنبى صحيح
ده كلامك لواحدك
فيه ناس تانية شايفة انى عبيطة ومش بعرف اتكلم
رشا.مين دول ياختى وانا اكل رقبتهم
رقية.لالا بعد الشر
دول بيهزروا بس
جيرانى يابت
بس سيبك بقى من كل ده
انتى جيتى امتى
وفى ايه عندكم خلاكي تيجي
رشا بصيت لرقية بأستغراب.وانتى عرفتى منين ان عندنا حاجة
رقية ارتبكت.ايه ده هو بصحيح فيه حاجة ولا ايه
انا بقولها كده
بس استغربت انكم لسه راجعين البلد والنهاردة ترجعوا
رشا.لاء انا لواحدى اللى رجعت
رقية.ليه طيب
فيه حاجة ولا ايه
اشرف فيه حاجة
رشا.لاء يابت كله كويس
انا بس قولت اعمل زيك
اجى اقعد مع اشرف
واخدمه بدل ما هو قاعد براسه كده
اهو اخدمه واخد بحسه
رقية بتضحك.عندك حق ياختى
جدعة اهو نبقى ونس لبعض كده
وتبقى جنبي
علشان مبقاش لواحدى
رشا باستغراب.تبقى لواحدك ليه
وجوزك فين
رقية.ايه
ها
اه ما انتى عارفة هو علطول فى شغله
يا سهران مع اصحابه
بييجى على النوم
ويصحى يطلع
وانا الحمل تاعبني
رشا فتحت عنيها على اخرها.اييييه
انتى حبلة يابت
رقية.اه ياختي
رشا فرحت وفى نفس الوقت زعلت ان اختها هتخلف عيل من فتحى
وهى عارفة انه خاين ومالهوش امان
رقية.ايه يابت انتى بلمتي كده ليه
ده انا بقولك حبلة هو انا بقولك بسقط بعد الشر
رشا سحبت اختها لحضنها.مبروك يا رقية
يا الف بركة ياحبيبتى
ربنا يكملك على خير
حبيب قلب خالتو
ان شالله ييجى والخير ييجى معاه
رقية.كل الخير ان شاء الله
رشا.بس عرفتي امتى يابت
ولا انتى مرضيتيش تقولى قدام الجماعة
رقية.وهى يعنى دى حاجة هتستخبى
ماهى خالتى فاطمة مرات عمي علي كانت معايا فى المستوصف
وعرفت وعمي علي وسي فتحي عرفوا كمان
رشا.بركة ياحبيبتى الف بركة
فى الوقت ده خبط الباب
رقية قامت تفتح
كان فتحى اللى قدامها
وبرغم ان قلبها اتقبض اول ما عينها وقعت عليه
الا انها حاولت تتماسك
وتتناسى خوفها منه
فتحى دخل من الباب حتى من غير ما يرمي سلام ربنا
واتفاجئ لما شاف رشا قدامه
رشا.اهلا اهلا
ازيك يا جوز اختى
مبروك ما هيجيلك ان شالله
فتحى.ايه يا رشا
انتى لحقتى
مكدبتيش خبر باين عليكي
رقية بتبص لفتحى ورشا وهى مش فاهمة فى ايه
قبل ما رشا ترد
خبط الباب مرة تانية
فتح فتحي الباب
وكان ابو اشرف هو اللى على الباب
فتحى بأستغراب.اه ده انتم عاملينلى مجلس بقى
ابو اشرف غمز لفتحى يسكت
ودخل من غير ما يسلم على رقية
مسك رشا من رقبتها
وعلشان ميديش فرصة لأى حد يتكلم
ابتدا يضربها وهو بيزعق.بقى انتي يابت الكل...
تسيبيلي البيت وتمشى
علشان امك بتشتكي منك
ده انا هكسر عضمك
جريت رقية على اختها
ووقفت حاجز بينها وبين ابوها
وفتحى واقف يتفرج
مش فاهم فى ايه بالظبط
رقية.استهدى بالله يابا بس
هو في ايه
فى ايه يا رشا
ابو اشرف عمال يضرب فى رشا
وهى ساكتة وحتى مش بتطلع صوت
ورقية واقفة بينهم بتحاول تحوش عنها ايديه
وده خلاها تاخد اكتر من ضربة من ايد ابوها
لحد ما فتحى فاق لنفسه
وقرر يفض الموضوع ده
علشان يفهم فى ايه بالظبط
لأن اللى اتضحله ان ابو اشرف مش جاى علشانه هو
واللى فهمه
ان رشا سابت البيت لأبوها وهربت
فتحى.خلاص يا حمايا
استهدى بالله بقى
تعالى بس نطلع نقعد على القهوة
ونتفاهم
بعد ابو اشرف عن رشا
بعد ما حجز فتحى ورقيه بينه وبينها
وخرج مع فتحى
وهو بيزعق لرشا.مش هسيبك
وهقطعلك لسانك فاهمة
خرج ابو اشرف مع فتحى
وفهمت رشا ان ابوها بيحذرها بطريقة غير مباشرة انها متتكلمش مع اختها فى حاجة
وهى فعلا قررت متقولش اى حاجة
بالذات لما عرفت ان اختها حامل
على القهوة
فتحى.فى ايه يا ابو اشرف
مالك داخل بهم طافح كده ليه
ابو اشرف بخبث.البت يا معلم فتحى
جاية من البلد عايزة تقول لأختها على اللى شافته
قولت اخدها بالصوت
علشان تخاف ومتقولش للبت حاجة
فتحى.يعنى البت جت من وراك
ابو اشرف.اه يا معلم
روحت على بيت الولا اشوفها هناك
ملقيتش حد
قولت الحق نفسى واجي على هنا
يمكن تكون لسه متكلمتش
مش عارف بقى رقية عرفت حاجة ولا لاء
فتحى ببجاحة بيحاول يدارى الخيبة اللى وقع نفسه فيها.وهى بتك هتقولها ايه يعنى
ابو اشرف.انك كنت عند ميرفت
بس متشيلش هم انت
انا فى ضهرك
وبتي متقدرش تراجع كلمتي
فتحى.بتك دلوقتى تحت طوعي انا يا ابو اشرف
وبعدين انا لا بعمل حاجة عيب ولا حرام
مراتي وكنت عندها
محدش له عندى حاجة
مش بس كده
ده انا هعيشهم هما الاتنين فى بيت واحد
ماهو انا مش هفضل رايح جاى على البيتين
ابو اشرف فتح بوئه من المفاجأة.هاااااا
فتحى.زى ما سمعت
انا راجل
وكفيل افتح بيتين تلاتة كمان
محدش له عندى حاجة
بتك مش عايزة تعيش يبقى على راحتها
تولد واستلم منها ابني
وبعد كده تروح لحال سبيلها
ولحد الوقت ده مالهاش عندى غير المعروف
لكن انا بقى بعمل ايه
محدش له انه يحاسبني ولا يراجعني
ابو اشرف مصدوم.ميرفت
انت متجوز ميرفت يا معلم فتحى
فتحى ببجاحة مصطنعة.مالها ميرفت
ست الستات
مش عيلة صغيرة اخدها اربيها واعلمها يعنى ايه ست متجوزة
والكلام فى الموضوع ده مقفول
وبتك عارفة وراضية
يعنى متفكرش نفسم عامل معايا جميل
ماشى يا ابو مراتي
ولا تاخدها معاك وانت راجع بلدك
المفاجأة والبجاحة والقلق من طلاق رقية كانوا هما اللى مسيطرين على ابوها
للدرجة اللى كانت مخلياه مش عارف يرد على فتحى
ولا يعلق حتى
فتحى.بقولك ايه دلوقتى بقى
تروح على البيت
وتاخد بتك فى ايدك كده
وتتكل على الله
انا راجع من برة عايز ارتاح شوية
مش ناقص وجع دماغ
وبلاش تعملوا بيتي استراحة
اللى رايح واللى جاى منكم
يعدي يريح فيه
ابو اشرف قام من مكانه من غير ما يقول ولا كلمة
وفعلا راح على اوضة رقية
دخل وهو فى منتهى الهدوء عكس ما خرج
رقية.فى ايه بس يابا
ايه لزوم اللى حصل ده كله
ابو اشرف.مفيش حاجة يابتى
هى اختك مقالتلكيش
رقية.بتحايل عليها من ساعة ما طلعت
بس هى عمالة تعيط
ومش عايزة تقول حاجة
ابو اشرف.ماشى يابتى
يلا يارشا
خلينا نمشى
رشا.لاء مش همشى معاك
ابو اشرف.الراجل راجع بيته عايز يرتاح شوية
تعالي نروح لاخوكي
وهناك نتكلم على راحتنا
رشا بصيت لرقية اللى واقفة ومتأكده ان فيه حاجة هما مش عايزين يقولوها قدامها
ابو اشرف.يلا يا رشا
متخافيش
رشا بثقة.لاء انا مش خايفة
بس همشى
علشان الراجل يرتاح
رقية.امانة عليك يابا ما تضربها
ابو اشرف.ماشى يارقية
خرج وجت رشا تخرج وراه
سحبتها رقية تسلم عليها وتحضنها
رقية.رشا قولى لأشرف اخوكي بتقولك اختك رقية
وافق على اللى ابوك هيوافق عليه
رشا باستغراب.ايه ده اللى يوافق عليه
رقية.قوليله بس كده
وان شاء الله هيفهم
ومتخافيش
الخير كله جاى ان شاء الله
رشا حضنتها اوى.خلى بالك من صحتك ومن اللى فى بطنك
ماشى
رقية بحب.متخافيش عليا
مشيت رشا
طلعت ورا ابوها
وكان فتحى واقف على باب الشارع
بصيتله من فوق لتحت
ومشيت
وابوها مشى وراها
من غير فتحى ما يوجهلهم كلمة واحدة
ومجرد ما مشوا
دخل فتحى البيت عند رقية
رقية حاولت تطمن نفسها
هى عارفة ان ربنا معاها
ودهمان حواليها فى كل مكان
فتحى قعد على السرير وفرد رجليه وهو لابس الجزمة بتاعته
رقية بتلم الحاجة اللى اكلت فيها
علشان تطلع تغسلها
فتحى.رقية
استنى عايزك
سابت رقية اللى فى ايديها
وقربت وقفت قدامه
وهى سامعة صوت همس فى ودنها.متخافيش انا جنبك
رقية بهدوء وابتسامة.نعم
فتحى.انا اتجوزت
رقية.مبروك
فتحى اتغاظ من هدوئها.بقولك انا اتجوزت عليكي
رقية بهدوء.مبروك يا سي فتحى
ماهو انت كانت قايلي انك هتتجوز انت نسيت ولا ايه
فتحى.كنت قايلك
وانتي صدقتى يعني
رقية.طبعا ياسي فتحى
وانت هتكدب عليا ليه
حقك ده وشرع ربنا
فتحى بغيظ.يعنى انتى مش فارق معاكى انى اجيبلك ضرة
رقية.اللى انت شايفه صح
انا ماليش رأى ولا ليا حق اقول على حلال ربنا بلاش
فتحى.ده انتى معندكيش دم
يابت بقولك ضرتك هجيبها تعيش هنا معاكي
رقية بهدوء.اشيلها على راسى يا سى فتحى
بس هو انت ناسى اللى بيحصل فى البيت ده من وقت ما دخلناه
انت عايزه يحصل معاها هى كمان
خاف عليها يا سي فتحى
انفعل فتحى وقام من على السرير وهو بيشتم ويسب
طلع من الاوضة
وسابها لواحدها
وهى حاسة بفرحة غريبة
مفيش ست تحس بيها لما جوزها يبلغها بخبر زى ده
عثمان.يا فتحى
انت يابنى
فتحى بعد ما كان خارج
رجع تانى على صوت عم عثمان.خير يا عم عثمان
عثمان من شباك اوضته.عايزك يابنى
عايز اتكلم معاك
قولتلك وانت طنشتنى
فتحى.حاضر يا عم عثمان
رايح بس لأخواتى
ولما ارجع هجيلك
عثمان لو عرفت تجمعهم وتيجوا كلكم يبقى ياريت يابنى
انا عندى كلام لازم تسمعوه
فتحى باستعجال.ماشى يا عم عثمان بليل هرجعلك
يلا بالاذن
عثمان.اذنك معاك
مشي فتحى وهو حاسس انه مش طايق الدنيا كلها
عثمان بيتكلم مع نفسه وهو باصص للفراغ.ارتاحتى انتى كده
انا بلغته
ولما ييجوا هقولهم
يتبعما بعد الأغتصاب
الفصل السابع والعشرون
وصل ابو اشرف ورشا للبيت
وكان طول الطريق ساكت
واول ما دخلوا البيت
واتقفل الباب
ابو اشرف قعد على كرسى
وفضلت رشا واقفة
وقلقانة ايه اللى ممكن يعمله
ابو اشرف.بتسيبى البيت وتطفشى يا رشا
عايزة تفضحى اختك
وتكسري رقبة اخوكي
رشا بثقة.انا معملتش حاجة غلط
انا جيت لأخويا
ابو اشرف.من غير ما تقوليلي
رشا.يابا انا مش عارفة انت ازاى راضيك اللى عمله فتحى ده فى اختى
بتك
اومال لو بت مراتك
كنت رضيت عليها ايه
ابو اشرف.انتى يابتى مش فاهمة حاجة
فتحى جوز ميرفت
وهى زيها زي اختك
هروح اتخانق معاه
هتطلق البت
وهتبقى ميرفت هى اللى خدت حقها تالت ومتلت
هيجيلنا ايه احنا بقى غير وجع الدماغ
وكلام الناس
البت اللى اتطلقت بعد اسبوع من دخلتها
رشا مصدومة.هو مين اللى جوز مين
ابو اشرف.فتحى يا رشا يابتي جوز ميرفت
اومال انتى فاكرة انا قولت اللى قولته فى البيت ليه
ماهو علشان مخربش على اختك
لكن انا عارف انها مراته
يعنى زيها زى اختك
ويمكن هى حقها مضمون اكتر
رشا.حق ايه اللى مضمون
انت بتقول ايه يابا
ابو اشرف.يابتى
البت رقية لسه عيلة صغيرة
مش فاهمة يعني ايه جواز ولا راجل هي بقيت على ذمته
لكن ميرفت دى ولية ادارجية
عارفة وفاهمة الدنيا
ومش سهلة
يعنى تبلع اختك
واهى خليت واحد زى فتحى اتجوزها
مع ان سمعتها مفيش اشهر منها فى البلد كلها
لكن هى ولية قادرة
هيرضيكي انتى بقى
اختك ترجعلنا بعد اسبوع
وواحدة زى ميرفت دى اللى تبقى قاعدة متستتة
الناس تقول ايه يا رشا يابتى
لما تبقى ميرفت اللى سيرتها على كل لسان هى اللى متجوزة ومتستتة
واختك اللى محدش كان بيسمع صوتها
رجعالنا بعد دخلتها بأسبوع
رشا.متجوزها
انا مش قادرة اصدق
طيب يابا ما هى اختى مسيرها تعرف
ابو اشرف.يابتى حتى لو عرفت
هتقوله اطلق
هيطلقها
لكن انا مش عايز البت تخرب على نفسها بسرعة كده
دى سمعتها وسمعتكم انتى واختك
وبعدين ده شرع ربنا
مش هنحرمه احنا
وبرضه يا رشا علشان متقوليش انى ظالم
هنشوف اختك لما تعرف
هتقول ايه
واللى هى عايزاه نبقى نعمله
رشا.ينتقم منك يافتحى
دى البت عروسة
لسه
وحامل مالهاش الزعل حتى
ابو اشرف باندهاش.حامل
اختك حامل يابت
عرفتي منين
رشا.هى يابا اللى قالتلى
واللى كانت معاها عند الدكتورة مرات اخوه
واخوه
ابو اشرف.شوفتى بقى يابتي
اهى خرجت من بيت ابوها براسها
لو اطلقت هترجع على كتفها عيل
طيب بذمتك يارشا احنا حمل مصاريف عيل صغير
ده احنا بنكمل عشانا نوم يابنتى
عايزانا نظلم روح مالهاش ذنب
كان ابو اشرف مصمم يقنع بنته انه مش مسترخصهم
لكن هو من جواه
عارف انه بيبيع بناته
علشان يعيش من وراهم مرتاح
ويقدر يمسك فلوس
لكن رشا اقتنعت بكلام ابوها
وزعلها على اختها زاد
وقعدت على الكنبة وهى ماسكة رأسها بأيديها
وحاسة بالقهرة من جواها على اللى بيحصل لاختها
وفرحتها اللى اتكسرت
فى بيت جوهرة
عمار.انت بتقول ايه يا فتحي
اتجوزت
ازاى يابن الناس
وامتى
جوهرة حاطة ايديها على خدها ومتنحة لفتحى
فتحى.امبارح يا جوز اختى
جرى ايه يا اخوانا
هو انا عملت حاجة غلط وحرام
انا اتجوزت
حلال ربنا
عمار.يا فتحى ده انت ملحقتش
ده انت عريس
يعنى حتى معندكش حجة تقول بيها زهقت من مراتك
ليه يابنى تعمل كده وتصغرنا
فتحى.شوف يا عمار
انا جيت ابلغكم علشان انتم اهلى
وعلشان اجيب البت اعرفها عليكم
جوهرة.وايه كمان يا ابن قلبي
فتحى.جوهرة انا مش ناقص تقطيم
اهو ياستى اديني بعدت عن الحرام
وبدل الجوازة بقوا جوازتين
انا ياستى راجل حرمجي
وواحدة مش مالية عيني
جوهرة.القول ضايع يا فتحى
القول ضايع
احنا اللى غلطنا
نجاسة البيت طالتك
فتحى.الله يفتح عليكي
القول ضايع
ابقى بلغي بقى انتى اخواتك
وصحيح
الراجل جارنا ده
قاللي اقولكم انه عايزنا
عمار.جاركم مين
فتحى.عم عثمان ده صاحب ابويا
قاللى قول لاخواتك عايز اتكلم معاهم
شوفوا امتى بقى هتيجوا
جوهرة.مراتك عرفت بخبر جوازك
فتحى.اه يا جوهرة عرفت
جوهرة.وعملت ايه الغلبانة
ده انت يا ناقص مراعتش حتى انها شايلة
والزعل وحش على اللى زيها
فتحى.ههههه زعل ايه
دى باركتلى كمان ايه رأيك بقى
جوهرة.ياعيني يابتى
ظلمناكى
هتعمل ايه عيلة غلبانة
اللى بيحصل فيها مش شوية
ماشى يا فتحى
هقول لأخواتك
ونيجى نشوف عم عثمان عايز ايه
فتحى.اجيب ميرفت امتى علشان تتعرفوا عليها
جوهرة.لاء
متجيبهاليش هنا
عايزها تيجى هاتها عند اخوك عند فردوس
لكن انا لاء
فتحى.ماشي يا جوهرة
اللى تشوفيه ياختى
يلا امشى انا بقى
عمار.قليت بينا اوى يا فتحى
فتحى بلا مبالاة.النصيب بقى يا جوز اختى
خرج فتحى
من غير ما حد يسلم عليه
مشى وهو عارف ان بجاحته دى
بيدارى بيها فشله فى كل حاجة
لكن بيكابر انه يعترف انه فاشل
وبيرتكب ذنوب لا حصر لها
مقدرش يرجع على البيت
وراح استلم العربية
وطلع يشتغل
واخر اليوم
راح اشترى بكل الفلوس اللى اشتغل بيها حشي....
وكالعادة راح لأصحابه
سهر معاهم وشرب لحد ما بقى مش شايف قدامه
خلص اشرف شغله
ورجع على البيت وهو شايل اكياس فيها فاكهة واكل
دخل من باب البيت
وشاف ابوه نايم على الكنبة
دخل يجرى يطمن على رشا
احسن يكون ابوه عمل فيها حاجة
لكن ارتاح لما شاف رشا قاعدة جنب الشباك
اشرف.السلام عليكم
رشا بأبتسامة.عليكم السلام ياخويا
حمد الله على السلامة
اشرف بيشاورلها بعنيه على ابوها
رشا.روح غير هدومك
هحضرلك تتعشى
ده اللى حصل لا يتقال ولا يتقرا
اشرف بفضول.فى ايه
رشا.روح بس
علشان اصحي ابوك يحكيلك بقى
اشرف.روحتي لاختك
رشا.اه روحت
المعدول جوزها اتجوز عليها
ميرفت
شوفت الناقص
رايح يبدي الفجل على الياسمين
راجل نتن
اشرف واقف باصصلها ومصدوم
ابو اشرف فتح عنيه.ادخل يابنى غير هدومك
وتعالى نتكلم براحتنا
قرب اشرف على ابوه
وباس راسه.حمدالله على سلامتك يابا
صحيح اللى البت رشا بتقوله ده
ابو اشرف بيقول من مكانه.صحيح يابنى
اشرف قعد على الكرسى وبقى يضرب كف على كف.يا عيني على حظك يا رقية ياختي
دى لسه عروسة
هى لحقت تفرح
ابو اشرف.بقولك ايه يا اشرف
شرع ربنا يابني
الراجل مدام قادر يبقى حقه
مدام مش هيقصر وهيعدل
رشا واقفة على عتبة الاوضة.ويعني هو هيعدل يابا
دى اختك حامل كمان يا اشرف
اشرف بص لاخته بصدمة
رشا.اه وكتاب الله
كسر فرحتها الراجل الناقص الخاين
منه لله
ابو اشرف بانفعال.وبعدين بقى
ما خلصنا يا رشا
هنفضل نعيد ونزيد ليه
اختك كده كده هتعرف
وقولتلك اللى هى هتعوزه
هيتعملها
مش عايز كلام تانى بقى فى الحكاية دى
اشرف بحزن.لو قالت تطلق يابا نطلقوها منه
اختى هى واللى فى بطنها فى رقبتى
لو هوقف حياتى عليهم هما بس
لكن مش هسيبها عايشة معاه غصب عنها
ابو اشرف.نشوف بس هى هتقول ايه لما تعرف
ويحلها الحلال
رشا.بصحيح يا اشرف
دى بتقولك وافق على اللى ابوك هيوافق عليه
اشرف بأستغراب.ده اللى هو ايه
رشا.معرفش هى اللى قالتلى اقولك كده
ابو اشرف.عجيبة يعنى
يا ترى تقصد توافق على ان جوزها اتجوز عليها
بس دى مجابتش سيرة ليا ولا لأختك بالخبر ده
اشرف بتفكير.مش عارف
يا ترى تقصد ايه
دى قاصدة تبعتلى الفكر ولا ايه
يلا انا هقوم اغير هدومي
واجي والصباح رباح ابقى اعدي اطمن عليها
واعرف قصدها ايه
ابو اشرف.حضرى العشا يا بت
تلاقى اخوكى راجع جعان
رشا.حاضر
دخلت رشا تحضر الاكل
واشرف غير هدومه
وقعد ابوهم يشرب سيجارة
واتجمعوا كلهم على الطبلية
اشرف.صحيح يابا بقولك ايه
ابو اشرف وهو بياكل.ايه
اشرف.فيه ناس طلبوا مني ان رشا تشتغل عندهم
رشا بأستعجال.والنبى صحيح
انا هشتغل
ابو اشرف وهو بيبلع الاكل.ناس مين دول
وشافوها فين ولا تشتغل ايه
وبعدين هى اختك دى تعرف تشتغل ايه
رشا.اى حاجة اشتغل اى حاجة
اشرف.الناس دى اصحاب البيت اللى احنا فيه ده
ساكنين تحت فى الدور التانى
راجل محترم ومراته
راجعين من بلاد برة
وهيشتغلوا فى مصر
وييجوا هنا فى الاجازات
ابو اشرف عنيه لمعت.من بلاد برة
واصحاب البيت
دول اغنيا بقى
اشرف.عايزين رشا تشتغل عندهم فى البيت
ابو اشرف.شغالة
اشرف.الراجل قاللى مديرة منزل
اصل هو ومراته هيبقوا طول اليوم برة
وعايزين حد يقوم بكل طلبات البيت
ابو اشرف لهفة.طيب وهيدفعوا كام
ضحكت رشا
هى واثقة ان ابوها كده كده اول اهتمامته الفلوس
اشرف.انت راضى يعنى يابا انها تشتغل فى البيوت وتسافر
ابو اشرف.يابنى انت مش بتقول ناس محترمين
وراجعين من بلاد برة
يبقى نقول لاء ليه بس
المهم يدفعوا كويس
اه انا هسيبلهم بتي فى بلد غريبة
رشا بأنكسار من سهولة موافقة ابوها
وبفرحة من انها اخيرا هتطلع من كل اللى كانت بتتمنى تطلع منه.الهى يكرمك يا اشرف يا ابن نبوية
اوعى تقول لاء
علشان ربنا وافق
سكتت لحظة
ورجعت تكمل بلهفة.يابت يا اروبة
يبقى هو ده اللى رقية كان قصدها عليه
انك توافق على اللى ابويا هيوافق عليه
شوفت بقى
يعنى رقية كمان راضية
اشرف باستغراب.طيب وهى رقية هتعرف منين
رشا بسعادة.وانا اعرف منين مين اللى قالها
بس مش يمكن جيرانك دول يعرفوا جوز اختك
وهما اللى قالوله
وهو قالها
اشرف.ممكن برضه
بس انتى يعنى يا رشا
حمل انك تشتغلى فى بيت
ياختى انا مش عايزك تتمرمطي
مع ان الناس محترمين
والراجل قاللى انهم هيعلموكي كمان
مش هتبقى شغالة فى البيت وبس
قامت رشا بفرحة اتنططت وهى متحمسة جدا
وبتتحايل على اشرف يوافق
ابو اشرف.وافق يابنى
انت يعنى تكره الخير لأختك
اهو جربنا نجوز واحدة
اديك شايف جوزها مستحملهاش اسبوع
خليها دى تجرب نفسها فى الشغل
يمكن تفلح
اشرف.انا بس صعبان عليا تتشحطط
رشا.لالا انا هجرب بس
والله لو تعبت ولا مرتحتش
هقولكم
ورجعونى
ابو اشرف.اهو شوفت
هى اختك لو حسيت انها مش واخدة راحتها
مش هتكمل معاهم ليلتين
على بركة الله
المهم بس اتفق معاهم على الفلوس
ولا خلي الراجل يقابلني وانا اتفق معاه بقى
اشرف بخضوع لرغبة اخته.انا هوافق علشان انتى راضية يا رشا
جربي ياختي
لكن انا من جوايا مش عايز امرمطك
لو على الفلوس نمشي على قد لحافنا
واقعدى هنا معايا ناخد بحس بعض
رشا.يا اشرف انا مش على الفلوس بس
انا عايزة اطلع من البلد
عايزة اشوف نفسى هنفع فى حاجة ولا اخرتى برضه ابقى زى رقية
مرمية فى اوضة
ومستنية جوزى يدخل عليا بواحدة تانية
خلينى اجرب يا اشرف
احنا ياخويا غلابة
ومش هتلاقى عريس عدل يخبط على بابنا
واهو فتحى اللى كلكم كنتم طايرين بيه
كسر قلب اختك
استقل بينا
يمكن الناس دول يطلعوا بصحيح ولاد حلال
يشغلونى ويعلمونى
وابقى حاجة ابهة
ابو اشرف.كلام اختك مظبوط يا اشرف
اشرف.ماشى
الصبح ان شاء الله ابقى اعدي عليهم وانا نازل
واقوله الرد
ابو اشرف.هبقى انزل معاك
علشان نتفق على المهية بقى
اشرف بيبص لاخته اللى بتبص لأبوها من تحت لتحت بنظرة استحقار.ربنا كريم يابا
خلصوا عشا
ونامت رشا بتحلم بانها هتسافر وتشتغل وتبقى واحدة تانية خالص غير رشا اللى لازم تستسلم لكل بيعة وشروة تيجي لأبوها
اشرف فرش على الارض ونام جنب الكنبة اللى ابوه نام عليها
وابو اشرف بيفكر فى يطلب مهية كام تمن رشا بنته
يمكن ياخد فيها تمن اكبر من اللى اخده فى رقية
فى بيت فتحى ورقية
كانت نايمة على سريرها
بعد ما اتعشيت
لانها حاسه انها بتجوع كتير
وده اكيد بسبب الحمل
واثناء نومها
هى سامعه همس فى ودانها بنصايح كتير
وكأنها بتتعلم ترد ازاى
وتتعامل مع فتحى ازاى وتواجه كل اللى هتقابله ازاى
وبرغم انها قاعدة لواحدها
والليل دخل
وصوت الهمس فى ودانها
الا انها مرتاحة ومش حاسة بخوف
علي.ايوة ياخليل
انا اتصلت بيك الصبح وانت مرديتش عليا
خليل.معلش يا علي
انا ببقى نايم بالنهار
انت عارف الشغل
علي.طيب يا خليل
احنا وقعنا فى مشكلة كبيرة
ولازم نبقى مع بعض
علشان نشوف حل
خليل.بيت فتحى يا علي
صح
علي بخجل.صح يا خليل
كان عندك حق ياخويا
ياريتنى سمعت كلامك
خليل.هتفيد بأيه ياريت
علي.انا كابرت اسمع كلام اخويا الصغير
خليل.اللى حصل بقى يا علي
العايط فى الفايت نقصان عقل
علي.طيب ايه يا خليل هتقدر تيجي ولا مش هينفع
دى جوهرة اكدت عليا
اقنعك ترجع
خايفة يحصل فى فتحى
زى ما حصل زمان
خليل.هاجي يا علي حاضر
ماهو مش هيبقى اخويا واقع فى ورطة
وانا قاعد بعيد
علي.ده العشم ياخويا
خليل.بس بقولك ايه ياعلي....
تيت تيت تيت
قطع الخط
علي.اطلبلي مدة تانية يا سيدي
موظف السنترال.الخطوط وقفت يا استاذ
معلش ممكن ساعة كده وترجع نكون شوفنا العطل منين
علي.ساعة
لاء على ايه بقى
وانا هقدر ارجع تانى
الصباح رباح
شوف حسبك كام
حاسب علي على المكالمة وخرج
من غير ما يعرف خليل كان عايز يقوله ايه
يتبع
ما بعد الأغتصاب
الفصل الثامن والعشرون
الوقت اتأخر
ورجع علي لبيته
علي.السلام عليكم
فاطمة.عليكم السلام ورحمة الله
علي.البنات رجعوا
فاطمة.لاء جوهرة اختك كلمتنى
وقالتلى اسيبهم والصبح هتيجي بيهم
علي.ومجاتش ليه النهاردة
وانتى ليه مروحتيش خدتيهم
فاطمة.علشان سناء اخت عمار راحتلها الصبح
وقعدت معاها لبعد العصر
ولما قولتلها اجى اخدهم
قالتلى لاء خليهم هاجى بحجتهم
علشان العيال ميمسكوش فيا
واعرف اهرب منهم
علي.ماشى يا فاطمة
فاطمة.احضرلك تتعشى
علي.اه ياريت
انتى صحتك عاملة ايه النهاردة
فاطمة.الحمد لله كويسة
دخلت فاطمة تحضر العشا
ودخل على ياخد دش ويغير هدومه
وقعدوا سوا يتعشوا
من غير ما يفتحوا كلام
رجع فتحى متأخر اوى
وكان كعادته داخل مش شايف قدامه
وقف قدام باب البيت بتاع عم عثمان
حط ودنه على الباب علشان يسمع هما صاحيين ولا لاء
علشان يشوف عثمان كان عايز ايه منه
لكن كان مفيش صوت
وده خلاه يدخل على اوضته
فتح بمفتاحه
وكانت رقية نايمة فى منتهى الهدوء
فتحى.اتخمدى من يوم ما شوفتك مشوفتش خير
داهيه تاخدك انتى واللى فى بطنك
بعد الكلمة دى
حس فتحى ان جسمه كله كأنه بيدخل جواه ابر
بقى يصرخ من الوجع
وهو مش عارف في ايه
صحيت بسرعة رقية على صوته مفزوعة
جريت من على السرير ناحيته
لكن هو كان بيصرخ للدرجة اللى خليت كل عروق وشه تتشد
وعنيه الحمرا من كتر الشرب
جحظت وكأنها هتخرج من وشه
رقية واقفة بصاله ومش عارفة تعمل ايه علشان تساعده
وهو عمال يصرخ من الألم
رقية بتمد ايديها ناحيته
حسيت ان فى ايد منعتها
ومنعت ايديها انها توصله
فهمت رقية ان اللى بيحصل لفتحى فى الوقت ده
هو بداية عقابه اللى دهمان قال عليها
رقية بصوت هامس.كفايا
خلاص سيبه
هيموت
كفايا
فى اللحظة دى حسيت رقية ان ايديها اتحررت
وقبل ماتمدها مرة تانية تساعد فتحى
كان الالم ابتدا يهدا
ووجعه قل بالتدريج
وده بان على ملامحه وصوته
ونفسه اللى كان بياخده بصعوبة
رقية.سلامتك ياسي فتحى
فتحى حاسس انه متخدر
اعصابه خانته
وقع على الارض
قعد على ركبه
ودموعه نزلت
رقية برغم انها مش طايقة تشوفه قدامها
لكن صعب عليها
قعدت قصاده على الارض
ومديت ايديه على ركبته
تطبطب عليه بأيديها الصغيرة
فتحى رفع عنيه وبصلها وباين فى نظرته الضعف
رقية.معلش هتبقى كويس
فتحى.انتى السبب فى اللى بيحصلى ده
رقية.انا السبب ليه
ولو انا السبب بصحيح
حقك عليا يا سي فتحى
قوم بس ارتاح دلوقتى
والنهار له عنين
فتحى.انا لا كنت عايز اتجوز
ولا كنت عايز اجي اعيش هنا
مش عارف ايه رماكى فى سكتي
انتى اللى جيبتينى للمكان ده مرة تانية
وكأن المكان هو اللى كان عايزك
رقية.مالهوش لازمة ياسي فتحى فى الكلام فى اللى حصل
خلاص
احنا دلوقتى هنا
واللى مكتوب ليا وليك هنشوفه
فتحى.معرفش انى هتأذى
ومعرفش انك كان ممكن تتأذى
او يمكن كنت عارف
وعايز ده يحصل
ويمكن كنت عايز اثبت لنفسي ان اللى فات مات
واتنسى
او يمكن كنت عندى امل توصلينى ليها
رقية بأستغراب.هى مين دى يا سى فتحى
انت واعي بتقول ايه
قوم ارتاح ياخويا
انت مش فى وعيك
فتحى بص لرقية.سابتنى بدري اوى يارقية
سابتنى وانا مشبعتش من حنيتها
كان نفسى تحضني بس
ولا تطبطب عليا
رقية فهمت ان فتحى يقصد امه
وسكتت علشان تخليه يطلع كل اللى جواه
فتحى بدموع.مش ناسى المنظر اللى شوفته
انا اللى دخلت شوفتها يا رقية
انا اللى اختفيت من قدام عيني فى لحظة
انا اللى شوفت ابويا بيطلع فى الروح
وهو فى مكانه متحركش خطوة
سمعت صوتها وهى بتقوله
انت السبب
انت ظلمتنى وظلمت عيالي
مش عارف الدخان اللى خرج مرة واحدة وملى الاوضة كان جاى منين
كأن حريقة قامت فجأة
وخارج من الاوضة دخان النار بتاعتها
بعد ما اطفيت
مشوفتهاش تانى
مش عارف هو بجد كان فيه حريقة وهى ولعت فيها
ولا انا كان بيتهيألى
ولا هى هربت فى وسط عتمة الدخان
مكنتش عارف
ببص لأبويا
لقيته بيعيط
اعصابه مشالتهوش
وقع على الارض
باصص مكان ما هى كانت موجودة
ساكت
دموعه بس نازلة
وانا مش عارف اسأله
انت السبب فى ايه يابا
امى راحت فين
اذيتها فى ايه
محسيتش بالدنيا
غير لما عمتى دخلت هى واخواتى
كانت جاية توصلهم
ولقيتها بتقول لأبويا
خلاص غورتها فى داهية
الخاينة النجسة
حلال فيها الدبح
غسلت عارك
يا راجل
بص ابويا لعمتى
وعنيه على خليل اخويا
كان عايز يقول حاجة ملحقش يقولها
وفى نفس الوقت
ابويا غمض عنيه ومفتحهاش تانى
غمضها ودموعه منشفتش
امى وابويا
خلص عمرهم هنا
فى الاوضة دى
مع صرخة اختى جوهرة
ولمة الناس
مسمعتش غير صوت عمتى وهى بتقول
قتلها الخاينة بتاعت الرجالة
قتلها بعد ما عرف ان الواد مش ابنه
زاد الدخان فى الاوضة
محدش قدر يستنى فيها
محدش قدر يتنفس
كلهم طلعوا برة
واحنا معاهم
واقفين نعيط
ابونا مات
وامنا خاينة
واتقتلت
كل اللى كانوا واقفين كانوا بيوشوشوا بعض
وانا كنت فى دنيا تانية
امى
دى كانت ملاك على الارض
كانت مش بتسيب فرض
امي انا خاينة
امى انا مخلفة اخويا من راجل غير ابويا
يعني ايه
وامتى وايه اللى حصل
فوقني صوت عربية الاسعاف
لما دخلوا ومعاهم المطافى علشان يخلصونا من الدخان
اللى كانت الناس فاكراه بسبب ان ابويا ولع فى امى
دخلوا ملقوش حريقة
مفيش نار يا رقية
ومفيش امي
ومفيش غير جثة ابويا
أختفيت امي
عارفة يعنى ايه اختفيت
ابويا مات قدام عنينا
وامى اللى كانت لسه بتتكلم من دقايق
مالهاش اثر
ومن يومها اللى اتقال ان ابويا ولع فى امى
واتقهر من الفضيحة معاهم
اتقال ماتت محروقة وجتتها ساحت
طلعوا كل حاجة تتقال ومتتقالش
على الاوضة
اتعفرتت
روح ابويا وامي بتطلع فيها
صوت صوات طالع من الاوضة بليل
عيشنا عند عمتي
سنين
لحد ما علي اشتغل
وجوهرة جالها عمار
وفى الوقت ده راحت عاشت هى فى بيت امى المقفول
اختى فردوس واخويا علي
قالوا بدل قفلته وجوزها معندهوش بيت
وهيقعد مع امه يبقى تعيش فى البيت احسن
اهو يبقى بيتها
على جهز اخواتى واتجوزوا
وانا جوهرة خدتنى معاها
وخليل كان مع فردوس
كل واحدة فيهم كانت فى حنية امي
كانت ام مش اخت
لكن عمتى وكلامها عن امي وانها مخلفة خليل اخويا من الحرام
كنت بفهمه كل ما بكبر يوم
كبرت وانا عارف ان حتى الملاك مالهاش امان
امى اللى كانت تاج على راسى
طلعت زانية
اخواتى كانوا علطول يقولوا اوعى تصدق على امك كده
وان امى روحها طاهرة
علشان كده منزلتش تحت التراب
لكن ازاى
ازاى هى مش خاينة
ازاى عمتى تكون بتكدب
ازاى كانت بتقوى ابويا على انه ياخد حق شرفه وعرضه منها
عمتي منين هتجيب الكلام ده يا رقية
ليه هتقوله لو محصلش
ليه
شوفى كل ده واجعنى وشايله فى قلبى
بوظني
معيشني عمرى كله حاسس انى عايش بفضيحة
بس برضه انا محتاج لحضنها
وحنيتها
وصوتها فى ودني
ببين انى بكرهها
لما كانت تيجي سيرتها
وابين لعمتى اني مصدق ان امي خاينة وزانية
لكن من جوايا
بتمنى لو ترجع ثانية بس
كنت لما ببقى مع اى ست
بحس انها امى وهى بتمرمغ شرفنا فى الوحل
وده كان بيخلينى انتقم منهم
العب بيهم وارميهم
اتمتع بعذابهم
حتى انتى يارقية
مع انى عارف انك شريفة
لكن شوفت فيكي امي
شوفت انتى ممكن ترسمي عليا الشرف
وانتى زيك زيها
فى الاخر هتطلعي خاينة
فى الاخر هتسلمي لراجل تانى
علشان كده كسرتك
ذليتك
انا مش عارف احس بندم
مش عارف احس ان عندى قلب
مش عارفة انسى انها ممكن تكون خاينة
ومن جوايا مصدق ان الملاك اللى كانت عايشة معانا دى عمرها ما تعمل اللى بيتقال عنها
انا تعبااااااااااان اوى
تعبان
بكره نفسي
وبكرهك
وبكرهها هى كمان
بكره كل حاجة فى حياتى
فتحى قال كل الكلام ده حتى من غير ما يقطع كلامه للحظة
قاله وكأنه كان مسجله على شريط
وشغله
وملقاش نفسه غير بيرمى جسمه على الارض
وبيحط رأسه على رجل رقية
اللى كانت قاعدة مصدومة من اللى سمعته
ومن كل الكلام اللى شايله فتحى جواه
ومع كرهها له
صعب عليها
فتحى اللى حط راسه على رجليها
غمض عنيها ودموعه نازلة
وراح فى النوم
فضلت قاعدة رقية
مش عارفة تصحيه
ولا تسيبه نايم
ولا المفروض تعمل ايه
فضلت قاعدة على الارض شوية
وهى بتراجع كل حرف قاله
وبعد ما حسيت بقلبها اتعاطف معاه
افتكرت قسوته عليها
واهاناته اللى مبتخلصش
تقليله منها ومن اهلها
جوازه من واحدة تانية وهى عروسة اسبوع
وكأن عقلها رفض تعاطف قلبها
وده خلاها تسحب نفسها ببطئ
وتقوم وهى بتحط راسه على الارض
جابتله مخدة من على السرير
حطيتها تحت راسه
وطلعت نامت على سريرها
وغمضت عنيها براحة
وكأنها اخيرا عرفت ان عقدته هى سبب الاذى اللى بيأذيه لها ولغيرها
راحت عنيها فى النوم
وكان دهمان قصاد عنيها فى الحلم طول الليل
وجوده بس فى الحلم
نساها اى حاجة كانت جواها
سواء زعل او كره
او ندم
وبرغم انها غرقانة فى النوم
لكن كان من جواها حاسة ان وجوده معاها وجنبها مش حلم
بالعكس ده حقيقة
وعقلها بيقول العفريت طلع احن عليكي من البني ادمين
فاتت الليلة على كل بيت من بيوت ابطال الحكاية
وهو فيه افكار كتير شاغلاهم
حاجات كتير خايفين منها
وحاجات كتير مش عايزين يفتكروها
وحاجات كتير
مستنيينها
طلع النهار
ونبوية وبسمة فى بيتهم
قلبهم واكلهم على رشا
ميرفت فى بيتها
حاسة ان اخيرا جه الوقت اللى تقعد وترتاح من الشقا والشغل
وده خلاها تستنى فتحى
ومتطلعش من البيت
فى بيت جوهرة
خرج عمار على شغله
وعيالها على مدارسهم
واخدت بنات علي
وخرجت رايحة لفاطمة
فردوس صحيت من نومها
غيرت هدومها واستأذنت من جوزها اخد عياله قبل الشغل
وصلهم عند عمتهم
وراحت هى كمان على بيت علي
اشرف صحى من نومه
وابوه كمان صحى
كانت رشا صاحية من قبلهم
ومحضرالهم الفطار متحمسة انهم يقابلوا الناس اللى هتشتغل عندهم ويتفقوا معاهم
تسريعا للأحداث
فعلا فطروا سوا
ونزل اشرف وابوه واتفقوا مع محمد وسارة على كل حاجة تخص عيشة رشا في بيتهم
وكان ابو رشا فرحان ان الرقم اللى محمد هيدفعه اكتر من اللى كان هو بيفكر فيه
وتم الاتفاق على ان السفر خلال ايام
ودفع محمد شهر اجرة شغل رشا مقدم
وده كان مخلى ابوها طاير من الفرحة
اشرف.هتوكل على الله يابا
هروح ابص على رقية واروح اشوف شغلي
ابو اشرف.بلاش يابنى
اشرف بأستغراب.ليه بس يابا
ابو اشرف.هتلاقى فتحى هناك
هو قاللى انه مريح فى البيت يومين
بالمحسوس كده وصلنى انه مش عايز حد يروح اليومين اللى قاعدهم فى البيت
اشرف.ماشى يابا انا مش رايح اتضايف
انا قولت بس اطمن عليها وعلى حالها بعد اللى حصل
ابو اشرف.ماشى يابني
نبقى نروح نشقر عليها
بعد ما ينزل هو شغله
خلينا احنا منبقاش سبب فى خراب بيتها لو هى ناوية تعمر
اشرف بأستسلام.ماشى يابا
هتوكل على الله
ابو اشرف.وانا كمان هاخد اختك ونرجع على البلد
تلاقى امك قلبها قايد
اروح اطمنها وافرحها بحكاية الشغل دى
اشرف سلم على ابوه
ومشى على شغله
فى بيت علي
جوهرة.اقعدى يا فاطمة
عايزاكى فى كلمتين مهمين
فاطمة.هعملك كوباية شاى بلبن
نفطر سوا
جوهرة.لاء تعالي بس
العيال انا مفطراهم قبل ما نيجي
نخلص كلامنا
وبعدين نفطر
قوليلى جوزك نزل
فاطمة.ايوة ياجوهرة نزل
جوهرة.طيب اقعدى بقى خلينا نتكلم على رواقة
قعدت فاطمة قصادها وباين على ملامحها الزعل
جوهرة.بقى فيه واحدة لسه عارفة انها حامل
تبقى مبوزة كده
فاطمة.بصى ياجوهرة
اكيد اخوكي قالك اللى حصل
انا ياختى مش باردة ولا انا فضولية بحب اطلع على خصوصيات الناس
بس انا اتصدمت لما لقيت فى حياة عيلة بناتي اسرار كبيرة اوى كده
ومطلعتش اسرار غير عني انا بس
جوهرة بتحرك رأسها يمين وشمال وهى بتضرب كف على كف.لاحول ولا قوة الا بالله
انتى عايزة تعرفي ايه يعنى يا فاطمة
فاطمة.ولا حاجة ياجوهرة
لا اعرف ولا معرفش
جوهرة.يافاطمة ياحبيبتى
اللى حصل
ميتقالش
ولا يتصدق
ولا احنا عارفين ايه اللى حصل علشان نتكلم فيه
فاطمة بانفعال.يعنى ايه يعنى
مش عارفين امكم اتقتلت ازاى
مين قتلها
اتقتلت ليه
جدة عيالى
معرفش عنها حاجة غير بالصدفة
قتل يا جوهرة
قتل
ليه ياختى
وانتم رايحين تدخلوا المكان اللى الست اتقتلت فيه مرة تانية
وتعيشوا البت الغلبانة فى بيت مسكون
جوهرة.تصدقى بأيه يا فاطمة يامرات اخويا
وحياة اللى بطنك واللى لسه ميعرفلهوش رب
احنا يابنتى ما نعرف ايه اللى حصل
احنا من كتر ما كان الكلام اللى بنسمعه مالهوش اى حاجة تثبته
مكناش عارفين نصدقه ولا نكدبه
كنا بنسمع زينا زى الناس
عمتى قالت كتير
واللى اتقال ميتصدقش
ولو عرفتي امي كنتى انتى ياللى مش جاية من على قلبها مستحيل تصدقيه
لكن اقنعنا نفسنا انه صح
علشان بس يكون فيه حاجة نصدقها
يكون فيه حاجة نقول اننا عارفين بيها اللى جرى
لكن اقولك امى اتقتلت
مشوفنهاش
منعرفش اتقتلت ازاى
ماتت ازاى
مدبوحة
هنلاقى دم
محروقة هنلاقى جلدها سايح على ارضية البيت
طفشت
محصلش
هجت مع راجل
محصلش ولا اتقال ولا يتصدق
ليه عمتى قالت اللى قالته
العلم عند ربنا
عايزانا نقول ايه
ونحكي ايه
ونتكلم فى ايه
لما امى اختفيت من حياتنا
واحنا منعرفش هى فين ولا جرالها ايه
ابويا مات قصاد عنينا مشلول ولسانه اتعقد
من غير سابق انذار
واحنا لا نعرف اللى حصل ولا اللى شافه
يخليه يحصل فيه كده
اوعي تلومي جوزك يا فاطمة
جوزك عاش عمره كله
بيتمنى بس يعرف ايه اللى حصل فى امه
وايه اللى جرالها
يوم ما كانت تجيلنا فى منام
تطبطب علينا وتمشى
حتى محلمناش باللى حصل
محكيتش حاجة حتى لو كدب وكانت فى الحلم كنا هنصدق اللى بتقوله
لكن هى راحت
وابويا مات
وسرهم معاهم
وعيشنا احنا طول عمرنا
بوجع الكلام اللى عمتى مليت دماغنا بيه
فاطمة.يعني انتى جوزك ميعرفش
جوهرة.جوزى يعرف اللى انا بحكيهولك دلوقتى
جوزى ياختى سأل عني وعن اهلى لما جه طلبنى
وسمع الكلام اللى كان بيتقال ساعتها
كان لازم نرد عليه
ونحكيله اللى حصل
علشان هبقى شايلة اسمه
وهو حر يكمل او لاء
علشان كده
كان لازم يعرف
ولو مسألش انا مكنتش هجيب سيرة يا فاطمة وقتها
مش سهل عليا اقول انا لا عارفة امى عايشة ولا ميتة
خاطية ولا شريفة
طفشت ولا اتقتلت
حطى نفسك مكان جوزك ياختى
ووجع الراجل اضعاف وجع الست يا فاطمة ياحبيبتى
دى حاجة فات عليها سنين طويلة
بلاش تقلبي عليه المواجع
احنا ياختى اللى فينا مكفينا
وانتى عرفتي وشوفتى بعنيكي
اللى حاصل فى بيت فتحى ومراته
نسيب بقى احنا المصيبة اللى عنده
ونتكلم فى اللى فات
ولا نشوف ايه فى ايدينا يتعمل علشان نساعدهم يطلعوا من هناك على خير
فاطمة بأحراج.ماشى يا جوهرة
انا غلطانة
صح مش وقت الكلام اللى قولته
جوهرة.احنا دلوقتى هنتقابل انا وفردوس ونروح نطمن على البت اللى قاعدة بروحها دى
وعلي هيجيلنا على هناك
فاطمة.عايزانى اجي معاكم
جوهرة.خليكي انتى مع العيال
وكمان انتى بطنك مليانة مش حمل مواصلات ومطبات بقى
فاطمة.ماشى يا جوهرة
اقوم بقى اعملنا كوبايتين شاى
ريقك نشف من الكلام
جوهرة بأبتسامة.ماشى يا حبيبتى
تسلم ايديكي
فعلا قامت فاطمة تعمل الشاى
وقعدت جوهرة
تمسح عنيها اللى كانت مدمعة ومانعة دموعها تنزل
علشان تفضل باينة قوية
ومتضعفش وهى بتتكلم فى حاجات بتتمنى انها تبقى مجرد كابوس
يتبع
ما بعد الأغتصاب
الفصل التاسع والعشرون
صحى فتحي من نومه
بص حواليه استغرب انه على الارض
ونايم بهدومه
كانت رقية نايمة على السرير مش حاسة بالدنيا
فتحى بتوجع من نومته على الارض
سمعت رقية صوته
لكن قررت تكمل نوم
هى مش عايزة تتعامل معاه
عارفة انه بحالات
فتحى وهو على الارض.وبعدين بقى الواحد بقى مش عارف راسه من رجليه
بيبص على رقية
مستنى منها تكون سمعته وترد عليه
لكن هى كملت نومها
برغم انها سمعاه
قام فتحى بكسل من على الارض
واتحرك ناحية الطباخة
دور على حاجة ياكلها
وفعلا اكل وهو واقف على الطباخة
كان حاسس بجوع رهيب
وكان كعادته ناسى الكلام اللى حصل منه بليل
ومش فاكر اى حاجة غير انه لما شتم على رقية
حس بشوك فى كل جسمه
فتحى بصوت مسموع.ما صحيح فلاحة مالكيش غير فى الاعمال والاسحار
انتى تلاقيكي عملالك تحويطة يابت بياع الخضار انتي
ابتسمت رقية على كلامه
وعلى تفكيره وسوء ظنه فيها
دهمان بهمس.سمعت قال ايه عنك
ده اللى قلقتى عليه بليل
رقية اكتفيت بأبتسامة
فتحى دماغى هتفرقع من الصداع
مد ايديه طلع حتة حشي...
وبص لها اوى بتمعن.طيب ايه اشربك دلوقتى
ولا اخليكي لبليل
ماهو انا مش هروح اشتري تانى بقى
لالا خليكي انتى لبليل
واطلع الاجزخانة اجيب برشام صداع
بص لرقية.يابت اصحى انتى هتفضلي نايمة
ايه عايزانى اعملك الطبيخ بالمرة
سامعاه ومش عايزة تقوم
قلق يكون جرالها حاجة
خلص اكله
واتحرك ناحية السرير
وقف جنبها
وركز معاها
شافها بتتنفس
بصوت مسموع.الحمد لله
يجرالها حاجة تلبسنى اسود
رقية بت يا رقية
قومى اصحى
اخواتى جايين
رقية بتتقلب على السرير
وبتفتح عنيها وهى بتضحك.ينوروا يا سي فتحي
عنيا حاضر انا قايمة اهو
فعلا قامت رقية من السرير
وكلها نشاط غير طبيعي
فتحى.ايه يابت جايبة العافية دى منين
بقى دى عافية واحدة حامل
رقية وهى بتشيل الحصير من على الارض علشان تكنس.بركة ربنا ياسي فتحى
الحمد لله
من حمده زاده
فتحى.عيشي فى دور خضرا الشريفة
رقية سمعت تريقته وابتسمت
وكملت اللى بتعمله
شالت البيت كله وحطته من تانى
مسابتش ركن فيه منضفتهوش
حتى الاكل
وقفت تجهزه
وهو قاعد يتفرج عليها
مش عارف اللى جواه من ناحيتها حقد
كره
حب
حسد
مش قادر يحدد
وهى مش شاغلة بالها بيه
ومش حاسة بأى حاجة
كأنها بتتحرك وهى طايرة
وكأنها مش هى اللى تعبت فى البيت ولا عملت كل اللى اتعمل فيه
خبط الباب
فتحى قام يفتح
جوهرة.سلام عليكم
فتحى.عليكم السلام
ايه النور ده اتفضلوا
جت رقية تجرى
استقبلتهم بأبتسامة جميلة
وبتبوس ايد جوهرة وايد فردوس زى ما اتعودت
فردوس حضنتها وباستها
وجوهرة من بعدها
دخلوا قعدوا
وهما بياخدوا نفسهم من المشوار
ورقية من غير كلام
راحت مليت مياه من القلة
وحطيتها قدامهم
لحد ما تحطلهم حاجة يشربوها
وبتعمل كده والابتسامة مش مفارقاها
فردوس.تعالى يا رقية
تعالي يا حبيبتى ارتاحي
خلينا نباركلك على اللى فى بطنك
رقية بتعمل كركديه.يبارك فيكي يا خالتى
انا جاية اهو
جوهرة.تعالي مالهوش لازمة اللى بتعمليه ده
المياه ساقعه وجميلة
رقية.ده الدنيا بحالها شوية عليكم يا عمتي جوهرة
جوهرة بأبتسامة.البت لسانه بينقط شهد
فتحى قاعد بيفكر فى ميرفت
وهيبقى ايه الحال لو جت قعدت مع رقية فى نفس المكان
فردوس.ندخل لعم عثمان دلوقتى يا فتحى
ولا لما اخوك ييجى
فتحي.لاء هو قاللى اخواتك
يبقى استني علي بقى لما يرجع
جوهرة.كنت قايلاله يكلم خليل ييجي
فتحى بانفعال.وده ييجي يعمل ايه يعنى
ياستى ما تخليه بعيد
اريحله واريحلنا
فردوس بصيت لفتحى بزعل
جوهرة.اخوك يا واطي
ايه اللى ييجي ليه
ياشيخ لو مش علشان يبقى جنبنا فى الوقت ده
علشان نشوفه
وحشنا
عيل قليل الاصل انت صحيح
فتحى.القول ضايع
قدمت رقية الكركديه
وقعدت على الارض قصادهم
وبترحب بيهم
فتحى ببجاحة.شوفوا الولية الباردة
اللى عمالة تضحك
عرفت انى اتجوزت عليها
وبصوا بتضحك ازاى
ولا على بالها
علشان تعرفوا بس انى عايش مع ولية باردة
وليا حق اتجوز
بصيت رقية لفتحى
واتحرجت من شتيمته ليها
جوهرة بأنفعال.لم نفسك يافتحى
رقية محترمة ومتربية
واحدة غيرها كانت فرجت عليك الدنيا
بس انت مفترى
والمؤدبة متنفعكش
بصيت جوهرة لرقية
وهى بتكمل كلامها.انتى يابت يا رقية خسارة فى الواد ده
رقية ابتسمت وسكتت مرديتش
فتحى اتغاظ من استسلامها اكتر
فردوس.يا فتحى انت دماغك يابنى مش مريحاك
لما انت واحدة بس متملاش عينك
ليه مكنتش على نور مع الجماعة من الاول
فتحى ببجاحة.هروح اخد الأذن انى امشى بشرع ربنا ولا ايه
هو انا روحت عملت حاجة غلط
فردوس بانفعال.هو فى ايه يافتحى
انت مبتكبرش لحد ليه يا جدع انت
كل اللى يتكلم تدخل فى صدره كده
رقية بهدوء.يا عمتى حصل خير
بالراحة بس
ربنا يصلح الاحوال
جوهرة بتبص لرقية.ايه يابت الهدوء ده
يخرب عقلك يا رقية
على قلبك مراوح
رقية ابتسمت وسكتت
خبط الباب
قام فتحى يفتح الباب
وكانت ام العربي
فتحى.ازيك يا خالتي
ام العربي.يسلم زيك يابنى
انا قولت اجى اطمن على مراتك
هى عاملة ايه دلوقتى
فتحى.بخير يا خالتى
اتفضلى خشي
دخلت ام العربي
واول ما شافتها رقية قامتلها
ام العربي بأبتسامة.ايه ده
ده الحبايب متجمعين
استنوا اسلم على رقية واجي اسلم عليكم
وقفت جوهرة وفردوس
احتراما لأم العربي هى فى سن امهم واكبر كمان
حضنت ام العربي رقية وطبطت عليها
رقية.يسلم سؤالك يا خالتي
ام العربي.ربنا يقومك بالسلامة ياحبيبتى
ويستر عرضك وعرض الولايا كلهم
جوهرة وفردوس بصوا لبعض وبصوا لاخوهم
طلعت ام العربى رقية من حضنها
وراحت سلمت عليهم بترحيب
فردوس.اقعدى يا خالتي ارتاحي
ام العربي وهى بتقعد.يريح قلبك ياحبيبتى
ايه يابنات عاملين ايه
جوهرة قاعدة جنب ام العربي.فضل ونعمة ياخالتي
ام العربي.جيتوا يا عيني على ملا وشكم
اصيلة ياجوهرة انتى واختك
جوهرة.رقية بتنا يا خالتى
مش مرات اخونا بس
ام العربي.اه يا حبة عين امها
عيلة صغيرة ومش فاهمة حاجة
انت ياولا يا فتحى
نمس
اقولك فيك ايه بس
ربنا يهديك
فهم فتحى اللى ام العربي بتلمح له
فتحى.مراتى يا خالتي
احنا عملنا الفرح يوم ما جينا البيت هنا
لكن احنا كاتبين الكتاب بقالنا داخلين فى سنة
ام العربي بذهول.لاء والنبى صحيح
طيب ومقولتوش ليه يا ولاد
بدل ما الناس اللى تعرف تفضل تتكلم
ما انتم عارفين هنا كل واحدة بوئها فى ودن التانية
فتحى.هى الناس مالها يا خالتى
تتكلم ليه فى حال غيرها
ما كل واحد يخليه فى حاله ويسكت
ام العربي.ياواد الكلام ده يتقال عند الخواجات
لكن احنا هنا لو مش كل اوضة عارفة اوضة جارتها دواخلها ايه
متبقاش مرتاحة
فردوس.ان شاء الله يطلعوا من هنا على خير
ام العربي.اه ياخدوا بيت من بابه
حتى العيل ييجى بعيد عن الشياطين والعفاريت
جوهرة بصيت لاخوها واختها.مفيش عفاريت ولا حاجة ياخالتى بسم الله الرحمن الرحيم
كل ده بيتقال
ورقية مش شاغلة بالها بيهم
هى فى ودنها بيرن صوت دهمان
اللى بالنسبالها كان بيغنيها عن كلام اى حد تانى حواليها
ام العربي بعد ما عرفت موضوع ان رقية كان مكتوب كتابها من فترة
قررت انها تخرج تلف على البيت اوضة اوضة علشان تقولهم
حتى علشان حريم البيت يلاقوا حاجة جديدة يتكلموا فيها
خرجت بعد ما سلمت عليهم مرة تانية
فتحى.عالم دماغها تعبانة عليا النعمة
لو ميقعدوش على سيرة غيرهم ميحسوش انهم هبطوا
جوهرة.نقول ايه بقى
احنا اللى غلطانين من الاول
الا قوليلى يابت يارقية
فى ايه ياختى بيحصل معاكى هنا
رقية بأبتسامة.كل خير يا عمتى
كل خير والله
فردوس.كل خير ازاى يعنى
انتى مش قولتى لفاطمة وعلي انك بتسمعي حاجات
وساعات بتحسي بحاجات غريبة
رقية.اه والله العظيم
انا مكدبتش
جوهرة.اومال ايه مش باين عليكي خايفة يعنى
رقية.ربنا معايا يا عمتي
هخاف ليه بس
جوهرة.ونعمة بالله يا بتي
ربنا يكملك بعقلك
خبط الباب مرة تانية
وكانت عواطف
اول ما شافت فتحى قدامها
اتخضيت
فتحى.فى ايه يا عواطف
مالك اتاخدتى كده ليه
عواطف بأستغراب.عم.عم فت.عم فتحى
متأخذنيش
فكرت رقية هنا لوحدها
فتحي.لاء مش لوحدها
ادخلي طيب لو عايزاها فى حاجة
عواطف من خوفها لما شافت فتحى.لالا خلاص
انا جيت اشوفها لو عايزة حاجة
بركة انها مش لواحدها
بالاذن
مشيت عواطف من قدام فتحى
وهى خايفة منه
ده اختفى من قدامها فجأة فى لمح البصر
دخلت اوضتهم
سنية.مالك يابت
وشك مخطوف ليه كده
عواطف.مفيش ياما
بس كنت بشقر على رقية
واتكسفت لما لقيت عم فتحى قصادي
عثمان.هو جوة
عواطف.اه
وباين كمان اخواته جوة
صوتهم عالي
عثمان.سنية حضري حاجة تقدميها للجماعة
علشان شوية وهتلاقيهم جايين
سنية.سترك علينا يارب
جيب العواقب سليمة
عواطف بأستغراب.هو فيه حاجة ياما ولا ايه
هما جايين ليه
سنية.يابتى جايين علشان ابوكي يشوفلهم حجاب يفوقهم من العكوسات اللى بتحصل معاهم
عواطف.عكوسات
هو اللى بيحصل معاهم ده عكوسات
سنية.اه
وانتى عارفة ايه اللى بيحصل
عواطف.اه اه
لا لا
بس انتم قولتوا الاوضة فيها حاجة غلط
وعرفت لما كنتى بتتكلمي انتى وخالتي ام العربي
سنية.طيب روحى خلصى شوية الغسيل اللى فى الحمام
عقبال ما اخلص انا الاكل
عواطف.ماشى حاضر
فعلا خرجت عواطف تغسل الغسيل
وهى بتفكر فى ان فعلا اللى حكيته رقية لها ممكن يكون عكوسات
هى عارفة معنى الكلمة لأن كتير ابوها بيقولها
ومفهمها يعنى ايه عكوسات
وده ريحها شوية
برغم ان من جواها لسه خايفة
من اختفاء فتحى قدام عنيها
عثمان.بقولك ايه يا سنية
سنية.نعمين
عثمان.لما الجماعة يدخلوا
خلى البت عواطف تدخل تقعد مع مرات فتحى جوة
سنية.انت هتقولهم اللى حصل
عثمان.لازم اقول يا سنية
الظلم ظلمات
واحنا سكتنا كتير
ورضينا بالظلم
ومسيرنا ننزل فى شبر ضيق
سنية.بس ليه دلوقتى يا عثمان
ليه مش من سنين
عثمان.مشوا يا سنية
مشغلوش بالهم
محدش نام ليلة من بعد اللى جرى فى البيت
محصلش اللى يخلينى اتكلم
لكن طلبوا مني اقول
سنية.ربنا يجيب العواقب سليمة
عثمان قام يصلي العصر
وكان ابو اشرف وصل للبيت
ومعاه رشا
اللى ارتاحت نبوية وبسمة اول ما شافوها
وحكوا لنبوية اللى حصل كله
وكانت مش عارفة تفرح للفرصة اللى جاية لرشا
ولا تزعل على حال رقية
ولا تزعل ان بنتها هتتغرب هى كمان وتبعد عنها
لكن الطمع كان عامل اساسي فى انهم يحكموا عقلهم قبل عواطفهم وقلبهم
فى بيت فتحى
خبط الباب
فتحى.الواحد لو شغال رئيس جمهورية
مش هيخبطوا علينا كل شوية كده
قام فتحى فتح الباب
وشاف قدامه اخوه
خليل
اللى برغم تكشيرته
ملامحه كلها حنان وطيبة
وقف فتحى قصاده مش عارف ياخده بالحضن
ولا يكشر فى وشه
اول ما لمحته فردوس
صرخت بفرحة.خليل
يا قلب اختك ياحبيبى
قامت تجرى على الباب
بعدت فتحى
وسحبت اخوها لحضنها
وقامت وراها جوهرة
تسحبها من حضن اخته علشان تحضنه هى وتسلم عليه
عمرهم ما صدقوا ان ممكن خليل يكون مش اخوهم
او ممكن يكون جاى من الحرام
دخل خليل
وسلم على فتحى
لكن فتحى رد السلام ببرود
قامت رقية وقفت ورحبت بخليل
اللى حست براحة اول ما شافته
وكأنه عكس فتحي تماما
دخل خليل قعد معاهم
واتكلموا كتير عن سفره وشغله
وكل حاجة عن حياته فى الغربة
وانه رجع بسرعة
وشكروه انه متأخرش عن انه يكون معاهم
وفى خلال الوقت اللى بيتكلموا فيه
قامت رقية تحضر الغدا
وصل علي
وقابل خليل بحب وترحيب واشتياق حقيقي
وبادله خليل نفس الحب والود
حطيت رقية الاكل
وقعدوا كلهم ياكلوا
وهى كانت كالمتفرج على كل اللى بيدور حواليها
خاصة بعد ما عرفت الصدمة اللى عاشوها فى صغرهم باللى حصل لأمهم وابوهم
علي.ايه يافتحى
هندخل امتى لعم عثمان
اسم عثمان رن فى ودن رقية
وده خلاها اخيرا تتكلم.ايه ده عم عثمان
خدوني معاكم
كلهم بصولها بأستغراب
فتحى بتقليل.وانتى مالك انتى
تحشرى نفسك ليه
رقية.معلش انا فيه كلام لازم اسمعه من عم عثمان
كلهم بصوا لبعض
وقبل ما فتحى يرد
خليل.خليها تكون موجودة يا فتحى
من حقها
عم عثمان كان صاحب ابوك الروح بالروح
يمكن اللى يتقال
يبقى محتاج يتعرف لكل الناس
فتحى بأستهزاء.ليه هو اللى اتقال زمان مكانش كفايا
علي.خلاص يا فتحى
مراتك عايشة فى البيت ده
وبلاش تبقى فيه حاجة مستخبية
نشوف الراجل عايزنا فى ايه
واحنا مبقاش عندنا اللى يستخبى علشان تداريه من رقية
رقية ابتسمت
وفتحى سكت
خاصة لما كل اخواته وافقوا على ان رقية تكون موجوده معاهم
فتحى.طيب انا هقوم اخبط على الراجل اشوفهم اتغدوا ولا ايه
مش هنذنبهم يعنى جنبنا
جوهرة.روح
واحنا هنلم الاكل
ونصب الشاى لحد ما تشوفه
فعلا قام فتحى يشوف عم عثمان
عثمان.تعالى يافتحى يابنى
فتحى.ايه ياعم عثمان فاضى نجيلك دلوقتى
ولا بعد الغدا
عثمان.لاء يابنى اتغدينا الحمد لله
فتحى.ماشى بيشربوا بس كوباية الشاى بتاعتهم
وندخلك
معلش بقى هنزحملكم البيت
عثمان.تأنسوا يابنى
فتحى.بقولك ايه ياعم عثمان
البت رقية مراتى
عايزة تبقى قاعدة معانا
هو فيه حاجة هتتقال المفروض متسمعهاش
عثمان مبتسم.تنور يابنى وتأنس
مفيش حاجة تكسف يابنى
خليها تبقى قاعدة
فتحى.ماشى ياعم عثمان
هروح اقولهم
خرج فتحى
عثمان.عواطف
بت يا عواطف
عواطف.نعم يابا
عثمان.بقولك ايه
عايزك تروحى لأختك سعاد
تقوليلها بيقولك ابويا تعالي بكرة اتغدي معانا
البت بقالها شوية مجاتش
عواطف بفرحة.والنبى بجد يابا
هوا هروح فوريرة
عثمان.ولما جوزها يرجع خليه يبقى يوصلك العشا
متجيش فى الشارع لواحدك
فرحت عواطف انها هتقعد مع اختها شوية
وكان عثمان بيعمل كده متعمد علشان متبقاش موجودة
ويتكلم مع الناس براحته
من غير ما يقلق ان بنته تخاف من اى حاجة ممكن تسمعها
يتبع
ما بعد الأغتصاب
الفصل الثلاثون
فتحى.الراجل قاعد مستنينا
قولتله ان رقية هتبقى معانا
خليل.فتحى
انا عايز اتكلم معاك كلمتين قصاد اخواتك
فتحى بلا مبالاه.خير يا خليل
عايز تقول ايه
خليل.انا بعدت السنين دى كلها
اتغربت ورضيت اعيش محروم منكم
اتحرمت من امى وابويا من وانا اصغر منك
ولما شديت حيلي شوية
اتحرمت من انى اكون جنبكم انتم كمان
فتحى مقاطع.وانت كان حد ضربك على ايدك
فضيحة امك هى اللى خليتك تهج علشان متبقاش ودنك مفتوحة للكلام اللى كنا بنسمعه ليل نهار
خليل بأنفعال.اوعى تقول على امك نص كلمة
جوهرة بصوت عالي.جرى ايه منك له
هى حصلت
هتتكلموا فى شرف امكم
سيبتوا ايه لبتوع الشارع
اخص على رخصكم
علي.كفاية كلام
غير ان اللى بتتكلموا عليها دى امنا
فيه حاجة اسمها حرمة ميت
خليل بهدوء.انا كان نفسي فتحى يسمع كلامي للأخر
مكنتش محتاج اسمع اللى اتقال ده
فردوس.كمل كلامك ياخليل
قول يابا كل اللى جواك
خليل مانع دموعه تنزل.انا مشيت وبعدت
مش علشان الكلام يا فتحى
انا مشيت لأن انت الوحيد فى اخواتى
اللى كنت مصدق انى مش اخوك
مش عارف ليه وازاى
بس كان واجعني انك واخدني بذنب مش ذنبي
فتحى مقاطع.بقولك ايه يا خليل مترميش بلا....
خليل.انا لا برمى بلا ولا بحملك ذنب
انا كانوا كلمتين جوايا عايز اطلعهم
علشان بعد اللى هنسمعه عند الراجل اللى جوة ده
يمكن انا وانت منقدرش نحط عنينا فى عين بعض مرة تانية
انا رايح
خرج خليل وسابهم واقفين يبصوا لبعض
رقية بتتفرج وهى ساكتة
وكأن فيلم شغال قدامها
علي.طيب خلونا ندخل لعم عثمان
نشوف هو عايزنا فى ايه
وبعدين نيجي نكمل كلامنا
رقية.طيب يا عمي علي
روحوا انتم انا هقفل الاوضة واجي وراكم
خرجت فردوس وجوهرة
وفتحى وعلي
وقفلت رقية وراهم الباب
ظهر دهمان
ولو موجود فى ارض الواقع
وفى الزمن اللى احنا فيه ده
كانت البنات مش هتتنازل عن انه ممثل اجنبي
او حتى واحد فاز بمسابقة ملك الجمال
رقية بأبتسامة.مشوفتكش بقالى وقت طويل
دهمان مبتسم.وحشتك
رقية بكسوف وخدود حمرا
هزيت رأسها بالموافقة على سؤاله
فرح دهمان
رقية.هو انا لازم اروح معاهم
ولا نقعد نتكلم احنا مع بعض
مع ان علطول صوتك فى وداني
دهمان.لازم تكوني موجودة
بس خلاص اسمعي من غير ما تقولى لعثمان ان انتى جاياله بمرسال
رقية بأستغراب.ليه كده
دهمان.المرسال وصله خلاص
عايزك تسمعي ومتقوليش اى كلمة
انا بس عايزك تعرفي سر كل حاجة حصلت فى المكان ده
رقية.حاضر
دهمان.يلا روحى بقى
وانا موجود معاكي وجنبك
رقية ضحكت
وسابته و خرجت وقفلت الباب وهو واقف قدامها بأبتسامته
خبطت رقية الباب على بيت عم عثمان
سنية.تعالي يا رقية
ادخلى ياحبيبتى
رقية.ازيك يا خالتي
سنية.يسلم زيك يا حبيبتى
ادخلى الجماعة قاعدين جوة مع عمك عثمان
ابتسمت رقية
ودخلت على المكان اللى شاورت عليه سنية
وقعدت جنب فردوس وجوهرة
وكان قاعد جنبها خليل وعلي
وفتحى
وقاعد قصادهم عثمان على الكنبة بتاعته تحت الشباك
جوهرة.خير يا عم عثمان
فتحى اخويا قال انك عايزنا
عثمان.مستعجلة على ايه يابتي
مش تستني اطمن على احوالكم
فتحى.كلهم بخير يا عم عثمان
بس متأخذناش
انت عارف جوهرة وفردوس مشوارهم طويل
ومش هينفع يتأخروا على اجوازهم
عثمان بيضحك.طول عمرك مستعجل يا فتحي
ماشى
عايزكم تسمعونى من غير ما تقاطعونى
علشان اللى هقوله ده
ربنا هو الشاهد عليه
وعالم ان مفيش فيه كلمة كده
علي.اتكلم يا عم عثمان
محدش هيقاطعك
عثمان.تعالوا احكيلكم الحكاية من الاول
خليل.احنا سامعينك يا عم عثمان
عثمان.البيت اللى احنا فيه ده يا علي يابني
له حكاية
كل اوضة فيها
تحتها سر كبير
مش مكتوب لأى حد يعرفه
بس من نعمة ربنا ان انا كنت من الناس دى
ومش لواحدى
علي بأستفهام ونظراته بتدور بين اخواته.سر ايه يا عم عثمان
عثمان بابتسامة.متستعجلش على رزقك
علي.متأخذنيش يا عم عثمان كمل
عثمان.البيت ده يابنى تحته خير كتير
خير للى يقدر الخير
البيت ده وتحت كل اوضة فيه
موجود سرداب
فردوس.سرداب
عثمان بيكمل كلامه.سرداب يوديك لعالم تانى
فيه مخلوقات تانية خالص
وكلها مبيجيش من وراها غير خير
للى بس يقرروا انهم يورولهم الخير بتاعهم
انتم مش فاهمين كلامي باين عليكم
البيت ده من الاثارات
بقاله سنين طويلة اوى
السراديب اللى تحت البيت ده
مسكونة كلها
بمخلوقات مشاركانا فى كل نفس بنتنفسه
لكن هما فى حالهم واحنا فى حالنا
فيه ناس عاشت فى البيت الكبير ده سنين قافلين عليهم اوضتهم
وجوة الاوضة كانوا عايشين كأنهم فى قصور
لكن ايه اللى داير جواها
ده سر بين صاحب الاوضة
والخير اللى طلعله من تحت الارض
لكن لأن البيت كان مليان ناس
فكان زى ما فيه افراح وليالي حلوة
كان فيه حزن ومشاكل وزعل
وده خلى ناس تنتحر علشان تهرب من مشاكلها
واللى ماتت بعد ما وقعت من على السطوح
واللى ولع فيها البابور وماتت محروقة
وده خلى البيت زى ما فيه سكان تحت الارض وراها الخير كله
خلى فيها كمان ارواح مش مرتاحة
لانها ماتت متعذبة
كان ناس تقول حسينا بحد سادد الحيطة
وكان اللى يقول شوفته فى سقف اوضتى بسواد الليل
وكل اللى عنده كلمة يقولها
ودول اللى كان مش بيظهرلهم غير الارواح التعبانة
اللى موراهاش غير الخوف
لكن اللى كانوا كافيين عن الخبر ماجور
كانوا هما اللى وصلوا لسكان تحت الارض
اصحاب الارض الاصليين
شافوا الخير كله
كنت انا ساكن في البيت ده من قبل ما اتجوز مع اهلى
وكان ابوكم عبدالله صاحبي وجاري وعشرة عمرى من واحنا عيال
عيشتنا واحدة
حتى لما جينا نتجوز
كانت خالتكم سنية جارة امكم
كنتم تقولوا الاوضتين مفتوحين على بعض من كتر ما عيشتنا واحدة
البيت كله كان بيحسد الاوضتين بتوعنا
عايش كل واحد مع مراته واهله
لحد ما الاهالى واحد ورا التانى ربنا افتكرهم
والعيال حلت محلهم
جاب ابوك جوهرة اختك
وانت يا علي
وبعدك فردوس
وفى سن فردوس
خلفت انا سعاد بتي
وكل ده وانتم عيالنا
والبيتين مفتوحين زى ما هما مفيش حاجة اتغيرت
لحد ما الحال اتبدل
كانوا قاعدين قدامه بيسمعوا الكلام
وهما حاسين انهم بيسافروا معاه للزمن اللى بيحكي عنه
عثمان كمل كلامه.فى يوم نايم على الكنبة بتاعتى برة فى الصيف
وابوكم طلع يجيب بطيخ علشان نتعشا سوا
كنا بليل
ولقيتها قدامي
علي بفضول.هي مين
عثمان مبتسم.هى صاحبة الخير اللى انا فيه
فتحى.خير ايه ياعم عثمان
انت عايش فى اوضة قد علبة الكبريت
عثمان.اسمعنى يابني الله لا يسيئك
الاوضة اللى مش عاجباك دى
اللى كنت ببقى قاعد من شغلى بالسنة
والخير مش بيخلص منها
ومتحوجتش فى يوم لمخلوق
جوزت بتي
وشورت التانية
وانا قاعد على كنبتي
جوهرة.كمل يا عم عثمان
سيبك من فتحى
عثمان.ظهرتلى من تحت الارض
وكانت نجمة من السما
بتنور فى العتمة
لقيت نفسى بتعدل فى قعدتى
وبفرك عنيا
يمكن بيتهيألى
اه انا سمعت عن البيت كتير
لكن عمرى ما شوفت حاجة من اللى كانوا بيحكوا عنها
المهم
لقيتها بتضحك وكأن الشمس طلعت فى نص الحوش
والنجوم فى السما
الحوش كله منور لما ضحكت بس
لقيت نفسى مش عارف اتكلم ولا انطق
قربت مني
ووقفت قدامى
جسمى كله كان بيتنفض
وقلبى صوته مسمع السطح فوق
ومراتي وبتي قاعدين جوة
مش عارف ازاى محدش طلع على النور اللى ملى البيت مرة واحدة ده
ولقيتها بتتكلم
بتقولى
يا عثمان
انا اختارتك
تكون انت جوزى
واكون انا اميرة فى مملكتي
وجارية فى حضنك
كنت بسمع الكلام
وانا فاكر نفسى بحلم
بيتهيألي
اتجننت مثلا
ماهو اللى انا شايفه وسامعه ده لا مجنون ولا عاقل يصدقه
رقية كانت بتسمع ومبتسمة
ومصدقة كل كلمة بيقولها
لان وصفه يشبه وصفها لدهمان
عثمان بيكمل كلامه.لقيت نفسى ببص على اوضتى
اتكلمت هى وكلامها خدنى للعالم بتاعها.عارفة ان انت ليك الدنيا بتاعتك
مش هاخدك منهم يا عثمان
بس هتكون ليا زى ما هتكون ليهم
هقبل يفضلوا موجودين
ومالهمش حق يعارضوا وجودى فى الوقت اللى اختاره
عثمان.انتي ايه
انتي مين
رديت بصوتها اللى بيخطفنى
انا سلسبيل
جميلة اميرات الجان
وعشقتك
وقررت تكون انت اللى تستاهل تتمتع بسلسبيل
عثمان.طيب مراتي
هقولها ايه
سلسبيل.قولها اللى انا قولته
هى هتوافق يا عثمان
هبقى شريكتها فيك
وهتشوف الخير كله انت وهى
طول ما انتم قابلين وجودى
لكن
لو حصل فى ليلة وحسيت ان فيه رفض من حد منكم ليا
محدش فيكم هيشوف شكل الارض مرة تانية
عثمان.هو مين
مين يعنى عاقل ولا مجنون يرفض الشمس اللى تنور حياته
دى تغور الدنيا باللى فيها
قصاد كلمة من شفايفك اللى مالهاش مثيل دى
سلسبيل مديت ايديها قدامى
وفجأة ظهر بين كفوفها
صندوق
قربته مني
خد ده يا عثمان
قدمه لمراتك
علشان تصدقك
مديت ايدي اخدت الصندوق
وببص بشوف شكله
اللى كان حتة تحفة
مالهاش زي
هخلى خالتكم سنية تجيبه دلوقتى علشان تشوفوه
وجيت ارفع عينى علشان اقولها فى ايه الصندوق ده
لقيت كل حاجة رجعت لأصلها
نورها اختفى
رجع الحوش لكأبته والضلمة بتاعته
لكن اللى خلانى اصدق ان اللى شوفته مكانش حلم
هو الصندوق
اللى فتحته وانا بدور عليها بعنيا
شد نظرى اللى كان بيلف الحوش كله
اللمعة اللى خارجة من الصندوق
كريستال يا عيالي
كريستال
الماظ
الجواهر اللى الواحد يسمع عنها بس مش ممكن يشوفها
حاجات لو افرط فيها
تعيشنى ملك انا وعيال عيال عيالي
كنت مصدوم من اللى شوفته
ومش عارف اتكلم ولا انطق
بقيت امسك اللى جوة الصندوق بأيدي
علشان اقول لنفسى انتى متخبلتش يا عثمان
دخل ابوكم عليا فى الوقت ده
ولقانى قاعد بالحال ده
عبدالله.ايه ياعثمان
مالك شارد فى ايه
وايه اللى فى ايدك ده
عثمان.لقيت نفسي بلف الصندوق
علشان يبقى قصاد عنيه
عبدالله فتح عنيه وبوئه على وسعهم
من جمال اللى شافه
عبدالله.ايه يا عثمان ده
يخربيتك
وقعت على الكنز ده منين
ده انا سايبك زى ما جيت لقيتك
حكيتله اللى حصل
اخويا
مبخبيش عليه الهوا
عبدالله.يا ابن المرزقة يا عثمان
ده انت اتفتحتلك طاقة القدر
ايه الحظ ده
انا عارف انه كان بيقول الكلمة وهو قاصدها
عارف انه اتمنى لو كان مكانى
حتى لو مشافش سلسبيل
بس الكنز اللى شافه بين ايديا لواحده خلاه يتمنى انه اللى حصل ده كان يحصل معاه
عبدالله قاللى اوعى ترفض الخير اللى اترمى تحت رجليك
واوعى تفرط فى الباب اللى اتفتح ليك
عثمان.بس سنية
عبدالله.هتشوف الكنز ده هتقولك روح عيش معاها
عثمان.اعيش مع جنية يا عبدالله
عبدالله.بقولك ايه يا عثمان ياخويا
سمعنا كتير عن اللى عاشوا عيشة الملوك بسبب الخير اللى طلعلهم من تحت الارض
ليه ترفص النعمة
ياريتنى مكانك
ده انا كنت رميت زهرة بالعيال فى اول محطة
عثمان.اصيل انت ياجدع
عبدالله.دى زهرة نفسها هتنزل هى فى اول محطة يوم ما اقولها انا ولا كنز زى ده
متبقاش فقري يا عثمان
اكبش واغرف
خلي الدنيا تدينا وشها بقى
عثمان.انا اقتنعت بكلام عبدالله
واتكلمت مع سنية
اللى كان ردها فعلا نفس كلام ابوكم
ما هى مش خسرانة حاجة
انا قاعد جنبها ومعاها ومع عيالى
والخير بييجى لحد باب اوضتنا
يبقى ايه اللى يخليها ترفض انى اغيب عنها ساعة ولا اتنين ولا حتى شهر
جوهرة.كمل يا عم عثمان
عثمان.الخير كله ظهرلى
عيشت معاها ملك زمانى
خدتنى معاها للعالم بتاعها
نسمع ان ممالك الجن والعفاريت جحيم
لكن اللى كنت بشوفه
حتة من الجنة
هارون الرشيد ميجيش فيا حاجة
بقيت تعرفني اللى ينفع تعرفهولى
خلتنى بعد ربنا اقدر اكون عون للى يحتاجني
بيتي علطول مليان
مراتي وعيالى مش ناقصهم حاجة
كل حاجة حلوة بتحصل معايا
وهى موجودة
سندانى مبلحقش اقع
كل ده بيحصل
برضا مراتى وعلمها
ولحد دلوقتى
وكل ده بيحصل
وابوكم على علم بيه
وامكم
والخير بيعم على الكل اوعوا تفكروا انى اتغيرت ولا بخلت
لكن عبدالله نفسه ساقته
محبش انى اكون انا اللى بدلق على الفاضى
كان بيتمنى يكون مكاني
يمكن يكون حقه
عمل كل حاجة
لحد ما راح للسحارين
علشان يجيبوله وليفة من تحت الارض تعشقه
ومن بعدها مشوفناش خير
انا بجمع نفسي معاه
مش علشان انا ذالت النعمة من وشى
لاء بس علشان هو اخويا
وزهرة امكم كانت اختي
ولحد دلوقتى
يعالم ربنا غلاوتهم جوايا انا ومراتي
فردوس.حصل ايه يا عم عثمان
عثمان.كل يوم كان بيفوت انتم بتكبروا يوم
ابوكم كان بيبعد عن امكم بروحه ايام
الفكرة كبرت فى دماغه
مبقاش يعمل غير انه يلف ويجرب كل حاجة ممكن تتجرب علشان تظهرله وليفة
حتى لما كلمت سلسبيل
قالتلى
خليه يا عثمان
طمعه وجشعه هيعميه
حاولت كتير اخليها تبعده عن اللى بيعمله
لكن هو اذى نفسه
ودخل نفسه لعالم معرفش يخرج منه
كلهم باصين لعثمان ومستنيينه يكمل
عثمان بيشرب شوية مياه
وكمل كلامه.فى يوم امكم جات خبطت علينا بليل
فتحتلها سنية
دخلت ووشها مخطوف
سنية.مالك يا زهرة
فى ايه ياختي
جوزك ولا حد فى العيال فيه حاجة
زهرة بخوف.فين عثمان يا سنية
سنية.اهو قاعد جوة
ادخلى
دخلت زهرة وانا قاعد على الارض بعمل لنفسى كوباية ينسون
على السبرتاية
زهرة.الحق اخوك يا عثمان
قومت من مكانى لدرجة ان كنكة الينسون وقعت من على السبرتايه
وبأحساس حاول اكدبه فى قلبى.جراله ايه يا زهرة
زهرة.قاعد فى الحمام
وقافل النور
وبيتكلم بصوت عالى
كلام مش مفهوم ياخويا
وضحكته بترن
طلعت على الصوت فكرته واقف معاك
لقيت الصوت جاى من الحمام
وقفت اتصنت
لقيته بيتكلم كلام مش مفهوم
بصوت متغير
لكن هى ضحكته
وخايفة العيال يحسوا بحاجة
عثمان.لقيت نفسى جريت على الحمام
سمعت صوته
سمعت ضحكته
وعرفت انه مش لواحده
كان فاكر عبدالله انه عمل اللى هو عايزه
لكن جاب الشر واللعنة لحد باب بيته
فى الوقت اللى سنية وزهرة واقفين قصادى مستنيين مني اطلع عبدالله من الحمام
رن صوت سلسبيل فى ودني
يتبع
ما بعد الأغتصاب
الفصل الحادى والثلاثون
الاخير
خلاص يا عثمان
صاحبك اللى جابهم بأيديه
عثمان بخوف بيكدب نفسه.مشيها يا سلسبيل
لو هتأذيه مشيها
سلسبيل لعثمان.دى مش واحدة يا عثمان
دى عشيرة كاملة
ومش مسلمين
واحنا فيه معاهدة بينا وبينهم
ميدخلوش عالمنا ولا لينا علاقة بعالمهم
الا لو بيأذو مسالم
وصاحبك مش مسالم يا عثمان
صاحبك اللى طلبهم
وهما موجودين برغبته هو
عثمان بخوف.ساعديه يا سلسبيل
ساعديه انا خدامك طول عمرى
اختفى صوتها
واختفيت
لكن عبدالله كان صوته الغريب بيرن فى الحمام
وضحكته اللى فاكرها هتدوم
كانت بترج حيطان البيت
زهرة بدموع.جرى ايه يا عثمان
قالتلك ايه
خدته واحدة زيها
قولى ياخويا
بيجراله ايه
عثمان.مش وقته يا زهرة
المهم دلوقتى
يخرج بس
ويدخل ينام
والصباح ربنا
سنية.قالتلك ايه يا عثمان
بصيت لسنية بصة هى فهمتها
معناها انها تسكت خالص
وفعلا سكتت وهى محاوطة زهرة بدراعها
وخايفة عليها
وعلى عيالها
وعلى عبدالله ذات نفسه
فردوس بدموع.ابويا اتلبس يا عم عثمان
عثمان.ابوكي طمع
فكفر يا فردوس يابتى
احنا واقفين على الباب
وانا بقول وبدعى بكل الادعية اللى بتوسل فيها انه يخرج سليم
خرج بعد وقت
وكأن مفيش اى حاجة حصلت
طالع مبتسم
ومستغرب وقوفنا على باب الحمام
زهرة.مالك ياخويا
فيك ايه
عثمان.عبدالله انت كويس
سنية.قلبنا اكلنا عليك ياخويا
جرالك ايه
عبدالله.فى ايه مالكم
حد يقف على باب بيت الراحة بالشكل ده
مفيش حاجة
روحوا على اوضتكم
ولقيناه سحب زهرة من ايديها
ودخل الاوضة وقفل الباب وراه واحنا واقفين ولا كأننا كنا موجودين قصاده
ومسمعناش غير صوت زهرة بتعيط بصوت مكتوم من خوفها تصحيكم
وصوت عبدالله اللى فهمنا منه
انه بياخد حقه الشرعي من مراته
فى الوقت ده كنت عارف ان اللى مع امكم مش هو عبدالله
مش صاحبي
ده واحد من العشيرة
قرر يقاسم نسله نسل البشر
ولان عبدالله كان فاكر ان اللى بيعمله
هيجيبله سلسبيل تانية
مكانش شاغل باله
بأى حاجة تانية ممكن تحصل
ودى كانت البذرة الفاسدة اللى اتزرعت جوة زهرة
زهرة مكانتش عارفة اللى انا عارفه
لكن هى كل اللى عارفاه ان جوزها
فيه حاجة مش صح
طيب يمكن شارب حاجة
يمكن اتأذى بسبب اللف على السحارين والمشايخ
بس زيها زي اي ست
لازم تطيع جوزها فى اللى يعوزه
من بعدها كل حاجة اتغيرت
بالنهار
ينسى عبدالله اللى بيحصل
وده خلاه مش فاكر انه جامع مراته
ولما حملت راح قال لاخته
ملمسهاش
وانها مش حامل منه
عمتكم مكدبتش خبر
بقيت فى الرايحة والجاية
تحرق دم امكم وتسبها
وتقولها احنا سايبينك خدامة
لكن انتى خاطية حلال فيكي القتل
ييجى الليل
يحصل اللى بيحصل
ولو ابوكم مش بيقرب من امكم
كانت بتبقى معاه واحدة منهم
بتزرع جواها نسل البشر
بيطلعوا ملعونين زيهم
ويصبح النهار
ينسى عبدالله اللى حصل فى الليل
لحد ما طلبت من سلسبيل واترجيتها انها تساعده
امكم كل يوم بطنها بتكبر
وهما كل يوم بيتمتعوا بتعذيب وتدنيس عبدالله وزهرة
اللى كانت مش عارفة تتكلم وتقول ايه
ماهو اللى بيكون معاها فى السرير هو جوزها
ابو عيالها
بقيت علطول تبعدكم عنه
يا انتم قاعدين معانا
يا اما بتخليكم تروحوا عند عمتكم
امكم مكانش لها اخوات
وبرغم انها عارفة الكلام اللى عمتكم ممكن تكون بتقوله
الا انها كانت بتأمن عليكم طول ما انتم بعيد عن ابوكم والحالة اللى بيكون فيها
على الحال ده شهور
لحد ما سلسبيل
قدرت تساعده
كان الموضوع مش سهل
عشيرة كاملة
متحكمة فى انسان ضعيف
نفسه امرته بالسؤ
رجع عبدالله لطبيعته
وولدت زهرة
وقدام الناس
كله عارف ان زهرة مرات عبدالله
وده ابنهم
لكن الوحيدة اللى مصدقة انه ابن حرام كانت هى اخته
عمتكم
اللى علطول تقول الكلام ده
وكانت اوقات امكم تتجاهل كلامها
واوقات تانية ترد عليها وتهاجمها
واوقات عبدالله يرد على اخته
واوقات تانية يصدق اللى بتقوله
برغم ان سلسبيل ساعدته
لكن قدرتهم عليه كانت اقوى
اه سيطرتهم قلت
لكن لسه لهم تأثير
كان عايش عبدالله ليله كله
مع واحدة منهم
بعد عن امكم خالص
بيصرف عليكم وعليها
وهى شايفة كل احوالكم
وكأنهم اخوات
سنين طويلة على الحال ده
تعبت هى فيها من الشكوى
وهو ولا كأنه عايش معانا
كان فى عالم تانى
جحوده زاد
لكن فى طمعه وجشعه
واهماله لدينه وقربه من ربنا
كل اللى قدرنا نمنعه هو ان حد منهم يعتدي على زهرة مرة تانية
لأنها كانت بتتأذى
وبذرة الشر اللى بتتزرع جواها
كانت مالهاش ملة
ولا ديانة حتى
كبرتوا
وابوكم ابتدا يكبر
وعافيته تقل
وفى يوم من الايام
اللى كنا قاعدين فيها انا وسنية قصاد الباب
وانتم كنتم قاعدين على السطح مع عيال البيت
طلعت زهرة والضحكة مالية وشها
سنية.يااااه يا زهرة
فين ياختى الضحكة دى من زمان
زهرة بسعادة.ربنا فك كربه يا سنية ياختى
عبدالله شكله رجع لعقله
ولان الوقت كان بالنهار
وهما كانوا متعودين يبقوا معاه فى الليل وبس
عرفنا وقتها
ان اللى كان مع زهرة هو عبدالله
اخويا
وجارنا
وابوكم
وجوزها حلالها
قولنا خير
وبعدوا عنه
بعد ما كان مربوط من ناحية مراته سنين
وحملت تانى
وجابت خليل
فتحى مصدوم
وكلهم متنحين وفاتحين عنيهم على اخرها
فتحي.قصدك ايه
ان انا ابن الشيطان
انا اللى كنت بذرة فاسدة
انا اللعنة اللى ابويا كان سبب فى انها تتزرع جوة بطن امي
عثمان بحزن.ايوة يافتحي انت
اللى جيت فى الوقت اللي ابوك كان متحاوط بيهم
هما مسابوش ابوك لحد اخر يوم فى حياته
لكن شرهم اتربط وسيطرتهم عليه اتحجمت
اموره هو وامك هديت
وقت طويل
لكن عمتكم كأن الشيطان كان قاعد على لسانها
منسيتش الكلام اللى ابوك كان بيروح يقوله عن زهرة ليها
وفضلت العمر كله تشحنه من ناحيتها ويمكن لو كانت لسه عايشة لحد دلوقتي كانت هتبقى بتردد نفس الكلام بنفس درجة الحقد والغيرة
كان ابوكم
اوقات يسخن من الكلام وييجى يطلع الهم والمرار كله فى زهرة
واوقات يصدق اللى بقوله انا وسنية مراتي له
وان اللى عمل فيه كده السحر واللعنة اللى كان بيدور عليها
لكن انتم عارفين الزن على الودان
عمتكم لانها كانت متجوزتش
وامكم كانت محدش يشوفها غير ويحبها
ولا يعرفها وميشكرش فيها
كل ده كان بيزود حقد وعيرة عمتكم منها
وكانت فرصتها كلها فى الكلام اللى ابوكوا راح قاله فى يوم من الايام
لحد فى يوم
شرب ابوكم زفت من اللى بيشربه
ودخل اوضته بعد ما رجع مشحون من عند عمتكم
اتقفل الباب وراه
ومسمعناش غير صوت عبدالله بيقول
لاء سيبوها
مش هى السبب
سيبوها
جريت انا وسنية على الباب نخبط
مفيش حس
لحد ما اتفتح الباب
بعد ما قعدت اخبطه بكتفى
كان فتحى صاحى من النوم مفزوع
وابوكم عنيه حنفية دموع
واخر كلمة قالهالى
اخدوها يا عثمان
ساعدها وانقذها منهم
مسمعتش صوته تانى
سنية خدت فتحى وقبل ما تطلع من الباب
كان عبدالله واقع على الارض
عنيه فى المكان اللى اختفيت منه زهرة
ودموعه مغرقة وشه
ولسانه اتعقد
حاولت اطلب سلسبيل
لكن الناس اللى اتلمت
منعتها تظهرلى
الدخان ملى الاوضة
وحصل اللى حصل قدام عنيكم
ابوكم القهرة والرعب اللى شافه منهم اليوم ده
كان السبب فى انه يموت بالسكتة القلبية
مات من غير ما يقدر يبراء امكم قصادكم ولا قصاد عمتكم
خلصت كل حاجة
والاوضة اتقفلت
وعرفت من سلسبيل
ان هما اللى اخدوا زهرة من العشيرة
خدوها علشان ينقذوها منه
ولما حاولت اعرف هى عايشة ولا لاء
قالتلى
زى ما بطنها شالت الانسي
وزى ما بطنها شالت الشيطان
خرج من بطنها بذرة خير
هتكون مكانها طول العمر
هتعيش فى المكان اللى هى اتعذبت فيه
هتكون حتة منها
مهمتها هى مساعدة اى حد يتعرض فى المكان ده لأي اذى
رقية.دهمااااااااااااان
عثمان ابتسم
وكلهم
بصولها
علي.بس يا رقية استني
هو فكرها بتقول اي كلام
وكان عايز عثمان يكمل كلامه
فى الوقت ده سلسبيل طلبت مني انى اسكت
ومتكلمش
وهييجى الوقت
اللى ولادها يعرفوا الحقيقة
وبعد رقية ما جت هنا
طلبت مني سلسبيل
انى احكيلكم اللى حصل
وعلشان تبقى زهرة مرتاحة
عايزة فتحى يبعد عن رقية
انا كده خلصت ذمتي
وقولتلكم اللى حصل
بما يرضي الله
امكم ست مفيش اشرف منها
وابوكم عمره ما قتل ولا كان بيفكر
لكن الشياطين الكفرة
هما اللى اتحكموا فيه
كان تحت سيطرتهم
وكان تحت ضعف نفسه
كلهم كانوا مصدومين
ورقية باصة لعثمان ومبتسمة
وفهم عثمان من الاسم اللى قالته ومحدش فهمه غيره
ان رقية شافت ابن زهرة من العالم التانى
شافت دهمان
امير بني قيعان
خليل قام وقف.الله يرحمهم
كتر خيرك يا عم عثمان
الكلام ده كان محتاج يطلع من زمان
لكن كتر خيرك
انا لازم امشى
وارجع من مكان ما جيت
مع انى كنت خايف وكنت هقول لعلي اني خايف اجي
لكن كنت علطول بحس بأمي جنبي
حسيتها هى اللى قوتنى انى اجي علشان اسمع الكلام ده كله
انا همشى
جوهرة بدموع.خليل مفيش حاجة اسمها هتمشي من هنا
انت مع اخواتك
كفاية بعد يابنى
لازم نبقى جنب بعض
بص خليل لفتحي
اللى كان واقف
مصدوم من اللى سمعه
علي بصدمة.فتحى انت كويس
فتحى بجحود.رقية انتي طالق
بالتلاتة
وانتم انسونى وطلعونى من حياتكم
اعتبروني مجرد اسم كان فى حياتكم
ومبقاش له وجود
فردوس بدموع.ايه اللى بتقوله ده
انت اتجننت
ازاى تطلق مراتك
وايه اللى بتقوله ده
فتحى باستهزاء.فردوس
الكلام خلص
انا اتجوزت اللى كنت عايزها
رقية دى مكانتش ليا من الاول
وانا فى حياتكم
مكانش المفروض يبقى ليا مكان
سيبونى بقى
عيشوا حياتكم
وانا سيبونى لحياتى
علي.انت بتقول ايه يا فتحي
انت ناسى انك هتبقى اب كمان كام شهر
فتحى باستهزاء.ياترى ابني بقى ده ولا ابن الشياطين اللى انا منهم
ماهو انا دخلت عليها من اسبوع
هما داخلين عليها من قبلي بقى
انا قاعد مع شوية ناس مجانين
على بانفعال.فتحى
احترم نفسك
فتحى.شوف يا علي يا خويا
متأخذونيش كلكم
انا محقوقلكم.رقية انا طلقتها
لأنى مش عايزها من الاول
واهو قول للجنية بتاعتك يا عم عثمان انى سيبتها خلاص
حامل مني
ماشى ابعتولى لما تولد هاجي اسجل العيل
لما اجيب مراتى اعرفكم عليها
واخدلها سكن
هبقى اقولكم عنواني
بس انا مش عايز حد يعاملني ولا يقرب ناحيتى مرة تانية
جوهرة.اخواتك هانوا عليك تسيبهم وتقطع علاقتك بيهم يا فتحى
فتحى باستهزاء.جاحد بقى ابن شياطين
وانتى يارقية
عايزة تقعدى فى الاوضة هنا تحت حماية الملاك الحامي
اقعدى ياما
بيتك بقى وبيت اللى فى بطنك
هيخلوا بالهم منك
عايزة ترجعي بيت اهلك
روحيلهم
بس منصحكيش
علشان هيتقلوا من لقمتك
يلا بالأذن
كل اخواته وقفوا ينادوا عليه
لكن هو مشي من البيت كله
ركب وراح لميرفت
اما الاخوات
كانوا مصدومين من اللى سمعوه
رقية بهدوء.افوتكم بعافية
انا فى الاوضة بقى يا عمي
انا هستناكم فى الاوضة يا عمتى جوهرة
خرجت رقية وهى مرتاحة
اخيرا اطلقت من فتحي
حتى لو هتعيش لواحدها
هى فعلا مش محتاجاه
هى معاها ربنا
وجنبها اللى بيخلي باله منها
جوهرة.مش عارفة ياعم عثمان المفروض نقول ايه
اللى سمعناه ده يعدي المعقول
بس احنا لو صدقناه هنصدقه
علشان احنا عمرنا ما صدقنا ان امنا ممكن تكون عملت الغلط
ولا حتى غصب عنها
عثمان.سنية
يا سنية
هاتى الصندوق
دخلت سنية وهى ماسكة الصندوق اللى اتكلم عنه عثمان
وهى ملامح الحزن على وشها
عثمان.هو ده الصندوق اللى قولتلكم عليه
سنية.حقكم علينا يا ولاد
كان لازم تعرفوا من زمان
بس احنا مكناش عايزين نخليهم يغضبوا علينا
كان لازم عمكم عثمان ميحكيش غير لما يتطلب منه
فردوس بدموع بتبص على الصندوق
اللى فتحه عثمان
وشافوا حاجات عمرهم ما شافوا زيها فى حياتهم
ولا حتى فى الصور
جوهرة.مصدقينك ياعم عثمان
استهدي بالله يا فردوس
فردوس.احنا كنا عايشين مع شيطان يا جوهرة
كنا مستغربين من كل اللى بيعمله
بس اهو عرفنا السبب
امنا متقتلتش
خدوها يا ناس
خدوها وحرمونا منها
اتكلموا عنها وعن شرفها
عيشنا عمرنا كله مش عارفين نرد ولا نجيب حقها
علشان معندناش حاجة نقولها
ويطلع طمع ابويا وحقده هو السبب
مش مسامحاه
ولا هقدر اسامحه
خرجت فردوس من اوضة عم عثمان
ومن البيت كله
حتى مدخلتش لرقية
ومن خوف اخواتها عليها
مشوا وراها
خليل سلم على عثمان
ومشي هو كمان
سنية.ياريتك اتكلمت من زمان
يا ريتها سمحتلك من زمان
عثمان بيتنفس براحة.رقية هتعيش فى الهنا كله يا سنية
رقية اتكتبلها ابن زهرة
سنية بأندهاش.ايه
انت بتقول ايه يا راجل انت
قصدك ايه
عثمان بثقة.زى ما بقولك
البت دى شافت ابن زهرة
شافته زى ما بشوف سلسبيل
هو اللى جنبها ومطمنها
علشان كده هى هادية وراضية وساكتة
سنية.هياخدوها زى ما خدوا زهرة يا عثمان
عثمان.مش هيغصبوها يا سنية
بعدوا عنها الشيطان
وهيحاوطوها
هيراعوها
مش هتحتاج لبشر بعد كده
ربنا كتبلها الخير كله
سنية.ربنا يحميها من شر الشياطين
عثمان بابتسامة.روحى اعمليلى كوباية قرفة
فعلا سنية اتحركت من قدامه
وبص عثمان فى الفراغ.انا وصلت الرسالة
خليها ترتاح
وخليه يحافظ على رقية
وابتسم عثمان
لأبتسامة سلسبيل اللى برغم سنين عمره الكتير اوى الا انها لسه بتخطفه
وبتسرق قلبه
فاتت الايام
بعد ما الامور هديت
راح فتحى عاش مع ميرفت شوية
وبعدين جابها عرفها على اخواته
اللى محدش منهم كان مرحب بيها
وعرفهم مكان سكنه الجديد اللى كان بعيد عنهم بكام شارع
لكن حافظوا على الحدود فى علاقتهم من بعد اليوم ده
اما اهل رقية
قرر اشرف انهم ييجوا يعيشوا فى الاوضة اللى جنبه على السطح ويسيبوا البلد
خصوصا بعد ما رشا سافرت مصر مع محمد وسارة
فعلا ابو اشرف واشرف اشتغلوا على النصبة
وربنا فتحها عليهم
واشرف قرر يخلي بسمة تكمل تعليمها
وتكفل هو بالمصاريف
ومع الوقت والايام
نقلوا فى بيت خاص بيهم
واشرف كان ربنا فتح عليه من وسع
وعمل لأمه وابوه وبسمة اخته شقة عاشوا فيها
وهو عمل لنفسه شقة
ومع الوقت اتجوز واحدة بنت حلال
تبقى اخت واحد صاحبه من الموقف
عرفوا ان رقية اطلقت
بس كانت رغبتها اللى قبلوا بيها انها تفضل عايشة فى بيت ابنها
ومش هتسيب البيت ده ابدا
اما رشا كانت بتسافر وترجع وكل مرة بتكون افضل من اللى قبلها
كل حاجة فيها بقيت احسن
اسلوب وتفكير
ولبس وذوق
حتى تعليم وخبرة
كانت مختلفة فى كل حاجة
غير الفلوس الكتير اللى كانت بتكون معاها نتيجة انهم كانوا بيخلوها تساعدهم فى شغل خاص بيهم غير شغل البيت كمان
وده كان بيزود دخلها
وهى كانت مش متعودة تطمع فى اى خير لنفسها وبس
علشان كده كانت علطول
خيرها بيفيض على اخواتها واهلها
وفضلت من احسن لأحسن
لحد ما اتعرفت على شخص من اصدقاء محمد وسارة
وطلب انه يتجوزها
وفعلا بمنتهى الهدوء والاحترام
تم الاتفاق على كل حاجة
بالاصول
وكان صاحب الاتفاق اشرف
اللى ابوه بعد اللى حصل مع رقية
وعنيه اللى اتملت بالفلوس اخيرا
شال ايديه من اي اتفاق يخص البنات
وساب كل القرارات لأخوهم
فتحى مع ميرفت كان مربوط فى رجليها
برغم طبعها اللى كان عكس رقية فى كل حاجة
الا انه كان مش عارف يخلص منها بسبب الفلوس اللى ماسكاه بيها
وفيه ناس فى البلد كانت بتقول عليها بتاعت اعمال واسحار
ومن الكلام اللى اتقال
انها عملاله عمل دفناه تحت راس امها فى تربتها
خلف منها عيل واتنين وتلاته واربعه كمان
وكانت لما المسؤليات تزيد عليه
يزيد فى انه يلجأ للحرام
يبيع مخدرات
يمد ايديه على حاجة مش بتاعته
كان بيستحل اى حاجة مالهاش علاقة بالحلال
وعمره ما حس بالذنب
بالعكس كان بيجاهر بين اصحابه باللى بيعمله
وحتى مراته
برغم انها عارفة انه بيأكلهم من الحرام الا انها عمرها ما رفضت
اما رقية
خلفت
وسط كل اخوات فتحى
اللى مكانش يقدر ييجى من خوفه وقلقه من ميرفت
وكل علاقته بالطفل انه سجله باسمه
اخوات فتحى كانوا علطول بيودوها
ويطمنوا على مجد
اللى كان من سن بنت عمه علي
وكتير اتكلموا فى انه هيكون هو جوزها
كانت رقية محافظة معاهم على الود وصلة الرحم
بعيد عن اى حاجة
حتى دهمان
اخوهم
ابنها وابنه
هو ابن اخوهم
برغم انهم ميعرفوش اى حاجة عن اللى بيحصل
بين رقية وبين دهمان
اما دهمان
اوقات كتير كان بياخد رقية للعالم بتاعهم
عن طريق السرداب اللى تحت الاوضة
شافت العالم اللى وصفه عثمان
بعنيها
وكأنه موصفش المكان باللى يستاهله
لكن هى كانت رافضة تسيب اهلها وتعمل نفس اللى حماتها عملته
هى اه مشافتش زهرة
لكن عرفت من دهمان
ان هى اللى كانت بتتكلم معاها
وبتطمنها قبل ما يظهرلها دهمان
وهى اللى كانت علطول بتعلمها ترد بأيه وامتى وازاى
بس يمكن زهرة كانت مجرد طيف
علشان كده مظهرتش ولا مرة لرقية
لكن بالنسبة لدهمان
هى موجودة دايما
فتحى كان ناسى تماما انه عنده طفل
من رقية
وناسي رقية عموما
وكانت رقية مش بتجيب سيرة فتحى ابدا
لكن وجود اخواته وودهم ليهم
كان بيكون السبب الوحيد فى ان مجد يسمع سيرة فتحى كتير
منهم هما مش من امه
فاطمة نسيت او تناسيت الحكاية بتاعت البيت
ومجابتش سيرتها تانى من بعد ما جوهرة اتكلمت معاها
وحاولت تعيش كأنها مسمعتش اى حاجة عن ذكريات اهل جوزها
وكانت ونعمة الام والزوجة
خليل ومجد كانوا اصحاب جدا
حاولت جوهرة تقنعه يتجوز رقية
وهو اولى بأخوه
لكن هو رفض
وقال ان رقية وابنها مسؤولين منه من غير ما يتجوزها
فاتت الايام والسنين بسرعة
كل حد منهم حاله بيتغير للأحسن
الا فتحى
مجد كان كل ما بيكبر
كل ما بيبقى واخد شكل امه وجمال وروح دهمان
رقية.دهمان
خلاص ابني كبر
دهمان.ابننا كبر
رقية.اخواتى اتجوزوا
ومرتاحين فى بيوتهم
امى وابويا كمان مرتاحين
دهمان حاسس باللى هتقوله
ومبسوط
رقية.وجه الوقت اللى اجى اعيش معاك فى العالم بتاعك
ابني خلاص عرف اهله
وقرر انه يبداء حياته
دهمان.هتسيبيه
رقية.لاء عمري
هكون معاه
يوم ما يخلص دراسته
يوم ما يتجوز
يوم ما يخلف
بس هقوله انه من حقه يكون له مكان احسن من اللى انا معيشاه فيه ده
انا عايشة فيه علشانك
لكن مجد ميعرفش عنك حاجة
ومش ذنبه يفضل عايش فى بيت زى ده عمره كله
دهمان.خلاص
شوفى عايزاه يعيش فين
رقية بسعادة.فى مكان كويس
دهمان.شاورى
رقية كان قلبها بيطير من الفرحة
برغم ان فاتت سنين كتير
الا انها لسه صغيرة
ده هو السن ده اللى كانت المفروض تبقى لسه بتبداء حياتها فيه
سنية وعم عثمان اتوفوا
عواطف اتجوزت ومشيت من البيت
ام العربي لسه عايشة
بس كبرت اكتر
وكانوا عيالها بعد ما اتجوزوا بيقعدوها عندهم كل واحد منهم اسبوع
فضى البيت تقريبا على رقية
وكام ساكن جديد فى الناحية التانية من البيت
رقية.مجد
مجد.نعم ياماما
رقية.انا عايزاك بقى تطلع من البيت ده
عايزاك تعيش فى بيت تبقى مبسوط فيه
وتتباهى بيه قصاد اصحابك
مجد.بس انا مش مضايق يا ماما
رقية.عارفة
انا اللى مضايقة
البيت قرب يقع علينا يا مجد يابنى
ومن حقك
تعيش فى بيت زى بيوت الناس
مجد.ماما انتى قررتى نعزل خلاص
رقية.بص انت اللى هتعزل
انا بيتي ده مش هقدر اسيبه
لكن انا هبقى معاك كل يوم
واجى بيتي انام فيه
وهفضل معاك كل يوم لحد ما تلاقى بنت الحلال
وتتجوز
مع ان بنت الحلال موجودة
مجد بابتسامة.ااااه انتى اكيد قصدك على بنت عمي علي
رقية بتضحك.مش هنلاقى احسن منها يا حبيبى
مجد.لاء مش هنلاقى
رقية.قولى يا مجد
مش عايز تشوف ابوك
مجد.ابويا مين
ارتبكت رقية من السؤال
وفكرت ان مجد عارف حاجة
مجد.مالك ياماما
انا بسألك ابويا مين
هو انا عمرى شوفته طيب علشان تسأليني سؤال زى ده
شوفى يا امى
انتى امى وابويا
خالى اشرف وعمي علي وعمي خليل
هما اللى ابهاتي
لكن فتحي ده مش اكتر من اسم فى شهادة ميلادى
رقية.هننزل بكرة مع خالك اشرف
وعمك خليل نشوف شقة
مجد.ماشى يا ست الكل
رقية.ونروح نتكلم على بنت عمك
ونربط اتفاق
وبعد ما تخلص دراستك
تتجوزوا علطول
مجد.انتى مستعجلة يا ست الكل
رقية.عايزة افرح بيك يا مجد
مجد.انا موافق
فعلا كان اشرف وخليل علطول بيساعدوا رقية فى مصاريف ابنها
وبرغم انها مش محتاجة مساعدتهم
الا انها مكانتش تقدر ترفضها علشان محدش يسألها هى منين بتمشى امورها
برغم ان دهمان وقبيلته
كانوا هما المسؤولين عن كل حاجة خاصة برقية وابنها
وده كان سبب فى ان رقية تقدر تحوش مبلغ
وهو ده اللى هتقول انها هتشترى منه الشقة
شافوا الشقه وعجبتهم
فرح بيها مجد
وفرحت رقية بفرحته
اما دهمان
كان معاهم وحواليهم فى كل لحظة
اتفقت رقية واشرف مع علي وخليل وجوهرة وفردوس
على ان الجواز يبقى بسرعة وميستنوش لحد ما يخلص
والاتنين يكملوا تعليمهم مع بعض
كان فتحى يشوف مجد ورقية او مجد وخليل
كان يعمل نفسه ميعرفهمش
وهو من الفضايح اللى كان بيعملها
كانوا بيتكسفوا منه
حاولت جوهرة اكتر من مرة
تخليه يقرب من ربنا
لكن كأن الشر هو اللى غالب عليه
رقية كل اليوم مع مجد فى بيتهم الجديد
وترجع بليل تلاقى دهمان قدام عنيها
ياخدها للعالم بتاعه
لحد ما النهار يطلع
شافت كل حاجة حلوة
وكأن عالم الجن والعفاريت اللى بيخوف ده
مجرد اسطورة
اخيرا اتجوز مجد
رقية.مبروك يا مجد
مبروك ياحبيبى
مجد بيحضن رقية.ربنا يخليكي ليا يا امي
مديت رقية ايديها فى شنطتها
وطلعت دفتر صغير
مجد.ايه ده يا امي
رقية.دى هديتي ليك يا حبيبى
بس اوعى تفتحها غير لما انا اطلب منك
مجد باستغراب.حاضر يا ماما
بس فهمينى ايه ده
رقية بسعادة.بقولك هدية
متسعجلش يا حبيبى
بس اعرف ان طول ما انت اللى جواك خير
مش هتلاقى فى طريقك وحياتك غير الخير
وانا معاج وجنبك دايما يا مجد
مجد.هو فيه حاجة ياماما ولا ايه
رقية.لاء يا قلب امك
اشرف مقاطع لكلامهم.مش يلا بقى يا عريس
خلونا نتصور صورة عائلية كده
رقية بسعادة.يلا بينا
جمعت الصورة
اشرف ومراته وبسمة وجوزها وبنتها الصغيرة
ورشا وجوزها واولادها الاتنين
وخليل ومراته
وعلى وفاطمة وبناتهم بأجوازهم واولادهم
حتى جوهرة وفردوس
كانوا فى الصورة بأجوازهم واولادهم واحفادهم كمان
كانت احلى صورة اتصورتها رقية
لأن فى الوقت اللى كانت واقفة جنب ابنها
كان واقف وراهم دهمان
اه مبانش فى الصورة
لكن كانت حاسه بيه جنبها بيشاركها فرحتها بابنها الوحيد
خلص الفرح
نبوية وجوزها موجودين
لكن سنهم مش مساعدهم يطلعوا يتصوروا مع العريس
وعلشان كده قبل ما يمشى مجد ومراته قربوا منهم واتصوروا معاهم وهما قاعدين
رجع مجد بيته مع مراته وبنت عمه
وكانت احلى اختيار
برغم انها اكبر منه بشهر
لكن هو كان ليها اب واخ وصاحب
من فرحته
شال هدية رقية فى دولابه ونساها
عاش مع مراته احلى حياة
معاه رقية علطول
وفى حياتها هى مع جوزها وابوا ابنها
برغم عدم اعتراف اى عقل بعلاقتهم
الا انهم اكتفيت بيها لها لواحده
ولما قرر اشرف يضغط عليها بأنها خلاص مينفعش تعيش لواحدها
كانت اخدت قرارها
راحت لمجد بيته
رقية.مجد
اقعد عايزة اقولك كلمتين
قبل مراتك ما تيجي
مجد بقلق.فى ايه يا ماما
مالك تعبانة
رقية.لاء يا حبيبى انا زى الفل
بس فاكر الدفتر اللى عطيتهولك يوم فرحك
مجد بيفتكر.ااااه معايا فى الدولاب من يوم الفرح مجيتش جنبه
رقية.بعد ما امشى من عندك هنا بساعتين زمن
عايزاك تفتحه
وتقرا كل حرف فيه
مجد باستغراب.ليه يا ماما
اشمعنى يعني بعد وقت محدد
رقية.اسمع كلامي بس
وبعد ما تقراه
هتلاقينى كتبالك حاجة فى اخر الكتب فى الجلاد
هبقى استناك يا مجد
يلا يابنى
سلملى على مراتك بقى لما ترجع من عند عمك
اشوفك على خير يا حبيبى
مجد سلم على امه اللى رفضت انه ينزل يوصلها
وراحت على بيتها
رقية.دهمان انا جاهزة
دهمان.متأكدة
رقية.اه متأكدة
انا مش هقدر اقف قصاد اخويا واكسر كلامه
ومش هقدر ابعد عن هنا ولا عنك
وعلشان كده مفيش حل غير انى ابقى معاك علطول
مش هسيب بيتى وبيت ابنى
ومش هبعد عنك
دهمان بسعادة.ده وقت الاحتفال بجوازنا يا رقية
وفى لحظة
كانت رقية فى مملكة بني قيعان
اللى احتفلوا بزفاف اميرة اوسم شباب بني قيعان
كان عهد الدم بينهم هو عقد جوازهم
دليل على ارتباطهم ببعض للأبد
ومجرد ما عاشت رقية اللحظات دى
كأن ذاكرتها رجعت ذاكرة طفل صغير
نسيت كل حاجة حصل في حياتها
الا ابنها مجد
اللى كانت عارفة انه هيقرا كل حرف حصل فى حياتها
هى استعانت بدهمان فى كتابة كل خط فيه
وعارفة ان مجد مش هيتأخر انه يرجع كل فترة والتانية للبيت اللى امه وابوه موجودين تحت ارضه
وروحهم محاوطة كل ركن فيه
مجد.انا فعلا قريت الكلام
اللى حسيت انه ربطني
اه اتعلمت
واه مش بقتنع بالكلام ده كله
لكن طول عمرى حاسس ان فيه حاجة غريبة فى حياتى انا وامي
كل حاجة بتواجهنا كانت سهلة
كل حاجة بنحتاجها بنلاقيها
حتى عمامى وعماتي
كانوا علطول يقولوا امك فى حماية ربنا والغالية وابنها
كانوا عارفين كل حاجة
وسكتوا
كل السنين دى حاسس بس متخيلتش ان اللى مكتوب ده هو اللى كان مستخبي عني
راح مجد للبيت
وسمع همس رقية
وسمع همس دهمان
اللى اول مرة يسمع صوته
طمنوه انهم جنبه ومعاه
وانهم هيفضلوا ساندينه طول عمره
طول ما هو مكمل فى طريق الصح
اليوم ده
بعيد عن ان كل اللى قريته كان غير عقلانى بالمرة
وواحد زيي كان سهل ميصدقش
لكن فرحتى ان فتحى ده مش ابويا
وان الراجل اللى سمعته السيئة سبقاه فى كل مكان هو واولاده ومراته
ده انا مش من صلبه
كانت تفوق اى حاجة تانية
مش عارف ان ابويا من الجن
وان امى عاشت تحت الارض
دى حاجة المفروض يكون رد فعلي عنها ايه
لكن محسيتش ان انا المفروض ازعل
امى معايا علطول
يمكن هى مش بتجيلي
لكن انا كل ما بروح البيت
بسمعها
وبحس بيها
واوقات بشوف طيفها كمان
وعلطول دهمان معايا
فى كل مكان
وكأنه الحامي ليا
كل العيلة عرفت ان امى سافرت وقررت تعيش لواحدها
برغم ان اهل ابويا مصدقوش
الا انهم حاولوا يقتنعوا بالكلام ده علشان اهل امي يصدقوه
هما عارفين ان امي محصلش لها حاجة وحشة
وراحة نفسيتى واطمئنانى عليها
مطمنهم انى عارف كل حاجة عنها ومرتاح
وجودهم جنبي بعد ربنا ساعدني فى كل حاجة
كل يوم اسمع اخبار عن فتحى الرايق واولاده
ومراته اللى مش سايبة حد مش بتتشاكل معاه
لكن بعمل نفسى مش سامع
برغم انه اسمه ورا اسمي
لكن مش حاسس بوجوده ابدا
لما خلفت
وحسيت يعنى ايه اب
ويعنى ايه قلبي يعيش احساس الابوة
حسيت بأمي واللى عاشته معايا
وعلشان كده
حبيت كل كلمة هى كتبتها فى حكايتها
كل الناس تعرفها
لأن انا لازم اشكرها بكل الطرق على اللى عملته واستحملته من اول حياتها لحد اخر عمري
وعارف ان الناس لما تقرا حكايتها هما كمان هيشكروها
لأنها ست تستاهل الشكر
رقية.دهمان
دهمان.اميرة دهمان
رقية بأبتسامة.هو انا لما اموت
هتفتكرني
دهمان بيضحك.هو ده طبع الانسان
دايما اى اوقات حلوة فى عمره بيعيشها
لازم يدور على الزعل
رقية بتضحك.الله مش اطمن هتنساني ولا لاء
دهمان.يعنى لو قولتلك مش هنساكي هتصدقينى
رقية بحب.لاء طبعا
دهمان بيضحك.علشان تعرفي البشر مش بيصدقوا حاجة
خليكي فى السنين اللى هنعيشها سوا
اتمتعى معايا بكل وقت احنا فيه مع بعض
وعايزك اى حاجة اقولهالك يا رقية تصدقيها
زى ما اللى حصل بيني وبينك مفيش حد سهل يصدقه
يبقى لما اقولك ان انتى قدام عيوني فى كل لحظة حتى لو مش هتكوني معايا
يبقى صدقينى
رقية بسعادة.انا بس كنت عايزة اسمع الكلام الحلو ده
دهمان.وانا من امتى قولتلك كلام مش حلو
رقية.ابقى بكدب لو قولت مرة حتى
انا من يوم ما حسيت بوجودك جنبى ومعايا
وانا بعيش احلى عمر
مش عارفة ازاى كل حياتى دى والحلو اللى فيها يكون مع عفريت
لكن هو ده اللى حصل
دهمان بيضحك.مش عايزك تنسى ان امى انسانة زيها زيك
رقية.كان نفسى اشوفها
دهمان.هى دايما معانا
زى ما انا عارف ان انتى دايما معايا
رقية.انا عشقتك
دهمان.وانتى هديتي
تمت
يااااااااااااااااااااااااااااارب تكون النهاية عجبتكم
تعليقات
إرسال تعليق
فضلا اترك تعليق من هنا