رواية نادرة قلبي الفصل 36-37-38-39-40الاخيربقلم دعاءاحمد (جميع الفصول كامله )

 رواية نادرة قلبي الفصل 36-37-38-39-40الاخيربقلم دعاءاحمد (جميع الفصول كامله )

رواية نادرة قلبي الفصل 36-37-38-39-40الاخيربقلم دعاءاحمد (جميع الفصول كامله )

#نادرة_قلبي... الحلقة السادسة و الثلاثون

عايزاه اقول حاجة في المقدمة انا حقيقي زعلانه انها قربت تخلص لان الرواية دي فيها كتير مني و علشان كدا مش عايزاه انزل الفصول الأخيرة... لكن لكن شي نهاية

        ...............................................

في مكتب النائب العام

مينا كان قاعد أدام النائب العام و هو بيشرح له كل التفاصيل و ادامه الورق اللي يثبت ان شركة الأسيوطي بيحصل فيها شغل كتير من تحت التربيزة و ان طه الأسيوطي هو اللي طلب من شخص يدس لحسن المخدرات

و دا بتسجيل صوتي وجدي سجله لطه وقت ما اتفق معه و فيه ورق مستندات تثبت ان طه متورط في حاجات كتيرة مشبوهة مش بس طه و رحاب كمان

النائب العام بجدية:و أنت وصلت للمعلومات دي ازاي يا حضرة المحامي... 

مينا:حضرتك قلتها انا المحامي بتاع حسن يعني دا وجبي اني اجيب دليل براءته و فيه عند حضرتك الدليل اللي يثبت ان حسن برئ.. و الدافع اللي خلي طه الأسيوطي يكري ناس يدسوا لحسن المخد"رات لان حسن اخد صفقه كبيرة من طه و انا كنت المحامي في الصفقة دي 

اللواء كمال اللباد كان يملك تلات مراكب نقل كبيرة و الوسيط المالي بتاعه عرفة كان متفق مع طه انهم ياخدوا الصفقه بربع التمن تقريبا و فعلا عرفه كان بيوقف كل الإجراءات لو حد سأل عن المراكب دي و كان بيبلغ كمال بيه اسعار اقل من اللي بتتعرض علشان لما طه الأسيوطي يقول عرضه يحس ان دا مكسب ليه

لكن حسن كان السمسار الخواجةاللي اشترا المراكب دي و انا المحامي بتاعه

حسن وقتها قرر يبتزا الوسيط المالي بالحاجات اللي على الموبيل دا مقابل انه يعرفه على اللواء كمال علشان يعرض عليه العرض الخاص الخواجة نيكولاس

النائب العام اخد الموبيل من مينا و بدا يسمع التسجيلات اللي بتدين عرفه و الفيديوهات

النائب العام:طب ليه التسجيلات دي مظهرتش وقت التحقيق او في المحكمه

مينا؛ لان للأسف كان حصل مشكله في الموبيل و اتمسحوا علشان كدا حسن مقالش عليها لكن هو قال المعلومات دي في المحكمة لكن مكنش في اي دليل عليها 

دلوقتي أدام حضرتك كل المعلومات اللي تدين طه الأسيوطي و بنت اخوه رحاب و مدير الحسابات وجدي و عرفة و كل الناس المتورطين في الموضوع دا

و دليل براءة حسن ياريت تاخد قرار لان هو مش مكانه السجن أبدا 

حسن انا اتعاملت مع شاب جدع و عايز ينجح هو وعامر فيه زيهم الف الشباب اللي بيستنوا فرصة بس علشان ينجحوا 

و احنا بأيدينا بندفنهم بالحياة

حسن مسئول عن أسرة و طفل لسه جاي للدنيا و زوجة و أم 

النائب العام ابتسم بجدية

:متقلقش يا مينا البرئ اكيد هينول برائته بس انت عارف الإجراءات لازم نتأكد من كل المعلومات دي... و انا هعمل امر ضبط و إحضار لكل اللي اسميهم انذكرت العدالة لازم تاخد مجراها

مينا تنهيدة :اتمنى يا فندم.... بعد اذن حضرتك 

بعد ساعتين 

مينا و عامر و سمارة و اسلام كانوا قاعدين مع الحج موسى و نادرة اللي بتعيط من الفرحة أخيراً و هي مش مصدقه اللي بيقولوه و حاسه بروحها بتضحك بعد كل الدموع اللي نزلت 

الحج موسى بحب:

=خالص بقا يا نادرة انتي هتقضيها عياط و لا ايه مينفعش كدا يا حبيبتي

نادرة بدموع و سعادة:مش مصدقه يا بابا مش مصدقه أخيراً.... انا مش عارفة اقولكم ايه و الله العظيم جميلكم دا هيفضل فوق رأسي طول العمر

سمارة بحب:

=جميل ايه بس دا حسن دا نفديه بعنينا وقف جانبنا كلنا و ربنا عالم أنه يستاهل كل خير

بحر صقفت بسعادة و حب 

:يعني ابو علي هيرجع تاني... 

مينا بابتسامه :ايوة يا بحر هيخرج قريب اوي 

... زمانه وصله خبر في السجن دلوقتي يعني ان شاء الله اسبوع او اتنين بالكتير اوي و يكون معانا و تعملوا سبوع بقا للقمر الصغير 

جليلة بود :ان شاء الله و أنت يا مينا اول الحاضرين انت و المدام مش أنت متجوز برضو

مينا بابتسامة و هيام:

=ايوة اسمها مريم و على فكرة أنا حكيت ليها كتير عنكم و نفسها تشوفكم

جليلة:خالص ابقا هاتها معاك انا و الله ارتحت لك 

مينا بود: القلوب عند بعضها يا ست جليلة... 

في السجن 

حسن كان قاعد مع سليمان بعد ما جيه من عند المامور و هو مش مصدق اللي قاله 

دموعه نزلت و هو بيحمد ربنا 

سليمان بسعادة

:الف مبروك يا حسن الف مبروك تخرج لاهلك

حسن بسعادة و حماس:

انا مش مصدق يا سليمان حاسس ان قلبي هيقف من الفرحة... انا كنت بدأت افقد الامل مكنتش متخيل انهم برا هيقدروا 

سليمان ربت على كتفه باهتمام:

:أنت عندك ناس كتير بيحبوك و اللي بيحب حد بيقف في ضهره الف مبروك 

حسن :الحمد لله انا هقوم اتوضي و اصلي ركعتين لله... 

سليمان :خدني اصلي معاك 

بعد عشر أيام 

كانوا قبضوا على طه و وجدي و رحاب بقضايا كتير تخص شغلهم و تهمة انهم خلوا شخص يدخل ورشه حسن و يحط له المخدرات 

قبضوا علي عرفة بسبب التسجيلات اللي تثبت انه مرتشي بعد التحقيق معه 

حسن معاد خروجه بكرا 

نادرة قررت ترجع البيت هي و ياسين و بحر 

كانت واقفه بتظبط اوضتهم بنفس الطريقه اللي بيحبها كانت سعيدة جدا 

بصت لبحر اللي كانت قاعدة جنب ياسين و هي بتضحك 

سابتهم و دخلت اوضتها كانت عايزاه اطلع جميلة جداً و مشرقة زي كل مرة بيشوفها فيها 

زي ما كان يتغزل فيها و يقولها انها بتشبه الورد في دلاله و الفراشة في سحره و جمال ألوانها 

اختارت دريس كانوا اشتروه سوا و قررت تلبسه و هي رايحة له بكرا 

بدأت تطلع هدومها الجديدة اللي ملبستهاش ولا مرة و بدأت تقلب في حاجتها من جديد و هي فرحانة 

كانت بتعد الدقايق اللي بتعدي عليها 

غمضت عنيها بسعادة و حب 

:يارب متوجعش قلبي على قريب تاني يارب انا عمري ما تخيلت اني احبه كل الحب دا يارب... أنا اكتشفت اني كنت فعلا محتاجة جدا... نفسي نرجع تاني أسوان تاني و نبعد عن كل الناس اللي حوالينا و نعيش كل لحظة مع بعض من اول و جديد 

خرجت من الاوضة و راحت تجهز الاكل لبحر و طلعت ليهم بعد شوية

:ياله يا بحر علشان تاكلي 

بحر بحماس:هو خلاص حسن هيجي بكرا 

نادرة قعدتها على رجليها و باست خدها بحنان

:ايوة يا حبيبتي هيرجع تاني لينا انتي مبسوطة

بحر:انا مبسوطة اد الدنيا بحالها هو كان وحشني اوي 

نادرة ابتسمت بحب و بدأت تأكلها و هي بتبص لياسين اللي نايم جانبها على الانترية و جاانبهم قطتها 

تاني يوم

حسن غير هدوم السجن و لابس هدومه و هو مستني الوقت اللي يخرج فيه 

صحابه من السجن كانوا بيباركوا له 

مستني اللحظة اللي بوابة السجن تتفتح و ياخد حريته من تاني.... 

و ها قد جاءت اللحظة المنتظرة

كانوا كلهم واقفين منتظرينه

خرج  بص لهم و ابتسم و هو بيحضن أمه بسعادة و هي بتعيط من الفرحة و تبارك و جوزها واقف جانبها 

حضن عامر و سلم على مينا لكن فجأة لقى بحر بتجري عليه بتحضنه 

نزل لمستواها و حضنها بسعادة و باس خدها بحب

:وحشتيني يا اوزعة وحشتيني اوي يا ست بحر

بحر بحماس طفولي

:و انت كمان وحشتني اوي يا بابا 

حسن بصلها و مكنش مصدق الكلمة ابتسم بسعادة و باسها بسعادة

حملها و قام و هو بيدور علي نادرة بعنيه بينهم كانت واقفه بعيد جانب ابوها و هي شايله ياسين و مبتسمه

كانت جميلة جداً جداً جذابة بشكل يخليه يتهور.... دايماً بتطلع أجمل في عنيه و دايما بتعمل كل حاجة علشان تكون الأجمل

بيقولوا ان الجمال بيشوفه بالعين لكن هو شاف الجمال الحقيقي في عيونها اللي دايما ملهوفه و مشتاقة ليه.

أبتسم بحب و راح ناحيتها سلم على والدها و وقف قصادها

نادرة ابتسمت بسعادة

:كنت خايفة يا حسن بس عرفت انه مقدر و مكتوب.... وحشتني يا ابو علي

حسن بأس رأسها و بعد عنها و هو بيبص لياسين اللي كان بيرمش بعيونه و بيبص لحس ببراءة

نزل بحر و اخد منها ياسين

:بسم الله ماشاء الله بسم الله الرحمن الرحيم

نادرة برجاء؛

أنت وحشتنا اوي يا حسن أنا مش عايزاه فلوس و لا عايزاه اي حاجة تبعدك عننا ابوس ايدك بلاش تعمل حاجة تبعدك عننا انا و الله مش هستحمل تاني و الله

حسن اتنهد بحزن و شدها لحضنه بقوة و غمض عنيه

:حقك عليا يا نادرة و الله حقك عليا...

عامر:ياله يا جماعة خلينا نمشي من المكان دا لان انا حقيقي بتشائم منه

اسلام:انا بقول كدا برضو....

مشيرا كلهم معه و هو ركب العربية مع الحج موسى قعد جنب نادرة و هو شايل ياست و بحر قاعدة على رجل نادرة و هو حضنها

نادرة غمضت عنيها و سندت رأسها على كتفه

بعد عدة ساعات

أخيرا رجع البيت و الكل رحبوا بيه و بركوا له و كل واحد رجع بيته و سابوا حسن و نادرة مع اولادهم

حسن بص لبحر اللي نامت على الانترية، شالها و دخل اوضتها نايمها في سريرها و خرج من الاوضة و قفل الباب وراه... 

راح ناحية اوضته و هو مشتاق للبيت و الهدوء الطبيعي اللي فيه.... 

فتح الباب و دخل لقى نادرة بتطلع له هدوم علشان ياخد شاور

ابتسمت بحب اول ما شافته و راحت ناحيته بسعادة

وقفت ادامه و حاوطت رقبته بدلال :

:وحشتني اوي يا حسن اوي 

حسن بابتسامة:و انتي كمان يا نادرة و البيت وحشني و بحر كنت خايف اوي ان عمري يضيع في السجن و.. 

نادرة حطت ايدها على بوقه بسرعة:

=مش عايزاه اسمع اي كلمة بالله عليك مش عايزاه ممكن... أنت من النهاردة بتاعي أنا 

مش هتعمل حاجة غير لما تشاورني يا حسن و لو قلتلك اني قلقانه هتسيب الموضوع دا بسرعة و دا على فكرة أمر مش طلب

حسن ابتسم بخبث و حاوطت خصرها :

=قلبك جمد يا بنت الحج موسى 

نادرة بدلال:علشان معنديش استعداد اني اخسرك فاهم..... بقولك ايه تعالي عايزاه اوريك حاجه 

مسكت ايده و راحت ناحيه السرير مكان ما ياسين نايم قعدت و هو قعد جانبها 

نادرة بعدت البطانية الصغيرة عن ياسين :

:شكله عامل ازاي و هو نايم شبهك يا حسن جميل اوي

حسن ابتسم بسعادة و انحني شالها بحب 

:انتي عارفة يا نادرة أنتم التلاتة قلبي كان مخطوف معاكم و انا بعيد 

نادرة بحب:خالص بأحسن مفيش داعي للخوف تاني صدقني 

حسن حضنها بقوة و هو مش عايز يبعدها عنه

:انا بحبك اوي يا نادرة... حب بيزيد كل يوم و كل لحظة و بيكبر في قلبي كل لحظة لدرجة اني بقيت متيم بيكي و حبي دا زاد كتير اوي في الازمة دي.... لما حكولي عن اللي عملتيه و أنك كنتي واقفه معهم علشان تثبتوا برائتي بقيتي عندي في مكان لوحدك مكان بعيد 

نادرة ابتسمت بسعادة و طلعت بوسه على خده 

:و أنا بعشقك يا حسن و بموت لو بعدت عني... 

حسن اخد نفس عميق و ارتاح اخيرا 

بعد يومين 

حسن طلع من البيت و راح هو و عامر لمينا المكتب زي ما طلب منهم

لما دخل اتفاجأ بوجود الخواجة نيكولاس

الخواجة نيكولاس ابتسم بجدية و هو بيسلم عليه

:الف مبروك يا حسن خروجك من السجن على فكرة انا كنت متابع الموضوع 

حسن بابتسامه :متشكر يا نيكولاس بيه

الخواجة نيكولاس:اتفضلوا اقعدوا

عامر و حسن قاعدوا و مينا معهم 

الخواجة نيكولاس :اتفضلوا 

حسن مد ايده ياخد منه الشيك و بص فيه بدهشة 

حسن:ايه دا؟ 

الخواجة نيكولاس:

:حقكم

حسن :بس أنا و عامر حقنا في موضوع السمسرة عشرة مليون مش عشرين 

الخواجة نيكولاس:تقدر تقول ان بعد اللي حصل دا انا غيرت رأي و كمان بسببك انا تخلصت من أكبر منافس ليا طه اللي دلوقتي بيحققوا معه و الصراحة انا زي ما بتقولوا بالمصري استجدعتك يا حسن 

اعتبر ان دي هدية مني ليكم علشان تقدروا تفتحوا مشروعكم 

قولي صحيح انتم ناوين على ايه... انا شايف انك تفتحوا حساب باسمكم و تحطوا فيه الفلوس دي لحد ما تخططوا و تعملوا دراسة جدول كويسة 

حسن بابتسامه و سعادة:ان شاء الله بس هو احنا كن ناويين نفتح معرض سيارات بس الصراحه لسه خبرتنا مش كبيرة في المجال دا

الخواجة نيكولاس:

خالص انا عندي فكرة .. ايه رايكم تشتغلوا معايا فترة مؤقته لحد ما تكونوا عندكم الخبرة الكافية على فكرة انا مش بهزر ممكن نعمل عقد دلوقتي حالا 

عامر:بس هنشتغل ايه احنا طول عمرنا بنشتغل في الميكانيكا و العربيات

الخواجة نيكولاس:متقلقش يا عامر هو دا تقريبا نفس المجال اللي انا بشتغل فيه بس على كبير شويتين تلاته، مينا هيفهمكوا كل حاجة تخص الشغل لو وافقتوا هتمضوا معه العقد، أنا لازم امشي دلوقتي لان عندي اجتماع مهم.. 

حسن:تمام يا خواجة

نيكولاس:مبسوط اني اتعرفت عليكم يا شباب ربنا معاكم

حسن و عامر ابتسموا و مينا قعد معاهم و بدا يفهمهم الشغل. 

بعد شهرين

حسن رجع البيت و هو تعبان و خصوصاً لانه وافق على الشغل مع الخواجة نيكولاس و قرر يبدأ في المجال بجد و فعلا بأن دا في شغله انه عايز يفهم كل تفصيله كبيرة و صغيرة 

نادرة ابتسمت بسعادة و هي بتخرج من المطبخ :انت جيت يا حسن

حسن بابتسامه :لا لسه برا

نادرة :بايخ بس قمر يا سونة 

حسن:انا بايخ طب بذمتك هو في حد زي انا

نادرة بدلال:لا حبيبي انا جهزتلك الحمام

حسن:كويس انا حقيقي محتاج اخد دش و اريح شوية علشان اقدر انزل الورشة بليل صحيح يا نادرة قبل ما انسى خدي مصروف البيت 

طلع المحفظة من جيبه و ادلها الفلوس 

حسن بجدية؛ انا لسه قابض المرتب اخدت منه اللي يمشيني و دا خليه معاكي انا عارف ان مصاريف البيت كتير و كمان ياسين و بحر 

نادرة:متقلقش انا بعرف اظبط اموري متقلقش حسن هو انت ليه مصمم تشتغل في الورشة حتى بعد ما بقا عندك وظيفه بمرتبة ثابت انا اقصد انك ممكن تاجر الورشة و بلاش الشغلانة دي 

حسن بحزن:انتي لسه بتتضايقي اني ميكانيكي يا نادرة

نادرة بسرعة:و الله ما اقصد يا حسن و الله العظيم ما اقصد انا بس شايفه انك بتتعب نفسك اوي في الورشة بليل و بالنهار في المصنع.. دا عامر قالك انه خالص هيسيب الشغل في الورشة ليه انت متمسك بيها اوى كدا ما الحمد لله مرتبك بيكفينا

حسن بابتسامة:الورشة دي يا نادرة كانت أول حاجة املكها باب رزق ليا منها ربنا كرمني و قدرت اجهز تبارك و اجهز شقتنا دي و اصرف على بيتي علشان كدا مش عايز اسيبها و هفضل شغال فيها طول ما فيا صحة

اومال فين الولاد مش سامع ليهم صَوت

نادرة بابتسامه :عند جليلة قالت انهم وحشنها و اخدتهم 

حسن ابتسم و غمز لها؛ 

يعني مفيش غيرنا انا بقول بلاها ورشة النهاردة يا قمر أنت... 

نهاية الفصل.... دعاء احمد

#نادرة_قلبي.... الحلقة السابعة و الثلاثون

قيل في الحب الحلال:

" إنِّي وقعتُ و لم أَبُح يوماً لها ..

لم أقترِب مع أنيِ أبغيها ..

فحياؤُها و الله يكبِحُ جُرأَتيِ..

لكن غداً سأدقُ بابَ أبِيهاَ..

"بعد عقد القرانِ قال لها: 

" لقد كلٌَفنيِ الوصُول إليكِ كثيراً من الصدقاتِ ، و عدداً هائلاً من الدعوات في جوف الليل ،و لم يبقَ مسجدٌ في المدينة إلا وكان لي أثرٌ به كان الطريقُ إليكِ صعباً .. و لكن كان وعدُ ربي حقاً 

و نِلتُ منزلتيِ في قلبك.......

                                       حسن لنادرة

تمر الأيام و تمر الليالي و يبقى حبي لكِ ثابت لا يغيره الزمان

بعد مرور سنة و نص .. في بيت الصياد

نادرة كانت بتحضر الغداء، بحر كانت بتعمل واجب المدرسة و ياسين بيحبي على الأرض جانب بحر 

نادرة لمرجانة في الموبيل

:خالص يا مرجانة أنا هعدي عليكي بليل بطلي عياط بقا و بعدين ما انتي عارفة يحيي دايماً تتخانقوا و بعدها بيصلحك 

مرجانة بضيق:

:بس المرة دي غير يا نادرة أنا زهقت من كتر الخناق

نادرة بابتسامة:بس بتحبيه و عارفه انه بيحبك و بيثق فيكي و أكيد ضغط الشغل لازم تقدري كل دا يا حبيبتي و لما يهدأ اتكلمي معه بهدوء و احكيله عن اللي بيضايقك منه لان صدقيني لو انتي اتكلمي معه دلوقتي و هو شايط هيحصل مشكله اكبر لازم تهدي و هو يهدأ 

نغم :يا نادرة أنا فاهمة قصدك بس أنا مش انتي و نبيل مش حسن... هو فيه زيك أنتي و حسن يا نادرة محدش بيسمع صوتكم و لو اتخانقتوا بيصلحك حتى لو أنتي اللي غلطانه حظوظ

نادرة :أعوذ بالله من عينك يا بت اعوذ بالله 

بت يا مرجانة انتي بصالي في حياتي كدا ليه

يخربيت سنينك يا بت 

مرجانة بضحك؛ و الله ما قصدي بس حقيقي تعبت من الخناق يا نادرة و مش عايزاه دا يأثر على مالك  

نادرة:يبقى تتكلمي معه و تصارحيه يا مرجانة...

مرجانة :ماشي يا ستي قوليلي انتي بتعملي ايه دلوقتي 

نادرة:بجهز الغداء عاملة مكرونة بالبشاميل و جلاش و بعمل السلطة 

مرجانة:بالهنا والشفا ياسين و بحر عاملين ايه؟ 

نادرة:بخير الحمد لله... بقولك يا نغم حماتي عايزانا نجيب اخ كمان لياسين

مرجانة بصحك :و الله هي طلبت كدا

نادرة:مش بالظبط بس الكلام جاب بعضه بس بصراحة انا مش مستعدة دلوقتي لأي حاجة مدرسة بحر و ياسين سنة و تمن شهور يعني انا مش هقدر اهتم باي حد تاني دلوقتي 

مرجانة:طب و حسن رأيه أيه 

نادرة:بصي هو مش معترض و مش بيزن على الموضوع اوي يعني و كمان هو مركز أكتر في الشغل من ساعة ما ساب المصنع مع الخواجة نيكولاس و هو مركز انه يقوم مشروعه هو و عامر 

مرجانة بحب:ربنا يوفقهم يا نادرة يارب بس اقولك حاجة لازم تخلي بالك عليه و عينيك دايما تبقى عليه

نادرة باستغراب:يعني ايه؟ 

مرجانة:يعني يا حبيبتي جوزك دلوقتي ربنا كرمه و عنده معرض لقطع غيار السيارات و الراجل يا حبيبتي لما يطلع على وش الدنيا و يحس انه بقا من الطبقة الغنية عنيه بتبدأ تزوغ على دي و دي

او ممكن اي واحدة كدا و لا كدا تحاول توقعه

نادرة:حسن؟! لا طبعاً بصي يا مرجانة انا و حسن مش عشرة يوم علشان افكر فيه بالطريقه دي أصلا حسن بيحبني و انا بحبه اوي كمان 

حسن أصيل يا مرجانة و قلبه اتختم بختم حبي ليه و عمره ما يخو"ن

مرجانة :أنا ممكن احسدك على فكرة من غير ما اقصد يا نادرة لان العين و القلب ساعات يحسدوا من غير ما يقصدوا علشان كدا بلاش تقولي الكلام الحلو دا لحد حتى أنا و خالي الكلام دا لابو على ماشي يا ست نادرة

نادرة بحب:

مع اني مش مقتنعه بس ماشي بقولك تيجي نروح جليلة بليل وحشتني بقالي يومين مروحتش عندها 

مرجانة:بلاش انا النهاردة روحي انتي و انا هبقي اروح بكرا 

نادرة غسلت ايدها و مسكت الموبيل و خرجت من المطبخ:

:ماشي يا حبيبتي بس خالي بالك على نفسك هكلمك تاني.... 

مرجانة؛ ماشي يا عسل سلام مؤقت..

نادرة قعدت تلعب مع بحر و هي بتمسك ايد ياسين علشان يمشي اول خطواته.... 

            *******************

بعد ساعة و ربع تقريباً 

حسن وصل البيت و باين عليه الحماس و السعادة، طلع السلم بسرعة فتح الباب لقاهم قاعدين في الصالة، ابتسم بحب 

:السلام عليكم ورحمة الله وبركاته 

:و عليكم السلام ورحمة الله وبركاته 

بحر قامت بسرعة جريت عليه تحضنه

حسن:وحشتيني يا اوزعه

بحر بضيق:متقولش اوزعه انا دلوقتي بقيت كبير في سنة تانية ابتدائي يعني كبيرة

حسن بمرح :خالص خالص متزعليش كدا هاتي حضن كبير بقا علشان انتي وحشاني اوي 

بحر ضحكت بسعادة و حضنته و هو شاله على كتفه و قعد جانب نادرة على الأرض، اخد منها ياسين و ضحك بسعادة 

:وحشتني يا قلبي أنت... 

ياسين ضحك بطفولية و هو بيحاول يقوم و يمشي و حسن ماسك ايده و هم التلاتة بيلعبوا 

نادرة ابتسمت و سابتهم و قامت تجهز السفرة 

حسن :بحر خالي بالك على اخوكي لحد ما اجي 

بحر:حاضر بس دا بيعض شوف عمل فيا ايه لما كنت بلعب مع ماما 

حسن بص ايديها باستغراب و رجع بص لياسين اللي بيضحك بعدم فهم 

حسن بحزن :بتوجعك لسه؟ 

بحر:شوية صغيرين بس هو أصلا من ساعة ما السنتين دول طلعوا و هو بيعض كل ما اقعد مع ماما بيعيط 

حسن باستغراب :بيغير دا و لا ايه؟! 

طب حقك عليا يا ستي هو لسه صغير و مش عارف هو بيعمل ايه بس بعد كدا خالي بالك و انتي تلعبي معه.... 

بحر :حاضر 

حسن ابتسم و بص للشنطة اللي جابها معه و هو جاي فتحها و طلع منها شكولاته و زبادي بالفراولة و عصير 

:خدي يا ست بحر عارف انك بتحبيهم

بحر بحماس و سعادة:كلهم ليا 

حسن:و أنا عندي كم بحر يعني طبعاً كلهم ليكي 

بحر اخدت منه الحاجة و باسته من خده، طلعت لسانها لياسين و كأنها بتغيظه

حسن ضحك و سابهم يلعبوا و قام دخل المطبخ لنادرة 

نادرة كانت بتطلع الصينية من الفرن 

حسن :اساعدك في حاجة؟ 

نادرة:لو ممكن... خد الأطباق على السفرة

حسن بابتسامة : 

حاضر يا ستي اي أوامر تانية... 

نادرة هزت رأسها بأه و شاورت له انه يقرب 

حسن رفع حاجبه باستغراب و ساب الأطباق و قرب 

نادرة مسكته من ياقة قميصه بغيظ:

بعد كدا لما تجيب شكولاته لبحر هاتلى انا كمان فاهم.... 

باسته من خده و بعدت اخدت الصنيع و طلعت، حسن ضحك بسعادة و اخد الأطباق و خرج وراها 

نادرة :بحر ياله يا حبيبي علشان نتغدا 

بحر و هي بتاكل شيبسي 

  :انا مش عايزه اكل يا ماما 

نادرة :هقول ايه كله منك يا حسن قلتلك الف مرة بلاش شيبسي بيوجع لها بطنها و بيخليها مش عايزاه تاكل اتفضل أنت بقا اقنعها

حسن لبحر:عجبك كدا دي ست مفترية بتاع مشاكل تعالي ناكل علشان ممكن تعملنا مشكله

بحر بحزن :مش عايزه اكل يا حسن بطني بتوجعني لما باكل 

نادرة بزعل:علشان مش بترضي تاخدي الدوا بتاع بطنك انا تعبت و الله

سابتهم و دخلت المطبخ.... حسن قعد جانب بحر بحزن

:ممكن اعرف ليه مش بتأخدي الدواء انتي عايزاه تزعلينا.... 

بحر:الدوا مر اوي يا حسن 

حسن بتفهم:حبيبتي انا عارف بس لازم تاخديه علشان تبقى كويسة و تعرفي تاكلي و تكبري انا اصلا لو كنت أعرف انك ماخدتهوش مكنتش هديكي الحاجة دي لأنها اصلا بتتعبك

بحر سكتت و وطت رأسها بحزن

حسن بمرح و خبث:

بس ممكن اجيبلك كل الحاجات اللي تحبيها لو اخدني الدواء 

بحر دموع:خالص هخده بس بلاش نادرة تزعل 

حسن:هي بتزعل لما تحس انك مش كويسه علشان كدا وعد تاخدي الدواء؟ 

بحر:وعد و الله هاخده على طول 

حسن ابتسم بحب و شالها على كتفه:

يبقى ياله بينا بقا ناكل علشان الاكل ريحته حلوة اوي... 

بحر:حاضر 

قعدوا ياكلوا كلهم و نادرة شايله ياسين على رجليها و بتاكل بحر 

حسن كان بيبصلها و مركز معها و افتكر اول مرة شافها زمان و هو عنده 19سنة كانت جميلة جداً و حنينه على القطط 

و عدت الأيام و دعواتها استجابت و بقيت قسمته و نصيبه. 

نادرة:سرحان في ايه... حسن 

حسن؛ ها؟ 

نادرة :ها ايه الاكل هيبرد مش بتحب البشاميل سخن ياله 

حسن؛ طب ياله سيبي بحر هي بتعرف تاكل لوحدها و كلي.... صحيح في مشوار لازم نروح سوا بليل 

نادرة:مشوار ايه؟ 

حسن بجدية:هنودي ياسين و بحر عند ماما و نقعد معها شوية و بعدها هاخدك و نشوف المفاجأة 

نادرة :مفاجأة ايه؟ 

حسن؛ بليل يا نادرة... 

بعد وقت طويل 

خرجوا الاتنين من بيت والدته بعد ما قعدوا معها هي و تبارك و سابوا بحر و ياسين

حسن ركب الموتسكل و وراه نادرة و اتحرك

بعد حوالي ساعة

 وقف في شارع في مكان معروف أدام مكان متغطي بالقماش من فوق

نادرة:ايه دا

حسن ابتسم بسعادة و مسك ايديها و عدي و هي معه

دخل جوا المعرض اللي كان منظم بشكل أنيق و شيك جدا

بدأت تتفرج على مكان باعجاب 

نادرة بابتسامة و صدمة:

هو دا المعرض اللي نفسك تفتحه

حسن هز راسه بأه؛ 

بصي هو محتاج شغل كتير لسه و يعني محتاج يبقى فيه موظفين كويسين بس اول ما شفت المكان دا حسيت انه هيبقى فتحة خير لينا 

نادرة بحماس؛ الف مبروك يا حسن ربنا يوفقك طب انت اشتريته و لا لسه 

حسن:بصراحة لسه قلت اجيبك نتفرج عليه سوا 

نادرة:المكان شكله حلو اوي و في مكان معروف.... بس قولي أنت ناوي تشتريه لوحدك و لا انت و عامر زي معرض قطع الغيار 

حسن :هو انا و عامر بنفترق يا بنتي ان شاء الله اه و معانا سليمان و مينا 

هو هيهتم بالشئون القانونية و كل حاجة تخص القانون انا كلمته و هو رحب بالفكرة جدا

نادرة بقلق :سليمان يا حسن أنت متأكد؟ 

حسن: نادرة سليمان اتحبس ظلم بسبب رحاب و بعدين فات سنة و نص و عرفنا نثبت انه كان برئ و عملنا قضيه تعويض و ربنا اثبت برائته يمكن متأخر و قضي اربع سنين في السجن ظلم لكن أنا قعدت معه في السجن يا نادرة و في السجن محدش بيتجمل كل واحد بيبان على حقيقته و صدقيني هو شخص كويس، و على فكرة سليمان كلمني و قالي انه عايز يتجوز سمارة 

الحمد لله وصل لبنته و اتطمن عليها و اخد حكم من المحكمه انه يشوفها لان والدتها كانت رافضه 

حياته بدأت تستقر و ناوي يتجوز و كمان دا شغال معايا في المعرض من وقت ما خرج من السجن و آمين جدا 

نادرة؛ طب و سمارة وافقت و لا لسه؟ 

حسن:مش عارف الصراحة بس حاسس أنها هتوافق و كمان عامر فرحه قرب خلينا بقا نفرح لهم... 

نادرة؛ ربنا يسعدهم كلهم يا حسن يارب 

حسن ابتسم بخبث و هو بيقف قصادها 

:طب بقولك ايه احنا الحمد لله ربنا فتحها علينا و أنا دنيتي اتظبطت جدا انا و الشباب انتي بقا مش نفسك في حاجة 

اطلبي اي حاجة نفسك فيها... 

نادرة بتفكير: نفسي تعمل حاجة يا حسن بس ماتفهمنيش غلط 

بص انا نفسي تمسك شغل بابا هو صحته مش أفضل حاجة و محتاج يرتاح و هو عمره ما هيهدا غير لما يتأكد ان معارض الأجهزة الكهربائية ماشيه تمام و هو طلب مني اقولك يا حسن هو بيحبك و بيثق فيك و عارف انك ذكي هتعرف تحافظ عليه

هو لو كان واثق أن يحيى جوز مرجانة بيفهم في الشغل دا مكنش هيتردد يطلب منه و دا مش تقليل منك يا حسن بس بابا تعب لحد ما كبر الشغل دا بالله عليك فكر يا حسن 

حسن :حاضر يا نادرة انا ياستي هروحله بكرا و اقعد معه افهم الدنيا ماشية ازاي

نادرة :بجد؟ روح يا حسن ربنا يسعدك على اد تعبك يارب... 

حسن :انتي سعادتي يا نادرة و كفاية وجودك معايا انتي و الولاد، غمضي عينك بقا

نادرة بصتله باستغراب و غمضت عنيها، حسن طلع خاتم من جيبه و لابسه ليها... 

نادرة فتحت عنيها و بصت للخاتم :

دا ليا؟! 

حسن بابتسامة:اه يا ستي ايه رأيك؟ 

نادرة بحب:دا حلو اوي يا حسن حلو اوي 

حسن :مبروك عليك يا نادرة قلبي.... 

نادرة :نادرة قلبك؟! حلو الإسم دا يا حسن 

حسن :طول عمرك نادرة قلبي من يوم ما عيني شافتك.... 

نادرة بسعادة :انا بحبك يا حسن بحبك اوي 

عمري ما تخيلت اني هبقي سعيدة كدا

حسن:و أنا بموت فيكي...

بعد يومين 

حسن كان عند والدته نايم و حطط رأسه على رجليها و هي بتملس على شعره بحنان

حسن :ربنا كرمني اوي ياأمي كرمني بالوسع و حبب فيا خلقه.... كان نفسي ابويا يبقى موجود و عايش يشوفني و انا بكبر اسم الصياد 

دعاء بابتسامة:محمود زمانه مرتاح في قبره يا حسن ادعيلها بالرحمه يا ابني

و اوعي الغرور ياخدك في يوم من الايام مهما نجحت او حققت لان الغرور يا ابني آخرته وحشه اوي..... و أنت بتكبر و بتكبر أسمك اوعي تنسى حق الغلابة و اوعي تيجي على غلبان و تفتكر ان في حد ممكن ياخد منك رزقك كل واحد بياخد نصيبه يا حبيبي

و خليك حنين علي أهل بيتك و اوعي يجي اليوم اللي تقل فيه باصلك و تيجي على نادرة لأنها استحملت معاك في بساطة الحال و في اسوء الأحوال و كانت واقفه في ضهرك

اوعي يا ابنى تغش او تاخد حق مش حقك و خالي بالك على اختك دايما فاهمني يا حسن

حسن ابتسم براحة و بأس ايديها :

ربنا يديمك لينا بخير دايما يارب 

دعاء:و يسعدك يا ابني

حسن اتعدل و قعد ادامها

 :على فكرة انا عندي ليكي خبر حلو 

انا حجزت ليكي في موسم الحج الجاي و ان شاء الله السنة دي تبقي على جبل عرفات و تلمسي الكعبة 

دعاء بصتله بعدم تصديق و دموعها نزلت 

:بتتكلم جدا يا حسن؟! 

حسن بأس ايدها :بتكلم جدا يا ست الكل 

دعاء بسعادة و دموع:

انا مش مصدقة معقول ذا انا كل يوم بدعي ربنا أني ازورها قبل ما اموت 

حسن بحزن :بعيد الشر عنك يا ماما دا انا اتوه في الدنيا من غيرك 

اتوه لو انتي مش جانبي دا 

مهما حبيت ناس أنتي بالذات فوق الكل أنتي بالذات مقدرش ابعد عنها احس اني بموت بتخنق.... 

دا انتي اللي قولتيلي اللي يراضي امه ربنا يحبب في خلقه... عمري ما هنسي تعبك علشان تربيني أنا و تبارك 

دموعك و حزنك بعد وفاة ابويا و مع ذلك وقفتي علشانا ربنا يحفظك لينا يا أمي بالله عليكي بلاش الكلام دا 

دعاء :ربنا يراضيك يا حسن يا رب 

حسن ابتسم بحب و نام و سند راسه على رجليها بارتياح 

نهاية الفصل... دعاء احمد 

لسه فاضل فصلين..... نادرة قلبي 

و للحب باب واحد

#نادرة_قلبي... الحلقة الثامنة و الثلاثون

بعد حوالي ست شهور

حسن و عامر فتحوا معرض العربيات اللي كانوا بيحلموا بيه، الي جانب معرض قطع الغيار.

عامر بيجهز لفرحه، اشتري شقة تانية صغيرة في نفس الحي لان الفلوس اللي كانت معه قرر انه يستثمرها في الشغل و واحدة واحدة يكبر.... 

سليمان استلم شغل الحسابات في المعرض و حياته اتغيرت جداً بعد ما خرج من السجن و رفع قضية تعويض بسبب الأربع سنين الظلم اللي اتحبسهم. 

سمارة بتفكر في عرض سليمان في موضوع الجواز متنكرش أنها مبسوطة بالفكرة و معجبه بيه لكن مش عارفة تاخد خطوة جدية فيه... 

جليلة و دعاء وتبارك و  الحج موسى حياتهم ماشية طبيعي جداً بالعكس مليانة فرح 

و خصوصاً لأن تبارك حامل في الشهور الأولى. 

ياسين و بحر دايماً في خناق مع بعض لأنهم بيغيروا من حب حسن و نادرة ليهم.... 

حسن مسك شغل الحج موسى و بيحاول يظبط وقته علشان يوفق بين شغله و شغل والدها اللي فرح جدا بموافقة حسن..... 

....... في بيت الصياد........ 

حسن كان قاعد بيبص لياسين بضيق و لبحر اللي بتعيط.....

حسن:طب ممكن أفهم  أنت معجون بماية عفاريت يالا أنت....

يعني لما أنت لسه مروحتش و لا جيت و ضر"بتها كدا أومال لما تكبر هتعمل ايه... يعني سنتين و نص و عامل كل المشاكل دا 

ياسين كان قاعد جنب بحر و باين عليه انه زعلان رغم أنه مش فاهم حاجة و لا مستوعب بس زعلان  انها بتعيط 

نادرة كانت شايلة بحر  بتهديها لأنها بتعيط بهستريه و حطه ايدها على خدها اللي باين عليه أثر العض بقوة "بفعل ياسين" 

نادرة :حقك عليا يا بحر متزعليش و الله هو ميقصدش... 

بحر بدموع و غضب :لا هو يقصد هو عضني بقصد وشي بيوجعني اوي

نادرة حضنتها بحزن و هي بتبطبط عليها 

:طب خليني احطلك تلج مش هيوجعك... 

بحر كانت بتعيط بشقهات متقطعه 

حسن مكنش عارف يعمل ايه و خصوصاً لان ياسين فعلا مش كبير كفاية انه يزعق له 

حسن بضيق:ممكن افهم عملت كدا ليه؟ 

ياسين مردش عليه و عيط بخوف من نبرة صوته العالية و مسك في نادرة

نادرة :مش كدا يا حسن براحة... 

حسن اخد نفس عميق و هو بيحاول يهدأ لان ضغط و زحمة الشغل مأثرة عليه  

ابتسم بحنان و هو بيشيل ياسين و بيقعد على رجليه 

:أنا آسف يا عم بس أنت كمان غلطان مش كل يوم خناقة يعني خالص بقا... 

ياسين فضل يتكلم كلام مش مفهوم و هو بيعيط، حسن رغم انه مكنش فاهم حاجة لكن ابتسم و هو بيمسح دموعه

بحر كانت بتبص لياسين و هي زعلانة أنها شايفه بيعيط بالشكل دا....قامت و راحت قعدت جنب حسن و فضلت تتطبطب على ياسين 

:خالص أنا مش زعلانة متعيطش... 

نادرة ابتسمت بحزن عارفه انهم بيحبوا بعض لكن فعلا بيتخانقوا كتير جداً و المرة دي قلبت بجد لان حسن كان جاي من الشغل مصدع و لما شاف ياسين بيعضيها بالشكل دا و بيتخانقوا كدا اتعصب عليهم و غصب عنه اعصابه فلتت... 

حسن بحزن:عارفة و الله لو كان كبير شويه و فاهم هو عمل ايه كنت خليتك تضربيه زي ما هو عمل معاكي بس هو صغير.... بس اوعدك مش هيعملك حاجة بعد النهاردة

بحر مردتش على حسن و هي بتقرب من ياسين:

أنت زعلت عشاني.... المرة دي وجعتني بس أنا مش زعلانة أنا عارفة أنك مش قصدك توجعني........

حسن حضنها و غمض عنيه و هو مش عارف يتصرف معاهم ازاي

بعد ساعة تقريباً 

نادرة كانت بتنيم ياسين و حين قاعدة مع بحر في اوضتها 

قام لما اتأكد انها نامت و راح اوضته 

نادرة كانت بطلع هدوم ليها علشان تاخد دش، بصتله بضيق و متكلمتش 

حسن:مالك؟ 

نادرة:مفيش... 

حسن بجدية :عليا أنا؟! مالك 

نادرة بغضب و هي بتحط الهدوم على السرير :

في ان الطريقة دي متنفعش يا حسن أنت بتزعق لطفل عنده سنتين و نص هو اصلا مش فاهم حاجة هو اه عضها و ضربوا بعض بس دول اطفال مينفعش تعلي صوتك كدا معاهم.... 

حسن:و انتي مش ملاحظة أنك بتعلي صوتك عليا دلوقتي.... ثانياً الأطفال دول ضربوا بعض بسببنا إحنا لأننا مش عارفين نتعامل معاهم صح 

عارفة ايه المشكلة 

المشكلة اننا لما بنشوف واحد فيهم بنديله كل الحب و الاهتمام و التاني بيبقى واقف و بيغيروا 

اه بنحبهم الاتنين كتير اوي لكن مش عارفين نساوي المعاملة بينهم و هم الاتنين موجودين، نادرة بالله عليك انا الدنيا كلها فوق دماغي 

و انتي اكتر واحدة شايفه دا و حاسة بيه

 أنتي عارفة اني مبنامش تقريباً من الضغط اللي انا فيه من هنا لهنا و بحاول و الله العظيم بحاول اظبط مواعيدي بس صدقيني  و الله العظيم البيت دا اهم عندي من اي شغل او اي حاجة تانية 

مش عايز اقصر في حقكم بس صدقيني لو الفترة دي صعبة فغصب عني

 فرح عامر غير حاجات كتير و انا بقيت مسئول عن الشغل اللي هو كان بيعمله و صدقيني غصب عني 

غير موضوع الولاد اللي زاد.... أنا آسف حقيقي و الله العظيم بس أنا محتاج القى الهدوء اللي افتقدته، محتاج القيه في حضنك على الأقل، لو اتعصبت فدا غصب عني بسبب اللي بمر بيه الفترة اللي فاتت بس حقيقي انا محتاجك جانبي..... 

نادرة بصتله باستغراب و هي حاسة لأول مرة انها مقصرة معه و انشغلت مع الولاد 

قربت منه بحزن و حضنته و غمضت عنيها 

:حقك عليا يا حسن..... بس صدقني أنا مكنتش فاهمة اللي بتمر بيه أنت طول الوقت بتبين انك كويس و لما بتكلم معك مش بتحكيلي عن همومك في الشغل بس صدقني حاسة بيك و على فكرة الولاد بيحبوا بعض اوي يمكن لأننا مش عارفين نسيطر على حبنا ليهم أدام بعض بس صدقني هم بيحبوا بعض اوي 

و دموع ياسين غالية اوي على بحر و دموع بحر متهونش عليه رغم انه صغير و مش فاهم حاجة بس حاسس و بيحبها و صدقني دي شقاوة أطفال مش أكتر.... 

حسن كان ساكت و هو ضممها لحضنه بخوف... فضل علي وضعه لوقت طويل محسش به بس محتاج يفضل كدا 

بعد يومين في القاعة "فرح عامر" 

عامر كان بيرقص مع "ياسمين" مراته ، كان وسيم جدا و فرحان جدا 

و حسن معه و مينا و اسلام و سليمان و عبد الرحمن والده 

و شباب المنطقة و كل اهل الحي تقريب 

عامر كان واقف على الاستيج و بيرقصوا سوا و هو مبتسم و فرحان. 

نادرة كانت واقفة مع سمارة و بحر و نغم و هم بيتكلموا 

سليمان :احم ممكن ثانية يا سمارة

سمارة بارتباك:أنا؟! 

سليمان:اه لو معنديش مانع

نادرة بسرعة؛ لا طبعا معندهاش مانع 

سمارة بصت في الأرض بخجل مكنتش تحلم ان في يوم من الايام ممكن حب يحبها هي بتشوف الحب في عيون سليمان رغم انه عارف ماضيها لكن مفيش مرة شافت نظرة قسوة او سخرية في عيونه ليها 

راحت معه في جنب و نادرة بتضحك هي و نغم 

نادرة:شكلنا كدا هنقرا فاتحة قريب

نغم؛ يارب 

سمارة:اتفضل يا استاذ سليمان 

سليمان:بصي يا سمارة بصراحة انا زهقت من ألف و الدوران حواليك و بصريح العبارة كدا انا معجب بيكي جدا و مش عارف لو دا إعجاب و لا حب الله اعلم 

بس انا نفسي تكملي معايا حياتي و تكوني مراتي على سنة الله ورسوله 

سمارة :بس أنا..... 

سليمان بسرعة:سمارة لو هتتكلمي عن الماضي فبلاش لو سمحتي أنا بتكلم عن سمارة البنت اللي واقفه ادامي دلوقتي انا عارف انها انسانة جدعة و بنت بلد 

و انا عارف اني اتسجنت بس و الله العظيم كان ظلم بس ربنا كرمني لما عرفت حسن و دلوقتي بشتغل و الحمد لله حياتي بقيت افضل مش ندمان على حاجة حتى مراتي لما اتطلقنا في المحكمة مكنتش زعلان انا بس كنت خايف على بنتي و هي دلوقتي تحت عيني بس من حقنا بقا نفكر في حياتنا انا مش صغير ماليش حد يسأل عليا او يكمل معايا اللي باقي من عمري

و انتي كمان اللي اعرفه ان ماليش قرايب خلينا ندى بعض فرصة و صدقيني عمرنا ما هنفتح اللي فات خلينا نكمل في اللي جاي يا سمارة..... اتمنى حقيقي انك توافقي 

سمارة :طب اديني يومين افكر فيهم يا استاذ سليمان بعد اذنك

سليمان بابتسامة جميلة:اتفضلي و هستنا ردك

حسن و الشباب كانوا بيرقصوا ويا عامر و باين عليهم الحماس و الفرح

حسن بصوت عالي بسبب الاغاني

:الف مبروك يا عامر....... بس أنجز عايز ابقا عمو انت فاهم

عامر بفخر و ابتسامة سعيدة

:عيب عليك عد من هنا لتسع شهور 

حسن بمرح و ضحك :

على الله بس ترفع راسنا على العموم انا بقا عامل معاك الصح حجزتلك في فندق في الساحل اسبوعين تاخد ياسمين و تطير على هناك و اتبسط علشان صدقني هترجع للشغل مش هرحمك 

عامر بحماس :اجدع ابو علي والله بقولك شكلي حلو

حسن؛ ابو شكلك.... عريس قمر روح لمراتك 

عامر حضنه بحب اخوي :

تسلم يا حسن

مينا كان واقف مع مريم مراته و هم فرحنبن لان مؤخر نشأ علاقة صداقة قوية بينهم و بين حسن و عامر و نادرة 

مينا:فكروني بيوم فرحنا 

مريم بحب:حبيبي اليوم دا كان جميل اوي، على فكرة انا بحبك اوي يا مينا 

مينا ابتسم و باس راسها بسعادة...... 

حسن راح ناحية نادرة اللي قاعدة مع جليلة 

:مساء الفل يا حماتي 

جليلة:مساء النور يا حبيبي عامل ايه يا حسن ليك وحشه 

حسن بود:انا بخير الحمد لله 

بعد تلات شهور في أسوان 

حسن وصل البيت هو ونادرة نفس المكان اللي قضوا فيه شهر العسل بتاعهم قبل حوالي تلات سنين و نص 

نادرة كانت متضايقه انها سابت بحر و ياسين مع جليلة لكن فرحانة انهم اخير هيقضوا وقت تاني لوحدهم بعيد عن الدوشة ليها و بس..... 

نادرة كانت واقفة أدام الدولاب بترتب هدومهم، حسن حضنها و طبع بوسة على خدها 

:بذمتك مش المكان وحشك 

نادرة ابتسمت بدلال و هي بتلف له و بتقف في وشه، لفت ايدها حوالين رقبته 

:وحشني اوي و أنت كمان وحشتيني اوي نفسي نلف كل مكان جيناه هنا 

اقولك سر يا حسن 

انا حسيت اني بحبك اول مرة و انا هنا في المكان دا 

انا معاك بحس اني طفله صغيرة كانت مفتقدة حاجة مهمة و لقيتها بيك مع كل يوم كنت بتثبت ليا اني كنت اغبى واحدة في الدنيا

لما قلت لبابا مستحيل اتجوزه

مع ان مع الوقت انت قدرت تثبت ليا اني مكنش ينفع اكون ملك حد تاني غير يا حسن 

مكنش ينفع احسن بحب حد تاني غيرك، وانا في حضنك بحس اني الطفلة الشقية اللي بتدلع 

اول مرة جينا هنا مكنتش حباك بس كنت بخاف عليك اوي فاكرة لسه لما اللي اسمه منير دا خطفني و ضر"بوني وقتها كنت مرعوبة بس ملقتش غيرك تحميني منهم و لما دخلت الحبس كنت بموت من الرعب و مع الوقت في المكان دا بقيت أنت كل حاجة ليا الهواء اللي بتنفسه 

حسن ابتسم بسعادة و هو بيمرر ايده في خصلات شعرها البرتقالي تقريباً 

و عيونه مليانة سعادة و عشق 

:عارفه انا بموت فيكي يا نادرة .... بدمن وجودك رغم ان اول خطوبتنا كنا عاملين زي القط و الفار لكن انتي بالذات خاطفاني من نفسي و انا بقا وحشني كل اللي فات و ناوي ارجع ذكرياتنا هنا واحدة واحدة سيبي نفسك ليا خالص 

نادرة ابتسمت بسعادة و هو حضنها 

نهاية الفصل.... الحلقة الثامنة و الثلاثون 

لسه مخلصتش.... رايكم بقا في الرواية و بلاش جو الصمت الرهيب دا

#نادرة_قلبي... قبل الاخير

بعد مرور ثلاث سنوات" في معرض الصياد" 

في صباح يوم جديد... في آخر أيام شهر رمضان الكريم 

نادرة دخلت المعرض مع ياسين و بحر في طريقهم لمكتب حسن، قابلت عامر واقف مع سليمان و هم بيتكلموا في الشغل.

نادرة من وراهم:ازيك يا عامر... سليمان

سليمان :اهلا يا مدام نادرة نورتي المكان

نادرة:تسلم...

عامر بابتسامة:حسن في المكتب...

نادرة:اه ما انا طالعه له..... صحيح متنسوش الفطار بكرا عندنا

:ان شاء الله....

نادرة مسكت ايد ياسين و بحر و طلعت لمكتب حسن.... اللي كان قاعد على كرسيه و بيشتغل باحترافية على اللاب توب و باين عليه انه متغيرش كتير في ملامحه الهادية...

نادرة دخلت هي و الأولاد

ياسين بسرعة و سعادة و هو بيجري على حسن

:بابا...

حسن ابتسم بسعادة و قام من على المكتب و راح لهم

:حبيب قلبه.... وحشتوني

نادرة ابتسمت و هي شايفه بيحضن الاولاد بحب و سعادة

نادرة :امم من لقا احبابه نسي أصحابه...

حسن بصلها و ابتسم :

و الله؟! ايه اللي جابكم.... و بعدين جيتك ازاي 

نادرة:بتاكسي و بعدين هو أنت مكنتش عايزنا نيجي و لا ايه؟ 

حسن مسك ايدها بحب :

اكيد مقصدش كدا... انا اقصد انتي خرجتي انتي و الولاد من غير ما تكلميني كان ممكن تتصلي و انا ابعتلك حد يجيبك.... و بعدين دي احلى مفاجأة 

بحر بابتسامة:بابا.....هاخد ياسين و نلعب تحت 

حسن :ماشي يا حبيبي بس متخرجوش برا 

ياسين :حاضر يا بابا... 

مسك ايد بحر و خرجوا.... 

 حسن ابتسم بحب و هو بيقرب نادرة منه و ببحاوط خصرها بسعادة:

:وحشتيني اوي....

نادرة بابتسامة و هي بتظبط له باقة قميصه:

أنت كمان وحشتني يا حسن ....

حسن بابتسامة:قوليلي بقا سر الزيارة دي

نادرة؛ كنت عايزاه فلوس الصراحة.... هنعمل كحك للعيد أنا و جليلة و والدتك و مرجانة هنتجمع كلنا في البيت كمان شوية عند جليلة و هنعمل 

حسن :و ليه تتعبوا نفسكم ما أنا ممكن اجيبلكم جاهز و بعدين هو أنتي ناسية أنك حامل و مش ناقصين فرهده.... و بعدين أنا سايبلك الكريدت كارت في البيت

نادرة بحماس 

:أولا دا مش تعب لان جليلة متعوده تعمل في البيت و احنا كنا ناوين نعمل لماما دعاء بس هي قالت إنها هتيجي و تعمل معانا و نتجمع.... و الولاد مبسوطين و عايزين ينقشوا الكحك.... فاضل ست أيام على العيد.. 

ثانيا بذمتك دا شكل واحدة حامل يا حسن أنا دلوقتي في السادس و اللي يشوفني يفتكر اني عندي انتفاخ

و اقولك سر أنا من وقت ما عرفنا اني حامل في بنت و أنا الفرحة مش سيعاني يا حسن و متقلقش عليا جليلة مش هتخليني اعمل حاجة صعبة...

ثالثا بقا الصراحه الصراحة انا بتلكك علشان اجيلك قولت اطب عليك كدا اقفشك احسن تكون بتلعب بديلك كدا و لا كدا

حسن بابتسامة:طب بذمتك أنا ممكن اعمل حاجة كدا و لا كدا و انا معايا واحدة زي القمر كدا

نادرة بابتسامة :ماشي هصدقك هات بقا فلوس

حسن :ماشي يا ستي.... اتفضلي

نادرة اخدت الفلوس و حطيتهم في الشنطة

؛ حسن بقولك ممكن تجيب فطار معاك النهاردة و أنت جاي علشان ممكن نقضي معظم اليوم عند جليلة و مش هلحق اعمل حاجة

حسن :حاضر يا ستي... عايزين تفطروا ايه؟

نادرة:أنت نفسك في ايه؟

حسن :بصراحة أنا نفسي في حاجة بس من ايدك انتي.... نفسي في ورق عنب من اللي انتي بتعملي و مكرونة بالبشاميل و طاجن بامية خارج من الفرن بتعملي اكل حلو اوي

نادرة بحزن :

و الله هكون مشغولة معاهم مش هلحق اروح و أعمل

حسن بسرعة :انتي هتزعلي و لا ايه يا حبيبتي اهدي مش كل حاجة توترك كدا و بعدين عادي هجيب اكل وانا جاي معايا

نادرة بشهية مفتوحة

 :عايزاه كريب.... عايزاه اتنين ليا لوحدي و خليه يحط جبنه كتيررر و أربعة شاورما و طومية و مخلل

و هات لياسين بيتزا سي فود و بانية 

ولبحر برجر بس متنساش ميحطش فلفل اسود فيه خالص بحر عندها حساسيه

حسن:طب بقولك ما انا عندي حل تاني

انا ممكن اسيب الشغل بدري و اروح اعملكم فراخ و ملوخية خضراء و شوربة لسان العصفور و اعمل انا لبحر البرجر و كمان البيتزا لياسين...

نادرة بنظرة مخيفة:

حسن أنت كل دا بتعمل أنك موافق انك هتجيب اكل من برا و بتسايرني بس كأني عيلة صغيرة هتضحك عليها و تروح تعمل اكل بيتي...و مشكلتك مش مع بحر و ياسين بدليل انك عايز تعمل اللي هم عايزينه

حسن؛ بمختصر المفيد كدا اه

نادرة الدكتورة قالت إن اكل المحلات مش كويس ليكي حتى لو متأكدين من نضافته لكن انا مش هرتاح يا نادرة و بعدين خلينا نتطمن

 و نعدي فترة الحمل دي و الصيام و بعدها هعملك كل اللي انتي عايزاه ما هو مش كل يوم تاكلي من برا صدقيني غلط علي صحتك

نادرة؛ طب أنت هتسيب الشغل فعلا

جسن:ياستي مفيش مشكلة همشي بدري ساعتين و كل حاجة موجودة في التلاجة هروح اظبط كل حاجة و لو خلصت هاجي اخدك انتي و الولاد....

نادرة بابتسامة حنونة؛ ماشي يا أبوعلي.... ربنا يحميك لينا يا حسن

حسن ابتسم بحب و باس رأسها :

ياله علشان اوصلكم و اللحق ارجع اكمل اللي ورايا... 

نادرة بسرعة :يا حسن مش لازم تتعب نفسك كل ام اجيلك توصلنا و تسيب الشغل 

حسن:اعمل ايه متجوز قردة... 

نادرة ضحكت و هو اخد مفاتيح العربية بتاعته و خرج معها.... وصلها لبيت الحج موسى هي و الأولاد و سلم عليهم و رجع المعرض تاني 

بعد ساعة تقريباً بعد أذان الضهر 

نادرة خرجت من اوضتها بعد ما صلت، كانت جليلة و دعاء بيتكلموا عن واحدة جارتهم، مرجانه

 جايه من المطبخ و هي شايلة حلة فيها سمنه سخنة للكحك 

نادرة قعدت جاانبهم بحماس و هي سامعهم بيتكلموا

 و بدأت تتكلم معاهم في الموضوع و هم بيعجنوا الكحك و بحر و ياسين و مالك ابن مرجانة قاعدين بيلعبوا 

و بينقشوا الكحك و هم بيضحكوا رغم انهم مش بيعرفوا لكن كانوا فرحانين 

في المعرض 

حسن وصل المعرض ركن عربيته و دخل... كان فيه بنت من اللي شغالين في المبيعات بتبصله و هي واقفه جانب صحبتها 

منار:بقولك يا ندى انتي تعرفي ايه عن استاذ حسن صاحب المعرض... 

ندى بجدية و استغراب؛ بتسألي ليه؟ 

منار بابتسامة خبيثة:

أصله بصراحة عجبني اوي... شاب ناجح و وسيم و غني 

ندى بحدة؛ أنتي بتقولي ايه يا منار؟ هو احنا جايين المعرض نشتغل و لا نعاكس 

ركزي في شغلك و اهدي على نفسك دا راجل متجوز و عنده اولاد و كل الموظفين بيقولوا انه بيحب مراته فاهدي احنا مصدقنا لقينا مكان نشتغل فيه و بمرتبة محترم و مع شخص بيراعي ربنا في تعامله مع الناس و انا مش عايزاه اخسر شغلي .... 

منار:و أنا عملت ايه يعني يا ندى و بعدين بلاش دماغك تروح بعيد انا قصدي خير لينا... و بعدين أنا بس بسألك عادي

ندى :مش واضح انه عادي بس انا هريحك علشان تعرفي ان اللي انتي بتفكري فيه دا مينفعش

استاذ حسن كان بيشتغل ميكانيكي بسيط جدا قبل حوالي سبع سنين اللي سمعته انه اتجوز مراته مدام نادرة و هو لسه ميمكلش غير ورشة ميكانيكة صغيرة

اتحبس ظلم في قضية مخد"رات و بعد مدة طلع براءة و كمان استاذ سليمان مدير الحسابات دا بقا دماغه عوقر ذكي جدا و اتصحبوا في السجن.... كان عنده مشاكل في أول حياته بس مع الوقت قدر يفتح معرض لقطع غيار السيارات هو و استاذ عامر و بعد مدة فتح معرض العربيات دا و عنده دلوقتي فرعين كمان بيديرهم هو و مستر عامر و غير انه ناوي يفتح مصنع لصناعة السيارات اللي فهمته انه شخص طموح و بدا من الصفر 

و لسه لحد دلوقتي عايش هو و مراته و اولاده في شقتهم في الانفوشي في ناس قالوا انه بخيل و محبش يشتري شقة علشان يوفر

بس اظن ان الكلام دا غلط جدا 

لأن هو كريم جدا مع كل الموظفين و بيدي علاوات للي بيشتغلوا بضمير و لو بصيتي لمراته و اولاده تقريباً مش محتاجين حاجة 

منار:اومال ليه مشتراش بيت تاني 

ندى :الله اعلم بس ممكن يكون مرتبط بشقته في ناس كدا بتحب يفضلوا في المكان الدافي اللي بيجمعهم بذكريات عمرهم... 

ثانيا بقا كل الكلام اللي انا قلته دا معناه ان بيحب مراته و أنها استحملت معه من اول ما بدا من الصفر لحد ما بقا اسم الصياد ليه هيبه في السوق و لسه بيكبر 

و معناه كمان ان استاذ حسن مش هيفكر يبص لأي واحدة 

منار بخبث:طب بذمتك انتي عارفة عنه كل المعلومات دي ليه و لا انتي كمان فكرتي فيه

ندى بحدة:احترمي نفسك يا منار انا متربية و بعدين الكلام دا كله انا عرفته و انا بدور علي شغل لان بابا عمره ما يرضى يخليني اشتغل في مكان مديره شخص مش كويس 

و بعدين ياريت تعدلي لان أنا حقيقي بدأت ازهق من الاسلوب دا و ياريت تهتمي بشغلك لان انا مش هعمل شغلي و شغلك 

انا عاملة حساب أنك بنت خالي بس لحد كدا و استوب 

منار بضيق:انتى بتعيرني علشان خلصتي ليا كم حاجة كنت مكسلة اخلصهم 

ندى؛ لا مش بعايرك يا منار بس مش عايزاك تخسري الوظيفة دي على العموم ربنا يهديكي انا هروح اسلم الملف دا لمستر أسلام 

منار لنفسها :مستر اسلام ماشي ياختي خليكي في خيبتك إنما أنا مش هتهدا الا لما أوقعه و ساعتها مش هحتاج الوظيفة دي 

ندى خبطت على مكتب اسلام 

"اسلام دخل معهد تجاري و ساب شغل النقاشة من وقت طويل جدا بعد ما حسن فتح معرض قطع الغيار و طلب منه يكمل تعليمه و يشتغل معاهم و فتح كان بيشتغل و قت دراسته في المعهد لكن في مكان بسيط و بعد ما خلص حسن كلفه بمهام اكبر و مع الوقت اسلام اثبت كفائته و انه ذكي في إدارة الشغل..... 

ندى بحرج:مستر اسلام الملف اللي حضرتك طلبت مني اخلصه.... 

اسلام بابتسامة:بالسرعة دي يا أستاذة ندى و الله مكنتش متخيل 

ندى بحماس؛ أنا بحب اخلص شغلي على طول علشان ميحصلش اي تأخير من ناحيتي.... 

اسلام باعجاب:انتي انسانة ملتزمة و ناحجة و أنا حاسس أنك قريب ان شاء الله هتكوني في المكان اللي تستحقيه... ربنا يوفقك يا ندى 

ندى :شكرا بعد اذن حضرتك..... 

خرجت من المكتب و هو ابتسم بسعادة و كمل شغله و هو بيفكر في موضوع الارتباط... سكت و رجع بالزمن حوالي سبع سنين اول مرة شاف حسن فيها 

قبل خطوبة حسن و نادرة و بالتحديد يوم خطوبة نغم صاحبة نادرة

وقتها اسلام كان بيختلس النظر للبنات اللي بيغنوا و يرقصوا

 و يومها حسن مسكه.... يمكن من اليوم دا حياته اتغيرت لقى شغل و بدا حياته 

وقفته مع حسن وهو في السجن خلت حسن يثق فيه و يعرف انه شاب جدع يعتمد عليه و علشان كدا قرر ياخده يشتغل معه و اسلام حياته بالكامل اتغير من شاب صايع مش لقى شغل و مش عارف هو هيعمل ايه 

لشخص بدا يحدد مستقبله هو بس كان محتاج حد يمسك بايده و يساعده و حسن ساعده بدون مقابل....... لاننا مش عايشين في الحياة لوحدنا... لأننا عايشين وسط ناس كتير لازم نساعدهم و هم بيساعدونا و بيمسكوا ايدنا لبر الأمان..... 

فاق من شروده، اخد الملف بسرعة و قام خرج راح لمكتب حسن 

حسن:ادخل 

اسلام بسرعة:محتاج اتكلم معاك 

حسن ابتسم ساعات بيحس ان اسلام ابنه رغم ان فرق السن بينهم حوالي عشر او تسع سنين

:ادخل يا ابني ما انا خلفتكم و نسيتكم

اسلام بسعادة:دا انت الخير و البركة يا كبر بقولك ايه... انا عايز اتجوز 

حسن :افندم و انا مالي ما تروح تخطب و بعدين دا مكان شغل 

اسلام :حسن انا كنت عايزاك تيجي معايا أنت عارف انا والدي توفي و معنديش خلفية بالحاجات دي.... انا الحمد لله قربت اشطب شقتي و الحمد لله عندي مدير قمر بيقبض مرتب كويس يعني انت فاهم بقا عايز اكمل نص ديني

حسن :فيه حد في دماغك و لا جاي تقولي الفكرة العبقرية دي كدا من الباب للطق اللي هو ادورلك انا على عروسة حد قالك اني خاطبة

اسلام بسرعة:لا و الله انا خلاص قررت و عارف مين صاحبة النصيب بس يارب هي توافق بص هي الصراحة كدا ندى اللي معانا 

حسن :البنت اللي اشتغلت هنا هي و بنت خالها من سبع شهور تقريباً 

اسلام :ذاكرتك الله اكبر 

حسن:قل أعوذ برب الفلق.... 

اسلام:مش بحسدك و الله بس ايه رايك فيها

حسن :رأي فيها ايه هو انا اعرفها بس ندى بنت مجتهدة و بتحب الشغل و واضح انها محترمة و في حالها... 

اسلام:حلو اوي يعني انت موافق؟ 

حسن بغيظ؛ يا ابني متجلطنيش هو انا اللي هتجوزها و لا انت و بعدين خد رقم ابوها و لو أنا رايد الحلال فأنا معاك و الجواز قسمة و نصيب... 

اسلام بسعادة :تسلم يا حسن اللهي يارب يحققلك اللي بتتمناه و يفرحك باولادك يارب و تيجي القمر الصغيرة على خير يارب... 

حسن بود:يارب.... ياله روح على مكتبك

اسلام :لا دا انا اصلا جايلك في شغل... دا الملف بتاع توكيل العربيات.... 

حسن :ايوة كدا هات وريني.... 

يدوا يتكلموا في الشغل و حسن بيقوله يعمل ايه....  

حسن وصل البيت على بعد صلاة العصر

كان ساب المعرض و امر الموظفين يمشوا بدري النهاردة.....

دخل غير هدومه كان البيت هادي دخل المطبخ و بدا يعمل الفطار بيطلع الخضار يغسله و الفراخ من الفليزر و بدأ يجهز الاكل رغم انه تعبان من الشغل.....

كان ناوي يخرج و يروح يجيب نادرة لكن لقى الباب بيتفتح و هي داخله مع الاولاد و الحج موسى

حسن كان لابس مريلة المطبخ، موسى بصله و ضحك

حسن بسرعة و مرح:بنتك اعمل ايه بقا..

موسى بابتسامة :المشكلة انها بنتي و انا عارفها.... ياله اسيبكم انا بقا و الحق امشي قبل الاذان

حسن :استنى بس يا حج تمشي فين انت هتفطر معانا.... ما تقولي حاجة لابوك يا نادرة و بعدين دا انا اللي عمل الاكل لازم تدوق و تحكم

موسى بود:معليش يا ابني انا بحب افطر في البيت على فكرة والدتك و اختك انا وصلتهم لحد البيت و ادي مراتك كانت هترن عليك تيجي تأخذها  بس أنا اصريت اوصلها علشان اطمن عليها.....

حسن بمرح و هو بيبوس بحر من خدها و بيشيل ياسين 

 :يعني هو انت مش مطمن عليها معايا؟

موسى :بطل تلاعبني بالكلام يا إبن الصياد...

حسن:صحيح يا حج ايراد المعارض جاهز ما تخليك نفطر سوا و اقعد معك اوريك الكشوفات و نراجع الحسابات سوا و تاخد ايراد الشهر...

موسى بثقة :أنا ماليش دماغ للحسابات و بعدين انا واثق فيك و سبحان الله من ساعة ما مسكت الشغل و الايراد زاد الطاق اتنين غير المشروع اللي عملته لتجهيز العرايس ربنا هيبركلك يا حسن لأنك بتعمل حساب الغلابة عارف لما عديت على المعرض امبارح بالصدفة لقيت واحدة اول ما شفتني فضلت تدعيلي و قالت إنها قدرت تجهز بنتها بسبب تخفيض الأسعار اللي بتعمله ليهم

حسن ابتسم بود:

في أهالي بتجهز عيالها و في شباب هم اللي يجهزوا نفسهم بنفسهم يبقى لازم نساعدهم و طبعاً لولا انك سمحت ليا اعمل كدا مكنش هيبقى ليا حق التصرف

موسى ابتسم و هو بيربت على كتفه بحب و كأنه ابنه مش جوز بنته... قرب من نادرة و بأس رأسها

:خالي بالك على نفسك

نادرة:متقلقش عليا يا حبيبي...

موسى ابتسم و هو مطمن عليها و مشي

ياسين بحماس:بابا انا نقشت معاهم الكحك

بحر :و أنا كمان عملته على شكل ورقة شجر

ياسين :يا ماما ورى بابا اللي احنا عملناه

نادرة دموعها نزلت بدون سبب... حسن حضنها و هو عارف انها تقلبات مزاجية بسبب الحمل....

:خلاص فكي بقا هعملك اللي انتي عايزاه..

نادرة :انا مش عارفه انا بعيط ليه؟

حسن بمرح:فاهم يا ستي و متضغطيش نفسك ياله اقعدي و انا هحط الاكل على السفرة....

نادرة سابت العلبة اللي كانت شايلها فيها الكحك و حسن اخدها و فتحها

:ريحته حلوه اوي....

ياسين بابتسامه :انا عملت دي

حسن:جميل كله يا حبايبي بس ياله ورانا شغل تعالوا ساعدوني

بحر و ياسين دخلوا وراه المطبخ و بدوا يساعدوه

بعد الصلاة

نادرة عملت الشاي و طلعت لهم كان حسن بيعمل الواجب مع بحر اللي امتحانها بعد العيد و بيتابع ياسين اللي بيكتب و هو مبسوط ان ابنه بيعرف يكتب قبل ما يدخل المدرسة لسه.... ياسين خمس سنين و نص

نادرة:الشاي و الكحك... دوق بقا و قولي رأيك؟

حسن:بصراحة ريحته تجنن.....

نادرة:حلو دوق بقا....

حسن قعد معاهم لحد ما سمع العشاء بتاذن...

حسن:ياله يا ياسين نصلي التراويح 

ياسين:حاضر يا بابا....

حسن ابتسم و اخده على كتفه و خرج من البيت و نادرة قامت اتوصت هي و بحر علشان يصلوا. 

بعد الصلاة 

بحر كانت بتغسل المواعين... اطباق قليلة هي اللي أصرت تغسلهم علشان نادرة ترتاح 

عملت لها مشروب دافي و شغلت لها التلفزيون 

نادرة كانت مندهش من تصرفات بحر اللي تعتبر نسخة من حسن في حنيته، رغم أنها عندها حوالي 12سنه الا أنها واخدة منهم حاجات كتير و اهمها انها تاخد حقها و تعتمد على نفسها 

حسن طلع من المسجد و راح لوالدته و فضل قاعد معها حوالي ساعة و نص 

كان بيحاول يقنعها تيجي معه و تعيش معاهم لكن هي مكنتش عايزاه تسيب البيت و انه كذا كدا بيروح لها كل يوم يبقى مفيش داعي انها تنتقل للعيش معاهم... 

رجع البيت بعد مدة 

لقى بحر بتتفرج على مسرحية بأس رأسها و ساب ياسين يتفرج معها و هم بيتخانقوا هيتفرجوا على اي.... 

دخل اوضته و هو هلكان... نادرة كانت حاطة صندوق الذكريات على السرير و بتكتب حاجة في مذاكرتها.... ابتسمت و هي شايفه داخل 

حسن:اخبار الجميل بتاعي اي؟ 

نادرة بحب:بخير الحمد لله... 

حسن:هاتي لي اللاب توب بالله عليكي عايز اخلص شوية شغل 

نادرة بحزم :لا و ممكن تنام على بطنك 

حسن بشك:اشمعني؟ 

نادرة:هعملك مساج اكيد تعبت النهاردة... 

حسن عمل زي ما هي بتقوله و بدأت تعمله مساج و غصب عنه نام من التعب... نادرة بصتله و ابتسمت غطته كويس

 و خرجت تطمن على الولاد... 

نادرة:معاد النوم... 

بحر :شوية كمان يا ماما ارجوكي

ياسين:ايوه شوية صغيرين الحلقة قربت تخلص... 

نادرة:لا و ياله علشان السهر غلط عليكم 

ياسين ببراءة :يا ماما شوية صغيرين بس... 

نادرة :ماشي بتتفرجوا على اي

بحر :بيتر بأن.... 

نادرة :هتفرج معاكم و يخلص ننام ماشي

قعد معاهم يتفرجوا عدي وقت طويل و نادرة هي اللي بتتفرج على الكرتون معاهم

نهاية الفصل... دعاء احمد

#نادرة_قلبي... #خلصت_الحكاية

من قال إن الصواع قد سُرِقْ .

نحن وضعناه في رَحْلِ مَنْ نود لِقاءه

                                    جلال الدين الرومي

بعد شهر و بالتحديد قبل ولادة نادرة بيومين

في المستشفى

نادرة كانت خايفة و متوترة بعد ما عرفت أنها هتولد قيصري، حسن كان قاعد جانبها و هي ماسكة في ايده بقوة و توتر

نادرة للدكتورة:

يا دكتور هو ليه حضرتك مصممه على موضوع القيصري دا، أنا بصراحة قلقانة هي مش كويسة 

الدكتورة بابتسامة؛ اهدي يا نادرة أنتى سالتي السؤال دا عشرين مرة تقريباً من وقت ما جيتي المستشفى، بس ياستي لو وضعية البنت اتغيرت هيبقى الولادة طبيعي لكن في الغالب هتبقى قيصري و دي ساهلة و بسيطة خالص بس متتوتريش كدا 

أنا هسيبك دلوقتي ترتاحي و هعدي تاني عليكي و ياريت تهدي.... بعد اذنكم

خرجت من الاوضة و سابتهم

نادرة بسرعة:أنت هتكون معايا في العمليات المرة دي يا حسن أنا بقولك اهوه... المرة اللي فاتت كنت محتاجك معايا مش هتسبني ادخل لوحدي فاهم...

حسن بابتسامة:حاضر يا بنتي و الله بس بالله عليك اهدي يا نادرة أنا اتوترت بسببك... و بعدين هي مش أول مرة

نادرة بغيظ :ما أنت مجربتش الولادة من حقك تقول أكتر من كدا

حسن بمرح:حظك بقا.... بقولك تعالي نغير الموضوع قوليلي هنسميها اي؟

نادرة بلامبالة و ضيق :مش أنت اختارت أسم زمرد من زمان من قبل ما نخلف ياسين أصلا بتسألني ليه دلوقتي

حسن :أنتي لسه فاكرة دا عدي ست سنين تقريباً

نادرة:ما هو انا فاكرة علشان فيه حاجات مش بتتنسي يا حسن.... فاكرة علشان مش عايزاه اسميها زمرد هو الاسم حلو بس مش

حسن :نفسك تسميها ايه؟

نادرة :حورية.... حلو الإسم دا و كمان أنا اختارته مع ياسين و بحر حلو مش كدا

حسن :حلو.... يعني نتفق عليه

نادرة:بجد!

حسن:ايوة طبعا حورية حسن الصياد

نادرة ابتسمت بسعادة... الباب اتفتح و بحر دخلت مع ياسين و جليلة

جليلة:ازايكم يا ولاد....

نادرة:بخير الحمد لله.. هو بابا فين؟

جليلة؛ في المعرض...

نادرة :ماشي

جليلة:مالك قالبه وشك كدا ليه

نادرة:لا أبدا مفيش.... بقولك أنا عايزاه اتكلم معاكي شوية لوحدنا

حسن:طب هخرج و اسيبكم ياله يا ولاد

ياسين :يا بابا مش أنت قلت ان النونو هتيجي قريب.... أنا بقالي كتير مستنيها

حسن :لسه شوية تعالوا بقا نطمن على تيتة و نرجع تاني

خرجوا من الاوضة و فضلت جليلة و نادرة اللي كانوا بيتكلموا

جليلة:عايزه تقولي ايه و مكسوفة تقوليه أدامه 

نادرة :لا مش عايزاه اقول حاجة أنا أتكلم معاكي لوحدنا محتاجة نرجع نتكلم تاني مع بعض كتير زي الاول تعرفي أنك وحشتيني اوي و خناقتنا وحشتني يا جليلة

جليلة بتاثر:مالك يا بت بتتكلمي كدا ليه 

نادرة:عشان دي الحقيقة.... عارفة أنا نفسي اوي نرجع لوقت ما كنا دايما نتخانق و وقت ما اقوم من النوم الاقيكي واقفه فوق دماغي علشان اقوم.... أنا اكتشفت مع الوقت أنك اكتر حد مهم في حياتي أنتي و بابا 

كل ما الوقت بيعدي و بحس اني بعيدة عنكم بحس اني عايزاه اعيط و خايفه يجي اليوم اللي نفارق فيه بعض.... وقت ما بابا تعب انا كنت مرعوبه كنت خايفه يسبني و انا من غيره اضيع مهما كان حب حسن ليا فهو عمره ما هيقدر يعوضني عنكم و دا اللي مزعلني 

نفسي ارجع لايامي معاكم و في نفس الوقت مسبوش 

جليلة ابتسمت بهدوء و مسكت ايدها :

بس دي سنة الحياة يا نادرة، اي بنت عايشة في بيت أبوها بيكون تفكيرها في حياتها بعد الجواز و هل هتقدر تشيل مسئوليه و لا لاء و لما بتتجوز و تكون اسرتها بتحن لبيت ابوها و أيام ما كانت عايشه على حريتها بدون ما تحس انها مسئولة بحد تاني لازم تاخد رأيه في كل حاجة تقريباً 

بس لازم تكوني واثقه و عارفه اننا دايما معكم  و موجودين في قلوبكم حتى لو مشينا و سبنا الدنيا دي أحنا معاكم 

نادرة:بس انا خايفه يجي اليوم الي احس فيه اني لوحدي 

جليلة:مش هيحصل لأننا معاكي كل الناس اللي بيحبوكي و عمرهم ما هيسبوكي يا حبيبتي لو فضلتي ماسكه فيهم بايدكي بقوة اوعي يا نادرة يجي اليوم اللي تتخلى فيه عن حد حبك امسكي في كل اللي حواليكي و هم عمرهم ما هيتخلوا عنك.... ربنا يسعدك يا نادرة و تفرحي ببنتك يارب 

نادرة حضنتها بقوة و غمضت عنيها :

أنا بحبك أوي يا مرات ابويا 

جليلة بغيظ:يا بت عايزه اسمع كلمة أمي منك 

نادرة كانت ماسكه فيها :هتصدقني لو قلتلك أنك فعلا أمي 

كفاية أنك اتحملتي مسئولية بنت مش بنتك و ادتيها حب الدنيا و عمرك ما قسيتي عليها 

جليلة :خلاص بقا انتي هتعيطي و لا ايه هدي هرموناتك علينا..... ياله أنا عملتلك اكل من البيت 

نادرة بسرعة:بس التمريض مانعين الاكل دا و بيجبولي اكل هنا ميتكلش 

جليلة:اه ما انا عرف و بعدين انا قافله الباب كويس ياله كلي دا أنا اللي عمله اصل بصراحة لما دوقت اكل المستشفى كنت هتعب قلت ربنا يكون في عونك... 

نادرة:طب اتاكدي ان مفيش حد بسرعة أنا جعانه اوي 

جليلة:حاضر.... 

بعد يومين

حسن خرج من العمليات و هو دايخ و مندهش، كلهم كانوا واقفين برا

حسن بصدمة

:هي الولادة كدا.... هي الولادة كدا

دعاء :مالك يا إبني؟

حسن بتعب  :دوخت حاسس ان الدنيا بتلف بيا... فتحوا و شالوا اععااا 

جليلة بصتله بلامبالة 

صحيح و انتم تعرفوا ايه عن الولادة المهم نادرة كويسة و البنت؟

حسن:اه اه تقريباً

موسي :مالك يا جدع اجمد كدا

حسن سند دراعه على كتف الحج موسى و هو لسه مصدوم :

اصلك ماشوفتش اللي انا شوفته دول فتحوا و طلعوا رأس... انا عايز ارجع

عامر ضحك بمرح

و مين سمعك انا كان هيجرالي حاجة لما شفت ياسمين بتولد

حسن:خلينا نروح نطمن عليها...

كانوا واقفين ادام اوضة نادرة و حسن بدأ يفوق

الممرضة كل شوية تدخلها تطلب منها تقوم و تتحرك لكن نادرة كانت متضايقه منها

نادرة بحزن:هم مستقصدني ليه يا حسن كل شوية تقولي قومي امشي و تحط ايدها على بطني بطريقه مخليني قرفانه من نفسي و منكم

حسن :معليش يا حبيبتي بس دا الدكتور اللي طالب منها كدا و دا علشان مصلحتك

نادرة بدموع :انا مش هعمل حاجة غير لما يجبوها اشوفها هم اخدوها فين يا حسن؟

حسن:دكتور الأطفال قال لازم يطمن عليها معليش اهدي و شوية و الممرضة تجيبها

نادرة بسرعة:أنت شفتها؟ شبهك و لا شبهي لون شعرها ايه و عيونها و....

حسن بمقاطعه:اهدي يا نادرة أنا مشوفتهاش بصراحة بعد العمليات كنت دايخ و مقدرتش

نادرة بصتله و عيونها مليانه دموع و حزن غير مبرر

:علشان تعرف أنت عملت فيا ايه.... أنا خلفت اتنين أنت كنت عايز تلاته على جثتي يا حسن هو الحمد لله اوي كدا

انا مش حمل خلفه تاني أنت فاهم و ربنا يحميهم أنت فاهم عايز تخلف روح اتجوز إنما انا خلاص كدا أخرى

حسن ضحك غصب عنه:بذمتك لو اتجوزت ترتاحي

نادرة:اه لما اقت"لك أنت و هي هبقي مرتاحة ابق فكر بس يا حسن و الله لولا اني مش قادره اتحرك كنت زعلتك

حسن حضنها و بأس رأسها :

حمد الله على السلامة يا نادرة....

نادرة غمضت عنيها و حطت راسها على صدره

الممرضة دخلت و اتكلمت بجدية:

يا استاذ حسن لازم المدام تقوم و تتحرك كدا غلط علي الجرح

نادرة بدموع:خلي الوليه دي تمشي يا حسن هي مستقصدني و الله

الممرضة بابتسامة :صلي على النبي ... انا قصدي مصلحتك بس صدقيني دا غلط عليك لازم تتحركي

نادرة:انتم اخدتوا بنتي فين؟

الممرضة:واحدة زملتي في التمريض هتجيبهالك دلوقتي الدكتور بس كان بيطمن انها بصحة كويسه و الحمد لله كويسه و زي القمر

نادرة بتهور و سعادة :بجد طب هي شبهي و لا شبه اوعي تقولي انها شبهه اصل ياسين طالع شببهه برضو هو انا ماليش نصيب انهم يكونوا شبهي و بعدين ليه ياخد منه الشبه مع اني اللي حملت تسع شهور منقصوش يوم و انا اللي خلفت و رضعت و كبرت و...

بصت لحسن و كملت كلامها بدون تفكير 

؛ أنت بتعمل فيا كدا ليه يا حسن ليه كلهم يبقوا شبهك..... حتى بحر بقيت شبهك في أفعالها

حسن بص الممرضة بحرج و هي ابتسمت و خرجت :

اعمل ايه دلوقتي..... تقريبا لسه متخدره انتي معندكيش فرامل للسانك

الممرضة التانية دخلت و هي شايله البنت، نادرة اول ما شافتها ابتسمت و حاولت تتعدل لكن اتوجعت.... حسن ساعدها و هي اخدت البنوته منها بسرعة

حضنتها بحنان و هي حاسه بدفي، ابتسمت بسعادة و هي بتمسك ايد بنوتتها الصغيرة جدا، دموعها لمعت في عنيها بسعادة

حسن حضنهم و هو بيلمس خدها بحنان

نادرة :دي صغيرة اوي يا حسن و جميلة اوي أنت عارف انا بقالي اد ايه نفسي يبقى عندي بنوته من قبل ما نتجوز و انا نفسي يكون عندي بنت صغنونه اوي كدا.....

حسن :ربنا يحفظها و يحفظهم كلهم يا نادرة المهم دلوقتي هاتي بقا ننيمها هنا و تمشي شوية

نادرة:سيبها في حضني شوية و الله والله هقوم بعدها

ياسين و بحر دخلوا الاوضة و هم فرحانين 

ياسين :ماماااا انا عايز اشوفها 

بحر بسعادة : و أنا كمان 

حسن ابتسم و طلع ياسين على السرير و بحر طلعت من الناحية التانية و الاتنين بصوا حورية اللي بتفتح عنيها ببطي و كأنه بتبصلهم

 بحر بابتسامة  :دي حلوه اوي يا ياسين  ....

ياسين:دي شبه ماما جميلة اوي بس مش هتبقى جميلة زيك يا بحر 

بحر ابتسمت :لا دي جميلة اوي بسم الله ماشاء الله..... هنسميها ايه 

نادرة :حور.... حورية 

ياسين بضحك:يبقى حورية و بحر...

 حورية البحر علشان يكملوا بعض

حسن ابتسم بحب و باس راس نادرة و اخد البنت حطها في السرير و ساعد نادرة تقوم و تتحرك معه رغم أنها كانت بتعيط من الوجع لكن كانت بتمشي ببطي و هي ماسكه فيه بقوة.... العيلة كلها دخلت واحد وراء التاني 

بعد مدة

رجعوا البيت كلهم و معاهم جليلة و دعاء اللي فضلوا مع نادرة طول الوقت 

نادرة نامت و هي حاضنه حورية 

بعد اسبوع و نص تقريباً 

كانوا بيحتفلوا بسبوع حورية في وسط فرح و سعادة 

كل العيلة جيت و أطفال العيله و اصحابهم 

و اسلام هو و ندى اللي حسن خطبها له من شهر تقريبا 

اسلام كان واقف جانبها و هو فرحان و بيغنوا كلهم.. ندى متنكرش انها اتفاجت لما طلب ايدها لكن كانت حاسه انه انسان كويس و قررت توافق بعد موافقة والدها و رغم ان حسن طرد بنت خالها منار  المعرض لما بدأت تعمل تصرفات تضايقه 

 الا ان ندي اتمسكت بشغلها و حسن اشاد بيها انها شاطرة 

اخت ندى الصغيرة كانت واقفه جنب اسلام مش مدياله الفرصة يتكلم معها لكن كان عارف انه دخل بيت ناس يعرفوا الأصول و بنت محترمة هتحافظ عليه

مينا :الف مبروك يا حسن يتربوا في عزكم 

حسن:الله يبارك فيك يا حبيبي .... 

سمارة كانت واقفه جنب سليمان و كل ما تحاول تهز وسطها مع الاغاني يبصله بنظرة تخليها تقف زي الف 

و حقيقي وصلت لمرحلة اللي بقيت تحس فيها بالرضا عن حياتها و بتحمد ربنا على حب سليمان ليها و رغم الماضي لكن عمره ما جرحها بكلمه و لا فتح موضوع فريد و علاقتها القديمة بالكبارية.... 

تبارك و جوزها كانوا فرحانين لحسن و نادرة 

مرجانة بصت لمالك إبنها الكبير و هو بيتكلم  مع بحر و بيخانقوا  راحت ناحيتهم باستغراب 

مرجانة:في ايه يا ولاد بتتخانقوا ليه

مالك بحدة:يا ماما انتي مش شايفه الجيبه بتاعتها ضيقه ازاي... بقولها تدخل تغيرها مش راضيه 

بحر بعناد شبه نادرة:

مش ضيقه و بعدين أنت مالك 

بابا نفسه مقاليش حاجة أنت بقا بتزعق لي بصفتك ايه 

مالك بضيق:متعصبنيش يا بحر و ادخلي غيريها 

بحر؛ لا مش مغيره حاجة بعد اذنك يا خالتو 

مالك : والله لاقول لعمي و اخليه يزعقلك 

مرجانه؛ استنى استنى تقوله ايه و بعدين مالها الجيبه دي ضيقه؟! مالك يا حبيبي بطل  تتكلم معها كدا دي نسخة من خالتك نادرة يعني مش هتوصل معها لحاجة 

مالك:ماشي يا ماما صبركم عليا لما اكبر و انتي يا ست بحر اما نشوف اخرتها معاكي 

مرجانة هزت راسها بيأس و هي بتبص له 

بعد يومين 

نادرة كانت واقفه في المقابر أدام قبر والدتها سنية.... قعدت على الأرض و حطت ايدها على قبرها 

:كان نفسي تبقى معايا يا ماما كان نفسي اكبر معاكي اوي و تحضنيني... ارتاحي يا حبيبتي و طمني عليا انا كويسة و بحبك اوي مهما قالوا الناس عنك هتفضلي في قلبي.. انا جيت النهاردة من وراءهم كالعادة سيبت الولاد مع حماتي هي عندي في البيت و جيت علشان اتكلم معاكي 

أنا عندي بنتين دلوقتي بحر و حورية الاتنين زي القمر و ياسين واخد كل حاجة من حسن 

أنا بقيت كويسة يا ماما..... ارتاحي يا حبيبتي 

قامت قراءت الفاتحة و بعض السور و بعد خرجت من المقابر رجعت البيت 

في نفس اليوم بليل 

نادرة خرجت من الاوضة و هي شايله حورية كانوا كلهم قاعدين أدام التلفزيون و حسن بيخلص شغل على اللاب توب 

نادرة قعدت جاانبهم و اخدت الريموت تقلب 

بحر:يا ماما عايزين نسمع الفيلم زمانه هيبتدي 

ياسين بحماس :ايوة يا ماما زمانه ابتدا... عايزين فشار و شيبسي

نادرة بحنان:وطي صوتك يا حبيبي براحة أختك بتخاف من الصوت العالي 

حاضر هعملكم اللي عايزنه شغلوا الفيلم و انا هاجي على طول بس خلوا بالكم من حور

أبتسموا و هي قامت تعمل الفشار، كانت سرحانة حست بأيد حسن بتتلف حوالين خصرها و هو ساند على كتفها 

:سرحانه في ايه؟ 

نادرة بابتسامة:و لا حاجة 

حسن :طب خدي الشيبسي و العصير و انا هعمل الفشار و اجي وراكي ياله

نادرة :ماشي بقولك انا عاملة كنافه بالقشطه في التلاجة هاتها معاك 

حسن:دا شكلنا هنسهر للصبح... حاضر يا ستي 

خرجت و هو جيه وراها بعد شوية قعدوا كلهم على الانترية و هم بيتفرجوا على التلفزيون و بياكلوا فشار كلهم جنب بعض في حضن بعض بيضحكوا و بيتفرجوا بحماس عيلة حقيقه 

حسن مال على نادرة بهمس:بحبك يا نادرة قلبي 

نادرة بابتسامة :و أنا بدوب فيك

حسن ابتسم و حط ايده على كتفها و هو بيشد الغطا عليهم و هو مش شاغل دماغه بحاجة 

و هو بيحمد ربنا انه في النهاية بقا عنده عيلته الصغيرة اللي بيحبه و يحبوه و انه داب معها و وقع في حبها في الحلال 

مال عليها و بأس خدها 

ياسين ضحك و حط ايده على بوقه و هو بيبص لبحر 

:احنا مشوفناش حاجة

بحر بمرح و سعادة:خالص خالص يا بابا 

نادرة:عجبك كدا يا سي حسن 

حسن بسعادة:طبعا عجبني.... 

ياسين غمر لحسن و بحر ضحكت بحب 

"وسندًا صالحًا يا اللّٰه، إن اعوجّت الخطوات أقامها".

الحب وعد ، والوعد دين ، والدين لا يوفيه إلا الرجال . 

نهاية الحكاية... دعاء احمد 

بما اننا وصلنا لهنا قولي رأيك في كومنت تذكاري