رواية ما بعد الأغتصاب الفصل 6-7-8-9-10بقلم هناء عادل كاملة
رواية ما بعد الأغتصاب الفصل 6-7-8-9-10بقلم هناء عادل كاملة
ما بعد الأغتصاب
الفصل السادس
اشرف سابه ودخل لأخته اوضتها
رقية بصوت واطي.ايه فى ايه يا اشرف
اشرف.بقولك ايه يابت يا رقية
فتحي عايزك تيجي تاكلى معانا
بصى اعملي نفسك نايمة
علشان انا هطلع اقوله انى لقيتك نايمة
وانا هدخلك الاكل بتاعك هنا علشان تاكليه وهو سخن
ولحد ما النهار يطلع متطلعيش من هنا
رقية بصوت واطي.حاضر
بس افرض عايزة اروح دورة الميه
اشرف بانفعال.ما تمسكي نفسك يا رقية
معلش ياختي خلي الليلة دى تعدي على خير
انا مش مرتاح لقاعدته دي
رقية.ماشى يا اشرف
هاتلي بس الكفتة
ريحتها فى مناخيرى طالعة من دماغي
جوعت من الريحة بس
اشرف.مفجوعة يخربيت بطنك
ماشى هجيبلك الاكل
فعلا اشرف اخد جزء من الاكل ودخلهولها الاوضة
وخرج لفتحي
فتحي.حط حط ويلا بسم الله
فين البت اومال
اشرف.رايحة فى النوم يا عم فتحي
مرضيتش تقوم معايا
فتحي.بقى ده كلام ياجدع
كانت اكلت معانا لقمة
اشرف.انا شيلت نايبها على جنب
لما تقوم تاكله بقى على مهلها
فتحي.ده الاكل اللى يتاكل سخن
يلا مش مهم
تعالى انت كل والسهرة طويلة
اكيد هتصحي
تبقى تاكل بقى لما تقوم
تعالى تعالى
ده انا هخليك تجرب حاجة هتعجبك اوى
بس خلينا ناكل
اشرف قعد وسمى الله
وابتدوا ياكلوا سوا
وكان اشرف بيستطعم الاكل وخاصة الكفتة اللى كانت اول مرة يدوقها
اشرف.ياسلام ياولاد
دى طعمها زى العسل
حلوة حلوة بصحيح
فتحي.ايه ده انت اول مرة تاكلها ولا ايه
اشرف.ايوة
الاكل ده بتاع الذوات يا عم فتحي
احنا علشان نجيب ااكلة زى دى
هنبقى عايزين نقعد اسبوع مناكلش علشان نحوش تمنها
فتحي بيضحك.لاء يا عم اشرف متقولش كده
ده كل يوم تلاقى عندك الاكل ده
ولسه بقى لما تدوق الكباب
ولا الجمبرى والسبيط
ده انا هروقك ياض يا اشرف
اشرف بيضحك.ايه يا عم فتحي كل ده
انا جاى اكل بس ولا ايه
كتر خيرك
ده انت جمايلك غرقتنى من ساسي لراسى
ربنا يقدرني بقى واقدر اردلك حاجة من اللى انت عملته معايا
فتحي.صبلنا ازوزة بقى نبلع بيها
وسيبك من الكلام الحمصي ده
عيب ياض بقولك انتم اخواتى
اشرف فتح زجاجة الحاجة الساقعة
وصب منها لنفسه ولفتحي
اللى بيشرب وبياكل وهو بيتفرج على اشرف
وسعادته الغريبة بالاكل
فتحى.ياااااااه الواحد اكل لما بطنه اتنفخت
اشرف.اه يا عم فتحى اكلة بشبعة بصحيح
فتحى.طيب تعالى بقى اخليك تسلك
اشرف ببلاهة.اسلك ايه يا عم فتحي
هى المجارى اتسدت ولا ايه
فتحى بيضحك.مجارى ايه يا دغف انت
انا هخليك تسلك نفوخك
اشرف بفضول.اسلك نفوخي ازاى يعنى
طلع فتحي من جيبه الحش...
وبيوريه لأشرف
اشرف بأستغراب.ايه ده ياعم فتحي
فتحي.ده المزاج كله ياولا
الروقان والدلع
اشرف.ايوة يعنى ايه
فتحي.انت بصحيح مش عارف ايه ده
اشرف.لاء والله ما اعرف
فتحى.انت مبتشربش سجاير يا اشرف
اشرف.جربت كام مرة كده
بس قطعت نفسي
فمطولتش فيها
فتحى.لاء ده بقى دماغ عالية اوى
روح انت شيل الحاجة دى
وارجعلى اكون جهزتلك الدماغ
اشرف كان عنده فضول قوى جدا يعرف فتحى ناوى على ايه
وفعلا دخل بسرعة شال الحاجة
ورجع لفتحى اللى كان جهز القرف اللى قرر انه يشربه لأشرف
فتحى.تعالى ياض يا اشرف اقعد
اسحب كده واكتم وعيش الخيال بقى
اشرف مد ايديه لفتحى وحاول يقلد اللى اتعمل قدامه
بس لأنه مش متعود فضل يكح بقوة
وبقى مش قادر يبطل كحة
وسمعت رقية صوت اخوها
خافت
طلعت تجري بسرعة على السطح
تطمن على اشرف
اللي لقيت وشه احمر وعمال يكح
وفتحى بيحاول يشربه مياه
رقية بخوف.مالك يا اشرف
فى ايه ياعم فتحى
ماله اخويا
جراله ايه
فتحى وعنيه على رقية.مفيش هو كان بيشرب والمياه وقفت فى زوره
ههههههه
جاتله شرقة بقى
متخافيش
قربت رقية من اخوها وفضلت تخبط على ضهره
واشرف عمال يشرب فى مياه
وبعد دقايق كان هدا شوية
فتحى بيضحك.ده انت طلعت عيل طرى اوى ياض يا اشرف
ده انت العيال السواقين فى الموقف هيلاقوا لقية لو عرفوا انك طرى كده
اشرف ونفسه مقطوع.طرى ايه بس يا عم فتحي
عيب الكلام ده
فتحي.ايه ياجدع نفس واحد يعمل فيك كده
انا فكرتك راجل شديد كده ودماغك متكلفة
طلعت لسة بترضع
فتحى كان قاصد انه يستفز اشرف علشان يكرر تانى الشرب
وهو فعلا قدر يعمل ده
رقية.اشرف روق يا خويا
انت شربت دخان ولا ايه
اشرف بانفعال.انتى ايه اللى صحاكى مش كنتى نايمة
امشى يابت انتى خشى كملى نومك
فتحي.مالك بس يا اشرف فى ايه
اهدا ياراجل
اختك خافت عليك طلعت تشوفك
تهب فيها كده وتكسفها
امسك امسك اسحب نفس دلوقتى هتروق
سحب اشرف من ايد فتحى الشرب مرة تانية
واخد نفس تاني
وفضل يكح لكن مش بنفس درجة المرة الاولى
وكررها تانى وتالت وفى كل مرة يكح اقل من المرة اللى قبلها
رقية.ياخويا كفاياك
حرام عليك نفسك
اشرف.خشى جوة قولتلك بدل ما اقوم اسدغلك
رقية بصيت لأخوها بقلق وبصيت لفتحى لقيت عنيه متعلقة عليها
وده خلاها تسمع كلام اشرف وتدخل تانى تقعد على سريرها
بس بصة فتحي ليها خوفتها
فتحى بعد شوية كان شرب اشرف فيهم كتير وتأثير الشرب ظهر عليه.ايوة ياض كده استرجل
المزاج بان على عنيك اهى
اشرف بيضحك بهدوء.روحى كانت هتطلع فى اول نفس
فتحي.هههه علشان اول مرة بس
لكن شوفت مع كام نفس اتعودت ازاى ودماغك ابتديت تشتغل
اشرف سمع كلام فتحى وابتسم وكمل شرب
وكأنه مش فى وعيه
ولأنه اول مرة يشرب
وشرب كتير
تأثير الشرب عليه كان سريع
للدرجة اللى خليته نزل دماغه على الطبلية مرفعهاش مرة تانية
بيتنفس وعنيه مفتوحة
لكن اعصابه كلها كانت سايبة
ومش حاسس بنفسه
فتحي.اشرف ايه ياض
انت سافرت ولا ايه
اشرف مش بيرد
فتحى استغل ان اشرف مش مركز معاه
والشرب اثر عليه هو كمان
وده خلاه يتكلم بكلام
لو فى وعيه كان اكيد مقالهوش
فتحى.عارف ياض يا اشرف
انا مش مصبرنى على القعاد مع عيل زيك
غير ان البت اختك عجبانى
وكيفى اطولها
وانا مينفعش حاجة تعجبنى ومطولهاش
مع انها عيلة صغيرة ولو اتجوزت من بدرى كان زمانى معايا قدها
لكن بت الكل...
داخلة مزاجى اوى
بقى انا تبقى معايا حرمة تحل من على حبل المشنقة
واقضى معاها الليلة وانا شايفها العيلة المفعوصة دى
ليه فيها ايه العيلة دى عن باقى الحريم يعنى
مش هرتاح ولا يهدالى بال غير لما ادوقها
اشرف مش بيرد حاول يرفع رأسه من على الطبلية لكن مقدرش
فتحى.خليك خليك يا حيلة امك انت
وانا صارف ومكلف كل ده علشان تقوملي
لاء اوعى ياض تفكر انك هتضربلي الليلة
ده انا جايبلك حتة متكلفة
مجيبهاش للغالي
بس هنعمل ايه بقى
الكيف بيزل صاحبه
وانا كيفى مش هوصله غير لما توصل انت للى انت فيه ده
علشان كده يلا مش خسارة فيك الحتة
يلا يا خويا
خليك انت بقى هنا نام وارتاح
وادخل انا الحمام
وارجع اشوف ليلتى يا حلو
عايزك تصحى تقول لأختك صباحية مباركة
وخبط فتحى بأيديه على رأس اشرف
وسابه وقام من مكانه
دخل الحمام
واشرف كان مش فى وعيه حرفيا
وده خلاه محسش بكل الكلام اللى قاله فتحى
اللى اخد قراره بأن هى دى الليلة اللى يوصل فيها لرقية
كان اشرف وفتحى محدش منهم واخد باله
ان رقية سمعت كل اللى اتقال وهى فى اوضتها
من شباكها اللى بيبص على السطح
وكانت بتتنفض من جواها
خاصة انها مش سامعة صوت لاخوها خالص
وبمجرد ما سمعت صوت باب الحمام اتقفل
قامت تجرى من على سريرها
طلعت لأخوها برة
رقية بصوت واطى بتحاول تفوق اخوها.قوم يا اشرف
قوم يا اخويا الراجل شكله ناوي على نية سودة
قوم الهى يسترك
طبعا اشرف ولا فى الدنيا
وكأنه شارب محيط خمرة
رقية.يا وقعة سودة يا ولاد
اعمل ايه انا دلوقتى بس
يارب ساعدنى واقف معايا
قوم يا اشرف
قوم الحق اختك
وهنا سمعت صوت باب الحمام بيتقفل
دخلت تجرى على الاوضة وقفلت وراها الباب
ودخلت تجرى على اوضتها وقفلت الشباك كمان
طلع فتحى من الحمام
وراح ناحية اشرف بص عليه لقاه لسه على نفس الوضع
فتحى.الله يخربيتك
ده انت طلعت دغف بصحيح
خليك ياخويا انت احلم
متأخذنيش
انا عندى سبوبة اخلصها واجيلك تانى
وسابه فتحى
ورح ناحية باب الاوضة
اللى اتفاجئ انه مقفول
فتحى.اتقفل امتى ده
ابتدا يخبط بالراحة على الباب
ورقية قاعدة على سريرها
مفيش فيها حتة مش بتتنفض من الخوف والقلق
فتحى.رقية بت يا رقية
افتحى الباب
تعالى شوفى اخوكى
مش عارفله مات ده ولا حصله ايه
رقية بتسمع الكلام وهى خايفة على اخوها
وفى نفس الوقت واخدة قرارها بأنها مستحيل تفتح الباب لو السما اتهدت على الارض
فتحى يأس من التخبيط على الباب وخاف اشرف يرجع لوعيه تانى
وده خلاه يروح ناحية شباك اوضة رقية ولقاه مقفول برضه
فتحى.بت يا رقية
افتحى يابت
بقولك اخوكى بيموت
انتى نمتى تانى ولا ايه
رقية بصوت واطي.يارب اقف معايا يارب
استرها معايا وعليا
وابعده عني
يارب ماليش غيرك دلوقتى
كان ايه هفك فى دماغك يا رقية علشان تيجى تقعدى القاعدة المنيلة دى
يارب سترك يارب
فتحى.انتى نمتى يابت ولا ايه
ايه مش سامعة كل الخبط ده
وفى لحظة ومن غير تفكير
رقية.عم فتحى اتوكل على الله انا مش هفتح الباب ولا الشباك
فتحى.يابت بقولك اخوكى عيان بيموت
رقية.ربنا موجود معاه
لو رايد الخير هيقوم ويبقى زى الفل
ولو عمره انتهى
ده قضا ربنا بقى
فتحى.يابت انتى خايفة مني
افتحى بس هقولك كلمتين
رقية.عم فتحى الله يسترك ويستر ولاياك
اعتبرنى اختك ولا بتك
اتقي الله فينا انت واكل معانا عيش وملح
بلاش تتخلي الشيطان يلعب بدماغك
فتحى بغيظ.يابت هكسر الشباك افتحى بقولك هقولك كلمتين
رقية.والله ما هفتح
وليك عليا مش هقول لأخويا ولا ابويا حاجة
وانت فى مقام ابويا
الله يسترك بلاش تأذينا
احنا غلابة مش حمل فضايح
فتحى.يعنى مش عايزة تفتحى يابت الكل...
رقية دموعها نازلة على خدها ومش عايزة ده يبان على صوتها
فتحى.يابت افتحى ده انا هبسطك
وهفسحك
واجيبلك هدوم جديدة
وادلعك اخر دلع
رقية.يا عم فتحى
حرام عليك احنا مش حمل فضايح
فتحى متغاظ ومنفعل.يعنى ده اخر كلام عندك
مش ناوية تفتحى
رقية.لاء مش هفتح
فتحى بغضب.طيب يا رقية
وشرف امى ما هسيبك
والليلة دى مش هتعدى معاكى على خير
ولو مخدتش اللى انا عايزه مبقاش انا فتحى العايق
والليلة قبل صباحة ربنا
يتبع
ما بعد الأغتصاب
الفصل السابع
بمجرد ما سمعت رقية اخر كلمتين قالهم فتحى
حسيت ان الدنيا بتلف بيها
وبرغم صغر سنها او حتى قلة علمها
الا انها شافت ان ملهاش ملجأ غير ربنا ودعواتها له
هى كانت على يقين انه هينقذها
فى الوقت اللى كان فتحى بيحاول يفتح الشباك
كانت هى بتعيط وبتدعى ربنا ينجيها
ويسترها
وفعلا ربنا كان معاها
سامعها
رفض يخذلها ويكسرها
وعلشان كده جعل جار من جيرانها سبب فى نجاتها
الجار طلع على السطح
وشاف اشرف اللى نايم على الطبلية واثر سجاير الحش...
وسمع صوت حد بيخبط فى خشب
اتحرك الجار بهدوء
وشاف فتحى اللى كان بيحاول يفتح الشباك
الجار بحدة.خير يا اخ فى حاجة ولا ايه
فتحى بأرتباك.حاج سيد
لاء ابدا مفيش حاجة
انت مش عارفنى ولا ايه
انا فتحى السواق
سيد.فتحى اللى جيت اجرت الاوضة من علاء ابني
فتحي.اه يا حاج انا
سيد.طيب فى ايه يا فتحى
ماله العيل اللى نايم على الطبلية ده
وانت بتعمل ايه فى الشباك
فتحى مرتبك.ده قريبى اللى انا جيت اجرتله الاوضة
شرب دخان كتير وتعب
نام مني على السطح
وعايز افتح الاوضة علشان ادخله ينام جوة بدل ما هو فى الطل كده
سيد.طيب يابن الحلال
هو اللى عايز يفتح باب اوضة يدور على انه يكسر الشباك ازاى
ولا يدور على مفتاح للباب
مش يمكن فى جيبه
ولا حتى كنت انزل اسألنا
فتحى.معلش يا حاج انا والله ما جه فى بالى
الوقت كمان متأخر مش اصول اخبط على بيوت الناس دلوقتى
سيد.لاء يابنى انا سهران
لقيت ارسال التليفزيون اتقطع
قولت اطلع ابص على الاريال
ربك بقى بعتنى ليك
تعالى تعالى خلينا نساعد الواد ده انه يفوق
ربنا يهديه لنفسه
عيل على الدخان والقرف ده
فتحى اتحرك مع الشيخ
ومن جواه بيحمد ربنا ان رقية مفضحتهوش ولا اتكلمت
وكانت رقية جوة الاوضة بتعيط وبتضحك من فرحتها بأستجابة ربنا لدعواتها
وانه نجاها من تحت ايد فتحى
سيد.بقولك ايه يا فتحى يابنى روح هات شوية مياه نغسله دماغه بيهم
وهات شوية مياه بملح
راح فتحى يعمل اللى سيد قال عليه من غير نقاش
وقلقان ان رقية تفتح الباب وتفضحه فى اى لحظة
لكن هى فضلت على موقفها
ومتحركتش من مكانها
فتحى جاب الحاجة
والحاج سيد بداء يغسل رأس اشرف بالمياه الباردة
وكان اشرف ابتدا يحاول يرفع دماغه لكن مش قادر
اخد سيد المياه ام ملح من فتحى
وشربها لأشرف بالعافية
ومجرد ما نزلت المياه فى جوف اشرف
خليته جاب كل اللى جواه
وابتدا يكح بقوة وهو بيفوق
سيد.لما انت يابن الناس مش قد البلاوى دى
بتشربها ليه من الاول
ربنا يهديك يابنى
اشرف.رقية
فين رقية
سيد.رقية مين
فتحى بسرعة.اختك نايمة مش حاسة بالدنيا
ده انا ايدى اتخلعت من الخبط على باب الاوضة والشباك علشان تفتح الباب ادخلك تنام جوة
ولا حسيت بالدنيا
لولا ستر ربك بقى بعتلنا الحاج سيد
فكر فى اللى مجاش فى بالى
مش تقول يا اشرف ان انت مالكش فى الدخان
اشرف بتعب.متأخذونيش على البهدلة دى
انا هنضف كل حاجة
ادخل بس دورة المية
واجى انضف الدنيا
سيد.اه يابنى نضف نفسك ونضف بيتك
وابعد عن الشيطان
اشرف قام وقف وهو لسه حاسس بدماغه تقيله
دخل على الحمام قلع الجلابية بتاعته
نضفها وغسل راسه ووشه
وملا طشت كبير مياه
وطلع بيها من الحمام
علشان ينضف المكان اللى كان قاعد فيه من اللى حصل
فتحى.طيب ادخل ارتاح انت دلوقتى
والصباح رباح
اشرف.لالا انا بقيت كويس
كتر الف خيرك ياعم الحاج
ربنا بعتك لينا
سيد.لا خير ولا حاجة يابنى
احنا جيران
والنبى وصى على سابع جار
لو احتاجت اى حاجة
خبط علينا احنا فى الدور التالت
خبط على باب فى الدور
تبعنا
بس انت مدام اختك معاك فى البيت
بلاش اللى انت بتعمله ده
راعي حرمة بيتك يابنى
الدنيا مالهاش امان
قالها الحاج سيد وهو بيبص لفتحى
فتحى بأرتباك.عندك حق يا حاج
وبعدين اخته كمان عيلة صغيرة لو شافته بالمنظر ده لا هتعرف تحيل ولا تتصرف
ومش هييجى فى بالها تنزل تخبط على باب حد
سيد.يلا بركة انى اطمنت عليك
ابص على الاريال بقى اللى كنت طالع علشانها
وانزل اقعد فى فرشتى
اشرف كان عمال ينضف الارض
ويلم كل حاجة حواليهم
فتحى.تشكر يا حاج سيد
اشرف.كتر خيرك يا حاج
وحقك عليا معلش على المنظر اللى انت شوفته
سيد ابتسم.يلا تتصبحوا بالخير
اسيبكم انا
اتحرك سيد راح شاف الاريال بتاع التليفزيون
وسابهم ونزل
بعد ما اتأكد ان اشرف فاق
خلص اشرف اللى كان بيعمله
وهو من جواه متأكد ان فتحى كان قاصد يوصله للحالة دى
فتحى.ايه يا اشرف بقيت كويس
اشرف قعد على الارض وسند ضهره على السور بياخد نفسه
فتحى.طيب ايه حاسس بحاجة اخدك ونروح المستوصف
اشرف.لاء يا عم فتحى انا الحمد لله
فوقت
حاسس بس بأن دماغى تقيلة
بس الحمد لله
فتحى.متأخذنيش يا اشرف انا قولت اقوم معاك بواجب الضيافة
معرفش انك مالكش فيه خالص كده
اشرف بيبص لفتحى بعدم اقتناع
ومردش
فتحى.مالك يا اشرف
انت فيه حاجة عايز تقولها
اشرف.لاء يا عم فتحى
بس انا باين عليا كده مش قد اسكندرية
ولا انا قد ناس اسكندرية
انا عيل غلبان وفى حالى
وده باين عليه مش هينفع هنا
فتحي.ليه يابن الناس بتقول كده
ده انت راجل زى الفل
انا بس اللى اتغاشمت
تقلت عليك وانت دماغك خفيفة مش حمل الشرب
حقك عليا يا اشرف
اشرف.لا ياعم فتحى حقى مش عليك
الحق عليا انا
فتحى.يلا اهى ليلة وفاتت
قوم ريح انت ساعتين تلاتة
ويطلع النهار
ننزل نتوكل على الله بقى
انا هقعد هنا على السطح اشربلى سيجارتين مع كوباية شاى
علشان انت طيرت الدماغ اللى انا عملتها باللى حصلك ده
اشرف.مالهوش لازمة ياعم فتحى روح انت ارتاح
وانا ارجع الصبح بلدى انا واختى
افتح نصبتي تانى
ودينك فى رقبتي هجمعهولك قرش قرش
حتى لو مش هاكل انا ولا اهلى
وهردهولك على داير مليم
بس انا مش هقعد هنا ليلة تانية
فتحى بألحاح.ليه كده بس يا اشرف
حصل ايه يابن الناس لكل ده
عادى كلنا كنا كده فى اول نفس شربناه
اشرف.لاء يا عم فتحى
انا اختى فى رقبتى
مكانش ينفع انى اعمل كده وهى معايا
انا مراعيتش حرمة وجودها معايا
حتى لو ربنا قاسملى لقمة عيش هنا
مينفعش اختى تبقى معايا
فتحى.يابنى وايه اللى جرى لأختك بس
اهى نايمة مش حاسة بالدنيا
وبعد كده نحرس احنا ومتشربش هنا تانى
قوم بس انت ريح دلوقتى
والصباح رباح
نتكلم لما تفوق
فعلا دخل اشرف اوضته
بعد ما فتحها بالمفتاح اللى كان فى جيبه
وقفل وراه الباب
وساب فتحى قاعد برة
اول ما قفل الباب
دخل يجرى على اخته
اللى لقاها قاعدة فى نص سريرها مقهورة من العياط
اشرف بصوت واطى.جرى ايه يا رقية مالك يابت
بتعيطي ليه
رقية بتشهق من العياط ومش قادرة تاخد نفسها
اشرف بقلق حضنها وبيطبطب على راسها.طيب استهدى بالله
احكيلى
فى ايه مالك
فتحى عملك حاجة طيب قوليلى
حقك على راسى ياختى
رقية بعياط.ليه كده بس يا خويا
اشرف.حصل ايه ما تقولى
رقية خافت تقول لاخوها اللى حصل.محصلش حاجة
بس انا سامعة كل اللى حاصل برة
وخايفة اطلع علشان انت محرج عليا
قلبى واكلنى عليك
ومرعوبة افتح الباب ولا الشباك اسأل فيك ايه
ليه بس يا خويا توجع قلبى كده وتفجعني عليك
اشرف براحة.والله يا رقية ما كان فى نيتى خالص اللى حصل
حقك عليا
انا غلطان
ومن صباحة ربنا هاخدك ونتوكل على الله من هنا نرجع بلدنا
يعالم اللى حصل ده يتكرر تانى لو فضلنا هنا ولا لاء
رقية.لاء يا خويا انت اقعد هنا شوف رزقك
وانا لما ابويا ييجى زى ما قال
ابقى ارجع معاه
علشان مبقاش حمل على كتافك وتبقى شايل همي
اشرف.نامى بس والنهار له عنين بكرة نتكلم
ونشوف هترسى على ايه
رقية.انت ياخويا بقيت كويس
طيب طمني
اشرف.اه يا رقية متخافيش انا زى الفل
والحمد لله ان اللى حصل ده فات على خير
يلا نامى بقى وانا هطلع اخطفلى ساعة كده ولا ساعتين
علشان فتحى قاعد على السطح لحد ما النهار يطلع
رقية قلبها اتقبض وخافت لما سمعت اسمه
بس حاولت تدارى على اخوها
طلع اشرف نام على الكنبة بتاعته
ورقية على سريرها بتفكر لو قالت لأخوها واتخانق مع فتحى
ايه اللى ممكن فتحى يعمله فى اشرف
قلقت ان فتحى يأذى اخوها
علشان كده قررت انها مش هتجيب سيرة باللى حصل
بس هى مكانتش تعرف ان فتحى برة الشباك
سمع كل اللى حصل بينها وبين اخوها
كان واقف بيتصنت عليهم
وبرغم انه عارف ان حتى اشرف لو عرف اللى حصل منه لرقية
فتحى كان هيتصرف ازاى مع اشرف
الا انه كان قلقان من انه عيل فى سن اشرف يفكر يهينه او يقل منه
بسبب عيلة صغيرة
نامت رقية ونام اشرف
لكن فتحى قاعد على السطح لحد النهار ما طلع
وهو بيفكر هل هو كان غلطان
لما عمل كده علشان بت صغيرة مالهاش فى حاجة
ولا هو المفروض يفضل وراها لحد ما يوصل لغرضه
علشان اكبر واحلى واحسن منها ومعرفوش يمنعوا نفسهم عنه زى ما هى عملت
كانت السهرة طويلة على فتحى اللى عقله فضل يودى ويجيب
مرة يلوم نفسه على انه قل من نفسه مع عيال صغيرة
ومرة تانية يتغاظ كل ما يفتكر محايلته على رقية واصرارها على انها ترفض تفتحله
طلع النهار
كان فتحى خلص علبة سجايره كلها فى القاعدة اللى قعدها
ومع اخر سيجارة
قام من مكانه
يخبط على باب اوضة اشرف
اللى كان رايح فى النوم
اول رقية ما سمعت صوت الخبط على الباب
قامت من نومها مفزوعة
كرر فتحى الخبط اكتر من مرة بقوة
لحد ما اشرف قام من مكانه
كانت رقية واقفة قصاد اشرف بتحاول تصحيه بس كان رايح فى النوم
اول ما فتح عنيه
اشرف بخضة.ايه فى ايه مين بيخبط
رقية.ده عم فتحى
انت مش قولت انه برة على السطح من بليل
اشرف قام بسرعة من مكانه.اه صحيح
خشى انتى جوة
راح اشرف فتح الباب
شاف فتحى واقف قدامه
فتحى.صباح الخير يا اشرف
يلا يابنى علشان ننزل
انا ورايا مصالح برضه
اشرف.صباح الخير يا عم فتحى
ما انا قولتلك الليلة اللى فاتت
خلينى انا ارجع بلدى احسن
فتحى.هو لعب عيال يا اشرف ولا ايه
عيب انا متكلم مع ناس معلمين فى السوق علشان اعرف اشغلك واوقفك وسطهم
وانت عايز تصغرنى وتقل مني
يعنى دى اخرتها
اشرف اتحرج من كلام فتحى
اشرف.لاء ميرضنيش يا عم فتحى
بس انا حاسس انى مش هعرف امشى فى وسطهم هنا
فتحى.تعالى بس انت معايا دلوقتى
وجرب يوم ولا اتنين ولا اسبوع
لو مجاش معاك الشغل خلاص ارجع بلدكم تانى
بس علشان امك واخواتك اللى عشمانين فى ربنا وفيك دول
ومستنيينك انت تنصفهم وتطلعهم من الضنك اللى عايشين فيه ده
يرضيك تكسر قلبهم وعشمهم وترجعلهم زى ما جيت
ايد ورا وايد قدام
كلام فتحى كان مترتب وموزون وبيقوله وهو عارف انه بيضغط على اشرف بالطريقة اللى هتقنعه
اشرف بقلة حيلة.عندك حق ياعم فتحى
اغسل وشى والبس وانزل معاك
فتحى.طيب اعملي كوباية شاى يا اشرف احسن انا عينى مغفلتش
وهوديك الموقف
واطلع انا اتوكل على الله على شغلي
عايز افوق
اشرف.حاضر احلى كوباية شاي
ومن غير ما اشرف يقول لفتحى ادخل
دخل فتحى على كنبة اشرف
وفرد جسمه
اتحرج اشرف يقوله اى حاجة
ودخل يعمله الشاى علشان يمشوا بسرعة
كانت رقية جوة ومرعوبة ان فتحى لسه موجود فى نفس المكان
اشرف عمل الشاى
وطلعه لفتحى اللى كان مغمض عنيه وغفل فى النوم
اشرف.الشاى ياعم فتحى
فتحى راح فى النوم
اشرف.ياعم فتحى
قوم اشرب الشاى هيبرد
فتح عنيه فتحى وقام قعد وماسك كوباية الشاى
اشرف واقف قصاده
فتحى بضيق.جرى ايه يابنى انت هتفضل واقفلي كده ما تروح تخلص نفسك خلينا ننزلوا بقى
اشرف كان مش عايز يطلع وفتحى فى الاوضة
لكن محرج يقوله اطلع برة
خرج اشرف للحمام يغسل وشه
وفى اقل من لحظة رجع للاوضة تانى
كان فتحى قاعد مكانه متحركش منه بيشرب كوباية الشاى
لبس اشرف جلابيته
وخلص فتحى الشاى بتاعه
ونزلوا
ورقية مظهرتش قدامهم لحظة حتى
ومجرد ما سمعت باب الاوضة اتقفل
اتنفست براحة
اتحركوا على الموقف
وفتحى ماشى ساكت ومش فايق
ودماغه شغالة
واشرف ماشى معاه ساكت هو كمان
عمال يتفرج على الزحمة اللى فى الشوارع من صباحية ربنا
لحد ما وصلوا الموقف
اللى كان زحمة بالضرب
موظفين وطلبة
وعربيات
ونصبات السندوتشات
واللعب
ودنيا تانية
سوق فى الموقف
اشرف.يابويا
ايه الناس دى كلها
هو مفيش حد فى بيته ولا ايه يا عم فتحى
فتحى.لاء يا اشرف ده اللى فى بيوتهم اكتر من كده بكتير كمان
اشرف.ده سوق يابا مش موقف
سواق.ايه يا ابو الفتوح صباح الفل
فينك ياعم مش باين من يومين
فتحى.صباح الفل يا محي
اهو كان عندى شوية مشغوليات كده
محي.الجماعة عندك بخير ولا فيه حاجة
فتحي.لا ياعم كلهم زى الفل
بس كنت برتب شغلانة لأشرف
بص فتحى لأشرف وهو بيشاور عليه
محي.ازيك يا اشرف
ايه هتشغله معاك على العربية يا فتحى ولا ايه
فتحى.لاء اشرف بتاع شاى
اتفقت هنا مع ابراهيم الريس على انه يقف بنصبة شاى
محي.ايه ده اتكلمت مع ابراهيم الريس مخصوص ده انت مقاطعه من زمن
باين عليك يا اشرف ليك غلاوة عند الريس فتحي
فتحي.اه اومال ايه
اخو جماعتي
يتبع
ايه رأأأأأأأأأأأأأأأأأأأأأأأأأأيكم بقى
ما بعد الأغتصاب
الفصل الثامن
اندهش اشرف ولكن متكلمش
اعتقاد منه ان فتحي بيقول كده علشان محدش يتعرضله لما يعرفوا من قريب فتحي
محي.جماعتك
جماعة ايه ياعم
انت بتهزر ولا ايه
انت اتجوزت ولا ايه
وامتى من غير ما تعزمنا كده
سكيتى
فرح فتحى العايق يبقى سكيتى
فتحى بيضحك.حيلك حيلك يا جدع
سكيتى ايه
لاء لسه متجوزتش
هو ربط كلام بس
وبعدين الليلة الكبيرة انت مش محتاج فيها عزومة
ده انت اخويا يا جدع يعنى صاحب فرح
محي.والله فرحتلك
اهو المغفلين هيزيدوا واحد
مبروك يا اشرف
فتحى ده رجولة وصاحب صاحبه
ربنا يتمم على خير
اشرف اكتفى انه يبتسم هو مش عارف يجارى فتحى فى كدبته
محي.طيب يا عايق اتوكل على الله انا دلوقتى
وابقى اظهر كده
احنا لازم نحتفل بقى قبل ما تدخل القفص
فتحي بضحك.اكيد طبعا يا صاحبى لازم نتقابل ونسهر سهرة حلوة
سابهم محي ومشى
اشرف باستفهام.انت ليه قولتله كده يا عم فتحي
فتحى.اسكت بس انت دلوقتى يا اشرف
خلينا نروح لمعلم ابراهيم
وانت تأمن على كلامى وبس
هنا اقتنع اشرف ان اللى قاله فتحي لصاحبه كان كدب
فعلا راحوا سوا للمعلم ابراهيم
وده ريس الموقف
وعرف فتحى اشرف على ابراهيم
واتفقوا على المكان اللى هيقف فيه بالنصبة بتاعته
وفتحى عرف ابراهيم ان اشرف يبقى اخو جماعته بالظبط زى ما قال لمحي صاحبه
واتفق معاه ان الاتاوة اللى بياخدها من اللى فى الموقف
فتحى هو اللى هيدفعها
اشرف كان عمال يبص حواليه
حاسس ان الزحمة دى
هتكون هى السبب فى انه فعلا يمسك قرش كويس
ويعمل اللى هو واهله بيتمنوه
كان متفائل
برغم ان اليوم كانت بدايته معاه مفيش فيها اى تفاؤل
فتحى.ها يا معلم اشرف
ايه رأيك بقى
لسه عايز تسافر بلدكم
اشرف.ايه ياعم فتحى الناس دى كلها
ده الموقف بيشغي ناس
فتحى.اهو كده اليوم بطوله
مش ساعة ولا اتنين
انت بس شد حيلك كده
وكل ما هتطول وتعمل عزوة هنا
كل ما هتتعرف وتمسك قرش زى الفل
وبدل ما تبقى واقف بنصبة شاى
تعمل قهوة
اشرف.قهوة مرة واحدة
ياااسلام ياولاد
ده يبقى زعقلي نبي بصحيح
فتحي.يلا ارجع انت بقى رتب امورك وشوف ايه العدة اللى هتجهزها
علشان من بكرة تنزل تسترزق بقى
انا لازم اتوكل على الله
بقالى يومين مطلعتش
اشرف.كتر خيرك يا عم فتحي
ربنا يرزقك ويوسع عليك
فتحي.لو عايز ترجع اختك البلد
انا ممكن اروح هناك النهاردة
اخدها على سكتى
اشرف.لاء يا عم فتحى متتعبش نفسك
لو انا مش هروح معاها
هنستنى ابويا لما ييجى ياخدها معاه
فتحى.طيب يا اشرف
بكرة هبقى اعدي عليك فى الموقف اشوف الاحوال ماشية معاك ازاى
محتاج فلوس
اشرف.لالا مستورة الحمد لله
لسه معايا قرشين من اللى انت كنت عاطيهملى
وكده كده شغلى جاهز مش ناقصه حاجة
يعنى مش هحتاج فلوس فى حاجة
فتحي.ماشى يلا امشى انت بقى
هتعرف توصل للبيت ولا ايه
اشرف.اه هعرف
اشرف رجع على البيت
وفتحى راح استلم العربية
وشاف شغله
ويهزر مع دى
ويتمسخر مع دى
واللى تيجي معاه سكة
مياخدش منها اجرته
رقية.ايه يا اشرف
عملت ايه يا خويا
اشرف.اسكتى يابت يا رقية
ايه الناس دى كلها اللى فى الشوارع
دى بلدنا كلها بناسها بدكاكينها
واقفين فى الموقف هناك
رقية.طيب ياخويا بركة
ربنا يجعل سعيك فتحة خير ليك ولينا
اشرف.شوفى يا رقية
لو عايزانى اخدك اروحك البلد من الليلة يلا بينا
عايزة تستنى لما ابويا ييجى ترجعى معاه اللى يعجبك
رقية.لاء يا خويا انت بقى اتوكل على الله
ولما ابويا ييجى هرجع انا معاه
اشرف.ماشى يابنت ابويا
بس زى ما اتفقنا
لو الباب خبط وانا مش هنا
اوعي تفتحى للجن الازرق
كأن الاوضة مفيهاش حد
رقية.اطمن يا اشرف
فات اليوم
ما بين تجهيز اشرف لشغله وحاجته
ومابين شغل فتحى رايح جاى على الطريق
ومبيعديش عليه اليوم غير هزاره مع الستات وشربه للقرف اللى بيقلب دماغه
وميمنعش ان لو واحدة اتساهلت معاه وجت الفرصة انه يريح شوية ويقضى معاها وقت هى والشيطان
ميضيعش الفرصة
خلص فتحى الطرف بتاعه
ورجع قعد على القهوة
بيسلم السواق التانى
على.السلام عليكم
فتحى بسعادة.ايه ده عيلوة اخويا بحاله نور القهوة
هات شربات ياض يا خلف
على بأبتسامة.هتفضل طول عمرك كده كل حاجة واخدها بضحك
عامل ايه يا فتحي
فتحى.طب اقعد الاول انت جاي تسأل على حالى وانت واقف
ده انت واحشنى
قعد على.بكاش انت يا واد يا فتحي
ايه يابنى ناسى ان ليك اخ وبنات اخ تسأل عنهم وتشقر عليهم
فتحي.معلش يا عيلوة انت عارف يا خويا اهو لسه مخلص شغل
وجاى اسلم السواق اللى شغال معايا
ومش هاجيلكم نص الليل يعنى
على.لاء يا ولا وانت سيد الاصول
وماله حجتك معاك
المهم انا جاى اقولك ان انت واخواتك هتتغدوا معايا فى البيت يوم الجمعة
عايزين نتجمع بقى
فتحى.خير فى حاجة ولا ايه
على.هو احنا علشان نتجمع لازم يكون فيه حاجة يعنى
صلة رحم يابن الناس
اخوات احنا لازم نود بعض
فتحى.ماشى يا خويا تن بيتك عامر بحسك
وعلطول مجمعنا كده
على.عقبال ما نجيلك بيتك بقى
يلا انا هقوم امشى
علشان العيال مش بيتعشوا غير لما ارجع
سلم فتحى على اخوه
ومشى على بيته
وكمل فتحى قعدته على القهوة
لحد ما سلم العربية
وقرر انه يرجع البيت بدرى شوية علشان اخته متتخانقش معاه تانى
وفعلا رجع لقاها هى وجوزها قاعدين قدام التليفزيون
فتحى.سلام عليكم
جوهرة وجوزها.عليكم السلام ورحمة الله
جوهرة.حمد الله على السلامة
احطلك تتعشى
فتحى.لالا انا واكل برة
يادوب ادخل استحمى وانام
عايز اتوكل على الله بدرى
جوهرة.ماشى تصبح على خير
دخل فتحى استحمى وطلع اترمى على السرير نام مهدود ما هو يومه مخلاش من السرمحة برضه
وطلع النهار
ونزل اشرف اتوكل على الله
وراح على شغله
ونصب نصبته
واخد على الجو بسرعة
وبدأ يشتغل
والطلبات تهل عليه
صحى فتحى من نومه
وخرج من البيت من غير ما يفطر
هو واخد على خاطره من الطريقة اللى جوهرة اتكلمت بيها معاه
فتحى راح على اوضة اشرف
وخبط على الباب
رقية قررت انها متفتحش الباب زى اخوها ما قال
راح فتحى ناحية شباك اوضتها
وبصوت واطى وحنية.بت يا رقية
انا عارف انك قاعدة سامعانى
انا عايز اقولك كلمتين
امبارح انا مكنتش فى وعيي
متأخذنيش فى اللى حصل
مكانش فيه حاجة فى ضميرى
بس خليكي عارفة ان انا لو كنت عايز اعمل حاجة كنت عملتها
ومفيش حاجة تمنعني عن اللى فى دماغي
بس انتى بت مؤدبة ومحترمة
ومع ان سنك صغير
لكن جدعة وبتعرفي تحافظى على نفسك
وده اللى حريم اد عمرك مرتين تلاتة مش بيعملوه
خليكي زى ما انتي كده
يلا انا ماشى
ومتخافيش انا مش هضايقك تانى
سمعت رقية كلام فتحى
وببرائة فرحت اوى من كلامه
وفرحت اكتر انه طلع غير اللى هى واخوها فكروا فيه
واقتنعت ان اللى حصل منه ده لانه بس كان مش فى وعيه
قالت لنفسها ليه لاء
ماهو اشرف اخويا لما شرب
محسش بالدنيا ولا بيا
يبقى ليه عم فتحى ميكونش حصله نفس اللى حصل مع اشرف
فرحت وهديت شوية من قلقها اللى كانت حاسة بيه
مر اليوم على اشرف والشغل كتير معاه
وكان فرحان اوى
مر عليه فتحى واطمن ان الدنيا معاه كويسة وماشية تمام
وفات يومين على الحال ده
اشرف فرحان اوى بشغله والفلوس اللى جريت فى ايديه
وكل يوم يرجع الاوضة وهو جايب خزين وحلويات لاخته وللبيت
ورقية شايفة طلبات اخوها كلها ونسيت اللى حصل من فتحى اللى بقى مش بيروحلهم البيت ولا حتى بيفوت على اشرف فى الموقف
يوم الجمعة
اشرف اجازة
رقية.صباح الخير يا زينة الشباب
اشرف.صباح الفل يا ست البنات
رقية.ايه اجازة ولا ايه
اشرف.اه وهاخدك النهاردة بقى افسحك واجيبلك اللى انتى عايزاه كله
رقية بفرحة.احلف بالله
هتودينى البحر
اشرف.وماله نروح نمشى على البحر
رقية طايرة من الفرحة وبتتنطط زى الاطفال اللى فرحانين بهدوم العيد
فتحى واخواته اتجمعوا عند على
وكانت مرات اخوهم عاملة عزومة كبيرة
وكان الجو بين العيلة كلها كله ود
لحد على ما بص لمراته
وقامت دخلت المطبخ تغسل المواعين
وتعملهم شاى
علشان تسيبهم يتكلموا براحتهم
علي.ها بقى يا ابو الفتوح
انت ناوى امتى تفتح بيت
فتحى بيضحك.افتح بيت
هى اختك اشتكيتلك مني ولا ايه
جوهرة.اه يا فتحى اشتكيت
اومال هنفضل سايبينك طايح فى الدنيا كده
على.اختك مش بتشتكى يا فتحى
اختك خايفة عليك
فردوس.يا فتحى يا حبيبى
انت ياخويا بتكبر فى السن
اتجوز ياخويا وهاتلك حتة عيل
بدل ما تلاقى نفسك بقيت اربعين ولا خمسين سنة وانت براسك
ابن الكبير يتيم يا حبيبى
هات عيالك وانت لسه بصحتك
فتحى بيضحك.ايه يا فردوس ياختى اللى بتقوليه ده
الاعمار بيد الله
وبعدين الموت والحيا مش بالسن
على.يابنى عايزينك تفتح بيت ويبقى ليك واحدة ست تشوف طلباتك وتعفك يا فتحى
بدل اللى انت بتعمله ده
راعي ربنا فى نفسك وفينا يا بنى
فتحى.العزومة طلعت معمولة علشان تعملوا عليا قعر مجلس
وماله يا على يا خويا
انا راضى انى اتجوز
والعروسة كمان موجودة
بس قولولى بقى
اتجوز بأيه
لا معايا اجيب بيت
ولا معايا اجهز
انتم عارفين انا علطول قرشى ضايع
نزهى ومبحبش اكنز
فردوس بسعادة.والنبى صحيح
حاطط عينك على حد
اخ منك يا خبيث انت
علي.يعنى انت فيه واحدة شاغلاك وناوى معاها على الحلال
طيب مقولتش ليه يا فتحي
فتحى.ياعلى اقول ايه
واشيلكم همي ليه
انا لا بيت ولا فلوس مكسورة
يعنى فتح البيت مش ببلاش يا خويا
وانا عارف ظروفكم كلكم
واللى ميشوفش من الغربال يبقى اعمى
جوهرة.ايه يا ولا يا عبيط انت ده
اومال اخوات ايه لو مش هنقف جنب بعض يعنى
وبعدين القرش على القرش هيقضى الغرض
انت بس قول انك نويت
وكله هيتحل
فتحى.طيب انا نويت
هتتحل ازاى
على.محلولة يا عم
اوضة ابوك فى البيت القديم مقفولة
بندفع ايجارها كل شهر ومقفولة
تتوضب وتاخدلها وشين جير
هتبقى زى الفل
فردوس.وانا هكلم خليل اخوك يبعتلنا قرشين كمان وهحط معاه
واجيبلك اوضة النوم
جوهرة.وليك عليا باقى لوازم الاوضة كلها
واحنا فى ديك الساعة لما تتجوز ياخويا
ده يا نهار ابيض
فتحى.ايه ده
بالسهولة دى اتحلت
على.اه يا فتحى انت فاكر ايه
ده الحلال ربنا بييسره
بس المهم انت قولنا مين العروسة
وعرفتها منين دى
حد نعرفه
فتحى كلمهم عن رقية
واستغربوا كلهم لما عرفوا سنها
فتحى.بت خام ومحترمة
وقطة مغمضة
لكن الحريم انا اتعقدت من اللى بشوفه
هتجوز علشان اريحكم
يبقى اتجوز اللى تريحني
هحطها فى البيت
لو وسط مليون جدع هرجع الاقيها محافظة على نفسها وعلى شرفي
على.خلاص يا خويا مدام انت مقتنع بيها نتوكل على الله
المهم تكون محترمة ومن بيت طيب
فتحى.لاء دول ناس اطيب من الطيبة
على قد ايدينا ومش هيقولوا على حاجة لاء
غلابة اوى
فردوس بسعادة.طيب نروحوا بقى نطلبوها
خير البر عاجله
فتحى.طيب هرتب مع اخوها ونشوف يوم ونروح لاهلها
كان فتحى من جواه حاسس انه دبس نفسه
لكن كان مش لاقى مفر من اخواته وزنهم
وفى نفس الوقت هو نفسه يطول رقية
وعلشان كده هى اللى جت فى باله
خاصة انها هى الوحيدة اللى صدته برغم انه كان مزغلل عنيها بكل اللى نفسها فيه
لكن هى مهمهاش غير انها تحافظ على نفسها منه
اما رقية واشرف
كانوا بيتفسحوا طول اليوم
ولفوا طريق البحر كله
واكلوا برة
وجابلها هدوم جديدة
وقضيت رقية يوم من احلى ايام حياتها
بس يا ترى هتعيش ايام حلوة تانية ولا لاء؟
ما بعد الأغتصاب
الفصل التاسع
انتهت الليلة
وكل واحد رجع لمكانه
لكن فتحى راح يكمل سهرته مع اصحابه
كانت جوهرة وعلي وفردوس فرحانين جدا ان اخوهم اخيرا قرر يتجوز
وبرغم انهم عرفوا فرق السن بينه وبين البنت
الا انهم ما صدقوا انه قرر يفتح بيت ويعقل
لعل جوازه يكون سبب فى هدايته
قضى فتحى ليلته شرب ومزاج فى نفس الدكان بتاع صاحبه
السهرة اللى كانت لا تخلوا من الحرام بجميع اشكاله
ولحد ما النهار طلع
كان مقرر فتحى الليلة دى انه مش هيبات عند جوهرة
وانه هيقضى الليلة مع اصحابه
ويطلع الصبح على شغله
وفعلا ده اللى حصل
خرج من الدكان لما النهار طلع
وراح استلم عربيته
وقبل ما ياخد اول نقلة
راح بعربيته فاضية
شايل خزين وفواكه وخضار ولحوم بكميات
ووقف على باب ابو رقية وخبط
نبوية.يا الف مرحب
سى فتحي اهلا وسهلا ياخويا
يادي النور
خرج ابو اشرف من الاوضة.ايه ده المعلم فتحى بجلالة قدره
اتفضل يا راجل انت واقف على الباب كده ليه
انت صاحب بيت
دخل فتحى وهو شايل ومحمل
ووجه كلامه لأبو اشرف.معلش يا ابو اشرف فيه حاجات فى صندوق العربية
هاتهم علشان مقدرتش اشيل كل حاجة
خرج ابو اشرف للعربية
وشال باقى الحاجة اللى فى الصندوق
وكانت نبوية عينها على الحاجة اللى دخل بيها
ومستغربة سببه انه يجيلهم بدرى كده
ابو اشرف.ايه ده كله
انت هتفتح فرش خضار هنا يا معلم فتحي ولا ايه
فتحى وهو بيقعد على الكنبة.فرش ايه يا ابو اشرف
دى فضلة خيركم زيارة بسيطة كده
نبوية بفرحة.ياحومتى كل ده وزيارة بسيطة
ده انت جايب السوق كله يا سى فتحي
فتحي.دى حاجة بسيطة يا ست ام اشرف
معلش لو هرذل عليكي بس فى كوباية شاى
علشان عايز ابو اشرف فى كلمتين
نبوية.كوباية شاى ايه بس
انا هدخل احضرلكم الفطار
بالأذن
دخلت نبوية على المطبخ
وكانت بسمة ورشا لسه نايمين
ابو اشرف.خطوة عزيزة يا معلم فتحي
فتحى.يعز مقدارك
بقولك ايه يا ابو اشرف
انا جايلك دلوقتى
علشان عندى كلمتين مهمين عايز اخد ردك عليهم دلوقتى
ابو اشرف باستغراب.خير يا معلم فتحى
حد فى العيال عمل حاجة
انا كنت هروحلهم بكرة الأحد
قولت هريح من السوق بكرة واروح اشقر عليهم
خير طمني
فتحي.لالا عيالك زى الفل
انا جايلك علشان عايز اناسبك
ابو اشرف بفرحة.تناسبنى انا يا معلم فتحي
واحنا نطول
ده انا اجهزها واوصلهالك لحد باب بيتك
بس قولى انت عايز مين فيهم
فتحى.عايز رقية
ومش عايزك تحمل هم قشاية حتى
عايزها حتى من غير شنطة هدومها انا هجيبهالها
ابو اشرف بسعادة.لاء يا بويا وده كلام برضه
دى بنتنا ولازم نشرفها
هو اه احنا على قدنا اوى
بس برضه
لازم البت تبقى داخلة بيتك متشرفة ومتحسش انها اقل من حد
فتحي.يعنى انت موافق وده المهم دلوقتى
ابو اشرف.اهييييه ودي عايزه سؤال يا راجل
ده انت زين الرجال
تشرف اى بيت تطلب نسبه
فتحى طلع من جيبه مبلغ ومد ايديه بيه لأبو اشرف
ابو اشرف.ايه دول يا معلم فتحي
فتحى.دى فلوس تجيب بيها لوازم رقية كلها
اللى على اى عروسة
وانت تجيب مراتك وتيجي اسكندرية
علشان اختى الكبيرة مش هتقدر على المشوار ده
وهنيجى نطلبها منك فى السكن بتاع اشرف
ومتقلقش بتك هنقدرها وشبكتها وفرحها هيبقى زى ما الكتاب بيقول
بس انت اوعى قصاد اخواتى تقول انى عطيتلك فلوس تجهز بيها بنتك
نبوية طالعه بصنية الفطار
ابو اشرف.زرغطى يا ولية
المعلم فتحى عايز بتك رقية
نبوية بتحط الصنية على الارض
وبتعتدل فى وقفتها.عايز رقية بتى انا
يتجوزها يعني
ابو اشرف.اومال ايه يا ام مخ تخين انتى
عايزها يبيع ويشتري فيها
نبوية بفرحة ابتديت تزرغط ورا بعض من فرحتها
للدرجة اللى قومت البنات من نومهم وهما مستغربين
خرجوا واتفاجئوا بوجود فتحى رجعوا مكانهم تانى وندهوا على امهم
رشا.فى ايه يمة
ايه اللى جاب الراجل ده
وانتى بتزرغطى ليه
نبوية.زرغطوا يا عيال
المعلم فتحى طلب اختكم رقية
بسمة بصدمة.ايه
ده هيتجوز رقية اختى
نبوية.مالك يابت فى ايه
انتى اتلونتى كده ليه
ماله ده
انتى عينك منه ولا ايه
رشا.عينها منه!!
ايه يمة اللى انتى بتقوليه ده
بس يعنى انتى مش شايفة ان الراجل ده كبير اوى ورقية اختى صغيرة
نبوية.هو ايه ياختى اللى كبير
وبعدين اختك مش صغيرة ياختى
اختك خلاص من سنتين لو كان جالها نصيبها وفى ايدينا نجهزها كان زمانها معاها عيال دلوقتى
احنا قلة المال بس هى اللى مخليانا لحد دلوقتى مقعدينكم جنبنا
رشا.عيال ايه يمة
دى لسه بت 13
وبعدين هو يعنى المال ده حضر دلوقتى
نبوية.بصى انا لسه معرفش ايه اللى دار
بس طالما ابوكي وافق ورحب
يبقى الراجل ده قاله اللى يكيفه
يمشى بس ونعرف ايه اللى حصل
فعلا مشى فتحى
واتفق مع ابو اشرف على يوم الجمعة يكون موجود فى اسكندرية
علشان يجيب اهله وييجوا يطلبوا رقية
نبوية.ايه يا راجل
فرح قلبى
اتفقت معاه على ايه
ابو اشرف.لا اتفقت ايه
شوفى يا ولية دفعلى كام
ده عطانى 1000 جنيه
وقاللى اجيب للبنت لوازمها
يعنى مش هيدفعنا قرش فى شوار البت
غير انه قاللى كل حاجة فى الجواز هو اللى هيشيلها
نبوية بتزرغط تانى
رشا.يابا بس رقية طيب هترضى
ده الراجل سنه كبير عليها اوى
ابو اشرف.اتكتمى يابت
سن ايه وكبير وصغير ايه
ده راجل هيعيشها برنسيسة
وبعدين لما هو يبقى كبير وهى تبقى صغيرة
ده يخليه يحبها اكتر يابت
ويفرح بيها
هترجعه سنين لورا
مش هتفهموا انتم الكلام ده
ده السن اللى بتتكلموا فيه ده هيخليه يشيلها على راسه
انتم مش شايفين هو شاريها ازاى
رشا بأستهزاء.اه صح شاريها اوى
ابو اشرف.اتلمي يابت واتكلمى بأدب
شوفى يا نبوية
انتى انزلى هنا شوفى ايه الحاجة اللى البت تحتاجها فى جهازها
وبلاش تفرتكي الفلوس ها لمي ايديكي
نبوية.الم ايديا ايه يا ابو اشرف
هى مش دى فلوس شوارها
خلينا نجيب للبت كل اللى هتحتاجه
ده احنا المفروض نصيغها كمان
بدل ما تدخل وسطهم وهى لا حلق ولا غويشة
ابو اشرف.خلينا بقى نضيع الفلوس فى الكلام الفاضى
انتى ايه ياولية
شوفتى الفلوس اتصرعتي
بقولك لمي ايديكي
خلينا نكسر قرش هينفعنا
نبوية.ماشى يا خويا
بس لما تيجي هى معانا بقى الجمعة الجاية علشان تختار على عجب عينها
ابو اشرف بأنفعال.شوف الولية البهيمة
تختار ايه يا ولية
هى كانت تطول تتجهز ولا يتجابلها حتى هدمتين جداد
البت غلبانة هتفرح باللى هييجي
خدى انتى اخواتها
وانزلوا اتسوقوا
وانا بكرة هروحلهم
علشان اتكلم مع اشرف لأن المعلم فتحى
متكلمش معاه فى حاجة
ولازم الواد يبقى على علم
نبوية.ماشى يا خويا اللى انت شايفه
كانت رشا وبسمة مش مقتنعين بالموضوع
لكن خلاص ابوهم وامهم موافقين وفرحانين
هما مالهمش رأى فى حاجة زى دى
رجع فتحى اسكندرية
ومفكرش يشوف اشرف ولا رقية ابدا لحد ما ييجى يوم الجمعة
هو عارف كويس ان ابوها ما صدق ييجى لواحدة من بناته جوازة زى دى
وبرغم انه يقدر يجهز نفسه للجواز بسرعة
الا انه حب يوري اخواته ان اللى كان معطله عن الجواز انه معهوش اللى يكفي يفتح بيت بيه
ركز فتحى فى شغله
وبقى على اخوه وجوهرة بيتابعوا توضيب الاوضة اللى هيتجوز فيها
كانت فى بيت عربي قديم
من البيوت اللى مقسمة لأوض
وفيها عائلات كتير
كانت اوضة ابو فتحى فى الدور الارضى
وجنبها كمان 4 اوض
وكان فوق الأرضى دورين علوى غير السطح
وكل البيت مليان ناس
وكلهم يعرفوا بعض
وزى الأهل
وعلشان كده كانوا فرحانين ان فتحى هيتجوز
ما هى امه وابوه كانوا عشرة عمر لجيران البيت
والعيال متربيين فى وسطهم مع عيالهم
يعنى فتحى بالنسبة لكبار البيت واحد من عيالهم
وكانوا واقفين مع علي وجوهرة فى اى حاجة بيعملوها
وكأن ربنا بيسهل كل حاجة للحلال علشان فتحي يستقر ويبعد عن الحرام
الأوض كلها كانت متقسمة من جواها لان مساحاتها كبيرة
لكن الحمام بتاع الأوض دى مشترك
فى الحوش اللى قدام الأوض
وبرة الحمام فيه حوض كبير بحنفية
عاملينه علشان لما الستات بيتجمعوا مع بعض فى الحوش برة يغسلوا مواعينهم او حتى غسيلهم
ابو اشرف.بت يا رقية افتحي انا ابوكي
رقية بتجرى على الباب بتفتح بفرحة.ابويا
عامل ايه يا با
وحشتينى انت وامي واخواتى
ابو اشرف بيدخل الأوضة.ايه يا عروسة
عاملة ايه هنا يا بت
رقية.بخير يابا الحمد لله فى نعمة
ابو اشرف.واخوكى عامل ايه معاكي
رقية.اشرف
يا زين الشباب يابا
ربنا يسعده ويجبر بخاطره زى ما هو علطول بيفرحني
ابو اشرف.اوعي يابت يكون بيفرتك فلوسه على الفاضى
رقية.لاء يابا
انا بحوشله فلوسه
مبينزلش بقرش فى جيبه
ولما بييجى مش اكتر من انه يجيبلنا الأكل بتاعنا ولوازمنا ونعين الباقى على جنب
ابو اشرف.جدعة يابت
عايزك تعملى كده مع جوزك
تبقى واعية وتخلى قرشه تحت ايديكي
خليكي ناصحة
رقية فكرت ان ابوها بيتكلم عن المستقبل وده خلاها ضحكت واتكسفت.اقوم اعملك لقمة يابويا
ابو اشرف.يابت وشك احمر ليه
انا بتكلم بصحيح
المعلم فتحى طلبك مني
وانا رضيت
وجاى علشان اقول لاخوكى
هييجى هو واهله هنا يوم الجمعة
علشان يشوفوكى
رقية.يشوفوا مين يا با
ومين دى اللى طلبها
ابو اشرف.المعلم فتحي يا بت يا حمارة انتى
طلب يتجوزك
واهله هييجوا هنا علشان يقروا فتحتك يا بت
وامك واخواتك فى البلد نازلين يجيبولك لوازم الجواز
رقية مصدومة ومش عارفة هى المفروض يكون رد فعلها ايه
فتحى من وقت ما برر اللى عمله مفكرش تانى يوريلهم وشه
وده اقنعها ان نيته كانت مش وحسة من ناحيتها
وفى نفس الوقت هى مش مستوعبة فكرة انها تتجوز
ابو اشرف.فى ايه يا بت مالك بهمتي كده ليه
رقية بكسوف.لاء يابا
اللى انت شايفه صح
انا ماليش كلام بعد كلامك انت واشرف
شوفوا هتقولوا ايه وانا راضية
ابو اشرف.بصى يابت يا رقية
هقولك كلمتين حطيهم حلقة فى ودنك
فتحى ده سنه كبير عنك
يعنى عايز واحدة ترجعه ابن عشرين من تانى
تحسسه انه لسه صغير وتدلعه كده
علشان اختار بت صغيرة زيك
وبعدين الراجل اه شغلته على باب الله زينا
بس هو ريس فى شغلته
يعنى بيعرف يكسر قرش
ونزيه
وهيعوضك عن الفقر اللى عيشتيه فى بيت ابوكى
ولو عرفتى تكسبيه بصحيح
هتعوضى اخواتك وامك كمان عن الفقر اللى احنا فيه
الراجل ده يابت فرصتك وفرصتنا
وده معارفه كتير
يعنى مش بعيد يجيب عريس لأختك
ولا عروسة مرتاحة زيه كده لاخوكي
وكلكم تقبوا بقى على وش الدنيا
وتعيشوا زى خلق الله
رقية.يابا بس انا بقوله يا عمي
ابو اشرف.يابت بقولك فتحي مخك متبقيش حمارة زى امك
بقولك الراجل لما يتجوز بت اصغر منه
يبقى بيدول على الدلع
خليكي مفتحة بقى زى اللى عايشين حواليكي
اللى فى سنك متجوزين وفاتحين بيوت
يعنى انتى مش عيلة خلاص
فتحي مخك وكلى بعقله هو واهله حلاوة
هيشيلوكى من على الارض شيل
فاهمة يابت
رقية اغراها كلام ابوها.حاضر يابا
شوف انت عايزنى اعمل ايه وانا اعمله
ابو اشرف.عايزك تكسبي رضاهم
وتقولى حاضر وطيب
واى حد منهم يقولك حاجة تقولى امين
وامك بقى هتفهمك جوزك ترضيه ازاى لما تيجي هى
ولو سمعتى كلامنا هتعيشى ملكة يابت
والراجل مش هيتأخر عنك فى اى حاجة تعوزيها
كل اللى اتحرمتي منه هتلاقيه تحت رجليكي
رقية بفرحة بريئة.بجد يابا كل حاجة
يعنى هتفسح
والبس هدوم جديدة
واكل لحمة وكفتة وفراخ علطول
ابو اشرف.ويجيبلك دهب كمان
فرحت رقية ومن فرحتها بالحاجات اللى ابوها قعد يعدهالها
بقيت تتنطط وتلف حوالين نفسها
بالذات كمان لما عرفت ان فتحى هيجيب تليفزيون
وهى كانت نفسها يكون فى بيتهم تليفزيون بدل ما كانت بتتفرج عند الجيران
ابو اشرف.انا هريح شوية بقى وانتى اعمليلى كوباية شاى
اهو نضيع وقت لحد ما اخوكي ييجي
رقية.من عيونى يابا
فات الوقت
وخلص اشرف شغله
ورجع اوضته وهو جايب خير ربنا كله
وفرح اوى لما شاف ابوه عنده
ابو اشرف.ايه يابنى طمني
اخدت على الجو هنا ولا لسه
اشرف.الحمد لله يابا
انا فى حالى
وده مخلي الناس بتعزنى
وكل الموقف بقوا معارفي
خلاص
ابو اشرف.ومحدش ضايقك من اول ما نزلت
اشرف.لالا
كلهم عاملين حساب من الأول لعم فتحى
ما هو قايلهم اننا نسايب
علشان محدش يفكر يتعرضلي
ابو اشرف.بس هو نسيبنا بجد يا ولا
اشرف.لاء يابا
قال كده بس علشان الناس تعمل حساب انى قريبه
ابو اشرف.ياض بقولك نسيبنا بجد
الراجل طلب اختك رقية وانا وافقت وهييجوا الجمعة يقروا الفاتحة
اشرف بصدمة.مين اللى طلب اختى يابا
ابو اشرف.الله يخربيت ابوكم
ايه انتم بجم
صحيح مش مصدقين روحكم
ما هو هتصدقوا ازاى ان راجل زى ده يناسبنا
اشرف.ليه يابا يعنى
انا اخواتى زى الفل
واحسن رجالة يتاقلوهم بالدهب
وبعدين يعنى المعلم فتحى راجل كسيب وكل حاجة
ووقف معايا وساعدني
لكن برضه يعنى مش الأملة اللى تخلينا ما نصدق نوافق على اننا نديه رقية
ابو اشرف.اه انت القرش جري فى ايدك بقى خلاص
وشايف ان الراجل قليل
ناسى ان هو سبب فى انك تمسك قرش
اشرف.يابا ده رزق ربنا كان قاسمهولى
هنا او هناك كان مكتوبلي
ابو اشرف.بقولك ايه
امك راضية
واختك بذات نفسها راضية
وانا اتفقت مع الراجل خلاص
انت مش هتعرف مصلحة بتي اكتر مني
الراجل ما يعيبهوش غير جيبه
وهو جيبه عمران وشاري
ده انت مشوفتهوش داخل علينا شايل ومحمل ازاى
جايب السوق كله
من الأبرة للصاروخ
راجل جلاب خير
متخافش على اختك معاه
اشرف.انت متأكد يابا انى مخافش على اختي معاه
ابو اشرف.وانت ياض هتعدل عليا ولا ايه
بقولك هيصونها ويحافظ عليها
يبقى تسمع كلام ابوك وتنفذه وانت مغمض
الخميس هجيب امك واخواتك ونيجي
علشان الناس جاية الجمعة
ابقى اعمل حسابك تعمل اليوم ده راحة بقى
اشرف مش مقتنع
لكن هو كمان زى اخواته
مدام ابوه وافق على الحاجة
مهما قال مش هيعرف يراجعه فيها
لكن اشرف مكانش مقتنع بأن دى جوازة ناجحة
ما بعد الأغتصاب
الفصل العاشر
مرت الأيام بمنتهى السرعة
كانت رقية نسيت كل حاجة كانت مخوفاها
وفرحانة بأنها هتبقى عروسة
ومش فاهمة ايه اللى هى داخلة عليه
بقيت عايشة تحلم بس بكل الحاجات اللى ابوها فرحها بيها
وعشمها انها هتلاقيها فى جوازها من فتحى
وفى نفس الوقت كان فتحى مش بيفكر يورى وشه لأشرف او يروحله او حتى يمر عليهم فى البيت
جه يوم الجمعة
وكانت نبوية فرحانة ببنتها
وبالجوازة اللى هتتجوزها
حتى اخواتها حاولوا يفرحوا معاها
هما برضه خبرتهم فى الدنيا قليلة
والطمع كان عامي عيون ابوهم وامهم
كانوا من اول اليوم بيغنوا ويسقفوا
وكان فتحى فى البيت نايم
جوهرة.قوم يا عريس
فيه عريس ينام للعصر يوم خطوبته
فتح فتحى عنيه بكسل.فى ايه يا جوهرة
هى الساعة كام
جوهرة.العصر اذن يا خويا
اصحى يلا يا عريس
فتحى.ماشى يا جوهرة لسه بدرى
جوهرة.قوم يا ولا بقولك
عايزين نفوت على اختك فردوس
على ومراته هيجولنا على هناك ونمشى سوا
فتحى قام قعد على السرير.ماشى يا جوهرة اهو صحيت
جوهرة بأستغراب.مالك يا فتحى
انت مش فرحان ولا ايه
فتحى.ليه بتقولى كده
جوهرة.اصل يعنى شايفاك صاحى مالكش كيف كده
ده العريس مبيعرفش ينام لما بيبقى فرحان انه هياخد اللى عايزها
لكن انت غضب ربنا نازل على وشك
هو فيه حاجة يا ولا
قول يا خويا
لو حصلت حاجة بينك وبينها وبتصلح غلطة
قولى
خلينا على نور
فتحى.لالا ايه اللى بتقوليه ده يا جوهرة
دى بت زى الفل
هتشوفيها
دى اصغر من بتك ايمان
جاية من ورا الجاموسة طازة
متعرفش حتى السما من العما
بس انتى مصحيانى وعمالة دودودودودو
على ودني قبل حتى ما اغسل وشى
طبيعي يعنى ابقى مقريف
جوهرة وهى بتخبطه على كتفه.ينيلك عيل
بتقول على عروستك من ورا الجاموسة
اما انت راجل هزؤ صحيح
قوم يلا ياولا
العيال برة لبسوا
فتحى.ماشى يا جوهرة هدخل استحمى والبس
فعلا جهز فتحى نفسه
ولبس طقم جديد وساعة جديدة
وكأنه ابن باشا رايح يخطب
خرج مع اخته وجوزها واولادها
وراحوا سوا لفردوس اللى كان على ومراته واولادهم كمان جاهزين
ومشوا كلهم مع بعض
وكانوا فرحانين جدا
لكن فتحى اللى مكانش حاسس بأى حاجة
ولا فرحان ولا زعلان
وقف على عند محل حلويات
واشترى جاتوه
وكملوا مشوارهم
لحد ما وصلوا عند العمارة اللى فى فيها رقية
طلعوا وسبقهم فتحى
على السلم
فتحى.ايه ده يا ابوش اشرف
ابو اشرف بسعادة.اهلا اهلا يا عريس
الدنيا نورت
ربنا يتمم على خير
فتحى.بقولك ايه ده
اخواتى هيقعدوا فين
ابو اشرف.جوة يا معلم فتحى
الأوضة براح
واحنا ان شالله نقعد على الارض
فتحى.بقولك ايه اعمل لنفسك كرامة شواية قدام اهلى
وابعت اشرف ابنك يجيب شوية كراسى من القهوة اللى على اول الشارع
وطلع فتحى فلوس من جيبه وعطاها لأبو اشرف
علشان يدفع تمن ايجار الكراسى
دخل ابو اشرف لأبنه اللى كان قاعد جوة مع اخواته
وطلب منه يجيب الكراسى
وفعلا خرج اشرف من الاوضة يجرى بعد انفعال ابوه عليه
قابل اهل فتحى اللى كانوا وصلوا للسطح
ورحب بيهم
فتحى كان على الباب هو وابو اشرف
واستقبلوا سوا اخواته واجوازهم كمان
عرف فتحى اخواته على حماه
ودخلت الستات كلها الأوضة ورحبت بيهم نبوية
والرجالة فضلوا واقفين على الباب
لحد اشرف ما يجيب الكراسى
جوهرة واختها ومرات اخوها
كانوا فرحانين لأخوهم وفرحتهم باينة عليهم
وعلشان كده برغم ضيق حال اهل العروسة اللى واضح عليهم من اول لحظة
الا انهم حسوا ان العروسة من بيت طيب
جوهرة.وفين عروستنا بقى يا ام العروسة
عايزين نشوف القمر اللى عرفت توقع العايق بجلالة قدره
نبوية بسعادة.يسلم لسانك يا ست الستات
اناديلك عليها من عنيا
يا رقية
تعالى يا عروسة
سلمى على عمتك
خرجت رقية اللى كانت زى الملايكة
لابسة فستان خامته من الحرير
الوانه كتير لو على الوقت اللى احنا فيه
ممكن نقول عليه اوفر
او مبهرج اوى
لكن بالنسبة لرقية واهلها
كان فستان ممثلين
لاحظوا اهل فتحى بساطة رقية وبرائتها
وكمان لاحظوا جمالها
وصغر سنها
فرحوا اوى بيها
ورحبوا بيها
وهى بمنتهى الادب سلمت عليهم
قعدت بين جوهرة وفردوس
اللى كانوا بيضحكوا وبيطبطبوا عليها
وجوهرة قعدت تعرفها عليهم
وعلى ولادهم
وعلى مرات اخوهم كمان
ورقية تسلم عليهم كلهم وتبوس ايديهم
جه اشرف ومعاه الكراسى
وقعدوا الرجالة برة
اتفق على مع ابو اشرف واشرف
على تفاصيل الجواز
وكان على محترم جدا فى اتفاقه
وقدر ظروفهم اللى واضحة عليهم
لكن ابو اشرف اتكلم بثقة.لا بنتنا هنجيبلها احلى حاجة
هتدخل بيتكم متشرفة
كل اللى طالبينه منكم تحافظوا عليها
جوز جوهرة.بنتكم هتكون بنتنا يا ابو اشرف
دى امانة متخافوش عليها
ابو اشرف.انتم هنا اهلها يا استاذ
ويوم ما تقصر فى اى حاجة
شيعولنا بس خبر واحنا نكسر رقبتها
فتحى.بنتك هتكون مع راجل يا ابو اشرف
عيب تقول كده
احنا عيلة تفهم فى الاصول
على.انتم باين عليكم ناس طيبين ومحترمين
وده المهم
واخونا راجل هيكفى بيته من مجاميعه
وخير البر عاجله
خلصوا الأتفاق
ودخل على باب الاوضة اشرف.اقروا الفاتحة يا جماعة
عليت الزراغيط
وطلعت مرات على من شنطتها
علبه صغيرة فيها غويشتين
وطلعت جوهرة علبه الشبكة اللى كانت عبارة عن دبلة وساعة وسلسلة
وطبعا نبوية وبناتها شافوا الدهب
فرحوا اكتر
خرجت رقية برة تسلم على الرجالة
وعلي بالنسبالها كان كأنه حماها
رحبت بيهم كلهم بكسوف وعنيها فى الارض
وفتحى بياكلها بعنيه
كان اشرف فرحان باخته
ومبسوط بيها وهى زى القمر وعروسة
ومن جواه بيحاول يقنع نفسه
ان ربنا بعتلها راجل كويس
وبيشيل من دماغه اى افكار مش حلوة
دخل فتحى جوة الاوضة
ولبسها الشبكة بتاعتها
وسط الاغانى والمباركات والزراغيط
وكسوف رقية ودقات قلبها اللى كانت باينة من قوة ارتفاع صدرها وهبوطه
فاتت الليلة بعد ما اتفقوا على ان كتب الكتاب والدخلة بعد اسبوع
اوضة فتحى بقيت جاهزة
ومش ناقصه حاجه
ولأن حاجات رقية جهزت بفلوس فتحى فكان مفيش حاجة تخليهم يعارضوا
عزم علي رقية واهلها عنده على الغدا تانى يوم الخطوبة
وبعدها بيوم
جوهرة وجوزها عزموهم
وفردوس اليوم اللى وراه
علشان يعرفوا بيوت اهل فتحى
وياخدوا على بعض
ورابع يوم
اخدوهم كلهم علشان يتفرجوا على البيت اللى هتعيش فيه رقية
لكن اشرف كان مش بيكون موجود معاهم
لأنه فى شغله
لكن نبوية وجوزها كانوا فرحانين بالنسب ده
فتحى واهله
اهل كرم
وناس كريمة فى بيوتهم
وبيقدموا الخير كله
راحت جوهرة وفتحى مع اهل رقية للبيت بتاع فتحى
اللى يعتبر مش ناقصه غير العروسة وحاجتها
ولأن الجيران هناك حلوين مع بعض
متأخروش فى انهم يهنوا ويباركوا لفتحى ولرقية
اللى كانت لسه مش عارفة تتعامل ك واحدة داخلة على جواز
ولسه الطفولة او عدم الخبرة غالبة عليها اكتر
الغريب ان من وقت الخطوبة لحد اللحظة اللى شافوا فيها البيت
كان فتحى بيتجنب التعامل مع رقية تماما
وهى كانت مش مهتمة ولا مركزة فى حاجة زى دى
فرحت نبوية وجوزها بالبيت
اه هى اسمها اوضة
لكن اكبر من البيت اللى عايش فيه ابو اشرف بمراته وعياله الاربعة
اه متوضب بأقل الامكانيات
حتى الوان الحيطان مدهونة جير
بس هما كانوا شايفين ان بنتهم هتسكن فى سرايا
وكأنها كانت مصدر دخل ليهم
وفعلا كان فتحى يوميا من يوم الخطوبة لحد اليوم ده
بيدى فلوس لأبو رقية
علشان ميروحش بيت اى حد من اخواته من غير ما يبقى جايب ضيافة معاه
كان ابو اشرف شايف ان فتحى
حابب يخلى رقية متشرفة بأهلها قصاد اهله
ميعرفش انه فتحى كان حابب يكسر عين حماه اكتر واكتر
وبرغم ان اشرف كان بيدفع لأبوه فلوس علشان ميروحش بيوت الناس فاضى
لكن فى نفس الوقت
كان ابوه مقتنع ان زيادة الخير خيرين
خلصت زيارتهم لبيت العريس والعروسة
وقرر ابو اشرف ياخد رقية وياخد بناته ومراته ويرجعوا بلدهم
علشان فتحى يوم الفرح هييجى ياخدها بزفة من بيت ابوها هو واهله
ما هى دى الاصول
فعلا وصلهم فتحى للبلد
ورجع هوا لسهراته والحريم اللى مرافقهم
واشرف فى شغله
ويرجع البيت ينام
اما فى بيت ابو رقية
باقى كام يوم على الفرح
كل يوم هيصة وزراغيط
وخبيز وتجهيز اكل للعروسة
وجيران داخلة تهني وجيران تبارك
وتهادي
الريف وكرمه برضه
الناس كلها بتجامل بعض فى فرح وفى حزن
البيوت مفتوحة على بعضها
لحد ليلة الحنة
وبليل
لما اتقفل بابهم عليهم
قاعدة نبوية مع بناتها
واشرف وابوه قاعدين بره البيت فى الهوا بيشربوا كوبايتين شاي
ابو اشرف.شوفت بقى ياض يا اشرف
ابوك معلم يا ولا
نظرتي فيه مخيبتش
اشرف.اه يابا
كلمة قولتها وحصلت
ربنا يسعدها
البت رقية طيبة وغلبانة
عقبال بسمة ورشا كمان
ابو اشرف.اااه يا ولا يا اشرف
يقعوا هما كمان وقعتين زى وقعة رقية
اشرف.وان شالله احسن يابا
احنا مش بنأذى حد ولا بنظلم حد
اكيد ربنا هيكرمنا بولاد الحلال
ابو اشرف.يلا بقى ياض اتجدعن انت كمان
ياه ياولا يا اشرف
لو تاخد البت بت اخت فتحى
بت زى القمر
ويبقى زيتنا فى دقيقنا
اشرف.يابا نستر اخواتى بس
وبعد كده اشوف حالى انا
ابو اشرف بيبص بطمع.ياولا علشان نبقى محزمين العيلة
واخدين من رجالتها ومن حريمها كمان
اشرف.يابا انا بفك الخط بالتيلة
ودى متعلمة باين عليها
مش هيرضوا بيا
احنا فتحى لينا كان املة علشان احنا غلابة
لكن هما غيرنا يابا
خلينا نبص على قدنا
ابو اشرف.عيل فقري
ياض بص لفوق ياض
بلاش تفضل باصص تحت رجليك
فى البيت
نبوية.بت يارقية
اسمعي الكلمتين دول
وحطيهم حلقة فى ودانك
جوزك على ما تعوديه
يعنى هيشوفك بتضحكى ومبسوطة يوم واتنين وتلاتة
هيتعود انك علطول مفرفشة ورايقة
هيشوفك مكشرة ولا بتشتكى
هيقول عليكي نكد
ووش فقر
الراجل ميحبش اللى تشتكى واللى تقول عيانة
ولا تطلعي سر بيتك برة ابدا
ولا حتى لأمك
يرجع من برة يلاقيكي حلوة وبتضحكى ورايقة وتقعدى تحت رجليه
اللى يقولك عليه
تقولى حاضر
رشا.اه يابت اغسليله رجليه بمياه وملح كمان
بسمة.واديله دماغك تحت رجليه زى البطة
خليه يقطعهالك
نبوية بأنفعال.بس يا معدولة منك ليها
اسمعى مني يابت يا رقية
علشان تعمرى فى بيته
اهله تحطيهم على راسك
متنقليش كلمة تسمعيها
وتخدميهم بعنيكي يابت
خليهم يحبوكى
وهما لو حبوكى
هيقفوا فى صفك علطول
ومش هيرضوا ابدا اخوهم ييجى عليكي ده لو حصل
وبرضه اوعى تروحى تشتكي
رقية بطاعة عمياء.حاضر يمة
ابويا كمان قاللى
نبوية.ومن يوم دخلتك نعد تسع شهور
تكونى جيبتيله العيل
رشا.جرى ايه يمة
هى دى كمان بالكيف
دى الخلفة بتاعت ربنا
نبوية.يابت اتلمى هقوم امسح بيكي البيت
امها ولادة ياختى
وستها ولادة
هتتأخر ليه هى بقى فى الحبل
اش فهمكم انتم
اسمعى كلامى يارقية
انتى كبرتى خلاص
وبقيتى حرمة وهتشيلي بيت لواحدك
ماشى ياختي
رقية.حاضر يمة
رقية سمعت كلام امها
ومفكرتش تناقش فى حرف
هى عارفة ان كلام امها وابوها صح علطول
ماهما كبارها
ولازم تسمع كلامهم
كانوا اخوات فتحى كمان عاملينله حنة
ومتجمع فيهم اهله كلهم
واصحابه
وكانت جوهرة وعلي
ام العريس وابوه
وكانت سهرتهم للصبح
خلصت الليلة حلوة فى البيتين
فتحى مش محتاج توصيات
ورقية سمعت نصايح امها لحد ما نامت فى حضن اخواتها
من بكرة هتبات فى بيت تانى
مع راجل غير ابوها واخوها
طلع النهار
زراغيط فى بيت العريس
اللى هو بيت جوهرة
وزراغيط فى بيت رقية
وجارة ليهم دخلت تزوقها
ولبست فستان فرحها اللى كان جميل عليها برغم بساطته
خرج فتحى فى زفة مع اخواته على 3 عربيات
ومعاه اصحابه بعربياتهم
وراه
وراحوا على بيت اهل رقية
زفة محصلتش لبنت من بنات البلد
وعربيات ملاكي ونص نقل وميكروباص لامم اخوات فتحى بعيالهم
خرجت رقية واخدها فتحى من بيت بوها
واشرف واخواتها بيحطوا الخزين بتاعها
فى صندوق عربية من العربيات النص نقل
والجيران واقفة تسلم وتزرغط وتسقف ويغنوا
ورقية بتبص حواليها
وقلبها بيدق من استغرابها للى بيحصل من حواليها
مش عارفة هى فرحانة ولا مكسوفة
ولا حتى خايفة
اه امها قالتلها تبقى خدامة لفتحى
لكن مقالتلهاش ازاى تبقى زوجة
خلصت الزفة
واخد فتحى رقية وركبوا العربية
ومعاهم فى العربيات ركب اشرف وابوه علشان يروحوا يوصلوا بنتهم لحد باب بيتها
وطول الطريق العربيات بتضرب كلاكسات
واخواته واهله فى الميكروباص
بيزرغطوا ويسقفوا
ورقية بتتفرج من الشباك
ونبوية فى بيتها
بتدعى ربنا يجعل ليلتها سهلة
واخواتها فرحانين لأختهم وفى نفس الوقت خايفين عليها
وصلوا كلهم للبيت
وسط الهيصة
بتاعت الاهل
والجيران كمان اللى قررت تجامل
وتزرغط
وتهنى
ماهو بيت عربي مليان ناس
ودخل فتحى ورقية بيتهم
بعد ما دخلت جوهرة
الحاجة اللى جاية بيها رقية
للأوضة بتاعتهم
وقفل فتحى الباب ورا اخته بعد ما خرجت
وسابهم برة شوية بيهيصوا ويسقفوا
لحد ما سمعوا صوت صرخة رقية
يتبع
توقعاااااااااااااااااااتكم بقى
ياحلوووووووين
تكملة الرواية من هنااااااااااااااا
تعليقات
إرسال تعليق
فضلا اترك تعليق من هنا