رواية الدلالة الفصل الخامس والسادس 5-6بقلم هنا عادل (جديده وحصريه وكامله)
رواية الدلالة الفصل الخامس والسادس 5-6بقلم هنا عادل (جديده وحصريه وكامله)
الدلالة
رفيقة الشيطان
الفصل الخامس
مش عايزة احكيلكم ازاى ماما كبرت الموضوع لبابا علشان تضمن ان رد فعله يكون اقسى من كل مرة تشتكيله مني فيها
صورتله الموضوع وكأنى فعلا كنت رايحة عيد الميلاد ادور على واحد ارمي عليه نفسي
حتى برغم ان بابا حاول يبرر تصرفي بأن ممكن يكون وصلها بطريقة مبالغ فيها
لكن هى متوصيتش فى انها تنادى على مروة
علشان تمثل قصاد بابا اللى حصل من اهانات وتقليل ومتاخرتش فى انها تعيط قدامه كمان
دليل على كسوفها واهانتها وسط الناس بسبب تصرفى اللى كان مالهوش علاقة بالادب والتربية
زعل بابا جدا
زعل مني حتى لو مجرد هزار مينفعش اهزر مع شاب بالطريقة دى
ولا اهزر مع شاب ماليش علاقة بيه اصلا
ده ولا قريبي ولا لينا علاقة بيه لا من قريب ولا من بعيد
وده كان سبب كافى يخليه يعاقبني فعلا
اه بالنسبالي ايا كان اللى بابا بيعمله اهون بكتير من اللى امي ومروة بيعملوه
خاصة ان مروة وماما بيكونوا متعمدين يزعلوني
لكن بابا الصورة اللى وصلتله كان لازم تخليه يعاقبني
وعلشان كده قرر انى ميبقاش معايا تليفونى ويتاخد مني
وانى مخرجش خالص غير للمدرسة
وبرغم انى حاولت كتير ابرر لبابا اللى حصل
لكن هو كان مقتنع بحاجة واحدة
انى مجرد هزارى مع شاب غريب عني ده فى حد ذاته يستاهل العقاب
مش مهم بقى ايه اللى حصل
ولا ايه المناسبة ولا ولا ولا
هو اخد قراره وخلاص
فاتت الليلة
مش هقول انها من اصعب الليالى اللى فاتت عليا
لان فيه اصعب منها بكتير عيشته
لكن كانت مش حلوة بكل حاجة حصلت فيها
نمت وقلبى واجعني
اهانتى والظلم اللى اتظلمته بسبب حاجة مش مقصودة كان تاعبنى
وده كان سبب فى انى اصحى تانى يوم
وجنب كامل من جسمي مش بيتحرك
شفايفي معووجة
ولسانى تقيل
وايدي مش قادرة احركها
ورجليا مش قادرة اقف عليها
خوفت من شكلى وخوفت. من اللى حصلى
عيطت بصوت عالى
دخلت ماما تجرى على الاوضة
ماما.يالهوى
فى ايه ايه يا سميرة
مالك
اتكلمت بالعافية.مم.مش عارفة
مش ق.قادرة احرك ايدي ورجلي
وشى منمل
ماما صرخت من خضتها
مروة دخلت على صوتها
لما شافتنى اتصدمت.ايه ده مالك يابت فى ايه
ماما بخوف.البت مش بتحرك ايديها ولا رجليها يا مروة
اختك مش حاسة بوشها
مروة.يعني ايه يا ماما اتشليت يعني
ماما.فى ايه يا مروة
دى كلمة تقوليها انتى كمان
انتى بتخففى عن العيان ولا بتمرضيه زيادة
روحى كلمي ابوكى ييجى يودينا لدكتور
مروة.طيب وليه نستنى بابا
ما تيجي ننزل احنا بيها دلوقتى
ناخد تاكسى ونطلع على اقرب مستشفى
بدل ما التأخير يكون غلط
ووشها يثبت على كده وتبقى كملت بقى
اصل هى ناقصة عوجان سحنة كمان
ماما.طيب هقوم البس
قامت ماما خرجت من الاوضة
وخرجت بعدها مروة وهى بتقولى .انتى ناقصة حلاوة على حلاوتك
امرى لله اروح اغير هدومي
كان نفسي حد منهم يطبطب عليا او ياخدني فى حضنه
لكن محصلش
دى كمان اتريقت على التعب اللى ماليش فيه يد
فعلا نزلنا على اقرب مستشفى
وهناك قالوا ان ده التهاب عصب سابع
وانى هحتاج شوية وقت علشان ارجع لطبيعتى تانى
لان اللى حصل ده حصل معايا من بليل
وانا رايحة المستشفى على العصر
والوقت الطويل ده على انى ماخدش اى علاج سريع
كان سبب فى انى احتاج شوية وقت لحد ما ارجع تانى لطبيعتي
ماما.زعل ايه اللى زعلتيه انتى يا سميرة علشان يجرالك كده
انتى بتعرفى تزعلى يا بنتي
مروة.زعل ايه يا ماما بس
هى سميرة بتعرف تزعل
دى تلاقيها زعلانة لأنها مشيت من عيد الميلاد امبارح من غير ما تاكل تورتة
ماما.بس بقى يا مروة
متغلسيش عليها دلوقتى
مش ناقصين بلاوى تانية كفايا اللى حصل
مروة.ههههه شكلها كوميدي اوى بصراحة
ماما.وبعدين بقى يا مروة
قولت كفايا
مروة.طيب بقولك ايه يا ماما
مش هتتصلي بالناس زى ما اتفقنا
ماما.احنا فى ايه ولا فى ايه دلوقتى يا مروة
نرجع بس البيت
ونشوف حكاية اختك دى
وبعدين نبقى نشوف موضوع الناس
مروة.ياماما كده كده سميرة هتاخد شوية وقت وهتخف
الدكتور قالك علاج طبيعي وشوية حقن وخلاص
لكن الموضوع ده لو نسيناه
يبقى خلاص كده
ماما.طيب استنى نوصل البيت بس واكلمهم حاضر
مروة.بقولك ايه قوليلها انك بهدلتيها
وروحنا بيها المستشفى من كتر ما عاقبتيها
ماما.خلاص يا مروة
خلاص يا حبيبتى
نرجع البيت ونتكلم
كل ده كان بيحصل فى التاكسي
ماما قاعدة جنب السواق
ومروة قاعدة جنبي
والكلام قدامي وقدام السواق
تقريبا صعبت عليه
كل شوية كان يبص لمروة بقرف فى المرايا بتاعت العربية
كنت عايزة الفت انتباهها انها تركز شوية احنا مش فى البيت علشان كل اللى بتقوله ده ولا بتعمله
لكن هى مهتمتش تبص عليا اصلا غير علشان تضحك على وشى اللى كان معووج
سابت ان الدكتور قال من الزعل ومسكت فى ان شكلى بقى مضحك اكتر من الاول
اه انا مش باخد حاجة على اعصابي
لكن اللى حصل معايا امبارح كان غير اى حاجة بعديها
وفكرة انهم يستهونوا كمان بتعبي
كانت اصعب واكبر
رجعنا على البيت
سندتنى ماما ومروة
وطالعين العمارة
ام هند وهند كانوا نازلين سوا
ام هند بخضة.ايه ده خير فى ايه
مالك يا سميرة
مالها يا مدام ناجية بعد الشر
ماما.بسيطة الحمد لله
الدكتور قال شوية زعل
هند.بعد الشر عنك يا سميرة
يابنتى مش قولتلك الموضوع تافه
ليه تاخديه على اعصابك كده
حاولت ارد عليها ولساني تقيل.الحمد لله
ام هند.يا مدام ناجية البنت كانت بتهزر والله
بس هى مرات عم هند كده
طبعها صعب شويتين
بتغير على ابنها غيرة ولا كأنه جوزها
واى واحدة تقرب منه حتى لو زميلته
لازم تتعمد تقلل منها
لكن الشهادة لله سميرة مغلطتش
وهند بنتي كانت واقفة وحاضرة الموضوع
واللى عندنا احنا هما اللى اتمادوا فى الغلط
هند.اه والله يا طنط
سميرة معملتش حاجة تزعل
حتى عمرو كان مضايق جدا من رد فعل اخته ومامته
بس هما طبعهم كده الغيرة عندهم صعبة اوى
مروة.عندهم حق
اى حد بيحب حد بيغير عليه
ام هند.ايوة طبعا يا حبيبتى
بس مش للدرجة اللى تخلى الواحد يجرح الناس ويزعلهم
انا والله هكلمها واقولها اللى حصل لسميرة علشان تعرف كلامها اللى بيوجع ده عمل ايه فى البنت
ناجية.لالالالا مفيش داعي
هى بس علشان باباها بليل عاقبها على انها هزرت مع شاب
فهى زعلت
لكن الناس مالهاش علاقة بالموضوع
سميرة اصلا مشغلتش بالها بكلامهم
هند.ازاى يعنى يا طنط
دى سميرة كانت هتعيط من كتر زعلها امبارح
مروة.يا هند سميرة مش بتزعل من حاجة
لكن هو علشان بابا منعها من التليفون والخروج
ده اللى فرق معاها
لكن غير كده والله مش بتشغل بالها بحاجة
والناس اصلا مغلطوش
هو فعلا اكيد ابنهم مش هيشغل باله بكلمة واحدة زى سميرة
ام هند.ومالها سميرة يا مروة
دى ست البنات
وبعدين اختك ياحبيبتى متتكلميش عليها كده قصاد حد
ده انتى تدافعي عنها حتى لو غلطانة
متشمتيش حد فيها
مروة بقرف.ازاى يعني يا طنط
تبقى غلطانة واقول انها صح
علشان محدش يشمت فيها
لاء طبعا
لازم قدام الناس تعرف انها غلطت
علشان تحس على دمها ومتكررش غلطها تانى
هند.خلاص يا جماعة مش وقت الكلام ده
سميرة اصلا باين عليها التعب جدا
والموضوع مكانش مستاهل
الف سلامة عليكي يا سمسمة
اطلعي ارتاحى
ونبقى نيجي نطمن عليكي
حاولت ابتسم بس مقدرتش
حاسة ان الزعل اللى جوايا اكبر من انى اكدب على حد بضحكة صغيرة
طلعنا على البيت
ودخلنا على الصالون علطول
مروة.يلا بقى يا ست الكل هتصل انا على مي واخليها تديني مامتها علشان تكلميها
ماما.استنى يا مروة طيب اخد نفسي من المشوار
مروة.ماما بقى هو انتى علطول كده لازم تذليني علشان تعمليلي اى طلب اطلبه منك
تعالي شوفى امهات صحابى فى الكلية
مصاحبين بناتهم ازاى
وهما اللى بيفكرولهم وبيدورولهم على مصالحهم
لكن انتى بصى عايزة تضيعي الفرصة من ايدي
ماما.مش عارفة انا يا مروة انتى ياحبيبتى مفيش حاجة بترضيكي
اطلبيها يا مروة هكلمها حاضر
كانت ماما ضعيفة جدا وسلبية اوى من ناحية مروة
مش عارفة ايه السبب بجد
بس انا محدش منهم وجهلي كلمة من وقت ما طلعنا من المستشفى
ولا حتى فكروا يتكلموا فى كل الكلام ده لما يدخلونى اوضتى
وانا كنت تعبانة للدرجة اللى بيها حاسة انى مش قادرة امسك اعصابي علشان اقوم انا ادخل اوضتى
فعلا طلبت مروة التليفون
وفتحت الاسبيكر علشان لما ماما تكلم مامت عمرو
تبقى سامعه اللى بيتقال ايه
مروة.مساء الخير
مي عاملة ايه
مي.مساء النور
مين
مروة.انتى مسجلتيش الرقم ولا ايه
انا مروة اللى اتقابلنا امبارح فى عيد ميلاد هند
مي.ااااااه
اخت البنت اللى كانت بتعاكس اخويا
مروة.اه انا
بصى انا رجعت امبارح حكيت لماما اللى حصل
وكانت عايزة تكلم مامتك تعتذرلها
فلو مامتك فاضية ممكن تكلمها دقيقة واحدة
مي بعجرفة.طيب ثواني اشوفها فاضية ولا لاء
فعلا مها كلمت ماما
مها.الو
ماما.السلام عليكم
مها.عليكم السلام
ايوة يافندم
ماما.انا مامت سميرة
مها.سميرة مين
ماما.انا كنت بكلم حضرتك اعتذرلك على اللى حصل امبارح فى عيد ميلاد هند
مها.اااااه
البنت التخينة دى
خلاص حصل خير
اختها اعتذرت بما فيه الكفايا
ربنا يشفيها
ماما.ايه ده عرفتي منين انها تعبت
مها.ماهى اختها امبارح قالت ان عقلها غير مكتمل
ماما.دى يا عيني من اللى باباها عمله فيها امبارح
صاحية النهاردة وشها معووج
ويديها ورجليها مش بيتحركوا
والله لسة راجعين بيها من المستشفى
مها.طيب يا مدام لما هى مش بتعرف تتصرف كده
بلاش تخلوها تتواجد مع ناس متعرفهمش
علشان متتحطش فى مواقف محرجة كده
وتضطركم تعتذروا وتبرروا
ماما.ولا كان على بالنا تعمل حاجة زى دى يا مدام والله
المهم انتى بس ما تزعليش وقولى للدكتور ما يزعلش
دى مروة بنتى من امبارح دمها محروق من الموقف
معرفتش تنام ولا راضية تاكل
وتقولى يا ماما كنت فى نص هدومى من الكسفة
اصل احنا يا مدام مش متعودين على الحفلات والحاجات دى
ويوم ما تروح تحضر مناسبة
تحرج اختها كده وتقلل منها
مها.محصلش حاجة صدقينى
خلص الموضوع من امبارح
ماما.يبقى تقبلي عزومتى بقى علشان اتأكد انك خلاص مش زعلانة بجد
وكمان لازم نتأسف للدكتور بنفسي
مها.مفيش داعي صدقيني
الموضوع مش مستاهل كل ده
والدكتور كمان معندهوش وقت
ماما بألحاح.هو حضرتك مش عيزانا نتعرف عليكي بقى ولا ايه
دى مروة من امبارح عمالة تقول فى اشعار فى ذوقك وشياكتك
شوقتنى انى اشوف حضرتك واتعرف عليكي
انا مشعارفة ازاى بقالنا سنين جيران ام هند
ومنعرفش بعض
مها.احنا مش بنيجي كتير
وعموما اهى جت الفرصة واتعرفنا
اتشرفت بحضرتك
ماما.وانا اكتر وعلشان الشرف ده بقى يكمل
تقبلي عزومتى
شوفى تحبي نتقابل فى النادى ولا تحبى نتغدى عندنا فى البيت
هعملك شوية اكل بقى انما ايه
اتحداكي اكلتى فى طعامتهم
مها.طيب هشوف بس ظروفى ايه علشان عندى التزامات والله
واخلى مى تكلم مروة تأكد عليها
ماما بألحاح.هستناكي
اوعى تنسي
والله هاخد على خاطري
وبعدين طول ما انا لسه مش مقتنعة انك مش زعلانة من عملة البت سميرة
هفضل اعاقب فيها كده
يرضيكي
احسن تتخن اكتر ما هى
حاكم دى لما بتتعاقب بتفضل تاكل اكتر
مها.ان شاء الله نتقابل قريب
ناجية.فى انتظار الرد
مها.مع السلامة
فعلا قفلت مها الخط مع ناجية
وكانت بتتكلم معاها بمنتهى التعالى
مي.فى ايه يا ماما
مالهم
هما وسعوا الدنيا كده ليه
مها بتضحك.ولا وسعوها ولا حاجة
دول تلاقيهم بس اخوكي دخل دماغهم
فاكرين انهم بالطريقة دى
هيعرفوا يوصلوله يعنى
مي.ايه
ايه الهبل ده
انتى ايه اللى خلاكي تقولى كده
وبعدين هو خلاص يعنى
عمرو يوم ما يفكر هيبقى بيفكر فى الاشكال دى
مها.يابت يا عبيطة مش اخوكي اللى بيفكر
هما اللى بيفكروا
خليهم بقى على راحتهم
يشوفوا مين ينولهم اللى فى بالهم
مي.همسح رقمها حالا
ايه رمى الجتت ده
مها.ولا تمسحيه ولا حاجة
علشان لما تتصل بيكي تانى تبقى عارفة انها هى ومترديش عليها
خليهم يسلونا
هههههههه
مي.قال يحطوا عنيهم على عمرو قال
ليه وهو عمرو هيختار اى بنت والسلام كده
ده لو مكانتش االبنت دى انا راضية عنها من شعر راسها لصوباع رجليها
والله ما اهنيها عليه ساعة زمن
مها.يابت يا عبيطة
انتى اللى يشوفك كده يقول عليه جوزك مش اخوكي
ده انتى اللى هتبقى حما يا مي مش انا
مي.ايوة انتى عايزة عمرو واحدة تيجي تشاركني فى الدلع اللى بيدلعهولى
ولا تاخد من حبه ليا كده واسيبها
لاء ياخد واحدة علشان يبقى اتجوز وخلاص
لكن ميحبهاش
تبقى زيها زى اى حاجة فى البيت
مش كفايا بابا وسفره
كمان تيجي واحدة تاخد عمرو مني
لاء مش هقبل
مها بتضحك.يابنتى ما هو انتى مسيرك تتجوزى برضه
مي.بس برضه ميحبش اى واحدة غيري
الا انتى طبعا يا مامتى
مها بتضحك.احنا اللى يحكمنا على حد ميخلصش مننا
مي.ايوة ياست الكل
ما انا بنتك بقى
مها.شاطرة يا مي
اوعى فى عمرك تسيبي حد يشاركك فى حاجة بتحبيها
فى الوقت ده كنت انا قاعدة
مأكلتش اى حاجة من الصبح
حتى الادوية بتاعتى ماما نسيت تجيبها واحنا طالعين
ماما.يااااه يا مروة
بصى نسينا نجيب الدوا بتاع اختك
مروة.بصراحة كنت مشغولة بموضوع الست دى
كنت عايزاكى تكلميها
ماما.طيب ما تنزلى يا مروة تجيبي لأختك الدوا بتاعها
خليها تاخده علشان يعمل معاها مفعول
احسن بجد تفضل على الحال ده
مروة.ييييه بقى ي ماما
انا فرهدت اصلا من مشوار المستشفى
بصى انا هقوم اخد دش كده واهدا شوية
وانزل اجيبهولها
او ابقى اما اطلع اجيبلك رقم الصيدلية تتصلى بيهم
يجيبولنا هما الادوية
ماما.خلاص يا حبيبتى ماشى
انا هقوم اغير هدومى وافرد جسمي شوية
احسن تعبت من المشوار
وانتى يا سميرة قومى بقى غيري هدومك دى
وشوية وابقى اجيبلك علاجك
سكاكين بتقطع فى قلبي
تصرفات مستحيل تخرج من ام واخت شقيقة
وافعال محدش يتحملها
للدرجة اللى كنت حاسة بيها ان قلبى هيقف من كتر زعلي منهم
لكن اللى فوقنى شوية من صدمتى من تصرفاتهم
جرس الباب لما رن
يتبع
الدلالة
رفيقة الشيطان
الفصل السادس
فتحت ماما الباب
واللى كانت على الباب هند ومامتها
وعمرو
ماما طبعا متعرفش عمرو
علشان كده كانت مستغربة وهى بترحب بجارتها وعندها فضول تعرف مين اللى معاها
ماما.اهلا اهلا يا ام هند
اتفضلي
ام هند.ده الدكتور عمرو ابن عم هند
ماما بسعادة.يا اهلا يا اهلا
ايه النور ده
اتفضل يا دكتور
انا لسه قافلة السكة مع والدتك
كنت بعتذرلها على اللى حصل امبارح من المخفية
ام هند دخلت ووراها هند وعمرو اللى بيمد ايديه يسلم على ناجية
عمرو.ومين قال لحضرتك انها كانت غلطانة فى حاجة
بالعكس الغلط كان مننا احنا
انا اللى جاى اعتذر
ماما.لاء انت علشان محترم بس وذوق بتقول كده
لكن دى بنتى انا عارفاها لسانها فالت
مبتعرفش تستر مجالها ابدا
هند.هى فين سميرة ياطنط
علشان عمرو جاى يطمن عليها لما عرف انها تعبانة
ماما.اهى قاعدة جوة اتفضلوا طيب فى الصالون
دخلت ام هند وهند وعمرو
ومروة كانت فى الحمام بتاخد دش ومتعرفش انه موجود برة
شوفته قدامى اتصدمت وفرحت واتكسفت من شكلى
كنت مش عارفة انا حاسة بأيه بالظبط
لكن الاكيد انى كنت مكسوفة اكتر من كل حاجة
من اللى حصل امبارح
ومن شكلى ومنظر وشى المعووج
عمرو بأبتسامة جميلة.الف سلامة يا انسة
ايه ده للدرجة دى حساسة
شوية كلام تافه يزعلوكي كده
ناجية.حساسة ايه يا دكتور
هى دى بتحس
هى بس بتدلع على ابوها علشان عارفة انها مش بتهون عليه
ام هند وهى بتقعد على الكرسى جنب سميرة.اخص عليكي يا ام مروة
سميرة دى طيبة الدنيا فيها
ما تزعليش يا سميرة ماما بس بتحب تنكشك
ابتسمت غصب عني
عمرو.خير يا طنط هو الدكتور قالها ايه
ماما.ولا حاجة
بسيطة قال التهاب فى العصب السابع
وهتبقى كويسة
عمرو.لالا الف سلامة عليها
بسيطة على فكرة متقلقيش
انتى هتاخدى حقن وجلسات علاج طبيعي وهتبقى زى الفل
ناجية.دى مروة هتفرح اوى ان انتم هنا
ثوانى انادي عليها
طلع عنيها فى المستشفى معانا
بس بقولك ايه يا دكتور مامتك ست زى العسل
ام هند.صحيح انتى جيبتي رقم مها منين يا ام مروة
وايه ياختى اللى خلاكي تكلميها
ماما.يا دى العيبة يا ام هند
انتى عايزانا يتقال علينا مش بنفهم فى الاصول
اتصلت ياختى اعتذرلها على اللى البت عملته
ورقم مى اخت الدكتور عمرو مع مروة
اتكلمت على نمرتها
عمرو وعنيه مع سميرة.بس على فكرة يا طنط
اللى المفروض يعتذروا فعلا كان احنا مش حضرتك
انسة سميرة كانت مؤدبة جدا واتحملت اسلوب مينفعش تقبله من اختى او امى
وذوقها ده اللى خلانى اجى اعتذرلها النهاردة
حتى من قبل ما اعرف من مرات عمي انها تعبانة
ماما.انت بتتكلم عن مين يا حبيبى
مين اللى مؤدبة وذوق دى
هههههههههه
انت تقصد سميرة متأكد
كانت ماما متعمدة تقلل مني
وكان هو بيدافع عني وكأنه يعرفني من سنين
هند.يا طنط ليه حضرتك متحاملة كده
اكيد الكلام وصلك بطريقة مش صح
علشان كده حضرتك بتقولى الكلام ده
ماما.لاء يا هند عيب يا حبيبتى
اللى وصلتنى الكلام اللى حصل مروة
وانا بنتى مبتكدبش ابدا
دى راجعة مكسوفة ودمها محروق من اللى حصل
وتقولى يا ماما كنت واقفة حاسة انى هعيط
وبعدين انا عندى مروة دى نسخة مني
شبه البسكوتة كده
رقيقة وبتتأثر بسرعة
دى فى كلية اداب يا دكتور
بس شاطرة اوى بقى
ام هند.بناتك الاتنين ميتخيروش عن بعض يا ام مروة
ادب واخلاق وجمال وتربية
ربنا يحفظهم ويفرحك بيهم
ماما.لالالا ميتخيروش عن بعض ايه يا ام هند
مروة حاجة تانية خالص
لكن سميرة
بووووووريه منها ومن لسانها
عمرو.طيب احنا هنستأذن يا طنط
والف سلامة على انسة سميرة
وانا بعتذر لحضرتك مرة تانية
ناجية.لاء والله ما يحصل
مش هتمشى قبل ما تشرب حاجة
ثوانى بس اقوم اقول لمروة تيجي تسلم عليكم
قامت ناجية وسابتهم مع سميرة اللى كانت قاعدة حاسة ان وشها بيطلع نار من كتر كسوفها
ناجية.بت يا مروة
انتى يا مخفية
عارفة مين برة
مروة.ايه يا ماما فى ايه
مكانش دش ده
ناجية.يابت البسى واطلعى
عندنا ناس برة مش هتصدقى هما مين
مروة.اصبري يا ماما
مين برة يعنى
دلوقتى اخلص واطلع
ناجية.يابت عمرو برة
مروة فتحت باب الحمام وواقفة وراه وبتبص لأمها.عمرو مين اللى برة
ناجية.الدكتور يا حيلة امك
اخلصى ياختى واطلعى
بس بقولك ايه مش حلو يعنى زى ما كنت فاكراه
مروة بأندهاش.عمرو برة
يالهوى
بتهزرى يا ماما
طب ااطلعى قعديه لحد ما اجيلكم
اوعى تخليه يمشى
ناجية.ده تخين يا بت وبكرش
مروة.ياماما اطلعي
انتى ايه فهمك انتى
بقولك معاه عربية بي ام ودكتور
تقوليلي تخين وبكرش
اطلعي يا ماما
ناجية.طالعة ياختى طالعة
بس اخلصى علشان عايز يمشى
مروة.ماشى دقيقتين
فى الوقت اللى كانت ناجية بتتكلم مع مروة
كان عمرو وهند ومامتها بيحاولوا يهزروا ويضحكوا مع سميرة بسبب احساسهم بكسوفها
عمرو.بس شوفتى يا مرات عمى
انسة سميرة لما تعبت بقيت اجمل من امبارح ازاى
ام هند بتضحك.بعد الشر عنها من التعب
سميرة علطول جميلة
الوحيدة فى العمارة اللى هند بتحبها وبتحب تتكلم معاها
عمرو.علشان هما الاتنين طيبين زى بعض
والناس الطيبة دى تتحب وتدخل القلب علطول
هند بتغمز لسميرة.يلا ياستى شهادة اهى مش من اى حد
عمور ده ميقولش كلام حلو لأى حد على فكرة
عمرو.ليه كده بس يا نودي
هو انا مش بدلعك
هند بتضحك.ماهو انا مش اى حد يا دكتور ولا ليك رأى تانى
ضحكت انا وضحك عمرو ومامت هند
عمرو.طيب وبعدين بقى يا انسة سميرة
هتفضلى تضحكى على كلامنا وبس ولا ايه
مش تردى علينا
هند.مكسوفى يا عمور مكسوفة
عمرو.من ايه بقى مكسوفة
ده انا اللى اتكسف انا اللى قاعد فى بيتهم
وجاى اتأسف واصالح
تسيبني اكلم نفسي كده
سميرة بصوت واطي.ا.أ..أأأنت..أنتم نورت..ونا
قولت الكلمتين بتقل فى لسانى
كسفني من نفسى اكتر
ووشى طلع سخونية اكبر
عمرو.يا خبر ابيض
شوفتى يا مرات عمي الكلام الحلو
ام هند بتضحك.الحلو علطول كلامه حلو يا عمور
وطيت صوتها ووجهت كلامها لسميرة
انتى يابت يا سميرة خسارة فى امك واختك دول
انتى كنتى عايزة تبقى بنتي واخت هند
يالهوى ده احنا كنا بقينا مسخرة مع بعض
ضحكت على كلامها
ومن جوايا ومن طيبتها هى وهند معايا
كنت بتمنى فعلا حاجة زى دى
عمرو.اه علشان كانت تبقى بنت عمي
كنا شكلنا عصابة بقى
هند.يانهار ابيض
انا توقعت الوضع بس فرحت
تخيلي يا بت يا سميرة
طلعت ناجية وكانوا كلهم بيضحكوا
كانت ماسكة صنية عليها كاسات عصير بعدد الضيوف وهى ومروة
حطيت الصنية على الترابيزة
ومديت ايديها لعمرو بكاس العصير وبعدين ام هند وهند
واخدت الكاس بتاعها وقعدت تشرب فيه
وهى بتعيد ترحيبها من تانى
وسميرة قاعدة كأنها مش شايفاها اصلا
هند مديت ايديها تاخد الكاس علشان تديه لسميرة.اشربي يا سميرة العصير حلو اوى
ناجية.لاء دى بتاعت مروة
كل اللى قاعدين بصولها فجأة
فهى حسيت انها غلطت فى انها تجاهلت سميرة
ناجية.اصل سميرة مش بتحب العصير ده
المانجة بتعملها حساسية
وهى مش ناقصة احنا عايزينها تخف
فتحت عيني على اخرها وانا مصدومة من رد امى السريع
عمرو.اول مرة اشوف بنت بالذات مش بتحب المانجة
ناجية.لاء غصب عنها علشان الحساسية
لكن دى سميرة فى الاكل والشرب
بتزيح الاخضر واليابس
مش بتقول لاء
انت يا دكتور مش شايفها عاملة ازاى
دوخنا معاها انا واختها علشان تعمل ريجيم
لكن هى ابدا
الاكل عندها اهم حاجة فى حياتها
عمرو.بس هى مش تخينة اوى يا طنط
وعلى فكرة مش كل التخن بيكون بسبب الاكل
فيه ناس بيكون عندها قابلية للتخن بسبب هرمونات جسمهم
زيي كده
ناجية.ايه ده وهو انت كده تخين
ده انت ماشاء الله عليك طول وعرض
وبعدين انت راجل
يعنى التخن والا الرفع مش هيعيبوك
لكن البت لما تبقى مفشولة كده
تعنس وتبقى تقيلة متقدرش تتحرك
ولا تقدر تخدم نفسها ولا تحمل حتى
هند.يا طنط بس سميرة بجد مش تخينة
ناجية.غيرى يا هند يا حبيبتى كعب الكوباية اللى انتى لابساها دى
وانتى تشوفيها كويس
ام هند بأنفعال.ايه كعب كوباية دى يا مدام ناجية
عيب يا حبيبتى الكلمة دى
وبنتى بتشوف احسن مني ومنك
النضارة مش علشان نظرها ضعيف
انا بنتى لابسة النضارة لفترة مؤقته
عمرو حس ان مرات عمه اضايقت
وهند اتكسفت.طيب يلا بينا بقى يا مرات عمى
انا عندى شغل وهتأخر عليه
خرجت مروة من الاوضة وهى زى القمر الحقيقة
لابسة بيجامة برمودة ورافعه شعرها لفوق وهو كان لسه مبلول وكان مخلى شكلها احلى واحلى
ورموشها طويلة خليت شكل عنيها جميل جدا
وخدودها الحمرا مزودة حلاوة ملامحها وجمال وشها
انا نفسى كأختها كنت بفرح بيها وبجمالها كنت بحب اشوفها من كتر ما هى حلوة
وبفرح اوى لما الناس بتقول في حقها كلام جميل
مروة.ايه ده مش معقول
وانا اقول بيتنا منور ليه
ام هند.بسم الله الله اكبر
منور بوجودك يا مروة يا حبيبتى
ايه القمر ده بس
مروة وهى بتسلم.دى عيونك الحلوة يا طنط
اهلا وسهلا يا دكتور
معلش بقى طالعالكم بالبيجامة
بس كنت طول النهار انا وماما فى المستشفى بسميرة
وما صدقت ارجع البيت علشان اغير هدومي
عمرو عنيه فى الارض.ازيك يا انسة مروة
احنا جينا نعتذر على اللى حصل امبارح
ومضطرين نمشى بقى علشان عندى شغل معلش
مروة.لالا تمشوا ايه ملحقناش نقعد مع بعض
وبعدين بقى حضرتك جاى لحد هنا علشان تعتذر
ده كان واجب علينا والله
عمرو.معلش تتعوض ان شاء الله
ومرة واتنين وتلاتة انا بعتذر عن اللى حصل
والف الف سلامة على انسة سميرة
ان شاء الله نطمن عليها
يلا السلام عليكم
ام هند.سلامتك يا سميرة يا حبيبتى
هبقى اطمن عليكي
سميرة بصوت واطي.ش.ِشكرا ي.ي.يا طنط
هند.بلاش دلع بقى يا سمسمة
عايزة اسمع صوتك بيرن تانى ماشى
ولا تحبى اجيبلك عمرو هنا كل يوم ييجى يضحكك شوية ضحك بخمسة جنيه
عمرو بيضحك وهو باصص لسميرة.لو ده هيخليها تخف ماشى اجي وماله ومن غير الخمسة جنيه كمان
مروة.كلك ذوق يا دكتور
ده انت تشرفنا
عمرو.شكرا
يلا نستأذن بقى
اتقدم عمرو خطوات لقدام
بس مروة اتقدمت اسرع علشان تبقى ماشية قدامه
يمكن بتحاول تلفت انتباهه ليها
لكن هو عنيه فى الارض
طلعت ماما وراهم وام هند
هند بصوت واطي.بت يا سميرة عمرو ابن عمي معجب بيكي اوى على فكرة
بس متسيحيش لحد بقى
قالت هند الكلمتين دول
وطلعت وراهم
وقفوا مع بعض يسلموا على بعض
لكن ماما كان صوتها مش طالع
بسبب انها احرجت هند وان ام هند رديت على ماما وهاجمتها
اصل اللى زى ماما متعودة تستهزاء بالناس وتسمع اللى يضحك على كلامها مش اللى يقولها ان دى مش اصول وانها المفروض تراعي مشاعر الناس
لكن انا كنت عايشة مع الكلمتين اللى قالتهم هند
وبسمع فى وداني بصوت عمرو نفسه
بعيد عن اى حاجة حصلت
فكرة اهتمامه ونظراته ليا دى لواحدها مفرحاني
ومع انى مبفكرش فى الولاد ولا المواضيع بتاعتهم اصلا
الا انى حسيت بأحساس حلو كده
لما قالتلى هند الكلمتين دول
غير ان كلامه واهتمامه بيا مفرحني
وهون عليا كل الزعل اللى جوايا
وبعد ما كنت قاعدة حابسة الدموع فى عيني
وحاسة بهبوط من كتر الجوع والتعب والعطش
حسيت فجأة ان انا جوايا طاقة تخليني اطلع سلم العمارة وانزل عشر مرات من غير ما اقول انا تعبت
هو اه مش امور ولا مز زى ما البنات بتوع اليومين دول بيقولوا
لكن عنده قبول وكاريزما كده
تخطف
وده اللى كان عاجب مروة اختى
اللى كانت هتتجنن انه كان فى بيتنا وهى معرفتش تلفت انتباهه ليها
سمعت صوت باب البيت اتقفل
قعدت مكانى
وانا بحاول ادارى سعادتي
ماما دخلت على الصالون تشيل الصنية.ايه اللى عاجبك فيه ده
انا قولت هشوف رشدى اباظة ولا احمد رمزى
جاتك خيبة
مروة دخلت وراها وقعدت على الكرسى ومديت رجليها على الترابيزة.سيبك من شكله
اصلا هو مش وحش بالعكس شيك ووسيم
وبعدين لو على الكرش الصغير ده شوية ريجيم يختفى
ناجية.ريجيم ايه يا موكوسة
ده باين عليه عيان
اصله بيقول هرمونات الجسم هى اللى مزودة وزنه
وبعدين مش عارفة ليه يا مروة
حاسة ان عنيه من سميرة
اول ما امى قالت الكلمة دى حسيت ان قلبي دق
مروة بصدمة.مين دى انتى بتخرفي يا ماما ولا ايه
يعنى واحد زى عمرو ده
يبص لعيلة زى سميرة
مخلصتش مدرستها لسه
ومبعجرة بشكلها ده
ده كفايا وشها المعووج
يكرهه فى صنف البنات كله
ماما.انتى ذوقك طلع معفن
ده اسود يابت مش اسمر زى ما قولتي
مروة.المهم انا جميلة
علشان يبقى حاسس علطول انى كتير عليه
مش احسن ما يبقى هو احلى مني
وابقى انا هتجنن من الغيرة وعيون البنات بقى
ماما.كأنه متأكده انه خلاص حاطط عينه عليكي
مروة.حتى لو لسه
بس هيحصل متقلقيش
كانت ماما ومروة بيتكلموا
وانا قاعدة بسمعهم ولا كأني ليا وجود بينهم
بس احساسى بأن عمرو فعلا عنيه مني انا
وده مش تخمين ماما بس
لاء ده كلام هند كمان
وتصرفاته معايا
كان محسسنى ان ده حق من حقوقى اللى باخدها من مروة
انى ابقى انا صاحبة حاجة او اكسب حاجة هى بتتمنى تاخدها وبتفكر وبتحاول تخطط للطرق اللى تخليها توصل لحاجة دى اللى جاتلى من غير اى مجهود مني فى انى اخدها
بالنسبالي مكسب
وبعيد عن المكسب والخسارة
عمرو فعلا شخص جميل لو مش الشكل بس
فهو جميل فى كل حاجة
واعتقد ان انا مش هضيع حد زيه من حياتى
حتى لو ده هيضايق اختي
هى عمرها ما عملت حساب للي بيضايقني
يتبع
تكملة الرواية من هنااااااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هنااااااااا
مجمع الروايات الكامله اضغط هناااااااا
 رواية الدلالة الفصل الخامس والسادس 5-6بقلم هنا عادل (جديده وحصر…){kind=link}
تعليقات
إرسال تعليق
فضلا اترك تعليق من هنا