رواية الاميرة و المغترب الفصل التاسع وخمسون 59بقلم آلاء إسماعيل البشري جديده وحصريه
رواية الاميرة و المغترب الفصل التاسع وخمسون 59بقلم آلاء إسماعيل البشري جديده وحصريه
بارت 59 🔥🔥
-اازيك يا أميرة ؟ و ازاي خالتي أم أحمد !
أميرة بتوتر: الحمد لله احنا بخير ...لو عايز تكلم خالتي ام أحمد فهي طلعت قبل شوية ..
ياسين : لا انا اتصلت عشانك انتي
أميرة : عشاني ؟
ياسين : قصدي ..كنت عايز اعتذر منك لإني سافرت بالطريقة دي. . جالي شغل مستعجل ملحقتش أكلمك
أميرة: ولا يهمك .. بس يعني ...هتطول ؟
ياسين: ليه ؟
أميرة بلجلجة: لا قصدي. عشان اعمل حسابي نسافر امتى
ياسين بضيق : يمكن النهاردة بالليل لو خلصت شغلي او بكرة الصبح لو حصلت حاجة عطلتني
أميرة بآلية: تمام... مكانش فيه داعي تغلب نفسك و تتصل بس عشان تعتذر انا مقدرة انشغالاتك 🙄
ياسين :لا أنا اتصلت بيكي عشان عندي ليكي خبر حلو
انقبض قلبها فجأة ! لا تدري لماذا توجه فكرها فورا الى القنصلية ! هل جهز اوراق الطلاق بهذه السرعة !!
-خبر ايه ؟ ؟😥
ياسين : امبارح طلعت نتيجة الثانوية العامة
حينها هتفت أميرة تلقائيا : سحررر !!! انا ازاي نسيتها !!! 😱
-عموما انا اتصلت اقولك أنها نجحت 😊
أميرة بفرحة: بجد !!!! 😍
ابتسم ياسين تلقائيا و تخيل فرحتها الطفولية و ضحكتها التي تأخذه الى عالم آخر و قال بحب:
-ايوة و جابت 73 في المية كمان ...انا قلت افرحك عشان تتصلي بيها و تهنيها
أميرة بلهفة: أكيد 🥰 متشكرة اوي عالخبر الحلو ده انا حالا هأتصل بيها ☺️ ربنا يطمن قلبك و يفرحك 🥰
تنهد ياسين بعمق قائلا : آاااامين يا رب ☺️ اسيبك انا دلوقت عندي شغل
أميرة : طبعا اتفضل .
اقفلت الخط و صاحت بفرحة طفولية : هيييييييييي حبيبتي نجحت اخيييييرااااا !!! 😍😍🥰
اتصلت بها لكنها لا تجيب
حاولت مرة أخرى لكن لا رد
-اكيد نايمة.... يا دي نومتك الثقيلة يا سحورة ...هو ده وقت نوووم!؟؟
كانت تحاول للمرة الثالثة حين دخلت أم أحمد
أم احمد : في اي يا بنتي صوتك كان واصل للمطبخ خير !! فرحيني معاكي !!! هو قالك ايه خلاكي طرتي من الفرحة كدة !! ☺️
أميرة بسعادة بالغة : بنت خالتي نجحت في الثانوية العامة ...ياااااااه مش مصدقة بجد .... أخيييييرا
-و الله ؟؟! طب الف مبروووووك 😍 ربنا يبارك لها و يخلي حياتها كلها افراح يا بنتي ☺️
أميرة بلهفة : يا رب يا خالتي ...سحر بنت خالتي اه بس زي اختي الصغيرة...الحمد لله ان ربنا عوضها عن السنين اللي ضاعت منها بسبب المرض
-ليه هي عندها ايه ؟؟
-عندها الربو و كانت بتسقط بسبب النوبات و الإلتهاب و كدة المفروض اللي من سنها داخلين على ثالث سنة في الجامعة
أم احمد بحزن:يعني عندها 21... على عمر شوق
أميرة بدهشة: مين شوق ؟؟
أم احمد : بنتي اللي ماتت لما كان عندها 3 سنين بإلتهاب الكبد
أميرة بحزن: الله يرحمها ..اسفة إني فكرتك بيها
ام احمد : ولا يهمك يا حبيبتي ...خلينا في فرحة بنت خالتك ... انا بافرح اوي لما اسمع حد نجح في دراسته حتى لو مااعرفوش
أصل الجامعة دي كانت حلمي اللي متحققش
ابتسمت بهدوء و اردفت: من لما كنت صغيرة كان حلمي أبقى دكتورة عيون ☺️
أميرة بحزن: طب ليه ما حاولتيش تاني يمكن كنتي نجحتي في ثاني مرة ؟ ليه فشلتي بسرعة و استسلمتي؟
-و مين قال اني فشلت او مكنتش قادرة انجح في اول مرة ؟ أنا كنت باطلع الاولى على دفعتي من لما كنت صغيرة سقطت بس لما وصلت الثانوية العامة
أميرة بمزاح -اوعة تقوليلي بسبب الحب و الغرام ؟؟ 😂
-الحب عمره ما كان عائق قدام النجاح يا بنتي ...كنت اقدر أحب براحتي و ادرس و انجح و أجيب أعلى مجموع كمان ...بس انا ضحيت بكل ده عشانه و اخترت اسقط
-مش فاهمة ؟😳
-عمك سليمان سقط و مكانش ينفع اكمل انا ...الوقت كان غير الوقت.. لو دلوقت يمكن كانت ضبطت عادي ...بس وقتها هاقدر ازاي اتجوزه و انا اسمي دكتورة و هو صنايعي يوم يشتغل و عشرة لأ؟ الناس و المجتمع ماكانوش هيسيىونا في حالنا و هيأثروا على علاقتنا من قريب او من بعيد و مكنتش هأبقى مرتاحة في حياتي معاه و هو حاسس نفسه أقل مني
انا صليت استخارة و اخذت القرار ده عن قناعة و ارتياح و ضحيت عشان اكون معاه على أمل ان ولادي يحققوا اللي انا ما قدرتش احققه
-ياااااه يا خاااالتي !!! هو فيه تضحية كدة !!! انتي ضحيتي بمستقبلك عشان حبك ليه؟؟ عشان كدة فقدتي النطق لما سابك؟
-صح ...سليمان كان هو مستقبلي و لما عرفت أنه بيحب واحدة تانية حسيت لوهلة اني فقدت كل حاجة من ايدي الصدمة كانت شديدة عليا
بس بعدها استخرت ربنا و استعوضته في كل اللي ضاع مني و الحمد لله عوضني بكل حاجة حلوة حصلتلي في حياتي بعد ما اتجوزت سليمان ...
- انا دلوقت فهمت ليه بتفرحي لما حد ينجح .... انتي ست عظيمة اوي يا خالتي ...انا شكلي هاتعلم منك حاجات كثير 🥰
-ان شاء الله هتتعلمي ...طب رني تاني يمكن ترد عليكي ☺️
اومات أميرة و اتصلت و في تلك اللحظة ردت سحر
-الو
-سحوووووورة حبيبتي !!! 😊
قالتها أميرة بفرحة و هي تشير إلى أم أحمد بأنها على الخط
كانت أم أحمد تهم بالذهاب لكن أميرة اومأت لها بالجلوس و اصرت على ذلك و هي تجيب بفرحة غامرة
سحر- ازيك يا أميرة عاملة ايه يا روحي !! طمنيني عليكي
-انا الحمد لله بخير ...ألف مبروووووك نجاااحك يا روووحي بجد الدنيا مش سايعاني من الفرحة يا ريتني أعرف ازغرط بس
سحر بحب: الله يبارك فيكي يا قلبي 🥰.. أكيد ياسين اللي قالك مش كدة !!
أميرة بحب : ايوة هو 🥰
شردت لوهلة ثم قالت بدهشة:تعالي هنا !! هو انتي تعرفي ياسين منين !! و عرف ازاي انك نجحتي ؟ لا و بمجموع 73 كمان ؟!!🤨
سحر : ما هو صديق خالد أكيد هو إتصل بيه و بلغه
أميرة: خااالد !! و هو خالد يعرف منين انك نجحتي ؟؟
سحر بهدوء: -ماهو ...كان معاي لما طلعت نتيجة الامتحان 🙄😌
أميرة بتعجب -كان معاكي ازاي مش فاهمة ؟؟
سحر-زي الناس 🙄
-بت !! انتي مخبية عني حاجة مش كدة ؟؟! هو انتي تعرفي خالد من امتى و بتتكلمو بتاع ايه؟؟!😕🤔
سحر بلهفة لم تستطع اخفائها: خاااالد طلب ايدي امبارح و بابا وافق 😍 و الأسبوع الجاي قراية فاتحتنا كماااااان تصدقي يا امييييرة !!!
أميرة بدهشة: بتقولي طلب ايدك !!؛ معنى كدة ان انتو كنتو ..!!
سحر بفرحة: ايوة بنحب بعض و امبارح لما طلعت نتيجة الثانوية العامة اعترفلي بحبه و عرض عليا الجواز 🥰
أميرة بفرحة: يعني الفرحة كدة فرحتين نجاااحك و خطوبتك !!ألف مبروووووك و الله فرحتلك من كل قلبي ..
سحر :كان اجمل يوم في عمري يا مييييرو عقباااالك يا قلبي 🥰....ااااخ نسيت !! ما انتي اتجوزتي فعلا ! 😁
تبدلت ملامح أميرة للحزن فورا و قالت ؛ اتجوزت ايه يا سحر دي كانت بس شهامة منه ..ماهوو انجبر عالحل ده عشان يقدر ينقذني ..عموما احنا هنتطلق الأسبوع ده 🥺😔
لاحظت أم أحمد القهر في عينيها و فرحتها التي اختفت في لحظات و حل محلها حزن عميق
سحر بدهشة : حل مؤقت ايه و مجبور يا بنت العبي'طة ؟؟ هو فيه حد يعمل اللي ياسين عمله من باب الشهامة بس !!! الراجل دافع د"م قلبه للزعيم بتاعهم...
دول ثلاثة مليون دولار ان شاء الله يطفحهم مرار إلاهي هو و الگلب اللي إسمه دانيال ...و كمان ماضي اوراق في القنصلية توديه السجن عشان يقدر يطلعك !
كل ده و بتقولي شهامة؟؟ شهم مين اللي يعمل كل ده يا ماما !! ما تصحصحي و تفكري شوية ؟؟ هو انا اللي هأعلمك ؟؟
أميرة بصدمة -انتي بتقولي ايه يا سحر !! ثلاثة مليون ايه اللي انتي بتتكلمي عنها !!! 😱
سحر:هو ياسين ما قالكيش رضيوا يطلعوكي مقابلة فدية كام ؟! قال مجبور قاااال 🙄 !! ده انا اللي اسمي بنت خالتك لولاه كان زماني كل عضو في بلد و هو انقذني بس عشانك ...انا من رأيي فكري تاني في الموضوع ده لإني مش شامة ريحة شهامة بس هنا 🙄
شردت أميرة قليلا : يعني دافع كل الفلوس دي بس عمره ما جابلي سيرة !! طب ليه خبى عني حاجة زي دي !! معقولة تبقى كل الناس عارفة إلا انا !
ثم فجأة صاحت برعب
: سحر انتي عرفتي اني اتجوزت ازاي ؟؟؟ 😱
سحر بدهشة: خالد قالي طبعا ...مالك إتخضيتي كدة ليه؟؟
أميرة بصدمة: اوعي تكون خالتي عرفت بالموضوع ؛!!! تبقى مصييييية !!!😱
سحر :بصراحة يا ميرو... ايوة عرفت😓
أميرة بخوف : عرفت ازاي ؟؟؟
اخفضت سحر رأسها بضيق و قالت : انا مش عارفة ازاي فلتت من لساني في لحظة غضب و قلتلها انك اتجوزتي.. ما اتحملتش تغلط فيكي قدامي و اقعد ساكتة 😰
أميرة بذعر: تبقى مصيبة لو قالت لماما يا سحر 😓 ليه بس تعملي العملة دي و انا اللي بقول عنك أعقل وحدة فيهم؟؟ 😥😓
سحر: اهو اللي حصل بقى ...ما تزعليش مني... المهم تراجعي نفسك في حكاية الطلاق دي
أميرة : اراجع نفسي ف ايه بس يا سحر اذا كانت الجوازة من أساسها باطلة لاني مكنتش أعرف ؟
-معلش يا قلبي مع كدة حاولي تستخيري ربنا هو اللي عارف الاحسن ليكي ☺️
-و نعم بالله يا حبيبتي ...خلي بالك من نفسك و الف مبروك مرة تانية
اقفلت الخط بضيق و هي تقول
-الحقيني يا أم أحمد ...مصيبة 😔
أم احمد : مصيبة ايه كفى الله الشر؟؟؟
-خالتي عرفت بخبر جوازي من ياسين ... و ممكن تكيد ماما بالخبر انا عارفاها كيادة و سموية و ما بتصدق تلاقي حاجة تؤذيها بيها ...قوليلي اعمل ايه دلوقت ؟؟
أم احمد بتفكير: انا من رأيي تتصلي بوالدتك و تقوليلها الحقيقة
لو خالتك زي ما بتقولي فهي ممكن توصل المعلومة بطريقة غلط .. بس لو عرفت منك انتي الاول متقدرش خالتك تعمل حاجة وقتها
أميرة بقلق: انتي شايفة كدة ؟؟!
-قلنا ايه امبارح يا بنتي؟! الصراحة منجاة ...صارحي والدتك و ما تخليش خالتك تستغل الفرصة زي ما عملت ثريا
مش انتي قلتي لو كنت صاحبت ماما و حكيتلها مكانش حصل اللي حصل معايا ؟؟
-صح معاكي حق .. انا هأتصل بيها
تتصلي ايه دلوقت طب مش تفطري؟؟
- بعد ما أخلص اتصالي
-بس الساعة دلوقت بدري اوي في مصر ..أكيد والدك هيكون معاها مش هتعرفو تتكلمو براحتكم انا من رأيي تستني كمان ساعتين أو ثلاثة
فكرت قليلا ثم قالت :معاكي حق الساعة دلوقت عشرة و ربع يعني عندهم أربعة و ربع الفجر
نظرت الى ام أحمد و قالت بإستسلام ماشي يا خالتي هاستنى لبعد الساعة اثنين يكون بابا طلع من البيت
أم أحمد : يبقى انا رايحة أجيبلك الفطار
-ماشي ...بس عايزاكي بعدها تساعديني في الحمام محتاجة اغسل شعري و هنطلع بعدها الجنينة زي امبارح حاسة اني اتخنقت
-حاضر يا بنتي ...خمس دقائق بس و ارجعلك.
توقف دانيال بسيارته في الطريق ثم نظر هنا و هناك و توجه الى الغابة المحاذية للطريق المؤدي على قصر ياسين حيث كانت تختبأ سيارة اخرى بها ثلاثة من رجال دانيال
-أهلا شباب ما الاخبار
-لا جديد ...لم يخرج أبدا من المنزل
دانيال بشك: هل انت متأكد ؟؟
نظروا الى بعضهم البعض ثم قال أحدهم-نقبع هنا منذ ثلاثة ايام .. سيارته لم تخرج أبدا من القصر لا يوجد طريق آخر سوى هذا ..نحن متأكدون
دانيال بتفكير : هذا مستحيل .... هو رجل اعمال لا يمكنه الاعتكاف بهذه الطريقة في قصره ؟؟ هناك شيء خاطيء
في تلك اللحظة رن هاتف دانيال و كان ايهاب
-الو ... دانيال ارجوك قل لي انك قد نفذت الامر
-كيف انفذه و هو لم يخرج أبدا من قصره ؟
نفخ إيهاب بضيق - قلت لم يخرج ؟؟! اووووف يبدو أنك لن تصل الى أي شيء 😒 و انا الذي كنت أعتقد انكم محترفون !!
دانيال بغضب: لقد بدأت أفقد أعصابي منك ايها الغب'ي !!
إيهاب : الغب'ي هم رجالك الذين تكلفهم بمراقبته😡 لأن ياسين في اونتاريو منذ الأمس أتم صفقة هناك و يهم بالعودة فعلا ...كيف فوتت فرصة كهذه !! 😤
دانيال بصدمة: غادر القصر قلت !!!
قالها و هو ينظر اليهم بشزر لدرجة انهم انكمشو مكانهم بخوف
ايهاب: ان بقيت تعتمد على حفنة من الفاشلين فستفقد اعنبارك !! برأيي عليك أن تغير من طريقة عملك
قالها ايهاب ثم أقفل الخط .
دانيال بغضب: ياسين في اونتاريو كيف تقولون إنه لم يغادر القصر !!
احدهم بذعر: صدقنا لم نتحرك من هنا و لم يمر سوى مسؤول الأمن بيتر بالسيارة لحقه ليو و عرف أنه ملأ بنزينا فقط و عاد للقصر فورا
شرد دانيال قليلا و هو ينظر في بقعة من السيارة ثم انحنى و التقط قارورة خم'ر فارغة كانت ملقاة تحت كرسي السيارة !!!
نظر كل منهم الى الاخر بخوف منه بينما زمجر بغضب جحيمي
-أيها الأغبياء ما هذااااااا !!!! أكنتم تثملون بينما كان عليكم مراقبته ؟؟؟ 😡😡
-ك ...كااانت...ب بضع قارورت فقط ... و لم نصل الى الثماا...
-اخرررررس !!!! 😤😡
قالها دانيال بغضب و هو يصفعه صفعة نزف على اثرها و سقط ارضا
-مادمتم قد تناولتم الخ'مر فمن المؤكد انكم قد غفوتم... ايها الحثاااااالة ألا تعلمون أنه مسلم ؟؟؟ هذا يعني انه يقوم باكرا ليصلي الفجر و من الممكن انه قد تحرك وقتها !!! طبعا في هذا الوقت انتم كنتم ناااائمون 😡
ليو : دانيال ...صدق....
قاطعه دانيال بحركة سريعة و هو يخرح مسدسه و يضعه في رأسه: كنت معتمدا عليك يا ليو. ...الآن و قد خذلتني أعطني سببا واحدا يبقيك على قيد الحياة؟
قال ليو بخوف بينما يبتلع ريقه بصعوبة : لقد وضعت جهاز تعقب في السيارة حين اخذها بيتر لمحطة البنزين 😓
شرد دانيال قليلا ثم ابعد السلاح و هو يقول
- حسنا .. هذا خبر جيد ... لكن الغلطة القادمة ستكلفك حياتك هل فهمت ؟؟
ليو - اجل ..اجل فهمت 😓
غادر دانيال و هو يفكر: ان كانت سيارته هنا فكيف غادر؟ على حد علمي لديه رهاب من الطائرة !
ثم ركب سيارته و هو يجز على أسنانه : أعتقد انها كانت مجرد ضربة حظ ياسين... لن تبقى محظوظا لوقت طويل .. قريبا جدا ستودع هذه الحياة و ستصبح أميرة لي من جديد.
دخلت أميرة الى الحمام و ازالت تلك الطرحة لتترك العنان لشعرها بالإنسدال على ظهرها
في تلك اللحظة دخلت أم أحمد
-بسم الله ماشاء الله تبارك الرحمن فيما خلق... ايه الشعر القمر ده بجد الطرحة مخبية كثير
أميرة بإبتسامة: تسلمي يا خالتي ..بس مغلبني في غسله لدرجة اني بافكر اقصه
-اوعي يا بنتي ...الشعر هو جمال الست اصلا ...و انتي شعرك بسم الله ماشاء الله حرير ...انا هاساعدك و هأسرحهولك ما تشبيليش هم
-ربنا يديكي الصحة يا ست يا طيبة 😌
ساعدتها ام أحمد على غسله و تسريحه ثم صلتا الظهر في جماعة و توجهتا سويا الى الحديقة الخلفية و جلستا في السرادق تنعمان بالظل و الهواء المنعش
كان صوت مياه النافورة مع زفزقة العصافير تبعث على الراحة النفسية و تنسي المرء كل ما مر به من ضيق في يومه ...ازاحت أميرة طرحتها و تركت شعرها حرا يطير في الهواء مع تلك الفراشات المتناثرة هنا و هناك بين الازهار
-الجو هنا تحفة ...لو عليا ما ادخلش جوة خالص
قالتها أميرة و هي تنظر الى الورود
أم احمد : ده عشان دلوقت الظهر ...اصبري للمغرب ساعتها هتغيري رأيك ...برد كندا شديد ...اومال انا جالي روماتزم منين ...المهم انا هأدخل أحضرلنا لقمة للغداء جاي على بالي محشي كوسى و طبعا محتاج وقت على ما يجهز...انتي بتحبيها مش كدة ؟؟
-بحب كل المحاشي مش بس الكوسى
-حاضر يا بنتي من عينيا هأعملك معاها بتنجان كمان
دخلت ام أحمد بينما أمسكت أميرة هاتفها و نظرت الى الساعة ثم قالت
-الساعة دلوقت اثنين يعني عندنا ثمانية أكيد ابوي طلع
اتصلت برقم والدتها و قلبها يخفق بشدة
في مصر
-بابا انا جعانة 😔
قالتها ندى بتذمر
-يا خبر !! حبيبة بابا جعانة !! حالا هأحضرلها سندويش البيض اللي بتحبه ...محمر اوي بزبدة كثير 😊
-ليه هي ماما مش هتقوم تحضرلي سندويش بتاعي زي كل يوم ؟
-لا حبيبة قلبي الدكتور قال إن ماما تعبانة شوية عشان كدة احنا هنساعدها اليومين دول لحد ما تخف و هنسيبها تنام عشان تقوم لنا كويسة ماشي؟؟
ندى : تمام ...و انا هاقطع الخيار و الطماطم ماما علمتني اقطع من غير ما اتعور
-طب يالاا بينا وريني شطارتك
بعد مدة قصيرة انتهى رجب من تحضير الفطار و هو يقول
-يالا عشان تقوليلي رأيك مين احلى سندويش البيض اللي انا باعمله ولا سندويش ماما!!
-ماما طبعا 🥰
-كدة يا لمظة !! طب ماشي كلي بالهناء و الشفاء ..
قالها و هو يخلع مئزر المطبخ و يعدل ثيابه كي يخرج
ندى بتساؤل- الله انت رايح فين ؟ مش هتفطر معايا ؟؟ 🥺
-بصي أنا طالع شوية بس و راجع لو امك صحيت اديها الفطار اللي جهزناه ليها في الصينية و خليها تأخذ حبة الضغط بعد الاكل
ندى: حاضر يا بابا ..بس ما تتاخرش زي عادتك ! مش بحب اقعد لوحدي 😔
-مش هاتأخر يا روح بابا يا دوبك أجيب شوية خضار و لحمة و راجع على طول ...تحبي تتغدي ايه ؟؟
-بامية باللحمة 😊
-طب انا هجيب كل اللي نحتاجه و نحضرها سوا للغداء اتفقنا؟!
-ماشي ..🥰
-طب العبي بالتلفون بتاع ماما من غير ما تعملي صوت اوعي تصحيها !
خرج رجب و هو يمسك هاتفه و أتصل
سحر تجلس في الصالة تقلب في هاتفها حين وصلتها رسالة على تطبيق الواتس: وحشتييييني
ابتسمت بحب و فتحتها ثم ردت عليه :الناس بتقول صباح الخير الاول
-صباح الخير ايه احنا داخلين عالعصر عموما بتوحشيني ف كل وقت ظهر و عصر و فجر و
-خلاص خلاص فهمنا
-طب اقدر اتصل صوت ؟؟
كتبت سحر : ماما تسمعني
-طب ما تسمع مش انا خطيبك؟!
-قل لي عايز ايه من غير فلسفة
-عايز اشوفك قبل ما ارجع شغلي
كتبت سحر بلهفة: هو انت راجع بسرعة كدة!!
-اومال عايزاني افضل في مونتريال اشحت عالرصيف؟؟
ضحكت سحر و كتبت : مش قصدي ...بس ..
-اكونش وحشتك من دلوقت يا بنت ؟ 😉😁
-لا وحشتني ايه 😥...
-على فكرة انا رايح اخلص شغل مستعجل عشان الحق ارجع الأسبوع الجاي ...مش قراية فاتحتنا بعد اسبوع ولا نسيتي؟؟
-طب تمام ...روح خلص شغلك اوام عشان ترجع
-طب ايه ؟؟؟
-ايه ؟؟؟
-مش هشوفك!؟؟
-هأسأل ماما
-يعني عايزة تقولي بإختصار مش جاية..فهمت
-خلاص خلاص هههه ...هأسأل بابا 😊
-اذا كان كدة معلش... هاستناكي في الكافيه اللي قريب من هنا
-اوكي باي 🥰
-حاف كدة ...مفيش كلمة حلوة تحت الحساب مثلا
-لما تكتب الكتاب ...يالا بطل غلاسة
-انا غلس!؟ ربنا يسامحك ..و النبي لأشتكيك لايلينا
ضحكت سحر و هي تكتب: ماما طلعت بااااااي
و وضعت ايموجي ❤️
فاجابها :😘❤️
خرجت فاتن من غرفتها و هي تجفف شعرها بفوطة بينما تكلم صالح عبر الهاتف :
صالح -انا اتصلت اقولك اني معزوم عالغدا مش جاي اتغدو انتو
فاتن بتساؤل : مين ده اللي عزمك ان شاء الله ؟؟
-ده واحد بلدياتي ما شفتوش من زمان مسك فيا الا ما اتغدى معاه
- طب يا اخوي ابقى إشحنلي رصيد عشان اتطمن على فاطمة مش تنساني زي ما نسيتني امبارح بالليل ..!
- لا مش هأنسى ..سلام عليكم
اقفلت الخط و سرعان ما رأتها مبتسمة بحب و هي تكتب على هاتفها
فقالت بتساؤل: شايفاكي مبسوطة اوي ...بتكلمي مين ؟؟
-ده...ده خالد ... بيقول أنه مسافر 🙄
فاتن بغضب: انتي بجد موافقة عليه ؟؟ مش اول امبارح بس قلتي مش عايزاه !! ايه اللي اتغير بين يوم و ليلة ؟؟
-إكتشفت أنه بيحبني بجد مش شفقة ولا حاجة
-لا و الله ...نعمل ايه بحبه احنا ؟؟ هو الحب بيأكل عيش حاف حتى !! 😤
-انا يكفيني حبه و اهتمامه
كلي
جلست بتذمر
-يا شيخة اوعي من قدامي و انتي فقرية كدة زي ابوكي ...قال يكفيها حبه ...بنت خالتك وقعت واقفة على رجليها و خذت ملياردير و انتي مبسوطالي بالخدام بتاعه
سحر بإندفاع -بس خالد يبقى ...
في تلك اللحظة رن هاتفها فاومأت لها بإشارة : بس خلاص مش عايزة كلمة زيادة ...ده رقم رجب أكيد خالتك بتتكلم منه يا رب تكون احسن النهاردة
سحر : ليه هي مالها؟
اومأت لها بالسكوت و اجابت : فاطمة ازيك يا اختي عاملة ايه النهاردة
رجب: اختك !!! دلوقت بقت اختك ؟؟؟😡
فاتن بدهشة: رجب !!
كانت سحر تهم بالدخول الى غرفتها و هي تجز على اسنانها لكن لفت انتباهها حدة صوت رجب زوج خالتها فوقفت من خلف الباب تسمع ما يقولان
رجب بغضب - ايوة رجب ..كنتي مستنية فاطمة الغلبانة طبعا عشان تسممي بدنها بكلمتين تانيين مش كدة !!! 😤
فاتن بتوتر: ايه الكلام ده يا رجب ! اللي بتتكلم عنها دي تبقى اختي
-لا و الله !!! طب كويس انك فاكرة !! المهم اختك من امبارح ضغطها عالي مش راضي ينزل و البركة في حضرتك طبعا ...انا عايز اعرف قلتيلها ايه بالضبط؟؟؟
فاتن بلجلجة: هكون قلتلها ايه يعني ؟؟ 😥 احنا كنا بنتكلم عن حمل حنان و زعلت اني خبيت عنها جوازها
-هو انتي شايفاني فاطمة قدامك تضحكي عليا بالكلام العبي'ط ده؟؟؟ بقولك قلتيلها ايه اختك صحتها في خطر بسببك يا عديمة القلب و الإحساس !😤
فاتن بغضب: الزم حدودك و انتي بتكلمني فاهم ؟ انت مين عشان تكلمني بالطريقة دي !!!
-ادعي ربنا إن ازمة الضغط دي تعدي على خير و بعدين هأخليكي تعرفي انا مين ...أوعدك
اقفل الهاتف بغضب بينما جزت على اسنانها بغل
-و أنا مالي الله !؟؟ يعني بنتهم تتجوز من وراهم و انا اخذ اللوم كله.🤨..ربنا ياخذكم انتو و بنتكم في يوم واحد ! 😠
شهقت سحر و هي تضع يديها على فمها كي لا تسمعها
اغلقت الباب برفق و هي تهمس:يا نهار اسود !! مادام خالتي تعبت يبقى أكيد قالتلها عالخبر ...و مادام هي عرفت جوزها أكيد هيعرف ...ان مكانش النهاردة يبقى بكرة 😱😱
فكرت قليلا ثم قالت :ياسين لازم يتصرف قبل ما عم رجب يتهور و يعمل حاجة فالبنت انا لازم أقول لخالد عشان يكلمه ...
لبست ثيابها و خرجت مسرعة و هي تتلصص حتى لا تراها والدتها
في منزل رجب
جلست ندى خارجا في الصالة تقلب في الهاتف بحثا عن العاب بنات
بعد مدة قصيرة رن الهاتف في يدها..لم يكن الرقم مسجلا و استغربت ندى لأنه كان طويلا فأجابت بتوجس
-الو ...مين ؟؟ 😕
أميرة :ندى !! ازيك يا حبيبتي وحشتيني 😊
ندى بفرحة:اختي أميرة !! انتي كمان وحشتيني اوووي 😍
أميرة : ازيك و ازاي ماما و بابا ؟
-احنا بخير ..مش هترجعي بقى انا زهقت لوحدي 😔
تنهدت أميرة بحزن و قالت
-معلش يا حبيبتي هانت شهر بالكثير و راجعة مصر 😔
-بجد هترجعي !! هيييييبه 🥰
هتفت ندى بحماس طفولي
-طب بقولك ايه يا ندوش .. ادي التلفون لماما اكلمها
-ماما نايمة
أميرة: و هي ماما من امتى بتنام في الوقت ده !!مش الساعة عندكم عدت ثمانية؟؟
-ايوة ..بس ماما تعبانة
انقبض قلب أميرة و قالت بلجلجة
-ب..بتقولي تعبانة؟ ..تعبانة ازاي مش فاهمة!!! 😰
-مش عارفة ...كانت بتكلم خالتي امبارح و فجأة وقعت
بابا بيقول ضغطها علي لازم نسيبها نايمة عشان ترتاح
لطمت أميرة على وجهها و همست: يا مصيبتي !! تبقى قالتلها بجد !! أعمل ايه دلوقت !! 😓 ثم تصنعت الهدوء و قالت
-طب بقولك ايه يا ندى... لما تقوم قوليلها اني اتصلت بيها و هبقى...
-مين عالخط يا ندى!!
قالتها فاطمة بتعب بينما تمسك تلك الاريكة بصعوبة
سمعت اميرة صوت والدتها فأمسكت قلبها الذي كان يكاد يمزق جدران صدرها من شدة الخوف
ندى بحماس طفولي :ماما انتي صحيييتي !! دي اختي أميرة 😍
-قلتي أميرة !!! 😳
سألت بدهشة
-ايوة أميرة ...خذي يا أميرة ماما صحيت أهي 🥰
امسكت فاطمة الهاتف بتعب و قالت : روحي انتي اوضتك يا ندى
أميرة بلهفة ممتزجة بتوتر:الو ازيك يا ماما 🥺
فاطمة بغضب : أخيييييرا افتكرتي ان ليكي ام ؟؟ 😔😤
أميرة بخوف: ماما ارجوكي ضغطك هيعلى تاني ...
-ملكيش دعوة بضغطي و قوليلي ان اللي قالته خالتك ده مش صحيح!! 😤
أميرة بضيق : ماما مش عارفة خالتي قالتلك ايه بالضبط ..بس سيبيني اشرحلك
-هتشرحيلي ايه ولا ايه ...يا خساااارة تربيتي فيكي يا أميرة .. بجد خسااااارة 😓😣
أميرة ببكاء: يا ماما اصبري عليا انا هافهمك كل..
قاطعتها فاطمة بغضب ممتزج بألم و هي تمسك بقلبها
-هتفهميني ايه بالضبط هاااا!! انك هربتي من بيت خالتك و كذبتي علينا و قلتي لقيتي شغل ولا انك كنتي عايشة في بيت شاب و اتجوزتيه من ورانا ؟؟؟؟
-مين دي اللي اتجوزت يا فاطمة !!!
قالها رجب بصدمة لدرجة ان تلك الأكياس وقعت من يده
شهقت فاطمة و وقع الهاتف من يدها :
-رجب!!!!! 😳😱
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
تعليقات
إرسال تعليق
فضلا اترك تعليق من هنا