رواية الدلالة الفصل السابع والثامن والتاسع 7-8-9بقلم هنا عادل (جديده وحصريه وكامله)
رواية الدلالة الفصل السابع والثامن والتاسع 7-8-9بقلم هنا عادل (جديده وحصريه وكامله)
الدلالة
رفيقة الشيطان
الفصل السابع
فى بيت عمرو
كانت مها قاعدة هى ومي بيتفرجوا على التليفزيون
عمرو فتح الباب بمفاتيحه
ودخل بابتسامته الحلوة.السلام عليكم يا اهل الدار
قامت مى تجرى من مكانها تحضنه.وعليكم السلام يا قمر الدار
مها بتضحك.عليكم السلام ورحمة الله يا حبيبى
حمد الله على السلامة
عمرو وهو حاضن اخته.الله يسلمك يا ست الكل
ايه يا حلوين عاملين ايه النهاردة
مي.زى الفل يا معلم
مها.يابنتى سيبي رقبته بقى حرام عليكي
مي بتضحك.الله واحشني انتى هتغيري مني انا ولا ايه
لاء بقولك ايه ده اخويا اوعى تدخلى بينا
عمرو بيطلع مي من حضنه.عيب عليكي يا ميوش بقى موها هانم تغير منك انتى
يابنتى دى مشغلاكى معاها على ورديات
خلينى اقعد بقى
وقفت مى تبص لامها وايدها فى جنبها.طبعا مش انت الراجل بتاعنا يا دكتور
لازم نبقى ورديات عليك
ابوك لو كان هنا كنا عملنا معاه كده هو كمان
عمرو بيضحك.الحمد لله ربنا نجده
مها بتضحك.صح بابا كلمني النهاردة
ممكن يوصل على المينا هنا كمان اسبوعين
هييجى يقعد يومين ويرجع تانى المركب علشان طالعين رحلة 6 شهور
عمرو.خسارة كان نفسي اكلمه واحشني اوى
مى.اسكت ده فيه ناس تانية كلمتنا النهاردة
عمرو.ناس مين
مها.يابنى سيبك منها دى دماغها فاضية
بقولك ايه اقوم احضرلك تاكل بقى
عمرو بأستغراب.لاء بجد ناس مين اللى كلموكم
مى بصيت لأمها كانت متعرفش انها مش عايزة تقوله على المكالمة
وعمرو كان ناسى خالص ان ناجية قالتله انها اتصلت بمامته
مها.الناس اهل البت التخينة بتاعت امبارح دى
اتصلوا بيا يعتذرولى
عمرو.اااااه انا نسيت
فعلا عرفت الموضوع ده
مها باستغراب.ايه ده انت عرفت منين
مى.انت عطيتلهم رقمك ولا ايه
عمرو.لاء يا مي معطيتش حد رقمي
بس امبارح اخت البنت لما رجعوا البيت متعرفوش حكيت ايه لمامتها وباباها
بهدلوا البنت ومن الزعل......
مها بانفعال.من الزعل ايه
وانت عرفت منين يا عمرو كل ده
وبعدين انت مالك انت بهدلوها ولا مبهدلوهاش
تصدق بقى انا شغل اللف والدوران ده مش بحبه
وهتصل ابهدلهم بجد
عمرو.فى ايه يا ماما مالك
الموضوع مش مستاهل
بكلم عمى اسلم عليه
مرات عمى حكيتلى ان البنت تعبت وراحوا بيها المستشفى ومن الزعل جالها التهاب فى العصب السابع
صعبت عليا
ده كل اللى حصل
خاصة ان احنا اللى غلطنا فيها بصراحة هى مغلطتش
مى بتبص لمها بغيظ
عمرو.ايوة يا مى احنا اللى غلطنا
قعدتى انتى وماما تتريقوا عليها وتقلوا منها
غير اللى اختها عملته
مها.احنا معملناش حاجة يا عمرو
وبعدين اختها هى اللى قالت ان اختها مش سوية
وبعدين هى مين دى علشان نشغل بالنا بيها ولا نتكلم عنها
مي.انت مهتم ليه كده يا عمرو بالموضوع ده
اومال لو كانت حلوة يعنى
دى تقرف
عمرو.مى هو ايه اللى تقرف
انتى بتتكلمي عن بني ادمة
انتى ترضي حد يقول عليا كلمة زى دى
وبعدين يا ماما انا لا مهتم ولا اى حاجة
بس انتى عارفة انا مش بحب الظلم
وحسيت ان الموضوع كبر من غير داعي مكانش فيه حاجة حاصلة يعني لكل ده
مها.شوف يا عمرو يا حبيبى
كلمتنين حطهم حلقة فى ودنك
علشان نقفل الكلام ده خالص
عمرو.ها يا ماما اتفضلي انا سامعك
مها.بص يا عمرو
الناس دى شكلهم كده مش سهلين
يلفوا عليك
يكلموك
يعملوا شغل الستات ده لما يبقوا عايزين يوقعوا واحد زيك كده
وانت تديهم الفرصة مش هس....
عمرو.ايه يا ماما كل اللى بتقوليه ده
ايه اللى خلاكى تفكرى كده
صدقينى والله انا بس حسيت ان احنا زودناها
وصعب عليا اللى حصل البنت بسبب ان احنا كبرنا قصة تافهة جدا
شيلي بقى كل اللى فى دماغك ده
مها.اااه اصل فكرة انها تاخد رقم اختك وتكلمها ده وتكلمني
مريحنيش الموضوع ده
عمرو باستغراب.سميرة خدت رقم مي
مها.هى مين فيهم سميرة؟؟
اهى البت الحلوة مش التخينة دى
عمرو.اه مروة
وبعدين ايه التخينة دى يا ماما
ماهو انا تخين
ترضى الناس تشيل اسمى وتنادي عليا بتخين
مي.انت ليه كل كلمة تدخل نفسك فى الكلام يا عمرو
هى البت فعلا تخينة وجسمها وحش
عمرو.حتى لو يا مي
احنا مالناش فى خلقتنا حاجة
وبعدين الكمال لله ولا ايه يا ماما
مها.ادخل يا عمرو غير هدومك
وهقوم احضرلك الاكل
عمرو.ماشى يا ست الكل
تسلم ايديكي
قام عمرو يغير هدومه فعلا
وهو مشغول بسميرة اللى صعبت عليه بسبب احساسه وملاحظته لوجعها وكسوفها
وزعلها من التقليل منها من اللى حواليها
مى.هو فى ايه يا ماما
الموضوع شكله كده مش هيبقى موقف وفات
مها.لالا هيعدى متقلقيش
اخوكي بس قلبه طيب
والبنت صعبت عليه
بصراحة احنا متوصيناش فعلا
مى.بقى اللى احنا قولناه
ولا اللى اختها قالته عليها
مها.اختها دى مش مريحة بالمرة
هى اه جميلة والاتنين مالهمش علاقة ببعض فى الشكل
لكن مش مريحانى
وخوفى منها هى مش من اختها
مي.ولا هى ولا اختها ييجوا فينا حاجة
ده ابعد من خيالهم
فى بيت ناجية
عمر.السلام عليكم
ناجية.عليكم السلام يا حبيبي
عمر.اومال البنات فين البيت ساكت يعني
ناجية بحزن.مروة نايمة شوية
وسميرة تعبانة يا عينى فى اوضتها جوة نايمة
عمر بقلق رايح ناحية اوضة سميرة.مالها يا ناجية فيها ايه
دخل الاوضة من غير ما يخبط
كانت سميرة نايمة على سريرها وشاف وشها وشفايفها اللى كانت معووجة
وده خضه عليها اكتر
مسكته ناجية من ايديه وطلعته برة الاوضة وطلعت بيه وقفلت على سميرة تانى
عمر واقف يبص بخوف لناجية.ايه اللى جرالها يا ناجية
فى ايه
ناجية.تعالى بس ندخل اوضتنا نتكلم بدل ما تسمعنا
اصل الدكتور قال ده من الزعل
دخل عمر اوضته مع ناجية وقفلوا الباب
وقف يبصلها مستني يعرف حالة بنته ايه
ناجية.ياخويا متخافش الدكتور قال بسيطة يعنى
هى الزعل واللى حصل امبارح هو اللى عمل فيها كده
عمر بحزن.ليه بس كده
انا غلطان يا ناجية
انا عاقبتها زيادة عن اللزوم
ناجية.هو ايه اللى بتقوله ده يا عمر
جرى ايه اومال هنربيها ازاى يعنى
هى هتلوى دراعنا ولا ايه
عمر بحزن.مش لوى دراع
البنت اللى عملته مكانش يستاهل ان كلنا نعاقبها كده يا ناجية
على الاقل حد مننا يشد والتانى يرخي
لكن كلنا جينا عليها
شوفتى بقى
ناجية.بقولك ايه يا عمر
دى بنت ياخويا
مش هينفع نسيبلها السايب فى السايب
ولو حسيت ان تعبها ده لوى دراع لينا
مش هنعرف نكلمها بعد كده
عمر.قلبك جامد انتى عليها يا ناجية
صاحبيها زى ما انتى مصاحبة مروة
بلاش نعقدها البنت لسه صغيرة
ناجية.جرى ايه يا عمر مالك
هو انت محسسني ليه انى مرات ابوها
وبعدين هى واختها عندى غلاوة واحدة
انتى مشوفتنيش كنت قربت اجرى حافية فى الشارع من خوفى عليها
واختها اللى انت فاكرها بتحاربها دى
طلع عنيها النهاردة معاها فى المستشفى
عمر.حقك عليا يا ناجية ما تزعليش
مش عيب انا وانتى نوجه بعض للصح
انا بس بقولك علشان تخلى بالك
وعلشان سميرة متكرهش اختها لما تحس بفرق معاملتك بينهم
ناجية بانفعال.شوف الراجل برضه بيقول بفرق بينهم
انا بتعب لما بتكلم معاك
عمر.خلاص حقك عليا
المهم بس راضيها انتى علشان انا مش هينفع اقولها حقك عليا
علشان متفكرش ان تعبها نساني انها غلطت
بس برضه انتى عوضى اللى انا بقصر فيه معاها
ماشى يا ناجية
ناجية.من غير ما توصينى يا عمر
دى بنتي يا خويا
حتة مني
عمر.بس الدكاترة طمنوكي يعني
ناجية.اه بس هى تمشى على العلاج
والعلاج الطبيعي
عمر.طيب يعنى اخدت علاجها ونامت ولا ايه
ناجية بلا مبالاه.لاء لسه مخدتهوش
مروة رجعنا من المستشفى تعبانة ومفرهدة
نامت علطول
وانا رجليا وجعانى مقدرتش انزل
وبعدين هى هتحتاج حقن ومش هتقدر تنزل
قولت ميصحش اجيب حد من العيادة يضربلها الحقنة وانت مش موجود
افرض اللى جه راجل
عمر بصدمة.ايه اللى بتقوليه ده يا ناجية
انتى سايبة البنت من الصبح من غير ما تاخد علاجها
وبعدين فيها ايه لما حد ييجى من العيادة يعنى يديلها الحقنة
مش احسن ما تبقى كده متاخدش علاجها الموضوع يزيد معاها
الله يسامحك يا شيخة
سابها عمر وخرج يجرى من الاوضة بعد ما اخد منها روشتة العلاج ونزل يجرى لأقرب صيدليه
ناجية بلا مبالاه.هو فى ايه ماله ده
هيجرالها ايه يعنى
يا عيني عليا
اومال لو كان شاف اللى اتعمل فيا
واديني اهو زى الفل وام لشحطتين
راح عمر الصيدليه وجاب العلاج وطلع معاه حد من الصيدليه علشان يدي الحقنة لسميرة
وصل عمر للبيت
ودخل علشان يصحى سميرة
صحيت من النوم على ايد بابا وهى بتهزنى علشان اصحى
شوفت وشه وقلقه
محسيتش بنفسى غير وانا بضحك فى وشه
بضحك على شكلى ومنظر وشى
ابتسملى وبيقولى بهدوء.قومى يا حبيبتى حطى روب عليكي علشان الصيدلى برة هيديلك الحقنة
سميرة بتقل.حاضر
سندنى بابا وقومت من مكانى شاورتله على مكان الروب جابهولى وحطه عليا
وطلع يجيب الصيدلى
فعلا دخل بابا معاه سندنى لحد ما اخدت الحقنة
ووصل الصيدلى لحد الباب
ورجعلى تاني
بابا.حقك عليا يا سميرة
حقك عليا فى كل حاجة
سميرة بتعب.ليه يا بابا
هو فى ايه
بابا.والله بتكسفينى بقلبك الطيب يا سميرة
سميرة.ه..ه.هو.ااايه.ايه حصل يعني
بابا.انتى لسه زعلانة من اللى عملته معاكى امبارح
سميرة بتضحك.ا.اانا ازعل منك انت
أأانت..حبيبى يا بابا
انا كنت غلطانة فعلا
مش اى حد اهزر معاه
بابا.انا كان المفروض اوصلك قصدى من غير ما اضايقك بالكلام
بس انتى بنتى حبيبتى مينفعش اقبل ان حد يشوفك قليلة او مش مؤدبة
كنت فرحانة اوى بكلام بابا
انا برضه زى ما بتوجع اوى بالكلام اللى يزعلني
برضه انا بفرح بأقل كلمة حلوة
وياااااه بقى لما الكلمة دى تكون من بابا
حتة من قلبى ده
بابا.يلا بقى انا هقوم اغير هدومي
واعملك شوية اكل انما ايه تاكلى صوابعك وراهم
علشان نتغدا سوا
كنت ميتة من الجوع
انا من امبارح مفيش حاجة دخلت بطني
وانا اصلا بحب الاكل جدا
ف اللى عمرو عمله واللى بابا كمله بكلامه الحلو ده فتحلى نفسى على الاخر
وكأنى لا كنت زعلانة ولا حتى تعبانة
وضحكت لبابا وانا بقومه من جنبى على السرير علشان يخلص بسرعة وناكل بقى
طلع بابا من الاوضة
حاولت اني احرك صوابع ايدي
كانت تقيلة جدا وحركتها صعبة
لكن مش مهم بقى انا هحاول
ما هو انا مش هفضل عايشة بنص بني ادمة يعني
مش انا خالص اللى استسلم كده
دخل عمر غير هدومه وراح على المطبخ
دخلت وراه ناجية ووقفت تبصله باستغراب
عمر.فى ايه يا ناجية
واقفة بصالي كده ليه
ناجية.اصلك يعنى مخدتش نفسك من ساعة ما جيت
ما تقعد ترتاح وانا هجهز الاكل
عمر.لاء يا ناجية
انا هحضر الاكل
اتفقت مع سميرة انها هتاكل من ايدي
ناجية.ياعينى عليا
بتورم رجليا من الواقفة طول اليوم الا ما فيه مرة تيجي تقولى الكلمتين دول
عمر.معلش يا ناجية بس حاسس بالذنب من ناحيتها وعايز اراضيها
ناجية بتمصمص شفايفها.يا عينى على البخت
اما اروح اصحي الغلبانة اللى نايمة جوة
لو تعرف تحبها زى ما بتحب سميرة كده
عمر.الاتنين نفس الغلاوة وانتى عارفة يا ناجية
انتى بس اللى مروة غلاوتها فى قلبك زايدة شوية
يلا روحى صحيها علشان نتغدا سوا
كان عمرو فى اوضته بعد ما اخد الدش بتاعه وغير هدومه
مسك تليفونه واتصل على هند
عمرو.هنوووود
بقولك ايه
هند بتضحك.وانت هتتصل علشان تسأل عني مثلا
ماهو لازم يكون فيها بقولك ايه
عمرو بيضحك.يابنتى ايه ما بتصدقى تتكلمي
اسمعي بس قبل ما مرات عمك تسمعني
هند.استر يارب
عايز ايه
عمرو.من غير ما تفهمينى غلط يعنى
ومن غير تريقة واستظراف
انا عايزك تديني رقم تليفون سميرة
هند بشهقة.سميرررررررررررررة
عايز الرقم بتاعها تعمل بيه ايه يا دكتور
عمرو.يابنتى اطمن عليها
يخربيت اللى يبقاله عندك حاجة
هند.بقولك ايه يا عمرو
البت دى جدعة وطيبة
لا حمد مرات عمى ولا حمل مي
كفايا عليها اختها الحرباية دى
عمرو.فى ايه يا هند لكل ده
والله عايز اطمن عليها بس متقلقيش
مش هعملها اى مشاكل ومحدش هيعرف
هند.عمرو اوعى تضحك عليها الله يخليك
دى غلبانة
متعلقهاش بيك على الفاضى
عمرو.جرى ايه يا هند
ايه اعلقها بيا دى
بقولك هطمن عليها وعلى حالتها مش اكتر
انتى مش واثقة فى ابن عمك ولا ايه
هند.ماشى يا عمرو
انا بس مش عايزة تحصل مشاكل لا عندها فى البيت
ولا مع مي وطنط مها
انت عندهم اصلا خط احمر
عمرو بيضحك.اه هيخللوني
انا مش عارف لما اتجوز هيسيبوا ايه لمراته تعملهولى هى بقى
هند.ههههههههههههه تتجوز
يالهوى
يا عيني عليها مراتك يا عمرو
انت اللى زيك يابنى يترهبن كده وميدخلش واحدة حياته
والا امها هتبقى داعية عليها
عمرو بتركيز.تصدقى باين عليها فعلا انها داعية عليها
هند.ايه ده قصدك ايه
عمرو.ها
ولا حاجة يا نيلة انتى اخلصى بقى
يخربيت اللى يتصل بيكي يا شيخة
هند بتضحك.ماشى هبعتهولك فى رسالة دلوقتى
اقفل يلا
قال يعني متصل تطمن عليا
ما هو انت متصل علشان مصلحتك
عمرو بيضحك.اقفلى يا هند سلام
قفل فعلا الخط معاها وهو بيضحك على طريقتها
هى غاليه عليه وبيعتبرها زى مي بالنسباله
واتربيت هند وكبرت ان عمرو اخوها الكبير لأن هند مالهاش اخوات
وكانت مي برغم اختلاف تفكير الاتنين الا انها صاحبتها المقربة تعتبر
فعلا بعتت هند رقم تليفون سميرة لعمرو
وهو بيعمل اتصال
افتكر ان مامتها قالت
دى باباها عاقبها واخد منها التليفون
عمرو لنفسه.يخربيت دماغك
اهو كنت هتوديها فى داهية تانية
عمرو كان مستغرب اهتمامه
وقلقه عليها
وهو بيقول لنفسه
جرى ايه يا دكتور هو الممنوع مرغوب ولا ايه
انت عايز تعاند امك واختك بالبت الغلبانة ولا ايه بالظبط
يتبع
الدلالة
رفيقة الشيطان
الفصل الثامن
فى بيت سميرة اتجمعوا كلهم على السفرة
عمر بحب.يلا بقى دوقوا وقولوا طبيخي ولا طبيخ ماما
سميرة بأبتسامة ولسان تقيل.تسلم ايديك يا بابا كفايا تعبك
مروة.ايه ده يا بابا انت عملت الاكل بنفسك
ناجية.اه ماهى حبيبة قلبه عيانة
قال يأكلها بأيديه بقى علشان تخف
اصل انا بحطلها سم فى الاكل
سميرة بصيت لأمها ورجعت ابتسمت مرة تانية
مروة بثقة.ياستى انتى تفرحي
مين قدك اصلا
لما الباشمنهدس عمر غالي بجلالة قدره يقف فى المطبخ يحضرلك الغدا
ناجية.يعنى ايه ياختى بجلالة قدره
اهو كلامكم ده اللى بيخليه يشوف نفسه عليا
عمر بيحاول يخلى الكلام هزار.هو انا عندى اغلى منك يعنى يا ناجية
وبعدين المفروض انك اكتر واحدة فى الدنيا عارفة انا بحبك ازاى
سميرة بتبص لأبوها وبتضحك
مروة.اه صحيح
اللى يخليه يعادي اهله كلهم علشان يتجوزك
يبقى اكيد بيحبك
ناجية.اهله ايه ان شاء الله اللى عاداهم علشاني
لاء يا حبيبتى
ده هو عاداهم علشان محبش ان حد يمشى كلمته عليه
عمر.انتى مفترية ياست انتى
انا مش عارف كنت ماشى وراكى وقتها زى الاعمى
انتى معقول نسيتي يا ناجية
عارفة يامروة
دى كانت تقولى يمين
اروح يمين
تقول شمال اروح شمال
لو انا مش عارف ان السحر والاعمال دى تخاريف
كنت قولت سحرالى
ضحكوا البنات
لكن مسكت ناجية كوباية المياه تشرب وهى بتبص لسميرة بكره غريب كأنها ضرتها
عمر.ايه يا سميرة
طمنينى الاكل عجبك
مروة من غير حتى ما تفكر تطمن على اختها.ودى بيفرق معاها طعم
اهو كل الاكل بالنسبالها حلو
المهم تملى كرشها ده
عمر.فى ايه يا بنتى
اومال لو تخينة بجد
وبعدين يا حبيبتى الملافظ سعد
مش الاولى انك تطمنى عليها
ناجية.جرى ايه يا عمر فى ايه
انت مش طايق عليها كلمة ليه يا خويا
بقولك ايه
لو زعلان على المحروسة اوى كده
خدها وغوروا روحوا عيشوا بعيد عننا
ناجية وطريقتها كانت صادمة ليهم كلهم
حتى لمروة كمان
عمرو كان باصص لناجية ومش مستوعب الكلام اللى هى قالته
هى اول مرة تتطاول للدرجة دى
غير ان ده حصل قدام البنات
غير ان اصلا محصلش حاجة تخليها تتكلم بطريقة زى دى معاه
مروة فى اللحظة دى قررت متتدخلش هى شايفة ان امها كانت فى قمة انفعالها
برغم ان مفيش داعي
لكن هى خافت تدخل فى الكلام
تقلب امها عليها
عمر بيشرب شوية مياه.انتى يا ناجية ايه الطريقة اللى بتتكلمي بيها دى
وبعدين انا مش هسمح بالطريقة دى لا قدام البنات ولا حتى بيني وبينك
ناجية بأنفعال غير مبرر.انت تسمح ولا متسمحش دى بتاعتك انت
جرى ايه يا عمر انت فاكر نفسك راجل بجد ولا ايه
انت لولا القرشين اللى حيلتك مكانتش واحدة عبرتك
جاتك نيلة راجل على ما تفرج
البت تعبتلها شويتين
ريل وداخل يصالح ويتأسف
هو فى ايه يا خويا
ما كان ابويا بيضربني وبيبهدلني
لا صا.........
عمر بأنفعال.ناجية
خلاص
لحد هنا واسكتى بقى
كفايا
انا ساكت فاكر كل ده بسبب زعلك على بنتك
لكن الطريقة دى لو تماديتي فيها بكلمة كمان
هتكونى مش على ذمتى دقيقة تانية فاهمة ولا لاء
قامت ناجية من على الكرسى بتاعها
وهى بتاخد وضع استعداد الخناق اكتر من كده
لكن اللى لجم لسانها
منظر عمر وهو بيغمض عنيه وماسك قلبه
المنظر كان مرعب بالنسبالهم كلهم
حتى ناجية اللى كانت غيرانه على جوزها من بنتها من دقيقة
جريت عليه وهى مرعوبة
فى لحظة كانت مروة جنبه
وسميرة بمجرد ما بتقرب منه
بعدت ايديها امها عنه
وزقتها لبعيد
ولانها مش بتتحرك كويس
توازنها اختك ووقعت على الارض
محدش اهتم بيها
لكن اهتمامهم كله كان بعمر
كانت سميرة بتعيط وبتحاول تقوم تقف تطمن على ابوها
ومروة واقفة جنبه بتعيط وبتحاول تفوقه
لكن ناجية كانت عماله تدلك فى المكان اللى مسكه بأيديه
بس هو فضل مغم عليه
وقبل ما حد يقول اى كلمة
جريت مروة بسرعه طلعت عند هند
ترن الجرس وتخبط على الباب بالايد التانية
فتحت هند
مروة بعياط.هند الحقينى
اتصلى بابن عمك
بابا تعبان اوى ومش عارفين نكلم مين
هند مخضوضة من المنظر
وطلعت ام هند على صوت مروة
ام هند.مالك يا مروة فى ايه
مروة.بسرعة ياهند اتصلى بيه الله يخليكي
هند من غير تفكير دخلت جابت تليفونها
واتصلت على عمرو
عمرو.استر يارب
خير ياست
هند بسعرة.عمرو الحقنا الله يخليك
بابا سميرة جارتنا تعبان اوى ومحتاجين دكتور
عمرو بقلق.طيب تعبان ماله علشان لو مش تخصصى اشوفلك حد
هند.تعبان ماله يا مروة يكلم حد من اصحابه
مروة بعياط وانفعال.معرفش يا هند معرفش
خليه ييجى يشوفه الاول
طلعت تجرى مروة من قدام هند رجعت على البيت
عمرو بقلق.طيب يا هند اقفلى هغير هدومى واجيلك علطول
فعلا قفلت معاه
وطلعت هند ومامتها على شقة ناجية
كان الوضع فى البيت مخيف
وكانت سميرة لسه على الارض بتعيط واعصابها مش شايلاها بسبب خوفها وقلقها على ابوها
هند ساعدتها تقوم من على الارض
وام هند وقفت جنب ناجية
مستنيين ان عمر يفتح عنيه
لكن عمر كان غايب عن الوعى تماما
لكن بيصبروا نفسهم بأنه هيفوق دلوقتى
فات وقت مش كبير
وصل عمرو ودخل بسرعه حتى من غير ما يرمي السلام
بمجرد ما فتحت هند شاورتله على المكان اللى فيه عمر
دخل بسرعه يقيس النبض ويكشف عليه
لكن كانت كفأة القلب ضعيفة جدا
عمرو.لازم يتنقل حالا على المستشفى
ناجية بعياط.مستشفى
يامصيبتى ليه مستشفى
عمرو وهو بيطل حد من تليفونه.قلبه ضعيف جدا ومحتاج عناية مركزة
مروة بتصرخ.عناية مركزة
ليه ماله طيب فى ايه
كان عمرو عنيه مع سميرة اللى بتعيط وهى مش بتتكلم نص كلمة
مردش عمرو على مروة علشان اللى بيتصل بيه رد عليه.خالد بقولك ايه
انا عايز عربية اسعاف حالا على العنوان اللى بعتهولك فى رسالة ده
بص على تليفونك
وابعتلى الاسعاف حالا
قفل عمرو الخط بعد ما صاحبه رد عليه بالموافقة
كان الوضع يقلق فى البيت
وكان نفس عمر عمال يقل
وبناته ومراته واقفين منهارين حرفيا
رن تليفون هند اكتر من مرة برقم مى
لكن هى كانت مش بترد
راحت ناحية عمرو اللى واقف جنب عمر بيتابع النبض والنفس.عمرو هى مي عارفة انى كلمتك
اصل هى عمالة تتصل بيا
وانا مش عارفة اقولها ايه
عمرو.ردى يا هند عادى
هو ده وقته
فعلا رنت مي مرة تانية
هند.ايوة يا مي
مي بأنفعال.فى ايه يا هند بتصل بيكي من بدرى
هند.معلش مش فاضية
مي.طيب انتى كلمتى عمرو من شوية ونزل بسرعه وهو مخضوض
انتم عندكم حاجة ولا ايه
هند بتوتر.ايوة يامي
عندنا حد فى جيرانا تعبان
وكانوا محتاجين دكتور
معرفتش اعمل ايه مفكرتش غير فى عمرو
مي.طيب ويعنى مفيش دكاترة قريبين منكم يا هند علشان تطلبوها
وبعدين جاركم مين ده
هند بانفعال.مي معلش مش وقته
احنا عند الناس والجو متكهرب
ارجع البيت واكلمك
قفلت هند الخط وهى متعصبة من مي اللى بيتغير على اخوها وانانية فيه بشكل مبالغ فيه
وصلت الاسعاف
وبسرعة كانوا المسعفين مع عمرو نزلوا عمر
اللى لحقته على السلم ناجية ومروة
وكانت هند ومامتها بيسندوا سميرة علشان تنزل معاهم
طلعوا على المستشفى
ناجية راكبة معاه الاسعاف
وسميرة وهند ومروة وام هند مع عمرو فى عربيته
وصلوا واستقبلوه بسرعه
وبمجرد ما دخل العناية المركزة
طلع منها الدكتور ووقف مع عمرو
اللى برغم انه مش عارف مين عمر ولا اتعامل معاه قبل كده
لكن قلقان عليه كبني ادم
وصعبان عليه مراته وبناته اللى قلقانين عليه
ام هند.فى ايه يا عمرو
الدكتور قالك ايه
عمرو بحزن.اتوفى يا مرات عمي
ام هند بحزن بتبص لناجية اللى واقفة فى حضن مروة بنتها.لاحول ولا قوة الا بالله
حسيت سميرة من نظرة ام هند ونظرة عمرو
محسيتش بنفسها غير وهى بتصرخ
وبتعيط بأنهيار
طلعت ناجية من حضن بنتها
جريت على عمرو.هو فى ايه
هو حصل حاجة
عمرو ساكت وباصص فى الارض
ام هند.شدى حيلك يا ام مروة
ميتعزش على اللى خلقه يا حبيبتى
ناجية بأنهيار.اسكتى ياولية يا مجنونة انتى
قولى يا دكتور
جوزى فى ايه
ماله حاسس بأيه
عمرو بحزن.البقاء لله
سكتة قلبية
دى كانت اصعب لحظة مرت على ناجية تقريبا فى حياتها كلها
سميرة قعدت فى الارض مكانها بتلطم على خدها
سندت مروة على الحيطة وقعدت هى كمان على الارض
ودفنت وشها بين ايديها
وانهارت من العياط
لكن ناجية واقفة مش مصدقة
بتحاول تدخل العناية المركزة
لكن عمرو وام هند بيحاولوا يمنعوها
ناجية بصراخ.سيبونى ادخل اشوفه
خلونى اطمن عليه
ده كويس
ده هيرجع البيت معايا
عمرو.اهدي اهدى بس ده امر ربنا
ام هند.ربنا يصبر قلبك يا رب
ناجية بانهيار.هو مين اللى مات
محدش يقولى عمر
لاء عمر ايه اللى يموت
ده كان لسه قاعد بياكل معانا
ده عمل الاكل بأيديه
ده احنا ملحقناش نخلص
اكل
عمرو.لاء انا هجيب حد من التمريض يديها حقنة مهدئة
سابها عمرو ومشى بعيد عنهم
وكانت ام هند لسه سانداها
ناجية اترميت فى حضنها
وانهارت من العياط.لاء لاء
هو زعل مني
انا زعلته
انا طول عمرى بزعله
مكانش يستاهل واحدة زيي
كان بيراضيني
وبيعمل كل حاجة تريحني
ام هند بتطبطب عليها وسايباها تطلع كل اللى جواها
ناجية.خسرته الدنيا كلها
انا اللى خليته يخسر اهله واصحابه
انا السبب فى انه يخسر عمره كمان
بس كنت فاكراه هيفضل معايا ومش هيفارقني
فكرت
انى زى ما جيبته لحد عندى
وقت ما احب انه يبعد انا برضه اللى هبعده بمزاجي
كان الكلام اللى بيتقال طبيعي بيتقال نتيجة انهيارها بوفاة عمر
لكن كانت فيه واحدة برغم اللى حاصل ده كله
سامعه الكلام اللى ناجية بتقوله ومركزة فيه
ناجية.لاء ده مكانش اتفاقى
مش ده اللى عيشت عمرى كله بدفع تمنه
مش هسيبه يبعد عني بالسهولة دى
فى اللحظة دى وصل عمرو ومعاه حد من التمريض
ومعاهم كرسي بعجل
قعدوها وهى منهارة وعماله تكمل كلام مش مفهوم
لكن الممرضة استغلت انها مش مركزة معاها
وعطيتلها الحقنة
واتحركوا بيها لأوضة من الاوض
ونيموها على السرير
وهى كانت لسه بتخرف بالكلام
راحت معاها هند ومامتها
وعمرو كان معاهم
لكن سميرة لسه على الارض منهارة من العياط
اما مروة كانت مركزة فى المكان اللى امها كانت واقفة فيه
دموعها لسه بتنزل
لكن فى هدوء
واخيرا عرفت ازاى امها قدرت تتجوز واحد زى ابوها
وتخليه يبعد عن كل الناس اللى المفروض مكانش يبعد عنهم
يتبع
الفصل التاسع
الدلالة
رفيقة الشيطان
وفاة عمر قلبت الاحوال بتاعت اسرته اكتر من 360 درجة
بالنسبة لسميرة كان الوقت اصعب مما يكون
طبيعي ان ده حال الدنيا وكل يوم ناس بتتولد وناس بتموت
قضاء ربنا ولازم نرضى بيه
لكن سميرة بخسارتها لأبوها خسرت الحاجة الوحيدة اللى بتهون عليها اى كلمة وحشة بتسمعها
خسرته فى وقت هى حتى صحتها مش مساعداها انها تقدر تقف على رجليها
دخلت ناجية وعمرو معاها لأوضة فى المستشفى واخدت مهدئ علشان الحالة اللى كانت فيها
سميرة فضلت على الارض حتى مش قادرة تقوم وبرغم ان هند حاولت تساعدها لكن كل حاجة فييها كانت رافضة تخليها تقاوم ضعف حركتها
بالعكس اللى حصل لأبوها كان سبب ان حالتها تسوؤ أكتر
حركة لسانها تقلت اكتر
علاجها اللى محدش اهتم بيه هى كمان مشغلتش بالها بيه
فى الوقت ده كانت حاسة ان وجودها بعد موت ابوها مبقاش له لزوم
احساسها بالحقد ناحية امها واحساسها ان كلامها كان هو السبب فى اللى حصل لأبوها
دخل الكره جواها من ناحيتها
طول عمرها عارفة ان ناجية طبعها صعب
لكن متخيلتش فى يوم من الأيام ان صعوبة طبعها دى ممكن توصل بني ادم ايا كان هو مين
انه يحزن ويزعل للدرجة اللى بيها يخسر حياته وعمره فى لحظة
اه طبعا الموت ده حاجة لا مفر منها
لكن هى كانت سبب فى حزنه للدرجة اللى تخلى قلبه ميستحملش يقاوم اكتر من كده
استحمل منها كتير
وقبل اسلوبها سنين طويلة
استحمل سوقيتها وعجرفتها
استحمل تدني تفكيرها وهو نفسه مش قادر يقتنع هو ليه قبل كل ده وليه استحمل كل ده
يمكن فعلا حبها
يمكن بناته كان اقوى سبب يخليه مضطر يحافظ على علاقته بيها
الأتنين كانوا غير بعض تماما ومختلفين فى كل حاجة
لكن برغم عن كده كمّل معاها لحد ما حياته انتهت
وسط تفكير سميرة فى كل اللى حصل
وقهرتها على ابوها
ودعواتها لربنا انه يجمعها بيه فى نفس اللحظة
كانت مروة بتفكر فى حاجة تانية
خلاص ابوها مات
والميت مش هيرجع
وده حال الدنيا
الزعل مش بيدوم العُمر كله
والدنيا عمرها ما بتقف على حد
لكن دلوقتى امي قالت كلام غريب
كلام كبير
له معاني بعيدة لازم اعرفها
اصل امي بتقول انها مش ده اللى اتفقت عليه
بتقول انه جابته ومتفقتش انه يبعد
بتقول انها بتدفع تمن وصولها له السنين دى كلها
امي بتقول كلام يدل على ان ابويا ده مرتبطش بيها بمزاجه
معقول تكون امي عملت سحر لأبويا
اه
ليه لاء
امي اتوقع منها اي حاجة
ست قلبها ميت
مبتخافش من حاجة ولا بتخاف على حد
مبتحبش تخسر حاجة
ومينفعش تبقى عايزة حاجة ومتوصلهاش
معقول امي لها فى الاعمال والسحر
وانا عايشة زى الهبلة كده
ياااااااااه يا ماما لو طلع اللى بفكر فيه ده هو الصح
دى هتبقى الدنيا فتحتلى دراعاتها بجد
نخلص بس من الكعبلة دى
وافوق انا ليكي وللى انتى قولتيه
ماهو انا مش هعدي الكلام ده بالساهل كده
خرجت ام هند وعمرو من اوضة ناجية بعد ما اتأكدوا ان المهدئ نيمها
كانت مروة قاعدة على كرسى فى الممر ساندة رأسها على الحيطة ومغمضة عنيها
وكانت سميرة قاعدة على الارض ساكته ودموعها نازلة من سُكات وجنبها هند بتحاول تهدّيها
- لاحول ولا قوة الا بالله
- ياعيني عليكي يابنتي
- أنتي فى ايه ولا فى ايه بس
- الموضوع ده يا مرات عمي هيأثر عليها تأثير سلبي
- خليكي جنبها أنتي وهند مامتها مش حاسة بالدنيا من حواليها
- الصدمة كبيرة عليهم
اتحركت ام هند وعمرو ناحية سميرة
سندوها مع بعض وقامت من على الارض قعدوها على كرسى جنب مروة اللى كانت حابة انها متتكلمش مع حد ودماغها فى دنيا تانية
كان عمرو واقف يبص لسميرة وصعبان عليه حالها
لكن مرات عمه بكلامها شتت تفكيره شوية وغيرت ملامحه اللى كان واضح عليها التأثر بحال سميرة
- سميرة يا حبيبتى شدي حيلك ده حال الدنيا
- وبعدين انتى لازم تبقى جدعة كده علشان تسندى امك اللى مش حاسة بالدنيا من حواليها دى
- صح يا سميرة ماما عندها حق
- أنتى المفروض تبقى اقوى من كده
- وبعدين عمو عمر ده راجل طيب جدا، شوفتى ربنا رحمه من غير ما يتعب ولا يتوجع، ولا حد يضايق منه ازاى
- يعنى ربنا بيحبه والله، ودى حاجة تهوّن عليكي الزعل شوية
كانت سميرة دموعها نازلة وابتديت تحاول تتكلم بصعوبة
- مش قادرة فكرة انه مش موجود فى البيت، مش عارفة استوعبها
كانت بتتكلم ببطء ولسانها بيجمع الكلام بصعوبة
وعمرو لاحظ ده
- على فكرة يا سميرة انتى اكيد مأخدتيش العلاج بتاعك،
- وده غلط جدا
- مش عايزة علاج ولا عايزة اخف،ايه اللى هيتغير لو خفيت،بابا هيرجع تاني،أنا عايزة اروحله،أنا ماليش حد تانى من بعده.
- كده برضه يا سميرة،اخص عليكي يا حبيبتى،وبعدين ايه مالكيش حد دي؟
- وأختك مروة،ومامتك،وانا وهند صاحبتك واختك،كلنا جنبك اهو وتقولى مالكيش حد؟
- طيب يا مرات عمي انا هروح اشوف ايه الاجرأت اللى محتاجة تخلص،وكمان هشوف ايه الأدوية اللى سميرة هتحتاجها،وهبعتلكم حد من التمريض لو محتاجة حقن او محلول.
- ماشى يا حبيبى،تسلم ياعمرو تعبت معانا،طول عمرك صاحب واجب يا حبيبي.
-
- أبقوا اطمنوا بس على انسة مروة،لأنها على الوضع ده من بدرى.
- ماشى يا عمرو،روح أنت وانا هطمن على مروة،بس حاول تتصل على مي بقى علشان اتصلت بيا وسألتني عليك،وأنا مطولتش معاها علشان الوضع اللى أحنا كنا فيه فى البيت.
- خلاص يا هند،أنا هتصل بيها،متشغليش بالك انتي.
عمرو فعلا راح يخلص باقى الأجرأت،وراح اتكلم مع دكتور المخ والأعصاب علشان الوضع الصحي الخاص بسميرة،وراح الدكتور تابع سميرة وشاف اللازم وعمله،أما هند كانت جنب مروة اللى فضلت ثابته على وضعها،للدرجة اللى خليتهم يعتقدوا انها نايمة،لكن مروة كانت سامعة كل اللى بيحصل حواليها بس دماغها شغالة،ياترى عمرو ده هو الشخص اللى يستاهل اني ادور على السحر والأعمال علشان اوصله،ولا فيه حد تانى ممكن يكون أحسن منه؟
الوقت كان مش مناسب ابداً لتفكيرها ده،لكن هى مروة واخدة طبع ناجية،قلبها جامد،ومبتعرفش تزعل على حد،حتى لو الحد ده ابوها.
فات اليوم خلصت كل الاجراءات،الجنازة هتكون تاني يوم،هيصلوا عليه الظهر،ناجية فاقت من اثر المهدئات،لكن نفسيا كانت مش قادرة تستوعب ان عمر خلاص مبقاش موجود..لأول مرة بناتها يشوفوها ضعيفة بالشكل ده.
سميرة من بليل لحد الصبح اخدت اكتر من حقنة للأعصاب،اخدت ادوية ومحاليل تعّوض قلة الأكل فى الفترة اللى فاتت دى كلها.
مروة قاعدة مع ناجية فى اوضتها،وبتحاول تمسك لسانها بأى شكل فى انها تسألها عن معنى الكلام اللى كانت بتقوله،لكن هى مقتنعة ان مش ده الوقت المناسب لأى كلام.
أما هند ومامتها كانوا مع سميرة شوية،ويروحوا يطمنوا على ناجية شوية.مسابهومش لحد ما النهار طلع وهما معاهم فى المستشفى.
عمرو خلص كل حاجة كان ممكن يحتاجوله فيها،وكان لازم يرجع البيت علشان مامته واخته اللى مش مبطلين اتصالات،وبلغ مرات عمه انه هيكون موجود معاهم وقت الجنازة.
- فى ايه يا عمرو؟
- كل ده معرفش انت فين،ولا مع مين،ولا بتعمل ايه؟
- انت مالكش ام تحترمها وتقولها يومك ماشى ازاى؟
- ماما،والله انا تعبان جدا،حقك عليا بس صدقينى الوضع كان صعب جدا مكنتش فاضى خالص انى ابص على تليفوني،انا حتى لغيت كل الحالات اللى كانت عندى،وبعتهّم لكريم فى عيادته.
- يابني طيب قولى فى ايه،ابقى مطمنة عليك،مش ابقى لا عارفة اوصلك،ولا حتى هند وامها يفهمونا فى ايه.
- جارهم اتوفى،واهله ستات ومعرفوش يتصرفوا،ومرات عمى لما فكّرت فيا قالت انى ممكن ابعتلهم حد تبعي،لكن انا اللى روحت.واضطريت افضل معاهم بقى علشان كانت الست وبناتها حالتهم صعبة جدا،الام وواحدة من البنات محجوزين فى المستشفى,والراجل الله يرحمه فى التلاجة هيطلعوا بيه بكرة الصبح.
- لاحول ولا قوة ألا بالله،ربنا يصبرهم
- مين الناس دول يا عمورة؟
- هيفرق معاكي في ايه يا مي؟، ناس جيران مرات عمك، هو أنتى عارفة جيرانهم كلهم؟
- لاء مش كلهم،بس اعرف ناس فيهم يعني،اوعى تقولى ان حالة الوفاة اللى بتقول عليها دى تكون عند البت اللى كانت بتعاكسك؟
- أخوكي دكتور يا مي،يعني مش هيفرق بالنسباله مين ولا مش مين،ده شغله يا حبيبتي،وبعدين ده بيقولك حالة وفاة،مش تمثيل يعني ولا بيجيبوا رجليه مثلا علشان تضايقي.
- الله ينور عليكي يا ماما،انا هدخل اخد دش بقى واغير هدومي،وأنام ساعتين،علشان هروح المستشفى الصبح واحضر الجنازة معاهم.
- هو فى ايه يا عمرو،انت مش خلاص عملت اللى يخص شغلك،تحضر الجنازة ليه بقى؟
- أدخل يا عمرو يا حبيبي أرتاح،مي بس زعلانة على تعبك وقلة نومك لحد دلوقتى،والصبح أن شاء الله هاجي معاك اعزيهم،اه انا معرفش الست،لكن هى اتصلت بيا واعتذرتلى على اللى بنتها عملته،وكمان مروة بنتها كانت ذوق معانا.
- طول عمرك بتفهمى فى الواجب يا ماما،اتعلمي من ماما يا مي بدل ما تفكرى فى الغيرة والخوف عليا وبس،أفصلي يا حبيبتي ماشى،يلا بعد اذنكم.
دخل عمرو حضّر هدومه ودخل الحمام ياخد الدش بتاعه،لكن مي كانت متغاظة جدا ان عمرو قضى وقت طويل اوى مع الناس دى،برغم ان الوضع يقول أنهم أكيد مش فايقين لأى حاجة من اللى هى خايفة منها،ألا أن كرهها الغير مبرر لسميرة مخليها مش طايقة نفسها،ولا حتى طايقة أن اخوها يمارس واجبه المهني مع الناس دي الذات.
- مي بطّلي الجنان ده،اخوكي بيقول كان فى المستشفى معاهم،وحالة وفاة وحالتين محجوزين،يعني مفيش اى حاجة تضايقك،بلاش باللى بتعمليه دى تلفتى انتباهه لحاجة مش موجودة،وبدل ما نبقى احنا مش عايزينه ياخد باله من الناس دى،بتصرفاتك هتخليه يركز معاهم أكتر.
- بصراحة خايفة ياماما،حاسة ان عمرو هيقع مع واحدة فى البنات دى،وانا لا طايقة البت التخينة دى،ولا مرتاحة لاختها الكبيرة.
- خلينا بس نروح مع اخوكي الصبح نحضر الدفن،وبعدها نشوف في حجّة ايه تانى تخليه يتقابل معاهم،ساعتها هيلاقونى أنا اللى فى وشهم.
- ماشى يا ماما،بس خلي بالك انا مش هقبل ان واحدة منهم تاخد أخويا مني،صدقيني هوريها النجوم فى عز الضهر.
- يا هبلة اخوكي ميقدرش يزعلني،ولا هيقبل ابدا يزعلك،بس بالراحة مش بالعافية علشان أنتى عارفاه مبيحبش حد يفرض رأيه عليه،خلينا منكبرش الحكاية فى دماغه،لأني برغم انى مش طايقة البت الصغيرة،ألا ان قلقى كله من أختها.
خلص كلامهم على انهم هيروحوا مع عمرو علشان يقدموا واجب العزاء,عمرو اخد الدش بتاعه وراح فى النوم فى اقل من دقيقة من تعبه وطول اليوم اللى عاشه معاهم,سميرة نوعا ما احسن من الليلة اللى فاتت،لكن هى لسه تعبانة برضه,ناجية ومروة فى الاوضة لواحدهم
وناجية سرحانة فى دنيا تانية..
- للدرجة دى كنتى بتحبي بابا يا ماما؟
كانت ناجية سمعاها لكن ساكتة مش بترد
- طيب ليه علطول كنتى بتعملي معاه مشاكل،متخيلتيش انه يزهق ويسيبك،متوقعتيش فى يوم من الايام أن اللى احنا فيه دلوقتى ده يحصل؟
- لاء متوقعتش،مفكرتش يا مروة،فكرته هيبعد لما احب انه هيبعد،لكن كنت عارفة انى هفضل مالكاه لحد ما انا اللى ازهق،وبرضه مش الموت اللى كان فى دماغى،ولا فكرت انه يبعد عني ألا لو بس انا زهقت منه،لكن انه يموت كده بالسهولة دى،مفكرتش فيها.
- ليه فكرتي ان السحر اللى انت عملتيه هيتحكّم فى عُمره كمان؟
- اه يا مروة،كنت فاكرة ان عُمرهُ بأيدي أنا،متخيلتش أن الشخص الوحيد اللى قررت أنى اربط حياتى بحياته يكون مصيره فى ايد حد غيري..
- حد غيرك ايه يا ماما،مصيره ومصير الدنيا بحالها فى ايد ربنا،أنتى مستوعبة أنتى تفكيرك الشيطاني وصلك لأيه؟
ركّزت ناجية فى الكلام اللى بيدور بينها وبين مروة،ولاحظت ان مروة سحبتها لكلام مكانش ينفع يتقال،وعرفت ان مروة قدرت بطريقتها فى سحب الكلام توصل لحاجات امها عاشت سنين مخبياها،ومحدش يعرف عنها حاجة غير ناجية وبس،وده خلاها تبص لمروة بذهول وصدمة من الكلام اللى اتقال بينهم،فى الوقت اللى كانت مروة بتبص لأمها وهى مبتسمة وكأنها اتفتحت لها بوابة تحقيق الأمنيات،وعرفت ان أمها هتكون هى الطريق اللى يوصلها لكل اللى هتحتاجه،ومختلفش تفكير مروة الشيطاني،عن تفكير امها اللى لغى وجود قدرة ربنا ووصّلها أنها تعتقد ان حتى الأعمار فى ايديها انها تتحكّم فيها
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هنااااااااا
مجمع الروايات الكامله اضغط هناااااااا
 رواية الدلالة الفصل السابع والثامن والتاسع 7-8-9بقلم …){kind=link}
تعليقات
إرسال تعليق
فضلا اترك تعليق من هنا