رواية النصيب الفصل التاسع 9بقلم رحاب القاضي جديده وحصريه وكامله مدونة قصر الروايات

رواية النصيب الفصل التاسع 9بقلم رحاب القاضي جديده وحصريه وكامله مدونة قصر الروايات 

رواية النصيب الفصل التاسع 9بقلم رحاب القاضي جديده وحصريه وكامله مدونة قصر الروايات 

#النصيب

_الحلقه التاسعه 

ــــــــــــــــــــــــــــــــــــــــ 

_في لحظة استسلامي وجدتُكَ وكنت أنت القوه التي جعلتني أتراجع عن تلك اللحظه 

_في الوقت ده وصل أسر المستشفي وبص لشهد بقلق بسيط علي حالتها ونزل من العربيه ولاحظ نزول التلات رجاله اللي كانو معاهم في العربيه.. 

بص أسر لواحد منهم وقال

ادخل يا ابني جوه قولهم يجيبو تورلي بسرعه وقولهم أسر بيه بره يلااا.. 

_سمع الولد كلامه وبعد شويه طلعو الممرضين اللي في المستشفي ومعاهم السرير الطبي المتحرك وهو فتح باب العربيه اللي ناحية شهد وشالها وحطها علي السرير بكل هدوء وقال للدكتور اللي واقف قدامه.. 

أسر

اعملو ليها اللازم بسرعه دي حد. تبعي تمام؟.. 

الدكتور

تحت امرك يا أسر بيه.. 

_واخدو شهد ودخلو جوه وبص أسر للرجاله اللي جم معاه وقال بهدوء.. 

أسر

اطمنتو يا جماعه ولا لسه؟.. 

رد عليه واحد. منهم وقال بتوتر

لا كده تمام يا باشا ربنا يكتر من امثالك، احنا بس كنا خايفين علي البت... 

أسر بجمود

طيب اركبو اوصلكم... 

الراجل 

لا لا يا باشا كتر خيرك احنا هنروح لوحدنا.. 

أسر

قولت اطلعو يلا هوصلكم.. 

_ركبو هما العربيه اتنين ورا وواحد جنبيه من قدام، وهو قفل عليهم ابواب العربيه وابتسم بخبث وقال.. 

أسر

مستعدين يا رجاله؟.. 

_بصولو بعدم فهم وهو في لحظه ساق العربيه واتحرك بيها من قدام المستشفي بسرعه جنونيه خلت اللي معاه في العربيه يصرخو بخوف علي عكسه هو كان هادي وباااارد جداً وكان هيعمل بيهم اكتر من حادثه، وبعد اكتر من نص ساعه وقف بيهم قدام المستشفي تاني وقال بجمود.. 

أسر

ده درس بسيط عشان لو حصل واتقابلنا تاني ما تفكروش تدايقوني.. 

_ نزلو بسرعه من العربيه، وهو كمان نزل من العربيه ودخل المستشفي ولقي في بنت هناك واقفه مستنيااه ولما شافها ضحك بسخريه وقال.. 

أسر

لحق الخبر يوصلك بالسرعه دي يا هاله؟.. 

هاله بحده 

وليك عين تتكلم يا بجح، البنت اللي انت جايبها حالتها زي الزفت انت عملت فيها ايه؟.. 

أسر بجمود

اعتديت عليها مش ده اللي في دماغك وانتي عايزه تسمعيه يا اختي يا كبيره.. 

هاله بعصبيه

انت عارف الخبر ده لو طلع بره المستشفي سمعتك هيحصل فيها ايه اكتر ما هي متنيله، بقي احنا بنلم فيك وفسمعتك من ناحيه وانت تخربها من الناحيه التانيه.. 

أسر بهدوء

انتي مش جيتي وهتلمي الموضوع بطلي بقي رغي.. 

هاله بحده 

انا تعبت منك بجد تعالي معايا نروح نشوف البنت ونخلص الموضوع ده سوا.. 

أسر ببرود

لا ولو مش عاجبك امشي ومالكيش دعوه بيا ولا بحياتي انتي وجوزك.. 

_قال كلامه وطلع سجاره وولعها بكل هدوء وبعدين مشي من قدام اخته اللي بصتله بعصبيه وغضب وطلع بره المستشفي كلها، وهي مسكت موبيلها وكلمت جوزها وقالت.. 

هاله

ايوه يا فؤاد انا هروح اشوف البنت دي واسكتها والم الموضوع بقرشين.. 

فؤاد 

طيب اجيلك.. 

هاله 

لا لا الموضوع مش مستاهل، خلي بالك انت من تيام لحد ما ارجع.. 

فؤاد 

اوكي يا حبيبتي، وهو فين أسر مش معاكي.. 

هاله بدموع 

أسر زي عادته بيعمل المصيبه ويمشي عشان يخلينا احنا نصلح من ورااه.. 

فؤاد بجمود

هي البنت مالها بالظبط؟.. 

هاله بقلق

البيه بكل بجاحه اعترفلي انه اعتدي عليها، انا مش هخليهم يعملو اي تقرير في المستشفي وهحاول الم الموضوع معاها.. 

فؤاد بحده

بتقولي ايه انتي كمان هي دي مش ممكن تبقي بنت ناااس ذنبها ايه انها وقعت في ايد اخوكي المريض.. 

هاله بدموع

اعمل ايه طيب يا فؤاد اسيبه يتفضح.. 

فؤاد بجمود 

لا انتي هاتي البنت دي عندنا البيت وانا هتصرف بس اوعي تخليها تمشي.. 

هاله بقلق

حاضر يا فؤاد... سلام دلوقتي.. 

فؤاد 

ماشي وطمنيني عليكي وخلي بالك من نفسك.. 

هاله 

حاضر... 

_ وقفلت معاه وطلعت للاوضه اللي فيها شهد ولقيت الممرضه واقفه جنبيها، واول ما شافتها اتصدمت من شكل الكدمات اللي في وشها وكمان علي من شكلها الصغير جداً مقارنتاً بأخوها اللي عنده 30 سنه.. 

هاله للممرضه 

اطلعي بره.. 

الممرضه 

تحت امرك يا هانم... 

_وطلعت فعلا الممرضه وقعدت هاله جنب شهد اللي كانت بتبصلها بقلق وخوف وقالتلها بجمود.. 

هاله

تعرفي أسر منين؟.. 

شهد بهدوء

أسر مين؟.. 

هاله 

هو ما قالكيش اسمه، انتي ما تعرفيش ان اللي عمل فيكي كده يبقي أسر الفيومي اللي هو للاسف اخويا.. 

شهد 

لا بس اللي عمل فيا كده كلب.. 

هاله 

معاكي حق اللي يعمل كده في بنت يبقي كلب وستين كلب.. 

شهد 

لا هو كلب بجد اللي عمل فيا كده انا مش بشتم حد.. 

هاله بأهتمام

لا استني فهميني هو مش أسر اخويا اعتدي عليكي.. 

ردت عليها شهد بسرعه وقالت

لا والله ما حصلتش حاجه زي دي خالص، انا كنت ماشيه في الشارع ولقيت فجأه كلب بيجري عليا وعضني في دراعي.. 

ابتسمت هاله بأرتياح وقال

الف سلامه عليكي دي اكيد توتا اللي عملت فيكي كده.. 

شهد بدموع

توتا أيه بس انا مش بحب الكلاب واهو كنت هموت بسببهم.. 

هاله 

لا بعد الشر اديني طيب رقم حد من اهلك واكلمه اخليه يجي عشان تروحي معاه.. 

_بصت شهد للناحيه التانيه بدموع وحزن، وهاله سألتها بفضول وقالت.. 

هاله

هو انتي مين اللي عمل فيكي كده، ومش قصدي اتدخل في حاحه بس فضول.. 

مسحت شهد دموعها وقالت

انا مش عايزه ارجع لاهلي انا بس هخف وامشي لوحدي.. 

هاله بجديه 

يعني اهلك اللي عملو فيكي كده؟.. 

شهد ببكاء

انا مش عايزه احكي حاجه لحد، لان الناس. كلها بتحكم علي المظلوم انه غلطان ديماً.. 

هاله بتأثر

طيب اهدي لو مش عايزه تحكي خلاص، وتعالي معايا هنروح بيتي انا لحد ما تخفي وتبقي كويسه وبعدين روحي مكان ما انتي عايزه.. 

شهد بقلق

هو انتي هتاخديني معاكي من غير ما تعرفي انا مين اصلا؟.. 

هاله ابتسمت بهدوء وقالت

لا ما انا مش بخاف لان عندي عيله الجن الازرق مش هيقدر يأذيها، هخلي الممرضه تيجي تساعدك لحد ما اروح اطمن عليكي عند الدكتور.. 

_ وسابتها هاله وطلعت وشهد ابتسمت بهدوء وأرتياح لهاله اللي بتعاملها بشكل كويس... 

ـ والساعه 3 الفجر كان واقف فؤاد عند الشباك بتاع اوضته اللي في قصره الكبير وقال.. 

فؤاد 

اخوكي لسه ما جاش يا هاله؟.... 

هاله بنوم

هتلاقيه جااي دلوقتي زي كل يوم بس بلاش تتخانق معاه المره دي... 

فؤاد بضيق

يعني هو بيحس ولا بيسمع لحد، وبعدين انا برضو عايز افهم انتي كمان ازاي تجيبي البنت معاكي هنا.. 

هاله قعدت علي السرير وقالت

البنت شكلها غلبانه يا فؤاد وبعدين ما هي برضو دخلت المستشفي بسبب أسر.. 

فؤاد 

طيب ما تديهاش الامان اووي لحد ما نعرف ايه حكايتها بالظبط لتكون لعبه من بتوع اخوكي ومتفق معاها والجو ده انا ما استبعدهاش عنه.. 

_سمعو صوت عربية اسر فراح فؤاد بص من الشباك وقال.... 

فؤاد 

اهو جه خليكي هنا يا هاله انا هتكلم معاه... 

هاله بخوف 

طيب خليها الصبح عشان خاطري.. 

فؤاد بحده. 

لا دلوقتي لازم يقف عند. حده بقي.. 

_ ونزل فؤاد تحت ووقف قدام أسر اللي كان طالع وقاله بحده.. 

فؤاد 

ما لسه بدري يا بيه.. 

أسر ببرود

بدري من عمرك يا حبيبي وسع كده من قداامي.. 

فؤاد بحده 

كنت فين لحد دلوقتي، ولحد امتي هتفضل كده؟ 

أسر ببرود

انت عارف كويس انا كنت فين يا فؤاد.. 

فؤاد 

واخرتها معاك امتي هتبقي بني ادم محترم.. 

أسر بجمود

لما ترجعلي حقي اللي سرقته يا ابن عمي.. 

فؤاد 

لما تبقي بني ادم محترم وتعرف تحافظ علي حقك هبقي ارجعهولك.. 

أسر

ربنا يدينا ويديك طولت العمر بقي.. 

فؤاد بسخرية 

وانت عايز تاخد ورثك دلوقتي تعمل بيه ايه، تروح تعمل بيه سباق عربيات يا فاشل ولا تصرفه علي الاشكال الزباله اللي تعرفها.. 

تابع بخبث

ولا هتروح توديه لكارم يشغلهولك في الحرام.. 

أسر بحده

ورثي وانا حر فيه؟.. 

فؤاد 

وانا عمي الله يرحمه قال ان انا اللي ابقي متحكم في ورثك لحد ما الاقيك اتغيرت وقتها ارجعهولك.. 

أسر بحده 

ورحمة امي يا فؤاد انا اللي مصبرني عليك اختي، بس لو جيبت اخري مش هعمل حساب لحد.. 

فؤاد بهدوء

لو ما اتعدلتش يا اسر شوفلك بيت تاني اقعد فيه غير هنا وانسي انك تطول مني قرش واحد... 

_ما ردش عليه أسر وطلع اوضته وما كانش يعرف بوجود شهد عنده في البيت  اللي كانت نايمه في الاوضه اللي جنبيه بس سامعه كل الكلام اللي قالوه لبعض هو وفؤاد ومش فاهمه حاجه... 

ــــــــــ #بقلم_الكاتبه_رحاب_القاضي ــــــــ

_وتاني يوم الصبح في بيت اهل شهد كان صابر هو وفاطمه مجمعين شنطهم وحاجتهم وماشين، ودخل عندهم سعيد وقال.. 

سعيد 

علي فين يا عم صابر؟.. 

صابر بجمود

راجعين بلدنا يا ولدي.. 

سعيد

طيب وشهد انا بدور عليها و.. 

صابر بنفس طريقه

شهد بتي ماتت وانا وامها واخواتها رايحين البلد عشان ناخد عزاها.. 

سعيد بصدمه

انت بتقول ايه يا عم صابر شهد عايشه وانا هلاقيها والله وهرجعها ليا وكل حاجه هتتصلح.. 

ردت عليه فاطمه ببكاء وقالت

لازم نعمل كده يا ابني، والا الخبر هيوصل في البلد انها طفشت ووقتها العار هيطول اخواتها الصغيرين كمان.. 

صابر بغضب

ما تدورش عليها تاني عشان حتي لو لقيتها هتكون ميته وعلي ايدي انا.. 

فاطمه ببكاء

استغفر الله العظيم يااارب. يلا بينا يا اخويا... 

_ وطلعو كلهم ومشي صابر ومراته وبناته، وراح سعيد قعد في المحل بتاعه وبص للدبله اللي في ايده وقال بدموع.. 

سعيد 

انا السبب في اللي حصلك وحصل لاهلك يا شهد، انا اللي مش راجة وما عرفتش احمي مراتي من امي، بس الدنيا بتعلم برضو... 

ــــــــــ #بقلم_الكاتبه_رحاب_القاضي ــــــــ

_وفي بيت الفيومي اللي كانت بايته فيه شهد خرجت بره اوضتها وهي بتحاول تثبت حجابها علي راسها ونزلت تحت وسمعت صوت هاله في المطبخ فراحت هناك وقالت.. 

شهد 

صباح الخير.. 

ابتسمت هاله وقالت

صباح النور يا شهد، معلش خليت داده صباح تصحيكي عشان تفطري وتاخدي العلاج بتاعك زي ما الدكتور قال.. 

شهد 

لا عادي انت كنت صاحيه اصلا.. 

هاله 

طيب اقعدي يلا افطري لحد ما اروح اصحي ابني عشان عنده مدرسه.. 

شهد 

حاضر انا همشي علي طول علي فكره يعني ما تقلقيش.. 

هاله بهدوء

انا مش قلقانه يا شهد ومش هينفع تمشي من هنا غير لما تبقي كويسه ومش هقبل اي كلام في الموضوع ده، وما تقلقيش انتي مش هيبقي ليكي علاقه بالبيت خالص في بيت صغير بتاع داده صباح جنب الفيلا في الجنينه هتقعدي معاها فيه لحد. ما تبقي كويسه وتظبطي امورك... 

ابتسمت شهد بدموع وقالتلها

انا بجد مش عارفه اشكرك ازاي علي كل ده.. 

هاله بابتسامه حنونه 

ده واجب يا حبيبتي، يلا افطري وداده صباح هتديكي العلاج، وبعد ما جوزي وابني يمشو هنيجي بقي ونحمي وندردش سوا شويه.. 

شهد 

ماشي.. 

_وطلعت هاله وصباح حطت الفطار قدام شهد وقالتلها بهدوء.. 

صباح 

افطري بقي وخدي راحتك لحد ما اروح اجهز السفره بره.. 

شهد 

حاضر.. 

_ وطلعت صباح ومعاها الشغاله التانيه اللي شكلها مش مصريه، وشهد مسكت السندوتش اللي قدامها وفضلت تاكل بهدوء وبدأت تحس براحه في البيت ده علي عكس اي مكان كانت موجوده فيه، ولكن الامان دائماً مخيف لتلك الصغيره.. 

_ في الوقت ده وقع حجابها من علي راسها، فسابت السندوتش بسرعه ورفعت ايدها السليمه عشان تعدله، وفي الوقت ده جه أسر وقف وراها وهو في ايده السجاره بتاعته وبصلها بخبث ومسك الطرحه اللي في ايدها وسحبها من علي شعرها.. 

وقفت شهد بسرعه وبصتله بخوف وقالت

لو سمحت هات الطرحه.. 

ابتسم بسخريه وقال

هو انتي، انا فكرت شغاله جديده هنا.. 

وقرب منها بخبث وقال

بس شكلها هاله صدقت الكدبه اللي انا قولتلها عليها.. 

شهد بخوف وهي بترجع لورا 

لو سمحت اديني الحجاب بتاعي كده ما ينفعش.. 

_رماه أسر الارض وقرب منها جداً وبقيت محجوزه بين الحيطه وبينه، ورفع ايده اللي فيها السجاره ولمس وشها بهدوء خلاها تتنفض بخوف وقال بنبره هادئه.. 

أسر

وليه عايزه تلبسيه ما كده احلي بكتير،بس مين المتوحش اللي عمل في الوش البرئ ده كده؟.. 

نزلت دموعها وقالت بخوف 

ابعد عني يا جدع انت ابعد عنييي... 

جات في الوقت ده هاله وقالت بحده 

أسر. انت اتجننت ابعد عن البنت.. 

بعد أسر عنها وقال بخبث

هو انتي صدقتي يا هاله ان انا اللي عملت فيها كده فقولتي تجبيها البيت وتسكتيها بقرشين.. 

هاله بحده 

احترم نفسك واخرج بره يا أسر يلااا.. 

رد. عليها بحده

هو في ايه يا هاله ده بيتي وادخل في المكان اللي يعجبني.. 

وبص لشهد بخبث وقال

واعمل اللي يعجبني برضو.. 

وقفت هاله قدام شهد وقالت بعصبيه

لا يا حبيبي ده بيت جوزي وتقعد هنا بأحترامك يا أسر.. 

أسر بغيظ

ماشي يا هاله خليكي فاكره كلامك ده كويس.. 

_ قال كلامه وسابها وطلع بره المطبخ وهو متعصب جداً، واخدت هاله الحجاب بتاع شهد من علي الارض واديته ليها وقالت بأحراج.. 

هاله 

انا اسفه يا شهد هو ما كانش يقصد يعمل كده ومش هتتكرر تاني.. 

شهد بدموع 

انا عايزه امشي من هنا لو سمحتي.. 

هاله 

لا طبعا انتي تعبانه مش هقدر اخليكي تمشي بالحاله دي، اهدي وما تخافيش هو مش هيدايقك تاني... 

_حطت شهد الحجاب علي شعرها وكانت بتتنفض من الخوف وبدأت تفتكر اللي كان هيعملو فيها الراجل اللي اشتغلت عنده يوم صبحيتها هي وسعيد ودموعها زادت اكتر، جات صباح وقالت بقلق... 

صباح

مالها يا ست هانم. ما هي كانت كويسه.. 

هاله 

خليكي معاها يا صباح هي بس خافت من أسر انتي عاؤفه تصرفاته، علي فكره يا شهد أسر هو اللي انقذك امبارح ووداكي المستشفي.. 

شهد بدموع ونبره مهزوزه

لو سمحتي انا مش عايزه اقعد هنا سبيني امشي.. 

عاله بحزن علي حالتها

طيب اهدي دلوقتي وانا هخليكي تمشي، وانتي يا صباح خليكي معاها وما اسبيهاش لوحدها.. 

صباح 

من عينيا يا ست هانم.. 

_ وطلعت هاله وشهد قعدت وهي خايفه من وجود. أسر وانع ممكن يرجع ويدايقها تاني، ونظراته ليها كانت بترعبها.. 

ــــــــــ #بقلم_الكاتبه_رحاب_القاضي ــــــــ

_وبعد شويه كانت قاعده هاله بتفطر ومعاها ابنها اللي عنده عشر سنين وفؤاد. جوزها اللي قالها بضيق.. 

فؤاد

بلاش الطيبه الزياده دي يا هاله، وبصراحه برضو البنت دي وجودها مع اخوكي في بيت واحد خطر وانتي عارفه اخلاقه كويس.. 

هاله 

البنت صغيره يا فؤاد وشكلها مالهاش حد وانا ضميري مش هيسمحلي اسيبها، يا حبيبي ربنا بيكرمنا لما نكرم المحتاج وما حدش ضامن الدنيا ممكن توصلنا لايه.. 

فؤاد 

طيب خليها تحت عينك لحد ما اسأل عليها كويس وابقي ابعتيلي اسمها علي الوتساب كامل.. 

هاله 

اوكي يا حبيبي.. 

وقالت لابنها بحده 

وانت يا حبيبي كل كويس ما تبهدلش الدنيا كده انت مش صغير.. 

جه في الوقت ده أسر وقعد معاهم وقال

ما تسيبي الواد براحته، حتي العيل الصغير هتتحكمو فيه.. 

فؤاد بجمود

امه بتربيه عشان ما يبقاش سايب وما حدش قادر عليه لما يكبر.. 

رد عليه أسر بخبث وقال

ما هو لو كنت لقيت فيها حد معدول كنت بقيت زيه.. 

هاله بحده 

بس انت وهو مش قدام الولد.. 

تيام ببرود 

عادي هعمل نفسي مش سامع.. 

ضحك أسر وهاله قالت بغيظ

عجبكم كده.. 

أسر بجمود

انا اصلاً ماشي بس عايز فلوس.. 

رد عليه فؤاد وهو بياكل وقال

مصرفك موجود فر حسابك في البنك من يومين.. 

أسر

خلص وانا مش باخد مصروف منك ده حقي.. 

فؤاد بحده 

خلصت مبلغ زي ده في يومين، وخلصته في ايه حضرتك؟.. 

أسر ببرود. 

مع ان ما لكش حق تحاسبني بس هقولك انا غيرت عربيتي، ودخلت سباق جديد وخسرته لمزاجي عشان اخسر الفلوس فيه واجي اخد غيرها منك.. 

هاله بحده 

انت قليل الادب.. 

فؤاد بهدوء

سبيه براحته يا هاله، بس والله ما هياخد قرش باقي الشهر مني ولو عايز فلوس بنزل الشغل معايا.. 

اسر بعصبيه 

هو انا بشحت منك دي فلوس ابويا وانا حر فيها.. 

فؤاد بحده اكبر

اثبت انها فلوس ابوك، كل حاجه بأسمي يا أسر واللي اقوله انا هو اللي هيمشي واللي عندك اعمله.. 

_‌قام أسر وميك الكرسي اللي قااعد عليه وحدفه علي الشباك القزاز الكبير اللي كان ورا فؤاد اللي قام وزعق فيه وقال.. 

فؤاد 

انت اتجننت ايه اللي عملته ده؟... 

أسر 

ده اللي عندي يا ابن عمي... 

_ قال كلامه ومشي وهاله كانت حاضنه ابنها اللي خاف من اللي عملو أسر وفضل يعيط، وبصلها فؤاد بعصبيه وقال.. 

فؤاد 

هو ده اللي انتي خايفه علي زعله، اخوكي مش بيجي بالكلام يا هاله.. 

هاله بدموع 

طيب انا اعمل ايه يا فؤاد انا تعبت والله.. 

اتنهد بهدوء وقرب منها وباسها علي راسها وقال

هتتحل ان شاء الله، يلا يا تياام عشان اوصلك المدرسه.. 

هاله بحزن 

حقك عليا يا فؤاد انا اسفه.. 

فؤاد 

بتتأسفي علي ايه يا عبيطه ده اخويا قبل ما يبقي اخوكي مش ابن عمي وبس وانا نفسي طويل اووي معاه لحد. ما يتغير.. 

مسحت دموعها وردت عليه وقالت

ربنا يخليك ليا يا فؤاد وما يحرمنيش منك ابداً.. 

_ واخد فؤاد ابنه ومشي، وبعد شويه كان في حد بيصلح الشباك اللي اتكسر وشهد قااعده مع هاله في الجنينه وجات صباح حطت قدامهم صنية عليها شاي ولبن وقالت لشهد بهدوء.. 

صباح 

عملتك لبن مش شاي يا شهد عشان شكلك ضعيف اووي.. 

شهد بهدوء

شكراً تعبتك معلش.. 

صباح 

تعبك راحه يا بنتي، تؤمريني بحاجه يا هاله هانم.. 

هاله بهدوء

شكراً يا داده.. 

مشيت صباح وهاله قالت بدموع لشهد

بقيت محتاره بقي بين الاتنين اسر لما عرف ان بابا كتب كل الثروه بتاعته لفؤاد طلب مني اطلق منه ونتهمه بالتزوير، طبعا انا كنت عارفه ان بابا عمل كده ومستحيل اوافق وقتها أسر حطني انا وفؤاد في كفه واحده وكأننا اعدائه مش اهله اللي بنحبه وبنخاف عليه اكتر من اي حد.. 

شهد بهدوء

طيب ما ياخد ورثه وخلاص يعني هو كبير واكيد عارف هو بيعمل ايه... 

هاله 

لا طبعاً انتي ما تعرفيش حاجه يا شهد، زمان لما كان عنده 17 سنه بابا الله يرحمه قرر انه يخليه يسافر  يكمل تعليم في امريكا، أسر رفض لانه. كان متعلق بماما وبينا وبفؤاد وصحابه اووي، بس بابا صمم وخلاه سافر غصب عنه والمفروض انه مان ينزل كل سنه يقعد معانا شهر ويمشي، بس أسر وقتها رفض ينزل خالص عندنا ده غير ان بعد ما اتخرط من الجامعه بالعافيه رفض برضو يرجع وبقينا نسمع عنه انه بيشارك في سباق عربيات غير شرعي بيبقي حاجه خطيره اووي وبيعمل كل حاجه حرام ممكن تخطر علي بالك وبيقول انه عايش سنه وعايش حياته ومش عايز يتقيد بحاجه.. 

شهد بأهتمام

طيب وباباكي ازاي سكتله يعني ما رجعوش غصب عنه ليه؟.. 

هاله 

ما هو ده اللي عملو بابا خلاه يرجع غصب عنه، ورجوعه كان سبب في كارثه لانه عرف واحد شغال في حاجات ممنوعه واتفق معاه يعملو السباق ده في مصر وعملوه فعلا وكل فتره بيعملو وبيخسر فيه فلوس كتير ده غير الحوادث اللي بتحصل بسببه وكمان الشرطه لو مسكته هناك في مره ما حدش هيقدر يعمله حاجه، واللي خلي بابا اصلا يرجعه من امريكا انه عمل حادثه خطيره وهو في السباق الزفت ده مره، وفضل يتعالج من الحادثه دي سنتين.. 

شهد بضيق. 

مش عارفه اقولك ايه بجد بس هو طريقته اللي شوفتها من شويه مع جوزك ما تقولش انه ممكن يرجع عن اللي بيعملو ده.. 

هاله بدموع 

ربنا قادر علي كل شئ، بابا كان ديماً بيقول مدام القلب طيب مهما اتملي سواد هينضف الطيبه هي عمار القلوب يا شهد وأسر طيب اووي والله بس طايش وواخد الدنيا عافيه،وانا نفسي وبتمني يجي اليوم اللي اشوفه راجل بجد متجوز وعنده عيله وماسك شغل بابا ويبقي مكانه.. 

ابتسمت شهد وردت عليها 

ان شاء الله ربنا يحققلك اللي في بالك، انتي طيبه وتستاهلي كل خير.. 

هاله 

قوليلي بقي ايه حكايتك ومين اللي عمل فيكي كده وليه مش عايزه تروحي لاهلك.. 

شهد بضيق 

هو انا كده كده همشي فمش هخاف من حاحه وانا بحكيلك حكايتي.. 

هاله 

انتي ليه بتقولي كده؟.. 

شهد بدموع

لان اول ناس قررو يساعدوني ندمو وطردوني من عندهم في الاخر لما عرفو حكايتي.. 

هاله بقلق وفضول 

اتكلمي يا شهد انا سمعاكي... 

_تفتكرو بقي هاله هتعمل ايه لما تعرف حكاية شهد، وأسر  هيسيب شهد في حالها ولا النصيب هيكون هو؟.. 

تكملة الرواية من هناااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله اضغط هنااااااا