رواية روحى تعاني الجزء الثالث الفصل الحادي عشر والثاني عشر والثالث عشر والرابع عشر والخامس عشر بقلم إيه شاكر

رواية روحى تعاني الجزء الثالث الفصل الحادي عشر والثاني عشر والثالث عشر والرابع عشر والخامس عشر بقلم إيه شاكر 

رواية روحى تعاني الجزء الثالث الفصل الحادي عشر والثاني عشر والثالث عشر والرابع عشر والخامس عشر بقلم إيه شاكر 

(١١)

-أنا أتمنى اسم زوجتي يكون معناه أي حاجه بتنور يعني مثلًا شمس أو قمر أو نور أو... أي حاجه بقا...

قالي حاتم بمكر:

-فعلًا! حاجه بتنور عشان تنور حياتك!

ضحكوا كلهم فرفع حاتم ايده وهو ماسك الدبله، وقال:

-مش ضايع منك حاجه يا كريم؟

ولما حاولت أخدها من ايده، قام حاتم وقف وهو بيبص للدبله وبيتأملها وقال:

-مكتوب عليها حرفين! حرف k يعني كريم وحرف الـ...

🌸🌸🌸🌸🌸

الحلقه (١١)

#روحي_تعاني٣

بقلم آيه شاكر 

🌸🌸🌸🌸🌸

مش عارف نطيت إزاي وحطيت إيدي على بوقه فكلهم ضحكوا، أخدت الدبله من ايده وقلت بارتباك:

-الـ... الحروف دي صدفه...

لبست الدبله مره تانيه فقال حاتم بضحك:

-يا سلام على الصدف!

كانوا بيضحكوا لكني كنت ببدل نظري بينهم بتوتر، خايف يكون حد فيهم لاحظ حاجه!

أنقذني من الموقف ده سمر ونسمه لما ألقوا السلام وسلموا على والدتي وأخدوا أخويا الصغير عشان يلعب مع عيالهم وكمان أخدوا نجمه معاهم، فقالت شروق:

-هما مين دول!؟

-دول اخواتي يا شروق بنات بابا رضوان!

قلتها وأنا بقعد، هزت شروق راسها باقتناع وقالت بسماجه:

-اهااا جوز أمك! حـــلـــويــن أكيد بقا شبه مامتهم لأنهم مش شبه باباهم خالص...

بصتلها والدتي بضيق، وديرت وشها للناحية التانيه وقالت بهمس سمعته:

-يخربيت غلاستك يا شيخه!

طبطبت على ايد والدتي وأنا ضاغط على شفايفي عشان أمنع ابتسامتي...

وقف حازم فجأة فقالت والدته:

-رايح فين مش هتتعشى؟ 

قال بجمود:

-لأ مليش نفس هروح أعمل مكالمه وآجي...

قامت أسماء وراه فقالها:

-خليكِ إنتِ اتعشي آ... أنا مش هغيب...

مش عارف ليه كنت بحس من نظرات حازم إنه مش ملهوف على مراته بمعنى مش نظرات واحد راضي بزوجته وبيحبها! لكني كنت بكذب احساسي ده وأقول وأنا مالي!

بعد لحظات من الصمت قالتلي عمتي دلال بهمس:

-أي حاجه بتنور! يعني ممكن نجمه برده صح؟

بصيت لها بصدمة فابتسمت وغمزتلي، اتوترت وظهر عليا جدًا إنها صح! قمت وسيبتهم كنت بدور على ياسر فلقيته قاعد مع ياسين وهيثم، سحبت كرسي وقعدت جنبهم وأنا بلقي السلام، قلت:

-القعده مع عيلة أبويا مش لذيذة... ممكن أقعد معاكم؟

-بتستأذن بعد ما قعدت!

قالها ياسين وهو بيضغط على أسنانه، فبصتله وأنا بسأل نفسي مش عارف البني آدم ده مش بيحبني ليه! صحيح كنت عريس لمراته زمان لكن زمان وهو اللي اتجوزها! دا غير إنه كان غصـ ـب عني!

-دا العريس مش هنا خالص!

انتبهت على صوت هيثم لما قال كده، فقلت بعدم فهم:

-عريس مين!

قال ياسر بابتسامة:

-إنت العريس... ما احنا كنا بندورلك على عروسه دلوقتي! هتفضل من غير جواز لحد امته؟!

سندت ظهري للكرسي وقلت:

-والله يا جماعه نفسي أتجوز بس خايف أترفض!

رد ياسر بذهول:

-تترفض! هو حد عاقل يرفض عريس لُقطه زيك طيب بس شاور على أي واحده في الشركه وأنا أجوزهالك الصبح.

اتعدلت في قعدتي وقلت:

-لا ما أنا عايز واحده بعينها يعني قلبي مسكون.

اتعدل ياسين في قعدته وقال وهو مبرق عنيه:

-مسكون! مسكون ايه بالظبط إنس ولا جن!

قال هيثم بضحك:

-جن إيه يا ياسين هو فيلم الرعب لسه مأثر عليك ولا ايه!

حرك ياسين ايده وهو بيقول بزهق:

-اسكت متفكرنيش دي أول وأخر مره أسمع أفلام رعب في حياتي أصلًا! تخيل امبارح بالليل أقولهم عايز حاجه تفرفشني يسمعوني رعب!

ياسين كان بيكلمني من أول ما قعدت، فضحكت حسيت إنه فيه أمل يستلطفني ويفك معايا! في حين غمزلي ياسر وقال:

-المهم ها قلبك مسكون بمين؟

بصيت على التربيزه اللي قدامنا بس بعيد شويه كانت نجمه قاعده مع سمر والبنات...

نزلت عيني وسكتت للحظه وأنا مبتسم وبلمس الدبله ورجعت وهما مركزين معايا، بصيتلهم وقلت:

-ارتحتلكوا وهحكيلكوا...

بصيت لـ ياسين وبدلت نظري بينهم وأنا بقول بهمس واحد بيتفق على خطة سرقه:

-أنا معجب ببنت من زمان أوي... بس هي كانت صغيره عشان كده كنت مستني الوقت المناسب عشان أتقدملها!

قال ياسين بنفس الهمس:

-أيوه... وإنت بتتكلم بصوت واطي ليه!

بصيت حوليا بنظرات حرامي بيراقب وجود الشرطة وقلت بنفس الهمس:

-متراقب...

ضحكوا على حركاتي وسألني هيثم بنفس الهمس:

-وبعدين يا عريس كمل...

بصيت للأرض وأنا بتخيل شكلها وقلت بابتسامة وبصوت واطي:

-هي أحلى حاجه في حياتي... صوتها حلو أوي وضحكتها بتخطف قلبي خصوصًا لما عينيها تقفل شويه كده و...

قال ياسين وهو بيضـ ـربني على رجلي:

-إيه يا عم رايح فين!! إنت واعي للي بتقوله!

 ضحكوا فمسحت وشي بحرج وقلت:

-لأ مؤاخذه اندمجت...

قال هيثم:

-طيب وهي! أصل البنت بتحس بالشخص اللي معجب بيها مراتي دايمًا تقولي كده...

قلت بعد تنهيدة:

-مش عارف! ساعات بحس إنها بتعتبرني زي أخوها وساعات بحس بغير كده!

قال ياسين:

-يبقا لازم تتقدملها عشان لو رفضتك متعلقش قلبك بيها أكتر من كده! الموضوع ده صعب أوي...

ضحك ياسر وهو بيشاور على ياسين وبيقول:

-واسأل مجرب...

ضحكوا وضحكت أنا كمان وبعدين قلت بتأثر:

-مجرد تخيل إنها ممكن ترفضني بحس إن قلبي هيقف!

رد هيثم:

-لأ سلامة قلبك يا غالي... دا احنا هندعيلك ليلًا ونهارًا... ولا ايه يا رجاله؟!

هزوا رأسهم بتأيد، فقلت:

-أيوه ادعولي ينوبكم ثواب... إلهي تنستروا دنيا وأخره...

ضحكوا كلهم وشاركتهم الضحك...

صلوا على خير الأنام ♥️ 

بقلم آيه شاكر 

                  ★★★★★

             «حازم»

كل واحد ليه حكايه وكل بيت وراه رواية، وأنا كتبت نهاية حكايتي لما اتجوزت! مش الجواز برده هو النهاية؟!

لو كنت أعرف إن «نجمه» طالعه الرحله دي مكنتش جيت! حاولت أغض بصري عنها، حاولت مفكرش فيها لكن لا إرادي بلاقي إني بتصرف تصرفات طايـ ـشه! عشان ألفت نظرها مش عارف ليه! أنا متضايق من نفسي أوي وحاسس إني بخـ ـون مراتي!

مراتي اللي مش عارف أحبها رغم إنها بتعمل كل حاجه عشان تسعدني، مر على جوازنا ما يقرُب من شهر وهي بتحاول توصل لقلبي...

أنا متأكد إنها حاسه ببعدي عنها رغم قربنا لكن مش بتشتكي ولا بتتكلم بحاول مبصش ناحية نجمه طول ما أسماء جنبي لأنها بتراقبني حاسس إنها بدأت تشك فيا!! 

بصيت للسما لشكل النجوم، وحاوطت وشي بإيدي وأنا بقول:

-يارب...

افتكرت كريم اللي واضح من نظراته لنجمه إنه بيحبها! أنا فاهم قصده من إن اسم مراته يكون أي حاجه بتنور! 

أنا ليه مش قادر أتقبل إنها تتجوز أصلًا لا من كريم ولا من غيره! رغم إن أنا اتجوزت!!

نفخت بضيق وحاوطت راسي بإيدي، وقلت:

-آه على الحيره اللي أنا فيها... إيــــه مش عارف أسيطر على قلبي؟

-حـــــازم!

التفتت على صوت «شروق» اللي وقفت جنبي، قالت:

-إنت لسه بتفكر فيها صح؟

-بفكر في مين؟!

قلتها بسخرية فقالت:

-أنا عارفه إنها بتحاول تشد انتباهك وكده بس والله يا حازم أسماء مراتك دي ضفرها برقبة نجمه.

ضحكت وقلت باستخفاف:

-ايه اللي بتقوليه ده! أفكر في مين! نجمه دي حتة عيله لا راحت ولا جت...

قالت بمكر:

-عليا أنا الكلام ده!

-كلام ايه! إنتِ شكلك كده بتسمعي أفلام هندي كتير!

ضحكت وقالت:

-من ناحية بسمع فأنا بسمع... وعشان كده فهماك...

-فهماني! وفاهمه ايه بقا ياختي!

قلتها بسخرية، فقالت بنفس النبرة:

-إنك بتحب نجمه من زمان وهي اللي بتحاول تلفت نظرك ليها... ولسه لحد دلوقتي بتحاول... عشان كده لازم تخلي بالك من كيد البنت دي... دي مش بعيد تعملك عمل عشان ترجعلها!

عقدت ذراعي قدام صدري وقلت بضحكه ساخرة:

-يا شيخه!!! بس يا حبيبتي بلاش أوهام...

بصيت لها للحظة وقلت:

-وبقولك ايه يا شروق طلعي نجمه من دماغك وبطلي غيره منها! أنا لولا إني حافظك وعارفك كويس كنت قلت إنك إنتِ اللي نشرتِ صور عنها!!

-إيه اللي بتقوله ده وأنا هغير منها ليه أصلًا!!

-شروق! أنا فهمت كل حاجه وعرفت إن الكلام اللي قولتيه عنها محصلش! فاسكتي أحسن!

قالت بانفعال:

-إنت بتكذبني يا حازم!؟ أنا مش عارفه مين اللي قالك إني كذابه! لكني متاكده من كل كلمه قولتها عنها إنت بقا مش مصدق فأنت حر! 

-كفايه بقا يا شيخه...

قولتها بضيق وهزيت راسي باستنكار وسيبتها ومشيت وأنا بفكر في كلامها، كنت محتار ومتلغبط! تسائلت ليه الإنسان بيسيب اللي ماسك في إيده ويبص على اللي مستحيل يلمسه!

زي ما أنا سايب مراتي وبفكر في واحده تانيه من غير أي وجه حق!!

استغفروا الله ❤️

                         ★★★★★

                          «نجمه»

حسيت إن ربنا بعتلي صُحبه في الوقت المناسب، قلت في نفسي ما الدنيا فيها ناس بتعبد ربنا أهوه وبيراعوا الحلال والحرام أومال عيلتي مفهماني إن الالتزام ده مش موجود إلا في الروايات الدينيه ليه!

-أنا سعيده أوي إني اتعرفت عليكم... أنا مليش أصحاب وهكون في غاية السعاده لو كنتوا أصحابي.

قلتها بسعاده فمدت همسه ايدها وقالت:

-أهلًا بيكِ في الشلة.... جروب «م» سمر ونسمه ونجمه وهمسه...

قالت اسمها وهي بتشاور على نفسها وماده ايديها فسلمت عليها وسلموا عليا بمرح، حبيت أوي روحهم الحلوه، وابتسامة كل واحده فيهم وهي بتحكي عن حياتها وعن الصعوبات اللي واجهتها وازاي ربنا أنقذهم وازاي بيتوكلوا على الله في كل خطوة، كانوا بيتكلموا عن ربنا بحب كبير، حب مالي قلوبهم وفاض لحد ما انتقل ليا...

وفي الوقت ده رن موبايل همسه بأنشودة:

-أحبك يا الله في الفقر والغنى أحبك يا الله في اليسر والعسر، أحبك في دقات قلبي وأنسه فحبك زاد الروح في سائر العمر. 

قامت ردت عليه ولما رجعت قلتلها:

-ممكن تبعتيلي الأنشوده دي؟

ابتسمت لثانيه وقالت بمرح:

-ممكن بشرط واحد!

ابتسموا كلهم وهما بيبصوا لبعض بتفهم وابتسامة وكأنهم بيفهموا بعض من نظرة، ولما سألتها عن الشرط قالت:

-تنشديهالنا في الشات اللي هندخلك فيه ان شاء الله... سمر قالت إن صوتك حلو وإحنا قررنا نستغلك يا شابه...

قالت أخر جمله وهي مبرقه عينيها وبنبرة إجـ ـرامية، فضحكت وقلت وأنا بحرك صوباعي بمرح:

-بس افتكروا إن انتوا اللي طلبتوا.

استأذنوا عشان يروحوا لأزواجهم، فقمت أنا كمان عشان أروح لخالتي هو أنا ليا غيرها!

في الليلة دي كنت حاسه بأُنس وراحه وسكينه، فعلًا الصُحبه الصالحة تُصلحك من غير ما تحس، دخلت اتوضيت عشان أصلي لأن كلامهم عن حب الله حسسني إني بحب ربنا أوي وإن ربنا كمان بيحبني! أنا واثقه إنه بيحبني...

خلصت صلاة وخرجت البلكونه اقرأ الورد بتاعي وسط نظرات شروق وأمينه وخالتي...

ومر يوم ورا التاني وراه التالت وأنا بقعد معظم الوقت مع أصدقائي الجداد، ومستمتعه بالأجازة برفقتهم...

تجاهلت حازم تمامًا حتى لما كانوا يقعدوا يلعبوا مكنتش بقعد معاهم عشان بيبقى موجود وحسيت إنه تجاهلني هو كمان حتى مبقاش يلقي عليا السلام!

كنت كل ما أشوف كريم  يبقى قاعد مع زوج سمر «ياسين»...

وفي اليوم الرابع كنت داخله المطعم عشان أتعشى كنت ماشيه لوحدي وحازم وأسماء كانوا قاعدين على ترابيزه مع أمه وخالي، وباقي العيله على ترابيزه تانيه....

رفعت راسي لفوق عشان أتجاهل حازم وأعدي من عليه كأني مش شيفاهم لكن يشاء الله إني اتكعبل في طرف الإدناء وأقع على حازم، اتنفضت واتعدلت بسرعه واعتذرت وأنا ببص لأسماء:

-والله العظيم أسفه... أسفه والله... أسفه... أسفه جدًا... 

قال حازم وهو بيبص للأرض: 

-حصل خير يا نجمه...

سيبتهم وروحت ناحية الترابيزه اللي عليها باقي العيله وأنا في قمة إحراجي، ضحكت شروق وهي بتقول بسخرية:

-حركات قرعه! 

بصيت لشروق وقلت:

-تقصدي ايه يا شروق!

تنهدت وقالت بفظاظة:

-ولا حاجه!

قالت خالتي دلال لشروق بغيظ:

-يا شروق... حاسبي على كلامك مفهوم؟!

قالت شروق بسخرية:

-أنا مقولتش حاجه!! والله بقا اللي على رأسه بطحه يحسس عليها!

حسيت أعصابي بتترعش، وتلقائي بصيت لكريم اللي كان باصص للأرض وساكت ووشه معلهوش أي تعبير!

تجاهلوا الحوار لما الأكل اتحط ورغم إني مكنتش اتغديت إلا إن نفسي اتسدت وحاولت أكل معرفتش، كنت بتخيل نفسي برد على شروق وأقولها كفايه بقا! وأفهمها إني مكنش قصدي! حسيت إن العيله كلها بتبصلي بشك فقومت ومشيت وأنا ماسكه دموعي وبقول لنفسي ياريتني ما جيت الرحله دي!

سمعت خالتي دلال بتقول لشروق:

-عاجبك كده!!

وقامت ورايا تنادي عليا، عديت من على تربيزة حازم وأنا عيني في الأرض لكنه كان متابعني بطرف عينه، صعبت عليا نفسي أوي، وزاد الأمر سوء لما اتكعبلت مره تانيه في طرف الإدناء ووقعت على كرسي بس الحمد لله كان فاضي وإلا كان هيبقى شكلي ايه لو وقعت على حد تاني! 

ودي أخرة اللي يلبس حاجه طويله مش على مقاسه!

*******

ضحكت شروق وقالت بسخرية:

-نجمه دي لخمه أوي!

قام كريم وكان متغاظ من شروق فقالت والدته «فريال»:

-لحقت تاكل يا كريم؟!

-الحمد لله شبعت...

قالها ووقف للحظه يبص في المطعم ولما شاف ياسين شاورله فهز  ياسين رأسه بتفهم وشال ابنه الصغير من سمر وقال:

-اتعشي بقا وابقي اطلعي نامي أنا هاخد بالي من الكائن ده لحد ما ينام...

بصتله سمر وقالت بابتسامة:

-تشكرات كتيرات...

ولما مشي قال ياسر:

-جوزك اتصاحب على كريم يا سمر... اللي يشوفهم زمان يقول مستحيل يتلموا على بعض...

-أقدار بقا يا جوز أختي...

قالتها سمر وهي بتاكل...

فقال ياسر:

-طيب هسيبكم بقا أنا كمان وأروح لهيثم...

ولما مشي بصت سمر لنسمه اللي متابعه وساكته وباين عليها الزعل وقالت:

-مالك؟ إنتِ متخانقه معاه ولا ايه؟!

-لأ هو أنا وش خناق... أنا بس قلبي وجعني لما نجمه وقعت مرتين...

-يا حبيبتي دا باين عليها انها اتحرجت خالص...

                ★★★★★

                  «دلال»

أنا خالة نجمه وصاحبتها والسبب في وجه قلبها! 

كل ما أبصلها بحس بتأنيب ضمير، أنا السبب الأول إن نجمه تتعلق بحازم، وإن حازم كمان يتعلق بيها! مكنتش عارفه إني بغلط لما أروح أتكلم مع حازم عنها وألمحله بحبها ليه وأرجع أتكلم مع نجمه وأقولها إنه بيحبها!

بالرغم من إني ملسوعه من كأس الحب والمفروض ابعد عنه! إلا إني روحت شربتهم من نفس الكاس...

أنا معترفه بغلطتي ومعترفه إني كان لازم أتحكم في أفعالي!

قررت إن أول حاجه أعملها بعد ما أرجع من الأجازه إني هروح لدكتوره نفسيه لأني محتاجه أتكلم! ومحتاجه أفهم نفسي وأسيطر عليها، أنا عامله زي اللي جواه نار ومش عارف يتحكم فيها بل بيحـ ـرق اللي يقرب منه، ومياخدش باله إلا لما يشوفه متشـ ـوه من النار دي!

سهرنا كتير ونجمه متكلمتش معانا وتجاهلتنا، صلت ومسكت مصحفها في البلكونه...

بصت شروق لأمينه وقالت بسخرية:

-هي كانت بتصلي ايه دي!

قالت أمينه:

-دي صلاة القيام! يا بختها والله... أنا لاحظت إنها بتصلي ركعتين بعد العشاء وركعتين قبل الفجر مع الوتر ربنا يثبتها ويهدينا...

-يهديكِ لوحدك ياختي أنا الحمد لله ربنا هاديني!

قالتها شروق بحقد ظاهر، لأنها مبتقدرش تسيطر على غيرتها من نجمه حتى في أمور الدين! كانت بتبص لنجمه بضيق وهي بترتل القرآن بصوت عذب لكن خافت، قالت بسخرية:

-بتقرأ في البلكونه عشان الناس تسمع صوتها اللي فاكراه حلو!

قلت بنرڤزة:

-ايــــه يــــا شـــــروق مـــالـــك كده مـــش طــايـــقــه نجمه وبتلقحي عليها بالكلام! هي عملتلك إيه!

-ليه بتقولي كده يا عمتو! وأنا بيني وبينها ايه يعني! أنا بس مش بحب تصرفات النفاق دي! انتوا فاكرينها بتصلي حُبًا في الصلاة! دي عايزه تورينا إنها بتصلي!

قالت أمينه:

-حرام تقولي كده هو إنتِ كنتِ دخلتِ قلبها وشوفتي نيتها!

رن موبايل أمينه برقم خطيبها فقامت وسابتنا، بصيت لشروق بعمق وقلت:

-بطلي غيره شويه... يا بت إنتِ جايبه الغل ده منين دا إنتِ أمك وأبوكي ناس طيبه! وأخوكي كمان!

ضحكت شروق وهي بتقول بسخرية:

-غل وغيره مره واحده! ومن مين؟ نجمه!!

-هو إنتِ فاكراني نايمه على وداني! ومش واخده بالي إن إنتِ السبب في بُعد حازم عنها...

اتعدلت شروق في قعدتها وقالت بضيق:

-على فكره بقا هي متستاهلش حازم إنتِ نسيتِ اللي عملته! دي كانت مصاحبه ميسره!!

-اه فعلًا كانت مصاحبه ميسره! لكن كانت بتعتبره أخوها الدور والباقي على اللي كانت بتبعتله كلام حب! وبتحاول تبعده عن نجمه بأي شكل!

بلعت شروق ريقها بارتباك وقالت:

-تـ... تقصدي ايه!!!

وقفت وقلت بجمود:

-أقصد اللي فهمتيه يا شروق...

تنهدت بعمق وأنا ببص على شروق المرتبكه، وقومت دخلت البلكونه عند نجمه عشان أسمعها وهي بتقرأ...

كنت مبتسمه وأنا بسمع صوتها لحد ما قفلت نجمه المصحف بعد ما خلصت الورد بتاعها واتنفست بارتياح وابتسمت، فقلتلها:

-ايه سر الابتسامه الحلوه دي؟

-مش عارفه بس حاسه براحه وآمان... وكنت حاسه إن كل كلمه بقرأها فهماها وداخله قلبي... والشعور ده كنت مفتقداه من زمان أوي... حاسه إن القرآن بيغسل قلبي...

-ربنا يريح قلبك يا أغلى نجمه في حياتي...

ابتسمت نجمه وقالت: 

-إنتِ اللي أغلى حاجه عندي يا خالتو... 

مسكت إيد نجمه وبوستها فتفاجئت وقالت بضحك:

-ايه يا خالتو هو إنتِ غلطانه فيا ولا حاجه!

-دي محبه يا قلب خالتك من جوه...

قامت نجمه حضنتني وقالت:

-طيب يلا بقا ننام! وبكره ان شاء الله فكريني أعرفك على أصحابي الجداد.

-حاضر هفكرك ما أنا عارفه انك بتنسي بسبب شركاتك الكتير ومشاغلك!

ضحكت نجمه وقالت:

-طبعًا شركات بابي بقا! بمناسبة الشركات وكده تعرفي إن كريم اشتغل في شركه!

-أيوه حكالي! بتاعت جوز... بنت... جوز مامته... نسمه...

قلتها بتركيز فضحكنا وحاولت متكلمش عن كريم خالص مش هغلط نفس الغلط تاني! فغيرت الموضوع وبعد ثواني دخلنا من البلكونه...

ولما بصينا لشروق اللي كانت قاعده على سريرها وكان باين عليها العياط، قلت بشوية استخفاف:

-إنتِ كويسه يا شروق!!

مردتش عليا ومن طيبة نجمه قربت منها ولمست  كتفها وهي بتقول بحنان:

-مالك يا شروق؟!

في البدايه مردتش شروق عليها، وعيطت بصوت عالي، فطبطبت نجمه عليها وهي بتسألها مالها؟ فزقتها شروق بعصبيه وهي بتقول بصوت عالي:

-ملكيش دعوه بيــــــا...

وقعت نجمه على الأرض قاعده لكن اصطدمت بضهرها في التربيزه اللي كان عليها مزهريه إزاز فوقعت على دماغها، وصرخت نجمه بألم...

جرينا عليها كلنا بخضه والد***م بدأ يسيل من دماغها اللي اتجرح، قالت شروق بخوف ودموعها بتنزل:

-أنا مكنش قصدي والله! مكنش قصدي...

متنسوش التفاعل❤️ ولو أمكن كومنت برأيكم وتوقعاتكم😍

محدش يشتم أي حد من الأبطال لأن اللي بتشتموهم متابعين التعليقات وطلبوا مني أوقف القصه..

(١٢)

-ملكيش دعوه بيــــــا...

وقعت نجمه على الأرض قاعده لكن اصطدمت بضهرها في التربيزه اللي كان عليها مزهريه إزاز فوقعت على دماغها وصرخت نجمه بألم...

جرينا عليها كلنا بخضه والد***م بدأ يسيل من دماغها اللي اتجرح، قالت شروق بخوف وعياط:

-أنا مكنش قصدي والله! مكنش قصدي...

🌸🌸🌸🌸🌸

(١٢)

#روحي_تعاني٣

بقلم آيه شاكر 

🌸🌸🌸🌸🌸

جيبت مناديل وحاولت أكتملها الجـ ـرح وإيدي بتترعش لأني بخاف من شكل الد**م! ونجمه حطت ايديها على رأسها ولما شافت الدم انهـ ـارت بالعياط، وأمينه خرجت جري تنادي حد من بره...

                        ★★★★★

                          «كريم»

بيقولوا الطيور على أشكالها تقع وأخيرًا وبعد طول انتظار وقعت على اللي شبهي...

كلهم كانوا دخلوا يناموا إلا أنا وياسين اللي شايل ابنه الصغير، كنت بتكلم معاه بالألغاز لأني كنت متضايق من شروق وزعلان على نجمه ومن نجمه عشان مبتاخدش بالها ووقعت على حازم وأنا بغيّر عليها! وقلقان تكون كانت بتحب حازم! أو عندها مشاعر ناحيته! مع إنها قالتلي إنه زي أخوها وأنا بصدق أي حاجه تقولها وبثق فيها...

تنهدت بعمق وقلت:

-عارف لما تكون متلغبط كده من حاجات تلغبط وقلقان من حاجات تقلق دا بقا قمة البؤس...

رد ياسين بغيظ:

-تصدق بالله ما أنا فاهم منك ولا كلمه من ساعة ما قعدنا... قول إنت عايز تقول ايه يا كريم بطريقه مباشره!

-ايه اللي مش واضح في كلامي يا ياسين!

-مفيش حاجه واضحه يابا... إيه شغل الألغاز ده إنت بتحكيلي فوازير وأنا المفروض أحلها!!

ضحكت وقلت:

-البنت اللي بحبها يا ياسين... خايف تكون بتحب حد تاني أو متعلقه بحد.

-يابا انجز واتقدملها يابا... وارحمني أنا والواد ده من كلامك اللي مش مفهوم ده!

قالها وهو بيشاور على ابنه وضحكنا، من لما حكيت لياسين عن نجمه ومشاعري ناحيتها بدون ذكر اسمها طبعًا ومعاملته معايا اتغيرت تمامًا، يمكن لأنه اطمن إني مبفكرش في سمر ولا عمري فكرت فيها! أو يمكن صعبت عليه، وبعد فترة من صمتي وأنا بتفرج على  ياسين اللي بيغني لإبنه مين حبيب بابا مين روح بابا، حسيت إني عايز أكون بابا زي ياسين! بصلي ياسين قال:

-عارف يا واد يا كريم إنت بتفكرني بنفسي!

-إيه واد يا كريم دي!! أنا ملاحظ كده إنك أخدت عليا بزياده!

-وإنت تطول أخد وأدي معاك في الكلام ياض... دا إنت قاعد مع ياسين باشا أخو رجل الأعمال المهم ياسر باشا... يعني مهم برده!

ضحكت على كلام ياسين اللي نصه هزار، بدلت نظري بينه وبين ابنه الصغير اللي كان بيرضعه بالببرونه، وقلت بابتسامة:

-طيب وبفكرك بنفسك ازاي يا أستاذ مهم؟

ابتسم ياسين وبص قدامه كأنه بيفتكر زمان وقال بحب:

-أصل أنا وسمر زمان كنا...

كنت ببصله بتركيز لكنه سكت وبصلي بطرف عينه وقال:

-إنت هتصاحبني! قوم ياض نام يلا.

قلت بابتسامة وغيظ مصطنع:

-على فكره أنا كنت فاهم زمان إنك بتحب سمر وهي منفضالك...

قال ياسين بصدمه مصطنعه:

-منفضالي!!! قوم يا كريم نام الله يرضى علينا وعليك... قـــــــوم...

بصيت في ساعتي اللي كانت داخله على الواحده بعد نص الليل ووقفت وأنا بضحك، قلت بزعل زائف:

-تصدق أنا غلطان إني قاعد معاك أصلًا! أنا ماشي...

مشيت خطوتين فوقفني صوته العالي وهو بيضحك:

-تصبح على خير هنكمل كلامنا الصبح... قال كانت منفضالي قال!!

بصيت له وضحكت وقلت:

-وإنت من أهله يا أستاذ مهم...

مشيت والإبتسامة على وشي كنت مرتاح عشان حكيت معاه عن مشاعري ومخاوفي وكان رأيه إني مضيعش وقت وأتقدملها.وقررت أخد خطوه...

وبمجرد ما قربت على أوضتي شاورتلي أمينه اللي كان باين عليها الارتباك، قالت:

-كريــــــم... تعالي ورايا بسرعه يا كريم.

-أجي وراكِ فين!

قلتها وأنا ماشي وراها وهي مردتش عليا وجريت على الأوضه وهي باين عليها التوتر فجريت وراها وأنا مخضوض وفي خيالي ألف مشهد عن اللي ممكن يكون حصل!

ولما قربت سمعت صوت عمتي دلال اللي بتقول بلهفة:

-الد**م مش بيقف يا نجمه؟

وصوت شروق الباكي:

-أنا مكنش قصدي والله!

صرخت فيها دلال:

-اسكتـــــي بقا إنتِ السبب!

-خلاص بقا يا خالتو...

قالتها نجمه بصوت باكي، بلعت ريقي وحمحمت وأنا بقرب منهم ولما شافتني شروق سابت الأوضه وخرجت وهي بتعيط، ولما شافتني نجمه ارتبكت لأنها كانت شِبه خالعه الحجاب، بلعت ريقي وبصيت لعمتي وأنا بقول بتوتر:

-إيه اللي حصل؟

قامت عمتي دلال وهي بتقول:

-تعالى يا كريم شوف الجرح ده محتاج يتخيط ولا ايه! 

نجمه عدلت الحجاب تغطي شعرها وكانت بتبكي، وأنا قلبي اتنفض، وقفت مكاني، وأمينه كانت بتشرحلي اللي حصل بالتفصيل، وأنا باصص للفراغ ومركز في كلامها، زعقتلي عمتي:

-إنـــت هتفضل متنح يا كـــريـــم! تعالى شوف الجرح ولا ناخدها مستشفى ولا ايه!

حمحمت بحرج، وانحنيت أبص لشكل الجـ ـرح من غير ما ألمسه، كنت في موقف صعب أوي، حمحمت مره تانيه وقلت:

-إنتِ حاسه بإيه يا نجمه؟!

قالت بدموع:

-بيحرقني و... وشكل الدم أصلًا مخوفني.

-طيب متقلقيش مفيش حاجه آآ... أنا دايمًا بيكون معايا أدواتي... هجيب الشنطه وأجي...

-شنطة ايه! هو هيتخيط؟!

قالتها نجمه بخوف، فقلت:

-هعقمه الأول ونشوف كده...

خرجت بسرعه وأنا سامع صوت عياط نجمه وبلعن شروق في سري...

جيبت شنطتي بحذر عشان مصحيش أخويا ووالدتي اللي نايمين في الأوضه! 

ولما رجعت قابلت حازم بيخبط على الباب وجنبه شروق اللي بتعيط وماسكه في دراعه، بصلي حازم من فوق لتحت بصمت وقبل ما نتكلم فتحت عمتي دلال الباب، فدخلت شروق ودخلت أنا كمان لكن عمتي اعترضت طريق حازم، فابتسمت...

استغفروا ❤️ 

بقلم آيه شاكر 

******

-رايح فين يا حازم؟ 

قالتها دلال لما وقفت قصاده، فقال حازم بنبرة مهزوزة:

-شروق بتقول نجمه اتصابت في رأسها...

-أيوه بس مش هينفع تدخل لأنها من غير حجاب.

-والله! واشمعنا ده بقا دخل!

قالها وهو بيشاور على كريم اللي دخل قدامه، فعقدت دلال ايديها قدام صدرها وقالت:

-داخل عشان يعقم الجرح ويشوف لو هيتخيط... لأنه ممرض...

حاول حازم يدخل وهو بيقول:

-ماشي وأنا كمان هدخل لأن نجمه زي أختي...

مسكته من ذراعه وقالت:

-مفيش حاجه اسمها زي أختي!! لأنها مكانتش زي أختك يا حازم ولا هتكون...

بصلها حازم للحظه وتنهد بعمق وقال:

-طيب يا عمتو هشوفها وأمشي...

قالت بنرفزه:

-فيه ايه يا حازم!! مالك؟ دي مش تصرفات انسان عاقل! فوق لنفسك يا حبيبي واهتم بمراتك... وأعتقد إنت اللي اختارت بكامل إرادتك تبعد عن نجمه...

مسح حازم وشه وبلع ريقه وقال بارتباك:

-آ... أنا بس قلقت لما قابلت شروق وهي بتعيط وقالتلي على اللي حصل! 

مد حازم عينه يبص جوه لما سمع صوت تأوه نجمه، وقال بارتباك:

-آآ... طـ... طيب ادخلي يا عمتو شوفيها و... وأنا هبقا أطمن عليها منك الصبح... بس ناديلي شروق عاوزها...

دخلت دلال للأوضه وهي بتنفخ بزهق ووقف حازم ينفخ بضيق من عمته! 

وطلعت شروق لحازم ودخلت تاني بسرعه...

-كريم بس بقا شيل ايدك...

قالتها نجمه بنبرة عاليه، فقال كريم:

-إنتِ اللي شيلي ايدك واصبري... وبعدين أنا متأكد إنه مش بيوجع لأني حاطط مخدر...

-لا بيوجع... وراسي منمله...

رد كريم بسخرية:

-كدابه أوي راسك منمله يعني مش بيوجع!

قعدت دلال جنبها ومسكت ايديها وهي بتقول:

-اصبري يا نجمه... 

قال كريم وهو شغال:

-أومال حازم راح فين؟

انتبهت نجمه لسؤال كريم، وردت دلال:

-مشي... كان جاي يطمن لأن شروق بتعيط وخايفه.

قالتها دلال وبصت لشروق اللي كانت واقفه بتلعب في موبايلها وساكته، ولما لاحظت  شروق إن العيون بتبص عليها، قفلت موبايلها بارتباك وبصت لنجمه وقالت:

-أنا آسفه يا نجمه... بجد مكنش قصدي...

وخرجت من الأوضه بسرعه من غير ما تسمع رد، فبص كريم لمكانها الفارغ وقال:

-شروق دي تصرفاتها مريبه... وحازم ده كمان غريب أوي يا عمتو... ساعات بحس إنه مش طايقني مع إني معملتلهوش حاجه والله!

قالها بضحك وسحب حجاب نجمه عشان يغطي شعرها كله بعد ما خلص، في حين دلال قالت بابتسامة:

-ليه ياض يا كريم.... دي شروق غلبانه بس عبيـ ـطه... وحازم جدع ياض...

-ايه الحكايه النهارده! بسمع كلمة ياض دي كتير!!

قالها كريم بضحك وهو بيقفل شنطته، فسألت دلال بضحك:

-ليه مين قالك كده غيري!

قعد كريم ولسه هيحكي فقالت أمينه:

-هو إنت لسه هتقعد! أنا عايزه أنام!

حمحم كريم بحرج وقام وقف، ولما لقى نجمه ساكته وحاطه ايديها على رأسها قال:

-روقي يا نجمه ومتقلقيش دي كل الحكايه غرزتين اتنين!

-بيوجعني...

قالتها نجمه، فابتسم كريم وقال:

-مستحيل يكون بيوجعك بطلي وهم...

بصتله نجمه وابتسمت، فبصلها وابتسم ودلال متابعه نظراتهم...

وفي اللحظة دي قالت أمينه بزهق:

-أنا بقول لو عايزين تسهروا تقدروا تخرجوا تتكلموا بره... أنا بجد عايزه أنام أوي.

انتبه كريم لنظراته لنجمه وبلع ريقه وهو بيمسح شعره بتوتر، كان خايف من التجاوزات اللي بقا بيقع فيها غصب عنه، يعني يضحك مع نجمه ويبصلها...

قاطع أفكاره صوت أمينه:

-اتحرك يا كريم عاوزين ننام!

قال كريم بمرح:

-طيب يا أمينه براحه ماشي أهوه... مش بنطمن عليها!

قالها وهو بيشاور على نجمه فابتسموا كلهم واستأذن كريم ومشي...

قالت أمينه بضحك:

-حاسه إني أحرجته!

ضحكوا وقالت دلال:

-حاسه!! 

-اعمل ايه ما أنا بحب أنام بدري وانتوا سهرتوني النهارده! وخضتوني كمان ودا مش حلو عشان بشرتي...

قالتها أمينه وهي بتلمس بشرتها، فقالت نجمه وهي بتبص لدلال وبتشاور على أمينه:

-هي البت دي بجد! 

ضحكت دلال وبصت لأمينه وقالت بسخرية:

-قومي ياختي نامي عشان بشرتك!

رقدت أمينه على السرير وقالت:

-أوكي تصبحوا على خير...

بصت دلال لنجمه وقالت:

-يلا ننام احنا كمان؟!

سألت نجمه:

-طيب وشروق؟

-سيبك منها تلاقيها هتنام عند حازم...

استغفروا♥️

بقلم آيه شاكر 

                 ★★★★★★

نامت شروق في أوضة حازم جنب أسماء وطول الليل دموعها بتنزل في صمت وأسماء متابعاها، شروق كانت بتقول في نفسها إنها مش بتكره نجمه ولا بتغير منها بل إن نجمه هي اللي بتكرهها وبتغير منها! وإن نجمه منافقه!

تاني يوم 

بمجرد ما فتحت شروق عينيها مسكت موبايلها على المحادثة اللي بينها وبين ميسره وحذفتها وهي بتنفخ بضيق، مكنتش عارفه عمتها دلال عرفت ازاي!!  

طبطبت عليها أسماء فاتنفضت شروق وقفلت الموبايل بسرعه! قالت أسماء:

-صباح الخير يا شوشو... أنا جايه أطمنك إن نجمه بخير مكنتش أعرف إنك بتحبيها وبتخافي عليها أوي كده! 

-أ... أيوه ما هي بنت عمتي وصاحبتي! لازم أخاف عليها طبعًا...

-يا بختها بيكِ كان نفسي يكون ليا صاحبه زيك تحبني وتخاف عليا!

حمحمت شروق وارتعشت شفايفها بابتسامة متوتره، خبط باب الأوضه ولما فتحت أسماء ظهر حاتم اللي قال بابتسامة:

-يا صباح الصباح... يلا يا جماعه مش هتفطروا ولا ايه؟!

خرج حازم من الحمام ولبس ساعته وهو بيقول:

-احنا لابسين ونازلين أهوه...

قالت أسماء:

-يلا أصل أنا جعانه أوي....

خرجوا من الأوضه، ومشيت شروق مع أسماء قدامهم فسأل حازم أخوه:

-صحيح يا حاتم الفضول هيمـ ـوتني... ايه الحرف التاني اللي كان على دبلة كريم؟

بص حاتم حوليه وقال بهمس:

-الواد ده شكله بيحب واحده اسمها نور... كان حرف N...

سأله حازم: 

-واشمعنا نور ما يمكن اسم تاني!

-فاكر لما قال إنه عايز اسم زوجته أي حاجه فيها نور... وقال شمس قمر أو نور!

هز حازم رأسه لتحت وقال:

-امممم أي حاجه فيها نور... وحرف N...

كان شاكك في علاقته بنجمه لكنه تأكد! همس حازم لنفسه من غير ما يسمعه حد:

-نجمه!!

جز على أسنانه بغيظ، واشتعلت غيرته أكثر! وجواه أسئله كتير، أهمها هل نجمه بتحب كريم من زمان؟!

من ناحية تانيه قالت شروق لأسماء:

-عايزه أنصحك نصيحه من أخت لأختها...

-انصحيني يا أوختي...

قالتها أسماء بمرح فقالت شروق بخبث:

-خلي بالك من جوزك... مع إن نجمه صاحبتي وبنت عمتي وبحبها لكن إنتِ أولى لي منها... نجمه مش سهله زي ما إنتِ متخيله! وبتحاول تلفت نظر حازم ليها! 

ضحكت أسماء وقالت:

-مش معقوله! وبعدين أنا واثقه في حازم...

ضحكت شروق وقالت:

-لا يا حبيبتي ركزي نجمه كانت بتحب حازم لكن حازم سابها واختارك إنتِ والظاهر إنها لسه بتحبه وبتلفت نظره وحازم شكله بدأ يتلغبط ويتشدلها... وأنا عشان بحبك لازم أنبهك... 

أسماء قلبها اتقبض، لكن مردتش على شروق ومشيت وهي بتفكر في كلامها...

سبحان الله وبحمده سبحان الله العظيم❤️

                      ★★★★★★

                    «حازم»

لما وصلنا للمطعم شوفت كريم قاعد على تربيزه تانيه جنب دلال وبيتكلم مع «ياسين» اللي بقى يقعد معاه دايمًا والإبتسامه مش مفارقه وشه...

ولما لقيت نجمه كمان قاعده معاهم وبتبتسم معرفتش أتحكم في غيرتي، اللي مش عارف هي من كريم ولا على نجمه!

قعدت على التربيزه اللي وراهم مع عيلتي وقلت بضيق:

-مينفعش كده! نجمه قاعده مع شباب منعرفهمش وبتضحك معاهم هي وعمتي! أعتقد لو والدها هنا مش هيرضى بوضع زي ده!

قالت شروق بغيظ:

-للأسف نجمه مش هتتغير! مش بتتعلم من أخطائها وبتحب تلفت نظر الشباب ليها! أنا صعبان عليا اللي بتعمله في نفسها!

كلهم بصوا ناحية نجمه اللي قاعده جنب البنات ومش بتبص ناحية الشباب، فقال حاتم:

-ايه يا جماعه البنت قاعده باصه قدامها وساكته... وبعدين ما احنا برده شباب وأجانب عنها ولا هو الضحك معانا احنا اللي حلال! 

قالها حاتم وضحك وفعلًا كان معاه حق...

بصتلي أسماء وقالت بشك وبهمس:

-مش شايف إن إنت مركز مع نجمه شويه!

ابتسمت وقلت بهُيام مصطنع:

-لأ أنا مش مركز مع حد غيرك يا قمر... بس مش حابب اللي بيحصل ده ما هي برده بتجيبلنا الكلام...

قالت:

-واحنا مالنا بيها أصلًا يا حازم!

-ما هي بنت عمتي برده يا نجمه...

-أنا أسماء مش نجمه!

قالتها وحسيت إنها هتعيط...

بلعت ريقي بارتباك وقلت لها بابتسامة: 

-إنتِ اللي لغبطتيني!

-إنت اللي ملغبط نفسك!

قلت في نفسي فعلًا أنا اللي ملغبط نفسي! حاولت أغير الموضوع بسرعه فقلت بغزل:

-بس ايه القمر ده أول مره أشوف الفستان ده عليكِ!

ابتسمت أسماء ابتسامه صغيره وقالت:

-بس أنا مش أول مره ألبسه! الظاهر إن إنت مش مركز معايا! 

في الوقت ده اتأكدت إن أسماء فاهماني وخوفت! أنا تقريبًا بـ ـدمر حياتي! حاولت أتدارك الموضوع فميلت ناحيتها وقلت بهمس:

-والله بحبك... 

ابتسمت وقالت:

-وأنا كمان...

مسكت ايديها من غير ما حد ياخد باله، وبصينا لبعض بابتسامة، مكنتش بكذب عليها لأني فعلًا بحبها، كنت شايف الدموع متجمعه في عينيها! سحبت ايديها مني وبصت قدامها...

ولما جه الفطار كنت باكل وعيني كل شويه تروح على كريم ونجمه اللي لما بصت ناحيتنا عنيها وقعت في عيني فنزلت عينيها بسرعه...

أسماء كانت متابعه نظراتي، وفجأة سابت الأكل من ايديها، قامت وقالت:

-أنا شبعت...

-وإنتِ أكلتي حاجه؟!

قالتها والدتي، فقالت أسماء:

-مكنتش جعانه... عن إذنكوا...

مشيت أسماء بسرعه وروحت وراها، وسط نظرات الكل، ولما دخلنا أوضتنا، قلتلها:

-إيه يا حبيبتي! مفطرتيش كويس ليه!! مع إنك الصبح قولتي إنك جعانه!

بصتلي بعمق ومردتش، فكررت سؤالي وأنا بمسك ايديها، فحضنتني جامد وانفجـ ـرت بالعياط، طبطبت عليها وقلت بقلق:

-إيه اللي حصل يا أسماء؟! حد ضايقك؟ إوعى تكون شروق!!

قالت بعياط:

-بالله عليك يا حازم متعملش معايا كده! متحسسنيش إن أكرم أخويا كان صح لما كان مُصر إني أسيبك عشان الصور اللي نزلت عنك! متشمتش حد فيا أنا وثقت فيك... 

مسحت على رأسها وقلت:

-عشان خاطري اهدي... إيه اللي حصل لكل العياط ده!

خرجت من حضني وقالت:

-أنا عايزه أرجع بيتنا يا حازم...

-عشان خاطري اهدي و... ويوم واحد بس وهنرجع يا حبيبتي.

قعدتها قدامي ومسحت دموعها وقلت بلين:

-براحه وبهدوء احكيلي مالك؟!

ولأن أسماء طيبه ومش بتخبي عني أي حاجه حكتلي اللي قالته شروق وخوفها من نجمه ونظراتنا لبعض، حاوطت وشها بايدي وقلت:

-متخافيش أبدًا يا سمسم... وعد مني قدام ربنا إني عمري ما هخذلك... وسيبك من شروق دي دماغها فاضي واللي بتقوله ده أوهام في دماغها! 

-بجد يا حازم! اوعى تكون بتضحك عليا!!

-بقولك وعد قدام ربنا إني عمري ما هخذلك... نجمه أختي وهتفضل أختي وإنتِ مراتي وحبيبتي وأم عيالي مستقبلًا ان شاء الله.

ابتسمت وبوست ايديها واتنفست أسماء بارتياح، قلت:

-روقي كده وقومي اغسلي وشك عشان نخرج مع بعض وأفسحك شويه...

سمعت كلامي وقامت، وقلت لنفسي بهمس:

-أنا وعدتك يا أسماء... والوعد قدام ربنا وهنفذه... 

بصيت لفوق وقلت:

-يارب... 

بصيت قدامي وأنا بفتكر شروق أختي وتصرفاتها المريبه، وهزيت راسي باستنكار، وضيق، وأنا عايز أقوم أضـ ـربها...

                          *****

شروق كانت متابعه نجمه وكريم، وعملت نفسها بتلعب في موبايلها وصورتهم كتير ولعبت في الصور شويه. 

أكلت بسرعه وقامت وقفت في جنب وطلبت رقم وهي بتلتفت وراها كأنها بتعمل حاجه غلط، إداها مشغول أكتر من مره، ففتحت نت وبعتت:

-مش يتضيع وقت... يعني ملقتش فايده من أخويا قالت تشوف ابن عمي...

بعتت صور كتير واحده لنجمه وكريم حاطط ايده على رأسها كان بيخيط الجرح لكن واضح إنه بيلمس شعرها وفيديو تاني وهي قاعده جنبه على الشط وبيضحكوا سوا وصور تانيه قصتهم عشان يظهروا قاعدين جنب بعض... 

استنيت رد، لكن رسايلها اتقرأت ومحدش رد، فبصت شروق قدامها وعينها دمعت وهي بتقول:

-ليــــــــه كــده! ليـــــه كله بيتجاهلني!

دموعها نزلت وهي بتقول:

-يارب... يارب بقا أنا تعبت...

                     ********

في مكان تاني قعد ميسره جنب أخته يبصلها وساكت وهي ملاحظه لكن عامله نفسها بتلعب في موبايلها ناداها بلين:

-توتو... توتو...

بصت له وهي رافعه رأسها لفوق وقالت:

-يا نعم!

-هي... هي نجمه عامله ايه؟!

-بتسأل ليه! مش إنت أخر مره قلتلي أقطع علاقتي بيها!

سكت ميسره وهو بيبصلها، فكملت تسنيم:

-على العموم أنا مشوفتهاش من يوم ما قولتلي أقطع معاها كلام... وهي أصلًا مبقتش تيجي التدريب لأنها سافرت...

قال بدهشه وصدمه:

-سافرت فين؟!

-راحت نزهة صيفيه مع عيليتها...

-واللي اسمه كريم ده معاهم؟!!

-معرفش بس هو كمان مش بيجي الشغل بيقولوا واخد اعتيادي!

-وإنتِ مكلمتهاش! 

-لأ متكلمناش!

-ماشي يا تسنيم...

قالها وقام خرج من الأوضه وهو بيغلي من الغيظ...

فاتبعتله رسايل على الماسنجر وصور لنجمه زي كل يوم، ورسالة:

-اوعى تكون لسه بتفكر فيها!! أنا رأيي تنساها...

ضغط ميسره على أسنانه بغيظ وقال:

-صـــح... هـــنـــساهــا... مش همـ ـوت نفسي عليها يعني!! تغور في داهيه... تستاهل كل اللي بيحصلها... 

نادى على أخته بصوت عالي وهو متعصب فجريت وهي بتقول:

-نـــــــــعـــــم... جيت أهوه... عايز ايه؟

-من بكره تقطعي علاقتك نهائي بالبنت اللي اسمها نجمه دي... فاهمه؟

نفخت تسنيم بضيق فقال ميسره بصوت عالي:

-ردي علـــــيــــا... فـــــــــــاهــــــمــــــه!!!

خافت منه لأنها أول مره تشوفه متعصب كده فبلعت ريقها وقالت:

-طيب... طيب فاهمه... هو حصل ايه؟ 

مردش عليها وقعد يمسح وشه بايديه فقعدت جنبه وسألته:

-هو فيه حد بعتلك صور ليها تاني؟!

هز رأسه لتحت فحاولت تسنيم تهديه:

-ممكن تهدي وتفكر بعقل... متاخدش أي قرار وإنت غضبان!

قال بنرفزه وصوت عالي:

-أنا لا غضبان ولا نيله...

رن موبايله برسايل تانيه على الماسنجر ولما فتحها برق عنيه بصدمه وقام وقف وهو بيقول:

-يا نهار مش فايت! إيـــــه ده!!! هي وصلت لكده!!

قربت تسنيم عشان تشوف فيه ايه فقفل موبايله بسرعه وحطه ورا ظهره وقلبه بيدق بسرعه من الصدمه..

(١٣)

-ردي علـــــيــــا... فـــــــــــاهــــــمــــــه!!!

خافت منه لأنها أول مره تشوفه متعصب كده فبلعت ريقها وقالت:

-طيب... طيب فاهمه... هو حصل ايه؟ 

مردش عليها وقعد يمسح وشه بإيديه فقعدت جنبه وسألته:

-هو فيه حد بعتلك صور ليها تاني؟!

هز رأسه لتحت فحاولت تسنيم تهديه:

-ممكن تهدي وتفكر بعقل... متاخدش أي قرار وإنت غضبان!

قال بنرڤزه وصوت عالي:

-أنا لا غــضـــبان ولا نيله...

رن موبايله برسايل تانيه على الماسنجر ولما فتحها برق عنيه بصدمه وقام وقف وهو بيقول:

-يا نهار مش فايت! إيـــــه ده!!! هي وصلت لكده!!

قربت تسنيم عشان تشوف فيه ايه فقفل موبايله بسرعه وحطه ورا ظهره وقلبه بيدق بسرعه من الصدمه...

🌸🌸🌸🌸

الحلقه (١٣)

#روحي_تعاني٣

بقلم آيه شاكر 

🌸🌸🌸🌸

-وريني فيه ايه!!

قالتها تسنيم وهي بتمد ايدها عشان تاخد موبايله فقال بضيق:

-مفـــيـــــش... أنا خـــارج...

سابها ومشي بخطوات سريعة وخرج وقفل الباب وراه، فجريت وراه ووقفت على باب الشقه تقول:

-استنـــــــى يـــا ميـــســره طمني الأول في ايه!!!

التفت ليها ولما شافها خارجه من البيت من غير  حجاب رجعلها، برق عينيه وقال بصوت عالي:

-قولت مفيش وادخلي جوه إنتِ طالعه من غير طرحه!

قالها وزقها لجوه وقفل الباب ومشي ووقفت تسنيم محتاره وقلقانه، فتحت موبايلها وبدأت تراسل نجمه وتسألها عن الرحله وعن أخبارها وردت عليها نجمه، اترددت تحكيلها عن الأكونت اللي بيبعت صورها لأخوها ولا لأ وفي الأخر أنهت الكلام مع نجمه ومقالتش حاجه، محبتش تعكر عليها الرحله قررت تأجل الكلام...

********

من ناحية تانيه خبط ميسره على بيت صاحبه اللي بيفهم في السوشيال ميديا، واللي ساعده قبل كده إنه يمسح كل الكلام اللي نزل عن نجمه، شاب يُعتبر من نفس سنه لكنه مخلص كلية تجاره...

رن الجرس لحد ما فتحتله أم صاحبه، قال:

-ازيك يا طنط أومال أكرم فين؟!

-أهلًا يا ميسره اتفضل يا حبيبي... أكرم نايم تعالى ادخل صحيه...

دخل ميسره البيت، وهو بينادي أكرم، فتحت والدة أكرم باب أوضته وهي بتقول:

-أدخل بقا صحيه...

دخل ميسره وقال وهو بيبص على أكرم:

-إيه يا عم هو لسه فيه حد بينام للظهر!

فتح أكرم عين واحده وقال بنعاس:

-إيه يا عم إنت! إيه اللي جايبك دلوقتي؟ طفي النور ده...

خرجت والدته من الأوضه فقفل ميسره الباب وقال:

-عاوزك في حوار مهم قوم اغسل وشك كده وصحصح معايا...

دير أكرم ظهره وقال بنعاس:

-طفي بس النوم وسيبني نص ساعه وهبقا أجيلك البيت...

-نص ساعه ايــــه! بقولك حوار مهم....قــــــــوم...

قالها ميسره وهو بيهز أكرم فقعد أكرم وقال بضيق:

-يـــــــوه.... أبو شكلك على أبو معرفتك ياخي... ياريتني ما رجعت من الغردقه كنت شغال هناك ومرتاح من أشكالك...

ميسره كان ساكت وبيبصله وهو رافع حواجبه بغيظ، فبصله أكرم وقال بسخرية وضيق:

-مالك... رافع حواجبك ومحدش عاجبك على الصبح ليه!

تنهد ميسره بعمق وقال:

-نجمه! فيه حد بعتلي صور وفيديوهات ليها تاني بس المره دي الفيديوهات مخله يا أكرم! وأنا مش ممكن أصدق عليها اللي شوفته ده... هي متعملش كده!! 

نفخ أكرم بزهق وقال:

-يا عم ما قولتلك فكك من البت دي.... إنت واجع دماغي ودماغك ليه! 

-أنا شيلتها من دماغي بس عايز أعرف مين اللي بيعمل كده يا أكرم! عشان خاطري شغل دماغك وساعدني أعرف مين ابن الـ....

قاطعه أكرم:

-هعرف ازاي وكل الأكونتس اللي بيبعتلك منها بيقفلها بعدها!

قال ميسره بقلق:

-طيب والعمل!! أنا قلقان الفيديوهات دي تنزل على النت وساعتها البنت دي هتتـ ـدمر... تخيل «أسماء» أختك مكانها أكيد مكنتش هتسكت...

-لأ ياسطا أسماء أختي محترمه ومش بتحط نفسها في موضع شُبهه والراجل الوحيد اللي كلمته في حياتها كان حازم جوزها اللي دخل البيت من بابه... أما الست نجمه كانت مصحباك وماشيه معاك ياسطا واللي تصاحب واحد تصاحب عشره!

-لا يا معلم نجمه محترمه وكل كلامها معايا كان باحترام... وإنت بنفسك حاولت تكلمها من كذا أكونت وشوفت كان رد فعلها ايه!

نفخ أكرم بضيق وقال:

-طيب ماشي يا محامي النجمه عايز مني ايه دلوقتي؟

قال ميسره:

-عايزك تساعدني؟!

-مش عارف أقولك ايه بس مفيش في ايدي حاجه!

قالها أكرم وسكت شويه وبعدين بص لميسره اللي باصص للأرض بحزن وقلة حيله وقال:

-بص أنا من ناحيتي هتابع النت لو نزل أي فيديوهات ههـ ـكر الصفح وأقفلها زي المره اللي فاتت وأوعدك هحاول أعرف مين ده... بس مش أكيد أنا هحاول وخلاص...

اتعدل ميسره في قعدته وقال:

-طيب اي رأيك أبلغ أبوها بالفيديوهات دي ونروح مباحث الانترنت ونقدم بلاغ!

-لأ طبعًا اوعى تعمل كده... دا ممكن أبوها يروح فيها! اصبر أنا هحاول أتصرف الأول...

صلوا على خير الأنام ❤️ 

بقلم آيه شاكر 

                     ★★★★★★

                          «كريم»

وقفت أبص على نجمه  وهي واقفه قصاد البحر وشايله ابن ياسين وسمر، رفعت موبايلي أصورها وبعدين تراجعت وحطيته في جيبي، وأنا بقول لنفسي كفايه تجاوزات لازم أتحكم في نفسي أكتر من كده!

رجعت أقعد على الكرسي جنب عمتي دلال اللي ابتسمتلي وكانت متابعه اللي كنت هعمله لكن عملت نفسي مش واخد بالي قعدنا ساكتين شويه وعيني كل شويه تروح على نجمه لا إرادي وكانت عمتي دلال مركزه معايا أوي، قالت:

-طيب ما تنجز قبل حد تاني ياخدها تنور حياته!

ميلت ناحيتها وابتسمت وقلت بهمس:

-قلقان يا عمتو... خايف أترفض...

-تحب أمهدلك الطريق؟!

-ازاي؟!

-هقولها هي مباشر طلبك وأوعدك مش هتمشي من هنا إلا ومعاك الرد...

قلت بقلق:

-تفتكري هتوافق؟!

-ولو رفضت هقنعهالك هو أنا عندي كام كريم يعني!

ابتسمت وقلت:

-إنتِ عمه جدعه على فكره وأنا حبيتك أكتر ما كنت بحبك... توكلي على الله ربنا يجعل القبول على ايديكي يا شيخه.

ضحكت عمتي وطبطبت عليا وقامت وقفت وقالت بابتسامة:

-هتوافق يا كريم ان شاء الله متقلقش... 

-يارب...

قربت عمتي من نجمه ومع كل خطوه كان قلبي بيدق أسرع كنت متوتر وخايف أكون اتسرعت...

ولما وقفت عمتي دلال جنبها اتكلموا لفتره وانا متابع حركاتهم لكن مش سامع أي حاجه، وفجأة بصوا عليا هما الاتنين فارتبكت وطلعت موبايلي فتحت النت وعملت نفسي قال يعني مشغول أوي...

رفعت عيني براحه فشوفت شروق واقفه وراهم زي ما تكون بتسمع هما بيقولوا ايه! 

بصت شروق ناحيتي ومشيت بسرعه وباين عليها العصبيه! ومأخدوش بالهم منها، رجعت بصيت لموبايلي تاني...

وفعلًا اتشغلت عنهم لما لقيت طلبات مراسله كتير ففتحتهم واحد ورا التاني واتصدمت! 

حطيت ايدي على بوقي من صدمتي وقلت:

-يا اللـــــــه! إيـــــــه ده؟

فتحت الصور والفيديوهات واحد ورا التاني وحسيت جسمي تقل مره واحده!

من صدمتي مكنتش شايف قدامي وحاسس إني في عالم تاني بعيد عن كل اللي حوليا، مش سامع ولا شايف حد حسيت إن وداني بتصفر! ودماغي منمله، والدنيا بتلف حوليا حطيت إيدي اليمين على دماغي وغمضت عيني والموبايل وقع من ايدي الشمال اللي حسيت فيها بوجع غريب! سمعت صوت ياسين اللي وقف قدامي، قال بمرح:

-ايه ياض يا كريم إنت هتنام وإنت قاعد ولا وايه! قوم ننزل البحر...

قعد ياسين قصادي وأنا لسه على حالتي، فناداني:

-كريم... واد يا كريم...

صوته كان كأنه من جاي من قاع بير ومختلط مع صفير أذني، ولما حس إني مش مظبوط قرب مني وهزني براحه، وهو بيناديني، فبصيتله وسندت راسي عليه، وقلت بتعب وبلسان تقيل ونبره مهزوزة:

-الحقني يا ياسين... الحقني...

انحنى ياسين بسرعه وقال بلهفة وخوف:

-ايه يابا مالك... إنت تعبان ولا ايه؟!

-آاااه...

خرجت مني كأني بتألم وبأكد كلامه في نفس الوقت...

كنت ساند على ياسين اللي نادي ياسر وهيثم كنت سامع أصواتهم وحاسس بلهفتهم عليا وأصوات عيلتي وأمي اللي كانت بتعيط، وأخويا الصغير اللي بينادي عليا وبنت ياسر اللي بتشد في هدومي وبتقول:

-خالــــــــو...

ودي كانت أخر كلمه سمعتها قبل ما أفقد تركيزي بالكامل وانفصل عن اللي حوليا رغم إني مغبتش عن الوعي وكنت بصرخ بآه من شدة ألم ذراعي اللي حسيت روحي بتطلع معاه...

صلوا على خير الأنام ❤️ 

بقلم آيه شاكر 

                 ★★★★★

                     «نجمه»

من لما وقفت خالتي جنبي وهي بتتكلم عن الحب الحلال، قلت بسخرية: 

-وبعدين معاكي يا خالتو مش قولتلك أي كلمه فيها ح أو ب متجيبيش سيرتها قدامي...

قالت:

-المره دي تختلف لأنه هيبقى حب حلال...

-مش عايزه أتجوز أصلًا... رافضه المبدأ... لأني لسه صغيره...

-مش لما تعرفي مين العريس اللي هيمـ ـوت عليكِ...

لاعبت ابن سمر اللي على ذراعي وقلت بلامبالاة:

-مش عايزه أعرف...

-براحتك هبلغه إنك رافضه...

كان عندي فضول أعرف مين العريس لكن مسألتش وعملت نفسي بلعب مع ابن سمر، فسكتت خالتي شويه وقالت بمكر:

-التيشيرت اللي على كريم ده بيفكرني بخالك الله يرحمه أوي...

بصينا احنا الاتنين على «كريم» فلقيته بيبص علينا، وارتبك وبص للأرض بسرعه، فابتسمت خالتي وقالت:

-كريم محترم وأخلاقه عاليه... الشباب كلهم في كفه وكريم في كفه تانيه وإنتِ شايفه بعينك مش محتاجه إني أقولك... صلي استخاره وردي عليا عشان لو كده أبلغه يكلم باباكي.

سألتها بتعجب:

-كريم العريس؟!

هزت رأسها بالإيجاب وهي مبتسمه، فسألتها بتوتر:

-هـ... هو اللي قالك تقوليلي ولا بتهزري يا خالتو؟!

-هو الكلام ده فيه هزار... والله هو اللي باعتني... 

قلبي دق بسرعه وبلعت ريقي بتوتر، ولما وصلت سمر عندنا مشيت خالتي دلال بصيتلها فشاورت بصوباعها جنب دماغها بابتسامة إني أفكر، وقعدِت دلال جنب شروق اللي قاعده لوحدها على الرمله وباصه للبحر، وماسكه موبايلها اللي مش بتسيبه...

مدت ايديها عشان تاخد ابنها مني، فبوسته واديتهولها وأنا بحسس على شعره بحنان، فقالت سمر:

-ربنا يرزقك يا حبيبتي بزوج صالح وذرية صالحه تملى حياتك...

ابتسمت، مكنتش عارفه أفسر مشاعري هل أنا فرحانه إن كريم اتقدملي ولا خايفه! وهل أوافق ولا هبقى بظلم كريم معايا لأني لسه منستش حازم ولازم أخد وقتي وأتعافى منه! 

بصيت لسمر وقلت:

-سمر أنا جايلي عريس... وعايزه أخد رأيك...

-مين ده اللي عايز ياخد البنبونايه... وإيه مواصفاته؟!

ابتسمت وبصيت ناحية كريم، اللي كان ساند على ياسين فقلبي اتقبض واختفت ابتسامتي وحسيت إنه فيه حاجه فركزت معاهم...

وقبل ما أتكلم الدنيا اتقلبت وسمعت أصوات صراخ طنط فريال، ولقيتهم شايلين كريم وبيجروا بيه، اتخضت سمر وجريت وراهم وهي شايله ابنها وجريت أنا كمان وأعصابي بتترعش كنت بجر رجلي بالعافيه...

وكان جوايا صوت بيصرخ إلا كريم! مينفعش يختفي من حياتي! هو الوحيد اللي وقف جنبي هو الشخص اللي أنا بسببه وقفت على رجلي تاني رغم إنه كان ورا الستاره لكنه الوحيد اللي سندني وكان واثق فيا ومستعد يبذل أي جهد عشاني!

كنت  كل ما تضيق الدنيا تتردد في دماغي جمله بصوته:

-فصبر جميل والله المستعان على ما تصفون...

فوقت على صوت حاتم إللي بيقول:

-جماعه دي شكلها أعراض جلطه! طلما دراعه الشمال...

قالت دلال بدموع:

-جلطه!!! لا إن شاء الله مفيش حاجه... ان شاء الله هبقى كويس...

وصلنا مستشفى وبمجرد ما دخلنا قابلنا دكتور وفحصه مش عارفه مر وقت أد ايه على ما فاق وعمل أشعه واطمنا عليه، كان يوم طويل أوي عليا...

كلهم مشيوا من المستشفى لكن أنا وقفت مع خالتي دلال ووالدته «فريال» وياسين وحاتم اللي مسابوش كريم ولا لحظه...

قالت خالتي دلال:

-مش عارفه حصله ايه! دا كان كويس وبيهزر معايا! حصلها ايه مره واحده كده!!

تنهدت بألم فقلت وأنا حاطه ايدي على قلبي:

-قلبي كان هيقف من الخضه...

حضنتني خالتي وقالت:

-الحمد لله عدت على خير... إن شاء الله يقوم بالسلامه ويبقى عريس ونفرح بيه...

قالتها بمكر فابتسمت وظهر حازم معاه شروق اللي بتبصلي بحدة، سأل حازم بلهفة:

-كريم عامل ايه يا عمتو؟

-بيقولوا كويس بس مش عايز يشوف حد... ياسين وحاتم ووالدته معاه جوه...

حازم بصلي بنظرة جانبيه وبص للأرض حتى مقاليش ازيك! مكنتش عارفه أفسر النظره دي يمكن شفقه!! 

في اللحظه دي لقيتني بقارن بين حازم وكريم، لو على الأخلاق والتدين فكفة كريم تغلب، لو على الوسامه برده كفة كريم تغلب، ولو على الحب، فالحب بيجي بعد الجواز والعِشره مش العكس، وأنا اكتشفت إن كريم غالي أوي عندي...

افتكرت جملته أول مره نزل عني صور، لما قال:

-إنتِ غاليه أوي عندي واللي يمسك يمسني وأنا مش هسكت...

قلبي دق أكتر وحسيت إني عايزه أشوف كريم...

قلت لنفسي ساعات بنبقى محتاجين نحس إن اللي قدامنا ممكن يختفي فجأة عشان نتأكد من غلاوته عندنا!

وقفت أبص على شروق اللي ماسكه ذراع حازم، وأقول في نفسي يا بختها عندها أخ... 

افتكرت جملة كريم:

-بكره تتجوزي ويبقا أخوكي وصاحبك وجوزك وتجيبي أولاد ويبقوا أولادك وأصحابك وإخواتك... 

في الوقت ده حسيت إني فعلًا عايزه أتجوز، وإني محتاجه كريم في حياتي...

استغفروا ♥️ 

*********

من ناحيه تانيه قال الدكتور لكريم:

-إنت فيه حاجه زعلتك؟

عيط كريم، وحط ايده السليمه على وشه يداري دموعه وضعفه، فانحنى ياسين ليه وقال بحنان:

-ايه يابا... إيه اللي مزعلك؟

ومن الناحيه التانيه حضنته فريال فزاد بكاء كريم، ولما هدي شويه طلب ياسين منهم يسيبوهم لوحدهم، فخرجوا وطبطب ياسين على كريم وقال:

-بقينا لوحدنا احكي ايه اللي تاعبك يا كريم؟ زعلان من ايه! 

من ناحيه تانيه لما طلع الدكتور ووراه فريال وحاتم سألوا عن حالة كريم فقال الدكتور:

-دي كانت أعراض جلطه بس الحمد لله لحقناه... الظاهر إن فيه حاجه زعلته جامد... كويس إنكم جبتوه على المستشفى علطول...

قالت دلال:

-ايه اللي زعله! دا كان لسه بيهزر معايا!

ولما مشي الدكتور قالت فريال بحسرة وحزن:

-الواد يا قلب أمه مبطلش عياط! 

-لا حول ولا قوة إلا بالله...

قالتها دلال، فقالت فريال:

-كريم دا أصله مبيعرفش يعيط قدام حد دايمًا بيكتم في نفسه! عشان كده لما شوفت دموعه دلوقتي حسيت إن فيه حاجه كبيره! كبيــــره أوي...

طبطبت دلال على كتفها وقالت:

-ان شاء الله خير متقلقيش...

-يارب... يارب فك كرب ابني يارب...

ونجمه كانت واقفه تسمع وساكته، وهي باصه للأرض، ولما رفعت عينها شافت حازم وحاتم بيبصوا عليها وبيتكلموا بهمس، وشروق بتبصلها بقرف، فبصت للأرض تاني...

من ناحية تانيه سأل حازم أخوه:

-مين اللي معاه جوه وطلعتوا ليه؟!

-ياسين قال هيتكلم معاه لوحدهم...

قالها حاتم فتنهد حازم بحزن وقال:

-الظاهر كده إنه شاف الصور والفيديوهات!

قال حاتم بدهشه:

-يا نار أزرق هي وصلتلك إنت كمان؟

هز حازم رأسه بتأيد، وقالت شروق بنرفزه:

-منها لله نجمه هي السبب في كل حاجه!

قال حاتم بصدمه:

-هي وصلتلك إنتِ كمان؟

-أيوه لقيت طلب مراسله فتحته واتصدمت من الفيديوهات! على فكره ممكن تكون حقيقيه أنا بقيت بتوقع أي حاجه من أي حد...

قاطعها حازم بانفعال:

-اسكتِ خالص دا أنا ليا حساب معاكِ...

-حساب ايه!!!

قالتها شروق بدهشه وقلق، فقال:

-إنتِ قولتِ لأسماء ايه!! وليه أصلًا تقولي كده!

بصت شروق للأرض، وقالت:

-آآ... أنا كان قصدي أنبهها عشان خايفه عليك...

-خايفه عليا!!!!

بصلها بحده، فبصتله وقالت بندم:

-آسفه والله أنا غلطت متزعلش مني!

قال حازم:

-بعدين يا شروق بعدين... هنتحاسب بعدين... خلينا في اللي احنا فيه...

من ناحية تانيه

وبعد فتره من العياط تماسك كريم وقال:

-هو موبايلي فين؟!

-معايا في جيبي...

قالها ياسين، واداله الموبايل، وسأل ياسين:

-ايه اللي مزعلك يابا احكيلي...

قال كريم بدموع:

-فضيحه يا ياسين! فضــــيحـــه... أنا مش مهم بس هيا... 

سحب ياسين كرسي من وراه وقعد عليه وقال:

-لأ انت تهدى كده وتحكيلي براحه عشان أنا مش فاهم حاجه...

بدأ كريم يحكي من البداية من لما نزل صور عن نجمه على صفحتها لحد أخر حاجه اتبعتتله، بصور ليه وليها وفي أوضاع مخـ ـله، فقال ياسين:

-ولما الموضوع من زمان إنتوا ازاي ساكتين! مبلغتوش مباحث الانترنت؟!

-بلغنا ومفيش حاجه حصلت... موصلناش لحاجه ولما الصور اتحذفت قولنا الموضوع انتهى...

ردد ياسين بتفكير:

-يعني إنت بتقول حد بعتلك صور وفيديوهات ليكوا وانتوا مع بعض بس متفبركه يعني! 

هو كريم رأسه بالإيجاب وقال:

-أنا مش مهم بس خايف عليها لو حد بعتلها الفيديوهات دي... نجمه ممكن تحاول تنتحر تاني!

تنهد كريم بألم وكمل:

-أنا مش عارف مين اللي حاططها في دماغه!! نجمه متستاهلش يحصل معاها كده...

حمحم ياسين وسأل:

-هي... نجمه دي بنت عمتك!!؟

هز كريم رأسه بالإيجاب، فسأل ياسين بدهشه:

-دي صاحبة سمر! وهي البنت اللي انت عايز تتجوزها صح؟!

سكت كريم واتعدل في قعدته ومازال حاسس بثقل في جسمه، كان هينكر لأنه مش عايز حد يعرف نجمه، لكنه اتطمن لياسين فقال:

-آآ.... أيوه... هي اللي عايز أتجوزها...

ابتسم ياسين وكأنه لقى الحل وقال:

-طيب يابا ما هي محلوله إنت تتجوزها والموضوع يتحل... محدش هيقدر يتكلم عليكوا ربع كلمه... واحد ومراته...

فكر كريم لثانيه وقال:

-مش عارف يا ياسين هتوافق ولا لأ! وبعدين عشان اتجوزها لسه فيه فترة خطوبه و...

قاطعه ياسين:

-ليه خطوبه يابا! هو إنت لسه هتتعرف عليها! انتوا تتجوزوا علطول...

-مش بالسهوله دي ياسين فيه ترتيبات... وأنا مش جاهز لسه هشطب الشقه وهشتري العفش و...

-الكلام ده هنخلصه في اسبوع... سيبه عليا... إيه رأيك موافق؟

-هو أنا اللي هوافق لوحدي!! لسه فيه رأي أهلها ورأيها هي! وبصراحه أنا عايز أعرف مين اللي عمل كده! أنا ليا طار ولازم أخده يا ياسين...

قالها كريم بانفعال، فقال ياسين بتفكير:

-أممممم... ماشي طارك هتاخده وأنا هساعدك بس برده بعد ما تتجوزها...

سكت كريم وبص للفراغ وهو سرحان، فقال ياسين:

-لما تريح شويه بص في الصور اللي مبعوتالك دي شوف مين ممكن يكون صورهالكم... يمكن تلاقي ثغره أو طرف خيط وتفهم... 

-أبص على إيه!! بقولك أوضاع مش كويسه!!!

قالها كريم بزهق لكن افتكر صوره! ففتح الموبايل وبدأ يبصلها جامد فحاول ياسين ياخد الموبايل من إيده وهو بيقول:

-بقولك لما تريح شويه يا عم! 

شد كريم الموبايل وقال وهو بيبص فيه بتركيز:

-اصبر بس يا ياسين...

بص كريم للصور مره واتنين، كانت الصوره اللي بيخيط فيها الجرح اللي في راس نجمه، قال:

-الصوره دي... مفيش حد كان موجود في الأوضه إلا عمتي وأمينه وشروق... أكيد  مش عمتي دلال اللي مصوره الصوره دي ولا أمينه! شروق! شروق... شـــــــــــــروق اللي كانت ماسكه موبايلها...

سأل ياسين:

-مين شروق!؟

مردش كريم ووقف المحلول، ونط من على السرير ومع إن جسمه كان ثقيل ودراعه مازال واجعه لكن الغضب كان سايقه، مشي لحد الباب وتجاهل نداء ياسين عليه فجري ياسين ووقف قدامه وقال:

-إنــــت رايــــــح فــــيـــــن بالحاله دي؟!!

في الوقت ده خبط حازم على الباب ولما فتح ظهرت شروق وأول ما شافها كريم معرفش يمسك نفسه، صرخ فيها:

-أكـــــيـــــد إنـــــــــت! مفيش غيرك...

قال حازم بحدة:

-فيه ايه يا كريم بتعلي صوتك على أختي وأنا واقف!

قال كريم بغضب وصوت عالي:

-أخـــــتـــــــك!!! أختك دي حربايه بمية لون... ولا مية لون ايه! هو لون واحد إسود ملى قلبها وظهر قدامنا في تصرفاتها وكلامها!

قال حازم بصوت عالي:

-كــــريــــم أنا مسمحلكش ولولا إنك تعبان كنت مديت إيدي عليك!

قال كريم بعصبية:

-لأ يا راجل مد ايدك كده وريني!

وقف حاتم قدام أخوه حازم واخده بعيد عن كريم، ورجع لكريم وقال:

-أنا مقدر اللي إنت فيه! وعارف إنك متأثر بسبب الصور والفيديوهات اللي وصلتك! لكن شروق ملهاش ذنب يا كريم... أختي متعملش كده!

برق كريم عينيه وقال بصدمة:

-لحظه واحده.... إنت عرفت بموضوع الصور والفيديوهات منين؟!

أدرك حاتم اللي قاله، فعض على شفايفه بندم، مسك فيه كريم بإيد واحده بغضب وقال:

-يبقا إنت اللي بتساعدها!! ومش بعيد حازم كمان يكون معاكم! ما انتوا عــــــصــــــابــــه!!!

متنسوش التفاعل❤️ ورأيكم😍

ــــــــــــــــــــــــــــــــــ

كدا باقي حلقتين أو تلاته... استعدوا لأحداث أكثر حمـ ـاس❤️

#يتبع

(١٤)

-أخـــــتـــــــك!!! أختك دي حربايه بمية لون... ولا مية لون ايه! هو لون واحد إسود... ملى قلبها وظهر قدامنا في تصرفاتها وكلامها!

قال حازم بصوت عالي:

-كــــريــــم أنا مسمحلكش ولولا إنك تعبان كنت مديت إيدي عليك!

قال كريم بعصبية:

-لأ يا راجل مد ايدك كده وريني!

وقف حاتم قدام أخوه حازم وأخده بعيد عن كريم، ورجع لكريم وقال:

-أنا مقدر اللي إنت فيه! وعارف إنك متأثر بسبب الصور والفيديوهات اللي وصلتك! لكن شروق ملهاش ذنب يا كريم... أختي متعملش كده!

برق كريم عينيه وقال بصدمة:

-لحظه واحده.... إنت عرفت بموضوع الصور والفيديوهات منين؟!

أدرك حاتم اللي قاله، فعض على شفايفه بندم، مسك فيه كريم بإيد واحده بغضب وقال:

-يبقا إنت اللي بتساعدها!! ومش بعيد حازم كمان يكون معاكم! ما انتوا عــــــصــــــابــــه!!!

🌸🌸🌸🌸

(١٤)

#روحي_تعاني٣

بقلم آيه شاكر 

🌸🌸🌸🌸

                          «نجمه»

عمري ما شوفت كريم منفعل للدرجه دي، مكنتش فاهمه أي حاجه وشروق كانت ماسكه ايد حاتم ومتخبيه وراه...

قال حاتم بهدوء:

-اهدى يا كريم وركز وشوف إنت بتقول إيه!

سكت كريم للحظة، ونظراته مليانه حزن وانكسـ ـار، فقالت شروق لحازم بفزع:

-آ... أنا معملتش حاجه!

قال كريم بحدة وانفعال:

-لأ عــــمــــلتِ... وإنتِ عارفه إنتِ عملتِ إيه! 

وقف حازم في وش كريم وقال بنرفزة:

-كـــــريــــــم! كلامك معايا أنا!!

قال كريم بنفس الانفعال:

-كلامي لا معاك ولا معاها أنا كلامي مع عمي...

حاتم كان بيهدي أخوه حازم وياسين وفريال بيهدوا كريم، وأنا وخالتي دلال واقفين نبص لبعض شويه  وعليهم بصدمه شويه...

قربت خالتي دلال من كريم فقالها حاجه في ودنها، بصت دلال لشروق وقربت منها وسحبت موبايلها من ايديها بحركه سريعة، فقالت شروق بصدمة:

-هاتي موبايلي يا عمتو...

حطت دلال الموبايل في شنطتها وقالت باختصار:

-ابقي خديه من أبوكي...

مشي كريم مع ياسين وفريال عشان يخرج من المستشفى ووراه عمتو وشروق بتجري وراهم وبتقول برجاء:

-يا عمتو هاتي موبايلي...

وقفت شروق وبصت لحاتم اللي وراها وقالت بدموع:

-هاتلي موبايلي منها يا حاتم!

مسكها حاتم من ايديها ومشي وراهم وهو بيقول لخالتي دلال بعصبيه:

-أنا عايز أفهم فيه ايه!!! إنتِ بتاخدي موبايلها ليه يا عمتو!!!

مردتش دلال عليه ومشيت، وشروق كانت بتعيط جامد، فقال حاتم بنرفزه:

-لأ أنا محدش يعلم على أختي وأنا واقف....

بص حازم وحاتم لبعض للحظات وكأنهم بيكلموا بعض من خلال النظرات، والاتنين قطعوا المسافه جري ووراهم شروق اللي كانت خايفه...

وقدام المستشفى وقف حازم قدام دلال وشد حاتم الشنطه من ايديها وأخد موبايل أخته ورجعهولها، وبدأت الخناقة...

قالت دلال بعصبية وبصوت عالي:

-والله يا حازم انت وحاتم ما هعدي اللي عملتوه ده...

رد حاتم بانفعال:

-أنا محدش يعلم على أختي وأنا واقف حتى لو مين!!

قالها وهو بيبص ناحية كريم وياسين، فضغط كريم على أسنانه ومشي خطوات ناحية حاتم عشان يتخانق معاه، فوقف حازم قدامه وقال:

-بقولك ايه يا كريم إحنا مش عايزين مشاكل... وأختي وأخويا ملهومش علاقه بالصور والفيديوهات دي... طلعهم بره الموضوع ده!

فتح كريم موبايله، وحط صوباعه على شعر نجمه ودير الموبايل لحازم وهو بيقول بعصبيه:

-الصوره دي أختك اللي مصوراها أنا متأكد... هي الوحيده اللي كانت ماسكه الموبايل...

ولما بص حازم للصوره قلبه اتنفض واتصدم! حاول يتماسك وميظهرش عليه حاجه، لكن من صدمته قال:

-أنا قولتلك أختي ملهاش علاقه بالموضوع ده!

قال كريم بسخرية:

-ممكن فعلًا متكونش ليها علاقه وتكون إنت اللي  عملت كل حاجه! أو يمكن حاتم!

قال حازم بزعل وهو بيشاور على نفسه:

-إنت بتظن فيا كده يا كريم!!! أنا أعمل كده في نجمه اللي بعتبرها أختي! أنا هسكت بس عشان إنت أعصابك تعبانه...

هز كريم الموبايل اللي في ايده وهو بيقول لحازم:

-أختك اللي صورت الصوره دي يا حازم لما كنت بخيط لنجمه جرح رأسها! وأكيد ليها ايد في اللي بيحصل! أما إنت وحاتم بقا مشتركين ولا لأ أكيد هعرف...

رد حاتم بعصبية:

-مشتركين في ايه يا عم كريم!!! يا حبيبي إحنا زينا زيك الفيديوهات والصور دي وصلتنا على الخاص الصبح... 

قربت دلال من حاتم وضـ ـربته بايديها الاتنين في كتفه وهي بتقول:

-إنـــــت مبـــتفـــهــــمــــش! هــــو ده وقــــتـــه!

رجع حاتم لورا خطوات وبص للأرض ومردش....

وقف كريم مصدوم يبص للأرض وساكت، فمسكه ياسين من ذراعه وهو بيقول:

-لازم تهدى عشان إنت تعبان يلا نرجع الفندق وهنفكر بعقل...

هز كريم رأسه بالنفي كان باين عليه التعب والإرهاق وهو بيقول بصدمة:

-سمعت قال ايه يا ياسين! الفيديوهات والصور وصلتهم! 

بدل كريم نظراته بينهم  وضـ ـرب دماغه بإيده وهو بيردد بانهيـ ـار وبصوت عالي:

-والله أعلم اتبعتت لمين تاني... احنا اتفــــضحـــنا!!

رفع رأسه لفوق يبص للسما وهو بيردد:

-حسبي الله ونعم الوكيل...

حضنه ياسين وطبطب عليه، وقرب منه حازم يطبطب على كتفه فشال كريم إيد حازم عنه بعصبيه، تنهد حازم وبصلي بنظرة سريعه وبص للأرض وهو بيقول:

-أنا كلمت أكرم أخو أسماء وهو بيفهم في السوشيال ميديا وقال إنه هيتصرف... 

سند كريم رأسه على كتف ياسين ومردش فسألتهم فريال بقلق:

-أنا مش فاهمه حاجه! فيديوهات ايه دي يا كريم؟

مشي كريم من غير ما يرد على والدته كأنه مسمعش سؤالها، ومشيت والدته جنبه وهي بتكرر السؤال على ياسين مره وعلى خالتي دلال مره وعلى حازم وحاتم مره تالته وأنا مصدومه وقلبي مقبوض والكلمه اللي كريم قالها:

-احنا اتــفضــــحنـــا.

بترن في دماغي، وبسأل نفسي يقصد إيه بـ احنا!!! 

بصتلي شروق وقالت بدموع:

-منك لله إنتِ السبب في كل اللي بيحصل ده!

شدها حازم من ايديها وقال بنرفزه:

-أنا مش عايز ولا كلمه يا شروق!

مشيوا كلهم وكنت ماشيه وراهم بخطوات ثقيله، وحاتم ماشي لوحده قدامي وباين عليه الحزن، سرعت خطواتي ولما وصلت عنده سألته:

-فـ... فيديوهات وصور ايه دي يا حاتم؟!

ارتبك وبصلي بنظرة متوتره، وبلع ريقه، حسيت إنه بيفكر يرد بإيه! 

ولما طال سكوته سألته مره تانيه فقال:

-دي... دي فيديوهات لكريم زي اللي نزلت عن حازم قبل كده!

قالها وسرع خطواته يسبقني عشان مسألش أي أسئله تانيه!

كنت ساكته طول الطريق ببص على كريم بقلق، ولما وصلنا الفندق سألت خالتي دلال، لأني مش قادره استوعب! أو مش عايزه أستوعب فقالت:

-اصبري يا نجمه إنتِ كمان! 

وسابتني ومشيت لما كريم شاورلها عشان يروحوا عند والد شروق فجريت وراها، قالتلي خالتي دلال:

-روحي يا نجمه نادي أمينه ومتجيش إنتِ...

-أنا عايزه أفهم في ايه!!

-بالله عليكِ مش وقته...

قالتها خالتي بصوت عالي وسابتني ودخلت مع كريم عند خالي ومشيت أنا ودموعي بتنزل، ومشاعري كلها خوف وقلق وحيره وأعصابي بتترعش! حاسه إن الموضوع يمسني لا متأكده مش حاسه! كنت بسأل نفسي يا ترى صور إيه المره دي!!

ولما دخلت أوضتي قلت لأمينه فنزلت بسرعه وقعدت أنا أعيط بصوت عالي ودماغي بتودي وتجيب بأفكار وخيالات ممكن تكون حقيقيه!

مسحت دموعي وفتحت مصحفي وأول آيه وقعت عيني عليها:

﴿قال بل سولت لكم أنفسكم أمرًا فصبرٌ جميل والله المستعان على ما تصفون﴾

ازداد بكائي وأخيرًا تماسكت وبدأت أرتل القرآن بقلب خاشع ومستشعر كل كلمه بتلمسه وكإنها بتخاطبه وتطبطب عليه وتغسل جراحه، حسيت إني عايزه أصلي اتوضيت وصليت وفي كل سجده كنت بقول بقلبي ولساني:

-يارب استرني يارب...

استغفروا❤️

بقلم آيه شاكر 

                     ★★★★★

سمر كانت بتنيم ابنها لما فتح ياسين الباب، قعد ياسين على أقرب كرسي قابله وجريت عليه سمر سألته:

-كريم عامل ايه؟

-كويس... بس كريم في مأزق كبير أوي يا سمر!

-خير؟! 

هز ياسين رأسه بالنفي وحكى لسمر اللي حصل بدون ذكر اسم نجمه، فقالت سمر:

-ومين البنت اللي معاه في الفيديوهات؟

ضغط ياسين شفايفه وهو متردد يقولها ولا لأ، فسألته مره تانيه، قالت بقلق:

-حد أعرفه؟! 

فقال:

-أيوه حد تعرفيه...

اتعدلت سمر في قعدتها وسألت بلهفة:

-مين يا ياسين انطق؟!

-نجمه.

شهقت سمر بصدمة وحطت ايديها على بوقها وقالت:

-والله العظيم من أول ما قلت صور وفيديوهات جه في دماغي نجمه! يا نهار أبيض يا ياسين دي فضيحه كبيره أوي!!!

قالتها وهي متوتره ومرتبكه فقال: 

-أنا شايف إن الحل دلوقتي إن كريم يتجوزها... وبعدين بقا نشوف هنعمل ايه! 

-لأ ده مش حل... لإن اللي فبرك فيديوهات ليها مع كريم يقدر يعمل غيرها مع أي راجل تاني! لازم تعرفوا مين اللي بيعمل كده الأول...

بص ياسين لسمر شويه وهو ساكت وقال:

-مش عارف كريم هيعمل ايه! ربنا يكون في عونه!

قامت سمر وقالت:

-أنا هروح لنجمه لازم أكون معاها...

مسكها ياسين من ايديها وقال:

-لأ لا اصبري متروحيش دلوقتي لمي حاجتنا عشان هنمشي... كريم قال إن نص ساعه وهيمشي وأنا عايز أكون معاه...

استغفروا❤️

★★★★★★

في بيت ميسره ولما دخل البيت جريت تسنيم عليه وقالت بقلق:

-طمني يا ميسره! إيه الصور اللي اتبعتتلك؟

بصلها وتنهد بحيره ومسك رأسه وقال:

-اعملي كوباية شاي الأول دماغي هينفـ ـجر...

دخلت تسنيم تعمله شاي فوقف وراها وسألها:

-البت شروق دي أنا شاكك فيها! ممكن تكون هي اللي بتبعتلي صور نجمه! وممكن تكون هي اللي بعتت قبل كده! 

-هي فعلًا باين عليها بتغير من نجمه... بس معتقدش إنها تعمل كده في بنت عمتها يعني!

قال ميسرة:

-الغيره بتعمي العين وممكن تخلي الشخص يعمل أي حاجه! شروق دي بعتتلي على الخاص رسايل كتير تحذرني من نجمه وقالتلي إنها بتحبني...

تسنيم كانت بتقلب الشاي فوقفت وبصتله بصدمة وسألت بعدم تصديق:

-بتتكلم بجد!!!

هز ميسره رأسه بتأكيد، وقال:

-المشكله بقا إنها مش بتحبني ولا حاجه لإنها مصاحبه واحد تاني وبتقوله برده إنها بتحبه وكلام غــــــرامي!

-وإنت عرفت إزاي؟

-مش مهم عرفت إزاي! المهم إني عرفت...

قالت تسنيم بتوتر:

-طيب... طيب هنعمل ايه!! نكلم نجمه نقولها! ولا...

قاطعها ميسره:

-لأ لا أنا عايزك تطلعي بره الموضوع ده خالص... واقطعي كلام مع البنتين دول إحنا مش ناقصين!

أخذ كوباية الشاي من ايديها وهي بتسأله:

-وإنت ونجمه؟

قال بابتسامة ونبرة ساخرة:

-لا خلاص موضوع نجمه ده اتقفل بالنسبالي أنا مش هتجوز واحده عليها علامات استفهام...

-بالسهوله دي! طيب وحبك ليها! 

-حب ايه يا تسنيم فكك من كلام الأفلام ده! أنا مش بتاع الكلام ده... وبعدين هي مش بتحبني ولا هتحبني وأنا مبفرضش نفسي على حد... ربنا معاها بقا...

خرج ميسره من المطبخ ووقفت تسنيم تفكر في كلامه، وتقول لنفسها ازاي اتغير كده بين ليلة وضحاها! دا كان بيحب نجمه وبيسألها عن كل تفاصيلها حتى يوم ميلادها حافظه!!! تسائلت يا ترى صور إيه اللي غيرت ميسره للدرجه دي!! ويا ترى مين اللي حاطط نجمه في دماغه بالشكل ده معقوله شروق!

بقلم آيه شاكر 

استغفروا♥️

                     ★★★★★★

                       «حازم»

كنت واقف جنب شروق اللي ماسكه دراع حاتم بخوف وبتعيط فطبطب حاتم عليها ووقف قدامها يمسحلها دموعها بايده وقال بحنان:

-متعيطيش... بتعيطي ليه؟ احنا معاكِ وواثقين فيكِ...

قالت بعياط:

-أنا معملتش حاجه والله ومستعده أحلفلكم على مصحف.

قال حاتم:

-متقلقيش يا حبيبتي قولتلك أنا واثق فيكِ...

بدأ كريم يحكي لوالدي وفرجه على الصوره اللي كان بيخيط لنجمه فيها جرح رأسها وقال:

-محدش كان ماسك موبايل في الوقت ده غير شروق!

قالت عمتي دلال:

-فعلًا أنا استغربت إنها ماسكه موبايلها في الوقت ده! 

قلبي اتنفض، وأنا وشروق بصينا لبعض بخوف وقلق، قالتلي شروق بهمس:

-اتصرف بقا وإلا هقول على كل حاجه...

حسيت إن أنا اللي في مأزق مش شروق، وشي عرق وحسيت بحراره في جسمي...

قالت شروق بصوت عالي:

-أنا معملتش حاجه! دول بيكدبوا يا بابا... موبايلي أهوه خد فتشه...

بصتلها عمتي دلال وقالت بنرڤزة:

-ما إنتِ أكيد مسحتِ الصور!

وجهت دلال كلامها لوالدي:

-بص بقا يا أبو حازم أنا كنت ساكته ومش عايزه أتكلم عن تصرفات بنتك بس لما توصل الحكايه للفيديوهات وصور بتمس شرف اتنين يبقا لأ مش هسكت...

صرخت فيها شروق وقالت بانفعال:

-أنا مليش دعوه بالفيديوهات دي! معرفش عنها حاجه! والله والمصحف ده ما أعرف عنها حاجه...

قالتها شروق وهي ماسكه المصحف، فقالت دلال:

-حلو! نبدأ بقا من الأول خالص يا شروق... 

بصت عمتي لوالدي وقالت:

-شروق طول عمرها بتغير من نجمه... ولما حازم طلب يتجوز نجمه شروق مستحملتش واتكلمت عن نجمه بالكذب... نجمه دي مصاحبه شباب دي بتضحك مع شباب دي بيها وعليها... وحتى اسأل حازم هو اللي حكالي كل ده...

كلهم بصولي فحمحمت بحرج وبصيت لشروق وسكتت...

قالت شروق بانفعال وهي بتبص لحازم:

-وأنا مكذبتش دي منافقه أصلًا وكلكوا مخدوعين فيها! واه كانت بتكلم شباب وروحوا اسألوها...

ردت دلال بانفعال:

-اخرسي قطع لسانك... نجمه عمرها ما كلمت إلا واحد وهو ميسره ولما إنتِ عرفتِ إنه بيحبها وكان بيحبها بجد! روحتِ بعتيله رساله تقوليله نفس الكلام اللي قولتيه لحازم عنها قال ايه بتحذريه ولما مصدقش... بعتيله رسايل حب!

قالت شروق بدموع:

-ايه الكلام دا يا عمتو أنا معملتش كده والله!

قالت دلال بنرفزه:

-متحلفيش! ما أنا مكنتش مصدقه برده بس شوفت الرسايل بعنيا ومعايا اسكرينات بيها....

فتحت دلال موبايلها وكلنا اتفرجنا على الرسايل اللي فيها كلام حب وغرام، وكلام تاني عن نجمه، بصت شروق للأرض وعيطت، وقالت:

-الاسكرينات دي متفبركه و...

قاطعتها دلال:

-الاسكرينات دي ميسره اللي بعتهالي من كم يوم وقال إنه شاكك في شروق تكون هي اللي بتعمل كده في نجمه! 

هزت شروق راسها وقالت بدموع وهي مازالت ماسكه المصحف:

-معملتش حاجه... كل ده كذب والمصحف ده! تلاقي ميسره ده هو اللي مفبرك كل حاجه وعايز يلبسهالي...

قرب والدي من شروق وضـ ـربها على وشها، فاتخبت ورايا، وهي بتردد بهستيريه:

-بتضـ ـربني لـــــــيــــه! كله كدب أنا معملتش حاجه يا بابا...

وحاتم وقف قدام والدي وقال:

-اصبر يا بابا بالله عليك... احنا مش متأكدين... ما يمكن الصور دي متفبركه زي صور نجمه...

منطقش كريم بكلمه كان بيسمع وساكت وأنا كمان كنت ساكت، ووالدي بيزعق فبصت شروق لكريم وقالت بحسرة وعياط:

-والله يا كريم ما عملت حاجه... أنا معترفه إن أنا اللي صورت الصوره دي بس بالغلط... وعشان...

بصتلي شروق وضغطت على شفايفها عشان متنطقش بالحقيقه اللي أنا خايف منها!

حاتم كان واقف قدام والدي اللي بيحاول يضـ ـرب شروق، أشفقت على شروق وكنت عارف إنها هتتكلم وتقول عني، فقررت أسبقها وأعترف، قلت:

-أنا اللي طلبت منها تصور الصوره دي...

بص والدي ليا وقال بصدمة:

-إنت اللي طلبت منها تصورها؟! لــــيـــــــــه؟

ولإني مبعرفش أكذب ولا أحور قلت:

-آآ... أيوه يا بابا لإني كنت عايز أطمن على نجمه عـ... عشان عمتي دلال مردتش تدخلني و...

-لأ والله!!!

قالها والدي بسخريه فبصيت للأرض بحرج....

للأسف أنا اللي طلبت من شروق تصورهم! كنت حاسس بغيره لما كريم دخل وعمتي دلال رفضت تدخلني أنا عارف إني غلطت لما طلبت كده بس دا طبعي لما ببقا غضبان أو غيران مش بشوف قدامي وباخد قرارات غلط!

سأل والدي حاتم وقال:

-وإنت كمان مش عايز تقول حاجه!

بص حاتم للأرض وسكت، فقالت شروق بانفعال:

-وأنا معملتش حاجه يا بابا... وكل كلمه قولتها عن نجمه صح... أنا صحيح مشوفتش بعيني بس صاحبتي اللي قالتلي الكلام ده و... وصاحبتي دي أنا بثق فيها... ورسايل ميسره دي مش أنا اللي كتبتها والله دي... دي واحده صاحبتي معاها الباسورد بتاعي وأنا معايا الباسورد بتاعها وكانت بتحذر ميسره من نجمه وعملتله اختبار تشوفه هيكلمني ولا لأ... ومعرفتش إنها عملت كده إلا لما شوفت الرسايل صدقني يا بابا...

سألها والدي بهدوء عكس اللي جواه:

-مين صاحبتك دي؟ 

اتوترت شروق وبلعت ريقها ومردتش فمسكها والدي من دراعها وهزها وهو بيقول بصوت عالي:

-انطــــقــــــي مين البت دي؟

-آ... آ... إيمان ... اسمها إيمان...

كريم كان ساكت وواقف جنب عمتي دلال فقال بهدوء وقلة حيله:

-يلا يا عمتو لمي حاجتك إنتِ ونجمه عشان هنمشي دلوقتي...

بص كريم لوالدي وقال بصوت سمعناه كلنا:

-أنا هتقدم لنجمه وهتجوزها...

بدل كريم نظره بيننا وقال:

-ومش هسيب حقي وحقها أيً كان اللي عمل كده هعرفه...

وقعت الجمله زي الصفعه على قلبي، هيتجوز نجمه!  حسيت إني اتهزيت! وشروق عيطت جامد وهي بتقول:

-إنا معملتش حاجه...

خرج  كريم ووراه عمتي، ووقف والدي يضـ ـرب كف بالتاني ويقول:

-مش قادر أصدق اللي بيحصل...

قعد والدي على الكرسي، فانحنت شروق قدامه وقالت:

-مش أنا والله يا بابا والله مش أنا...

بصلي والدي وقال:

-طيب فسرولي الصوره دي وصلت لكريم ازاي! مش إنتِ اعترفتِ إنك صورتيها؟ وحازم باشا اللي طلب منك تصوريها! تصرفات عيال!

قالت شروق:

-أ... أيوه... آ... بس...

قلت لشروق:

-إنتِ بعتي الصوره دي لحد يا شروق؟

-آآ... أيوه... بعتها لصاحبتي...

قعد حاتم قدام شروق وقال:

-بهدوء واحكيلي مين صاحبتك دي؟ 

قام والدي خرج من الأوضه وقفل الباب وراه جامد، فقالت شروق:

-ايمان دي بنت محترمه يا حاتم معتقدش إنها تعمل كده!

قلت بنرفزه:

-محترمه!! والمحترمه دي تكلم ميسره وتقوله الكلام ده من الأكونت بتاعك ليه!

حاولت أنا وحاتم مع شروق لكننا موصلناش لأي معلومه عنها، كانت خايفه تقول أي حاجه عنها،  وطلبوا مننا نلم حاجاتنا عشان هنمشي، فقررنا ندور عن إيمان دي بمعرفتنا!

اتنفست بعمق وأنا بقول في نفسي شروق أتفه من إنها تعمل كده في نجمه رغم إنها بتغير منها وأنا عارف ده! وعارف كمان إنها أكبر كذابه لكن مش ممكن تعمل كده مش قادر أصدق إنها ممكن تعمل كده!

استغفروا ♥️ 

                    ★★★★★★

                       «نجمه»

وفي طريق العوده كنا ساكتين، كنت ببص على كريم كل شويه وهو مغمض عينيه من التعب، ومش عارفه ازاي كنت صبوره كده حتى بعد معرفتي بموضوع الفيديوهات والصور يمكن لأني مشوفتهاش! أو يمكن ربنا أفرغ عليّ صبرًا ببركة الصلاة والقرآن...

قالتلي والدة كريم:

-إنتوا لازم تتجوزوا...

مردتش عليها وقعدت فترة بتقنعني إن أنا وابنها لازم نتجوز في أقرب وقت، وكريم بيسمعنا ومش بيرد ودا قلقني، فقلت:

-أنا بعتبره أخويا والفيديوهات دي متفبركه!

فقالت:

-يا حبيبتي والله عارفين... سيبك من الفيديوهات خالص... أنا عايزاكِ لإبني يا نجمه... ولو لفينا الدنيا كلها مش هتلاقي أحسن منك!

قالتها والدة كريم ولما بصيت ناحيته كان فتح عينه وباصص قدامه ومتكلمش ودا قلقني، قالت خالتي دلال:

-كريم طلب يتجوزك من قبل الصور يا نجمه! 

قلت:

-وأنا لسه ملحقتش أفكر...

وفي الطريق وبدون إذني طلب كريم من والد حازم يكلم والدي وطلبني للزواج، وأخدوا ميعاد عشان يجوا البيت، والدي استغرب جدًا رجوعنا المفاجئ لأن لسه باقيلنا يومين! وكان واضح إن والدي ميعرفش حاجه عن الفيديوهات فمحدش قاله وأنا اتطمنت وحمدت ربنا...

نظراتهم كلهم كان باين فيها الشفقه عليا! والحيرة من أمري كانوا متخيلين إني هنهـ ـار، وصمتي العجيب ده مخوفهم، لكني كنت بحاور نفسي وبطمنها وأقول في سري: "قل لن يصيبنا إلا ما كتب الله لنا"

وكل حاجه صعبه بتمر علينا بناخد عليها أجر، ويا بختي بعظيم الأجر ده، طول الطريق كنت بذكر الله وخصوصاً ذكر «لا إله إلا أنت سبحانك إني كنت من الظالمين»

كنت بقول لنفسي كله بيعدي وكله بيمر اصبري يا نجمه لازم تصبري! مش هكون ضعيفه زي زمان وواثقه إن ربنا هيقف جنبي ويخرجني من المأزق ده! وأنا توكلت على الله... 

قعدت مع كريم تاني يوم رجوعنا للرؤية الشرعية سكتنا كتير، وكنت ببص على ذراعه اللي رافعه حولين صدره، كان صعبان عليا! فاجئني بسؤال:

-موافقه عليا؟!

قلت:

-محتاره!

-صلي استخاره... ولو عايزه رأيي... فوافقي...

اطمنت شويه لما قال الكلمتين دول لكن لسه جوايا خوف وقلق لأن ملامحه غامضه مش قادره أفهمه! 

أخر حاجه كريم قالها قبل ما يمشي:

-أنا مش هسيب حقي وحقك... 

وافقت وكتبنا الكتاب بعد ثلاث أيام من رجوعنا من السفر بحفله بسيطه في حضور العيله، كنت ببص على كريم اللي قاعد قصادي بحاول أفهمه هل هو فرحان ولا مُجبر على الجوازه دي! 

ولما رفع عينه ولاحظ إني ببصله ابتسم لكني بصيت للأرض ومعرفتش ابتسم...

كريم كان مستعجل جدًا إن الفرح يبقا بعد إسبوع ووالدي مستغرب استعجاله لكنه وافق لما لقاني موافقه...

ومر عليا أسبوع في خلاله قربت من ربنا أكتر وبكيت كتير ودعيت أكتر، بدعاء واحد:

"يارب استرني واخترلي ولا تخيرني."

متكلمتش مع كريم الفتره اللي فاتت ولا هو جه، عرفت من خالتي دلال إن دراعه الشمال كان تقيل وبيحركه بصعوبه والفتره اللي فاتت بيعمله جلسات، الأيام جريت وهو كان مشغول بتجهيزات الفرح وأنا كمان كنت مشغوله بالتجهيزات والتحضيرات وكل ما يوم الفرح يقرب كل ما قلقي يزيد، وفي غمضة عين مر الإسبوع...

والنهارده أنا عروسه، وواقفه مستنيه عريسي، ورغم خوفي وقلقي من اللي جاي إلا إني مطمنه عشان خلاص هيبقا ليا أخ وصاحب في الحلال لكني متوتره أوي ومحتاره برده!

كل الأحداث حوليا كانت بتمر بسرعه حتى الحفله محستش بيها، وفجأة لقيتنا اتقفل علينا باب واحد، التفت كريم بص عليا وأنا قاعده أفرك إيدي ومتوتره، وسمعت صوت تنهيدته، وبعدين خلع جاكت بدلته وقعد قصادي... 

متنسوش التفاعل ورأيكم طبعًا 😍 

يتبع 

(١٥)

النهارده أنا عروسه، وواقفه مستنيه عريسي، ورغم خوفي وقلقي من اللي جاي إلا إني مطمنه عشان خلاص هيبقا ليا أخ وصاحب في الحلال لكني متوتره أوي ومحتاره برده!

كل الأحداث حوليا كانت بتمر بسرعه حتى الحفله محستش بيها، وفجأة لقيتنا اتقفل علينا باب واحد، التفت كريم بص عليا وأنا قاعده أفرك إيدي ومتوتره، وسمعت صوت تنهيدته، وبعدين خلع جاكت بدلته وقعد قصادي... 

🌸🌸🌸🌸

(١٥)

#روحي_تعاني٣

بقلم آيه شاكر 

🌸🌸🌸🌸

كنت قاعده على الكرسي باصه للأرض، لكني معيطتش ولا نزلت دمعه واحده! كنت كل ما الدموع تخبط على بابي أقولها تعالي وقت تاني...

سكتنا فتره طويله، وكل ما أرفع عيني شويه أبص عليه ألاقيه بيحرك الدبله في إيده اليمين وباصص للأرض، وبعدين خلعها وبصلي بابتسامة وقال:

-بقالي تلت سنين تقريبًا أو أكتر شويه مخلعتهاش من ايدي إلا يوم واحد! عارفه مخلعتهاش ليه وخلعتها ليه؟

هزيت راسي بالنفي، وكنت ببصله بتسائل وأنا مش فاهمه أي حاجه، ومش مركزه معاه أوي بسبب وجع بطني من التوتر، فمدلي ايده بالدبله وأخدتها منه، قال بابتسامة:

-اقري كده الحرفين اللي عليها...

ضيقت جفوني وأنا بحاول أقرأ لكن للأسف نظري ضعيف ومش معايا النضاره، بصيت كتير بحاول أقرأ الحرفين لكن معرفتش وعشان إحراجي منه قلت:

-أأ... أكيد الحروف دي صدفه صح؟

-لأ طبعًا مش صدفه... أنا اللي طلبت نقش الحرفين دول عليها...

مكنتش فاهمه حاجه وهو كان بيتأملني ومبتسم، فرجعتله الدبله، قال:

-إيه مش عايزه تسأليني عن حاجه؟!

قلت بنبرة مهزوزة:

-آآ... أيوه صح عايزه أسألك عن حاجه بس محرجه منك...

ابتسم كريم لما تخيل إني هسأله عن الدبله والحرفين اللي عليها، لكن ابتسامته اختفت واتحولت لدهشه لما وقفت وقلت وأنا بقلب نظري في الشقه:

-احم... هي الشقه دي كام أوضه؟!

وقف كريم وشاور قدامه وهو بيقول بابتسامة:

-اتفضلي يا عروسه أفرجك على الشقه...

-طيب لو سمحت يا كريم ممكن نبدأ بالحمام...

-واشمعنا الحمام؟!

-آآ... بحب أنا أبدأ بأقل حاجه وأنا طالعه...

قلتها بابتسامه متوتره، فضحك كريم وقال:

-طيب ماشي... على شمالك يا عروسه...

شيلت فستاني الواسع ودخلت الحمام ولاحظت إنه عايز يدخل ورايا، فقلت:

-لأ استناني بره نصايه كده!

-نصايه!!

قالها بدهشه وهو عاقد جبهته، فقفلت الباب في وشه وأنا ماسكه بطني وبقول بهمس:

-آااااه ويمكن أكتر...

أعمل إيه ما أنا لما بتوتر بيجيلي إسهال، وأنا وصلت لأعلى ليڤيل في التوتر!

وبعد شويه خبط على الحمام وسألني:

-إنتِ كويسه؟! 

غسلت وشي وخرجت...

كريم كان غير هدومه، ولما شافني قال:

-إنتِ كويسه يا نجمه؟!

مكنتش مركزه خالص فرديت بتلقائية:

-كويسه الحمد لله إنت عامل إيه؟!

ضحك وقال:

-الحمد لله أنا بخير طول ما إنتِ بخير... 

-طيب هي فين الأوضه؟!

شاور قدامه وهو بيقول:

-تعالي...

دخل قدامي للأوضه ودخلت وراه، ولما شافني واقفه محتاره مع الفستان، قال:

-تحبي أساعدك؟!

قلت:

-آ... ياريت...

فك الفستان وسابني وخرج، كنت بقول في نفسي والله راجل محترم بزياده وأنا متأكده إني هحبه بس أهم حاجه الصبر...

غيرت هدومي، ولبست إسدال الصلاه على البيجامه، وقعدت على السرير وكل شويه أنفخ بضيق لإني مش واخده على كريم خالص ولا عارفه هتعامل معاه ازاي! قعدت أفكر شويه وأنا بكلم نفسي وأقول:

-طيب أقوله إيه!! أقوله خلينا اخوات! ولا أقوله سيبني فتره لحد ما أحبك! ولا أقوله إن الدراسه بدأت وأتحجج بيها! ولا أقوم أهرب ولا أعمل ايه!!

اتشنجت ملامحي وكنت هعيط وأنا بقول:

-ياربي بقا!! يارتني ما اتجوزت!

أنا كنت كويسه لحد ما اتقفل علينا باب واحد! ومن شدة التوتر بطني وجعتني تاني فجريت على الحمام، لقيت كريم جوه، استنيت دقيقه والتانيه وبعدين خبطت على الباب، وقلت باستعجال:

-كريم ممكن تخرج؟

-حـــــاضـــر خارج أهوه...

فتح الباب وخرج بصلي بصدمه من فوق لتحت عشان لابسه الإسدال! وقال:

-إنتِ....

مستنتش يكمل كلامه ودخلت وقفلت باب الحمام في وشه...

قضيت ليله صعبه جدًا معظمها في الحمام، اتبهدلت أوي حتى الحبوب اللي كريم اداهالي معملتش معايا حاجه!

وبعد صلاة الفجر نام كريم على الأريكه بتعب، كنت قاعده قصاده أبص عليه وأنا بقول لنفسي أنا شكلي كده اتسرعت وغلطت لما وافقت على جوازنا بالسرعه دي! بس كنت هعمل ايه مكنش في ايدي حل تاني!

وقفت في البلكونه أتفرج على شروق الشمس وأنا بقول الأذكار، ولما بصيت على كريم حسيت إنه مش مرتاح في النوم وهو بيتقلب على الأريكه، فقربت منه وهمست جنب ودنه:

-كريم... كريم قوم نام جوه...

اتنفض مره واحده وقعد بسرعه ولما شافني مسح وشه بايده واتنفس بارتياح وسألني:

-إنتِ كويسه؟

هزيت راسي بالإيجاب وقلت:

-قوم نام جوه ضهرك هيوجعك...

قام وبيمد.ايده يمسك ايدي وبيقول:

-طيب تعالي يلا ننام... إنتِ إيه اللي مصحيكِ؟!

رجعت خطوتين لورا وقلت بارتباك:

-ادخل إنت نام و... وأنا هدخل الحمام وأجي...

ولإنه كان مرهق جدًا مجادلش ودخل نام ولما اتأكدت إنه نام دخلت الأوضه التانيه وقعدت أفكر هعمل ايه! وعشان أهرب من التفكير رددت الورد اللي بحفظه من القرآن لحد ما غلبني النوم...

استغفروا❤️

بقلم آيه شاكر 

                ★★★★★★★

وقبل العصر في مكان تاني كانت قاعده على سريرها ماسكه موبايلها وبتكتب عليه وهي مبتسمه، فدخلت والدتها وقالت ببهجة:

-بت يا إيمان... فيه اتنين شباب بره طول بعرض بيسألوا عنك! وعايزين يقابلوكِ.

اتعدلت في قعدتها وقالت بدهشه:

-يا إلهي! شباب!! بيسألوا عني أنا! وحضرتك فرحانه كدا ليه يا ماما؟

قالت والدتها بابتسامة:

-قاعدين مع أبوكي بره الظاهر كده حد فيهم عريس...

-عريس!!! لا لا لا مش موافقه طبعًا دا جاي من غير ميعاد يعني مينفعش ميناسبنيش...

-طيب بس البسي وظبطي نفسك... دا الاتنين حلوين ومسمسمين... وطالبين يقابلوكِ...

-لأ أنا قلقانه والفار بيلعب في حجري أنا عمري ما حد طلب يقابلني إلا اتنين مره العميد لما كنت بدافع عن شروق في الكليه وزعقت للواد اللي عاكسها... ومره تانيه معيد التشريح لما أنا وشروق كنا بنتكلم في السكشن وضحكنا!

-من غير كلام كتير اخلصي والبسي...

ركزت ايمان مع موبايلها وهي بتقول:

-طيب هكتب المشهد ده وألبس علطول...

سحبت والدتها الموبايل من إيديها وخرجت وهي بتقول بنفاذ صبر:

-اخلصي البسي على ما أعمل العصير!

-استني بس هاتي الموبايل هنسى المشهد! 

مشيت والدتها وهي بتقول بزهق:

-بلا مشهد بلا زفت... 

ولما الأم دخلت المطبخ دبدبت ايمان في الأرض وقالت بضيق:

-يــــــوه طيب والله ما هوافق على العريس ده... مــــــاشـــــي...

لبست بسرعه ووقفت ورا الستاره بتحاول تلقط شكل الشابين ولما شافت حازم شهقت بصدمة وقالت:

-دا حازم أخو شروق بس دا متجوز!! يبقا التاني ده هو العريس! يا ترى هو ده حاتم! ما هي كل البلاوي مش بتيجي إلا من ورا شروق هانم! دي كان صحوبيه مهببه!

أخواتها الصغيرين كانوا بيلعبوا مع بعض وفجأه زقوها فخرجت من ورا الستاره ولقيت نفسها واقفه في النص والدها على يمينها والشابين على شمالها، ارتبكت وقالت بابتسامة:

-السلام عليكم... 

ردوا السلام، ولما بصت لوالدها ولقيته بيبصلها بغيظ قالت بتوتر: 

-آآ... أنا ايمان... شيرتونا ونـ... أومال فين شروق وأم شروق وباباها...

اتنحنح والدها بصوت عالي عشان تسكت وبصلها بحده وهو بيشاور بعينه عشان تخرج فقالت بنبرة مهزوزة:

-شرفتونا ونورتونا... عن إذنكم هجيب العصير وأدخل تاني بطريقة لائقة...

ولما جت تخرج ناداها حازم:

-أستاذه إيمان لحظه من فضلك عايز اتكلم مع حضرتك في وجود والدك...

شاورلي والدي أقعد جنبه ولما بصيت لحاتم كان باين عليه إنه ماسك ضحكته، قال حازم:

-إنتِ معاكِ الباسورد بتاع شروق؟! 

-لا مش فاهمه السؤال ممكن تطرحه بطريقه أخرى؟!

ابتسم حاتم وسأل:

-معاكِ كلمة السر بتاعت الفيس الخاص بأختي شروق؟

تفكيرها وقف للحظه وهي بتبص لحاتم وبتقول في سرها وإيه علاقة كلمة السر بإنه عريس ليها!

لما طول سكوتها سأل حازم مره تالته:

-معاكِ الباسورد بتاع شروق؟!

قالت بنيرة مهزوزة ومصدومة:

-أنا!! لا والله دا أنا مش حافظه الباسورد بتاعي أصلًا!!

قال حاتم:

-بس هي بتقول إنها معاكِ! وصفحتها اتسرب من عليها صور عملت مشاكل! ومشاكل كبيره يعني الأفضل تقولي الحقيقه من غير لف ولا دوران!

-بص يا حضرت... أنا مبعرفش ألف ولا أدور أنا كاتبه يعني مرهفة الحس والمشاعر بلـــيــــز طلعني بره حوارات شروق دي لأن مزاجي لازم يكون كويس عشان أكتب الحلقه ومنكدش على الناس!

قال حازم:

-أنا مش فاهم أي حاجه!

-مش مهم حضرتك تفهم... المهم إن أنا فاهمه...

قالتها وهي بتشاور على نفسها ووقفت وقالت وهي رافعه رأسها:

-المقابله انتهت وبلغ أختك إني قطعت علاقتي بيها عشان كل المشاكل اللي في حياتي بسببها... وبلغها بقا إن الشخصيه الشريره في الروايه الجايه هتكون باسمها وهدعي عليها أنا والـ ١٠٠ متابع اللي عندي...

قالت كده ودخلت أوضتها ووقف والدها يحاول يلم الموضوع ويعتذر عن أسلوب بنته...

خرج حازم مع أخوه من البيت وأول ما قفل والد إيمان الباب، قال بصوت عالي:

-أنا باين كده مكنتش فاضي أربيها!! ماشي يا إيمان أنا هربيكِ من أول وجديد! 

وقفت ايمان تلم هدومها وهي بتقول لنفسها:

-والله أنا متربيه بس ساعات بعك الدنيا معرفش ليه! الله ينتقم منك يا شروق...

دخلت والدتها للأوضه ولما شافتها بتلم هدومها قالت والدتها بغيظ:

-رايحه فين يا موكوسه خالتك لسه طرداكِ امبارح...

-هروح عند خالتك إنتِ... لحد ما بابا أعصابه تهدى...

-خالتي أنا!! ومن امته بتروحي عند خالتي دا إنتِ محضرتيش فرح أسماء! وكمان أكرم رجع من السفر هتقعدي هناك إزاي؟! 

-عادي أكرم زي أخويا...

قالت والدتها:

-يا بت حرام عليكِ اعقلي دا إنتِ الكبيره يعني المفروض قدوة لباقي اخواتك...

لبست شنطتها وهي بتقول:

-بعدين يا ماما نتكلم في موضوع القدوه ده... خرجيني الأول من البيت ده... عشان الموضوع مستعجل وخالتك وحشاني...

استغفروا❤️

بقلم آيه شاكر 

                      ★★★★★

                        «حازم»

حاتم كان قاعد جنبي في العربيه وواقفين قدام بيت إيمان نفكر وساكتين، وفجأة انفـ ـجر حاتم بالضحك وقال:

-هي دي اللي كنا بندور عليها بقالنا أكتر من أسبوع؟ دي طلعت مجـ ـنونه يا عم!

-بتقولك كاتبه! يعني أكيد مجنـ ـونه!!

ضحكنا ولما شوفناها خارجه من البيت، قال حاتم:

-المشكله إنها تبان عاقله من بره!! بص هناك...

قالها وهو بيشاور عليها وكمل حاتم:

-استنى ثواني هحاول أكلمها مره تانيه...

وقف حاتم قدامها وقال:

-أستاذه ايمان لحظه من فضلك...

وقفت ايمان وقالت بجديه:

-أفندم!

-احنا في مشكله كبيره بسبب صوره اتسربت من موبايل شروق و...

-بص يا أستاذ...

قاطعها حاتم بغرور:

-دكتور... دكتور حاتم...

-أيًا كان مهنتك! أختك كل شويه تعمل كارثه وتلزقها فيا أنا بجد هقطع علاقتي بيها!

-طيب يعني مكنش معاكِ الباسورد؟!

-يا فندم حتى لو معايا أنا معنديش وقت أفتح صفحتها أصلًا دا أنا بفتح صفحتي بالعافيه! لإني معظم الوقت بكتب...

-حضرتك بتكتبي إيه؟ 

-بكتب قصص وروايات وشعر وخواطر... إنت بس اكتب اسمي على جوجل و...

قالتها بغرور لكن بلعت باقي الكلام وسكتت فجأه وظهر عليها الندم إنها اتكلمت، بصت للأرض وسكتت، فقال حاتم:

-طيب سؤال أخير... إنتِ تعرفي نجمه صح؟

-أكيد طبعًا شروق مش بتبطل كلام عنها... أنا شخصيًا بحس إنها طيبه ومظلومه... منه لله اللي ظلمها! أكيد هعرف هو مين! عن إذنك بقا عشان مينفعش وقفتنا دي!

مشيت إيمان وحاول حاتم ينادي عليها تاني مردتش عليه، ووقف يبص عليها للحظه ويفكر في كلامها!  فشاورتله يركب العربية، قال:

-سمعت يا حازم قالت ايه!

قلت بحسرة:

-سمعت! شاكك إن البنت دي وراها حاجه! احنا هنعمل ايه دلوقتي مع شروق! أختك بتكذب وأنا ابتديت أقلق منها وأخاف عليها من نفسها!

تنهد حاتم بعمق وقال:

-سيب الموضوع ده عليا... وايمان دي أنا هعرف وراها ايه!

قالها ومسك موبايله يبحث عن كاتبه بنفس اسمها لحد ما ظهرت صفحتها قدامه فقال:

-لقيت صفحتها واضح إنها كاتبه مبتدئه... عشره لايك على كل حلقه منهم واحد هي اللي حطاه والتعليقات واحده صاحبتها وعمها وخالها وخالتها وهي كمان معلقه لنفسها وقايله جميل جدًا...

ضحك حاتم وضحكت أنا كمان وبعدين شغلت العربيه ومشيت شويه وحاتم مشغول بالقرايه، ابتسمت وقلت لحاتم:

-عايز أقولك بشرى حلوه...

-خير؟

قلت بابتسامة:

-أسماء حامل...

-احلف!!! يعني أنا هبقى عمو؟

هزيت رأسي بالإيجاب، كنت فرحان أوي، ومرتاح لإني بعد عناء مع نفسي طلعت نجمه من قلبي وقررت أبص لمراتي وبس وأرضى بيها، قال حاتم بحـ ـماس:

-لو طلع ولد تسميه حاتم ولو طلعت بنت سميها زي ما انت عايز...

ضحكت وقلت:

-لا يا عم كفايه علينا حاتم واحد... المهم متقولش لحد بقا دلوقتي...

شاور حاتم على عنيه وقال:

-أمرك يابو حاتم...

ضحكت وانشغل حاتم مع صفحة إيمان وقال:

-هبعتلك لينك صفحتها على الواتس...

ولما وصلنا البيت خبطنا على شروق اللي كانت قاعده في أوضتها وباين عليها الحزن مكنتش بتبطل عياط حتى محضرتش فرح نجمه، طبطب حاتم على كتفها وقال:

-شروق حبيبتي احكيلي بصراحه قولي الحقيقه عشان أساعدك... لإن كريم بلغ مباحث الانترنت واتهمك وممكن تتحبسي ومستقبلك يضيع!

بصلي حاتم بطرف عينه وكنت فاهم مقصده، حاتم دبلوماسي وبيعرف يطلع الكلمه من بوق الأسد، خافت شروق وقالت:

-أتحبس!! لأ أنا معملتش حاجه!

عيطت جامد فحضنها حاتم وطمنها وأنا بتفرج عليهم، قالت شروق بنبرة مبحوحة:

-هحكيلكم كل حاجه بس توعدوني إنكم تساعدوني!

-طبعًا هنساعدك...

قلتها وأنا بقعد قصادها، فقالت بخوف:

-آ... آ... حازم قالي أصور نجمه وكريم وعملت كده! وبعتت الصور لـ...

عيطت جامد فسألتها: 

-بعتِ الصوره لمين يا شروق اتكلمي متخافيش؟ 

-بعتها لـ إيمان صاحبتي... لكن...

قال حاتم بمكر:

-ايمان دي اللي معاها الباسورد بتاع صفحتك؟!

عيطت شروق وهي بتبصلنا بخوف وبتقول:

-لأ... مش معاها حاجه... هي معملتش حاجه أنا متأكده دي بنت طيبه وفي حالها... لكن فـ... فيه حاجه تانيه عاوزه أعترفلكم بيها بس بالله عليكم متتعصبوش عليا...

قال حاتم وهو بيطبطب على ايديها:

-قولي يا شروق احنا عايزين نساعدك...

قالت ودموعها بتسيل:

-فيه شاب أنا معجبه بيه وبنتكلم من أكتر من سنه... وهو اللي معاه الباسورد بتاع حسابي على الفيس... وهو اللي كلم ميسره من حسابي... وأكيد كمان شاف الصور اللي بعتها لـ إيمان... وممكن يكون هو اللي بيعمل كده... 

-مــــيـــــن؟! مين الواد ده؟!

عضت شفايفها بخوف من نبرتي العالية فقال حاتم:

-بهدوء يا حازم احنا بنساعدها مش بنعاقبها!

بص حاتم لشروق وقال بهدوء:

-مين الواد ده يا شروق؟!

شهقت بالبكاء وقالت اسمه بهمس فسألناها أكتر من مره تكرر اسمه فقالت بصوت عالي:

-أكرم... أكرم أخو أسماء... 

اتصدمت ورجعت خطوتين لورا وأنا بردد اسم أكرم، وخرجت من الأوضه وأنا متعصب فخرج ورايا حاتم وقف قدامي وقال:

-بقولك ايه يا حازم الموضوع محتاج هدوء... اصبر واهدى كده عشان نفكر بعقل...

نفخت بضيق وقلت:

-عاوزني أعمل ايه!! دا أنا هروح لـ أكرم ده وأديله فوق دماغه...

-ملحوظه مهمه يا اخ حازم أكرم يبقا أخو مراتك يعني فكر كويس عشان كمان مراتك الحامل! 

غمضت عيني واتنفست بهدوء وقعدت، فقال حاتم:

-أيوه كده ربنا يهديك...

بقلم آيه شاكر 

استغفروا ♥️ 

                ★★★★★★

لما سمعت تسنيم صوت ميسره وهو داخل الشقه دخلت أوضته بسرعه عشان تخضه وتهزر معاه لإنها ملاحظه إنه متأثر وباين عليه الحزن من بعد جواز نجمه، اتخبت ورا السرير فدخل ميسره الأوضه وقبل ما تعمل حاجه خرج تاني بسرعه ففضلت مكانها مستنياه وكانت المفاجأة إنه دخل ومعاه «أكرم» صاحبه، اتوترت تسنيم وفضلت متخبيه ورا السرير زي القطه الخايفه، وهي بتسمع كلامهم مع بعض...

قال أكرم:

-أنا عايز أفهم مالك؟ زعلان ليه إنها اتجوزت لما إنت أصلًا كنت مقرر تنساها!

-كنت بقول كده قدامكم لكن أنا بحبها يا أكرم! أنا حبيتها أوي واتمنيت يحصل أي حاجه واتجوزها... وكنت سايب الموضوع للزمن...

-خلاص بقا يا عم الرومانسي دا انت مبقتش ميسره إنت بقيت مسخره... بص لشكلك في المرايه كده؟ 

بص ميسره لذقنه وشنبه اللي كبروا ووشه المرهق، فقال أكرم:

-البت اتجوزت وانتهى... انساها وشوف غيرها...

-أشوف غيرها! ليه هو أنا زيك! منك لله ياخي إنت السبب في كل حاجه! أنا لا كان ليا في البنات ولا في الحب ولا القرف ده!

قال أكرم بضحك:

-وهو أنا يعني اللي ليا!! وبعدين يا معلم احنا اتفقنا نلعب عليهم مقولتلكش روح حبها!

قال ميسره بسخرية:  

-وإنت طبعًا دوبت شروق في حبك وسيبتها تتجرع من كأس الحرمان...

قال أكرم:

-شروق دي بت خبيثه... وأنا واثق إن هي اللي مفبركه الصور لنجمه... 

وقفوا يتكلموا عن اتفاقهم سوا والتحدي اللي عملوه من أكتر من سنه لما شافوا شروق ونجمه ماشين مع بعض...

                     ,,رجوع للماضي،،

لما ميسره وأكرم نزلوا من عربية الأجرة، شروق ونجمه كانوا قدامهم بيتكلموا ويضحكوا، قال ميسره:

-اللهم بارك البنتين دول محترمين جدًا... 

ضحك أكرم وقال:

-مفيش بنت محترمه ياسطا! كلهم صنف واحد ميغركش المظاهر!

-لا يا عم فيه بنات محترمه يعني أختي وأختك ما شاء الله...

قال أكرم:

-يا حبيبي أختي وأختك دول سلاله نادره مفيش منهم! 

-لا يا أكرم أنا مش معاك...

-طيب اي رأيك أثبتلك... نعمل تحدي ونشوف... جرب إنت مع دي وأنا هجرب مع دي وبالمره نشوف مين فينا دنجوان...

قالها أكرم وهو مختار لنفسه نجمه لكن بص ميسره على نجمه اللي لبسها واسع وقال بابتسامة:

-لأ أنا هجرب مع اللي لبسها محترم دي... وأهي حاجه تكسر الروتين الممل وتطري حياتي شويه...

وبعد فتره تقريبًا ٣ شهور قعد أكرم مع ميسره وقاله:

-البت شروق بقت خاتم في صوباعي يا جدع... دي إديتني الباسورد بتاع الفيسبوك بتاعها ياسطا يعني أنا اللي كسبت...

-نجمه بقا محترمه بطريقه متتخيلهاش حاجه كده بريئة ونضيفه وملهاش في أي حاجه... أنا حبيتها بجد يا أكرم وعايز أتجوزها...

-حبيت مين! إنت عبيط ياض البنت طلما كلمت شاب يبقا هتكلم غيره! ونجمه دي بالذات بنت مش تمام يا ميسره وبتلعب عليك... ياسطا لما تيجي تتجوز لازم تختار واحده مغمضه...

قال ميسره:

-معذور عشان مكلمتش نجمه! لإنها فعلًا مغمضه...

ميسره كان دائما يحكي لأكرم عن نجمه وأخلاقها فأكرم يروح يكلم شروق ويقولها ليه متكونيش زي نجمه بنت عمتك وتلبسي زيها...

شروق كانت بتحس بغيره من نجمه فحكت لأكرم إن نجمه كانت بتحب حازم وماشيه معاه، وفي نفس الوقت مصاحبه ميسره ولما حازم عرف إنها مصاحبه ميسره وليها علاقات سابقه بشباب تانين، سابها وراح يخطب عروسه تانيه اللي بالصدفه طلعت أخته أسماء...

                           ،،عوده،،

بص أكرم لميسره وقال بحمـ ـاس:

-بص احنا لازم ننسى الماضي ونتحرر منه... أنا عايزك تقوم تلبس وننزل عند الحلاق يظبطك كده ونخرج خروجه من بتوع زمان.

وقف ميسره وتنهد وقال:

-ماشي هروح الحمام وأرجعلك...

عضت تسنيم شفايفها بقلق لما أخوها خرج من الأوضه، وقام أكرم يتمشى في أوضة ميسره ويحط من البرفيوم بتاعه هو بيدندن فتح دولابه وطلعله هدوم ورماها على السرير من غير ما يبص وراه فوقعت على رأس تسنيم ورا السرير وحدفتها بسرعه بعيد عنها وحطت ايديها على بوقها تكتم نفسها وهي خايفه وبتدعي محدش يقفشها...

اتأخر ميسره شويه وقعد أكرم يلف في الأوضه يمين وشمال لحد ما وصل لمكان تسنيم اللي غمضت عنيها، ولما شافها اتصدم وبرق عينه، ودير ضهره ليها فتحت تسنيم عين واحده ووقفت بسرعه وسحبت ملاية السرير تغطي نفسها وشعرها لإنها كانت لابسه البيجامه وبدون حجاب، في نفس الوقت دخل أخوها للأوضه ووراه والدتها بالعصير...

استغفروا♥️

                  ★★★★★★

                      «كريم»

لما فتحت عيني، وملقتهاش جنبي قومت بسرعه، بصيت في الساعه لقيتها داخله على ٤ العصر! مش عارف إزاي نمت كل ده ومحستش بنفسي...

خرجت من الأوضه أدور عليها وكانت في الحمام، ولما بصيت للأوضه التانيه لقيت غطا على السرير فعرفت إنها منامتش جنبي، بصيت الدبله اللي لسه في اليمين، وأنا بفكر هقول لنجمه إزاي إني بحبها! صعبانه عليا أوي من امبارح وهي في الحمام!!

خبطت عليها وقلت:

-نجمه! إنتِ لسه تعبانه؟

فتحت الباب وخرجت، كانت لسه بالإسدال لكن باين عليها أثر النوم أو يمكن التعب، قالت:

-صباح الخير... 

قلت بابتسامة:

-يا صباح النور اللي دخل حياتي... بقا أنا محظوظ للدرجه دي عشان أصطبح بالنور ده كل يوم!

ابتسمت وبصت للأرض بحياء وفجأه مسكت بطنها تاني بألم وقفلت الحمام في وشي، قلت:

-إيه الحكايه دي؟!

وبعد شويه خرجت من الحمام، وقعدت قصادي، فقلت:

-إنتِ أكلتِ إيه عامل فيكِ كده؟

-لأ الموضوع مش أكل... أنا لما بتوتر بيحصلي كده... 

-وإنتِ متوتره ليه دلوقتي!

تنهدت وبصت للأرض وقالت:

-التوتر مش بيسيبني! 

بصتلي وقالت بنظرات حزينه:

-أنا تعبت أوي يا كريم... أنا عارفه إن الدنيا كلها ابتلاءات وأنا راضيه والله لكني تعبانه أوي... عارف ايه أكتر حاجه نفسي فيها؟

ملامحها كانت مرهقه، والدموع اتجمعت في عينيها قلت بأسى:

-إيه؟

قالت بابتسامة مهزومة:

-نفسي أنام... أنا بقالي أكتر من أسبوع مبنامش! وطول الوقت كنت خايفه بابا وماما يعرفوا حاجه عن الفيديوهات! أنا خايفه عليهم أوي...

اتعدلت في قعدتي وقلت:

-صدقيني يا نجمه أيًا كان اللي بيعمل الصور دي حقك مش هيضيع عارفه ليه؟ لإن ربنا عالم بكل حاجه وان شاء الله ربنا يجبرك وينصرك... قصدي يجبرنا وينصرنا... ما احنا خلاص بقينا واحد!

ابتسمت وهزت رأسها باقتناع، عجبني أوي رضاها، كل يوم بحبها زيادة، سكتنا شويه وكنت ببصلها وبتأملها ومش عارف أنزل عيني من عليها، فبصتلي هي كمان وقالت:

-أنا مش عايزه أظلمك معايا عشان كده قررت أديك فرصه تراجع نفسك وأراجع نفسي أنا كمان لأننا اتسرعنا في الجوازه دي...

اتصدمت لأن كلامها معناه يخوف! وقلت:

-نعم!!! وقت ايه! أنا مش محتاج أي وقت أنا اخترتك بكامل إرادتي و....

قاطعتني وقالت:

-بس أنا محتاجه وقت لأني مختارتكش بكامل إرادتي!

هزيت راسي بتفهم وأنا بقول:

-ومالو خدي وقتك لحد ما تتعودي عليا يعني ساعه اتنين تلاته براحتك خالص...

ــــــــــــــــــــــــــــــــــــــــــــ

تكملة الرواية من هناااااااا