رواية حبيبي المدير الفصل الخامس و عشرون 25بقلم شيماء صبحي( جديده وحصريه فى مدونة قصر الروايات)

رواية حبيبي المدير الفصل الخامس و عشرون 25بقلم شيماء صبحي( جديده وحصريه فى مدونة قصر الروايات)

رواية حبيبي المدير الفصل الخامس و عشرون 25بقلم شيماء صبحي( جديده وحصريه فى مدونة قصر الروايات)

#الفصل_25

#رواية_حبيبي_المدير

#الكاتبة_شيماء_صبحي

"احلام اول مشافت شكل امها واختها خافت وقربت من ماهر قبل ما يمشي ومسكت فيه قالت:استني يا ماهر خليك معايا ..انا خايفه”””قالت كلمة خايفه بهمس وهوا سمعها بسهوله  فا بص علي والدتها واختها وحرك راسه وقال بهدوء :طيب متخافيش انا معاكي  ادخلي بس جهزي غرفة والدك ليهم واعملي زي ما طلبت منك ! 

حركت احلام راسها بالموافقه وقربت من مامتها واختها وقالت:هجهزلكم اوضة بابا علشان تناموا فيها ؟

مامتها حركت راسها بالموافقه ولاكن مريم كانت معترضة وقالت:متخليكي انتي نامي فيها مع جوزك وسيبينا احنا ننام في اوضتك؟

احلام حركت راسها برفض وقالت:لا اوضتي سريرها صغير ولاكن اوضة بابا مناسبه!

مريم باستغراب:هوا مش اوضتك كان فيها سريرين هوا التاني دا راح فين!

احلام قالت بخجل:بعته علشان كنت محتاجه فلوس!!

مامتهم قاطعت كلامهم وقالت:خلاص يا حبيبتي احنا هننام في اوضة باباكي ادخلي يا مريم مع اختك علشان تجهزي معاها الاوضه!

رفعت احلام ايديها باعتراض وقالت:لا متتعبيش نفسك انا هجهزها بسرعه!

مريم بصت لاختها بضيق وحركت راسها واحلام اتحركت من قدامهم ودخلت اوضة والدها وبدات تاخد كل الاوراق المهمه من الدولاب وتحطها في كيس وبعدما خلصت خرجت ليهم وهيا بتبلغهم ان الاوضة جاهزه ولان الاوضه كانت مترتبه في البدايه احلام معملتش فيها حاجه فقالت كلامها ليهم وهما اتحركوا بسرعه ودخلوا للاوضة وماهر بص لاحلام وحط ايديه علي ضهرها وهوا بيشاور لاوضتها وبيقول :خلينا ندخل نرتاح احنا كمان علشان الوقت اتاخر !

احلام بصتله بخجل وتوتر من قربه منها وحركت راسها وماهر ابتسملها علشان يطمنها وبالفعل دخلوا الاتنين للاوضه وقفلوا الباب عليهم كويس!

ماهر بص علي السرير وقال بتساؤل :يا تري مين هينام جوا ومين هينام برا؟

احلام خجلت وقالت:انا هنام جوا زي امبارح !

ماهر حرك راسه بالموافقه وقال:طيب انا هغير هدومي وانتي كمان غيري هدومك علشان ننام .

.احلام بدات تتوتر اكتر من كلامه وهوا بدأ يقلع  جاكت البدله قدامها و بدأ يفك زراير القميص وهيا واقفه مكانها تبص عليه وساكته لحدما ماهر بصلها وقال:مفيش حاجه تخليكي تخجلي مني انا جوزك !

احلام حركت راسها بهدوء وقربت من دولابها خرجت منه بيچاما ليها وطلعت لماهر هدوم جابتها ليه من اوضة باباها الصبح وادتهاله وهوا اخدها منها وابتسم وهيا كانت بتبص للاوضة وبتدور علي اي مكان تغير فيه هدومها من غير ما هوا يشوفها ولاكنها لقت ان الاوضة مفيهاش حاجه ضخمه غير الدولاب ولانه واخد ركن لوحده مكانش ينفع تستخبي جمبه، فاستسلمت احلام لان مفيش قدامها حل تاني وقررت تغير ملابسها قدامه وبالفعل بدأت احلام ترفع الدريس ببطئ ولاكنها مقدرتش انها تقلعه خالص فبصتله لقته مديلها ضهره فحست براحه شويه وغيرت هدومها بسرعه وفردت شعرها علي ضهرها وقربت منه وهوا كان لسا واقف وساكت  فقالت احلام بهدوء :انا خلصت!

ماهر لف جسمه يشوفها وانبهر بجمالها للمره الثانيه وبدأ يدقق في تفاصيلها وقلبه بيتحرك كل ما احلام ترمش بعيونها وتبص في عينيه..

ماهر بتوتر:هتنامي!

أحلام بهدوء:ايوا.

ماهر بعد عن السرير علشان احلام تقدر تطلع عليه واول ما طلعت علي السرير بدات تنام وتغطي نفسها وهوا كان واقف بيحاول ياخد نفسه بسبب توتره من شكلها.

احلام لفت جسمها وادتله ضهرها وهوا قرب من السرير ونام جمبها  وقبل ما يلف جسمه فضل يبصلها وهوا مش مصدق انها فعلا احلام وللحظة افتكر ذكرى ليهم وكانت اول مره قلبه يدق ويكتشف انه بيحبها؟

"ماهر كان بيلعب كورة في النادي مع أصحابه وكانت احلام المفروض هتخرج من درس قدام النادي وكانوا هيرجعوا للبيت مع بعض ..

واحده من زملاء احلام قالت:مش هتروحي معانا؟؟ 

احلام برفض:لا هروح مع ماهر..قالت احلام كلامها وخدودها احمرت بسبب حبها  واعجابها بيه.

فقالت زميلتها بغيره من كلامها :اشمعنا ماهر دا يعني هو انتوا مرتبطين؟

احلام اتوترت من كلام زميلتها وقالت برفض:لا مش مرتبطين انا وماهر اخوات وبعدين بابا هو اللي قالي اروح معاه علشان طريقنا واحد وكمان المسافه طويله!

البنت حركت راسها بتفهم وقالت:خلاص ماشي براحتك احنا هنمشي بق مع السلامه؟

احلام رفعت ايديها وشاورتلهم بابتسامه واول ما زمايلها بعدوا عنها بمسافه اخدت احلام نفسها بخجل وهيا بتدخل للنادي ووقتها كان ماهر بيلعب كوره وكان مغول مع فريقه وكان جسمه كله مليان ماية بسبب المجهود الكبير اللي بيبذله في الجري ..

احلام اول ما دخلت وشافته بيلعب ابتسمت لان كان شكله جميل وشعره كان نازل علي وشه بسبب انه مليان مايه فكان مخلي شكله وسيم اكتر..

ولان  ماهر كان  شاب رياضي فكان بيمتلك مهاره كبيره في الجري وكانوا اصدقاءه بيعتمدوا عليه ومسمينه المنقذ بسبب سرعته وانه بيلحقهم دايما قبل ما الفريق الثاني ياخذ منهم الكوره ..

واحد من زمايله في الفريق وجهله الكوره علشان يدخلها جول وبالفعل ماهر قدر يدخل هدف واول مشافته احلام فرحت وقالت بصوت عالي علشان تشجعه:برافووووا ماهررر؟

انتبه ليها ماهر وابتسم لوجودها وهيا قلبها دق لما بص في عينيها..فابتسملته وشاورتله علشان يروحوا وهو حرك راسه بالموافقه وحدف لاصحابه الكوره علشان هيخرج من اللعبه وبسبب غيرة واحد من الفريق المنافس ليه حدف الكوره بقوه عليه ولاكن ماهر  تفادها  وهوا مش واخد باله ان الكوره جايه عليه  والكوره للاسف جت في احلام بالغلط وبسبب قوتها احلام وقعت علي الارض..

ماهر اول ما انتبه ليها وشاف الشاب بيبص عليها وبيضحك بشماته قرب منه بغضب علشان يضربه واصحابه جريوا علي احلام علشان يطمنوا عليها وماهر مسك زميله  اللي ضرب احلام وبدأ ضربه بكل قوته وهوا متعصب وبدا زمايله التانيين يبعدوهم عن بعض وماهر او ما انتبه ان اصحابه اللي في الفريق مقربين من احلام وواحد منه كان بيقرب ايديه علي شعرها فبعد بسرعه عن زمايله  الي ماسكينه بغضب وجري عليها بسرعه وهوا حاسس بقلبه بيشتعل من الغيره..

احلام كانت بتبكي بسبب انها اتألمت وكان زميل ماهر بيحاول يهديها ولمس وشها علشان يمسح دموعها ولاكن ماهر مسك ايديه وزقه بغضب وقال:ابعد ايدك دي ؟

زميله بصله بدهشه لانه ميقصدش اي اساءه ليها ولاكن ماهر قاطع كلامهم بغضب وقال:خلينا نمشي يا قومي!

خافت احلام من صوته العالي  وغضبه فحركت راسها ومسكت ايديه وهوا ساعدها تقوم وخرجوا من النادي وقبل ما يمشوا في الطريق افتكر انه نسي شنطته فطلب منها تستناه مكانها لحدما يجيب شنطته  ويرجعلها وهيا وافقت علشان كان متضايق جامد ووشه احمر فخافت انها تقول اي كلمه وتزيد من غضبه ..!

ماهر رجع لاوضة تغير الملابس علشان يجيب شنطته اللي نساها ولاكنه قبل ما يدخل سمع زمايله اللي كانوا وقفوا اللعب و بيتكلموا عن احلام  وبيقولوا لبعض قد ايه هيا بنت جميله وانها ازاي بتحب ماهر وهو متجاهلها  ومش بيحبها وبدا كل واحد يقول منهم  للتاني انه بيتمني يرتبط بيها لانها بنت جميله وشاطره ..فماهر بدأ قلبه يزداد بالغيره الشديده وحس انه عايز يدخل يكسر راسهم كلهم  بسبب انهم بيتكلموا عليها بالطريقه المثيره دي .. فقرر ياخد نفسه ويهدي واول ما دخل علشان ياخد شنطته زمايله اتصدموا من وجوده وسكتوا. 

ماهر وقتها بصلهم بغضب وهما فهموا انه سمعهم فالتزموا الصمت لحدما يمشي وبالفعل ماهر خرج من النادي  بسرعه وقرب منها تاني  ولما لقاها حطه ايديها في  مكان الضربه وبتتآلم قال بغيره وغضب:معدتيش تجيلي تاني النادي وابقي روحي مع زمايلك البنات!

احلام اتصدمت من كلامه وقالت بحزن:بس بابا اللي قالي اروح معاك!

ماهر بضيق:انه هبلغه اني مش هقدر اروح معاكي تاني لاني هاخد درس اضافي ومش هعرف اوصلك !

احلام زعلت من كلامه وهوا بص لوشها ولما شاف دموعها اتوتر وقرب ايديه من وشها ومسحها وقال وهوا متضايق من نفسه علشان اتعصب عليها : متعيطيش حقك عليا  وبعد كدا متبقيش تسيبي شعرك مفرود تاني ولميه بتوكه وابقي البسي كاب علشان الشمس ؟

احلام بصتله وسكتت وهوا لما دقق في ملامحها حس باحساس غريب وقال بتوتر من نظراتها:خلينا نمشي.

احلام حركت راسها بهدوء ومشيت وكانت وقتها ساكته وهوا كان متعود يسمعها بتحكيله عن يومها ولاكنها مقالتش حاجه ففكر انها بتعمل كدا علشان الضربه اللي اخدتها فقرر يسكت ولاكنه اتفاجئ في اليوم التاني انها لما كانت بتروح معاه المدرسه بطلت تتكلم معاه وكلامها بق قليل ..

فضل ماهر يضايق لانه مش متعود علي سكوتها فقرر يسألها ليه بتتعامل معاه برسميه واول ما قرب منها وهيا مع اصحابها  علشان يسألها ..احلام بصتله وقالت برفض:معلش يا ماهر انا عندي درس ولازم امشي؟

ماهر اتصدم لانها اول مره تعامله كدا ففضل يبص عليها وقلبه مشتعل بسبب انه بدأ يحبها ولاكنهانر بينكر احساسه لانه شايف انها زي اخته ومش متقبلها غير كدا؟

فاق ماهر علي ذكرياته معاها وهو بيبصلها وبيقول في عقله:بس دلوقت بقت مراتك مكنتش تتوقعها دي صح..

عدي وقت وماهر مثبت نظرة  عليها في صمت  واحلام لانها بتتقلب كتير اثناء نومها بدأت تلف جسمها وقربت منه وكان وقتها لسـا باصص عليها واول ما لقي وشها قريب من وشه بدأت ضربات قلبه تتصارع وبقي يبصلها وهوا مندهش..

احلام رفعت ايديها وحطتها علي رقبته وقربت منه اكتر وهوا كان ثابت وكأن جسمه وقف عن الحركة وفضل يبص علي شفايفها وهو مش قادر يقاوم جمالهم؟ 

قرب ماهر منها ببطئ لحدما وصل مقابل شفايفها وبدأ ياخد انفاسه ببطي وبيقاوم مع نفسه  لحدما استسلم وقرر يطبع قبله سريعه وبالفعل في ثواني كان طبع قبله علي شفايفها واحلام كانت نايمه ومش حاسه بيه فقرر ماهر يستغل نومها العميق فانه يتبادل معاها قبله رومانسية ولانه وقع في عشقها مقدرش يقاوم افكارة الشريره وبدأ يقبلها ..

وبعدما انتهي ماهر من قبلته بص لاحلام بحب كبير ولمس وشها بلطف ودمعه نزلت من عيونه وكانت بتعبر عن ندمه  الشديد فانه يسيبها كل السنين دي لوحدها و بدات احلام تضم حاجبها لأن بدأ يطاردها حلم مزعج فقرر يطمنها ويخليها تنام في حضنه واول ماسحبها عليه بدأت احلام تحس بشعور من الراحة والاطمئنان وتضم نفسها اكتر ليه..

ابتسم ماهر وغمض عينيها براحه كبيرة وسمح لنفسه انه ينام علشان يصحي بكرا بدري .

___________

                'في غرفة والد احلام'

فاديه مامت احلام قالت بضيق من بنتها:بتفكري في ايه المره دي يا مريم انا بقيت اقلق من سكوتك المفاجئ دا ؟

مريم قالت وهيا بتنام علي السرير وبتبص للسقف وبتقول بتنهيده :ماما هو انتي بتحبي اختي احلام!

فاديه استغربت سؤال بنتها الغريب وقالت:اكيد بحبها دي بنتي وكمان متنسيش انها تبقي  اختك؟

مريم قالت  بتجاهل:عارفه بس مدام بتحبيها اوي كدا سيبتيها لوحدها ليه من ٩ سنين؟

فاديه قالت بتوتر :سيبتها علشانك.. مكنش لازم اسيبك في المصيبه دي لواحدك خصوصا ان لو ابوكي اوعمك عرفوا  باللي انتي عملتيه كانوا قتلوكي!

مريم  قالت بسخريه:بس انا مغلطش يا ماما  انا اتجوزت عرفي؟

مامتها ضربتها بغضب وقالت:لولا اني عارفه انك بنت طايشه مكنتش عبرتك بس بلاش بق تفتحي في الماضي تاني وقوليلي بتفكري في ايه دلوقتي وليه صممتي نيجي هنا تاني ؟

مريم قالت بتساؤل : تفتكري لما احلام  تعرف اننا راجعين علشان  ناخد ورثنا هتعمل ايه؟

فاديه  بصتلها وقالت بتساؤل:انتي هتقوليها امتي علي الموضوع دا.

مريم غمضت عينيها وقالت : بكرا اخر يوم في العزاء فانا هبلغها بالليل علشان تعمل حسابها اننا هنبيع البيت دا وكل واحده تاخد نصيبها .

فاديه نامت جمب بنتها وقالت برفض:انا شايفه اننا نأجل الموضوع دا دلوقت وبعدين دي بتقلك هترجع بيتها يعني كدا كدا هتسيب البيت  فخلينا نعيش في البيت وخلاص واهو نكون ارتاحنا من يوسف وقرفه؟

مريم فكرت في كلام مامتها وقالت بتفكير:بس انا شايفه اننا نروح نعيش معاها في بيتها التاني احسن!

فاديه باستغراب:تقصدي ايه مش فاهمه؟

مريم بصت لامها وقالت بابتسامة مليانه طمع:القصر؟؟ بيقولولك عندهم قصر عارفه ياعني ايه قصر يا عني مساحه كبيره وحمام سباحه وجناح وفلوس؟

فاديه بصت لبنتها وسكتت ومريم قالت بتساؤل:انتي مش نفسك تعيشي في مستوي عالي!

فاديه بابتسامه:نفسي بس تفتكري احلام هتوافق اننا نعيش معاها خصوصا انها لسا مش متقبلانا؟

مريم قالت بضيق من كلام والدتها : هتوافق غصب عنها طبعا ..احنا اهلها وهيا ملهاش غيرنا واكيد هتكون محتجانا جمبها واحنا تحت أمرها!

فاديه  قالت بتردد: بس يا حبيبتي دا برضوا قصر جوزها يعني احنا اخرنا نروحلها زياره  بس ولاكن ملناش نجبرها  انها تعيشنا معاها !

مريم ضمت حاجبها بضيق وقالت:يعني ايه ..مفيش قصر ومفيش جناح؟

مامتها برفض:اهدي يا مريم انتي داخله فاتحه صدرك كدا ليه دي البنت لسا مصدومه من وجودنا اهدي وبراحه واحده واحده عليها احنا لازم نخليها تسامحنا الاول علشان نعرف تقنعها  ونقرب منها اكتر وبعدها نخليها ترجع تتعلق بينا من تاني!

مريم حركت راسها بالموافقه وقالت:طيب يا ماما انا هنام  بق تصبحي علي خير؟

فاديه بستلها وقالت : ماشي وانتي من اهله؟

مريم غمضت عينيها وهيا بتفكر في كلام والدتها ولقت ان عندها حق ولازم انها تقرب من احلام اكتر علشان تقدر تكسب ثقتها من جديد وتعرف بعدها تاخد منها اللي هيا عايزاه.. 

وبعد وقت من التفكير الشديد مريم قررت تنام وبالفعل نامت ومامتها كانت لسا صاحيه وبتفكر في كلام بنتها وبدأت تفتكر ماهر وان احلام كانت بتحبه وهيا صغيره  ولاكن ماهر مكنش بيحبها فسألت نفسها وقالت: ازاي رجع  يحبها وازاي بق غني كدا ودلوقت  بيقول انه اتجوزها؟؟

والدة احلام قالت كلامها لنفسها ولاكنها ملقتش اي إجابه فقررت تستسلم وتنام هيا كمان ..

______

تاني يوم صحي ماهر بدري وقرر انا يروح القصر علشان يخلص موضوع سيلين ويرجع لاحلام تاني وبالمرة يشوف حمزه عمل ايه لحد دلوقت في الجناح بتاعه زي ما طلب منه.

وبالفعل بدأ يجهز وغير هدومه بسرعه وبعدها قرب من احلام اللي كانت نايمه بعمق وقال بهمس:عاوزك تفضلي نايمه كدا لحدما ارجع وياريت متخرجيش من الأوضه!

اتقلبت احلام بنوم وهوا ابتسم وخرج من الاوضه ونزل ركب عربيته اللي سابها منعم ليه علشان لو حب يروح في مكان وهو مش موجود؟

وفي القصر كان حمزه نايم في حضن مرسي واللي كان بيصدر اصوات عاليه اثناء نومه فصحي حمزه بخضه لان مرسي بدأ يصدر منه أصوات عاليه بطريقه أوفر فبصله وقال بغضب:انت نايم ولا بتتخانق ؟

قال حمزه كلامه وقرر يروح اوضته ينام فيها واول ما خرج من الاوضه شاف خاله اللي كان لسا داخل من باب القصر ومركز في موبايله!

حمزه قال بتساؤل:خالي انت هنا من امتي؟

ماهر انتبه ليه وقال بتساؤل:انت صاحي بدري ولا عيني فيها حاجه!

ابتسم حمزه وقال بخجل :ايوا صاحي بدري بس انا كنت رايح اكمل نومي لان مرسي نومه مزعج بس قولي انت ايه اللي جايبك بدري كدا وفين احلام !

ماهر بصله وقال:جاي اشوف المشكله اللي سيلين عملاها واحلام في بيتها متقلقش عليها..

حمزه حرك راسه وابتسم وماهر قال بتساؤل 

 :هيا سيلين فين دلوقت !

حمزه شاور علي السلم وقال:فوق في اوضتها مربوطة علي السرير بتاعها !

ماهر بصله بصدمه وقال:نهارك اسود انت  بتقول 

ايه يا عني ايه مربوطة.. 

حمزه حرك راسه بتردد وماهر قال:تعالي ورايا يا غبي انت!

ماهر اتحرك للأعلي بسرعه وحمزه طلع وراه واول ما وصل ماهر لاوضة سيلين فتح الباب ولما دخل يشوفها  لقاها نايمه ومربوطه في السرير بحبل فقال بضيق:ايه المنظر دا ومين قالكوا تعملوا فيها  كدا؟

حمزه بصله وقال بخوف:انا اللي طلبت منهم يربطوها لانها امبارح كانت بتضرب فينا وعايزه تاخد من البودره تاني فقررت امنعها ومكنش قدامي غير الطريقه دي !

ماهر بصله بشك وقال:وهيا فين البودره دي وازاي سيلين اصلا قدرت تجيبها هنا ؟.

حمزه بصله وشرحله عن كلام الحارس وتحليله للي حصل وماهر افتكر اليوم اللي سيلين خرجت فيه بطريقه غريبه وحرك راسه بتفهم وقال:طيب ساعدني نصحيها!

قال ماهر كلامه وقرب من سيلين اللي واضح عليها التعب فلمس وشها وقال بتكرار :سيلين..سيلين قومي؟

سيلين فاقت علي صوته ولمسته واول ما شافته قالت :ماهر هل انت هنا حقا!

ماهر قرب منها وبدأ يفك الحبل من عليها وهيا حضنته بقوه وقالت وهيا بتبص لحمزه بغضب:انظر ماذا فعلوا بي رجالك؟

ماهر بعد عنها وقال:متزعليش منهم يا سيلين  اهم حاجه دلوقت فوقي علشان نتكلم في حاجه مهمه..

سيلين حركت راسها وعدلت نفسها وقعدت علي السرير وماهر بصلها وقال بجديه:سيلين انتي لازم ترجعي دبي تاني لان وجودك هنا مش كويس لاني عرفت كل حاجه وطبعا انا مش من حقي اعاقبك ولاكن الحكومة عنا تقدر تعمل كدا  ..عاوزك بس  تفهمي الوضع وانا بعمل كل دا لمصلحتك انتي؟

سيلين بصتله بحزن وقالت:هل تريد مني العوده حقا!

ماهر حرك راسه بالموافقه وهيا قربت ايديها من وشه وقالت بحزن:هل تريد مني ايضا ان انسي حبك!

ماهر حرك راسه بالموافقه وقال:انا قولتلك اني بحب غيرك وصدقيني انا لما فكرت فيكي اكتشفت انك افضل صديقه ليا واحنا مش مناسبين نكون حبيبين ولاكن اعتقد اننا أفضل أصدقاء .

سيلين بدات تبكي وهيا بتقول بحزن :انا اتألم بسببك يا ماهر لماذا تفعل هذا بي ؟

ماهر بص لحمزه وقال بجديه :احجزلها تذكره لدبي ولو في طياره هتطلع دلوقت يكون افضل؟

حمزه حرك راسه بالموافقه وخرج من غرفتهم واتواصل مع واحد شغال في المطار علاقتهم قريبه من بعض وسأله لو متواجد تذاكر لدبي النهارده والشاب بلغه ان في طياره هتطلع بعد ثلاث ساعات فطلب منه حمزه يحجز تذكرة والشاب وافق وبعدما انهي حمزه اتفاقه معاه قفل المكالمة ورجع لماهر وبلغه انه حجز تذكره لدبي والطياره هتتحرك بعد ثلاث ساعات !

ماهر بص لسيلين وقال:اتمني تفهميني وانا بقولك كدا علشان مصلحتك.. انتي هنا بتضري نفسك مش بتنفعيها وصدقني لو وقعتي تحت ايد الحكومه مش هتعرفي تخرجي من تحت ايديهم لان هنا مصر مش دبي ؟

سيلين بدات تخاف من كلامه وحركت راسها بالموافقه وقالت:حسنا سوف اذهب..

ماهر حرك راسه بالموافقه وطلب منها تجهز شنطتها وعرفها ان حمزه هو اللي هيوصلها للمطار.. 

قال ماهر كلامه وبص لحمزه وقال:سمعتني..

حمزه حرك راسه بالموافقه وقال:حاضر يا خالي بس انت هتروح فين دلوقت..

ماهر:هروح اشوف الجناح بتاعي واشوف ناقصه ايه علشان احلام خلاص هتعيش معانا!

حمزه بصله وقال بفرحه:بجد يا خالي اخيرا؟

ابتسم ماهر علي حماس حمزه الشديد وبعدها خرج من الاوضه واتجه لجناحه واول ما وصل  بدأ يبص لكل ركن في الغرفة بتركيز وبعدما عرف ايه الحجات اللي ناقصاه فتح موبايله واتواصل مع مهندس ديكور وبلغه بطلبه وعرفه انه محتاج التصميم في خلال يومين وبعدها قفل موبايله وقرر يدخل ياخد شاور سريع ويغير هدومه علشان يرجع تاني لأحلام..

اتجه ماهر لغرفة تبديل الملابس وبدا يقلع هدومه ويجهز اللبس اللي هيلبسه وهوا خارج لمح ورقه غريبه واقعه علي الارض..  

قرب ماهر من الورقه وفتحها باستغراب من شكلها  لانها كانت قديمه ..فقعد علي الكرسي علشان يقرأ محتواها ولاكنه اتفاجئ ان الورقه دي مكتوبه بخط ايديه وكان محتوي الورقه عباره هن :

"متزعليش مني يا احلام انا بس كنت متعصب ومش عارف ليه زعقتلك رغم انك ملكيش ذنب… ارجوكي كلميني تاني علشان انا مش متعود اشوفك ساكته… وختم كلامه بخط صغير وكتب:ماهر الصياد…"

ابتسم ماهر علي الكلام اللي مكتوب وبدأ يفتكر اللحظة اللي كتب لاحلام الورقه دي وكانت وقتها احلام مقرأتهاش لانه كانت متضايقه منه ولما شافها بترميها في باسكت القمامه  زعل لانه كان يتمني انها تسامحه في اللحظة دي ولاكنه ميعرفش ان احلام رجعت تاني للباسكت ودورت علي الورقه واخدتها تاني وانها احتفظت بيها طول السنين دي كلها ..

حط ماهر الورقه في درج من ادراج الغرفه بعدما طبقه ورجعه لحالته زي مكان وبعدها دخل للحمام ياخد شاور سريع علشان يخرج.

__________

وبداخل بيت صغير في نفس المنطقة اللي عايشة فيها احلام كان البيت دا عايش فيه اسره بسيطه مكونه من اب وام وولد وبنت وكان الولد صغير يبلغ من العمر٥ اعوام والبنت كانت تبلغ من العمر١٧ عاما..

والدتهم كانت بتحط الفطار علي السفره الصغيره وبتقول:قومي يا حنين علشان المدرسه ..حنين همست بتعب:خليني اجازه ياماما النهارده!

مامتها قربت منها وقالت بصوت اعلي:مينفعش يا حنين المدرسه مهمه وانتي لازم تروحي علشان مستواكي مينزلش تاني ونعاني من جديد..

بعدت حنين الغطاء عن جسمها بزهق وقامت وهيا بتبص حواليها وبتقول :كل يوم مدرسه مدرسه انا تعبت بجد امتي هتخرج وارتاح !

قالت حنين كلامها ودخلت تغسل وشها علشان تفوق وبعدما خرجت قربت من مامتها وقالت :فين حمزه اخويا مصحاش ولا ايه!

مامتها :حمزه حبيبي نايم اصله كان سهران بالليل بيلعب وتعب!

حنين بصدمه من كلام والدتها:يعني هوا يسهر ويلعب وانا لأ!

مامتها :انتي بتقارني نفسك بالطفل الصغير وبعدين انتي وراكي مدرسه ولاكن هوا لسا مورهوش حاجه!

حنين غمضت عينيها بزعل وقالت:خلاص يا ماما انا غلطانه خليه ينام براحته وانا هدخل البس هدومي علشان متأخرش علي المدرسه!

مامتها قالت  بتساؤل:يعني مش هتفطري؟

حنين برفض:لأ مش جعانه..

قالت كلامها وقفلت الباب وراها بضيق وهيا بتاخد نفس وبتقول:النهارده هيكون يوم طويل واكيد المدرسين هيرخموا عليا تاني علشان مبروحش عندهم دروس..

حنين اتنهدت وهيا بتلبس هدومها المدرسيه وبدأت تلف الطرحه وهيا بتقول:اجمل الناس هم البسطاء، انا هكتفي بشكلي كدا النهارده ..

كانت بتكلم نفسها في المرايه وبعدها خرجت بسرعه من اوضتها.. حنين قالت وهيا بتبص لمامتها:انا محتاجه مصروف..

والدتها حركت راسها بالموافقه وقالت:هاتي الشنطة بتاعتي من وراكي!

حنين ابتسمت وقربت من شنطة والدتها المتهالكه وقربتها منها وادتهالها..والدتها فتحت الشنطة وطلعت منها مبلغ بسيط جدا وقالت:خدي يا حنين حاولي متخلصيهوش  كله علشان يكفيكي بكرا كمان لان القبض بتاعي هيتأجل كمان يومين!

حنين بصت للعشرة جنيه اللي في ايديها وقالت بحزن:حاضر يا ماما متقلقيش هحافظ عليها..

مامتها بصتلها وحركت راسها وقالت بهدوء :يلا يا بنتي اتوكلي علي الله ربنا يحرسك ويوفقك خلي بالك من طريقك..

حنين  بصت لمامتها بيأس وحركت راسها بالموافقه وخرجت من بيتهم وكان والدها واقف علي الباب وماسك سيجاره في ايديه وبيطلع الدخان من فمه بطريقه محترفه وبيقول بتساؤل وهوا بيوقفها برجليه :علي فين!

حنين قالت  بتوتر:رايحه المدرسه!

والدها بتساؤل:معاكي فلوس!

حنين حركت راسها وقالت:ايوا ماما ادتلي حق المواصلات؟

والدها بص لايديها اللي كانت ضاغطه علي الفلوس بقوه وقال:معاكي كام..

حنين بخوف منه:عشرة جنيه!

والدها حرك راسه بالموافقه وطلع من جيبه خمسة جنينه وقربها منها وقال خدي دي..

حنين بصت للفلوس باستغراب ولاكن نظرتها اتحولت لصدمه لما اخد منها العشرة جنيه وقال:هاخد انا دي علشان اجيب سجاير!

حنين بصتله بصدمه وقالت:بس دي مش هتكفي..

بصلها والدها بغضب وقال:مش عاجباكي هاتيها..

حنين حركت راسها برفض وقالت:لا عجباني..قالت كلامها وخرجت من البيت بسرعه  واتجهت للموقف اللي هتركب منه علشان تروح مدرستها وكانوا زمايلها  البنات مستنينها واول ما وصلت قالوا:الحساب النهارده علي حنين اظن ان احنا دفعنالك كتير جه الدور عليكي تدفعيلنا النهارده..

حنين بصتلهم ودموعها اتجمعت في عيونها وقالت بحزن :حاضر انا اللي هدفع..

اصحابها ابتسموا بفرحه وركبوا العربيه مع بعض وبعدما العربيه اكتملت واتحركت طلب السواق منهم يلموا الأجره من بعض وبدأوا أصحاب حنين يبصولها ومستنينها تطلع الفلوس وتحاسب وبالفعل بدأت حنين تطلع من شنطتها محفظتها الصغيره وكانت فيها فلوس فكه وبدات تعد حساب خمس افراد وبعدما خلصت كانت كل الفلوس اللي معاها خلصت فبصتلهم بحزن وبعدها ادت للسواق الحساب..

السواق بص لكمية الفكه اللي هيا ادتهالوا وقال بسخريه:انتي فاتحه كشك ولا ايه يا انسه كل دي فضه؟

حنين خجلت بينما اصحابها ضحكوا وكانهم مستنين يسمعوا الجملتين دول ..حنين ابتسمت وهيا بتحاول متبينش انها اتضايقت ولاكن كان واضح عليها انها مش مرتاحه..

_______________

في منزل احلام كانت صحيت وبصت حواليها لقت ان ماهر مش موجود فقلقت وقامت تدور عليه واول ما فتحت باب اوضتها لقت ماهر داخل وكان في ايديه شنط كتير..

احلام بتوتر:هو انت كنت فين !

ماهر حط الشنط اللي في ايديه علي السرير وقال:كنت بخلص حاجه في القصر عندي وجبتلك الحجات دي !

احلام بصت للشنط وهيا مستغربه وهوا قال:شوفي انا جبتلك ايه وانا هخرج في البلكونه اشم شويه هوا..

احلام حركت راسها بالموافقه وهوا اتحرك في اتجاه البلكونه وبعدها  احلام بدات تفتح الشنط دي واول مشافت اللبس اللي جابوا ماهر اتصدمت لان الهدوم كان واضح انها غاليه بسبب جودتها وشكلها..

ماهر كان بيبص للسماء وبيتأملها كالعاده واحلام كانت واقفه وراه وباصه عليه وساكته ولحدما انتبهت انه اخد باله من وجودها جريت بسرعه وبدات تشوف بقيت الاكياس..

فتحت او كيس ولقت شنطة غاليه ومعاها برفيوم فطلعت البرفيوم وشمته واول ما شم ماهر ريحته ابتسم لان دا نوعه المفضل من البرفيوم الحريمي.

.احلام عجبها اوي البرفيوم وبدات تحط علي رقبتها بسعاده..وبعدها طلعت الهدوم التانيه وبدات تتفرج عليهم بفرحه وكانت مبسوطه باهتمامه ليها وخصوصا انه مهتم ان الهدوم متكونش فاتحه علشان احترام الميت وبعدما انتهت احلام من تفريغ كل الشنط اللي جابها خرجت للبلكونه وهيا ناسيه انها بشعرها… 

ماهر حس بوجودها وانتبه  ليها وقال:عجبتك الحاجات اللي انا جبتها..

احلام ابتسمت بخجل وقالت:شكرا اوي ليك يا ماهر..

ماهر بص علي شعرها بغيره لان بلكونتها بتطل علي الوجهه الرئسيه للمنطقة وبالتالي كل البيوت المحاطة بيهم يقدروا يشوفوهم بسهوله فقرب منها وقال بجديه :خلينا ندخل جوا احسن..قال كلامه بنبره من الجديه الشديده فوقتها احلام فهمت هوا ليه اتضايق كدا..لما انتبهت انها خرجت برا بشعرها قالت بتوتر:انا هروح اغير هدومي والبس طرحتي..

ماهر وافق وهيا قررت تلبس هدوم من اللي اشتراها ليها وبعدما خرجت وفي طريقها للحمام ..كانت صحيت اختها مريم وخرجت من اوضة والدها ولما شافتها ماسكه لبس شكله غالي ونظيف وقتها قالت بتساؤل:ممكن تجبيلي لبس من عندك لاني مش عامله حسابي ..

احلام حركت راسها بالموافقه وقالت:هدخل اغير هدومي بسرعه وبعدها اجبلك اللي انتي عاوزاه.

مريم بصت للهدوم اللي في ايديها وشدتها من ايديها بسرعه وقالت:متتعبيش نفسك دول حلوين وبعدين انا وانتي في نفس الجسم يعني هيكونوا مناسبين..

احلام اتصدمت من جرأة مريم فبصت للهدوم بزعل وقالت:بس دول !..

مريم تجاهلتها ودخلت بسرعه للاوضه وقفلت الباب في وش احلام اللي واقفه ومش مستوعبه اللي حصل..

ماهر كان قاعد مستنيها في الاوضه ترجع ولما لقاها رجعت بنفس اللبس قال بتساؤل:مغيرتيش هدومك ليه!

اتوترت احلام وخجلت انها تقوله ان اختها اخدت منها اللبس فقربت من دولابها وطلعت منه دريس ليها اسود وقالت:هلبس الدريس دا علشان مناسب اكتر للعزاء..

ماهر كان ملاحظ انها متضايقه فحرك راسه بالموافقه وسابها تخرج وبعد دقايق كانت رجعت تاني ليه وهيا لابسه الدريس..

خرج ماهر وقعد في الصالون وطلب منها تقعد معاه لانه جايب ليها اكل علشان تفطر لان اليوم النهارده هيكون طويل..

احلام قعدت واكلت وهوا اكل معاها وكان وقتها جايب اكل اضافي علشان والدتها واختها لما يصحوا ياكلوا ..

وبعد مرور  ساعه خرجت مريم ووالدتها من الاوضه وكانت مريم لابسه الهدوم اللي اخدتها من احلام واول ما شافها ماهر اتصدم وبص لاحلام اللي كانت باصه في الارض وساكته ووقتها كان متضايق منها انها كدبت تاني عليه ومعرفتوش ان اختها اخدت منها لبسها ..

مريم كانت فرحانه بالبس لانها عرفه انه مش لبس عادي وانه ماركة مشهوره فبدأت تحط ايديها عليه وتقول بجرأة:هدومك جميله با احلام زوقك طلع حلو.

احلام بصتلها وقالت:تسلمي بس دا مش اختياري دا ماهر اللي جايبه ليا وهوا بصراحه زوقه اجمل مني بكتير..

رغم ان كلام احلام عجب ماهر الا انه كان متضايق ان مش هيا اللي لابسه الهدوم فقرر يتجاهل حركات اختها المستفزه وبدا يركز معاها وفي تفاصيلها لانها كانت هاديه عكس طبيعتها المرحه وهوا مقدر كل دا بسبب نفسيتها لانها كانت بتحب والدها جداا ومتعلقه بيه..

والدة احلام كانت ساكته ومش بتتكلم عكس مريم اللي كانت بتقرب من احلام كل شويه وتتكلم معاها وتسألها عن احوالها وبتشتغل فين وبتاخد راتب كام وازاي عاشت لوحدها وكانت احلام متضايقه منها وبترد علي اسألتها بحرص شديد وضيق من تطفلها..

رن جرس الباب لان الساعه بقت١٠ صباحا وقامت احلام تفتح وكانت اللي بتخبط مروة..

احلام اول مشافتها قالت بفرحه:مروه وحشتيني اوي..

مروه استغربت كلامها ولكنها ابتسمت وحضنتها وقالت:وانتي كمان وحشتيني يا احلام ..

احلام بابتسامه :اتفضلي ادخلي ..

مروه دخلت واول ما شافت مريم وفاديه وشها كرمش بسبب الصدمه..احلام بصت لمروه وقالت:نورتي البيت يا مروه..

مروه بصتلها بصدمه وحركت راسها وهيا بتشاور علي امها واختها بعيونها وبتسألها بعيونها :هو ايه اللي بيحصل.

احلام بلغتها انها هتفهمها كل حاجه بعدين وطلبت منها تسلم عليهم..

مروه بصت لماهر وقالت بإبتسامه:ازيك يا ماهر!

ماهر بهدوء:الحمدلله لله يا مروه انتي اخبارك ايه!

مروه بابتسامه:انا بخير الحمدلله ..

مريم كانت بتبص لمروه من فوق لتحت ولانها مش متذكراها قالت بتساؤل:هيا مين دي يا احلام..صاحبتك؟

احلام بصت لاختها وقالت بجديه:ايوا دي مروه بس هيا مش صاحبتي دي اختي وانتيمتي..

مروه بصت لاحلام وابتسمت بفرحه علي كلامه ولاكن مريم كانت متضايقه فقالت بغيظ:ازيك يا مروه انا ابق مريم اخت احلام الكبيرة ..

مروه بصت لمريم من فوق لتحت بسخريه وقالت:الله يسلمك .

والدة احلام بصت لمروه وقالت:ازيك يا حبيبتي انا ابق والدة احلام!

مروه بصت والدة احلام بضيق وقالت الله يسلمك حمدلله علي سلامتك يا طنط..

مريم بمقاطعه:دا نورك يا حبيبتي اتفضلي..

مروة كانت متغاظه من مريم وقدرت تفهم انها شخصيه مستفزه بسبب اسلوبها في الكلام فبصت لاحلام بضيق واحلام قالت:بقولك يا مروه تعالي ندخل نعمل قهوه ..

مروه حركت راسها واحلام بصت لماهر وقالت:بتحب تشرب قهوتك ايه..

ماهر بهدوء:سادة بس من غير وش؟

احلام ابتسمت بهدوء وبصت لمريم وفاديه وقالت:بتحبوا قوهتكم ايه!

مامتها كانت هترد ولاكن مريم قالت بمقاطعه:هو انتي مش هتفطرينا الاول قهوة ايه دلوقت؟

احلام بصتلها وقالت بصدمه:انا معملتش فطار؟

مريم بضيق:ازاي وانا شايفه اكياس في المطبخ!

ماهر بصلها وقال بمقاطعه لكلامهم :في اكل في المطبخ ليكي انتي ومامتك تقدري تدخلي تجيبيه..

مريم بصتله وقالت بابتسامه:انا قولت برضوا انك زوق من البدايه..

ماهر سكت ومردش عليها وهيا قامت بسرعه واتجهت للمطبخ وزقت احلام وهيا معديه من  جمبها.. واحلام كانت بصالها ومصدومه ومروه مسكت ايد احلام وقالت بقلق:انتي كويسه!

احلام حركت راسها وقالت بخجل من حركات احتها الغريبه :خلينا ندخل للمطبخ احنا كمان..

مروه وافقت ودخلوا الاتنين للمطبخ واول ما عينيهم جت علي مريم  اللي واقفه بتاكل من الاكياس بشراهه  بصولها الاتنين بصدمه ..

 احلام  قالت بتقزز من شكلها:بتكلي لوحدك ليه هو انتي مش هتاكلي مع ماما !

مريم بصت عليها وقالت برفض:لا انا هاكل لوحدي وهروح اديلها الباقي..

احلام مكنتش قادره تستوعب اللي سمعته فقالت بدهشه من تصرفات اختها الغير مفهومه :انتي بتتكلمي بجد ياعني انتي هتاكلي علي نظافه وهيا تاخد منك البواقي..

مريم عدلت شعرها  ورا ظهرتا وقالت بسخريه:ممكن متتدخليش بينا احنا حُرين وبعدين احنا متعودين علي كدا !

احلام اتعصبت وبصتلها بغيظ منها وكانت هتقرب عليها علشان تضربها ولاكن مروه اللي منعتها لما مسكت ايديها وقالت:خلينا نعمل القهوه يا احلام سيبها هيا حره بشكلها المقرف دا..

مريم انتبهت لكلام مروه فبصتلها وقالت بتساؤل:لو سمحتي يا استاذه انتي متتكلميش معايا كده والزمي حدودك ومتنسيش انك في بيتنا ؟

احلام اتضايق وبصت لاختها وقالت بغضب وصوت واضح:انتي اللي تلزمي حدودك هنا وبعدين بيتك ايه دا بيتي انا ومكتوب باسمي انا ولا انتي ولا حتي مامتك ليكوا حاجه هنا واعملي حسابك ان بعدما العزاء  دا يخلص هترجعوا مكان ما كنتوا عايشين..

احلام قالت كلامها بتحذير وبجديه لدرجة ان صوتها وصل لمامتها اللي قاعده برا وماهر اللي اتفاجئ من كلامها ولاكن كان مبسوط انها مسكتتش علي تصرفات أختها الجريئة وقلة احترامها ..

مريم بصت لاحلام وشهقت بصدمه وقالت وهيا بتبعد الاكل عنها:نعم انتي بتقولي ايه انا ليا زيك بالظبط .وبعدين بيت ايه دا اللي مكتوب باسمك انتي اكيد بتخرفي او تعبانه في دماغك..

احلام رفعت حاجبها بصدمه وبصت لمريم بتحذير وقالت:انتي قولتي ايه؟

مريم كانت بتبصلها بجرأة ولاكنها متعرفش ان احلام هتضربها فعلا لانها فاكره انها متقدرش بما انها اختها الكبيره..

احلام بدات تتعصب بسبب قلة ادب اختها من وقت ما جت فمسكتها من شعرها اللي كانت سبغله بلون مقرف وقالت بغضب:انا سبق وحذرتك تحترمي نفسك بس الظاهر ان قعدتك في الشوارع نستك اصلك وتربينك!

مريم صرخت وهيا بتحاول تبعد ايد احلام عنها وفي الوقت دا دخلت والدتها واللي بعدتهم عن بعض وضربت احلام بالقلم وقالت بغضب:انتي مش محترمه ولو فعلا شايفه ان اختك تربية شوارع يبق انتي متربتيش ومحتاجه اعادة تربيه من اول وجديد..

ماهر كان اتدخل في الحوار لانهم بدأوا يتكاتروا عليها فقرب من احلام ومسكها وبعدها عنهم ووقف قدامهم وقال بصوت قوي :انتي وبنتك ملكوش دعوه بمراتي ولو واحده فيكم اتجرأت وحاولت بس تاني انها تغلط فيها انا مش هسكت والظاهر كدا انكم مسمتعوش عني ومتعرفوش ممكن اعمل فيكوا ايه وانا كنت محترمكم علشان خاطرها بس الظاهر ان الاحترام ناقص من عندكم مش من عندها لانها بنت اصول وكويس اوي انها وافقت تدخلكم بيتها وتستضيفكم برغم انكم متستهلوش بسبب عمايلكم دي..

كان كلام ماهر شديد وقاسي علي والدة احلام ومريم واحلام برضوا كانت متضايقه لانها ابدا عمرها ما تمنت انهم يكونوا في وضع زي دا ولاكن في الحقيقه هما يستحقوا اكتر من كدا فبصت لاختها مريم بحزن لانها اتحولت لبني ادم غريب مش مفهوم وكانها اتولدت للغل والطمع فبصتلهم بحزن شديد وبكت لانهم حرجوها وكسروها زمان قدام الناس ودلوقت عملوا نفس الموضوع  قدام جوزها و مش قادره تدافع عنهم لانهم مسابوش حاجه كويسه تغفرلهم..

مشيت احلام من قدامهم ودخلت اوضتها بسرعه وهيا بتبكي ،جريت وراها مروه علشات تهديها لانها عارفه انها خلاص جروحها اتفتحت من جديد وهتحتاج وقت للتعافي ..فقربت من الباب ولاكن احلام كانت قفلت علي نفسها فخبطت مروه وقالت برجاء:علشان خاطري يا احلام افتحي الباب ..

احلام كانت بتبكي بقهر ومبتردش عليها ولاكن مروة مستسلمتش وفضلت تترجاها تفتح لحدما احلام استجابت وفتحلها الباب واول ما دخلت مروه حضنتها احلام بقوه وهيا بتقول:مش عارفه هما عاوزين مني ايه !

مروه مسحت علي طرحتها بهدوء وقالت:اهدي يا حبيبتي وحاولي تاخدي نفسك ومتزعليش ..

كان ماهر واقف قدام مامتها وبنتها اللي باصين عليه بضيق بسبب كلامهم ولاكنه كان مش منتبه ليهم وكل اللي بيفكر فيه هوا الكلام اللي قاله بدون وعي وهوا متاكد انه جرح احلام بيه بس هوا مقدرش يسكت علي المهزله اللي حصلت لانهم مش متأثرين بأي حاجه وجايين يحرقوا دمها ولما سمع خناق مريم واحلام علي البيت قدر بسهوله يفهم غرضهم فبصلهم وقال بحديه:انا متاكد انكم مش جايين علشان تصلحوا الماضي وتخلوها تسامحكوا لان نظراتكم بتقول غير كدا، خليكي صريحه يا مدام فاديه انتي وبنتك وقولولي راجعين ليه بعدما سابتوها وهيا ضعيفه معقول جايين تورثوا معاها !

مريم قالت بغضب:ايوا جايين نورث وبعدين احنا مش فارق معانا هيا عامله ايه لانها مش زينا دي زي والدها فاكره انها ملاك برئ بس دي سوسه وانا عارفه انها مش سهله من وهيا صغيره ..

ماهر بصلها بغضب وقال:اسكتي ومتغلطيش فيها بدل ما اقفلك بوقك دا بعشرين غرزة مش خساره فيكي..

مريم بصتله بصدمه وهوا بص لوالدة احلام وقال:انا ممكن اديكي فلوس بس بشرط ؟

فادية قالت باستغراب:فلوس ايه وشرط ايه؟

ماهر :مليون جنيه لكل واحده فيكوا ولاكن الشرط اننا منشوفكوش تاني وترجعوا مكان ما كنتم ومتتعرضوش لاحلام تاني..

مريم فتحت فمها من الصدمه  لما سمعت المبلغ اللي قاله وبصت لوالدتها اللي كانت بنفس صدمتها فبصتله وقالت:وانت بق معاك تدينا كل واحده مليون جنيه!

ماهر طلع دفتر شيكات من هدومه وقال:اكيد بس اتفاقنا دا هيكون سر ولو واحده قررت تقول حاجه لاحلام صدقوني هقلب عليكم وانا زعلي وحش وكمان انا برضوا لحد دلوقت محترم انكم اهل مراتي للاسف وعلشان انا بحبها مش عايز اي حاجه تضايقها تكون حواليها!

مريم حركت راسها بالموافقه وكانت والدتها هترفض الا انها قالت:احنا موافقين بس عندنا شرط..

ماهر مردش عليها وهيا قالت:احنا عاوزين شقه نعيش فيها وصدقني مش هتشوف وشنا تاني؟

ماهر حرك راسه بالموافقه وقال:طيب لحدما اليوم دا يخلص هكون جهزتلكم شقه بعيده عن هنا وهكتبها باسم والدتك بس متنسيش شرطي واني مش عاوز اي اختلاط بينكم وبين احلام  ولو في يوم شفتها يالشارع لفوا وشكوا..

فاديه قالت بمقاطعه لكلامه:انت بتقول ايه دي بنتي وانا مستحيل..ماهر بضيق:خليني اقاطع كلامك واقولك يا حماتي العزيزه اني عارف السبب الرئيسي لهروبك انتي ومريم وعلي فكره آبن اللوا دا يبق  صديقي وبسبب البلاغ اللي بنتك عملته فيه هوا قالب عليها الدنيا لانه خسر وظيفته بسببها  ولو انا بس عملت مكالمه صغيره بنتك هتروح في داهيه فارجوكي احترمي اني ساكت لحد دلوقت ومش عاوز اذي حد فيكوا وانا بطلب منكم بكل هدوء انكم تبعدوا عن مراتي ؟

فاديه حركت راسها بالموافقه وبصت لمريم وقالت:احنا موافقين والنهارده هنمشي بس لو حصل اي حركه مش كويسه هنرفع عليها قضيه علشان اكلت ورث اختها..

ماهر مضي علي شيك بمليون واداه لمريم ومضي علي شيك تاني واداه لوالدتها وقال:الفلوس معاكم تقدروا تسحبوها من اي بنك وانا هتواصل مع مدير حسابي يسمحلك بسحب الفلوس ويبق كدا احنا اتفقنا!

مريم ومامتها حركوا راسهم بالموافقه وهوا سابهم ومشي وكان باين علي ملامح وشه الانزعاج الشديد منهم ومن تغيرهم للاسوأ ولاكن كان متوقع منهم حاجه زي دي بعدما سمع من منعم عن حكايتهم لما طلب منه يبحث عن معلومات تخص احلام وكان من ضمن المعلومات حكايه هروب والدتها واختها…

احلام كانت بتبكي لسا ومروه بتحاول تخفف عليها وبعدما سمعوا صوت خبط علي الباب قامت مروه تفتح ولما لقته ماهر قالت :احلام تعبانه شويه ومحتاجة ترتاح؟

ماهر حرك راسه بتفهم وطلب منها تسيبهم لوحدهم ومروه خرجت واول ما ماهر قفل الباب ودخل لاحلام ….احلام بصتله بخجل شديد وقالت:انا اسفه… اني عرضتك لموقف سخيف زي دا؟

ماهر باعتذار:لا انا اللي اسف اني قولت الكلام دا ليهم رغم ان مش من حقي ابدا اغلط فيهم بما انهم اهلك بس انا بجد مقدرتش اشوفهم بيتكاتروا عليكي ومش مقدرين انك من دمهم بس متزعليش لان اوقات كتير الاهل بيكونوا اغراب والاغراب بيكونوا اهل وانا وعدتك قبل كدا اني جمبك ومش هسيبك يا احلام وكل اللي طالبه منك تنسيهم وتتعاملي كانهم لسا مظهروش .

احلام حركت راسها بالموافقه وقالت :حاضر انا هتعامل عادي ومش هيفرقوا معايا..قالت كلامها بحزن واضح وهوا حضنها علشان يخفف عنها ولاكن حاسس بيها لانه عارف ومتاكد ان اهلها دول مش كويسين وخطر عليها وقرر انه يساعدها تتخطي بانها تتالم دلوقت وتنسي بعدين افضل من انهم يفضلوا يأذوها علي طول ومتقدرش تتخطي..

_____________

بدا ماهر ينزل للاسفل علشان ياخد العزاء  ولانه اخر يوم كانت الاعداد قليله وكان في عزاء السيدات العدد قليل ولان محدش يعرف ان فاديه ومريم رجعوا كانوا بقيت اليوم قاعدين في الاوضه ومبيخرجوش علشان محدش يشوفهم ويتعرف عليهم ويتشهروا انهم رجعوا من تاني.

مريم بصت لمامتها وقالت:انا شايفه ان الفلوس دي مناسبه وافصل بكتير من اللي كنت هورثه معاها وانتي ايه رأيك في المبلغ اللي معاكي؟

فاديه بصت لبنتها وقالت:المبلغ مناسب بس انا متضايقه بسبب اللي انا عملته في احلام رغم انها بنتي زيها زيك وانا فعلا انانيه!

مريم بصت لمامتها وقالت:انتي اللي اخترتي زمان تسيبها وانتي برضوا اللي ضربتيها دلوقت يعني كل اللي انتي عملتيه كان رد فعل سريع منك فمتجيش دلوقت تندمي لانك مبتديش لنفسك فرصه تفكري فيها ولو بتعتبريها بنتك فعلا يبق هتخسري الفلوس والشقه  اللي جوزها هيدهملك!

مامتها بصتلها بحسره وسكتت لانها مبقتش عارفه هيا بقت مين ولا بتعمل ايه ..هيا كانت غلطانه من البدايه لانها معرفتش تربي بنتها الكبيره وتخافظ عليها من البدايه ودلوقت مريم اتحولت لشخص غريب مش مفهوم فاول ما بصتلها وهيا بتلمس الشيك اللي اخدته بحب خافت من بنتها لانها في الحالتين هتدمر نفسها وتدمرها معاها فأخدت قرار في وقتها ..انها تروح معاها لان احلام ملهاش ذنب تدفع ثمن اخطائها….

_______________

في مكتب ياسر في الشركه كان قاعد وماسك تلفونه بغضب من شوقي اللي مش بيرد عليه فقرر يبعتله رساله يهدده بيها انه لو متواصلش معاه هيقرر يأذي عيلته .. 

وكان وقتها شوقي في شركة ماهر شغال ولما شاف رسالة ياسر وقرأها قلق وخاف منه لانه مؤذي ومش صعب عليه يأذي عيلته فرد عليه بسرعه وبلغه انه هيجيله علي الشركه دلوقت بس بلاش يعمل اي حاجه تأذي عيلته..

وبالفعل خرج شوقي من شركة ماهر واتجه لشركة ياسر واول ما وصل ودخل لمكتبه لقي قلم قوي نازل علي وجهه من ياسر وبيقول بغضب:لو تجاهلتني تاني مش هتشوف خير ؟

شوقي بص في الارض بخوف منه وقال:انا اسف يا ياسر باشا بس انا مش هقدر انفذ اللي طلبته مني!

ياسر اتصدم من كلامه وقال بغضب:انت مش هتقولي هتعمل ايه انا سبق وقولتلك انت تسمع انا بقول ايه وتنفذه يا ايما بق انسي ان بنتك تتعالج في المستشفي الخاصه بيا وهتطرد حالا بمكالمه من تيلفوني ؟

شوقي اتصدم وقال برجاء: لا يا باشا الا بنتي انا موافق اعمل اي حاجه علشانها دي هيا اللي ليا؟

ياسر ابتسم قوال:يبق تنفذ اللي طلبته منك وتبطل التصرفات العبيطه دي كلها وتشوف شغلك كويس؟

شوقي بصله وقال بحزن:يعني انفذ يباشا؟

ياسر بضيق: انجز ونثنفذ؟

شوقي حرك راسه بالموافقه وقال:حاضر  ياباشا الخبر هيكون عندك بكرا؟

ياسر بضيق منه قال:لا انا عاوز الخبر يجيلي النهارده ويكون علي كل منصات التواصل الاجتماعي انت فاهم يا شوقي..

ينبع بقلمي شيماء صبحي 

تفتكروا ممكن ياسر يأذي حمزه فعلا🤔

ويا تري احلام هتقدر تتخطى اللي حلصها بعد صدماتها الكتيره

تكملة الرواية من هنااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله اضغط هناااااااا