رواية أميرة اخر الزمان الفصل التاسع والثلاثون 39بقلم ملك إبراهيم (جديده وحصريه فى مدونة قصر الروايات)
رواية أميرة اخر الزمان الفصل التاسع والثلاثون 39بقلم ملك إبراهيم (جديده وحصريه فى مدونة قصر الروايات)
#الحلقة_39
#أميرة_اخر_الزمان
#بقلمي_ملك_إبراهيم
خجلت اميرة من اسلوبها البارد ووقفت وهي تخفض وجهها ارضا، تحدث محمد بصوت قوي ردا علي هويدا.
ـ احنا لسه مخلصناش، اتفضلي انتي يا هويدا برا لحد ما اخلص مع أميرة
وقفت اميرة مصدومة بعد استماعها الي رده القوي علي هويدا دون ان تعرف من هي، اتصدمت هويدا من احراجه لها امام السكرتيرة وتحدثت اليه بزهول.
ـ انا اللي اخرج؟
حرك لها رأسه مؤكدا، وقفت تنظر اليه لعدة لحظات بزهول ثم خرجت من الغرفه واغلقت الباب خلفها بعنف.
تحدث الي أميرة الواقفه امامه مجمدة من الصدمة.
ـ اتفضلي اقعدي يا اميرة احنا لسه مخلصناش كلامنا
جلست اميرة وهي تخفض وجهها بصدمة ثم تحدثت اليه بخفوت.
ـ انا اسفه لو كنت اتسببت لحضرتك في مشكله
ضحك محمد قائلاً لها بمرح.
ـ انتي فعلا اتسببتي لي في اكبر مشكلة في حياتي
رفعت اميرة وجهها تنظر اليه بصدمة، ضحك محمد اكثر وهو يتابع صدمتها بعينيها الجميله المفتوحه بوسع تنظر اليه، بدأ يلاحظ تجمع الدموع بداخل عينيها، تحدث سريعا اليها قبل ان تذرف الدموع من عينيها.
ـ اهدي انا بهزر معاكي، دي الدكتورة هويدا تخصص قلب وتبقى بنت عمتي وبتيجي العيادة هنا تدريب مش اكتر يعني مفيش مشكله اتسببتي فيها ولا حاجه
لم تستطيع السيطرة علي دموعها لقد فات الاوان وانسالت دموعها علي خديها رغم محاولاتها في ايقافها، وقف محمد من مكانه سريعا وجذب منديلا ورقي من فوق مكتبه واقترب منها بقلق واعطاها المنديل بيدها كي تجفف دموعها قائلاً لها بستغراب.
ـ طب بتعيطي ليه دلوقتي؟!
ردت عليه أميرة ببكاء.
ـ اصل انا اتخضيت فكرتها مراتك
عقد مابين حاجبيه قائلاً لها بستغراب.
ـ بس انا مش متجوز وبعدين حتى لو هي مراتي ايه اللي يخليكي تعيطي؟!!
تحدثت اليه ببكاء.
ـ خوفت اكون اتسببت لكم في مشكله
تأملها عدة لحظات بصمت، شرد في رقتها وبرائتها، خطفت قلبه وعقله، شعرت بالخجل من نظراته اليها، وقفت وتحدثت بتوتر وهي تجفف دموعها.
- انا هروح اشوف ولاء بعد اذنك
تحركت سريعا من امامه قبل ان تسمع رده وقف محمد امام مكتبه يتابعها وهي تخرج من الغرفه سريعا، اغلقت الباب خلفها، ابتسم تلقائيا وعاد الي مكتبه مرة أخرى، بعد لحظات قليله دخلت اليه هويدا مرة أخرى تتحدث اليه بلوم.
ـ ممكن اعرف ليه اهنتني قدام السكرتيرة الجديده دي؟!
كتم محمد غيظه قائلاً لها بجمود.
ـ انا مهنتكيش يا هويدا بس مينفعش اكون مجتمع مع حد بتكلم في شغل وتدخلي كده بدون استأذان وكمان تطلبي منها تخرج وانا لسه مخلصتش كلامي معاها
نظرت اليه هويدا وتحدثت بهدوء.
ـ انا مكنش قصدي وعلي كل حال انا بعتذر لو اتصرفت بتهور شويه بس برضه مكنش يصح تحرجني قدمها كده
كتم غضبه بداخله قائلاً لها.
ـ خلاص يا هويدا حصل خير وبعدين مش وقته الكلام ده في مرضى برا ولازم اكشف عليهم
جلست هويدا علي المقعد امام المكتب وهي تدعي الحزن منه، تجاهلها محمد وضغط علي الزر بجواره، دخلت اليه ولاء، تحدث اليها بجمود.
ـ هاتي اول كشف يا ولاء وجهزيه للكشف
حركت ولاء رأسها بالايجاب واسرعت في تنفيذ ما طلبه منها.
رواية أميرة آخر الزمان بقلمي ملك إبراهيم.
__________
في منزل والدة جمال..
اخذت اماني البنات ونزلت بهم شقة والدتها، نظرت اليها والدتها بمكر قائلة لها بنبرة ساخرة.
ـ ايه هي الهانم عملتك الداده بتاعه عيالها ولا ايه؟!
جلست اماني وتحدثت الي امها بهدوء.
ـ يا امي احنا عمرنا ما شوفنا من اميرة حاجه وحشه وبعدين هي شالت عن ابنك كتير والمفروض نقف جمبها مش ضدها
دخل جمال شقة والدته واستمع الي حديث شقيقته، تحدث اليها بغيظ.
ـ طب والهانم اللي انتي وقفتي جمبها سابتلك البنات وراحت فين؟
نظرت اليه اماني بغضب، قائلة له.
ـ راحت شغلها
رد جمال ساخرا.
ـ وده شغل ايه ده اللي بيرحوله باليل
تحدثت اماني بقوة.
ـ عيب كده يا جمال دي ام بناتك وكلنا عارفين أخلاقها كويس وبعدين اميرة هتشتغل في عيادة الدكتور اللي عمل لـ جنه العمليه وكل ده عشان تسدد فلوس العملية للمستشفى
عقد جمال حاجبيه قائلاً.
ـ هي لسه مدفعتش فلوس المستشفي؟!
تحدثت اماني بالايجاب.
ـ لسه المستشفى قسطو عليها فلوس العمليه وهي هتشتغل عشان تسدد
تحدثت والدة جمال سريعا كي تنهي الحديث.
ـ ربنا يعينها ويقويها هما بناتها برضه وواجبها تعمل اكتر من كده
استغربت اماني من حديث والدتها ونظرت اليها بصدمة، تحدث جمال ببرود يطلب من امه تضع له الطعام كي يتناول العشاء، وقفت والدته وهي تنادي علي ابنتها شاهنده قائلة لجمال بشكوى.
ـ البت اختك شاهنده دي من يوم ما خلصت امتحانات وهي قافله علي نفسها كده وماسكه الزفت التليفون ده ليل ونهار ومبقتش تسمعلي كلمه
غمض جمال عينيه متجاهلا حديث والدته، ضربت والدته كفوف يديها ببعضهما بقلة حيلة وذهبت كي تجهز له الطعام، جلست اماني وهي تحمل جنه علي قدميها وحور تلعب حولهم، اعتدل جمال في جلسته وتحدث الي اماني.
ـ هو ايه حكاية فتحي بالظبط هو هيفضل سايبك عندنا كتير ولا ايه؟
غضبت اماني من اسلوب شقيقها في الحديث معها وتحدثت اليه بنبره حاده.
ـ فتحي مش سايبني عندكم يا جمال انا اللي مش عايزه ارجعله وعلي فكره بقى انا هطلق منه
رفع جمال حاجبيه قائلا لها بستغراب.
ـ اشمعنا يعني كل ده عشان عايز يتجوز، طب ما يتجوز هو اللي زي فتحي ده هيلاقي وحده تبصله اصلا!!
غضبت اماني من شقيقها اكثر وتحدثت اليه بنبرة حاده.
ـ والله اللي خلى وحده تبصلك يخلي وحده تبص لفتحي ما انتوا الاتنين شبه بعض
غضب جمال من تشبيه شقيقته له بزوجها وارتفع صوته قائلاً لها.
ـ بقى انا شبه المعـ*فن جوزك ده، هو انتي فاكره انه راجل اصلا!.. هو لو كان راجل وبيفهم كان اتجوزك ولا بصلك انتي
اتصدمت اماني من اهانت شقيقها لها وجرحه لها بكلامه القاسي، وقفت من مكانها وهي تحاول السيطره علي دموعها ومنعها من التساقط امامه، اخذت حور وحملت جنه وصعدت بهم الي شقة أميرة بالاعلي.
خرجت والدة جمال من المطبخ تبحث عن اماني بستغراب، سألت جمال عنها.
ـ اختك راحت فين؟
اجابها جمال ببرود.
ـ خدت البنات وطلعت، هاتي يلا ما اكل انا جعان
نظرت اليه والدته بغيظ وعادت للمطبخ مرة أخرى.
في الأعلى بشقة اميرة..
جلست اماني تبكي بحزن بعد حديث شقيقها لها حتى اتت أميرة من عملها.
دخلت أميرة الشقه واستغربت جلوس اماني متكومة فوق الاريكه، اقتربت منها وتحدثت اليها بقلق.
ـ مالك يا اماني، اومال البنات فيين؟
تحدثت اماني بحزن.
ـ البنات ناموا جوه
نظرت اليها اميرة بستغراب قائلة لها.
ـ انتي كنتي بتعيطي؟!
انهارت اماني وبكت بشده وارتمت في حضن أميرة، ربتت اميرة علي ظهرها بحنان، بدأت اماني في الحديث وهي تبكي واخبرتها ما قاله لها جمال، حزنت اميرة من اجلها وحاولت تهدأتها.
____________
بعد اسبوعين في منزل اهل مروة..
جلست مروة تزفر بغضب قائلة لامها.
ـ وبعدين انا بقالي اسبوعين قاعده والباشا لا اتكلم ولا جه وسأل
تحدثت اليها والدتها ببرود.
ـ هيسأل ليه ما زمان اميرة ماليه عليه الدنيا واهي رجعت شقتها واحتمال كمان يكون رجعها لعصمته تاني وانتي اللي هتطلعي خسرانه في الاخر ورجعتي لنا وانتي شايله في بطنك عيل وبدل الهم بقيتي اتنين
جن جنون مروة قائلة لامها.
ـ وبعدين انا هقعد كده احط ايدي علي خدي واطلع انا الخسرانه
وقفت فجأة قائلة باصرار.
ـ انا هقوم اروحله واعرفه مين مروة
لم تهتم والدتها بامرها وتركتها تذهب، خرجت مروة من منزل اهلها ذاهبه الي جمال في ورشته.
رواية أميرة آخر الزمان بقلمي ملك إبراهيم.
____________
في منزل جمال..
خرجت أميرة من الشقه كي تذهب الي عملها في العيادة تحمل بيدها هاتفها الجديد الذي احضرته لها ولاء من احد اقاربها بالتقسيط..
وقف جمال امام باب المنزل وهو يعلم ان هذا موعد ذهابها الي عملها، نزلت اميرة الدرج وخفق قلبها بخوف عندما رآت جمال يقف امام المنزل، حاولت تجاهله وخفضت وجهها أرضا وارادت ان تتابع السير لكنه وقف امامها يقطع عليها الطريق، وقفت اميرة ورفعت وجهها تنظر اليه، تغيرت نظرتها اليه كثيرا، الان اصبحت لا تشعر اتجاهه بأي مشاعر، ترا من يقف امامها الان رجل غريب لا تعرفه، تأملها جمال من الاسفل الي الأعلى ولاحظ اهتمامها الجديد بمظهرها والذي جعلها تبدو فتاة لم يسبق لها الزواج من قبل يتمنها الكثيرون وهو اولهم، تحدث اليها بنبره هادئه قائلاً لها بعض العبارات من الغزل.
ـ احلويتي اوي يا اميرة ولا انتي طول عمرك حلوه وانا اللي كنت اعمي
شعرت بالاشمئزاز من تلك العبارات التي قالها بطريقته ونظراته الوقحه وهو يتأمل مفاتنها باشتياق.
تحدثت اليه بنبره غاضبه.
ـ بعد اذنك انا متأخره على شغلي
تحدث اليها وهو يتأملها من الأعلى الي الاسفل.
ـ شغل ايه وبهدلت ايه بس ما ترجعي لعقلك يا بنت الناس وخلينا نرجع لبعض وانا استتك في بيتك زي الاول
تجاهلت حديثه وتحركت كي تتابع سيرها، جذبها من ذراعها قائلاً لها بتحذير.
ـ لما اكون بتكلم معاكي تقفي وتكلميني
وصلت مروة امام منزل حماتها ورأت جمال وهو يقف مع اميرة ويمسك بيدها.
اقتربت منهم مروة قائلة بصوت مرتفع.
ـ الله الله قولوا كده بقى
ثم نظرت الي اميرة بغضب وتحدثت اليها بصوت مرتفع.
ـ والله عال يا ست اميرة عايزه تخطفي مني جوزي
نظرت اليها اميرة بشمئزاز قائلة لها بقوة.
ـ انا مش هرد عليكي عشان جوزك ده ميستهلش اني اقف وارد عليكي وتحصل خناقه بينا عشانه
ثم نظرت الي جمال بشمئزاز قائلة لـ مروة.
ـ اهو عندك اهو اشبعوا ببعض وخليه يبعد عني ويسبني في حالي
ثم ارتفع صوتها اكثر قائلة لجمال في الشارع.
ـ رجوع انا مش هرجعلك يا جمال لو انت بقيت اخر راجل في الدنيا دا لو انا اعتبرتك راجل اصلا
ثم نظرت الي مروة قائلة لها ببرود.
ـ اشبعي بيه يا مروة
ثم تحركت من امامهم وتابعت سيرها، وقف جمال مصدوم من قوتها وحديثها معه ببرود واهانتها له بالشارع امام الجميع، تحدثت مروة الي جمال بغضب.
ـ عجبك كده هزقتنا وفرجت علينا الشارع
تحدث جمال بغضب شديد.
ـ وحياة امها لاكون مربيها ومعلمها الادب واخليها تقول حقي برقبتي
ثم ارتفع صوته قائلاً لـ من يقفون يشاهدون ما حدث بالشارع.
ـ واقفين تتفرجوا علي ايه كل واحد يروح يشوف حاله
ثم تحدث الي مروة بصوت مرتفع.
ـ وانتي اطلعي قدامي
دخلت مروة منزل حماتها وصعدت الي شقة حماتها وجمال خلفها.
وقفت والدة جمال تنظر اليهم بستغراب قائلة لـ ابنها.
ـ صوتكم عالي ليه تحت ايه اللي حصل؟!
جذب جمال زوجته مروة من يدها الي غرفته بشقة والدته ودخلوا واغلقوا الباب خلفهم، وقفت امه تشاهد ما حدث بستغراب، خرجت شاهنده من غرفتها وهي ترتدي ثوب ضيق قصير واسفله بنطلون يلتصق بجسدها وتظهر القليل من خصلات شعرها وتضع احمر شفاه فاقع اللون، لم تنظر اليها والدتها وكانت عينيها معلقة علي باب غرفة جمال وشارده بافكارها ماذا يحدث وكيف اتت مروة، تحدثت شاهنده الي امها بهدوء.
ـ ماما انا رايحه عند سمر صحبتي شويه
نظرت اليها والدتها ولم تعلق علي ملابسها ولا مظهرها، تحدثت اليها بعدم اهتمام.
ـ ماشي روحي ومتتأخريش
تحدثت شاهنده بتوتر.
ـ طب هاتي فلوس تبقى معايا لو عوزت اجيب حاجه
اعطتها والدتها ما تريد وهي لا تهتم بأمرها، اخذت شاهنده الأموال من والدتها وخرجت من المنزل بإستعجال.
وقفت والدة جمال تفكر في جمال وزوجته واقتربت من باب الغرفة كي تستمع ماذا يقولون بالداخل.
في غرفة جمال..
تحدثت اليه مروة بغضب.
ـ بقى دي اخرتها، بقى تسبني زعلانه في بيت اهلي وشاغل بالك باميرة وعايز ترجعها اهي بهدلتك قدام الناس كلها في الشارع وكل الناس بقوا عارفين انها مش طيقاك ولا بقيت مالي عينيها
اقترب جمال من مروة وجذبها من ذراعها قائلاً لها بقسوة.
ـ انا راجل غصب عنك وعنها وأميرة دي انا هخليها تبوس جزمتي وهتشوفي
تحدثت اليه مروة بغيظ.
ـ نفسي اعرف انت شاغل بالك بيها ليه مش انت سبتها واتجوزتني، بقا في واحده عاقل بعد ما شاف النعيم معايا يفكر في اميرة تاني
غمز لها جمال قائلاً.
ـ وهو فين النعيم ده ما انتي حرمتيني منه
ارادت مروة ارضاء غرورها گأمرأة وتحدثت الي جمال بدلال.
ـ انت اللي مش عايز اعملك ايه يعني
تأمل جسدها باشتياق قائلاً بلهفة.
ـ مش عايز ايه بس دا انا هموت تعالي
ضحكت مروة بطريقه خليعه وهو يجذبها الي الفراش.
وقفت والدة جمال تنظر امامها بشمئزاز بعد استماعها الي حديثهما معا.
رواية أميرة آخر الزمان بقلمي ملك إبراهيم.
____________
في عيادة الدكتور محمد..
دخلت أميرة العيادة وهي في قمة غضبها، تحدثت اليها ولاء بمرح.
ـ مالك شكلك مضايقه النهاردة؟
تحدثت اميرة بغضب.
ـ انا زهقت طليقي مش عايز يسبني في حالي وانا خلاص جبت اخري ومش عايزه اعيش في البيت بتاعهم ده تاني
دخل الدكتور محمد العيادة واستمع الي حديث اميرة، وقف خلفها وتحدث بغضب مكتوم يخفي غيرته الشديده عليها.
ـ خلاص سيبي بيته وشوفي شقه تانيه
توترت اميرة وخجلت بعد ان استمعه الي حديثها وردت عليه بخجل.
ـ ان شاءالله ربنا يسهل
تأملها عدة لحظات ثم اتجه الي مكتبه، تحدثت أميرة باحباط بعد ذهاب الدكتور محمد.
ـ انا نفسي اخد شقه تانيه بس هعمل ايه مش هقدر اسدد الفلوس اللي عليا من شغلانه واحده
نظرت ولاء الي اميرة بتفكير.
ـ بقولك ايه يا اميرة، انتي بتقولي ان انتي معاكي شهادة دبلوم صح؟
حركت اميرة رأسها بالايجاب قائلة.
ـ اه انا حتى اتجوزت بعد ما خدت الشهادة علي طول
تحدثت ولاء بحماس.
ـ طب ايه رأيك تقدمي في التمريض وتاخدي شهادة تمريض وتشتغلي بيها جمب شغلك هنا في العياده وتحسني دخلك
عقدت اميرة ما بين حاجبيها بستغراب قائلة لها.
ـ وده ينفع؟!
حركت ولاء رأسها بالايجاب قائلة بتأكيد.
ـ اه طبعا ينفع انا عملت كده
ثم اضافت بشرح.
ـ بصي في مستشفيات كبيرة بتدي شهادة تمريض، يعني بتقدمي في المستشفي زي المعهد بالظبط وبتروحي وبتحضري المحاضرات وبتتعلمي و الدراسه بتكون سنه واحده وبتتخرجي بعد السنه دي معاكي شهادة تمريض تقدري تشتغلي بيها في اي مكان وكمان لو طلعتي من الاوائل بتشتغلي في المستشفى اللي اتخرجتي منها ولو مفيش شغل في المستشفي اللي اتخرجتي منها بيساعدوكي تشتغلي في مستشفيات تانيه
نظرت اليها اميرة بستغراب ولمعت عينيها بالحماس قائلة لها.
ـ طب انتي تعرفي مستشفى من اللي بيعملوا كده؟
ابتسمت ولاء قائلة بثقة.
ـ اه طبعا المستشفي اللي بيشتغل فيها الدكتور محمد وعلي فكره هو كمان من الدكاتره اللي بتدرس هناك
اتصدمت اميرة وتحدثت بزهول.
ـ انتي بتتكلمي بجد!!
وقفت ولاء من مكانها وتحدثت بحماس.
ـ اه والله وصدقيني لو عملتي كده انتي صحيح هتتعبي في الاول بس بعد كده هيبقى عندك شغلانه كويسه وتقدري تشتغلي في مستشفى خاصه وهتاخدي مرتب كويس جدا جمب شغلك هنا طبعا
تحمست اميرة كثيرا، تحدثت اليها ولاء بحماس وهي تتجه الي غرفة الدكتور.
ـ استني انا هدخل اقول للدكتور واسأله
اتصدمت اميرة من تسرع ولاء وقبل ان تستوعب وتوقفها دخلت ولاء الي غرفة الدكتور.
خجلت اميرة كثيرا ، لا تريد ان تطلب من الدكتور محمد شئ اخر، بعد لحظات قليله خرجت ولاء وهي تبتسم لاميرة وتحدثت اليها بحماس.
ـ تعالي يا اميرة كلمي الدكتور
خفق قلب اميرة بخوف قائلة لها بتوتر.
ـ ايه اللي حصل انتي قولتيله ايه؟
ابتسمت لها ولاء قائلة بحماس.
ـ قولتله ان انتي عايزه تاخدي شهادة التمريض والدكتور هيساعدك
خجلت اميرة بشدة قائلة لها بلوم.
ـ ليه بس يا ولاء الدكتور ساعدني كتير اوي
تحدثت اليها ولاء بحماس.
ـ ادخلي بس كلميه
اقتربت اميرة من باب المكتب وطرقت علي الباب بهدوء، سمح لها الدكتور بالدخول، دخلت وهي تخفض وجهها ارضا، نظر اليها بابتسامة قائلاً.
ـ تعالي يا اميرة اتفضلي
اقتربت من المكتب وجلست امامه، تأملها عدة لحظات بابتسامة قائلاً لها.
ـ ولاء قالتلي ان انتي عايزه تدرسي تمريض
خجلت أميرة بشدة وتحدثت بصوت مهزوز من شدة التوتر والخجل.
ـ اه بس مش دلوقتي يعني، احنا كنا بنتكلم وولاء اتحمست شويه
تأمل ارتعاد يديها وتوترها الشديد وتحدث بهدوء.
ـ وايه اللي يمنعك تقدمي دلوقتي؟ ... بقلمي ملك إبراهيم.
... يتبع
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
 رواية أميرة اخر الزمان الفصل التاسع…){kind=link}
تعليقات
إرسال تعليق
فضلا اترك تعليق من هنا