رواية ليه يا زمن الجزء الثاني من بعت نفسي الفصل الاربعون 40بقلم نسرين بلعجيلي (جميع الفصول كامله وحصريه)
رواية ليه يا زمن الجزء الثاني من بعت نفسي الفصل الاربعون 40بقلم نسرين بلعجيلي (جميع الفصول كامله وحصريه)
الجزء الثاني من ليه يا زمن مع بعت نفسي
بقلم نسرين بلعجيلي
الفصل الأربعون ....
حكيم العرب :
- عمك حسن تعبان ولازم ننقله مستوصف المركز ينولك فينا ثواب وصلنا بعربيتك النقل.
غانم فضل يفكر...
غانم :
- لاجل عيون قمر ماشي.
غريب :
- سامعه بيقولك إيه؟
حكيم العرب :
- إسند حماك من كثر الوجع مش قادر يصلب طوله.
ركبهم و وصلهم المستوصف، دخل معاهم جوه.
حسن :
- ده جاي ورانا.
حكيم العرب :
- أسكت أنا هاتصرف.
راح لقمر.
حكيم العرب :
- روحي لغانم قوليله إنك جعانة يجبلك حاجة تاكليها.
قمر :
- وغريب!!
حكيم العرب :
- روحي إعملي اللي قلتلك عليه تعالا معايا يا غريب.
قمر قربت من غانم..
قمر :
- ممكن أطلب منك طلب؟؟
غانم :
- أنتِ تأمري يا ست البنات.
قمر :
- أنا من امبارح مافيش لقمه دخلت خشمي أبوي كان تعبان أوي وانا جعانه.
غانم :
- و ماقولتيش لجوزك ليه؟؟
قمر :
- ما أنت عارف هو مش من هنا مش هيعرف حاجة باقولك أنا ندمت إني اتجوزته.
غانم :
- واعيه لكلامك ؟!؟!
قمر :
- واعيه زين روح جيبلي حاجة أكلها و ادعيلي ربنا يخلصني من البلوة اللي أنا فيها.
غانم :
- يارب أنا رايح أجيبلك أكل ولا أقولك تعالي معايا.
قمر :
- لا ماينفعش أسيب أبويا.
غانم :
- طيب أجبلك إيه؟؟
قمر :
- عايزه آكل أكل زي ما انت عارف ظروفنا صعبه.
غانم :
- إنتِ تأمري فيه محل هنا بيعمل مشاوي إنما إيه خليكي هنا وانا جاي على طول.
رجعت قمر..
غريب :
- كنتِ فين؟
حكيم العرب :
- مش وقتك خالص أنت كمان أسكت عملتي إيه؟
قمر :
- راح يجيب الأكل و يجيب مشاوي.
حكيم العرب :
- جدعه يا بت يا قمر ياعيني لازمله نص ساعه في واحد بس بتاع مشاوي و على طول مليان.
غريب :
- مشاوي إيه و أكل إيه؟ ما تفهموني وأنا عامل زي الأطرش في الزفه.
حكيم العرب : يلا بينا قبل ما يرجع.
أول ما طلعوا حكيم العرب أخد مواصله من راجل بيعرفه كان ربنا مهيأ ليهم الطريق علشان يهربوا.
~~~~~~~~~~
في المحكمه.....
وصل عاطف معاه الشنطه وسالم كان في عربيته مستنيه لحد ما فتح باب العربيه.
سالم :
- كل ده تأخير؟
عاطف :
- هو إنت مستسهل اللي حصل ازاي؟؟ باقولك العماره وقعت و الرجاله بتاعتنا جوه.
سالم :
- خد يا متر الورق ده شوف اللي هينفعك في القضية وانت يا عاطف عايزك تطلع من هنا تختفي و ما تخافش أنا مأمن كل حاجة نوال هي اللي هاتشيل الليلة كلها.
عاطف :
- ربنا يستر.
في المحكمه الكل قاعد..
سميرة :
- مين دول يا محمد؟؟
وكانت بتشاور على أدهم و اللي معاه.
محمد :
- مش عارف.
نسرين بلعجيلي
مراد :
- ده أدهم الشرقاوي غول في السوق من أكبر رجال الأعمال.
فرح :
- و إيه اللي جابه هنا؟؟
مراد :
- أكيد علشان يحضر الجلسة وقاعد هناك علشان هو في صف زهرة شايفه ستاف المحامين بتوعه؟
فرح :
- وعرف زهرة منين؟؟
مراد :
- أنتِ مش متابعه الأخبار؟ قضية زهرة بقت قضية رأي عام وأكيد سمع بيها واقتنع إنها بريئة و شايفه الناس اللي قاعدين هناك؟ دول تجار سوق الخضار و الفواكه و الذهب و العطاره جايين يساندوها.
محمد :
- زهرة سيرتها حلوة وكانت بتعامل الناس كويس جدا.
سميرة و فرح كانوا بيبصوا لبعض، فرح لفت ورا تشوف لو معاهم حد لاقت نفسها هي واختها و اجوازهم و نوال و كريم، حتى عمها و عمتها ماحدش جا عندهم سألت نفسها ليه كده؟؟ هي فعلا لعنة ؟؟ ليه حياتهم اتشقلبت كده مرة واحدة؟؟
أدهم :
- إتصل بطارق شكله اتاخر.
خالد :
- ربنا يستر هاطلع بره أشوفه قبل الجلسة ما تبتدي.
جات زهرة و دخلوها جوه القفص ياسين و يوسف و أكرم و فارس أول مره يشوفها، شافوه بنت صغيره حلوه جمالها رباني مستسلمه لقضاء ربنا شافها أدهم بدور بعينيها على طارق قام عندها يطمنها.
أدهم :
- إزيك يا زهرة؟
زهرة :
- طارق فين ؟؟
أدهم :
- جاي ما تخافيش.
زهرة :
- فيه حاجه حصلت واحنا جايين هنا.
أدهم :
- حصل إيه قولي وانا أبلغ طارق.
زهرة :
- فيه واحده من المسجونات في عربية الترحيل إداتني ورقه متنيه في إيدي قالتلي خليها وايديها لطارق إوعي توقع منك ولا تفتحيها، فيها براءتك.
أدهم لف كده ونده على محامي معاه علشان يغطيها.
أدهم :
- هحاول أدخل إيدي وآخدها منك من غير ما حد يحس.
نوال :
- بصوا يا بنات الراجل بيقرب منها ازاي.
أكرم لاحظ إن أدهم بيحاول ياخد حاجه قام بسرعة ينقذ الموقف.
زهرة : وقعت غصب عني.
أكرم :
- الحمد لله في إيدي زهرة رجلك فيها حاجه.
زهرة :
- الست ضربتني في رجلي.
أكرم :
- حاولي تشيلي الجزمة فيها حاجة.
نوال :
- شوفي البت الرجالة دايرين حواليها.
أكرم بسرعة طلع الورقه.
أدهم :
- إطلع بسرعه إقرا الورقه و بلغ طارق.
رجع خالد وقف جنب أدهم
أدهم :
- لاقيته ؟؟!
خالد :
- خلص الجلسة وطلع.
أدهم بعصبية...
أدهم : طلع ازاي؟ الجلسه دقائق وتبتدي.
خالد : أكيد فيه حاجه إهدا بس.
أما زهرة وشها مافيهش نقطى دم من الخوف و التوتر.
إبتدت المحكمه.......
...محكمه...
بسم الله الرحمن الرحيم...
على بركه الله نبتدي الجلسة رقم ........ للمتهمة زهرة محمد علي بتهمه القتل العمد..
جلسة الاستئناف النهارده تقدمت بيها المتهمة من خلال المحامي طارق وجدي رفع القاضي راسه يشوف طارق.
القاضي :
- محامي الدفاع فين؟؟
تقدم محامي الدفاع و معاه توكيل
المحامي :
- إحنا يا سعاده القاضي بس أنا نائب عنهم و المحامي طارق وجدي ليه ظروف خاصه.
القاضي حس إنه فيه حاجه مش تمام..
القاضي :
- هل فيه جديد في القضية لطلبكم الاستئناف ؟؟
المحامي :
- طبعا يا سعادة القاضي.
في الحمام أكرم فتح الرسالة...
لو عايز حياة زهرة و براءتها و حياة أمك و بنتك ماتفتحش الملفات و تسلمنا كل حاجه.
الورقه الثانيه.....
براءه..
ركون..
علي علي علي علي..
أكرم استغرب و طلع، ومن حسن الحظ شاف طارق.
طارق :
- الجلسه بدأت؟؟
أكرم :
- أيوه فيه رسالة تعالا.
دخلوا الحمام و أكرم قاله اللي حصل طارق فتح الورقه فرح جدا.
أكرم : إيه؟ فهمت إيه من الكلمة دي ؟؟
طارق :
- دول حروف أسامي الناس اللي قتلت المعلم.
أكرم : نعم!!!!؟؟
طارق : تعالا ندخل.
وصلوا باب القاعة و فتحوا والكل لف زهرة أول ما شافته الأمل دب في روحها.
طارق :
-طارق آسف يا سعادة القاضي على التأخير.
القاضي فرح لما شافه..
محامي الخصم :
- أعترض يا سعادة القاضي.
القاضي :
- على إيه إعتراضك؟؟؟
محامي الخصم :
- أعترض على حضور طارق وجدي المحكمة و هو مش محامي المتهمه بعد ما تخلى عن القضيه و قال الكلام ده في الصحافه.
طارق :
- بعد إذنك يا سعادة القاضي ممكن أرد؟
القاضي : إتفضل.
طارق :
- أنا عمري ما تخليت عن القضي كل اللي حصل كان تمويه للخصم في القضية وحماية لموكلتي وحماية لأهلي بعد ما وصلني تهديدات كثيره بقتل بنتي و أمي، وأنا اليوم هنا بصفتي المحامي الرئيسي في القضية بعد إذن حضارات المحامين اللي اشتغلنا مع بعض، القضيه دي تخصني لأن الماثله أمامكم تبقى حرم طارق وجدي، يعني مراتي شرعاً و قانونا، بعد العدة ما خلصت كتبت عليها.
الكل ابتدا يتكلم و مستغربين الوضع..
نوال :
- آه يا نافوخي البت مقضياها مع الرجالة.
محمد :
- ممكن تسكتي.
نوال :
- أهو سكت بس علشان تعرفوا إنها كانت ماشيه على حل شعرها من ورا المعلم.
سميرة :
- كفاية يا نوال أسكتي لو سمحت.
طارق :
- عارف إن الكل استغرب أحب أقولكم إن زهرة أشرف من الشرف و الدليل الناس اللي موجوده هنا تجار كبار في السوق وكلهم يشهدوا بده.
بدأت همهمات التجار بالموافقه..
طارق :
- إتجوزت زهره لعدة أسباب أولا حمايتها، ثانيا كانت وصية المعلم شخصيا وفيه الوصيه هنا مكتوبه.
وراح قدمها للقاضي..
هنا طلب المعلم إني أتجوزها وأحب أقولكم إنه ما كانش فيه أي رابط بيني وبين زهرة غير كل خير والمعلم شاهد على ده وطلب مني أتجوزها وأنا وافقت قبل ما المعلم يموت كان حاسس إن النهاية قربت لأنه كانت بتوصله تهديدات كتيره الفترة دي، وفيه أسباب شخصيه أحب أحتفظ بيها لنفسي. وبص على زهرة و جوازي منها مش جواز اتفاق لا جواز حقيقي على سنة الله ورسوله وعن اقتناع من ناحيتي أنا على الأقل.
هنا زهرة حست قلبها هيطلع من مكانه..
طارق :
- ف على المحامي المحترم إني هنا كمحامي لمراتي.
القاضي : ألف مبروك. إتفضل ابدأ المرافعه.
طارق :
- الله يبارك فيك يا سعادة القاضي.
القضية دي إشتغلت عليها شهور، من يوم ما زهره دخلت السجن وأنا شغال ليل نهار أجمع المعلومات وادرس فصول القانون و أدور على أي ثغره تطلع موكلتي براءه، سهرت ليالي وجمعت معلومات و مستندات و رجعت للتحقيقات من أول وجديد وأخدت إذن من النيابه العامة بمساعدة الظابط حسام الدمنهوري اللي حاضر معانا و ممكن يدلي بشهادته جلستنا النهارده مش حطول لأن الدلائل موجوده.
القاضي :
- ممكن أشوف التحقيقات وصلت لإيه؟؟
طارق :
- أيوه سعادتك هنا في ملف فيه التحقيقات نرجع لورا شويه يوم الجريمه كل حاجه متسجله بالتوقيت. أخدت تصريح من النيابه العامه بتفريغ الكاميرات و التسجيلات، مع الأسف الكاميرات الخاصه بالمحل كان فيها عطل أو ممكن نقول إن اليوم ده كان معروف إن المعلم هيموت أو يتقتل فا بوزوا الكاميرات الخاصه، بس ما كانوش يعرفوا إن فيه تسجيلات للصوت تحت مكتب المعلم. أنا معايا تسجيل ومكبر الصوت علشان نسمع كلنا، طبعا سعادتك معاك تفريغ للتسجيل في الملف قبل المحكمه ب 48 ساعة ما اعرفش حضرتك إطلعت عليه أو لأ؟
القاضي:
- طبعا قريت كل حاجه و بحييك على كل المجهودات اللي عملتها و التحريات و المستندات اللي قدمتها للمحكمه.
Nisrine Bellaajili
محامي الخصم :
- سعادة القاضي أنا أعترض لأن ده بيضلل العداله و هو عايز يطلع المتهمه بريئه بأي طريقه، و بعدين ماحدش أخظ رأي أهل القتيل في إنهم ياخدوا التسجيلات الصوتية ولا حتى بإذن النيابه.
طارق :
- أولا المحل اللي فيه الكاميرات في ملكية زهرة وهي اللي من حقها تقرر أو لأ وممكن تسأل محمد اللي هو مسؤول عن المحل برغبة من زهرة.
القاضي :
- الإجراءات كلها قانونيه و كل حاجه بإذن من النيابه العامة إتفضل يا طارق كمل المرافعة.
طارق :
- شكرا يا سعادة القاضي.
محامي الخصم :
- سعادة القاضي باطلب من حضرتك إن الجلسة تكون سرية.
طارق :
- وأنا بارفض رفض قاطع القضية بقت رأي عام و من حق الكل يعرف تفاصيلها، قضيتنا سعادتك درس لكل واحد فينا، القضية بتتكلم عن الطمع و الحلال و الحرام و عقوق الأبناء، سعادتك ماكنتش موجود في الجلسة الأولى و حصلت تجاوزات كتيره في الجلسه بس ربنا نصفنا النهارده وحضرتك موجود معانا وزي ما حضرتك شايف علي مش موجود معانا الله أعلم هو فين.
أخواته البنات عملوا محضر في النيابه و أخته الكبيره سميره الزيات أخذت الحق في التصرف في أملاكه لحد ما يرجع بالسلامة وهنا سعادتك ورق يثبت إنه تم البحث عنه في المطارات و المستشفيات وكل مكان و مافيش أي خبر عنه ما اعرفش حضرتك ده صدفه ولا ليه علاقه بقضيتنا زي ما سعادتك عارف القضيه فيها فروع كثيره والقاتل مش واحد للأسف، بس إحنا هنركز بس على قضيتنا.
الوقت ده طارق لف ناحية سالم اللي إداه الإشاره بدماغه.
القاضي كان متابع كل حاجه بعنيه.
طارق :
- وكمان يا سعادة القاضي الحاجه رحمه كمان اتوفت والقاضي اللي كان ماسك القضيه كمان اتوفى، بكل صراحه الصدف غريبه جدا التقرير الشرعي بيقول إن الحاجه ماتت بسم، بس طبعا اللي كانوا مع علي قدروا بنفوذهم يزوروا كل حاجه.
أكرم :
- طارق حيودينا في داهيه
أدهم : ربنا يستر.
محامي الخصم :
- يا سعادة القاضي، قضيتنا النهارده في قتل المعلم مش الحاجه رحمة اللي ماتت بسكته قلبيه.
طارق :
سعادة القاضي، تقرير الطب الشرعي في الملف، وكمان محمد جوز بنتها كان موجود وفي التحقيقات السرية اللي تمت؛ بتقول إن الحاجه رحمه كانت كويسه وكانت مستعده تيجي تشهد بالحقيقه، وهنا عندي تسجيل صوت وهي بتقول لمحمد إنها هتشهد.
القاضي :
-سمعنا التسجيل.
فتح التسجيل بمساعده خالد..
**رحمة:
- صباح الخير يابني تعالى وديني المحكمه أنا لازم أشهد إن زهره كانت معانا وقت الحادثه. علي ضغط عليا إني أشهد زور. أنا من يوم التحقيق وانا مش بنام **
الكل كان ساكت، ده تصريح بالحقيقه.
طارق :
-زي ما سعادتك سمعت إن علي كان طالب منها تشهد زور وده لسبب حنعرفه بعدين اليوم ده بشاهدة الكل، الحاجه ما كانتش في حالتها الطبيعيه بعد ما أخذت الحبوب، وزي ما موجود في التحقيقات الشغاله مسعده شهدت إن نوال هي اللي إدت الحبوب للحاجه رحمه بطلب من علي و أكدت كلامها الممرضه.
نوال :
- ده كذب و افترا، هو انت عايز تدبسني ولا إيه؟؟
القاضي :
- ماحدش سمح ليك إنك تتكلمي لو سمحتي، وإلا هطلب منهم يقبضوا عليك.
طارق :
- أكيد يا سعادة القاضي الخطوه دي جايه في الطريق.
هنا نوال خلاص عرفت إن كل حاجه راحت أما فرح و سميره كانوا تحت صدمه كبيره مراد و محمد كانوا عارفين الكلام ده قبل كده.
طارق :
- يعني حضرتك علي هو اللي طلب من الحاجة رحمة تشهد زور لغرض في نفس يعقوب، و معنى الكلام ده إن نوال مشتركه في الجريمة وممكن الحبوب اللي أخدتها واداتها للحاجة رحمة كانت فقط حبوب مهلوسه، الماده اللي كانت في التحاليل بتقول إنها كانت بتاخد حبوب مهلوسه مع حبوب بتسرع ضربات القلب، وعلى أول انفعال يجيلها هبوط في الدوره الدموية، بناتها قدموا دعوه في فتح تحقيق في وفاه أمهم و النتيجه طلعت إن الممرضه اعترفت بعد ما تم القبض عليها هربانة، و من بين الإعترافات إن هايدي الله يرحمها هي اللي كانت بتدي الدوا ده للحاجة من ورا علي.
علي بقى كان أرجوز في القصه دي كلها و الله أعلم هو فين، ولما اتقبض على الممرضه و اعترفت يا سبحان الله هي كمان جالها هبوط في الدوره الدمويه وماتت. يعني بعد قتل المعلم إتوفت هايدي وأبوها اللي يا حرام ما استحملش وفاتها و انتحر، و اتوفت الحاجة رحمة و بعدها الممرضه وبعدها القاضي. ياترى مين ورا قتل الناس دي كلها ؟؟؟
ده سؤال باسأله و عايز من النيابه العامه إنها تشدد على التحقيقات علشان العداله تبان. نيجي بقى ليوم وفاة المعلم، بعد خناقه المعلم مع إبنه المدمن كريم اللي كان لسه طالع من المصحة ما بقالوش كثير و اللي الكل عارف إنه كان بيسرق المعلم علشان يصرف على مزاجه.
نسرين بلعجيلي
نوال :
- منك لله، أشوف فيك يوم.
القاضي أمر بالقبض عليها وإنها تتحط في الحجز جنب زهرة.
القاضي :
- كمل المرافعه بس بعد إذن حضراتكم سكوت لو سمحتم، القضيه رأي عام و الصحافة تلتزم بالشروط المطلوبه.
طارق:
- سعادة القاضي، المعلم سعد رحمة الله عليه إتقتل كذا مرة من أهله، من ولاده اللي ماكانوش بيسألوا عليه و هو عايش، ونفس اليوم إتقتل من كذا شخص حضراتكم الأحداث اللي جايه محتاجه تركيز عالي، اليوم إبتدا لما المعلم كان تعبان وحب ياخذ الدوا وكانت معاه زهره في التسجيل اللي هتسمعوه. زهره بتقول للمعلم جبت الدوا ده منين ؟؟ وهنا معناه إن زهرة أول مره تشوف علبة الدوا دي.
و الحبوب دي إستعملت لقتل المعلم و الحاجه رحمه و الممرضه، أما بالنسبه لموضوع إن موكلتي إدت دوا يقلل من الرغبه الجنسيه للمعلم فموكلتي اعترفت إنها إدت الدوا للمعلم 3 مرات بس، وهنا جبت تقرير من عند دكتور متخصص في الخصوبه و الذكوره وعرضت عليه الدوا و حالة الوفاة وأكد ليا إنه الدوا ده مش بيأدي لحاله المعلم. رحت للدكتور اللي كان متابع معاه وقالي معلومات جديده خالص وهي إن المعلم كان بيعاني من ضعف جنسي في فترات، وأخذت منه التقرير اللي عند سعادتك، و باطلب من حضرتكم إنه يدلي بشهادته
القاضي :
- نادي على الدكتور للشهادة.
الدكتور راح المكان المخصص للشهادة و حلف يمين القسم على إنه يقول الحقيقه.
طارق :
- شكرا لوجود حضرتك هنا وكنت عايز أسألك من إمتى المعلم كان بيشتكي من الضعف الجنسي؟؟
الدكتور :
- من من 4 سنين وكان كل مرة بييجي يشتكي و مرة يكون كويس يعني ماكانش بياخذ علاج، كنت بقوله ممكن عامل السن و كمان الستريس و ضغوط الشغل.
طارق :
- يعني يا سعادة القاضي الدوا اللي موكلتي إداته للمعلم مش هو اللي عمل فيه كده لأن الدكتور بيقول من 4 سنين.
الدكتور :
- آه فيه نقطه كمان، المعلم كان كويس في السنه الأخيره بعد ما طلق مراته الثانيه و الثالثه.
طارق :
- ده بيأكد إن اللي كانت بتديله الدوا مش موجوده و الشك يا في الحاجه رحمه يا في نوال أو نانسي، بس نانسي نستبعدها لأنها إتجوزته وهو عنده العجز في فترات و نستبعد الحاجه رحمه لأنها من سنين هي تنازلت عن حقوقها الشرعيه من المعلم، يبقى السؤال هنا مين اللي ليه مصلحه المعلم يبقى ليها هي لوحدها من غير نوال اللي الكل بيقول إنها بتحبه حب جنوني.
سعادة القاضي موكلتي بريئه من تهمه القتل وشويه و أديكم الدليل، و كمان بريئه من الدوا اللي أدى للعجز و الشلل لأن الدوا كان بيتاحد على مدار 4 سنوات قبل ما يتجوز موكلتي و هنا هقول إن اللي قتل المعلم هي نوال.
نوال صوتت بأعلى صوتها...
نوال :
- لا كذب أنا ما قتلتوش.
طارق :
- يبقى كريم، وفيه تسجيل إن كريم بعد خناقه مع المعلم طلع و جات نوال اتخانقت معاه، في الفتره دي رجع كريم ضربه بالمطوه سلاح أبيض.
نوال :
- لا لا إبني ما عملش حاجه.
الوقت ده باب القاعه اتفتح..
...... : أنا اللي قتلت المعلم.
الكل لف يشوف صوت مين ده......
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله الجزءالاول1 من هناااااااااا
الرواية كامله الجزء الثاني2 من هناااااااااا
مجمع الروايات الكامله اضغط هناااااااا
 رواية ليه يا زمن الجزء الثاني من…){kind=link}
تعليقات
إرسال تعليق
فضلا اترك تعليق من هنا