رواية أميرة اخر الزمان الفصل السادس والثلاثون 36بقلم ملك إبراهيم (جديده وحصريه فى مدونة قصر الروايات)
رواية أميرة اخر الزمان الفصل السادس والثلاثون 36بقلم ملك إبراهيم (جديده وحصريه فى مدونة قصر الروايات)
#الحلقة_36
#أميرة_اخر_الزمان
#بقلمي_ملك_إبراهيم
تحدث فتحي باصرار.
ـ ملهمش حاجه عندي يا ام اميرة ولو علي اماني انا ممكن اطلقها
ثم اضاف بلهفة.
ـ المهم عندي رضا اميرة
تنهدت والدة اميرة بتعب، وقفت تفكر قليلا بحيرة ثم تحدثت اليه بهدوء.
ـ سيبها لله يا فتحي وربنا يقدم اللي فيه الخير لكم ان شاء الله
ثم اضافت برجاء.
ـ بس معلش يا فتحي خليك بعيد عن أميرة الايام دي عشان هي فيها اللي مكفيها ومش ناقصه مشاكل
نظر اليها فتحي بغموض وشعر انها لا تريده لابنتها، حرك رأسه بالايجاب قائلاً لها.
ـ زي ما تحبي يا ام اميرة وبرضه انا موجود ومش هزهق لحد ما بنت أميرة تعمل عمليتها وتقوم بالسلامه وكمان تكون أميرة خلصت عدتها وخلصت من جمال خالص
تحركت والدة اميرة من امامه قائلة له بتوتر.
ـ ربنا يسهل يا فتحي
_____________
بعد اسبوع.. بداخل المستشفى.
وقفت اميرة امام غرفة العمليات وهي تبكي بخوف وقلق على ابنتها، وقفت والدتها بجوارها وراندا واماني وضياء واستاذ طارق المحامي.
تحدثت اليهم أميرة بقلق وهي تبكي.
ـ هما اتأخروا جوه اوي كده ليه انا خايفه اوي، حاسه ان في حاجه حصلت لبنتي جوه
ربتت والدتها علي ظهرها بحنان قائلة لها.
ـ متقلقيش يا حبيبتي ان شاءالله خير
تحدث اليهم طارق بهدوء.
ـ عمليات القلب دايما بتغيب كده متقلقوش
نظرت راندا الي اماني وتحدثت اليها بفضول.
ـ اومال اخوكي فين يا اماني، مجاش يعني يطمن علي بنته من يوم ما دخلت المستشفى؟!، حتى النهاردة بنته بتعمل العمليه وبرضه مجاش!!
خفضت اماني وجهها باحراج، نظروا اليها جميعا بفضول ينتظرون ردها، لاحظ طارق حزن اماني وعدم قدرتها علي الرد، تحدث الي راندا بهدوء قائلاً لها.
ـ مش وقته الكلام ده دلوقتي وبعدين سواء جه او مجاش اظن اخته ملهاش علاقه بمشاكله مع أميرة وهي قامت بدورها گعمه للبنت وجت تطمن عليها
حركت والدة اميرة رأسها بالايجاب قائلة.
ـ فعلا حضرتك عندك حق، وتشكر أماني انها بتيجي كل يوم تطمن علي جنه واميرة وكمان واخده بالها من حور وبتراعيها
رفعت اماني وجهها ونظرت الي طارق المحامي بامتنان، قطع نظراتهم خروج احدى الممرضات من غرفة العمليات واخرتهم ان العمليه انتهت بنجاح، وقفت أميرة بلهفة وارادت الدخول الي ابنتها لكن الممرضة منعتها، بعد لحظات قليله خرج محمد من غرفة العمليات، ركضت اليه أميرة بلهفة قائلة له.
ـ طمني يا دكتور جنه عامله ايه؟
ابتسم لها بهدوء قائلاً.
ـ اولا مبروك نجاح العمليه وجنه هتكون في العناية ومتقلقيش عليها ان شاءالله هتكون بخير
انسالت دموع أميرة بدون توقف، كانت تبتسم ودموعها تتساقط على خديها، اقتربت منها راندا ووالدتها وتحدثوا اليها بسعاده.
ـ الف مبروك يا أميرة الحمدلله
تحدثت أميرة وهي تبكي بسعادة.
ـ الحمد لله الف حمد وشكر ليك يا رب
وقف الدكتور محمد يتأمل سعادتها بسعادة اكبر، استأذن منهم وذهب الي غرفة مكتبه، وقفت اماني بعيدا تشعر بالاحراج وتخشي ان تقترب من اميرة كي تبارك لها وتلومها أميرة على عدم مجئ شقيقها كما فعلت صديقتها.
وقف طارق يتابع حزن اماني وتوترها، اقترب منها وتحدث اليها بهدوء.
ـ على فكره أميرة اعقل من كده ومستحيل تلومك على خطأ اخوكي، انتي فعلا تشكري انك متخلتيش عنها وكنتي اول واحده واقفه قدام غرفة العمليات
بكت اماني وتحدثت بضعف.
ـ انا والله بحب اميرة وبناتها وعمري ما فكرت آذيهم بالعكس دا انا على طول كنت ببقى في صف أميرة
ثم أضافت بنهيار.
ـ وكل اللي جمال عمله مع اميرة بيترد فيا دلوقتي وجوزي عايز يتجوز عليا وانا صابره وساكته وبقول انه ذنب اميرة وبيترد فيا
نظر اليها بصدمة قائلاً لها.
ـ ذنبها مش هيتردلك انتي لانك ملكيش ذنب اصلا
ثم اضاف بتأكيد.
ـ على فكرة أميرة كانت حكتلي علي كل حاجه وصدقيني هي بتحبك جدا وانتي اكتر واحده فكرت فيها تأمنها علي بنتها
نظرت اليه اماني وهي تبكي لا تعلم ان دموعها جعلته حزينا من أجلها، يريد فعل اي شئ كي تتوقف دموعها.
رأتها أميرة وهي تبكي، ذهبت اليها سريعا وتحدثت اليها بقلق.
ـ مالك يا اماني، ايه اللي حصل؟!
تحدثت اليها اماني وهي تبكي قائلة لها.
ـ انا اسفه يا اميرة علي كل اللي اخويا عمله معاكي بس والله مش بإيدي انتي عارفه
عانقتها أميرة وتحدثت اليها بحزن.
ـ ايه الكلام اللي انتي بتقوليه ده يا اماني، انتي متعرفيش غلاوتك عندي ولا ايه!
وقف طارق يتابع حديثهم بحزن وهو يرى اماني تبكي بداخل حضن أميرة بانهيار.
__________
في منزل والدة جمال..
اغلق جمال ورشته وصعد الي شقة امه.
جلست امه بتوتر تنتظر اتصال اماني كي تطمنها.
دخل جمال شقة امه وتحدث اليها ببرود.
ـ هي مروة لسه منزلتش ولا ايه؟
نظرت اليه امه بغضب قائلة له.
ـ مروة ايه وزفت ايه دلوقتي، مش تسأل علي بنتك الاول اللي بتعمل العملية دي وممكن تموت فيها
جلس جمال بتعب وتحدث بجمود.
ـ اومال يعني انا قفلت الورشة دلوقتي وطلعت ليه، ما انا مش عارف اشتغل وكل شويه تيجي افكار في دماغي يا ترى البت عملت ايه
تحدثت اليه والدته بغيظ قائلة.
ـ بذمتك انت عندك دم، يعني هو ده اللي انت قدرت عليه
حرك جمال يديه بملل قائلاً .
ـ كنتي عيزاني اروح يعني، ولما يطلبوا مني في المستشفي فلوس كنت هعمل ايه؟
همست والدته بغضب قائلة.
ـ فلوس ايه بقى دا زي ما يكون ربنا غضب علينا ومبقاش في بركه في الفلوس معانا
وقف جمال بملل قائلاً.
ـ طب انا جعان دلوقتي
رفعت امه حاجبها بغضب قائلة له.
ـ نزل المحروسه بتاعك تعملك اكل، انا مش قادرة وأماني اختك راحت المستشفى من بدري وشاهنده عندها امتحان النهاردة
تحرك جمال اتجاه باب الشقة قائلاً.
ـ هطلع اريح شويه وانزلها تعملك اللي انتي عيزاه
حركت والدته رأسها بالايجاب قائلة بهمس.
ـ نزلها نزلت الميه من زورها بت فقر
رواية أميرة آخر الزمان بقلمي ملك إبراهيم.
___________
عند شاهنده امام مدرسة الثانوي بعد انتهاء الامتحان.
وقفت شاهنده مع ثلاثة بنات أصدقاءها، تحدثت احدهم بحماس قائلة لشاهنده.
ـ يا بختك يا شاهنده مش شاغله بالك بشهادة ولا مجموع ولا كلية، احلى حاجه انك هتتجوزي وترتاحي من الوش ده انما احنا لسه قدمنا المشوار طويل
نظرت اليها شاهنده قائلة لها.
ـ جواز ايه بقى، انا حاسه اني مش هبقي مبسوطة في الجواز مع فريد، حساه كده مش هو اللي هكون سعيده معاه، فريد دايما ساكت وتقيل كده دا حتى بقاله فترة كبيرة معرفش عنه حاجه من يوم مشكلة اخويا مع مراته وهو لا بيكلمني ولا بيسأل وانا كمان زهقت بصراحه
نظرت اليها احدي صديقاتها قائلة لها بمرح.
ـ بس انا عارفه ايه اللي خلاكي تزهقي من فريد
ابتسمت شاهنده ورفعت حاجبيها قائلة لها.
ـ تقصدي ايه؟
غمزت لها صديقتها قائلة لها.
ـ هقولك واحنا مروحين مع بعض
تحدثت احدي الفتيات الواقفين معهم.
ـ طب يلا بينا احنا يا بنات عشان شاهنده وسمر شكل في بينهم اسرار
ذهبوا البنات وتبقي شاهنده وصديقتها سمر، تحدثت شاهنده الي سمر بغضب قائلة لها.
ـ ايه يا زفته انتي هتفضحيني
ضحكت سمر وتحدثت اليها بمرح.
ـ ما انا مسكت نفسي اهو ومقولتش حاجه
ثم اضافت بفضول.
ـ المهم قوليلي عملتي ايه مع المز الجديد؟
ابتسمت شاهنده وتحدثت اليها بسعاده.
ـ مش عارفه لسه يا سمر، بس بصراحه شخصيته عجباني اوي، دايما يسأل عليا واول ما يصحى يكلمني وقبل ما ينام يكلمني ولو لقاني قفله النت في اي وقت بيقلق عليا ويفضل قلقان لحد ما انا افتح
ابتسمت سمر قائلة لها.
ـ الله يا بختك وايه كمان انا اتحمست اوي
ابتسمت شاهنده ثم شردت بقلق قائلة لها.
ـ بصراحه هو مخليني مش بفكر في حد غيره، حتى فريد دلوقتي مبقاش فارق معايا زي الاول ولا بقيت بشغل بالي هو كلمني ولا مكلمنيش ولا اي حاجه، يوسف ده بقى مالي حياتي بس انا خايفه اتعلق بيه اكتر من كده وانا حتى معرفوش ولا اعرف هو منين ولا عرفني ازاي، يعني ده مجرد واحد بعتلي ااد على فيسبوك ورساله فيها كلام حلو وانه نفسه يتعرف عليا وكلامه الحلو ده شجعني اكلمه ومن بعدها والعلاقة اتطورت بينا وانا بقيت خايفه وقلقانه
استمعت اليها صديقتها باهتمام ثم تحدثت اليها.
ـ بصي يا شاهنده انتي لازم تقرري وتشوفي انتي هتقدري تكملي مع فريد ولا لا، عشان لو مش هتقدري يبقى تركزي مع سي يوسف ده لحد ما تجيبي اخره
نظرت شاهنده امامها بتفكير قائلة.
ـ عندك حق
رواية أميرة آخر الزمان بقلمي ملك إبراهيم.
____________
في المستشفي مساءًا بعد ذهاب الجميع، لم يتبقى سوى اميرة مع ابنتها والدكتور محمد ذهب إلى منزله ليبدل ثيابه ويعود الي المستشفى مرة اخري.
جلست أميرة أمام غرفة العناية المركزة، استندت بظهرها على الحائط وغمضت عينيها قليلا.
وقف بالممر المؤدي الي غرفة العناية، نظر اليها وهي جالسه وتستند بظهرها علي الحائط وتغمض عينيها بتعب، اقترب منها بخطوات هادئة ووقف يتأملها للحظات دون ان تشعر به، جلس بجوارها وهو يتأملها عن قرب، اراد رفع يديه ولمسها لكنه يخشي ان تصرخ او تفعل اي شئ، تحدث اليها بهدوء قائلاً.
ـ الف سلامة علي جنه يا اميرة
فتحت عينيها بصدمة بعد استماعها الي صوته، تعلم صوته جيدا، نظرت بجوارها وجدته جالسا بالقرب منها ويتأملها عن قرب، انتفض جسدها ووقفت من جواره سريعا قائلة له بصوت مرتفع قليلاً.
ـ انت ايه اللي جابك هنا؟!
تحدث وهو مازال يتأملها بلهفة واشتياق قائلاً.
ـ جيت اطمن عليكي يا ست البنات واشوفك عامله ايه انتي وبنتك ولو محتاجين اي حاجه انا في الخدمه
زفرت بغضب قائلة له.
ـ شكرا انا مش عايزه منك حاجه غير تبعد عني
وقف من مكانه وتحدث اليها وهو يقترب منها قائلاً .
ـ بعد ايه بس ربنا مايجبش بعد، بقى انا جاي عشان نقرب تقومي انتي تقوليلي بعد
وقفت أميرة مصدومة من حديثه، نظرت حولها لا تريد ان يحدث مشكله بالمشفى، حاولت السيطرة الي غضبها وتحدثت اليه بهدوء قائلة له.
ـ بعد اذنك يا فتحي ابعد عني وسبني في حالي انا مش ناقصه والله
حاول ان يقترب منها اكثر، رفعت يديها تمنعه من الاقتراب منها قائلة له بحدة.
ـ قولتلك متقربش مني يا فتحي وبعد اذنك امشي من هنا مش عايزة مشاكل في المستشفي
وقف مكانه وتحدث اليها ببرود.
ـ ربنا ميجبش مشاكل بينا يا أميرة، انا جاي اطمن عليكي انتي وجنه وعايز اطمنك اني هكون جمبك، ضهر وسند في اي وقت تحتاجيني فيه وكمان مش عايزك تشيلي هم ان انا متجوز والكلام ده انا هطلق اماني واخلص منها هي وعيلتها دول ناس فقر
نظرت اليه أميرة بغضب ليتابع حديثه قائلاً لها بمكر.
ـ الناس دول ظلمونا انا وانتي يا اميرة واحنا لازم نحط ايدينا في ايد بعض ونحرق قلبهم ونردلهم اللي هما عملوه فينا
ابتعدت عنه بخطوات قليله للخلف وتحدثت اليه بصرامه قائلة له.
ـ انا مش عايزه احرق قلب حد، انا عايزه ربنا يشفي بنتي واخد بناتي الاتنين وابعد عنكم كلكم، انا مش عايزه رجاله في حياتي تاني، ابعد عني يا فتحي وسبني في حالي
وصل الدكتور محمد المستشفى واتجه الي غرفة العنايه مباشرة كي يطمئن على جنه.
تفاجئ بأميرة تقف ويقف امامها شخصا ما وتظهر علامات الغضب علي وجه اميرة بشدة، اقترب منهم بخطوات سريعه يريد ان يعلم من هذا الشخص، وقف امامهم وهو ينظر الي الواقف امام اميرة بفضول قائلاً.
ـ مساء الخير
نظرت اليه اميرة وشعرت ان روحها عادت اليها بوجوده، لقد اصبح وجوده يشعرها بالامان والاطمئنان.
نظر اليه فتحي وعقد حاجبيه قائلاً له.
ـ مساء النور
نظر الدكتور محمد الي أميرة ثم عاد ببصره ذاك الواقف امامها قائلاً له.
ـ ممكن اعرف مين حضرتك؟!
نظر اليه فتحي بتحدي قائلاً له ببرود.
ـ مش لما اعرف مين حضرتك الاول!!
ثم نظر الي اميرة قائلا لها.
ـ هي ايه الحكايه بالظبط؟
تحدث اليه الدكتور محمد بصرامه قائلاً.
ـ مفيش حكايه ولا حاجه انا الدكتور محمد نصار دكتور القلب والمسؤل عن حالة الطفلة جنه، ممكن اعرف بقى مين حضرتك؟!
حرك فتحي رأسه بالايجاب قائلاً.
ـ اااه دكتور، مش كنت تقول كده من الاول يا دكتور، انا بقي أستاذ فتحي ميكانيكي سيارات بس ايه أعجبك اوي
نظر محمد إلى أميرة وتحدث بفضول.
ـ وحضرتك هنا بتعمل ايه يا أستاذ فتحي؟
تحدثت اليه اميرة بتوتر قائلة له.
ـ ما هو يبقى جوز عمة جنه، اماني حضرتك تعرفها
تحدث فتحي بتأكيد وهو ينظر الي أميرة بنظرات استطاع محمد فهمها بسهوله.
ـ بس ده مؤقتا بس لحد دلوقتي، اصلي نويت اطلق اماني مراتي، اصلها لامؤاخذه يعني مبتخلفش وانا نفسي في حتة عيل
نظر اليه محمد بستحقار قائلاً له.
ـ ولو حضرتك اللي كنت مبتخلفش كانت مراتك هتعمل معاك كده برضه؟!
تحدث فتحي وهو يضحك بسخرية قائلا.
ـ دي كانت هتعمل فيا كده وفي اهلي، اصل حضرتك يا دكتور متعرفش العيلة دي، اميرة قدامك اهي اسألها عملوا فيها ايه
ثم تأمل اميرة من الاعلي الي الاسفل قائلاً.
ـ بقى بزمتك يا دكتور، واحده زي اميرة دي ينفع الواحد يتجوز عليها، والله جمال ده مبيفهمش
صرخت به أميرة قائلة له بنبرة حادة .
ـ ملكش دعوة يا فتحي ولاخر مرة بقولك ابعد عني وملكش دعوه بيا
نظر اليها محمد وفهم ان فتحي يطاردها وهي ترفضه، تحدث محمد اليه بهدوء عكس ما يشعر به بداخله.
ـ اتفضل بعد اذنك دا مش وقت زياره دلوقتي
وقف فتحي ينظر الي اميرة وتحدث اليها.
ـ ماشي يا أميرة بس خليكي عارفه ان انتي مش هتلاقي راجل غيري يخاف عليكي ويحاوط عليكي انتي وبناتك
ارتفع صوت أميرة قائلة له.
ـ وانا مش عايزة رجاله تاني في حياتي، انا كرهت كل الرجاله، ابعدوا عني وسبوني في حالي، انا مش عايزة غير اربي بناتي واعيش بيهم من غير مشاكل
وقف الدكتور محمد مصدوم من انهيارها، تحرك فتحي الي خارج المشفي قائلاً لها.
ـ ماشي يا اميرة مصيرك تلفي وتجيلي لحد عندي
وقفت اميرة تحاول اخذ انفاسها بعد انهيارها، ذهب فتحي من امامها، وقف الدكتور محمد ينظر اليها بصدمة ثم تحدث اليها بهدوء قائلاً.
ـ حاولي تهدي شويه هو خلاص مشي
بكت اميرة وتحدثت بضعف.
ـ انا مش عارفه هما عايزين مني ايه، ليه مش عايزين يسبوني في حالي، هو حرام اني اكون مش عايزه رجاله في حياتي، حرام اني مش عايزه حاجه من الدنيا غير بناتي واربيهم بعيد عن اي مشاكل
شعر الدكتور محمد بالحزن وهو يستمع الي حديثها وتحدث اليها بهدوء قائلاً.
ـ لا من حقك يا أميرة ومن حقك تعيشي زي ما انتي عايزه ومش من حق اي حد انه يفرض عليكي نفسه
نظرت اليه أميرة والدموع تنسال من عينيها، خفض الدكتور محمد وجهه وتحدث اليها بجمود.
ـ انا هدخل اطمن علي جنه
اتجه الي غرفة العنايه ودخل، انهارت اميرة في البكاء وذهبت الي المقعد وجلست عليه، بعد دقائق قليله خرج الدكتور محمد من غرفة العناية وتحدث اليها بجمود.
ـ الحمدلله جنه حالتها كويس
رفعت اميرة عينيها كي تنظر اليه لكنه لم ينتظرها وذهب مباشرة دون ان يستمع الي ردها، تابعته اميرة بعينيها وهو يبتعد عنها بخطوات سريعه، غمضت عينيها وهمست بداخلها قائلة.
ـ ياااااارب
رواية أميرة آخر الزمان بقلمي ملك إبراهيم.
______________
بعد اسبوعين..
بداخل المستشفى، وقفت اميرة تضم ابنتها جنه بداخل حضنها وهي تبتسم بسعاده وتشكر الله علي نعمته عليها واعطاء ابنتها فرصة ثانيه للحياة.
اقتربت منها والدتها وتحدثت اليها بسعاده قائلة.
ـ حمدلله علي سلامة جنه يا أميرة، الف حمد وشكر ليك يارب
قبلت أميرة ابنتها وتحدثت بسعاده .
ًـ الحمدلله يا امي ربنا فضله كبير عليا اوي
تحدث ضياء بفضول قائلاً لاخته.
ـ اومال انتي هتخرجي من المستشفى هتروحي فين يا اميرة؟
تحدثت راندا بحماس.
ـ هتيجي عندنا طبعا
خفضت اميرة وجهها قائلة لها.
ـ انا تقلت عليكي كتير اوي يا راندا كتر خيرك وكفايه الدين اللي في رقبتي ليكي ربنا يقدرني واقدر اسدده
ابتسمت اليها راندا قائلة لها بمرح.
ـ بطلي جنان يا أميرة احنا مفيش بينا الكلام ده
دخلت اماني عليهم الغرفة وتحدثت إليهم بسعاده وهي ترى جنه بحضن امها.
ـ سلام عليكم ، الف حمدلله على السلامه يا أميرة ... بقلمي ملك إبراهيم.
... يتبع
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هناااااااا
 رواية أميرة اخر الزمان الفصل السادس…){kind=link}
تعليقات
إرسال تعليق
فضلا اترك تعليق من هنا