رواية الحصان والبيدق(الجزء الثاني من رواية" بكِ أحيا") الفصل 19-20-21بقلم ناهد خالد

رواية الحصان والبيدق(الجزء الثاني من رواية" بكِ أحيا") الفصل 19-20-21بقلم ناهد خالد

رواية الحصان والبيدق(الجزء الثاني من رواية" بكِ أحيا") الفصل 19-20-21بقلم ناهد خالد

19-20-21

الفصل التاسع عشر " تهديد" 

الحصان والبيدق 

بكِ أحيا 2 

ناهد خالد 

" كلاً منا بداخله خوف وشجاعة بنفس القدر, ونحن من نختار أيًا منهما يتغلب على الآخر"

_ البيت الكبير ونص المصنع خالي أمر انهم يكونوا باسمي، حجي، وابجى عبيطه لو اتنازلت عن حاجه حتى لو كان ليك... او بالأخص لو كان ليك..!!! 

ونظرته في تلك اللحظه وتحول ملامح وجهه كان اختباراً لها إما أن تمضي قدمًا، وتكمل إما أن ينتصر خوفها وتتراجع.....!!!  

-  هتجولي ايه؟ سمعيني تاني أكده؟

تحكمت في رجفتها الداخلية, ولبست ثوب الشجاعة, ورفعت رأسها كرأس الغزال وهي تقول:

-  كيف ما سمعت, ولما اعيد كلامي مش هغيره, اللي جولته هو اللي هعمله.

التقط كفها بين قبضته يعتصره بقوة عاصفة, وبرزت أنيابه وهو يهدر بها:

-  مش بكيفك, هتمضي على التنازل ورجلك فوج رجبتك. 

تحكمت في ألم كفها الذي شعرت وكأن عظامه تُهرس, وقالت بإصرار:

-  هو ايه اللي مش بكيفي! متجدرش تمضيني عن حاجة غصب عني, ده أنا اروح اشتكيك في النجطة " القسم " واطعن في الأوراج اللي مجدمها.

-  يا نهار ابوكِ طين! أنتِ واجفة تناطحي جدامي! ده أنتِ عيارك فلت ولازملك تتأدبي.

ومع انهاء كلمته الأخيرة كان يهبط بكفه على وجهها بقوة أطاحتها أرضًا, لتشهق بوجع, ولكنها لن تتلقى ضربه في صمت هذه المرة, وخاصًة أن " رباح" معها الآن, ليست معه بمفردها كالسابق, ستعمل بنصيحة "خديجة" و...

-  أنتَ بتمد يدك عليا!! يالهووووي... الحجوني يا ناس هيموتني..

وقف مصدومًا وصراخها وعويلها يعلو ويعلو, لم يلمسها بعد سوى مرة واحدة حين لطمها بها, لِمَ تصرخ الآن! وأي موت تتحدث عنه تلك المجذوبة! 

-  هتصرخي ليه يا بت المجنونة أنتِ! 

وما إن انهى جملته حتى وجد "رباح" تفتح باب الغرفة بقوة, وهي تصرخ بفزع:

-  في ايه يا فريال؟ مالك يا بتِ؟

تمسكنت أكثر وبكت بقوة, ليس اصطناعًا ولكن اللحظات الماضية كانت عصيبة عليها وشعرت فيها بضغط نفسي رهيب أثر اصطناعها القوة و تحكمها في خوفها أمامه, وأجابت من بين بكائها:

-  ضربني ياما لاجل مانا رافضة اتنازله عن املاكي, وكان هيموتني في يده.

صرخ بها وهو يقترب منها:

-  بكفياكِ كدب يا....

وقفت أمامه "رباح" مانعة وصوله لها, ودفعته في صدره ليرتد للخلف, وهي تهتف بهِ:

-   وجف عندك, ايه هتضربها جدامي كمان اياك! 

اتسعت عيناها وكأنها للتو استوعبت ما يفعله, وهتفت وهي تشيح بيدها يمينًا ويسارًا بهياج:

-  اتاريك سكت بعد ما هجت كيف التور تحت, رتبتها يا بن رباح؟ حطيت في عجلك إنك هتمضيها تنازل عن اللي ليها, بس لاه, مش هيحصل أنا هجافلك جبل ما هي توجف, حجها محدش هيلمسه, سامع؟

تجمدت ملامحه وقست بشكل مخيف, شكل أشعرها أنها لا تعرفه, وهي حقًا يبدو أنها لا تعرفه! في كل موقف يثبت لها هذا, وإلى متى ستتجاهل؟ وتتأمل في التغيير, هي تتخذ الآن معه منحنى آخر في علاقتهما, لكنها تشعر وكأنه لا أمل, فالشخص الذي أمامها الآن يتجسد وكأنه شيطان! أو كأنه شخص متجبر, قاسٍ لا يعرف الرحمة أو الإنسانية..

ومن بين جمود ملامحه هتف بما جعل جسدهما يتسمر وعيناهما تكاد تخرج من مقلتيها ....

----------------------------------- 

بعد أربعة أيام...

اليوم هو يوم زفاف أسطوري, كتبت عنه الصحف ومختلف مواقع التواصل الاجتماعي, والعنوان الرئيسي كان

" زفاف أسطوري يشهده البحر الأحمر, لأحد أصحاب الطبقة المخملية, العروس المهاجرة...والأعزب الوسيم نجل رجل الأعمال الشهير"

وأسفل العنوان الكثير من التفاصيل في مضمونها:

" الشاب الوسيم, رجل الأعمال الذي أثبت جدارته رغم صِغر سنه, " مراد وهدان" نجل رجل الأعمال الشهير "حسن وهدان", يتخلى عن عزوبيته ويواعد ابنة خاله المهاجرة إلى لندن منذ صغرها, ليصبح حفل زفاف الفتاة الشابة والشاب الوسيم حديث وسط الطبقة المخملية, قبل إقامته حتى, والجميع ينتظر المفاجئات, ويترقب الحفل"

والعروس الآن تجلس في غرفة لم تحلم يومًا برؤيتها من بعيد, غرفة تطل على ساحل البحر مباشرةً بمنظره الرائع , الغرفة مليئة بالتصاميم والورود التي تصنع خصيصًا من أجل العروس, تجلس ترتدي روب أبيض من الستان الفاخر, رُصع عليهِ بماء الذهب جملة " bride  خديجة ", وتجلس على كرسي مريح للغاية حتى أنها شعرت تغوص بداخله وأن عظام جسدها ارتاحت بشكل غير طبيعي, وأمامها فتاة المكياج تتفنن في وضع مستحضرات التجميل على وجهها, وهي صامتة, هادئة, بشكل غريب, حتى أن الفتاة حدثتها بمرح متسائلة:

-  خديجة هانم اللي يشوفك يقول إنك مُرغمة على الجواز! 

ابتسمت لها بهدوء مجيبة:

-  لا ابدًا, بس متوترة شوية.

هزت رأسها متفهمة وضعها وأردفت:

-  فاهمة طبعًا, واكيد كل العرايس بيكونوا متوترين, ما بالك وحضرتك حفل زفافك هيبقى اسطوري, اكيد قلقانه يحصل فيه حاجه مش مظبوطه أو ميطلعش زي مانتِ متخيلة, لكن ده ميمنعش أبدًا إنك تفرحي ده يوم مبيتعوضش يا هانم.

ارتفع صدرها في تنهيدة قوية, وهي لا تعلم ما بها, لكنها تشعر بكونها في غير مكانها, كل هذا لا يخصها, تشعر وكأنها تُجهز وتُعد لمجرد عرض سخيف أمام الجمهور, ليصفق الجميع ويمدح الحفل الأسطوري الذي يليق بعائلة "وهدان", لكن إن كان عليها فكل هذا لا يعنيها البتة, انتفضت من شرودها على دقات خافتة فوق باب الغرفة, تبعها صوته المميز لأذنها يطلب الدخول بلباقة تليق بهِ أمام الغريبة, لتسمح له الفتاة على الفور فتشعر بهِ يدخل الغرفة, والأخيرة تقول:

-  استأذنك أنا بقى يا باشا أنا كده خلصت ميكب, وحضرتك زي ما طلبت محدش يساعدها في الفستان, فالفستان موجود اهو وأول ما تلبسه هتيجي البنت تلبسها الحجاب.

أجاب بكلمة واحدة وعينيهِ ثابتة على التي ما زالت جالسة على الكرسي وظهرها له, كرسيها المطل على شرفة الغرفة ليكن البحر أمامها مباشرًة:

-  تمام.

اقترب منها ودقات قلبه تتسابق للوصول إليها ورؤية وجهها, ليس اهتمامًا بمساحيق التجميل التي وضعتها ابدًا, ولكن شوقًا لها, فهو لم يراها منذ ليلة أمس, فقد انشغل في ترتيب أمور الحفل وحرص على هذا بنفسه كي يطمئن أن يسير كل شيء كما خطط له, فهو لن يسمح بأي عشوائية قد تحدث وتتسبب في إزعاج صغيرته.

وقف أمامها لينظر لها بأعين تشع حبًا وولهًا يخصها هي فقط, لمعة عيناه هذه لا تظهر سوى لها هي, ابتسم ثغره برضا وهو يرى ملامحها لم تتغير البتة كما طلب من الفتاة, مكياج بسيط جدًا, فقط يخفي المشاكل الطبيعية التي تكن في البشرة, وكحل ثقيل أبرز جمال عيناها فبدت كعين المها, حتى أحمر الشفاه كان من لون وردي خفيف, احتضن وجهها بكفيهِ تحت نظراتها الصامتة, واقترب مقبلاً جبهتها قبلة طويلة, عبرت عن مشاعره الجياشة نحوها, ثم ابتعد قليلاً يخبرها بابتسامة:

-  مكنتيش محتاجة ميكب أصلاً, بس لزوم الفستان والحفلة بقى, بس بردو طالعة زي القمر يا ضيّ.

قطبت ما بين حاجبيها تشعر بالضيق من نعته لها باسم لا تفهم سببه:

-  أنتَ بردو مش هتقولي ليه بتناديني بالاسم ده أوقات؟

اجابها بنفس ابتسامته الساحرة:

- حكايه الاسم حكايه طويله قوي، وما تتحكيش في أي وقت كده، ليها وقتها المناسب، فسيبيها لوقتها.. 

نظرت له بتنهيده وهي تدرك انه ما لم يريد اخبارها الآن إذاً فلن يفعل، لذا تجاوزت هذه النقطه وهي تعاود سؤاله:

_  وليه بتقوله في اوقات معينه؟ يعني مش طول الوقت!

_  ويا ترى انتِ ملاحظه إن امتى بناديكِ بيه؟ 

سألها بخبث ظهر واضحًا وتراقص في مقلتيهِ لترفع كتفيها حائره وهي تجيب بخجل طفيف:

_  مش عارفه امتى بالظبط، بس يعني في الأغلب بيكون وقتها بتقولي كلام حلو او بتبصلي زي ما بتبصلي دلوقتي.... 

أردفت الأخيرة وهي تحني رأسها بخجل أحمر له وجهها، لمعت عيناه اكثر سعيدًا في ملاحظتها القويه لشيء كهذا وسألها وهو يقترب برأسه منها لدرجة الخطر:

_ ببصلك ازاي؟ 

 لترتبك بشده ويصيبها التوتر خاصًة وإنه لم يقترب الى هذا الحد المبالغ بهِ من قبل، حتى أن انفيهما كادا ان يتلامسا، لتبتعد هي برأسها تلقائيًا لدرجه تسمح لها بالتنفس، وتجيبه بتوتر ظاهر:

_  مش عارفه. 

رحم توترها وارتباكها، ليستقيم واقفًا مره أخرى ليسمح لها بالهدوء، ثم سألها مضيقًا عينيهِ:

_ مالك يا حبيبي!؟ حاسك مش مبسوطه!! 

تنظر له الآن مستغربه، كيف لاحظ؟ فهي منذ تحدث معها وهي تحاول قدر المستطاع ألا تظهر له اضطرابها وبؤسها، لكنها لم تنجح وقد استطاع من نظره واحده في عينيها أن يدرك أن بها شيء ما تحاول اخفاءه، ابتلعت ريقها بتردد وهي تحاول التحدث بطبيعيه:

_ ابداً ما في.... 

قاطعها وهو يقول بتحذير اخافها رغم هدوءه:

_ خديجه! بلاش لف ودوران، لإنك لو قلتِ من هنا للصبح ما فيش حاجه مش هصدقك،  فهاتي من الآخر وقولي مالك؟ 

لا تريد ان تضايقه بحديثها بعد كل ما فعله من أجل أن يكون اليوم يوم مميز لها من وجهة نظره، ولا تريد أن تبخس مجهوده في جعل حفل الزفاف كما وعدها سابقًا "يخطف الانفاس"، ولكن تحت اصراره الظاهر فهي لن تستطيع خداعه بأي حجه كانت فحاولت انتقاء كلماتها وهي تقول بينما تفرك كفيها بتوتر، و ملامحها ظهر عليها الحزن تدريجيًا:

_ مفيش... أنا بس حاسه ان المكان هنا مش مكاني.. حاسه ان كل ده ما يناسبنيش... عارف لما تحس إنك بتحضر حاجه لحد، اهو أنا حاسه كده، ان كل ده مش ليا وما يخصنيش واني جايه احضر المناسبه لشخص تاني... 

تنهدت مكملة وهي تسرح بعيناها في منظر البحر خلفه:

_ انا لو في يوم من الايام كنت اتخيلت يوم فرحي عمري ما كنت هتخيله كده... كل ده غريب عليا يا زين، ومش حاسه براحه.. فكرة ان في 100 واحده حواليا بتعمل كذا حاجه عشان تطلعني بالشكل اللي هم شايفينه مناسب، وفي 100 واحد بيظبط الحفله  عشان تطلع كويسه، وفي 100 كاميرا وتليفون هيصوروا، وناس كثير هتبقى مستنيه تشوف العروسه اللي كل ده معمول عشانها، ومش أي ناس دول ناس متعودين يشوفوا بنات بيلبسوا وبيتعاملوا زي الفنانين، و زي ولاد الزوات، هيكون رد فعلهم ايه وهم شايفين واحده محجبه وتعتبر مش حاطة ميكب و شكلها عادي.. وهي اللي كل ده معمول عشانها وخدت حد زيك... حتى هويتي كدبه، كله فاهم إن أنا بنت خالك اللي كانت مهاجره بره، وظهرت فجأة عشان تتجوزها، وتعمل لها كل ده.. ازاي وسط كل ده عاوزني اشوف ان انا في مكاني؟! أنا حاسه زي عارضة الأزياء اللي بيقعدوا يجهزوها ويحضروها ورا الستاره عشان في الآخر تطلع تتمشى قدام الجماهير اللي بره، وتعرض نفسها وأهم حاجه انها لازم تعجبهم ويصقفوا ويشيدوا بيها، أنا عارفه انك بتعمل كل ده عشاني قبل ما يكون عشانك أو عشان الناس.... ونيتك صادقه في اللي بتعمله و هو انك تفرحني... عشان كده ما كنتش عاوزه اقول اي حاجه من اللي قلتها دلوقتي. 

تنهدت بضيق بعد ان انهت حديثها.. وقد شعرت بأنها لم يكن عليها قول كل ما قالته، فهي ورغمًا عنها لم تستطيع انتقاء كلماتها رغم تحفظها، فالأمر ليس به أي تجميل، وإنما يُشرح كما هو... نظرت له تحاول معرفة رد فعله على حديثها فقد ظل لثواني بسيطه صامتًا فقط، وطالعها بنظرات لم تستطع كشف ما وراءها، حتى خرج عن صمته وهو يلتقط كفيها اللذان تفركهما بقوه، يملس عليهما بحنو، وبدأ حديثه يقول بصدق ظهر في نظرته وعينيهِ:

_ اولاً، كل اللي انا عامله ده لا عشانهم ولا عشاني.. ده عشانك انتِ وبس، فكره البنات اللي حواليكي من الصبح والناس اللي بتحضر الحفله كل ده طبيعي، وأي واحده بتتجوز طبيعي تروح تعمل ميكب، وطبيعي واحده بتلبسها الحجاب وواحده بتلبسها الفستان، وبيصوروا فيها... كل ده طبيعي حتى الناس اللي بينظموا الحفله، برده طبيعي، أي فرح بيبقى فيه ناس بتنظمه... مش شايف فيهم حاجه تخليكي تتوتري او تحسي ان ده مش مكانك! تمام انا معاكي انه الاهتمام زياده والمكان مش أي حد يعمل فرحه في مكان زي ده، بس ده طبيعي يا خديجه! حتى لو ما كانش فرحنا كبير وما كنتش عازم فيه كل الناس كنت برده هعمل كده حتى لو انا وانتِ بس اللي هنحضر.... هعمل كده عشان ده اللي يليق بيكي وده اللي تستاهليه، أما بالنسبه لموضوع إني قلت انك بنت خالي، فده مش ابداً معناه ان مش حابب الناس تعرف انتِ مين، أو شايف ان هويتك الحقيقيه تحرجني لو قلتها قدامهم، او ما تكونش لايقه بيا، عشان عارف ان ده في تفكيرك حتى لو ما قلتهوش.. كل الحكايه ان انا قلت انك بنت خالي عشان اقفل أي باب وامنع أي حد ممكن يحاول يسأل او يدور في حوار انتِ مين وبنت مين ونعرف بعض منين وكل الحوارات اللي ملهاش لازمه دي.. وعشان ما سببش ليكي انتِ اي مضايقه من أي نوع سواء كلمه حد يقولها أو خبر تشوفيه أو تسمعيه، صدقيني كل همي اني اقول انك بنت خالي وكنتِ مسافره بره هو عشانك وعشان أبعد عنك اي حاجه ممكن تضايقك واقفل أي باب ممكن يسببلك إحراج بأي شكل من الأشكال او يعرضك لموقف سخيف... 

التقط نفسه بقوه ثم عاد يبتسم لها وهو يقول بنفس الصدق:

_  حالاً لو مش عاوزه الفرح و عاوزه ترجعي القاهره كل اللي عليكِ بس انك تقولي وفوراً، كل ده هيتلغي وهنرجع القاهره ولو عاوزاني سواء في فرح او ما فيش اطلع واقول انتِ مين واقول انك مش بنت خالي، برده حالاً هعملها، عشان كل ده ما يهمنيش لو انتِ مش مرتاحه وانا قلتلك ده قبل كده قلتلك لو انتِ مش عاوزه فرح يحضروا ناس كثير ومش عاوزه حد انا هعمل كده.... خديجه، كل الناس اللي مستنيه فرحنا و كل الناس اللي قاعده بره واي حد ما يهمنيش ابداً، انا كل اللي يهمني انتِ، شوفِ انتِ حابه ايه، وأنا فوراً هعمله. 

صمتت لدقيقتين تقريبًا تتخبط بين جنبات الحيره لا تعرف ما عليها ان تقرره، هل تخبره بان الغاء كل هذا هو ما سيريحها؟ ام تتجرأ وتدلف معه لعالمه المختلف تمامًا عن عالمها التي عاشت فيهِ، وتبدأ في الاعتياد على عالم جديد باشخاص جديده وطبقه اجتماعيه اخرى ستلازمها طوال الفتره المقبله ما دامت معه، وبعد حيرتها كان الاختيار الحل الثاني لتنظر له وتضغط بكفيها على كفيهِ الممسكان بها دون وعي وهي تقول:

_  لا تمام كمل الفرح... بلاش تلغي كل ده... يمكن انا بس متوتره يعني زي اي عروسه في اليوم ده ، حتى البنت اللي عملتلي الميك اب قالتلي ان ده طبيعي.. 

نظر لها بجديه وسألها بتاكيد فقط عن طريق نطق اسمها:

- خديجه؟! 

هزت رأس وابتسامه صغيره وهي تجيب:

_ خلاص والله... أنا اكيد متوتره عشان كل ده جديد عليا لكن في الاخر لازم اتعود يعني انتَ نفسك كنت لسه بتقولي من يومين ان بعد كده لو في حفلات اللي هي تبع شغلك لازم هكون موجوده فيها، ككوني مراتك، ولازم اتعود عليها واتعود على ظهوري قدام الناس. 

اومأ برأسه مؤكداً وهو يقول:

- فعلاً احيانا في حفلات هكون مضطر انك تكوني موجوده معايا فيها، لانها بتكون حفلات عائليه لرجال الأعمال، وانتِ مش اقل من اي حد هيكون حاضر، بس كمان مش هتكونِ موجوده في كل حفله.... مش حابب انك تظهري قدام الناس كثير... اصلاً حتى في الحفلات اللي بقولك عليها مش حابب تكوني موجودة بس بقولك عشان لو الظروف حكمت. 

امالت رأسها بدلال وهي تعقب:

_  بس انا هبقى حابه اني اكون موجوده زي ما انتَ قلت، مش معقول كل واحد هيكون رايح مع مراته وانتَ رايح لوحدك! 

حرك رأسه بهدوء متجاهلاً الحديث في هذه النقطه حالياً واخبرها:

_ طب يلا عشان تلبسي الفستان، عشان في بنت هتيجي تلفلك الحجاب.. 

وقفت معه وهو يجذبها من على الكرسي لتقول باستغراب تسأله:

_ بس الفستان تقيل قوي، انا استحاله اعرف البسه لوحدي، هم فين البنات!؟ 

نظر لها بتلاعب وهو يخبرها:

_  لا يا حبيبتي ما هو ما فيش بنات... الفستان زي ما انتِ قلتِ تقيل قوي ومقفول من كل اتجاه فمش هينفع تكوني لابسه حاجه، فاكيد مش هسيب البنات اللي تدخل تلبسك الفستان ويشوفوا جسمك.. 

توترت وابتعدت عنه تقف امامه هاتفه بحيره وهي تنظر للفستان المعلق على مجسم ضخم بجانبها:

_ ايوه بس البسه ازاي؟ ده كان اتنين شايلينه عشان يجبوه هنا! 

نظرت له في هذه اللحظه لترى ابتسامه عابسه أدركتها على الفور، فاتسعت عيناها وهي تتراجع للخلف مردده بفزع:

_ لا.. لا ما تهزرش. 

ضحك بصوت وهو ينظر لذعرها المتوقع وقال من بين ضحكته العاليه والتي اظهرت" غمازتيهِ":

_  ما هزرش ايه، اومال مين هيلبسهولك؟ 

حركت رأسها نافيه بتوتر بالغ:

_ لا مش هينفع... مستحيل لا.. 

تعالت ضحكاته اكثر على كلماتها الغير مرتبه وجسدها الذي يتراجع للخلف باستمراريه تلقائيًا فاخبرها مهاوداً:

_ ما تخافيش مش هبص انا بس هساعدك تلبسيه.. 

_ زين! انسى... 

قالتها وهي تبرق بعينيها وكأنه سيخافها مثلاً؟ 

وبعد نصف ساعه.... 

كانت تصرخ بهِ وهو واقفاً خلفها:

_خلصني بقى كل ده بترفع الكتف! 

اجابها بتمهل كاد يجلطها وهو يقول:

_ يعني انا هرفع الكتف واجري؟! مش في سوسته لازم تتقفل.. بعدين لازم اشد الفستان عشان اعرف اقفل السوسته.. هو انتِ تخنتِ ولا ايه يا خديجه! 

شهقت بضيق وهي تلتف له نصف التفاته تردد  بغضب:

_ تخنت.. طب والله ما هرد عليك! 

انطلقت ضحكته المجلجلة مره ثانيه وهو يرى غضبها الطفولي كأي انثى حين يتعلق الامر بزياده وزنها، وبالفعل شدّ جوانب الفستان ليحاول اغلاق سحابه  دون ان يؤذيها وهو ينظر بحسرة للكنزه التي بدون اكمام "بادي" والتي صممت ان ترتديها اولاً قبل ان يبدأ في مساعدتها في ارتداء الفستان، وارتدت اسفلها بنطال التصق على جسدها فلم تترك له متعه النظر سوى لذراعيها العاريه! 

_خلاص يا ستي خلصت... 

التفت له على الفور وهي تزفر باختناق:

_ ايوه اخيراً... حاجه خنقه.

نظر لها مبهوراً فالفستان كان مصممًا خصيصًا لها، ملائم جسدها بشكل رائع، وتلك الفصوص الألماسية التي تحتله تعطيها مظهر لامع كنجمه وسط عتمة السماء.. عبر عن اعجابه وهو يهتف:

_ تخطفي يا ضيّ... دلوقتي بقيتِ ضيّ شكل ومضمون.. 

تلون وجهها حرجًا وابتسمت ابتسامة متوتره وهي تملس بكفها على الفستان:

_  اختيارك... بجد مش متخيل انبهرت ازاي لما شفته.. 

ابتسم لها بحنان وهو يخبرها من بين مشاعره الثائرة:

_طيب انا هخرج انا بقى عشان مش ضامن نفس اكثر من كده.. هبعتلك البنت اللي هتساعدك في الحجاب.. يا دوب على ما البس البدله عشان هننزل بعدها للتصوير المفروض ساعه وهتبدأ الحفلة.. 

_ تمام.. 

اردفت بها بابتسامه جميلة بادلها اياها قبل ان يتركها ويخرج من الغرفه... لتلتف للمرآة الموجوده بها تنظر لنفسها بانبهار جلي فهي حقًا تبدو كأميرة، وكأنه اختار لها فستان احلامها دون ان تدري.... 

رن هاتفها برقم غريب، لتتجه له تلتقطه تطالع الرقم باستغراب.. فتحت الخط بهدوء لتسمع صوته يقول:

_ نصيحة مني تسيبي الفرح وتخفي.. عشان اللي هيحصل بعد كده مش هيعجبك... 

قطبت ما بين حاجبيها بخوف وقلق وهي تسأل:

_ مين معايا!؟ 

_ حسن وهدان. 

بكل عنجهيه ولامبالاة عرف نفسه، ليرتجف جسدها وتجلس فوق الفراش بصعوبة وهي تسمع لحديثه المهدد لها:

_ الجوازه مش هتتم.. بس قولت اديكي فرصة أخيرة تهربي فيها بنفسك عشان لو اتدخلت هتتأذي.. 

_____________________

كانت جالسة بجوار "باهر" و "رباح" منتظران أن يبدأ حفل العروس، وقد تأنقت في فستان من اللون الزهري وحجاب ابيض اللون يلائم تمامًا كونها في مناسبة مهمة وسعيدة كحفل زفاف صديقتها وابنة خالها.... 

وبينما هي جالسة شردت بافكارها لترجع بذاكرتها لقبل اربعة ايام، تحديداً تلك المواجهه التي لم يتوقع اياً منهم النتيجه التي وصلت إليها 

ومن بين جمود ملامحه هتف بما جعل جسدهما يتسمر وعيناهما تكاد تخرج من مقلتيها:

_ خلاص.. والست اللي تكسرلي كلمه وما تطاوعنيش وتناطحني ما تلزمنيش... ولا تجعد على ذمتي ثانيه واحده.. 

ارتعشت بقلق وهي تشعر بأن القادم ليس كما خططت له تمامًا...! 

بينما تولت "رباح" الاستفسار وهي تسأله بحده:

- جصدك ايه يعني؟ 

لينظر لفريال بتمعن قبل أن يفرد ظهره بشموخ

وعنجهيه وهو يقول ونظراته لم تسقط عنها:

_ يعني يا تتنازل عن اللي ليها وتعمل اللي على كيفي

.... يا هطلجها.....!!! 

........... انتهى الفصل.... 

الفصل اهو... اجري أنا بقى🏃💃

الفصل العشرون " لمن الغلبة؟" 

الحصان والبيدق

بكِ أحيا 2

" ندًا لند، كلاً منهما لديهِ سرًا يدين بهِ الآخر، فيا ترى لِمن الغلبة!؟ من سينفش ريشه كالطاووس ومن سيدفن رأسه كالنعامة!؟"

فاقت من شروها على يد "باهر" يحركها وهو يقول:

_ روحتي فين؟

نظرت له مبتسمة بحزن جم، وقالت بنبرة ألم:

_ روحت لاخوك.

تنهيدة حارة صدرت منه، ونظر لها بيأس مستنكرًا:

_ بردو؟ لسه مُصرة تشغلي بالك بيه؟ 

حركت رأسها باستسلام وخزي وهي تجيبه:

_ لو كان بيدي كنت نزعته من جلبي وعجلي نزع، بس أنت خابر زين، الموضوع خارج ارادتي. 

صمت، وشعر بها، فكيف يلومها وهو الآخر على نفس حالها، رغم انه من أراد وقرر البعد، لكنه لم يستطع أن يجبر عقله على الترك... 

ومن منا يتحكم في عقله؟ فيما يفكر وفيما لا يفكر بهِ؟ وياليتنا نستطيع، لرحمنا أنفسنا من افكار سامة، وذكريات مُرهقة، وأشخاص لا يستحقون أن يمروا بعقلنا حتى، وإناس أُغلقت حكايتهم ووُضعت نقطة النهاية فلا فائدة من تذكرهم سوى جلب الوجع والحزن.. 

_ ربنا يهون يا فريال، بس صدقيني إبراهيم أقل من أنه يشغل تفكيرك. 

ابتسمت بألم وتجمعت الدموع في عينيها وهي تخبره بمكنونات صدرها:

_ هو اللي طلجني يا باهر... بعد كل اللي سواه فيا، هو اللي يجولها وبكيفه، كان المفروض انا اللي اطلبها، والمفروض بردك اني ارتاح بعد ماجالها، بس انا مش مرتاحه واصل، جلبي ممرتاحش وجايد نار، ومخبراش السبب، عشان هو اللي رماني!؟ ولا عشان جلبي ماريدش البعد من أصله؟

_ مش هتفرق. 

قالها بهدوء تام، وأكمل بنفس الهدوء والاقتناع:

_ لو عشان هو اللي طلق فده هتعملي فيه ايه، هترجعي بالزمن عشان تطلبي أنتِ الطلاق؟ 

ابتسمت ساخرة وهي تقول:

_ لا هرجع بالزمن عشان اعدل حاجة تانية...

ورجعت بذاكرتها لذاك اليوم مجددًا... 

حين هدرت "رباح" بدون قصد ولم تكن تعرف أن الأمر سينقلب عليهما:

_ تطلجها! عشان ربع بيت ونص مصنع يا نتن! طب ماهياش متنزلالك عن حاجة، واعلى ما في خيلك اركبه. 

أدركت هي ما سيؤول إليه الأمر، فهو لن يتمسك بها، بل سيلقيها على مصرع ذرعيهِ دون أن يهتم أو يتردد حتى! فهمست بصوت مسموع.. همست برعب وذعر حتى أن صوتها يخرج بالكاد:

_ لاه.. بلاش يا ابراهيم.. دي لحظة شيطان بلاش تخرب بيتنا.. 

وهذه الجملة تحديدًا ما تندم عليها، ليتها لم تتحدث في تلك اللحظة، ليتها خرست واطبقت شفتيها عنوة كي لا تبوح بما يهين كرامتها أكثر.. لو رجعت بالزمن إما ستصمت، إما ستثور هي الأخرى وتخبره أن يفعل، يطلقها وينتهي الأمر السخيف هذا برمته.... 

نظر لها بملامح قاسية، كما كان دومًا، وبنبرة جافة:

_ أنتِ طالج.. 

وذهب فورًا من أمامهما تحت صراخ والدته التي لم تتوقع أن يفعلها وهي تلحق بهِ لترده عما فعله، وانخرطها هي في بكاء عنيف، قاسٍ، كقسوة نظراته منذ قليل.... 

~عودة~

تنهدت بقوة وهي تقنع ذاتها قبل أن يكون حديثها موجه للجالس جوارها:

_ هنسى.. كل حاجة بتتنسي يا باهر، خصوصًا الشين "الوحش".. بس شوية وجت "وقت"...

_ بس الحلو عمره ما يتنسي يا فريال، مينساش الحلو إلا قليل الأصل..

نظرت له تساله بحزن عليهِ:

_ ليه طلجت مرتك؟ أنتَ كان باين عليك إنك بتحبها جوي..!!

ضحك باصطناع أدركته:

_ أصل الحلو مبيكملش.. يعني لا حلو نافع، ولا وحش نافع.

دعت له بصدق:

_ ربنا يهدي سركوا يا باهر، وكل حاجة ترجع أحسن من الأول..

وعلى ذِكر سرهما! رآها... جميلة كالعادة، تأتي من بعيد متألقة في ثوب نهاري يناسب اجواء الحفل، بلونه الزهري الفاتح، ليتلائم مع مياة البحر تمامًا، وشعرها يتراقص بفعل الهواء، تمسك في ذراع والدها المجاور لها، وهي تنظر هنا وهناك حتى وقعت عيناها عليهِ حين أصبحت على مقربة أكثر منه...

ضُرب قلبها بعنف دقاته حين ابصرته، كانت متأكده انها ستراه هنا ولكن للفعل وقع آخر، سمعت والدها يخبرها:

_ باهر اهو يا ستي.. تعالي يلا نروحله.

وللأسف والدها لا يعرف بشأن طلاقهما بعد..

نهض حين اقبلا عليهِ واستغرب ابتسامة والدها وترحيبه بهِ، ثم أردف يقول:

_ استلم يا سيدي مراتك، أنا عاوز افهم يعني مجبتهاش معاك من امبارح ليه، لازم تبهدلوني وراكوا؟

نظر لها على الفور باستغراب وقد شعر بحيرة واضطراب، انقذته وهي تقول لوالدها:

_ يا دادي قولتلك، هو امبارح كان مستعجل وأنا في ترتيبات بحب اعملها قبل أي مناسبة ما بالك بقى أنها في بلد تانية، هو بالنسباله يلا على الغردقة يبقى اخد فستاني اللي هلبسه على كتفي ونجري، لكن انا مش كده عندي ترتيبات... بعدين سبني اسلم على القمر دي بقى..

قالتها وهي تقبل على "فريال" بابتسامة مرحبة، فقابلتها الأخرى بمثلها، وتعانقا مرحبان ببعضهما، ثم اتجهت تصافح وتعانق "رباح" بحب مماثل، فهي تعلم أن باهر يحب هذه السيدة، ثم التفت على صوت والدها بعدما حياهما بهدوء يقول:

_ طيب، هروح انا بقى يمكن الاقي حد من رجال الأعمال اللي اعرفهم هنا، اسلي وقتي...

_ متقلقش يا عمي هتلاقيهم كلهم، ده مراد باشا فرحه ولا فرح سفير تانزانيا..

_ اشمعنا تانزانيا؟

ضحك بخفه يجيبه:

_ اهي اللي جت على لساني..

بادله "نبيل" الضحك وهو يقول:

_ ماشي، يلا استأذنكوا أنا..

_ اتفضل.. 

قالها الجميع لينصرف هو بعيدًا عنهم، ويلتف "باهر" ل "جاسمين" بتوتر بالغ، وقلب يدق كطبول الحرب، لم يتحدث فقط نظر لها بصمت، لتقول هي بسخرية:

_ محبتش اعرفهم دلوقتي... كده كده هقولهم مش باقية عليك اوي يعني.. بس مش دلوقتي .. 

استمعت لصوت "رباح" تقول:

_ جاسمين يا حبيبتي، ما تستهدوا بالله يا بتي وتجعدوا تسووا اموركوا مع بعض، يمكن ربنا يهدي الأحوال. 

التفت لها بأعين تلمع في مقلتيها:

_ انا مش محتاجه اهدى، مش انا اللي المفروض اقعد واتكلم يا طنط، مش أنا اللي نهيت عشان أنا اللي أصلح. 

نظرت "رباح" لباهر وكادت أن تحدثه، لكنه هز رأسه نافيًا من خلف "جاسمين" لتصمت "رباح" فجأة مدركة عدم رغبته في فتح الحديث في الموضوع.. 

ابتسمت ساخرة ومتوجعة وهي تدرك أن رباح حصلت على إشارة منه للصمت، فاتجهت لمقعد مجاور ل "فريال" تجلس فوقه وهي تقول بضجر وكبرياء:

_ لولا معزة خديجة عمري ما كنت جيت أصلاً، مش ناقصة سدة نفس. 

لكزتها "فريال" برفق من أسفل الطاولة لتصمت، لكنها تحدثت باصرار:

_ ايه بتنغزيني ليه؟ بلاش اقول اللي في نفسي كمان؟! 

أتاها الرد منه وهو يقول بهدوء:

_ سبيها يا فريال تقول اللي عوزاه. 

اغتاظت واشتعلت من بروده كما تراه، فنظرت له بشرار نظراتها:

_ تصدق بالله أنتَ ما عندك دم.. 

وجملتها كانت صادمة للجميع، بما فيهِ هو لكنه اكتف بامتصاص غضبها يقول:

_ اللي تشوفيه. 

وهل امتصه؟ بل اشعله أكثر لكنها كتمته بداخلها و هي تشيح بوجهها بعيدًا كي لا تفتعل شِجار في وسط الحفل المكتظ بوسائل التواصل سواء كان صحافة أو إعلام أو حتى ما يهتمون بمواقع التواصل الاجتماعي.... 

ابتسم بخفه وهو يراها تكتم غيظها وغضبها بصعوبه حتى أن وجهها قد اكتسب لون احمر جراء هذا.

______________

في غرفة العروس..... 

رن هاتفها برقم غريب، لتتجه له تلتقطه تطالع الرقم باستغراب.. فتحت الخط بهدوء لتسمع صوته يقول:

_ نصيحة مني تسيبي الفرح وتخفي.. عشان اللي هيحصل بعد كده مش هيعجبك... 

قطبت ما بين حاجبيها بخوف وقلق وهي تسأل:

_ مين معايا!؟ 

_ حسن وهدان. 

بكل عنجهيه ولامبالاة عرف نفسه، ليرتجف جسدها وتجلس فوق الفراش بصعوبة وهي تسمع لحديثه المهدد لها:

_ الجوازه مش هتتم.. بس قولت اديكي فرصة أخيرة تهربي فيها بنفسك عشان لو اتدخلت هتتأذي.. 

أيهددها؟ هذا أول ما جاء بخاطرها، وثانيًا لا يجب لها أن تسمح لأحد أيًا كان أن يضع إصبعها تحت ضرسه، أو أن يشعرها بأنه لديهِ ما يدينها، هذا ما أخبرها بهِ مراد منذُ أيام... وهي لن تفعل كما في الماضي، لن تهرب، ولن تعطي له الفرصة بأن يتحكم في حياتها مره ثانية، لذا هَدأت من نفسها وجلست فوق الكرسي ثانيًة بارتخاء، وهي تسأله بنبرة حاولت جعلها ماكره، قدر المستطاع كي تُظهر أنها لا يُستهان بها.. 

_لو فكرت تهددني تاني هقول اللي عندي ووقتها أنتَ اللي هتنضر مش أنا.

استمعت لنبرته الساخرة وهو يقول:

_ بقى أنتِ هتضريني أنا، مبقاش غير حتة بت زيك اللي تهددني، ده أنا امحيكي من على وش الدنيا يا بت أنتِ.

جلست على كرسيها ترجع بظهرها للوراء تجيب بدورها بهدوء تام:

_ قولي يا حسن بيه، لو مراد عرف إنك السبب في هروبي زمان تفتكر ممكن يعمل ايه؟

وعلى عكس ما توقعت تمامًا، فقد توقعت انه سيبدأ بالتراجع في حديثه، ستشعر بالتوتر في نبرته، كما اخبرها مراد!!! ولكن اتسعت عيناها ذهولاً حين صدحت ضحكاته عاليه عبر الهاتف، وبعد ثواني كان يقول بهدوء وبال رائق:

_بتهدديني! وانتِ فاكره إن ده تهديد! لو أنتِ عندك حاجه فاكره إنك تقدري تهدديني بيها، فأنا عندي الأجمد.. تحبي تسمعي؟.. 

صمتت وتعالى تنفسها بتوتر، سرعان ما تحولت ملامحها، شحب وجهها، وضاق تنفسها، وبعد ثواني كانت تقول بهمس خرج بالكاد:

_أن... أنتَ.. أنتَ عرفت ازاي؟؟ 

وهي من خرج صوتها مهزوزًا وبان التوتر في نبرتها وبدأت تتراجع في حديثها... كما أخبرها "مراد"..!! 

ليجيبها الآخر بغرور وانتصار:

_ أنا ما فيش حاجه في الدنيا بتخفى عني، يعني اعتقد أنتِ بقيتِ متأكده من ده لما عرفت سر ما حدش يعرفه غير أنتِ والباقيين الله يرحمهم.. 

لقد انهالت صخرة الواقع فوق رأسها، وما عليها الآن سوى المسايسة ومحاولة الوصول لنتيجة ترضيها، فقالت بلجلجة واضحة:

_ على فكرة أنا.. أنا لو سبت الفرح ومشيت، هـ.. هتحصل مشكلة والناس هتتكلم والصحافة اللي بره دي.. بعدين.. كله فاكر إني بنت خاله، فليه اهرب واسيب الفرح.. إلا لو عرفت حاجه عن العريس أو ميت مبرر تاني الصحافة هتكتب عنه. 

_________________

وصلا لمكان حفل الزفاف... 

ليترجل من سيارته معدلاً من سترة بدلته بحنق واضح، ونظر للباب الآخر الذي ترجلت هي منه، ومعها صغيرهما تعدل ثيابه وتحثه على السير.. 

تجاورا بعد أن تجاوزا السيارة ليزفر باختناق، فغمغمت وهي تسير بأناقة تليق بها كسيدة أعمال الآن:

_  بطل تنفخ، وترتني طول الطريق واتخنقت انا كمان. 

عقب ساخرًا:

_ وتتخنقي ليه؟ ده حتى أنتِ عامله اللي في مزاجك وجاية فرح صاحبتك. 

_ عشان لما حد جنبك يكون مضايق عدوى الضيقة هتتنقلك تلقائي، مسمعتش عن الموضوع ده قبل كده؟! 

_ مش عاوز اسمع. 

رددها بعصبية لتقف وتوقف صغيرها الممسكة بيده والذي ارتدى بدله أنيقة كوالده، وقالت بينما تنظر له بحده:

_ طب أنتَ عندك معلومه إن أنا ما غصبتكش تيجي معايا، قلتلك كفايه تبعت معايا عربيه بالسواق، أنتَ اللي أصريت تيجي، وطول الطريق عمال تقولي أنا جاي فرح واحد ما بحبوش وما فيش بينا ود وجاي غصب عنك طب ليه كل ده؟! 

اجابها ببساطة:

_ اكيد مش هسيبك تيجي فرح في بلد تانيه وطريق سفر، وفرح كبير زي ده هيبقى ناس كتير  لوحدك. 

عادت تكمل سيرها وهي تقول بهدوء:

_ خلاص يبقى ما تنكدش عليا اليوم، مش كل شويه لازم تفكرني انك جاي غصب عنك. 

سارت لبعض مسافه ثم احست بشعور بالضيق فتوقفت فجأه وهي تخبره:

_ أنا عاوزه... عاوزه الحمام ضروري. 

سألها قاطبًا ما بين حاجبيه:

- أنتِ تعبانه يعني ولا عادي؟ 

هزت راسها بهدوء:

_ عايزه بس اظبط الميكاب.. 

_ تمام... 

_________________

 سارَ بين رواد الحفل وعيناه تطوف على هنا وهناك منبهراً بتصاميم الحفل الخاصه جداً، لتليق بحفل كبير كهذا والجميع على قدم وساق كي لا ينقص الحفل شيئًا، وكاميرات المصورين اتخذت اماكنها لتصبح جاهزه لاستقبال العروسين لحظة ظهورهما،  ظل يتجول لبعض الوقت حتى وقعت عيناه على ما جعله يتوقف لثانيه قبل أن يقترب من نقطة ما بعينيها، وخاصًة تجاه شخص ما، وفجأه كان يقول وقد وقف خلف الشخص تمامًا:

_ حسن..! 

التف المذكور خلفه ليرى "نبيل" يقف امامه فقال بهدوء تام وملامح عاديه، باردة، لم يظهر عليها اي اندهاش:

_ أهلاً يا نبيل... 

نظر له نبيل معاتبًا وهو يقول:

_ توقعت انك على الأقل هتبعتلي دعوة فرح ابنك، ولا احنا بقينا غرب للدرجادي.. 

قلب عينيهِ بملل ويبدو أن الحديث لا يروقه، ثم قال:

_ انشغلت في ترتيبات الحفله ونسيت.. بعدين انا شايفك جاي من غير عزومه! يعني ما كنتش مستني الدعوه... 

حرك رأسه غير راضيًا عن إجابه شقيقه ثم قال:

_ الحقيقه انا مش جاي عشان احضر الحفله، أنا جاي لسببين، أولاً عشان بنتي جايه تحضر الحفله لأن العروسة صاحبتها، غير إن جوزها قريب العروسة، والسبب الثاني عشان عاوزك في موضوع كلمتك فيه 100 مره بس النهارده مختلف.... 

رفع حاجبيهِ بضيق وهو يهمهم:

_ يبقى موضوع أمك.. 

_ أمنا... 

قالها "نبيل" بحده وقد طفح بهِ الكيل، وأكمل بنفس حدته:

_ أمنا اللي خلاص في أواخر أيامها، واللي بقالي اكتر من سنتين بقولك تعالى زورها، لا عاوز تيجي تزورها ولا عاوزني اعرفها إني عارف مكانك، للدرجادي قلبك قاسي عليها!! أنتَ بتعمل فيها كده ليه؟؟ 

نظر له بضيق واردف:

 _ أنتَ شايف أن ده وقته؟ في فرح ابني جاي تكلمني في موضوع زي ده؟ 

_ويا ترى امتى وقته يا حسن بيه، انا كل وقت بكلمك فيه في الموضوع ده بيكون مش وقته، بتتهرب وبتقفله معايا وبتقولي مش هزور حد، فقلي امتى وقته؟ 

_حل عن دماغي يا نبيل. 

قالها بحدة وضيق وهو يذهب من أمامه، لينظر "نبيل" لاثره بقلة حيلة فلا فائدة معه في الحديث. 

_______________

تركا "فريال" و"رباح" الفرصة لهما للانفراد سويًا  متعللتان بذهابهما للحمام، الصمت كان سيد الموقف لا هو تحدث ولا هي بادرت، حتى أتى والدها وهو يقول:

_ طبعًا أنتِ هتروحي مع جوزك.. 

شعرت بأن هناك ما يضايقه فسالته بقلق:

_ في ايه يا دادي شكلك متضايق؟ 

اجابها بهدوء محاولاً الظهور طبيعيًا:

_ ما فيش انا تمام.. بس كنت عاوز ارجع عشان كده بسألك، هترجعي معاه؟ 

سألته باستغراب:

_ وجيت ليه؟ انا قلتلك مدام هترجع بسرعه كده انا  ممكن اجي لوحدي عادي، أنتَ اللي قلتلي والد مراد يبقى صديق ليك وداعيك. 

_ انا جيت عملت الواجب وقعدتي مالهاش لازمه، عندي شغل لازم ارجع القاهره. 

_تمام انا هرجع مع باهر. 

قالتها وهي تنظر له بينما يطلعها بذهول، لينسحب والدها في هدوء، فنظرت له تقول بكبرياء لا يلائم الموقف:

- عملت بنصيحة تيتة، قالتلي مادام بيحبك وعمل كده عشان مصلحتك مش رغبة منه في البعد، ومادام أنتِ مش عاوزه تبعدي يبقى متسبيهوش لشيطانه اللي راكبه، ولو فكر يبعد عنك تاني طلعي عين أمه. 

_ أمه؟!!! 

قالها معقبًا بدهشة رغم سعادته الجمة بحديثها وقرارها الذي فهمه، لتنظر له ببرائه تقول:

_ أصل انا حكيالها إنك مبتحبش أمك.. مبترتحش معاها يعني، فمحبتش تقول عين ابوه، عشان متزعلش لأنك بتحب باباك الله يرحمه. 

رفع حاجبه الأيسر باستنكار، مقنعة هي في مبررها!!! 

_________

ها هي العروس قد انتهت من كل تحضيراتها والآن يقوم المصور المحترف بالتقاط عدة صور تذكاريه لهما في اماكن جماليه مختلفه.... 

يسند جبهته على جبهتها كما طلب منه المصور ينظر في عيناها وهي تفعل المثل.. تنظر له ولكن عقلها شرد في مكان مختلف تمامًا، لا يكاد ينصرف عن تذكر حديث معين بنبرة صوت "حسن" وهو يقول باستمتاع كأنه كان موقنً من أن ما سيقوله سيثير الرعب في نفسها

" تخيلي أنتِ مراد ممكن يعمل ايه لو عرف إنك مش خديجة.... ولا بنت محمود ولا مصطفى اخوكي.... وإن خديجة دي ماتت من وهي صغيرة"

............ يتبع .......

...... انتهى الفصل ........

الفصل الحادي والعشرين... "كما يجب أن يكون" 

الحصان والبيدق 

بكِ أحيا 2 

"الحب أفعال، ليس أقوال.. والفعل هو ما يصل للقلب أسرع، ويكون ترسيخه أقوى من مجرد قول يُقال" 

_ خديجة؟ حبيبتي؟ 

انتبهت لصوته ينتشلها من شرودها، نظرت له بتيه للحظة قبل أن تعي أنها الآن معه، يلتقطون صور العرس، وليست في غرفتها تتحدث مع حسن وتسمع تهديده عبر الهاتف، ابتسمت بزيف وهي تجيبه:

_ نعم؟ 

ضيق عيناه ينظر لها بتفحص:

_ مالك؟ أنتِ كويسة؟ سرحانة في ايه للدرجادي!؟ 

_ حسن مش هيسيبك... هيدمر حياتك يا خديجة زي ما دمرتي حياتي. 

تحولت عيناها فورًا تنظر لجهة فارغة، لترى "سارة" تقف بها، بابتسامة شامتة، وملامح منتصرة، تحدثها، وتكمل:

_ هيفضحك واللي خبتيه هيتكشف، أنتِ خدتي مكان مش مكانك يا خديجة، خدتي حق مش حقك. 

ادمعت عيناها رغمًا عنها وهي تستمع لحديث الأخيرة قبل أن تعاود قول:

_ قوليله؟ تقدري تواجهيه؟ قولي لمراد حقيقتك، عرفيه أنتِ مين، ده لو أنتِ نفسك عارفة! 

تساقطت دموعها عجزًا وقهرًا، وهمست بصوت وصل له رغم خفوته:

_ معرفش... معرفش. 

أقلقه حالتها، وتأكد أنها ترى "سارة" لقد عادت هلاوسها مرة أخرى، بعد أن مضى أكثر من خمسة عشر يومًا على آخر مرة رآها بحالة كهذه، وأخبرته أنها لم تراها منذ أسبوع، لم تطاردها كالعادة، لكنه توقع أن تفعل اليوم، وقد أنبأه الطبيب بإمكانية هذا، فعقلها الباطن لن يدعها تستمع بيومها بهذه البساطة، ر فع كفيهِ يكوب بهما وجهها، ووجهه لينظر لوجهه، قبل أن يحدثها:

_ خديجة، حبيبتي بُصيلي، خديجة ركزي معايا يا حبيبتي. 

وأخيرًا نظرت له، ليدرك أنها بدأت تعي، أشار للمصورين برأسه أن ينصرفوا ففعلوا، توجه بها لكرسي موجود في ساحة التصوير، وجلس فوقه وجذبها لتستقر فوق قدميهِ باستسلام تام وكأن عقلها غائب عن الحاضر، أمسك كفها الأيمن يمسده بكفه، والكف الآخر يمرره على خدها بلطف ليزيل أثر دموعها، وهو يقول:

_ اهدي، مفيش حاجة أنتِ معايا. 

نظرت له صامتة، فاستحثها على الحديث يسألها:

_ شوفتيها؟ 

اومأت برأسها بضعف، ليميل رأسه قليلاً بألم من حالتها وما وصلت إليه، أليس مقدر لها أن ترتاح؟ وأكثر ما يؤلمه هو عجزه عن مساعدتها، و كونه السبب فيما تعانيه مهما أنكر... 

_ ليه ردتِ عليها؟ مش اتفقنا إنك مش هتسمعي لكلامها، مش هتردي ومش هتبصيلها حتى. 

ارتعشت شفتيها تنذر بالبكاء وهي تجيبه بانكسار:

_ معرفتش... 

جذب رأسها لصدره يحتضن جسدها بأحد ذراعيهِ ورأسها بكف ذراعه الآخر، وكأنه يحميها من شبح مخيف، رغم إدراكه أن هذا الشبح يكمن بداخلها، قبل أعلى رأسها وهو يسألها هامسًا:

_ تحبي اجبلك قرص مهدأ؟ 

اومأت برأسها موافقة، فهي حقًا تحتاجه وبشدة كي تستطيع استكمال يومها، مدَ كفه لجيب سترته الداخلي ليخرج شريط أقراص ابيض اللون، نظرت له باستغراب وابتعدت عن حضنه تسأله:

_أنتَ شايله في جيبك؟ 

تنهد مجيبًا بهدوء رغم ضيقه:

_ عشان توقعت إنك ممكن تحتاجيه، رغم إني مش حابب ابدًا إنك تاخدي منه، مش عاوزك تتعودي عليه، بس عشان اليوم يعدي ومحدش يلاحظ حاجة. 

أحنت رأسها بحزن واضح وهمست له:

_ عرفت ليه بخاف من التجمعات والناس الكتير، عشان أنا مش ضامنة نفسي.. لو الموقف ده كان حصل قدام حد كانوا هيقولوا عني... 

قاطعها وهو يفتح فمها بإصبعيه ليضع القرص في فمها بلطف بعد أن التقط زجاجة المياة الموضوعة على طاولة مجاورة للكرسي:

_ هيقولوا عنك ست البنات وملكة قلبي، أنتِ مش شايفة طالعة حلوة ازاي!! 

ابتلعت قرص الدواء في صمت، وعقلها يفكر بقلق من القادم، تُرى هل سينفذ "حسن" تهديده ويفسد يومها ويكشف حقيقتها أمام "مراد"؟ 

_ ممكن متفكريش في أي حاجة غير إنك تفرحي وبس؟ 

نظرت له تبتسم في هدوء وهي تخبره:

_ حاضر.. 

تم عقد القرآن بعد دلوفهما لساحة الاحتفال، وهذه المرة بكنيته الحقيقية ك "مراد حسن وهدان"، وشعوره في هذه اللحظة كان عاديًا، فهو اساسًا ليس مقتنع بهذه العادات الغير مهمة بالنسبة له، وليس مهتمًا بإعادة عقد القرآن، لأنه لا يشك في صِحة الأول، ولكن من أجلها وأجل والدته فعل... 

والآن يتراقصان معًا على نغمات أغنية هادئة كرقصة افتتاحية للحفل، أحاط خصرها بذراعيهِ يقربها له بقدر ما يسمح له الفستان، والذي سمح له بقرب كبير، فهو انسيابي الحركة وباقترابه منها تراجع الفستان باتساعه للوراء، أحاطت عنقه بذراعيها بتوتر يضرب كل خلية بها، ليس فقط لقربه المبالغ بهِ، ولكن لكم العيون الواقعة عليها، والكاميرات التي لا تنفك تلتقط الصور في كل لحظة، شعر بتخشب جسدها بين يده وتوترها الواضح في تحركها معه، ليمسد بكفه على ظهرها صعودًا وهبوطًا وهو يقول بعدما مالَ على أذنها:

_ اهدي ومتفكريش في اللي حواليكِ، سيبي نفسك للحظة ومتشوفيش حد غيري أنا وأنتِ وكلمات الأغنية. 

وهل تنقصه هو الاخر؟ لقد بدأت تفصل عما حولها بالفعل ولكن بدأ هو من يثير توترها، ومع ذلك بدأ تيبس جسدها يختفي مع مرور اللحظات وتركيزها في كلمات الأغنية التي تصدح في الأرجاء وشعورها بقربه منها وأنفاسه التي تضرب وجهها من حين لآخر حين يقترب برأسه زيادة.. 

..... أنا مكسب عمري إني قابلتك

غيرت في عيني الأيام

طمنتني ع الباقي في عمري

حققت لي كل الأحلام

أول ما عيونك دي بشوفها

مش بعرف أشوف غيرها خلاص

إنت هدية ربنا ليّ

إنت حبيبي وأغلى الناس

وبتحلى الدنيا في عيني

وأنا جنبك فما تبعدنيش

حُبك فعلاً بيخليني

أتمسك بالدنيا وأعيش

وفي قربك بيروح خوفي

وده وعد ومُلزم أنا بيه

مهما تكون يا حبيبي ظروفي

قلبك عمري ما هاجي عليه.. 

وفي نهاية الأغنية كان يحتضنها بقوة وحملها يدور بها عدة مرات تحت التصفيق الحار وعدسات الكاميرات تتسارع لتلتقط الصور لهذه المشهد الذي بدا وكأنه خرج من احد افلام السينما العالمية، وما عززه الآلات دفع البخار التي شكلت سحابًا وهميًا والتي تستخدم لأول مرة في مصر في هذا الحفل ليكن له الأسبقية، وفستان العروس يتطاير بشكل خرافي بين السحاب الوهمي فكان منظراً أكثر من رائع.. 

وانتهى الحفل أخيرًا.... 

وانفض الجمع، واستقل كلاً سيارته متجهًا لوجهته.. 

__________

وعادت "فريال" و "رباح" بسيارة "باهر" الذي استأجرها لليوم خصيصًا، وبالطريق أخبرهما:

_ هتباتوا معانا اليومين دول لحد ما نروح نبارك لخديجة مش هينفع ترجعوا سوهاج وتيجوا تاني. 

والحرج أصابهما في وجود "جاسمين" فبالطبع هناك الكثير بينها وبينه للتحدث فيه، ووجودهما سيعيق التفاهم، وسيسبب لهم الإحراج. 

_ ما بلاش يا حبيبي، خلينا نسافر وكام يوم ونبجى نيجي نزورها. 

قالتها "رباح" بحرج، ليقول:

_ اكيد مش بعد ما نرجع القاهرة هسيبكوا تمشوا، المشوار هيكون صعب عليكوا وهتتعبوا، ارتاحوا يومين ولو عاوزين تسافروا وتيجوا لخديجة يوم تاني مش مشكلة. 

قالت " فريال" :

_ مش هينفع نزورها دلوجتي، خلونا نعدي سبوع اكده ونبجى نروحلها. 

_ اللي تحبوه، بس برضو هترتاحوا عندي يومين. 

نظرت له "جاسمين" بجانب عيناها، لا تستطيع فهم إصراره، هل هو من أجل راحتهم، أم هربًا من المواجهة معها؟ 

أثرت الصمت الآن، وفي البيت لابد من حديث آخر.. 

_____________

في طريق العودة... 

بسيارة "دياب".. 

كانت تغلق زجاج السيارة خوفًا من أن يصاب "عُمر" الذي غلبه سلطان النوم على قدميها بالبرد، واحتضنته بعناية تقبل رأسه بحنان أموي، استمعت له يسألها:

_ نام؟ 

اومأت قائلة:

_ لعب كتير النهاردة. 

_ معرفش كان فرحان بالمكان على ايه، ده حتى مكانش فيه أطفال غيره، وعشان كده قولتلك نسيبه مع ماري. 

نظرت له تقول:

_ فرحان بالاغاني والدوشة والمكان كان واسع ولافت انتباهه، بعدين مكانش فيه أطفال لأنك عارف كويس كل اللي معزومين دول مستحيل ياخدوا أطفالهم معاهم في افراح ولا أي مناسبة أصلاً ومتعودين يسبوهم للمربيات، لكن أنا مش متعودة، أنا اه ممكن اسيبه معاها ساعتين او تلاته بس مش المدة دي. 

_ ليه مانتي بتروحي الشغل وممكن تقعدي فيه بالخمس ساعات وسيباه عادي.

_ مبتكونش معاه لوحدها، بيكون معاها سعاد " المسؤولة عن الطبخ والتنظيف" وأنا بثق فيها لكن هي النهاردة أجازة، غير إني معظم الوقت في الشغل بيكون عيني على الكاميرات. 

_ على فكرة ماري كويسة، ومتقدرش تأذيه في حاجة، أنا مش هجيب أي واحدة وأمانها على ابني، مش عارف ليه مبتحبيهاش! 

_ مبرتحلهاش، عادي كده من غير سبب. 

ابتسم بلؤم وهو يقول:

_ متأكده؟ ولا يكون عشان ماهي حلوة شويتين فغيرة ستات وكدة!

ادعت الإنكار وهي تجيبه:

_حلوة؟ هي عادية على فكرة. 

انطلقت ضحكاته عالية، وهو يدرك صحة حديثه، ليقول بفهم:

_ مادام أنكرتي حلاوتها يبقى فعلاً، غيرة، بس يا ترى غيرة منها ولا عليا؟ 

مسدت على خصلات طفلها بلامبالاة زائفة وهي تقول:

_ آخر حاجة ممكن اعملها إني اغير عليك، وانا مش وحشة عشان أغير منها.. 

قال بغزل ونبرة محبة:

_ أنتِ أحلى من أي ست عيني شافتها، سواء غيرة عليا أو منها، فكوني واثقة إن مفيش ست في الدنيا تستحق غيرتك لأنك أحلى وأحسن منها. 

لن تنكر أن حديثه أرضاها، وأرضى غرورها الأنثوي، وأشعرها بقليل من الراحة لاكتفائه بها، ورؤيته لها بهذا المنظور، لكنها بالطبع لن تظهر، فأشاحت بوجهها تنظر من النافذة بصمت. 

ليحرك رأسه يائسًا فيبدو أن لا شيء يثير مشاعرها ناحيته. 

انتبهت لرسالة وصلتها على هاتفها، لتفتحها فوجدتها من معمل التحاليل الذي ذهبت له منذ عدة أيام وقامت بعدة فحوصات فيهِ جراء شعورها ببعض التعب بعد أن زارت الطبيب ونصحها بعمل فحوصات معينة.. 

وبأصابع راجفة، وقلب مرتعش، فتحت نتيجة التحاليل، لكنها لم تفهم منها شيء، فبعثتها على الفور للطبيب الخاص بها.. وأغلقت الهاتف فورًا كأنها تهرب من رد الرسالة.. 

وبعد عشر دقائق اتاها إشعار رسالة آخر، لتضطر لفتحه فتظهر رسالة الطبيب

" أفضل حضرتك تشرفيني في العيادة" 

بعثت له بخوف وتوتر

" ممكن تقولي التحاليل فيها ايه لحد ما اجي لحضرتك؟" 

وبعد دقيقة أتاه الرد 

" شكي طلع في محله، بس مش هينفع نتناقش أو أوضح حاجة في الشات، نوريني في العيادة يا مدام رنا" 

هي لا تعلم شكه لكن سقط قلبها، المرة السابقة لم يخبرها بما يشك، وحين حاولت الاستفسار أجابها 

" بلاش اقولك شاكك في ايه واقلقك على الفاضي، مبحبش اعمل كده ولا ده اسلوبي، أنا مبتكلمش مع المريض غير بعد الفحوصات والتحاليل"

ورغم جهلها، لكنها تشعر أن الأمر مُقلق وخطير ولا تعلم لأي حد... 

نظرت ل "دياب" تسأله بخفوت:

_ لسه كتير على ما نوصل؟ 

_ لا، ربع ساعة بس، كويس إننا مشينا قبل الفرح ما يخلص، لو كنا استنينا كان زمانا لسه متحركين من هناك، بعدين هو مش من بقية عيلتنا يعني. 

لم تجيبه، ليظن أنها لا تحبذ الحديث فيما يتعلق بصديقتها كالعادة، ابتسم ساخراً وهو يتذكر وجه "مراد" حين رآه، وكيف تبدلت ملامحه للجمود فجأة، اقترب منه بخطى متريثة وابتسامة مستفزة، وهو يمسك كف "رنا" التي سرعان ما تركته معانقة "خديجة" بحب وسعادة، وقف أمامه يقول بسخرية:

_ مبروك يا مراد بيه، بقى عندك اللي يتخاف عليه. 

قست ابتسامة "مراد" وهو يقول:

_ متعود تروح اماكن مش معزوم ولا مرحب بيك فيها؟ 

_ الدعوة جت من المدام بتاعتك.. هي اللي دعت المدام بتاعتي وقالتلها أنتِ وجوزك. 

ماكر وخبيث، يدرك أن حديثه يشعل فتيل غضب الأخير رغم ادعائه اللامبالاة، ليعقب "مراد" :

_ آه، يعني أنتَ جاي مع دعوة المدام.. 

و ابن وهدان ليس اقل مكرًا أو تلاعبًا بالكلمات، و "دياب" ليس مثله، فقد ظهر ضيقه في عينيهِ، رغم ثبات ملامحه، ولم يتوقف هنا بل أكمل ردًا على جملته الأولى، وعيناه تنظر للصغير الذي تحمله "خديجة" وتقبله الآن.. 

_ أنتَ عندك اللي يتخاف عليه اكتر بكتير، أمور ابنك مش طالع شبهك... قولتلي اسمه ايه! 

وسؤاله الاخير لم يكن سؤالاً فهو لا يهتم بمعرفة اسم الصغير من الأساس، وتغيرت ملامح "دياب" هذه المرة على ذِكر صغيره، فكيف نسى أن الواقف أمامه بالطبع سيرد له الصاع صاعين، وكما أخبره لديه هو الآخر ما يخشى عليهِ أكثر منه.... 

عاد من تذكره لمقابلتهما، وأردف:

_ ماشي يابن وهدان، من وهنا ورايح هضطر العابك في الشغل وبس، عشان لو دخلت حياتنا الشخصية هكون أنا الخسران. 

قال الأخيرة وهو ينظر ل "رنا" التي اسندت رأسها على ظهر المقعد ناظره من النافذه بشرود، ونقل بصره لمصدر قلقه الأكبر، طفله الصغير الذي ينعم بنوم هادئ.. 

______________

بعد ساعة ونصف.... 

وصلا أخيرًا للقاهرة.. وتوقفت السيارة أمام المنزل ليترجل الحرس أولاً بسرعة يفتحون أبواب السيارات.. ليترجل "مراد" أولاً من السيارة الخاصة بهِ هو و "خديجة" والتي تولى قيادتها سائقه الخاص، واستدار للباب الآخر يساعدها في الترجل بفستانها من السيارة، ومن ثم تحرك لوالدته يعاونها على الجلوس فوق كرسيها المتحرك، بعد أن حملها من داخل السيارة، ابتسمت له "ليلى" وقبلت وجنته تقول بابتسامة:

_ ربنا يسعدك يابني ويوفقك في حياتك الجاية. 

ابتسم لها بامتنان وقبل جبهتها بحب، قبل أن يدفع "مصطفى" مقعدها لداخل المنزل. 

اتجه ل "خديجة" التي ما زالت واقفة محلها، ابتسم لها بحب وهو يمسك كفها بينما يقول:

_ لولا إني عارف إنك هتتضايقي كنت شيلتك. 

خطت معه تصعد درجات السلم القليلة وهي تنظر ل "مصطفى" الذي دلف من باب آخر يلائم مدخله كرسي "ليلى" وهي تقول:

_ أنتَ عارف إني هتكسف، وقولتلك إني محبش حاجات زي دي تحصل قدام حد كاحترام ليهم ولينا. 

_ عارف. 

قالها باستسلام، فرغم عدم اقتناعه برأيها ووجهة نظرها، سيفعل ما تريد، رفعت الفستان وهي تصعد درجات السلم وهو يعاونها حتى توقفا على مدخل باب الفيلا وهما يسمعان صوت آخر شخص تمنت سماع صوته في هذه اللحظة:

_ مراد استنى. 

التفا ليظهر "حسن" وهو يترجل من سيارته بشموخه المعتاد، ونظره مسلط عليها بابتسامة متسلية، ارتجف جسدها ليشعر بها "مراد" الممسك بكفها، فنظر لها وهو يضغط على كف يدها:

_ احنا قولنا ايه! 

يذكرها أنها لا يجب أن تخشى أحد وهو معها، لكن كيف تخبره أنها الآن تخشاه هو نفسه.. 

_ عاوزك في موضوع مهم. 

قالها "حسن" حين وقف أمامه، ليردف "مراد" بضيق ساخر:

_ ده وقته؟ 

أكد قائلاً:

_ فعلاً ده وقته، اصله يخص العروسة.

والعروس تموت رعبًا، حتى أن ريقها جف من كثرة الخوف، ولا تعلم ما القادم... وعزائها الوحيد أن لديها بعض الثقة في "مراد".. 

_ خلينا نتكلم جوه. 

قالها "مراد" حين لاحظ تبادل النظرات بين زوجته ووالده، وشعر بخطورة الأمر. 

__________

والآن... 

استقر الجميع في غرفة الصالون.. والصمت هو السائد، والنظرات متبادلة، حتى هتف "مراد" بسأم:

_ خير؟ 

وضع "حسن" رجل فوق الأخرى، ونظر ل "خديجة" الجالسة كالهرة الخائفة بجوار" مراد"، ملتصقة بهِ، وكفها يحضتنه بكفه، ابتسم ساخرًا وهو يسألها:

_ تقولي أنتِ ولا اقول أنا؟ 

والصمت استمر لعدة ثواني قبل أن يقطعه "مراد" نازقًا:

_ بابا، أنا مبحبش حوار التشويق ده، قول اللي عندك. 

هز رأسه موافقًا:

_ هقول... فاكر لما قولتلك شوف مراتك مخبية عنك ايه؟ 

وهنا قد جذب اهتمام "مراد" جيدًا، الذي نظر له في انتظار بقية حديثه، ليبتسم "حسن" وهو يقول:

_ انا بقى بما إنك مدورتش ومهتمتش، هقولك هي مخبية عنك ايه.. الهانم متب.... 

_ زين.. 

همست بها "خديجة" وهي تقلب الوضع لتصبح هي من تمسك كفه وتضغط عليه بقوة، نظر لها وهاله ما رأى... 

مقلتيها حمراء كالدم، والدموع متعبأه بهما، ووجهها شاحب كالموتى، شفتاها ترتجفان رغمًا عنها، ونظرة رجاء في عيناها وهي تهمس له:

_ بلاش ومصطفى... مصطفى لأ... 

لم تستطع تكوين جملة مفيدة، لكنه فهمها، وضربته الحيرة أكثر، والقلق! نظر ل "مصطفى" الذي يتابع ما يحدث بفضول وقلق على شقيقته، ليقول "مراد" بهدوء زائف:

_ مصطفى خد ماما طلعها فوق.. 

وتبادلوا النظرات قليلاً، قبل أن تفهم "ليلى" رغبة ولدها:

_ طلعني يا مصطفى ارتاح شوية. 

وثواني وكانت الغرفة تضم الثلاثة فقط.. لتبدأ "خديجة" في البكاء بصمت، ولكن رغمًا عنها انفلتت شهقة منها لم تستطع التحكم بها، لينظر لها "مراد" وهو يترك كفها ليمسك وجهها بكفيهِ محدثها بحدة وغضب:

_ أنتِ عاملة في نفسك كده ليه؟ 

_يمكن خايفة من الحقيقة اللي هتتكشف. 

وكأنه لم يستمع لتعقيب "حسن" السخيف، ليحدثها بضيق:

_ أيًا كان اللي حاصل، متخافيش، وميستاهلش اللي أنتِ عملاه ده، اهدي يا خديجة! 

وجملته الأخيرة خرجت آمرة، لتحاول التحكم في بكائها بينما يمسح وجهها بكفيهِ، فقد تعرق إضافة للدموع التي تغرقه.. 

عاد يمسك كفها يطمئنها، لتحاول التقاط أكبر قدر من الهواء تعبأ رئتيها قبل أن يقول "حسن" بملل:

_ نهايته، اللي عرفته، واللي هي مخبياه عنك، إنها مش خديجة محمود الدالي... مش من عيلة الدالي ولا اللي طلع ده اخوها.. يعني حضرتك اتجوزت واحدة غير اللي أنتَ فاكرها. 

_ ايه التخريف ده! 

قالها "مراد" باستنكار وعدم تصديق تام، ثم نظر ل "خديجة" ليراها عاودت البكاء في صمت، قطب ما بين حاجبيهِ وهو يسألها:

_ هو بيقول ايه؟ وأنتِ بتعيطي كده ليه؟ هو كلامه صح!!!؟ 

_ مراد. 

قالها "حسن" ليلفت انتباهه، لينظر له بالفعل، ليقول بجدية:

_ خديجة ماتت من وهي صغيرة.. ودي مش خديجة الدالي. 

هز رأسه برفض تام وانتفض واقفًا بعدما ترك كفها، يقول بهدوء رافض:

_ مستحيل. 

_ طب اسألها... لو كنت بكدب تكدبني. 

قالها "حسن" وهو يقف يواجهه، ليقول "مراد" باصرار:

_ مش محتاج اسألها، حتى لو قالت نفس كلامك، تبقى هي كمان كدابة، أنا لما عرفتها بعد سنين عرفتها بقلبي، لما شوفتها قلبي عرفها قبل ما اتأكد انها هي، قلبي حس بيها وبيحس بيها كل ما تكون قريبة منه، معرفش ايه السر في اللي بتقوله، بس اللي متأكد منه إنها البنت اللي حبيتها وربيتها على أيدي... 

رفعت عيناها تنظر له من بين غيام دموعها، وقلبها يركض إليه، يقدره ويقدر موقفه، لم تتخيل ابدًا أن يكون هذا رد فعله، هو الآن يثبت لها أنه يحبها بالفعل.. يحبها الحب الذي ينفي أي شيء يشكك في حبه وحبيبته، الحب الذي يجعل المحب يدافع عن حبه رغم الشكوك والأدلة، ويبرهن الآن بأن حبه قوي، وأن حبه هو الحب كما يجب أن يكون... 

_ بقولك خديجة دي ماتت، وأنت تقولي مش محتاج اسألها؟ طب على الأقل اسألها هي مين لما خديجة ميتة أصلاً!. 

لن تتركه يهدم حياتها التي اوشكت أن تبدأ، لن يتركه يفعل معها كما فعل في الماضي، وإن قرر قلب الطربيذة فلتكن على الجميع وكلاً يدافع عن جبهته. 

انتفضت واقفة تزيح دموعها بعنف، وصرخت ب "حسن" :

_ ما تقوله خديجة ماتت امتى.. ولا وهو خديجة ماتت وخلاص! ما تكمل كلامك يا حسن بيه ولا لو كملته خطتك هتبوظ؟ 

نظرت ل "مراد" لتجد نظرته ضائعة، بعد اعترافها بموت "خديجة"، حزنت على تشتت نظراته وشحوب وجهه بشكل واضح، لتقترب منه تمسك كفيهِ بكفيها، وهي تنظر لعينيهِ وتقول من بين دموعها:

_ أنا البنت اللي حبتها.. أنا البنت اللي ربيتها على ايدك زي ما بتقول، أنا اللي عاشت معاك الحلو والوحش.. أنا اللي شيلتها بايدك وخدت بايدها لكل خطوة في حياتها... ده اللي يهمك ولا يهمك المسميات؟ 

نظرت له بقلق تنتظر رده، والخوف يتراقص في عينيها، ماذا إن رفضها بعدما علم حقيقتها؟ ماذا إن لم يتقبل كذبها وخداعها له بشأن هويتها الحقيقية؟ هل سيتركها؟ هل سيرفض أن يكمل حياته معها وقد أخبرها سابقًا أنه لا يحب الكذب ولا يريد أن يكتشف عنها شيء من شخص آخر، والآن هو يكتشف أهم شيء عنها من والده، لم تخبره بنفسها كما أخبرها سابقًا.. فقط لو امتلكت بعض الشجاعة لفعلت، لكنها كالعادة أجبن من أن تفعل... وأتى رده صادم لها ولوالده، حين قال بعد تنهيدة قوية خرجت منه وأحد كفيهِ ترك كفها ليرفعه ويضعه على وجنتها بحنو:

_ متخافيش، قولتلك قبل كده مش عاوزك تخافي من أي حاجة في الدنيا... حتى لو كنت أنا. 

ولهنا لم تستطع الصمود أمام كرم حبه، وقوة عاطفته، فرمت بنفسها تحتضنه بقوة وذراعيها يطوقان عنقه بصعوبة لفرق الطول بينهما، وأجهشت في البكاء فالضغط النفسي الذي تعرضت له في الساعات الماضية أنهكها وخارت قواها... 

ورغم حيرته والأفكار التي تعصف برأسه لفِهم الحقيقة، لكنه لم يحبذ الضغط عليها أكثر، وهو يرى خوفها وحالتها النفسية السيئة، أحاطها بذراعيهِ يرفعها لطوله بين أحضانه وهمس في أذنها:

_ ميهمنيش اسمك ولا حقيقتك... المهم إنك حبيبتي اللي قلبي مغلطش فيها وعرفها من أول نظرة، ميهمنيش غير إنك حبيبة عيوني وكل ما ليا، مش مهم أي حاجة تانية. 

وما زادها حديثه إلا بكاءً وهي تشدد من احتضانه كأنها ولأول مرة تريد أن تدلف لداخله لو تستطيع...! 

....... انتهى الفصل....

يخربيتك يا مراد جايبلنا جفاف عاطفي 🌚

تفاعل الفصل اللي فات مزعلني اوي بجد مش هقول اكتر من كده

تكملة الرواية من هنااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول1 من هناااااااااا

الرواية كامله الجزء الثاني2 من هناااااااااا

مجمع الروايات الكامله اضغط هناااااااا

مجمع الروايات الكاملة 2 اضغط هنااااااا