رواية اسمى معاني العشق الفصل الاول والثاني والثالث والرابع والخامس بقلم سلمى سمير( جديده وحصريه فى مدونة قصر الروايات)

 رواية اسمى معاني العشق الفصل الاول والثاني والثالث والرابع والخامس بقلم سلمى سمير( جديده وحصريه فى مدونة قصر الروايات)

رواية اسمى معاني العشق الفصل الاول والثاني والثالث والرابع والخامس بقلم سلمى سمير( جديده وحصريه فى مدونة قصر الروايات)

**********

في محطة القطار

في كل قطار يصل، تُحمَل معه آمال وطموحات، وفي كل قطار يغادر، تتوارى خلفه نهايات وأحلام ضائعة. وسط هذا الزحام البشري، وبين الوجوه التي تحمل قصصها المختلفة، نزل شاب يافع من القطار القادم من قلب الصعيد. كان في مقتبل العمر، يحلم بمستقبل مشرق، ويخطو أولى خطواته نحو تحقيق طموحاته وبناء حياته.

دعونا نسرد حكايته ونتابع ما يخبئه له القدر في رحلته.

عمر، شاب طموح وبطل قصتنا، وصل إلى القاهرة ليبدأ رحلته الجامعية بكلية الهندسة. كان الأمل يملأ عينيه، والحماس يغمره، وهو يستعد لبدء فصل جديد من حياته المليئة بالتحديات والأحلام.

خارج محطة القطار

خرج عمر من المحطة بخطوات متسارعة، يحمل حقيبته الصغيرة ويتلفت حوله. في الخارج، وقف أمام كشك صغير بالقرب من المحطة.

السلام عليكم.

رد صاحب الكشك:

وعليكم السلام ورحمة الله، أي خدمة؟

عاجله عمر بالرد:

لو سمحت في مكان هنا للسكن؟ 

عايز أأجر أوضة أسكن فيها.

طالعه صاحب الكشك بريبة واخذ يتفحصه باهتمام

ورد بعد برهه من الوقت:

آه، طيب استنى كده... 

نادي على صبي صغير وقال له بتحذير؛

خليك هنا مكاني لحد ما أرجع لو سيبت الكشك بموتك فاهم  

هز الصبي راسها بالموافقة فنظر إلي الشاب وسأله:

اسمك إيه يا أستاذ؟

دون تردد أجاب الشاب بثقه وفخر:

اسمي عمر حامد الألفي، من المنيا.

عاد صاحب الكشك وسأله بعد الترحيب به:

أهلاً وسهلاً، أكيد جاي للدراسة

إجابة عمر بابتسامة ثقه:

أيوه، ان شاء الله هدرس هندسة في جامعة القاهرة

.

ابتسم له صاحب الكشك واجابه:

بص، انا عندي شقة أوضتين وصالة لسه فاضية امبارح. البيت قريب من المحطة يعني مريح، لكن الإيجار غالي شوية. لو لقيت حد يشاركك، هيخفف عنك كتير 

لم يتقبل عمر فكرة مشاركة أحد السكن لكنه لم يعترض فهذا الحل مناسب لظروفه المادية فقال:

  طب، أشوف الشقة الأول.

قاد الرجل عمر عبر شارع جانبي في حي من أحياء شبرا. ذلك الحي الشعبي الذي يميزه المودة والالفه بين سكانه، وصلوا إلى بيت قديم مكوّن من ثلاثة طوابق. صعد معه الي ان وصل للطابق الثاني. طرق الرجل باب إحدى الشقق، ففتح شاب في أوائل  العشرينيات. وقال مرحبًا:

عم رجب: إزيك يا راجل يا طيب؟

خير ان شاء الله احنا لسه في نص الشهر، عايز الإيجار بدري ولا إيه؟

ضحك عم رجب من حديث الشاب المازح وقال:

لا لا، أنا عايز مفتاح الشقة اللي فوق. سيباه مع أمك.

امتعض الشاب من طلبه وسأله بضيق:

ايه ده  انت هتأجرها لطلبة تاني؟

ما بلاش يا عم رجب مش ناقصين  مشاكل 

ربت عم رجب علي كتفه برفق واردف:

واحد أو اتنين مش هيضروا. ده حتي الشاب واحد منهم أهو.محترم وابن ناس غير اللي كانو قبله

ات من خلفه صوت عمر الذي القي السلام بتودد:

السلام عليكم.

رد الشاب وهو يرمقه بنظرة تفحص شموليه:

وعليكم السلام. شكلك ابن ناس. يا رب ما تعمل زي اللي قبلك. 

مد يده الي مصافحًا ومعرفًا عن نفسه:

أنا عاصم،  سنة تانية تجارة، وأنت؟

صافحه عمر بمودة:

أنا عمر، لسه أولى إعدادي هندسة.

ابتسم عاصم ببشاشه وهتف بحماس:

أهلاً وسهلاً يا عمر  اتفضل.

******

صعدوا جميعًا إلى الشقة. كانت عبارة عن صالة واسعة متصلة ببلكونة تطل على الشارع، وغرفتين: واحدة كبيرة والأخرى أصغر، بالإضافة إلى مطبخ وحمام بحالة جيدة.

تنفس عمر بعنق وقال بحزم:

الشقة كويسة، أنا موافق.

بعد أن عرف مبلغ الإيجار، تردد قليلاً لكنه رد بحسم:

تمام يا عم رجب انا هأجر الشقه لوحدي. مش عايز حد يزعجني ولا أزعج حد.

تم توقيع العقد. حينها شعر عاصم بالراحة؛ فقد كان دائم القلق على أخته سعاد من المستأجرين السابقين. لكنه توسم خير في عمر وبث في قلبه الطمئنينه والراحة، وتملكه شعور جيد أنهما قد يصبحان أصدقاء ذات يوم.

  كانت هذه بداية حياة جديدة في حياة عمر 

فا بعد أن قرر أن يسكن وحده لتجنب المشكلات مع أي شريك  يسبب لها حرج مع الجيران، لكي يتمكن من التركيز على دراسته وتحقيق التفوق. أخذ على نفسه عهدًا ألا يُثقل على أهله بطلب المزيد من المال. لذا، بدأ بالبحث عن عمل بجانب دراسته ليساعده على دفع الإيجار.

مع بداية الدراسة، صار يومه مزدحمًا بين المحاضرات والعمل. وفي إحدى الليالي، بينما كان عائدًا متأخرًا، كان الحي يغرق في الظلام بسبب انقطاع الكهرباء.

مر عمر علي البائع تحت بيته والقي عليه السلام: السلام عليكم يا عم ياسين.

رد عليه عم ياسين السلام:

وعليكم السلام يا ابني. إزايك؟

ساله عمر بتوجس:

بخير الحمد لله. هو النور قاطع من بدري؟

ظهرت ابتسامه جانبه علي شفتاه علي ضوء الشموع: 

لاء يا ابني لسه من شوية، اطلع بس، وزمانه راجع.

صعد عمر الدرج بحذر. فجأة، اصطدم بشخص نازل بسرعة، وكاد هذا الشخص أن يتدحرج. أسرع عمر بإمساكه، مانعًا سقوطه. حين عاد النور، وقعت عيناه على وجه فتاة لم يرَ مثيل لها في الجمال من قبل.

كانت ذات عيون عسلية تميل للرمادي، وبشرة بيضاء تضاهي في نقائها قصص سنووايت. وقف يتأملها للحظات مذهولًا.

حمحمت الفتاة بخجل: 

أنا... أنا آسفة، مكنتش شايفة.

رد عمر التائه في سحر عيناه:

لا أنا اللي آسف. ماخدتش بالي، الدنيا كانت ضلمة.

ردت الفتاة بصوت رقيق كانه نغم عذب وشجي:

اصلا النور كان قاطع.  يعني لا ذنبك ولا ذنبي.

ابتلع عمر ريقه فهو يعاتب نفسه للوقوعفي سحرها وهذا ليس من تعليم دينه التي يحافظ عليها وهتف:

: فعلاً... لكن آسف علي اني خدتِك في حضني. كنت بحاول ألحقك، وما كنتش عارف إنتِ ولد ولا بنت.

غمغمت الفتاة بقلة حيلة وقالت شاكرة:

شكرًا جدا، انت  أنقذتني من الوقوع. استأذن أنا... اتأخرت.

هربت الفتاة مسرعة  من امامه. وقف عمر مكانه مذهولًا، ثم همس لنفسه:

إيه ده؟ معقول في جمال كده؟ ياتري مين دي؟ 

أنا بقالي أكتر من شهر هنا، وأول مرة أشوفها... أول مرة في حياتي حد يشغل بالي بالشكل ده.

***********

يتبع......

#سلمي_سمير

الفصل الثاني

#أسمى_معاني_العشق

***********

في صباح يوم جديد، أشرقت الشمس بهدوء وكأنها تحمل معها وعدًا ببداية جديدة، بينما كان القلب مثقلًا بالتساؤلات التي ظلت بلا إجابة. ليلة طويلة من التفكير انتهت بقرار صعب، قرار يخالف كل ما تربى عليه من عادات. شاب صعيدي لم يعتد التدخل في شؤون الآخرين، يقف الآن أمام باب جاره، تسبقه رغبة جامحة في كشف الحقيقة. كان الفضول أشبه بريح عاتية، تدفعه رغم كل الحواجز.

فتح عاصم الباب لتطل منه ملامح ودودة. كانت دعوة مبسطة للدخول وكسر الحواجز بين الجيران:.

صباح الخير يا عمر! إيه يا عم؟ مختفي فين؟ محدش بيشوفك خالص.

جاء الرد من عمر بصوت متردد بعض الشيء، يحاول تبرير غيابه:

معلش غصب عني ، برجع متأخر من الشغل يدوب الحق اذاكر. مبقاش في وقت للحياة والله يا عاصم

ثم انا بسال اهو وجيت اصبح عليك قبل ما انزل للكلية، 

ضحك الآخر وقال بحماس:

طب ما تيجي تفطر معانا؟

أنا كمان نازل الكلية، بالمره ننزل مع بعض."

حاول عمر الاعتذار:

مش عايز أزعجكم."

لكن الرد جاء حاسمًا من عاصم، بلا مساحة للتردد:

يا راجل ادخل ! ماما عايزة تشوفك. كل شوية تشكر فيك وتقول إنك أحسن الف مره من الشباب اللي كانوا ساكنين فوقنا وعاملين دوشة."

وافق عمر متلهفًا ودخل الشقة، كان المكان بسيطًا، لكنه مريح ودافئ. ظهرت الحاجة فتحية، بابتسامتها الطيبة، وهي ترحب به بلهجة مليئة بالحفاوة:

أهلاً وسهلاً يا ابني، نورتنا."

ابتسم عمر بخجل ورد بحذر:

"الشرف ليا يا ماما... تسمحيلي أقولك ماما؟"

ردت الحاجة فتحية بعفوية وصدق:

طبعًا، إنت زي عاصم وسعاد. أنا أمكم كلكم. إنت منين في الصعيد؟"

رد عمر بفخر:

من المنيا. أنا وحيد أهلي. أبويا مزارع بسيط، كل حلمه يشوفني مهندس وأرفع راسه."

ربتت علي كتفه بحنان ام:

ربنا يفرح قلبه بيك يا ابني. أنا أصلي من الفيوم، بس عندنا أراضي هناك. يعني صعايدة زي بعض.

اجاب بعمر بسعادة:

تشرفت جدًا والله.

ابتسمت وهي تشير إلى مائدة الطعام:

طيب تعال افطر مع عاصم، وبعدها تنزلوا مع بعض.

قبل أن تنهي قولها ات صوت ناعم قادم من الداخل قطع الحديث:

ياماما انا خلصت

التفت الجميع نحو الباب، حيث طلبت الحاجة فتحية من ابنتها أن تأتي للسلام على الضيف.

تعالي ياسعاد سلمي على المهندس عمر

في تلك اللحظة، وقف عمر يتأمل الباب بعينين يملؤهما الترقب. أمله أن يرى من خطفت قلبه. لكن حين ظهرت الفتاة، كانت المفاجأة غير ما توقع.

فتاة صغيرة، في الخامسة عشرة من عمرها، عيونها بنية واسعة، وبشرتها قمحية.

وقف في مكانه متحجرًا للحظة. تلك ليست الفتاة التي رأها بالأمس فمازالت ملامحها محفورة في ذاكرته. شعور من خيبة الأمل مر سريعًا، لكنه سرعان ما تمالك نفسه عندما قالت:

السلام عليكم.

رد عمر عليها وهو يحاول أن يبدو طبيعيًا:

وعليكم السلام.

ابتسمت الحاجة فتحية وهي تقدم التعارف:

ده جارنا عمر يا سعاد، من النهارده اعتبريه زي أخوكي عاصم. ادخلي رحبي بيه

ابتسمت الفتاة بخجل وقالت:

أهلاً وسهلاً يا أستاذ عمر.

رد عمر بابتسامة خفيفة:

أهلاً بيكي. الشرف ليا إني أكون زي أخوكي.

نكست راسها بخجل:

وأنا كمان اتشرفت بيك. إنت في هندسة، صح؟ أنا نفسي أدخل هندسة لما أخلص الإعدادية.

ابتسم من خجلها وسألها:

إن شاء الله تبقي مهندسة قد الدنيا. إنتِ في سنة كام؟

ردت بلهفه:

أنا في الشهادة الإعدادية.

تمني لها التوفيق قائلًا:

ربنا يوفقك و وان شاء الله تحققي حلمك.

قاطعت الحاجة فتحية الحديث وهي تذكر الفتاة:

يلا خلصي علشان ما تتأخريش على المدرسة. ندى طبعا هتستناكِ، علشان عندكم امتحان النهارده!"

عند سماع اسم ندى، تغير كل شيء. كان الاسم كالصاعقة، أعاد إليه كل مشاعره التي حاول كبتها. تساءل بصمت:

هل تكون هي؟ الفتاة التي خطفت قلبه؟

ظل في داخله شعور متناقض. أمله أن يلتقي بها من جديد بات أقرب من أي وقت مضى.

كان الاسم كالسهم، اخترق أعماق ذهنه وترك أثرًا لم يستطع تجاوزه. للحظات، خيم الصمت عليه، لكنه سرعان ما ألقى بالسؤال، رغم التردد الذي كان يحاصره :

هو انتي ليكي أخت تانية اسمها ندى؟

لم يأتِ الرد من صاحبة السؤال، بل تدخل صوت آخر، يحمل نبرةً مرحة ممتزجة بالاعجاب والانبهار، ليقطع حبل أفكاره:

ندى؟ أخت سعاد؟ 

يا راجل، دي حاجة تانية خالص! ندى دي تبقى ظلم نوصفها مجرد أخت.

ثم أضاف ضاحكًا:

دي زي ما تقول كده حورية أو ملاك اتوجد غلط في الدنيا دي. ممكن تقول حسناء، وملكة جمال شبرا!

تنهد بقوة واخذ يختلس الكلام كأنها في حضرة الجمال لا يستطيع ان ياتي بوصف يعطيها حقها: 

ندا دي عيون إيه؟ وبياض إيه؟ دي حاجة كده ما حصلتش ولا هتحصل في العمر غير مره!

استمر الحديث كأنه يحاول وصف لوحة فنية في جمالها الخلاب

ضحك فجأة ونظر الي سعاد المصدومه:

تصدق اختي بتخاف تمشي معاها في الشارع من كتر المعاكسات اللي بتاخدها. أي واحدة تمشي جنبها تبقى صفر علي الشمال كانها ولا حاجة.

لحد ما أبوها قرر يمنعها تخرج إلا للامتحانات. 

لكن لما كانت هنا امبارح متخيلتش انها بقت اجمل كده، سبحان الله! جمالها بيزيد يوم عن يوم."

كانت تلك الكلمات كافية ليوقن عمر تمامًا أنها هي، الفتاة التي اختطفت قلبه بنظرة واحدة في تلك الليلة المظلمة. 

بات كل شيء واضحًا الآن؛ الملامح، النظرات، وحتى الإحساس الذي لم يفارقه منذ تلك اللحظة.

وقبل أن يسترسل في أفكاره، جاء صوت الأم ليعيد الجميع إلى الحاضر:

يلا يا ولاد، خلصوا فطاركم وخدوهم معاكم عشان ما يتأخروش

في تلك اللحظة، رُفع الطرق على الباب. هرعت الصغيرة سعاد لتفتحه، 

بعد برهه ات صوتها يحمل بهجة غير خافية:

ندى! تعالي ثواني، أنا خلصت بس هاخد مصروفي 

ونازلة معاكي.

**********

لمحها أخيرًا. كانت اللحظة أشبه بحلم تحقق، وكأن الزمن توقف للحظة، ليتيح له فرصة استيعاب المشهد. جمالها لم يكن عاديًا، بل كان يحمل في طياته نقاءً وبراءةً تسرق الأنظار. شعور بالفرح اجتاحه، لم يستطع كتمانه، فتحدث بعفوية ولهفه:

استنوا... ناخدكم في سكتنا.

التفتت اليه الصغيرة سعاد بابتسامة عفوية وقالت:

استني اعرفك ده جارنا الجديد عمر ، في أولى هندسة. هيذاكر لينا لو احتجنا منه مساعدة

مش كده ولا إيه يا هندسه؟

ابتسم عاصم وأضاف بتطفل:

هنساعدكم إحنا الاتنين.

أكمل عمر بثقة وهدوء:

أكيد، طبعًا. تحت امركم،

بدأوا جميعًا السير باتجاه المدرسة. كان الطريق بسيطًا، لكن قلبه كان يعيش معركة من المشاعر. طوال المسير، لم يستطع مقاومة النظر إليها. كانت عفويتها وبراءتها تزيدها جمالًا، وجعلته أكثر يقينًا بأن قلبه لم يخطئ في اختياره،

لكن عاصم ذلك المراقب الصامت لم يكن غافلًا. لاحظ كل شيء، وضحك بخفة قبل أن يعلق قائلاً:

إيه يا عم؟ لحقت تسحرك؟

أنا بقالي سنين بشوفها وكل يوم بتسحر بيها اكثر نصيحه مني، ريح دماغك وخليك في دراستك. دي بنت غلبانة ومؤدبة، ومش هتديك فرصة حتى تكلمها. لما تبقى جاهز للجواز، ابقى جرّب حظك.

معاها واروح اخطبها رسمي

ثم أضاف بنبرة جادة:

يا راجل، دي بيجيلها خطاب من دلوقتي. أنا نفسي مبهور بيها، لكن عمري ما فكرت أتقدم خطوة معاها، علشان أنا غيرك عندي مسؤولية تجاه أختي. لازم أطمئن عليها ألاول

استجمع عمر شجاعته ليرد بنبرة عزم وإصرار:

بصراحة، لأول مرة في حياتي أحس الإحساس ده. مع حد، بس انا هكافح علشانها، وبأذن الله هتكون من نصيبي. الأول لازم أخلص كليتي وأثبت نفسي. وبعدها... اتقدم لها والباقي على الله."

كانت الكلمات أكثر من مجرد وعد. بدا كأنه يكتب ميثاقًا جديدًا لحياته. ومع كل خطوة، كانت الأفكار تتجلى في ذهنه. همس لنفسه بصوت لم يسمعه أحد:

كنت اعيش لأجل حلم واحد، أنجح وأسعد أهلي وأريحهم من شقاء السنين. واليوم... أضيفت غاية أخرى. أصبحتِ حلمي الجديد، الحلم الذي سأعيش لأحققه، جنبًا إلى جنب مع حلمي الأول."

ومن تلك اللحظة، بدأت لرحلته. طريقان، كلاهما اصعب من الاخر ومليء بالتحديات، لكنه عازم على خوضهما حتى النهاية .

***********

يتبع.....

الفصل الثالث

#اسمى_معاني_العشق

***************

تمرُّ الأيام، وتقوى أواصر الصداقة بين عمر وعاصم، حتى بات كلٌّ منهما السند والأخ الذي طالما حلم به الآخر. كانت صداقتهما بمثابة ملاذٍ مشترك، يتقاسمان فيه الأفراح والهموم دون تردد. وبعد مرور أربع سنوات من هذه العلاقة المميزة، وفي إحدى أمسيات الشتاء الباردة، كان عمر في زيارة لعاصم في شقته المتواضعة.

في الجانب الآخر من المنزل، كانت ندى وسعاد تجلسان في غرفة المذاكرة، تحاولان إنهاء واجباتهما المدرسية. لقد دخلتا عامًا حاسمًا؛ السنة الأخيرة من الثانوية العامة، حيث الأحلام والطموحات تتصادم مع الضغط والتحديات اليومية.

نظرت ندى إلى الأوراق أمامها بامتعاض، ثم زفرت بضيق:

المسائل صعبة جدًا، محتاجين حد يساعدنا.

ردت سعاد بحماس، وابتسامة ملأت وجهها:

ولا يهمك! عمر هنا، وهو في كلية الهندسة. أكيد يقدر يساعدنا. استني أروح أستأذنه.

نهضت بسرعة متجهة نحو غرفة أخيها. طرقت الباب بخفة قبل أن تسمع صوته:

ادخلي يا سعاد.

فتحت الباب بخطوات مترددة، ثم قالت بتوسل:

عاصم، ممكن تساعدني أنت أو عمر في شوية مسائل هندسية؟

أشار عاصم بيده نحو عمر، وابتسامة ماكرة ترتسم على وجهه:

أنا ماليش في الهندسة، شطارتي في الأرقام وبس. عليكي وعلى عمر، هو الباشمهندس بتاع الشغل ده.

نظرت سعاد إلى عمر برجاء، وعيناها تحملان أملاً خافتًا:

ممكن تساعدنا يا عمر؟

أجابها عمر برحابة صدر، وابتسامة دافئة على وجهه:

أنا تحت أمرك. هاتي المسائل وتعالي أشرحلك.

لم تستطع سعاد كتم حماسها، فقالت بمرح:

بس أنا مش لوحدي، معايا ندى. وعايزة تفهم هي كمان. استني أناديها.

لم يكن عمر يتوقع أن يسمع هذا الاسم، لكن بمجرد أن نطقت به، تسارعت دقات قلبه. أحس وكأنه يواجه اختبارًا مختلفًا تمامًا عن الهندسة. حاول أن يخفي ارتباكه، وقال بصوت ثابت:

ماشي، نادى عليها، وأنا مستعد.

اندفعت سعاد إلى غرفة المذاكرة، تاركة عمر غارقًا في أفكاره، متسائلًا: هل ستتحدث معي؟ هل ستبادلني نظرة، أم أنني مجرد صديق لأخيها؟

كان اللقاء على وشك أن يبدأ، ولم يكن يدري أن هذا المساء سيترك أثرًا عميقًا في قلبه.

**************

طالع عاصم صديقه عمر بدهشة مشوبة بحسد واضح، وقال مازحًا:

أشطة يا عم، يا بختك! هتشرح للجمال كله. يا ريتني مكانك. أقولك إيه؟ ما تشرحلي أنا، وأنا أشرح لهم.

ضحك عمر بصوت عالٍ، بينما كان قلبه يتراقص فرحًا، ورد عليه:

أنت هتقطع عليا ولا إيه؟ سيبني أشوف هعمل إيه معاهم.

ثم أخذ نفسًا عميقًا، وعيناه تحملان مزيجًا من القلق والفرح، وهو يهمس لنفسه:

معقول؟ أخيرًا هتكلم مع ندى؟

لم تفُت نظراته الشرود التي غزت ملامحه على عاصم، الذي أطلق ضحكة خفيفة وغمز بعينيه قائلًا بمرح:

أوبس، ده أنت وقعت يا هندسة!

تظاهر عمر بالجدية، لكن صوته كان مليئًا بالشجن، وقال بحزم:

مش واقع بس، أنا عاشق صبابة. بقيت أحلم بيها ليل ونهار، ووعدت نفسي إنها تكون من نصيبي، بإذن الله.

ربت عاصم على كتفه بحركة تحمل التشجيع، وقال بابتسامة ودودة:

ــ طيب، شد حيلك. بس خد بالك، أنا سمعت إن كل يوم بيجيلها عريس، ومش أظن إنها هتكمل دراستها على الوضع ده. بس أنت ابن حلال وتستاهلها، وأنا معاك هساندك لحد ما أفرح بيكوا.

تنهد عمر تنهدًا عميقًا، وكأن ثقلاً كبيرًا يضغط على صدره، ثم قال بامتنان وتودد:

ربنا يخليك ليا يا أجدع صاحب وأحن أخ في الدنيا.

وبينما كان الحديث يدور بينهما، فتحت ندى الباب برفقة سعاد، لتدخلا الغرفة بخطوات هادئة. رفعت ندى رأسها بخجل، وقالت بصوت عذب وهادئ:

آسفة لو كنا هنتعبك معانا يا باشمهندس.

ثبتت نظرات عمر عليها، وقد اتسعت عيناه بانبهار شديد. أحس وكأن الزمن قد توقف فجأة، وحدث نفسه بفرحة عارمة:

أخيرًا يا قلبي! ندى بتكلمني، وكمان قدامي. مافيش بينا غير شبرين. هتسمع مني وهسمع منها. آه يا قلبي، لو كان ينفع كنت قولتلها بحبك وبعشق النظر لعيونك.

دفعه عاصم على كتفه بخفة ليعيده إلى الواقع، وهمس له:

يلا رد عليها بدل ما تفضل كده.

عاد عمر إلى وعيه، وابتسم بحرارة وهو يرد بحماس:

ـ لا، أبدًا. ده أنا أخدمكم بعيوني.

ابتسمت سعاد بدفء وقالت بمرح:

مش قولتلك عمر مش هيتأخر علينا؟

تنفس عمر الصعداء، وكأن كلماتها أعادته إلى رشده، وقال بامتنان وهو يشير إلى الأوراق على الطاولة:

طبعًا، طبعًا. يلا نبدأ.

*************

بدا عمر في شرح المسائل لهما، مستغرقًا في الشرح بين الحين والآخر، لكنه لم يستطع مقاومة اختلاس النظرات نحو ندى، التي كانت تجلس أمامه بهدوء أشبه بسكون الليل. كانت كلماتها قليلة وابتسامتها نادرة، مما جعلها لغزًا يثير فضوله ويأسر قلبه شيئًا فشيئًا.

وفي إحدى المرات، بينما كان يشرح إحدى المعادلات، رفعت ندى نظرها إليه فجأة. منحته ابتسامة خفيفة، خجولة، تفتحت على شفتيها كزهرة تتحدى برودة الشتاء. تملك الارتباك عمر، فتلعثمت كلماته للحظة قبل أن يستعيد توازنه. تلك الابتسامة ظلت تلاحقه لأيام، يسأل نفسه بصمت: هل كانت إشارة خفية أم مجرد تعبير عن الامتنان؟

مع مرور الأيام، بدا وكأن تلك النظرات تحمل لغة خاصة بينهما، لغة لا تُقال بالكلمات بل تُقرأ في العيون. خاصةً عندما كانت سعاد تغيب عن الدرس.

في احد الايام ، قالت ندى بخجل وهي تتجنب النظر المباشر إليه:

بابا لما عرف إنك بتشرح لي الرياضيات والميكانيكا، طلب مني أسألك... تاخد مني كام على كل حصة؟

شعر عمر كأن كلماتها صفعة على قلبه. رد بصوت محمّل بالهدوء الذي يُخفي غضبًا مكتومًا:

ليه كده يا ندى؟ هو أنا طلبت منك حاجة؟

بللت شفتيها بعفوية أذهلت عمر، وقالت وهي تنظر بعيدًا عن عيناه السائلة بحزن:

مش أنا والله... ده بابا اللي قال كده. وكمان علشان مش عايزين نكون عبء عليك. أنت بتشتغل وبتصرف على نفسك، ومذاكرتك لينا حمل كبير عليك.

حاول عمر السيطرة على نبضاته المتسارعة، وقال برفق يعاكس ما في داخله من نار:

ندى، كل اللي يهمني إنك تنجحي. نجاحك هيكون فخري. أنا مش محتاج حاجة غير أشوفك بتحققي اللي بتحلمي بيه.

نظرت إلى الأرض وهي تهمس بخجل:

شكرًا جدًا، يا باشمهندس.

لم يستطع عمر منع نفسه من التعبير عن امتنانه، فوضع يده برفق على يدها وقال بابتسامة صادقة:

لا تشكريني غير يوم نجاحك. لأنه هيكون يوم نجاحي أنا كمان.

توردت وجنتاها كأنها زهره تختبئ من شعاع الشمس، وسحبت يدها بسرعة وهي تقول بعجل:

سعاد! يلا، بابا هيزعّل لو اتأخرنا."

غادرت الغرفة مسرعة، بينما بقي عمر جالسًا في مكانه، يشعر وكأنه طائر يحلق في سماء حلم بعيد. كانت نظراتها، خجلها، وكلماتها، تمنحه أملًا لم يكن يجرؤ على التفوه به.

**************

استفاق عمر في صباح جديد، مشاعر السعادة تملأ قلبه وابتسامة عريضة تزين وجهه. كان يشعر أن حلمه بقرب ندى منه بدأ يزداد واقعية يوما بعد يوم. فتح نافذة غرفته ليستنشق هواءً جديدًا، ولكن فرحته تكبرت عندما لمح ندى في شرفتها المقابلة. تقاطعت أعينهما، وكأنهما على موعد، فتسارعت دقات قلبه، وتداخلت مشاعره بين الدهشة والخوف. أما ندى، فقد شعرت بنفس الخفقان، لكنها سرعان ما تراجعت إلى الداخل مسرعةً، حين رأت أختها تودع سعاد في طريقها إلى المدرسة.

تكرر هذا المشهد يوميًا، ليزداد يقين عمر أن له مكانًا في قلب ندى، وأن مشاعرها بدأت تميل إليه وحده. كانت عيونها تُخفي الكثير، وعينيه كانت تبحث عن كل التفاصيل.

مرّت الأيام سريعًا، وأيقن عمر أن مشاعره تجاه ندى أصبحت أكثر عمقًا. نجحت ندى وسعاد في الثانوية العامة بتفوق، وكان لهذا النجاح طعم آخر بالنسبة له. التحقت سعاد بكلية الآداب، بينما ندى قبلت بكلية الفنون الجميلة. لكن المفاجأة كانت في قرار والدها الذي رفض استكمال ندى لدراستها بسبب ضيق ذات اليد وكثرة العرسان الذين يتقدمون لخطبتها.

كان هذا الرفض صدمة كبيرة لعمر. بدأ يفكر في كيفية مساعدتها على إقناع والدها باستكمال تعليمها، وتوصل في النهاية إلى فكرة قد تكون الحل. قرر أن يستعين بوالدة عاصم، فهي والدة صديقة ندى المقربة وتحبها.

في شقة الجار عاصم

ذهب عمر إلى عاصم في أحد الأيام، وكان يطلب منه خدمة كبيرة. قال له برجاء: 

عاصم، أنا عايز منك خدمة كبيرة.

أجاب عاصم ضاحكًا وهو يضرب عنقه برفق: 

رقبتي يا شقيق، قول.

تنهد عمر بارتياح، وقال بنبرة مليئة بالتفكير: 

عايز والدتك تتدخل وتتوسط عند والد ندى علشان تكمل تعليمها.

سحب عاصم يد عمر وجلسه بهدوء وقال: 

اسمعني يا عمر، الوضع مش سهل زي ما أنت متخيل. ندى بتتقدم لها عرسان كتير كل يوم، وأبوها ظروفه صعبة. هو مش قادر يوفر لابنته الصغيرة اللي وفره لندى، ولا قادر يتحمل عبء تعليمها في الكلية. ده غير إن والدتهم متوفية، وندى شايلة مسؤولية كبيرة في البيت.

رد عمر بتفهم، لكن قلبه كان مشغولًا: 

أنا فاهم كل ده، بس تعليمها مهم... ومش لازم نضغط على والدها أكتر من كده. لو تقدر تساعدها، يبقى خير.

تنهد عاصم بحزن، وقال: 

طيب، لو هتطلب من ماما تدخل، مفيش مشكلة. لكن لو هتقدر تتقدم ليها وتساعدها تكمل تعليمها بنفسك، هيكون أفضل حل.

رد عمر، وهو يشعر بضيق شديد: 

أتقدم ليها دلوقتي ازاي؟ أنا لسه بدرس وفاضلي سنة على التخرج. غير كده، أهلي مش هيقدروا يساعدوني في مصاريف الجواز.

أيده عاصم في كلامه وقال: 

اسمع يا عمر، أنا عارف إنك بتحب ندى، لكن ظروفك صعبة. لازم تفكر كويس قبل ما تدخل في حاجة ممكن تضرك وتضرها.

نهض عمر فجأة وقال بحسم: 

أنا هبعت لأهلي، ولو وافقوا، هتقدم لها فورًا. مش قادر أتصور إنها ممكن تكون لغيري.

أمسك عاصم بذراعه وقال له بحذر: 

استنى يا مجنون! اصبر على رزقك. مش لازم تندفع. لازم تعرف رأيها الأول، مين قال إنها هتوافق؟

رد عمر بحزم، ووضع يده على قلبه: 

قلبي دليلي. في حاجات بتأكد لي إنها ممكن توافق.

غامت عيون عاصم وقال بتشكك: 

طيب زي إيه؟ فهمني. أنا أخوك الكبير، ومصلحتك تهمني. ندى بترفض كل العرسان اللي بيجوا لها، وبتقول إنها عايزة ترعى أختها وأبوها. إيه اللي اتغير علشان توافق عليك؟ ده غير إنني سمعت إن في واحد ثري عربي غني جدًا عايز يتجوزها، وأبوها شايف إن ده عريس مناسب.

زفر عمر بضيق، وملامح وجهه تشتد قسوة. قال بإصرار، محاولًا أن يُطمئن نفسه أكثر من أي وقت آخر:

أنا واثق، خلاص.

ثم تنهد بارتياح، كأن عبئًا ثقيلًا قد وُضع جانبًا، ليُتاح له فرصة لتوضيح ما كان في قلبه.

رد عاصم بصوت هادئ، ولكن حذر، وهو يشعر بمسؤولية الموقف:

طيب بدل ما تحرج نفسك قدام أهلك، تعال أفهمك طريقة تتأكد بيها من قبولها.

أسرع عمر بالرد، وكأن كل ثانية تمضي تزيد من قلقه:

قولي الحل بسرعة.

رد عاصم بحكمة، مُوازنًا بين الأمور بعناية:

أختي سعاد صاحبتها المقربة. اسألها تكلم ندى وتشوف رأيها. لو كانت ندى مستعدة تستناك، يبقى مفيش مشكلة.

نظرة من الريبة تملأ عينَيّ عمر، فهز رأسه متسائلًا:

طيب وأختك ممكن توافق تسألها؟

ربت عاصم على كتفه بحزم، وكأنما يزرع في قلبه بعض الطمأنينة:

مفيش حاجة تمنعها انها تسألها، استنى هندهالك.

على الفور، نادى عاصم على أخته سعاد، التي دخلت الحجرة بهدوء، لكن ملامحها كانت تحمل شغفًا لما هو قادم.

أيوة يا أخويا، في إيه؟

أخذ عاصم يدها بلطف وقال، وهو يوجه إليها الطلب:

عمر عايز منك خدمة، هتقدري تساعديه؟

نظرت سعاد إلى عمر بعينين مليئتين بالتساؤل، ثم أجابت بثقة:

طبعًا، يا عمر. أنا تحت أمرك. لو اقدر ،

تنهد عمر بارتياح، وكأن زفرة صدره كانت بداية لقرار حاسم.

ربنا يخليكي ليا يا سعاد. عايزك تسألي ندى: لو تقدمت ليها دلوقتي، هل تقبلني وتستحمل ظروفي سنة بس لحد ما أخلص دراستي؟ ولا تقدر تستناني شوية على ما أمسك شغل مناسب؟ ولا هي مش موافقة أصلًا؟

هزت سعاد رأسها بحزم، ثم قالت بجدية:

حاضر، هكلمها وأرجعلك بخبر يفرح قلبك،

مرت ساعة واحدة، كأنها دهرًا بالنسبة لعمر. كل دقيقة كانت تمر وكأنها تحمل معه خوفه من النتيجة. أخيرًا، عادت سعاد، ومعها الخبر الذي طالما انتظره عمر بفارغ الصبر، قلبه ينبض بسرعة وهو يستعد لسماع ما قد يُغير مسار حياته.

**********

يتبع.....

#سلمي_سمير

بانتظار توقعاتكم لرد ندا

الفصل الرابع 

#اسمى_معاني_العشق

*************

كان عمر ينتظر رجوع سعاد بفارغ الصبر، يتنقل بنظراته بين الساعة والباب كأنه يُحصي اللحظات. قلبه يعتصره القلق وتُثقل أنفاسه التوقعات، فالرد الذي ستحمله سعاد قد يغير مسار حياته إلى الأبد.

وبعد قليل، عادت سعاد وهي تحمل ملامح شاردة وكأنها تحمل ثِقلاً فوق كتفيها. مرّت بجواره دون أن تنطق بكلمة، واتجهت إلى غرفتها مباشرة، مغلقة الباب خلفها بهدوء أثار في نفسه ألف تساؤل.

عمر، بتردد وحيرة، همس لنفسه:

إيه اللي حصل؟ ليه مش جت تقول لنا رد ندى؟وأنا اللي كنت مستنيها على نار علشان أعرف الرد.

التفت إلى عاصم، الذي كان يجلس بجواره بنظرات مترقبة، وسأله بريبة:

هي سعاد ليه جت ودخلت أوضتها كده

ناداها عاصم بصوتٍ عالٍ:

يا سعاد! إيه الأخبار؟

لكنها لم تستجب، مما زاد من توتر عمر. عاد ليسأل عاصم بقلق واضح:

هو في إيه يا عاصم؟

حاول عاصم أن يطمئنه، ولكن كلمات الطمأنينة فقدت تأثيرها أمام قلق عمر المتزايد، فقال له:

طيب، اهدي يا عمر. أنا هدخل أشوف في إيه.

طرق عاصم باب غرفة سعاد بهدوء، وقال:

"سوسو، افتحي.  وطمنيني ندى قالت لكِ إيه؟"

فتحت سعاد، وقالت بصوتٍ متحشرج من بين دموعها:

"ندي غبية يا أُبّيه... رفضت عمر!"

قالتها وانفجرت بالبكاء بحرقة، تكمل بين شهقاتها:

قالتلي أعمل بيه إيه؟ هو فاكر علشان ذاكر لي يبقى هوافق عليه؟! أنا مش عايزة حد يشدني للفقر أكتر من كده! أنا جميلة... ولازم أستغل جمالي وأتجوز واحد يعيّشني ملكة,

ثم انكفأت على صدره، تمسح دموعها في كتفه وتقول بصوت متهدج:

أنا صعبان عليّا عمر، والله ما يستاهل كده. هو طيب ونقي، وندا هتعمل غلطة عمرها. قالت إنها هتوافق على واحد ثري عربي متقدّم لها!

عاصم، وهو يهز رأسه بخيبة أمل:

"آخر حاجة كنت أتوقعها إنها تكون مادية كده! عمر هيكسر قلبه، لكن... كل حاجة قسمة ونصيب. خسارة كبيرة، حبها بجد. ندي هتندم عمرها كله إنها ضيّعت إنسان زي عمر.والايام بينا

خرج عاصم من الغرفة بخطوات مثقلة، ليجد عيون عمر تنتظره، ممتلئة بالقلق والتساؤل.

ساله عمر، بصوتٍ ملتاع و مبحوح:

إيه؟ طمّني، قالت لها إيه؟

عاصم، بعد لحظة تردد:

مفيش نصيب يا عمر. هي قررت تتجوز واحد غني، يقدر جمالها ويخرجها من الفقر.

تجمّدت ملامح عمر للحظات وكأن الكلام لم يصل إلى عقله بعد، ثم قال بدهشة واستنكار:

مستحيل... مش ندى! لا، لا، أكيد في حاجة غلط. أنا قلبي مش ممكن يكذب عليّا. ندى بتحبني... أنا واثق إنها بتحبني. مش ممكن كل ده كان وهم!

لم يتمالك نفسه، فتدفقت دموعه الحارقة على وجنتيه، تُترجم انكسار قلبه وخيبة أمله. قام مسرعًا وركض نحو شقته، يبحث عن مساحةٍ له وحده يستوعب فيها جرحه.

أما سعاد،  التي ظلت داخل غرفتها، انهارت فوق سريرها باكيا بانتحاب، تغرق في دوامة من ذكريات الحوار الذي دار بينها وبين ندى.

■■■■■■■■■ (فلاش باك)

طرقت سعاد باب شقة ندى بخفة، وكأنها تخشى أن تُثقل بصوت طرقاتها على المكان. دقائق قليلة، وفتحت ندى الباب لتجد أمامها وجه صديقتها الأقرب، حبيبة القلب التي لم تكن مجرد صديقة، بل أخت تسندها في شدائد الحياة.

رحبت بها ندي بحفاوة وسألتها بدهشه:

سعاد! يا أهلاً وسهلاً، تعالي، خير إيه اللي جابك دلوقتي؟ ادخلي، البيت منور.

ردت عليها سعاد بابتسامة مترددة:

شكراً يا ندى...  بس انا عايزاكي في موضوع مهم.

سألتها ندي بقلق:

موضوع؟ مالك يا حبيبتي؟ وشك مش مطمّني، حصل حاجة؟

دلفت سعاد إلى الداخل وجلست على الأريكة، تعبث بأناملها في توتر واضح، بينما جلست ندى بجوارها، تحدق في وجهها وكأنها تبحث عن جواب في ملامحها الشاردة.

اخيرا تحدثت سعاد بصوت مرتجف:

ندى، انتِ عارفة إني بحبك قد إيه... انتي أختي وصديقة عمري. بس النهارده حصلت حاجة ملخبطة تفكيري، ومش عارفة أتصرف.

زفرت ندي بعصبيه وسألتها :

يوه بقي ما تنطقي قلقتيني، قولي حصل إيه؟

أخذت سعاد نفساً عميقاً، ثم أطلقت الكلمات دفعة واحدة كأنها تتخلص من حمل يثقل كاهلها،.

عمر طلب إيدي من أخويا! وعايز يجيب أهله ويقروا الفاتحة قريب، والجواز بعد الكلية.

ساد الصمت للحظة، ثم انفجرت سعاد في البكاء والقت نفسها في حضن ندى، التي ظلّت متجمدة مكانها، مزيج من الصدمة والخذلان يشلّ تفكيرها.

صاحت سعاد بنحبب تدعي البراءة واكملت:

انامش ممكن اوافق... إزاي؟ انتي بتحبيه؟ وعلشانه رفضتي الثري العربي؟

أنا لازم. أرفضه عشانك، عشان حبك ليه؟

رفعت ندى وجهها المبلل بالدموع نحو السقف، وكأنها تخاطب القدر الذي ألحق بها هذا الألم. وقالت بوجع:

منك لله يا عمر....علقتني بيك وبعدين تخطب صاحبتي؟ ربنا يسامحك، وأنا اللي صدقت في الحب، كنت هبيع الدنيا علشانك، وأهو قلبي اتوجع... قلبي اللي كسرته.

مسحت ندى دموعها بعنف، ثم نظرت إلى سعاد بعينين مثقلتين بالألم.

اسمعيني يا سعاد، انتي أختي وسعادتك هي سعادتي. لو شايفة إنه عمر يناسبك وافقي، وما تشيليش همي.

ردت سعاد بذهول واحتجاج واهي:

إزاي عايزاني اوافق؟ انتي اختي وحبيبتي، ووجعك وجعي، ازاي أفرح معاه وأنا عارفة انك بتحبيه؟

ابتلعت نظي غصبة قلبها المكلوم واكملت بإصرار: متقلقيش عليا.. أنا وافقت على الشيخ جاسم خلاص. أهو هيساعد بابا في مصاريف أختي، ده غير ان انا هسافر معاه وأبعد عنكم. اتجوزيه يا سعاد، وربنا يهنيكم... وياريت توصّليله مني "مبروك"، وربنا يكتبلكم السعادة مهما كان.

انهارت سعاد في صمت، وعجزت عن الرد. لكن مشاعرها كانت تتأرجح بين الحقد والغيرة. تركت ندى وخرجت، بينما في داخلها شعور خفي بالانتصار، رغم أن قلبها كان يملؤه السواد.

**********

في لحظات الوحدة بغرفتها، لم تجرؤ سعاد على مواجهة عمر. جلست على سريرها، تهرب من الحقيقة التي صنعتها بيديها، بعدما أغلقت الباب خلف اخيها

تركت القناع الذي ارتدته طوال اليوم يسقط، وانفجرت في بكاء مرير. جلست على طرف السرير، تضم نفسها وكأنها تحاول حماية روحها من الألم الذي ينهشها. اخذت تسال نفسها بحيرة:

أنا ليه عملت كده؟ مش ذنبها إن عمر حبها... لأنها جميلة... مش ذنبها إن ربنا إدّاها اللي مش عندي... جمال، شطارة، موهبة.

توجهت بنظراتها إلى المرآة، وكأنها تحاسب نفسها أمام انعكاسها:

سعاد: لكن أنا؟ أنا ذنبي إيه؟ أنا بحبه... هو ليا، كان دايماً معانا، صديق أخويا، وأنا أكتر واحدة فاهماه. مش معقول أسيبه ليها. هي هتسافر وتكمل حياتها... وأنا هفضل أتحرق بناري لو سبته.

لمعت عيناها بحقد مخلوط بالألم، ثم أغمضتهما بقوة، وهي تسترجع لحظات انهيار ندى وعمر. ابتسمت بسخرية، تضحك من القدر الذي لعب لصالحها:

لقد دمرت حباً نقياً لم يكن ملكها يوماً، وجرحت قلبين باسم الصداقة والخداع.

حاولت إقناع نفسها بصواب ما فعلت فقالت:

أكيد اللي عملته صح... كان لازم أفرق بينهم علشان عمر يشوفني، يفهم إن أنا اللي بحبه بجد. لما ندى تسافر وتتجوز الشيخ جاسم، هيكون ليا أنا... وبس.

ضحكت بمرارة، وضحكتها هذه المرة كانت مليئة بالنصر الملوث بالخيانة.

*********

علي الجانب الآخر، كان عمر يدخل شقته بخطوات ثقيلة. ألقى حقيبته على الأرض، واتجه إلى الأريكة، لكنه لم يستطع الجلوس. قلبه كان يعتصره الألم، ودموعه تنهمر دون توقف.

صرخ عمر بالم ولوعه بندب حظه العاثر في خسارته:

قلة حيلتي. وفقرى... حرمني منها. ندى هتكون لغيري؟ مستحيل!

وقف يذرع الغرفة جيئة وذهاباً، كالمجنون الذي يبحث عن تفسير. ويسأل نفسه مرارًا وتكرارً:

طيب ازاي، أنا كنت شايف حبها في عينيها... كنت حاسس بيها... مستحيل تكون بتلعب بمشاعري، مستحيل. قلبي مستحيل يخدعني بالشكل ده،

لكنه سرعان ما فقد السيطرة على نفسه، وبدأ يضرب الحائط برأسه، كأنه يريد أن يعاقب نفسه على هذا الحب الذي أدماه وصاح بخذلان:

الف خسارة انا كنت عايش في وهم... وهم كبير!

جلس أخيراً على الأرض، مستنداً إلى الحائط، محاولاً استجماع قواه. ورغم كل هذا الألم، لم يزل لديه بصيص أمل صغير. حدّث نفسه بصوت خافت:

يمكن بكرة الصبح،  لما أشوفها أفهم. عيونها مش ممكن تكذب عليا. انا واثق من ده، واكيد  عندها سبب.غير اللي قالته اسعاد خلاها رفضتني،

ترك نفسه للأمل يخفف من وجع قلبه لعله يرتاح من شدة الالم الذي يمزقه اشلاء

************

مع أول خيوط الصباح، وقف عمر في شرفته كعادته، يبحث بعينيه عن تلك النافذة التي تحمل في طياتها روحه. انتظر أن يرى ندى تفتح الشرفة، أن تنظر إليه، أن تشرح له بصمتها ما لم تقله بالكلام.

لكنه وجد الشرفة مغلقة. ستائرها مسدلة بإحكام، وكأنها تُغلق الباب أمام كل أمل. وقف للحظات يحدق في الفراغ، يحاول أن يُقنع نفسه أنها ستظهر. لكنها لم تظهر.

شعر وكأن شيئاً داخله قد تهشم. كأن قلبه الذي كان يتحامل على الصدمة انفجر أخيراً.

عاد وسأله نفسه بذهول وعدم تصديق:

معقول  كل ده كان وهم... كنت لوحدي في الحلم؟

عاد إلى الداخل بخطوات بطيئة، وكأن كل خطوة تقطع جزءاً من روحه. جلس على طرف السرير، يحدق في الأرض، والدموع تملأ عينيه. وقال لائمًا

أول حلم مني ضاع... ومعاه ضاعت ندى... وقلبي...

صمت للحظة، ثم  أكمل بهمس لنفسه:

قلبي اللي جرحه مش ممكن يندمل أبدا -------------------------

في صباح اليوم التالي، حمل عمر قلبه المكسور إلى قاعات الكلية، وكأنه يحاول أن يُخفي حزنه خلف زحمة الحياة. جلس في محاضراته شارداً، لا يدرك الكلمات التي تُلقى أمامه، ولا يعي الزمن الذي يمضي. كان الألم يثقل على روحه، يطارده في كل زاوية.

بعد انتهاء يومه الدراسي، توجه إلى عمله منهكاً، يلقي بنفسه في روتين الحياة، لعله يجد في العمل عزاءً أو هروباً من ذكرياته. ثم يعود إلى شقته ليغرق بين الكتب والمذكرات، يحاول أن يهرب من صورها التي تطارده في كل لحظة. لكنه كان يعلم في قرارة نفسه أن محاولاته للنسيان كانت عبثاً؛ كل يوم يمر كان يزيده عذاباً، وكأنها حاضرة في غيابه أكثر مما كانت في وجودها.

هكذا مرت الأيام، ثقيلة الخطوات، إلى أن جاء ذلك اليوم الذي غيّر كل شيء.

عاد عمر من عمله متعباً، مرهقاً ليس فقط من جسده، بل من فكره الذي أنهكه التفكير فيها. جلس في شرفته متأملاً ظلام السماء، ثم حسم أمره فجأة. قرر أن يواجهها، أن يضع حداً لهذا الألم الذي ينهش قلبه. عليه أن يعرف الحقيقة، أن يسمعها تقول له بنفسها إن كل ما بينهما كان وهماً، وإنها كانت تلعب بمشاعره. 

بخطوات مترددة، توجه إلى بيتها. ولكن، ما إن اقترب حتى رأى زينة معلقة على الأبواب، وأضواءً مضيئة تملأ المكان. أصوات الزغاريد والضحكات كانت تمزق سكون الليل. وقف مكانه، جامداً كتمثال، وعيناه تتابعان المشهد.

كانت هي، حبيبة قلبه، تزف لرجل آخر. رجل غريب، ثري عربي، يمتلك المال الذي لطالما افتقده عمر.

وقف بين الحضور، عيناه تلاحقانها، وقلبه يخفق بقوة كأنه على وشك أن ينفجر. وحين التقت أعينهما، بدا وكأن الزمن توقف. نظراتها كانت حائرة، مليئة بالحزن، بالألم، وبعتاب خفي لم يستطع تفسيره.

نظر إليه بلوم وتساؤول صامت:

ليه بتلوميني وتعاتبيني بعيونك؟ هو أنا اللي اخترت الفراق؟! هو أنا اللي فضلت عليك المال؟ انتي اللي اخترتي! قوليلي... ليه؟

لكنه لم ينطق بكلمة واحدة. بقيت الأسئلة حبيسة صدره، يقتلها صمته. وحين رأى دموعها تسيل على خدها كالشلال، اعتصر قلبه ألمٌ لا يوصف.

عاد إلى شقته متثاقل الخطى، كأن روحه قد تُركت خلفه في ذلك الزفاف. أغلق الباب باحكام، وأسدل الستار على آخر فصل من حبه لها. جلس في عتمة غرفته، يحتضن وحدته، بينما تتردد في ذهنه صورتها، ودموعها التي خنقت كل تفسير.

لم يعد من حقه التفكير في حبه لها. الذي أصبح بالنسبة له حلماً مستحيلاً، ذكرى مؤلمة، وجرحاً عميقاً لن يندمل. كان يعلم أن حياته ستستمر، لكن قلبه الذي كُسر لن يعود كما كان أبداً.

ضرب يده علي قلبه الذي مازال ينبض بعشقها صارخ علي نفسه:

كفاية كفاية الحب ده كسرني وشتتني وضياع اجمل احلامي.صعب صعب. لا، مستحيل، أفكر أحب تاني.

وهكذا، طوى عمر صفحة حبه الأول، صفحة كُتبت بالدموع والألم، وأُغلقت بنهاية لم يكن يتخيلها يوماً.

***********

يتبع........

#سلمي_سمير

الفصل الخامس

#اسمي_معاني_العشق

*****************

مر أكثر من عامين على فراق الأبطال، ولكن الذكريات التي جمعتهم لم تفقد بريقها، حتى وإن ابتعدت المسافات.

في ظهيرة يوم هادئ، صعد عاصم إلى شقة عمر، يعتريه خليط من الحنين والقلق. طرق الباب، وانتظر قليلاً. بدا عليه الإرهاق من يوم عمل طويل، لكنه حاول إخفاء تعبه بابتسامة صغيرة. فتح عمر الباب أخيرًا، وعيناه تلمعان فرحًا.

رحب عمر به بلهفة حقيقية، وهو يتفحص وجه صديقه بريبة سائلًا:

إيه يا عاصم؟ هو شغلك سارقك مننا كده ليه؟

رد عاصم بابتسامة باهتة: 

والله أبداً... بس إنت عارف تعب ماما. ومصاريفها بقت كتير، وأنا بعد البنك بشتغل شغل تاني علشان أقدر أغطي طلباتهم،

رمق عمر صديقه بنظرة جدية، ثم قال بحزم: 

أنا كنت عندها امبارح. حالتها فعلا متدهورة جداً. يا عاصم، لو ما تحركتش بسرعة، ممكن تخسرها.

تجمد عاصم في مكانه، وكأن كلمات عمر أصابت قلبه. مسح وجهه بيد مرتجفة وقال بصوت منخفض: سعاد قالتلي إنك زورتها... أنا خايف عليها تموت. هي محتاجة عملية، ورافضة تماماً إنّي أبيع نصيبي من ورثي، اول اطلب من  عمي. وبتقول مش عايزة حاجة منهم. ومرتبي، حتى مع شغلي التاني، يدوب يغطي العلاج.

بادر عمر بالحديث محاولًا تحفيز صديقه، وهو يقول له بنبرة حازمة:

مش هينفع تفضل كده. روح لعمك، وبيع نصيبك من غير ما تعرفها. العملية دي ما تستحملش تأخير.

توقف عاصم للحظات، وقد ارتسمت على ملامحه حيرة عميقة. ثم رفع رأسه بإصرار وكأنه اتخذ قراره أخيرًا:

فعلاً.. مش هينفع غير كده. هسافر أول الشهر الفيوم، لأن ما عنديش إجازات خالص لآخر الشهر.

ربت عمر على كتفه بلطف، وقد ظهر في عينيه صدق الأخوة:

لو محتاجني أسافر معاك أنا مستعد، ومن بكره كمان. إحنا إخوات يا عاصم، أوعى تنسى.

ابتسم عاصم رغم حزنه، وصوته يحمل تأثرًا واضحًا:

ربنا يخليك ليا يا أحسن أخ في الدنيا. طمّني بقى، إنت عامل إيه في شغلك؟ وأبوك أخباره إيه؟

أخذ عمر نفسًا عميقًا، وكأنما يحاول لملمة شتات نفسه، قبل أن يجيب بصوت يحمل مرارة دفينة:

الشغل؟ ماشي زي ما هو. لكن حاسس إني بضيّع نفسي فيه. مجهودي بيضيع على ناس مش بتقدره. نفسي أبدأ مشروعي الخاص، لكن الفلوس عائق كبير. وأبويا... من بعد وفاة أمي، صحته بتتراجع هو كمان.

لم يكن لـعاصم أن يترك الأمر دون اقتراح، فقال بنبرة تنم عن اهتمام:

طيب ليه ما يجيش يعيش معاك هنا؟ بدل ما كل واحد منكم عايش لوحده كده.

زفر عمر بحزن، وراح يشرح موقفه:

والله حاولت معاه كتير، لكن بيقول لي دايمًا: بيتي وجيراني والصحبة اللي عشت معاهم عمري كله. الكبار دايمًا بيرتبطوا بالأماكن كل ما يكبروا.

ابتسم عاصم بخفوت، وقال بتفهم:

ليك حق. طيب إيه رأيك تنزل تتغدى معانا النهارده؟ سعاد عاملة أكلة بتحبها. تعب ماما خلاها ست بيت شاطرة.

رد عمر بابتسامة تخفي خلفها شجنًا لا يخفى:

سعاد بنت حلال. كان نفسها تبقى مهندسة، لكن النصيب خلاها تدخل كلية الآداب للأسف. هي ناوية تشتغل بعد التخرج؟

أجاب عاصم وهو يميل بجسده للأمام، وكأن ثقل الحديث بدأ يرهقه:

بصراحة مش عارف. بس كل همّي دلوقتي أشوفها مستقرة في بيت جوزها. وماما كمان نفسها تتطمن عليها. موضوع الشغل ده مش فارق معايا.

نظر إليه عمر بتمعن، وكأنما يزن كلماته قبل أن يقول بحنين صادق:

ربنا يوفقها، ويبعتلها ابن الحلال اللي يستاهلها.

ساد الصمت، لكن في أعماق كل منهما ظلت كلمات الآخر ترن، تحمل معها أصداء الأمنيات والهموم، وكأنها نجوم خافتة تُنير ظلام الأيام المقبلة.

وقبل أن يتسرب الجمود بينهما، قال عاصم سريعًا وهو يحاول كسر الجدية: 

طب وإنت؟ مش ناوي تتجوز وتفرح أبوك بيك؟

تبدلت ملامح عمر فجأة، واكتسى صوته بمسحة من الحزن: 

لما قلبي يقدر يحب تاني. تصدق؟ لحد دلوقتي مش مصدق إن ندى اتجوزت. يعني خلاص... مش هشوفها تاني.

رفع عاصم حاجبيه بدهشة وقال بخفوت: "لا، صدّق. ربنا رزقها بولد، وجوزها فرحان بيها جداً. الولد ده أول ولد ليه بعد ست بنات من زوجاته التانيين."

هزّ عمر رأسه بحسرة، وكأن الجرح الذي حاول تجاهله عاد لينزف من جديد: 

يعني اتجوزها علشان كده؟ الله يسامحك يا ندى... خسارة. بعتِ نفسك علشان المال.

ضاق صدر عاصم، فقرر إنهاء الحديث قبل أن يعود عمر الي حزنه عليها:

بقولك ايه اقفل الموضوع ده بقى. يلا بينا على السفرة."

********"

بعد الغداء، اجتمعوا مجددًا في الصالة، تتناثر كلمات الشكر بين الضحكات:

تكلم عمر بابتسامة ممتنة: 

تسلم إيدك يا سعاد. الأكل كان حكاية.

سعاد، وهي تحاول إخفاء فرحتها: 

بجد عاجبك؟ أخيراً شرفتنا وأكلت عندنا.

رد عمر بحرج بالغ من عتابها:

والله مشاغل يا سعاظ... وكمان تعب مامتك بيخليني أتحرج آجي زي زمان.

رمقته سعاد بصدمه وقالت بعتاب خفيف:

معقول انت عامل فرق بينا، ده بيتك يا عمر. ليه تقول كده؟

ضحك عاصم وهو يرمق صديقه بغيظ: 

سيبك منه يا سعاد شكله بيحسب نفسه غريب!

ردت سعاد بعجل، لكنها تعني ما تقول: 

غريب إيه؟ ده صاحب البيت! 

نكس عمر رأسه بخجل من كرمهم معه ورد عليهم ، ونبرة  التأثر واضحة في صوته: 

ربنا يخليكم ليا.  والله إنتوا زي أهلي وأكتر.

منحته سعاد ابتسامه خجوله وقالت بإيجاز:

طيب هروح انا ادي العلاج لماما 

غادرت سعاد الغرفة وهي تحمل الدواء،  وهي تحدث نفسها  بتمتمات خافتة تخاطب قلبها:

يارب،حس بيا بقى. خلاص مبقاش في غيري قدامك.

دخلت إلى غرفة والدتها بهدوء، وضوء خافت ينساب من النافذة. اقتربت منها، وهي تحمل الدواء، ثم همست بخفوت: 

ماما، قومي يا حبيبتي علشان تاخدي العلاج.

لكن الأم لم تستجب. تملكتها الريبة، فرفعت صوتها قليلاً: 

ماما... توحة يا قمر! ماما قومي يا حبيبتي؟

تسارعت أنفاسها، وكأن صدرها ضاق فجأة. اقتربت أكثر، ويدها ترتجف وهي تلمس وجه والدتها. ثم صرخت فجأة: 

ماما! ماما! ردي عليا,

هرعا إليها عاصم وعمر، علي صوت صراخها وعيونهما تملؤها الحيرة والخوف.

سألها عاصم بصوت مرتعش

في إيه يا سعاد؟

نظرت إليه بذعر وقالت بانهيار  تمامًا:

الحقوني... ماما مش بترد! وكمان مش بتتنفس!

لم يتردد عمر، واندفع خارج الشقة ليحضر الطبيب. دقائق مرت كالدهر، حتى عاد ومعه الطبيب الذي دخل بسرعة. وبعد فحص سريع، نظر إليهم الطبيب بعينين تخلو منهما الحياة، وقال بهدوء قاتل: 

البقاء لله.

الصمت خيم على الغرفة، ثم انطلقت شهقات البكاء كالعاصفة.

جلس عمر بجوارهم، يمسح دموعه التي لم يستطع كبحها. كانت الفقيدة بمثابة أم له، وفقدانها ترك فراغًا يصعب ملؤه. أما عاصم، فانهار تمامًا، وكأنه فقد آخر حصن في حياته. جلست سعاد بجوار جسد والدتها، تمسك يدها بحنان ودموعها تغسل ملامحها.

كانت هذه اللحظة بداية جديدة... لكنها من النوع الذي يولد من الحزن وألم الفراق؛ 

*************

مرت أيام العزاء ببطء ثقيل، وبدت الدموع وكأنها تجف فقط لتترك وراءها وجوهًا منهكة. كان الحزن يخيم على المنزل، ولم يكن أحد يتوقع أن عم عاصم سيظهر فجأة في العزاء، بعد كل هذه السنوات.

عندما انتهت مراسم العزاء وبدأ الناس في الانصراف، اقترب العم من عاصم، بنظرة تجمع بين الحذر والتصميم.

تعال يا عاصم... أنا محتاج أتكلم معاك.

عاصم، وهو ينظر إليه ببرود: 

افتكرت ابن أخوك دلوقتي؟ مفيش بينّا كلام خلصت خلاص، اللي بيني وبينك ورث وبس،  أنا عايز حقي وحق أختي اللي عندك من سنين

تنهد العم وكأنه يحاول كبح مشاعره، ثم قال بنبرة هادئة: 

طيب افهم يا عاصم... أمك اللي خدتكم وهربت وسابت كل حاجة بعد موت أبوك. أنا كتير طلبت منها إنها ترجع، لكنها كانت خايفة عليك من الثأر. وكمان، علشان أبوك قرا معايا الفاتحة علي إنك تتجوز بنتي. لكن والدتك كانت رافضة الترتيب ده، ومش عايزة حد يفرض عليك حاجة.

تسمرت عينا عاصم بعدم تصديق، وبدت الصدمة واضحة في ملامحه. قال بصوت متردد:

ماما عمرها ما قالتلي حاجة. لا عن الثأر، ولا عن الجوازة دي، ولا عن سبب هروبنا من الفيوم من الاساس، انا ظنيت انها هربت بسبب طمعك في مال ابويا، لكن كلامك ده جديد عليا

أومأ العم برأسه وقال بأسف: 

أنا بقولك اللي حصل وبعرفك سبب هروب امك منا. أما ورثك مالك وحقك وحق أختك تحت أمرك. ولو على موضوع الثأر، خلاص، إحنا اتصالحنا من سنين، وبقى بينّا نسب كمان. أما عن موضوع بنتي، فأنا بحلك منه وليك حرية اختيار اللي تناسبك.

ربت علي كتفه بحنان ابوي واكمل:

تعال ارجع لبلدك ومالك. أنت ابن أخويا الكبير، وهتبقى كبير العيلة من بعدي... لأن معنديش ولاد.

صمت عاصم للحظات، ثم قال بفتور: 

أرجع فين؟ أنا حاليا موظف في بنك، وخلاص اتعودت على العيشة هنا. صعب ارجع للفيوم،

ابتسم العم بهدوء، وقال بصوت حنون: 

تعال وجرب عيش بينا فترة . لو الوضع مش عاجبك، اعمل اللي يريحك. أنا مش هاجبرك على حاجة. وبالمناسبة، بنت عمك خلاص هتبقى دكتورة... 

كلها كام شهر. يعني أنا مش هفرض عليكم حاجة، لا أنت ولا هي.

لم يعرف عاصم بماذا يرد، لكنه وجد نفسه يتمتم:

ما شاء الله... ربنا يبارك فيها.

بعد حديث طويل مع عمهم، قرر عاصم أن يمنح الأمر فرصة اخيرة. واتفقوا على زيارة البلدة، للتعرف على ممتلكاتهم هناك، والتشاور حول كيفية التصرف في الميراث.

*********

لم يكن الأمر سهلاً على عاصم، لكنه شعر أن عليه مواجهة هذا الفصل الغامض من حياته. تحدث مع أخته سعاد، وأخبرها بالتفاصيل. ورغم ترددها، وافقت على السفر معه.

حين وصلا إلى الفيوم، كانت الأجواء مختلفة تمامًا عن كل ما اعتاداه في المدينة. دفء العلاقات، بساطة الحياة، ورائحة الأرض الطيبة، كل ذلك حمل شيئًا من السحر. أمضيا أسبوعًا مع بنات عمهم، وتعرفا على تفاصيل الميراث وأراضي والدهم الراحل.

كان الأسبوع مليئًا بالمشاعر المختلطة. وجد عاصم نفسه يتساءل: هل يمكن أن يعود يومًا إلى جذوره، ليصبح كبير العائلة؟ أم أن حياة المدينة أصبحت جزءًا لا يتجزأ منه؟

القرار لم يكن سهلاً... لكنه يعلم أن عليه اتخاذه قريبًا.

*************

بعد انقضاء الأسبوع الحافل بالأحداث في الفيوم، جلس عاصم وأخته سعاد في الشرفة المطلة على الحقول الواسعة، يستمتعان بهدوء الليل الذي بدا وكأنه يروي حكايات الماضي. قطع عاصم الصمت بسؤاله المفاجئ:

سعاد، إيه رأيك في شهد بنت عمي؟

طالعته سعاد بنظرة يغلبها الريبة، متفاجئة من سؤاله، ثم قالت ببطء:

شهد؟ بنت جميلة وهادية... بس بتسأل ليه؟

ابتسم عاصم ابتسامة غامضة، تشي بأمر كبير يدور في ذهنه، وقال بحسم:

أصل... بفكر أخطبها. تعرفي إن بابا زمان طلبها من عمي علشاني؟

ارتسمت السعادة على ملامح سعاد، ولم تستطع إخفاء فرحتها، فهتفت بحماس:

ألف مبروك يا عاصم! شهد مناسبة ليك فعلاً. وكمان هتبقى دكتورة قد الدنيا. بختك يا عم!

ضحك عاصم بخفة، وقال بحماس:

خلاص... خير البر عاجله. هروح أكلم عمي وأشوف رأيه.

لم يضيع عاصم الوقت، نهض متحمسًا، وتوجه مباشرة إلى عمه. طرق الباب بخفة، وسرعان ما أذن له العم بالدخول.

استقبله العم بابتسامة واسعة وهو يقول بترحاب:

ادخل يا عاصم، أنت واختك منورين البلد كلها!

تقدم عاصم بخطوات واثقة، وقال بتواضع:

ده نورك يا عمي. ربنا يخليك لينا يا رب.

ثم أردف بنبرة جادة، وكأنه يفتح صفحة جديدة:

عمي، أنا ليا عندك طلب.

رفع العم حاجبيه باهتمام، وقال بنبرة يملؤها الفضول:

خير يا ابني، قول. طلب إيه؟

تحنح عاصم، وكأن الكلمات تتعثر على لسانه للحظات، ثم قال بتردد مشوب بالعزيمة:

أنا عايز توفي بوعدك لبابا... وتقبل إني أخطب بنتك شهد. رأيك إيه؟

مباركة العم وسعادة شهد

لمعت السعادة في عيني العم، ولم يستطع إخفاء ابتسامته التي سرعان ما ارتسمت على وجهه، وقال بحماس:

ده يبقى يوم الهنا يا عاصم!

ثم رفع صوته مناديًا:

يا دكتورة شهد! يا دكتورة، تعالي يا بنتي.

دلفت شهد بعد لحظات، بخطوات هادئة يغلبها الخجل. كان وجهها مشرقًا، وقد زاد احمرار وجنتيها من حيائها. قالت بنبرة منخفضة:

تحت أمرك يا بابا.

نظر العم إليها بحنان، وسألها بفرحة لا تخطئها الأذن:

ابن عمك عاصم طلبك للجواز... إيه رأيك؟

احمر وجه شهد أكثر، وازدادت خجلًا، ثم همست:

اللي تشوفه يا بابا.

ابتسم العم، وقال بحزم ممزوج بالسعادة:

خلاص. نبقى نقرأ الفاتحة. والزفاف تحب يبقى إمتى يا عاصم؟

رد عاصم بنبرة مليئة بالتقدير والاحترام:

بعد مرور سنة على وفاة أمي... وتكون شهد خلصت دراستها وبقت دكتورة قد الدنيا.

التخطيط للعودة والاستقرار

نظر العم إلى عاصم بإعجاب، وقال بفخر:

مبروك يا ابني. ربنا يتمم بخير.

احتضن العم عاصم وابنته شهد في لحظة امتزجت فيها مشاعر الفرح بالامتنان.

اتفق الجميع على أن يعود عاصم وأخته سعاد إلى الفيوم بعد سنة، ليبدأا حياة جديدة. عاصم سيتولى إدارة أرض والده، ويعيش مع شهد كزوجين بعد انتهاء دراستها. أما سعاد، فستكون قد أنهت جامعتها، لتبدأ هي الأخرى البحث عن طريقها في الحياة.

في هذه الفترة، سيعمل عاصم على ترتيب أموره في القاهرة، وتصفية ارتباطاته، والتخطيط لمستقبل أكثر استقرارًا، حيث سيعود إلى جذوره في الفيوم، محققًا وعدًا لوالده، وحلمًا جديدًا لنفسه.

***************

بعد أن أمضى ساعة كاملة غارقًا في أفكاره داخل غرفته، قطع شروده صوت طرقات خافتة على الباب. فتحه ليجد سعاد واقفة بالخارج، عيناها مغرورقتان بالدموع، وجهها يعكس اضطرابًا لا تخطئه العين.

بصوت متقطع يحمل ارتجاف مشاعرها، سألته:

عاصم، إنت إيه اللي عملته ده؟ مين قالك إنّي عايزة أقعد هنا؟

زفر تنهيدة طويلة، ورفع رأسه ناظرًا إليها بتعب قائلاً:

في إيه يا سعاد؟ بعد سنة هتخلصي كليتك، وهنجي نعيش هنا. ممكن أفهم هتقعدي في مصر ليه؟ حتى لو رجعتي، هتعملي إيه؟

ردت بصوت خافت مليء بالعجز:

بس أنا مش عايزة أعيش في الصعيد، مفيش حد هنا... أنا مليش ليا هنا حاجة.

تقدم نحوها بخطوات ثابتة، واحتواها بين ذراعيه، يربت على كتفها بمحبة، وقال بنبرة هادئة تحمل دفء الأخ الأكبر:

ولا لينا حد في مصر، يا سعاد. ماما ماتت، وصاحبتك سافرت وعايشة مع جوزها، وأنا هبقى هنا مع أهلي. مين في مصر هيبقى موجود علشان ترجعي ليه؟

لم تستطع أن تتمالك نفسها، وأجهشت بالبكاء وهي تهمس من بين دموعها:

إنت عارف مين ليا، عاصم... أنا مش قادرة أعيش من غيره، وأنت مش فاهم كل حاجة!

شدد عاصم قبضته عليها، وكأنه يريد أن يحميها من ضعفها، ورد بنبرة حازمة لا تخلو من الحنان:

يا بنتي، اعقلي. عمر عمره ما فكر فيكِ. ولحد دلوقتي، هو لسه حزين على ندى. ما تظنيش إنك هتكوني في مكانها.

انهارت أمام كلماته، وكادت تختنق بين شهقاتها وهي تقول بصعوبة:

بس أنا بحبه يا عاصم! مش هقدر أبعد عنه... هموت، صدقني!

زاد عاصم من إحكام عناقها، وكأن حضنه ملاذها الوحيد، وربت على شعرها قائلاً بصوت منخفض يشوبه قلق:

عارف إنك بتحبيه. بس اسمعي، الأمر كله بإيد ربنا. لسه قدامنا سنة، واللي فيه الخير، ربنا يقدمه يا سعاد. لو كان ليكِ نصيب معاه، ربنا هيجمعك بيه. بس إنتِ لازم تفكري بعقل وما تتسرعيش.

حاول أن يخفف من وطأة الموقف، فداعب شعرها بمزاح خفيف وقال بعفوية:

يا بنتي، أنا أخوكي وسعادتك أهم حاجة عندي. لازم تفهمي إني دايمًا جمبك وعلشانك، وبس. فاهمة؟

رغم الألم الذي يسكن قلبها، رسمت ابتسامة باهتة على شفتيها، كأنها تحاول التمسك ببصيص أمل في أن يتحقق حلمها، حتى لو بدا مستحيلاً.

*********

بعد أسبوع آخر، عادوا إلى القاهرة لتجهيز أمورهم استعدادًا للانتقال إلى الفيوم والاستقرار هناك بشكل دائم.

في المساء، حينما صارح عاصم صديقه عمر بما ينوي فعله، ارتسم الحزن على ملامح عمر وهو يقول:

ــ أنت كمان هتفارقني، يا عاصم؟ يعني ندى، وبعدها أمي، وبعدها مامتك، وهتتحرم منك أنت كمان؟

بابتسامة مشوبة بالشجن، وضع عاصم يده على كتف صديقه قائلًا:

عمر، إنت أخويا. اتاكد لو احتجتني في أي وقت، هتلاقيني جنبك دايمًا.

تنهد عمر بحرقة، والتفت إليه وعيناه مثقلتان بالحزن:

بس أنا محتاجك جنبي دايمًا، يا صاحبي، يا أخويا.

تردد عاصم قليلًا قبل أن يقول بحزم:

طيب، ممكن أطلب منك طلب؟

ارتفع صوت عمر بفضول وهو يستعجل الإجابة:

اتفضل، أنا تحت أمرك. طلب إيه؟

نظر إليه عاصم بجدية، وقال:

ـأنا عايزك تتجوز أختي سعاد.

اتسعت عينا عمر من الدهشة، وبدا عليه التردد والحيرة. أكمل عاصم كلامه ليحسم الأمر:

ـأنا فاهم إن طلبي ده غريب، بس إنت عارف سعاد أختي الوحيدة. وأتمنى اللي يتجوزها يكون إنسان زيك في أخلاقك وأدبك. علشان أقدر أسافر وأنا مطمئن عليها، إنها مع راجل هيحافظ عليها ويصونها. كمان هتكون جنبك. إيه رأيك؟

ابتعد عمر قليلًا عنه، وأمسك رأسه بيديه مستغرقًا في التفكير لبرهة، ثم أجاب:

بس أنا مش بفكر في الجواز دلوقتي. وسعاد طول عمري بعتبرها أختي مش أكتر. إزاي عايزني أفكر إنها تبقى مراتي؟

ساد الصمت بينهما للحظات قبل أن يقول عاصم بنبرة حازمة:

أنا مش بجبرك على حاجة. فكر. قدامك سنة كاملة تفكر فيها قبل ما نسافر وتبعد بينا المسافات. على ما السنة تخلص، هتكون خلصت كليتها. وقتها شوف نفسك: تقدر ولا لأ. قلت إيه؟

أغمض عمر عينيه للحظة قبل أن يجيب بصوت خافت:

حاضر يا عاصم، هفكر. بس مش هقدر أوعدك. وبالذات إن سعاد خابرة إني كنت بحب ندى. أنا مش عارف أتعامل مع الموضوع ده بالذات.

انتهى النقاش بينهما عند تلك النقطة دون أن يعطي عمر جوابًا قاطعًا، لا بالرفض ولا بالقبول.

تمر الأيام سريعًا...

وخلال الشهور التالية، يفقد عمر والده، فتترك الفاجعة أثرًا عميقًا في نفسه.

وقبل موعد سفر عاصم بأسابيع قليلة، بدأ عمر يعيد التفكير في طلب صديقه. هل سيوافق؟ وهل سيتمكن من التغلب على مشاعره القديمة تجاه ندى؟

وما الذي سيحدث إن رفض؟ كيف سيواجه الأيام المقبلة وما قد تحمله من تحديات وأزمات؟

أسئلة كثيرة تدور في ذهنه، وإجاباتها ستتضح في الحلقات القادمة...

*********

يتبع..

#سلمي_سمير

تابعونا في الحلقات القادمة... وانتظروا منا المزيد

تكملة الرواية من هنااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هناااااا