رواية النصيب الفصل الخامس وعشرون 25بقلم رحاب القاضي جديده وحصريه وكامله مدونة قصر الروايات
رواية النصيب الفصل الخامس وعشرون 25بقلم رحاب القاضي جديده وحصريه وكامله مدونة قصر الروايات
#النصيب
_الحلقه الـ 25
ـــــــــــــــــــــــــــــــــــــــــــــــــــــــــــــــ
«إن كُنتَ حُرًّا كما تَزعُم، فهل تستطيعُ أن تختارَ غيرَ التي أحببتَها؟»
- الرافعيّ.
_دخل كارم بيته وهو ماسك ايد شهد بقوه اللي بتحاول تسحب ايدها منه بس مش قادره وكان فايز قااعد مستنيهم واول ما شاف شهد ابتسم بطريقه مخيفه وقام وقف قدامهم وقال..
فايز
يا اهلا وسهلا بمرااات الغالي..
وقفت شهد ورا كارم وقالت بخوف
مين ده؟..
كارم ابتسم علي حركتها العفويه وقال
ما انا لسه قايلك عليه، ده فايز اللي جوزك عايز يقتله بزمتك مش شكله لطيف حرام عليه ولا لا؟..
_ما ردتش عليه شهد وكانت خايفه جدا من نظرات فايز ليها، وكارم قال بهدوء..
كارم
دلوقتي بقي مع المفاجأه هخليكي تتعرفي علي نتالي، هي مش في جمالك كده بس شبه أسر اووي في شخصيتها تعالي انا هعرفك عليها...
فايز بجمود
لا استني انت يا كارم انا عايز اتكلم معاااك..
وقال بصوت عالي
تالاااا تعالي هنا..
_طلعت تالا اللي كانت شغاله في قصر الفيومي من اوضة فايز اللي في الطابق الارضي وبصت لشهد بخبث وقالت..
تالا
اوامرك يا فايز بيه..
فايز
خديها للاوضه اللي فيها نتالي وممنوع تطلع منها هي كمان..
تالا
اوكي..
وبصت لشهد بحقد وقالت
تعالي ورايا يا مدام شهد..
_مشيت شهد وراها وطلعو فووق وشهد سألتها وقالت بعدم تصديق...
شهد
حتي انتي كمان معاهم ده فؤاد وهاله كانو بيعاملوكي كويس اووي، عشان كده بقي سبتيهم ومشيتي..
تالا
انا اصلا من الاول بشتغل عندهم عشان انقل اخبار اسر لفايز، وظهورك بوظلي كل حاجه كنت بخطط ليها، بدل ما كنت بقدر اقرب من أسر واعرف منه كل حاجه بقي مش طايقني...
شهد بصدمه
يعني انتي اللي قولتي لفايز ده علي خطة أسر صح؟..
تالا
بالظبط كده وفايز استغل الوضع وخلي اللعبه كلها في ايده، كنت هقف جنب أسر لولا انه فضلك انتي عليا واتجوزك وعايزني افضل طول عمري شغاله عندهم..
شهد بغيظ
اسر فضلني عليكي عشان انتي رخيصه وما فيش راجل هيتجوز واحده زيك..
اتعصبت تالا وضربتها بالقلم وقالت بعصبيه
احنا هنا مش في بيت الفيومي عشان اسمحلك تغلطي فيا، كلمه كمان يا بت انتي وهخليكي تسفي تراب الارض...
وفتحت تالا باب الاوضه اللي فيها نتالي وقالت
تترزعي هنا لحد ما نخلص منك، امنيتي بجد انهم يقتلوكي وارتاح ما تعرفيش انا بكرهك اد ايه من اول لحظه شوفتك فيها..
ـ دخلت شهد زهي حاطه ايدها علي وشها وهي بتعيط بكسره وحزن وقفلت تالا الباب عليهم بالمفتااح وكان نور الاوضه مقفول وفجأه اتفتح لما نتالي قامت من نومها وبصت لشهد بضيق وقالت...
نتالي
هما جابوكي...
شهد مسحت دموعها وردت عليها وقالت
انتي تعرفيني؟
نتالي لمت شعرها علي كتف واحد وقالت
شوفت صورتك مع أسر وطلعتي احلي من الصور كمان، اقعدي واقفه ليه هما مش هيطلعوكي دلوقتي..
ـ قعدت شهد علي الكنبه قدامها ونتالي بصتلها بغيظ وغيره واضحه وقالت..
نتالي
متجوزين من امتي انتي وهو؟..
شهد بتوتر من نظراتها
تقريباً شهرين...
نتالي
حكالك عني؟..
شهد
ايوه..
نتالي
قالك ايه؟..
اتنهدت شهد بضيق ونتالي قالت بسخريه
ما تدايقيش اووي كده، طيب تعرفي انهم هيخلوه يختار بيني وبينك..
شهد بدموع
ايوه عرفت..
نتالي
تفتكري هيختارك ولا هيختارني؟..
نزلت دموع شهد بخوف وقالت
مش عارفه...
نتالي بنبره واثقه
بس انا عارفه.. هيختارني انا يا.. انتي اسمك ايه؟..
_ما ردتش عليها شهد ودموعها فضلت تنزل في صمت، وقامت نتالي قعدت جنبيها وقالت...
نتالي
انا بقولك الحقيقه واللي هيحصل اللي كان بيني وبين أسر مش قليل واللي انا شوفته هخيلي اسر مش هيهون عليه انه يسيبني او يستندل معايا..
شهد بحزن
بس انا برضو مرااته وهو بيحبني..
نتالي بحده
عشان انا مش موجوده لو انا كنت موجوده معاه او عرف اني عايشه ما كانش هيبصلك، انا كنت حامل لما عملنا الحادثه..
شهد بصدمه
انتو كنتو متجوزين؟!..
نتالي بأحراج
كنا ناوين نتجوز بعد السباق انا ما كنتش اعرف اني حامل اصلا، وبسبب الحادثه اجهضت وفايز قدر يخطفني من المستشفي بسهوله وخصوصا ان اسر وقتها كان في غيبوبه، اللي بيني وبين أسر انتي عمرك ما هتوصليله معاه..
_قالت كلامها وسابتها وراحت قفلت النور تاني ونامت بكل هدوء، فقامت شهد وقفت عند. الشباااك وبصت تحت البيت لقيت حراس كتير مُسلحين ومحاوطين البيت من كل ناحيه. وافتكرت كلام نتالي وفضلت تعيط بحزن وخوف من ثقتها الكبيره وهي متأكده ان أسر هيختارها، علي عكسها هي اللي حاسه بيه انه ممكن يتخلي عنها في وجود. نتالي..
ــــــــــ #بقلم_الكاتبه_رحاب_القاضي ــــــــ
_وفي نفس البيت تحت كان قااعد كارم مع فايز اللي قاله بجديه...
فايز
انا النهارده هقولو وعلي فكره هو هيسمع كلامي؟
كارم
لا لا خوفه علي مراته يقول انه مش هيتخلي عنها..
فايز
هنشووف كده كده انا هسيبله نتالي انا مش عايزها اصلا بس يا هسيبهاله عايشه يا ميته، وكذلك مراته..
كارم بجمود
لا مراته تبعي انا وانا ما ليش مصلحه اني اقتلها..
فايز بحقد
بس انا ليا يا كارم..
كارم بعصبيه
لما ابقي ارجعهاله ابقي اخطفها منه واعمل فيها اللي انت عايزه انما اللعبه دلوقتي معايا انا وانا اللي اتحكم فيها يا فايز، والبنت لو حصلها حاجه انا هقلب عليك وقلبتي وحشه وانت عارف...
وقام وقف وقال بأبتسامه واسعه
حلو الكلام كده يا فايز واتفقنا اوعي بقي تغيره، بااي يا حبيبي..
_قال كلامه وطلع وفايز فضل قااعد متعصب وهو بيفكر بكل مرض ازاي يأذي أسر..
ـــــــــــ#بقلم_الكاتبه_رحاب_القاضي ـــــــــ
ـ وفي شركة أسر بعد ما عرف ان شهد اتخطفت وقااعده عند كارم وهو عارف مدي خطورته واجرابه وبقي في قمة خوفه وقلقه عليها... ودخل عنده في الوقت ده امرم وقاله بقلق..
اكرم
في ايه يا أسر قالولي انك عايزني ضروري..
أسر
تعالي اقعد يا اكرم وقولي عملت ايه في الموضوع بتاع الفلوس اللي قولتلك عليها..
اكرم
انا روحت مع المحامي والموضوع هيخلص خلال اسبوع بالكتير وتقدر تاخد المبلغ اللي عايزه
أسر
لا كتير اووي انا عايز الفلوس بكره يا اكرم اتصرف
اكرم
دي اجراءات بنك والمبلغ كبير وفي اورااق لازم تخلص الاول...
أسر
طيب احنا لو هنجيب قرض مثلا بالمبلغ ده علي ضمان الشركه هنا هناخد اد ايه وقت؟
اكرم
كتير ياما هنسحب فلوسنا هناخد وقت ما بالك بقي من قرض اكيد وقت اكتر..
أسر بنفااذ صبر
واجيب منين دلوقتي المبلغ ده؟
اكرم
معلش يعني بس هو انت محتاج مبلغ زي ده ليه بسرعه كده؟..
أسر بضيق
متورط مع ناااس كنت هقول في اي وقت عادي قبل ما يدخلو شهد في الموضوع..
اكرم بقلق
نعمم ازاي يعني دخلو شهد في الموضوع ومين الناااس دي؟..
أسر بخوف حقيقي
تقدر تقول اخطر مجرم ممكن تشوفه في حياتك..
اكرم
لحظه بس هو الراجل اللي بتتكلم عنه ده هو نفسه الراجل اللي روحناله قبل كده؟..
اسر
ايوه هو...
_وبدأ أسر بحكيله عن نتالي واحمد وعن انتقامه ومعرفته بكارم، واكرم قاله بحده...
اكرم
انا مش عارف اقولك ايه بس انت ورطت شهد معاك من غير ذنب..
اسر
عاارف وعشان كده انا عايز اخد الفلوس واطلعها من الموضوع ده، انا ما فكرتش انه ممكن يخطف شهد لاني كده كده واثق اني هكسب السباااق..
قبل ما يرد عليه اكرم دخل فؤاد وقال بعصبيه
انا اكبر غلط عملته في حياتي لما صدقت انك اتغيرت وبقيت راااجل...
_حط أسر راسه بين ايده وهو ساند علي المكتب وندم فعلا انه دخل في موضوع السبااق ده مع كارم وخذل عيلته واهله فيه بالشكل ده، وقاام اكرم وقال بضيق...
أكرم
بعد اذنكم انا هروح اكمل شغلي.
انسحب اكرم من بينهم وفؤاد قال بحده
ضحكت علي شهد كدبت عليها وخدعت البنت وعملت نفسك بتحبها عشان توصل لـ اللي في دماغك يا اسر؟
أسر بضيق
لا انا ما كدبتش عليها في حبي ليها، شهد مراتي وخوفي عليها دلوقتي اكبر من اي حاجه؟..
فؤاد
لو كنت بتحبها ويتخااف عليها وعلى اختك ما كنتش عرضت حياتهم للخطر النهارده، ما كانتش مراتك دلوقتي قااعده وسط مجرمين والله واعلم بيحصل فيها ايه، انت لو عندك دم اصلا ما كانش كل ده حصل..
أسر بجديه
نتالي عايشه يا فؤاد وده اللي هيخليني افكر مليون مره قبل اي حاااجه عشان خاطرها هي وشهد....
فؤاد
كفايه كدب بقي ولو نفترض ان نتالي عايشه هي ليه السنين دي كلها ما جاتش ليك وعرفتك انها عايشه، انت اللي غبي...
أسر بعصبيه
انت مالك يا فؤاد الموضوع يخصني اللي مخطوفه دي مراتي وانت بنفسك اتنازلت ليا عن ادارة الشركه ولو علي نصيب اختي ، هاله اصلا عارفه اني كنت متجوز شهد عشان اخدعك في الاول واخليك تصدق اني اتغيرت يعني راضيه عن اللي بعمله..
فؤاد بصدمه
يعني هاله كانت عارفه؟..
أسر بجمود
روح واسألها يا فؤاد ومدام زعلان من اللي بعمله طلع نفسك بره الموضوع ده خالص..
فؤاد بحزن
معاك حق انا من النهارده ماليش دعوه لا بيك ولا بأختك انا حاولت اساعدك علي قد ما اقدر بس انت اللي مش عايز تساعد نفسك وانا مش هفضل اجي علي نفسي عشاانك تاني..
_قال كلامه وسابه ومشي وأسر راح قعد. علي مكتبه وحاول يكلم كارم بس ما كانش بيرد عليه... فبعتله رساله علي الوتساب وقاله..
أسر
"كاارم احنا لازم نتقابل ونتكلم اللي انت بتعمله ده هخلينا نخسر بعض، انا بوعدك. والله انا هكسب السبااق بس خلي مراتي تطلع من الموضوع ده، كلمني انا مستنيك"
_قال كلامه وقفل الفون وحطه في جيبه ولبس جاكيت بدلته واخد مفتاح عربيته كان طالع من مكتبه بس موبيله رن برقم غريب فرد وهو واقف قدام الاسانسير وقال..
أسر
الو..
فايز
وحشتني اووي يا صاحب اخويا..
اتحولت ملامح أسر للغضب وقال
اهلا والله انت اللي ليك واحشه..
فايز بخبث
طيب بصراااحه انا وحشتك. اكتر ولا احمد. اخويا اللي انا قتلته؟..
خبط أسر ايده في الحيطه وقال بحده
انت عايز ايه يالاا؟..
فايز
بقولك وحشتني هكون عايز ايه يعني عايز اشوفك يا أسر..
أسر بحقد
تمام انت فين وهجيلك..
فايز
اصبر شويه وهبعتلك اللوكيشن اللي انا فيه وهستنااك يلا باي باي..
قفل فايز معاه وأسر قال بغيظ
ايه يارب البلاوي اللي في حياتي دي بس، اجيب دماغ لكل ده منين؟..
ــــــــــ #بقلم_الكاتبه_رحاب_القاضي ــــــــ
_وفي المحل بتاع سعيد كان قااعد وبيقلب في موبيل نسمه حتي الرسايل اللي بينها وبين صحابها كان بيقرأها، وفجأه قعد جنبيه محمد وقاله..
محمد
مالك يالا قاعد مش علي بعضك. كده ليه؟..
قفل سعيد الموبيل ورد. عليه وقال
لا ما فيش بس شوية ضغط في الشغل..
محمد
في حاجه معاك ولا ايه انت عايز فلوس ولا ايه؟
سعيد
لا مش عايز حاجه، انت سايب شغلك ليه بدري؟
محمد
امك. كانت عايزه شوية حاجات قولت اجيبهم واجي اطمن علي البت ساره بنتي فوق سخنه وعندها برد...
سعيد
الف سلامه عليها..
محمد.
الله يسلمك. عقبالك. بقي اما تخلف وتشيل الهم بجد، بالك انت كل الحاجات دي اللي انت مادايق منها متسواش حاجه في قلقك علي ولادك او لما تشوف ابنك. او بنتك تعبانين وانت مش عارف تعمل حاجه هتفضل تقول وقتها يارب بس يخفو ومش عايز حاجه تاني من الدنيا..
سعيد ابتسم بسخريه وقال
ربنا يخليهملك يا محمد، اما انا بقي الله واعلم الهانم. اللي متجوزها هترضي تخلف امتي...
محمد
هو بمزاجها ولا ايه لا ده انت اللي تقرر، لو بتاخد. حاجه تخليها توقفها ولو ما بتاخدش تروح انت وهي للدكتور وتطمنو علي نفسكم اومال انت متجوز ليه مش عشان تعمل عيله ويبقي عندك عيال وتشيل المسؤليه..
سعيد بحمود
ان شاء الله يا محمد..
محمد
قولي صح انت ايه علاقتك بالواد هاني، سمعت انه كان طالعلك امبارح؟
سعيد
مش عارف اصل انا قدامه اليوم كله ما بيجيش ويقول كان عايز ايه، راحلي البيت ليه بقي ما اعرفش..
محمد بقلق
اممم اوعي ياد يكون بيدايق مرااتك في حاجه؟
سعيد بصوت واطي
لا مش بيدايقها بالعكس ده لو كان في حاجه بينهم. هتبقي برضاها..
محمد بحده
ايه يالا الكلام ده انت اتجننت ولا ايه، نسمه دي اخلاقها الحته كلها هنا تشهد عليها وانا اللي هكلمك في حاجه زي دي ولا ايه دي مراتك يعني اخر واحد يقول الكلام. ده عليها انت..
سعيد اتنهد بضيق وقال
انت مش عارف حاجه يا محمد علي العموم كبر دماغك انا هعرف اتصرف، روح انت شوف اللي ورااك وانا هخلص شغلي ورايا كام حاجه كده مهم في الحسابات عشان بتوع الضرايب..
_وسابه سعيد ودخل جوه المحل، ومحمد قاام وراااح للمحل بتاع هاني اللي كان واقف وبيتكلم مع حد من زباينه ولما شاف محمد قال بقلق..
هاني
خير يا اسطا محمد في حاجه؟..
محمد
عايزك في استشاره بس لوحدنا يا عم مارك المنطقه..
هاني للزبون بتوتر
طيب انت سيبلي الموبيل وعدب بكره عليا علي العصر كده هكون شوفتلك المشكله اللي فيه ايه وصلحتهالك..
سمع الذبون كلامه ومشي وقال هاني لمحمد
خير يا اسطا محمد؟..
محمد بهدوء
سمعت انك. جيت لاخويا البيت وكنت عايزه في حااجه، بس هو مش فتضي قولت اجيلك مكانه اشوفك عايز ايه؟..
هاني بتوتر
لا ابداً مش عايز حاجه خلاص.
مسكه محمد من. هدومه جامد وقال بحده
اومال ايه اللي يخليك. تدخل بيتنا وتطلع شقته تسأل عليه، انت ايه اللي عايز توصله ياااه؟..
هاني بخوف
والله ما عايز حاجه اا انا ااه افتكرت انا بس واحد صاحبي كان عايز بضاعه من الاستاذ سعيد فانا روحت اسأل عليه عشان. اقوله ولما مالقيتوش كنت هروحله المحل بس صاحبي بقي كلمني وقالي انه لقي حد يشتري منه قريب عليه..
محمد سابه وقال بجمود
اممم طيب يا هاني هصدقك المره دي بس ورحمة ابويا لو عرفت انك بتحاول تدايق اخويا لاي سبب هعلم عليك وسط الحته كلها وهكسرلك المحل ده فوق دماغك وانت خرع وطري ما تستحملنيش..
هاني بتوتر
لا لا والله هو كده وبس ما فيش حاجه تاني..
_سابه محمد ومشي من عنده وهاني قفل باب المحل وكلم ام محمد وقالها..
هاني
ايوه يا ست انتي ابنك محمد شكله قفش الخطه بتاعتنا وانا مش قده ده...
ام. محمد. بخوف
يا نهتر اسود ومنيل قالك ايه محمد، اوعي تكون وقعت قدااامه بالكلام في حااجه؟..
هاني
لا ما وقعتش بس لو كان كترهم. معايو كنت هتكفي علي وشي، انتي مش عارفه ابنك. يعني، احنا اتفقنا من الاول علي سعيد مالنا ومال محمد..
ام محمد
طيب اهدي ما تخافش مش هياكلك يعني وخليك ماشي في الخطه زي ما اتفقنا وانا هتصرف معاه..
هاني
طيب ايه انا بسمع كلامك اهو ومش شايف حااجه..
ام محمد
هبقي انزل واديك فلوس وبالراحه عليا شويه مش قاعده علي كنز انا..
_قالت كلامها وقفلت في وشه، وهاني طلع بره المحل وبص حواليه بقلق وتوتر ورجع قعد في المحل بتاعه تاني..
ــــــــــ #بقلم_الكاتبه_رحاب_القاضي ــــــــ
_وفي بيت الفيومي دخل فؤاد البيت وهو متعصب جدا وكانت هاله قاعده متوتره جدا واول ما شافته سألته بسرعه..
هاله بقلق
ايه يا فؤاد عملتو ايه وصلتو لشهد هترجع؟..
فؤاد بنبره غاضبه
هو انتي كنتي عارفه ان أسر متجوز شهد عشان يضحك عليا واصدق انه اتغير، انتي غفلتيني معاهم يا هاله؟..
هاله بدموع
هو غصب شهد في الاول توافق بس حاليا هو اتغير..
فؤاد
اتغير فين شهد فين دلوقتي، وكمان كان كل ده غصب عنها وانتي عارفه وساكته وكدبتي عليا..
هاله بخوف
انا غلطانه والله بس انا وثقت في اسر زيك انه اتغير، وانه حب شهد والله ما كنت فاكره انه بيضحك عليا انا كمان..
فؤاد بحده
مستغربه ليه ما هو زيك. كداااب..
هاله بصتله بحزن وقالت
طيب خلينا نطمن علي شهد الاول، خليك جنبه لحد ما..
قاطع كلامها بعصبيه وقال
لا انا ماليش دعوه اخوكي هو اللي ورط نفسه وهو اللي يتصرف، وخليكي قاعده. جنبه انا ماليش دعوه بيه وبيكي تاني، ومدام بنكدب علي بعض يا هاله وانتي عارفه اني ما بكرهش في حياتي قد الكدب يبقي خلصت كده..
هاله بصدمه
هو ايه اللي خلصت انا كنت ما قولتلكش عشان كنت فاكره انه بيحبها وانها هتغيره..
فؤاد بحده
بس قبلتي. ان جوزك يبقي مغفل وبيضحك عليه، قدرتي تكدبي عليا وانا عمري ما عملتها، كنت باجي اكلمك. اني مبسوط من أسر وانه خلاص استقر واتجوز واني نفذت وصية ابوكي وكنتي بتاخديني علي قد عقلي ما هو فؤاد طيب واهبل وبيضحك عليه صح..
هاله ببكاء.
لا والله انا كنت مصدقااه زيي زيك كده، انا اسفه يا فؤاااد والله مش هتتكرر تاني عشان خاطري..
فؤاد بغضب
خلاص بقي كفايه انا مش. هعرف اصدقك في اي حاجه تاني يا هاله اللي بيكدب مره بيبقي متعود علي كده، من النهارده اللي بيني وبينك تياام وبس وخلصت كده...
_جه يمشي بس هي وقفت قدامه بسرعه وقالت ببكاء وخوف...
هاله
لا لا يا فؤاد انا اسفه والله انا غلطااانه مش هكدب عليك في حااجه تاني بس ما تبعدش عني انا ما اقدرش اعيش من غيرك..
_سحب ايده منها وسابها ومشي وهي قعدت علي الكنبه مكانها وفضلت تعيط وقالت بحزن كبير..
هاله
منك. لله يا أسر منك لله..
جه في الوقت ده تيام ووقف جنبيها وقال بدموع
ماما هو بابا هيرجع تاني؟..
هاله ببكاء
مش عارفه يا تياام مش عارفه..
تياام بحزن
طيب ما نروح احنا نقعد معاه وناخد خالو أسر وشهد معانا..
حضنته هاله وقالت بثباات حاولت اظهاره قدام طفلها
بابا هيجي يا حبيبي وأسر وشهد وهنرجع زي الاول تاني ان شاء الله ما تخافش انت..
ــــــــــ #بقلم_الكاتبه_رحاب_القاضي ــــــــ
_وبالليل في شقة سعيد رجع شقته والوقت كان متأخر، دخل اوضته وكانت نسمه نايمه فحط الفون بتاعه وبتاعها وباقي متعلقاته الشخصيه علي الترابيزه ودخل الحمام، واول ما قفل الباب قامت هي بسرعه ومسكت موبيلها وجات تفتحه عشان تعمل لرقم هاني بلوك خوفاً من انه يبعت حاجه والموبيل مع سعيد، بس كانت الصدمه الكبيره من نصيبها لما لقيته غير الباسورد، وطلع في الوقت ده من الحمام سعيد ولما شافها ماسكه الموبيل قال بحده..
سعيد
بتدوري فيه علي اطمني ما بعتش حاجه..
نسمه بخوف
هو مين ده؟..
سعيد بخبث
اللي انتي ماسكه الفون وبتقلبي فيه عشااانه، كنتي هتعملي ايه هتحذريه عشان ما يكلمكيش او يبعتلك رساله وانا اشوفها..
نسمه بدموع
هو انت مبسوط بنفسك كده وانت عمال تتهمني في شرفي..
سعيد
اثبتيلي العكس..
نسمه بدموع ونبره غاضبه
انت مش... مش هقدر اقولك حاجه ما عملتهاش مش هقدر اخليك تصدق اني ما عملتش حاجه واني بريئه من كل ظنونك دي..
سعيد بحده
لو كنتي مظلومه فعلا ما كنتيش قبلتي الكلام ده علي نفسك يا نسمه، ما كنتيش هتسكتي وانا بقولك كده انا عارفك كويس..
ردت عليه بنبره حزينه وصغيفه
انت مش عارف حااجه، الراجل بيبقي امان لمراته انما انت اسهل حاجه عندك. انك تشك فيا..
سعيد بحده
لا برافو ابقي فكريني اخليكي تمثلي، طلعتي شاطره في التمثيل لدرجة اني بصدقك وحبيتك يا نسمه وانتي ما تستهليش انا اصلا قرفان منك وفاضل بس اتأكد وما حدش هيرحمك من اللي هعملو فيكي..
دموعها نزلت بألم وحزن من كلامه وقالت
مدام هو كده ما تسيبني، طلقني وخلي كل واحد. يروح لحاله..
سعيد بجمود
مش بعد ما اتأكد الاول واثبت للكل ان معايا حق ما انا مش هطلع ظالم في نظر الناااس مرتين..
نسمه بصتله بلوم وعتاب وقالت
لا انت ظالم يا سعيد في المرتين انت ظااالم..
_قالت كلامها وسابته ونامت وهو سابها وطلع قعد في الصاله وهو بيفكر في كلامها وفي شكوكه من الناحيه التانيه، وقال لنفسه بهدوء..
سعيد
لازم اقعد يا نسمه الاول انك بريئه قبل ما اصدقك وانا هعرف وقريب ايه الموضوع ده..
ــــــــــ #بقلم_الكاتبه_رحاب_القاضي ــــــــ
_وعند شهد في الوقت ده كانت نامت الي الكنبه اللي قاعده عليها، ونتالي قاعده قصادها علي السرير وبتبصلها بغيره وحقد واضحين وخصوصاً ان برغم جمال نتالي الا ان شهد احلي منها بكتير واصغر منها بفرق سنين كبير برضو...
_دخلت عندهم في الوقت ده تالا وهي ماسكه صنية أكل صغيره عليها وجبة واحده وحطتها قدام نتالي وقالت وهي بتشاور علي شهد..
تالا
فايز بيه قال ان انتي بس اللي تاكلي والبنت دي مش هتاكل حاجه خالص..
نتالي بضيق
هتسيبوها تموت من الجوع يعني؟
تالا بحده
اسمعي الكلام والا انتي كمان مش هتاكلي زيها..
_صحيت شهد علي صوتهم وقعدت علي الكنبه وهي بتعدل حجابها، وتاللا قعدت جنبيها وقالت...
تالا
سوري بقي يا مدام شهد مش هقدر اخليكي تاكلي حاااجه دي اوامر من فايز بيه..
شهد بضيق
انا اصلا مش جعاانه ومش عايزه منكم حاااجه..
تالا بشماته
اما نشوف هتفضلي لحد امتي مش جعانه ومش عايزه مننا حاجه..
_في الوقت ده الباب فتح فايز الباب ودخل عندهم واول ما شافته نتالي اتنفضت بخوف حتي شهد كمان اللي كانت مرعوبه منه ومن نظرااته ليها..
فايز
تالا اعمليلي قهوه..
تالا
حاضر..
_قامت تالا وطلعت وهو راح قعد مكانها جنب شهد اللي كانت هتقوم وتبعد عنه بس هو مسك ايدها بسرعه وبقوه واجبرها تقعد جنبيه وبصلها بخبث وقال..
فايز
لما سمعت ان أسر اتجوز فضلت اقول لنفسي مين دي اللي اتجوزها وايه المميز اللي فيها يخلي أسر الفيومي اكتر شخص عنيد شوفته في حياتي يتنازل عن حبه لحبيبته القديمه وينسي انتقاامه عشانهتا، بس لما شوفتك عرفت انك تستاهلي، ابهرني بأختياره بصراااحه لدرجة اني بقيت بتمني ما يختاركيش ويسيبك ليا...
شهد بعصبيه
انت بصفتك ايه بتتكلم كده انا لا مستنيااه يختارني ولا عايزه افضل معاك انت والراجل التاني الغريب ده، انا ماليش دعوه بيكم ولا بخطتكم دي..
ابتسم فايز بهدوء
هنشوووف بس أسر يختار ايه وبعدين نتنااقش يا سكر...
قال كلامه وطلع وقامت نتالي حطت قدامها الاكل وقالت بهدوء...
نتالي
كلي بسرعه قبل ما البومه اللي تحت دي تيجي..
شهد بدموع
مش جعانه شكراً..
نتالي
بس هتجوعي كمان شويه ودول ما عندهمش رحمه فمش هيأكلوكي..
شهد بضيق
هو انتي ازاي قادره تتحملي الوضع ده؟
نتالي
اتعودت بقالي سنين مخطوفه من ابن خالتي ومحبوسه ما بشوفش الشارع غير كل فين وفين ومن قزاز العربيه، انا نسيت اصلا الحيااه في الشارع عامله ازاي، اصعب حاجه لما حد يدفن وجودك ويعاملك علي انك ميته ممنوع تتكلمي ولا تعملي اي حاجه غير اللي هو بيقول عليها، عشان كده انا واثقه ان أسر هيختارني الله واعلم اللي بينك وبينه ايه بيحبك او ما بيحبكيش بس اسر هو الامل الوحيد ليا في الدنيا اللي لحد النهارده عايشه عشاانه..
شهد
هو أسر يعرف انك. عايشه؟
نتالي
هما قالولي انه عرف اول ما نزلت مصر من يومين تقريباً..
شهد
اممم هو ما قاليش ليه؟
نتالي
هو متعود يقولك كل حاجه يعني؟
ابتسمت شهد وقالت بنبره حزينه
علي فكره هو اتجوزني عشانك انتي دي الحقيقه..
نتالي بعدم فهم
اواي يعني مش فاهمه؟
شهد بدموع
يعني هو كان محتاج فلوس من جوز اخته عشان يدخل السبااق وينتقملك انتي واحمد لما كان فاكر انك ميته، وجوز اخته كان عايزه يعني يتجوز ويستقر ويبقي شخص كويس عشان يثق فيه ويديه الورث بتاعه وطبعا اسر مالقااش حد غيري ممكن يضحك عليها عشان يوصل لـ اللي هو عايزه..
ابتسمت نتالي وقالت
يعني هو ما بيحبكيش وجوازكم شكل بس قدام الناااس..
مسحت شهد دموعها وقالت
حاجه زي كده..
ابتسمت نتالي وقالت
طيب كلي الباقي ده انا شبعت..
شهد بدموع
لا ماليش نفس اصلا..
نتالي
ما تخافيش يعني اكيد انتي عندك اهل مش هيسبوكي وهيدورو عليكي غيري انا، انا ماليش غير أسر..
شهد بنبره ساخره
معاكي حق...
_وقامت شهد وقغت عند الشباااك وافتكىت الحوار اللي كان بينها وبين أسر لما اعترفلها بحبه...
_فلاااااااااااااااااااااااااااااااش بااااااااااااااااااااااااااك..
شهد
بس انت قولت انك. هتطلقني قريب..
أسر بخبث
احلفي؟ انا قولت كده امتي مش فاكر؟..
اتنهدت شهد بضيق فقال هو بجديه
ايوه قولت عشان ما كنتش عارف انا عايز ايه وقتها كان جوايا احساس عايزك جنبي علي طول واحساس تاني عايز ابعدك وارجع لوحدي، بس ما قدرتش ابعدك كل ما كنت اعمل كده بلاقي نفسي بقرب منك اكتر وبتعلق بوجودك اكتر..
شهد
وده لحد امتي، هتزهق امتي وتطلقني؟..
أسر بغيظ
هتقولي طلااق برضو..
شهد بسخريه
لان ده اللي هيحصل انا مش عارفه اصدقك، انا اللي مقتنعه بيه دلوقتي انك قربت مني وبتعمل الشويتين دول عشان هدف في دماغك اول ما هتوصله مش هيفرق معاك حاجه لا انا ولا مشاعري اللي عمري ما هخليها تبقي تحت رحمتك..
أسر بحزن
هو للدرجه دي انا وحش في نظرك وما عندكيش ثقه فيا خالص..
شهد بهدوء
لا ما عنديش ثقه فيك، انت بتضحك علي فؤاد اللي بيحبك مش كأنك اخوه لا ده بيعاملك زي ابنه وجوز اختك وبتستغفله ومش هيفرق معاك هو هيشوفك ازاي بعد ما تضحك عليه ولا فارق معاك ثقته فيك اللي هتخسرها، فمبالك انا الغريبه عنكم بقي هتخاف علي مشاعري مثلا، انت ايوه ساعدتني بس لمصلحتك انا ما شوفتش منك حاجه كويسه عملتها عشاااني انا، انت ما بتعملش حاجه عشان حد. انت اناني وبس..
ابتسم بسخريه ورد عليها وقال
تصدقي معاكي حق..
وقاام وقف قداامها وقال بجمود
انا لما قررت اكمل معاكي الهدف اللي كنت عايز اوصله انك تبقي معايا علي طول وبس، عشان نعمل عيله مع بعض ام واب واطفال واتحمل مسؤليه ونبقي زي هاله وفؤاد كده، فكرت بالطريقة دي لما حسيت اني حبيتك بس شكلي غلطان لا انتي بتثقي فيا ولا انا عندي ثقه فيكي برضو،ومدام ما فيش ثقه يبقي ما فيش حاجه اسمها حب اصلا...
جات مشي من قداامه بس مسك ايدها جامد وقال
لما قولتلك قدام هاله اني ناوي اطلقك واتخانقنا بعدها وهددتك وسيبتك ومشيت، رجعت بالليل وانتي كنتي نايمه كنت عايز اصحيكي واقولك اني بحبك وقتها وما كنش قصدي ازعلك كنت عايز احكيلك كل حااجه بس ما كانتش عندي الجراءه اتكلم فكتبتلك كل حاجه جوايا ليكي في كشكول المحاضرات بتاعتك اللي جيبناااه سوا، اتعصبت عليكي واتصرفت بهمجيه شويه لما روحتي لاكرم بس ده لان ما بتحملش تنطقي اسم راجل تاني غيري اصلا، ايوه بغير عليكي وقبل ما نتجوز كمان من اول لحظه شوفتك فيها وانا بقيت افكر فيكي وكل يوم قضينااه سوا كنت بتعلق بيكي اكتر كنت بتعمد اتهددك وابان بتاع مصلحتي عشان تبعدي عني او اقنع نفسي اني مش هحبك بس ما عرفتش ما احبكيش..
_فاقت من ذكرياتها اول ما هاله كانت بتتكلم مع تالا اللي دخلت وقالتلها انها ممكن تنزل تقعد تحت وفي الجنينه بس شهد تفضل محبوسه، اتنهدت شهد بضيق وراحت قعدت علي السرير في الاوضه لوحدها وقالت بدموع لنفسها.
شهد
طلع كدب كل حاجه عشتها معاك يا أسر وحبك ليا كدب، مش هتعشم فيك في اي حاجه تاني لاني متأكده انك هتختارها..
ــــــــــــ #بقلم_الكاتبه_رحاب_القاضي ـــــــــ
ـ وفي مكان تاني هادي جداً كان واقف فايز بعربيته ومشغل موسيقي هاديه ونايم براسه علي الشبااك ومغمض عينيه ، بس فتحها علي طول اول ما سمع صوت عربية أسر بتقرب منه ، وابتسم بحقد ونزل من العربيه ووقف قدام أسر اللي نظراته كانت كلها غضب وقال بجمود
أسر
عايز ايه ؟
فايز طلع سلاحه وحطه في ايد أسر وقال
اقتلني يلا مش انت جايبني مصر عشان كده ما انا مش عبيط ولا ساذج عشان اجيلك برجليا وانا عارف ومتأكد انك عايز تقتلني ، بس انت غبي وطول عمري بقول عليك غبي عشان تاخد حقك بتتصرف بغشوميه مع انهم يا جدع بيقولو ان اخد الحق حرفه
أسر بنفاذ صبر
نتالي فين ؟
فايز
هجيبهالك انا خلاص مش مستفاااد منها في حاجه وزهقت من حبستها عندي ، بس في حاجه صغيره انت هتعملها بكره عشان تاخدها
اسر بقلق
حاجة ايه دي ؟
فايز بخبث
انا عارف ان مراتك البسكوته اللي انت اتجوزتها عند كارم بيهددك بيها عشان تكسب ، بس ده ما يخصنيش انا عايز اكسبك وافوز انا في السباااق ده
ضحك أسر بسخريه وقال
اقسم بالله انت مريض يعني لسه عندك عقده انك بتخسر قدامي ودلوقتي عايز تكسب بأي طريقه ، بس انا بقولك مستحيل يا فايز وانا اللي هكسب وبعد ما هاخد نتالي منك هقتلك بالسلاح بتاعك ده كمان اللي في ايدي وهتشوف
جعه أسر يمشي بس فايز قاله ببرود
انت مستحيل توصل لطريق نتالي ولو قتلتني دلوقتي هي هتموت ، ولو انت كسبت السباااق انا هقتلها انا بنفسي ومش هتعرف توصلني يا أسر
ـ بصله أسر بقلة حيله وهو مش عارف مدي تهور وجنون الشخص اللي قداه وانه ممكن ينفذ اللي بيقول عليه واكتر من كده ، ابتسم فايز بأنتصار اول ما شااف تراجع أسر وقال
فايز
يلا يا حبيبي اقابلك بكره وانت بتخسر يا صديق اخويا المقرب هههههههههه
ـ قال كلامه وسابه ومشي وفضل أٍر واقف مش عارف يتصرف ازاي ولا هيعمل ايه في السباااق بكره وطلع موبيله وبعت لكرام وقاله
اسر
كارم لازم نتقابل ضروري قبل السباااق بكره ضروري يا كاااارم بالله عليك
ـــــــ #بقلم_الكاتبه_رحاب_القاضي ـــــــ
ـ وعدي اليوم وتاني يوم الصبح في بيت الفيومي نزل أسر من اوضته ولقي هاله قاعده بتفطر في ابنها واول ما شافته قالت بحده
هاله
شهد فين يا أسر ؟
اسر بضيق
هرجعها يا هاله اطمني
قامت هاله من جنب ابنها ووقفت قدام اسر وقالت بحده
انت قولت لفؤاد اني كنت اعرف سبب جوازك من شهد في الاول وخبيت عليه ، ما قولتلوش ليه انك كنت مهددني انك هتأذي شهد لو قولتله
أسر
هبقي اقوله انا كنت متعصب والكلام طلع لوحده مني ، وانا دلوقتي مش فاضي لحوراتك انتي وجوزك دي
هاله بحده
يعني هو انت تدمر حياتي وتقولي مش فاضي ، انت بتأذي كل اللي حواليك يا اسر ليه الانانيه دي
أسر
انا مش بأذي حد يا هاله انا محطوط بين نارين دلوقتي يا اختار شهد يا اختار نتالي
هاله بعدم فهم
تختار نتالي ازاي هي مش نتالي ماتت ؟
أسر
طلعت عايشه والكلب الحيوان اللي اسمه فايز بيلعب بيا يا انقذ نتالي يا شهد ، قوليلي اعمل ايه ؟
هاله بخوف
ايه تعمل ايه دي ، انت لازم تنقذ مراتك شهد مالهاااش غيرك يا اسر ومالهاش ذنب تدفع تمن انك تنقذ زفتت الطين دي اللي هي السبب في كل حاجه وحشه بتحصل في حياتك ، هو مين دخلك السباقات والقرف ده وعمل عداوه بينك وبين فايز ده غيرها
أسر بجديه
وانا ما اقدرش اسيبها يا هاله ما اقدرش اخليها تضيع مني بعد ما رجعت تاني ، انا لحد الان مش قادر استوعب انها عايشه نتالي دي اول حب في حياتي اللي كان بيني وبينها مش قليل
هاله بدموع
وشهد هتسيبها ليه هي اللي تدفع تمن اخطاء هي مالهاش ذنب فيها
اتنهد اسر بضيق وقال
مش عارف بس مش هسيبها هي كمان ، انا هتصرف يا هاله وهصلح علاقتك بفؤاد بس اخلص من السبااق ده وكل حاجه هتبقي تمام
ـ قال اسر كلامه ومشي وهاله قعدت وهي مدايقه ومش عارفه تتصرف وخايفه من بعد فؤاد وخايفه برضو عي شهد ، وفي الوقت ده موبيلها رن برقم رحمه فردت عليها وقالت
هاله
الو ايوه يا رحمه معاكي
رحمه
معلش لو بزعجك بس من امبارح بكلم شهد ومش بترد عليا وقلقت عليها ، والجلنف اخوكي كلمه قام عملي بلوك
هاله بتوتر
بصي انا حلفت اني مش هكدب تاني مهما حصل ، وهكلمك بصراااحه شهد اتخطفت بسبب اسر
رحمه
ههههههه قديمه ايه الجو ده يا بنتي انتي ست محترمه وكبيره علي المقالب دي ، فينم شهد بقي ؟
هاله بدموع
لا والله العظيم بكلمك بجد شهد مخطوفه بسبب اسر وما نعرفش هي فين بس اسر يعرف اللي الراجل اللي خطفها
رحمه بحده
الله يخربيت اخوكي يا شيخه ده احنا ما صدقنا البت حالها اتعدل شويه تقوم تتخطف ، انا صاحبتي خطوفه وانا ما اعرفش قوليلي ابن ال... قوليلي اخوكي فين دلوقتي بدل ما لساني يطول وانا مسكااه بالعافيه
هاله
اسر في الشركه بتاعته بصي بلغي اهل شهد خليهم يبلغو الشرطه ما اضمنش اسر بصراحه هيقدر ينقذها ولا لا
ـــــــــ #بقلم_الكاتبه_رحاب_القاضي ــــــــ
ـ وصل أسر بعد شويه الشركه بتاعته وقابله اكرم اللي سأله بقلق
اكرم
ايه يا اسر ما فيش اخبار عن شهد ؟
اسر بضيق
لسه يا اكرم
اكرم بقلق
طيب الراجل اللي اسمه كارم فوق بقاله يجي ربع ساعه مستنيك
اسر
بجد .. طيب كلم البنك وحاول تستعجل في سحب المبلغ يا اكرم ورد عليا..
_وراااح أسر بسرعه مكتبه ولقي كلرم قااعد هناااك، ولما شااف أسر قاله بهدوء..
كارم
قولولي انك مهمل في شغلك هنا وانك افشل مدير مر علي الشركه دي، ليه كده اخص عليك زعلتني..
أسر بجمود
فايز عرف منين ان شهد عندك؟..
كارم
جه وقالي انك هتخسر السبااق وقالي انه مهددك بنتالي فانا كمان لازم اضمن حقي يا أسر، هو شاف شهد عندي وو..
زعق أسر فيه وقال بحده
ما يشوفهااش تاني البني ادم ده. مريض ومراتي مالهاش ذنب في الحكايه دي كلها يا كارم، طلعها بره الموضوع وانا هديك. فلوسك حتي تمن الجايزه..
كارم
ومين. قالك بقي اني عايز تمن الجازه انت لازم تكسب ده اللي الاتفااق اللي انا مرتب اموري عليه..
أسر بعصبيه
فايز بيهددني بنتالي لو كسبت السباااق هيقتلها..
كارم. ببرود
ولو خسرت السباق مش هتشوف مراتك تاني انا ما حدش يزعلني وما اردهااش ليه اضعااف يا حبيبي..
سر بحده
يعني ايه الكلام ده، بقولك بيهددني بـ نتالي لو كسبت السبااق هيقت_لها..
كارم
ما يخصنيش يا حبيبي انت اتفقت معايا وانا مظبط اموري انك انت اللي تكسب..
أسر بنفاذ صبر
طيب طلع مراتي بره الموضوع وانا هتصرف..
كارم ببرود
لا لا انت مش هتتصرف يا أسوره هو انا مش عارفك، شهد.. قصدي المدام هتفضل عندي لحد. ما تكسب السباق ولو ما كسبتش تجيبلي فلوسي كلها بتمن الجايزه عشان تاخد مراتك والا مش هتشوفها تاني لاخر عمرك وبكدا انا بتنازل علي فكره...
_قبل ما يرد عليه أسر دخلت رحمه وهي مقتحمه المكتب بتاعه وقالت بعصبيه وصوت عالي..
رحمه
انت يالااا الكلام اللي اختك قالتهولي ده بجد، شهد اتخط_فت بسببك؟....
أسر بحده
انا مش فايقلك يا بت انتي امشي من هنا دلوقتي..
رحمه بعصبيه
لااا يا عووومررر انا مش همشي غير لما اعرف شهد فين والا وغلاوتها عندي اروح ابلغ عنك وعن الاشكال الوس_خه اللي خطف_وها..
كارم بصلها من فوق لتحت وقال لأسر
ازاي الخمسه سنتي دي مطلعه الصوت ده كله، وليه بتغلط فيا مين الكائن دي؟...
أسر بضيق
سيبك منها وخلينا في اللي بنتكلم فيه يا كارم انا هديك فلوسك والله..
رحمه بحده
وانا والله هديك في وشك يا حلوف انت، انطق البنت فين وحصلها ايه ولا اقولك انت عيل خرع قولي مين اللي خطفها وانا هروح ابلغ عنه ومش هجيب سيرتك واللي خطفها ده يتقبض عليه زي الكلب..
كارم بصدمه
كلب؟!!!...
أسر بغيظ
انتي عايزه تعرفي مين اللي خطفها؟..
رحمه
ايوه طبعاً..
أسر
حلو اووي..
وشاور علي كارم وقال
احب اعرفك كارم سلطان اللي خطف شهد..
_بصتله رحمه بصدمه وكارم رفع ايده وشتورلها وقال بأبتسامه واسعه..
كارم
هاي بيبي..
مسكته رحمه من هدومه وقالت بحده
البت فين ياااه انطق بدل ما اخمس علي وشك...
كارم بقلق
ااا أسر ابعد البتاعه دي عني..
رحمه بحده
عملتلك ايه البنت الغلبااانه دي. عشان. تخطفها حرااام عليك..
كارم ببرود
طيب سيبي الجاكيت اتركمش..
رحمه بحده
وهكرمش وش امك. دلوقتي لو ما قولتش البت فين؟
كارم بهدوء
صاحبتك ولا اختك. دي هترجع بس لما أسر يسمع كلامي، اقنعيه هو صدقيني يا بيبي انا ماليش دعوه..
رحمه. بعدت عنه فجأه وقالت
انا عرفتك. ده. انا حفظاااك. وحافظه كل كلامك...
أسر بصدمه
نعم يا اختي وانتي تعرفيه منين؟..
رحمه
هو مش ده. الجوكر بتاع الافلام الاجنبي وربنا شبهه بس الفرق ان. ده. بكرش دوكا العضمه علي الجلده..
اسر بغيظ
طيب ما اسمعش صوتك تاني...
وبص لكارم وقال
فلوسك اسبوع بالكتير وهتكون عندك..
كارم بجديه
الحل انك. تكسب يا أسر عشان. تاخد مراااتك انا ده اخر كلام. عندي..
_قال كلامه وجه يمشي بس رجع وبص لرحمه وقال بابتسامه واسعه وخبث..
كارم
لينا لقاء مره تانيه يا A fierce girl...
رحمه بحده
مين دي اللي فيرس يااااه؟..
ضحك كارم بهدوء ومشي ورحمه قالت لاسر بخوف
انت سيبته يمشي ليه المفروض كنت عكشته لحد ما يقولنا شهد. فين، وهو عايزك تكسب في ايه عشان يرجعها انا مش فاهمه حاجه..
حط أسر راسه بين ايده وهي قالت بحده
رد عليا انا بكلمك..
أسر
عايزه ايه يا رحمه؟..
رحمه
فين شهد؟..
أسر
عند كارم..
رحمه
طيب وكارم ده ساكن فين قولي وانا هبلغ عنه..
اسر بغيظ
اسكتي يا رحمه واوعي تتصرفي من. دماغك انا هعرف ارجع شهد، المهم ما حدش يعرف حاجه من اهلها..
رحمه بتوتر
هاا اااه ما ينفعش نقولهم عشان ما يقلقوش..
أسر بغيظ
قولتيلهم. يا رحمه صح؟..
رحمه
مم ما هو اختك اللي قالتلي اقولهم واخليهم. يبلغو بس عم صابر لما راح يبلغ قالولو لازم انت كمان تروح تبلغ لانها كانت معاك فهو اكيد هيجيلك عشان ياخدك وتبلغو..
أسر بحده
الله يخربيتك علي بيت اختي علي بيت عمك صابر ده في ليله واحده...
دخل اكرم عنده وقال
أسر البنك رفض وقالو كمان 3 ايام لولا ما نيحب الفلوس..انتي بتعملي ايه هنا يا رحمه؟..
أسر
خدها يا اكرم روحها وانا هروح اجهز للسبااق..
اكرم
طيب انت هتعمل ايه؟..
أسر بضيق
مش عارف بجد مش عارف..
رحمه
انا رجلي علي رجلك لحد ما شهد ترجع..
اكرم
احنا هنيجي معاك ونشوف السباااق وان شاء الله شهد ترجع معانا..
أسر
مااشي يلا بينا..
ــــــــــ #بقلم_الكاتبه_رحاب_القاضي ــــــــ
_ وفي المحل بتاع سعيد كان قااعد. علي مكتبه الصغير وهو مدايق ومش عارف حتي يركز في شغله وكل تقكيره في نسمه وانها بتخونه وعايز يتأكد، وفي الوقت ده موبيل نسمه رن برقم واحده. متسجل اسمها "هبه" ، افتكرها واحده من صحابها وما ردش لحد. ما الرنه خلصت وجات بعدها رساله. من. نفس الرقم محتواها..
"ايه يا نسمه ما جوزك. مرزوع قدامي اهو مطنشاني ليه ومش بنردي عليا كده. هزعل منك."...
_اتحولت ملامح سعيد. للغضب وراااح للمحل بتاع هاني وقفل المحل عليهم ومسكه من هدومه وذقه علي الحيطه وراااح وقال بحده..
سعيد
ايه اللي بينك وبين مراتي يلا يحليك تبعتلها رسابه زي انطق؟
هاني بتوتر
انا مش عارف انت بتتكلم علي ايه؟.
فتح سعيد. الموبيل ورن علي نفس الرقم. اللي جات منه الرساله فموبيل هاني رن برقم نسمه اللي متسجل بـ" الحته الشمال"...
هاني
اهدي كده. بس وانا هفهمك. كل حاجه مراتك هي اللي بترمي نفسها عليا وخد اقري الرسايل اللي بينا وانت تعرف كل حاجه وكمان عندي صور ليها وهي في حضني..
_وفتح هاني موبيله وورااه صورته وهو حاضن نسمه في الشارع وكمان ورااه الرسايل اللي كانت بتبعتها خوف منه وطبعا كان تفسيرها لسعيد مختلف...
هاني بخبث
انا مقدر موقفك بس حط نفسك مكاني انا شااب وعذاابي والاقي واحده ست حلوه وصغيره تفتحلي سكه الشيطان لعب في دماغي وخلاني اوافق بس تقديراً لحالتك وانت قداامي كده انا مش هروحلها تاني ولا هكلمها تاني وهعملها بلوك قدامك. اهو..
بصله سعيد بعصبيه وغضب فقال هاني بسرعه
بس اوعي بقي تعمل حااجه تفضحك او تفكر تشوه سمعتي لان اللي معايا ده يدينك انت ومرااتك والناس مش هتغالطني انا...
_سابه سعيد. وطلع من المحل وبص لبيتهم. بغضب يكفي العالهم وهو بيتوعد. لنسمه بأبشع الجرايم مش عقاااب عادي...
_تفتكرو بقي هيحصل ايه؟..
ــــــــــ #بقلم_الكاتبه_رحاب_القاضي ــــــــ
_ وفي الاوضه اللي قااعده فيها شهد ونتالي دخلت عندهم تالا وقالت بخبث..
تالا
كارم. بيه تحت بيقولكم. انزلو عشان تتابعو معاه السبااق وتشوفو مين اللي هيكسب..
شهد. بخوف ودموع
انا مش عايزه اشوف حاجه..
تالا بحده
هو انتي قاعده في بيت اهلك يا روح امك انتي هنا تقولي حااضر وبس..
_نزلت شهد هي ونتالي اللي كانت هي كمان متوتره وخايفه من اختيار أسر، واول ما شافهم كارم قال..
كارم
يا هلا يا هلا يلا بقي شرفوني واتفرجو معايا وانا جايبلكم لب وسوداني وفشار وكل التسالي اللي هتخلينا نتفرج واحنا مستمتعين، ده اكبر سبااق هيحصل في مصر كلها في أخر فتره والبث ده خاااص بيا انا لوحدي مش هتلاقوه في اي مكان..
_قعدت شهد بعيد عنهم وبصت للشاشه وشافت أسر فعلا وهو واقف جنب عربيته نفس العربيه اللي شافت صورها قبل كده علي اللابتوب بتاعه، ونظلت دموعها وبصت لنتالي اللي كانت برضو بتبص لأسر بكل لهفه واشتياااق... وبعد لحظاات بدأ السبااااق وكان من البدايه أسر فعلا هو اللي متقدم وبدأ الاحبااط. يظهر علي ملامح نتالي علي عكس شند. اللي بدأت تحس بأمان لانه متقدم عن. الكل بفرق كبير وفضل لحد اخر لحظاات وفجأه اترااجع أسر واللي وصل للمكسب فايز...
نتالي بسعاده كبيره
اختارني انا.. أسر اختارني وخلاص همشي من هنا وهشوفه وهبقي معاه..
_بصلهل كارم بجمود وبعدين بص لشهد اللي دموعها نزلت بحزن غطي علي ملامحها وبصت لكارم بخوووف وقالت..
شهد
انتو هتعملو فيا ايه؟..
كارم بسخريه
للأسف اسوأ شعور ممكن اي حد. يحس بيه هو الخزلان من اللي بنحبهم، بس هو ده طبع البشر الخيانه والغدر وان الطيب اللي بيضحي هو اللي يدفع تمن حاجات ما عملهاش يا شهد...
_تفتكرو بقي هيحصل ايه بعد ما أسر اختار نتالي؟..
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله اضغط هنااااااا
تعليقات
إرسال تعليق
فضلا اترك تعليق من هنا