رواية غنوة يونس الفصل الثالث 3 بقلم سلوى عوض (حصريه وجديده في مدونة قصر الروايات)

رواية غنوة يونس الفصل الثالث 3 بقلم سلوى عوض (حصريه وجديده في مدونة قصر الروايات)

رواية غنوة يونس الفصل الثالث 3 بقلم سلوى عوض (حصريه وجديده في مدونة قصر الروايات)

#غنوة_يونس

#بقلم_سلوى_عوض

بارت 3

يتصل الحاج يعقوب بيونس ليبلغه بهذا الخبر السعيد.

الحاج يعقوب: ألو، كيفك يا ونيس أبوك؟

يونس: الحمد لله يا أبوي، كيفكم إنتو وعاملين إيه؟

يعقوب: كلنا بخير ورايقين الحمد لله.

يونس: وكيفها ست الكل؟

يعقوب: مليحة والله يا ولدي،

يونس: وخواتي وحريمهم والبت فريدة 

يعقوب:كله يسلم عليك. أنا بتصل بيك عشان أخبرك بخبر جميل، مرات أخوك حبلى.

يونس: ماهي على طول بتحبل وتخلف، إيه الجديد؟

يعقوب: له، مش صدفة، إنعام مرات عيسى هي اللي حبلى.

يونس: جد يا أبوي؟ والله فرحت جوي جوي، الحمد لله ربنا عوض صبرنا خير.

يعقوب: عقبال جوازك، وأشيل عوضك على يدي، ده كلهم كوم وعيالك انت كوم تاني.

يونس: ربنا يديمك فوق راسنا يا أبوي.

يعقوب: هتاجينا ميته عشان هنعملوا ليلة لأهل الله.

يونس: هفوت بكرة وهآجي بعد بكرة إن شاء الله.

يعقوب: تاجي بالسلامة، أنا هجول لأمك، هتفرح جوي بجيتك، كانك بجيت ولا هلال العيد عنديها.

يونس: ربنا يحفظكم ويخليكم لينا يارب

يغلق يونس الهاتف مع والده ليتصل بهشام، سكرتيره وصديقه الوحيد.

يونس: تعالي يا هشام، عايزك.

هشام: بتتصل بيا وأنا في المكتب اللي جنبك؟ بصراحة أنا مكسل أجيلك، قول عاوز أيه في التليفون.

يونس: اخلص يا ظريف.

هشام: شكلك رايق، إيه؟ في ميعاد مع مزه ولا حاجة؟

يونس: اخلص يا زفت، قولت.

هشام: جاي أهو، أقفل. دايماً مرمطني معاك.

يغلق يونس الهاتف مع هشام، ليقول في نفسه:

يونس: عيل هايف، مافيش وراه غير الحريم.

يدخل هشام.

هشام: خير إن شاء الله؟

يونس: خير يا أخويا، اصرف للموظفين شهر مكافأة.

هشام: ليه شهر بحاله؟ كسبنا صفقة ولا حاجة؟

يونس: لاء، أصل أخويا عيسى جاي له طفل في السكة إن شاء الله.

هشام: بجد؟ ألف مبروك، فرحت له جداً، كان نفسه يبقى عنده طفل. عقبال ما نفرح بيك إنت كمان.

يونس: هو أنا بقيت محور الكون؟ الكل عاوز يفرح بيا. متفرح بنفسك إنت الأول يا أخويا.

هشام: أنا بحب أعيش حر طليق، بلا جواز بلا هم. أنا كده مرتاح. أروح أجيب لنفسي واحدة تنكد على اللي خلفوني؟! روحت فين؟ جيت منين؟ وأنت راجع من الشغل هات معاك جبنة ولبن وفينو، أصلي تعبانة ومعملتش عشا، تعالي خرجني، تعالي فسحني. ولو قولت لها مش فاضي تقلب لي وشها. مافيش أحلى من الحرية.

يونس: يخرب بيتك، كل ده؟ طيب روح يا خفيف شوف شغلك، وشوف لي صفقة الخشب أخبارها إيه؟

هشام: لسه محطوش الأسعار.

يونس: خلي بالك، أنا مسافر البلد وهقعد يومين، يعني تترزع في الشركة وتاخد بالك من أكل عيشك، وياسيدي أجل كل حاجة تخصك لحد ما أجي.

هشام: يعني هقعد يومين من غير معجباتي؟

يونس: هشام، خليك محترم يومين بس.

هشام: أمري لله، سافر إنت يا ريس ومتشيلش هم.

يونس: مالكش دعوة بالموظفات، دول بنات ناس بعيد عنك ومحترمين.

هشام: وهو أنا كلمت واحدة فيهم؟

يونس: أنا مش عاوز أزعلك، إنت عارف إنت عملت إيه.

هشام: والله ما عملت حاجة.

يونس: وبالنسبة لتقى الموظفة الجديدة، مش عارف عملت معاها إيه؟

هشام: يا باي، ديه بت رخمة ودمها تقيل.

يونس: قصدك محترمة.

هشام: ما أنا كمان محترم.

يونس: محترم أوي، رايح تقول لها إن أنا عامل اجتماع في الديسكو الساعة 12 بليل؟

يضحك هشام: ديه طريقة جديدة للشقط؟

يونس: وراس أبويا، لو ما احترمتش نفسك، لأكون معرفك مجامك. أديني جولتلك أهه، اللهم بلغت، اللهم فاشهد.

يضحك هشام: مالك قلبت صعيدي كده ليه؟ يبقا اتنرفزت يا حلو؟ عشان كده العرق الصعيدي طلع؟

يونس: هملني، روح اصرف المكافأة للموظفين.

هشام (متجنبًا يونس): حاضر يا ريس، عن إذنك.

_______________________________________

في منزل غنوة بالصعيد

 كانت غنوة جالسة في غرفتها لتسمع صوت طرق على الباب.

غنوة: خش يا اللي بتخبط.

رُقيّة: أنا رُقيّة يا غنوة.

غنوة: ما تخشي يا حلوة، يعني محتاجة إذن إنتي 

رُقيّة: لسانك طويل جوي.

غنوة: تعالي اجعدي جاري.

رُقيّة: إنتي جاعدة لوحدك ليه؟

غنوة: أصلك الصراحة أمي كانت عاوزاني أعمل الوَكْل، فعَملت حالي عيّانة.

رُقيّة: بت شياطين إنتي.

غنوة: مش أحسن ما أدبّس في الهم ده كله لوحدي.

رُقيّة: تعالي نطلع نجعد برا في الهوا، الأوضة هنا حر جوي.

غنوة: آه الأوضة حر، وبرا هوّا.

رُقيّة: بطلي يا بت.

غنوة: تعالي حتى ننادمو دياب يجعد معانا.

رُقيّة (يحمّر وجهها خجلًا): هو فين؟ صح نفسي أشوفه، ليا يومين ما ريتهوش.

غنوة: يا حنينة يا عيني.

رُقيّة: بطلي بواخة بجى، بكرة توجعي في العشق ونشوفك هتبجي عاملة كيف.

غنوة: بس يا مخبلة، بلا حب بلا كلام فاضي.

رُقيّة: العشق كلام فاضي؟ جومي طيب.

تخرج الفتاتان إلى خارج الغرفة.

فايزة: رَوَّجتي شوية يا غنوة؟

غنوة: لسه يا أما، حاسة حالي تعبانة شوية.

فايزة: خديها يا رُقيّة واطلعوا لبرا.

رُقيّة: حاضر يا خالة.

يدخل دياب فجأة، ليرقص قلب رُقيّة فرحًا.

دياب: إزيك يا رُقيّة؟

رُقيّة: الحمد لله، كيفك إنت يا دياب؟

دياب: بخير، الحمد لله.

فايزة: خد البنات وخليهم يشموا هوّا.

دياب (بفرحة): حاضر يا أما. تعالوا يا بنات.

غنوة (بهمس لرُقيّة): رزقك في رجليكي.

يخرج الثلاثة إلى الخارج.

دياب: تعالوا نجعد تحت النخلة، وأجيبلكم عصير قَصَب.

غنوة: يا أخي، حرام عليك، مفيش غير القصب؟ ناكله ونشربه عصير؟ هاتلنا عصير مانجه، جوافة، أي حاجة غير القصب.

دياب: من عيني. أجيبلك إيه يا رُقيّة؟

رُقيّة: اللي تجيبه كله زين.

دياب: اتعلمي من صاحبتك يا أم الهنا.

غنوة: طاب صاحبتي مخبلة.

دياب: بس يا غنوة، ما تجوليش كده على عروستي.

رُقيّة (مندهشة): بجد؟ بجد هتتجوزني يا دياب؟

دياب: بجد، أمال إيه؟ بكرة نجرى الفاتحة مع خالتي أم رُقيّة.

غنوة: الله الله على الأخبار الزينة، يعني ما جولتليش وخبرت أمك على كده؟

دياب: ما أنتي مفهماش، أنا اللي جولت لأمك تشيع لرقيّة عشان تيجي تجعد معاكي، وبعد كده نخلينا نخرجوا.

غنوة: بجى بترسم وتخطط من غيري؟ ماشي براحتك.

رقيّة: هي أمي عارفة على كده؟

دياب: طبعًا عارفة من عشية.

رقيّة: بس ما جالتليش حاجة.

دياب: جولت نخليها مفاجأة.

رقيّة: أحلى مفاجأة.

غنوة: بت يا رقيّة، أبقي اتعدلي يا بت، إنتي وانتي كيف الغفير مخيمر، لا حُلي ولا طُلي.

رقيّة: تلجاكي متغيظة مني عشان هتتخطب وأنتى لأ؟

غنوة: ده أنا هبجى أخت جوزك وأعرفك شغلك زين.

دياب: ولا تجدري تتكلمي معاها، ده أجطع رقبتك.

غنوة (ممثلة الزعل): من دلوك، من جبل ما تدخلي البيت، هتفرجي بيني وبين أخوي يا جادرة.

رقيّة: والله أزعل منك بجد.

غنوة: له بضحك معاكي يا صاحبتي، ده أنا وانتي هنتفقوا على دياب، صح يا ديبو؟

دياب: بس يا طجطوجة.

غنوة: اسمي غنوة، وبطل تجول طجطوجة ديه، والله أحاربك.

دياب: بجولك يا رقيّة، أوعاكي تحطي أحمر ولا أخضر في وشك، أنا عايزك كده زي الجمر، ما تتبعيش البت ديه.

غنوة: الحق عليا، عاوزاها تنور ووشها يلعلط.

دياب: له هي كده مليحة وعجباني، أطلعي منها انتي بس.

غنوة: وأنا مالي، صح مخيرين مع بعضكم. روح بجى، هات العصير ولا هتجضيها سبيل للغندورة اللي جدامك ديه؟

رقيّة: بكره لما غنوة تعرف العشق، نشوف هتبجى عاملة كيف.

دياب: عشق إيه ده بس يا بت منك ليها؟ إحنا عندينا كده بردك؟

رقيّة (بزعل): كتر خيرك يا دياب، وأنا بجول إنك هتبجى راجلي وعزوتي وسندي وأنا مجطوعة، ماليش حد. يعني اللي بيننا ده مش عشق؟

دياب: له، ما تزعلش يا نَوارة جلبي. أنا قصدي يعني إن غنوة تعشق مين؟ ومين يستاهل خيتي؟

غنوة: يخرب مطنك، كل ما تيجي تكحلها تعميها خالص. جاك روبه كبير وماعرفش تتحَدّتت. وانتي يا ست رقيّة، هو ما يقصدش، هو بس خايف عليا ،طب انتي هو هيجوزك لكن خايف لحسن اعشج واحد ويضحك علي

دياب: أهو هو كده. الله ينور عليكي

غنوة : وعليك روح بجى، نشفت ريق أبويا من الحديت، هات العصير ده، نهار ممعديش.

دياب: همك على بطنك دايمًا. هودي هبابه، هجيب رايح أجيب.

رقيّة: خليك جاعد أحسن، ما عايزنيش حاجة، إحنا تمام.

غنوة: خليكي ف نفسك انتي، أنا عشطانه.

رقيّة: طيب، هتغني ف الفرح؟

غنوة: بس يا فجريّة، أبوي وخواتي ما يعرفوش إني بغني.

رقيّة: ليه يعني؟ ده إحنا هنبجى بنته في بعضينا، وبعدين انتي حسك حلو جوي.

دياب: عارف إنك بتغني، وبسمعك. أبجي غني ف جراية الفاتحة، بس حسك عينك حد من الرجّالة اللي جاعدة يسمع حسك.

رقيّة: هو في حد جاي معاكم؟

دياب: آه، شيخ الجامع وكام راجل من معارفنا، وأنا ومحمد أخوي وأبوي.

رقيّة: تاجو تنوروا الدنيا بحالها.

دياب: تسلمي يا ست البنته.

غنوة: أنا هجوم أروح، ده انتو بجيتو ماسخين جوي. عشطانه يا ناس، أغنيلكوا؟

دياب: تعالوا نروح وازجيكم عصير واحنا مروحين.

غنوة: له، أنا هروح لحالي، جعانة وعشطانة.

رقيّة: والله لو مشيتي لحالك، انتي حرة، مش هعرفك تاني.

غنوة: طيب، قوموا، وانتو عاملين زي جوز الحدادي كده.

دياب: يابت، همّد يدي عليكي، اخشعي بجى شوية.

غنوة (تضحك): خلاص، خلاص.

_____________________________________

(في منزل غنوه كان محمد اخيها يتحدث في الهاتف)

محمد: ألوه، إيه يا فريدة، مروحتيش المدرسة النهارده ليه؟ ده فضلت واقف ساعة عشان تطلعي من المدرسة، كل صاحباتك طلعوا وانتي لأ. وآخر ما زهقت، سألت صاحبتك، جالتلي فريدة إجازة النهارده.

فريدة: معلش يا حمادة، أصل عندنا مناسبة سعيدة عشان كده قولت أساعد معاهم.

محمد: خير، فيه إيه؟

فريدة: أخويا عيسى جايله نونو صغير.

محمد (بفرحة): جد! ربنا يرزقه الذرية الصالحة، عم عيسى راجل طيب ومتواضع جوي. ده ساعات بييجي يقعد معانا في الأرض ونعمله شاي ويشرب معانا.

فريدة: إحنا كلنا ولاد تسعة يا حمادة، والفقر ما يعيبش صاحبه، كفاية أدبكم وأخلاقكم، وعم عياد راجل محترم. أنا بحبه جوي، عشان كل ما يشوفني يديني غزل بنات ويقولي "إنتي كيف غنوة بتي".

محمد: واحنا كمان عندنا مناسبة سعيدة، دياب أخويا هيجرا فاتحة على رقيّة بنت أم رقيّة.

فريدة: ألف مبروك، رقيّة غلبانة وطيبة ويتيمة وقليلة الأخ والاخت.

محمد: احنا هنبجى ناسها وأهلها، عجبال اللي في بالي يا رب، وربنا يقرب البعيد.

فريدة: بس بجى بتكسف انا ، 

محمد:تعرفي، أحسن حاجة عملها أبوي إنه علّمنا أنا وخواتي.

فريده: أكيد، العلم بيدي قيمة للإنسان. 

محمد:أنا جدمت على وظيفة أشتغل فيها عشان أساعد مع أبوي ودياب في مصاريف البيت. انتي عارفة إن الفدانين اللي حيلتنا يادوب معيشينا.

فريدة: إيه رأيك تتحدّت مع عيسى أخويا؟ يكلمك يونس أخويا وتشتغل معاه في الشركة في مصر؟

محمد: أخاف أجوله يكسفني ويردني .

فريدة: كلمة أنت بس، وإن شاء الله مش هيكسفك.

محمد: كلكم طيبين، لكن عم مندوح دائمًا يزعج وجالب خلجته وبيعاملنا كأننا شغالين عنده.

فريدة: سبحان الله، مع إن مرته طيبة جوي، بس هو مندوح كده شايف نفسه فوج الخلج.

محمد: استني أشوف مين بيرن عليّ، خليكي معايا.

فريدة: ماشي.

(محمد يعلق المكالمة ويرد.)

محمد: ازيك يا عم عيسى؟ كيفك وأحوالك؟

عيسى: الحمد لله يا حبيبي، بجولك يا محمد، هنعمل ليلة لأهل الله عشان إن شاء الله جايني عيل مرتي حبلى.

محمد (بفرحة): ألف مبروك، يجي على خير ويتربى في عزكم إن شاء الله.

عيسى: تعيش يا حبيبي. عشان كده عاوزك توقف معايا واحنا بنوزع اللحمة بتاعت الذبائح على الخلج.

محمد: من عيني، حاضر. ميته إن شاء الله؟

عيسى: بكرة بإذن الله. يكون يونس أخوي جا بالسلامة.

محمد: أجيلك على عيني، بس بعد المغرب. هسيبك عشان جراية فاتحة دياب خيي بعد العشا إن شاء الله.

عيسى: ألف مبروك، على مين؟

محمد: رجيّة، بنت المرحوم عبد السلام الكاشف.

عيسى: يا زين ما اختار، بنت أدب وأخلاق. ربنا يتمم على خير وعجبالك إن شاء الله.

محمد: ربنا يبارك في عمرك يا رب، ويجي الجمر ولدك على خير إن شاء الله، ويكون سليم معافى بإذن الله.

عيسى: يسلم خشمك يا محمد.

محمد: أجيك ميته؟

عيسى: بعد صلاة الفجر إن شاء الله. وعلى العصر تروح تشوف حالك، ولا أقولك، أنا هاجي معاكم وأوقف مع دياب في ليلته.

محمد: كتر خيرك يا عم عيسى، طول عمرك صاحب واجب.

عيسى: هجفل أنا معاك دلوقتي عشان أشوف الجزارين وأبيت عليهم.

(محمد يغلق الهاتف مع عيسى.)

محمد: انتي كل ده على الخط، ما قفلتيش؟

فريدة: مش جولتلي خليكي معايا على الخط؟ كنت بتكلم مين كل ديتي؟

محمد: مش هتصدقي، ده عم عيسى خييك

فريدة ترتبك :خير، فيه إيه؟

محمد: مال حسك اتغير ليه؟ ده كان عاوزني أوقف معاه وهو بيوزع اللحمة على الناس عشان فرحة حبل مرته.

فريدة: عقبالنا يا حمادة.

محمد: اللهم آمين. عم عيسى طيب جوي، ده جال إنه هيجي معانا الفاتحة بتاعت دياب أخوي.

فريدة: جد والله؟

محمد: آه والله. تعرفي، لما يجي معانا، هيكبر بينا جوي.

فريدة: انتو كبار بأدبكم وأخلاقكم. أقولك أنا هدحلبه في الكلام واعرف منيه أنه جاي معاي واتحننه اني اروح معاه.

محمد: ياريت، نفسي أشوفك جوي.

فريدة: ما أنا هبجى تحت معاهم وهما بيوزعوا اللحمة عشان أشوفك.

محمد: تمام جوي كده، وأنا هلبس الخلجات اللي على الحبل كلهم عشان تشوفيني مليح.

فريدة: أنا بشوفك بجلبي يا حمادة.

محمد: ربنا ما يحرمنيش منك ولا من قلبك، يا أحلى حاجة حصلتلي.

فريدة: طيب، أجفل بقى عشان الباب بيخبط.

محمد: سلام يا جمر.

فريدة: سلام يا حمادة.

(فريدة تفتح الباب وتجد صدفة أمامها.)

فريدة: خشي يا صدوف.

صدفة: خدي خلي دهبية الصغيرة معاكي على معمل وكل لأنعام.

فريدة: من جلة الشغالين عندنا يعني؟

صدفة: معلش، أصلك عم عيسى موصيني على وكلها وشربها.

فريدة: وانتي ميتة هتاخدي بالك من نفسك؟ طول النهار هالكة نفسك شغل، وتخدمي الكبير والصغير، وموخداش بالك من نفسك خالص.

صدفة: انتي عارفة يا بت عمتي، أنا بحب أعمل كل حاجة بإيدي.

فريدة: والست أنعام هانم هتقعد فوج لغاية ما توضع ولا إيه؟

صدفة: ميجراش حاجة، ادعيلها ربنا يكملها حملها على خير.

فريدة: يارب يكملها حملها على خير. تعالي يا دودو، إحنا نلعب وأسرحلك شعرك وأعملك ديل حصان صغير.

صدفة: عجبال منشيله. عوضك يا رب يا فريدة.

فريدة: ادعيلي أنجح الأول.

صدفة: النجاح والعريس مع بعض.

(تسمع صدفة ممدوح ينادي عليها.)

ممدوح: صدفة!

صدفة: جاية أهه يا ممدوح.

(تنزل صدفة.)

صدفة: خير يا ممدوح، كنت عاوز حاجة؟

ممدوح: تعالي طلعيلي غيار عشان رايح مشوار مع واحد صاحبي.

صدفة: حاضر، من عيني.

ممدوح: فينهم عويلاتك؟

صدفة: دهبية مع فريدة، ومازن ويعجوب الصغير مع عمتي في أوضتها.

ممدوح: هما ناس أنعام مشوا؟

صدفة: أمها قالت لعم عيسى إنها عاوزة تاخد أنعام معاها، وعم عيسى قالها له خليها قاعدة هنا والكل يخدموها، وبعد كده مشوا، وهي جاية بكره بدري عشان الدبيح.

ممدوح: طيب تمام. 

صدفة: هتتأخر برا أنتِ على كده؟

ممدوح: له، هاجي بدري.

صدفه: تجي بالسلامة.

ممدوح: متناميش عشان رايد أتحّدث معاكي في شي مهم.

صدفة: خير، جلجتني.

ممدوح: لما أجي هتعرفي.

يتبع 

تكملة الرواية من هناااااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا