رواية مكتوبة على إسمي( الجزء الثاني) الفصل الثالث 3 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل الثالث 3 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل الثالث 3 بقلم ملك إبراهيم( حصريه وجديده في مدونة قصر الروايات)

#الحلقة_الثالثة

#مكتوبة_على_إسمي

#الجزء_الثاني 

#بقلمي_ملك_إبراهيم

كفايه تواضع يا ميسرة هانم.. اي راجل كان لازم يحسد عزيز علي الجوهرة اللي كانت معاه.. واول لما عرفت ان الجوهرة دي بقت حره.. متردتش لحظة واحدة اني احاول. 

ميسرة بخجل من كلامه: يعني انت كنت تعرفني من زمان؟

مرتضي: من اول مرة شوفتك فيها وانا بحلم باليوم اللي تقعدي فيه معايا ونتكلم مع بعض.. النهاردة اسعد يوم في حياتي. 

ميسرة ابتسمت بخجل وخفضت وشها.. مرتضى بصلها بعمق وقال: ممكن تديني فرصة اعرفك على نفسي ونتعرف على بعض اكتر. 

ميسرة بخجل: اتفضل. 

رواية مكتوبة على إسمي بقلمي ملك إبراهيم.

في المساء. 

داخل شقة علاء و لولا. 

علاء لبس عشان يخرج يسهر مع مختار زي كل ليلة واتفاجئ ب لولا واقفة قدامه: وبعدين يا علاء في العيشة دي!! انت كل يوم هتخرج تسهر وترجعلي وش الفجر.

علاء ببرود: والله هي دي حياتي وانتي عارفه كده من زمان.. ولا نسيتي زمان لما كنت بسهر معاكي لحد الفجر! 

لولا: وانا قدامك اهو.. خلينا نسهر هنا مع بعض لحد الفجر زي ما انت عايز. 

علاء بصلها بعمق وقال بعصبيه: مبقاش ينفع خلاص يا لولا هانم.. الأول كنت بسهر معاكي نتبسط مع بعض شويه واروح علي بيتي.. لكن دلوقتي مبقاش ينفع. 

لولا: هو يعني مينفعش نبقى مع بعض غير في الحرام.. الحلال تعبك للدراجادي. 

علاء قرب منها ومسكها من دراعها بقوة وهو بيقولها بغضب: انتي متنفعيش في الحلال! 

لولا بحزن: انا غلطت وربنا اداني فرصة عشان اتوب وارجع عن الغلط اللي كنت بعمله. 

علاء: تتوبي برحتك بس مش وانتى مكتوبة على اسمي.. انا مبقتش عارف ارفع عيني في اي حد.. شايف كل الرجالة بيضحكوا عليا ويقولوا هو ده المغفل اللي حاسب على المشاريب. 

لولا سحبت دراعها من ايديه وقالت ببكاء: والله العظيم مفيش راجل لمسني من يوم ما اتكتبت على اسمك. 

علاء بجنون: وقبل.. تقدري تقوليلي كام راجل لمسك؟ هتعرفي تعدي كام راجل؟؟

لولا بغضب: هقدر اقولك بس بشرط.. انت كمان تقولي انت لمست كام بنت.. ضيعت مستقبل كام بنت بريئة.. وعدت كام بنت بالجواز وضيعت شرفها وهربت.. الحال من بعضه يا علاء بيه.. بس انا انضف منك بكتير.. على الاقل انا مبخدعش حد! 

علاء رفع ايديه عشان يصفعها بالقلم ولولا مسكت ايديه بقوة ومنعته: ايدك لو اترفعت عليا هعمل فيك محضر تعدي وساعتها هطلق منك واخد المؤخر بتاعي وانت عارف كويس المؤخر بتاعي كام.

علاء نزل ايديه بصدمة وبصلها بغضب وقال: حقك يا لولا هانم.. حقك. 

وخرج من البيت بسرعة وهو مش عارف ازاي هيتخلص من الجوازة دي وغضبه وكرهو ل عامر الجارحي بيتضاعف. 

لولا قعدت مكانها وهي بتفكر في علاقتها ب علاء ومش عارفه تعمل إيه عشان ينسى الماضي ويبدأ معاها من جديد.. هي عرفت قيمة الحلال ومش عايزة ترجع للحرام تاني. 

اتصلت بواحدة صحبتها هي اللي معاها كل اسرارها وحكتلها عن كل اللي بيحصل معاها هي وعلاء واتكلمت صحبتها بجدية وقالتلها نصيحتها: لازم تربطيه بيكي اكتر يا لولا.. مش كفايه عقد الجواز.. لازم تربطيه بالعيال. 

لولا بدهشة: يابنتي بقولك هو اصلا مش بيقرب مني!! 

صحبتها: بس قولتي انه بيرجع بالليل متأخر وشارب ومش شايف قدامه.. هو انا اللي هفهمك تعملي ايه يا لولا! ده جوزك وحلالك دلوقتي ولازم تربطيه بيكي اكتر حتي لو ب عيل واحد. 

لولا بتفكير في كلام صحبتها: عندك حق.. انا خلاص عرفت هعمل ايه. 

وقفلت لولا المكالمة وهمست بإصرار:انا مش هرجع لحياتي القديمة دي تاني يا علاء ويا انا يا انت. 

رواية مكتوبة على إسمي بقلمي ملك إبراهيم. 

في البلد عند عم آيات. 

الحاج إسماعيل كان قاعد هو وفارس ابنه بيتكلموا ووالدة فارس بتعملهم الشاي. 

الحاج إسماعيل: هدير خطيبتك عامله ايه يا فارس؟ بتكلمها تطمن عليها؟ 

رد فارس: طبعا يا ابويا بكلمها كل يوم اطمن عليها.. هي عايشه في شقة قريبه من الجامعة مع بنات محترمين وبيدرسوا معاها. 

الحاج إسماعيل: ربنا يوفقها يا بني ويصلح حالكم.. التعليم بينور العقل يابني اوعاك تحرمها تكمل تعليمها للاخر. 

فارس بأبتسامة: متقلقش يا أبويا انا مستحيل اعمل كده وان شاء الله مش هنتجوز قبل ما هدير تتخرج. 

ردت والدة فارس وهي داخله ومعاها الشاي: انا مش عارفه لازمته ايه كل ده.. دي بهدله للبنات علي الفاضي.. البنت ملهاش الا بيت جوزها.. مش كفايه آيات اللي بتروح الجامعة وهي حامل.. دا انا قلبي كل يوم يوجعني عليها وبدعيلها في كل صلاة . 

رد الحاج إسماعيل: قلبك يوجعك عليها ليه.. آيات مع جوزها وهو بيحبها وبيخاف عليها وانا مطمن عليها طول ما هي مع عامر. 

اتكلم فارس: جوز آيات راجل وابن حلال ومش هقدر انسى اللي هو عمله في ارض عمي لما صمم ان ابويا هو اللي يستلم الأرض وحط فلوس الأرض في حساب آيات وفهمها انه اشترى الارض وهي متعرفش ان الارض لسه بأسمها.

الحاج إسماعيل: انا من اول مرة شوفته فيها وقولت ان هو ابن حلال وربنا يهدي بنت عمك. 

فارس ابتسم وقام وقف وقال: انا هقوم أكلم هدير كده اطمن عليها. 

قام فارس وابتسمت والدته وقالت: مش لو كانوا اتجوزوا وفرحونا. 

رد الحاج إسماعيل: ملناش دعوة يا ام فارس.. سيبيهم يقرروا حياتهم برحتهم. 

ام فارس حطت ايديها على قلبها بتعب والحاج اسماعيل سألها بقلق: مالك يا حاجة شكلك تعبانه اليومين دول. 

ردت بتعب: مش عارفه يا حاج بقالي كام يوم بحس بنغزه في قلبي كده. 

الحاج اسماعيل: طب قومي ارتاحي شويه ولو حسيتي بالتعب اكتر ناخدك للدكتور. 

ام فارس هزت راسها بالايجاب وقامت وقفت بتعب ودخلت اوضتها عشان ترتاح والحاج إسماعيل بص عليها بحزن وهو بيفتكر كلام الدكتور من سنين لما فارس اتولد وقالهم انها مش هتقدر تخلف تاني لان قلبها تعبان وعرف الحاج إسماعيل انها كل ما هتكبر في العمر هتتعب اكتر وحالتها هتسوء. 

رواية مكتوبة على إسمي بقلمي ملك إبراهيم. 

في مكان مخصص للسهر. 

علاء ومختار كانوا قاعدين جنب بعض وبيشربوا وسكرا"نين. 

اتكلم مختار وهو بيبص قدامه وكان بيشرب من الكاس: عامر الجارحى هيستلم مشروع كبير اوي الأيام الجايه.. لو استلم المشروع ده يبقى الله يرحمنا. 

رد علاء: خليه هو كده يكبر شغله ويكبر اكتر وإحنا قاعدين نندب حظنا! 

ظهر شاب فجأة وراهم واخد كاس من قدامهم وقال: يبقى لازم نحط أيدينا في ايد بعض عشان نقضي عليه. 

علاء ومختار بصو له بدهشة والشاب قعد جنبهم وقال: بيقول عشان تحارب عدوك لازم تتعاون مع كل اعدائه وانا لما سألت عرفت ان مفيش اتنين بيكرهوا عامر الجارحى قدكم. 

مختار بقلق: وحضرتك تبقى مين ؟

ابتسم الشاب بثقة وشرب من الكاس وقال: أمير عزيز المحمدي. 

........ 

بعد مرور اسبوع. 

عند آيات وعامر. 

آيات كانت قاعدة بتذاكر وعامر بيشتغل علي اللاب بتاعه ومركز في شغل مهم وآيات زفرت فجأة بغضب وقالت: انا مش عايزة ادرس هندسة دي طلعت صعبة آوي. 

رد عامر وهو بيبص في اللاب: مش صعبة ولا حاجة انتي بس محتاجة تركزي شويه. 

آيات وقفت قدامه وقالت بغضب: قصدك ان انا مش بركز ومش هعرف أنجح في الكلية دي صح ؟

عامر بصلها بصدمة وقال: بس انا مقولتش كده! 

ايات بعناد: بس انت تقصد كده.. وبعدين انت عارف انا مش قادرة اركز ليه؟ عشان انا حامل يا باشمهندس والمفروض انك بابا الطفل إللي أنا شايله مسؤليته لوحدي والطبيعي إنك تساعدني وتذاكرلي عشان انا بفهم منك انت اكتر من اي حد تاني لكن انت مش مهتم بيا ابدا وكل تركيزك واهتمامك ب شغلك وبس وانا اخر اهتمامتك!! 

عامر قفل اللاب وقالها: آيات حبيبتي هو الحمل بيقلب معاكي بفقدان ذاكرة ولا ايه!! مش انا قولتلك أساعدك في مذاكرتك وإنتي رفضتي وقولتي انك فاهمة كل حاجة ومش محتاجة مساعدة! 

ردت آيات: اه انا مش محتاجة مساعدة بس محتاجة اهتمام.. محتاجة احس اني مهمة في حياتك.. شوف شريف بيعمل ايه مع هاجر واتعلم منه.. شريف كل يوم يتصل ب هاجر بالساعات ويفضلوا يتكلموا في التليفون طول الليل ويقولها كلام حب! 

عامر: طب دول مخطوبين وطبيعي يتصل بيها ويقولها كلام حب.. انا بقى اتصل بيكي ليه يا حبيبتي وانتي قدامي اهو وبقولك كل كلام الحب وانتي قدامي. 

آيات: لا طبعا المشاعر بتكون مختلفه بين المخطوبين والمتجوزين وانا من حقي اعيش مشاعر المخطوبين دي! 

عامر: ااااه هي هبت معاكي.. آيات هو انتي مش ناويه تولدي بقى وتخلصيني من الجنان ده! 

آيات شهقت بصدمة: انا مجنونه. 

عامر: لاااا دي هبت خالص انا خارج تكوني خلصتي برحتك. 

وقرب عامر من باب الشقة واول لما فتح لقى كوكو وميرنا في وشه: عااااامر احنا رجعناااا.

عامر رجع ل ورا بصدمة وقال: انتوا إيه اللي رجعكم. 

ميرنا وكوكو دخلوا الشقة وعامر واقف وآيات دخلت اوضتها بسرعة تلبس اسدال وتغطي شعرها وميرنا وقفت قدام عامر بحماس : دي كانت أجمل رحلة اطلعها في حياتي.. شكرا يا عامر. 

واتكلم كوكو بحماس: ايه رأيك في الأوت فيت بتاعي انا اشتريته من باريس. 

آيات خرجت من الغرفة وهي لابسه اسدال الصلاة وميرنا جريت عليها: ايااااات وحشتيني. 

وضمتها وآيات كانت مستغربه وابتسمت لها بمجاملة. 

كوكو كان واقف قدام عامر ولسه هيجري علي آيات ويعمل زي ميرنا لكن عامر مسكه من لبسه وقاله: انت رايح فين؟

رد كوكو بصوته الناعم: هسلم علي آيات.. انا خلاص بقيت بحبها عشان هي هتجيب لنا بيبي. 

عامر: بتحب مين اتظبط بدل ما اظبطك انا وبعدين ايه هتجيبلنا بيبي دي انت مالك اصلا! 

رد كوكو: ايه ده انت مش هتسمي البيبي كوكو!

آيات شهقت بصدمة وعامر اتكلم بغضب: بقى أبني انا هيبقى كوكو!! انتوا ايه اللي جابكم هنا؟

ردت ميرنا: اومال انا هروح فين يا عامر!! انت عارف ان بابا اتسجن ومبقاش عندي بيت !

عامر بصلها وكوكو اتكلم بعصبيته الناعمه: متقولش اخدها تعيش معايا في بيتي انا زهقت وعايز اعيش في بيتي برحتي.

عامر: تعيش في بيتك ازاي لوحدها وهي بنت وانت..!!

سكت عامر وهو بيبصله وقال: مش عارف احدد نوعك ايه بس مينفعش تعيش معاك ومينفعش تعيش لوحدها!

اتكلمت آيات بعد تفكير: ممكن تعيش في شقة البنات مؤقتا.. هما رجعوا يعيشوا في الشقة عشان الجامعة. 

عامر بصلها بتفكير وقال: والبنات هيوافقوا؟

ردت بتردد: مش عارفه بس انا ممكن اكلمهم.

وبصت ل ميرنا وقالت: المهم ميرنا هتوافق تعيش معاهم.. هما نفس البنات اللي كانوا معايا لما ميرنا خبطتنا بالعربية زمان لو تفتكر!

ميرنا بصت ل عامر بتردد واتكلم كوكو: اه هتوافق طبعا المهم متجيش تعيش معايا في بيتي!

اتكلم عامر مع كوكو: طب ما تيجي اجوزكم لبعض وخلاص يا كوكو.

كوكو بصدمة: جواز ايه!! انا كوكو اتجوز ميرنا الفقيرة بنت عزيز المسجون.

ميرنا صرخت في كوكو: كوكو عيب تقول كده.

كوكو: سوري يا ميرو بس مفيش حد هيوافق يتجوز بنت فقيرة زيك وكمان بنت عزيز المسجون.

ميرنا بصت قدامها بحزن وعامر زعق في كوكو وقال ل ميرنا: طب ممكن نتواصل مع اخوكي وتسافري عنده يا ميرنا إيه رأيك؟

ردت ميرنا بحزن: أمير بقاله فترة كبيرة مش بعرف اتواصل معاه ومعرفش عنه اي حاجة!

عامر: انا هعرف أوصله واحسن حل دلوقتي انك تعيشي مع البنات اصحاب آيات في شقتهم لحد ما اوصل ل اخوكي.

ميرنا هزت راسها بحزن وكوكو قعد براحة وقال ل آيات: انتي هتفضلي واقفه كده مش هتقدميلنا حاجة ناكلها؟

ردت آيات: قصدك حاجة تشربها! 

كوكو بصراخ: انتي مش عايزة تأكلينا في بيت عامر كمان!! دي فلوس عامر مش فلوسك انتي يا فقيرة زي ميرو. 

عامر قرب من كوكو ومسكه من لبسه: انت بترفع صوتك علي مراتي كمان.

كوكو: انت اتجوزت البنت الفقيرة دي ليه يا عامر.. انا ممكن اجوزك شيري صحبتي هي غنيه وعندها فلوس كتير وانت عجبتها يوم خطوبتك انت وميرو وكانت هتتجنن عليك. 

شهقت آيات بصدمة: ومين شيري دي كماااان! 

عامر مسك كوكو من لبسه وكأنه ماسك فار وخرجه برا الشقه وقاله: روح على شقتك بقى هتوديني في داهية. 

كوكو اتكلم وعامر بيسحبوا ل برا الشقة: اسمعني بس يا عامر دي شيري زي القمر ووو..... 

عامر خرجه بسرعة قبل ما يكمل كلامه وقفل الباب وبص وراه شاف آيات واقفه تبصله بغضب وتوعد وميرنا قاعده تبكي... بصلهم الاتنين وحط أيديه علي وشه بتعب وقالهم: انا لازم انزل ضروري عندي شغل مهم وعشان انتوا تقعدوا برحتكم. 

آيات بصتله بغيظ: تروح فين يا حبيبي قبل ما تحكيلي حكاية شيري هانم اللي هتتجنن عليك! 

رد عامر عليها وهو عارف ومتأكد ان الليلة كلها هتبقى نكد: شيري ايه بس يا حبيبتي انتي هتصدقي المجنون ده!! انا معرفش بنات بالأسم ده اصلا! 

آيات شهقت بصدمة: وايه بقى اسماء البنات إللي حضرتك تعرفهم؟؟

اتكلمت ميرنا وهي بتبكي: سيبكم من شيري دلوقتي وفكروا في حل ل مشكلتي.. انا مش هعرف اعيش في الفقر مع اصحاب آيات اكتر من يومين!!.. 

وبصت ل عامر وقالتله برجاء: عامر ارجوك انت لازم تساعدني.. حاول توصل لاخويا أمير وعرفه اني لازم اسافر عنده واعيش معاه. 

عامر هز راسه بتفهم وقال: حاضر يا ميرنا متقلقيش انا هحل الموضوع ده. 

وبص ل آيات وقالها: آيات لو سمحتي كلمي البنات عرفيهم ان ميرنا هتعيش معاها في الشقة كام يوم بس وانا هنزل اوصلها دلوقتي . 

ردت آيات بغيظ: حاضر يا حبيبي هكلمهم واجي معاك نوصلها واحنا راجعين نبقى نكمل كلامنا عن شيري هانم. 

عامر هز راسه بقلة حيلة وهمس لنفسه: ربنا يستر. 

...... 

بعد مرور اسبوع.. 

في الجامعة عند آيات. 

آيات كانت في الحمام وقبل ما تخرج سمعت صوت بنت بتتأوه من الالم.. آيات قلقت عليها وخبطت علي باب الحمام تسألها بقلق: انتي كويسه؟ 

خرجت البنت من الحمام ووشها كان اصفر وبتتألم وآيات اتكلمت معاها بقلق: انتي شكلك تعبانه اوي! 

البنت بتعب: بطني بتوجعني اوي ممكن تساعديني.

آيات بقلق: حاضر بس اساعدك إزاي اجبلك مسكن ؟

البنت وهي بتتألم: لا مش هينفع اخد مسكن.. اصل انا حامل. 

آيات ابتسمت لها وقالت: اااه فهمت.. طب انا معايا مسكن الدكتور بتاعي هو اللي قالي عليه.. انا كمان حامل على فكرة. 

البنت بصتلها وسألتها بتوتر: انتي متجوزة ؟

ردت آيات: ااه طبعا متجوزة. 

البنت بكت وآيات بصتلها باستغراب وسألتها: تحبي اخدك للدكتور بتاعي لو حاسه انك تعبانه اوي؟

ردت البنت ببكاء: لا كفايه اخد مسكن من اللي معاكي وهبقى كويسه. 

آيات فتحت شنطتها وادتها قرص مسكن والمايه ووقفت معاها لحد ما البنت اتحسنت وشكرتها بأبتسامة: شكرا لأنك ساعدتيني.

آيات بأبتسامة رقيقه: الف سلامة عليكي ولو احتاجتي اي حاجة انا موجودة. 

البنت هزت راسها بأبتسامة وآيات رجعت عند زمايلها عشان تحضر المحاضرة وبعد خروج آيات من الحمام البنت ابتسمت بمكر واتكلمت في التليفون مع شخص وقالت: خلاص قابلتها وشكلها سهلة مش هتتعبنا... بقلمي ملك إبراهيم.

...يتبع 

ثلاثي الشر أمير ومختار وعلاء اتعاونوا مع بعض وعامر ميعرفش الضربه هتجيله منين 💔💔

تكملة الرواية من هنااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول من هناااااااااا

الرواية كامله الجزء الثاني من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا