رواية سر زائرة الجبل الفصل الخامس 5الاخير بقلم زهرة الربيع (حصرية وجديدة في مدونة قصر الروايات)

رواية سر زائرة الجبل الفصل الخامس 5 الأخير  بقلم زهرة الربيع (حصرية وجديدة في مدونة قصر الروايات)

رواية سر زائرة الجبل الفصل الخامس 5الاخير بقلم زهرة الربيع (حصرية وجديدة في مدونة قصر الروايات)

#الحلقه_الأخيره🌹البنت مجنونه اخوها ميت ولسه بتشوفه وبتكلمه انتو مجانين دي لازم تتعالج و

بس قطع كلامو لما سمعو صوت شهقه التفتو وراهم وشافو رحيل واقفه بصدمه ووقعت الحاجات اللي اشترتها من ايديها

 جاسم بلع ريقه بتوتر وحزن ورحيل بصتلو بصدمه ودموعها بتلمع في عيونها وقالت...انت ..انت بتقول ايه....انت فاكرني مجنونه ....لجل كده ده رايح جاي وراي 

جاسم اتنهد وبصلها بحزن وقال....رحيل خلينا نتكلم ارجوكي 

رحيل قربت عليه بغضب شديد وقالت بحده..احنا مفيش بينا حديت واصل...انت اللي لازم تتعالج...لما تصدق كام كلمه سمعتهم من ناس البلد عني وتتجاهل كل كلامي ليك والي شوفتو بعنيك تبقى انت اللي محتاج علاج

جاسم اتنهد وقال...رحيل ارجوكي انا محتاج اشرحلك لو سمحتي اسمعيني

رحيل قالت بغضب وزعيق.... مسمعاش حاجه روح من هنه يلا امشي من قدامي

جاسم لسه هيتكلم عمها دفعه وقال بغضب..قالتلك امشي روح بدل ما اديلك عيارين في نص راسك

رحيل بصتلو وهزت راسها بحسره وخيبة امل ودخلت البيت بدموع وهو كان بينادي وبيقول..رحيل لازم نتكلم..يارحيل انا عايز مصلحتك ارجوكي...رحيييل

عمها بقى يدفعو بغضب وجيه احمد جري وقال..فيه ايه يا راجل انت ابعد عنه..يلا يا جاسم يلا

جاسم قال بسرعه..لا يا احمد انا لازم اكلمها زعلانه مني لازم افهمها ...رحيييل..

مختار بص لاحمد وقال بغضب..خد صاحبك وعاودو بلدكم ..لو عايزين تعاودو على رجليكم

قال كده ودخل البيت واحمد قال بقلق وزعيق...طبعا هنعاود على رجلينا امال هنرجع على ادينا يعني ...ده ايه التهديد الهابط ده

وبص لجاسم وقال ...مبسوط لما قلنا تعاودو على رجليكم عاود قدامي قصدي امشي قدامي هنتعدي من كلامهم ده يلاا

واخدو ومشي بيه بالعافيه

عند رحيل كانت بتبكي جامد ومرات عمها هنيه قالت..يا بتي خلاص عمك لو سمع صوتك وسأل نقولو ايه.. هنقولو بتبكي عليه ليه عاد

رحيل بصتلها بدموع وقالت ....كنت فكراه ...كنت فكراه ممصدقش الناس وكلامهم يا مرت عمي.... معقوله شايفني مجنونه...ده انا خليتوا قابل طاهر واتحدت معاه كمان ده انا معملتهاش مع اي حد 

مرات عمها اتنهدت بحزن وقالت...معلش يا بتي اكيد من كلام الناس فاكر ان اللي شافوا هناك مش اخوكي متزعليش روحك يا رحيل ...ومتفكريش في حد مش من توبنا يا بتي..وخليكي مع اللي شاري ومهاممهوش ايا كانت حكايتك

رحيل بصتلها بدموع ومرات عمها كملت وقالت... انتي ذكيه واكيد فهمتيني يا رحيل الجدع ده بيتسلى مش اكتر....بيقضيلوا يومين مختلفين مع ناس مختلفين وبكره يعاود بلدو وينسى ..انتي كمان لازم تنسي و تحطي عقلك في راسك وتعرفي مصلحتك

رحيل مسحت دموعها وقالت بألم...معاكي حق يا مرت عمي....هو فعلا بيتسلى..بس الحق مش عليه انا اللي حلمت احلام كبيره قوي ..وهتفضل احلام مهما عشت فيها...اطلعي.. اطلعي قولي لعمي اني موافقه على الجواز ..هتجوز وهدان 

سر زائرة الجبل بقلم...زهرة الربيع

عند جاسم كان رايح جاي بغضب وبيقول...اغبيه متخلفين فاكرين كده بيحموها معندهمش مشكله تفضل مريضه ومغيبه المهم ميتقالش عنها مريضه من امتى  المرض بقى عيب مش فاهم الناس دي بتفكر ازاي 

احمد كان حاطط ايده على خده بزهق وقال..ملاحظ ان بقالك ساعه بتلف وتدور وتقول نفس الكلام ....ممكن تهدى بقى وتفهمني فيه ايه لاني جبت اخري...يكون في علمك انا جهزت شنطي وراجع القاهره ولو مجتش معايا هكلم والدتك و

بس جاسم قاطعو وقال بحزم...هرجع معاك...اصلا لازم ارجع كفايه اوي كده

عند رحيل قامت زي العاده وهتطلع الجبل بس كان جاسم مستنيها وطلع وراها ومسك ايدها بسرعه

كانت هتصرخ بس حط ايده على بقها بسرعه وقال...ده انا يا رحيل اهدي

رحيل غمضت عيونها بارتياح بس دفعتوا بغضب وقالت..انا مش قولتلك الصبح معوزاش اشوف خلقتك تاني

جاسم قال بسرعه.....كده يا رحيل مش عايزه تشوفيني من غير حتى ما تقبلي تسمعيني ...ده انا لو دعبس كنتي عبرتيني شويه

بصتلو بضيق ومشيت خطوات بس جري مسك ايدها وقفها وقال...استني هنا انا مش بكلمك

رحيل دفعت ايده وقالت...متلمسنيش وعاود احسنلك بعد كلامك الماسخ اللي قولتو الصبح مبقلناش كلام مع بعض 

جاسم اتنهد وقال .....انا قولت ايه زعلك اوي كده

رحيل قالت بسرعه واندفاع...قولت ايه.... انا مجنونه ولازم اتعالج يا جاسم ..انت....انت لجل كده رايح جاي وراي ...وانا اللي فكرت انك بت...

بس قطعت كلامها لما خدت بالها للي كانت هتقولوا

جاسم ابتسم وقرب منها وقال..افتكرتي..ايه..كملي

رحيل بلعت ريقها بتوتر وقالت...ولا حاجه هملني عايزه ارجع بدري ...عمي وصاني يلا حل عني 

انا اصلا خلاص مبقاش ينفع اتكلم وياك واصل...لاني هبقى على زمة راجل وله كرامتوا حتى في غيبته

ولسه هتمشي وقف قدامها بسرعه وقال..تبقى على زمة راجل يعني ايه..مش فاهم

رحيل قالت بسخريه... ولو ان كلامي ممحتاجش شرح لكن نفهموك يا ولد البندر...الريس وهدان اتقدملي وانا وافقت وهنكتب الكتاب السبوع ده فهمت كده

جاسم بصلها بعضب وقال..انتي عبيطه يا رحيل..يعني انتو البنات امتى هتبطلو قلة العقل دي الواحده تتخانق مع حبيبها تروح توافق على اول واحد يتقدملها... اي هطل وخلاص

رحيل قالت بغضب...دول البنات اللي عندهم حبيب لكن انا معنديش وحرة نفسي 

جاسم قال بغضب.... لا مش حرة نفسك...وعندك حبيب..وبيعشقك كمان....انا...انا بحبك يا رحيل

رحيل اتسعت عنيها بزهول من اعترافو الصريح 

وجاسم اتنهد وقال...انا وقعت في عشق عيونك من اول ما لمحتهم ..رمشك رما سهامو يا بنت الجبل..وانصاب القلب في غرامو واتقتل

رحيل بقت تبصلو بتوهان وقلبها بيدق بسرعه ولمعت عيونها بالدموع وظهرت ابتسامتها لا اراديا...بس اختفت بسرعه لما افتكرت كلامو اللي قالو الصبح وقالت..وانا معيزاش الحب ده..اللي يشوفني ناقصه ويصدق عليا اي كلام يبقى ميستاهلنيش عاود بلدك متتعبش روحك

جاسم قال بسرعه..انا هعاود...بس مش من غيرك يا رحيل ..هتيجي معايا انا مستنيكي علشان اخدك.... واحمد مستني بالعربيه قريب هنهرب من هنا ولما امنلك مكان نتكلم على راحتنا ونتفاهم

رحيل بصتلوا بزهول وضحكت بخفه وقالت..انت بتشرب حاجه ولا ايه...انا عارفاها الدماغ دي... روح يا جاسم ارجع طس وشك بشويه ميه وخدلك نومه ربنا يهديك... عمي حاطط عينو علي اليومين دول ولو شافك مهيحصلش طيب

جاسم قال بضيق ...انتي فكراني بهزر ...يلا بقولك هنمشي مفيش وقت

رحيل قالت بضيق..... يوووه..انا غلطانه اللي بسمعك شكلك فاضي وعايز تتسلى  كيف ما قالت مرت عمي

ومشيت خطوات بس اتجمدت مكانها لما قال بسرعه ...طاهر معايا في العربيه ومستنيكي هنهربه ...بس مش عايز يمشي من غيرك ابدا 

سر زائرة الجبل بقلم زهرة الربيع

على بعد مسافه كان واقف وهدان وشايفهم وضم ايده بغضب وعمل مكالمه وقال..ايوه يا حج مختار ..كيف ما قولت بردك طلع وراها تاني...واقف بيتحدت وياها ...انا خلاص موافق على الي قولتهولي الرجاله معاي هستناك  تاجي وهنعلموه الادب المظبوط ..انا مكنتش عايز الأذى بس الظاهر انو مهيحلش عنها غير لو اتربى

عند رحيل رجعت لجاسم  بلهفه وقالت....انت..انت قولت ايه ...كيف يعني طاهر وياك

جاسم قال بتوتر...اصلي جيت اهربه وهو اصر ناخدك معانا ...علشان كده انا جيت لعمك الصبح وقلتلوا الكلام اللي سمعتيه كنت فاكره ميعرفش ان طاهر حي فقولت يمكن يسمحلك تسافري معايا تتعالجي

رحيل قالت بزهول...ميعرفش كيف ده عمي امال بيخليني اروحلو كل ليله ليه مش تفكر بعقلك شوي

جاسم قال بتوتر...مهو مهو معنديش حل تاني يا رحيل اعمل ايه ...اخوكي مش عايز يمشي من غيرك.. يلا بس اتأخرنا ونتكلم على الطريق

رحيل فرحت جدا وقالت.... طيب يلا يلا انا هكلمه

ولسه هيتحركو اتفاجأوا بوهدان ورجالتو حاوطوا المكان من كل جهه 

وكمان مختار عمها  جيه معاهم  وهو بيقول...منور الجبل يا ولد البندر

رحيل خافت قوي على جاسم وهو بصلهم بقلق وقال بهمس ..احم...ياريت تغمضي عينك

رحيل قالت باستغراب..ليه يعني

جاسم قال بسرعه...علشان متشوفيش اللي هيحصل شكلي هتروق مش عايز صورتي تتهز في نظرك

بس لما قربو منو وكانو كتير قال بتوتر..يعني ده لو فضلت صوره اصلا

رحيل وقفت قدامو وقالت..خليك مكانك يا جدع انت وهو محدش يقربلوا....وبصت لوهدان وقالت بغضب ...فيه ايه يا وهدان هنضربو راجل ضيف عندينا ولا ايه

وهدان لسه هيتكلم بس عمها قال بغضب...تعالي هنه يا رحيل متدخليش في الموضوع ده 

رحيل قالت بتوتر..عمي هو..احم هو جاي عشان طاهر و

بس قاطعها عمها لما قال بغضب...بلا طاهر بلا هباب منقصاش جنان... تعالي هنه

رحيل اتنهدت ولسه هترحلو بس جاسم  مسك ايدها وقال بحزم..رحيل مش هتتحرك من هنا انا هسفرها معايا...لو على جثتي

وهدان قال بغضب..على جثتك....وهو كذالك مدام انت رايد كده

 وبص لرجالتو بطرف عينه هجموا كلهم على جاسم ونزلو فيه ضرب بكل قوتهم وكانو كتير جدا مبقاش ملاحق عليهم ابدا

رحيل صرخت باسمه  ولسه هتقرب وهدان جري عليها مسكها من ايدها بيمنعها 

رحيل بقت تصرخ وتضربو وتحاول تفك ايدها منو وهيه بتبكي جامد وبتقول..هملني ...هملني يا وهدااااان حرام عليك...حرام سيبووووه....حرام عليكم بقى ...كفايه 

بس مكانش حد بيسمعها وبيضربوه بطريقه مرعبه 

رحيل وقعت على ركبها على الارض بتعب وهيه شايفاه بينز،،ف وبيضربوه برجليهم بقوه 

جاسم فضل يبصلها من بين رجليهم وابتسملها وهو بينز،،ف بالم

رحيل بصت لعيونه ولقتو بدأ يدوخ وهيقفلهم 

وجات قدامها ذكرى مؤلمه جدا لاخوها وقت ما اتصاب وغاب عن الوعي قدامها بنفس الطريقه  وحاولت تخليه يفتح عيونه بس مات بين اديها

هنا هزت راسها بالرفض وصرخت بكل قوتها وقالت..لاااااه...لاااه مش انت كمان لاااااه...هملوووه 

ودفعت وهدان بقوه شديده صدمته لدرجه انه كان هيقع وجريت عليهم بقت تدفعهم بعيد عنه وقعدت على الارض وضمت جاسر بقوه وقالت وهيه بتترعش..محدش هياخدك مني لااااه.. لاه متسبنيش انت كمان....انا ...انا ماصدقت لقيت رفيق....متسبنيش يا جاسم معنديش غيرك...قوم يا ولد البندر...قووم يا ضي عيني...قوووم اوعى تهملني انت كمان وبقت تبكي بانهيار شديد بطريقه صدمت الكل

جاسم بصلها بتوهان وتعب وكان نفسو يضمها ويهديها ويطمنها انو معاها بس حرفيا مش قادر يتحرك ابدا

وهدان بقى يبصلها بزهول وصدمه وقال..رحيل....رحيل بتعملي ايه انتي...

رحيل قاطعتو وقالت ببكا و صراخ...انا ريداه يا وهدان عشقاااه...ولو حصلتلو حاجه مش هرحم حد....مش ...مش ههملكم تعيشوا بعد ما تاخدو مني كل حاجه فضلالي

وبقت تضم جاسم اكتر وقالت بدموع وجنون ..انت معاي..محدش هيقربلك ...ماشي متخافش محدش هيأذيك...هحميك..هحميك  كيف ما حميت طاهر هما..هما كانو..كانو هياخدو مني طاهر قدام عيوني كده بس لا لا مخلتهمش ...مخلتهمش وهخبيك انت كمان منهم... انت هتفضل معاي في عيوني يا ضي عيوني

عمها كان بيبصلها بصدمه ووهدان قلبو حرفيا انشق بوجع رهيب بص لرجالتوا وحاول يصتنع القوه ويحافظ على اخر زره من كرامتوا  وقال...احم... بينا يا رجاله

عمها بصلو بزهول وقال...انت بتقول ايه هناخد البت معانا يلاا يا رحيل ولسه هيتقدم عليهم

وهدان وقف قدامو وقال...عمي خلاص هملهم...كيف ما قالت مينفعش ناخد منها كل حاجه...رحيل اختارتو وانا مهصغرش نفسي اكتر من كده

مختار قال بغضب ...وانا مهسيبش بت اخوي

وهدان بص لرجالتوا مسكو عمها ومنعوه يقرب منها

وهو راح قوم جاسم الي كان تعبان جدا ومش قادر يقف وقال بجمود.... تعالي ناخدو على الجبل عندي

 بس جاسم شاورلو بتعب وقال بالعافيه..لا..لا وديني..وديني لاحمد

رحيل قالت بسرعه..احمد صاحبو مستنينا هو وطاهر هنهربوه من هنه  يلا نروحلهم

وهدان اتنهد وقال ...طاهر.....اممم....طيب يلا بينا

 واخدو على عربيه احمد  اللي كان مستنيه على بعد مسافه

احمد اتخض اول ما شافوا بينز،،ف ومسنود على وهدان ورحيل  جري عليهم وقال بغضب..ياخبر..جاسم....عملتوا فيه ايه يا مجرمين انتو  انا هوديكم في ستين داهيه

وهدان بصلو بحده وقال بطريقه مرعبه.... توصلو بالسلامه 

ابقي طمنينا لما توصلي يا رحيل

احمد اتوتر من طريقتوا  واخد جاسم حطو في العربيه بتوتر وبقى يسقيه ميه ويغسلو وشو

 وهدان لسه هيمشي رحيل قالت بدموع..شكرا..شكرا يا وهدان

وهدان اتنهد بحزن وقال...انتي الغاليه اخت الغالي يا رحيل وراحتك تهمني حتى لو على حساب قلبي...ابقي افتكري دايما ان  ليكي اخ كمان هنه.... لو احتاجتيني في اي وقت كلميني انتي حافظه رقمي

قال كده ومشي وهيه بصت لطيفه بحزن

 بس جريت على جاسم لما سمعتوا بيتألم جامد

قربت منو وقال ببكا ... سلامتك يا جاسم حقك عليا يا ولد الناس

جاسم بصلها بابتسامه وقال بألم.... متبكيش كفايه ارجوكي وجعتي قلبي

رحيل لسه هتتكلم احمد قال بغضب..يا النحنحه.. هو قلبك بس اللي واجعك متاكد ...بس هقول ايه دي اخرت المحن وانا ياما حذرتك

رحيل اتنهدت بضيق منو وقالت بغيظ ..هو البعيد بقره مش شايفو مقادرش يتحدت اقفل خشمك ده

أحمد قال بزهول..خش... ايه

جاسم اتنهد و قال بتعب شديد .... بس بقى يا احمد

 اركبي يا رحيل يلا لو سمحتي  انا تعبان

رحيل  اتنهدت بحزن وقالت.... ماشي اتحمل شوي هنوديك اقرب مصتوصف على الطريق..انا هركب ورا جمب طاهر

احمد قال باستغراب...طاهر...طاهر مين اللي ورا  باسم الله

جاسم قال بألم وسرعه...اطلع يا احمد وانت ساكت ماشي   

احمد ساق وهو مستغرب  وجاسم ابتسم رغم الألم اللي فيه لكن كان مبسوط وهو بيبصلها في المرايه وشايفها قاعده بارتياح شديد وهيه متخيله انها انقذت حبيبها واخوها في نفس الوقت

سر زائرة الجبل بقلم زهرة الربيع

........................................................

بعد مرور ٦ اشهر دخل جاسم واحده من المصحات العقليه وهو بيجري بفرحه ومعاه كتاب في ايده

دخل على واحده من الاوض بسعاده وقال....رحييييل باركيلي يا قمري 

رحيل كانت حاطه ورود في الشباك وبتسقيها التفتتلو  بابتسامه جميله 

وهو  جري عليها حضنها بقوه وقال...مش هتصدقي ياقلبي الكتاب عمل نسبه مبيعات تجنن من اول يوم ...انا مبسوط...مبسوط اووووي 

رحيل قالت بسعاده..تستاهل اكتر من كده يا قلبي  ربنا يفرحك دايما يا جاسم...قولي  جبتلي نسخه كيف ما قولتلك

جاسم قال بابتسامه....وبالحجز كمان لبطلة الكتاب العسوله

رحيل مسكت كتاب  بيحمل صوره  لشاب جميل ماسك كاميرا للتصوير ومن قدام بنت مخبيه وشها بطرحتها ومش باين من وشها غير عيونها الجميله اللي تخطف القلب وسط رمال الصحراء بجبالها ...ويحمل عنوان. (سر زائرة الجبل)

رحيل ابتسمت ورددت الاسم وقالت..سر زائرة الجبل... الاسم حلو قوي يا جاسم

جاسم ابتسم وقال...اجمل واروع سر عرفتوا ..واروع منو  وجودك في حياتي.... قصتك مش مجرد حكايه تتقري وخلاص....دي  لازم تتحفظ ويتعلم منها الكل  انا مشوفتش وفاء ولا رحمه ولا حب اخوي زي الي شوفتهم في حكايتك يا رحيل

رحيل ابتسمت وقالت بحرج... ولا جنان كمان

جاسم ابتسم وقال....وافرض مجنونه... طب ما انا مجنون بيكي وعايش عادي

رحيل ضحكت بخفه وقالت.... انت هتقولي انا اتأكدت انك مجنون من وقت ما اتجوزتني في اول يوم وصلنا فيه رغم انك  عارف اني...

جاسم قاطعها وقال..عارف انك ست البنات كلهم... دي ازمه وهتعدي انا لسه شايف الدكتور وقال انك اتحسنتي قوي وان التهيؤات بتجيلك على فترات طويله وهتتلاشى مع الوقت...بس هنصبر شويه وهنعديها سوا...وهاخدك على بيتنا كل يوم بروح اجهز فيه وانا بتمنى تنوريه وتبقي جمبي طول الوقت ..انا خلاص ادمنتك يا بت مبقتش اطيق يعدي عليا نهار من غير ما اشوف العيون اللي أسروني

 رحيل بصت لعيونه بسعاده وقالت..انت رزق ربنا وعوضه ليا يا جاسم مكنتش هوصل لكده لولاك..انا مبسوطه قوي بيك وبحبك اللي نور دنيتي وونس وحدتي معرفاش اشكرك ازاي

جاسم ضمها لقلبه وقال....تذاكري كويس وتنجحي بتقدير عالي وقتها هتبقي شكرتيني....انا مراهن عليكي عايز يوم ما اخدك الامتحان ترفعي راسي  وتجيبي امتياز

رحيل قالت بسعاده.... ده انا مش ببطل مذاكره في الكتب اللي جبتهالي متقلقش علي

جاسم ابتسم بحب وقال....انا قلقان على قلبي اللي مبقاش متحمل جمالك ابدا

رحيل ضحكت برقه وجاسم قرب منها قوي وقال..بقولك ايه مش هتديني حاجه حلاوة الكتاب

رحيل ابتسمت بكسوف وقالت.... لاه ...كفايه عليك الكتاب ....انا قولتلك اللي في بالك ده مهيحصلش الا لما اطلع من هنه

جاسم قرب اكتر وقال..يا ابت دي تصبيره وحشاني

رحيل ضحكت برقه وقالت..وبعدين يا جاسم امسك روحك لحسن حد يدخل ....قولي صوح بتقابل طاهر بقالو كتير قوي مجاش زارني

جاسم اختفت ابتسامتو وبان الحزن على ملامحوا  بس حاول يقوى وقال بسرعه..اه..اه بقابلو مشغول في شغلو الجديد ادعي ميزركيش خالص..قصدي يخلي بالو من شغلو ومش مهم الزياره... يلا بقى خليني اراجعلك واشوفك  مذاكره ولا قاعده تفكري فيا 

رحيل ابتسمت بحب وقالت ..من الناحيه دي اطمن...بفكر فيك ليل نهار

جاسم قال بمشاكسه...طب بتفكري في الليل بإيه يا قليله الأدب

رحيل ضربتو في صدره وضحكت وقالت.... اتلم يا واد

جاسم ضحك وقال...الواد قلبو بيوجعه وعايز حد يدلعه يا بت

رحيل ضحكت وحطت ايدها على خده بحنيه وقالت...سلامة قلبك يا قلبي ....الحمد لله اني قابلتك يا جاسم

جاسم ابتسم  وضمها ليه وباس كفة ايدها وقال....الحمد لله على اي حال يا رحيل الحمد لله على وجودك في ايامي والف حمد انو جعلك نصيبي يا بنت الجبل ❤️🌹🌹

#سر_زائرة_الجبل

#بقلم_زهرة_الربيع

💕💕💕💕💕💕💕💕💕💕💕💕💕💕💕💕💕💕

ايا زهرة جذبني عطرها  🌹    وسقاني شهداً كالعسل

واسكنني جنةً هويتها    🌹   وتماديت في عشقها ولم امل 

وهاجر القلب في بيدائها 🌹     وبلا رحال قد ارتحل

وسألني ترى ما سرها     🌹    ولم أجد جواباً لما سأل

فقلت إني أحيا بعذابها   🌹   هكذا الحب منه ما قتل

وسأعيش قتيل عيونها  🌹   فأنتِ العشق يا بنت الجبل

💕💕💕💕💕💕💕💕💕💕💕💕💕💕💕💕💕💕

كنتم مع 🌹سر زائرة الجبل 🌹بقلم زهرة الربيع ...اتمنى ان تكون نالت اعجابكم اكتبولي رأيكم فيها بصراحه...ونلقاكم في قصص روعه تاتيه ان شاء المولى.... زهرتكم تحييكم ودمتم في امان الله مع من تحبون🥰❤️

لمتابعة  الروايه الجديده زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هناااااا