رواية مكتوبة على إسمي( الجزء الثاني) الفصل السادس 6 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل السادس 6 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل السادس 6 بقلم ملك إبراهيم( حصريه وجديده في مدونة قصر الروايات)

#الحلقة_السادسة

#الجزء_الثاني

#مكتوبة_على_إسمي

#بقلمي_ملك_إبراهيم

عامر انتفض اول لما سمع كلمة مراتك وسألها بقلق: مالها مراتي!

لولا: انا سمعت علاء دلوقتي بيتكلم في التليفون قبل ما يخرج وقال انهم هيخطفوا مراتك النهاردة يصوروها مع رجاله وهتتمسك آداب وهينزلوا صورها علي كل المواقع.

عامر اتجنن لما سمع كلامها وقفل المكالمة معاها بسرعة واتصل على آيات لقى تليفونها مقفول.. اتصل بسرعة علي السواق والحرس وسألهم عن آيات وبلغوه انها في الجامعة وهما واقفين برا.

عامر اتكلم معاهم بقلق وطلب منهم يدخلوا يشوفوها جوه ويفضلوا جنبها لحد ما هو يوصل وخرج من الشركة وهو بيجري بسرعة واتصل على لولا عشان يفهم منها اكتر ايه الكلام اللي هي سمعته بالظبط ولولا حكتله كل الكلام اللي سمعته من علاء.

بعد وقت قليل عامر وصل قدام الجامعة واتفاجئ بالحرس بتوعه بيقولوله ان آيات مش موجودة جوه في الجامعة ومش لاقينها وزمايلها بيقولوا انهم شافوها خارجة مع نادين صحبتها من البوابة التانية.

عامر اتصدم لما سمع اسم نادين وغمض عينيه بغضب وهو بيعصر قبضة ايديه بعنف وهمس: ليه كده يا آياااات.. ليه مسمعتيش كلامي لييييه. 

اتكلم واحد من حرس آيات بتوتر: حضرتك احنا ممكن نفرغ الكاميرات ونشوف ايه اللي حصل وخرجت ازاي وو... 

قاطعه عامر بعنف: مفيش وقت احنا لازم نتحرك بسرعة. 

فتح تليفونه واتصل على صاحب شركة الأمن اللي بيتعامل معاه وطلب مساعدته انهم يتتبعوا رقم تليفون علاء ويوصلوا لمكانه عن طريق تليفونه بسرعة وركب عربيته وكل الحرس اتحركوا وراه. 

رواية مكتوبة على إسمي بقلمي ملك إبراهيم. 

بعد وقت في مكان مهجور. داخل مخزن قديم. 

آيات فتحت عينيها بتعب وهي بتتأوه بألم ولقت نفسها نايمه علي الأرض وفي اصوات حواليها وكانت الاصوات ل نادين وهي واقفه بتتكلم مع مجموعة رجاله وبتاخد منهم فلوس وقالت بصوت مرتفع: لا احنا متفقناش على الفلوس دي.. انا مش هتحرك من هنا قبل ما اخد فلوسي كلها كاملة.. مش كفايه ان انتوا هتضيعوا عليا سنه في الجامعة ولازم اختفي بعيد لحد ما الموضوع ده يتنسي. 

اتكلم واحد من الرجاله اللي واقفين قدامها: دي الفلوس اللي الباشا بعتها وإحنا منعرفش انتي اتفقتي معاه على ايه! 

ردت نادين بصوت قوي غاضب: اتفقت معاه على ضعف الفلوس دي ودلوقتي انا مش هتحرك من هنا قبل ما اخد كل فلوسي.. انتوا ناسين هي تبقى مرات مين وهيعمل فيا ايه لو عرف يوصلي. 

اتكلم واحد من الرجاله: احنا ملناش دعوة بالكلام ده والباشا جاي دلوقتي اتصرفي معاه.. المهم ابعدي عن هنا دلوقتي خلينا نشوف شغلنا معاها ونخلص. 

نادين باعتراض: محدش هيقرب منها قبل ما اخد كل فلوسي انتوا فاهمين. 

آيات كانت بتبكي بصمت وخوف وهي سامعة كلامهم وعرفت ان نادين باعتها وكانت بتخدعها وعامر كان عنده حق لما حذرها منها.. قلبها كان هيقف من كتر الخوف ومش عارفه هما ناوين يعملوا فيها ايه وخايفه تظهر قدامهم انه رجعت للوعي وصاحيه وسمعاهم وحاولت تدور علي تليفونها حواليها عشان تكلم عامر لكن ملقتش شنطتها وهمست بخوف: الحقني يا عامر ارجوك.. انا اسفه. 

رواية مكتوبة على إسمي بقلمي ملك إبراهيم. 

عند عامر. 

كان بيتواصل مع كل الناس اللي يعرفهم ويقدروا يساعدوه وكان همه انه يوصل ل مكان آيات بأي طريقة قبل ما حد يأذيها وبعد وقت قدروا يحددوا مكان تليفون علاء وعامر عرف المكان واتحرك بسرعة وكان معاه عدد كبير من الحرس. 

..... 

داخل المخزن المهجور. 

دخل علاء المكان وسمع صوت زعيق نادين مع الرجاله وقرب منهم واتكلم بعصبيه: في ايه.. ايه اللي بيحصل هنا؟ 

أتكلم واحد من الرجاله: الهانم دي عامله دوشه ومش عايزة تسيبنا نشوف شغلنا قبل ما تاخد كل فلوسها. 

علاء بص ل نادين واتكلم بغضب: فلوس ايه اللي انتي عايزاها كمان.. انتي خدتي حقك اللي تستاهليه وبعدين هو انتي كنتي عملتي ايه.. انتي يدوب خرجتيها من الجامعة بس. 

ردت نادين بغضب: وانتوا كنتوا هتقدرو تخرجوها إزاي من غيري وسط كل الحرس بتوع جوزها وطبعا جوزها هيعرف انها خرجت معايا انا واكيد مش هيسبني عايشه علي وجه الارض بعد اللي هتعملوه في مراته. 

اتكلم علاء بسخرية: ومين قالك ان جوزها هيبقى قادر يرفع وشه من الارض اصلا بعد اللي احنا هنعمله في مراته. 

آيات جسمها ارتجف بخوف وهي بتسمعه ومغمضه عينيها عشان ميعرفوش انها صاحيه وخايفه تتحرك من مكانها ومش عارفه ايه هو المصير اللي مستنيها وقلبها كان هيقف من كتر الخوف ودموعها بتنزل بصوت مكتوم. 

نادين اتوترت من كلام علاء وقالت: هو انتوا ناوين تعملوا فيها ايه بالظبط؟ 

وبصت على آيات اللي نايمه على الارض وراها وقالت: علي فكرة مراته متستهلش انكم تؤذوها.. لو لكم مشكله مع جوزها حلوها معاه.. البنت دي طيبه ومتستهلش تتأذي. 

أتكلم علاء بنفاذ صبر: احنا مش فاضين لمحضراتك دي يا نادين هانم.. اتفضلي امشي دلوقتي خلينا نشوف شغلنا انتي معطله الرجاله بقالهم ساعتين كان زمانهم خلصوا مهمتهم وخلصنا.

نادين بصت على آيات بتوتر وقالت: طب انا عايزة ضعف المبلغ ده.. انا لازم اهرب ل مكان بعيد عن جوزها لانه اكيد هيوصلي. 

علاء بصلها بتفكير وقال: تصدقي انتي صح.. انا إزاي مفكرتش في الموضوع ده.. فعلا عامر الجارحي هيقدر يوصلك لأي مكان تروحي فيه وساعتها انتي هتعترفي من اول قلم وهتقولي مين اللي طلب منك تعملي كده... 

وفجأة وهو بيتكلم خرج سلاحه وطلق رصاصه في صدر نادين وقالها: كده بقى حتي لو عرف مكانك انا هبقى مطمن. 

نادين وقعت على الأرض وآيات خرجت منها صرخه بخوف اول لما سمعت صوت المسدس وعلاء ضحك بسخريه وقال: دي المدام فاقت اهي.. حمدلله على السلامة يا آيات هانم. 

وبص ل رجالته وقالهم: يلا يا رجاله شوفوا شغلكم معاها بسرعة كفايه الوقت اللي المرحومة ضيعته. 

آيات صرخت بخوف والرجاله قربوا منها وهي قامت بسرعه من على الأرض وحاولت تجري وتهرب منهم لكن المخزن كان كله مقفول وواحد من الرجاله مسكها وجذب الحجاب بتاعها من علي شعرها وآيات صرخت بخوف وهلع واترجتهم وهي بتبكي: حرام عليكم انا معملتش حاجة.. سيبوني امشي انا حامل. 

علاء ضحك بسخريه وقال: وماله عشان ابن الجارحي الصغير يبقى شاهد على اللي هيحصل في امه. 

وبص للرجاله وهو بيفتح تسجيل الفيديو وقالهم: شوفوا شغلكم. 

آيات صرخت بكل صوتها وهي بتترجاهم يبعدوا عنها وحاولت تحافظ على شرفها بكل قوتها وخلصت نفسها منهم وقامت تجري لكن واحد منهم مسكها من رجليها وشدها جامد وفجأة وقعت علي بطنها واقعه قوية جدا وصوت صرختها فزعهم وبعدوا عنها كلهم اول لما شافو نزيف من الدم بدأ ينزل منها بعد ما وقعت على بطنها.

الرجالة اترجعوا بعيد عنها وهما بيبصوا ل علاء بفزع وعلاء ابتسم باستمتاع وقالهم: شوفوا شغلكم معاها يلا. 

رد واحد من الرجالة: ازاي يا باشا دي بتنزف واحنا مقربناش منها.. شكلها بتسقط الطفل إللي في بطنها. 

علاء بصوت قوي: نفذوا اللي قولتلكم عليه.. لازم اكمل تصوير الفيديو للآخر.. مش كفايه ان ابن عامر الجارحي يموت.. لازم افضحه واقضي علي شرفه.

آيات كانت سامعه كلام علاء وهي بين اليقظه وفقدان الوعي ودموعها بتنزل منها ومش قادرة تتحرك من مكانها والرجالة خافوا يقربوا منها وعلاء اتعصب وقال: خلاص يبقى انا اللي هقضي على شرف عامر الجارحي بنفسي. 

وقرب من آيات وكل الرجاله كانوا واقفين يتابعوا اللي هيحصل وقبل ما يلمسها اتفاجئوا بعربيتين اقتحموا المخزن وهما بيطلقوا الرصاص علي كل الرجالة اللي في المخزن ووقعوا كلهم مصابين على الأرض ونزل عامر من العربية بسرعة وآيات شافته وعيونها بتقفل وبتغيب عن الوعي وعامر اتجمد مكانه لما شاف علاء قريب من مراته وفكر انه وصل متأخر وقدرو يؤذوها وقرب منها بخطوات تقيله وهو حاسس ان قلبه هيقف وعلاء ضحك بصوت عالي وقاله: جيت متأخر يا عامر.. انا استمتعت بمراتك ومبقتش تفرق عن لولا حاجة يعني كده بقينا متعادلين. 

عامر اتجنن لما سمع كلام علاء وشاف آيات بتنزف قدامه وبدون تردد رفع سلاحه وطلق رصاصه علي علاء اللي صوت ضحكه وقف مع صوت الرصاصه اللي اخترقت قلبه ووقع في نفس اللحظة. 

كل رجالة عامر اتصدموا لان دي كانت اول مرة عامر الجارحي يستخدم سلاحه وكلهم كانوا مقدرين ان الموقف اللي عامر اتحط فيه مش سهل ابدا علي أي راجل انه يشوف واحد كان بيحاول يعتدي على شرف مراته ويقوله انه اعتدى على شرفها بالفعل ويسيبه يعيش واللي عامر عمله كان دفاع عن الشرف. 

عامر قرب من آيات وكانت فاقده الوعي وبتنزف كتير ولبسها كله كان غرقان دم وهو لما شاف الدم الكتير مع كل اللي حصل عقله وقف عن التفكير وجسمه اتجمد مكانه. 

قائد الحرس بتاع عامر شاف الكاميرا اللي كانت بتسجل كل اللي حصل فيديو واخدها وفتح التسجيل وشاف ان محدش لمس آيات وانهم وصلوا قبل ما علاء يلمسها. 

قرب من عامر وقعد جمبه علي الارض وقاله: باشمهندس عامر.. علاء كذب عليك هو مقربش من المدام احنا وصلنا قبل ما يلمسها والكاميرا دي سجلت كل اللي حصل. 

عامر بص له وكأنه رجع للوعي لما سمع كلامه وبص على الكاميرا وقائد الحرس فتح الفيديو قدامه على الجزء اللي رجالة علاء خافوا يقربوا من آيات وعلاء قرر ان هو اللي يقرب منها بنفسه وقبل ما يقرب ويلمسها هما اقتحموا المكان بالعربيات.. 

عامر حس ان روحه رجعتله تاني لانه قدر يوصل قبل ما يأذو آيات لكنهم بالفعل أذوها هي وابنه وكان النزيف بيزيد اكتر واتكلم معاه قائد الحرس: باشمهندس عامر انت لازم تاخد المدام المستشفى بسرعه. 

عامر بص له وهو مش قادر ينطق ودم آيات بقى على ايديه وغرق لبسه هو كمان. 

قائد الحرس اتكلم معاه بصوت عالي عشان يفوقه من الحالة اللي بقى فيها: باشمهندس عامر انت لو ملحقتش المدام دلوقتي هتموت.. لازم تاخدها بسرعه المستشفى واحنا هننضف المكان هنا. 

عامر لما سمع كلامه عن الموت بص على آيات  وردد: مستحيل تموت.. 

ورفعها عن الأرض وشالها بسرعه وهو بيتكلم بصراخ عالي: حد يسوق العربيه بسرعه. 

ركب واحد من الحرس العربيه في مقعد القيادة وشغل العربيه وعامر ركب وهو شايل آيات في حضنه وبيهمس لها بحزن: انا اسف يا آيات مقدرتش احميكي. 

رواية مكتوبة على إسمي بقلمي ملك إبراهيم. 

بعد عدة ساعات .. 

داخل المستشفى وقدام غرفة العمليات. 

خرج الدكتور وعامر قرب منه بلهفة وقلق وقبل ما عامر يتكلم ويسأله عن آيات والجنين، الدكتور هز راسه بأسف وقال: للأسف فقدنا الجنين...

تراجع عامر للخلف وكأن قلبه اتكسر مليون قطعه.. الدكتور بصله بحزن وقاله: ربنا يعوضكم.. الجنين هيتجهز دلوقتي وتخلصوا الإجراءات وحضرتك تستلمه عشان الدفن. 

عامر بص للدكتور بصدمة والدكتور هز راسه بالايجاب وقاله: المدام كانت قربت من الشهر السابع.. ربنا يعوضكم ان شاء الله.. عن اذنك. 

اتحرك الدكتور من قدامه وعامر واقف مصدوم ونزلت دمعة من عينيه لأول مرة في حياته.

شريف وامجد وصلوا المستشفى وقربوا من عامر بقلق.

شريف: عامر في ايه.. ايه اللي حصل ل آيات طمنا؟

واتكلم أمجد: احنا عمالين نتصل عليك من الصبح مش بترد علينا وعرفنا انك خرجت جري من الشركة وقائد الحرس بتاعك كلمنا دلوقتي وقالنا انك في المستشفى انت وآيات!!. 

عامر كان في عالم تاني ومش سامع ولا كلمة من كلامهم وكان لسه تحت تأثير الصدمة ومش قادر يستوعب ان ابنه مات قبل ما يشوفه وهياخده يدفنه دلوقتي.. شريف وامجد كانوا بيتكلموا معاه بقلق ومش فاهمين ايه اللي حصل ومين عمل كده في آيات وكانوا عايزين عامر يشرحلهم ويفهمهم لكن عامر كان في عالم تاني لحد ما الممرضة قربت منهم واتكلمت معاه وطلبت منه انه يروح معاها عشان يكملوا الإجراءات ويستلم الجنين عشان يدفنه..

شريف وامجد اول لما سمعوا كلام الممرضه مع عامر وعرفوا ان ابن عامر مات قدروا حالة عامر ووقفوا معاه وهما مصدومين ومش عارفين ازاي يخففوا عنه الصدمة!

عامر حط ايديه على قلبه من كتر الالم اللي حاسس بيه وقعد علي اقرب مقعد وهو بيردد: ابني مات قبل ما اشوفه.. انا مقدرتش احمي ابني.. ومقدرتش احمي مراتي.. هما اتأذوا بسببي.. انا السبب. 

شريف وامجد كانوا مصدومين من الحالة اللي شايفين عامر فيها ومش قادرين يساعدوه يخرج من الحالة دي وبيحاولوا يخففوا عنه وهو بيردد بدون توقف ان هو مقدرش يحمي مراته وابنه! 

شريف حط أيديه علي كتف عامر وقاله بحزن: عامر انت لازم تكون اقوى من كده وان شاء الله ربنا يعوضكم. 

عامر رفع عينيه وبص ل شريف وهز راسه برفض وهو بيردد: انا مقدرتش احمي مراتي وابني.. انا السبب.

رواية مكتوبة على إسمي بقلمي ملك إبراهيم.

في مكان اخر.

في شقة مرتضى. 

مرتضى كان قاعد على الكرسي براحة وبيتكلم في التليفون: دي استوت علي الاخر يا باشا.. الدوا اللي بتاخده مع البودرة عاملين معاها شغل عالي. 

قاطع كلامه صوت ميسرة وهي خارجة من الحمام ووشها شاحب وقالت بتوسل: مرتضى الحقني.. جسمي كله بيتقطع والبودرة دي مش بتعمل حاجة هاتلي اي حاجة تانيه بسرعة تريحني.

مرتضى: طب اقعدي يا حبيبتي ارتاحي كده وخلينا نتكلم.

ميسرة برجاء: مش هقدر اقعد ارجوك بسرعة انا بموت.

مرتضى قفل المكالمة ورفع قدم فوق الأخرى ومسك موبايله يقلب فيه وميسرة جريت عليه تترجاه: أرجوك يا مرتضى هاتلي بسرعة اي حاجة تكون أقوى من البودرة دي حاسه اني هموت وهي مش بتعملي حاجة!.

مرتضى بصلها بمكر وقال: عندي نوع بودرة تانيه بس اقوى بكتير و هتريحك اوي. 

ميسرة برجاء: الحقني بيها بسرعه انا مش قادرة بموت. 

مرتضى فتح كيس صغير كان فيه بودرة وفضاها على الحذاء بتاعه وهو حاطت قدم فوق الأخرى وشاور علي الحذاء بتاعه وقالها: البودرة اللي على جذ.متي دي لو شمتيها مش هتحسي بكل الوجع اللي حاسه بيه دلوقتي.

ميسرة جريت علي الحذاء بتاعه بدون تردد ومرتضي جهز كاميرا موبايله وصورها فيديو وهي قاعدة تحت رجليه وبتشم البودرة من فوق الحذاء بتاعه وبعدها ميسرة فقدت وعيها وسقطت اسفل حذاء مرتضى وهو قفل الفيديو وهو يبتسم وبعت الفيديو ل امير المحمدي.

-------

عند أمير المحمدي. 

كان قاعد في جناح خاص في اوتيل كبير وميرنا كانت قاعده بتقلب في تليفونها بملل وفجأة أمير وقف وهو بيضحك بسعادة من قلبه وقال: واخيرا يا ميسرة وقعتي تحت أيدي وشوفتك مذلوله. 

ميرنا بصتله بفضول وسألته: في ايه مالها طنط ميسرة يا أمير ؟

امير بص ل اخته بغضب و ردد: طنط!! هتفضلي طول عمرك غبيه كده لحد أمتي.. طب اتفضلي شوفي طنط بتاعك بتعمل ايه. 

وفتح الفيديو قدامها وميسرة كانت قاعده تحت حذاء مرتضى وبتشم في البودرة. 

ميرنا شهقت بصدمة وقالت بفزع: ايه اللي بيحصل ده مين عمل كده في طنط ميسرة!؟ 

رد امير بثقة: انا اللي عملت فيها كده.. ولسه في فيديو تاني هيجي لمرات عامر.. عايز ابعتله الاتنين في نفس الوقت وبعدين ابعتهم لكل المواقع ينشروهم عشان فضيحته تبقى عالميه.. 

وهمس بقلق: بس مش عارف علاء الغبي ده اتأخر ليه لحد دلوقتي كان المفروض يبعتلي الفيديو بتاع مرات عامر من بدري وكمان تليفونه مقفول ومش عارف اوصله! 

ميرنا كانت بتبص ل اخوها بصدمة وسألته بقلق: فيديو ايه اللي هيجي لمرات عامر.. امير انت متعرفش آيات بالنسبه ل عامر ايه!! دا ممكن يقتلنا كلنا لو فكرت بس تأذيها. 

امير بصلها بغضب وقال بثقة: عامر الجارحي هو اللي هيخاف مني بعد النهاردة يا ميرنا وانا بحذرك لأخر مرة.. تنسي ميسرة وابنها لاني خلاص قضيت عليهم وانتهوا.

ميرنا بصت ل أخوها بخوف وقاطع كلامهم رنة تليفون أمير وكان واحد من رجالته. 

امير وقف بعيد عن اخته وسأل المتصل بقلق: طمني لقيت علاء؟

رد المتصل: لا يا باشا وفي خبر وحش. 

أمير بقلق: خبر ايه؟

المتصل: عرفت ان علاء ورجالته ماتوا.. وعامر الجارحي قدر يعرف مكانهم وينقذ مراته قبل ما علاء ورجالته يلمسوها. 

صرخ امير بغضب: علاء الغبي.. ضيع كل تعبنا وبوظ كل خططي.. انا اللي غلطان لاني اعتمدت على واحد غبي زيه. 

ميرنا انتفضت من صوت صراخ اخوها وهي بتتابعه بخوف. 

أتكلم أمير: وعامر الجارحي فين دلوقتي ؟

رد المتصل: انا عرفت انه اخد مراته على المستشفى لان حالتها كانت خطيره وفي خبر كمان عرفته من المستشفى.. انهم خسروا الجنين وعامر اخده يدفنه وهو في المقابر دلوقتي. 

أمير حس بسعادة ان مش كل خطته باظت وانه قدر يوجع قلب عامر وسأل بتأكيد: يعني عامر بيدفن ابنه دلوقتي في المقابر بتاعهم.. حلو يبقى هو ده الوقت المناسب عشان ابعتله الفيديو بتاع ميسرة هانم... بقلمي ملك إبراهيم. 

... يتبع

تفتكروا عامر ممكن يسامح آيات بعد اللي حصل🤔 وكمان هيعمل ايه لما يعرف اللي حصل مع امه والحالة اللي وصلت لها😱

تكملة الرواية من هنااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول من هناااااااااا

الرواية كامله الجزء الثاني من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا