رواية مكتوبة على إسمي( الجزء الثاني) الفصل الحادي عشر 11 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل الحادي عشر 11 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل الحادي عشر 11 بقلم ملك إبراهيم( حصريه وجديده في مدونة قصر الروايات)

#الحلقة_11

#الجزء_الثاني

#مكتوبة_على_إسمي

#بقلمي_ملك_إبراهيم 

آيات انتي كويسه؟ 

بصت ل مالك وهي لسه مصدومة وهزت راسها بـ لا ومالك قلق عليها اكتر وبعفويه مد أيديه ليها وقالها: تعالي اقعدي ارتاحي هنا. 

في اللحظة دي جن جنون عامر وبدون ما يفكر اتحرك بخطوات سريعة يقرب منهم وامجد وبيسان وشريف كلهم فاقوا من صدمتهم مع خطوات عامر إللي كان واضح عليه الغضب. 

اتحركوا كلهم بسرعه عشان متحصلش مشكله وبيسان قربت من آيات ووقفت جنبها.. 

آيات بصت ل بيسان والدموع لمعت في عينيها وكانت حاسه انها هتفقد الوعي من شدة الصدمة ومش قادرة تستوعب ان عامر موجود هنا دلوقتي فعلا ومعاها في نفس المكان وصدمتها كانت كبيره لأنها مكانتش تعرف انه رجع ومفيش حد قالها حتى ان في احتمال انه يرجع ومكانتش مستعدة ابدا انها تقابله دلوقتي ومش عارفه تفكر ولا تتحرك من مكانها! 

عامر نظراته ليها كانت ناريه وامجد وقف قدام عامر عشان يحاول يهديه واتكلم معاه بهدوء: عامر حمدلله على السلامه. 

عامر بص ل امجد وهز راسه بصمت لان تركيزه كان مع آيات والشخص اللي واقف جنبها وكان واضح علي ملامح الشخص ده انه قلقان عليها وكأنه قريب جدا منها وده كان هيجنن عامر وهو مش عارف مين الشخص ده وايه علاقته ب آيات وازاي كان واقف يتكلم معاها براحه كده وبيضحكوا!! 

هاجر خرجت من المطبخ هي ومهندس الديكور واتفاجأت بوجود عامر وبصت ل شريف بصدمة لانها مكانتش تعرف ان عامر ممكن يجي مع شريف وخافت ان آيات تزعل منها وتفكر انهم كانوا قصدين يجمعوها مع عامر بالشكل ده. 

هاجر قربت منهم بتوتر وقالت: حمدلله على السلامه يا عامر. 

عامر بصلها وهز راسه وقال بجمود: شكلي جيت في وقت مش مناسب! 

آيات كانت بتخفض وشها بعيد عن نظراته. 

اتكلمت هاجر بأبتسامه ونبره مرحه عشان تلطف الاجواء شويه لان الكل كانوا متوترين: وقت ايه اللي مش مناسب دي احلى مفاجأة لينا النهاردة. 

آيات بصت ل هاجر بلوم ونظرة عينيها كانت بتقولها ليه عملتي كده! 

هاجر كانت واقفه جنب شريف وفهمت نظرات آيات ليها وزعلت علي الموقف إللي حصل وهمست ل شريف بصوت منخفض: ليه مقولتش ان عامر جاي معاك؟

رد عليها شريف بنفس الهمس: ما انا معرفش انك هتجيبي آيات معاكي!! 

هاجر بصت ل آيات بحزن وهي مش عارفه إزاي هتشرحلها اللي حصل. 

عامر كان بيبص ل آيات ومنتظر ردها او تفسيرها ل وقوفها مع الشخص ده ومنتظر يعرف مين ده وسألهم بنبره حادة: مش تعرفونا؟؟

اتكلم شريف بتوتر وهو بيشاور علي مهندس الديكور: المهندس عادل.. مهندس الديكور اللي شطب لنا الفيلا. 

عامر بص على ديكور الفيلا بنظرة سريعه وقال: واضح ان الباشمهندس عادل بيحب شغله.. تسلم أيدك باشمهندس. 

مالك استغرب لان رد عامر كان نفس رد آيات لما سألها عن رأيها في ديكور الفيلا!

رد عادل علي عامر بأبتسامه واسعه: شكرا يا باشمهندس عامر دي شهادة غاليه اعتز بيها. 

عامر بص ل مالك وهو منتظر يعرفوه مين ده وامجد فهم من نظرات عامر وقال: المهندس مالك.. صديق المهندس عادل... 

وبص علي آيات وقال: ودكتور آيات في الجامعة. 

عامر رفع حاجبه وهو بيهز راسه وبيردد: دكتور آيات في الجامعة!! 

كمل امجد التعارف بتوتر وقال ل مالك: المهندس عامر الجارحي... 

مالك هز راسه بالايجاب وقال: اه طبعا المهندس عامر الجارحي غني عن التعريف.. 

ومد ايديه بالسلام وقال: حمدلله على السلامه يا باشمهندس. 

عامر بص على ايديه وبادله السلام. 

آيات بصت على أيديهم وهما بيسلموا على بعض وبدأت تستعيد نفسها وقوتها تاني وقالت: بعتذر منكم همشي انا لأني تعبانه شويه.. عن اذنكم. 

اتكلمت بيسان وهي بتتحرك مع آيات : انا كمان همشي عن اذنكم. 

امجد وقف بيسان وقالها: معلش يا بيسان خليكي انتي لان لسه في كلام بينا مخلصش. 

بيسان بصت ل امجد بتوتر وآيات قالتلها: خليكي يا بيسان انا هرجع البيت لوحدي. 

اتكلم مالك مع آيات: انا معايا عربيتي برا خليني اوصلك يا آيات شكلك تعبانه. 

كلهم بصوا لبعض بصدمة واتكلمت بيسان وهي بتبص علي عامر وشايفه غيرته علي آيات: اه يا آيات خلي باشمهندس مالك يوصلك عشان أبقى مطمنه عليكي. 

آيات بصت اتجاه عامر بتوتر وخفضت وشها ومقدرتش تحرج مالك وهزت راسها بالايجاب وقالت: عن اذنكم. 

ومشيت بسرعه ومالك مشي معاها وعامر كان خلاص هيتجنن من اللي بيحصل. 

عادل مهندس الديكور كان ملاحظ ان في توتر بين كل الموجدين واستأذن منهم بلطف وقالهم انه هيخرج يعمل مكاملة تليفون . 

بعد خروج آيات ومالك وعادل من الفيلا. 

عامر بص ل امجد وبيسان وشريف وهاجر وقال: هو ايه اللي بيحصل هنا بالظبط!!

كلهم بصوا لبعض بصمت و ردت بيسان: انا اللي عايزة اعرف ايه اللي بيحصل هنا بالظبط! 

وبصت ل هاجر وقالتلها: عشان كده اصريتي علينا نيجي؟

رد شريف عليها: هاجر مكانتش تعرف ان عامر جاي معايا يا بيسان. 

أتكلم عامر معاها بغضب: طبعا مكنتيش عايزاني اجي واشوف اللي بيحصل هنا! 

ردت عليه بيسان بغضب: وانت ايه علاقتك ب اللي بيحصل هنا يا عامر.. هو انت مش طلقتها وسافرت من غير حتي ما تفكر تطمن عليها وعلى حالتها.. سيبتها مرميه في المستشفى وكأنها ملهاش اي قيمه عندك وجاي دلوقتي تحاسبنا وتقول ايه اللي بيحصل وايه اللي مش بيحصل!!! 

عامر بص ل بيسان بصمت وهي انفعلت اكتر وقالت بصوت مرتفع: عايز تعرف ايه اللي بيحصل؟.. تمام انا هقولك.. اللي بيحصل هو اللي انت شوفته ب عنيك ده.

اتكلم امجد بسرعة عشان يهدي الوضع بينهم وقال: مالك يبقى دكتور آيات في الجامعة وبس يا عامر. 

اتكلمت بيسان بتحدي: لاء.. واضح جدا انه معجب ب آيات ومش بعيد آيات كمان تكون بتبادله نفس الشعور. 

كلهم بصوا ل بيسان بصدمة وهي كانت بتبص ل عامر بتحدي لانها كانت شاهدة على جرح آيات وعذابها طول فترة غيابه بسبب اللي عملو فيها وكانت عايزة تفوق عامر وتعرفه ان آيات من حقها تختار الحياة اللي هي عايزاها وهو خلاص مبقاش في حياتها بعد ما سابها وسافر واتخلى عنها في اصعب وقت في حياتها.. 

بيسان كانت متعصبه جدا وزعلانه من عامر بسبب كل اللي عمله في آيات وبصت ل هاجر وقالت بغضب: انا ماشيه يا هاجر لازم ارجع البيت عشان اطمن على آيات عن اذنكم. 

امجد حاول يوقفها لكن بيسان اصرت انها تمشي لوحدها. 

بعد خروجها من الفيلا امجد بص ل شريف وهاجر بقلة حيلة وعامر وقف يبص قدامه للحظات ومشي من قدامهم هو كمان لانه مكنش قادر يسمع اكتر من اللي سمعه وكان حاسس بنار في قلبه من شدة الغيرة علي آيات ومش قادر يتخيل انها ممكن تكون مع شخص غيره. 

بعد خروجه مبقاش في غير امجد وشريف وهاجر في الفيلا وشريف بص ل امجد وقاله: شكل اللي جاي هيكون صعب.. عامر مش هيقبل اللي بيحصل ده! 

اتكلمت هاجر: بصراحة بيسان عندها حق في كل اللي قالته ل عامر.. اكيد يعني آيات مش هتعيش العمر كله لوحدها ولازم تحب واحد تاني وتتجوز وتعيش حياتها. 

شريف وامجد بصوا لبعض لانهم فاهمين وعارفين ان مستحيل عامر يسمح ان يكون في راجل غيره في حياة آيات. 

رواية مكتوبة على إسمي بقلمي ملك إبراهيم. 

في عربية مالك. 

آيات كانت بتبص من شباك العربية وشاردة في كل اللي حصل معاها وفي ماضيها مع عامر وافتكرت جنينها إللي مات في بطنها ونزلت دموع عينيها بدون ما تشعر. 

مالك اتصدم لما شاف دموع عينيها ووقف بالعربيه بسرعه وسألها بقلق: آيات انتي بتعيطي ؟ 

ردت آيات وهي بتجفف دموعها: انا اسفه يا دكتور بس حاسه اني تعبانه شويه. 

مالك: طب أخدك المستشفى. 

آيات: لا مش مستهلة انا هرجع البيت ارتاح شويه وهبقي كويسه. 

مالك بصلها بعمق للحظات وشغل العربية مرة تانيه واتحرك بيها علي عنوان آيات اللي قالتله عليه وكان بين لحظة والتانيه بيبص عليها وشايف الحزن الواضح علي ملامحها ومش فاهم ايه سبب الحزن ده وكان شايف دموعها اللي بتنزل غصب عنها وهي بتجففها بسرعه ب أيديها عشان مياخدش باله انها لسه بتبكي!! 

بعد وقت وصل قدام العمارة اللي هي ساكنه فيها وآيات كانت لسه شارده ومش حاسه بالوقت وفاقت من شروها على صوته. 

مالك: آيات احنا وصلنا قدام بيتك.. اطلع اوصلك ؟

آيات بصتله وهي بتستعيد وعيها وتركيزها وقالت بصوت مبحوح: شكرا يا دكتور انا تعبتك معايا النهارده. 

مالك بصلها بعمق وقال: مفيش تعب ولا حاجة المهم تكوني بخير. 

آيات ابتسمت بلطف وشكرته مرة تانيه ونزلت من العربيه ودخلت العمارة اللي ساكنه فيها ومالك فضل واقف بعربيته قدام بيتها لحد ما اطمن انها طلعت وبعدها اتحرك بعربيته. 

رواية مكتوبة على إسمي بقلمي ملك إبراهيم. 

عند عامر.. 

اخد عربية شريف وكان بيسوق العربية بغضب وبأقصى سرعة ومش قادر يتخيل ان ممكن آيات تكون مع غيره! والف سؤال وسؤال جواه عن آيات وعلاقتها بالشخص ده!! 

وقف بالعربيه في مكان بعيد ونزل منها وهو بيحاول ينظم انفاسه ويسيطر على غضبه.. فك ازرار قميصه من فوق عشان يعرف يتنفس لانه كان حاسس بضيق غريب وكأن الاكسجين اللي في الجو اختفى فجأة!! 

صورتها وهي بتضحك مع مالك وهو بيبصلها ب اعجاب مش راضيه تفارق خياله.. مش قادر يتخيل ان ممكن آيات تكون ل غيره ويكون جواها مشاعر اتجاه اي راجل غيره.. هي حبيبته هو وبس ومش من حق اي راجل في الكون يبصلها او يفكر فيها!! 

كان فاكر انه قدر يتحكم في قلبه ومش هيضعف ليها تاني بس مع اول لقاء بينهم اتحطم الجليد اللي حوالين قلبه واتحول ل نار غيرة بتحرق فيه. 

اتنفس بعمق وهمس: لا يا آيات.. مش هتكوني لحد غيري. 

وفتح عربيته وركبها واتحرك بيها بأقصي سرعة. 

-------

عند بيسان وآيات. 

بعد وقت بيسان دخلت الشقة وهي قلقانه علي آيات وخبطت علي أوضة آيات ودخلت تطمن عليها لقتها قاعدة على السرير شاردة ودموعها بتنزل من عينيها. 

قعدت بيسان قدامها واتكلمت بحزن: آيات انتي كويسه؟ 

ردت آيات ببكاء: هو رجع ليه يا بيسان؟ عايز مني إيه تاني! انا لما صدقت اني نسيته وقدرت اعيش من غيره. 

اتكلمت بيسان بحزن: رجع عشان يحضر فرح شريف.. بس انتي مش لازم تكوني ضعيفه كده يا آيات من اول لقاء بينكم.. طبيعي انكم تتقابلوا لان في بينكم أصدقاء مشتركين كتير وفي شغل بين شركتنا وشركته. 

أتكلمت آيات ببكاء: انا مش عايزة أشوفه تاني يا بيسان.. لما شوفته النهاردة حسيت بدقات قلبي وكأني لسه بحبه.. انا مش لازم احس كده!! انا لازم انساه وانسى كل الوجع والعذاب اللي عشته.. 

آيات وهي بتتكلم حطت أيديها علي بطنها وافتكرت جنينها اللي كانت بتتمنى تشوفه وافتكرت لحظات العجز لما علاء واللي معاه كانوا بيحاولوا يغتصبوها.. انهارت وهي بتفتكر اللحظة اللي عرفت فيها ان عامر طلقها وسافر بدون حتى ما يشوفها او يطمن عليها.. كانت حاسه بألم قوي في قلبها وبتبكي وهي منهارة.. بيسان ضمتها لحضنها وكانت حزينه عشانها ومش عارفه تساعدها ازاي! 

آيات بعدت عن حضن بيسان وقالت بكاء: انا مش عايزة اعيش الوجع ده تاني يا بيسان.. انا تعبت ومش هستحمل يقهر قلبي تاني.. مكنش لازم يرجع.. انا كنت مرتاحه وهو مش هنا. 

بيسان بصتلها بحزن وقالت: معلش يا آيات حاولي تنامي وتهدي دلوقتي وان شاء الله مش هيحصل حاجة تاني اطمني. 

آيات هزت راسها وهي بتبكي وبيسان ساعدتها تنام وقعدت جنبها تبص قدامها بحزن وتفتكر نظرات عامر ل آيات وغيرته عليها اللي اكدت للكل ان عامر لسه بيحب آيات ومستحيل يسمح لحد غيره يدخل حياتها. 

رواية مكتوبة على إسمي بقلمي ملك إبراهيم. 

الساعة الثانية بعد منتصف الليل. 

رجع عامر بعربية شريف على بيت خالته وكان شريف سهران في انتظاره وقلقان عليه لانه من وقت ما خرج من الفيلا مرجعش علي البيت ولا بيرد على تليفونه. 

شريف قرب منه واتكلم بقلق: عامر انت كنت فين كل ده قلقتني عليك.. ؟ انا قولت ل خالتي انك سهران مع امجد عشان تطمن وتنام.. انت كنت فين كل ده؟ 

عامر قعد قدامه بتعب وسأله: ايه اللي حصل في غيابي يا شريف ؟ ومين مالك ده وايه علاقته ب آيات ؟

شريف قعد قدامه وقال بحزن: انا اول مرة أشوف مالك ده النهاردة.. واول مرة اسمع عنه في حياة آيات. 

أتكلم عامر بغضب وهو بيفتكر نظرات مالك ل آيات: عايز أعرف ايه اللي حصل في حياة آيات انا معرفوش خلال السنه اللي انا غبتها؟ 

رد شريف: محصلش حاجة غير اللي انت تعرفه! آيات رفضت ترجع البلد مع عمها وطلبت منه يسمحلها تكمل دراستها هنا وبيسان رجعت وقررت مع آيات إنهم يفتحوا شركة مع بعض وآيات دخلت معاها شريكة بالفلوس بتاع الارض بتاعها وفتحوا شركة صغيرة على قدهم وهاجر اشتغلت معاهم وآيات وبيسان عايشين مع بعض في شقة واحدة هنا ومرات عم آيات ماتت بعد سفرك ب شهرين وفارس ابن عمها اتجوز هدير صحبتها بعد موت امه عشان ميبقاش هو وعم آيات لوحدهم في البيت وآيات في الاجازة بتسافر عند عمها في البلد تقعد معاهم أسبوعين وترجع وطول السنه هنا وحياتها مفيش فيها غير هاجر وبيسان والشركة والجامعة! لكن مالك انا اول مرة اسمع اسمه ومعرفش دخل حياة آيات امتى ولا ايه علاقتهم بالظبط. 

اتعصب عامر وقال بغضب: اكيد مفيش بينهم حاجة!! آيات مستحيل تفكر في واحد زي مالك ده. 

شريف بص له بحزن وقال: طب حاول انت تهدا وانا هحاول افهم من هاجر إيه حكاية مالك ده. 

عامر بص قدامه بغضب وشريف كان متوتر وقلقان من اللي جاي ومش عارف عامر ممكن يعمل ايه لو اتأكد ان في مشاعر متبادله فعلا بين آيات ومالك. 

رواية مكتوبة على إسمي بقلمي ملك إبراهيم. 

صباح اليوم التالي. 

هاجر دخلت الشركة عند بيسان وآيات وهي متوتره بعد اللي حصل إمبارح. 

دخلت غرفة الاجتماعات وشافت بيسان قاعدة شاردة وآيات قاعدة قصادها وبتبص قدامها بشرود. 

هاجر قربت منهم وقالت بتوتر: احم.. ممكن نتكلم. 

آيات بصتلها بغضب وهاجر اتكلمت بصدق: طب احلف لك ب إيه اني مكنتش اعرف ان عامر هيجي مع شريف. 

اتكلمت آيات بغضب: يعني شريف مقلكيش ان عامر هيرجع من السفر إمبارح ؟

ردت بتوتر: هو قالي انه هيروح يجيبه من المطار ومش هيقدر يجي الفيلا عشان كده طلبت منكم تيجوا معايا. 

آيات بعصبيه: وليه مقولتليش ان عامر هيرجع من السفر إمبارح. 

ردت هاجر بتوتر: عشان مكنتش عايزاكي تضايقي.

اتكلمت بيسان بهدوء وهي بتبص ل آيات وهاجر: خلاص يا آيات اللي حصل حصل وكده كده انتي وعامر كنتوا هتتقابلوا تاني. 

ردت آيات بارتباك: بس انا مكنتش عايزة اقابله بالطريقة دي. 

بيسان: الطريقة مش هتفرق يا آيات.. عامر خلاص بقى شخص غريب عنك وانتى لازم تتعاملي معاه على الاساس ده. 

لمعت عيون آيات بالدموع وقالت: عندك حق.. هو فعلا بقى غريب عني. 

اتكلمت هاجر معاها برجاء: طب ايه لسه زعلانه مني؟ 

آيات ابتسمت لها وقالت: خلاص مش زعلانه بس بتمنى ان ده ميتكررش تاني يا هاجر عشان خاطري.. انا مش حابه اقابل عامر تاني. 

هاجر هزت راسها بالايجاب ودخلت السكرتيرة قاطعة كلامهم وقالت: الباشمهندس عامر الجارحي موجود برا وطالب يقابل حضرتك. 

بيسان وآيات وهاجر بصوا للسكرتيرة بصدمة وهاجر ضحكت وقالت: انا قاعدة معاكم اهو معرفش انه جاي هنا والله. 

آيات بصت للسكرتيرة بتوتر وسألتها: هو قالك عايز يقابل مين بالظبط؟

ردت السكرتيرة بثقة: طلب يقابل حضرتك... بقلمي ملك إبراهيم. 

... يتبع 

عامر شكله منمش طول الليل من التفكير في آيات ومالك 😂 ياترى عامر رايح يقول ايه ل آيات وهي هتقابله ازاي🤔🤔وتفتكروا المقابله دي هتخلص علي خير بينهم ولا الشركة هتولع🔥🔥

تكملة الرواية من هناااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول من هناااااااااا

الرواية كامله الجزء الثاني من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا