رواية مكتوبة على إسمي( الجزء الثاني) الفصل الثالث عشر 13 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل الثالث عشر 13 بقلم ملك إبراهيم( حصريه وجديده في مدونة قصر الروايات)

رواية مكتوبة على إسمي( الجزء الثاني) الفصل الثالث عشر 13 بقلم ملك إبراهيم( حصريه وجديده في مدونة قصر الروايات)

#الحلقة_13

#الجزء_الثاني

#مكتوبة_على_إسمي

#بقلمي_ملك_إبراهيم

عامر قرب منها اكتر وهو بيبص لها وقال: يعني عايزة تقولي انك نسيتيني خلاص؟ 

آيات اتوترت اكتر من قربه ووشها احمر وعامر ابتسم لانه اتأكد انه لسه بيأثر في آيات ومشاعرها اتجاهه متغيرتش. 

بعدت عنه خطوتين للخلف وقالت بتوتر: لو سمحت متقربش مني كده.. لازم يبقى في حدود بينا لاننا دلوقتي اغراب. 

عامر ابتسم وهز راسه وقال: تمام زي ما تحبي يا باشمهندسه آيات. 

آيات بصتله بغضب وقالت: الا احبه انك تبعد عني وعن شغلي..انا فاهمه كويس انت بتعمل كل ده ليه!! عايز توقع شركتنا عشان تثبت لنفسك اني فاشله وافضل محتاجالك طول العمر!! 

رد عليها بهدوء: انتي شايفه كده ؟؟

آيات بصت له بغضب وقالت: هي دي الحقيقه مهما حاولت تخفيها..بس اللي في دماغك ده مش هيحصل يا باشمهندس عامر.. عارف ليه؟ لأن آيات البنت الصغيرة اللي انت اتجوزتها وهي لسه بالضفاير وسبتها خمس سنين ومشيت وهي زي الهبله كانت قاعده مستنياك ترجع ، كبرت.. كبرت خلاص ومبقتش تستناك تاني.. وهشتغل وهنجح وشركتي اللي انت عايز توقعها دي هتكون اكبر من شركتك وده وعد مني. 

عامر كان بيبصلها اوي وهي بتتكلم ونظراته ليها مكانتش مفهومه لكن اللي كان واضح في عيونه قد ايه هو بيحبها ومشتاق لها. 

آيات بصت له بغضب وخرجت من أوضة المكتب اول لما خلصت كلامها وهو سند على طرف مكتبه وهو بيبتسم. 

آيات خرجت باندفاع وقربت من هاجر وبيسان وخرجوا التلاته مع بعض من الشركة. 

شريف وامجد دخلوا مكتب عامر عشان يعرفوا ايه اللي حصل ولقوا عامر ساند على طرف مكتبه وبيبص قدامه بشرود وبيبتسم. 

شريف اتكلم معاه بغيظ: تعرف انا كنت مضايق منك بس بعد اللي آيات عملته فيك دلوقتي انا ناري هديت شويه وخدتلي حقي. 

اتكلم امجد مع عامر بفضول: هو ايه اللي حصل صوت آيات كان عالي ليه كده ؟؟

رد شريف علي امجد: لازم يبقى صوتها عالي.. مش شايف الباشمهندس خسر شركتها قد ايه؟

عامر بص لهم بطرف عينيه وقال: بزمتكم انتوا مش مكسوفين من نفسكم وانتوا اتنين مهندسين قد الدنيا وكنتوا هتسلموهم مشروع زي ده لشركتهم تنفذو!! 

شريف وامجد بصوا لبعض بدهشة وعامر هز راسه بقلة حيلة وقال: المشروع ده تبع مين ؟

رد امجد: تبع اياد المغربي. 

عامر بصلهم وقال: واياد المغربي ده معروف عنه ايه؟ 

شريف وامجد بصوا لبعض بصدمة لان اياد المغربي معروف ان سمعته مش كويسه ابدا وخصوصا في علاقاته النسائيه.. 

عامر كمل كلامه وقال: وموقع المشروع اللي في اخر الدنيا، دا غير طبعا سمعته اللي زي الزفت.. ولو كانوا استلموا المشروع ده كان التعامل بينهم وبين اياد هيكون مباشر وسفرهم كل يوم للموقع عشان يتابعوا الشغل وطبعا مش محتاجين أكمل وأقول ايه المضايقات اللي أياد كان هيسببها للبنات والكوارث اللي ممكن تحصل!! 

شريف وامجد بصوا لبعض بصدمة لانهم مفكروش في كل ده وكان هدفهم انهم يسلموا البنات مشروع كبير يرفع شركتهم وخلاص . 

شريف بص ل عامر وقال: احنا ازاي مفكرناش في كل ده!! 

رد عامر عليه بنبره ساخره: عشان حضرتك يا باشمهندس لغيت التفكير بعقلك وبقيت بتسلم المشاريع بقلبك وبس. 

شريف خفض وشه وامجد اتنهد وقال: عامر عنده حق.. احنا فعلا كنا هنرتكب خطأ كبير.

اتكلم شريف: والبنات مش هيفهموا كده!! دي هاجر في لحظة لغت الفرح وبتقول مفيش فرح اخر الشهر!

عامر ضحك وامجد بص ل عامر وضحك هو كمان.. شريف بصلهم بصدمة وقال: بتضحكوا على ايه!؟ 

اتكلم امجد: مش انت لوحدك إللي هتتعاقب يا صاحبي.. انا كمان بيسان فكرت اني بنتقم منها!.. وصاحبك اخد اللي فيه النصيب من آيات هو كمان. 

شريف بص على عامر بغيظ وقال: ماهو الباشا لو كان شرح لهم سبب سحب المشروع منهم مكنش كل ده حصل .. اتمنى انك تكون ارتحت كده. 

عامر بص له وهو ساكت وامجد قال بثقة: معتقدش ان في راحة من بعد اللحظة دي! انت مشوفتش إللي آيات عملته فيه. 

امجد وشريف ضحكوا وشريف قال: ريحت قلبي والله آيات واخدتلنا حقنا منه. 

عامر بص قدامه وهو بيضغط علي شفايفه بغيظ  وبيفتكر زعيق آيات وصراخها فيه وبص على ورق قدامه وقال:خلونا في شغلنا.. انا عايز ابلغكم قراري.. انا قررت ارجع الشركة تاني رسمياً من النهاردة.. 

وبصلهم بسخرية وقال: أكيد مش هسيب الشركة تنهار ومدرائها يوزعوا الشغل مجاملات واقف اتفرج عليها. 

شريف هز راسه وقال ل امجد: شكلها مفيش جواز ولا اخر الشهر ولا اخر السنه. 

رد أمجد وهو بيضحك: ولا اخر العمر.. بيقولك خلاص هو قاعدلك هنا. 

وبص ل عامر وقال: اتفضل قول حضرتك ايه المطلوب مننا بعد ما خربتها. 

رواية مكتوبة على إسمي بقلمي ملك إبراهيم. 

في الشركة عند بيسان وآيات وهاجر. 

دخلوا الشركة وهاجر بتتكلم بعصبيه: ماشي يا شريف بقى انا تعمل معايا كده!! 

اتكلمت آيات: شريف ملوش ذنب بلاش تظلميه يا هاجر. 

قعدت بيسان علي مكتبها واتكلمت بعصبيه: انا اللي غلطانه.. كان لازم من الاول احط لهم حد وميبقاش شغلنا معتمد عليهم. 

اتكلمت هاجر بعصبيه: انا مش قادرة اصدق انهم عملوا كده! 

اتكلمت آيات بثقة: شريف وامجد ملهمش ذنب في اللي حصل.. احنا من اول ما فتحنا الشركة وهما بيساعدونا وعمرهم ما قصروا معانا في اي حاجة ودايما بيدعموا شركتنا.. اللي عمل كده عامر. 

بيسان وهاجر بصوا ل آيات وبيسان قالت بدهشة: بس عامر هيعمل كده ليه! ؟ وبعدين هو بعيد عن الشركة بقاله فترة كبيرة ولسه راجع من كام يوم وأكيد ميعرفش حاجة عن شغلنا معاهم. 

اتكلمت آيات بثقة: صدقوني عامر اللي عمل كده وانا واجهته بالكلام ده وفاهمه كويس هو عمل كده ليه!! هو عايز يخسر الشركة عشان يثبت لنفسه اني هفشل من غيره ومستحيل انجح في اي حاجة وانا بعيد عنه! 

بيسان بصتلها بتفكير وقالت: عندك حق يا آيات.. بس انا مش هسمحله يخسرنا شغلنا.. انا عارفه مين صاحب المشروع اللي كنا هنستلمه وممكن نروح نتكلم معاه ونقدم له عرض أفضل كتير من شركة الجارحي ونخليه يسحب المشروع منهم وناخده احنا غصب عنهم. 

آيات اتحمست وقال: حلوة الفكرة دي يا بيسان.. بس انتي واثقه انه ممكن يوافق يسحب مشروع كبير زي ده من شركة كبيرة زي شركة الجارحي ويسلمه ل شركة صغيرة زي شركتنا!؟ 

ردت بيسان بثقة: عشان كده احنا لازم نقدم له عرض افضل كتير من شركة الجارحي ونروحله ونحاول نقنعه. 

آيات اتحمست وقالت: هتبقى ضربه قويه ل عامر لو اخدنا المشروع ده غصب عنه. 

بيسان هي كمان اتحمست وقالت: انا هحاول اخد ميعاد مع صاحب المشروع ونروح نقابله في أسرع وقت.

اتكلمت هاجر بفضول: هو مين صاحب المشروع ده؟؟

ردت بيسان: اسمه اياد المغربي ومعرفش اي معلومات تانيه عنه بس هحاول اوصله ب اي طريقه ونقنعه ان شركتنا هتنفذ المشروع ده أفضل من شركة الجرحي. 

آيات اتحمست وهي من جواها بتتمنى انهم يتوفقوا في اقناع صاحب المشروع عشان تثبت ل عامر انها تقدر تنجح من غيره. 

فاقت آيات من شرودها على صوت هاجر وهي بتقول : يعني انا كده اتسرعت لما ظلمت شريف وقولتله مفيش فرح! 

ردت بيسان عليها: واضح انك ظلمتيه لان آيات معاها حق وشريف ملوش مصلحة انه يسحب مننا المشروع.. انا من رأيي ان انتوا لازم تعملوا الفرح في اسرع وقت عشان عامر يحضره ويسافر تاني لانه طول ما هو هنا هيوقف لنا شغلنا كله واحنا معظم شغلنا معتمد على الشركة بتاعهم. 

آيات بصت ل بيسان بحزن لما اتكلمت عن سفر عامر مرة تانيه واتنهدت بحزن وقالت: اللي حصل ده لازم يعلمنا يكون لنا شغل خاص بينا ومستقل ومنبقاش معتمدين على حد تاني. 

اتكلمت هاجر بخجل: انا مش عارفه ازاي هرجع في قراري قدام شريف بعد ما قولتله مفيش فرح. 

ردت بيسان وهي بتضحك: اطمني يا حبيبتي شريف مش هياخد علي كلامك وهيكمل كل تجهيزات الفرح ولا كأنك قولتي حاجة. 

وبصت ل آيات بطرف عينيها وقالت: المهم دلوقتي تعملوا الفرح بسرعة قبل ما عامر يرجع للشركة رسمي.

اتكلمت آيات بغضب: عامر مش هيقدر يعملنا حاجة تاني! 

ردت بيسان: ميبقاش عامر الجارحي لو مستلمناش ضربه ورا التانيه. 

تليفون هاجر رن برقم اخوها امجد.. بصتلهم وقالت: دا ابيه امجد اللي بيتصل! 

بيسان اتوترت وآيات قالتلها: ردي بسرعة. 

هاجر ردت علي امجد وسمعت صوته بيقولها: هاجر انتي في الشركة عند بيسان؟ 

ردت هاجر: اه يا ابيه. 

امجد: تمام.. عرفيها ان في اجتماع في شركتنا بكره وهما لازم يحضروا. 

هاجر بصت ل بيسان وآيات بدهشة وقالت: اجتماع ايه؟ ؟

امجد: اجتماع يا هاجر هنا في شركة الجارحي وبيسان وآيات لازم يحضروا عشان هنتكلم في المشاريع المشتركه بينا. 

هاجر هزت راسها وقالت: حاضر هقولهم. 

قفلت المكالمة وهي بتبص ل بيسان وآيات وقالت: في اجتماع في شركة الجارحي وانتوا لازم تحضروا.. بيقول هتتكلموا في المشاريع المشتركه بين الشركتين. 

بيسان وقفت وقالت بثقة: مش قولتلكم.. عامر الجارحي مش هيكتفي ب اللي هو عمله. 

آيات اتكلمت بعصبيه: هو عايز مننا ايه!!؟ 

ردت بيسان: هو مش عايز مننا احنا.. عايز منك انتي يا آيات. 

آيات بصتلها بدهشة وبيسان قالت بثقة: عامر اتجنن لما شافك مع مالك واتجنن اكتر لما جه الشركة هنا وسمع مالك وهو بيكلمك يطمن عليكي في التليفون. 

ردت آيات بعفويه: بس انا ودكتور مالك مفيش بينا حاجة اصلا! ازاي يفكر في كده دا الدكتور بتاعي!!

اتكلمت بيسان: بس وجود مالك كفايه انه يحرك غيرة عامر عليكي وللسبب ده اتجنن كده وعمال يخبط فينا. 

آيات بصتلهم بصدمة وقالت: لا هو صعبان عليه انه لما رجع لقاني لسه عايشه! كان عايز يرجع يلاقيني ميته عشان يرتاح. 

اتكلمت هاجر بحزن: بس عامر لسه بيحبك يا آيات. 

ردت آيات بغضب: انا مش عايزة حد يحبني يا هاجر.. انا تعبت ونفسي اعيش حياة طبيعيه زي كل الناس.. هو مش طلقني وسبني مرميه في المستشفى من سنه وسافر.. راجع عايز مني ايه ؟ عايز يدمر حياتي تاني!

وقامت فجأة وقالت بأصرار: بس لو حتي عايز يدمر حياتي انا مش هسمح له يعمل كده ويضيع تعبنا ومجهودنا في الشركة. 

بيسان اتكلمت معاها: اهدي يا آيات وانا هتصرف متقلقيش والشركة ان شاء الله مش هيحصل فيها اي مشكله.. انا هروح لهم بكره الاجتماع واعرف هما عايزين مننا ايه بالظبط وعلى الاساس ده هتصرف معاهم. 

اتكلمت هاجر بقلق: بس آيات لو حضرت الاجتماع ده مع عامر هتحصل مشاكل اكتر. 

ردت بيسان: آيات مش هتحضر.. انا وانتي اللي هنروح الاجتماع. 

آيات بصت ل بيسان وبيسان هزت راسها وقالت لها بثقة: انتي روحي جامعتك بكره عادي جدا وانا وهاجر هنحضر الاجتماع ونشوف بقى الباشمهندس عامر بيخطط ل ايه بالظبط. 

آيات هزت راسها بالايجاب وقعدت تفكر بغضب وعناد إزاي توقف عامر وتبعده عنها وعن حياتها. 

رواية مكتوبة على إسمي بقلمي ملك إبراهيم. 

في نهاية اليوم. 

هاجر رجعت بيتها ولقت امجد اخوها قاعد بيشرب القهوة مع والدته واول لما شافها قال بغضب: اهلا بالهانم اللي بتاخد قرارت من نفسها وعايزة تلغي فرحها اللي بعد كام يوم. 

شهقت والدتها بصدمة وقالت: انت بتقول ايه يا امجد!!! 

وبصت ل هاجر وقالت بغضب: ايه الكلام اللي اخوكي بيقوله ده! ؟ فرح ايه اللي يتلغي انتي عايزة الناس تتكلم في حقنا كلام مش كويس ويقولوا ليه الفرح اتلغي قبلها بكام يوم! 

امجد بص لوالدته بدهشة وقال: هو ده اللي بتفكري فيه يا امي! الناس وكلام الناس! مش تفكري في خطيبها إللي ملوش ذنب في حاجة والهانم عايزة تحاسبه علي حاجة ملوش علاقة بيها! 

هاجر قعدت قدامهم وقالت بتوتر: يا ابيه امجد انا عارفه ان شريف ملوش ذنب وانا اتسرعت في كلامي بس بصراحة إللي عامر عمله معانا ده سخيف جدا وميصحش. 

رد امجد بغضب: عامر عمل شغله يا هاجر وانتي لازم تتعودي من دلوقتي انك تفصلي بين حياتك الشخصيه والعمليه وعلاقتك ب شريف لازم تفصليها عن شغلك ومش أي مشكله تقابلكم في الشغل تحاسبي شريف عليها وتهدديه بالطريقه السخيفه اللي عملتيها دي!! لازم تقدري ان خطيبك راجل محترم ومهندس كبير له اسمه ومينفعش تحرجيه قدامنا زي ما عملتي النهاردة. 

اتكلمت والدته بغضب: وليه تشتغل اصلا هي مش محتاجة شغل! وبعدين انا من الاول كنت رافضه شغلها ده. 

اتكلمت هاجر بضيق: ليه يا ماما.. انا نفسي افهم ايه اللي يضايقك ان انا اشتغل مع بيسان وآيات وهما اقرب اصحاب ليا ومرتاحه جدا في الشغل معاهم. 

والدتها انتفضت بعصبيه لما سمعت اسم بيسان وقالت: والله بكره تتجوزي وميبقاش عندك وقت غير ل بيتك وجوزك وغصب عنك هتبعدي عنهم بدل ما يخربوا حياتك زي ما خربوا حياتهم. 

هاجر وامجد بصوا لوالدتهم بصدمة بسبب قسوة كلامها عن بيسان وآيات واتحركت والدتهم على غرفتها وامجد قام وقف وقال ل هاجر: متستغليش حب شريف ليكي بالطريقة دي يا هاجر وقدري ان هو بيحبك.. نصيحه بلاش تخسريه. 

هاجر خفضت وشها بخجل واخوها طلع علي غرفته وهي قعدت تفكر ازاي تصالح شريف وكانت ندمانه فعلا علي اللي عملته. 

رواية مكتوبة على إسمي بقلمي ملك إبراهيم. 

صباح اليوم التالي. 

آيات راحت الجامعة وكان عندها المحاضرة الأولى ل دكتور مالك اللي من اول ما دخل وعينيه كانت عليها ومركز معاها بطريقة ملفته وآيات بدأت تحس بتوتر من نظراته وخصوصا بعد كلام بيسان معاها إمبارح عن غيرة عامر من دكتور مالك.

فجأة جتلها رساله على تليفونها واول لما بصت علي التليفون شافت رقم مالك هو مرسل الرساله. 

اتوترت اكتر وبصت علي تليفونها بصدمة وبصت ل مالك اللي كان واقف طبيعي جدا وبيشرح. 

فتحت الرساله وايديها كانت بترتجف ودقات قلبها بتزيد. 

"حمدلله على السلامه نورتي مكانك" 

آيات اول لما قرأت الرساله اتوترت اكتر وقفلت تليفونها بسرعه وزميلتها اللي قاعده جمبها حست بتوترها وسألتها: آيات انتي كويسه؟ 

هزت راسها بتوتر وبصت على مالك شافته بيبتسم وكمل شرح وهي قاعدة طول المحاضره متوتره وخايفه من اللي بيحصل. 

بعد انتهاء المحاضره آيات قامت بسرعه عشان تخرج او بمعني اصح تهرب من الكلام معاه لكن رساله منه وصلت ل تليفونها وقفتها. 

"آيات ياريت تيجي مكتبي عايز اتكلم معاكي في موضوع مهم"... بقلمي ملك إبراهيم. 

.... يتبع 

ياترى مالك عايز يتكلم مع آيات في ايه معقول هيطلب ايديها🤔😂😂♥️ احنا ظلمنا عامر يا جماعة هو سحب المشروع منهم عشان يحميهم بس الاميرات بتوعنا هيروحوا برجليهم ل أياد المغربي💔😂 

تكملة الرواية من هناااااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول من هناااااااااا

الرواية كامله الجزء الثاني من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا