رواية مكتوبة على إسمي( الجزء الثاني) الفصل السادس عشر 16 بقلم ملك إبراهيم( حصريه وجديده في مدونة قصر الروايات)
رواية مكتوبة على إسمي( الجزء الثاني) الفصل السادس عشر 16 بقلم ملك إبراهيم( حصريه وجديده في مدونة قصر الروايات)
#الحلقة_16
#الجزء_الثاني
#مكتوبة_على_إسمي
#بقلمي_ملك_إبراهيم
عرفته من صوته واول لما رفع أيديه بعيد عن شفايفها اتكلمت بغضب: انت اتجننت ازاي تعمل كده؟
رد عامر وهو بيبصلها بغضب: انتي اللي اتجننتي ومش عارفه انتي بتعملي ايه! وبعدين مين مالك ده اللي رايح جاي وراكي في كل مكان؟؟
آيات بصتله بقوة وقالت: بتسأل بصفتك ايه؟
عامر بصلها اوي وهو بيقرب منها اكتر وقال: مش ده الرد اللي انا منتظره منك.. ياريت تردي على سؤالي وبس والا هيكون ليا تصرف معاه مش هيعجبك.
آيات دفعته في صدره بعيد عنها وقالت بخوف: ابعد عني لو سمحت وملكش دعوة بحياتي ولا بتصرفاتي.
وكانت لسه هتتحرك عشان تبعد عنه لكنه مسكها من أيديها وشدها عليه وقرب منها اكتر واتكلم قدام شفايفها: اومال مين اللي له دعوة؟!
آيات بصتله بتوتر وهو قريب منها وقلبها كان بيدق بسرعة ووشها احمر وهمست بارتباك: عامر ابعد..
عامر قرب اكتر وهمس لها: مش هبعد يا آيات.. دا مكاني.
آيات للحظات شردت في عيونه وكانت هتستسلم ليه لكن صوت جواها فوقها وفكرها ب اللي هو عمله فيها وب طلاقهم وسفره وعذابها ودموعها طول غيابه .
دفعته فجأة بعيد عنها وقالت بغضب وتحذير: متفكرش اني هضعف ليك يا عامر.. انا مبقتش البنت الصغيره اللي بتضعف قصادك اول لما تقرب منها ولا بتفرح بأقل كلمه حلوه منك.. انا كبرت خلاص واتغيرت وبقيت اقدر اتحكم في مشاعري ومش هسمحلك تتحكم فيا تاني.
عامر بصلها اوي وقال: انا كنت بتحكم فيكي امتى؟ بتسمي خوفي عليكي تحكم!!
ردت آيات بعصبيه وعناد: معرفش انا نسيت الماضي خلاص.
اتكلم عامر بغيظ: ماضي ايه اللي نسيتيه!؟ هو انتي بتقولي أي كلام وخلاص!!..
ومسكها من دراعها وقال بصوت قوي: اسمعيني كويس.. اللي اسمه مالك ده مش عايز المحك بس واقفه معاه.. انتي فاهمه.
آيات فهمت انه غيران عليها من مالك وفرحت من جواها لكنها اخفت فرحتها و ردت عليه بتحدي: دا شئ ميخصكش يا باشمهندس ومن فضلك حياتي الخاصه تخصني انا وبس.
قالت كلامها واتحركت من قدامه ودخلت القاعه بسرعه.
عامر هز راسه وقال بغضب: ماشي يا آيات.. هتشوفي انا هعملك فيه ايه لو بس قرب منك تاني.
--------
آيات دخلت القاعة بسرعة ولقت بيسان بتقرب منها واخدتها من أيديها وقالتلها: انتي كنتي فين تعالي يلا هاجر هترمي البوكيه وكل البنات متحمسين هناك.
آيات كانت مش سامعه بيسان ولا حاسه بكل إللي بيحصل حواليها وكانت لسه شارده في عامر وكلامه وقربه منها.
بيسان اخدتها من ايديها ووقفوا وسط البنات وعامر وقف على باب القاعة يبص علي آيات وهي واقفه وسط البنات وعلى الجانب التاني كان مالك واقف وبيبص على آيات بأعجاب وبيتمنى البوكيه يكون من نصيبها.
هاجر وقفت وهي ماسكه البوكيه وآيات بصت على البوكيه اللي في ايد هاجر وهي بتحركه وكل البنات متحمسين وافتكرت لما كان عندها 14 سنه وكانت هتتجوز راجل عجوز وفجأة ظهر عامر واتجوزها وسافر ونسيها خمس سنين وهي هربت من ابوها ومراته عشان تدور علي عامر.. وافتكرت زوزو اللي اخدتها من محطة القطر وكانت هتخطفها وافتكرت هاجر لما قابلتها اول مرة ومساعدتها ليها وشغلها في شركة امجد وافتكرت لما قابلت عامر وعرفت ان هو جوزها وحياتهم مع بعض وكل المشاكل اللي عاشوها وافتكرت حملها وابنها اللي مات في بطنها قبل ماتشوفه وافتكرت لما عامر سابها في المستشفى لوحدها ولما عرفت انه طلقها وسابها بدون ما يسأل عنها ودموعها وسهرها الليالي الطويله طول بعاده عنها... فاقت من شرودها وهاجر بترمي بوكيه الورد في اتجاه آيات واول لما حست ان البوكيه بيقرب منها هي رجعت بخطواتها بعيد عشان ميجيش عليها وكانت دموعها بتنزل من عينيها بغزاره وهي بتبعد عن البوكيه بخوف ومش عايزاه يقرب منها او يجي عليها.
مالك استغرب جدا واتصدم من اللي آيات عملته وعامر بصلها بحزن وحس بوجع جامد في قلبه لان هو اللي وصلها للحالة دي.
البوكيه وقع على الأرض قدام آيات وهي بصت للبوكيه وخافت حتى تلمسه وبيسان قربت من آيات وضمتها لحضنها بحنان وآيات بكت جوه حضن بيسان ومالك اصبح عنده فضول رهيب انه يعرف ليه آيات عملت كده وعامر كان نفسه يقرب من آيات ويضمها لحضنه ويطمنها ويعتذر لها ويعوضها عن كل الوجع إللي اتسببلها فيه لكنه محبش يضغط عليها وسابها تهدا وبيسان اخدتها وراحوا الحمام.
ميسرة وعم آيات اندمجوا جدا مع بعض وطول الفرح كانوا بيتكلموا ومستمتعين جدا بكلامهم وتعارفهم.
والدة امجد كانت طول الفرح بتحاول تشغله مع المعازيم والقرايب عشان تبعده عن بيسان بعد ما لاحظت ان امجد بيحاول يقرب من بيسان بكل الطرق.
عند شريف وهاجر.
هاجر كانت كل ما تحس ان وقت انتهاء الفرح بيقرب كانت بتتوتر اكتر وشريف متابعها وهو بيضحك وهمس لها: خلاص يا جوجو كلها ساعة وتبقي بين ايديا.
هاجر بصتله بصدمة وقالت: لا طبعا انا هرجع البيت مع ماما بعد ما الفرح يخلص.
شريف بصلها بصدمة وقال: نعم ياختي!!! بقى بعد الفرح والمصاريف دي كلها وتقوليلي اروح مع ماما!
اتكلمت هاجر برقه: شريف انت بالطريقه دي بتخوفني علي فكرة.
شريف مسك ايديها وقربها من شفايفه وقبلها برقه وقال: انا مقدرش اخوفك يا روحي بس انتي لازم تقدري اللي انا فيه شويه.. شوفي احنا مخطوبين بقالنا قد ايه وانا مستني اليوم ده بفارغ الصبر.
اتكلمت هاجر بخجل: وانت لازم تقدر ان انا خايفه ولازم تطمني مش تخوفني اكتر.
شريف وهو بيبتسم: حاضر ياروحي انا هطمنك اكتر بس نروح بيتنا ويتقفل علينا باب بس وسيبي الباقي عليا.
هاجر بصتله بصدمة وقالت: لااا انا مستحيل اروح معاك انا هروح مع ماما.
شريف بنفاذ صبر: طب خلاص احنا هنروح البيت نتعشا وننام بس ايه رأيك.
هاجر بتوتر وخوف: نتعشا وننام بس انت وعدتني.
همس شريف لنفسه: نروح بس البيت يا هاجر.. وبصلها وقال: طبعا يا حبيبتي انا وعدتك.
رواية مكتوبة على إسمي بقلمي ملك إبراهيم.
عند عامر وهو واقف في القاعة كان بيتكلم مع واحد من المعازيم.
دخلت لولا وهي لابسه فستان جميل جدا وحجاب بنفس لون الفستان واول لما قربت من عامر عشان تسلم عليه معرفهاش وسألها بدهشة: حضرتك تعرفيني؟
ضحكت وقالت: معقول يا باشمهندس معرفتنيش.. انا لولا...
عامر بصلها بصدمة ورجع خطوة للخلف يبصلها بنبهار.
في نفس اللحظة كانت آيات راجعة القاعة مع بيسان وشافت عامر واقف وقدامه بنت وضهرها ل آيات ووشها ل عامر وهو بيبصلها بنبهار وبيضحك بسعادة وبيتكلم معاها.
عامر: مش معقول!!
اتكلمت لولا بسعادة: كله بفضلك بعد ربنا يا باشمهندس.. والحمدلله دلوقتي ربنا تاب عليا واتجوزت راجل محترم وبيحبنى وبقيت بساعد البنات عشان يعيشوا بالحلال وفتحت مصنع كبير بشغل فيه كل البنات اللي محتاجين شغل وفي بنات كتير تابو علي أيدي وبيشتغلوا معايا ويكسبوا بالحلال.
عامر بسعادة: انا مش قادر اصدق ومش عارف اوصفلك انتي فرحتيني قد ايه بالكلام ده.
آيات كانت متابعاهم من بعيد ومش عارفه مين البنت المحجبه اللي واقفه مع عامر والسعادة الكبيرة الواضحة على ملامح عامر وهو بيتكلم مع البنت.
آيات حست بالغيرة وكان نفسها تروح تخنق البنت اللي واقفه مع عامر ومش قادره تصدق ان في بنت قدرت تجذب انتباهوا ليها بالطريقه دي!
بعد وقت لولا انتهت من الكلام مع عامر وشكرته ومشيت وعامر كان واقف يبتسم وهو حاسس بالراحة بعد ما شاف لولا وعرف الخير إللي هي بتعمله.
آيات عيونها كانت عليه ومعرفتش لولا لان شكلها كان متغير جدا وكان عندها فضول رهيب تعرف مين البنت دي لكن كبريائها منعها تسأل او تظهر اهتمامها قدام اي حد حتى نفسها.
بعد لحظات ظهرت بنت تانيه مش محجبه وكانت لابسه فستان قصير وضيق جدا وقربت من عامر عشان تسلم عليه.
عامر ابتسم لها بمجامله والبنت كانت واقفه تتكلم معاه وتضحك برقه مبالغ فيها وقدرت تستفز آيات.
آيات زفرت بضيق وهي هتموت من الغيره اكتر وهمست لنفسها: هو في ايه!! هي واحده تمشي التانيه تيجي!! وشاطر بس يقولي كلمي ده ومتكلميش ده!!
آيات مقدرتش تتحمل انها تشوف بنت غيرها واقفه مع عامر وكبريائها منعها انها تروح تجيب البنت من شعرها وتضربها وتبعدها عنه وحاولت تشغل نفسها ب أي حاجة عشان متتهورش وتروح تضرب البنت!
وقفت تدور علي بيسان وشافتها واقفه في اخر القاعه ومامت امجد واقفه تتكلم معاها وواضح انها بتزعج بيسان بكلامها وفجأة شافتهم الاتنين خارجين من القاعه.
آيات اضايقت من مامت امجد واتحركت بخطوات سريعه وراهم. .
عامر كان ملاحظ نظرات آيات وهي واقفه تبص عليه من بعيد وهو واقف مع لولا وشاف غيرتها اكتر لما البنت دي جت سلمت عليه.
تابعها بنظراته وهي بتخرج فجأة من القاعه واعتذر من البنت واتحرك بسرعه وخرج ورا آيات.
آيات اول لما خرجت من القاعه شافت مامت امجد وهي بتزعق في بيسان وبتحذرها.
مامت امجد: انا حذرتك كتير تبعدي عن ابني وانتي مصممه تتحديني وهتجبريني آذيكي.
اتكلمت بيسان بحزن: صدقيني انا ببعد عن امجد طول الوقت وهو...
قاطعتها مامت امجد: وهو ايه!!؟ عايزه تفهميني ان ابني هو اللي بيجري وراكي!
ظهر صوت آيات من خلفها: ااه ابنك هو اللي بيجري وراها.
مامت امجد اتفاجأت من صوت آيات وقربت آيات من بيسان ووقفت جنبها وهي بتبص ل مامت امجد بتحدي وقالتلها: مشكلتك مع ابنك مش مع بيسان.. خليه هو اللي يبعد عنها لو تقدري.!
مامت امجد بصت ل آيات من فوق ل تحت بنظرات ساخره وقالتلها: وانتي بتتكلمي معايا بالطريقه دي بصفتك ايه!!
آيات: بصفتي صحبتها وعارفه ان ابنك لو لف الدنيا كلها مش هيلاقي بنت في أخلاق بيسان.
ضحكت مامت امجد بسخريه وقالت: اخلااق!! هي صحبتك معرفتكيش ماضي عيلتها المشرف!! عن امها الخاينه وابوها القاتل!! اخلاق ايه يا حبيبتي اللي بتتكلمي عنها!!
بيسان بكت بقهره وهي سامعه اهانتها ومش قادره تتكلم وآيات اتعصبت اكتر وقالتلها: انتي ازاي معندكيش رحمه كده.. هو قلبك ده حجر!
ردت مامت امجد بسخريه:انا مش فاهمه انتي بتدافعي عنها ليه!! لتكوني فاكره ان انا زي ميسرة وهقبل ان ابني يجيب واحده من الشارع ويتجوزها ويكتبها علي اسمه.
صوت عامر القوي وقفها عن الكلام وهو بيقرب منهم: ايه اللي بيحصل هنا!!؟؟
شاف الحاله اللي بيسان فيها ونظرات آيات اللي كلها غضب وانفعال مامت امجد..
بصلهم بدهشة وهو مستني منهم تفسير للي بيحصل.
مامت امجد رسمت البراءة علي ملامحها وقالتله: البنات بيقولوا انهم تعبوا وعايزين يمشو وانا كنت بحاول اقنعهم يكملوا معانا الفرح للاخر بس هما مصممين يمشو..
وبصت للبنات وقالتلهم: خلاص يا حبايبي امشو انتوا وانا هعرف هاجر ان بيسان تعبت ومقدرتش تكمل الفرح وآيات اضطرت تمشي معاها.
آيات بصتلها بصدمة وقالت بانفعال: انتي ازاي كده..!! تعرفي لو مكنتيش ام هاجر انا كان هيبقى ليا تصرف تاني معاكي.
عامر اتصدم من اندفاع آيات وكلامها مع مامت امجد بالطريقه دي وزعق ل آيات: آياااات.. انتي ازاي تتكلمي مع مامت صحبتك بالطريقه دي!!
آيات بصتله بغضب وعيونها بتلمع بالدموع وقالتله: طبعا لازم تدافع عنها ما انتوا زي بعض.. فاكرين انكم اتخلقتوا من دهب واحنا اتخلقنا من طين!...
وبصت ل مامت امجد وقالتلها: لو وقفتي قدام بيسان تاني في اي طريق انا اللي هقول ل امجد كل حاجة بنفسي وهعرفه ان انتي فرقتي بينه وبين بيسان...
وبصت ل عامر بغضب وكملت كلامها: وهقوله ان انتي مش زي ميسره هانم ومش هتقبلي ان ابنك يتجوز واحدة من الشارع ويكتبها على اسمه.
عامر اتصدم من كلام آيات وبص ل مامت امجد اللي خفضت وشها في الأرض وآيات مسكت ايد بيسان وقالتلها: يلا يا بيسان نمشي من المكان ده...
صوت عامر القوي وقفها: استني يا آيات...
وبص ل مامت امجد وقالها: حضرتك اللي قولتلي ل آيات الكلام ده!؟
مامت امجد بصتله بقوة وقالت: انا حره في اختيار البنت اللي تليق ب اسم عيلتنا ومش هسمح ان حياة ابني تدمر زي حياتك وابنه يموت بسبب واحدة مستهتره زي اللي انت كنت متجوزها....
وبصت ل آيات بسخريه وقالت: انت جربت تتجوز واحدة من الشارع وشوفت نتيجة غلطتك..
رد عليها عامر بقوة: البنت اللي انا اتجوزتها مش من الشارع.. مراتي لها اهل وعيله ومتربيه وانا لاخر يوم في عمري هفضل اتشرف انها مراتي ومكتوبه علي إسمي..
آيات بصت له بصدمة لانه قال عنها مراتي وبيسان ومامت امجد بصو له باستغراب ومفيش حد فيهم فاهم معنى كلامه لانه بيتكلم عن آيات وكأنها لسه مراته.
عامر كان في شدة غضبه من مامت امجد وكلامها الجارح ل مراته وكمل كلامه معاها بغضب: الحاجة الوحيدة اللي هتمنعني احاسبك على غلطك في مراتي هو ابنك امجد لان ابنك إنسان محترم ومش ذنبه ان انتي امه.
آيات بصت ل عامر بصدمة وهي فرحانه من جواها لانه دافع عنها ، ومامت امجد بصتله بغضب وقالت بعصبيه: خليك ماشي وراها انت حر بس ملكش دعوه ب ابني، انا مش هسمحله يغلط غلطتك...
وبصت علي آيات وبيسان بغضب وقالت: انا مستحيل اجوز ابني ل بنت من المستوى ده!
وبصت ل بيسان وقالتلها بتحذير: وانتي دا اخر تحذير ليكي.. لو مبعدتيش عن ابني انا هدمرك يا بيسان...
وبصت ل عامر وكملت كلامها: ومفيش حد هيقدر ينقذك من اللي هعمله فيكي.
انتهت من كلامها وسابتهم ومشيت وعامر بص ل بيسان وايات وسألهم بصوت قوي: انا عايز اعرف ايه اللي بيحصل بالظبط وليه هي عايزة تفرقك عن امجد.
بيسان انهارت اكتر في البكاء وقالت: هي حره وانا مش عايزه ابنها.. تبعد عني هي وهو.
عامر بص ل آيات اللي كانت بتبصله بحب بعد ما دافع عنها وعامر فهم نظراتها ويمكن نظراتها دي اللي هدته شويه وقالهم: طب تعالوا كملوا الفرح ونبقى نكمل كلامنا لما تهدوا.
اتكلمت بيسان باعتراض: لا انا مش هرجع الفرح ده تاني انا عايزة امشي.
اتكلمت آيات معاها: انا جايه معاكي.
بيسان ببكاء: لا يا آيات ارجعي انتي عشان هاجر متبقاش لوحدها ومتقلقيش عليا انا كويسه والله وهكون احسن لو بقيت لوحدي شويه..
وبصت ل عامر وقالتله: خلي بالك من آيات يا عامر ومتسمحش ل مامت امجد تضايقها.
عامر أتكلم مع بيسان: طب اهدي يا بيسان وتعالي معايا انا هوصلك.
بيسان ببكاء: لا انا كويسه وارجوكم محتاجة اكون لوحدي شويه.
واتحركت بيسان بخطوات سريعه وخرجت من الفندق كله وآيات كانت لسه واقفه مكانها وزعلانه عشان بيسان.
عامر قرب من آيات وسألها: آيات قوليلي في ايه بين بيسان وبين مامت امجد؟
آيات بصتله بتوتر وقالت: مامت امجد رافضه بيسان وهي اللي طلبت منها انها تسافر وتبعد عن امجد ومش بتفوت اي فرصه غير وتضايقها زي ما انت شوفت كده.
عامر هز راسه بتفهم وقال: امجد لازم يعرف الكلام ده.
آيات اتوترت وقالت: بس بيسان مكانتش عايزه امجد يعرف عشان ميحصلش مشكله بينه وبين مامته بسببها.
عامر بصلها اوي وقال: لا يا آيات.. امجد من حقه يعرف عشان يدافع عن حبه.
آيات بصت ل عامر اوي وهزت راسها وقالت: على كل حال انا كنت عايزة أشكرك لانك دافعت عني.. بس مكنش له لزوم انك تقولها مراتي.
رد عامر عليها: انا قولتلها الحقيقه.
آيات بصدمة: تقصد ايه؟
عامر بصلها اوي وقرب منها وقالها: انتي لسه مراتي يا آيات انا مطلقتكيش.
آيات بصتله بصدمة وذهول واتجمدت مكانها وكأن كل ساعات الكون وقفت عند اللحظة دي ومبقتش تتحرك... بقلمي ملك إبراهيم.
.... يتبع
تفتكروا آيات هتقبل انها لسه مرات عامر ولا هتعاند تاني معاه🤔🔥♥️
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله الجزء الاول من هناااااااااا
الرواية كامله الجزء الثاني من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
 الفصل السادس عشر 16 بقلم ملك إبراهيم( حصريه وجديده في مدونة قصر الروايات) رواية مكتوبة على إسمي( الجز…){kind=link}
تعليقات
إرسال تعليق
فضلا اترك تعليق من هنا