رواية المفقودة الفصل الرابع 4بقلم زينب ماجد (حصريه وجديده في مدونة قصر الروايات)
رواية المفقودة الفصل الرابع 4بقلم زينب ماجد (حصريه وجديده في مدونة قصر الروايات)
المفقودة
((( بقلم زينب ماجد )))
الحلقة_٤
( الوقوع في القضية)
سحبني منير ودخلني بغرفة المكتب
اني ارجف وخايفة ومريضة كلش والانفلاونزة كاصة خشمي گص .. بس اجر بخشمي .. وابجي ..
جر باكيت الإكلينكس وشمره بوجهي وكال : كفي هالعيارة هاي وباوعيلي شايفة اذا ما حجيتي الحقيقة راح تنجلدين مثل صاحبج .
- والله ما اعرف شي
صرخ : هشششششش كلمة ما اعرف ما اريدها، جاوبني من جنتو بالميتم هم جنتوا ******* ( فشر )
كمت ابجي واهز راسي
اذني اتسممت من هيج كلمات يحاجيني بيها ..
جرني من راسي كال : ويا منو تلتقي صاحبتج ؟
- ما جنه نطلع بالميتم ابد وما جنا نشوف احد ولا اي رجال بس بالافلام .. والحارس حجي جبير .
- جانت تكعد ويا الحجي
- لا ما جانت باجي ترضى نكعد ويا متقبل
- ومن اجيتو للفندق ويا منو جانت تلتقي ويا منو تمشي حجتلج اذا صار وياها موقف ويا احد النزلاء لو شي
- والله لا ما كالت
- اسمعي .. تمشين بشوري امشيج على ذهب .. تصيرين عيني واذني بكل مكان واراقبج اذا مشيتي عدل تعرفين شنو اسوي ؟
رافعة ايدي واخاف يطكني وهو يحجي ويهدد بيده وسحبني من راسي : لا اخلي خمس ولد يلزموج ويعلموج شلون تتأدبين وانت تعرفين شلون يأدبوج
دفعني .. وطلع كمت ابجي
ابجي بهستيريا معقولة مالنا مكان نروحلة ؟
راح ارضى ابقى كل عمري بين اديهم هيج يكتلوني يتعدون عليه .. وراح نبقى تحت اديهم لا حول ولا قوة !؟
ما اريد ابقى .. راضية لو نبقى بالشارع .. بس ما نبقى عدهم .
لما بعد الساعة دخل منير ووياه شخص كاله : تاخذ هاي وترجع بيها للفندق .. واني ابلغكم شوكت نطلبها .. بس بلغهم يحطون عينهم عليهن .. هاي الوضعية مال مرض وعطاس وتجر بخشمها ما اريدها .. سببتولي مشكلة شكلرها اليوم ما اريدها تنعاد مفهوووم ؟
- مفهوم أستاذ
اشرلي : يلا امشي
حجيت : وبان مراح تجي ؟
صرخ : امشي لج كح****
فزيت من صرخته وانداريت عنه امشي بسرعة صعدت ويا الولد وصلني للفندق ونزل وياي لغرفة الادارة .. كال : ابقي هنا
وراح .. شوية واجت منال
- فوتي عيني فوتي عبالنا بنات صغار وعلى نياتجن طلعتن بايعاتها
- بان شحيسوون بيها ؟
- انت الصمي وصمي حلكج لا يلوحج اللي لاحها .
دفعتني حتى امشي مشتني لغرفتي ودخلت ويايا حجت : تعرفين ويا منو صار موضوعها
- لا
- محجتلج يعني اذا هي تحب احد او معجبه بيه ؟
اتذكرت اريان .. بس نكرت وكلت الها : ما اعرف شي
- صحيح صدگتج ، حتى لو جانت بان بايعتها بس تصل احسن منج .. انت لا اجرعج ولا اطيقج .
عافتني ومشت بقيت كاعدة بغرفتي وافكر شراح يصير ببان وشحيسوون بيها .. اريد انام اغفى مدا اكدر المناظر تلتم بذاكرتي من اخذها للغرفة والموقف .. والحارس اللي تحارش بيه .. تنهدت .. كلش ما اتحمل هالوضع وما اعرف شلون راح اخلص منه .
ثاني يوم وبان ممبينة ..
كعدت الصبح اشتغلت ووكفت بالبوفيه .. واريان ينقلي .. سألني : بان وينها ؟
- اخذوها البارحة
- وين اخذوها
- روح هسه بعدين نحجي
مشى كملت شغلنا ووكفت اغسل مواعين .. وكف هو يساعدني ويناوشني المواعين ويتهامس وياي : وين اخذوكم ؟
- حفلة وشخص جبير راد يتزوج بان بس ديكولون مو بنية وكتلوها
- مو بنية
- ما اعرف يعني حسب مفتهمت يعني متزوجة كبل بس اني اعرف بان ما متزوجة .. شديصير وياها مدا افتهم سلوني اذا احد متزوجها مكلت بس انت عندك شي وياها ؟
بسرعة توتر ونكر كال : لا انا ما عرف شي .. انا ما عندي
ترك من ايده وعاف الشغل عليه .. كملت كام يتحاشاني حتى ميحجي ويايا
رحت اخذت ادوات التنظيف وكارتات الغرف وصعدت نظفت .. كملت طلعت بوجهي منال : بوجهج على غرفتكم جابوا بان .. روحيلها واعرفي منها شنو صاير وياها وويا منو لاعبة كبل مرة .
ركضت بسرعة شمرت الغراض ورحتلها لكيتها نايمة ع السرير وتبجي بقوة .. المكياج متخربط بوجهه وعيونها كلها كحل مدمرة : شصار وياج اكعدي احجيلي
ذبت روحها بحضني وكامت تبجي : ما اريد ابقى هنا خل نروح لغير مكان عفية اخذيني
- بان بس احجيلي شصار وياج شسوولج
- تعدوا عليه .. مو مرة هوااي .. هواااي
كامت تبجي بنحيب وتصرخ
دمعت وحضنتها ردت اسألها واستفسر بس عرفت اكو احد ورا الباب كاعد ديتصنت اشرتلها ع الباب فهمت وحجيت : مراح نشرد مراح نسوي كلشي بان لازم ننفذ اللي يردوه من عدنا ونسكت لازم نتقبل اللي يرضوه مالنا غير نقبل
- ما اكدر
- مو بكيفنا نكدر لو ما نكدر ما راح نروح لمكان ثاني هنا عدنا غرفة يمكن نروح لمكان ثاني ونبقى بالشارع يعتدون علينا وما عدنا مكان ننام بيه ونبقى مشردين .. ما راح نروح راح نقبل باللي يردوه تمام كولي تمام لخاطري ما اريد ننكتل بعد تعبنا .
ندستها وكمت للكنتور طلعت ملابس وكلتلها : كومي للحمام خلي اغسلج تا ترجعين تنامين
كامت ويايا وهي تبجي بسكوت فتحنا الباب منال سوت نفسها كاعد تمر من غرفتنا من طلعنا اندارت وهي : ها شلونها ؟ شلون صارت
- زينة
تعديناها ومشينا للحمام غسلت ورجعنا للغرفة نومتها وبقت الشهكة بصدرها وهي دافنة راسها بالمخدة .. بقيت كاعدة يمها .. لحد ما حسيت محد اكو كتلها : اريان مو
شالت راسها : هو گلج
همست : لا هو بس سأل عنج ما كلي .. بس من كتلو يكولون مو بنية انت عندك شي وياها نكر وكام يتجنبني وحتى مساعدني بعد .
سكتت : تحبي ؟
هزت راسها اي
: وصدكتي هو يحبج ؟
- هو يحبني
- يحبج ! ووينو هسه اللي يحبج وانت هنا بهالحال ومتعدين عليج وضاربيج ؟ شرد ونكر وضم راسه هذا يحبج !
كامت تبجي كتلها : تتذكرين باجي اخر مرة شنو كالت النا لا تصدكون احد يكول احبج لحد ما يتزوجج ..
- اساسا الصار بينا كله من ورا باجي سيتا هي اللي بعتنا لذوله
- ويمكن ما باعتنا ويمكن باعتنا صح هالشي مو مهم المهم وين نروح وشلون نخلص من هذا المكان !؟
اتفقنا اني وياها لباجر نطلع ونشرد من هالمكان ونروح حتى لو نبقى بالشارع المهم منبقى عند ذولا ..
ثاني يوم كعدنا الصبح ..
نشتغل وهم يباوعلنا .. تقربت مني : متحسين نظراتهم غريبة !
- اني هم حسيت
- يمكن سمعونا البارحة !؟
- من وين يسمعونا .. مجان احد موجود
- ما اعرف ..
دنحجي دخلوا اثنين وهم شايلين اريان ..
فزعنا اثنينا .. ذبوا بالكاع مشبعي كتل لحد ما فاقد .. كمنا نباوع لبعضنا حجت منال : متتحركن تشتغلن لييييش واكفاااات
ركضت اني للبوفيه وهي وكفت ويا ام علي
رجعت بكاسة القشطة خلصت دا امليها لكيت منال واكفة ودا تحجي ويا بان وبان ميتة من الخوف .
مليت قشطة ورجعت حطيتها بالبوفيه ..
لما خف اللي جايين رجعت المطبخ : شكالتلج منال ؟
- دا تكولي لا تعتقدن يخفي علينا شي نعرف ونسمع كلشي
- شتقصد ؟
دا احجي دخل واحد كال : رايديكم بغرفة المدير
مشينا واحنا رجلينا كوا تخط من الخوف .. اول ما كعدنا .. المدير: حجا شلونها الحلوة اليوم
حجاها بيده قطعة كندر مد انطاها لبان ..
باوعتلي اخذتها من ايده وكالتله : زينة بس استا .. قاطعها
وكاللها : اكلا حلاوتج وانسي الصار والاغلاط اللي سويناها نحاول ما نعيدها واليوم راح اخليكم تتونسون ونكلب صفحة جديدة .. اريدكم تركزون .. وتصيرون شاطرات ..
كالتلا : اني مالي علاقة باريان والبارحة.... رد قاطعها
- راح البارحة ويا البارحة واحنا ولد اليوم .. اللي صار وياكم درس دا تعرفون شلون تديرون امركم هنا .. اليمشي عدل يصير فوك بالعالي واليمشي ويانا غلط .. راح نخلي يتمنى الموت وما يموت ..
بس انتو بنات صغيرونات حبابات وحلوات .. وبعد ما اسمحلهم يسوون بيكم اللي سووه سابقا بس تتعهدولي ما تسوون شي من ورا علمي وما التقون ويا احد
بان : يعني محد مراح يعتدي علينا ؟
-لا طبعا ما اقبل بهالشي واني البارحة رزلتهم وكلتلهم حتى لو غلطوا ممنوع يتعاقبون بهالطريقة ..
بقى يقنع بينا ويحجي ناعم وبان شفتها صدكتو .. بس بالي ممرتاحله .. شال لستة منيو كال : اطلبوا اي شي يعجبكم من هاي القائمة وراح يجيكم تعريض على اللي صار وياكم البارحة متفقين ؟
هزينا راسنا ومشينا ..
كالت : يمكن صدك سمعونا اني خايفة اسوي شي
- وراح نبقى خايفين طول عمرنا !؟
ما اعرف خلي نطلب وهي تدبر اني كلش جوعانة شتطلبين
باوعتلها .. ودرت عنها ع اللي عايشين بيه الي خلك احط لكمة بحلكي دا تكولي شطلبين
بطلبت قوزي ولبن وبيبسي ووافل ..
واني ممرتاحة للي يصير .. بان راحت حتى تنطيهم طلباتنا .. طلعت لكيت منال كاعدة وياها وتحجيلها وتسولف الها و بان مركزة وياها
لشوية هناك جابولنا القوزي للغرفة
كمنا ناكل وبان فرحانة بالاكل وتضحك وتتشاقى .. اتعجبت بيها ! شلون كدرت تنسى اللي صارلها البارحة وتسولف وتضحك ما كأنو صايرلها شي .. : تتذكرين لما جنا بالمعهد منشوف هذا اللحم ولا نضوكة
- وياريت لو ما ضكنا وبقينا مخلصيها عدس وفاصولية
- بس اقلها دناكله !
- ودننكتل .. ويتحرشون بينا ويتعدون علينا !؟
- اذا شردنا وين راح نروح ؟
- لاي مكان ما يعملون بينا اللي ديعملوه ذوله القذرين
- ولو لكينا الاقذر منهم بالشارع ؟
- اذا راح افكر هيج مراح نعيش يمكن نلكى مثلهم ويمكن نلكى ناس زينين شمدريج ؟
- يمكن
- انت شنو اللي ديخليج مقتنعة بهالمكان تا نبقى بيه ؟
- لان ما عدنا مكان
- ولو رجعوا استخدمونا ويا الراجيل شنو راح نسوي
- راح نسوي اللي يردوه
- واخلي رجال يتقرب مني تا يرضوووون !؟
- لا نشرط عليهم ينطونا فلوس وما نبقى هينا بالغرفة .. ونكوم نشتري ملابس وناكل اللي يعجبنا ونعيش بافضل مكان ويمكن حتى نشتري بيت
دا اريد احجي كالت : صدك منال انطتني هاي الحبة كالت انطيها لچچك خلي تاخذها
- مال شنو
- يمكن مال فيتامينات
- ما احب الدوا .. بس لا تفكرين مثلهم الله يخليج .. هيج احنا راح نصير بنات مو زينات .
- وشلون نصير بنات زينات لما ننضرب وننكتل لو لما نعيش بالشارع !؟
- المهم ما نسكت
- اي لا تسكتين بس راح تنكتلين وراح تتعذبين لحد ما ترجعين تسكتين غصبا ما عليج .. ما من الاول نسكت ؟
- بان شصايرلج منال شحجت وياج غيرت عقلج
- وعتني
-وعت تشتغلين وياهم
-كالت اليوم عدنا حفلة
-مثل حفلة اوت البارحة !؟
-لا اليوم بقاعة وراح يجي مطرب
-شنو نسيتي احنا شتفقنا !؟
- خلي نجرب وياهم اخر تجربة اذا بقوا يعاملونا بالكتل والاعتداء .. ما راح نبقى
- يعني قصدج ننتظر ننكتل مرة لخ !
- چچك انت ابالج مكان نروحله !؟
سكتت حجت ... ما عندج مع هذا خلي نشرد خلي نطلع وين نروح ؟ ما عدنا مكان چچك.. خلي نتحمل ونعيش
- ونعيش بهالوساخة !
- كل العالم وصخ مو بس هالمكان
- واحنا اشفنا من العالم حتى نكول كله وصخ الميتم ما جان وصخ وعشنا بيا احلى عيشة
- جان وصخ بس احنا اللي ما جنه ندري وهاي مو باعتنا وخذت فلوس بمكانا
- ومنو كالج هذا الكلام !؟
- منال
- كل الافكار اللي دا تزرعها منال بعقلج هذا غلط
- وانت الصح ؟
- ما ادري يمكن مو صح بس ما احب اشتغل شغلهم ما اتحمل .. اني ما اكدر اخلي اي واحد يعتدي عليه حتى ينطوني فلوس ايييع شغلة تلعب النفس .
- وشنو بدينا
- اذا ما حاولنا نطلع من هالمكان راح نبقى نكول شبدينا .
- عن نفسي ما مستعدة اتبهذل بالشارع حتى يعتدون عليا اللي بالشارع تالي ارجعلهم وانكتل واسوي اللي يردوه
- اما اني فما راح اقبل اصير مثل ميردون لو اعيش مثل ما اريد لو اموت .
- محد مراح يهتملج اذا متي .. يجيبون غيرج عادي
- المهم اني ما اشتغل مثل ما يردون .
دمعت واني احجيها وكمت من عدها وهي بعدها تاكل ..
دا اريد اطلع لكيت ام علي قريبة من الباب ..
عفتها وطلعت .. عرضتلي منال : اخذتي الحبة اللي انطيتها لبان
- ما احب الدوا
- ومنو مهتم شتحبين اليوم عدنا حفلة وهاي علاج حتى متتمرضين امشي وياي
جرتني واخذتني للغرفة وطلبت من بان الحبة انطتها .. جرت بطل مي وكالت : اشربيها
جبرتني اخذها ..
وسحبت نفسي من عدها وطلعت ضايجة من الوضع كله ..
وكفت برا وروحي طالعة من بان اللي اقتنعت بيهم وبشغلهم بسرعة واتأقلمت .. لا وما عدها مانع تعاشر اي احد وتاخذ فلوس والله حتى تعيش شنو هالمنطق !؟
راسي صار يأذيني مثل الدخت ..
واكو تنمل صار بجسمي مثل البسامير برجليه
مشيت كعدت ع الكرسي وحطيت راسي ع الطبلة .. برودة صارت براسي .. كامت تنزل على وجهي .. شلت اديه اتلمس وجهي ..
مدا اكدر الزم وجهي اديه ثكيلة
كمت اباوع لاديه كمت اضحك هاي شبيها اديه
الزمي وجهي اديه مدا تتحرك
كمت اضحك واني اصيح على اديه حتى تلزم وجهي بس اديه مدا تمشي بكيفي .. كمت اضحك لوحدي رجعت راسي للطاولة .. احس الكاع كاعد تتحرك جوايا
كمت اضحك يا الله شنو هاي شبيها الكاع ههههههههههههه
- چچك
رفعت واني اضحك ضحكت هي كالت : ها شلونج
- اديه صاير مو خوش ادين
ضحكت : ليش ؟
- اريدها تلزم وجهي متقبل
- خليهم براحتهم ويلا كومي حتى تتحضرون للحفلة
كمت اباوع بوجهه واضحك .. الافكار والسوالف تجي براسي
بس حالة غريبة كمت ما اكدر احجي الافكر بيه احس جان اكو حبل بين عقلي والساني .. انكطع هذا الحبل والساني مدا يمشي بكيف عقلي ويسولف السوالف اللي يردها .. يخربط من كيفه .
الوضعية دا تخليني بس اضحك على روحي
لا اديه تمشي بكيفي لا الساني .. اضحك اضحك بصوت عالي
وهي تضحك وكامت سحبتني ومشتني واني اكلها : ذني اديه
- اي اديج
كمت اضحك .. رحت بالغرفة .. بقيت بالساعة صافنة
من تحجي وياي بان وتسولف تريدني اجاوبها واريد اجاوبها بس الساني مدا ينطق بكيفي اضل اضحك
بس احس راسي مرتاح كلش ..
ادية مرتخية رجعت راسي واني صافنة بالسكف
حجيت : السكف راح يوكع ونموت كلنا
- هاي شبيج چچك؟
- ههههههههه
كومتني وانطتني الفستان لبسته مكلوبي ..
كامت تضحك عليه واني اضحك بقوة .. رجعت ساعدتني لبست الفستان عدل .. واجت منال حطت النا مكياج خفيف ورتبت شعرنا وهي تضحك واني ميتة ضحك وفرحانة حيل فرحانة
صعدنا بالسيارة السايق مشى وشغل ساجدة عبيد ( هلا يا ينور عيني ) وبدت خشابة اول بداية اني ما كمت اسيطر على روحي بالاغاني .. كمت اهز ركبة
باوعتلي بان كامت تضحك واني بركبتي على رنة الخشابة
كمت ارفع باديه من غنت وكمت اتمايل ويا الاغنية بالسيارة وبان كامت تتمايل ويايا وتغني بالاغنية ( وهلا ويا نور عيني ويا عليه يغالي من تمر سلم عليه )
ندك ونركص عليها ونضحك بصوت عللي والسايق يضحك ويدكلنا .. ويمه هنا يمه .. يم سعدون يما
ههههههههههههه
وصلنا المكان كال السايق : بس بس عود كملن جوا
دخلنا .. كلهن لابسات فساتين سهرة ومتمكيجات مكياج قوي ..
اجا المطرب وصعد الستيج واني وبان واكفين جوا الستيج .. والراقصات ما صاعدات بس المطرب يغني وناس هواية كاعدين ع الطاولات ..
انطلق المطرب والخشابة دكوا .. صعدوا الراقصات وكاموا يركصون يم المطرب ع الستيج واني وبان واكفين على صفحة ونتمايل ونضحك .
كمت الزم بشعر والف بيه مثل السبحة واركص واداور و بان ويايا .. وابو الخشابة يمنا اتفاعل ويضحك ويانا .. بس ما مسموح النا نوكف يم المطرب نركص لان بعدنا جدد ومنا حضور يخافون لا نخربط بقينا بمكانا بهالحال
لحد ما اشتد الغنى الراقصات نزلن للحضور يركصن ويا الكاعدين .. واثنين بقت يم المطرب يركصن
حجه ويانا واحد وكال : اصعدن وياهم
صعدنا اني وبان ونركص .. ونضحك وذبينا لحم بالركص ..
لحد ما تعبنا ورجعونا للفندق وجه الصبح نمنا التعب
.. كعدت الصبح على الم راسي ..
الم فضيع اريد اشوف من عنده ما اكدر كمت عفت الغرفة وطلعت .. شربت مي وغسلت وجهي وراسي بعده يأذيني .. طلعت ام علي كالت : جيبي طبقات البيض وحطيهم بالجدر واترسي واسلكي استعجلي وكعدي بان خلي نكمل شغلنا .
رحت كعدت بان شالت راسها وكامت واني كعدت اكولها : راسي حيل ديأذيني
- خاف من حفلة البارحة
باوعتلها : يعني احنا صدك جنه بحفلة مجنت اتحلم
- هاي شبيج متتذكرين شكد تونسنا
كمت اباوع وجها ، حجت : جانت الحفلة كلش حلوة والاجواء تخبل
-راسي ديأذيني كلش
-خلي اكوم اغسل واكول لام علي بلكي عدها حب وجع راس تنطيج
كمت وراه انطتني ام علي براسيتول اخذته وكمت اعبي بالكاسات الكبار قشطة ولبنة وزيتون .. كتلها : بان انت انقلي
نقلته دخلت منال كالت : هلا عيني هلا شلونج اليوووم
- راسي ديأذيني
- طبعا طبعا من الدك اللي دكيتي البارحة شنو هالمواهب الدفينة اللي ضميتيها علينا يولي الهز مالج مال وحدة محترفة جنتي تشتغلين ركاصة من ورانااا وضحكت
ابتسمت واني اكمل بشغلي و احط بيض وطماطة
حجت : كملوا يلا وتعالوا حتى انطيكم فلوسكم
-فلوسيش
-فلوس الحفلة البارحة
- ليش الحفلة بفلوس
-لا هو المفروض انتو جديدات ورايحين حضور بس ابو القاعة انعجب بركصج وانطى فلوس شغلكم وطلبكم تجون اليوم هماتين .
بقيت صافنة بوجهه كملت شغل
ورحت لغرفة المدير وبان اجت ورايا وهي تشوفه فديوهات ركصنا كال : باع هاي باووووع شد .. من الاول كتلج خليهن بالقاعة والقاعة تخليهن يشتغلن كلشي اللي نريده منهم هيج راح يقتنعن ويشتغلن ويانا وهن فرحانات
- يلا هم زين طلعت اكو موهبة دفينة تعرف تسويها هالمتمردة
- لا لا موهوبة وحبابة بس انت مضوجتها
شال ورقتين مال فلوس وكال : هذا فلوسجن
باوعتلها حجت بان : بس هاي مو نفس فلوسنا
- هاي ١٠٠ دولار امريكي احسن من فلوسنا
باوعتلي تضحك ابتسمت .. كال : اتجمعوهن يمكم اتصرفوهن ممنوع اي احد ياخذهن منكم هاي فلوسكم الكم بس .
- يعني شكد تطلع
- يعني اكثر من ١٠٠ الف عراقي
بان فتحت عيونها : واوووو على يوم واحد ناخذ اكثر من ١٠٠ الف !!
- طبعا كل يوم تروحون تتونسون وتركصون هيج ركص حلو راح ننطيكم اكثر هم وراح تكدرون تشترون بيها كلشي تريدوه .
يحجي ومنال انطتنا الفيديوهات اللي جنا نركص بيها البارحة
باوعتها .. هاي اني مو غيري ! شلون هيج جنت فرحانة ومنطلقة احس جان مثل الحلم بس اتذكر جنت كلش فرحانة .
رجعنا لغرفتنا وبان تكلي : بعدج تفكرين نشرد !؟
- اذا ما جبرونا على احد ومحد يتقرب مني .. راح اشتغل لحد ما اجمع فلوس هواية واشتري بيت واطلع من عدهم .
- واني هم هيج افكر لازم نشتغل حتى يصير عدنا بيت ومنحتاج احد منهم ، هم نروح حفلة وونسة وضحك وهم فلوس هواية .
- واذا رجعوا جبرونا على احد
- ساعتها راح ناخذ الفلوس اللي نجمعها ونشرد من هالمكان ونعيش بعيد منهم بس اذا طلعنا واحنا مفلسين وما عدنا فلوس وما عدنا مكان راح نبقى بالشارع ويمكن هم احد يتعدا علينا اقلها نكدر نجمع فلوس .
- صح لازم تصير عدنا فلوس يلا نكدر نطلع ونشرد منا .
اقتنعت بكلامها فعلا اذا اريد اخلص منهم واشرد ما لازم اشرد واني ما عندي ربع اشتري بيه بطل مي اذا تعبت .. احتاج فلوس حتى ما ابقى بالشارع واتأذى .. فلازم اشتغل واصبر لحد ما اجمع فلوس وبعدها انفذ اللي براسي .
بالليل هم جانت اكو حفلة .. اللي عرفناه انو يوميا اكو سهرة بدون توقف .. خصوصا يوم الخميس والجمعة يصعد فلوس السهرة من ١٠٠ دولار الى ١٥٠ دولار .. لان الحضور يصير قوي ..
رضيت اشتغل بالحفلات واخذ فلوس واجمعهم ..
بس انتبهت لشغلة انو يوميا لما اروح للحفلة تصيبني حالة غريبة واكوم اسوي امور وشغلات ما واعيتلها من اكعد ثاني يوم اصفن اني شلون اتجرأت وهي سويت !؟ واضحك هواية وانطلق
سألت منال كالتلي : بسبب الحبة اللي تاخذيها هاي تخليج تصيرين قوية وفرفوشة وتضحكين وما تتمرضين
فكمت اخذها يومية قبل لنروح للحفلة حتى ما اكعد افكر بهالوضع واضوج واغندب وما اكدر اشتغل لازم اجمع فلوس واخلص من هالوجوه كلها
اول بداية من جنت اخذ الحبة جنت كلش افلت ما اكدر اسيطر على ايدي على الساني بس من اخذتها اكثر من ٢٠ مرة كمت اسيطر واعرف شحجي بس اكون بحالة فرحانة وسعيدة ومزاجي كلش مرتاح ومتونس وبس اضحك ابد ما افكر بالحزن ولا افكر بشي واقعي من اخذ الحبة .. كمت اسميها حبة السعادة .. لإن من اخذها اصير كلش سعيدة واتونس بحياتي .
مر شهر واحنا على هالوضع ..
عافونا بحالنا نشتغل سهرات وحفلات ما جبرونا على احد بهالفترة رادونا نتأقلم على هالجو ونعيشه ونتعود عليه وننغر بفلوسه ونتعلق بيه .
من بعدها اجت منال كالت : امشوا ويايا
صعدنا وياها دخلنا لغرفة بالطابق كالت : الغرفة هذه راح تكون الكم منا وجاي مراح تبقون بذيج الغرفة مكسرين
باوعنا الغرفة من سريرين بس هالمرة الغرفة بيها حمام وبيها كنتور كله مرايا .. واكو ميز تواليت وطابوريا، حجت : يلا انزوا انقلوا غراضكم هنا واستقروا يلا ورانا حفلة .
نزلنا شلنا ملابسنا ومكياجنا .. وجبناهن هنا دنصفطهن .. اندكت الباب فتحت الباب .. وكف كدامي وطبان مبتسم : شلونج يحلوة
- زينين
فات للغرفة وكال : شلونها غرفتكم !؟
بان : كلش حلوة واخيرا راح ننام براحة وما محصورين .. متنا من السرير الواحد وچچك نومها عكر بس ادفر من تنام
- اني شيهمني غير راحتكم.
بيده علاكة بيضة جديدة طلع منها كارتونة وانطاها لبان والثانية انطاها اليه ، فتحتها بان
وهو يباوعلي افتح بيها كال : ايفون ١١ احدث اصدار لآبل .. تستاهلي .
فتحته : ايفون ١١ برو ماكس ذهبي ..
كمت اكلب بيه
اتقرب من عندي وكال : عجبج ؟
- شنو المناسبة
- حتى ترضين
- على منو ؟
- مو على احد ، امشي رايد احجي وياج شوية
طلعت من الغرفة كال : دا تاخذين الحبوب
- اي ليش
- شلونها
- زينة
- عندي مجموعة رايد اوديهن لبغداد .. تروحين وياي !؟
- وليش اروح
- اني ما اكدر انطيهن انت راح تنطيهن ابدالي .. واذا سويتها الج مكافئة غير الايفون
- لازم الشغلة صعبة
- لا مو صعبة بس تحتاج وحدة جريئة تكدر تقنع الزبون وتنطيهياه وتشرحله عنها وانت مجربتها .
- والحفلة !؟
- راح تروحين اليوم وباجر اخذي اوف
- تنطيني فلوس الاوف
- شد صرتي تقايضيني ع الاوفات وتطلبين فلوسها
_ انت الرايد اوف مو اني .. فلازم تنطيني فلوسه !
- حلو وتحجين معلك .. اي هاي صايرين تأمرين بشي ثاني ست .
تركته ورجعت للغرفة .. اخذت حمام ورحت نمت لورا المغرب كعدت بدلنا وكملنا .. لما ما اخذ الحبة افكر واكره الواقع الاني بيه وكل يوم حفلة وسهر ودك وركص وزلم تباوع وتتحرش بنظراتها وكلماتها وفد مستنقع كلش يلعب النفس .. بس اخذ الحبة انسب وارتاح واكوم ما ادقق بالتفاصيل .. اكوم اتونس واركص وبس .
اخذت الحباية بالسيارة ورجعت راسي للكشن واني احس بمفهولها يسري مثل المي على كاع يابسه ويحييها .. كمت اتنفسها هالحبة مو بس تعودتها .. لما اخذها اصير عالم ثاني .
وصلنا الحفلة واني منسمة وفرحانة واتمايل واركص ..
شفت المطرب وخر من مكان المايك وراح يحجي ويا ابو الديجي .. وصار القاعة بس حجي وضحك ماكو صوت اغاني ..
اني عشت واتعشعشت على اغاني باجي سيتا التركية .. جانت كلش تحب الاغاني التركية وتعلمنياها وتعلمني تركي حتى اصير مطربة بالمستقبل لان تعتقد صوتي حلو ارهم اصير مطربة .
فبخطوة ما ادري شفكرت بيها لما شفت المايك فارغ والمطرب ماكو
نزعت الكعب من رجلي تعبني
ورفعت فستاني شوية وكمت امشي مثل الحرامي الشارد ووكفت كدام المايك ..
فوگفت كدام المايك وغمضت وغنيت
ديودمكي
بير يارلموش سنا
اشكم زهر لموش بنا .. سفدام جهنم گلبن مسكن اولدو مان
صار هدووووء فتحت عيني الكل ضحك ..
حطيت ايدي على حلكي وكمت اضحك وانسحبت ..
اشر واحد من الكاعدين مبين رتبة وشخصية من شواربه .. رفع ايده واشرلي بالسبحة : كملي كملي خلي نسمع
كلها ضحكت وتكلي كملي
باوعت لبان وهي تسويلي اوكي بقوة عود كملي
واني بكامل جرأتي .. عدلت نفسي كدام المايك وانداريت للديجي يباوعولي ويضحكون : ترا ما اغني لتضحكون .
كلها ضحكت .. وخرت شعري منا ومني .. وتقربت حافية للمكان المايك ورجعت كملت الاغنية وغمضت واجر بصوتي .. الكل صار هدوءءءء .. كملت الكل يباوع بوجهي .. ضحكوا وناس صفكت وناس تكلي مشروع مطربة صوتها حلو رجع حجه الرجال ابو شوارب : زين بس اجنبي تعرفين نريد مالاتنا
- هذا تركي مو اجنبي
- هسه تركي اجنبي كلهن ما نفتهمهن نريد مالت اهلنا تعرفين لو بس هالمقطعين حافظتهم
كلهم كاموا يضحكون .. بنص ضحكهم غنيت : هذا كاتلني يعمة
باوعت للمطرب وكملت ... فدوة شكد احبه وارد اكلمه ..
كاموا هم يدكون ويكملون لحد ما كملت وياهم
روحي كلها يمه .. يعمه يعمه ..
اشتغل الديجي على انغام اغنية ( هذا الحلو )
كلت لا لا اني ما اعرف اغني ويا الموسيقى .. اني اعرف بس اغني
رجع حجه ابو شوارب : بس اذا غنيتي راح اكرمج
رفعت فستاني ودنكت مثل اللي بالافلام واكولهم : شكرا شكرا انتهت السهرة
وعفتهم وركضت ع الستيج ونزلت ...
تصرفات محششة فعلا كمت اضحك بهستريا لان سويت هيج
وبان تضحك ويايا ..
من كملنا ابو القاعة اجاني واني شايلة الكعب ما لابسته امشي حافية كال : اذا تغنين يومية اغنيتين ارفع اجرج من ورقة لل٥ اوراق ..
بان فتحت عيونها وهي تكلي : واوووو كامت تجيج عرووووض
كمت اضحك وياها وطلعنا من السهرة ورجعنا للفندق .. لما كعدت وشفت الفيدوهات اتعجبت بروحي شلون دا اسوي هيج واتجرأ .. شلون غنيت .. اني جنت من اوكف كدام باجي اغني استحي واكوم العثم وهي تشجعني .. هسه كدام كل هالزلم ومنطلقة واضحك .. بقيت اعيد بالفيديو مرة ومرتين وتلاثة
اتذكر كلشي .. وواعية لكلشي
بس من اخذ الحبة اكوم ما اسيطر على افعالي واضحك واركص واكمز بشي مبالغ بيه .. الحبة هاية عالم ثاني ..
يلا المهم كاعد استفاد
ضليت افكر بدال الورقة ٥ ورقات اذا اغني
يعني شكد راح استفاد ؟ يعني بالشهر شكد يصير عندي اذا خمس ورقات يوميا ؟ وووووو هواية
حلتلي الشغلة عجبتي ..
يعني اذا اغني اصير غنية ويصير عندي هواي ..
فرحت اذا هيج لعد اغني واصير مطربة احسن .. واذا صرت غنية راح اشتري بيت جبير واروح لباجي سيتا واكولها اي وحدة يصير عمرها ١٨ وتطلع من الميتم اخليها تعيش ويايا بالبيت لا تدزها لوطبان ومنير .
واني بنص تفكيري ..
اندك التليفون مال الغرفة من الرسبشن كمت من مكاني .. ورحت جريت التليفون كالوا : الاستاذ وطبان يكول انتظرها
- تمام راح انزل
كمت بسرعة بدلت ونزلت ع الدرج ومشيت للادارة كالوا : الاستاذ برا منتظرج .
رحت صعدت ويا كال : عال عال مطربتنا الحديثة شنو هالصوت شنو هالنشاط ؟
تنهدت : اي
- وبعد عندج مواهب دفينة غير الغنا والركص ؟
- مثل شنو ؟
- ما ندري بعد شضامتلنا .. يلا مستعدة تروحين تشوفين بغداد ؟
- تمام
داس بالسيارة واني سحبت التليفون اكلب بيه .. كال : اربطي التليفون ع السيارة وشغلي اي شي يعجبج
- ما اعرف وما عندي نت
اخذ تليفوني .. حطله نت وربطه ع السيارة
طلعت ابراهيم تاتلس (ليلم لي ) وكعدت اتأمل الشوارع وافكر والافكار براسي مثل موج البحر موجة تردم موجة بلا فايدة ولا عاصفة .
حط ايده على رجلي فزيت ووخرت ايده بسرعة : لتلزمني
- ول * * من تركصين وتهزين كدام الوادم ما تستحين تستشرفين لو ردت اكضبج
- بكيفي ..
- ها بكيفج .. اشوف من صار عندج كم فلس كمتي تحجين معلك يولي ؟ ابالج الفلوس التاخذينها تقويج علينا !؟
ما جاوبته ورفعت صوت الاغنية عالي حتى يسكت
نصاه وكال : صاحبتج مشت بدربنا من حلك ساكت وما حجت وانت لليوم معنده وما ترضين احد يكضبج ورافعة خشمج بس نحنا نعرف حلو
.. اخذي حباية خلي السفرة تصير حلوة لا تبوزين ..
- ما اريد
- بكيفج اول وتالي تاخذيها
- ليش
- راسج راح يوجعج اذا مر يوم وما اخذتيها
- مو مشكلة ما اريدها
سكت بقى يسوق رفعت الصوت وهم شغلت ابراهيم تاتلس ..
خطر ابالي سؤال .. حجيت : انت تعرف باجي ؟
- يا باجي
- سيتا مديرة المعهد
- قصدج الميتم
- اي
- شبيها
- تعرفها
- لا بس اتعرفت عليها من اخذتكم منير يعرفها
- متعودين تاخذون من عدها بنات من يصير عمرهم ١٨
- احنا متفقين ويا اكثر من ميتم نستلم البنات اللي عمرهم ١٨ ونوفرهم لخدمة الفنادق باربيل
- تعرف بقذارتكم
سطرني بنص وجهي اجت بخشمي وحجه : احترمي نفسج لا اعلج الادب شلونه وتعرفين من نعلم الادب شنعمل
سكتت بس الحرارة صعدت لراسي ..
ضجت حيل ودمعت .. رد حجه : احنا ما نكللهن بس هنا مو غشمة يعرفن راح تشتغلن كلشي بس تستلم المالات وتسكت حتى تراعي الاصغار منجن .
- عندك رقمها !؟
-ليش !؟
-مشتاقتلها
-ممنوع التواصل وياها
سكتت بقى يسوق مدري كم ساعة وصلنا بغداد ٨ بالليل صف كدام مطعم ودخلنا طلب اشكال الوان الاكل وحطو كدامنا .. اكلنا كملنا كال : يلا
كمنا راح لمكان كال : تشوفين ذاك المحل ؟
باوعت منطقة بيبانها كلها مسدودة .. وهيمة
ابو المحل مفتح .. كتله : اي دا اشوفه
- روحي احجي وياه وانطي هاي الحبوب واخذي منه مليون ونص وتعاي
انطاني جيس وكتله : شحجي
- احجيله عن الحبه وشعورها وشنو فوائدها وبيعيهن وجيبي الفلوس وتعاي .
اخذت الجيس ونزلت ..
رحت للمحل كتله هلو .. الولد مبين مو خوش بسرعة كال : هلو وهلوين .. امري
- تشتري ؟
- شنو ؟
- حبوب
- شنو هالصراحة هيج بسرعة كبل تشتري حبوب
- لعد شلون تريد احجيها
- حبوبيش
- حبوب اني اسميها حبة السعادة
شفته حرك تليفونه وكام يكلب ، كتله : هسه تشتري لو لا
- غير اعرف شنو هاي حبوب السعادة
- يعني لما تاخذ وحدة منهم تخليك سعيد ومرتاح وما تفكر بشي مو زين ابد تصير الحياة عندك وردية بلون الحبة
- مجربتها
- اي
- يعني مرة لو بس مرة وجاية تبيعيها عليه
- هاي موجود عندي شريط منها اخذ يومية ..
- ها يعني تتعاطين
- تشتري لو لا ؟
- بشكد تبيعيهن
-مليون ونص
-هواي مليون زايد بيهن
-بكيفك
-هسه دوكفي بس نتفاهم
-انت تريد تشتريهن لو لا ؟
كاعد احجي صفت سيارة مثل البيكم سودة وزركة نزلوا منها شرطة وكفوا يباوعون عليه كتله : شبيك تباوع
- شنو هذا البيدج ؟
- حبوب
- حبوب مال شنو
- مقويات
اخذهن من ايدي وهو يكله : سيدي هي الاجت عليه وهذا التسجيل موجود
-انجب لك ، كلتيلي مقويات مووو انت اهلج وين ولج
- ليش دا تغلط
كاعد احجي وما احس الشرطي الا يجيبني براسي ويصيح : اخذوها
كمت ارافس بديهم واكلهم : وين تاخذوووني عووووفوني ويييين اتركنيييي
عضيت ايد الشرطي وفلتت منه وركضت باتجاه الفرع البيه سيارة وطبان بس ما هي .. اختفى وينه مو جان هنا كالي بيعي وتعاي وين راح ؟
كمت اركض بالفرع وهم وراي يركضون واجت السيارة من وراهم داسلها بسرعة ووكف كدامي وشرطة اثنين وراي
لزموني كمت اصيح : عوفووووني ليش دا تاخذووووني اتركووووني
والشرطي يصيح : شيلوها
شالوني ودفعوني ع السيارة وجروا ادية وكلبجوهن ليورا .. وفتحوا باب السيارة وصعدوني واني اكوله : عفية والله ما سويت شي ليش هيج دا تسووون بيه الله يخليكم اتركوني
- رايدة تبيعين مخدرات وتكولين والله ما مسوية البراءة والتمثيل مالج نعلمج عليه ان شاءلله طايحة الحظ كح***
كاموا يغلطون ويفشرون
وصلوا لمركز الشرطة كاله : سيدي اليوم الصيدة خوش فختاية
- شمسوية هاي
- دا تبيع حبوب
- تبيعين حبوب ولج وانت بهالعمر اهلج وين ؟
- ما عندي اعل الله يخليك عوفني
- يعني هم نغلة من فطر الكاع وهم تبيعين حبوب .. ذبها جوا
جرني واني اصيح وابجي واتوسل بيه ..
كام شمرني وفتح اديه ودخلني وكال : اكعدي هنا لحد ما يجي الضابط
سد الباب عليه وكعدت بس كمت ارجف
واني عبالي الشرطة بنقذون الناس .. ومفكرة اذا شردت اروحلهم واشكيلهم تاليهم مثل وطبان وجماعته لزموني ويفشرون عليه .. الزلم كلهم يتشابهون كلهم .
كمت ابجي بقوى واني كاعدة
المكان فارغ ما بيه اي شي بس بساطين ممدودات ...
شوية وانفتح الباب شمروا واحد .. كام يصيح : سيدي والله هو اللي اعتدا عليه مو اني .. سيدي
سد الباب ما سمعلا ..
اندار شافني اتعجب .. كام يحجي ويايا يكلي : هو السجن بيه بنات !؟
انداريت عنه .. انفتح الباب بسرعة وصاح الشرطي : كووومي لج استعجلي
كمت ورحتله لزمني من زندي ومشاني لغرفة الضابط ، حجه : شنو هالحبوب ؟
- والله حبوب عادية استاذ
- كولي سيدييييي لج
فزيت منه ورجعت وكفت حجه : شسمج !؟
- چچك ؟
- اسمج البجنسية چچك ؟
- لا اللي بالجنسية اسمه رسل
- اسمج الكامل
-رسل عبد الله جاسم
- وين اهلج
- طلعت من الميتم من كم شهر
- يا ميتم ؟
- ميتم بكركوك
- وشجابج لبغداد وشجاب هاي الحبوب لايدج
- وطبان انطانياها
- منو وطبان
- اللي اخذنا من الميتم
- شسمه الكامل
- اعرف بس اسمه وطبان
- شتشتغلين
- بنادي
- نادي شنو
- حفلات
- هاااه حلو يعني تشتغلين بنوادي ليلية كلش حلو وشتشتغلين
- رقص
- رقص يعني حضرتج ركاصة
- اي سيدي
- عال والله .. ووين النادي التشتغلين بيه
- باربيل
- عال العالم شلون ملف حلو ومشرف هم نغلة وهم تشتغلين بنادي ليلي وهم ركاصة وهم بياعة حبوب لامتهن كلهن ولج
- اني شعليه هم خلوني اشتغل هيج ودا اجمع فلوس حتى اشرد منهم
- هااا يعني تكو*** كم شهر تلمين فلوس بروس الكواوي* وبعدين تصيرين شيخة وام فلان بروسنا مو صحيح
- هي ام الميتم انطتنا اله على اساس نشتغل بالفندق عاملات
- واشتغل عليجن وكملتيها كمتي تبيعين حبوب مو
دمعت وكمت ابجي : سيدي واني الله معليه الزموهم الهم اذوني هواية اتحرشوا بيه واتعدوا على صديقتي واذا نخالفهم يتعدون علينا
- فحتى ما يغتصبج كمتي تنامين بارادتج مو ؟
- لا
سطرني راشدي : لا شنو وانت تبييييعين حبوب كح***
- ليش دا تضربني اني ما سويت ... حجيتها وما احس الا جابني جف ثاني وثالث وللكاع حط رجله فوك ظهري : بنت القندرة وتكليلي شنو تضربني اني اكص راسج مو بس اضربج افتهمتييي
دنك شالني من راسي ووكفني كمت ابجي بقوة
كال : تاخذين من هاي الحبوب
- هزيت راسي اي
- حلو انت حاويتهن كلهن ما شاءالله ما مبقيتلج سالفة تعتب عليج
- هم سيدي
- همه هم غصبوج ع التعاطي طبعا انت انت شريفة وين اكو منج .. شريفة روما انت وين اكو منج ... شنو اسماء اللي تشتغلين وياهم
- وطبان ومنير ومنال
- اسمائهم كاملة لججججج
- ما اعرف اسمائهم كاملة
- كاعد دا تتسترين عليهم !
- لا بس والله ما اعرفهم
- احساااان
- نعم سيدي
- اريد الاسماء كاملة
- تأمر سيدي
اخذني من زندي ومشى دخلني بغرفة
كال : اعترفي احسن ما اشوهج
- ما اعرف اسمائهم والله
- ترا تنحكمين اعدام اذا ما كلتي اسمائهم الكاملة شنو
- ما اعرف بس هم يشتغلون بفندق باربيل
- وين صاير الفندق
- ما اعرف اسم المنطقة بس اعرف اسم الفندق
- ما تعرفين اسم المنطقة مو
حجاها وجابني ببوكس ببطني شاغت روحي وصرخت من كل صوتي لزمن من راسي بسرعة وركعني بالحايط كمت اصرخ وابجي ذبني للكاع وكعت وهوي صرخ : شنو اسمائهم احجيييييي
- ما اعرف اسمائهم والله والله ما اعررررررف
اتولاني دفرات برجليه نهاني من الكتل
دخل الضابط كال : تحجين لو اخليهم يصلخوج هنا وواحد واحد يجرب بيج
- والله ما اعرف الله يخليكم عوفوني
- يعني تتبنين القصية انت وانت تاجرة المخدرات وانت اللي اتبيعيهن مو
-هم انطونياهن والله اني ما اعرف عنهن شي الله يخليكم عوووفوني
- احسان
- نعم سيدي
- اخذها وخلي يسوولها فحص ويكتبون بيها تقرير عن تعاطي المخدرات اللي هي تاخذهم واخذوا بصماتها وصوروها وسجلوا معلوماتها .
- نعم سيدي
شالني من الكاع وكام يسحل بيه من ايدي واني كوا امشي وياه رجلي انشلت من الوجع من كثر ما دفرني ببسطالة عليها .
اخذوني لمركز طبي اخذوا من ايدي دم ..
وداوو جرح راسي من ضربني بالحايط وحطولي لزكة
ورجعوني للسجن .. سجلوا عليه دعوة متاجرة مخدرات
حجه وياي الضابط : تعرفين اذا ما حجيتي منو وراج ومنو الدينطيج هالمخدرات على تاريخج هذا يصدر بيج حكم مؤبد واعدام
- والله ما سويت شي سيدي
- هو انتم كلكم نفس الكلمة من نلزمكم والله ما سويت شي .. وهاي البلاوي البديكم منو ديبيعها اميييييي
- هم انطونياهن
- اي غير نعرف اسمائهم حتى ندونها
- ما شايفة جناسيهم اني اعرف بس اسمهم وحدة
- اي بالعافية اكليها فد مؤبد وان شاءالله اعدام .. وخليهم هم يتهنون ... احساااان
- نعم سيدي
- اخذها
اخذني وراح شمرني بالتوقيف ..
كمت ابجي نطيت من البجي يعني اني اريد اخلص منهم اروح ادخل السجن وانعدم لو انحكم مؤبد واخلص عمري بالسجن .. ليش ياربي ليش .. ساعدني دخيلك ياربي
كمت ابجي بجي من كل كلبي
لحد ما طلع الضوا ..
واتبدل الضابط .. رادني الضابط الثاني ..
اخذني الشرطي ووكفني كدامه وهو يطلع على الدعوى ..
كال : راقصة بنادي ليلي وتتعاطين وتبيعين مو رسل ؟
- نعم سيدي
- اخذها واشرله
- افتهمت سيدي
اخذني الشرطي ومشى طلعني من المركز وصعدني بالسيارة .. واني ابجي ودموعي تجري ومنهارة الى ابعد حد واني اسوف حياتي انتهت لو اعدام لو اخلصها مؤبد بالسجن .
ما احس الا وكفت السيارة والشرطي يسحب اقسام ويكلي : كدامج خمس دقايق بس اذا شفتج او لمحتج راح احط الطلقة برجلج وابلغهم شردت ويزيد الحكم عليج
-يعني شسوي ؟
- راح اعد للخمسة واشغل العداد وكدامج بس خمس دقايق اذا ما شردتي راح ارجع الزمج
واحد اثنين تلاثة ..
نزلت من السيارة بسرعة وهو يكمل عد وكمت اعرج واركض بكل قوتي ونزلت ع الترابي اركض اركض اركض بكل قوتي والدمعة جمدت بعيني لحد ما لبدت ورا سيارة وكلبي يدك يدك يدك
شلت راسي السيارة مال الشرطة مشت
حطيت ايدي على كلبي وكمت ابجي واصيح : الحمدلله ربي الحمدلله .
كمت امشي واكمل مشي .. لحد ما شفت سيارة ع السارع العام تطوطلي انداريت .. وطبان بيها اشرلي مشيتله وفتحت باب السيارة واباوعله بأستغراب : الحمدلله ع السلامة يا مطربتنا الموهوبة وهسه صار الشغل حلو مو ؟ وراح تنفذين كلشي نطلبه منج والا تلزمج الشرطة وترجعين للسجن وتنحكمين اعدام ... شنو رأيج ؟ ..... يتبع
_______
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
 رواية المفقودة الفصل الرابع 4بقلم زينب ماجد (حصريه وجديد…){kind=link}
تعليقات
إرسال تعليق
فضلا اترك تعليق من هنا