رواية أول مرة أحب الفصل الخامس 5 بقلم الكاتبة شيماء صبحي( حصريه في مدونة قصر الروايات)

رواية أول مرة أحب الفصل الخامس 5 بقلم الكاتبة شيماء صبحي( حصريه في مدونة قصر الروايات)

رواية أول مرة أحب الفصل الخامس 5 بقلم الكاتبة شيماء صبحي( حصريه في مدونة قصر الروايات)

#الحلقة_الخامسة

#أول_مرة_أحب

#الكاتبة_شيماء_صبحي

اتحرك عصام وراح للمكان اللي هربت منه اروي والعصابه جريت وراها فيه ..ففضل يمشي من نفس الطريق لحدما وصل عند النيل اللي بيفصل بينهم وبين الصعيد فبص عصام علي المكان وحس بالرعب فبص علي النيل وشك انها ممكن تكون وقعت فيه بالغلط او العصابه اذوها ورموها فيه بس لما فكر تاني  في الموضع لقي ان اروي اذكي من انها تخليهم يمسكوها فبص حواليه لقي في طريقين طريق يمين وطريق شمال فاختار عصام الطريق الشمال انه يمشي منه ويبدأ يدور عليها فيه .. 

_______________________

في يوم جديد صحت اروي ولقت انها نايمه علي سرير ضخم وكان ماجد قاعد علي مكتب موجود في الغرفه وشغال علي الكومبيوتر اللي موجود قدامه!

اول ما صحيت ولقيت نفسي في المكان دا اتوترت لأن اخر حاجه كنت فكراها اني هرجع لبيتنا بس لما بصيت حواليا وشوفته قاعد علي مكتب ولابس لبس هادي اتوترت وقررت ابص لهدومي لانه مش طبيعي اني افضل هنا لسا بعدما وعدني انه هيرجعني لبيتنا  ..

اول ما بصيت علي هدومي و لقيت ان لبسي زي ماهو ارتحت شويه وبصيت عليه تاني وقولت:استاذ ماجد هو انا بعمل ايه هنا ،مش انت وعدتني انك هترجعني لبيتنا؟

ماخدش باله مني ولا من صوتي لانه تقريبا كده حاطت سماعات في ودنه وكان واضح عليه انه بيتكلم مع حد علي الكومبيوتر.. فقررت اني اقوم علشان اخليه ينتبه ليا ويرد علي سؤالي .

واول ما قربت منه وانا مش واحده بالي من السلك اللي متوصل بالكومبيوتر دا اتكعبلت فيه والكومبيوتر اتفصل وتقريبا كده انا بوظتله الدنيا!

ماجد قام وقف وهو مصدوم وبصلي بعيون حمرا وقال :انتي عملتي ايه ؟

قومت بسرعه وبدات اعدل شكل هدومي وبصيت عليه وقولت:انا اسفه يا ماجد والله مش قصدي اتكعبل في السلك وابوظ عليك المكالمه المهمه دي!

اول ما قولت كلامي باعتذار بصلي وقال باستغراب:مهمة!!انتي ازاي عرفتي ان المكالمه دي كانت مهمه؟

بصيت عليه ورديت بكل تلقائيه:علشان انت قاعد بطريقه هاديه وواضح عليك انك مركز جدا مع المكالمه دي وحتي ما اخدتش بالك اني بكلمك وبنده عليك !

رفع حاجبه وقالي بتساؤل خلاني اتوتر:وانتي بق كنتي بتكلميني وبتقوليلي ايه!

اتكلمت وانا بفكره باني بوظت المكالمه عليه وقلت:بس الاول انا لازم احل المشكله اللي اتسببت فيها مش ممكن تكون المكالمه دي مكالمه شغل؟

حرك راسه وقال:هيا فعلا كانت مكالمه شغل بس مش هتضرني في حاجه !بس قوليلي كنت بتكلميني في ايه؟

اتوترت جدا من نظراته ليا وقولت :انا ليه مرجعتش بيتنا ولي انا لسا عندك في القصر؟

ضم حاجبه ورد عليا:انتي نمتي ومكنش ينفع اروحك وانتي نايمه فقولت ناجل الموضوع لليوم التاني لحدما انتي تصحي  براحتك!

كلامه كان هادي ومليان بحنيه فقولت بفضول:يعني عادي مش متضايق اني نمت وعطلتك وضيعت وقتك!

حرك راسه بضحكه:لا يا اروى ايه اللي هيضايقني دا حقك انك ترجعي بيتك وتطمني اهلك اللي قلقانين عليكي دول!

حركت راسي بحزن وانا بفكر في ماما اللي زمانها قالبه الدنيا عليا وقولت :ايوا دي ماما زمانها هتجنن !كملت كلامي وانا برجع خصله من شعري ورا ودني وبقول :أصل انا بنتها الوحيدة؟

كان بيسمعني بكل اهتمام ونظراته ليا كانت جميله اوي ويمكن دا اللي خلاني اتشدله أكتر فقرب مني وقال بتساؤل :قوليلي يا اروي انتي عندك كام سنه؟

سؤاله وترني شويه ولاكن انا جاوبته ورديت عليه وقولت انا عندي٢٥ سنه وانت بق عندك كام سنه يا ماجد؟

بصلي شويه وسكت وكنت فكرت انه مش هيرد عليا بس فجأني لما قال:عندي ٣٥ سنه يا اروي..يعني انا اكبر منك بعشر سنين!

رده محسسنيش بالانبهار ولاكن ابتسمت وقلت:العمر كله يا ماجد بس هو انت متجوز؟

حرك راسه بالرفض وسألني باستغراب :بتسالي ليه يا اروي؟

حركت راسي بهدوء وقولت:دا سوال عادي انا بس اخدني الفضول شويه قولت اكيد عندك أسرة بما ان عندك القصر دا كله فمستحيل تكون عايش فيه لوحدك يعني !

بان علي ملامح وشه الحزن بس رد عليا بكل هدوء وقال:لا يا اروي بالعكس انا عايش هنا لواحدي ومش متجوز ولا حاجه!

ابتسمت اول ما سمعت كلامه ومكنتش عارفه ليه انا ابتسمت وبان علي وشي كل الفرحه دي فبصيتله وقلت:انشاء الله ربنا يجمعك ببنت الحلال ومتفضلش عايش لوحدك كده تاني..

بصلي شويه وكأنه عاوز يقول حاجه بس انا قررت اغير الموضوع بسرعه لان انا كنت مكسوفه جدا من نظراته ليا وقولت:هو انا كده هروح بيتي بكرة صح!

حرك راسه بالرفض:مش هعرف ارجعك بكره للاسف لان عندي شغل كتير هياخد مني اليوم كله  وهخلص متاخر!

سالته بفضول:شغل ايه اللي هياخد يوم كامل منك دا؟

سكت وانا قولت انه اكيد مش هيرد عليا وانه اتضايق من تدخلي بس هوا صدمني لما رد وقالي:شغل المزرعه اللي هنا يا اروي انا دكتور بيطري وعندي مزارع مواشي وسمك في كل محافظات مصر وعندي كمان مزارع في السعوديه والكويت؟

انا انبهرت ودا بان علي ملامح وشي فحركت راسي وقولت:انت هايل بصراحه يا ماجد..لا عندك حق ان الشغل ياخد كل وقتك ربنا معاك!

ابتسم علي كلامي وانا ابتسمت لما شوفت ضحكته لان ضحكته مريحة للقلب والعين واي ضغط  ممكن احس بيه ..

ماجد اتحرك من قدامي وفتح الدولاب خرج  منه فستان شكله راقي وقرب مني وقال:انا عارف انك مرتاحه في لبسك دا بس الهدوم دي انا جبتها مخصوص علشان ممكن تلبسي منها لو حابه تستكشفي المكان وكمان لو حابه تيجي معايا وتشوفي المزرعه بتاعتي وتقوليلي رئيك فيها !

قال كلامه وهو ماسك في ايديه الفستان وانا فضلت ابص عليه وساكته لحدما حسيت انه تعب من مد ايديه ليا فقربت منه واخدت الفستان وحركت راسي وسالته:هو انا ممكن اجي معاك اشوف المزارع بتاعتك دي بجد؟

حرك راسه ليا بهدوء وانا ابتسمت ووقتها اخدت قرار اني أجل رجوعي لماما لحدما اخلص استكشاف في كل ما يخلص العربي المثير دا!

خرج ماجد علشان يسمحلي اني ابدل هدومي براحتي وانا بصراحه برغم اني كنت متوتره اني اغير في الاوضه بتاعته، الا ان احساس الحماس كان مخليني عاوزه اطير من مكاني..

خلعت فستاني بتاع السهره اللي كنت لبساه ولبست مكانه الفستان الي جابهولي ماجد وبصراحه كلمة واو مستحيل توصف جمال الفستان.. انا عمري ما شوفت الفستان دا في اي محل روحته قبل كده معقول الجمال دا كله يبق موجود وانا معرفش !!

دخلت للحمام اغسل وشي واعدل شعري ووقتها لقيت منتجات تجميل حريمي موجوده حسيت ان في ست كانت موجوده هنا معاه بس لما فكرت ان الحجات شكلها قديمة شكي راح واطمنت شويه ..  

بدات احط من مساحيق التجميل وفردت شعري بشكل لطيف وبعدها خرجت واخدت اكتر من ١٠ دقايق كمان كنت واقفه قدام المرايه و بتغزل في نفسي لآن كان شكلي حلو اوي ولما لاحظ ماجد اني اخدت وقت كبير خبط علي الباب وانا بلغته يدخل واول ما دخل وشافني لقيته واقف مزهول وانا بصراحه مكنتش قادره احدد هو مصدوم ان شكلي حلو ولا ان شكلي وحش!

اتوترت من نظراته وقولت:في حاجه يا ماجد هو الفستان وحش!

انتبه علي صوتي وفاق وحرك راسه بالرفض وقال:لا بالعكس الفستان جميل اوي عليكي يا اروي؟

فرحت جدا وحسيت ان قلبي بيرقص من الفرحه مش عارفه لي كل المشاعر دي انا حاسه بيها برغم اني مكملتش يومين بس عارفاه الا اني اتشدتله جدااا!

ماجد بتساؤل:لو خلصتي خلينا ننزل!

حركت راسي وقولت:انا خلاص جاهزه!

حرك راسه وانا قربت منه وكنت فاكره انه هيمسكني من ايدي وننزل مع بعض ومش عارفه ليه فكرت في كده!!يمكن لان دا اللي حسيت بيه لما وقفت جمبه وبان فرق الطول بينا وحسيت وكاني في حمايته ومسؤليته ولا كان مجرد خيالات في دماغي!!

ماجد تجاهلني تماما ولبس نظارته الشمسية ومشي هو الأول وبلغني امشي وراه!

بدون اعتراض مني حركت راسي ومشيت وراه لحدما خرجنا من القصر وركبنا عربيه فخمة جدا من عربياته؟

كنت اول مره ازور محافظة المِنيا ومكنتش اتوقع ان قصر بالفخامة دي هيكون موجود فيها فكنت شايفه جمال المدينه ومبسوطه وياسلام علي النيل وجمال النيل وجمال اللي قاعد جمبي..طبعا انا اقصد ماجد لان شكله كان وسيم بشكل مش طبيعي !! 

معقول واحد بالحلاوة دي كلها يفضل عازب لحد دلوقت دي مين الهبله اللي تتعرف عليه وتفكر تسيبه دي !

وفي وسط ما انا بصاله وسرحانه فيه لقيته فجاة بصلي وعينيه جت في عيني من تحت النظاره لفيت وشي بسرعه وكان قلبي بيدق بقوه واما هوا مسمعتش صوته قال اي حاجه!

وبعد وقت كنا وصلنا قدام بوابه  ضخمه كانت باللون الاسود..

الحراس اللي واقفين عليها او مشافوا العربيه بتاعنا بتقرب بسرعه قاموا وفتحوا الباب..

دخلت العربيه للمكان وانا كنت بحاول اقنع نفسي ان الجمال دا كله يبق مزعة مواشي مش جنة! 

ماجد بصوته الرجولي والواضح قالي:وصلنا للمزرعه يا اروي اهلا بيكي في مزرعه العربي!

بصيتله وحركت راسي بحماس وقولت:لا مزرعه ايه قول جنة بق..احنا وصلنا الجنة يا ماجد مش كده! 

لما قولت كلامي حسيت انه عايز يبتسم بس ماسك نفسه فلقيت الباب بيتفتح وكان واحد من الحراس وكان بيرحب بماجد بكل احترام ولما شافني شاور لزميله يفتحلي الباب وبالفعل الباب اتفتح من جمبي وانا لما شوفت شكل الشاب من جماله سميت الله وبعدها نزلت وانا ببص حواليا وانا مزهوله من اللي عيني شيفاه! 

ماجد قرب مني ولما لقاني تايهه وسرحانه مع شكل المزرعه اتكلم جمب ودني وقال:يلا بينا يا اروي ندخل لجوا المزرعه علشان تشوفيها من الداخل!

حركت راسي علي كلامه واتوترت من قربه فهوا مشي الاول وانا مشيت وراه وفضلنا نعدي علي اقسام كتير وانا كنت مبهوره بجمال شكلهم 

اقسام الـ (بقر والجاموس والخيل والغنم والدواجن وغير اقسام تانيه لسا موصلتش عندها )بس كل حاجه كانت نظيفه والعمال والدكاتره اللي لابسين البالطوا منتشرين في كل مكان وكان شكلهم مبهر ومبهج!

كان في نظام كبير وكان شكل المزرعه مثير جدا للدهشه!

ماجد شاورلي علي عماره كبيره في اخر المزرعه وقال:دي سكن العمال والدكاترة!

بصيت علي العماره طبعا بانبهار ولقيته شاور علي مبني تاني مصمم بطريقه حديثة وقال:دا مكتبي !

بصيت علي المبني ورديت عليه بصدمه:كل دا مكتب!

حاول ماجد يمسك ضحكته ورد عليا:لا يا اروي دا مش مكتبي لواحدي اكيد في اقسام معايا زي قسم المحاسبه والضرايب والمحامي والسكرتريه و.. كان هيكمل بس منعته البنت اللي اتدخلت في كلامنا وقالت بمقاطعه :صباح الخير يا ماجد بيه حضرتك نورت المزرعه!

كنت ببص علي البنت اللي دخلت فجأة علينا وقطعت كلامنا دي بكل استغراب لانها كانت لابسه لبس ضيق شويه بس كان شكله شيك وعامله تسريحه غريبه اوي في شعرها مخلياها طالعه حلوه في الحقيفه!

رد ماجد علي البنت دي وقال:دا نورك يا نتاشا قوليلي اخبار العلف ايه وصل كله بـ أمان!

نتاشا حركت راسها بموافقه وابتسمت:كل حاجه تمام يا مستر ماجد ..بصتلي من فوق لتحت وقالت بتساؤل:دي عميله جديده ولا ايه يا فندم!

ماجد بص عليا وانا كنت مكشره وقال:لا دي اروي صديقتي!

اول ما قال كلامه رفعت عيني عليهم وبصيت علي نتاشا اللي اسمها وشكلها غريب وكان واضح عليها انها مش مرحبه بيا!

نتاشا رفعت ايديها علشان تسلم عليا واتكلمت بابتسامه وراها نظرات مش حلوه خالص ومليانه غرور:ازيك يا اروي انا نتاشا السكرتيره الخاصة بمستر ماجد!

قولت باستغراب وانا بمد ايدي علشان اسلم عليها :اسمك خافشا؟

اتضايقت جدا وردت عليا  بتعديل لاسمها:لا انا نتاشا،،كملت بابتسامه لما لاحظت ان ماجد مركز معاها اوي:انا صحيح اسمي غريب شويه بس اما تتعودي عليه هيبق سهل في النطق؟

حركت راسي وابتسمت بمجامله وقولت:طيب يا نتاشا الله يسلمك!

نتاشا ابتسمت وسحبت ايديها من ايدي ومسحتها ف هدومها من ورا وانا طبعا اخدت بالي واتضايقت من حركتها دي ،بس ماجد ما انتبهش فقررت امشي من قدامهم بدل ما اعصابي تنهار اكتر واكتر وسيبتهم يكملوا كلامهم في الشغل وقررت استكشف انا المزرعه.

قربت من قسم الدواجن وشوفت الكتاكيت الصغيره ماشين حوالين بعض فابتسمت بحب لان شكلهم كان جميل وانا واقفه وسرحانه لقيت شخص بيقرب مني وبيقول:شكلك بتحبي الفراخ الصغيرة اوي؟

لفيت بوشي اشوفه ولقيت انه دكتور من اللي شغالين هنا لانه كان لابس بالطوا ابيض فقولت بموافقه علي كلامه :ايوا بحب الفراخ وبالزات وهيا متحمره ولسا طالعه من الفرن سخنه!

اتصدم  الشاب من ردي عليه وقال:يعني انتي من ساعتها بتتخيلهم وهما في الفرن ومش معجبه بنظافتهم!

رديت عليه بموافقه:ايوا مش الفراخ دي احنا بناكلها ولا بنقف بس نتفرج عليها!

رفع حاجبه بزهول وقال:ايوا صح احنا بناكلها ..علي العموم انا مرجان مسؤول النظافه الخاصه بالفراخ دي كلها؟

بصيتله بتقزز وقولت:مسؤول نظافه ولابس بالطوا اما عجب صحيح!

لما لقي اني بصاله كده ضحك وقال:لا بلاش النظره دي انا صحيح مسؤول النظافه هنا بس اكيد مش بشتغل بلبسي دا او بايدي احنا هنا عندنا نظام وبنلبس جونتات علشان حمايه نفسنا من اي امراض وكمان بعد اي تنظيف عميق بنقوم بيه بناخد شاور ونغير هدومنا كلها والبالطوا دا كلنا هنا بنلبسه؟

كلامه عجبني وحركت راسي وانا ببصله بابتسامه وقولت :طيب اتشرفت بيك يا مرجان..

ابتسم مرجان ورد عليا:دا الشرف ليا طبعا ،هو صحيح انتي دكتورة جديده هنا  ولا ايه اصلا انا اول مره اشوفك بصراحه؟

حركت راسي برفض وقولت:لا انا مش دكتوره ولا شغاله هنا انا جايه زياره مع ماجد ؟

مرجان اتصدم لما نطقت اسم ماجد من غير لقب فسألني بفضول:انتي قصدك ماجد العربي..ماجد باشا يعني؟

حركت راسي بالموافقه وهوا قال بفضول:انتي قريبته ولا ايه؟

رديت عليه وانا بنكر سؤاله :لا احنا مجرد اصدقاء!

حرك راسه بتفهم وابتسم وقال:طيب انتي اكيد جايه تتفرجي علي المزرعه اي رئيك اساعدك تاخدي جوله فيها، اصل المزرعه هنا كبيرة جدا وفيها اقسام كتير؟

حركت راسي بالموافقه وقولت بحماس:فكرة هايله يا مرجان بس الاول هاتلي كتكوت من دول اشوفه،لان شكله عاجبني!!

مرجان قالي بقلق:عاوزه كتكوت ليه هتاكليه!

بصتله بضيق ورديت عليه:هاكله حي يا مرجان!! هو دا سؤال برضوا؟؟ 

بصلي بقلق:اصل انا استغربت يعني عاوزه الكتكوت تعملي بيه ايه!

قولت بضيق:هشوفه يا مرجان هلمس جنحاته اصل شكله نظيف وحبيت الاعبه!

اول ما مرجان فهم قصدي قعد يضحك بشده علي تفكيره فقرب فعلا من كتكوت مسكه وقربه مني وبسبب انه كان بيحطه علي أيدي لمس ايدي بالغلط وفي اللحظه دي قرب مننا ماجد وكان واضح علي ملامح وشه قد ايه  انه مضايق فبص لمرجان واتكلم بغضب:روح علي شغلك يا مرجان!

مرجان اتحرج وحرك راسه بكل احترام  ومشي وانا لما بصيت علي ماجد  ولقيته متضايق مديت ايدي في العنبر من جوا وحدفت الكتكوت وبعدها بصيتله وقولت:انا اسفه علشان مسكت الكتكوت بدون اذنك متعاقبش مرجان او تعمله خصم بق!

كان باصصلي وساكت وانا كنت متوتره من نظراته ليا فـ رد عليا وقالي:متقربيش من اي حد من العمال هنا وتتكلمي معاه خلي في حدود بينك وبينهم لان دا شغل ونظام كله هنا ماشي عليه فانتي جايه زياره يبق اتفرجي  علي المزرعه وبس؟؟

اول ما قال كلامه اتضايقت ورديت عليه وقولت باعتراض:وانا عملت ايه علشان تكلمني بالاسلوب دا وتقولي كل الكلام دا ،كل الحكايه اني عاجبني الكتكوت وطلبت من مرجان يخليني اشوفه؟

رد بعصبيه:كمان اتعرفتي عليه ؟

رديت بضيق:ايوا اتعرفت عليه انا حره بق اتعرف علي اي حد يعجبني وبعدين انا متخطيتش حدودي ولاكن في ناس بق سايباها لاي حد يقرب منها ويتلزق فيها وعاملين نفسهم مش واخدين بالهم؟

ماجد بصلي وكان مش قادر يفهم انا اقصد ايه بالكلام الغريب اللي قولتهوله دا ،، فانا قررت اسيبه وامشي لانه حرق دمي واول ما مشيت هوا اتصدم وقرر يمشي ورايا ويمنعني اني امشي وانا مش عارفه اي حاجه هنا ..

انا قررت اروح لمكان حسيت انه بعيد شويه عن نظر الكل واول ما وصلت هناك وشوفت اللي موجود قدامي صرخت بخوف؟يتبع بقلمي شيماء صبحي 

تفتكروا اروي صرخت بالشكل دا ليه😂وياتري ماجد ايه حكايته اللي مخبيها ورا هدوئة الغريب دا؟😍

تكملة الرواية من هنااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا