رواية المفقودة الفصل الخامس 5بقلم زينب ماجد (حصريه وجديده في مدونة قصر الروايات)
رواية المفقودة الفصل الخامس 5بقلم زينب ماجد (حصريه وجديده في مدونة قصر الروايات)
المفقودة
((( بقلم زينب ماجد )))
الحلقة_ ٥
صعدت بالسيارة واني مذهولة : يعني جبتني من اربيل لبغداد حتى توكعني بهالسالفة واني اللي صدكت عندك شغل وجاية وياك حتى اساعدك !
- وساعدتيني هواي عاشت ايدج
- الشرطة وياك !؟
- اللي عنده فلوس كلها وياه ..
- ليش سويت هيجي ؟
- حتى تعرفين منو ولي نعمتج بهالحياة .. الفلوس اللي كاعد دا تلميها وتفكرين تشردين بيها مراح تفيدج بشي بعد في حال ردتي تشترين بيت واسمج دخل بالحاسبة راح يبين انت عليج قضية مخدرات وراح يلزموج، واذا ردتي تشرين سيارة يلزموج، واذا ردتي تسافرين بالمطار يلزموج ، وع الحدود لو اندك اسمج هم تنلزمين
يعني باختصار يا حلوة يا صغيرة ما كدامج غير تكليلنا بس وتشتغلين اللي نكلج عليه وبس .
احترك دمي بس الساني ما نطق ولا كلمة من الصدمة والقهرة
شنو اسوي وشنو بيدي ووين اروح ؟
معقولا اخلص عمري كله وياهم ؟
واشتغل شغلهم الوصخ !
لييش اني ؟
ليش سوو وياي هذا الملعوب وورطوني
وياي بان لا اتقربولها ولا ورطوها مثلي
ليش بس اني هيج سوو بيا !!؟
يعني حتى اذا اشتغلت وجمعت فلوس بيش تفيد اذا ما اكدر اشتري بيهم بيت واطلع منهم !
انداريت عليه من بعد موجة تفكير طويلة وسكوت تام بالسيارة .. حجيت : وين رحت البارحة ؟
- رحت نمت بشقتنا
_ عندك شقة ببغداد
- اكثر من شقة ليش عجبتج بغداد !؟ اذا حابة تشتغلين بيها هم اكو نوادي هنا واخليج بشقة
- متزوج انت !
- ليش السؤال !؟
- هيج سؤال
- اي متزوج
- عندك خوات ؟
- مالج علاقة بهالامور
- هم مشغلهم مثلنا
- مرتي وخواتي ما يوصلن الباب
- راح تشوفنا بيهم فد يوم
- شنو قصدج ؟
سكتت جر شعري : اسمعي لج اني ما ينحجي وياي هيج حجي افتهمتي احترمي نفسج وامشي عدل وياي لا وهو الله مو بس شرطة لا اورطج بامور وسوالف .. تا تموتين ومحد يدحج بيج .
- تكدر توكف ارجع ليورا اكعد
- وعليش ؟
_ رايدة انام
وكف السيارة ورجعت صعدت ورا ..
تمددت وهو يسوق .. وكمت اتكلب واجي منا وارجع لظهري وافكر
حياتي صارت دائرة تدور بمنطقتهم مالي طريق .. شلون اخلص شلون اعيش واتحملهم ما ادري .. جنت مرتاحة بالميتم اكبر همومي اخلص شغلي واني اداري خواتي الصغار .. كبرت همومي وكبرت فوك عمري عمرين بدين ذولة القذرين .
من التعب والكتل اللي اكلته البارحة غفيت بنص تفكيري
ندهني بسيطرة اربيل .. كعدت عبرنا السيطرة ورجعت غفيت ما كعدت الا وهو يكلي : انزلي يلا وصلنا الفندق اني راح راجع
كمت من مكاني ..
خطواتي ثكيلة حيل .. والتعب والقهر بكلبي هاد حيلي
كوة امشي ضربت على دكمة المصعد ما بيه اصعد .. وانتجيت ع الحايط .. انفتح المصعد صعدت لغرفتي .. افتح بالباب مينفتح .. كمت ادك ..
محد يفتح .. بقيت ادك واصيح : بااان
انفتح الباب وهي تعدل بملابسها
: اش فوتي
- وين جنتي صار ساعة ادك ؟
دا افوت والكى واحد نايم ع السرير التفتت الها : منو هذا
- هشش بس البارحة نام هنا
- ومنوووو هذا ؟
كعد هو وهي تكلي : هاي شبيج اتخبلتي .
- انت صدك تحجين لو مقلب ؟ شنو مدخلته بغرفتنااااااا باااان ؟
ما اهتمتلي راحت تهتم بيه : اسفة هاي صديقتي بالغرفة متدري بالموضوع ، لتزعل .
- انت براسج شي اتخبلتي ؟
- ججك كاااافي
- منو هذااااا ؟
- هذا حبيبي ولا البارحة وحدي انت مموجودة مكدر يتركني لوحدي اطلعي برا بين ميبدل روحي
- اني اطلع برا حتى هذا ياخذ راحته كوموا اطلعواااا مني بسررررعة
كامت تدفع بيا وتكلي : ترا مصارت هاي كتلج بس خلي يبدل ويطلع دطلعيييي
ودفعتني برا وسدت الباب
تركت الغرفة ونزلت بهمة رحت لمنال كتلها : بعد مستحيل ابقى اني وبان بغرفة وحدة انطيني مفاتيح .
- شنو السبب
- دا تجيب شباب بالغرفة واني ما اكدر اتحمل وضعها كمت اقرف منها
- تقرفين منها لو تغارين منها لان شاطرة وسباعية وعرفت شلون تشتغل وانت باقية تكمزين ومحد بحالج
- ما اريد احد بحالي انطيني مفاتيح الغرفة القديمة دا اكعد بيها
- انت حاسبة احنا نشتغل عندج لو الفندق ورث الخلفج واي غرفة تعجبج تنزلين بيها !
- لا تشتغلون عندي ولا ورث الخلفني اجر غرفة اليه لوحدي
- ممنوع
- ممنوع اشتري بيت ممنوع اشتري سيارة ممنوع اجر غرفة فندق المن دا اتخلوني اشتغل واجيب كل هالفلوس وشنو اسوي بيها
- لما راح تعرفين تحطين عقلج براسج وتصيرين شاطرة مثل بان وكتها راح تسوين كل اللي تريدي وتشترين كلشي بنفسج
كامت من مكانها وهي تكلي ليش يا حبيبتي احنا غشمة نخليج تحصلين كل هالفلوس وتعيشين بكيفج وعلى راحتج .. لا يا حبيبتي لا يحلوة انت .. لو تمشين بدربنا وبكيفنا لو لتحلمين تعيشين براحة ..
وهسه لفي وارجعي لغرفتج يلا حبابة
طخت خدي باصبعها ومشت .. النار صعدت لراسي ..
دا اكره روحي اكره عيشتي .. شسوي يا ربي شسوي ؟
عفت وطلعت من الفندق ..
اباب الفندق اكو سكيفة وجواها طبلات وكراسي وكعدات .. كعدت عليهم ولعبانة نفسي ومقهورة حيل مقهورة .. بان شلون هيج تغيرت ومشت بدربهم .. بسرعة تقبلت وعاشت الدور وياهم ومتونسة وتشوفني غلط !
واني اللي جنت اسأل اكول ليش بس اني ورطوني بسالفة الشرطة .. ليش ما سووها ببان طلعت بان من الاساس وياهم مو وياي
مو بيدي ما اكدر اصير مثلهم ..
جان حلمي احب انسان .. واتزوجه واصير ام ويصير عندي اطفال .. مو وحدة يومية تنطي نفسها لواحد وتاخذ فلوس .. ما اتقبل احد يتقربلي او يلمسني واني ما رايدته ولا عندي وياه مشاعر بس لمجرد اريد من عنده فلوس .. كارهة نفسي كلش .
كاعدة وحايرة بروحي
طلعت بان ، شافتني كال : ادور عليج صار ساعة وانت هنا .. چچك .
ما جاوبتها ، فتحت ايدها وكالتلي : حلو ؟
باوعت محبس فضة وبيه كرستالة ، درت راسي منها
كالت : دايموند .. جابلياه هدية البارحة لما طلعنا ، ومو بس هاي وعدني يجيبلي سيارة
هو ابن سياسي وابوه متختخ اتختخ فلوس ..
الدايموند هذا لا شيء عنده .. اذا كدرت وخليته يحبني اصير فوك فوك .
- وحتى تخلي يحبج جبتي للغرفة و.... اسكتي بان كومي مني .
- ليش اللي مثله وجايبلي مثل هيج محبس تكدرين تكليلا لا .. لو اكدر اتعزز عليه .
- انت مو بان ولا اختي اللي عشت وياها من صغري .. انت وحدة ثانية .
- اذا ما اتغيرتي مثلي راح تبقين لهذا حالج لحد متموتين .
- الموت اهون عليه من اكون مثلج .
عفتها وكمت منها صعدت فوك للغرفة .. لكيت بعد ملابس مطشرة والغرفة هوسة ... اتجاهلت كلشي ورحت لسريري تغطيت وكمت ابجي ومالي طريقة اخلص بيها من هالمستنقع .
الا بحالة وحدة .. واخاف اسويها .
———————
الانبار _ حديثة
عيفان : جنت جاي من بغداد دخلت البيت جان مكاوب فوك جوا وهوسه وصياح وسلوان ومرته صايرين دمايا ..
صحت على اختي سهاد جانت كبالي .. اشرتلها اجت
: شكو يولي
- مو تعرف سلوان خطب سحر بت ابو منهل الرايدها وما اطوها كالوا ابن عنها رايدها ..
- اعرف بهاي .. غيرها
- هو ودى اكثر من واحد ع البنية وما رضوا ينطوها .. البارحة زفتها لابن عمها .
- لا حول ولا قوة الا بالله .. مو نصيبه
- تعال اقنع سلوان مو نصيبك من عرف ولهساع ما خلا حجر بهالبيت ما بعثره .. يول جار حتى على مرته وجهاله
كاعد تحجي سهاد والحجي فات للبيت سمع بصياح سلوان ومرته تهدد الا تطلع وما تظل ، حجه : هالة اخذي جهيلج يابه واصعدي فوك
- عمي ما اضل ساعة وحدة عند سلوان ما ابقالها اليكتلني اني وجهالي لخاطر مرا والله ما اضلو
صرخ بيها : كلتلج اصعدي فوووووك ، سلوووووان
نزل سلوان وهو يهدد : ما اخليهم اليوم والله اليوم لا ما اهججهم ما اطلع ابن ابوي
- اذكر الله وحط عكلك براسك يا ولد .. البنت مو الك ولا هي نصيبك
- ويزوجوها غصب لابن عمها ما اسكتلهم والله
- شنهو اللي ما تسكتلهم ابن الكلب بنية ونطوها لابن عمها .. ياهو انت وتعترض عمها خالها
- والله لا اهجم الديرة فوك روسهم والله ما اخليهم اليوم .
كام يتصايح الحجي ويا سلوان وسلوان ما راضي يرد
طلع من البيت غضبان .. اندار الحجي لعيفان كالو : امش الحك اخوك لا تهده وحده ويتخبل علينه يولو ما ناكصين خبال نحنا امشيييي
كام عيفان من مكانه وراح لحك سلوان لكاه هستوا يريد يحرك سيارته .. صعد بالسيارة وياه وكام يهدي بيه بس سلوان ما يهدأ يهدد و يعزم .
راح وكف كبال بيت منهل يصايح وياهم
طلع اخو سحر تكاون وياه وضرب سلوان بوكس واتعدى عليه .. وعيفان چيت وفات بنصهم لزم اخو سحر لعب بيه بوكسيات بيده .. الولد ضعيف حيل يطلع بكد جف من ايد عيفان .. لعب بحاله لعب دفرات وبوكسيات .. وشمره كدام باب بيتهم مدمى وجر سلوان ورد للبيت
وحجه لابوه الصار ، الحجي تخبل كاله : واني زتيتك وياه تهدي اخوك وتجيبه لو تهد وياه على بيوت الوادم وتجتل ابنهم
- ول يابه جريته وما ينجر طلع ذاك يهادد وتعدا على سلوان شلون اكل متفرج وهو كاتل اخوي
- وجتلته
كاعد يحجون وما يحسون الا هوسه ومصايح على باب البيت
طلع الحجي وولده .. بيت منهل جايين هداده ومسلحين
اول ما طلع اشتعل الرمي وصوبوا سلوان ببطنه .. من شافوا سلوان وكع .. جروا ولدهم وانسحبوا .. وانخبص الحجي وولده بوكعت سلوان
نقلوه للمستشفى .. دخلوه عمليات ..
وعمران وعيفان يغلون يردون يهدون على بيت منهل ..
طلع سلوان من العمليات بس حالته ما مستقرة .. بين الحياة والموت
رجع عمران وعيفان اتسلحوا ويردون يهدون على ال منهل بثار اخوهم وعمهم يهدي بيهم وما ينردون .. واجا شيخ عشيرتهم وتكفل السالفة وراح على عشيرة ال منهل .. تا يكاوموهم .
وكبت هوسة بالديرة ناس تهدد بناس
وناس تريد تاكل ناس .. بس عيفان تاكل بروحه .. يريد يلزم الصوب اخوه يشرب من دمه
وكعد يتربص لمحمد اخو وطبان .. كعده ...
جان راكب سيارته وراكنها غاد تحت شجرة ولاف غترته على وجهه ..
صف سيارته وطبان كدام باب بيتهم وراد ينزل
نزله عيفان وصرخ : وطباااااان
وطبان ويا ما شاف عيفان رفع ايده يهدده : اكتلك اكتلك .. اصبر عليه يا ابن حجيل
عيفان : وانا رايدها من الله راكض عيفان على وطبان
وطبان ما مكابله داخل بيتهم وساد الباب شارد منه
رد عيفان لباب سيارته يغلط وينغل ويريد بس يلزم واحد منهم تا يكتلا ويبرد كلبه بيهم على وكعة اخوه سلوان .
لليل صال مكابل البيت لحد ما طلع محمد اخو وطبان
والزمه عيفان برد كلبك بيه .. لحد ما وخر منه ومحمد جثة لا يحرك ايد ولا رجل من كتلة عيفان
عافه ورجع لبيتهم بلغ ابوه .. ابوه تخبل
كاله : ما تضل هينا .. اطلع بهالليل لاربيل راح يهدون ويكتلونك
- وانا اخاف منهم خاطر اشرد
- يول الموت ما بيه شجاع الزلم تكاومت والعشاير كعدت تحلها نضل جاتل ومجتول .. يول اذا ضليت هينا للصبح يحطون طلقة بكلبك
- ما راح امشي ولا اتحرك من هينا لا ما ابرد كلبي بوطبان الخنيـ ث واهلو .. ما راح اتحرك .
- اخوك بالمستشفى وحيلي مهدود عليه وانت بعدك تهادد يول ارحموني شيضل بحالي لو تجتلتو جدامي يول امشي عيفان وخليني اكاومهم بالعشاير نحلها
عيفان والف سيف ما يرد
وابوه متخبل خايف لا يوكعون بعيفان ويكتلوه ..
بس عيفان ما رد ولا ترك الديرة ..
عاد الحجي حكم على عيفان ما يطلع من البيت ولا يوصل الباب ووصى عمران عليه .. وضل عمران ملازم البيت خاطر يلزم بعيفان وما يخلي يطلع لحد ما يحلون السالفة بالعشاير
وصارت كعدت وانخبصت العشيرة وطلع الحق على ال جحيل
كون سلوان وعيفان هم اللي هادين على ال منهل وكاتلين ابنهم واجوا هم هداده .. ووكعت بسلوان اللي يمشي ويشهر باسم باتهم وايدها وهم ما رايدينه .. ومكملها عيفان وكاتل محمد ابن اخوهن ..
فصاير مفاصل .. وسادين القضية بفلوس
وحاطين الزلم كلهم ومتعاهدين لا ال منهل يهدون على ال جحيل ولا ال حجيل يهدون على ال منهل .. واليعتدي منهم راح يقومون بيه القصاص ... والطرفين اتعاهدوا محد منهم يعتدي ع الاخر .
بس سلوان بالمستشفى
ومحمد اللي كتلا عيفان بالمستشفى ..
والكبار اتفقت بس الشباب شيلزمها
الحاج جحيل كام ولزم عيفان شغل باربيل وكالو : تلزم معامل الجبس باربيل وتكعد هينا ما توصل ولا تجي لحين ما انا ابلغك لو اكلك
- واشرد منهم
-يول انا رايدك تلزم شغل اربيل ما رايدك اشرد
- انا رجال مهندس معماري شفهمني بشغل معامل الجبس !؟
- تتعلم وهاي معامل ابوك امش غاد وحط عينك ع المعامل ولا توصل هين لحد ما انا اكلك تعال
وسلمه معامل الجبس اللي باربيل حتى يبعد ابنه من الديرة خاطر لا يأذوه . عيفان ما كال باطل اخذ جنطته وراح نزل بغرفة بالفندق البي متعود دائما ينزل بيه .
—————-
دخلت منال للغرفة كالت : كوموا ويايا اليوم عدكم جلسة ليزر
-ليش ؟ مو سوينا ذيج المرة ؟
-وبس مرة !؟ لازم يبقى جسمكم نظيف دائماً اتحركوا يلا
حجت وهي تكلي : استخدمي هذه الغسولات و الشامبو
-ليش ؟
-ريحتهم اطيب ويسوون الجسم ناعم بعد الشيفنك
اخذته وسبحت واستخدمتهم صار جسمي ناعم كلش وريحته تجنن .. سويت شيفينك لجسمي وطلعت وياها لمركز التجميل سويت ليزر للجسم كامل ..
وحطتلي مرطبات للجسم .. ومن بعدها سوتلي تنظيف بشرة واسنان ... ورتبتلي شعري سرحته وبرمتلي الاطراف وحطتلي مكياج بس مو قوي .. خفيف وبناتي
حسيت اكو شي غريب
ردت البس فستان سهرة ما رضت جانت جايبتلي فستان بناتي .. اوف وايت ربع ردن بيه وجوا الركبة .. طلعني بعمر صغير كأني طالبة اعدادية مو رايحة لنادي !
بس ما حجيت ولا ناقشت ..
دنريد نطلع اني وبان كالتلي : لا بان تروح لوحدها وانت تروحين وياي
- ليش مو سوا !؟
- افضل
ركبت بان ويا السايق واندارتلي مبتسمة : يلا خلي نمشي
- وين راح نروح
- مشوار صغير ونرجع
صعدت وياها بالصدر مشغلة اغاني بصوت عالي ..
وصلنا شفتها دخلت مكان مكتوب عليه ( باغي شقلاوة ) كمت اباوع بنايات عالية وفلل وقصور .
تنهدت واني اباوع البنايات ، حجت : تعرفين هذا المكان !؟
- لا شنو هذا
- يسمون هذا المكان القرية اللبنانية اجمل واغلى مجمع سكاني بالعراق .
- واحنا شعدنا داخلين الها ؟
- شغلة نخلصها ونمشي
صفت كدام بيت عالي وجبير .. انتظرنا شوية وكالت : يلا انزلي
- وين انزل
- راح تبقين الليلة هنا ولتحاولين تسوين شي مو زين ترا الشخصية اللي راح تلتقين وياها انسان جبير واله وزنه .
- واني شلي علاقة بيه
- اسعدي .. هو طلبج بنفسه ودفع خوش فلوس لوطبان حتى تحضرين عنده اليوم فلا تسودين وجوهنا وياه ترا تشوفين شي ما يعجبج من وطبان
- اسعده شلون واني شكو لا اريد ارجع احنا اتفقنا اشتغل بالنادي بس ما الي علاقة باي رجال
- لتصيرين غبية الرجال شافج بالنادي .. ورادج
هذا اذا سعدتي تصيرين فوك تعرفين شنو يعني فوك ؟
- لا اريد اصير فوك ولا اريد جوا رجعيني
- اسمعي وحطي عقلج براسج اذا حاولتي تخالفين الاوامر راح تنكتلين وراح تتعاقبين وبدل واحد مثل هذا راح يعتدون عليج اكثر منه ويأدبوج
- اني اتفقت وياكم
- لا اتفقنا ولا حجيتا انت هنا تنفذين الاوامر وبسسسس
انزلي بسرعة
- ما اكدر ما اريد رجعيني للنادي
- لا تنزلين وغصبا ما عليج
- ما انزل
- شوفي اذا اتحركنا منا ومشينا والله اوديج لوطبان اخليه يوجه بيج جماعة يعلموج شلون تنفذين الاوامر بدوورون نقاش انزليييييي
نزلت من السيارة وادية ترجف
حركت السيارة ومشت وتركتني .. دموعي كامت تجري
انفتح باب البيت .. وواحد كالي : اتفضلي منا
امشي وياه وابجي والتلفت واريد انهزم بس وين انهزم
ووين اشرد منهم !؟ دخلوني جوا
بيت جبير ومأثث بأفضل اثاث ..
كدامي طاولة عليها فاكهة وماعوني مخلا فوكه كلينكس ذهبي وشوكة وسجينة .
اخذت السجينة وحطيتها بأيدي ..
سمعت صوت رجال دينزل من فوك .. ضميت ايدي بصفحة القنفة .. وما كمت .. ضلت عيوني تراقب وجفوني مدمعة وجامدة بيها الدموع من الخوف
نزل رجال اتذكر شايفته
ابتسم وكال : يا هلا حي من نور البيت يابه
ما كمتله .. وكف كدامي : شنو هالجمال شنو هالرقة .. هم ركص حلو هم صوت حلو وهم وجوه حلو الله شكم يوم ضل يعجن بيج حتى طلع بهالجمال
باوعته كأني اتذكرته ..
اتذكر غنيت وهو جان لازم سبحة ويحاجيني وطلب مني اغني عراقي ، حجيت : منو انت
- اسمي صدام
- وليش طالبني
- اكو احد يشوفج ميدوخ بهالجمال صارلي مدة انتظر لحد ما كدرت احصلج
طلبتج من صاحب النادي وابو النادي اتواصل ويا الفندق المسؤل عليكم وابو الفندق اتواصل ويا الرجال المسؤل عليكم واتفقت وياه وكالي : البنية بباكيتها صارلها فترة طالعة من الميتم وجديدة بالنادي وسعرها يكلف
كتله لو بسعر جبل ذهب رايدها
- انتو شلون تكدرون تكونون بهالحقارة وتتاجرون ببشر وكأنوا احنا سلعة بأديكم مو بشر مو ناس ..
- له له له متوقعت وحدة حلوة مثلج السانها مو حلو هيج .. اللي يدفع ملايين حتى يحصلج تسمي يتاجر بيج
- لا اسمها يشتريني اني مو سلعة ولا سيارة تشتريها جان طلبتني وسألتني اذا اني معجبة بيك وجان راح تعرف جوابي بالنادي بدون ما تروح على صاحب النادي وتطلبني
- هسه يا حلوة هالجسم الترف من تركصين بيه كدام الرايح والجاي مو تجارة وبس من اجي اريدج واطلبج اتحسبيها عليه متاجرة
- مالك علاقة انت ششتغل وشسوي .. بس مو من حقك تشتريني اني مو سلعتك ولا شي ينشره وينباع .
- يعني قصدج ما تريديني
- اذا تسمح ترجعني للفندق وتعوفني بحالي
- وفلوسي !؟
- مالي علاقة تكدر تروح تاخذها منهم .
- بس اني رايدج
- واني ما اريد .. رجعني طبعا اذا عندك كرامة
- تمام بس تكدرين تهدين وناكل العشا سوا ونسولف وبعدها اذا ما عجبج ترجعين .
شفته بيه مجال ويتفاهم .. سكتت
ودخلوا صينية تمن وفوكاها لحم ومقبلات وخبز واشكال الوان الأكل حطوه كال : اتقربي اكلي ما راح اسويلج شي .. اتفضلي
كعدت ع الاكل كام ياكل بس اني خايفة ..
حطلي اكل كدامي ما اكلت .. حجه : اكلي
- اطلب منهم يرجعوني
- زين جربيني يمكن تحبيني
- ما اريد
اخذ كلينكس مبلل مسح اديه وحلكه وصاح على واحد اسمه حنش .. اجا وكف عنده كاله : اخذها ، اني راح اصعد للغرفة ساعة .. شوف شغلك .
- تأمر شيخ
كام راح وهو يكلي : كومي وياي
فرحت كلت واخيراً لكيت واحد ادمي ويستمع ويتفاهم .
مشيت كدامه اريد اطلع ليورا .. طلعوا كدامي اثنين
اريد اعبر منا يوكفون كدامي .. اريد امشي منا يجون
انداريت للوراي : شبيهم كللهم يوخرون
باوعلهم اشرلهم براسه
لزموني من اديه اثنينهم كمت ارافس برجليه وارفع برجلي واصرخ .. شالوني من الكاع واني اصرخ وادفع بيهم
رادو يلزمون اديه اثنينه يشدوهن فلتت من عدهم وزركت اصرخ واصيح بنص البيت .. اتراكضوا وراي .. صعدت فوك التخم واوخر بروحي منهم وهو يريد يلزمني وارافس باديه ورجليه
يردون يلزموني ذبيت روحي على اللي يريد يلزمني عضيته من ايده حيل لخني من ايده وذبني للتخم وحط رجله فوك ظهري واني اصرخ شدوا اديه ليورا
اصيح : عوفووووني وخروا من عندي .. وخروااا
وصلة ثانية شدوا عيوني بيهم
كمت اصيح وابجي واتوسل بيهم : الله يخليكم عوفوني
لا تأذوني عليكم الله لا .. اتركوووني
حطوا وصلة على حلكي
وجروني ذبوني بغرفة .. مقيدة ادية ورجليه وحلكي
ابجي ومرعوبة ما اعرف شراح يسوون بيه
يمكن راح يكتلوني
او يمكن يعتدون عليه ..
اجر باديه اريد افتحهن ما اكدر
ابجي بكل قواي من كل كلبي وما اكدر اصيح حلكي مشدود
رجعوا دخلوا عليه .. فتح حلكي وكال : اذا صيحتي راح اذيج
- الله يخليك لتأذيني رجعوني فدوة ابوس اديكم
- سوي المطلوب منج واحنا نرجعج
- لا الله يخليك لا ما اكدر عوفوني الله عليك
- شوفي الشيخ محترم ميحب يهين مرة او يغصبها يحب يعاشر المرأة اللي وياه بكامل الأحترام .. فتروحين عنده وتستقبلي بكل حب وتنفذين المطلوب منج لووو
- الله يخليكم عوفوني والله ما اكدر .. عوفوني
- هذه راح اتعبنا وما راح تتأدب شيلوها
شالوني وكفوني صرخت : عوفوني
- اذا صرختي راح نضطر نأذيج امشي بدون صياح احسن ما تخلينا نسوي بيج امور ما تخطر ابالج .. امشي
شادين ايديه وعيوني ولازميني من اديه ويمشي بيه .. نزلت درج ما اعرف وين ماخذيني .. اتنفس بقوة وحتى انفاسي ترجف من الخوف .. وكفني وصوت باب ينفتح .. حجيت : وين ماخذيني الله يخليكم اتركووووني
دفعني جوا بصوت عالي وهو يصيح : فوتي لججججج
فتت واني عيوني مشدودة كمت اسمع صوت جلاب تنبح بقوة كمت اصرخ لزمني من اديه عبالي راح يذبني للجلاب كمت اجر بروحي واصرخ بكل صوتي واتوسله : فدوة لا والله اخااااااف عوفووووووني لاااااا
جرني بقوة ونزل راسي ودفعني لشي حديد وسحب الوصلة من عيني اباوع اني بقفص حديد مال كلاب .. والكلاب كدامي لازمهن واحد وينبحن بقوة جوعانات ..
حجه : تصيرين حبابة وتشوفين شغلج وتروحين للشيخ تبيضين وجهنا .. لو اهد الجلاب ذولة واخليهم ياكلوج بعضامچ ؟
-الله يخليكم لتسوون بيه هيج والله اخاف
-كولي اي وصيري حبابة وشوفي شلون راح اخليج فوگ
-ما اكدر والله ما اكدر
-الشيخ منتظر جواب !
-ما اكدر الله يخليكم طلعوني منا وعوفوني كافي ابوس اديكم
-الظاهر هاي بعدها تحتاج تربية .. مهمتك هاي حنش .. ربيها
سد القفص الحديد عليه .. وطفى الضوا .. وترك الكلاب تهجم .. كمت اصرخ بصوت عللي وابجي .. صياح صياح من كل كلبي لحظات رعب مريت بيها وكف كلبي من الخوف واني اتوسل بيهم ما يردون ..
كلتلهم .. موافقة موافقة والله اسوي بس طلعووووني
جروا الجلاب واني كاعدة بنص القفص طلعوني منه واني ابجي واشهك .. دخلني بغرفة وكال : ميصير اتدخلين ع الشيخ وانت بهالحال .. رتبي نفسج وحسني وضعج واطلعي
دخلوني بغرفة بيها مكياج وملابس ومبين غرفة بنات ...
كمت ابجي بقوة
بجي اللي ماله لا حول ولا قوة
عدلت نفسي ومسحت دموعي وبقيت كاعدة بمكاني كل ما امسح ترجع دموعي تجري وارد ارتب من جديد .
دخل اللي سامه حنش
واخذني ووصلني لغرفة فوك .. كالي : دكي الباب وادخلي اسعدي الشيخ ومنريد اي تصرف يزعجه
دكيت الباب ، صاح : تفضل
دخلت .. وجانت اقبح ليلة اعيشها كل عمري ..
احس اتشوهت وصرت مثل ميردون هم ( بنت ليل ) مهمتها تسعد المقابيلها بجسدها .
للصبح منمت بس دافنة راسي وابجي واشهك بدون صوت حتى ميسمعني .. لصبح كعد هو سبح وطلع .. واني دخلت الحمام اللي بالغرفة .. احس كلشي هنا قذر ما اكدر استحمله .. ما استحمل ابقى هنا اكثر من هيج .
تركت ونزلت طلبت منهم ارجع
وفرولي سيارة ورجعوني ع الفندق .. لكيت بان نايمة اول ما دخلت فزت : هااا بشري شسويتي
- جنتي تدرين باللي يريدوه
- لا بس منال كالتلي اليوم
- اليوم شوكت لما رجعتي الفجر لو شوكت
- هسه احجيلي شسويتي .. كالوا خوش رجال
- كلش خوش وكلش محترم
وخري مني شو وخري
كعدت ابجي
- ليش تبجين كافّي چچك اتعودي على وضعنا وشغلنا ليش دا اتعبين نفسج ماكو فايدة من مقاومتج ودا تشوفيهم كل متعاندين وتقاومين يأذوج اكثر
- واصير مثلهم
- وشنو بيدج وشخسرانة
- شخسرانة !
- لا طبعا ربحانة ما خسرانة .. راح تربحين هواي فلوس هواي زلم تنتظر منج كلمة الضابط والشيخ وجبيرهم وثكيلهم يوكع يم حجل رجليج ..
- الله يخليج بان عوفيني البية مكفيني عوفينييييي .
تركتها ورحت سبحت ورجعت انداريت عنها بفراشي وبقيت ابجي .. بس ما اجاني نوم وهي فتحت اتصال ويا واحد تحبه وتسولف وتضحك .. اضايقت كمت من مكاني وطلعت من الغرفة وركضت ع الدرج طلعت برا الفندق .
انتجيت ع العمود مال المسكف ..
ابجي وتنزل دموعي واني اباوع الشارع .. وارجع امسحهم بيدي
منهارة ونفسيتي صفر ..
صفت سيارة ...
دنكت مسحت وجهي باثنين ادية واحضن نفسي وارجع على وكفتي .. نزل منها ولد معضل اصلع شايفته كبل بالفندق هنا .. كمت اكره وجوه الرياجيل كلها شريفهم مجرم .. ما بيهم شريف ابد .. كلهم يدورون شي واحد بالمرة .
طبك سيارته بلا اهتمام بس ضايج وعاكد حواجبه
ردات فعله الضايج خلت نظراتي بلا اهتمام تراقبه
من فات باوع بعيوني واندار متضايق دك تليفونه .. سحب ورد وهو يصيح بالتليفون !
اخذت نفس وانداريت ..
لا نوم لا اكل لا راحة بال احس جسمي دينهار
مدا اكدر اتخطى اللي دا اعيشه ولا اتأقلم وياه ..
اللي انقهرت واللي ضجت او متت منو مهتم !؟
رحت صعدت فوك .. سحبت جنطتي وطلعت حباية
اخذتها وشربت مي .. وبان تباوعلي سدت الخط : انت دا تاخذين الحب بكثرة
- حتى انسى وما افكر
- بس تعرفين هذه مخدرات ودا تورطين نفسج
- هي الوحيدة اللي اتخليني انسى وما افكر
- اذا هم اذوج شوية انت راح تأذين نفسج اكثر منهم
- اهتمي بصاحبج واتركيني اشوف روحي لوحدي
حجيتها واني اتمدد ع التخم واحس مفعول الحبة ديسري بكل ارجاء جسمي .. مغمضة .. كمت اضحك
: شبيج
- يكلي الشيخ محترم ميحب يعامل المرأة باسلوب محلو .. وهم ذابيني للجلاب هههههههههههه هو ميتحمل لهذا منطيني لجلابه هههههههه
ضحكت : كلهم هيج يحجولج الانسانية بطريقتهم ، الاولى بيج تستغلي وتفرغين جيوبه .. شيخ وعنده بيت جبير بقرية دجلة اذا رضيتي ثاني يوم سيارة عالية يحطها بين اديج
- وشسوي بالسيارة نطلع بيها اني ومنال نزهة ههههههههه
- او يمكن اني وياج
- وصاحبج ويانا ههههههههه
كامت تضحك .. كمت من مكاني وكفت ع الشباك شفت ابو عضلة واكف .. انتجت عليه بان كتلها : تعرفين مستر سلطع
- اللي بسبونج بوب هههههه
اشرتلها ع الشباك : - تشوفين ذاك الولد
- ابو عضلة
- هذا يصير اخو مستر سلطع اسمه مستر صلعة
- ههههههههههه
كمت اضحك من كل كلبي واكلها: مستر صلعة هههههههههههه
- ومستر عضلة
-لا يمه اخاف منه
-ليش تخافين
-شكله يخوف تشوفي
-اني بس اريد افتهم عو شيحط لصلعته وهيج تلمع
دا تشوفين الشمس اشون ضاربه بيها وصايرة لماعية
- عبالك كلوب مو صلعة هههههههههههههه
- منور مستر صلعة هههههههه
كمنا نضحكطار النوم من راسي بس ارتاحيت .. باوعت لوجهي بالمرايا جوا عيوني حمار كلش قوي .
انداريت الها كلت الها : امشي كومي نطلع
- وين نطلع ؟
ضحكت وسويتلها حركة بحلكي وكلتلها : اي مكان نتونس بيه
ضحكت : بس كدامنا ٥ ساعات ونرجع حتى نتجهز للنادي
- يلا
بدلت واني ما بدلت ..
كالتلي : راح اتطلعين هيج التيشيرت والبجاما
- اني حلوة بكل حالاتي .. اني اللي احلي الهدوم مو هي اللي اتحلينيييي
- اوكي اوكي على راحتج
ضحكت وطلعنا هي مبدلة كامل
واني بتيشيرت احمر .. وبيجاما سوده ونعال شطح ملمع فضي
امشي وحاطة ايدي وياها واغني
( ارامام سورمام بير دها .. يولفار سان بيل اللها )
وامشي واصيح بالشارع ( اراماااااااام )
ونضحك ونفتر بالشارع ونشتري ونضحك ونسولف ..
لحد خمس ساعات .. رجعنا .. اني متمددة ع السرير واباوع بالسكف بدون كلام ولا اي ردة فعل .. وهي تبدل وتتحضر
- محتروحين اليوم ؟
مجاوبتها
بدلت وراحت .. شوية واندكت الباب
ما جاوبت .. انفتحت الباب ودخل الحارس .. اني متمددة كال : المدير طالبج بغرفة الادارة .. راح انزل مو متجين
نزل واني بعدني صافنة
اريد انام بس مدا اكدر انام عيوني متغمض رغم كل جسمي يتوسل النوم من التعب .. اخذت نفس وكعدت اباوع بالغرفة الساعة تقريبا ١١ بالليل
كمت بلا اهتمام جريت نعالي برجلي ولبسته ونزلت اشحط بروحي شحط ، نزلت بالمصعد فتح الباب رحت لغرفة المدير ، كال : ليش مرايحة اليوم للسهرة
- بكيفي
- شلون بهالكيف احنا !؟ مراح اتبطلين مراح اتجوزين
كمت من مكاني واني اكوله : بكيفييييي افتهمت لو لا .. بكيفي
- محششة انت بالعة ؟
- اني اصحى منك ابو شارب المعووج
ضحك وهز ايده : دروحي منا روحي مالي خلك وحدة محششة
باوعت كدامه كاسة بيها جكليت اخذتهن كلهن بيدي وحطيتهن بجيوبي وهو يباوع ، كتله : سلام
تركته ومشيت طلعت من غرفة المدير رحت لمطبخ الفندق محد موجود .. فتحت جكليته وكمت اكل بيها واني افتر ..
وگفت ع الرسبشن شفت ورقة كدامي بيها عدد النزلاء اللي بالفندق كمت ا اعد عدد النزلاء ..
صفت سيارة كدام باب الفندق ، نزل منها الرجل نفسه .. ما اعرف ليش من اباوعه تلزمني الرهبة واخاف وجهه وملامحه بيه شي غريب والوضع مخوفني ..
انطى مفاتيح السيارة للحارس يصفها بالكراج وتوجه للفندق بس وصل الباب انفتح من وحده .. دخل لصالة الفندق وتوجه للرسبشن .. سويت نفسي مركزة بالسجل اعد .
وكف هو وكال : ٨٠٢
رفعت راسي من السجل وجهه صار كدام وجهي بالضبط .. ملامحه تخوف .. لابس اسود باسود بس الساعة فضية .. اكرع ولحيته محددها وشكله مريب ..
رجعت ليورا من شفته قريب ما بيني وبينه بس الرف ..
حجيت : نعم ؟
- الغرفة ٨٠٢
- شبيها ؟
رفع حاجبه بأستغراب وحچه : تسلم عليچ !
- انت بيك شي ؟
- انا لا بس يمكن انت أي
- احترم نفسك
حجيتها واني اذب السجل من ايدي
حجه :- وياهو المقلل احترامو وياج تا تكولين احترم !؟ انا رايد كارت مفاتيح الغرفة ول يمسطولة
اندرتله : - ومسطولة هذي مو قلة أحترام !؟ انتم ليش متعرفون متحترمون ؟
- ول تنطيني كارت مفاتيح الغرفة لو راح نضل متناطحين ؟
باوعت الرفوف جريت الكارت ٨٠٢ وانطيته وكتله : روح اتناطح لوحدك اني مو ثور ولا اني اشتغل بالرسبشن .. اني عاملة مطبخ .
صفكت الكارت كدامه ع الرف ونزلت راسي وجريت السجل اباوع بيه.. حسيته بعده واكف رفعت راسي لكيته يباوعلي بحده : بعد اكو شي ؟
- مدير الفندق وينو !؟
- دتهدد تبلغ المدير !؟
- لا اهدد عليش انا بس رايد اتفاهم ويا المدير تنعرف منهو الثور اليناطح !
- اما انت فعلا قبيح .. منو اللي تجاوز وكال نتناطح وانت التزعل والله يحقلك !!
وهو يمشي من الرسبشن للادارة .. وكف من سمعني حجيت هيج اندار باوعلي وهو عاكد حاجبه : ول انت احد مدربج عليّ ؟
- صرخت اييييي ما بقالي غير مستر صلعة يولول على راسي
احجي واني اريد امشي من الرسبشن ، وكفني : لا لا شو اكفي منو هاذ مستر صلعة يولي ؟
- انت انت
- ودست على رجله حيل .. انت حتى بعد لا تمد ايدك عليه افتهممممت.
سحبت نفسي واني امشي واسمع يحجي وراي :- شبيها محششة هاي ؟
ضربت على الدكمة مال المصعد والتفتت اله بحرگة : يروح يشكي مني ابو صلعة هم زين الله ما انطاه شعر لو منطي جان شسوا بينا .
دا احجي التفتت لكيته وكف وراي انفتح باب المصعد .. فتت .. فات وداس دكمتين رقم ٨ ودكمة باب المصعد سده
كتله : مو تريد تشكي مو تريد تتفاهم ويا المدير شكو لحكتني .. ول انت احد مدربج عليّ (اقلد) هسه منو المدرب على منو ؟
جر نفس ونفخ
وما دارلي ولا جاوب .. واكف كدامي عضلات ادية مفرودة والشرايين مبينة بيها وهو يقبض ايده ..
انفتح الباب دا اريد اطلع ما انتظرني اطلع كدامه صارت طلعتنا كبل .. اريد احجي انسد باب المصعد وراي انداريت اللوحة ع الحايط مكتوب الطابق الثامن ..
شجابني للطابق الثامن اني غرفتي بالطابق الأول !
اريد امد للمصعد اندار هو شافني واكفة ، رجع عليه الممر فارغ تقرب مني رجعت نفسي على باب المصعد حجيت بتحذير : لا تتقرب مني وخر
انفتح باب المصعد اتراجعت بسرعة ودست على الدكمة اللي اتسد الباب .. حط رجله رجع انفتح الباب : اذا حاولت تتقرب مني لو تأذيني ما راح اسكت افتهمت .
- اشوف لو تصمين السانج وتسكتين وتفتحين عقلج وادوسين رقم الطابق اللي تريدي بدل ما مضيعة وتحجين ويا روحج مثل المخبلة .. يمسطولة
دست على رقم واحد ودرت وجهي منه
وخر رجله من المصعد .. وابتعد انسد الباب ونزل المصعد فتح بالطابق الاول ..
مشيت لغرفتي واني افكر .. بالموقف
اتجاوزت وصيحت عليه بس هو مسوا اي شي مو زين
بس لا هو غلط كال مسطولة .. يعني شنو مسطولة !
لازم اعرف شنو يعني مسطولة
من راح اشوفه راح اسأله شنو يعني مسطولة
يمكن مو غلطة بس لا مبينة غلطة وله جان ما شمرها هيج
افكر واني نايمة على سريري ..
حضنت مخدتي ... واني افكر بس فكرة تروح وفكرة الزمها واختلط عقلي بين الواقع وبين التحشيش .
غفت عيوني من بعد ٤٥ ساعة واني منايمة
دخلت بنوم كلش ثكيل وغركت بين احلامي
بس ما ادري ذاك اليوم ليش خلصت الحلم واني اركض واضحك ويا مستر صلعة .. الحلم كله واني وياه كأنما نحب بعض وخيال واسع من الاحلام .
لحد ما فزيت الصبح على صوت بان وهي تكلي : چچك اكعدي يردوج بالمطبخ .
فزيت اباوع اني وين ووين جنت غاركة بحلمي
شكد جنت فرحانة بالحلم ومتونسة اتمنيته ميخلص
بس خلص وكعدت للواقع .. جريت نعالي لبسته ومشيت غسلت ورفعت شعري ذيل حصان ونزلت للمطبخ
كمت اشتغل ورجعت لافكار الواقع الاسود اللي اعيشه والوجوه الزفرة اللي معايشتها .. اخذت كاسة القشطة خلصت ودا اروح اجددها .. صد بوجهي مستر صلعة دا يدخل لمطعم الفندق
صد بوجهي عاكد حواجبه وبوجهه اليخوف
بالحلم جان احلى جان يضحك وحباب .. بس الاحلام مو مثل الواقع
رحت مليت قشطة ورجعت لكيته كاعد بمكانه ما واصل البوفيه ولا جايب شي ، اخذت ماعون شطح جبير حطيت بيه معلقة وكاسة وصبيت بالكاسة شوربة ، ورحت اله ، هو عاكد حواجبه ويكتب بالتليفون ..
حطيته كدامه فز ووخر تليفونه وباوعلي : شنو هذا ؟
- ريوك
- وعش جايبتو ؟
- شنوه ؟
- المن ؟
-مو لاحد جيبه
جريته من كدامه لزم ايدي وهو يجر الماعون
- تمام تمام اتركي .
- لا ما اتركه كوم انت جيب
- من الاساس منو طالب منج اتجبين ؟
- عبالي ادمي طلعت مسطول
دا اسحب لزم ايدي تركت وكال : منو المسطول !؟
- هاي كلمتك وكلت اذبها عليك حتى اعرف اذا غلطة لو مدح يعني طلعت غلطة وانت البارحة جنت دا تغلط عليه مووو ؟
- اتكدرين اتجيبلي جاي حار
- شنو يعني مسطول
- هاهية اني راح اكوم اجيب
كام من مكانه وهو يتوجه للبوفيه .. سحب كلاص ووكف يملي جاي .. واني رجعت وكفت يم البوفيه .. مر وهو يسوي نفسه يريد ياخذ علبة مربى حجه : الصبح ما تنسطلين الظاهر السطلة تجيج ليلية .
حجاها ومر مشى .. كمت اباوع وراه
كعد بمكانه وهو يحاول يخفي ضحكته ..
مشيت من البوفيه اخذت صمون وحطيته ع الطاولة مالته
وكتله : بالعافية يا مسطووووول .
ابتسم ودنك وهو ياكل الشوربة .. ورجعت وكفت بمكاني وكل ما اباوع عليه اخزره .. كمل ريوكه ومشى .. واحنا مكمل البوفيه ونغسل .. وكف عامل كال : چچك طالبيج بالأدارة .
- شرايدين
ما اعرف
مشيت ، وگف المدير كالي : اتحضري تروحين ويا السايق لمكتب منير
رحت للسايق كال : هيج تروحين
باوعتله وانداريت ما اهتمتله ورحت صعدت بالسيارة مشيت لمكتب منير .. جان وطبان كاعد ، كتله : كالولي رايديني
حط وطبان الايباد كدامي
بيه تصوير كاميرات المراقبة بالمصعد واني احجي وابو عضلة واكف وياي ... اندار وحجه وياي : تعرفي ؟ ..... يتبع
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
 رواية المفقودة الفصل الخامس 5بقلم زينب ماجد (حصريه وجديده…){kind=link}
تعليقات
إرسال تعليق
فضلا اترك تعليق من هنا