رواية المفقودة الفصل السادس 6بقلم زينب ماجد (حصريه وجديده في مدونة قصر الروايات)

 رواية المفقودة الفصل السادس 6بقلم زينب ماجد (حصريه وجديده في مدونة قصر الروايات)

رواية المفقودة الفصل السادس 6بقلم زينب ماجد (حصريه وجديده في مدونة قصر الروايات)

المفقودة 

((( بقلم زينب ماجد ))) 

الحلقة_ ٦ 

نكرت بسرعة وجاوبت : لا ما اعرفه 

- يعني ما حجيتي وياه ! 

- لا ما اتذكر كلام عابر هيج . 

بقى واحد يباوع بوجه اللاخ .. حجيت : والله ما عندي شي وياه ابد 

وطبان : واحنا مكايلين شي لتخافين .. احتمال اليوم يرجع يطلبح الشيخ جهزي نفسج . 

- بس عندي سهرة ما اكدر 

- مو مشكلة السهرة .. تعوضيها بغير يوم 

- ما اكدر اروحله لما رحتلهم اخر مرة رادوا يشمروني للجلاب تاكلني 

- لانج تستاهلين تعلمي تصيرين مؤدبة وتنفذين الاوامر بدون نقاش .. هسه روحي يلا وانتظري من عندنا الاوامر . 

طلعت والخنكة ببلعومي 

اطكطك باصابيعي خوف لا صدك هم يرجعوني للشيخ 

دمعت عيوني ( ياربي خلصني منهم والله بعد ما اتحمل قذارتهم ) 

رجعت للفندق واني ميتة قلق وخوف ل لا صدك يرجعوني لشيخهم 

صرت اروح واجي كعدة ما اعرف اكعد .. افتر من القلق 

اخذتجيلاتين منوم وذبيت روحي للنوم حتى ما اكعد .. بلكي اتمرض وميكدرون يودوني اله 

بالليل ندهتني بان حتى نتجهز للنادي فزيت 

: منير لو وطبان هم خابروا ؟ 

- لا ليش ؟ 

- ما اريد اروح للشيخ وكالي احتمال يودوني 

- اتحملي شتسوين 

- ما اكدر اتحمل اكثر اذا جبروني اكثر يمكن اكتل روحي واخلص 

- ومنو يهتم لو كتلتي روحج محد يخسر غيرج ؟ 

تنهدت واني اباوع التليفون .. ماكو اتصال 

كمت بدلت واني خايفة يطلبوني ولازمة گلبي بأيدي 

بس اجا السايق ورحنا النادي .. وما طلبني 

فرحت بس اتذكرت انو حتى لو ما طلبوني اليوم احتمال يطلبني باجر !؟ 

شلون راح اخلص من هالوضع .. 

مشكلتي مدا اكدر اتأقلم لو اتقبل وكلش كارهة حياتي واتمنى اموت ع اللي دا اعيشه من قذارة ووساخة . 

لثاني يوم كعدت الصبح 

دخلت المطبخ .. اشتغل .. دخلت منال 

صاحت : چيچك 

انداريتلها بفزة وخفت لا تگول وطبان يريدج ابيت الشيخ 

تقربت منها بخوفة ، كالتلي ، تعاي وياي 

مشيت وياها ووكف اباب المطعم الكاعدين بيه النزلاء يتريكون 

حجت: - تشوفين ذاك الرجال الأكرع ؟ 

باوعته النزيل ٨٠٢ ، حجيت : شبيه !؟ 

-باجر راح يتمرض 

-يا ستار ياربي ليش !؟ 

-حتى انت تشوفين شغلج وياه 

- اني ! اني شنو ؟ شعليه ؟

-كلمة شعليه، معليه ، مو شغلي،  ما يخصني ، انسيها انت هنا خادمة تنفذين اللي انكلج عليه وبس .. افتهمتي ؟ 

بقيت اباوع ع النزيل .. حجيت : يعني شنو المطلوب مني ؟ شسويله ؟

- راسه 

شهكت : اكتله ! مستحيل اني ما اتجرأ اكتل ذبانة لا .. اعفيني الله يخليك والله ما اكدر .

-بالوقت الحالي ما طالبين منج تقتلي .. رايدين توكعي 

- بيش اوكعه ؟ 

- احنا نكولج بيش ، مثل ما سويتي البارحة وحطيت له الشوربة بماعون واكلها امشي حطيها اله .. وحطي هذه الحباية بماعونه 

- حباية شنو هاي 

- نفذي وبس 

- واذا مات 

- واحنا اغلياء نموته بفندقنا حتى يطلع بالتقرير اتسمم بالاكل ونتورط وينسد فندقنا 

- لعد شنو هاي 

- حباية راح تسببله صخونك وانفلاونزا حتى تكدرين انت تتقربين منه وتساعدي 

- بس ! 

- اي بس اتحركي 

- بس يعني اذا اتمرض ما راح اروح للشيخ 

- بهالفترة اتركي الشيخ مهمتج النزيل ٨٠٢ .. تمام ؟ 

هزيت راسي ورحت هو كعادته ما كام للبوفيه .. رحت اخذتله شوربة وعلقة وصبيتله وحطيت الحباية بالشوربة  وكمت اخوط بيها.. 

ورحت خليتها كباله 

ما جنت ادري كاميرات المراقبة صورتني واني احط الحباية بصحنه واقدمها اله ، ولا جنت اعرف شنو هاي الحباية العرفته انو هاي تسببله صخونه وانفلاونزا وراح يتمرض شوية وتخليني التهي بيه وميدزون عليه اروح للشيخ . 

شال راسه بسرعة من حطيت كباله 

هز راسه وكال : شكراً عاشت ايدج 

- بالعافية 

دا امشي .. صاح وراي : العفو 

وكف كلبي كلت يمه بس لا طوفت الحبة كدامة لو ما ماعت وشافها ، انداريتله بخوفه : نعم ؟ 

- بس جاي اذا ما بيها زحمة ويكون بدون شكر 

- تمام 

انداريت عنه واني اتنهد .. جمد دمي هم زين ربك 

كمت اهفي على وجهي ومشيت صبيتله جاي ورحت حطيته كدامه كتله : اي طلب اخر أستاذ ؟ 

مجاوبني مندمج يشتغل ع الايباد .. 

ردت اعوفه انتبه ، حجه : اسف شكرا .. واخذ الجاي 

تقريبا بس هو بالمطعم ينزل متأخر اغلب النزلاء ينزلون من وقت للساعة عشرة كل الكروبات السياحية تنطلق .. ويبقون بس النزلاء وعددهم كلش قليل .. يطلع . 

فبقيت واكفة واني اباوعله شرب الجاي وكام يشتغل .. لحد ما باوع كدامه الشوربة مد ايده وصارياكل بالشوربة كملها كلها . 

كملها كلها .. اشرلي 

اجيته حطلي خمسة الاف جوا الصحن وكال : اذا ما بيها زحمة كلاص ثاني جاي 

- تمام 

رحت جبتله .. ومحد بالقاعة بس اني وهو منتظره يكمل علمود الم البوفيه . 

كمل جايه وراح طلع واني كمت انقل للمطبخ 

لزمتني منال : حطيتي الحبة مو 

- اي واكل الشوربة كلها 

- عفية بالسباعية هيج اريدج قوية 

- بس متودوني للشيخ 

- كتلج مراح نوديج بس كون كلشي نكولج عليه تنفذي 

- انفذ كلشي بس ما اقتل 

- واحنا هم ما نخليج تقتلين تبقين محسوبة علينا صح لو لا 

تنهدت وارتاحيت من كالتلي هيج 

ورجعت كالتلي .. اريدج تصيرين ظله لهالشاب حاولي تتقربين منه اتفتحين وياه مواضيع .. وخلي يأمنلج . 

- واذ امن شراح اسويله 

- حاولي تاخذين رمز تليفونه .. او تختارقين حسابة .. او تطلعين وياه بفد موعد ، واذا واعدج او ردتي اتطلعين وياه تبلغينا . 

- واذا حاول يتعدا عليا او طلع مو خوش انسان 

- ما اعتقد راح يسوي هيج الا اذا انت قبلتي .. بس اذا سوا هيج وقتها اتحملي 

- اتحمله اذا راد يعتدي عليه 

- مو اسمه اعتداء اسمه استدراج .. لازم تستدرجي وهاي مهمتج . 

- يعني مسويت شي خلصنا من الشيخ اجي لهذا 

- اطمني مراح يسوي شي .. 

تركتها ورحت كعدت بغرفتي .. 

اجيبها منا واردها منا يلا اهون منا اروح للشيخ ويذبني لجلابه . اقلها هذا مبين محترم ... ولو ما بيهم واحد محترم . 

لليل عفوني من روحة النادي كالوا ابقي بالفندق بس انزلي ع الرسبشن .. نزلت كعدت بالرسبشن اليجي انطي كارت الغرفة . 

لحد ما اجا هو .. وكف كتله : ٨٠٢ 

وابتسمتله 

صفن بوجهي وهو عاقد حواجبه : وليش الضحك 

-العفو تفضل 

-سحب الكارت راد يروح للمصعد 

اندار .. حجه : تكدرين تدبرلي حبوب وجع راس 

- العفو !؟ 

- حبوب وجع راس 

- اني موظفة خدمة ، مو صيدلانية تكدر تتوجه لاقرب صيدلية . 

ودرت وجهي عنه .. ما حجه داس باب المصعد وصعد 

باوعت .. اتمرض يمكن من ورا الحباية خطية 

هي كالت راح يتمرض وديطلب حبوب وجع راس 

يمكن راسه ديأذي حيل 

رحت ادور حبوب وجع راس ملكيت بلغت احد يوكف بالرسبشن 

واني اتمشيت لصيدلية تصير مسافة عشر دقايق عن الفندق اللي كاعدين بيه .. جبتلا بندول ورجعت 

هستوني اريد ادخل للفندق انفتح باب الفندق وطلع هو كبالي 

يلبس بقمصلته كتله : جبتلك 

- شكرا رايح اجيب 

- بس تكدر تشتريهن مني 

اندار باوع عليه : انت صاحية 

-ما مسطولة مثلك 

مد ايدي .. مد واخذ من ايدي بقوة وعنتكة سحبها 

وراح كعد تحت السكيفة اخذ الحباية وبلعها بدون مي وكام يفرك براسه 

مشيت اتقربت منه .. شال وجهه لكاني كدامه 

حجه : يولي شرايده ؟ 

- ايييي وليش تصيح مو زين اساعدك 

دروووح 

كمت صاحلي : تعاي لج 

- منو لج 

- على منو دا تصيحين انت ؟ 

- ومنو هاي اللج انت ليش تتجاوز 

- امشي من كدامي راسي راح ينفجر ما طايق اشوف امثالج 

- امثالي ! انت اشايف روحك .. ابو كرعة 

كام من مكانه بسرعة 

مشيت جر ايدي ولفها : اخ دوخر 

-من تتجاوزين قسما بذات الله لا اركع راسج بالحايط افتهمتي 

ركض الحارس ووكف : العفو استاذ اتفضل وياي 

نتر ايدي بقوة ودفع الحارس وفات .

كمت افرك بيدي من لواها احس نمردت بيده 

كبر العبالك يتعارك ويا رجال لف ايدي 

وجعتني .. حيوان 

دمعت ومشيت للرسبشن اذتني .. 

بقيت جوا لحد ١٢ .. ورحت صعدت لغرفتي نمت 

ثاني يوم .. كعدت للشغل .. هو ما نزل للريوك 

حجت منال : اصعدي اطمني عليه وشوفيه اذا يحب نوصله الريوك لغرفته 

-خلي يولي مو مال نوديلا 

-خل يولي شنو انت نسيتي شوصيتج 

-دباعي شسوا بيدي الا شوية راد يكسرها 

- ليش 

- هو مخبل يعارك نفسه 

- دروحي كملي شغلج وشوفي اذا يحتاج شي . 

- خلي غيري يروح 

- راح نبقى نمااااطل ؟ 

كاعد تحجي .. لمحته نزل 

كتلها : ذاك نزل 

اندارت هو طلع من الفندق ركب سيارته ومشى 

لشوية كالت : اخذي هاي الساعة علكيها بغرفته 

-ساعتيش 

-ساعة عادية بس علكيها 

-ما اعرف ادك بمسار 

-ميحتاج بسمار ذني اللاصقتين بس وخري الورقة عنهم والزكيها مقابيل جربايته بالعدل 

انطتني الكارت .. 

اخذت الساعة ومشيت فتحت غرفته بالكارت .. 

غرفته كلها ريحة جكاير .. جريت البردات فتحتهن .. وسحبت الشباك .. 

وكمت اباوع للجرباية والمكان المقابيلها ادورلي مكان .. 

لكيته .. جريت الكرسي مال التخم وصعدت عليه كمت اثبت بالساعة واحطها 

دا اريد انزل 

جان الكاه وراي فزيت بسرعة 

جرخت رجلي من الكرسي وزلكت وكتله : العفو عبالي طلعت دا ارتب الغرفة 

ردت امشي لزمني من ايدي حيل كال : انت جاي تفترين علي لو انا جاي اتخيل 

- بس ايدي اااخ اتركهاااا 

نتر ايدي حط ايده على رگبتي ولزكني بالحايط جر راسي ورجع دفعه ع الحايط بقوة ويحجي  : لو شفتج مرة لخ اتدورين حوالي ما تلومين الا نفسسسسج سمعتيييي 

دفعته من عندي .. 

وطلعت بسرعة بس الخوفة بگلبي 

هسه اني شسوي بروحي .. من جهة هو يهدد ميريد يلمحني ومن جهة يلزكوني بيه 

بس يكلي جاي تفترين عليه 

يعني شك بيه لو شنو !؟ معقولة كاشفني ؟ 

لا مستحيل شمعرفه بس يمكن تضايق من اتجاوزت عليه وكتله ابو سلعة . 

بقيت بقلق وخوف 

نزلت لغرفتي جسمي يرعد من لزمته واثار اديه على اديه وركبتي 

ايده ثكيله من يلزم ايدي احسه تريد تتكسر بيده 

كمت افرك بيها ومدمعة 

كعدت بان لكتني كاعدة ومكابلة الشباك وساكتة واشهك 

حجت : شبيج 

-خايفة 

-من شنو 

سولفت الها كعدت يمي : لو باقية ع الشيخ اقلها تعرفيه شيريد تنطي وتخلصين هذا منو وشنو وشيشتغل يمكن مجرم يمكن قاتل يمكن يورطوج وياه وتوكعين انت بيها وهم يتبرون منج ويطردوج من الفندق 

- انوب خوفتيني بالزايد 

- روحي وكليلها لمنال انسحبي من السالفة خليج ع الشيخ احسن يمعودة دكسبي نامي براسه هو جبير ويكدر عليهم ويخافون منه .. دستقوي بيه 

-انت شدا تحجين غير شمرني للچلاب 

-لان رفضتي 

- ما اريده ما اتحمله عفية اني يمكن راح انتحر واخلص منهم كلهم والله ما اتحمل الدا اعيشة ما اكدر 

حجيتها وبجيت وكمت امسح وجهي بالردن مال بلوزي 

كامت تطبطب عليه ورحت للسرير دا احاول انام ما اكدر صليت اتكلب بفراشي .. لحد الليل بان كامت ترتب بنفسها واني طلبوني للرسبشن جوا 

نزلت كعدت بالرسبشن هدوء ماكو احد 

لحد ما اجا كروب من البرنامج مالهم .. صارت الباحة مال الفندق هوسة .. سلمتهم كارتات غرفهم وصعدوا بقى كم واحد .. 

نظراتهم بيها تحرش رغم متزوجين ونسوانهم صعدت فوك 

كام واحد يسال ويحاول يفتح موضوع كتله : اخوية اذا تريد تسأل اسال الحارس اعرف مني بالمنطقة اني ما افتهم 

بقى يحاول يستظرف ويعتذر 

وما صعدوا كابلني .. تركته ورحت للمطبخ .. 

شوية واجت منال : ليش مو بالرسبشن 

- محد اكو 

- شلون محد ناس ديصعدون ، المهم اصعدي للغرفة ٨٠٢ 

- ليش 

- مريض كلش والمطلوب منج تبقين يمه او تشوفي شمحتاج 

- هو شك احنا دنسويله شي 

- شك شلون 

- ضرب راسي بالحايط كال انت كاعد تفترين عليه لو يتخيلي 

طلعت من جيبها : اخبطي هذا ويا الدوا مالته وانطي علاجه واطلبيله اكل وابقي يمه 

- واذا صيح عليه 

- واحنا شكو مخليج غير تستدرجي بكلمتين حلوات تغري تحاولين تهدي وتبقين وياه 

- اي وشراح اسوي يعني 

- وبعدها تسال شراح اسوي امشيييي 

- هاي مخدرات ترا اعرف انتو دا تورطو بمخدرات هم 

- مو شغلج امشيييي 

- بس اذا تورطت اني 

- اتورطتي ليش انت شنو يحبيبتي ما متشجل باسمج قضية مخدرات 

- وهيج راح ازيد الطين بله مو 

- انت وشطارتج اذا صرتي سباعية منو راح يعرف 

- بس هو ديشك 

- شكد تحجين من الاخير نفذي واذا ما نفذتي ابلغ منير وعيفان يستلموج ويشوفون شغلهم وياج . 

حجت ومشت عني 

ياربي شلون ياربييييي 

كمت ادمع وامسح بعيوني .. باوعت للبودرة اللي انطتنياها 

خليتها بجيب البنطرون من ورا .. ومشيت . 

دست على دكمت المصعد ودخلت دست رقم ٨ وصعد 

دكات كلبي اليكول طبل .. ارجف وانفاسي مختلطة 

انفتح باب المصعد والطابق الثامن كدامي .. 

رجليه ترجف وكلش خايفة .. كوة خطيت رجليه وطلعت من المصعد .. عبرت الغرف وصلت الغرفة رقم ٨٠٢ 

حطيت ايدي على گلبي .. يدك بقوة رفعت عيني الكاميرا كدامي يعني مراقبة ولازم انفذ .. اريد ايدي تتجرأ وتدك الباب .. جسمي كله يرجف 

كلت لازم اسوي هالشي حتى بعدها اخلص من كلشي.. لازم اتجرأ .. مديت ايدي ودكيت الباب 

الجو هدوء ولا صوت بالممر غير صوت دكات كلبي وانفاسي الترجف خوف ورهبة . 

ماكو جواب 

رجعت دكيت الباب مرة لخ .. محد رد .. 

ضوا الباب اخضر يعني الكارت فاتح الباب ما مغلق .. 

رجعت اريد ادك بقوة حسيت الباب اندفع شوية 

يعني الباب ما مسدود ! حطيت ايدي على يدة الباب وفتحت .. انفتحت الغرفة !

رجف كلبي .. خطيت رجلي ودخلت الغرفة هدوء تماما ولا اي صوت 

صحت : هلو منو هنا ! العفو .. 

باب الحمام يكون يم باب الدخول للغرفة واكو ممر  .. عبرت الممر للغرفة السرير فارغ .. 

معقولة الغرفة فارغة وينه هذا ؟ 

لما تأكدت الغرفة فارغة هميت بلا اهتمام حتى اطلع .. واني اندار ما احسه الا بطوله واگف وراي .. فزيت من كل گلبي من شفته 

كمت اتراجع وهو يتقدم 

وصلت للحايط.. انطخيت بيه اجا هو اتقرب جانت كل علامات المرض والتعب مبينه بوجهه ومخيف بشكل .. واني خرطت العافية من الخوف 

حجه : اجيتي لوكر الذيب برجليج مو ؟ 

- بس الادارة دزتني حتى اطمئن على حالتك والله 

سحبني من الحايط شمرني ع السرير وصار فوكاي 

: انت متخافين ادخلين غرفة واحد مثلي بالليل ووحدج ؟ 

دمعت عيني كباله .. وكلبي يدك من الخوف 

كتله : الله يخليك لتأذيني 

ضل يباوع بوجهي .. 

كام من عندي وكال : اطلعي برا 

كمت من مكاني بسرعة 

ردت اطلع توقفت اذا ما نفذت 

معناها اخلص من ايده اوكع بايديهم 

دخلت للحمام بسرعة .. غسلت وجهي .. وجريت كلينكس نشفت .. وبقيت امسح دموعي من الخوف وتنزل .. فركت وجهي بقوة اخذت نفس عميق .. وكمت افتح الباب على كيف 

متمدد ع السرير ولازم راسه 

رفع ايده .. شافني كباله ، اشرلي اتقرب منه 

بخطوات ثكيلة وكفت يم رجليه .. حجه : ما دامج مصرة تساعديني فركي اركبي 

كشف البطانية نايم بطرك الشورت 

درت وجهي عنه وكعدت اتلزم برجليه بس اديه ترجف 

حجه : يولي اذا ترجفين وخايفة عليش مكابلتني ؟ 

- هم كالولي روحي شوفي النزيل ٨٠٢ لان مريض 

- اهلج يدرون انت كاعد اتدارين النزيل ٨٠٢ بغرفة ووحده والساعة ١١ بالليل ؟ 

- ما عندي اهل 

عقد حاجبه .. كامت دموعي تجري واكوله 

انولدت يتيمة وعشت بالميتم ما شفت ام ولا اب ولا جانت عندي عائلة .. قبل ٣ اشهر مديرة الميتم كالتلنا صرتوا ١٨ لازم تطلعون من الميتم .. 

- يعني طردتكم 

- مو طردتنا .. انطتنا .. او يمكن باعتنا . 

جر رجله وكال : اكعدي على ذاك الكرسي 

كمت من عنده وكعدت على الكرسي وهو تغطا وستر نفسه 

وحاط ايده على راسه ، حجه : يعني انت طالعة من الميتم جديد ! 

- اي 

- بس اني شايفج كبل هنا 

- قبل ٣ اشهر اجيت 

- يمكن كبل ٣ اشهر ما ادري راسي يوجعني 

- تريد انطيك علاجك ؟ 

حجيتها واني امد ايدي لجيبي الورا واني كاعدة 

ما مانع كمت للميز اتواليت … وكفت كدام العلاج .. ردت احطه خفت يموت واتورط .. ضميته بجيبي وطلعتله العلاج .. وجبته اله شراب 

اخذ شراب وحبوب وكال : ما اعرف شصايرلي حالتي مو طبيعية ابد ..

- صخونة 

- لا دا احس بانفصام وامور غريبة دا تصير وياي 

- اي 

- اذا بقى الوضع هيج اتصل بالاهل يجون راسي مو طبيعي 

- احسن 

باوعلي : كملي 

- شكمل 

- وشدا تشغلين ؟ 

- شدا اشتغل !  ليش 

- احجي رايد التهي عن الالم 

- شحجي عن شغلي الظاهري لو المخفي 

- شنو المخفي 

- اشتغل بنادي ليلي 

- راقصة 

سكتت ، اندارلي : راقصة بالنادي 

استحيت اكله راقصة كتله : اغني 

- مطربة يعني 

- ما احب اشتغل هيج بس اذا ما اشتغلت يكتلوني وياذوني 

- شلون يأذوج يعني 

سكتت ضل يباوع بوجهي .. 

: يعتدون عليج 

- مو اعتداء تحرش 

- باي طريقة يعني ؟ 

مجاوبته ، حجه : العفو اسف اذا دا اسببلج احراج 

نزلت دموعي .. 

ضل يباوع عليه .. كمت امسح بدموعي واكمل : يشيلني ويربطني بالشباك ويشك هدومي ويكوم 

وكف الكلام بوجهي .. 

كملت : دا افكر انتحر 

اني والله ما اكدر اعيش اللي دا اعيشه وياهم مدا اكدر 

- اهل الفندق اللي ديسوون بيج هيج 

- اهل الفندق متفقين وياهم .. بس اكو مكتب ياخذ بنات مثلي ويوظفهم بالفنادق حتى هم يخدمن ويجيبن وارد وهم ما يحتاج يوفرلنا مكان .. فيوزعونا ع الفنادق ..

- شنو اسمج انت 

- چيچك 

عقد حاجبة : تركية انت 

- مديرة الميتم من اصول تركية سمتني بهالاسم .. بس اسمي بالجنسية رسل . 

- ليش متتركيهم وتروحين لغير مكان تشتغلين 

- مو على كيفنا يأذونا اذا طلعنا عن شورهم واذا طلعت واشتكيت عليهم .. فمورطيني بقضية ما اكدر اشتكي 

- شنو هي القضية 

- انطاني علبة بيها حبوب كالي روحي بيعيها لما دا اروح ابيعها لزموني الشرطة ، ضربوني واذوني هواية 

كامت دموعي تجري بحرارة واني 

احجي وامسح باصابيعي وااكمل .. 

وكفت العبرة ببلعومي والكلام مكام يطلع 

حجه : بصموج ؟ 

- يعني شنو بصموني 

حجيتها واني امسح واباوعله 

جر اكلينكس من يم راسه وانطاني 

وحجه : يعني اخذوا بصمات اديج 

جريت الكلينكس من ايده وكمت انشف دموعي واكوله : اي 

صوروا وجهي واخذوني للمستشفى سوولي فحص واخذوا بصمات اصبيعي عشرتهن 

- يعني اتسجلت عليج قضية مخدرات 

- يكلي اي حتى بعد لو شكد متشتغلين لا تكدرين تشترين سيارة ولا بيت ولا اي شي .. تبقين تحت ادينا 

- وشلون عافوج الشرطة 

- ما اعرف هو الشرطي صف بمكان بعيد كالي كدامج خمس دقايق اذا ما شردتي اضربج طلقة 

- لا اله الا الله ، حاميها حراميها يعني 

كمت امسح بعيوني واجر بخشمي وهو يرجع راسه 

كال : لهالسبب متكدرين تنهزمين منهم 

- اتمنى بس ما اكدر ما عندي مكان ولا اكدر اروح للشرطة 

- وين انلزمتي 

- ببغداد 

- ليش ما اعترفتي عليهم 

- ما اعرف اسمائهم الكاملة ويمكن هاي مو اسمائهم الحقيقية رادوا الاسم الكامل يكولون حتى يندك حاسبة ويطلعوه بس ما اعرفهم 

كمت احجي .. وهو كام يغمض ويفتح ويكمل وياي 

: يعني انت متعرفين مديرج بالشغل 

- الدوا يمكن بيه مسكن مدري منوم دا تنعس مو 

- اي 

سكتت، حجه  : اطلب منج شغلة 

- اي كول 

- تكدرين تجين تفركيلي راسي 

ماشي 

كمت من مكاني وانداريت 

هو شال نفسه وسحب المخدة وكال اكعدي 

كعدت بمكان المخدة .. حط المخدة بحضني .. ورجع راسه 

كمت افركله راسه 

كال : دا اضايقج ؟ 

- لا لا عادي 

رجع راسه وهو يغفي .. كمت ادلك بكصته وانزل 

كمت اباوع لوجه .. لحيته .. جسمه … صابتني قشعريرة 

وكفت عن المساج .. ما حجه ولا تحرك .. غافي 

خفت اتحرك ويفز بقيت بمكاني 

اندزتله رسالة .. رن الجهاز برنة فتح عينه 

سحب تليفونه .. ما اخذ بصمة يفتح بتك عين .. داس كله ٣ واخيرها سبعة انفتح الرمز .. ودخل الواتساب .. مكتوب اسم بالانكليزي بس صورة بنية 

كاتبتله ( شو متجاوب ) 

كتبلها ( مريض ) 

جاوبته ( بيش مريض شبيك ؟) 

ما جاوب سد التليفون وشمره .. 

حجه : ضايقتج ول يابه ؟

- ارجع ادلك 

- كلش دياذيني ولو دا ازاحمج انا 

كمت افركله راسه .. 

حجيت بصوت ناصي : متزوج ؟ 

- مو شايفتها زوجي

- شايفتها ! 

- اللي وياي ذيج المرة 

- ها البنية الضايجة 

- الضايجة ليش 

- ما ادري شفتها عاقجة وجها مشفتها ضحكت 

ابتسم : بيان زوجتي وبت عمي 

- متزوجها غصب يعني 

- لا ول ياب عش غصب 

- لعد ؟ 

- بس متزوجها يمكن عمري ١٨ مدري ١٧ بعدني ما مكمل اعدادية 

- حيل صار هواي يعني عندك اطفال هم 

- لا ما صار عدنا اطفال 

- احسن 

- ليش احسن ؟ 

- ما اعرف احسن يمكن انت تموت او هي ويبقى بالميتم 

باوع بوجهي : لا اهلي موجودين 

- اني جنت بالميثتم جانوا الاهل يذبون بناتهم عمة تشمر بنت اخوها لو جد يشمر بنات ابنه وهواية اهل يشمروهم نكوم احنا نداري بيهم . 

- لو كل الناس يفكرون مثلج محد يخلف ول يابه 

حجاها وجر المخدة ودار عني لنص الحرباية وهو يصيح : ااااااخ يا يابه راسي .. 

- مامن باهلك يداروهم 

- نحنا اهل عشاير ما نذبلنا جاهل .. صح عدنا اطباع صعبة بس الغيرة على اهلنا موجودة ما نذب لحمنا . 

- يعني انتو عرب 

- عجل فرس 

- لا قصدي يعني ريف 

- من الانبار حديثة مو ريف بس ديرة عشاير 

- يعني بالصحراء 

- ول حديثة يا صحراء واحة خضرة 

-ما عرف الدرسته الانبار صحراء 

-ول حتى الدرسوج عوج ؟ 

يحجيها ويدفن راسه .. 

بقى شوية ورجع نام .. ردت اكوم 

حجه : ول ولو اتعبج بس ذبي تليفوني ع الشحن 

انطانياه وخليته ع الشحن .. هو غفى 

وانطاني ظهره .. سحبت التليفون وخليته بجيب السويتر مالي وطفيت الضوا واتاكدت هو ناسم ما اتحرك 

اخذت تليفونه .. وطلعت من الغرفة 

ركضت لمنال كلتلها : هذا تليفونه وعرفت رمزه 

فزت وياي وكالت : عفية عليج 

شكلت تليفونه ع الحاسبة وفتحت الرمز .. انفتح تليفونه كله بالحاسبة . 

كالت : انت بطلة بطلة عفية عليج ركض رجعي تليفونه لمكانه بسرررعة 

اخذته ورجعته بالسويتر .. وصعدت بالمصعد فتح 

رحت اركض على كيف لغرفته .. فتحت الباب على كيف ظلمة 

دخلت للغرفة دا اريد اتأكد هو نايم 

ما احس الا انسحبت ووكفني ع الحايط وهو يكلي : شسويتي ؟ 

نشف دمي كمت اباوع بعيونه وقطرة دم ما بوجهي من الخوف 

انملى گلبي رعب ….. يتبع 

تكملة الرواية من هناااااا