رواية قصة لا تنتهي الفصل التاسع 9 بقلم دينا (حصريه وجديده في مدونة قصر الروايات)

رواية قصة لا تنتهي الفصل التاسع 9 بقلم دينا (حصريه وجديده في مدونة قصر الروايات)

رواية قصة لا تنتهي الفصل التاسع 9 بقلم دينا (حصريه وجديده في مدونة قصر الروايات)

عصام: انا موافق علي جوازك من بنتي بس بشرط 

اشوف بسرعه: اي حاجه انت هتطلبها هنفذها علي طول 

عصام: تبعد عبير طليقتك عن بنتي مش عايز اشوفها في يوم تجيلي ودموعها علي خدها 

اشرف بسرعه: علاقتي بـ عبير خلصت من زمان ومفيش اي حاجه مبينا ومستحيل ازعل بنتك سلمي او اجرحها دي في عنيا

عصام: تمام تيجي بكرا ونتكلم في المهم 

اشرف: تمام ماشي شكرا 

وقفل التليفون ومن جواه كان مبسوط اوي اخيرا هتبقا سلمي ليه وبتاعته ومفيش حاجه هتفرقهم.... اختفت ابتسامته لما افتكر جاسر و الوضع اللي هوا فيه.... ازاي هيقدر يفرح وصاحبه موجوع.. مش هيقدر يفرح ولا يبقي مبسوط

...........

شاف جاسر كاميرات المراقبه اللي في القصر..... اتفاجأ بالحراس بيقعو وهما واقفين... قرب الشاشه اكتر لقي واحد واقف قريب من القصر مغطي وشه وفي ايده مسدس و عامله بوضع صامت وبيضرب علي الحراس واحد ورا التاني 

ظهر معاه اتنين رجاله بجسد عريض و شالوا جثث الحراس و محو اي اثر ليها... بعدها دخل من بوابة القصر ومقدرش يشوف اي حاجه بعد كده 

قفل اللاب توب جامد... قام طلع من اوضته ونزل دخل اوضة اميره.... بص علي سريرها بحزن و ألم...افتكر وهيا بين ايديه وغرقانه في دمها.... تجمعت الدموع في عنيه وهوا بيضم قبضة يديه وعيناه حمراوتان وشرارة الانتقام تشتعل داخلهم... بدأ يدور في الاوضه علي اي دليل عشان يمسك بداية الخيط ويعرف مين المجرم 

دخل البلكونه وبص منها لتحت بس مكنش في اي حاجه....... كان هيدخل بس عنيه لمحت ضي حاجه واقعه علي الارض تحت البلكونه.... طلع من الاوضه ومن القصر وراحه ناحية البلكونه... نزل بنصه العلوي ومسكها كانت ساعه وعليها اثار دم والدته 

بص في علي البلكونه اكيد وقعت منه وهوا بينط من البلكونه ومحسش بيها لما وقعت منه 

بص للساعه وهوا بيضم قبضته عليها جامد وبنظرة انتقام.... رجع دخل القصر وقعد علي الكنبه وهوا بيبص علي الساعه بتفكير و شرود 

محسش بالوقت لحد ما طلع عليه الصبح وهوا علي نفس القاعده وعنيه مغفلتش ثانيه واحده 

مسح وشه بايديه بتعب وإرهاق شديد... قام دخل اوضته حط الساعه علي التسريحه ودخل الحمام ياخد شاور عشان يفوق 

قامت شربات وقعدت علي السرير وهيا بتفتكر خالتها دموعها نزلت وبدأت تبكي بوجع شديد عليها... كانت تتمني كل دا يبقي كابوس و تفوق منه..... افتكرت شكلها وهيا غرقانه في دمها وبتتوجع... حطت اديها علي قلبها وبتبكي بحرقه وحزن شديد: ليه... ليه يا خالتي تسيبيني لوحدي و تروحي.... هعمل ايه انا من غيرك 

مسحت دموعها وقامت نزلت وهيا بتبص علي اوضة خالتها ودموعها بتنزل.... نزلت تحت لقيت جاسر قاعد و بيشرب قهوه في هدوء... هيا لحد دلوقتي مستغربه الوضع اللي هوا فيه ازاي هوا قاعد هادي كدا 

لاحظ وجودها بصلها ببرود وهوا يشرب قهوته وقال: طلبت اكل عندك في المطبخ لو حابه تاكلي 

قربت منه وهيا بتبصله بشده وقالت: وانت اكلت 

بصلها وقال: اه اكلت 

مع انه لم يأكل ولم يضع لقمه واحده في فمه منذ فراقها 

بصتله بشده وهوا بيشرب قهوته ببرود.... انصدم لما خدت منه القهوه ورمتها علي الارض بقوة و الفنجان اتكسر 

بصلها والضيق ظهر علي ملامحه بصتله بغضب ودموع وقالت بصراخ: انت ازاي كدا.... ازاي بالبرود دا.... بتاكل وتشرب عادي كان مفيش حاجه حصلت 

قام وهوا بيبصلها بضيق وهوا بيحاول يسيطر علي اعصابه... سابها ومشي بس مسكت اديه منعته وقالت بصراخ: انا بكلمك 

بعد اديها عنه بعنف وقال بعصبيه: عايزه ايييه 

شربات بدموع: انت مش زعلان عليها..... للدرجادي موتها مش فارق معاك...... دنا حتي مشوفتش دمعه في عينك تثبتلي انك فعلا زعلان... كأنها مش امك اللي ماتت.... ولا فارق معاك انها اتقتلت وقاعد بكل برود كأن مفيش حاجه حصلت ومكمل حياتك عادي 

جاسر ببرود مصنتع رغم الألم الذي داخله: عايزاني اعمل ايه يعني اقعد و اصوت زي الحريم 

ابتسمت بسخريه وقالت: تعمل ايه ولا حاجه (كملت بحزن ودموعها بتنزل) انت عارف هيا قالتلي ايه.... قالتي افضل جنبك في الفتره دي كانها كانت عارفه انها هتموت... قالتلي افضل جنبك و مسبكش تقعد لوحدك كانت فاكره انك هتزعل عليها اوي عشان كده طلبت مني افضل جنبك..... مكنتش تعرف انك بارد و موتها مش هيفرق معاك... مكنتش تعرف انك قاسي قوي كدا 

جاسر ببرود مصنتع: خلصتي 

بصتله بصدمه من بروده.... انفعلت وضربته علي صدره مكان قبله بكل قوتها وقالت بصراخ: انت ايييه.... قلبك دا ايه حجر..... دا يمكن الحجر لين عنه..... انت قلبك قاسي قوي كدا ليييه

من قوة ضربها رجع لورا خطوتين وهوا بيبصلها وبيحاول يسيطر علي نفسه

شربات بدموع وصراخ: انت مش بتحس... معندكش مشاعر.... دنا يا اخي مزعلتش علي امي قد ما زعلت علي خالتي وانت اللي تبقا امك مزعلتش عليها

مسكها من دراعها بقوة فتأوهت بألم وهيا بتبصله بدموع صرخ فيها وقال بغضب وانفعال: بس كفايا... انتي ليه فكراني اني....... 

سكت مقدرش يكمل... كان نفسه يتكلم يبوح بكل الوجع اللي حاسس بيه... نفسه حد ياخده في حضنه ويبكي من كل قلبه... نفسه يتكلم يخفف من الوجع اللي في قلبه... نفسه حد يحس بيه وانه اد ايه موجوع وقلبه بينزف من جوه.... بس كبريائه مسمحش ليه انه يضعف قدامها او قدام اي حد 

سابها وهوا بيزقها لورا وهوا بيبصلها وعنيه حمرا.... سابها وطلع علي اوضته بصتله ودموعها بتنزل... قعدت علي الارض وهيا بتبكي بحرقه وحزن شديد 

دخل اوضته غمض عنيه جامد ودموعه بتنزل... فتح عنيها وكانت حمرا زي الدم و دموعه بتنزل... رجع شعره لورا وهوا حاسس بخنقه جامد.. كان عايز حاجه يطلع فيها كل اللي جواه... جواه احساس عايز يكسر كل حاجه يدمر كل اللي حوليه... بس مقدرش مش عايز يحسسها انه موجوع او تحس بضعفه 

دخل اوضة التمرين بتاعته وبدأ بتمرين الملاكمه وهوا بيضرب جامد وبكل قوته وهوا بيطلع كل الغضب الحزن الوجع الكسره اللي حاسس بيها وهوا بيضغط وبيهلك نفسه 

من الملاكمه علي رفع الاثقال وهوا بيرفع اوزان كبيره من الاثقال للجري ومن الجري لتمرين الضغط لحد ما حس بنفسه خلاص مش قادر يستمر 

سند ضهره علي الحيطه وهوا بينهج جامد وبصوت مسموع... وشعره وهدومه وجسمه غرقانين بـ حبات العرق 

قعد علي الارض وغمض عنيه بتعب وإرهاق ووجع شديد من جوا ومن برا

بعد فتره 

نزل بدل ما خد شاور وغير هدومه وهدى اعصابه... كانت شربات قاعده وفي حضنه صوره لـ خالتها بصتله بضيق بعدين بصت الجهه الاخرى متجاله وجوده 

قرب منها وقال ببرود: الاكل عندك جوه ولو احتجتي حاجه رني عليا... انا هتأخر في الشغل 

لم تنظر له ولا ردت عليه.... بصلها شويه بعدين سابها ومشي بصتله وهيا مش متخيله ازاي هوا بالبرود دا 

........... 

في الشركه 

دخل الشركه بكل هيبته وهوا لابس نضارته السودا.. وقف له كل الموظفين بإحترام وخوف منه.. تحت نظرات الاستغراب منهم لم يتوقع حضوره احد ظن الجميع انه مش هيجي بسبب وفات والدته بالامس 

دخل مكتبه وقعد مكنه وقلع النضاره دخلت السكرتيره بصلها وقال ببرود: في اي مواعيد النهارده 

السكرتيره بخوف: هوا انا لغيت كل المواعيد بتاعت النهارده 

بصلها وقال بحده ارعبتها: مين اللي طلب منك تعملي كدا 

السكرتيره بخوف شديد: مكنتش متوقعه حضرتك هتيجي النهارده 

ضرب المكتب باديه انتفضت مكانها بخوف شديد منه قال بانفعال: انتي متتوقعيش حاجه خالص وتاني مره معمليش حاجه من دماغك غوري من قدامه 

هزت راسها وجريت من قدامه بخوف شديد.... رجع بضهره لورا وغمض عنيه وهوا بيحاول يسيطر علي اعصابه

طلع علبة السجاير خد واحده و ولعها وبدأ يشربها بشراسه... شويه ودخل اشرف وقعد قدامه... بصله جاسر بطرف عنيه وقال: خير في حاجه 

اشرف: جاسر انت كويس 

بصله وهوا بيرفع حواجبه وقال: ليه شايفني مجنون بطنطت قدامك 

اشرف: مش القصد بس بصراحه قلقان عليك 

نفخ دخان سيجارته وبصله وقال ببرود: مش عايز اللي يقلق عليا

خبط الباب ودخل واحد وكان صاحب الارض اللي كان هيبدأ عليها المشروع بصله اشرف بغضب وقال: بتعمل ايه هنا يا خاين يا واطي 

طفي جاسر سيجارته وبصله وقال ببرود: اقعد يا حمدي 

قعد حمدي قدام اشرف اللي بيبصله بغضب شديد بص علي جاسر وقال بغضب: دا لازم يتسجن بعد ما لهف فلوسنا وضحك علينا وباع الارض لـ عاصي وليه عين يجي لحد هنا برجليه 

بصله حمدي وقال: انا معملتش حاجه غلط انا نفذت بس اوامر جاسر بيه 

بصله اشرف بعدم فهم وقال: قصدك ايه 

جاسر: انا هفهمك.... احنا لا اشترينا ارض ولا كنا هنبدأ مشورع ولا اي حاجه والارض دي اصلا مش بتاعت حمدي 

اشرف بصدمه: يعني ايه 

جاسر بابتسامة بارده: كانت لعبه عشان اوقع عاصي و اخسره الملايين في ارض مهياش بتاعته اصلا 

سكت اشرف شويه يستوعب اللي سمعه وقال: يعني الارض دي اللي اشتراها عاصي مبقتش بتاعته طيب و الفلوس اللي دفعها والعقد بتاع الارض 

جاسر بنفس الابتسامه: الارض دي اصلا ملك الدوله مش ملك حد والعقد مزور 

اشرف بصدمه: طيب ليه عملت كل ده 

جاسر: هما فاكرين نفسهم اذكي مني بس اللي محدش يعرفه ان مفيش اذكي مني ولا يمكن حد يقدر ياخد حاجه بتاعتي.... الخساره اللي خسرها عاصي تمن بسيط جدا تمن تفكيره انه يخسرني انا...... من حفر حفره لأخيه وقع فيها وبدل ما انا اللي هخسر هوا اللي خسر وخسر كتير اوي 

طلع جاسر شنطه من تحت المكتب وحطها قدام حمدي وقال: خد حلال عليك دول 

خد حمدي الشنطه فتحها كانت مليانه فلوس وقال بصدمه: بس دول كتير اوي 

جاسر: انبسط ودلع نفسك ومراتك وولادك خدهم سافرو في اي مكان بعيد عن هنا 

قفل حمدي الشنطه وقام وقال بفرحه: شكرا يبيه... شكرا 

وطلع من المكتب وهوا طاير من الفرحه بص اشرف علي جاسر وقال: مش دي فلوس عاصي اللي دفعها في الارض.... انا اتوقعت انك هتاخدها انت 

جاسر: انا مش باخد حابه مش بتاعتي وبعدين دول من حق حمدي.... تمن الارض اللي عاصي خدها من حمدي من اربع سنين غصب ومدفعش تمنها عشان راجل غلبان ومعهوش اللي يقف معاه... بس انا وقفت معاه رجعتله حقه وكمان استمتعت بخسارة عاصي قدامي 

اشرف بدهشه: انت دماغك سم 

جاسر: قولتلك محدش دماغو زيي..... ولسه لحد دلوقتي محدش شاف مني حاجه 

بص للفراغ وقال ببرود مخيف: دي مجرد بدايه بس الجد لسه هيبدأ 

.........

رمي عاصي كل الملفات والحاجات اللي مكتبه بغضب شديد وقال بانفعال: يعني ايييه.... دنا دافع فيها ملايين 

: هوا دا اللي حصل... والارض اصلا طلعت املاك دوله مش بتاعت حد... والراجل اللي كان عامل نفسه صاحب الارض اختفي دورنا عليه في كل حته ملوش اي اثر 

رجع شعره لورا بعصبيه وقال: يعني انا اللي خسرت في الاخر 

بص علي بوسي وقال: انتي السبب ومش بعيد تكوني متفقه معاه 

بوسي بغضب: ايه اللي انت بتقوله دا.... انا معرفش اي حاجه من اللي بيقول عليها.... كل المعلومات اللي انا قولتهالك حقيقه جبتها من الشركه عنده 

عاصي بعصبيه: يعني كان بيضحك علينا....كانت لعبه منه عشان يخسرني 

بوسي بقلق: يعني هوا عرف انه انا اللي ساعدتك وسربتلك المعلومات... دا لو عرف دنا هروح فيها 

عاصي بعصبيه: هوا دا اللي همك اومال انا اعمل ايه في الخساره دي.... دنا خسرت ملايين عارفه يعني ايه...... بس ورحمة ابويا ما هسيبك يا جاسر وهندمك علي اللي انت عملته وهتشوف 

.............

رجع القصر لقاها نايمه علي الكنبه وهيا حاضنه صورة خالتها و دموعها منشفتش من علي خدها 

سحب الصوره منها براحه عشان متصحاش بص علي صوره مامته بحزن.... حطها علي التربيزه اللي جنبه 

قرب منها وشالها برفق وطلعها اوضتها نيمها علي السرير..... حست بيه وصحيت... بصتله بشده من قربه الشديد منها... بعد عنها وبصلها وقال: اكلتي 

شربات: مليش نفس 

بصلها شويه بعدين سابها ومشي... بصت علي طيفه بحزن ازاي هتقدر تعيش معاها وهوا البرود والقسوه دي 

شويه ورجع وفي ايده صنية الاكل حطها قدامها وقال ببرود: كلي 

شربات بدموع وضيق: قولتلك مش عايزه 

جاسر بحده ارعبتها: قولتلك كلييي 

انتفضت بخوف منه... اخدت سندوتش وبدأت تاكلو غصب و دموعها بتنزل... كانت حاسه بطعم الاكل مر وبينزل من حلقها بصعوبه... كانت عايزه تبكي بس مش قادره... سابها ودخل البلكونه وطلع علبة السجاير خد واحده و ولعها وبدأ يشربها بشراسه وتفكير... بصلها لقاها بتاكل غصب عنها بخوف منه

خلصت السندوتش بالعافيه وكان بينزل في معدتها زي النار.... خلص السيجاره ودخل بصلها وقال ببرود: مش كل شويه هقلك كلي الفطار والغدا والعشا تاكليهم في مواعيدهم انتي فاهمه 

وسابه وطلع وقفل الباب بصت لطيفه بحزن ودموعها بتنزل... زقت الصينيه من قدامها وقعت علي الارض والاكل اللي فيها اتكب.... رمت نفسها علي السرير وهيا بتبكي ومش عارفه الحال هيستمر لحد ايه ولا حياتها هتبقا عامله ازاي من غيرها 

دخل اوضته وقفل الباب وراه.... قلع جاكت البدله ورماه علي السرير بإهمال قعد علي الكنبه بتعب وإرهاق نفسي و جسدي 

فرد جسمه علي الكنبه وغمض عنيه بتعب وهوا بيحاول ينام بس مش عارف... كل ما يغمض عنيه يفتكرها وهيا بين اديه وغرقانه في دمها قلبه يوجع اكتر عليها 

فتح عينه وقعد ودفن وشه بكفوف اديه بتعب شديد..... قام ودخل اوضة التمرين وبدا يرهق نفسه اكتر بالتمرين لعله يستطيع النوم بعدها... لكن بعد تعب شديد لم يستطيع النوم 

كان منهك متعب و مرهق بشده عايز ينام يريح نفسه شويه عقله يبطل تفكير بس مش قادر 

.......

عصام: تمام يبقي علي بركة الله 

بصت سلمي على اشرف بابتسامة وحب وفرحه مش مصدقه ان باباها واقف وهيبقو لبعض بصلها اشرف بابتسامة وحب 

بينما ينظر صلاح لهم بضيق وعدم رضا عن تصرف والده ولا يزال رافض هذا الزواج 

عصام: مش عايزك تزعلها بنتي سلمي دي حته مني ولو زعلتها يبقا متلومش غير نفسك علي اللي هيحصلك 

اشرف بابتسامة: متقلقش ي عمي دي في عنيا 

عصام: احنا معندناش دخول وخروج كل شويه بحجة انها خطيبتي ياريت الجواز يبقا علي طول بما ان كل حاجه جاهزه انتو عارفين بعض كويس 

اشرف بابتسامة: وانا معاك في اللي انت قولته

عصام: تمام اوي اي رايكم الفرح يبقا الشهر اللي جاي 

سلمي بابتسامة: معنديش مشكله 

اشرف بنفس ابتسامتها: ولا انا... وكمان وقت مناسب جدا 

عصام بابتسامة وفرحه لبنته: خلاص اتقفنا الف مبروك 

...........

فتح باب التلاجه طلع ازازة المياه وحطها علي رخامة المطبخ... طلع علبة من جيبه وكانت حبوب منوم 

طلع حبايه منها حطها في بؤه مسك الازازه وشرب... قفل التلاجه وطلع علي فوق 

فتح باب اوضة شربات يطمن عليها لقاها نايمه... قفل الباب وراح علي اوضته نام علي السرير بص للسقف وعقله مش مبطل تفكير في شربات هيتعامل معاها ازاي لوحده علاقتهم هتبقا عامله ازاي وهتستمر علي ايه... مين اللي قتل والدته وليه

بطل تفكير لما مفعول الحبايه بدأ وغمض عنيه ونام بعد تعب ومعاناه شديدة 

............. 

وقف واحد قدام قبر اميره وهوا بيبص للقبر بحزن و دموعه بتنزل.. قعد علي ركبته وحط ورد قدام قبرها وقال بحزن وألم: سامحيني.... سامحيني يا حبيبتي.... صدقيني اللي حصل كان غصب عني... عمري ما قصدت اجرحك او ازعلك وانتي عارفه دا كويس...... طول السنين دي كلها وانا مشتاق اشوفك بس مكنتش قادر... سامحيني...... 

#يتبع

#الفصل_التاسع

#رواية_قصة_لا_تنتهي 

تتوقعو مين الراجل ده 🤔.... جاسر و شربات صعبانين عليا 🥹

تكملة الرواية من هناااااا

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا