سكريبت جرائم بوليسية من_الجاني؟كامله بقلم مريم سمير
سكريبت جرائم بوليسية من_الجاني؟كامله بقلم مريم سمير
_ مشرحة أي الي عاوزني اروحها الساعة 4 الفجر ؟
= هنصلي جماعة ونتوكل علي الله
_ لن يقفل باب مدينتنا ف أنا ذاهبة لأصلي
= أنتي دكتورة طب شرعي يعني عادي تشرحي جثث دلوقتي
_ لي والضهر راح فين؟ العصر ، يعم ماشي بعد العشا ، لكن اي الفجر مش فاهمة؟
= أنا وظيفتي علي المحك يمريم دي آخر فرصة ليا في الداخلية
_ مهو انت جايلي دلوقتي البيت الجيران تقول علينا اي؟ تقول عليا اي طب وسمعتي الي فضلت ابني فيها سنتين؟
= يعني ألطم علي وشي يجدعان ، بقولك أي أنا استعملت معاكي الذوق ، يلا بدل ما افرتك دماغك بالمسدس
_ يباشا الي بتعمله دا ميصحش
= يالا قدامي مفيش وقت ، قضيه قتل ولازم نشتغل فيها دلوقتي
_ مش فيه مباحث؟ مش فيه شرطة ، مسدسك دا ولا مسدس خرز؟
= هتمشي معايا بالذوق؟ بدل ما اخلي القوة الي تحت تفجر العمارة؟
_ هو فيه عربية قوة تحت؟ هو لي بتتعامل معايا اني انا الي قتلتها؟ ما تروح تتشطر علي القاتل
= وانا الي لو كنت عارف القاتل كنت اتحوجت ل واحدة زيك لي؟
_ واحدة زيي ؟ شوف ازاي يجدع دنيا غريبة والله
روحنا موقع الجريمة ، ست مقتولة بطريقة وحشية ب كذا طعنة
= ها اي الاخبار؟
_ الحمد لله والله ، لو خربوش شاي هتبقي عملت معايا الصح
= هو انا بسألك عن صحتك؟ بقولك أي الاخبار الي اتوصلتيلها في الجثة؟
_ الله يرحمها
= جايبين داعية؟ ما تشوفي شغلك يدكتورة وقولي عملتي أي
_ كله دايما بيسألني عملتي أي محدش فكر يسألني عاملة اي
= الصبر من عندك يارب ، اشتغلي لو سمحتي
_ طب خد المعلومة دي
= اديني أيوة كد اديني
_ الجثة دي ميتة
حط المسدس علي دماغي = ولما ارقدك جنبها دلوقتي اي الدنيا ؟
_ هدي اعصابك أنا بفكر بصوت عالي بس يعني مش متأكدة
= مش متأكدة أنها ماتت؟ يعني ارقع بالصوت يجدعان! ، هو انتي بجد دكتورة؟ انتي اتخرجتي ب مقبول؟
_ ياريتها مقبول دا انا طالعة ب مادتين
= بتقولي حاجة؟
_ احترم نفسك معايا وسيبني اشوف شغلي
= اتمني ، اتمني تشوفيه
جه ظابط وقف قدامنا ° باشا ، مفيش اي أثر ل كسر في الباب او تكسير في الشقة
_ معني كد إن القاتل دخل وهو معاه المفتاح!
= طب اروح أنا ؟ يعني مش عارفة تشريح وجاية تتفلسي هنا؟
بصيتله بطرف عيني _ كمل لو سمحت وبعدين ؟
° فيه عشا علي الطربيزة في المطبخ
_ طب أي نبدأ ب بسم الله وناكل لقمة سوا ويبقي عيش وملح
= هاتها ، هاتها ، انتي راحة فين ؟
_ الاكل دا لازم يتحلل ممكن يبقي فيه دليل ويبقي اول طرف خيط في القضيه
= عارفة يمريم؟ انتي عملتي كل حاجة الا انك تشرحي الجثة الي جايبك عشانها
_ شكليات والله ، وبعدين هو انت عاوز تقنعني انك هتستنتج كل دا ب دماغك الي شبه بالبطاطساية دي ؟
= بس يساقطة ، بقولك أي انتي تنسي خالص أننا قرايب دا انتي معرفتك عار
_ وانا يعني الي هموت واقولهم؟ بقولك اي؟ عاوزة دقيق وبيضتين
= دا هينفعك في القضيه في أي ؟
_ لا هعمل كيكة للرجالة واقفين بقالهم كتير
= اقسم بالله يمريم هقتلك أنا غبي وانتي عارفة ، خلصي وشوفي هتهببي أي
_ انت ازاي تكلمني كد؟ أنا دكتورة وممكن جنون العظمة يجيلي مشوفش قدامي
= وانا ظابط وممكن أحسبك
_ تمام هشوف أنا بهبب اي ، أنا بكمل في الي بعمله علي ما يبانلي صاحب
شرحت الجثة ، اربع طعنات ، بسكينة حادة مفقودة ، واحدة في القلب ودي كانت أول طعنة فيهم ، اتقتلت من اكتر من تلت ساعات عشان جسمها بارد ودرجة حرارتها قليلة .
= طب منتي شاطرة اهو امال في اي؟
_ انت عارف اني من أوائل دفعتي ، بس بحب استظرف
ضحك = طب انتي تعبتي النهارده الصراحة ، روحي وتعالي بكرة الصبح
_ الي هو كمان ساعتين؟
= متدخلنيش في ام تفاصيل دلوقتي ، وبعدين ما أنا قدامك اهو طالع عين امي ومبنامش
_ اه
= وبخرج مش عارف راجع بيتنا أمتي ولا راجع اصلا ولا لاء
_ أيوة أيوة قسم وسمعني
= أنا شايل مصر فى كتافي يمريم
_ بس بس ، هروح استريح شويه واجيلك تاني
قبل ما امشي رجعت بصيتله _ احمد هي مش متجوزة ؟
= لا متجوزة ، جوزها في السفر لسه مجاش
_ يعني لسه ميعرفش ؟؟
= لاء
قطع صوتنا صوت شاب ° هو انتوا مين وبتعملوا أي في شقتي؟
= انت الي مين!!
_ أنا صاحب الشقة ، انت الي مين واي كل الرجالة دي؟
قربت منه _ قولوا حفلة تنكرية قولوا حفلة الراجل ممكن يروح فيها من الخضه ، أنا مش مشرحة جثث تاني
= في الحقيقة يفندم للاسف المدام تعيش انت
° ايييي!
_ دا أغمي عليه؟ ارتحت؟ منك لله
سندناه وفوقناه قام وهو بيزعق° مراتي فين ، هي فين؟
= اهدي لو سمحت عشان نعرف نتصرف ، حقها كد كد هيجي
° حقها؟؟ لي هو حصل اي؟
_ قوله اتزحلقت وقعت قوله اتزحلقت ابوس ايدك
= للاسف المدام الله يرحمها اتقتلت
_ فوقه انت بقي ازازة البرفان الاوريجينال خلصت ، دا أي الشغلانة دي دا انت مبتفهمش
= تعالي هنا ، مهو لازم يعرف الحقيقه
عيط ° ومين الي قتلها؟
همست _ قوله أنا وريحني بقي خلينا نخلص الليلة دي وتبقي happy end للجميع
= لسه بندور علي القاتل بس اوعدك هنلاقيه وناخد جزاته _ هو حضرتك كنت فين ؟
° مسافر ، باجي هنا تقريبا مرة أو مرتين في الشهر
_ ليك مواعيد محددة تنزل فيها؟
° لاء ، علي حسب الشغل
_ اه ، يعني اخر مرة نزلت فيها كانت امتي؟
زعق ° بدل ما تفضلي تحققي معايا شوفوا مين قتل مراتي وهاتوه
= طب اهدي هي مش قاصدة تحقق معاك
_ صدقني يا حضرت هنجيب الي عمل كد في اسرع وقت
° هي فين ؟
_ راحت المشرحة
سابنا ومشي ورجعت بصيتله _ أنا عاوزة معلومات كافية عن الراجل دا
= بقولك أي يمريم ، ادخل المطبخ اعملك أكلة حلوة؟ اصل يعني اشتغلتي شغلتي ، لبس ظابط دا ولا أنا تبع الشرطة المدرسية ؟
_ اهدي بس كد ، أنا هشتغل معاك في القضيه دي
= اه دكتورة
_ لاء هساعدك الطب الشرعي بيأكلش عيش
= وانتي يعني شيفاني باكل جمبري ما تخلينا ساكتين بقي
_ أنا مقولتلكش؟ اصل احنا هنبقي سوا في أي قضيه بعد كد
= دا مين الي قال القرار دا؟ إن شاء الله يكون منك وكد كد مبناخدش علي كلام الهطل
_ ريسك في الشغل الي قالي امبارح
= للدرجاتي عاوزني افشل عشان كد خلاكي معايا؟ عشان اقعد في بيتنا افصص بسلة؟
_ تفشل أي القضيه دي بعون الله محلولة ، بس زي ما قولتلك جوزها عاوزين معلومات كتير عنه
= ماشي يستي اعتبريه حصل
روحت نمت ساعتين وقومت وروحت القسم عنده
_ ها اي الدنيا ؟
= فانية والله
_ ولما اموت من الضحك وتشيل ذنبي دلوقتي؟
= اسمعي ، هو زي ما قال بينزل مرتين في الشهر ، شغله في القاهرة ، راجل محترم وفي حاله ، بس كان بيحصل مشاكل بينهم الفترة الأخيرة ، فيه تسع شغالات اشتغلوا في البيت وسابوه
_ تسع شغالات؟ وانا اقول فيه عجز في البلد لي
= يعني بذمتك أنتي مسكتي في دي في كل الي قولته؟
_ مش غريبة تسع شغالات مفيش ولا واحدة تفضل؟ تفتكر أي السبب؟
= لاء مخدمتش في البيوت قبل كد للاسف
_ تعرف شغلانة ؟
= نعم؟؟
#جرايم_بوليسية ، من_الجاني
مريم سمير 🤍.
البارت التاني
_ مش غريبة تسع شغالات مفيش ولا واحدة تفضل؟ تفتكر أي السبب؟
= لاء مخدمتش في البيوت قبل كد للاسف
_ تعرف شغلانة ؟
= نعم؟؟
_ ليلي ، الظابط ليلي
= اشمعنا؟
_ هي الي هتبقي الشغلانة
= انتي عارفة لو سمعتك هتعمل فينا ايييي؟ ، وبعدين أبلعي ريقك ، لي شاكة في جوزها مع أنه مكنش موجود ف مستبعد
_ اتعلم متستبعدش أي حاجة ، كل قضيه وليها ثغرات ، مفيش اي كسر في الشقة ، يعني القاتل كان معاه مفتاح
= او يمكن حرامي ودخل الشقة في اعتقاد منه أنها فاضيه ف قاومته ف قتلها؟
_ أي يخلي حرامي يطعنها اربع طعنات؟ مع إن الطعنة الأولي كانت في قلبها يعني كان اتأكدت أنها ماتت وكمان الفريق الي معانا مأكد إن مفيش حاجة مفقودة في الشقة
= مش عارف ، قضيه مكلكعة ، مسكوهالي عشان يعقدوني أنا عارف
_ ولا يهمك هتتحل إن شاء الله ، أنا هروح دلوقتي عشان اشوف التحليل الجنائي اتوصل ل اييي
= مريم أنا معزوم النهارده عندكم
_ لاء متجيش هو انا ناقصة بذمتك؟
= انتي ناقصه فعلا والله ، هو أي الي مجيش؟ امك خالتي ولا اتبريتوا مني ومتدوليش خبر؟
_ همشي واشوفك علي الغدا بقي اقولك وصلت ل اي
= بقولك؟
مسكت الباب ورجعت بصيتله = شكرا انك وافقني تساعديني في قضية زي دي
_ وانا يعني كنت سيبتك في حاجة قبل كد !!!
= ربنا مش مقدرك تردي حلو ردة الميا في زور عدوينك
روحت معمل التحاليل ° فيه حاجة غريبة جدا يمريم
_ أي هي؟
° الاكل طلع مسمم والضحية كلت منه
رجعت البيت بسرعة لقيت امي قاعدة مع احمد
° ومريم يا احمد انت عارف شاطرة في المطبخ قد أي
= يخالتي بنتك مجريانا كلنا علي السكك في مرة عشان نعمل غسيل معدة
بصيتله بطرف عيني _ عوزاك
° وهو كمان عاوزك يحبيبتي
_ هو في أي يماما!! ، تعالي يا احمد بسرعة عوزاك
دخلنا قعدنا _ هي ماما مالها؟
= معرفش ، وامي نازلة فيكي قصايد شكر ولا هيفاء وهبي
_ ما علينا ، الاكل كان فيه سم
= نعم؟؟؟؟ قصدك أنه..
_ أيوة اتقتلت الاول مسمومة
= أي يخلي الي قتلها يقتلها بالسم ويرجع يقتلها بسكينة؟
_ دا الي عاوزين نعرفه ، يمكن انتقام أو سايكو
= حيث كد نتغدي ونكمل كلامنا عشان واقع من الجوع
خرجنا وقعدنا جمب بعض علي السفرة بصينا ل أمه وامي ورجعنا بصينا لبعض _ هو في أي يمعلم؟ أنا حاسه ب حاجة غريبة
' مش ناويين تفرحونا بقي يعيال
_ لما ربنا يأمر يخالتو ، جوزي ابنك بدل مهو متلقح باير
° بس يبايرة
_ يماما!!!
' نفسنا نفرح بيكم قبل ما نموت
_ إن شاء الله يخالتو لما يجي واحد محترم وابن حلال
' واحمد ماله؟
_ بقولك محترم يخالتو ماله اي بس
= ولما ألبس وشك في الطبق الي قدامك وترجعي تزعلي؟
_ يغبي افهم دول بيدبسونا في بعض
= اييي ؟ علي جثتي
° بصراحة يولاد احنا شايفين انكم لايقين علي بعض
_ بمناخيره دي؟
= ب نضارتها كعب الكوباية ديييي؟
_ حقك ، بقولك أي تعالي نكمل شغل برا
' أيوة اخرجوا سوا ، وخلصوا نفسكم كد عشان خلاص احنا قررنا
_ قوم يبني شويه وهيقولك كتب الكتاب كمان نصاية
روحنا كافية وطلبنا قهوة مظبوط
_ هنعمل أي في الورطة دييي ؟
= هو النيش عليا ولا عليكي؟
_ انا بقول علي القضيه فوقلي كد!
= اه تمام ، يعني المرحومة اتسمت وبعد كد اتطعنت ، انتي شايفة اييي؟
_ عاوزين نحقق مع جوزها ، ونقول ل الظابط ليلي أننا هنحتاجها في القضيه
= هو انتي فاكرة بجد إن ليلي هترضي تشتغل خدامه ؟
_ اسمها الي بتساعد في البيت
= بذمتك دا وقت مسميات؟ ، وبعدين انتي عاوزة شغلانة لي اصلا؟
_ عاوزة اعرف لي تسع شغالات يطفشوا من البيت اكيد فيه سبب
= بس كل دي احتمالات ، ويمكن احنا بنبعد عن المجرم الحقيقي وبنمسك في واحد مكنش موجود اصلا يوم قتلها
_ واحنا خسرانين اي؟ اسمع كلامي بس ، أنا حاسة أننا هنوصل لحل القضية قريب
= منتي مبتحسيش الا بالقواضي بس
_ قصدك اي؟
= مفيش يختي ، يلا عشان نكلم ليلي
روحنا القسم ودخلنا مكتبها وحكيتلها الي عوزاها تعمله
_ وبس يستي ، عندك جلابية ولا اجيبلك؟
° جلابية أي يمريم وشغالة أي الي عوزاني اعملها؟
_ قضية يا ليلي وهتساعديني فيها منا ياما ساعدتك في قواضي
° خلاص يمريم
_ قواضي الآداب دي مين مخلصها؟
° خلاص يمريم
_ المخدرات مين جايبلك اسامي الي بيتاجر فيها؟
° ذلي اهلي كمان ذلي ، خلاص ماشي هساعدك
عرفنا من بواب العمارة إن جوزها عبدالله طالب شغالة تروق الشقة بعد الي حصل فيها ، طلبت من احمد يروح يتكلم مع بواب العمارة وانا هستناه في العربية
= ازيك يعم الناس
° الحمد لله يفندي ، تطلع مين ؟
= انا اخو البت الي طلعت تروق الشقة ، سجارة؟
خدها ° كتر خيرك يبيه
= قال قولي صحيح ، سمعت إن الست مرات الراجل دي ماتت
° دي اتقتلت يعيني والدنيا كانت مقلوبة ولسه معرفوش مين قتلها
= يا ساتر يارب ، طب ما يمكن جوزها الي قتلها؟
° جوزها أي يعم دا بيخاف من خياله لا يعرف يهش ولا ينش
= اه يعني كانوا بيحبوا بعضيهم
° بيني وبينك؟
اداله سجارة كمان = ها يحاج؟
° كانت خانته ومكنتش بطيقه بس مسبهاش
= لا اله الا الله ، ربنا يسهل الامور ، البت اختي الي طلعت دي لهلوبة هتخلي الشقة علي سنجة عشرة
° ياريت يبيه دا عبدالله افندي منبه عليا تبقي بت شاطرة
= لا متخافش هتشرفك ، استأذن أنا بقي عشان ورايا مصالح
دخل العربية وبصلي _ عملت ايي؟
= علبة السجاير خلصت مهو دا الي بناخده منكم
_ احمد انت بتدخن؟
= لاء بس جايبها غالية ، منا قولت مدخلش علي الراجل ب أيدي فاضيه
_ أيوة عملت اي؟
= قالي أنها خانته بس مسبهاش وأنه بيخاف من ضله ، يعني مستحيل يمسك سكينة ويطعنها اربع طعنات ، اكيد شخص تاني
_ واي يخليه ميسبهاش بعد ما خانته؟
= هو انتي لي دايما بتسأليني أسئلة تعجيزية ؟
فضلنا مستنيين في العربية لحد ما ليلي نزلت ، كانت نازلة متبهدلة ف اتخضيت _ مالك في اي؟ عمل فيكي حاجة؟ °ضربني يمريم
_ ضربك!! ، لي عملتي اي؟ اوعي يكون كشفك؟
° هو فضل يبصلي بطريقة غريبة وكأنه مستنيني اعمل غلطة ولما كوباية وقعت مني ضربني وبهدلني وطردني
_ احمد انزل قول لبواب العمارة لو كان يعرف عنوان من التسع شغالات الي اشتغلوا قبل كد
= نعم يختي ؟ واجيب سجاير تاني؟ علي جثتي سامعة؟ علي جثتي يمريم
= حبيب قلبي عامل اي؟ تعفر؟
° تشكر يذوق
= يعني ينفع الباشا يمد أيده علي البت؟
° تاني!! ، معلش يفندي والله بس تلاقيها هي الي عصبته ، هو كد لما يتعصب
= طب اطلب منك خدمة؟ ، لا أنت تاخد تعفر تاني بقي
° تشكر يبيه ، اطلب أوامرك ؟
= تعرف واحدة من الي كانت شغالة عنده؟
° اعرف ، البت فتحية ، بس اشمعنا يبيه؟
= مفيش ، يعني ممكن ابعت اختي تشتغل معاها في حتة كويسة بدل المرمطة دي
° صحيح هي شغالة دلوقتي مع ناس محترمين اوي ممكن تجيب لأختك شغلانة عند حد معرفة
= يبقي كتر خيرك
خد منه العنوان ورجعلي العربية
° انتوا ترجعوني بيتي حالا ، أنا اضرب ؟ دا لولا أنها قضيه كنت حدفته من التاسع
_ معلش يا ليلي عندي دي ، وصلها يا احمد وبعدين نطلع علي العنوان الي معاك
وصلنا ليلي وروحنا علي العنوان ، طلبنا من مامتها نشوفها ف طلعتلنا
° خير؟ أي خدمة؟
= داخلية
_ والله يباشا ما عملت حاجة هو في اي؟
_ اهدي مفيش حاجة احنا بس جايين نسألك عن حاجة ونمشي علي طول
° خير يباشا؟؟
_ انتي كنتي شغالة في بيت عبدالله والست صباح مش كد؟
° أيوة ، بس الست صباح سمعت انها تعيش انت
= ما احنا جايين عشان كد ، انتي سيبتي الشغل لي؟
°..
_ اتكلمي ، أي معلومة ممكن توصلنا للي قتلها
° عشان البيه كان بيضربني ، حتي والست الي غلطانة بيجي يفش غله فيا انا ، ف معتش استحملت وطفشت من عندهم
_ والست كانت بتغلط فيه؟
° ياه ، دا علي طول كانت بتسمعه كلام مر ، بس مكنش يعرف يرد عليها ، دا كل الي اعرفه والله يبيه
_ كتر خيرك ، ومتشكرين
ركبنا العربية وبصينا لبعض _ هو الي قتلها
= بس مينفعش نمشي ورا استنتاجات بردو يمريم
_ كان بيسقط الي مراته بتعمله فيه علي الشغالات ، الضرب دا كان مجرد رد فعل جواه مكنش يعرف يطلعه علي مراته ف كان بيطلعه علي اي حد أضعف منه أو شغال عنده ، جه يومها علي غير عادته وحط السم في الاكل
= طب والطعنات؟ تفتكري هو الي عملها؟
_ انا هبقي الشغالة الجاية
= انتي بتقولي اي؟
#جرائم_بوليسية ، من_الجاني؟
مريم سمير 🤍.
البارت التالت والأخير
_ انا هبقي الشغالة الجاية
= انتي بتقولي اي؟
_ مفيش حل غير كد عشان نكشفه
= انا مستحيل اوافق إني اعرض حياتك للخطر
_ يا احمد القسم صارف مكافأة وترقيه لو حليت القضيه
= عندك جلابيه ولا نروح نشتري دلوقتي ؟
ضحكت وبصيتله _ انت لازم تحل القضيه دي ولازم تفضل في الداخلية ، دا حلمك
= مينفعش يمريم اوافق علي الي بتقوليه ، دا ممكن يضربك وانا الي يمد أيده عليكي أمحيه من علي وش الدنيا
_أ ديني في الرجولة اديني وسمعني
= انا بتكلم بجد ، شوفي حل تاني
_ دي آخر فرصة ليك ، ودا الحل الي قدامنا متخافش انت هتبقي معايا وسامع كل حاجة هتحصل ، امسك
= دي ولاعة؟ هو انتي بتشربي سجاير؟ هتبقي انتي والبواب عليا!!
_ دي جهاز تصنت ، جيس بكام؟ ب خمسه ونص من محل اسمه الدلوعة
= دا وقته بذمتك؟
_ مهو انت هتبقي معايا اهو لو حصل أي حاجة هتعرف تتصرف أنا متأكدة
= ونفترض أنه قرب منك؟ اعمل اي انا ساعتها؟
_ وفيها اي يعني؟؟
= فيها اييييي؟ بصي اعمل أنا الشغالة اصل انا بيتقالي فيها أي
_ احمد هو في اي؟ اوعا تكون خايف عليا ؟
= ما اكيد خايف عليكي
_ متخافيش أنت عارف اني بعرف احافظ علي نفسي كويس ، من بكرة هروحله ماشي ؟
=..
_ سوق بقي ووصلني عشان الدنيا بدأت تبرد
ساق ووصلنا جيت افتح باب العربية صوته وقفني
= مريم ، شكراً علي كل الي بتعمليه معايا ، من واحنا عيال صغيرة وانتي بتساعديني ، بتساعديني في الواجب عشان المدرس ميضربنيش ، وبتساعديني ألعب كورة عشان زمايلي ساعتها ميتريقوش عليا ، حتي انتي الوحيدة الي كنتي بتشجعيني ادخل شرطة زي ما كنت عاوز ، انتي يمريم عندك اطيب واجمل قلب في الدنيا
_ يعني هتبطل تقلس في نضارتي وتقولي اني بكعب كوباية؟
ضحك = شكلك حلو اوي بيها والله أنا الي بحب أنكشك
_ ماشي تصبح على خير
= تعالي تعالي ، هو بعد كل الي قولته دا مش جاي معاكي تردي عليا ب اي حاجة؟
_ تجيب جلابيه وانت جايلي بكرة بقي ماشي؟
= انزلي من العربية بدل ما اديكي بالرجل
ضحكت ونزلت ، كلامه كان جميل ، اول مرة اسمعه منه ، كنا دايما صحاب دبش مع بعض ، كل واحد لو عمل حاجة حلوة مع التاني عمره ما يشكره ، بس الليلادي كان لذيذ اويييي ، جالي بعد المغرب
= ادخلي إلبسيها بقي خلينا نخلص ، وعارفة لو الولاعة دي فصلت ثانية هعمل فيكي اي؟
= ساعتها اطلع وشيله من تحت ايدي
_ تربيتي ، ادخلي بقي
دخلت ولبستها وقلعت النضارة ولبست اللينسز الشفافة بتاعتي وطلعت احنا _ هنسأل البواب الاول بقي هو عاوز شغالة ولا لاء عشان منبانش مكشوفين اوي
=..
_ وانا لو طلعت هحاول ادور علي اي حاجة تثبت أنه هو القاتل ، ف تطلع تقفشه متلبس
=..
_ وتاخد الترقيه وتحل عني مشوفش وشك عندنا تاني
=..
_ احمد!!
غمز = هو انتي بجد لابسه نضارة لي؟ مدارية القناصة؟
_ احترم نفسك يا احمد
= اصل انتي احلي شغالة شوفتها في حياتى الصراحة
_ انا معايا مسدس يا احمد
= ثواني ، خدتيه منين؟
_ خدته من العربية امبارح متدخلنيش في تفاصيل
= دا عهدة يمريم
_ يعني عاوزني اطلع فوق من غير سلاح؟ بان علي حقيقتك بان
= هو انتي هتضربي عليه نار ؟
_ لاء عيب عليك يا احمد
= أيوة الحمد لله
_ هقتله
= اييييي!!
_ يلا بس عشان منتأخرش
روحنا وركنا العربية قريب من العمارة ورجعت بصيتله
_ علبة السجاير الي بتجيبها فدا مصر يا احمد
= انا مشوفتش جنيه واحد من الي دفعته لحد دلوقتي
_ مش مشكلة خليك فدائي ، يلا اتوكل علي الله
نزل من العربية وراح للبواب
= ازيك يبلادينا
° اهلا اهلا بالبيه ، أي الاخبار؟
= الحمد لله ، تعفر؟ هتعفر
° تشكر يذوق يا ابو الكرم
= بقولك أي ، الباشا مش عاوز شغالة تانية؟ اصل معايا واحدة معرفة وعاوزلها شغلانة
° هو قالي من امبارح ادورله علي واحدة بس محدش رضي يجي ، الي انت جايبها دي مضمونة ؟
= برقبتي يا عم بت لهلوبة هتاخد الشقه رايح جاي ولا الاندرتيكر في مجده
° خلاص يبيه هاتها ويبقي كتر خيرك
= هي معايا في مكان قريب من هنا ، هروح اجيبها عما تروح تبلغ الباشا انك لقيت شغالة جديدة
° خلاص ماشي تشكر يفندي
_ ها اي الاخبار ؟
= انزلي ، وبقولك أي خلي بالك من نفسك ، واهدي ومتتكلميش معاه هيشك فيكي ، مريم دا واحد قاتل مراته يعني عقلك في راسك عشان خاطري ، طلعتي سليمة تنزليلي سليمة
_ خلاص يا احمد هو انا صغيرة؟
= اه يستي اهههه، ومتهزريش معاه لا تلاقي قلم نازل يزغرط علي خدك
_ يعيني كد اعمل حسابك هسلمهولك ناقص دراع
انتي متتكلميش وكل حاجة هتمشي مظبوط
طلعت فوق وسيبت احمد في العربية ، خبطت علي الباب طلعلي البواب
° انتي البت الشغالة؟
هزيت راسي ب اه ° طب ادخلي روقي والبيه جوا وحسك عينك تعصبيه أنا زهقت اجيب شغالات
دخلت الشقه وانا ببص حواليا لقيته قاعد في الصالة
° بصلي أنا عاوز الشقه علي سنجة عشرة ، انا رايح مكان وجاي ، اجي الاقيها خلصانة سمعاني؟
هزيت راسي ب اه ° والأوضة دي متجيش جنبها ولا تفتحيها
بصلي من فوق لتحت ° كلامي واضح؟
_ أيوة يبيه
سابني وخرج ف اتصلت ب احمد علي طول
_ سمعت هو قال اي؟ اكيد الاوضه دي فيها حل كل الأسئلة
= طب ادخلي وخلي بالك وخليني معاكي علي الخط
دخلت الاوضه لقيتها ضلمة فتحت الفلاش بتاع الفون ، لقيت فيها أدوات حادة! سكاكين ومنشار وحاجات كتير ، صور مراته مالية الاوضه ومعمول عليها علامة ×
_ هو يا احمد اكيد ، دا حاطط صور مراته ومشخبط عليها
= لقيتي حاجة تانية عندك؟
فتحت الدولاب لقيت هدومها متقطعة!
= مريم ؟؟ هو ازاي منزلش لحد دلوقتى ؟
_ نعم؟ هو قالي أنه رايح مكان!!
= بس انا مشوفتوش نزل خالص
قفلت الدولاب ف لقيته قدامي ف صوتت والفون وقع من ايدي ° كنت شاكك اني شوفتك قبل كد ، انتي الي كنتي مع الظابط؟
_ قتلتها ليييي؟
° منتي هتحصليها بس الصبر
بصيت علي أيده لقيت فيها سكينة ف رجعت بصيتله
_ دلوقتي كله متأكد انك انت الي قتلتها ، متوقعش نفسك في تهمة تانية
شدني ولوي درعي ورايا ° مهي كد كد خربانة ف خلينا نستمتع شويه
رابطني في كرسي ووقف قدامي
° وانتي تحبي بقي تموتي ازاي؟
_ لي بتعمل كد؟ لي عملت فيها كد؟
° هقولك ، عارفة لي؟ عشان بعد خمس دقايق مش هتبقي موجودة ف هعتبرها اخر حاجة هتعوزي تعرفيها
_..
° انا كنت بحبها اوي ، اوييييي ، بس هي عمرها ما حبتني مع اني كنت قايد صوابعي العشرة ليها ، مكنتش برفض ليها أي طلب ، كنت بشتغل ليل نهار عشان اوفرلها العيشة الي هي عوزاها ، ببعد عنها ايام كتير عشان اعرف اجيب فلوس ، استحملت بواخة مديري وقلة ادب العملا والموظفين عشانها ، لحد ما في يوم جيت ومكنتش قايلها ، كان عيد جوازنا ف كنت عاملها مفاجأة ، لقيتها مع واحد تاني خانتني!! ، بعد ما كنت بستحمل اي كلام تقولهولي
_ عشان كد كنت بتسقط كل حاجة بتعملها فيك علي الشغالات الغلابة ، مكنتش قادر ترفع عينك فيها أو تمد ايدك عليها ، ف كنت بتشوف أي حد أضعف منك تمارس عليه رجولتك وقوتك عشان تشبع رغباتك الي كانت هي بتهينها كل شويه ، انت مريض!!
° مكنش عندي حل تاني
_ لي بعد ما سمتها قتلتها؟؟
° عشان تستاهل تموت ب كذا طريقة ، بس علي فكرة معرفتش اعملها ، صاحبي الي قتلها قدامي وانا مبسوط وانا شايفها بيحصل فيها كد ، أنا ضحيت ب حاجات كتير عشانها وهي مقدرتش أي حاجة عملتلها ، الي زي دي كان لازم تموت ، كل الستات خونة ولازم يموتوا!!
_ كان ممكن تطلقها وتسيبها
° وعمري الي راح مين يدفع تمنه؟؟ ، بعد ما اقتلك اوعدك هبدأ صفحة جديدة مع ست تانية ، ست لو فكرت تعصالي أمر هقتلها
_ انت مجنون ، مجنون
° يمكن ، يمكن الجنون اعلي درجة من درجات العقل
قرب مني ° لما تروحيلها سلميلي عليها ، كان نفسي تفضل معايا وتحبني ربع الحب الي حبتهولها
_ انا مليش ذنب ، ارجوك متعملش كد
° ذنبك انك ست ، وفاكرة نفسك ذكية ، مدخلش عليكي دور المسكنة الي كنت راسمه قدامكم ، وافتكرتيني غبي عشان مش هعرف اكشفك
_ انت لازم تتعالج! انا ممكن اساعدك
° وانا اخر حاجة هعوزها هي مساعدة ست
الباب اتكسر وأحمد دخل ، خدت نفسي وطلعته بصعوبة
= متخافيش يمريم
وقف ورايا والسكينة علي رقبتي ° زي اخر مشهد من كل فيلم ، البطل بيجي ينقذ حبيبته من ايد الشرير ، بس للاسف مش دي النهاية
= ارمي السلاح الي في ايدك يعبدالله ، خلاص انت وقعت المكان تحت كله محاصر
° افكها؟ دي تذكرتي عشان اطلع من هنا ، ارمي سلاحك وقول للي تحت يفضولي سكة عشان امشي
= مش هتعرف تفلت يعبدالله
° ولا هي هتفضل عايشه لو مسمعتش كلامي
_ متسمعش كلامه يا احمد ، اضرب النار
° اخرسي انتي
_ احمد دا جبان مش هيعرف يعمل حاجة
كتم بوقي ب أيده ° هتسمع الكلام ولا اقتلها؟
بص عليا ف غمضتله عيني ، طلع طلقة جت في دراعه ، أغمي عليا ، فوقت علي صوت احمد في المستشفى
= مريم انتي كويسه ؟
_ أيوة ، هو حصل ايييي؟
= هو انتي بجد افتكرتي اني ضربت النار عليكي؟
_ مش بعيدة عليك يا احمد أنت احول يبايا
ضحك = حمدالله على السلامه
_ طمني بس حصل اي؟
= قبضنا عليه ، طلع فعلا جبان وصاحبه الي طعنها بعد ما هو سمها ، طول عمرك دماغك مفوتة بس شجاعة
_ شجاعة أي دا انا في مستشفى بعد ما أغمي عليا انت مستوعب؟
= بس محدش كان هياخد الريسك أنه يختار اضرب النار عليه والسكينة علي رقبتك ، أنا كنت خايف عليكي اوي ، لو كان حصلك حاجة مكنتش هسامح نفسي ، ابدا
_ انا كويسه متخافش ، اترقيت؟
= الحمد لله ، بعد ربنا انتي السبب
_ انت الي ظابط شاطر
= انا صفر علي الشمال من غيرك ، قومي بقي عشان محضرلك مفاجأة
_ اي هي؟
= هتجوزك
_ بص أنا هقيم في المستشفى مش هخرج
= معني الكلام دا ايييي؟
_ نتجوز أي يا احمد انت تبطل تقعد مع امي وامك ، اقنعوك ازاي ، دفعولك كام وننصص سوا؟
= لاء هما معملوش حاجة عشان أنا كد كد بحبك
_ نعم؟؟
= منا قولتلك قبل كد مبتحسيش غير بالقواضي بس؟ ، بصي هو انا مش هحلك ومش متجوزة غيري والله ف قصري
_ هو أي دا؟؟
= عرض جواز
_ انت بتعرض عليا الجواز وماسكلي مسدس!!
= يعني اه عشان لو رفضتي هي طلقه وهتريحنا كلنا
_ احمد فين الولاعة الي ادتهالك الي جيبالها من محل الدعولة؟ عوزاها معلش عشان عهدة
حط المسدس علي دماغه = طب اقتلني انا؟؟
_ خلاص يعم ، سيبني أفكر
= ماشي يستي معاكي عشر دقايق شقلبيها في دماغك
_ دا انا لو بفكر هتغدي اي هاخد وقت اكتر من كد!
= انجزي عشان الجلابيه عليكي مووتتت
_ احترم نفسك يا احمد
= اصل انتي احلي شغالة شوفتها في حياتى الصراحة
#جرائم_بوليسية ، من_الجاني؟
مريم سمير 🤍.
تعليقات
إرسال تعليق
فضلا اترك تعليق من هنا