رواية قطار الأقدار الفصل الثاني 2 بقلم عادل عبد الله حصريه في مدونة قصر الروايات
رواية قطار الأقدار الفصل الثاني 2 بقلم عادل عبد الله حصريه في مدونة قصر الروايات
#رواية_قطار_الأقدار
#للكاتب_عادل_عبد_الله
الحلقة ٢
: المشكلة كمان ان اخو جوزي ده مش سهل ومش هيسيبني في حالي وانا اهلي غلابة ومش قد المشاكل !!
: وأنتي ناوية تعملي ايه ؟
: مش عارفة يا علاء ، كلمني انت بقي عن نفسك .
" وهنا كانت المشكلة لأني مش هقدر اقولها كل حاجة عني !!!! "
: انا اسمي علاء ٣٥ سنة ، مدرس لغة انجليزية ، اعزب ، عايش مع والدتي بعد وفاة والدي الله يرحمه وجواز اخواتي البنات ، نسيت اقولك اني ولد وحيد علي ٣ بنات انا اكبرهم ، رومانسي بدرجة كبيرة ، حبيت كتير لكن للأسف مفيش واحدة فيهم كانت تستاهل حبي ، شقتي جاهزة وفلوس جوازي كمان ، كل اللي ناقصني العروسة .
: أنت انسان طيب وابن حلال وألف واحدة تتمناك .
: مش عارف ليه لحد دلوقتي مش لاقي واحدة من الالف !!!
: دور كويس حواليك اكيد هتلاقي .
: مفيش حواليا غيرك !!
: انا ؟!!! انا اخر واحدة ممكن تفكر تتجوزها .
: ليه بتقولي كده ؟!
: زي ما قولتلك اخو المرحوم جوزي مش سهل ومصمم يتجوزني ، ولو فكرت اتجوز غيره مش هيسيبنا في حالنا !!!
: لو انا جنبك مش هيقدر يتعرضلك .
: بيتهيألك يا علاء ، ده مجرم و نابه ازرق .
: علي نفسه ، طول ما انا موجود مش هيقدر يمس منك شعرة .
: ربنا يخليك ليا .
: انتي عينيكي بدأت تنعس ، تحبي تنامي شوية ولا تحبي تشربي قهوة ؟؟
: لأ هات تليفونك اتسلي فيه شوية .
: خدي التليفون ، وانا هروح اشرب قهوة وسيجارة في البوفية .
: انت بتشرب قهوة وسجاير كتير قوي !!!
: علشان اقدر اكمل لغاية ما اوصل .
اعطيتها هاتفي و ذهبت للبوفية تناولت قهوتي وسيجارتين ثم عدت اليها لأجدها ممسكة بهاتفي في يدها وقد نامت مرة اخري !!! يبدو انها مرهقة للغاية .
جلست بجوارها واخذت من يدها هاتفي ولكنها لم تنتبه !!!
لم يمر وقتا طويلا وانا اتأمل ملامحها الرقيقة حتي غلبني النعاس انا الاخر !!
لم أشعر بنفسي الا وانا افتح عيناي لأجد مقعدها بجانبي خاويا !!!
انقبض قلبي ونهضت سريعا ابحث عنها ولكني لم اجدها !!
بحثت عن حقائبها فلم اجدها !!! نظرت في ساعتي لأجد انه قد مر وقتا طويلا اثناء نومي !!!
بالتأكيد لقد وصلت ريم الي محطتها ونزلت من القطار !!!
غادرت دون ان توقظني !! حتي لا تمنحني وسيلة للاتصال بها او حتي لتودعني !!! اذن لم اكن لها الا مجرد اداة للتسلية في ليلة سفر طويلة !!!!!
لا اعرف لماذا تحركت مشاعري تجاهها سريعا !! ولا اعرف لماذا انا حزين لهذه الدرجة !!!
شعرت بعجز بائس حزين استيقظ للتو من حلم جميل !!!
ماذا علي ان افعل الان ؟؟ لا شئ !!! وكأنها كانت حلم جميل استيقظت منه سريعا !!! او كأنها نسمة عابرة جاءت في ليلة رمضاء ثم رحلت في هدوء !!!
رجعت لاستعيد التفكير في حياتي المليئة بالاحزان !!!
في السادسة صباحا وصلت الي بلدتي وذهبت مباشرة الي دار عمي ناجح .
: حمدلله ع السلامة يا ولد اخوي .
: الله يسلمك يا عمي ، البقاء لله ، البجية في حياتك في الحاجة مرت عمي .
: حياتك الباجية يا ولد اخوي ، تعال جعمس اهني جاري .
جلست بجوار عمي الذي اظهر ود وترحيب كبير .
: جولي يا ولد اخوي كيفك وكيف اخواتك البنات وامك ؟؟
: الحمد لله بخير بحسك يا عمي ، بيبوسوا ايديك .
: لساك مناويش تتجوز وتجيب ذرية تشيل اسم اخوي عبد الرازق الله يرحمه ؟؟
: ما انت عارف يا عمي دلوجتي مش جادر اتجوز عشان اخواتي !!!
: اخواتك البنات لسه حظهم مايل يا ولد اخوي ؟؟
: النصيب يا عمي ، التلاتة اتطلقوا وقاعدين معانا في البيت !!!
: متزعلش يا ولد اخوي ، كان فيها ايه لو كانوا اتجوزوا ولاد اعمامهم ؟؟ كانوا زمانهم متستتين ومتهنيين هنا جارنا .
: النصيب يا عمي ، ما انت عارف اللي اتربي في مصر صعب ييجي يعيش هنا في الصعيد .
: بخاطرهم ، ربنا يصلح حالهم ، بس اني اتوحشتك جوي يا ولد اخوي ، انت هتجعد اهني سبوع متجيبش سيرة مرواح ، فاهم ؟؟
: كيف يا عمي ؟! والشغل ؟ والمدرسة ؟ انا لو عليا عايز اجعد معاك شهر مش سبوع لكن عشان الشغل .
في منزل ريم ...
وصلت ريم الي المنزل قبل اذان الفجر بساعتين !!!
صعدت الي شقتها ووضعت حقائبها وارتمت الي فراشها لتستريح من عناء يوم شاق .
انتبهت علي دقات عالية علي بابها !!!
نظرت في ساعتها لتجد الساعة الخامسة صباحا !!!
فتحت الباب لتجد حماتها !!
: صباح الخير يامه .
: صباح النور ، طلعت اطمن اشوفك رجعتي ميتة ؟؟
: رجعت من ساعتين يامه .
: وكيف تعودي في وجت زي ده ؟!! الناس تجول علينا ايه ؟؟
: يامه علي ما خلصت اوراج مكافأة المرحوم ، وانتي جولتيلي متبيتيش في مصر وترجعي طوالي .
: مش لو كنتي سمعتي الكلام واتجوزتي منصور ولدي كان زمانه سافر مكانك وجعدتي معززة مكرمة بدل البهدلة دي ؟!
: يامه ده وجته ؟؟
: انا هصلي الفجر و انتي تعالي اعملي الفطور ونتحدت .
نزلت ريم واعدت الفطور وجلست مع حماتها ام منصور ...
ام منصور : عدت خمس شهور يا بنتي علي مو.ت جوزك وعدتك خلصت ، جوليلي ليه مش راضية تتجوزي ولدي منصور ؟؟
ريم : يامه مش هجولك ان ولدك منصور زي خوي والكلام ده ، لكن انا كنت بحب ولدك سليم الله يرحمه ومش هجدر يمس جسمي راجل تاني غيره !!
ام منصور : سليم الله يرحمه عند ربه ، وانتي يا بنتي مش هتعيشي عمرك كله عذبة !!! ومنصور ولدي اولي من الغريب ، علي الاجل هتلاجي فيه ريحة المرحوم .
ريم : يامه منصور متجوز وهدير مرته زي اختي !! ده غير انه كبير معدي الاربعين و اكبر مني ييجي بعشرين سنة !! وطباعنا غير بعضينا !! اتجوزه واعاشره كيف ؟؟؟
ام منصور : لو كان حداي ولد غيره صغير كنت جوزتك اياه !! انما ما باليد حيلة يا بنتي .
ريم : يامه انا من يوم ما دخلت داركم عداكي زي امي تمام ، ياريت يامه ماتكلمنيش في الموضوع ده تاني .
ام منصور : يا ريم يا بنتي وانا عداكي زي بنتي تمام ، هجولك كلمتين حطيهم حلجة في ودنك ، مادام دخلتي دارنا مش هتخرجي منه الا علي جبرك !!!
ريم : وانا يامه جولتلك جواز مش هتجوز واديني عايشة معاكي ممشيتش !!!!!
للكاتب عادل عبد الله
ام منصور : وكيف هتعيشي معاي وولدي منصور في نفس الدار و عينه منك ؟؟
ريم : هوه في حاله وانا في حالي يامه .
بعد يومين ...
: اشوف وشك بخير يا عمي .
: لساك مصمم تمشي يا ولدي ؟؟
: معلش يا عمي لولا الشغل كنت جعدت معاك لما تزهج مني .
: عمري ما ازهج منك يا ولدي ، يلا ربنا معاك ، ابجي سلملي علي اخواتك وامك .
في منزل علاء ...
ام علاء : حمدلله ع السلامة يا ابني .
علاء : الله يسلمك يا امي .
ام علاء : عمك وولاده عاملين ايه ؟
علاء : بخير يا امي ، كلهم بيسلموا عليكي وعلي اخواتي البنات ، هما فين صحيح مش باينين ؟
ام علاء : موجودين ، هيروحوا فين يعني !!! عمك عطاك ايجار الارض ؟؟
علاء : ايوه يا امي ، الفلوس اهي .
ام علاء : طيب هاتهم اشيلهوملك .
علاء : حاضر يا امي خديهم .
تأتي اخوات علاء ( علياء ٣٢ سنة وامينة ٣٠ سنة وسهير ٢٧ سنة ) ...
علياء : حمدلله ع السلامة يا علاء .
علاء : الله يسلمك .
سهير " بضحك " : جبتلنا ايه معاك ؟؟
علاء " يضحك " : بتاو و بامية وملوخية ناشفة وجبنة قديمة .
امينة : وعمك عطاك ايجار الارض ؟؟
علاء : ايوه ، مع امكم .
علياء : العيال عايزين كسوة يامه .
ام علاء : حاضر .
سهير : وانا عايزة اشتري عباية جديدة .
ام علاء : حاضر ، هشتريلكم كل واحدة عباية جديدة يمكن ربنا يعدلهالكم وتلاقوا ولاد الحلال .
علياء : ومين هيبص لثلاثة متطلقين ؟!!
ام علاء : ربنا يرزقكم بولاد الحلال .
علاء : بمناسبة ولاد الحلال يا امي ، انا شوفت واحدة في السفرية دي بنت حلال وحلوة قوي كان نفسي تكون من نصيبي لكن للأسف اختفت فجأة كأنها كانت حلم جميل وانتهي !! لو كنت عرفت رقم تليفونها ولا عنوانها كنت قولتلك تجوزهالي .
ام علاء : اجوزهالك ؟؟؟
علاء : ايوه يا امي ، بصراحة حبيتها من اول نظرة ، لكن للأسف !!!!!
ام علاء : عملت خير انها ضاعت .
علاء : ليه كده يا امي ؟!!!
ام علاء : يا بني جواز ايه وهم ايه ؟؟ يعني اللي اتجوزوا عملوا ايه ؟!!! ما اخواتك التلاتة اتجوزوا ورجعولي كل واحدة بعيالها !!! وانت اتجوزت قبل سابق وطلقت !!!
علاء : يمكن حظي المرادي يكون احسن ؟
ام علاء : يعني هتتجوز يا ابني واخواتك التلاتة قاعدين ؟؟!!
علاء " بغضب " : لا يا امي هقعدلك انا كمان جنبكم !!!
ام علاء : دور علي مصلحتك اهم ، يلا ارتاحلك ساعتين علشان تشوف الولاد اللي بتعطيهم الدروس .
علاء : لأ يا امي انا النهاردة هرتاح من السفر و انا مواعد الطلبة علي مواعيد الدروس بكره .
ام علاء : وتضيع اليوم في النوم ؟؟
علاء : يعني بلاش ارتاح يوم يا امي ؟!!
ام علاء : ارتاح يا حبيبي .
في شقة علياء في الدور التالت ...
علياء : شوفتوا اخوكم وهو بيقول انه عايز يتجوز ؟؟
امينة : اه ، قال عايز يتجوز قال !!!!
سهير : ماهو لازم يتجوز ، اخوكم كبر !!
علياء : يتجوز ؟!!! عارفة جواز اخوكي معناه ايه ؟؟
امينة : معناه ان كل الخير اللي بيجيبه من الدروس الخصوصية هيكون للعروسة اللي هيتجوزها !!! واحنا نعيش كلنا علي الالفين جنية معاش ابوكم !!!
سهير : ده احنا كده مش هنلاقي ناكل !!!
علياء : ايوه ، علشان كده لازم اخوكم ميشوفش جواز الا لما نتجوز احنا الاول او نرجع لاجوازنا ، بعدها يتجوز زي ما يحب !!!
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق
فضلا اترك تعليق من هنا