رواية قطار الأقدار الفصل الثالث 3 بقلم عادل عبد الله حصريه في مدونة قصر الروايات
رواية قطار الأقدار الفصل الثالث 3 بقلم عادل عبد الله حصريه في مدونة قصر الروايات
#رواية_قطار_الأقدار
#للكاتب_عادل_عبد_الله
الحلقة ٣
امينة : معناه ان كل الخير اللي بيجيبه من الدروس الخصوصية هيكون للعروسة اللي هيتجوزها !!! واحنا نعيش كلنا علي الالفين جنية معاش ابوكم !!!
سهير : ده احنا كده مش هنلاقي ناكل !!!
علياء : ايوه ، علشان كده لازم اخوكم ميشوفش جواز الا لما نتجوز احنا الاول او نرجع لاجوازنا ، بعدها يتجوز زي ما يحب !!!
امينة : انا عن نفسي جوزي مستحيل يفكر يرجعني بعد اللي حصل .
سهير : طبعا من عمايلك السودا .
امينة : يعني انتي اللي جوزك بيتمني رجوعك ؟!! ده ما صدق طلقك وراح اتجوز !! وسمعت انه مبسوط في جوازته !!!
سهير " بغضب " : ربنا ياخده هو وهي ، حلة واتلمت علي غطاها !! هما الاتنين شبه بعض ، والنعمة انا خسارة فيه !! هو هيلاقي واحدة في جمالي وحلاوتي فين ؟!!!
علياء " بسخط " : خلاص يا ست الحسن والجمال منك ليها ، خلونا في المهم .
امينة " بسخرية " : ايه هو المهم يا ابلة علياء ؟؟
علياء : المهم طبعا ان علاء ميتجوزش لغاية ما نتجوز احنا التلاتة الاول .
في منزل ريم ...
تنزل ريم لشراء بعض متطلبات المنزل وتجد منصور يقف عند درج المنزل " وكأنه في انتظارها " !!!
ريم : لو سمحت بعد عن الطريج خليني ادله !!
منصور : ادلي ، حدا حاشك ؟؟
ريم : ادله كيف وانت واجف اكده ؟!!
منصور : اديني بعدت عاد ، يلا ادلي .
ريم : انا مش هدله طول ما انت واجف اكده !!!
منصور :جوليلي الاول ، كنتي فين الليلة اللي فاتت ؟؟
ريم : حماتي عارفة زين اني كنت في مصر بخلص اوراج المرحوم .
منصور : عجباكي البهدلة اكدة ؟!! بكلمة واحدة من خشمك اللي عمينجط عسل ترتاحي وتبجي ست الستات !!
ريم : كلمة ايه ؟؟
للكاتب عادل عبد الله
منصور : انتي خابرة زين اني رايدك ، جولي موافجة وانا اخليكي ست الدار .
ريم : لا يا منصور ، انا جولت جبل سابج اني مش هتجوز بعد المرحوم !!
منصور : يا بت الناس ده المثل بيجول الحي ابجي من الميت ، وانا رايدك بالحلال .
ريم : وانا ماريداشي اتجوز يا منصور !! خوك الله يرحمه كان مش بس جوزي !! كان حبيبي !! و كيف رايد تتجوزني عاد و مرتك صحبتي ؟!!!
منصور : هخليكي ست ستها !!!
ريم : انا مش هتجوز يا منصور ، هعيش عذبة اكده ، يلا بعد عن طريجي خليني افوت .
منصور : هبعد يا ريم ، و خليكي واعية زين انك في يوم من الايام هتكوني مرتي .
نظرت له ريم بسخط ثم مرت وخرجت من المنزل .
دخل منصور شقته فوجد زوجته حنان تسأله : كنت بتتحدت مع مين ؟
منصور : كنت بتحدت في المحمول .
حنان " بسخرية " : وكيف بتتحدت في المحمول والمحمول اهني عاد ؟؟؟
منصور " بصوت عال " : خلاص خلصنا !! هتحججي معاي ولا ايه ؟؟
في المساء ...
خرج منصور وجلس مع اصدقاؤه كعادته يوميا ، بينما صعدت زوجته حنان الي شقة ريم !!!
ريم : تعالي يا حنان اتفضلي .
حنان : يزيد فضلك .
ثم تجلس حنان وببدو عليها التوتر !!!
ريم : مالك يا حنان ؟؟ شكلك متضايقة ؟؟
حنان : منصور كان بيقولك ايه علي السلم الصبح ؟؟
ريم " تضحك " : قوليلي الاول انتي بتغيري لهجتك وبتكلميني مصراوي ليه ؟
حنان : ما انتي عارفة اني متربية في مصر واللهجة الصعيدية متعودتش عليها الا لما اتجوزت هنا ، بحب اتكلم معاكي مصراوي علشان انتي كمان متعودة عليها .
ريم : ايوه ما انا عيشت مع ابويا عشر سنين في مصر لما كان بيشتغل هناك .
حنان : متغيريش الموضوع وقوليلي يا ريم ، منصور كان بيقولك ايه الصبح علي السلم ؟
ريم : ما انتي عارفة يا حنان !! كان بيكلمني في موضوع الجواز تاني !!
حنان : يا بووووي !! لساته مصمم ؟!!
ريم : الحقيقة يا حنان انا مش عارفة اعمل معاه ايه ؟؟
حنان : وقولتيله ايه ؟؟
ريم : قولتله اني رافضة و مش هتجوز .
حنان : مادام هو وحماتي في دماغهم الموضوع ده مش هيسكتوا الا لما يتجوزك .
ريم : متخافيش يا حنان ، مش هتجوزه يعني مش هتجوزه ، ده اخر كلام عندي ، وانا عمري ما اكسر قلبك وازعلك ابدا .
حنان : تعيشي يا حبيبتي ، انا والله عداكي اختي مش سلفتي ولا حتي صاحبتي ، انتي اختي واكتر من اختي .
ريم : وانا كمان بحبك زي اختي تمام .
حنان : لولا العيال كنت اتطلقت منه ، لكن اعمل ايه في ست عيال اكبرهم عنده ١٧ وسنة واصغرهم بنت عمرها سنتين ؟!!!!! لو اتطلقت منه العيال هيضيعوا !!!
ريم : لا يا حنان ، حافظي علي بيتك ومتخافيش انا عمري مش هوافق علي جوازي من جوزك ابدا .
حنان : عارفة يا ريم انا مش مقصرة مع منصور ابدا لكن هوه اللي عينه زايغة !!
ريم : يا حبيبتي هو عينه من البيت مش مني انا .
حنان " بدموع " : لا يا ريم ، مش البيت وبس ، هو عينه منك ، ده حتي سواعات بيغلط في اسمي وبيناديني باسمك !!!
ريم : متزعليش يا حنان ، لما ييأس مني مش هيكون في دماغه وقلبه وتفكيره غيرك .
حنان : عارفة يا حنان الشئ الوحيد اللي يبعد تفكير منصور عنك انك تتجوزي !!
ريم : اتجوز !!!!! بعد المرحوم صعب قوي يا حنان !!!
حنان : مش صعب ولا حاجة ، انتي مسيرك هتتجوزي خصوصا انتي ولا مربوطة ب عيل ولا تيل .
ريم : مش عارفة !! الفكرة نفسها صعبة عليا ، رغم اني هقولك سر .
حنان : قولي يا حبيبتي .
ريم : بس اياكي تقولي لحد !! انتي عارفة ممكن يعملوا فيا ايه !!!!!
حنان : متخافيش يا ريم سرك في بير .
ريم : انا قابلت واحد في القطر وانا راجعة من مصر وحسيت اني ارتاحت له و قلبي دق .
حنان : عنجد ؟؟ ثم ضحكت وقالت : بجد يا ريم ؟؟
ريم " تبتسم " : ايوه بجد ، بس خلاص راح لحاله !!
حنان : ليه ؟
ريم : ليه قلبي دق له ولا ليه راح لحاله ؟؟
حنان : الاتنين .
ريم : قلبي دق له ليه معرفش !! معرفش ليه حسيت انه شبه المرحوم رغم ان شكله مختلف خالص !! لكن حسيت وهو قاعد جنبي بنفس الاحساس اللي كنت بحسه وانا جنب المرحوم !!!
حنان : وبعدين ؟ اتكلمتوا ؟؟ اخد رقم تليفونك ؟؟ قوليلي ايه اللي حصل ؟؟
ريم : اتكلمنا كلام عادي بحكم طول الوقت اللي قعدناه في القطر ، وبعدها نزلت من القطر وهو نايم .
حنان : نزلتي بدون ما ياخد منك رقم تليفونك او اي وسيلة يكلمك بيها ؟!!!
ريم : ايوه .
حنان : غلطانة يا ريم ، كان لازم تسيبي له باب يوصلك منه مادام ارتحتي له !!!
ريم " تضحك " : لو عايز يوصلي بجد ومن قلبه هيعرف يوصلي .
حنان : كيف ؟؟؟
ريم " تضحك " : دي شطارة اختك ريم بقي .
حنان : قوليلي علشان خاطري هيوصلك ازاي ؟؟
ريم : لو فعلا كان مهتم بيا هيوصلي وهتعرفي وقتها ، انما لو مش مهتم مش هيعرف يوصلي ، و ساعتها مش هتفرق !!!
في القاهرة
في المدرسة
يجلس علاء مهموما شارد الذهن !!!
يأتي زميله عمر ويلاحظ عليه هذه الحالة ...
عمر : مالك يا لولو ؟؟ مين مزعلك ؟؟
علاء : لا ابدا مفيش حاجة .
عمر : مفيش ايه يا راجل !!! ده انا واقف جنبك من ربع ساعة مأخدتش بالك مني !!!
علاء : معلش كنت مشغول بحاجة .
عمر : عارف يا علاء لما تتجوز زيي كده مش هتلاقي وقت تسرح فيه زي دلوقتي!!! مش هتلحق تبص حواليك من المسئوليات اللي هتكون علي كتافك .
علاء : يا عم بس انا اتجوز وساعتها يقوينا ربنا .
عمر : ولما انت عايز تتجوز ايه اللي مانعك ؟!! ده انت حتي قايل انك جاهز من كله !!!
علاء : اللي منعني يا عمر اخواتي البنات وامي بتقولي هتتجوز ازاي واخواتك كلهم بعد ما اتطلقوا واحدة ورا التانية قاعدين في البيت !!!
عمر : يا عم ما اتشوفلهم عرسان ؟
علاء : انت عب.يط يا ابني ؟!! هروح لواحد واقوله تعالي اتجوز اختي ؟!!!!
عمر : و افرض قابلت بنت الحلال هتعمل ايه ؟ هتضيعها من ايدك علشان مستني اخواتك ؟!!
علاء : ما انا قابلتها فعلا لكن للأسف .
عمر : استني استني يا لولو ، قولي بسرعة هي مين ؟؟ مس ميرفت ولا مس نادين ؟؟
علاء : يا عم دول في وشي كل يوم وكمان مينفعوش ، اللي انا قابلتها حاجة تانية خالص .
عمر : طيب احكي يا عم هي مين وقابلتها فين وايه اللي حصل ؟؟
علاء : قابلتها في القطر وانا مسافر لعمي في الصعيد .
عمر : وبعدين ؟
علاء : اعجبت بيها جدا واتكلمنا مع بعض وحسيت ان قلبي فعلا دق وقولت هي دي صاحبة النصيب اللي ربنا هيعوضني بيها ، لكن للأسف !!!
عمر : للأسف ليه ؟؟
علاء : نزلت من القطر وانا نايم قبل ما اخد رقم تليفونها او اعرف اي وسيلة اتصال بيها !!!
عمر : ده انت غبي !! متزعلش مني ، ازاي يجيلك نوم في الوقت ده ؟!!!
علاء : هي كانت تعبانه ونامت وانا نمت بعدها ولما صحيت كانت نزلت !!
عمر : انساها يا لولو .
علاء : ليه ؟؟ حرام عليك ده انا مش عايز انسي كل لحظة عدت عليا في اليوم ده .
عمر : البنت دي لو كانت اعجبت بيك او اهتمت بيك كانت سابتلك رقم تليفونها او اخدت رقم تليفونك علي الاقل قبل ما تنزل !!
علاء : ماهو ده اللي هيجنني !!!
عمر : انسي يا صحبي ، يلا علشان تروح الحصة بتاعتك .
علاء : اللهي يسد نفسك زي ما سديت نفسي يا بعيد .
عمر " يضحك " : استني يا علاء نسيت اقولك حاجة مهمة .
علاء : قول .
عمر : استاذ رؤوف موجه اول اللغة الانجليزية في الادارة والدته توفيت والمفروض تعزيه .
علاء : هي امه كانت لسه عايشة ؟!!
عمر : يا عم الاعمار بيد الله ، المهم اوعي تنسي تعزيه ليحطك في البلاك ليست !!
علاء : انا هتصل اعزيه دلوقتي لانسي وتبقي مشكلة !!!
اخرج علاء هاتفهه و ظل يبحث في الاسماء ..... ر ر ر ر ر ... ريم !!!!!!!
كاد يفقد وعيه حين نظر الاسم امامه في هاتفهه !!!
هو لا يعلم من لها نفس الاسم غيرها !!!!
ولكن هل حقا هو رقم هاتفهها ؟؟؟
و كيف وصل رقم هاتفهها الي هاتفهه ؟!!!!
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق
فضلا اترك تعليق من هنا