رواية عاجر الفصل الحادي عشر 11بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الحادي عشر 11بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الحادي عشر 11بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_ ١١

كاعدة على نار وروحي فايرة فور 

خابرته شكثر اخر شي انسد التليفون ..

اني من انسد وكام يطلعلي الخط مغلق غوشن عيوني من القهر 

معناتها طفر ! 

خلاني امن بيه واثق واعتمد عليه ومن وصلت للصدك سد خطه وطفر 

دخيلك يالعباس تشوفه شسوا بيه .. مسلمته بيدك ها يالعبااااس 

اريد اتطلع حوبتي منه 

الله لا ينطي ورطني وفلت منها 

وساعة الحجي اني واني ولا تخافين ولا تهتمين واني موجود 

وتاليتها عاف اخوتي حلوكهم تريد تتناوشني وتاكلني و دارلي ظهره 

وين الكل شحدهم واشك حلوك و العب واخبط واهجم 

يما ما لعب غير عليه الله ينطيييييي

للمغرب وكل خبر ماكو 

بس سهى خابرتها كالت عمي خذا اخوتي وراحو يهدون على محل حازم ويتكاومون وياه .. شصار بعد وشجرا ماكو خبر 

غير افتهم كاتل مكتول 

امداني وامدا قسمتي رحت اطلب مراد حتى يحل مشكلتي الاولى تعزيت وتصخمت وتبربدت بالثانية .. حظي مغناطيس مال مشاكل ماكو مشكلة ما يجرني الها. 

اجتني رسالة ( هذا الرقم متاح حاليا ) يعني فتح خطه 

بسرعة خابرته .. ما جاوبني 

رجعت خابرته .. انطى رفض 

يمه كمت الوب كون الزمه هسه وانام بخوانيكه 

فوك عمايله الشينة ينطيني رفض ويتهرب 

ورا ساعة دك اتصال 

بمجرد ما اتصل اني انهديت بيه : الله لا ينطيك ان شاءالله 

اتبريت منيييي يوم الحجي اني واني والزلمة ويا حجي الزلم تاليتك تروح فدوة للطنطة اقلها ما عافله مرة ورا ظهره وغدر بيها 

- طايحة الحظ هذا ياهو اليروح فدوة للطنطة من اجيج هسه واكسر ضلوعج احد يكلي ليش 

- اي اي طلع مراجلك عليه وانت اخوتي من سمعت بيهم كابين سديت تليفونك وطفرت مسلمتك بيد العباس ابو فاضل اليطكك بمكانك كوووو 

- ولج اني اليطكني .. جايج واعلمج ياهو اليطكه العباس 

لا ما افرك حلكج بسيييطة 

سده بوجهي واني كمت افتر والنار تشع مني 

يا يمه يا يابه كون يطيح بيدي والكطه بعضه اريح افادي منه 

رجعت اخابره وما يرد عليه .. هم كام يتهرب وما يجاوب يا يمه شيبرد كلبي منه .

ربع ساعة واندك باب العيادة .. 

اني فزيت من مكاني بس رجف كلبي كلت اندلوني واجوني .. 

رحت لباب العيادة كوة طلع حسي مبحوح واني اكول : منو 

حازم : فكي الباب بسرعة 

فتحت الباب بسرعة كالي : منو هذا اليروح فدوة للطنطة ولج 

- وليش سديت تليفونك وطفرت 

-طفرت منين بتل الاوادم اني اطفر .. تتجاوزين علي صبا 

-مسلمتك بيد العباس هو الباخذلي حوبتي منك اخوتي يريدون يكتلوني ومجمعيهن عليه كلهن وحدة وحدة وانت ماكو 

حجيتها بهضم وعيوني دمعت 

- ولج انت ليش رعنة 

- ميل مني لو زلمة صدك تروحلهم مو تجي علي بلكت تحضالك بختلة 

- اختل ويامن وجه الجريذي هو انت وجه ينختل وياه 

- لا تغلط وامشي اطلع برا يلا عايفهم يتوعدون وجاي علي 

- ولج منو العايفهم مو رحتلهم 

- رحت لمنو 

-كبور اهلج 

- لا تغلط واحجي عدل وين جنت 

- دمسحي دموعج واكعدي ام دميعة صايرتلي فاندام يمي وتلعلع يوهم حرام دجاجة هم الدجاجة تطلع راسها تتنوع الا انت الشردتي هنا وختلتي عمت عينج 

- وتريدني انتظرهم يذبحوني مثل الدجاجة 

-وشفايتلنا اقلها نسويلنا ثوابات ونتعشى بس حتى فايدة مثل الدجاجة ما بيج لحمج مر مثل طبعج 

-انت عود شني جاي تقلد وتضحك واني النار مشتعلة بيه 

-دفوتي منا .. فوتي اقلد ام دميعة 

-وشعرفك اني هنا 

-وانت شايفة روحج المرأة الغامضة ؟ وين تولين لا لبيتج تكدرين تروحين ولا عد عمج تبقين مالج غير تجين هنا . 

- ها ومن انت ذكي وتلكفها طايرة ليش ما ترد من اخابرك 

- انت بطرااااااانة ورب البطرانة شو كعدي 

-بطراااانة ليش لان ردتك تطمني عفتني مشتعلة نار ومشيت 

-هسه تبجين ليش مو هالاجيت اطمن 

-بس ما رديت 

-اي غير ما جنت بوضع اكدر ارد 

-وشنهو وضعك الما تكدر ترد بيه بالله مثل حالي متوعديلك يكتلونك لو شنو 

- منو يتوعدلج ومنو يكتلج واني موجود غير احش راسه وعلي كتلج كافي لا تبجين 

- ميل .. وخر يلا 

ابتعدت واني امسح بعيوني بحركة واديه ترجف 

حجه : مسلمتني بيد العباس مو امس تصيحين ناخية الحسين يحفظك واليوم تسلميني للعباس شني زلم العالم لعبة عدج توزعيهم بكيفج 

-حازم عليك الله كافي والعباس كلبي خلص من الخوف وكلي شصار 

- يخسى الخوف اليجيس كلبج يابعد حيلي وعلي ما عايفج وراي بس جنت ويا الزلم وسديته لان كلساع تخابرين واني كاعد بنصهم مو مالت ارد واحاجيج 

-وشسويت 

-شسويت رحت على محل امل تعاركت وياها وكسرت وخذيتها لاهلها طلكتها وطلعت 

- طلكتها !؟

- جا اني اخلي مرة خطت بلا علمي ومشت لبيت زلمة تتهمني كدامه وتتهم عرض العالم واعوفها على ذمتي شبيه مسودن نعل ابوها لابو خيرها 

-وشصار 

-هسه جيبيلي ماي حلكي نشف خاطر اسولفلج الصار 

مسوية جاي .. 

- دسولف 

-شسولف اطيني امية الله الاحد شني كاتل الحسين ومحرمه علي الماي 

- خو باللسان تاكل الوادم وتشربهم 

اندارت تجرله بطل مي من الثلاجة الصغيرة وهو يكللها : هالطبيك من هالغليك ما تشوفين جابج علي تشابهيني باللبگ 

اخذ بطل المي من ايدها وهي تكله : وطلاكك بالله بيش يفديني وياهو ماتي الطلكت والعفت اني اكلك اخوتي وانت تكلي طلكت مرتي 

نزل البطل : انت ليش هيج بصلايتج محروكة 

- طالعة عليك 

- اذا اني اشبه هالحسن والجمال عمي اكوم بعد ما اتحاجه وامشي واتشيم ع الناس 

- كبل شوية تكلي وجه الجريذي وهسه كاعد تلوفها عود صاير كلاوجي انت 

- التريدينه مني شنهو احجيلي 

حجاها وهو يسد البطل ويكعد ع الكرسي 

- الاريده شني اكلك اخوتي متخلفيلي وانت يا برودك تكلي احجيلي غير تروح عليهممممم 

- واني وين جنت 

- يعني رحتلهم 

- جا اخاف منهم 

- جا ليش اتعل افادي احجيييي كلي شصار 

- الصار خذيت واحد من عمامي ومسيت على عمج 

- اي لكيت اخوتي 

-والله شكيتيني باخوتج وهم حضاين واحدهم ما بيه لزمة 

- واني كتلك بيهم لزمة تباهيت لو شاردة منهم بس غير متحلفيلي 

-خوش زلم ويتحلفون شمالج غير اشكهم شك 

- جا انت خوفك من العار والمو زلمة لو زلم صدك ما اخاف منهم 

- لا تخافين جا اني يمج قابل عايفج 

- غير اعرف شسويت وياهم 

- تعاركت ويا جعفر وكعدنا حجينا وبررت الموقف وهاهية كمنا وطلعنا 

- بس ! 

- جا بعد شسوي شنهو المطلوب مني ؟ الاكدر عليه سويته ورحت 

قابل خايف 

- اني ما كلت خايف بس تبريرك شراح يقنعهم 

والله ما يعوفوني ويبقون متحلفيلي 

- اكص اركابهم والله اليجيسله شعره من مرتي 

عقدت حاجبي : مرتك شني حازم تلعب علي انت لو جاي تنكت ترا وعلي كلبي خلصان

ابتسم : لو خلص گلبج اديرله من حيلي 

انا رحت لعمج وكلت له رايد البت زوجة الي على سنة الله ورسوله . 

حجاها وكعد رجع ظهره للكرسي واني تبسمرت بمكاني اباوعله بتفاجئ : صدك والله ؟ 

ابتسم وهز راسه : تظنين ارضاها على روحي اتكتر وانت هاذ حالج شاردة واختج شادين حزامهم عليج ؟ اطم روحي لو اطيت كلمة واتراجعت بيها وانا كتلج وراج والله ما اخليج اتطيحين 

رحت لبيت عمج وكعدت بنصهم ولو ما الزلم تكضني اخيج هذا المتكوي اعليج لا جا كضيته وشكيته بس طلعوه من الكعدة .. وحجيت وعبت اللي عابج ونزلت روسهم ورفعتج كبالهم وطلبتج . 

دمعت عيوني 

اريد كلمة تطرى على الساني ما جانت روحي تعبر غير بالدموع 

كال : اهووو هسه راح تكلبها دراما وتترومس وعود متأثرة خايبة دكفي دمعج كفي جنج سماعيل ياسين من تبجين 

ابتسمت واني بنص دموعي 

كمت امسح بعيوني حيل .. واسأله : ووافقوا 

- عمج ما اطى خبر كال هاي اشوف اخوتها واردنلك خبر خو ما نلكى احسن منك نناسبه . 

- ومجبور على قرارك هذا لو لان صارت الهوسة 

- اي غصبوني مو برضاتي خو عمي طكاني علابيه الا ارضى اتزوج 

خب انت شمالج !؟ مجبور شني 

- انت كبل شهر كلتلي اني ما رايد اتزوج رايد الم بيتي واعيد امل لدربي 

-ان حضر الماء بطل التيمم 

- يعني شنو ؟ 

- عليمن اضل اعل بروحي واتوسل مرة مالها نية تنصلح واني لكيت بت الاصول التكدر تصلح امري وامر بيتي .. لو ما تكدرين ؟ 

- ما اكدر شنو 

- تعرفين وضعي انا زلمة راعي اطفال واطفالي يصلون عدي وابيتي ما اردهم لامهم تكدرين تراعيهم وتساعديني بيهم  

- شساعدك هم واحد جبير ما يتعب واني اختلطت وياهم حبابين 

- مو هيج بس رايدج تصيرلهم ام 

- لو رضوا يا بختي هاي امنيتي من الله اصيرن أم 

ابتسم وهو يرجع راسه للحايط يباوعلي بتأمل 

حجه : جوعانة 

- هو اني ضلي حيل احس بيه جوعانة لو عطشانة 

- دكومي خل اخذج اشتريلج شوف شتريدين عشا خاطر اردج لبيت عمج 

- ارجع لبيت عمي شلون هو عمي كام يتحلفلي وياهم 

- جا تظلين هنا ؟ 

-ولو كتلني 

-يكتلج ليش وشمسوية 

-وهم يصدكون رايديلهم حجة عليّ 

-وبضلتج هنا تطيهم الحجة وتثبتيها على روحج الا اذا انت ابيتج ماكو و رجعتي لعمج منو راح يصدكج من تكليلهم شردت للعيادة ؟ 

وهم مو اغبياء من طلكت مرتي وجبتي عمي واجيتهم وهم ما كايليلي شنو السالفة راح يعرفون اني منين عرفت وتحركت وتوجهت الهم واذا بقيتي هنا معناها تثبت انا ماخذج ومخليج عدي ارجعي لوحدج صبا ولا تزيديها على روحج وتحمليها هاليومين تنفض كلشي 

-اكيد 

-بحيل الله ، يلا بويه ترا اليوم طفت عكا ومكة واني جدامي مجدمات بالعباس كود ادوسن عليهن من التعب 

-حاسة بيك رجلية هم هيج من تعب الخدمة والمشي 

-ديلا لبسي عباتج واستعجلي 

واكلج شغلة ما طولنا راح نتزوج 

سالفة تنزعين العباية وتلبسين جبة ما ارضاها 

احنا الزلم تغرينا الجبة اللازكة على جسم المرة اكثر من لو جانت عريانة فمن هسه اكلج جبتج الاثريها نكعيها و دفنيها وشي ميها . 

- من هسه بديت باوامرك عمي اتراجعت ما اريدن 

- هاه يعني الجبة اعز مني 

سكتت حجه : لا لا شو جاوبي 

شو ارجعي ارجعي خل نتفاهم عمي طلعت الامور مو زينة 

ياهو الاهم انا لو الجبة 

-تحط عقلك ويا جبة 

-لا شو حاط عقلي وياج وما تلبسيها ومو على كيفج وهذا امر .. يلا . 

- دكتاتوري شو صرت. 

- كلش 

حجاها وهو يجر سبحته ويكوم يفتح الباب : تعلمت منجن الما يصير دكتاتوري عليجن بعلي تاكلنه وتشربنه وتسيبن 

- يا دهر 

- والله وعلي .. دمشي امشي

اطيني المفاتيح .. عدج شي بعد 

-لا ، بس حازم احس بروحي خست تعب الزيارة بجسمي وما سبحت واحتاج ملابس من البيت شلون !؟ 

- تعتقدين حيدر هسه بالبيت لو لا ؟ 

- لا اعتقد حيدر طالع وهو اساسا باجر راح يرجع يلتحق 

- زين نروح للبيت تاخذين ملابس وتطلعين 

- تكدر 

- جا شعدي 

-مو محلك 

-حاط بيه عامل وابني وخابرت على اخوي محمد يكعد بيه اليوم بين ما احل مشاكلي 

حجاها وهو يقفل العيادة 

نزلت بعباتي بوجهي لسيارته 

طلع بيها وكف كدام كصابة ومشويات كالي : شتاكلين كباب لو معلاك 

- بكيفك 

نزل جابلي ماعون مشويات كباب ومعلاك وصمون وزلاطة 

راحت روحي من شميت الريحة .. متحملت فتحته سويت لفة كباب واطيتها اله كال : دكلي هسه انت واشبعي واني سهلة 

- واني وين اكدر اكل هذا كله داخذ 

-مشكورة 

اخذ من ايدي سويتله اللفة الثانية وحطيتلهياه على صفحة وكمت اكل بالمعلاك اسوي وهو يسوق وياكل .. صف كتله : شكو ؟ 

- دقايق 

دخل مطعم طلع وهو جايب كلاصين جاي 

حجه : هيج يلا يكعد راسج مو 

- ايييي رحم الله امك وابوك 

اخذت رشفة وهو حار ومهيل صحت : افيييييش يا يمة 

ابتسملي وهو يباوعلي بالمرايا : هني ومري الف عافية 

ابتسمت واطيته اللفة الثانية كال : لا اكلي شبعت 

- ترا اكو كومة واني اكلي تنقيش هاك 

-لا لا اشبعي 

- دهاك يمعود راحت ايدي 

حجه وهو ياخذ من ايدي : جا مو سلمتيني للعباس مساعة شو هسه هاك وتزقين بيه 

-بعد مو يكولون لكل حادث حديث 

- جا ولو طكني العباس هسه ومتت 

- يا اسم الله شمالك لا تحجي هيج يحفظك علي 

- اكلج شني لعبة عدج اني ساعة موديتني للحسين ساعة مسلمتني بيد العباس ساعة تحفظيني بعلي 

-اهووو راح يستلمني وينصب عليه 

ضحك بصوت عالي ومشى شوي غاد عن البيت 

نزلت باوعت سيارة حيدر ماكو دخلت بسرعة اخذتلي هدوم .. 

بس صينية اكل بالكاع مو مال نفر كلاصين و بطل بيبسي باثي بيه جعبية وخاشوكتين .. تنهدت اخذت هدوم وطلعت 

مشيت ضليت ساكته الطريق حجه :هكو شي شو رسومج تغيرن 

-شاكة حيدر يجيب احد بالبيت او بالاصح وحدة 

- جائز هو شاب وما متزوج والبيت فارغ مو بعيدة 

-جا وسمعتي ما يفكر بيها من يجيب نسوان للبيت !؟ 

- تستغربين وهو مسوى الاصخم منهن مثل هيج عار شتتوقعين منه.

سكتت لحد ما قرب يوصل للداخل اختنكت 

دخل بالفروع القريبة من بيت عمي وكف كال : يلا يابه انزلي وشما يحجون سكتي خليها تفض وتكضي على خير 

هزيت راسي وانداريت الم واحر بعلاكتي حجه 

: صبا بيج شي 

مختنكة حيل وجاوبت كوة طلعت مني كلمة الـ لا 

رد : هي شني اللا وحسج مختنك بيج شي كولي 

- مالي حيل اواجه وابرر واحجي 

احس بروحي تعبانة حيل ومالي حيل اتجرع تهديدهم وخوفي منهم 

- وليش تخافين اني مشيت كبلج حجيت وبررت كلشي 

- كبالك شي ووراك شي ثاني 

ما بودي ارجع وخايفة 

- تريدين امشي وياج واوصلج 

-تخربها معناها صدك جنت وياك 

- اي جا ناهبج اني غير طالبج منهم على سنة الله ورسوله 

-تعرف هالامور ما تصير وما تمشي عدهم 

- اي جا شسوي اخليج تروحين ودموعج بعينج 

- الله كريم يلا اودعك 

- راح اضل يم التليفون انتظر اتصالج 

هزيت راسي ونزلت اخذت علاكتي وبالفروع مشيت لبيت عمي 

دخلت هو بالدكان ... فتت للدوانية كبل عمتي كاعدة محد موجود اجا عمي : وين جنتي ولج 

دفعت العلاكة مال الهدوم واني اجر بشالي : رحت للعيادة كضيت شغلي ومشيت للبيت جبتلي هدوم واجيت 

- هسه من اكضنج واكتلج وابرد كلبي بدمج احد يكلي ليش 

ما جاوبته عمتي ردت عني : هسه الزلمة براها وهي تصيح ما غلطانة وياه و خطبها بعد هالصياح والمشاكل هاي شنهي اطو البت وخلصوها من جوركم خل تسوف وجه الله اطوهاااا 

- وانا كايل لا الود ودي هسه اخابرنه واكله تعال كبعها واخذها وافتك من هشكولات  بس غير هذا جعيفر 

حجيت : وجعفر شرايه بالموضوع 

- شنهو شرايه غير اخوج الجبير وجعفر ما راضي يطيج الحازم 

- يتهمني بيه بس ما راضي يطيني عود ليش !؟ 

- عبن تعاركوا وصاروا دمايا من حدر راسج يا طايحة الحظ 

- واني شسويت عمي انتم ليش تكثرون الحجي علي وتصدكوه عمي اخذوني للعباس الزمنه واحلف اذا اني رحت لغير الزيارة والخدمة ما عدي شي ويا الزلمة وما غلطت وياه انتم تتهموني باطل ليش مو عرضكم اني 

- وعلى يا مال يدفعلج سحب ويطيج فلوس ولج 

- صار اليساعد متهوم عمي الزلمة شافني محتاجة واطاني فلوس خمس واستشرع كالوله ما طول يتيمة ومحتاجة ومالها معيل مستحقه وكام يدفعهن عني من فلوس الخمس 

من ما ترضون احد يتصدق علي جا وينكم عمي 

منو درى عني اكلت شربت بردت احتاجت ، اخوي اكله ما عدي فلوس اطيني فلوس مسواك يركع ويكسر بالغراض وراح التحق وما انطاني ربع دينار .. جا ما خاف من عافني ابيت وحدي بلا اكل ولا شرب اسوي الحرام واشبع بطني اخوي ما خاف علي من الدرب الأعوج 

- انجبي واكلي خر* ولج تمشين بدرب الحرام شحدج 

- جا من ما مشيت تتهموني ليييش 

- عبنج طايحة حظ وما استحين بت انت اكعدي ابيتج واسكتي شنهي طلعة شنهي شارع 

- وشطلعني للشارع غير ضيمي شو من اجيك اكلك راح اطلع ومحتاجة تكلي كلعة مردي ما تكلي هاج عمي هاي فلوس شبعي بطنج لا اتطلعين انت بنية واخاف عليج شو بس بالتهايم حاضرين 

- اسكتي ولج اسكتي بعد الج عين وتحجين هساه المفروض متعاونين اني واخوتج ودافنينج على فواينج وبعدها تعلي بحسها وتحجي 

-ما طولني ما مسوية الغلط احجي ليش ما احجي شنهي عيني مكسورة واسكت 

دمغني على راسي : اسكتي اكلج اسكتي 

بعدت عنه وهو يهدد : اصلخج والله وادفنج هنا طايحة الحظ 

كعدت عاكدة وجهي والدمعة بعيني 

دك تليفوني سهى رديت وعمي يحجي : ها سهى 

ابيت عمي .. شصار الزلمة براني وحجه الحك وطلبتي منهم واخوج ما يرضى 

سهى شمدريني ليش ما يرضى خابري واتصرفي وياه انت لإن والله طكت روحي ولو ضل الحال هيج ما اتحمل واطك والعب جولة والله 

متت شو المو شريفة كلها تهابها وتتحمدها وتمدحها 

واللازمة شرفها وصاينة روحها يا شايلينها يا راكعينها 

شو اريد اعوف الشرف واصير مو زينة 

بلكت يكعد حظي وارتاااااح 

دفعت التليفون ودنكت ابجي .. 

وعمتي تكلي : ميخالف بتي اتحملي 

-والله يا عمة كرهت كلمت التحملي و اصبري جزعت 

شنهو السويته وملتمين اليوم يريدون يغسلون عاري 

العباس يشهد ظهري هاذ انكسر بخدمة ابو عبد الله 

شعره من راسي ما طلعت ومكبعة من فوك لجوا وكتله خوية عوفني ارد وحدي ما خلاني جيف صار انفجار .. عمي لو رايحة ومفجورة اخيرلي من هالظلام ذول 

حجيتها وكمت وهي بعدها تواسيني .. 

مشيت لاحمام حطيت هدومي وغسلت وزحت تعب الزيارة والضيم الشفته بهالايام .. وتوضيت وطلعت من الحمام 

حطيت السجادة وصليت صلواتي وكعدت افر السبحة بالصلاة على محمد وال محمد وبالي تايه وروحي باهتة وشي بالنفس طافي .. 

اصعب شي تواجهه الروح الظلم

وانو ما عدها القدرة على مواجهة هالظلم 

لا يخلوني اعيش ولا ينطوني ويخلصون مني .. 

اجاني مسكول شفت جهازي لمض 

اخذته حازم وداز رسالتين 

ها كون حاچوچ 

بالي يمج 

تركت التليفون ولميت السجادة عفتها على صفحة 

وجريت المخدة حطيتها ورا ظهري وانتجيت للحايط عمتي كاعد اتابع محاضرة للسيد الفالي .. وضليت اتابع وياها بغير روح .. 

خلصت المحاضرة والقناة كامت تعرض قصايد 

فطلعت يا يوم اشوف اعتابك .. مرجعة راسي ع الحايط ومركزة ويا كلمات القصيدة لحد ما وصل الملا لمقطع 

ليالي الضيم باكن بسمة الشفة 

واسنيني انگضت بالحسرة واللهفة 

دمعت عيوني .. واستهضمت حيل واتجمع العبرة ببلعومي 

كصتني كص .. كمت كوه اتجرح النفس واني اجر الهوى من العبرة اللي ابلعومي .. ما رايدة ابجي واسمع كلمات المواسات من عمتي بس بنفسي ابجي اصرخ اطلع قهر كلبي 

لحد ما وصل المقطع 

اناشد ع الصبر ما ادري دربه منين 

خذن ثلثين حيلي مخلفات البين 

دنكت راسي بين رجليه وكمت ابجي بهظيمة 

هظمة اليتيم الماله احد يسنده وينصفه . 

كامت عمتي تحجي : هسه عليمن تبجين يا عمة حظج هذا بعد شتسوين حطي عينج بعين الله 

هزيت راسي وكمت .. طلعت بالحوش باردة كلش مكدرت ابقى بالحوش 

دخلت المطبخ .. حطيت الجاي ع ع النار واحاول الهي روحي فكمت انظف واحلف بالمواعين الباقية ع السنك 

طب رسول : ها اجيتي 

ما حجيت ، كاله : هو جعفر عود شنو معناتها يرفض وما يطي ما طول حازم خوش ولد وزين هو ياهو مالته 

- شلون بالضيم هو غريب وبالحكم هو اخوي .. وتعاي لازم تتبعين اخوج الجبير وتسمعين كلام اخوج الجبير واني اخوي لا شايفته ببرد ولا حر .

وكف يسولف وياي وكال : صبيلي جاي وياج 

صبيته وكعد يحجيلي على شغله البشورجة ووضعهم وهيج سوالف 

لحد ما صاحتله هدى .. مشالها .. 

المطبخ ما بيه فراش ولا كرسي .. جريت سفرة من فوك الكاونتر حطيتها جواي وكمت اشرب الجاي .. رج التليفون بجيبي 

طلعته رسالة من حازم .. ( طمنيني عنج ترا استلكت ) 

باوعت رصيدي ما بيه هواي .. 

والساعة ١٢ الا عشرة .. انتظرت لحد ما صارت ١٢ 

خابرته حجه : ها شني 

- ماكو شي 

- كون طكج لو اذاج عمج 

- لا بس جعفر ما راضي بالزواج 

- اتوقعت .. بس خلي عمج يلح عليه 

- اي 

- شبيج مقهورة 

حجاها دمعت بسرعة وتغيرت انفاسي كمت اجر بحشمي كال : شبيج كاعد تبجين ؟ 

صبا شنو سالفتج عمج يحاجي تبجين ليش 

- حازم قهر والعباس قهر بالفضيحة اجا يركض حتى يكتلني ومن سمع خطبتني رفض وما ينطي اي مو فضيحة انطيني واخلص السالفة ليش رايد يعذبني اني شمسويتله ليش يتقصدون اذيتي !؟ 

-عبنه عار شلون يصير العار بعد احمر اخضر 

اخوتج عارات وحضاين بالعباس .. بس تنحل وربج تنحل لا تخافين 

ماكو شي يصل على حاله لا تقهرين روحج 

سكتت 

كام يحجي : صبا والقران تشكين كلبي بسكوتج هاذ تذبحين ولج بابا لا تنقهرين انعل ابوهم خل يولون 

كامت دموعي تجري : من صفيت بالفرع اختنكت 

ما اريد ارجعلهم ما اريدهم 

روحي يمك غير روح اتمنيت ابقى وما انزل 

بس مفروض عليه انزل واشوف وجوهم واواجهم وادبغ حدر اديهم وظلمهم 

- اخ يا يابه يابويه والعباس لو ما العيب لا اطب اخذج من بينهم غصب عنهم وشيريد يصير يصير بس اخ يالعيب ادري العشيار واهل البخت راح يلومون ويحسبونهم علي زلم وناهب بت من اهلها 

كاعد يحجي طب عمي للمطبخ كال : ويامن كاعد تحجين 

-ويا سهى 

حازم : صخونة امي كون سوتني سهى 

عمي : صبيلي جاي وجيبيلياه وفرشيلي نعست من ضيمج اليوم افادي جل

-صار عمي 

حجيت : نحجي بعدين 

-ما راح انام راح انتظرج 

-زين 

سديت الخط وصبيت لعمي وفرشتله وفرشت لروحي بالدكان وترست القوري وحطيته ع الهيتر يمي ورجعت خابرته .. رد كال : يعابيج الله ولج سويتيني سهى ليش جا ولحيتي وشواربي 

تنهدت : جهالك وين 

- فرشوا كبل شوية وناموا 

-ما حاجوك شي على اللي صار ويا امهم 

- بس دنيا وكتلها بابا معليج بهالأمور افرشي لاخوتج وسدي الباب ادفو .

-هم خطية ذوله شالو اثم غيرهم 

-اذا امهم ما تنصلح شرد اسويلها جزعت منها 

يوم اللي تنصلح وتعوف شغلها هلا بيها بس بهالحال ما ارضاها 

فوك تقصيرها وسوالفها تروح تتهمني كدام الناس !؟ واتطلعني ناهب بت ولاعب بيها حجي هذا !؟ 

- والله ما ادري .. شتسوي بعد هي اختارت طريقها 

-بس اني ضالة ابالي شغلة 

-شنو هي ؟ 

- ما ادري حاير امل منين تعرف جعفر اخوج ؟ ومنين تندل بيته ؟ 

- سألت ومشت 

- وتسأل منو !؟ الا تسأل عمج عبن عمج المعروف بالمنطقة مو انت ولا جعفر .. اليريد يعرف احد من كرابتكم يروحله صح لو لا ؟ 

ومن الاساس هي ليش ما راحت العمج مو انت معروفة بالمنطقة بت اخو الحجي راضي !؟ 

المدوخني ليش راحت لجعفر ما راحت لعمج ؟ 

- ما ادري وشنو الفرق 

- امل لو رايحة لعمج جان كل هذا ما صار الزلمة يعرفني ويعرف اهلي وما يصدك الكلمة الشينة علي وجان رد امل وخابرني وحل السالفة بدون هجمان وصياح ومذابح ... 

- تلاكيها عرفت عمي يطمطمها وراحت لليفضحني 

- اي مو هو هذا الدخت بيه منين عرفت اخوج ومنين عرفت مكانه اذا ما سأله عمج !؟ اني هسه اذا تكليلي اخذني لبيت اخوي ما اندل بيت جعفر امل منين اندلته !؟ 

- ما ادري شو خوفتني 

- لا بابا هيج يمعودة بس كاعد افكر .. لا تشغلين بالج عوفيها ختولي .. 

سكتت تنهد وحجه : اليوم كلش مقهورة 

-لان وصلت حدها وخلصت كل اعذارهم عندي 

جنت ابرر مرته ما تريدني لو ما عنده يصرف علي 

لو اكول الحياة تلاهي وكلمن حاير بضيمه شعليه يحتار بضيمي قابل مخلفني .. واحط وابررلهم وامحي البكلبي وما اضل شايلة لا عليه ولا على حيدر رغم كل سواياتهن بس اليوم خلصن بروحي كل اعذارهم وسما ادور عذر واكول ليش يرفض الماه يكرهني مالها مبرر ثاني 

-ليش اتعبين روحج بالتفكير 

-معطلين حياتي حازم جان هسه اني ابيتي نايمة ومرتاحة ودفيانة و ولو موافق جان هسه كاعد اضحك وياك وطايرة فوك الغيم مو هذا حالي نايمة بدكان وطارديني من بيتي 

-رجعي لبيتج باجر واستقري ومالج غرض بيهم 

-هو اساسا حيدر راح يلتحق باجر او الفجر وامشي بس الدكتورة التنوب راح تداوم ولازم اضل بالعيادة وياها 

- كلش كاعد اكره روحي واني عاجز ما اكدر اسويلج شي 

يمتى اكدر اكلج نامي وعوفي الهم على اجتافي اني احيرن بيه واشوفج مرتاحة 

اخذت نفس عميق وتنهدت .. 

- اليخفف عليه كل هذا انت موجود 

هم خلف الله عليك متقاسم وياي همومي وجاي تسمعني وتهتم لامري 

- خلف الله عليّ شني .. انا ما اتقاسم وياج يا صبا انت سكنتي بنص روحي اليجيس روحج يجيسني ويهضمني .

دمعت عيوني 

حجيتها بخنكة : لا تطلعني ضمني بروحك مالي مكان بهالعالم غير بيك . 

- اسكيج من روحي لو مرح عطش .. لا تضوجين عليج العباس والله احلنها الج بس اطيني وكت لو ما رضوا اجبرهم 

- شلون 

- بالوكت انا مو صغير واعرف شلون اخذ الاريده بس مو كلشي نريده يحصل بسرعة الاريده منج بس تثقين بيه وتضل ايدج بيدي لا تبعدين ولا تفلتين 

انداريت بفراشي وتغطيت ووكعورت روحي بفراشي وغمضت واني اتحسس شعوري واحاول بصوته اتخيله موجود وادفي روحي واطمنها بوجوده : خليني يمك 

- يمج وحواليج.. نامي ريت الضيم لا جاسج 

اخذت نفس وكمت ادفن راسي بالمخده واستشعره 

وهو يحجي بهمس : منين طلعتيلي 

اتزوجت وانا عمري ١٧ سنة لا انا صاحب علاقات ولا بعمري عرفت الحب ولا خطيت بدرب النسوان .. وعشت بالمودة والرحمة ويا الراح .. هالشعور الجاي اعيشه وياج غريب غريب حيل 

اگل لروحي يا روحي حرام شمالج نسيت العيب والحرام ومكابلة مرة غريبة تعيشين وتتنفسين بصوتها استحي .. والكى روحي لاهي بامري ولا دايرة عني هايمة بهمج وجايسها ضيمج وحايرة بيا طريقة تحويج والي وتلمچ . 

... كمت احس حجاياته مو كلام عادي 

مطر زخ بعد عاصفة مال تراب شوهت كلشي بروحي ونزل عليها المطر وغسل ترابها وهدت روحي بكلامه .. وهمت . 

غفيت واني امرجح نفسي باحلامها وامنها بصوته وحجاياته . 

ثاني يوم .. كعدت الصبح ويا عمي وكمت اسويله ريوك .. اجتي عمتي .. كتلها : فدوة لعينج احجي ويا عمي يحاجي جعفر 

- ابالي والله يا بتي كبل لا تحجين .. بس نكعد احاجي 

حطيت صينية الريوك العمي وكعدت عمتي تحاجي 

يكللها : جا اذا اخوها ما يرضى اني شبيدي 

- شبيدك شني غير عمها انت والمسؤل عنها 

- واني الي حيلهم معاركهم وصياحهم لا هي ولا اخوتها ينجرعون 

- زين اقنعم انت موش تعرف حازم وتعرف اهلها وخوش اوادم اقنعهم يطوها ولا يوكفون بقسمتها 

- حجيت وياه امس يكلي لو يضل بس حازم بالدنيا يا صبا ما اطيها اله 

صبا : وشيريد مني عمي ترا جزعوني وعلي ما يصير هيج 

لا اطيك ولا اخلي رحمة الله تجيك شنهو اليريدونه اخوتي 

من باب يصيحولي العزبة والمطلكة وعيب وفضحتينا ومن باب ما يرضون يطوني .. شيريدون . 

- جيف حازم تعارك وياه وغلط عليه حازم هم دخيل بختك انت حاي تخطب لو تعارك 

عمتي : جا تهامينه الزلمة ورايدين تكاومونه وجعفر ما يكض السانه شنهي الوادم كليلة شر وجعيفر متوليها يشتم بهاذ ويسب بذاك ويغلط وما حاسب حساب احد اباله جان كال عيب جورة عمامي وخاف عمي يتفاشل ويا جيرانه ما يستحي 

- ما يستحون وربج لا يستحون ولا يخجلون .. واني جل كلبي منهم حتى هاي طايحة حظ مثلهم ومبتلي بيها بلوة 

- جا انت ترد على جليلة الذنوب ما تكدر لذولاك تندار عليها 

اطوها وخلصوها من ضيمكم شنهي وليه خوما ولية 

سكت وكمل اكله وراح للدكان خابر على جعفر .. 

اجا جعفر الضحى يتكلب يكله : والله لو يضل بس حازم بالدنيا ما انطي مرة 

عمي : وشنهي قصور حازم الزلمة اكرمنا وجانا وبرا البت ورادها على سنة الله ورسوله جا شيسوي بعد والرجال نعرفه ونعرف اهله  ومعدل وعده بيت واموره مستقرة وحتى مرته طلكاها شنهو البيه ونرده اطي البت وخلي توالف قسمتها 

- ما اطيها والله لو اعرف ادفنها لو اطيتها يا عمي ولو ثنيت على كلمتي والعباس اسويها دموم 

دخلت عليه كتله : لا تطيني ولا رايدة منك شي غير بس اعرف شنهو السبب ما رايدة بس سبب يبررلكم بروحي ليش توكفون بحياتي 

- هيج شلة حال 

- وعدوتك اني وتشل حالي جا مو اختك مو كاعد تحكمني جيف اختك رايد شلة حالي ليش ؟ 

- امشي مني زين مني كاعد وما دافنج على سوالفيج الطايح حظهن 

- شنو سوالفي كلي شفتني كو*** لكيت احد احد وياي وكلت سوالفي .. لازمني ويا واحد بشي مو زين وعبتي ولك مو انت اخوي تطعني ليششش 

- لا تفشرين لا اكوم اكسر اسنوووونج والله طايحة الحظ 

- جا تطعن بيه لييييش اشفت عليه غير تكليييي صدكت الغرب وجذبتني لييييييش 

كام من مكانه : شتريدين ولج تريدين حازم 

كاتلة روحج عليييه 

- ما كاتلة روحي اعلى بشر بس رايدة تعوفوني بحالي 

لا انتم العايفيني اعيش ابيتي مرتاحة ولا انتم الراضين تنطوني وتسترون علي .. تكولون مرة ما يصير تكعد وحدها اي اطوني وخلي الياخذني يكعد وياي واخلصوا مني مو اني عار جا خلصو 

- تعاي لج تعاي على سالفة البيت منهو ذوله الخابرو حيدر ومانعين البيعة .. تروحين ويانا اليوم وتخابريهم وتكليلهم اني راضية ابيعة البيت لو ما كلتي الحجي هذا وخليتي حيدر يمشي بسالفة البيعة والله اكسر ركبتج 

- والله وروح الحسين ما اروح ولا ابيع ولا انطي بيتي ومن هاللحظة وجاي لا انتم اخوتي ولا احطنكم بحسباني 

هميت اريد اطلع وفز وراي لزمني من راسي .. 

وتولاني بوكسيات كامت عمتي وعمي يجروني منه .. 

يصيح ويفشر عليه بنص بيت عمي .. ميلاد وهدى واكفات والجهال 

واني عمتي ضامتني وراها بالباحة مال الدرج يم المغسلة .. دنكت غسلت وهو يكلي : والله فلا اخليج ترتاحين وحتى شغلج هذا لا ابطلج منه .. وحتى المكينة اكسرها والله واعلمج شلون توكفين بوجهي ساقطة ام الزلمممم 

كام عمي يصيح ويطرد بيه .. ودفعه من البيت 

ورد عليه هيج منج وهيج بيوم اللي الله بلاني بيج ما افتك من مصايبج اني خلفت ولد وبنات ما شكيت منهم ولا اذوني بكثرج ولج كافي جلي مني تعبتيني طايحة الحظ جوووزي مني 

اخذت عباتي وغراضي وردت اطلع وعمتي توكف بيه : لا تحسبين على عمج تعرفينه شكثر يحبج بس عصبي لا اتطلعين 

- ادري عمة ادري بس خل اروح لبيتي ما اتحمل هنا بعد 

- لا يلكاج جعفر غاد ويستفرد بيج اكعدي ولج عمه 

- عوفيني عمة الله يخليج 

جريت ايدي منها وطلعت ابجي بقهر من كل كلبي .. 

ركبت كية واطيت كروة ودموعي تجري واناشغ  .. العبرية يباوعون عليه 

صفنت .. الدكتورة  البديلة اليوم تجي والساعة ب١٢ يعني ساعتين لازم اني بالعيادة .. شعدي رايحة للبيت .. صحت نازل وكفت الكية .. جريت الباب ونزلت ورديتها وراي انضربت حيل .. 

وكفت وغمضت عيني .. 

مسحت وجهي باثنين اديه .. واخذت نفس عميق 

وانداريت عبرت للسايد الثاني ركبت كية ذبتني كبال العيادة مال الدكتورة .. صعدت و اخذت المفاتيح من جوا السيندانة وفتت .. كمت انظف واغسل .. اتصل حازم 

عفت الماسحة ومشيت ، سحبت التليفون : الو 

- ها عيني شو اخابرلج من الصبح ماكو 

- موبايلي جان صامت 

- شصار 

- ما صار شي شوية فشار وغلط ورزايل على كتل ودمغ بس .. ما صار اكثر 

- هاي منو وشوكت .. 

- حازم تعبت 

- منو بس كليلي منو ووين انت 

كاعد احجي واندكت الباب مال العيادة كتله : اجت الدكتورة الجديدة روح بعدين نحجي 

فتحت باب العيادة وما احس الا امل كبالي 

- شتريدين مني بعد 

- شبعتي بيه ؟ فاخت دوتج طلكتي وهجمتي بيته 

- اكلج اني يمج بكرباج .. اطلعي برا ولا وتشوفيني وجهج 

- ولج هجمتي بيتي وتريدين اعوفج لا ما ابرد كلبي بيج اليوم والعباس ما افك 

وانهدت عليه تعارك وتتمالخ وياي .. 

العيادة الكبالنا اجا ولد يركض كام يجر منها 

وهي تصرخ بوااااااااااااكة الزلم خذيتي رجليييييييي هجمتي بيتي ارتاحيييييتي الدايحة الساقطة ام الوووووولد .. 

كمت اتصايح وياها واكللها : والله لو بيج خير ما طلكاج 

انت الهجمتي بيتج بيدج .. اني ياهو مالتج بس ناقص الشرف علته الشرف ويلولح بيه 

اني كلتلها هيج وهي كامت تدك وتلطم وتملخ بروحها جرت عبايتها فكت حجابها والزلمة يصيح ويريدها تطلع من العيادة صعدوا ناس من جوا وهي تريد تجرني وتصيح : ولكم عوفوني ابرد كلبي بيها ام الزلمممممم 

وكامت تفشر افشار علني .. 

ما ينلبس عليه ثوب .. هيج عامل بيج وهيج راكبته وكلام ما ينسمع بالعريض .. 

جروها الرياجيل كوا ونزلوها .. 

جريت التليفون وخابرت حازم ، رد صحت : والله لو ما جيتها وخذيتها من باب المستشفى هسه لا العب بحالكم لعب 

- منو الاخذها وشصاير شكو 

- مرتك الما تستحي هجمت عليه للعيادة كتلتني وتفشر بالقلم العريض كدام الناس 

- بالمحل اني جاي .. 

سديته من عنده .. ولبست عباتي ووكفت برا صوتها لهسه 

العيادات والصيدليات الجوا كلها طلعت تتفرج .. وهي تفشر فشار مال وحدة صدك بت سوك وشوارع . 

صف سيارة حازم ونزل علي ابنه ومصيول اخوها .. 

هد وهو عصبي جراها من راسها وهي تكله : خابرتك وزتك علييييه 

غرتك بكم بوسة ونووومة 

سطرها براشدي وكاللها كدام الناس حتى يتبرى من السانها : طلكتج اني وما خلصت من شرج چلببببببة اتظلين طول عمرج عوجة وما تنعدلين مثل ذيل الجلب 

وجراها من راسها وكفت الناس تفازع بيناتهم .. ذباها على اخوها واجرلهم تكسي وجروها بالتكسي ومشوا وهو ركب سيارته ومشى .. سمعت تليفوني يدك 

دخلت للعيادة .. طلع هو : شسوتلج ومنين اندلت مكانج التشتغلين بيه 

- شمدريني عبالي الدكتورة سديته ورحت افتحه وطلعت كبالي 

مخلت على حالي حال 

والله ما ناقصة منين اتلكاها من اخوي 

لو من امل والسانها .. حتى برزقي عابتني وجتي شوتلي مشكلة بنص هالناس شلون اطلع كبالهم بعد شكول وهي فشرت عليه كل هالفشار كدامهم ؟ 

- اعلمها بسيطة .. متوجه لبيت عمي واعلمها سهلة . 

سده من عندي وكعدت ابجي .. 

ل٤ والدكتورة ما جتي وراسي كام يوجعني حيل كمت ما اشوف احد من راسي .. لان جعفر ضربني بوكات على راسي وامل ملختني كمت اون من الم راسي .. 

اخذت حبايتين وجع راس وشديته 

وخابرت ع الدكتورة البديلة تأخرت واكو اثنين جايين حاجزين 

كالت الدكتورة : لا اني حاجيت دكتورتج وكتلها ما اجي ولغينا الموضوع 

- اي غير تبلغيني 

- مو دوري ابلغج حبيبتي اني اتفاقي ويا دكتورتج 

تشكرت منها وسديته واتعذرت من اللي حاجزين ورجعتلهم فلوسهم 

وكمت لبست العباية وطلعت للبيت مالتي .. 

هوسة والوصخ فوك راسي المطبخ متعرف شكو ع الطباخ والسنك 

واني دايخة وتعبانة وهالامور تتعبن ياكثر ما اكدر انام والوصخ هيج متلتل تصيري بيه حالة نفسية 

كمت ذبيت الهدوم كلها بالغسالة وشغلتها و حطيتلي جدرية وترستها مي وزاهي وسيم و اسفنجة وحطيت قاصر وجلفت المطبخ كله من الكاع للكاونتر للمواعين .. وشلت فراش الغرفة وغسلتها وشمرت المي بالكراج ومسحتها وعطرتها .. على ما نظفت الكراج لكيت البيت كله ناشف رجعت الزوالي وسديت البوب وشغلت التلفزيون والصوبة وحطيت قوري الجاي ومديتلي فراش وكعدت .. 

صبيتلي كوب جاي وكعدت اباوع التلفزيون بلا هواة 

ومرجعة راسي للحايط .. تنهدت تعبانة حيل 

دك اتصال .. باوعته ( لزكة ) 

ما رديت شكد ما عنده كرامة هسه ما ارد عليك وما اريدك غير تجوز 

اتذكرت صلاة المغرب والعشا ما صليتهن التهيت بالشغل 

كمت اتوضيت وصليت .. وقفلت التليفون ونمت ... 

كعدت الصبح بـ ٨ الصبح 

لكيت حازم كومة متصل وداز رسايل وضال باله عليه عباله صار بيه شي 

دا اقرا .. اتصل بساع 

رديت : ها 

- هو شها عملك هاي تقفلين خطج وتعوفيني ع الشحن 

- جنت تعبانة 

- وتعبانة تعوفيني قلقان بالله شوي اداهمج للبيت لو منين ادري انت شصار بيج 

- كلشي ما يصير بيه لو بيه خير جا ربي خذاني 

- دنجبي انجبي سلكتني سلك وهسه كاعدة تحجي حجي مال وحدة متوثة نوم واني الليل المر ما نمته وهسه متوجه لدوامي وعيني ما ضايكة النوم 

- سودة عليه والله ما ادري هيج راح يضل بالك 

- اسم الله عليج بس مو هيج وعلي روحي راحت حسبالي صار بيج شي لو احد اذاج وانت امس كايلتلي كتلوني ودمغوني وما حجيتلي شصار 

كمت اسولفله الصار من عرف 

كال : لو ما مجادلته خ يولي اني احلها 

- شلون تحلها حازم 

- ارتاحي ورجعي نامي وماطول الدكتورة ماكو لا تطلعين ولا تعتبين الباب استقري وخلي جسمج يرتاح واني احلنها الج بحيل الله . 

هسه خل اروح وصلت للدوام احاجيج بعدين 

- تمام 

سديته من عنده .. 

وكمت سويتلي بيض وطماطة وكعدت ع التلفزيون اكل كبال الصوبة. 

مرت ايام .. 

وحازم انتظر فرحة الزهرة .. 

بيوم ١ ربيع الاول اخذ زلم من جماعته وناس عشاير ورايح على عمي وخطبني منهم خطبة رسمية 

بس اتفاجئ بعمي يكله 

والله جيتكم على راسي بس المرة جوها خطابة كبل يومين واخوها اطه كلمة وموافقة وما نكدر نرد بجلمتنا كدام الوادم وجيتكم نتشرف بيها 

حازم تخبل خابرني النار تشع من عيونه 

كالي : المن منطينج اهلج ولج وليش ما كايلتلي؟ 

- منطيني ؟ المن منطيني ؟ 

- دخابري وسوفي شوضعهم امشين الماي من حواج ومنطيج وانت ما تدرين خابري وشوفيلي شنو الموضوع والله اخوتج مو مال عيني واغاتي لا اشوفهم شراح اسوي بيهم 

سد الخط وهو يتوعد لجعفر اخوي 

بسرعة خابرت على عمتي كتلها : عمة شصاير ياهو هاذ الخاطبني وجعفر شني موافق شنو منطيني واني ما ادري !؟ 

- عمه امس مر على عمج وكاله واحد اسمه حسن هذا الجان رايد بت بيت ابو اسعد وما اطوها رايح لاخوج وطالبج وجعفر موافق ومنطي كلمة وكايله المرة الك ما تصير الغيرك 

- شنوووووووه منطيني لحسسسسسسسن ...... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا