رواية عهد الاسود حلقه خاصه 1بقلم زهرة الربيع (حصريه وجديده في مدونة قصر الروايات)

 رواية عهد الاسود حلقه خاصه 1بقلم زهرة الربيع (حصريه وجديده في مدونة قصر الروايات)

رواية عهد الاسود حلقه خاصه 1بقلم زهرة الربيع (حصريه وجديده في مدونة قصر الروايات)

في نهار رمضان يا زباله حبكت لك تقرب لها في نهار رمضان حقها تطلب الطلاق دي حقها تولع فيك ايه القرف ده 

غالب بص له بغضب شديد وقال ....ما تطلع بره تناديلهم وتقول لهم كلهم اقولك اكتبها في بوست ويشوفوها الكل بدل ما تتعب نفسك... بقالي ساعه بقول لك عايزين نلم الموضوع من غير ما اتفضح اكتر من كده مش كفايه قولت لك انت والباشا اللي عمال يضحك من ساعه ما عرف

جبران ضحك جامد تاني وقال... مش قادر ابطل ضحك طيب اعمل ايه يعني

فارس اتنهد وقال.... يا جماعه بالراحه خلينا نفهم منه ايه اللي حصل بالظبط ونحاول نساعد النهارده يوم العيد كل سنه وانتم طيبين ولو ساعدناه على الاقل يبقى في ميزان حسناتنا 

نديم قال بزهق.... اسكت انت حسنات ايه اللي بتتكلم عليها بيقول لك نام مع مراته في نهار رمضان تقولي حسنات

 غالب قال بسرعه..... لا والله محصلش.... هو كل الحكايه اني حاولت مجرد محاوله يعني تخيلوا كل اللي انا فيه ده علشان حاولت بس.. فهيه اتخضت مني يعني وجريت على الحمام استخبت فيه وفضلت تصرخ اني اطلع من الاوضه ...الكلام ده كان امبارح الظهر ولحد دلوقتي ما فتحتليش الباب ..انتم عارفين وعد في موضوع الدين ده يعني حريصه شويه و

ولسه هيكمل جبران ضحك جامد تاني وقال ....حريصه... حريصة ايه يا ابني دي من الاولويات اللي المفروض تبقى فاهمها 

غالب قال  بسرعه وحرج.... يا ابني ما انا فاهمها ...هيه بس كانت طالعه من الحمام و...و ونسيت نفسي شويه والحمد لله ما قربتلهاش واليوم كمل وعدى على خير... وانا استغفرت كتير وصليت كثير ...بس هي مش قابله تفتح الباب ولا تسامحني بتقول اني مش ثقه...و اني زي ما عملت كده امبارح ممكن في يوم ما تقدرش تمنعني واعمل كده غصب عنها ومصره على الطلاق 

جبران اتنهد وقال... لا مش لدرجه الطلاق نحلها اكيد يعني احنا اربع شباب ما نعرفش نحل موضوع زي ده حتى عيب علينا

غالب  قال بسرعه.... امال انا جيت للغبي ده اللي عمال يزعق ليه علشان روز مراتو اختها يمكن تقدر تعمل حاجه

 نديم ضحك وقال..روز مين..مراتي.. ما انت عارف انها بتعزك لله في لله من غير اي حاجه ولو انا قلت لها هتزيد بنزين على النار زي ابوها شعليله وما هتصدق...وبعدين احمد ربك ان ابوها مش موجود والا كان جريت قالتلو وكان زمانكم مطلقين اصلا

غالب قال بتوتر ....مهو ابوها هيرجع النهارده بالليل هو ومراته وانت عارف اول ما هيوصل هيقعد يفتش فيهم بقى ويعدلي عيطت كام مره من ساعه ما هو سافر ويحلل نوع الدموع كمان والوقت اللي اخذته على خدها 

جبران ضحك اكثر وغالب ضربه جامد بغيظ وقال ...امشي من هنا امشي انا غلطان اللي قولتلكم ولا واحد فيكم فيه فايده 

فارس قال بسرعه... انت مش بتقول انها لو فتحت الباب هتعرف تصالحها 

غالب قال بسرعه ...يا عم دي لعبتي عيب عليك 

فارس قال بسرعه....طب ما كده اتحلت  النهارده العيد وعمي اسد جاي من السفر بالليل وعاملين له حفله فطبيعي هتخرج عشان تستقبله معاهم

جبران قال  بسرعه ..حلو اول ما تطلع تروح انت تشقطها على طول

 فارس بص له بدهشه وقال... ايه يشقطها دي.. ده لفظ تقوله على واحد ومراته لا حول ولا قوه الا بالله 

جبران نفخ بزهق وقال...يا ابني يا ابني كفايه عليا امك بتحسسني اني من كفار قريش و كل ما تشوفني تقول لي عدل من وضعك يا جبران حالك مش عاجبني... ما طبيعي حالي ما يعجبهاش اذا كان حالي مش عاجبني انا شخصيا و

بس سكت وقطع كلامه لما غالب قعد بياس على الكرسي وقال ...شكل كده ما فيش امل ...اصلا حتى لو جيت اتكلم معاها هنا هتفضحني في البيت كلو هيه عارفه ان لو اخذتها في مكان لوحدها وزنقتها مش هتقدر تفضل على موقفها...واستلم بقى لو عرفو في البيت....ماما هتفضل تعيط كاننا اتطلقنا وبنقضي شهور العده....لا وكلو كوم وبابا كوم لوحده هيفضل كل ما يشوفني يرجع في وشي كلمتين يسموا البدن على اساس ان انا ما اعرفش اني غلطت ما انا عارف اني اتنيلت غلطت  واستاهل ضرب الجزمه بس اموت نفسي علشان غلطت يعني..الظاهر مفيش فايده

جبران ضحك وقعد جنبه وقال ....بطل هبل واحنا روحنا فين هنحلها ومحدش هيعرف ولا هنجيب سيره لحد 

وبصو كلهم في وقت واحد على نديم اللي كان بيحرك عينيه يمين وشمال وعامل نفسه مش واخد باله 

جبران وقف جنبه وقال بتحذير.... ولااااا متعمليش عينيك زي البنادول كده لو حد شم خبر بالموضوع بس شم كده هقطع لك لسانك اللي مغلبنا ده 

نديم قال بسرعه.... يا عم عيب عليكم انا مش فتان والله هبه الكلمه بتفلت مني سعات و

 جبران قاطعو وقال بتحذير.... لا المره دي حاول تمسكها كويس لانها لو فلتت منك مش هيحصل خير 

بصلهم بتوتر وقال... يا عم عيب عليكم في بير والله في بير

جبران بصلو بسخريه وقال..اه عارف البير بتاعك ديما مليان وبيطرطش من جنابه

وبص لغالب وابتسم وقال...قوم ياض ومتقعدش زي الولايا كده...دلوقت هندخلك لمراتك 

غالب بصلو بلهفه وقال..ازاي

جبران ابتسم وقال..هو واحد بس اللي يحلها ويحللك ابوها كمان 

بقلم زهرة ...الربيع

غالب فهمه فورا وقال بحرج...ما بلاش...انا مش ناقص فضايح

جبران ضحك وقال..لا متخافش..ده الوحيد اللي عمره ما هيقول لحد ولو على الفضايح اطمن ده كوكتيل فضايح من اجود الانواع

عند ضرغام كان مبسوط جدا وبيزين البيت بطريقه جميله هو وعهد وشوق 

 اسامه بقى كان واقف معاهم و هو بينفخ في بالونات كتير رمى واحده منهم بغضب وقال... يا ابني هو عيد ميلاد عيل عنده ثلاث سنين ايه كل البالون ده انا وداني وجعتني ايه الهم ده

 درغام بصلو بضيق وقال ....اسامه انت من اول ما مسكت اول واحده وانت بتقول كده ..قولتلك أسد بيحب البلاون قوي انفخ وانت ساكت

اسامه قال بخنقه...مدام بيحبها يبقى لما يجي بسلامته ينفخ..انا انفخ ليه ...وبعدين انا قلت لك نجيب مصمم حفلات ينفخ له بالون قد ما يحب لكن لا لازم تخنقنا معاك

 عهد قالت ابتسامه.... يا اسامه ما هو قال لك ان هو حابب يزين له كل حاجه على طريقته بنفسه

اسامه قال بسرعه.... حلو قولتي عايز يعمل  بنفسه اهو يبقى تسيبوني في حالي بقى ده يوم العيد يا جماعه و انا قاعد انفخ بلالين 

شوق ضحكت وقالت ....ما هو انت السبب لولا انك بوظت المنفاخ كانت زماننا خلصناهم بسرعه

اسامه قال...انتو كلكم اتفقتو عليا ...هو  يعني عشان بوظته انفخ كل البلالين دي ويوم العيد كمان

ضرغام قال بغيظ منه... هو انت  علقت يلا يوم العيد يوم العيد  ناوي تعمل ايه يوم العيد يعني انفخ وانت ساكت يا اسامه الراجل اذا عدى ال60.. اخره ينفخ بلالين 

شوق وعهد ضحكوا عليه و اسامه ابتسم بسخريه وقال ....ده الناس يا حبيبي انما الاسود اذا عدت ال 60 بيبقوا شعلة ادرينالين 

ضرغام لسه هيرد جيه جبران و قال.... طب قوم معانا يا عم الشعله عايزينك

شوق قالت بسرعه .. اخيرا شرفتو سايبنا نشتغل في الزينه لوحدنا وخلعتو

وبعدين   مرتاتكوا فين حنين لوحدها من الصبح في المطبخ 

فارس قال بسرعه....تاره نيمت امنيه و بتلبس  وجايه بس انتي عارفه هي بتطول في اللبس شويه

و نديم قال...روز كمان نازله بتنيم أسد بس اصل عنده مغص من امبارح 

التفتوا كلهم لغالب اللي بعد عينه يمين وشمال وقال... وعد اه... يمكن تعبانه

 ابوه بص له بشك وقال... يمكن

غالب قال بسرعه... قصدي يعني هي تعبانه شويه وقاعده بمحمد بس هتنزل يعني.... ما يلا يا اسامه قلنا لك عايزينك يا جدع

اسامه قال بزهق..... يا فتاح يا عليم يا رزاق يا كريم توها اللي احلوت.. دخلتكم عليا دي كده بتقول في مصيبه ما فيش مره قولتو لي عايزينك يا اسامه الا و كنتو عاملين مصيبه 

ضرغام قال بضيق ...وهيروحوا لمين غيرك معودهم على الدلع وتغطي عليهم..... لو تسيبهم يحلوا مشاكلهم والعك اللي بيعكوه على الاقل يخفوا مصايب

 نديم قال بسرعه لا والله يا عم انت ظالمنا مش كلنا ده هو بس غالب اللي ...

بس قاطعو جبران لما ضربه على رجله بغضب وقال ...غالب اللي عايزه في موضوع شغل  ها...شغلللل

نديم صرخ من الالم وقال.... اه اه شغل شغل طبعا 

ضرغام ضحك وقال.... ايوه ايوه روح معاهم عشان شكله الشغل صعب المره دي ربنا يكون في عونك

اسامه وقف وقال.... يلا يا اخويا انت وهو ...امي زمان كانت تقول يا جايبه البنات يا شايله الهم للممات.... الله يرحمها لو كانت شافت الخلفه اللي تفرح دي كان عرفت ان اللي تخلف الصبيان ...تشيل الهم اطنان 

فارس شدوا من ايده وقال.... يلا يا عمي بس هنسترجع ذكريات ستي جوه ان شاء الله

و اخذه هو ونديم ومشي بيه 

جبران لسه هيروح ناحيه المطبخ غالب شده من ايده وقال... رايح فين 

جبران قال ....يا عم عطشت هشرب في ايه 

غالب قال بسرعه....لا يا اخويا ما فيش شرب لحد مصالح مراتي يلا قدامي مش ناس تشرب وناس تفضل عطشانه 

جبران مشي معاه بضيق وهو بيقول ....اشوف فيكو يوم يا بعده... انا الغلطان ايه اللي بيقعدني معاكم في بيت واحد

 فوق بقى كانوا البنات متجمعين في اوضة وعد اللي كانت قاعده ساكته ومش بترد على حد 

اما روز كان ابنها اسد بيعيط وهي هتعيط قصاده وقالت... يا ربي مش بيسكت ليه طيب... انا مش عارفه ابقى ام خالص ابقى ماما ازاي وانا اصلا عايزه ماما 

تاره ضحكت وقالت.... يا بنتي هزيه شويه هيسكت 

روز قالت بدموع ....انتو نيمتوا اولادكم ازاي بجد ازاي نيمتوهم ده حتى حنين نيمت اسامه من الصبح ونزلت المطبخ اشمعنى هو اللي مش بينام... بس انا عارفاه اكيد عايز باباه اول ما بشيله بيهدى وينام 

تاره قالت....طب ما ده الطبيعي كل الاطفال بتحب باباها جدا  

هنا وعد انتبهت لكلامهم ونزلت دمعه من عيونها وقالت وهيه بتبص لابنها وقالت.... مش شرط على فكره الاطفال بتحب مامتها اكتر واي ام تقدر تربي ابنها من غير ما تحتاج لوالده

روز وتاره بصولها باستغراب وروز قالت.... ايه يا بنتي اللي بتقوليه ده بعيد الشر ربنا يخلي كل طفل وسط مامته وباباه 

وعد بصتلها بحده وقالت بغضب.... ايه الشر في كده ...انا بقول اي ام تقدر تعوض  ابنها عن باباه وعن كل الدنيا دي مش حاجه صعبه

تاره اتنهدت وقالت... انتي متخانقه مع غالب ولا ايه شكلك مش طبيعي اصلا من الصبح في ايه يا بنتي ده النهارده العيد 

روز قالت بغضب.... تلاقيه منكد عليها زي العاده وايه الجديد ما هو واحد تافه مش بياخد باله لتصرفاته 

تاره قالت بسرعه... البنزين يا قلبي مش وقته النار مشعلله لوحدها... كل حاجه ليها حل و

 بس قاطعتهم وعد وقالت بحزن .. لو سمحتوا انا كويسه بس بجد يعني مش هقدر انزل دلوقتي يا ريت تنزلوا مع حنين علشان ما تفضلش لوحدها وانا هساعدكم بكره ان شاء الله لو حتى هقف لوحدي اليوم كلو 

تاره ضحكت وقالت ....ايه اللي انتي بتقوليه ده يا بنتي احنا فيه بينا الكلام ده... انا اصلا خلصت لبس ورايحه دلوقتي احصل حنين ...والمجنونه دي اول ما تنيم ابنها هتنزل معانا

 لا ده مش هينام انا عرفاه هاخده اواديه لجدته واحصلكم 

  تحت عند اسامه كان عرف الموضوع كلو و موقفه كان ميفرقش عن جبران مش مبطل ضحك

و جبران كان بيحاول يسيطر على ضحكته علشان غالب كان هيتفرقع منهم بس مش قادر

غالب قال بغيظ...هنقضي نص يوم العيد في الضحك بقى ولا ايه

 اسامه حاول يبطل ضحك وقال...غالب انت اهبل يا حبيبي اخيرا اخدت حاجه من جنات امك. ..ما انت عارف مراتك عارفها اكتر واحد ازاي تتصرف تصرف زي ده معاها ده انت نهارك اسود النهارده... ده اسد  جاي بالليل  تخيل بقى لما تعيط وتحكيله  يا لهووووي بص دور على عروسه اسهل والله.. انت طلقت خلاص ما فيهاش اثنين ثلاثه 

غالب بصلو بزهول وقال.... ده اللي جايبك علشان تقوله 

وقرب منه بسرعه وقال...وانبي  اسامه  حلها والنبي انت عارف انا  بحبها قد ايه انا اموت لو بعدت عني ..ولو ابوها اتدخل في الموضوع هيكبر قوي كفايه فضايح كده ابوس ايدك 

اسامه اتنهد وقال.... هعمل لك ايه انت عارف مراتك اكتر واحد في الموضوع ده بتزودها و

 فارس قال بسرعه وزهول....بتزود ايه هو اللي غلطان من ساسه لراسه ...حد يعمل كده في نهار رمضان استغفر الله العظيم ده ذنب صيام الدهر كله ميغفرهوش ...وغير كل ده حد يخوف مراته بالشكل ده... يعني مراتك اللي المفروض تبقى انت امانها تخليها تجري منك بالشكل ده وتتخبى في الحمام... لا طبعا هو الغلطان وغلطان جدا كمان

جبران بص لغالب لقاه منزل عيونه في الارض والحزن باين عليه وحالته صعبه  اتنهد وقال بحزم ..صح انت بتتكلم صح بس كمان ربنا غفور رحيم و قلنا ابغض الحلال عنده الطلاق وخلينا نصلح بينهم يا شيخ فارس دي اجرها عظيم... واتصرف يا اس بقى امال احنا جايبينك ليه

 اسامه اتنهد وقال ...ملهاش غير حل واحد... انت لازم تدخل وتتكلم معاها بنفسك... الست بتعمل نفسها جامده طول ما هي بعيده انما لو انت قربت هيه مهتقدرش تبعد 

غالب قال بسرعه وحماس ...مهو  ده اللي لسه كنت بقولهلهم بس هكلمها ازاي هيه مش راضيه تفتح ....ده حتى امبارح فطرت في اوضتها وقالت لهم انها تعبانه وانهارده كمان ...مش راضيه تفتح باب الاوضه ابدا

اسامه ابتسم بخبث وقال.... سيبلي انا الموضوع ده 

اما في المطبخ كانت حنين واقفه بتقطع الخضار بشرود وتاره وروز بيشتغلوا في المطبخ معاها وبيفكرو في وعد لانها مكانتش طبيعيه ابدا

روز قالت.... لما بابا يجي بالليل هقول له يعرف لي حكايتها ايه...اصلها مش طبيعيه خالص امبارح منزلتش تفطر في المغرب...ودلوقت بتقول تعبانه  ولا بتكلم حد ولا بترد حتى لما اكلمها  قاعده شايله طاجن ستها  اكيد اكيد الزفت اللي متجوزاه ده عمل حاجه اقطع دراعي لو ما كان عمل مصيبه

تاره قالت بضيق... يا بنتي حرام عليكي مش كفايه عليه ابوكي على فكره بقى غالب اكتر  واحد بيحب وعد ولا واحد فيكم هيحبها اكتر منو واذا غلط في حاجه كده ولا كده يبقى اكيد مش بقصده و المفروض نعرف عشان نساعدهم ولا ايه يا حنين

واستنت منها رد  بس حنين ما ردتش وكانت بتقطع الخضار بشرود واضح وكانها مش سمعاهم اصلا

تاره وروز  بصوا لبعض باستغراب وتاره قالت ...ايه يا بنتي يوم العيد المنحوس ده... في ايه انتي كمان 

حنين قالت بتوتر ...ها...ايه في ايه لا ما فيش انا كنت بجهز الخضار عادي

 روز قالت ...واضح انو عادي ...ساعه بنتكلم جنبك ولا انتي هنا في ايه انتي كمان ....هيه الرجاله مالها خابت كده ولا واحد مراضي مراته يوم العيد

تاره ضحكت وقالت ...طبعا طبعا يا عم انتي بعد معامله نديم ليكي المفروض ما تشوفيش حد مراضي مراتو ابدا

 روز اتوردت خدودها بابتسامه جميله وقالت... نديم ..نديم ده العسل كله ده بابا التاني... يشهد ربنا ان عمره ما زعلني ابدا ولا قسي عليا 

حنين اتنهدت بحزن وقالت... هما كلهم طيبين بس احنا اغبيه قوي

 تارا وروز ضحكو جامد وضربو كف بكف وقالوا بصوت واحد ... عملتي ايه المره دي

 حنين اتنهدت بيأس وقالت بحرج ....برده زي العاده

 عند اسامه كان بيخبط على اوضه وعد وقال ...وعد حبيبتي ممكن تفتحي عايزك في موضوع

 وعد استغربت ووقفت لبست طرحتها بسرعه وراحت فتحت وقالت ....خير يا عمي

 اسامه ابتسم وقال....خير  يا قلبي .انا قاصدك في خدمه .. انا عندي واحد صاحبي يعز عليا كان عايش هنا وسافر .. معاه بنته كانت عند اعمامها وحصلت مشكله معاهم واتخانقت مع بنت عمها ومصره ترجع لوالدها ...وطبعا انهارده العيد ومفيش سفر فكانت هتقعد في اوتيل بس انتي يعني عارفه اني مينفعش اسمح بكده  ده صديق عمري .. فأنا اصريت عليه تفضل عندنا انهارده لحد ما يجي ياخدها بعربيته

وعد كانت مستغربه ليه بيشرحلها وقالت...حضرتك معاك حق بس برضو مفهمتش محتاجني في ايه  

اسامه قال بسرعه...ما انا هقولك اهوه...اصل البنت ملتزمه جدا ومنتقبه ومش راضيه خالص تقعد تحت عشان الشباب وكده رغم ان انا قولت لها ان دول اولادي وزي اخواتها وكده بس برده مش مرتاحه

 وعد قالت بسرعه ....لا طبعا يا عمي هيه معاها حق... تقعد فين وفي شباب في اجانب عنها ... لا هاتها تفضل معايا افضل

اسامه قال بابتسامه.... ما انا فكرت فيكي اول واحده قلت يعني تدي لها حاجه واسعه تلبسها من عندك  وتحاولي تهديها من ناحية اهل ابوها ده برده صلة رحم مينفعش تتقطع

وعد قالت بطيبه... اكيد يا عمي زيها زي روز والله وانا هكلمها اكيد

اسامه ابتسم وقال.... كنت متاكد والله

ونادى وقال.... يا غاليه ....غاليه حبيبتي تعالي

  وجات غاليه ووعد بصت لها و رمشت بعينيها بزهول كانت طويله عليها طويله بالنسبه لاي بنت اصلا ومنتقبه مش باين منها اي حاجه ....وطبعا كلنا عارفين دي او ده مين ؟

وعد ابتسمت باستغراب وقالت.... طيب يا عمي تمام... اتفضلي يا غاليه اتفضلي انا زي اختك 

اسامه كان عايز يضحك وقال.... خدو راحتكم بقى بنات وكده مع بعض بنوتين سوا

 غالب بصلو بغيظ وتوعد

 واسامه مشي بسرعه وهو مش قادر يمسك ضحكته اكتر

 وعد بصت لطيفه باستغراب ودخلت وقفلت الباب وبصت لغالب وقالت بابتسامه.... شيلي النقاب يا حبيبتي زي ما انتي شايفه ما فيش حد في الاوضه ...وانا هجيب لك حاجه تلبسيها يعني ممكن ما الاقيش حاجه على مقاسك بس هحاول 

غالب هز راسه بالموافقه وهيه راحت تدور في الدولاب بتاعها

غالب استغل انشغالها و راح للباب قفله بالمفتاح من جوه وقلع النقاب وقرب منها حضنها من وراها وقال بهمس.... وحشتيني قوي قوي يا قلبي

وعد اتسعت عينيها بزهول وخضه ودفعته ورجعت خطوات وهيه بتبصله بصدمه

بقلم....زهرة الربيع

عند عهد كانت مع ضرغام بيشتغلو في الزينه  مع بعض وشوق راحت تشوف البنات في المطبخ 

ضرغام بص لها جامد وقال بابتسامه.... هو الواحد ممكن يموت كام مره 

عهد قالت باستغراب ...هي مره واحده... ليه

ضرغام  قرب منها وقال بحب ... امال ليه كل ما اشوف عيونك احس اني قتيل 

عهد بعدت عيونها بكسوف شديد وقالت.... ضراغام وبعدين مش كبرنا على الكلام ده

ضرغام  رفع وشها ليه وقال ...وايه دخل السن بالمشاعر انا هفضل اغازلك لحد ما اموت 

عهد قالت بابتسامه... بعيد الشر عن قلبك ربنا يحفظك ليا

ضرغام مسك ايدها وباس كفت ايدها وقال ....كل عيد وانتي معايا يا اجمل عيد جيه في حياتي يا كل اعيادي اصلا

عهد  لمعت عيونها بدموع وقالت....كل عيد وانت بلسم حياتي 

ضرغام باس جبينها وابتسم وقال ...انهارده بالليل اسد هيجي نخلص الاحتفال و بكره هخرجك ناخد اليوم كلو بره البيت

 عهد لسه هترد بحماس افتكرت حاجه واختفت ابتسامتها و قالت بتنهيده.... لو ربنا سهل 

ضرغام بصلها باستغراب وقال....ماشي. نعم بالله بس فيه ايه..فيه حاجه انا معرفهاش

 عهد اتنهدت وقالت... من وقت ما اتجوزو الاولاد وانت بتعمل كل حاجه علشان يبقوا مرتاحين ومبسوطين وحتى علشان تخليهم قلبهم على بعض وما تخليش حد وسطينا مشيت الخدم وبقينا نعمل كل حاجه بايدينا بس المشاكل هي هي

ضرغام استغرب اكتر وقال.... هو في حاجه ولا ايه قلقتيني

 عهد بصت يمين وشمال كانها بتتأكد لو حد شايفها وقالت بهمس...شاكه ان غالب ابنك عامل حاجه مع وعد علشان مش عادتها تقعد كل ده ما تنزلش ...وكمان حنين بحسها مش على بعضها زي ما تكون متخانقه هي كمان مع جوزها

ضرغام  اتنهد وقال ...ولا يهمك واخد بالي من اول ما نادو اسامه وعقدو المؤتمر سوا اتأكدت انهم عاملين بلوه ...بس نخلص تزيين وهتكلم معاهم ولو متخانقين هصالحهم متقلقيش

عهد ابتسمت وقالت.... ربنا يخليك ليهم يا رب

 عنده اسامه نزل وهو بيصفر على السلم برواق

فارس قال بقلق...ها ظبطت ولا ايه

اسامه ضحك وقال.... عيب عليكوا انتو جتو لاسامه الثابت يا ابني

 فارس ونديم حضنوا بعض بفرحه 

ونديم قال .... ايوه كده خلينا نعيد بقى

 جبران ابتسم وقال بسعاده.... جدع يا اس كنت واثق فيك والله

اسامه  بص له بطرف عينه وقال ....واضح انك واثق فيا واثق فيا بجد... في ايه انت الاخر مع مراتك 

جبران ضحك وقال ... ابدا ما انت عارف حنين مشاكلها ما بتخلصش وانا ما بزعلش منها مجنونه وليس على المريض حرج

 اسامه ابتسم وقال... اذا كده يبقى تمام...على العموم لو معاك مشكله انت او اي حد فيكم قولوا لي فورا انتم عارفين مع اسامه.... قول للمشاكل مع السلامه 

بس قطع كلامه بصدمه على دخول اسد اللي قال بصوت عالي و وسعاده ......مفاجاااااااه مش كده.. ما قدرتش استنى بالليل وقلت اعملها لكم مفاجاه واجي دلوقتي 

اسامه ضحك بزهول وقال....الا المشكله دي

 ضرغام جري عليه حضنو و هو مش مصدق نفسه وناديم لطم على خده بايديه الاثنين ووقع مغمى عليه 

وفارس سنده بذهول

 جبران بلع ريقه بتوتر من الموقف و قال ....يا نهار غامق 

 اسد قال بسعاده يا بنات ...انتي فين يا روز يا وعد حبايبي انتو فين 

اسامه ابتسم بتوتر وقال.... بيدور على حبايبه....مبروك يا ولاد غالب طلق خلاص عقبالكو وووو

😂😂😂

الحلقه طويله جدا هنزل باقيها بكره باذن الله 

طبعا الحلقه كانت المفروض تنزل يوم عيد الفطر كنت ناويه اخليكم تعيدو معاهم بس محصلش نصيب والصفحه اتقفلت واتعطلنا شهر وكنت هكنسلها خالص بس بناء على طلبكم نزلتها يلا بقى حيو اولاد الثابت باجدع تفاعل علشان نرجع بقوه وانتظرو التكمله والشغل الروعه من بكره💪💪

لمتابعة  الروايه الجديدة زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هناااااااااا

الرواية كامله الجزء الاول من هناااااااااا

الرواية كامله الجزء الثاني من هنااااااااا

مجمع الروايات الكامله اضغط هناااااااا