رواية عاجر الفصل الثالث 3 بقلــم الكاتبـــة زينب ماجد (حصريه في مدونة قصر الروايات)

 رواية عاجر الفصل الثالث 3 بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثالث 3 بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد} 

الحلقة_٣

(

_منين عرف رقمج ولج وخابرااااج احجيييي 

-عمي والعباس ما عرف حتى ما حجيت وياه 

-شلون ما حجيتي وياه وهدى سامعتج 

يحجي ويعت براسي ويكفخ بيه ، واني رافع اديه واتوسل بيه وابوس بيده : عمي احب ايدك الله يخليك عوفني وروح الحسين ما حاجية وياه ولا صاعدة ولا اعرفه 

كامت تجرني عمتي من بين اديه وهو يهم يريد يكتلني ويصيح : اطيني تليفونج ولج شو اطيني اتهرمين من ورااانا 

نزلت ملاد وسويسو وياها كتله : ولك تحجي مو البارحة انت رديت ع الرقم الغريب شكالك 

ضل يباوع خايف وميلاد تكلي : لا ادخلين الولد بالمشاكل صبا 

-بس يحجي هو مو رد اني حجيت وياه ؟ 

سيف : ياهوه ؟ 

-البارحة الرقم الغريب شسمه 

ميلاد: امشي ولي فوك اصعد مالك علاقة 

سيف:لا ما رديتي كتيلي رقم غريب انت رد واذا مرة اطينياها 

جراه جده : وكالك منو 

-كال اسمه حسن 

-وشراد 

-ما ادري هي كالتلي كله يا حسن بس هو كالي اطينياها كالتلي سده وسديته 

عمتي : يعني البنية لا حاجية ولا مخابرة وانت توليتها كتل وكفخات عاين وجهه الدم ترس وجهه عليمن صدكت كلمتين من هدى وهديت على بت اخوك بلا نشد ! 

عمي كام بس يصيح :انعل ابوكم لابو الخلفكم لابو البزركم وذبكم علي 

ويدفر برجليه وراح للدكان كعد 

وعمتي مستمرة تحتجي وتعاتبه 

خاف ربك حجي مو هاي يتيمة وبلا والي 

 من يوكفك ربك يمه غاد ويكلك بيا ذنب خليت دمها على وجهه شتكله ؟ المن اتصلي والمن تصوم وانت ما تخاف الله بهالمسكينة ويلي من ضيمكم عليها ولكم يززززي

اني على صفحة ابجي وامسح من وجهي والدم على كصتي ينزل من ضرب راسي بالحايط .. 

وعمتي واكفة تصيح على هدى اني مشيت للمغسلة اغسل براسي الدم ما جاي يوكف .. وعمتي تكللها : شسمعتي وفتنتي عليها تخابر وادور زلم 

ولج اركدي بسج كافي المرة لا رايدة رجلج ولا بعازته 

بت بس رايدة تعيش وانت فوك ضيمها 

-واني شنو عايلة بيها يمعتها تحجي وتخابر وحجيت 

ميلاد جرت سويسو وصعدت .. 

وهدى سوت نفسها اتضايقت من حجي عمتي وطبت لغرفتها واني اغسل وعمتي تصيح وتحجي وادعي عليهم 

اجت داليا بت يوسف جابتلي ربطة :حطي هاي على راسج خل يوكف الدم ما حاي يوكف بالمي 

-اخذت منها وطبيت لغرفتي ابحي والزم براسي واعاتب باني وابوي المن جابوني الهادنيا المن ذبوني ، من ماتوا ليش ما خذوني .. عافوني الهم واحد يذبني للاخر جني طوبة مو بشر 

حسيت راسي ثكل والدم بعده مستمر ينزل 

شديت راسي وكمت لبست ربطتي وحجابي وكتلها :عمة اني راح اروح للمستشفى احس راسي ثكل والدم ما جاي يوكف 

-دنطري اخابر رسول بلكت قريب يمرج انا مالي جدام التعيني وامشي وياج 

-ما بحتاج المستشفى قريبة بربع انزل يمها بس بالطواري يكشف عليها واجي 

مشيت وعمتي تصيح على عمي : كوم اخذها امشي وياها لا توكع واطيح البنية 

-وياهو اليضل بالدكان ولدج الدايحين المالهم عونة 

هذا اخر شي سمعته من صياحهم بعد ما طبكت الباب وراي ومشي توجهت للشارع العام .. بس خطواتي ثكلن راسي كام يوجعني 

اريد اعبر الشارع كمت احس بالكاع تتحرك جواي 

وعيني ما كمت اشوف بيها زين .. والنظر صار ضبابي 

حطيت ايدي ع السيارة الواكفة وبس اريد الزم ما اوكع 

حت استقر 

كمت اتجى اريد بس اشوف حتى اوكف كيا اصعد للمستشفى 

الكاع تروج بيه .. 

اجاني صوت من وراي : بيج شي خوية شني شصاير وياج 

الصوت صوت حازم ابو الإنشائية 

حجيت بس وكفلي كية فدوة اروحلك 

حجيتها وبادن رجلية 

كعدت للكاع 

فز : اسم الله سلامات ، هاي شنو الدم العلى وجهج 

علي ... علييييييي جيبلي سويج السيارة ابني بسررررعة 

عيني نفسج خوية وكومي كولي يا علي 

چلبت بالسيارة الواكفة وكمت اعين بروحي 

وابنه اطاه السويج كاله : عزلوا المحل وارجع ويا موسى للبيت يلا ابني ، بس تعال هسه ساعدها المرة خل تصعد 

اجا الولد تقرب مني وكال : كومي يبنية 

لزمني ومشاني وابوه قرب السيارة صعدت ليورا 

وسد الباب داسلها بسرعة 

وحجه : شنو واكعة لو شكو عليش هالدم ؟ 

-اي واكعة 

-وكعتيش هاي ما تكليلي الدم ما جاي يوكف 

ما كمت ارد بس اون واصيح من راسي 

اخ ولج يمه راسي

استعجل وصف بكراج المستشفى وكالي : اتكدرين تنزلين 

فتحت الباب واتجى وامشي 

كالي : اذا ما تكدرين الزمي بهدومي من ورا وامشي وياي على كيفج ، عمج ولد عمج وين شلون خلوج اطلعين بهالحال صدك جذب 

ما لزمت بيه بس راسي ثكل حيل واني افتح حتى اسوف منين امشي ،  لزمت بهدوم الرجال من ظهره وهو مشى بيه دخل للطوارى 

وكف طبيب كشف كال : بشنو مضروبة ؟ 

-وكعت 

-شتحسين 

-راسي ثكلان حيل وما كاعد اكدر اركز احس اريد اوكع 

اندار لحازم كاله : الجرح يحتاجله خياط وراسها لازم تسويله اشعة ما دام اثر ع النظر خاف اكو شي 

- نروح للاشعة يعني ؟ 

-لا بالاول لازم نخيط الجرح ، بس بنج ما متوفر راح اخيطه بدون بنج 

-رحمة لوالديك دكتور شواكف كدامك حديد شو مرة وتايخة من وكعة كاعد اطيح وتطوطح، وتريد تخيط راسها بلا بنج ادري شيضل بيها 

-تكدر تاخذها مضمد خارجي او دكتور يخيط الجرح .. بس اضمده الك وروح سوي اشعة 

-ديلا لفة خل نروح للاشعة 

-بس فكي الحجاب اختي حتى اكدر اضمدلج الجرح 

حازم : اني راح اوكف برا اخذي راحتج يابه 

طلع واني فكيت ربطتي وكعد الدكتور يضمد بيها وسوالي فحص دم وكتبلي على اشعة ، اخذت الورقة وطلعت الزم بالحايط ، وكف حازم كدامي بساع : ها شكالج 

-للاشعة 

-اجيبلج كرسي خاف ما تكدرين تمشين ؟ 

- اكو 

لزم مرفق ايدي من فوك العباية وكالي : بس تعاي كعدي هنا هسه اجيب واجي ، تليفونج جايبته وياج 

-لا والله حتى الجيزدان نسيت اجيبه 

- عبالي خابروج 

حجاها ومشى جاب كرسي واجا كمت كعدت وهو دفعني بالكرسي وصلني لغرفة الأشعة انتظرنا شوية ودخلنا .. انطى الورقة للدكتور ابو الاشعة وكالي : كومي اتمددي هنا 

كمت من الكرسي واتمددت حجه : حامل 

-لا 

عدل راسي وراح شوية وكالي : انتظري نص ساعة وتطلع النتيجة 

كمت حازم برا عدلي الكرسي تعاي هنا اكعدي .. رجعت كعدت كالي : شكد 

-نص ساعة 

عدل الكرسي يمه وكعد هو ع الكرسي الموجود بالممر 

اكو ناس موجودين بس مو هواي ، حجه : شصاير وياج صدگ واكعة 

باوعت بوجهة هزيت راسي ومديت اديه لعيوني فركتها 

حجه : لو احد ضاربج ؟ 

تنهدت وذبيت حسرة ما رديت حجه 

:ادري عافوج وحدج اطلعين والدم يجري من راسي ، جا لا زلمة لا مرة براسها خير وتطلع وياج ، شني وين كاعدين 

ما جاوبت بقى ساكت بس ضاج واحتقن حيل 

الغريب شالته الغيرة عليّ والقريب ما شفته ، ضرب ايد بايد وكال : مشكلة وعلي من واحد يموت الضمير بداخله مشكلة 

بقيت مرجعة راسي ع الكرسي 

كلش متأذية وكوة اشوف حجه : ولو تدخل ليش كاعدة عد عمج ما تعرسين يا خوية وتخلصين 

-جنت متزوجة واتطلكت لان ما اخلف 

- وطلكاج لان ما تخلفين خو يوديج دكتورة يعالجح 

يا عني يتزوج ويعوفج 

-ما عندي رحم عندي تشوه خلقي .. عاجر مالي علاج وهو حالته تعبانة ما عنده مكان طلكني وراح اتزوج 

-لا حول ولا قوة الا بالله يا خوية كلهن لامتهن لا اب لا ام لا اخوة لا اهل لا صحة شكد فكر چا أنت 

فتحت عيني شوية باوعتله 

ابتسم : والله جا جذب حظج ما ادري من يا جيحة مناوشته 

- مينطوني حب وجع راس راسي كلش دياذيني 

-غير ناخذ الأشعة حتى يعرفون شينطوج 

رجعت راسي مثل الكمت اغفي 

دفع راسي وكال : لا تنامين خوية الضربة براسج مو زين تناميلها اتحملي على ما تطلع الاشعة 

-ديأذيني كلش 

-هسه ينطوج دوا 

حجاها وهو يكلب بتليفونه اتصل .. 

حجه استفسر عن ابنه رجع لو لا وعن المحل 

سده ، كتله : خابر عمي اذا تعرف رقمه خل يدز رسول 

-وهو لو رايد يدزه ينتظر احد يخابره شو المستشفى هاي وينها يعني اكيد من طلعتي راح تجين لاهنا ويلكوج بس الظاهر الجماعة مو ابالهم . 

-زين خابر عمتي 

-وانا وين اعرف رقم عمتج !؟ 

نصيحة والله لا ادورينهم ما طولهم ما لحكوج ما بيهم رجه ، لا تخابرين ولا تنتظرين هسه تتعالجين وارجعي 

سكتت، حجه : عدج اخوة 

-اثنين جعفر وحيدر 

جعفر صاحب كشك بالشورجة متزوج وماجر بيت وحده

واخوي الثاني حيدر منتسب بالجيش .. ما متزوج وعايش ويا اخوي 

-جا لفى الزلمة وطرداج وانت المرة شنو من تحفه هذا 

-يكول عيب من انسابتي اختي مطلكة ومذبوبة عندي 

-وعيب من انسابته مذبوبة عنده مو عيب هو ذابج على عمج وما يدري عنج وهو اخوج ، زين هذا نكول ما بيه خير ابو الجيش مو عنده راتب وراتب الجيش بالمليون ونص ما عرف ياجر انت وياه وتكعدون وما يخليج هذا حالج 

-ما يدري عني اصلا وماله علاقة بكلشي تحسه بغير عالم ولو ما مشارك جعفر بنص الايجار هم ما يرضاه جعفر وجان هم سواله سالفة واتعارك وياه وطلعة بس مستفاد ينزل ١٥ يوم وباقي الشهر بالواجب ، اني بيش افيده 

- لا حول ولا قوة الا بالله ، خوية انت المن عايشة دطكي روحج بطلقة وفضيها 

باوعتله باطراف عيوني بوجع 

ابتسم ، هزيت ايدي .. 

حجه : سهلة سهلة يحلها ربج 

شكد عمرج انت؟ 

-٢٤ سنة 

-اذا زهرة شبابج وهذا حالج جا من تعجزين شيصير بيج يمكن بدار العجزة 

-انت خوش تنطي الواحد امل بالحياة 

-يا امل رحمة للعباس امل ماتت وشبعت موت هي دنيانا بيها امل 

ضحكت وهزيت ايدي 

حجه : اتشاقى وياج ترا كاعد احجيج خاطر لا تنامين مو زين عليج

صاحو اسمي صبا عبد علي 

كتله : هذا اسمي

فز راح جاب الاشعة 

كتله : ها ؟ 

-كال اخذها للدكتور يچيكها 

سحبني بالكرسي واخذني لغرفة الطوارئ 

باوع الدكتور الفحص والاشعة 

كال الاشعة ما بيها شي رضوض بسيطة بس هي عدها فقر دم والنزف الهواي اثر عليها سببلها ثقل بالراس وحالة من اللا وعي .. تحتاج بطل دم وتصير زينة 

- يعني نروح للدم 

كتبله الورقة وكاله : روح لمصرف الدم 

اخذني وراح .. طلبوا متبرع كاله : اني دمي O+

عاد اخذوا من عنده دم .. 

ونوموني ع السديا وشكلولي بطل .. 

غفيت واني الصوندة مال الدم بيدي والمستشفى هدوء .. 

نمت 

رجعت فتحت عيني صدت بوجه حازم منتجي ع الحايط وواكف يباوع بوجهي ، حجيت : ها خلص ؟ 

- لا بعده ارتاحي 

-اني تعبتك وياي حيل 

-اي والله كلش تعبتيني 

درت اباوع بوجهه ، حجه : ما تعبتيني بركض لو هيج لا .. بس اني كلش اتعب من اسمع هيج مثل حالتج ، بنية بعمر الورد نايمة بالمستشفى محد بحالج ليش ؟ 

عدي بنية اصغر منج ب١٤ سنة .. وهم عدها اثنين اخوة 

كمت افكر اذا الله اخذ امانته هم تضل بعدي هيج ومحد بحالها ؟ 

-الله يكتبلها احسن من حظي ويحفظها الك 

-الله يستر عليج خوية

خلص يمكن خل اشوف المضمد حتى اخذج نخيط راسج اذا يضل هيج ما يطيب 

-كلفتك هواي اني 

-هسه غير تسكت وتصم حلكها 

ابتسمت وكمت رفعت العباية مني حتى اكعد وهو راح صاح واحد سحبت الجهاز مال الدم مني وكمنا طلعنا وكف برا ..

رحنا للسيارة صعدت ورا من الچكمچة طلع عطر بكد الاصبع فر على ايده ومسح على ركبته وهدومه .. العطر رجالي بس كلش قوي وعطره طيب 

ناوشنياه من ورا وابتسملي وهو يلاشيني 

اخذت العطر من ايده .. باقي بيه نص .. فر السيارة ومشى

كمت اباوعله .. احسه كلش حنون وحباب وحركاته ونظراته بيها دفو وطيبة 

خصوصا من باوعلي وكالي عندي بنية اصغر من وشال همها اذا هو ما موجود شيصير بيها .. شكد حسيت بيه انسان حنين على اهله وعائلته بالعافية عليهم . 

اخذت العطر خليته بالجيب مال ثوبي 

فر السيارة ووكف بيها كدام مطعم الحجي ونزل 

جاب لفات واجا صعد كالي : هاي لفة تكة ومعلاك اكليها خاطر شوية ترد روحج انت عندج فقر دم قوي . 

-مشكور بيش هي 

رفع عينه بأستهزاء : واذا كتلج السعر شني راح اتطلعين الجيزدان و تورقين .. اكلي ام افليس 

-يا لا والله انطيك 

-دكلي بويه اكلي هني ومري 

-لعد سجلها من ضمن الدين 

-هاي صار الج .. بعيني 

ابتسمت وكمت اكل هو هم اكل وحجه : متت من الجوع من وراج اليوم حيل جوعتينا وتعبتينا ، الله يساعده الجان ماخذج عمي اتعبين انت 

يحجي بشقة : شتعب خلص عمره وياي نايم للظهر واني اخيط واحف واشتغل وانطي الفلوس ، ويوم الاشتغل وصارت عده فلوس طلكني وجاب غيري 

جان ياكل نزل من ايده وكام يباوع عليه بالمرايا .. 

لا حول ولا قوة الا بالله .. الحمد لـ الله من فكج منه بلكت الله اطيحيلج بواحد ابن اوادم يسترج ويصونج 

- شوكت ترجعني 

-بالاول كملي اكلج خاطر اخذج نخيط راسج واردج 

-بس لا تخليهم يشوفونك 

-عليش !؟ 

-يسوون مشكلة 

-وصاحبج اني بويه ويسوون مشكلة دكملي كملي 

اكلت نص من اللفة ولفيتها واخذني لمضمد خدر المكاني وخيطلي راسي ..جوا شعري بشوية .. بكصتي من الجهة اليسرى .. كملت دار السيارة ورجع بيها لبيت عمي 

كتله : والله من يعرفون اني صاعدة ويا شخص هسه يأذوني 

-شحدهم بويه شني السالفة 

مالج غرض عوفيها عليّ ، الاريده منج هسه كون اتسوين روحج مواتة هيج كون من يشوفونج يخابرون الدفان يحضرلج كبر حسبالهم ميتة ... يلا 

-اشلون 

-مووووتي خلي انزل .. 

صفها اباب بيت عمي 

عمي كاعد بالدكان اني رجعت راسي للكشن وسويت نفسي مثل الغافية او مالومة مثل لما طلعت منهم 

وهو دك الباب ع الدكان صاح : حجيييي ، ابو يوسف كواك الله 

اطلع اطلع عمي هاي بتكم لكيتها متخربطة بالسارع وخذيتها للمستشفى 

صدك جذب كاعدين مستريحين ما تدرون عنها ما طلعتوا ما دورتوا 

طلع عمي : اااخ هاي شبيها 

-شنهي الشبيها غير طالعة والدم تارس وجه صدك تحجون اتجذوب همي مرة هاي مرررررة الها حرمة عليفينها تطلع مدماية اطوطح بالشارع لو طايحة بنص السيارات ما تنشهرون وتنفصحوووون شني نايمين صارلها شكثر غايبة من البيت ما سألتوا ما نشدتوا ولكم مصيبة 

على صوت صياحه بالباب عمتي فزت وطلعت ورسول اجا يركض وجهالنا طلعوا بالباب

فتحوا باب السيارة ينزلوني ويسألوني : ها سني شلون هيج كلش وكعتي 

رد هو : اكله اتخربطت ع الشارع وجيف اعرفها بنيتكم تراكضتلها كلت لا تطيح وتتكشف والعرض واحد يا خوية 

عمي يحجي ويحاول يلغمطها وما درينا من طلعت وما كالت لحد ورجع عليه : غير تكولين تحجين يا عمي اشلون اطلعين هيج وحدج طحتي صار عليج شي 

نزلوني دخلوني بالاستقبال نوموني وعمتي اتكلي : شصار وياج 

- اتخربطت براس الشارع واللهي نطي لهالرجال شالني بسيارته اخذني للمستشفى 

عمي ورسول ويوسف نزل بعدهم بالباب 

حازم مستلمهم اكس مربع رزايل دك بس باحترام وهم اتسودت وجوهم كداموا بس يتشكرون منه رادوا يدخل يكعد .. ما كعد كاللهم : اتاخرت على البيت لازم ارجع ممنونين 

سلم عليهم وراح .. واجا عمي واكف فوك راسي : شكالولج 

- خيطون راسي وسوولي اشعة 

رسول : غير تخابرين تحجين شني نشم ادينا 

عمتي : مو حجيت وصيحت وكتلكم البنية طلعت تطوطح روحو الحكوا ما بيكم واحد السمع وراح وراها 

يوسف : هسه شكالولج 

- رضوض بالدماغ وفقر دم انطوني بطل دم والله ينطي هذا الرجال اتبرعلي بالدم 

عمتي : الله ينطي ان شاءالله بجاه الرسول 

عمي : انوب طحنا بحلك حازم شيسد حلكه وشيسكته راح يحطنا لكمة بحلوك الوادم . 

جابتلي ميلاد فراش ونوموني وبقوا يمي بس متفشلين من حازم وخابر عمي على حعفر رزله وغلط عليه ويكله من وراكم اني افتضح كدام جيراني وشوكت الله يفكني منكم ومن هالكلام 

خابرتني اختي سهى مستطرقة 

من درت بحالي اتخبلت مخابرة على اختي الثانية منى 

واثنينهم العصر اجن هن وجهالهن .. واجا جعفر ومرته سلم عليه من ورا خشمه .. 

ووفاء هم سمعت اجت هي وامها 

عاتبتها عمتي كالتلها : جا خالة من اجيتي وفزعتلج هي على لاهيتها اتشركينها بالمصيبة ليش وهالتشوفين شصار بيها انت ما عملوا بيج العملوا بيها جا ما خفتي عليها وهي بلا والي 

كامت تبجي ووتعذر 

ووالله ما ادري هيج راح يصير 

وما عبالي عمي يضوج بس هيج ردت شاهد وياي حتى ابوي يصدك ، وكامت تحبحب بيها وتعتذر 

واني كتله : ما صار شي خير ان شاءالله 

خواتي جانن بنيتهن يباتن يمي بالهن يمي 

بس مرت رسول ذبتلها كلمة وكالت لابني اختي : وابوك شوكت يجي ياخذكم تروحون اليوم 

اختي كالتلها : اي هسه راح يجي 

عمتي كالتلها : لا يعمه وين رايحة ما طول اخيتج مريضة ضلن يمها 

عمي كال : لا خلي يروحن خل يروحن هالتشوفين ماكو مكان بس هالغريفة انام بيها وصارت باردة الواحد مو مالت يطلع بالحرس ينام هم تعال اصعد درج ونام فوك خل يردن لعيالهن احسن شعدي مضيف .

سهى خابرت على رجلها اجا خذاها 

ومنى ماخذة اخو مرت جعفر عاد جعفر خذاها وياه بالكيا ووصلاها لبيت نسابته .

عاد اني لميت فراشي من راحن خواتي ورجعت للغرفة مالتي 

ردت اكعد ع المكينة راسي حيل ماذيني من الجرح والضربة .. عاد لفيت راسي وردت انام .. صار شي جواي من ردت انام .. بجيبي طلعته العطر .. 

فتحته كمت اشم بيه 

اخذت نفس .. شكد عطر طيب وبيه حنية بيها عطر ابو .. 

ما اعرف ليش حسيت بهيج مشاعر دافية 

جريت مخدة من وراي .. مسحت العطر بيها .. وحضنتها

حسيت بشعور حلو ودافي خلاني اسكن وانام . 

ثاني يوم كعدت من ٨ الصبح .. 

النومة مو الي .. محرم كرب وكوم نسوان دازتلي هدومها تريد خياطها .. ما يقبلن عذر الانطيها يوم محدد تريد ثوبها بنفس اليوم .. 

كمت لكيت متريكين ومواعين الريوك ع السنك مذبوبة 

لزمت سويسو ودزيته على صمون بربع وجبن ب٥٠٠ .. وربع ياخذه اله. 

ركض جاب واجا حميت الحاي وكمت نظفت البيت 

محد كالي مريضة عليمن تشتغلين روحي ارتاحي .. ما سمعتها ميلاد تمر كانما اني مو كدامها ، وهدى شايلة بتها الصغيرة وتفتر بيها مالها غرض ، كملت وكعدت ع المكينة 

لشوية غاد ردت اروح اجيب مي من المغسلة 

سمعت عمي يحجي بالتليفون ومن ضمن الكلام لفت اذني اسم عدنان اسمعني عدنان 

حطيت اذني 

يكله : البنيه لهساها تذكرك وتبجي عليك وانت خوش زلمة وخير 

ادري بحالك اني جا ما ادري بس هي هم تضل مريتك 

والعشرة مو شوية 

ردها واجرلها ب١٠٠ الف اني الكالك البيت واعاوننك ب٥٠ الف خاف تكول عافوني .. وهي شو هم تشتغل وتكد على روحها ما اتعبك لا والله وتعاونك وتكبر شغلك بعد 

اي فكر وردلي جواب 

ترا انتظرك ها وانا عمك 

يلا ابني امش الله يوفقك فكر وردلي جواب 

شكد كسر خاطري وهو يتوسل طليقي حتى يرجعني 

شكد عالة وثكل اني عليهم وهيج يريد يخلص مني !؟ 

رجعت لغرفتي مكسور خاطري ودمعتي بعيني اشتغل والدمعة بعيني تغرغر احس اختنگت حيل. 

لحد الظهر سمعت عمتي جاي تصب .. 

طلعت لكيتها مسوية ثواب : المن هذا عمه 

-اليوم دورة السنة مالت المرحومة امي وذكرتها عمت عيني عليها ، يلا عمة كعدي خاطر اصبلكم 

-اي واصل ان شاءالله جا لو صايحتني اعاونج 

-لا يعمه انت هم مريضة وكفيتي البيت الصبح بعد شتصيرين 

-لا يمعودة الواحد ما يموت من شغل .. يموت من الحجي 

-لا عاب السانج شتسوين عمة حطي عينج بعين الله هو يتولى الصابرين ويطيهم اجرهم 

-والنعم بالله ، اكلج عمه ما تحطيلي بصينية لهذا الرجال ابو الانشائية البارحة شلون وكفة وكفلي حتى دم اتبرع وانطاني من دمه 

-اي جيبي اماعين خل اسويلج صينية ووديها ليه يستاهل ابو علي خوش زلمة برد كلبي من رزلاهم يا يمه حجاياته ماي بارد نزلن علي بالعباس .

ابتسمت ورحت جبتلها صينية ومواعين ومشيت لفيت حجابي ولبست عباتي لكيتها صابة تمن برياني وفوكه دجاج مگلا ومركة فاصولية وكاسة زلاطة ناعمة وخضرة وطرشي ، حطيت خاشوكة وشلته . 

صاح عمي : وين رايحة 

-ما اطول شوية وارد بس اودي الصينية عمتي دزتني 

حجيتها وطلعت 

مشيت للمحل بس العامل موجود : جا ابو المحل وين 

-الصبح هو بالدوام ما يكعد ، بس هسه على جية كولي يتحاسب ويسد المحل .. كولي 

-لا والله جايبتلا ثواب حسبالي موجود 

-عوفي هنا هسه اطيهياه منين اكله 

كاعد يحجي طب للمحل هو : ها السلام عليكم 

-وعليكم السلام عمي اجيت بوكتك هاي المرة جايبتلك ثواب 

-هلا صبا شبسرعة كمتي من فراشج حتى تسوين ثواب واطلعين المفروض هسه نايمة جرح راسج اخضر 

- المثل حالي النوم ما يلوكله ، جبتلك غدا واتشكرك على موقفك امس هواي وكفتك ما انساها الله يجازيك بكي خير بجاه الحسين ويحفظ اهل بيتك 

-الله يحفظج واجيتي بوكتج خارطة روحي من الجوع 

انطيني الطاولة الصغيرة من يمك ابني 

حطها وهو يريد يجر الكرسي حطيت الصينية كدامه حجه : اي شلون امورج اليوم 

-بنص الخير واتنهدت 

- خير هم حاجوج 

-لا ما حاجوني بس والله ما ادري 

-احجي اذا اكو شي اني اخوج بالخدمة 

-لا ريتك سالم بس سنعت عمي يخابر بطليقي يكله ردها واجرلها واني اطيك الفلوس الايجار ولا تخاف ما اتعبك هي تشتغل وتنطيك وهو يكله افكر ومن هالحجي وعمي يكله انتظر منك جواب

-لا اله الا الله ، خوية انت ليش ما تشوفيلج بيت صغير تاخذين وتهجين منهم وتخلصين 

- والبيت هين يا خوية منين اجيب واشتري 

- قابل كايلج اشتري بالمنصور لو بزيونة يا خوية اكو بيوت اسعارها رخيصة حيل خاصة التجاوزات، هسه عدج هذا ابن عمي رايد يبيعله بيت تجاوز بالشماعية غرفة ومطبخ وحمام .. بتلث ملايين تعبانات صحيح بس اخير ما الواحد يضل على عالة على احد وعيشته ضنكة 

- واني منيلي التلث ملايين  

-انت مو تشتغلين ؟ 

-اي 

-ليش ما تخليني اشوفلج اسعد صاحبنا 

-ابن بيت ابو اسعد لو غيره 

-اي تعرفينه هذا اني هم من اعتاز اسحب منه واسدد بس ما اسحب فلوس خافنها تصير ربا اخذه وياي واستري الحاجة ويحسبلياها قساط  

-الله وايدك اذا تكدر احب ايدك وراسك 

-هاه يعني احجيلج وياه 

-اي وكله صبا يعرفني اني اشتغل ويا اخته بالصالون 

-جا خوش يعني اخته تكفلج 

- اي والله رحم الله والديك تسوي عليّ فضل ما انساه 

-بسيطة هسه اكمل غداي واخابر ابني عمي واخابرلج اسعد واشوفلج السالفة واوديلج ابني علي لو استجد شي 

- جا انتظر منك خبر 

- اي بس كبل هاي كولي اهلج يرضون اطلعين ولو هم مالهم وجود بس خاف بعد يومين اسويلجياه واطيح كلها براسي ويتهموني واني صاحب عايلة 

ضليت اباوع بوجهه ، كال : نعلت ابوهم دروحي واني اشوفلجياها واخبرج عود 

-ماشي ، هني ومري 

ابتسملي : على كلبج بويه . 

عفته ورحت بس شكثر ارتاحيت باقتراحه هيج واكدر اشتريلي شي اكعد بيه هسه عسما خيمة وبيها باب وما كاعدة عد احد ولا ثكل على احد اصبر عسى ما اموت من الحوع واكل من الزبالة بس كون افتك من عمي واخوتي .

كام يچرخ بالي وافكر 

وعاد بالي شلونه من يجرخ يروح زايد 

وافكر يصير عدي بيت واشتغل واثثه على كيفي واسويلي زاوية افتح بيها صالون وخياطة بس لازم اتعلم ميش 

اني اعرف اصبغ الشعر بس ما اعرف اميش .. 

اكل لوفاء تعلمني .. 

خلصت الوكت اشتغل وافكر حتى كلام عمي نسيته 

عشت بالخيال واتخيل يصير عدي بيت وارتاح وخواتي يجن يباتن عدي ويصير عدهن بيت اهل يروحله ومحد يطردهن منه .. ويوووه شكام عقلي يسفط

لثاني يوم ما ردلي خبر .. 

خابرتني وفاء كالتلي : تكدرين تجين تعاونيني لو بعدج مريضة ما تكدرين ؟ 

- لا يا مريضة هسه جايتج 

لبست عباتي وكلت لعمي ورحتلها : ها مساء الخير 

- هلا جيتي يمعودة بس كضي هاي المرة خطية صالها ساعة منتظرة 

- اي بعيني 

كعدت احف وسألتها : مشى وضعج ويا الحجي 

- اي يمعودة حطيتله حمرة بجيبة كتله مصرفك بوية نسى السالفة كلها ومشت الامور . 

- اي هاهية شتسوين بعد 

حجيتلها على سالفة البيت بس ما كتلها حازم وهيج مشى وياي بس كتلها واحد يريد يبيع بيته وفكرت احجي ويا اسعد بلكت يكدر يروح وياي ويشتري 

- كالت علوا وتفتكين من الكال والكلت احسنلج هسه اني احجيلج وياه .. واكله بلكت الله شكثر محتاجة 

- ب٣ ملايين ادبر خمسمية يعني احتاج بس ٢ ونص 

- اي يقسطهن الج ع المية ٣٠ الف وعلى كيفج سددي بالشهر ١٥٠ اكلة تكدرين مو 

- بحيل الله اكدر يمعودة بس خل اخلص 

- وعمج يرضى تكعدين وحدج خاف تتفقين وتشترين وليغاد ويخربها 

- لا طبعا بالاول غير اكله ويروح هو الشراي خو ما اني اروح ويا الزلم بس كلت بالاول اضمنها تصير حتى احجيله واحطه بالوجه يروح وياي .. وما اضم يعارض هو بس يريدله طريقة يفتك بيها مني لو بيده يشمرني بالشارع مو ابيت بس يخلص تكول كاعدة فوك راسه مو بالبيت . 

- وتفتكين يوو ينرادلج بخت ولج 

- ادعيلي 

- ان شاءالله بجاه الزهرة . 

خلصت ثلث نسوان حفافة واخذت منها سبعة ونص وطلعت .. لكيت اسعد بالباب صاحلي : صبا 

- هلا 

- اشلونج شلون وضعج 

- تحت رحمته 

- سمعنا بيج مريضة وواكعة ومفشوخة 

- بعد شر التايهات 

- الله يجفيچ شرهن 

- اكلج عيني خابرني حازم تعرفينة 

- اي ابو الانشائية وكالي على اقساط هيج شي رايدة 

- اي والله 

- بس المبلغ مو شوية 

- اي والله كلت اشتريلي بيت بالشماعية وكالوا ب٣ ملايين عدي خمسمية احتاج بس ٢ ونص 

- هاه اتكعدين وحدج 

- اخير من كعدتي وبس المدامغ فوكي .. شعليه اسد بابي واكعد 

 ضل يحك بلحيته ويباوعلي : اي تامريني امر هاليومين استلم راتب ان شاءالله واروح وياج لو اعرف اداينلجياهن ، تدللين انت 

- ريتك سالم الله ينطيك ، يعني اكيد خاطر اگل لعمي 

- لا فوتي بزودج ادبرهن ادبرهن بحيل الله هاليومين يمج 

- اي فدوة رحتلك الله يحفظك ان شاءالله ويزيد خيرك . 

يا يمة طلعت من بيتهم جني ريشة مو بشر بودي اطير اغني اركص .. يا يمة هيج الله ويكتبلي بيت .. ينراد الها بخت . 

ثاني يوم جنت محتاجة اروح للسوك مريت باوبو الأنشائية العصر جان كاعد يشرب جاي ، طبيت سلمت كال : يا هلا ومرحبا . 

- اني يمكن ثگلت عليك 

- شثكلتي بوية لا تكوليها ولا تكلفين رويحتج بهالشعور ، لا كلفة ولا شي اخيتي الصغير وابطن عيني 

- الله يحفظك ، شفت اسعد امس وكالي هاليومين يكدر يدبر الفلوس .. يعني ابن عمك يبيع مو 

- غير تروحين تشوفين البيت يعجبج ما يعجبج اتكعدين تتفقين 

- اي مو اجيت اكلك حتى اذا متأكد من البيعة خاطر اكل لعمي يتفق وياه 

- لا خابرته يبيع ان شاءالله احجي ويا عمج وخلي يخابرني واني اكعدهم على طاولة اتفاق وارتبلج السالفة كلها بعيني. 

- تسلم عينك الله يزيدك بجاه الزهرة  ، اودعناك 

- هلا بيج يابة. 

عفته ورحت للسوك مثل الريشة ورجعت 

اول ما فتحت الموضوع ويا عمتي حيل فرحتلي وكالتلي .. 

مالج غرض خليها عليه اني احجيلج ويا عمج ويروح ويتفق ويشتريلج بلكي يا عمة ترتاحين وتفتكين من هالملة ذول .. والله مكسور كلبي عليج بس ما بيدي عليج شي . 

- اي والله عمة فدوة اعتمد عليج 

- من عيوني اني اقنعلجياه واخليج تاخذينه وتمشي ولا تحجين بالسالفة لاحد لحد ما تشترين وتكضين خاطر لحد يخرب عليج خوش 

- ان شاءالله عمه . 

ثاني يوم من الفجر كعدت من الفرحةعمي فاتحني بالموضوع 

كتله اي والله عمي .. عليمن بعد اشتغل وشغلي رايح خو اشتريلي بيت واسد بابي واكعد احسنلي 

كال : ما بيها شي اذا تسدين بابج وتروحين بطريقج وتجين بطريقج ياهو الاله غرض بيج بس كون عينج على روحج اتصونينها وما تفشلينا 

- لا عمي شتعرفني انت 

- اعرفج حبابة وخوش بنية وان شاءالله فد شوية اخابر على حازم واشوفلج الموضوع 

حجت عمتي : بس لا تحجي بيه حجي الوادم من تحط عيونها تخرب كلشي حتى لا تكول راح تشتري وتكعد تنتقل بيه بدون ما احد يدري كانما راحت لاخوها كعدت .. لا تفتح على البنية عين 

- اي هو هذا الصحيح ما نريد حجي الوادم، الينشد عنج نكله عد اخوها والينشد اخيج يكله عدي ونضيع السالفة خاطر لا توازيج الوادم بحجيها . 

صدك خابر الضحى واتفق ويا حازم العصر يروحله .. 

واني على نار من التفكير خلصتيلي ٣ كلبيات واني ما حاسة بروحي . 

وذبيت حيلي ع الشغل هم اكضي هدوم النسوان كبل محرم .. 

وهم اكسبلي جم فلس حتى اشتريلي كم حاجة . 

رد عمي المغرب .. وكال اتفقنا ويا الولد وحجينا

وخابرنا اسعد كال عكب باجر الفلوس جاهزة بس ايرد مقدمة ربع مليون .. 

كتله خوش عود ادبرها من خواتي شوف شلون .. 

لعكب باجر انطيت ٢٥٠ الف لعمي ورحنا اني وياه شفنا البيت .. سجن قديم .. وغرفة جبيرة حيل كاصيها نصين نص مسوينها مطبخ وحمام .. ونص غرفة تطلع مساحتها ٦ مترات ب٥ عرض .. بس تعبان حيل والكاع صبابة محفرة والحيطان ماخذة رطوبة .. والحوش الكدام الغرفة عبارة عن حديقة بس الحيش واصل بيها اطول مني .. وحاطين شتايكر وحدة بصف اللخ سرا لحد الباب الخارجي 

الحيطان البيني وبين الحيران مو طابو .. جينكو مصفطات ومرصوصات .. وسيم واسلاك .. المطبخ اظلم تكول كبر .. يمه بصفه مفتوح منه باب الحمام بين شباك صغير فوك وما بيه غير بوري .. نفسه البوري جارين منه بوري للمطبخ وولسنك وحافرين مسوين مجاوي على تسليطة الحمام بس مكان الصبة مبينة صاير علوة ونصة ... ووصخ حيل يحتاجله كومة شغل . 

بس هالخايس ويلعب النفس وجنة كبر بس هالكد فرحت بيه طرت من الفرح من اتفقنا واشترينا واسعد وعمي وحازم وابن عمه شهدوا البيعة .. لان بيت حواسم ما بيه لا طابو ولا ورقة كلشي ماكو .

ما بيه مفاتيح الباب سركي من جوا .. 

حجه ابن عم حازم بيها الخير ان شاءالله وباركلي .. 

وسلم على عمي هو واحازم وراحوا واسعد راح قبلهم بقى بس عمي يفتر بالبيت وهذا يحتاجله هيج وهذا ينرادله هيج 

وصيري سباعية 

وصوني نفسج واشتغلي وعيني نفسج 

ولا تخلين الوادم تشمت بيج وباخوتح وبينا 

ومن هالكلام .. 

واني اي وصار وبالي مو يمه 

بالي كله شلون ارتب هاي وانظف ذيج واعدل هاي 

رجعت ويا عمي للبيت .. 

وكت العشا .. كالت عمتي : ها بشروا ؟ 

كاللها ؛ فضت واشترينا البيت الحمدلله زين اذا هي شاطرة تنظفه وتعدله يصير يخبل . 

- الحمدلله على كيفها ما عدها شي ، بس خوما تخافين لو ضليتي وحدج

- لا يا خوف عمة بس خل اكعد وارتاح انعل ابو الدنيا .. 

عمي : بس يحتاجلها زلم يروحون وياها يجرولها واير مالت سحب يسوون الكهرباء يعدلولها كم حاجة بالبيت .. غراض حاجيات . 

-سهلة ان شاءالله نشوف منو من الولد يروح وياها ويكضيهن الها 

طبت هدى شايلة صينية العشا : خير وين يروحون وياها 

عمتي : هيج سالفة 

-وشني هي السالفة 

-هسه نكلج سالفة عود من تصير نكلج بيها 

-هاه لازم رايدة تزوجيها لواحد من ولدج

-انت بطرانة وفكرج بس بهالسالفة

-اي جا شني السالفة الما ندري بيها 

عمي : يا عمي شكثر تلحين صبا اخذتلها بيت صغير بالتجاوز وراح تكعد بيها 

-هله والله عمي صايرة تشتري بيوت و ا مو تبجين بوجه الله وما عدج 

عمتي : خذته اقساط على اسعد المسكينة منين مقدمة اداينتها وجابتها 

-ها وتريد تكعد وحدها 

عمتي : شعليها هي سباعية وتعرف ادبر امرها 

طب رسول كعد كدام الصينية حجه عمي : جا اول ما طبيت تجيت ضل بدكان بس خل اتعشى 

-سويسو واكف بويه جوعان 

عمتي : رسول باجر عندك مجال 

-كولي يمة 

-صبا معتازة احد يروح يسويلها الكهربائيات غاد .. 

-كهربائياتيش 

سولفتله ، حجى : اي ان شاءالله باجر اودي هدى لاهلها ومناك اطلع اكضيلها التريده 

- وماكو غيرك يرووح 

عمتي : هسه سهلة دكعدي رسول يوسف اي واحد اليكدر بس كفوا العشا 

كعد رسول يستفسر وعمي يحجيله ويكله لا تگل لاحد ما نريد السالفة تطلع على ابو ها بتهم كاعدة ابيت وحدها ناسنا حجيها ما يرحم 

خلصوا العشا وشلت الصينية وغسلت المواعين وسويت جاي وهدى مركزة بالسالفة اكثر مني .. 

كالتله : وشلون تكعد لوحدها 

عمي : شعليها تسد بابها وتكعد ما عليها شي جم بيت انهجم من السقوط لهسه وضل بس بطرك النسوان قابل شلون ما يعيشن 

- هسه لو نفرض هي خوش بنية وما تخلي الطاب والطالع وتسد باب بيتها بس شلون تامن ما واحد يسطي عليها شوف شيسويلها وهي وحدها شتكدر تسوي !؟ 

حجيت : هدى ما افتهم سالفتج شني .. صارلج شهر تصيحين لو اني لو صبا بالبيت وما تريدين وهسه من اريد اطلع جاي تشوشين عليّ عليمن حاطة روحج بسالفتي مو ما تحبيني وتتمنين تخلصين مني ؟ 

- اي وتكعدين بلا رجل الج امان انت مرة هاكداتح اتكعدين وحدج 

سويتها بضحكة وضحكت ويا رسول : ما طولج هيج خايفة عليه اطيني رجلج وخلي نعرس هم ابن عمي شيال همي وهم ترتاحين ما تشيلين همي بعد 

اني كلتها هيج وهي وكفت على حيلها : ساقطة ام الزلم حاطة عيييينح على رجلي بوبووووووو* 

- احترمي نفسج واعرفي احجي ولا تغلطين اني رايدة اطلع وافتك بعد كاعدة وتحرضين وتسوين فتنة ليش 

- تريدين رجليييي حاطة عينج علييييه مفلفلة 

كام رسول يصيح وعمي يصيحون 

وكتلها ؛ الله من فوك يعلم هو اخوي بس انت وحدة ما تستحين ولا تخجلين 

صارت هوسة وعركة شكبرها 

لبست عباتي وطلعت من البيت رحت لبيت وفاء 

كعدت احجيلها واشكيلها لحد ما هديت 

رجعت .. جان عمي يكلي : اسمعي عمي ما طول اخذتيلج بيت وراح تستقرين خابرت على عدنان وكتله وكال اذا عدها بيت اني مستعد ارجعها .. ارجعي لعدنان بوية وكفي المشاكل وخلي يستر عليييج 

حجاها واني طكيت كتله : صار سنة شكثر بجيت واترجيته وما رادني هسه يكلك ما دام اشترت ارجعها والله لو يصير بس هو وبس يا عدنان ما اريدله بعدددد لو تغصبوني لو اتذبحوووني . 

كام عمي على حيله وهو يكلي : ماطول هيج ولج اكسر رجلج والله لو تعديتي عتبة الباب لوكعدتي بذاك البيت .. لو ترجعين العدنان لو احز ركبتج واذبج  للجلاب وافتك منج 

والله يا صبا فلا اخليج ترتاحين ولا تكعدين بذاك البييييت واعلمج شلون تخالفين كلامي طايحة الحظظظظظظ .... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا